lky_reg/50-EPH.usfm

\id EPH
\ide UTF-8
\h Efesio
\toc1 Efesio
\toc2 Efesio
\toc3 eph
\mt Efesio
\c 1
\cl Ebwayit 1
\p
\v 1 Paulo, ohifak lo Kristo Yesu th'awahan thon'Ojok, d'ohothing h'Ojok hodwa ho Efesus, hoiruk do Kristo Yesu.
\p
\v 2 Alwahio dothai karik elik n'ahap karik ahwandek th'Ojok Omonye Lohothai karik Ohobu Yesu Kristo.
\p
\v 3 Ojok karik Omonye l'Ohobu Lohothai Yesu Kristo thoithahabuye, inyong lo athuk aboroyo ohothai th'elwahithi h'ohoile dith'amasok hothohide ditha ho Kristo.
\v 4 Ojok onyimu ohothai ditha honyong thoculwe h'ahap, delibo aang ohothai omorye dihithemi honyong.
\v 5 Anyimu ohothai Ojok ahithemi karik eduhu ohothai ara olonyirok honyong tholo Yesu Kristo iring owak inyong olefeng.
\v 6 Eduhuna nanyong ohothai ara oduri honyong nawon ara alwahio nanyong nahitto hijan athuk inyong isarahini ohothai th'hawan thananyong d'Ojok aboithe lomuno inyong.
\v 7 Ditha Yesu Kristo ewon h'ethalwahuna th'ahotho thanyong karik amehina neyatha, ahana nebarithi nalwahio nanyong.
\v 8 Abuhok inyong alwahio ne dohothai th'olofioro fodok karik atihahunu.
\v 9 Esarak ohothai Ojok thoteha arami hedima h'awahan nanyong iring aning nesarak inyong amuno karik nethaithak inyong ditha ho Kristo.
\v 10 dihuhumyo ahwandek ara hayyu d'omiru howon, diyanu asang fodok amaji aboithe, asang hothohide karik hothohop, d'ohoindefani aboithe, juk Krsito.
\v 11 Ditha ho Kristo eduhuni ohothai nya ara ohoruthak. Athuhi nya eduhuna ohothai berien iring nateharik inyong egyema nanyong fodok iring owak inyong.
\v 12 Anyimu ohothai Ojok ara ohoruthak dewon h'eyihina nako do Kristo defunu ithahuyo abolori nanyong.
\v 13 Ditha Kristo, ithai dang ahani, ara ethuk ithai ethaminguna ocame l'eladiri, evanjelio n'ethalwahuna nathai, eruk ithai donyong karik athuhi ithai ekeluna ara h'Ohoile Lodwa lojo inyong loindu,
\v 14 athuk inyong eruhuna aruthahina nahothai lwai ohothai eduhuna inyong dithahuyerek abolori nanyong.
\p
\v 15 Th' ahu thone, ge nang ethaninguna arami h'eruk nathai d'Ohobu Yesu karik amuno nathai ohothing fodok hodwa h'Ojok,
\v 16 kabong nang awetha difurahina Ojok ahinywarang thoithai iring nelecerek nang ithai ditha h'omojitha hundang.
\v 17 Amojo nang disarak Ojok l'Ohobu lohothai Yesu Kristo, Omonye l'ahujon, ohoile l'olofioro karik.
\v 18 Amojo nang d'otehu othaja hothai, ditek ithai eyihina nathuk inyong ithai elongo dia karik ebarithi h'eruhuna nanyong nabolo ditha ohothing fodok hodwa h'Ojok.
\v 19 Ditha h'omojitha hundang, efiyo hijan ditek ithai abolori tholohide h'abolori ditha hohothai hoiruk iring th'egyema than'akolon nanyong nahitto.
\v 20 Inyong akolon nene aboithe n'egyema Ojok do Kristo th'ethadothuna inyong th'ohoyak ethawonik inyong dinget hoyong d'amasok hawon dihide.
\v 21 Ethawonik Kristo tholohide h'asang fodok. Indafaitho de Kristo ahide h'ahap, ikara d'oper lya hamaring. ti, karik dang d'operi hofuni.
\v 22 Esarak Ojok asang fodok tholohop h'ahejek ho Kristo karik esarak inyong dikklesia iring ahu tholohide h'asang fodok,
\v 23 Ekklesia inyong ahwan nanyong. athuba nanyong lethafuthak fodok dith'asang fodok.
\c 2
\cl Ebwayit 2
\p
\v 1 Iring dothai, ethuk ithai nya aye ditha h'omanyitha hothai homonyo h'eyatha.
\v 2 Ditha nya hoisukaitha homonyo karik eyatha isuka ithai thoisukaitha thah'ahap na. Isuka ithai nya th'osaritha thoh'ohoindefak h'aloiri, ohoile l'egyema ditha olonyirok h'amesio.
\v 3 Esuka ohothai nya fodok dihiji h'ohthing hulya, ara ohothai ihandyo asang hamonyo hawak oisuket lohothai l'eyau, karik ohothai ihandyo asang hawak ahwan karik ahu. Thoisuket, ohothai nya oduri h'engere, iring elathulo fodok.
\v 4 Ti, obara Ojok amehina, anyo, obolo amuno nanya omunorik inyong ohothai na.
\v 5 Dihide nya hoisukaitha hohthai homonyo hulya, esarak ohothai thoisukai ara ohoisuok ditha ho Kristo - th'alwahio thananya ithalwahunerek ithai.
\v 6 Adohok ohothai Ojok dihide fodok ho Kristo, karik ethawonik ohothai fodok dith'amasok hothohide ditha Kristo Yesu,
\v 7 dara d'operi hofuni, doindu inyong ithaithahina ohothai abolori bebe nebarithi h'alwahio nanyong naleyo ditha h'ayiji nanyong d'ohothai dithai Kristo Yesu.
\v 8 Th'alwahion thon'Ojok, ethalwahunu ithai th'eruk. Ikara thothai oindu alwahio ne. Inyong na alwahio n'Ojok.
\v 9 Alwahio n'Ojok ikara th'egyema oindu, Awang othulo lethadara thonyong.
\v 10 D'ohothai elulung n'egyema n'Ojok, ayehi Ojok ditha ho Kristo Yesu thoihandye asang hayyu hathuk Ojok ehuhumahina arabo nya berien thohothai, defunu idaha ditha hosong.
\p
\v 11 Hekwothi hijan ikela ithai nya th'Ojudei. Ilongoi ithai nya ara ohothing hakabong hongocye. Ilongoi ithai nya ara "awangan n'angocio". Awangan n'angocio th'ahinang.
\v 12 D'omiru hule ekeluni ithai nya tho Kristo. Ithai nya ohodahak d'ohothing ho Israele. Ithai nya ohodahak d'emorathik h'acocio. Awang eyihina nabo nathai do mwai. Awang ithai nya iwon h'Ojok dihap.
\v 13 Ti, ditha ho Kristo, ithai honya ilama th'Ojok hulo, eyanai ithai iindehai th'ahotho thono Kristo.
\v 14 Inyong lo elik n'ahwan karik ahap nahothai. Athunak ohothing arehai ara aboithe. Th'elathulo thananyong athuk ahecyo oilyethe l'elamerok lonya athuk ohothai ebwayo.
\v 15 Inyong na, athuk eduhuna adi oyano h'efahitha h'osaritha d'oyeu inyong othulo ongejuk ditha honyong diyanerek elik n'ahap karik n'ahwan.
\v 16 Ethamoryo Kristo ohothing arehai hulyan ditha ahwan aboithe d'Ojok thal'akruce, eyanu d'elamerok aye.
\v 17 Aindu Yesu anyahi elik dothai honya olama th'Ojok karik ohothing honya oyindek.
\v 18 Tholo Yesu erumak ohothai oyihoi ditha Ohoile aboithe Lodwa d'Omonye.
\v 19 Th'omiru hulya, ithai ohothing hoikela th'Ojudei, awang ithai hoiwon ara ohodahak dia othohomonok. Kombwo, ewon ithai ara ohothing h'amiji aboithe karik ahang n'ohothing hodwa h'Ojok.
\v 20 Athuhi ithai aduho d'asihothe n'ohoifahak karik ohocorok Awon Yesu th'ahwan ara asihothe.
\v 21 Ditha honyong osiru athwa fodok ara aboithe, aboboloruno ara Atemplo ditha Ohobu.
\v 22 Ditha honyong dang oduhoi ithai ara amaji aboithe nesukarik d'Ojok ditha Ohoile Lodwa.
\c 3
\cl Ebwayit 3
\p
\v 1 Th'arami thohune, nang, Paulo lawon ara othulo lefitha lo Kristo Yesu th'ohothing thohoikela th'Ojudei.
\v 2 nang disuhe honang ara ohohorani l'alwahio n'Ojok nanya athuhi esarahina do nang thoithai.
\v 3 Egero nang iring nathuhi nang anyahinerek thoteha arami hedima. Eladiri ne nedima na anyahi nang dothai ara nasuk.
\v 4 Ara ohothai hehenio arami hune ocohi de dothai ditehan ainyong egigilo hindang ditha h'eladiri nedima no Kristo.
\v 5 D'operi homok, eladiri ne, awang hoithaithahini d'olonyirok h'ohothing. Ti, thone, athuhi anyahina th'Ohoile thol'Odwa d'ohoifahak karik ohocorok honya isarahini arakang ara h'egyema ne.
\v 6 Eladiri nedima ne, ojo hijan ohothing hoikela th'Ojudei, owoni ara ohoruthak karik ohothing howon iring amasok hamahama h'ahwan. Ongara isong arami homwai hanya athuk isong Kristo Yesu anyahina thoyihoi thal'evanjelio.
\p
\v 7 Aindu nang iwonan ara ohoigyemani l'evanjelio ne th'esorio than'alwahio n'Ojok nesarahini do nang th'egyema than'akolon nanyong.
\v 8 Isarak nang Ojok esorio na, juk nang awon bebe diholu h'ohothing fodok h'Ojok hodwa. Esorio ne isarak nang thonyahi d'ohothing hoikela th'Ojudei ebarithi ho Kristo hawang othifeye.
\v 9 Esorio n'Ojok do nang ne isarak nang eyanu d'ohothing afangan n'atehan ainyong owak Ojok ehandyo. Ojok nya idimaitho nya berien th'operi fodok aning nawak inyong ehandyo, inyong loyeu asang fodok.
\v 10 Isarak nya Ojok ainyong owak inyong ehandyo thotehi thololonyi ekklesia d'ofuni ohoidefak h'amasom hothohide itehan oyaitha h'olofioro h'Ojok thoyihothik thoholwa.
\v 11 Ofuk arami hune iring ainyong owak inyong ehandyo iring nathuk inyong egyemarik ditha ho Kristo Yesu, Ohobu lohothai.
\v 12 Ditha Kristo ewon h'akolon karik eyihina n'eruk nahothai donyong.
\v 13 Efiyo nang ithai th'aang hotaluhoi, anyo, thothai ethathacana nang. Ethathacan hindang abolori nathai.
\p
\v 14 Th'ahu than'arami hune, arigongo nang d'Omonye,
\v 15 loindu thonyong efuryo n'ahang dihide karik dihap.
\v 16 Amojo nang disarak dohothai, iring ebarithi h'abolori nanyong, thoithahongo th'akolon thon'Ohoile lonyong, lowon ditha hothai.
\v 17 Amojo nang Kristo thoisukai dithaja hothai th'eruk dijingak ithai ditha h'amuno nanyong.
\v 18 Ithai thoiwona h'akolon, ditek ithai, hohoiruhok fodok, abolori n'amuno nanyong.
\v 19 karik ditek ithai hijan amuno no Kristo, okalaru atehan, karik difut ithai th'elajok thon'Ojok.
\p
\v 20 Amojo nang le, locohi ehandyo tholohide ehandyo asang h'efiyo dia h'egiglo, th'akolon thananyong th'egyema ditha hohothai.
\v 21 ahujon thoiwona donyong dith'ekklesia karik ditha ho Kristo Yesu d'operi fodok mak. Amen.
\c 4
\cl Ebwayit 4
\p
\v 1 Nang, ohoifithani l'Ohobu, lanyahi ithai thoiwona ara ohothing hosiru d'oilongit lonya ilongorik ithai.
\v 2 Emimingak nang ithai thoisukai th'alauna ahwandek karik angnongio, ara ithai imuno ahwandek.
\v 3 Ihandyethe aning nacohi hothai ehandyo diwon ithai h'asuduhe n'Ohoile th'elik than'ahwandek karik n'ahap.
\v 4 Owon ahwan oboithe karik Ohoile aboithe, iring nanya ilongorik ithai ditha hayenio n'elongo ithai.
\v 5 Karik owon Ohobu aboithe, eruk aboithe, Abatisimo aboithe,
\v 6 Ojok aboithe karik Omonye l'ohothing karik asang fodok. Ojok Omonye tholohide asang, thal'asang karik dith'asang fodok.
\v 7 Athuhi esarahina othulo aboithe th'ohothai thoityenie alwahio, iring abolori n'esorio no Kristo.
\v 8 Iring najararik amaninihio halwa: "Adohan nanyong nya dihide, adiroro ohoifithak difitha, karik inyong esarak esoritha d'ohothing."
\p
\v 9 Ainyong ojo, "Adok dihide," arahari ajan ecuru dang di hap?
\v 10 Inyong lecuru di hap inyong lya dang aboithe lodok dihide tholohide h'ahide, dithafuthak inyong asang fodok.
\v 11 Esarak Kristo homok ara ohifak, homok ara ohocorok, homok ara ohoithamojok karik ohoithayeyenak.
\v 12 Esarak inyong lo ohoigyemak hulya thoihuhumye ohothing honyong hodwa d'egyema n'alwahio diduhorik ahwan no Kristo.
\v 13 Obothok inyong lo ara aduho n'athwa no Kristo lwai ohothai edwongon d'athuna, atehan n'Olonyi l'Ojok karik dang debi edwong d'athemit n'efuthan no Kristo.
\v 14 Oduho ohothai Kristo dihide, daang ewon iring okalifinok hethalacyangyo ahomwa n'etyenathik hekela karik ohongitha h'odwalak.
\v 15 Kombwo acama eladiri ditha h'amuno. isarak ohothai thoboloro th'oyihothik fodok ditha honyong, lowon ara ahu lo, Kristo.
\v 16 Oduho Kristo ahwan fodok, d'othuna awon ara aning aboithe. Ara igyema oyirik lahwan ara aboithe h'ahwan, isarak ahwan thoboloro aduho ahwan nanyong dith'amuno.
\p
\v 17 Th'arami thohune ajo nang, nang emimingak arami hune d'Ohobu. Hoinyahatha esuka iring ohothing haang owoni ara Ojudei, d'aning nabo nawang thohosi hosong.
\v 18 Athuhi ethariyohyo isong ditha h'atehan nasong, esukai olamarai thoisukaitha h'Ojok thaangan natehan nawon ditha hosong, th'akolo thon'othaja hosong.
\v 19 Awang ajwon n'ahosi thosong. Athuhi amirohina ahwandek d'arami karik asang hamonyo. H'odihandyo asang karik arami h'ebot.
\v 20 Ti, ikara oyihoi lya lonya iyeyenarik ithai Kristo.
\v 21 Thono hindang, ojak donang ethuk ithai ethaninguna tuhudi arami hanyong, etyenie ithai arami hanyong, iring nawonderek eladiri ditha ho Kristo.
\v 22 Athuhi ithai etyenio thoidehi oyihothik hothai honya h'amanya nathai nanya berien. Othulo ongoroi lo lomuyak, asang fodok hawak inyong adwala thororo.
\v 23 Athuhi ithai etyenio diwon ithai ara ongejuho ditha h'ohoile l'ahosi hathai,
\v 24 ara ithai iyofok dihwandek othulo ongejuk loyeuni d'arijori n'Ojok - d'abisan karik adwaran nadiri.
\p
\v 25 Inyong na, idehina adwala. Ocamathik h'othulo loyindek dohoi arami hadiri, atha ithai hulo ohothing h'elulung aboithe.
\v 26 Ingerejatha. Ti, hoiyauna. Hoisarak oholong tholumo h'engere nahoi.
\v 27 Hoisarahina sitan thomunoi atehuna nanyong ara latehu ithai eyauna.
\v 28 Othulo lonya ohoholyo thoidehi. Thoigyema asang hayyu th'ahinang thananyong d'orimak among nabo nangara inyong hohoicyanak.
\v 29 Hoisarahina ocame lobo lomuyak thoifunu thohuthuhie hothai. Ocamathik ocamitha holwahu aduhohina ohothing homok dihide iring nawaharik isong. Ocamitha hothai tholwahu ohothing hoithairu ithai.
\v 30 Hoikorotho Ohoile l'Ojok, thonyong nya ifunu ithai iwonderek ara h'ofaning l'alwahio.
\v 31 Idehina asang fodok hamonyo iring: adwaran n'othaji, engere, ethethena, omoritha karik asang fodok hamonyo.
\v 32 Oyijotho ara ithai imuno ahwandek hothai, iwonatha h'othaji hoilik, omehunethe ahwandek, iring namehinerek ohothai Ojok ditha ho Kristo.
\c 5
\cl Ebwayit 5
\p
\v 1 Inyong na, iwonatha ara ohoithethemak h'Ojok, iring oduri homunoi bebe.
\v 2 karik odahathi ditha h'amuno, karik dang iring namunorik ohothai Kristo, aye th'ohothai, ehuma nangwo kudaar karik angongohina ethathacana th'arami thoh'Ojok.
\p
\v 3 Arami hamok hamonyo thaang holeyoro dihiji hothai d'arwanga n'obusuha h'angorwo. dia arami hebot, dia h'agaganghu. Awang asang hune osiruni d'ohothing hodwa h'Ojok.
\v 4 Amuyahi, ocamitha h'ananga, obalitha homonyo - isong hulo fodok awang hoyiji dothai dihandyo. Kombwo aning nera iwonan dihiji hothai, afuryo n'ahinywarang.
\v 5 Otehatha arami hune tuhudi, hijan awang othulo lelangorwo, loibot oisukaitha dia logaganghu, othulo laang otek Ojok, horimak aning nabo d'ohobye lo Kristo hol'Ojok.
\v 6 Othulo lobo thaang hoithatumye ithai th'ocamitha thahaang aning nabo thiya. Th'arami thohune, engere n'Ojok naindu d'oduri homesyo.
\v 7 Hoijingahina d'elulung nasong.
\v 8 Ditha omudwe nya isuka ithai, ti, th'orii lya ne, ithai afangan ditha ho Kristo. Isukathi iring okalifinok h'afangan,
\v 9 (ahayo h'afangan isong: ayiji, Abisan karik eladiri)
\v 10 karik orimahina ainyong ithamunoyo Ohobu.
\v 11 Hoithajingak ahwan nahoi ditha egyemathik h'omudwe haang ithai irimak aning nabo thiya, ti ithalyehina asang hamonyo hune dindak.
\v 12 Iyanu ajwon n'ahu elecyo asang hehandyo isong hedima hune.
\v 13 Ti, ara asang fodok hainwahye, otehunai.
\v 14 Asang fodok hatehunu isong afangan. Ojo ajaran, "Odothoi, ohojothoni, odothoi th'ohoyak, inwaha de Kristo dohoi."
\p
\v 15 Omijethe tuhudi angai isuka ithai - hoisukathi iring ohothing haang otek aning naboling,
\v 16 isukathi ara ahongok.
\v 17 Hoidudufothi, otehatha tui ainyong owak Ohobu.
\v 18 Hoibothothik obalu. Isarak ithai esuka caa. Kombwo, ithai thoifutha th'Ohoile Lodwa,
\v 19 Ocamahunethek th'oyendok thoh'Ohoile. Idolothi d'Ohobu th'othaji tholothai fodok,
\v 20 Ofurahina ahinywarang juii th'asang fodok th'ofure thol'Ohobu lohothai Yesu Kristo d'Ojok Omonye,
\v 21 Olwahathik ahwandek th'abongi thono Kristo.
\p
\v 22 Afuretho, iruhotho arami h'ondehio hothai, iring neruhorik ithai d'Ohobu.
\v 23 Onde ahu n'afure, iring nawondere Kristo ara ahu n'ekklesia, Kristo th'ahwan inyong ohoithalwahani lonyong h'ekklesia.
\v 24 Ti, iring neruhorik ekklesia arami ho Kristo, afuretho dang thoithsningye arami h'obusuha hosong d'asang fodok.
\v 25 Ithai Ondehio, omunothi henethefure, iring namunorik Kristo ekklesia, aye thonyong.
\v 26 Esarak Kristo ahwan nanyong d'ekklesia dodwa. Athuhon nanyong ethaliboryo ekklesia th'elalayo th' ahari karik ocame,
\v 27 dohu diwonderek ara nayong, kwong ebothi dia asang karik egilitha hamok hamonyo, arahari adwaran kwong epal.
\v 28 Iring ne, ondehio thomunoi afuretho hasong iring namunorik isong ahwandek hasong. Lomuno athulo nanyong omuno ahwan nanyong.
\v 29 Awang othulo loman ahwan nanyong, ti, ithanyo endafaitho ahwan nanyong tuhudi iring nethanyerek endafaitho Kristo ekklesia tuhudi,
\v 30 anyo, ohothai okangi h'ahwan nanyong.
\v 31 "Th'ahu than'arami hune, idehi de othulo omonye h'ahathingi, athunahunai, awoni ara ahwan aboithe."
\v 32 Arami hadiri hedima hune obolori - ti, nang lacama tho Kristo karik ekklesia.
\v 33 Ti, dothai fodok abok abok ajo nang, omunothi henethefure iring nemunorik ithai ahwandek hathai, karik athulo nangorwo thobanga onde.
\c 6
\cl Ebwayit 6
\p
\v 1 Ithai okalifinok, iruhotho arami helethemonye karik henethehathingi ditha Ohobu, obiai arami hune.
\v 2 "Ithahabuye le monye hanehathingi" (Efahit ethaboithe h'eruhuna ainyong owon mwai),
\v 3 "Doyyu dothai disuka omiru hohodo dihap."
\v 4 Ithai omonyehio, hoihandyethek arami hesarak okalifinok hothai thoingereja. Kombwo, iyanethe isong dihide th'osaritha thoh'Ohobu.
\p
\v 5 Ithai ongacani, ithaningyethe ara ithai iruk arami h'ohothing hoindefaitho ithai th'abangi karik th'ehihira thanabolo th'eladiri thonoth'othaja hothai. Ithaningyethe arami hasong iring n'era ithai ithaningyerek arami ho Kristo.
\v 6 Awang ithai ira ohoindefak hothai thotehu ara ithai iruhok karik ara ithai ithaningyo arami hasong dithamunoyere isong. Kombwo ithairyethe arami iring ongacani ho Kristo, lehandyo ainyong owak Ojok thothaja hothai.
\v 7 Olwahyethe th'othaja thohothai fodok iring negyemarik ithai d'Ohobu ikara d'ohothing,
\v 8 anyo, etek ithai hijan aning nayyu nehandyo othulo, owon h'esorio th'Ohobu, dia inyong ongaca dia ikara ongaca.
\p
\v 9 Ithai ohoindefak h'ohothing, indafaithethe ongacani dang tuhudi. Hoithabangyethe isong. Itek ithai hijan ohoindefani lothai hosong lodihide. Awang inyong lo ikelyo.
\p
\v 10 Di cuhi, ithakolyethe ahwandek d'Ohobu karik d'akolon n'abolori nanyong.
\v 11 Iyofohina dihwandek akolon n'Ojok, docohi dothai atehan ainyong owak Sitan ehandyo.
\v 12 Angalafa nahothai ikara h'ahwan h'ahotho. Kombwo, Angalafa nahothai hoindefitha, h'ohoindefak h'ohoile, ohoiriringak h'ohobyethik homonyo h'omudwe lomonyo. Eribo nahothai h'ohoilehio homonyon d'amasok hothohide.
\v 13 Iyofohina dihwandek akolon n'Ojok dithakolyo ithai d'omiru homonyo karik diholu hothai ehandyo asang fodok. Owethathik ara hoko.
\v 14 Owethathik tuhudi, ara ithai hethuk efithahina erohit n'arami hadiri karik abuhu n'arami h'abisan.
\v 15 Thiya, iring han'ahamuha hotho hejek na, iyofohina ara ithai ira anyahina n'evanjelio n'elik n'ahap karik ahwandek.
\v 16 D'oriihio fodok iyofohina abuhu n'eruk, nesarak ithai de ekauna ohwani ho Sitan.
\v 17 Karik iyofohina alohuluk n'alwahuna karik odemi l'Ohoile Lodwa, lowon ara ocame l'Ojok lo.
\v 18 Th'amojo karik th'efiyo, omojothi th'oriihio fodok d'Ohoile Lodwa. Thoisukaitha thohulya, omijethe tuhudi angai efwo ahithemi ahibu ohothai isarak d'ohothing fodok hodwa h'Ojok.
\v 19 Karik omojothi tho nang, dofuni arami do nang ara nang labucyo ahuthuk. Omojothi tho nang d'atek nang akolon n'arami hadiri hedima h'evanjilio.
\v 20 Th'arami thah'evanjelio awon nang ara ohifak lefitha, dacama nang dindak kwong abangi, iring nera nang icamarik.
\p
\v 21 Onyahi ithai de Tycikus, olai lomunoi karik ohoigyemani ladiri l'Ohobu, onyahi ithai de asang karik arami fodok, ditek ithai ainyong ehandyo nang dini.
\v 22 Asulak nang inyong dothai th'arami thohune, ditek ithai angai isuka ohoi dini. Isulak ohoi inyong dothai dithakolyo othaja hothai.
\p
\v 23 Elik n'ahwandek thoiwona d'olarok. Amuno n'eruk th'Ojok Omonye karik Ohobu Yesu Kristo.
\v 24 Alwahio n'Ojok thoiwona d'ohothing homuno Ohobu lohothai Yesu Kristo th'amuno thanaang oye.