See in Reader
130 lines
12 KiB
Plaintext
130 lines
12 KiB
Plaintext
\id COL
|
|
\ide UTF-8
|
|
\h Kolossia
|
|
\toc1 Kolossia
|
|
\toc2 Kolossia
|
|
\toc3 col
|
|
\mt Kolossia
|
|
\c 1
|
|
\cl Ebwayit 1
|
|
\p
|
|
\v 1 Nang, Paulo, ohifak lo Kristo Yesu, karik Timoteo olai lohothai,
|
|
\p
|
|
\v 2 d'ohoiruho karik olarok ohoiruhok do Kristo howoni di Kolossia. Alwahio thoiwona dothai karik elik th'Ojok Omonye lohothai.
|
|
\p
|
|
\v 3 Ifurak ohoi ahinywarang d'Ojok, Omonye l' Ohobu lohothai Yesu Kristo, ohoi h'emojo juui thoithai.
|
|
\v 4 Ethaningu ohoi eruk nathai do Kristo Yesu karik amuno newon ithai honyong d'ohothing thoisarahini arakang d'Ojok.
|
|
\v 5 Iwon ithai hamuno ne, anyo itek ithai aning nakana ara nathai dihide. Ethaningu ithai enihina nshesndek d'aning necahi arimahina ditha arami hadiri, evanelio,
|
|
\v 6 nathuk ainduna dothai. Evanjelio ne nethadoyo ahayo karik dang naboboloro dihap fodok. Athuk ehandyo ahani dothai karik hara th'ofaning lethaningunerek ithai karik ara ithai iyeyena inyong th'alwahio thon'Ojok th'arami thahadiri.
|
|
\v 7 Inyong ne evanjelio iring n'eyeyenarik ithai tho Epafras, ohoigyema loth'elulung hohoi lomunoi, ohoigyemani loyyu lo Kristo thohoi.
|
|
\v 8 Athuk Epafras esarahina ohoi thoteha amuno nahoi d'Ohoile.
|
|
\p
|
|
\v 9 Th'amuno thone, d'ofaning lethaningurek ohoi inyong, kabong ohoi ithawejo amojo thoithai. Ithabuho ohoi efiyo hijan ithai thoifutha th'atehan awahan nanyong d'elofioro karik athenuna n'arami h'ohoile.
|
|
\v 10 Emojo ohoi thoithai didaha ithai oyihoi lethamunoyo Ohobu. Emojo ohoi thoithai diwon ithai h'ahayo d'asang h'ehandyo ithai ara hayyu karik dibolo ithai d'atehan n'Ojok.
|
|
\v 11 Imojo ohoi thothai diwon ithai hakolon n'abolori nanyong, nesarak ithai ewasan dicuhit.
|
|
\v 12 Imojo ohoi thoithai difurak ithai Omonye ahinywarang th'amuno. Inyong lesarak ithai angara ayiji nedyaharai d'ohoiruhok h'afangan.
|
|
\v 13 Ethahoru ohothai th'ohobye l'omudwe karik eyaru ohothai d'ohobye l'Olonyi lonyong lomunoi.
|
|
\v 14 Ditha h'Olonyi lonyong ewon h'ethalwahuna karik ahohina n'eyatha.
|
|
\v 15 Olonyi arijori n'Ojok laang hoco hatehuna. Inyong lo ohoithemoni l'ayeuna fodok.
|
|
\v 16 Tholonyong oyeuni asang fodok, hothohide karik hothohop, asang hatehunu hahaang otehunu. Dia okani, ohobyehio, elulungi h'ogalla dia ohoindefak h'ohothing karik amasok, hayeuni nya asang fodok thonyong karik ara hanyong.
|
|
\v 17 Inyong lo dihithemi h'asang fodok karik ditha honyong osuduha asang fodok amaji aboithe.
|
|
\v 18 Inyong lo ahu n'ahwan, ekklessia. Inyong lo aculwe karik ohoithemoni th'ohoyak, th'ahu thone owon inyong h'amaji ehethemoni d'asang fodok.
|
|
\v 19 Omuno nya Ojok hijan inyong fodok thomanyai ditha honyong.
|
|
\v 20 karik dithamoryo asang fodok thololonyi donyong alefeng. Ethamoryo Ojok asang fodok donyong. Eyanu Ojok elik thal'ahotho n'akruce nanyong. Ethamorik Ojok asang fodok dia hothohop dia hothohide donyong.
|
|
\v 21 Th'orii homok nyana, awang ithai nya dang otehi ara h'Ojok. Iwon ithai nya ara omerok h'Ojok th'egigilitha karik th'asang thah'ehandyo ithai.
|
|
\v 22 Ti, thone, athuk ithai ethamoryo th'aye than'ahwan thananyong. Ihandyo ahani dinyahinerek ithai hijan idwa ithai, awang ithai omorye karik tholohide hohune awang ithai ithamonyorye dihithemi honyong,
|
|
\v 23 ara ethacoyo ithai ahani th'eruk thanako, ikara nabwangye th'asang hayyu hawon de h'evanjelio hethaningu ithai. Evanjelio ne nethuk ithai elolongohina d'ohothing fodok hoyeuni dihap. Inyong ne evanjelio nesarak nang, Paulo, thoiwona ara ongaca.
|
|
\p
|
|
\v 24 Thenene ne, amuno nang ditha hethathacanitha hundang thoithai, nang ethafuthak dihwan honang aning nawang th'arwaji thahangongok Kristo th'ahwan thananyong, ekklesia.
|
|
\v 25 Nang ongaca l'ekklesia iring nesarahinerek nang awona ahani ne th'Ojok thoithai dowon ocame l'Ojok ara ladiri.
|
|
\v 26 Arami hune hadiri hedima nya th'oyingathik karik th'operi. Ti, d'orii lya athuhi ethalyehina d'ohothing hoiruk donyong.
|
|
\v 27 Dosong owak Ojok anyahina ebarithi h'ahujon n'arami hadiri hedima hune d'ohothing hawang owoni ara Ojudei. Inyong nawon Kristo ditha hohoi, eladiri n'ahujon no mwai.
|
|
\v 28 Inyong lya lelolongo ohoi lo. Inyahi ohoi tuhudi, ara ohoi ityenio ohothing th'olofioro fodok, dinyahi ohoi d'ohothing howon fodok do Kristo.
|
|
\v 29 Th'arami tho hune, egyema nang, nang aringitho digyema th'akolon thananyong than'egyema ditha honang, dith'akolon.
|
|
\c 2
|
|
\cl Ebwayit 2
|
|
\p
|
|
\v 1 Awak nang kudien itek ithai angai egyema nang bebe thothai, thohoto thohowon di Laodicia, karik th'ohothing olwarai hokabong otehu ahomong hindang ara othulo.
|
|
\v 2 Egyema nang ahani dithakolyerek othaja hosong difuna amaji aboithe th'amuno karik ditha h'ebaritha hetek ijan owoni ditha hatehan n'arami hadiri h'Ojok hedima, Kristo.
|
|
\v 3 Ditha honyong idima ebarithi h'olofioro karik atehan.
|
|
\v 4 Anyahi nang izaihune da awang ozulo lobo izatumio izai.
|
|
\v 5 Juk awang awon hozai za ahuan, egigilo nang izai bebe, ajahizerek nang lawon hozai. Ti nang lamuno bebe acha atek nang ijan izifoizo izai Kristo zo oihoi za lawangarik lobo izawejo izai, ijan izai heruk do Kristo Kuong ezawejo.
|
|
\p
|
|
\v 6 Iring nethuk ithai efothunere Kristo, Ohobu, odahathi ditha honyong.
|
|
\v 7 Obulatha ara hoko ditha honyong., ithai thoihuhumahini ditha heruk iring nathuhi ithai etyeniere, karik th'afurahina than'ahinywarang.
|
|
\p
|
|
\v 8 Otihatha tuhudi othulo lobo thaang hoindefu ithai thol'olofioro karik th'adwala thon'oisukaitha h'ohothing honya berien, diruhohina asang thohop, karik ikara diruhohina do Kristo.
|
|
\v 9 Anyo ditha honyong isuka efuthan n'Ojok dith'ahwan.
|
|
\v 10 Ethafuthahini ithai ditha honyong.
|
|
\v 11 Ditha honyong athuhi ithai nya abosyo th'abosio thana kabong hoihandye d'ohothing dingocyere ahwan n'othulo, ti, d'abosio no Kristo.
|
|
\v 12 Amuhahini ithai nya honyong ditha Batisimo, karik ditha honyong, adohohini ithai dihide th'eruk than'akolon n'Ojok, lodohu Kristo th'ohoyak.
|
|
\v 13 Aye nya nathai ditha eyatha nathai karik awangan nathai angocyo ahwandek, ethasu inyong lo ithai ditha honyong karik amehi ithai eyatha hathai.
|
|
\v 14 Efufusu amaryat h'egero karik oyano homonyori nya dothai. Eduhu adi fodok abehok ahwan nanyong di kruce.
|
|
\v 15 Eduhu adi akolon karik endafaitho n'ahap h'ohothing, ethalyehi isong dihithemi h'ohothing, arimahina nanyong ohobye tholohide hosong th'akruce.
|
|
\p
|
|
\v 16 Inyong na, othulo lobo thaang hongocye arami hathai h'anyari karik th'amatha, dia ofaning l'amuno, dia operok oithacofehio.
|
|
\v 17 Asang hune fodok obibile l'asang de hafuni, ti, aning nako bebe dosong inyong Kristo.
|
|
\v 18 Othulo lobo lowak alauna ahwan karik amojo n'anjelohio thaang hokanye ithai imonyoroi. Othulo lya de lojingak dith'asang hathuk inyong atehuna karik esarak inyong thigigiloi bebe th'asang thohothohop.
|
|
\v 19 Awang inyong indef tuhudi aramim h'ahu. Tholohu orimak ahwan ainyong owak inyong disukari ara aboithe; obolo inyong na th'abolori thana athuk inyong Ojok esarahina.
|
|
\p
|
|
\v 20 Ara ithuk ithai aye ho Kristo d'asang hotho hop, anyo isuka ithai iring ohothing h'ahap:
|
|
\v 21 "Hoindef, ohoithem, hoithiin"?
|
|
\v 22 Asang hune fodok hamuyak de ara hegyemari, iring d'osaritha karik oityenitha h'ohothing.
|
|
\v 23 Owoni osaritha hulya h'olofioro h'atehan n'Ojok, alauna n'ahwan karik akolon n'ahwan, ti, awang howoni h'akolon n'ainyong awang ahwan howak.
|
|
\c 3
|
|
\cl Ebwayit 3
|
|
\p
|
|
\v 1 Ara athuk Ojok adohohina ithai ho Kristo dihide, othifeyethe asang hothohide, amaji nesukari Kristo dinget h'Ojok.
|
|
\v 2 Igigilothi asang hothohide ikara hothohop.
|
|
\v 3 Atha ethuk ithai aye, ti, esu nathai nedima ho Kristo ditha Ojok.
|
|
\v 4 Ara Kristo, lowon dothai ara esu lo laleyo, ileyo ithai de honyong dang dihujon.
|
|
\p
|
|
\v 5 Athuhon nya ethayeyo asang hamonyo, asang hanya hofithoro dihap isong: eleru, amanya nebot, ehihira n'asang hothohop, awahan asang hamonyo karik audori, narwang iring aning neduhuni iring Ojok.
|
|
\v 6 Asang hune isarak engere n'Ojok ainduna d'oduri h'aangan ethayiryo arami hanyahini dosong.
|
|
\v 7 Isong asang hune hanya idaha ithai hosong orii lesukarik ithai ditha hosong.
|
|
\v 8 Ti, ithai thedehi asang hune fodok: engere, egigilitha hamonyo, omoritha karik ocamitha homonyo hothohuthuhie hothai.
|
|
\v 9 Hoidwala d'othulo loboling, anyo, ethuk ithai eloyitho ara ohothing ongejuho hoihanditha hosong,
|
|
\v 10 Karik ethuk ithai eyofohina othulo ongejuk ditha h'atehan iring arijori no le lonya oyeu inyong lo.
|
|
\v 11 Amaji ne nawangarik Ogrithanani karik Ojudethanani, angocyo dia awangan n'angocyo ahwan, ohothing hoisuka iring ecangi, Oscythians, ongaca, othulo lesuka olefeng iring owak inyong, ti, Kristo inyong fodok karik owon ditha hosong fodok.
|
|
\p
|
|
\v 12 Iyofohina, iring ohothing h'Ojok hanyimuni, ohothing hodwa karik homunoi, elik n'ahohya, ayiji dohomok, alauna n'ahwandek, awahan ayiji nohomok karik angongohina ethilauna.
|
|
\v 13 Olwahyethek ahwandek. Ara ongica othulo lobo holoboling, thomehi iring nathuhorik ithai Ohobu amehina.
|
|
\v 14 Tholohide h'asang hune fodok, iwonatha h'amuno, ahathorani n'abisan.
|
|
\v 15 Elik n'ahap karik n'ahwandek no Kristo thoindafaithe othaja hothai. Th'elik thone inyong nanya ilongorik ithai ditha ahwan aboithe. Ofurahina ahinywarang da Lamolo.
|
|
\v 16 Ocame lo Kristo thoisukai ditha hothai iring ebarit. Th'olofioro fodok ityeniethe ara ithai isaryo ahwandek th'oyendok thah'elulung karik h'Ohoile. Idolothik th'afurahina than'ahinywaran dithaja hothai d'Ojok.
|
|
\v 17 Aning nehandyo ithai th'ocame dia th'adodoro, ihandyethe th'ofure thol'Ohobu Yesu. Ofurahina ahinywarang d'Omonye tholonyong.
|
|
\p
|
|
\v 18 Afuretho, iruhotho ondehio hothai iring nawaharik Ohobu.
|
|
\v 19 Ondehio omunothi ofuretho hathai, hoimanatha isong ara namonyo.
|
|
\v 20 Akalifinok h'okalifinok, iruhotho arami halethemonye hahenethehathngi d'asang fodok, anyo, ithamunoyo Ohobu.
|
|
\v 21 Omonyehio, hoitorohojethe othaja h'okalifinok h'akalifinok, tek ataluhoi.
|
|
\v 22 Ongacani, ithanignyethe arami h'ohobwore hothai d'asang fodok, ikara th'ahonde dithamunoyo isong ija, ti, th'othaji thaladiri. Obangatha Ohobu.
|
|
\v 23 Aning nehandyo ithai, ihandyethe th'othaji d'Ohobu, ikara d'othulo.
|
|
\v 24 Itek ithai hijan ifothu ithai de th'Ohobu akanyuma n'aruthahina. Ohobu Kristo legyema ithai thonyong lya.
|
|
\v 25 Lehandyo aning nawang nabis, osarye de th'aning thanepal than'ehandyo inyong, awang ekelio thiya.
|
|
\c 4
|
|
\cl Ebwayit 4
|
|
\p
|
|
\v 1 Ohoidefak h'ohothing, isarahina d'ongacani aning nabis karik nacohi dosong. Itek ithai hijan iwon ithai hohoindefani dihide.
|
|
\p
|
|
\v 2 Odulothi dimojo th'akolon. Omijethe tuhudi dith'amojo h'afuryo n'aninywarang.
|
|
\v 3 Omojothi amaji aboithe thohoi dang, d'ongahi Ojok oyihyet d'ocame, dicama arami hadiri hedima ho Kristo. Th'arami thohune efitha nang.
|
|
\v 4 Omojothi d'acama nang tuhudi iring nerarik nang icama.
|
|
\v 5 Odahathi th'olofioro d'ohothing hothondak. Olwahuna omiru.
|
|
\v 6 Ocamitha hothai thoiwona juii h'alwahio. Isarahina ahipere ditha h'ocamitha hothai, ditek ithai angai itharangye ohothing hulya abok abok.
|
|
\p
|
|
\v 7 Iring d'asang hawon ara hundang, isarak de Tycikus ithai toteha. Inyong lo olai leruk loth'othaji; inyong lo ohoigyemani th'othaji karik ongaca l'Ohobu.
|
|
\v 8 Asulak nang inyong dothai th'arami thohuna, ditek ithai arami hahoi, karik dang dithakolyo othaja hothai.
|
|
\v 9 Asulak inyong h'Onesimo olai neruk loth'othaji, loboling iring ithai. Onyahini ithai de asang fodok hawon dini.
|
|
\p
|
|
\v 10 Aristarkus, othulo lefitha iring nang, ithamandayo ithai, karik dang Marko losoning ho Barnaba (lefothu ithai thonyong ainyong ihandye, ara laindu dothai, ifothuna inyong),
|
|
\v 11 karik dang Yesu, lelongoi ara Justo. Ohotho h'angocye hulya hama ohoigyemak hundang hulya h'ohobye l'Ojok. Esarak isong hulo nang alengan nesuka.
|
|
\v 12 Ithandayo ithai Epafras, inyong lo lobo lothai karik ongaca lo Kristo Yesu. Omojo inyong lo bebe thoithai diwahu ithai ara ithai inihi ahwandek hathai fodok d'ainyong owak Ojok.
|
|
\v 13 Ocohi donang dijaran igyema inyong lo bebe thoithai, th'ohothing thoho Laodicea, karik ho Hierapolis.
|
|
\v 14 Ithamandayo ithai Luka, ohomurani loth'othaji karik Demas. i
|
|
\v 15 Ithamandahina olarok hotho Laodicea karik Nymfa karik ekklesia nawon dihang honyong.
|
|
\v 16 Ara amanini ne nathuhi ehenahina dothai, thehenahini dang d'ekklesia no Laodiceans, iheniethe dang amanini notho Laodicea.
|
|
\v 17 Ijaratha do Arcippus, "Omije tuhudik d'amaji nahoi n' egyema nefothu iye th'Ohobu, awak hijan ihandyo iye.
|
|
\p
|
|
\v 18 Emanda na th'ahinang thono hindang ho Paulo. Hoikwothik efitha hindang. Alwahio thoiwona hothai.
|