See in Reader
140 lines
14 KiB
Plaintext
140 lines
14 KiB
Plaintext
\id JAS
|
||
\ide UTF-8
|
||
\h Yakobo
|
||
\toc1 Yakobo
|
||
\toc2 Yakobo
|
||
\toc3 jas
|
||
\mt Yakobo
|
||
\c 1
|
||
\cl Ebwayit 1
|
||
\p
|
||
\v 1 Yakobo, Ohoigyemani l’Ojok karik l”Ohobu Yesu Kristo, d’amukoko tomon larehai dith’athurohunu. Emanda!
|
||
\v 2 Iduhuna ara amuno fodok, olarok hundang, ara iwon ithai hethathacianitha olwarai hekela.
|
||
\v 3 Itek ithai hijan iyanu ethemyo n’eruhon nathai amanya.
|
||
\v 4 Amanya ditha h’eruhon, thoingohi egyema nanyong, diyyu ithai bukulung ara ithai ithuba, ara hang aning neyangyo.
|
||
\v 5 Ti, ara owak lobo thothai olofioro, thoifiye inyong th’Ojok, lesarak ija kwong eringyo d’ohothing fodok hoifiyo, isarak de dang inyong donyong.
|
||
\v 6 Ti, inyong thoifiye ditha h’eruhon, kwong eririhitha. Aca, d’othulo leririhitha ojahitha ahari hepongaitho th’ahomwa dith’ahari nahitto karik asullaru arabo arakang.
|
||
\v 7 Othulo lya thaang hoigigiloi hijan ifothu inyong de aning nabo th’Ohobu.
|
||
\v 8 inyong lo othulo leririhitha, aang owetha ara loko d’oyihothik honyong fodok,
|
||
\v 9 Olai lowon dihap, thoitharai th’amaji thananyong thanawon dihide.
|
||
\v 10 ti, othulo lobara l’amaji nanyong nothohop, anyo, olo de adi iriing athuyathi nothoth’omiyang.
|
||
\v 11 Aca, ittoru oholong ara lonok, karik ethayohojyo amiyang. Odou athuyathi dihap, ara alibori nanyong alitho. Th’oyihoi tholya aboithe olitho de ohosomani dihiji h’oyihoi ladaha nanyong.
|
||
\v 12 Othulo lolang ethemitha, thomunoi. Aca, ara athuk inyong alangan ethemitha, ifothu de olohuluk n’esu, nathuhi esarahina arakang ara n’ohothing hamuno Ojok.
|
||
\v 13 Lobo thang ijara ara inyong lethabuyangie, “Ojok lothemyo nang.” Anyo, aang Ojok othemyo th’amonyori, aang dang ngonyena Ojok othemyo othulo lobo.
|
||
\v 14 Ti, othemye othulo, th’awahan thanyong, nethangaru inyong karik ewuwularu inyong arakang.
|
||
\v 15 Ajara thiya, diholu hawonan n’egigilo ne dihu honyong, ayisu eyau, ajarara eyau ne abolo, ayisu aye.
|
||
\v 16 Hoiruhotho ethadwala, olarok hundang homunoi.
|
||
\v 17 Esorio nanyyu karik nathenunu, esorio ne naindu th’hide. Oindu inyong na dihap th’Omonye l’afangan. Honyong, aang eloyicio dia obibile l’eloyitho.
|
||
\v 18 Anyimu Ojok ayisuna ohothai th’ocame tholo eladiri. Diwon ohothai ara ohayocong ohoithemoni l’asang food hayeu inyong.
|
||
\v 19 Itek ithai arami hune, olarok hundang homunoi. Othulo, thoithairye, thocamai karik engere tiibai.
|
||
\v 20 Aang engere n’othulo ohorik inyong abisan n’Ojok.
|
||
\v 21 Inying na, iduhu adi eruji karik abolori n. amonori n’eyau. Ditha elamuha, ifothuna ocame ledula ditha hothai, locohi ethalwahuna ohoilehio hothai.
|
||
\v 22 Iwonatha ara ohihandak h’ocame, ikara ohoithayirak, ethadwalyo ahwandek hathai.
|
||
\v 23 Aca, ara ithayiryo ocame, aang ihandyo aning nabo, ojahitha othulo lengengelyo ahomong dith’engengelit.
|
||
\v 24 Ingengelyo ahwan nanyong, alo adi, okworok kwak angai dwo oya inyong.
|
||
\v 25 Ti, othulo lomijyo tuhudik d’oyalu l’athenuna n’oyaitha, amattak diya, ikara ara ohoithayirani lokworo, omuno de othulo lya ditha egyemathik hanyong.
|
||
\v 26 Ara igigilo othulo lobo hijan inyong lo l’eruhon, aanghogotterek ongadiep lonyong, inyong lo dithadwalyo othaji lonyong, esarak eruhon nanyong awonan ara amonyoroni.
|
||
\v 27 Eruhon aliboroni, naang ithorohoja dihithemi h’Ojok karik Omonye lohothai, inyong alwahio d’ohohino karik aharathak ditha ethathacianitha hasong karik dinfaitho ahwan ara naang ahap ithabocyo.
|
||
\c 2
|
||
\cl Ebwayit 2
|
||
\p
|
||
\v 1 Olarok hundang, hoimattahina d’eruhom d’Ohobu lohothai Yesu Kristo, Ohobu l’abolori, ahibu ithai iwon herehon d’ohothing homok.
|
||
\v 2 Ara ijinga othulo lobo loiyofo ayeli karik abongoitho aliborok d’oputet lothai, ara dang ohoicanani lebot abongoitho ajinga diya.
|
||
\v 3 Ara imijyo iye d’othulo lolibo abongotho, ara iye ijyo, “Owoni dini d’amaji nayuu,” ti, ara ijyo d’ohoicanani lo, “Owethai d’amaji nya,” Dia “Owoni diker h’okara lafethahinerek nang ahejeha lo,”
|
||
\v 4 Ikara ithai diri hodikanyo ahwandek hathai? Kabong ithai diri iwon ara ohokanyak th’egigilitha thoh’omonyoroni?
|
||
\v 5 Ithaningyethek, olarok hundang, kabong diri Ojok honyimu ohoicanak h’ahap thobarai dith’eruhon karik thoiwona ara ohoruthak h’ohobye lonya isarahini arakang d’ohothing hamuno inyong?
|
||
\v 6 Ti, kabong ithai ithalongojyo othaja h’ohoicanak? Aangara ohobarak horeyo ithai ahosi hulya? Ikara isong hoififihoitho ithai di lokiko hulya?
|
||
\v 7 Aang isong hulo omoryo ofure Loyyu lathuhorik ithai elongotik
|
||
\v 8 Ara ti, egotterek ithai oyalu l’ohobye, iring nawonderek inyong ditha h’Amanini Nadwa, “Omunoi othulo loindek dohoi, iring nemunorik iye ahwan nahoi,” ehandyo iye ara nayyu.
|
||
\v 9 Ti, ara iyyu ihai d’ohthing homok, ara ithai imonyong d’ohothing homok, eyau ithai. Ara oyalu elongo ithai ara ohitharohojak h’oyalu.
|
||
\v 10 Aca, ara ithairyo ithai oyalu bukulung, ara ithai iryafu th’oyihoi Aboithe, iwon ithai ara ohoitharohojak h’oyalu fodok.
|
||
\v 11 Aca, othulo lajyo, “Hoiyau h’afure n’othulo lobo.” karik ajyo, “Hoittoho,” Ara aang ithai iyau h’angorwo h’ohothing homok, ahibu ithai ittohoi, iwon ithai ara ohoitharohojak h’oyalu bukulung.
|
||
\v 12 Ocamathik ara ithai ihandyo iring ohothing hofuni ikanyo th’awahan thanasong.
|
||
\v 13 Aca, oindu akanya kwong amehina n’ohothing hang ithaithak amehina. Otelu amehina akanyo.
|
||
\p
|
||
\v 14 Ainyong ayiji erimak, olarok hundang, ara ojyo othulo lobo owon inyong h’eruhon, ti, aang owon hegyemathik? Ocohi d’eruhon dithalwahuna inyong?
|
||
\v 15 Ara ithathalik olai dia ahani eyoyofo, aang anyari n’ofaning.
|
||
\v 16 Ara ojyo lobo thothai dosong, “Ifwatha ditha elik n’ahap, ithanohyethek ahwandel ara ithai ifong.” Ara aang ithai isarak isong asang hawak ahwan, ainyong ayiji ne?
|
||
\v 17 Th’oyihoi Aboithe, eruhon hamaring, kwong egyemathik, aye.
|
||
\v 18 Ocohi do lobo othulo ajaran, “Iwon ithai heruhon karik ithai iwon hegyemathik,” Ithaithahina nang eruhon kwong egyemathik, nang de ethaithak ithai eruhon hindang thegyemathik thohundang.
|
||
\v 19 Iruk ithai hijan owon Ojok Aboithe; Ethenu ithai. Ti, juk ohoilehio omonyorok, iruhi ahani ahibi isong ihihira.
|
||
\v 20 Iwak iye atehan, othulo lonanga, hijan eruhon kwong egyemathik aang ohwadu aning naboling?
|
||
\v 21 Aang Abraham owon ara omonye lohothai th’adohohina thananyong olonyi Isako dimunu dihumarik?
|
||
\v 22 Engengelu ithai, egyema eruhon th’egyemathik thahanyong. Karik th’egyemathik thahanyong athuba eruhon nanyong.
|
||
\v 23 Athenunu asuduhe n’amaninihio hadwa najyo, “Eruhu Abraham Ojok, eherahini donyong ara abisan.”karik elongoi inyong omotte l’Ojok.
|
||
\v 24 Itek ithai hijan ojyori othulo othulo thegyemathik, ikara theruhon ti.
|
||
\v 25 Th’oyihoi tholya Aboithe dang, otehi nya Rahab ara amwak thegyemathik thahefothunerek inyong ohoifahak, aconyok isong adi ht’oyihoi tholobo?
|
||
\v 26 Aca, iring ahwan ara napeharu th’ohoile aye, inyong dang nara eruhon ara napeharu th’egyemathik, aye.
|
||
\c 3
|
||
\cl Ebwayit 3
|
||
\p
|
||
\v 1 Aang holwa hothai irahi ifuna ara ohotyenak, olarok hundang, aca, itek ithai hijan ohoi hoityenio huly ofuni de ikanyo thanako.
|
||
\v 2 Aca, eboso ohoi fodok ditha oyihothik olwarai. Ara aang othulo iboso ditha ocamitha, inyong lo othulo lobis. Ocohi donyong dipahuna ahwan nanyong fodok.
|
||
\v 3 Thenene ne, ara esarak ebilathi hattik dihuthuhye h’akusani diringyerek isong diruhi arami hahothai, ocohi dang ohothai endafaitho ahwandek hasong ara Aboithe.
|
||
\v 4 Idoro dang arokoni, juk halathi angai, ara ahomwa nako newak isong, okuraru isong oyiret lotti bebe d’amaji nawak ohosulani.
|
||
\v 5 Th’oyihoi tholya, ongadiep oyirik lotti l’ahwan, ti, ithaithak asang hahittwak. Idoro dang owulyewulye h’ahimang hottik, edweye oduyaru lohittok.
|
||
\v 6 Ongadiep dang ahimang, ahap n’amonyori nedwehini dithatha h’okeri h’ahwan nahothai. Itharohojyo ongadiep ahwan fodok. Idwehi ongadiep oyihoi lesu karik inyong dang th’ahwan ahimang nawulo th’ahimang.
|
||
\v 7 Aca, opecen l’ecang n’afara, ahweny, ecang naryetha, ecang nathath’ahari nahittok, iwuwulunu karik athuk othulo ewuwuluna.
|
||
\v 8 Ti, aang othulo locohi ewuwuluna ongadiep ara loyyu. Inyong lo amonyori naang oyiri, ifut h’ohiyani lethayeyo.
|
||
\v 9 Ara ohothai hemamajyo Ohobu karik Omonye, karik thonyong dang ohothai ifyethak ohothing, honya athuhi ayeuna d; arijori n’Ojok.
|
||
\v 10 Th’ahuthuk Aboithe ne ofuni aboroya karik afyethahina. Olarok hundang, asang hune thaang hofuhi.
|
||
\v 11 Obuhyo ologugudut ahari thohuthuk honyong, hayil re, dia hadwa?
|
||
\v 12 Ohiyani lohittok l’ahayo, olarok hundang, idadoyo re ahayo h’olif? Dia ithadoyo olemon lohittok lo, abiyongo? Aang dang ahari hedwadwalanga iloitho ara hayil.
|
||
\p
|
||
\v 13 Ngai thoth’ohothai lelofioro atek tuhudik? Lya thoithaithak esu nayyu th’egyemathik thahanyong ditha elamuha n’slofioro.
|
||
\v 14 Ti, ara iwon ithai h’ahayini nadwa therekeleng karik awaha nabolori dithaji, hoithadarathik, ithai idwala d’eladiri.
|
||
\v 15 Ikara elofioro ne naindu dihap thohide. Kombwo, inyong na nothohop, ikara n’ohoile, n’amonyori.
|
||
\v 16 Aca, amaji nawonderek ohayine karik awahan n’abolori, dia owon engolohocia karik egyemathik amonyorok.
|
||
\v 17 Ti, d’elofioro n’othohide, ainyong ahithemi, alibori thila thila, amuno n’elik n’ahap, ayiji, esuka dee, awonan h’amehina karik ahayo hayyu, aangan n’ekekelyo ohothing karik eladiri noth’ohaji.
|
||
\v 18 Ahayocong n’abisan idula ditha h’ohothing hoduho elik n’ahap.
|
||
\c 4
|
||
\cl Ebwayit 4
|
||
\p
|
||
\v 1 Thongai ofuni ethethena karik elafere dihiji hothai? Ofuni th’awahan nathai eribo dihiji h’asuduhe nathai?
|
||
\v 2 Iwak ithai kodien, ithai ikoti aang hoiwon h’aning nabo. Ittohyo ithai, ithai ikoti iwak kodien, ara ithai aang icohi arimahina. Iribo ithai, ara ithai ithethena. Aang aning nabo thothai, anyo, aang ithai ifiyo.
|
||
\v 3 Ifiyo ithai, ithai aang hoifothu, anyo, ithathalik ithai efiyo; iwak ithai ifunerek igyemarik asang hewak ithai.
|
||
\v 4 Ithai heyau h’obusuha h’ahathing hamok! Aang ithai itek hijan elamorot h’ahap, inyong elamerok h’Ojok? Inyong nara, lowak elamorot h’ahap, owak eduhuna ahwan ara omerohothononi l’Ojok.
|
||
\v 5 Dia thanathai igigilo igigilo ithai hijan ojyo amanini Nadwa ija, “Ohoile lathuk inyong esarahina thomahyai ditha hohothai, ohain bebe?”
|
||
\v 6 Ti, isarak Ojok alwahio nabolo, aca, ojyo amanini Nadwa, “Ida Ojok ohoithadarak, esarak alwahio d’oilamuhajak.
|
||
\p
|
||
\v 7 Inyong na, iruhohina d’Ojok. Idaratha Sitan, ongero de thotaoi.
|
||
\v 8 Ifuna indehai d’Ojok. Oindu de indehai dothai. Ilalayethek ahas, ithai ohoiyak, ithai ithaliboryo othaja, ithai ohothing hoigigilo operok arehai.
|
||
\v 9 Otharihathik, oyoothik karik ikorotho! Ahenda nathai thoiloithoi ara Athariha karik amuno nathai ara ayoo.
|
||
\v 10 Ithabuyangyethek ahwandek dihithemi h’Ohobu. Ithahuyo de itha.
|
||
\p
|
||
\v 11 Hoicamathik arami hamonyori tholobo tholothai, olarok. Locama arami hamonyong tholai d’oyalu dia okanyo olai imonyoroi karik akanyo oyalu. Ara ikanyo iye oyalu, ikara iye ohoihandani l’oyalu, iye ohokanyani.
|
||
\v 12 Aboithe ti, inyong ohoisarani l’oyalu karik ohokanyani. Inyong aboithe locohi ethalwahuna karik ethorohojo. Iye ngai, iye lekanyo othulo loindek dohoi lya?
|
||
\p
|
||
\v 13 Ithaningyethek thenene ne, ihai hoijyo, “Ahanana dia moithe ifwo ohoi de di bore, ohoi isuka dia oyinga, ara ohoi ithanyangyo, ohoi irimak ebarithi.
|
||
\v 14 Ngai otek ainyong de ofuk moithe karik ainyong de esu nathai? Aca, ijahitha ithai iring eriri nara naleyo arii tiibai ahani alitho.
|
||
\v 15 Kombwo, ira ithai ijyaran, “Ara owak Ohobu, esuka de ehandyo aning na dia nya.
|
||
\v 16 Ti, ahani ne, ithai hodi ithadara, hibu ithai induhyo asuhena dithaleyo ainyong iwak ithai egyema. Ethadara ne fodok amonyori.
|
||
\v 17 Inyong na, aca, othulo loyinik ehandyo aning nayyu, aang hoihandyo, owon donyong ara eyau.
|
||
\c 5
|
||
\cl Ebwayit 5
|
||
\p
|
||
\v 1 Ifuna thenene ne, ithai ohobarak, anyo, ikoroth ara ithai iwuluho, th’amyehunu thanaindu dothai.
|
||
\v 2 Athuk ebarithi hathai amuyahi, athuk abongoitho hathai iriribiha.
|
||
\v 3 Athuhi ayel karik ebindang neyelehe na ebothan, alodokiya de nasong ithaculok ithai.
|
||
\v 4 Idorotho, adumetha h’ohoigyemak horomo amandak hathai hedimaitho ithai, hadikoron thoithai. Onyo de ithai iring ahimang. Ethuk ithai akanahina abara nathai n’operok hothocuhit. Oikoitha h’ohoingongothok ewasi diyoha h’Ohobu l’elulung n’ohoremok.
|
||
\v 5 Ethuk ithai esuka aliboroni nothohop, ara ithai ileng ethamunoyo ahwandek hathai. Ethuk ithai ethafiryo othaja hothai d’ofaning longocerek.
|
||
\v 6 Ethuk ithai edra fodok adi karik ara ithai ittohok othulo lobis. Aang inyong lo ida ithai.
|
||
\p
|
||
\v 7 Ongongohina, do ti, olarok, lwai d’ainduna n’Ohobu. Idorotho, angai ithilayo ohoromoni ahayocong nanyong nalibo thohop karik angai ongongyo inyong thonyong, lwai inyong efothuna ohusik ohoithemok karik oiholuha.
|
||
\v 8 Ithai dang, thongongok. Ithakolyethek othaja, anyo, aindek ainduna n’Ohobu.
|
||
\v 9 Hoiwiwinyathi, olarok, dith’ahwandek hathai tek ithai amani fodok adi. Idorotho, ohokanyani lowetha dihuthuk h’oyihet.
|
||
\v 10 Iduhuna aryemara, olarok, th’ethathaciana karik angongio n’ohocorok, ohothing hacama ditha h’ofure l’Ohobu.
|
||
\v 11 Idorotho, iduhu ohoi ohothing hangongu ara ohomunok. Ethuk ithai ethaninguna angongio no Job, karik itek ithai ainyong awahan n’Ohobu, angai owon inyong ara lomiehunu karik lomiehi.
|
||
\p
|
||
\v 12 Tholohide h’asang fodok, olarok, hoipithathik th’ahide, th’ahap dia th’eruhohina asing nabo ahithemi ahithemi. Kombwo, “Aa” nahoi, thoiwona ara “Aa.” ara “A a” nahoi, thoiwona ara “A a.” daang ithai ipwaharu ditha h’akanyo.
|
||
\p
|
||
\v 13 Owon loboling dihiji hothai lethathaciana adihari n’amanya? Inyong thomjyoi. Omuno lob? Thoidoloi oyendok h’amuno.
|
||
\v 14 Owon othulo lodiha dihiji hotha? Thoilongoi ohobolok h’Ekklesia, thofunu omojyoi thonyong. Thoboroye inyong th’elethang th’ofure thol’Ohobu.
|
||
\v 15 Ithaijyo de amojo n’eruhon othulo lodiha lya, Ohobu ethadocyo inyong; ara eyau, omehi de inyong Ojok.
|
||
\v 16 Onyahina ahwandek hathai eyatha hathai, ara ithai imojo th’ahwandek thahathai diyyu ithai. Amojo n’othulo lobis, oko bebe digyemarik honyong.
|
||
\v 17 Elija nya othulo iring ohothai. Amojo nya th’akolon hijan ohuju thaang osai; kabong diri ohuju osa d’ahap nya oyingathik aunihoi hoyefathik inde.
|
||
\v 18 Thiya, Elija ikoti amojo. Ahide esarak ohuju. Ara ahap edoyo ahayocong nanyong.
|
||
\p
|
||
\v 19 Olarok hundang, ara ongero lobo thothai adi th’arami hadiri, loboling inyahunu inyong,
|
||
\v 20 othulo lya thoteha hijan othulo loipahu ohoiyauni th’oyihoi lonyong lepal, olwahu inyong thoye karik epahu inyong th’eyatha halwa.
|