See in Reader
70 lines
7.3 KiB
Plaintext
70 lines
7.3 KiB
Plaintext
\id 2TH
|
||
\ide UTF-8
|
||
\h 2 Tess
|
||
\toc1 2 Tess
|
||
\toc2 2 Tess
|
||
\toc3 2th
|
||
\mt 2 Tess
|
||
\c 1
|
||
\cl Ebwait 1
|
||
\p
|
||
\v 1 Tho nang Paulo, Silas karik Timoteo – d’ohothing h’Ekklesia di Tessalonia, howoni ara h’Ojok, Omonye l’ohothai karik Ohobu Yesu Kristo.
|
||
\p
|
||
\v 2 Ojok, Omonye l’ohothai karik Ohobu Yesu Kristo thoisarak ithai alwahio, ayiji karik elik n’ahwandek.
|
||
\p
|
||
\v 3 Olarok, ahanerok, ohoi thofurak Ojok ahinwarang juui thoithai. Obis d’ihandyo ahani, anyo, eruhon nathai nabobolorunu karik amuno nathai abok abok d’ohothing karik th’ahathing thahamok abolo lunga diri.
|
||
\v 4 Inyong nara ohoi th’ahwadek hoithadara thoithai ditha ekklesiahio h’Ojok. Ithadara ohoi thoyihoi tholoingongohinerek ithai ara ithai iruk dihide ethatthaciana nethathacanierek ithai.
|
||
\v 5 Onyahini arami hune fodok hijan obis akanyo n’Ojok disiru ithai d’ohobye lonyong lethathacanarik ithai lya.
|
||
\v 6 Ihandyo de Ojok aning nayyu; iyanu de ethatthacana d’ohothing h’ahathing hethathacanio ithai,
|
||
\v 7 karik iyanu de ethatthacana d’ohothing hoiyahak ithai ethathacana, karik isarak ithai de ohothing hoithathacana alwahio karik d’ohoi dang. Oindu de ihandyo asang hune, ara Ohobu Yesu laleyo dihide ho anjelohio honyong hoko
|
||
\v 8 karik ahimang nawulo, osaryerek ohothing hoida Ojok karik ohothing haang ithairyo eruhi arami h’evanjelio no Ohobu lohothai Yesu.
|
||
\v 9 Ottumuni de assario nethathacana karik etharohoja fodok naang ecuhit, ekeluna th’awonan n’Ohobu karik th’abolori n’akolon,
|
||
\v 10 ara inyong laindu ofaning le difothuna abolori th’ohothing honyong fodok karik ethahuyo th’ohothing fodok hoiruk. Iwon ithai de dang dihiji hosong, anyo eruhu ithai ocame lonyong lethuk ohoi ithai anyahina.
|
||
\v 11 Inyong nemojorik ohoi juui thoithai. Ifiyo ohoi Ojok l’ohothai thoithasiru ithai dimanya amanio nelongorik inyong ithai. Inyong thoisarak dothai th’akolon thananyong asang fodok hayyu hewak ithai karik hengohinerek egyema nathai n’eruhon.
|
||
\v 12 Th’oyihoi tholya, ofure lo Hobu Yesu, ifothu de ahujon thoithai, ithai ifothu thonyong, th’alwahio thon’Ojok lohothai karik l’Ohobu Yesu Kristo.
|
||
\c 2
|
||
\cl Ebwait 2
|
||
\p
|
||
\v 1 D’arami h’ainduna n’Ohobu Yesu Kristo d’asuduhe nahothai ara aboithe honyong, amojo nang ithai olarok karik ahanerok hundang
|
||
\v 2 ithai thaang hoithathacangye ija ahani digigilo hothai dia othaja hothai thaang hoitharohojai th’ocame tholojo athuk ofaning l’Ohobu ainduna. Dia igigiloi de ngona hijan ecama ohoi arami hune di coryo, dityenio dia digero hohoi amaninihio.
|
||
\v 3 Hoihorihina othulo lobo thoithatumye ithai paat th’oyihoi tholoboling. Anyo, aang de ofaning le hoindu, ara kabong eribo nedara arami ha lahong howon karik ara kabong Omonyoroni, lawon ara lalo dihimang lo, holeyo.
|
||
\v 4 Oindu de idara ajohi dia asang hamojoi dosong. Oindu de isarahina ahwan nanyong tholohide hosong bukulung. Oindu de dang ijingara awoni dith’Atempolo n’Ojok, ajo inyong Ojok.
|
||
\v 5 aang ithai iyuu? Anyahi nang ithai arami hune fodok nanya esukarik nang hothai na
|
||
\v 6 ojak owon aning nabo nekohyo afuhon n’asang hune inyong thewona theene. Ti, itek ithai inyong anyo. D’omiru hocohini de, oleyo de Omonyoroni lya.
|
||
\v 7 Amisterio Amonyoroni negyema. Ti, aning nalo ifuhon, ofuk de ara aning nethakarahi inyong ne neduhuni adi. Ithalyehini de Omonyoroni ara Ohobu Yesu laindu. Oindu de itohoro inyong th’aloyiri thonothohuthuk honyong, ingohi inyong fodok ara laang opoho lonyong oleyo.
|
||
\v 8 ethaithahini de hathi Omonyoroni lo ara Oho’bu Yesu laindu. Oindu de itohoro inyong th’aloiri thonotho huthuk honyong ethalithok inyong adi kwong opoho lonyong aleyori.
|
||
\v 9 oindu de Omonyoroni lya thakolon thono Sitan ihandyo asang hafalangai hang owoni ara hadiri.
|
||
\v 10 karik ihandye de fodok opeceni h’adwala d’ohothing hoye. Oyetha de isong anyo kabong isong ifothu ara nayyu karik amunoi arami hadiri dithalwahuna isong.
|
||
\v 11 Inyong nasulak Ojok akolon n’epalan ditha hosong diruhu.
|
||
\v 12 Onyahi hijan ohothing haang hoiruk arami hadiri, amunoi eyauna, aang de othulo loiruhu isong karik arami hasong.
|
||
\p
|
||
\v 13 Owak ohoi thofurak ahinwarang th’oriihio fodok d’Ojok thoithai, ithai homuno Ohobu hulya. Aca, athuk inyong anyimuna ithai ara ohoithemok dithalwahuna th’akolon thon’Ohoile disarahina ithai ara ohothing honyong hodwa th’eruhon ditha eladiri.
|
||
\v 14 elongo ithai Ojok dihuhumyo oirik lothai l’abolori n’Ohobu Lohothai Yesu Kristo.
|
||
\v 15 Inyong na, olarok karik ahanerok hahoi, owethatik ara hako. Indefatha thanako osaridta hadiri hethuk ohoi etyenahina dothai hulya: thenyanyahyo karik th’egero amaninihio.
|
||
\p
|
||
\v 16 Ohobu Lohothai Yesu Kristo thahwan karik Ojok Omonye lohodtai, lomuno ohodtai, karik alwahio nanyong thoisarak ohothai engere karik eyihina nako
|
||
\v 17 ethahongok karik ethakolyo ithai juui dicama karik dihandyo ayiji.
|
||
\c 3
|
||
\cl Ebwait 3
|
||
\p
|
||
\v 1 Di cuhit fodok adi, olarok karik ahanerok hahoi, omojothik thohoi dothurohunu ocame l’Ohobu kwak efothuni th’abangi, iring nanya owonerek inyong dihiji hohoi.
|
||
\v 2 Omojothik ikoti thohoi, dipahu ohoi Ojok th’ohothing homonyong howak arami hamonyong; anyo ikara ohothing fodok iruk ocame l’Ojok.
|
||
\v 3 Ti, iruhi Ojok, anyo, ocama arami hadiri. Ithakolyo de ithai karik epahu ithai th’Omonyoroni Lo.
|
||
\v 4 Karik isarak Ojok ayenio nahoi dothai, ara ohoi itek tuhudik ainyong ihandyo ithai karik aang ithai de idehi asang hethuk ohoi ithai anyahina.
|
||
\v 5 Ohobu thoiyohoro ithai d’atehan nabolo amuno n’Ojok karik angonguna ethathacana nesarak Kristo.
|
||
\p
|
||
\v 6 Olarok karik ahanerok hahoi, inyahi ohoi ithai th’ofure thol’Ohobu Lohothai Yesu Kristo, thoisukai olamarai th’ohoiruhok ofathak haang othifoitho arami henyahi ohoi dosong.
|
||
\v 7 Itek ithai th’ahwandek tuhudik hijan ithai thehandye asang hehandyo ohoi.
|
||
\v 8 Aang ohoi nya ifatha, nanya isukarik ohoi hothai na. Kabong ohoi nya iruhu aning nesarahini d’ohoi ara kabong ohoi nya iduma.
|
||
\v 9 Kombwo, egyema ohoi ara ohoi imorwa, egyema ohoi diri ofaniing, ohariee, tek ohoi ithadumayo lobo thothai ija ahani. Ihandyo ohoi nya ahanya, ikara hijan aang ocohi dohoi dilongo alwahio thothai, Ihandyo ohoi ahanya ara ethaithit nethifoitho ithai.
|
||
\v 10 Nanya hoisuka ohoi hothai na, icamatho ohoi nya dothai, “Othulo leda egyema, thaang onye.”
|
||
\v 11 Icama ohoi arami hune, anyo ithairu ohoi hijan owoni ohothing homok dihiji hohothai homanya th’afatha, aang aning nehandyo isong arahari ethathacanio nasong ohothing homok digyema hosong.
|
||
\v 12 Th’ofure thol”Ohobu Yesu Kristo, inyahi ohoi d’ohothing hulya thomijye tuhudik disuka karik digyema ara nayyu dindafaitherek ahwandek hasong.
|
||
\v 13 Ti, ithai olarok h’ahanerok, ahwandek hathai thaang odihara digyema ara nayyu.
|
||
\v 14 Kodara owon de loboling othulo laang iruhu arami hesulak ohoi dothai hune dith’amanini nefahak ohoi dothai na. Ara ahani, otehetha othulo lya tuhudik karik hoiwonatha h’aning nabo nehandye hosong dojwu isong ahosi.
|
||
\v 15 Ti, hoihandyethek isong iring omerok Kombwo isarahina isong thoteha arami hune tuhudik iring omotte-ohoiruhoni.
|
||
\p
|
||
\v 16 Ijara Ohobu thahwan lowon d’ohothai ara oyihet d’elik nahap, thoisarak ithai elik nahwandek juui karik d’omiru fodok. Ohobu thoiwona hothai bukulung.
|
||
\v 17 Th’ahinang thono hindang nang olefeng egero arami huna: Emanda tho Paulo. Oyihoi lya legeryerek nang amaninihio fodok. Ahani egero nang.
|
||
\v 18 Alwahio karik ayiji n’Ohobu Lohothai Yesu Kristo, thoiwona hothai fodok.
|