lky_reg/48-2CO.usfm

\id 2CO
\ide UTF-8
\h 2 Korinsia
\toc1 2 Korinsia
\toc2 2 Korinsia
\toc3 2co
\mt 2 Korinsia
\c 1
\cl Ebwayit 1
\p
\v 1 Paulo, ohoifahani lo Kristo Yesu, th’awahan thon’Ojok, karik Timoteo, olai lohothai, d’ekklesia n’Ojok nawon di Korinthia, karik d’ohothing bukulung hodwa h’Ojok howoni dihap ho Achaia.
\p
\v 2 Alwahio thoiwona dothai karik elik th’Ojok, Omonye lohothai karik Ohobu Yesu Kristo.
\p
\v 3 Ojok karik Omonye l’Ohobu lohothai Yesu Kristo thoifufurye. Inyong lo Omonye l’amiehina karik Ojok l’alengan n’esuka nayyu fodok.
\v 4 Ithasukayo ohothai Ojok ara nayyu ditha ethathaciana, dithasukayo ohothai ara nayyu, ohothing howon ditha h’ethathaciana. Ethasukayo homok ara nayyu, th’ethasukayo than’ayyu then’ethasukayerek ohothai Ojok ara nayyu.
\v 5 Aca, iring aang ethathacianitha ho Kristo iherunu thohothai, aang dang kodien ethathacianitha hahothai iherunu tho Kristo.
\v 6 Ti, ara ithathacianie ohoi, ithathacianie, thesuka thanathai thanayyu karik thethalwahuna thanathai; karik ara isuka ohoi ara nanyyu, isuka ohoi thayiji thanathai ara nayyu.
\v 7 Awang eyihina nahoi thoithai ithathanianga, anyo, itek ohoi hijan engara ethathacianitha karik ingaru ithai dang esuka nahoi ara nayyu.
\v 8 Aca, aang ohoi iwak hijan ithai thaang hoteha tuhudik, olarok, ethathacianitha hewon ohoi hosong di Asia. Aindehi ethathacianitha ateluna akolon nanhoi, took, ohoi ehaya ara namoyong th’esu.
\v 9 Diri, ewon ohoi nya h’asuduhe n’ocamitha h’aye dihosi hohoi. Owon nya ahanya, tek ohoi inihi eyihina dihwandek hohoi, ti, kombwo d’Ojok, loithadocyo ohoyak.
\v 10 Ethahoru inyong ohothai th’abangi naye; ithahoru de dang ikoti ohothai. Ethuk ohothai eninina eyihina nahothai dihide honyong, doindu ohothai ithahoruna.
\v 11 Ihandyo de inyong asang hune, iring nelwahyerek ithai ohoi thomojitha thohothai. Ofurak de ohothing holwa ahinwarang thohoi th’esoritha thah’esarahini th’omojitha thoh’ohothing holwa.
\p
\v 12 Ethadara nahoi na: anyahi ohoi othaji karik ahu nahoi hijan diri esuka ohoi dihap th’abisan karik th’abangi thon’Ojok, ikara thenihina ahwandek d’olofioro h’elathulo, ti, d’alwahio n’Ojok.
\v 13 Igero ohoi dothai aning naang ocohi dothai dihena karik ditehan tuhudik; ayenio nang hijan itek ithai de tuhudik,
\v 14 iring nethuhorik ithai atehan ohoi tuhudik ara oyirik, hijan ocohi dothai dithadara thohoi, d’ofaning j’Ohobu lohothai Yesu Kristo, iring nethadarik ohoi de thoithai.
\p
\v 15 Anyo, ayenio nang nya arami hune, awak nang nya ainduna dothai dodo, difunu ithai nya ifothunerek ayiji etharehe.
\v 16 Awon nang inya hegigilo diaden atiharu ithai oyihoi hindang di Macedonia. Thiya, awak nang nya koti atihyo ithai oyihoi hindang tho Macedonia; thiya, ithai nang ira isulak d’oyihoi lo Judea.
\v 17 Egigilo hindang nya ahani, eririhitha nang aden nya re? Awak nang nya ehandyo asang ara othulo ahani, dajarik nang, “Aa, aa,” dia “A a, a a,” d’orii oboithe?
\v 18 Ti, iring Ojok diri, ocame lohoi dothai, ikara “Aa” dia “A a.”
\v 19 Aca Olonyi l’Ojok Yesu Kristo, lonyahi Silvano, Timoteo karik nang dothai, ikara “Aa” dia “A a.” Kombwo, inyong lo juui “Aa.”
\v 20 Aca eruhohina bukulung n’Ojok nawon juui inyong “Aa,” ditha honyong. Inyong na, tholonyong dang ejyo, “Amen” d’abolori n’Ojok.
\v 21 Thene, Ojok ithaithak ohoi hothai ditha ho Kristo; inyong aboroyo ohoi,
\v 22 adwanyak arijori nanyong dohoi karik esarak dithaja hohoi Ohoile ara ethamijani n’ainyong de naindu.
\p
\v 23 Ti, elongo nang Ojok, thoiwona ara latihak ohoile hindang, hijan arami hesarak nang aangan ainduna di Korinsia nya, hijan dafithok nang ithai.
\v 24 Ahani ne, ikara hijan iwak ohoi awonan ara ohothwaha dihide h’eruhon nathai. Kombwo, ohoi ohoigyemak hothai d’amuno nathai, iring iwetha ithai ara nako ditha heruhon nathai.
\c 2
\cl Ebwayit 2
\p
\v 1 Inyong na, tholonang, awak nang kodien aang nang aindu thothai th’ejiringa.
\v 2 Ara eyanu nang dothai adihari n’othaji, ara ngai de isarak nang amuno, arahari inyong lathuk nang ethadiharyo othaji lonyong lya?
\v 3 Egero nang iring negerorik nang ne, hijan dara ara nang laindu dothai, daang ohothing hoira ithamunoyo nang, ithadiharyo othaji hindang. Enihi nang ahwan dothai fodok, dorijoro amuno hindang iring amuno nawon dothai.
\v 4 Aca egero nang dothai th’ethathaciana nahittok, adihari n’othaji karik th’ehiyo olwarai. Aang nang nya egero dothai hijan dodiha ithai othaja. Kombwo, awak nang nya ithai thoteha tuhudik amuno nawon nang honyong dothai.
\p
\v 5 Ara athuk othulo lobo eyana adihari n’othaji, iyanu, ikara donang hamaring, thoyihoi tholobo, ikara dithadingoyo esuka nathai, ti, dithadingoyo esuka nathai fodok.
\v 6 Asario n’othulo lya th’elulung, aang ocohi.
\v 7 Inyong na, dirahan asaryo inyong, ira ithai imiehina, ara ithai iyoboyo inyong. Ihandyethek ahani, tek adihari n’othaji atelu inyong.
\v 8 Inyong na emamajyo nang ithai, iruhohina amuno nathai donyong.
\v 9 Ahu ne nanya egerohinerek nang dothai, dithemyo nang ithai, dateharik nang ara eruhu ithai ehandyo aning nenyahi ohoi ithai thoihandye.
\v 10 Ara emiehi ithai othulo loboling, amiehi nang dang othulo le. Aning nathuk nang amiehina – omiehini inyong na thoithai ditha h’awonan no Kristo.
\v 11 Owoni arami hune ahani, tek ohothai Sitan ahongorik. Aang ohoi ingodo amoloha hanyong.
\p
\v 12 Angahi nya nang Ohobu oyihet, ahibu nang aindu di Troas dityenio evanjelio no Kristo diya.
\v 13 Kabong nang nya othaji iliharu, anyo, kaang nang arimak lalalai, Tito, diya. Edyaharu nang isong, nang apulyo di Macedonia..
\p
\v 14 Ti, afurahina nahinwarang thoilo d’Ojok, loiyatho ohothai ditha ho Kristo dirimahina juui aning newak.
\v 15 Thol’ohothai, ithalyehi inyong amujan no Kristo, d’ohothing hathuk ethalwahunu karik hafwo ingohunu.
\v 16 D’ohothing hafwo ingohunu, amu ara aye d’aye. Dohoithahorunu hulya, omu th’esu, d’esu. Ngai osiru d’asang hune?
\v 17 Ikara ohoi iring ohothing olwarai hoithanyangyo ocame l’Ojok dirimahinerek aning nabo nayyu dihwandek hosong. Kombwo, th’alibori than’ahu n’egyema, icama ohoi ditha ho Kristo, iring osuluni ohoi th’Ojok, dihonde h’Ojok.
\c 3
\cl Ebwayit 3
\p
\v 1 Eculuyo ohoi ethahuyo ahwandek ikoti? Aang ohoi iwak amaninihio h’ewuwulio dothai dia thothai, dia iwak ohoi?
\v 2 Ithai thahwandek amaninihio hanyahi ohoi, hegero dithaja, hatehi karik hehenai ohothing bukulung.
\v 3 Ithaithahina ithai hijan ithai amaninihio tho Kristo, asang hafuni th’egyema nahoi. Igero nya, ikara th’ahari thah’egerorik, ti, th’Ohoile thol’Ojok lomijyo. Aang inya igero ditha engebeha h’omorik, ti, ditha engebeha h’othaja h’ohothing.
\v 4 Inyong ne enihina nahoi ahwandek, newon ohoi honyong tholo Kristo dihithemi h’Ojok.
\v 5 Aang ohoi icohi th’ahwandek thahahoi ajaran hijan asang fodok thohoi ofuni. Combwo acohina nahoi ehandyo aning nabo, th’Ojok oindu.
\v 6 Ojok inyong isarak ohoi acohina awonan ara ohoigyemak h’emora angejuk. Ikara emora ne n’amanini, ti, n’Ohoile. Aca ottohyo amanini, ahibu Ohoile isarak esu.
\v 7 Thene, amaji n’egyema n’aye – nettohohini dihide h’omorik – oindu ditha hajahitha n’abolori nera olonyirok ho Israele imijyerek gwo dihomong ho Musa. Owon ahani, anyo, n’abolori n’ahomong nanyong, nanya enor.
\v 8 Angai de oindu abolri n’amaji negyema n’Ohoile ijahitha?
\v 9 Aca berien na, ara owon amaji nangocyerek arami ara hamonyong h’abolori, angai de oindu abolori n’amaji nangocyerek arami habis ikalahina?
\v 10 Aca diri, aning naya athuhi ethabolory, aang hoithabolorunu thoyihoi tholya, anyo, th’abolori than’athuk inyong akaru.
\v 11 Aca, ara owon nya aning nalo adi h’abolori, angai hathi de aang aning namanya mak howon h’abolori nakalaru th’abolori?
\p
\v 12 Iring ewon henihina najak ahani, iko ohothai bebe.
\v 13 Ikara ohothai iring Musa, lonya imuhok ahomong nanyong, tek olonyirok ho Israele atehu gwo abolori nanya alo ipwaharu.
\v 14 Ti, akoli nya ahosi hasonng. Aca d’ofaning l’ahanana lo, Ara isong hehena emora angoroi, orasa emuhet n’ahomong nya dimaji. Kabong hoiduhuni adi, anyo, ti, adi thotho Kristo, athuhi eduhuna.
\v 15 Ti, juk ahanana, ara Musa leherai, imuho othaja hosong.
\v 16 Ti, ara othulo leloitho d’Ohobu, emuhet eduhuni adi.
\v 17 Thene, Ohobu, inyong Ohoile. Amaji nawonderek Ohobu, owon esuka iring iwak iye diya.
\v 18 Thene, ohothai bukulung, howon h’ahomongithe habutho, etehu abolori n’Ohobu. Ohothai hoiloicye ditha h’abolori nehyelaru ne, nabo tholohide hanabo, iring th’Ohobu, inyong lowon ara ohoile lo.
\c 4
\cl Ebwayit 4
\p
\v 1 Inyong na, anyo, ewon h’amaji negyema, karik efothu ohothai amiehina, aang ohothai ithaluho.
\v 2 Kombwo, ethuk ohoi edehina oyihothik hoidima karik heyanu ajwuon n’ahu. Aang ohoi idaha th’ahongon karik aang ohoi ithathalik endafaitho ocame l’Ojok; arahari dohoi, anyahina ti, arami hadiri. Isarak ohoi ahwandek hahoi dithaji h’othulo dihithemi h’Ojok.
\v 3 Ti, ara imuhoevanjelio nahoi, imuho d’ohothing hafwo dingohunu.
\v 4 Dosong, athuk ojok l’ahap ethangodoyo ahosi hasong haang hoiruk. D’ahani ne, aang ocohi dosong ditehuna afangan n’evanjelio n’abolori no Kristo, lowon ara arijori n’Ojok.
\v 5 Aca aang ohoi ilolongok ahwandek hahoi. Ti, inyahi ohoi Kristo Yesu, ara Ohobu, ara ahwandek hahoi, ara ohoigyemak th’ahwan thono Yesu.
\v 6 Aca Ojok olefeng inyong ojyo, “Oindu de afangan iwulo thahta omudwe.” Athuk enwaha ditha h’othaja hohoi, disahina afangan n’atehan abolori n’Ojok ditha hawonan no Yesu Christo.
\p
\v 7 Ti, iwon ohoi h’ebarit na ditha h’ohudongio hoyaa th’amothong. Inyong naleyo inyong theler hijan akolon nabolo bebe n’Ojok, ikara nahothai.
\v 8 Ithathaciana ohoi th’oyihothik olwarai, ti, ikara ara nenihi ohoi. Ingalaju ohoi, ti, iyihi ohoi.
\v 9 Ithagyemye ohoi, ti, aang ohoi ohalanyahini, obahahini ohoi dihap, ti, aang ohoi isasahathahini adi.
\v 10 juui eyaitho ohoi dihwan hohoi aye no Yesu, dithalyehini dang dihwan hohoi esu no Yesu..
\v 11 Aca ohoi hohomijyo hulo hohowahi thoye th’ofure tholo Yesu, dithalyehini esu no Yesu ditha h’ahwan n’othulo naye na.
\v 12 inyong na, aye negyema dithahohoi. ti, esu negyema ditha hothai.
\v 13 Ti, ewon h’ohoile lorijoro h’eruhon, iring lathuhi egerohina, “Eruk nang, inyong nacama nang.” Eruk ohoi dang, inyong necama ohoi,
\v 14 anyo, itek ohoi hijan loithadothu Ohobu Yesu, ithadothu de dang ohothai ho Yesu, eyanu ohoi hothai ditha hawonan nanyong.
\v 15 Aca asang fodok owoni thoithai, diyanu alwahio newas d’ohothing holwa ne afurahina n’ahinwarang d’abolori n’Ojok.
\p
\v 16 Ahana ne, aang ohoi ittaluho. Juk esusuk ahari tholondak dohoi, tholothwa ethalengejuhyo th’ofaning th’ofaning.
\v 17 Ethathaciana nasuk karik neyelehe ne, iyanu dohoi auhan naang ingohunu n’abolori naang othemunu bukulung.
\v 18 Aca aang ohoi ingengelyo asang hatehunu, ti, asang haang otehunu. Asang hecohi atehuna, hothenene; ara haang ecohi atehuna, ho mak.
\c 5
\cl Ebwayit 5
\p
\v 1 Etek hijan ara athwa – amoroko - nahothai nothohop nethorhoja, ewon hathwa th’Ojok. Ikara athwa nehuhumye th’ahas thoh’othulo. Athwa namanya mak, di hide.
\v 2 Aca ditha amoroko ne, ewiwinya, ewak ohothai thoithayofohini th’athwa thanahothai thonothohide.
\v 3 Ewak ne, anyo, theyofohina inyong aang de erimak ahwandek iluluyai.
\v 4 Aca diri, ara ohothai hewon d’athwa ne, ewiwinya ethathaciana. Awang ewak esuka kwong eyofo. Kombwo, ewak ohothai thoimuhohini, dodiloro esu, adiloro aye.
\v 5 Lehuhumyo ohothai d’aning ne, inyong Ojok, loisarak ohothai Ohoile ditherohina ohothai ainyong naindu.
\v 6 Inyong nara, juui, inihi ahwan ahibu iye itek hijan, ara ohothai hohoiwon dihang, dith’ahwan, elama th’Ohobu.
\v 7 Aca idaha ohoi th’eruhon, ikara th’atehuna.
\v 8 Iring na, iwon ohoi henihina n’ahwandek. Iwak ohoi kodien esuka olamarai th’ahwan, dihang, h’Ohobu.
\v 9 Iring na, thoiwona ara aning newak ehandyo, dihang dia adi thohong, dithamunoyo inyong.
\v 10 Ohothai thoiwona dihithemi h’okara l’akanyo lo Kristo, difothu othulo ainyong nawon d’asang hehandye dihwan, dayiji dia dimonyori.
\p
\v 11 Inyong nara, amanio ohothing thoteha abangi n'Ohobu. Awonan nahoi ara hongai, otek Ojok theleer. karik ayenio nang dang hijan oleyo theleer dithaja hothai.
\v 12 Aang ohoi ithayijyo ahwandek hahoi, ikoti ikara thoitha, ti, ohoi hoinyahi ithai ahu nethadararik ohoi thoithai, diwon ithai h'ehtarangio d'ohothing hoifiyo ahwandek th'asang thahatehuni, ti, ikara th'aning thanawon di thaji.
\v 13 Aca ara ethorohoja ohoi ahosi, otek Ojok; ara obis ohoi ahosi, oyyu de dothai.
\v 14 Aca amuno no Kristo iyohoitho ohoi, anyo, ohoi amonye ingohi ahani. Oye othulo aboithe th’ohothing fodok, inyong na, athuk ohothing aye fodok.
\v 15 Aye inyong th’ohothing fodok, aang ohothing homijyo isuka d’ahwandek thahasong, isukai ara hanyong, anyo, aye inyong thosong, ethadothuni inyong.
\v 16 Th’arami thohune, th’ofaning l’ahanana, adihithem, aang ohothai imijyo d’othulo ara othulo, juk nya emijyo ohothai do Kristo ara othulo. Ti, aang ohothai imijyo donyong ahanya.
\v 17 Inyong na, ara owon othulo ditha ho Kristo, iwon ara ayeyo angejuk. Asang angoro, athuhi afwan adi. Idoro, athuhi afuna ara angejuho..
\v 18 Asang hune bukulung th’Ojok. Ethamorik ohothai honyong tholo Kristo. Karik athuk esarahina dohothai amaji n’emora.
\v 19 Ahana, ditha ho Kristo ethamorik Ojok ahap honyong, aang hoiherye epal nasong hohomok. Inyong lo, lesarak ocame l’emora dohothai.
\p
\v 20 Ahani ne, athuhi esarahina dohothai amaji n’ohothing howetha dimaji ho Kristo, ojahithere Ojok lefiyo tholo ohothai. Imojyo ohoi hothai, tho Kristo: “Imorathik h’Ojok!”
\v 21 Esarak inyong laang otek eyau, thoteha eyau thohothai, defunu iwonan ara abisan n’Ojok ditha honyong.
\c 6
\cl Ebwayit 6
\p
\v 1 Egyema amaji aboithe honyong, ikokolok ohoi dang ithai thaang hoifothu alwahio n’Ojok ija.
\v 2 Aca ojyo inyong, “D’omiru hoyyu, ethaningyo nang ithai, karik d’ofaning l’ethalwahuna, alwahyo nang ithai. Omijye, omiru hoyiji hulya. Thene, orii l’ethalwahuna lya. Omijye, ahanana, ofaning lethalwahuna.
\v 3 Aang ohoi isarak omorwong lebosorik dihithemi h’othulo loboling, aca aang ohoi iwak amaji negyema nahoi ofure lonyong thoithorohojye.
\v 4 Kombwo, iwak ohoi esarahina ahwandek hahoi ara ohoigyemak h’Ojok ditha: angongoi, ethathaciana, ehawa, akolon nesuka,
\v 5 dith’abahio, difitha, dithethena diyihoi, egyema nako, ditha aharie naang ajoo, ahure,
\v 6 alibori, ditha atehan, ditha angongio, anyalami, ditha Ohoile Lodwa karik ditha hamuno nadiri.
\v 7 Ditha ocame ladiri, ditha akolon n’Ojok. Iwon ohoi h’akolon n’abisannenget karik nehothong.
\v 8 Igyema ohoi di bolori karik daangan nethahabuyo, dimoryo karik dithahuyo, ara ohotumak karik ohoiruhok, ohodwala,
\v 9 Igyema ohoi iring ohothing haang otehi, ti otehi ohoi tuhudik, iring ohothing hoirwahitha, Ti, itehu ohoi, ohoi hohoisuka, iring ohoi hosarye thoigyemitha thohohoi, ti kabong ohoi ottohori.
\v 10 Igyema ohoi iring hodiha othaji, ti imuno ohoi juui, iring ohoicanak, ti, ethabarayo ohoi holwa. Iring hawang aning nabo, ti, owoni hasang bukulung.
\p
\v 11 Ethuk ohoi acama eladiri fodok dothai, ithai Okorinsia, karik ongai othaji lohoi ara lolat.
\v 12 Aang ithai imihye thohoi dithaja hothai, ti, ithai amonye imihyo othaja hothai.
\v 13 Thene, d’eloyicyo narijoro – acama nang iring okalifonit – ongahina dang ahwandek hathai ara halat.
\v 14 Ithai thaang hoiringahini thothorihini amaji aboithe didohoitho. Aca ainyong ongara abisan karik etharohojo n’oyalu? ainyong elamorot n’afangan h’omudwe?
\v 15 Ainyong eruhon ocohi Kristo awonan ho Belial? dia ainyong ongara ohoiruhoni karik othulo laang hoiruk?
\v 16 Ainyong ngona eruhon owon dihiji ha Templo karik ajohi? Ohoi a templohio h’Ojok lomijyo, iring ojyo Ojok, “Esuka nang de dihiji hosong, nang adaha dihiji hosong. Awon nang de ara Ojok losong, isong de awoni ara ohothing hundang.”
\p
\v 17 Inyong na, “Indu adi thoihiji hosong, ara iye isuka arakang, ojyo Ohobu. “Hoithin aning nebot, Nang efothu iye tuhudik.”
\q
\v 18 Awon Nang de ara Omonye dohoi, ithai de iwon ara olonyirok karik angarok,” ojyo Ohobu Lohittok.
\c 7
\cl Ebwayit 7
\p
\v 1 Ohothing homunoi, iring ewon h’asang heruhonini hune, helalayethek ahwandek hahothai th’ebothi h’ahwan karik h’ohoile. Hethaliborohina adwaran ditha h’abangi n’Ojok.
\p
\v 2 Isarahina ohoi amaji! Kabong ohoi ithapalyo othulo loboling. Kabong ohoi ithabocyo othulo loboling. Kabong ohoi ithabarayo ahwandek th’othulo tholobo.
\v 3 Aang nang acama arami hune, didararik ithai. Athuk nang anyahina ithai hijan, ithai hodithaja hohoi, dohoi diye hothai, karik disuka hothai amaji aboithe.
\v 4 Iwon ohoi henihina nahwan dothai nahittok. Karik obolo ethadara hiding thoithai. Efut nang h’ayiji karik abolo amuno hidang bebe, dihide h’ethathacianitha olwarai hune.
\p
\v 5 Afuna nya nahoi di Macedonia, kabong ahwandek hahoi oyiri. Kombwo, ethathaciana ohoi nya th’oyihothik olwarai: th’angica, tholondak karik abangi tholothwa.
\v 6 Ti, Ojok, lethamunoyo ohothing holau ahwandek, ethamunoyo ohoi th’edwongon thono Tito.
\v 7 Ikara nya ti th’edwongon thono Tito ithamunoyo ohoi Ojok. Ethamunoyo dang ohoi, th’efothuna thono Tito tuhudik. Anyahi ohoi amuno nathai nabolo donyong, adihara n’othaja hothai karik awahan nathai nang bebe. Amuno nang dang bebe.
\v 8 Juk ethadiharyo amanini hindang ithai othaja, aang nag eda. Ti, eda nang atehuna hindang esarahina nanyong ithai othaja adihari, juk orii tiibai.
\v 9 Thene, amuno nang, ikara anyo eyanu dothai adihari n’othaja, ti anyo eyanu adihari n’othja ne dothai aburunu d’Ojok.
\v 10 Adihari n’othaji d’arami h’Ojok, eyanu aburunu karik ethalwahuna. Ara adihari n’othaji d’arami h’ahap iyanu aye.
\v 11 Idoro ainyong iyanu adihari n’othji d’arami h’Ojok. Ottiha awahan nahoi anyahina hijan kabong iye ipal. Idoro, edara nahoi, abangi, awahan ateha, ngai obis, ngai ipal.
\v 12 Juk egero nang dothai, aang nang egero th’othulo tholoipa, dia th’othulo tholo ehandye donyong ara namonyong. Egero nang dothai, dithalyehinerek angai ojahithi oisukaitha dihiji hohoi karik ithai dihithemi h’Ojok.
\v 13 Th’oyihoi tholya, ethakolo ohothai fodok. Dihide hamuno nahoi, emuno ohoi dang bebe th’amuno thono Tito, anyo, ethalengejuhyo ithai fodok ohoile lo Tito.
\v 14 Aca ara ethadara nang donyong thoithai, kabong hoisarak nang ajwuon n’ahu. Kombwo, iring owoni asang hejyo ohoi dothai hune ara hadiri, ethadara dang hahoi do Tito thoithai owon dang ara nadiri.
\v 15 Amuno nanyong dothai abolo bebe, iring iyu inyong, eruhon nathai fodok, karik efothuna nathai inyong th’amuno, abangi karik thehihira.
\v 16 Amuno nang, anyo, awon nang h’enihina bukulung dithothai.
\c 8
\cl Ebwayit 8
\p
\v 1 Iwak ohoi ithai, olarok, thoteha alwahio n’Ojok nathuhi esarahina d’ekklesiahio ho Macedonia.
\v 2 D’omiru h’athemio nahithok n’ethathaciana, eyanu amuno nahittok karik ecan nabolo abara n’ahorio.
\v 3 Iring na, ocohi donang dinyahina hijan esarak isong, iring ocohi dosong, karik tholohide hanacohi dosong dihandyo iring owak isong.
\v 4 Amojyo isong ohoi awahan angara ditha h’egyema n’ohothing h’Ojok hodwa.
\v 5 Ti, kabong arami hune ofuni ifuhon iring iyihi isong, ti, ecahi esarahina ahwandek hasong d’Ohobu karik d’ohoi th’awahan thon’Ojok.
\v 6 Iring na, iwak ohoi Tito, lathuk aculuyo egyema ne, thoingohi dihiji hohothai egyema nalwahio ne.
\v 7 Karik dang ihandyethek asang bukulung th’eruho, th’acama, th’atehan karik th’amuno thanathai dohoi; karik dang oyijotho tholohide hayiji d’egyema n’alwahio ne.
\v 8 Ajyo nang ahani, ikara ara eringahina, ti, dithemyo eladiri n’amuno nathai ditharijyerek inyong d’amuno d’amuno n’ohothing homok.
\v 9 Aca itek ithai alwahio n’Ohobu lohothai Yesu Kristo. Juk nya obara inyong tholohothai, aindu icanan tholohothai, difuna ibara th’ecan thananyong.
\v 10 D’arami hune, esarak nang de ithai ocame lolwahu ithai. Oyinga longole, kaang ithai iwak aculuyo ehandyo aning nabo ija; ewak ithai dang diri ehandyo.
\v 11 Thenene, ingohina inyong adi, iring nanya awonderek awaha n’ehandio, thoihandye karik engohini dang adi, iring ocohi dothai.
\v 12 Ara iwak ithai engohina adodoro ne, inyong ne aning nawahi karik neruhi. Inyong na aning nehandye th’aning thanawon d’othulo. Ikara th’aning thanawang th’othulo. Ikara ethahorohina alwahio d’ohothing howak, karik ethathaciana dothai, ti, alwaha narijoro see.
\v 13 Owon inyong na iring nathuhi egeryerek: Lowon holwarai, aang aning nafithoro donyong. Ara lowon haning tiibai, awon haning naang howon thonyong,”
\v 14 Awonan hohoi d’omiru hulya ne, isarak de ainyong owak isong. Owon ahani ne, disarak awonan nasong aning newak ithai, dowon arijoro.
\v 15 Owon iring negerorik inyong: “Lowon holwarai, awang howon haning nafithoro; ara lowon ho tiibai, aang nya howon haning nawang.”
\p
\v 16 Ti, humo d’Ojok loisarak dithaji ho Tito awahan narijoro dindafaitho nawon nang honyong dothai.
\v 17 Aca kabong nya hoiruhu efio nahoi hama, ti, owak inyong nya dang inyong bebe. Oindu nya inyong dothai, th’awahan thananyong olefeng.
\v 18 Ethuk ohoi nya asulahina honyong olai, lefufuryo ekklesahio fodok th’egyema thananyong dinyahinerek evanjelio.
\v 19 Ikara ne hamaring, karik dang anyimu inyong ekklesiahio ara omotte lohoi didaha h’ehandio na nalwahio, negyema ohoi d’abolori n’Ohobu thahwan karik thawahan thanahoi.
\v 20 Ohoi hodikarahina ewiwinya nolobo othulo thahorihina thanahoi ahwandek d’egyema ne.
\v 21 Imijyo ohoi tuhudik dihandyo aning nayyu, ikara dihithemi h’Ohobu hamaring, ti, karik dang dihithemi h’ohothing.
\v 22 Ohoi dang hesulak olai loboling hosong. Ethuk ohoi athemyo inyong th’oyihothik olwarai, ara ohoi irimak inyong lo ara loyinik egyemathik olwarai. Owak inyong lo egyema thenene, anyo, th’ayenio thanawon honyong dothai.
\v 23 Iring do Tito, inyong lo oingarit karik ohoigyemani honang thoithai. Iring d’olarok hohothai, isong hulo ohoifahak th’ekkesiahio. Isong hulo abolori do Kristo.
\v 24 Ithaithahina isong ainyong onyahi amuno nathai, karik onyahina d’ekklesiahio ahu nethadararik ohoi thoithai
\c 9
\cl Ebwayit 9
\p
\v 1 Th’arami thah’egyema d’ohothing hodwa h’Ojok, awang owak hijan egero nang dothai.
\v 2 Atek nang awahan nathai, nesarak nang ethadar d’ohothing ho Nacedonia. Anyahi nang holwa hosong hijan Achaia nethilayo isong gee ingalongole. Esarak eahan nathai holwa hosong thoigyemai.
\v 3 Ethuk ohoi efahahina olarok, daang ethadara nahoi thoithai oka ija; dithuthuna dang ithai arabo, iring najararik nang ithai thoiwona.
\v 4 Ara ikoti ofuni ohothing ho Macedonia, hofuni honang irimahina ithai kabong hoihuhumyo ahwandek – ofuni de ohoi ahosi ijwuon – aang nang ajyo aning nabo thoithai, dinihina ahwandek hahoi dothai.
\v 5 Inyong na, egigilo nang, owak nya ikokolohini olarok thoifunu dothai dihuhumyo arabo esorio nanya athuhi eruhohina dothai. Owon ahani, doindu iwonan ara aboroyo, ikara ara aning nahoruni.
\p
\v 6 Ohonyek l’arami hune lo: othulo loyeyo ohinyomo th’aririhi, oindu de dang iririhi dingongocyo; ara loyeyo th’aboroyo, oindu de dang ingongocy aboroyo.
\v 7 Othulo thoisarak, iring nathuk inyong eduhumya dithaji honyong, ikara theririhitha dia theringahina; aca omuno Ojok ohoisarani lonyalam.
\v 8 Karik ocohi d’Ojok disarahina alwahio thoiburuyahe ithai, dara juui, ditha h’asang bukulung, diwon ithai h’asang fodok hewak ithai.
\v 9 Ofuni de iwonan ahani, dithalwaryo ithai egyemathik hayyu h’ohothing h’Ojok hodwa, ti, akrik dang, diburuyahye. Owon inyong na, iring nathuhi inyong egerohinerek: “Athuk ebwayo ebarithi hanyong, esarak d’ohoicanak. Abisan nanyong, omanya mak.”
\p
\v 10 Loiyanu ohinyomo d’ohoromoni loromo, eyanu angiryang d’anyari, iyanu de dang karik ethalwaryo ohinyomo horomoi. Ithaboloryo de inyong engongocio n’abisan nahoi.
\v 11 Ithabaraye iye de thoyhothik abo abok, docohi dohoi dihoryo. Iyanu de ehandyo ahani ne, afurahina ahinwarang d’Ojok tholohoi.
\v 12 Ehandyo egyema ne, aang hoiyanu ti asang hawahi ohothing h’Ojok hodwa, ti, iburuyahyo dang egyemitha olwarai, hafurahinerek Ojok ahinwarang.
\v 13 Anyo, thathemyo iye karik theruhohina dohoi egyema ne, ithaboloryo iye de dang Ojok th’eruhon thanahoi anyahina dindak evanjelio no Kristo. Ithaboloryo iye de dang Ojok th’ahorio thaneduhunerek iye ara iye isarak dosong karik d’ohothing bukulung.
\v 14 Othifeyo isong ithai. Isong dang amojyo thoithai. Ihandye isong ahani, anyo, thalwahio n; Ojok thanabolo bebe, nawon dihide hothai.
\v 15 Humo d’Ojok, th’esorio thanaang oco enyanyahyo!
\c 10
\cl Ebwayit 10
\p
\v 1 Nang, Paulo, thahwa ikokolok ithai, th’alauna ahwan karik anyalami no Kristo. Alau nang ahwan ara nang lawon dihji hothai, ti, engere nang dothai, ara nang lalama thothai.
\v 2 Amojyo nang ithai hijan, ara nang lawon dihiji hothai, aang howak engere nang thenihina ahwan hindang dothai, iring egigilo nang, awak nang engere, ara eda nang arami h’ohothing hoigigilo hijan ohoi hoihandyo asang fodok iring nehandyerek othulo.
\v 3 Aca juuk dwona ohoi ohothing, aang ohoi ingalafa ara othulo ija. Aca aferya karik atangir hengalafarik ohoi, ikara h’othulo hamaring. Kombwo owoni h’akolon n’Ojok ditharohojyo amasok hako.
\v 4 Iyaru isong elafere nepal dindur dijojo.
\v 5 Itharohojo ohoi dang asang hahittwak, hadotho didara atehan n’Ojok. Iduhu ohoi egigilitha fodok ara hefitha deruhon no Kristo.
\v 6 Ethuk ohoi ethuthuna disaryo oyihothik h’edidara, ara edara nathai nengohunu.
\v 7 Omijyethek tuhudik d’aning nawaon dihithemi hothai. Ara lotek hijan inyong lo Kristo, thethayuhi ahwan hijan inyong lo Kristo, iring dang newonderek ohoi.
\v 8 Aca juuk ethadara nang tiibai ara nabolo bebe, th’akolon than’endafaitherek, nathuk Ohobu esarahina dohoi, diduhorik, ikara ditharohojyerek ithai, aang de ahu ojwu.
\v 9 Awang nang awak ajahitha nang lodithabangyo ithai th’amaninihio thohohundang.
\v 10 Aca ojyori ohothing homok, “Okoli karik omonyori amaninihio hanyong, ti, awonan nanyong thahwan ilik bii. Aang ocamitha honyong ocohini ethaningyo.”
\v 11 Ohothing hulya thoteha hijan awonan nahoi ditha hocamitha h’amaninihio hahoi, ara aang ohoi thatha egyemitha hahoi, ara ohoi diya.
\v 12 Aang ohoi ingere d’elulung th’ahwandek thahahoi dia itharijyo ahwandek hahoi h’ohothing hoithahuyo ahwandek. Ti, ara othemye ahwandek tholobo thosong, etharijye ahwandek holobo thosong, aang otehi..
\v 13 Ti, aang ohoi de, ithadara ara nethalangyo. Kombwo, ihandyo ohoi de ti, iring nathuk ohoi Ojok esarahinerek thoihandye, oihori lolo lwai dothai. Awang ohoi iwak afonihina ahwandek iring ohoi hakaang hoidwong dothai.
\v 14 Ohoi nya ahithemi idwong dothai h’evanjelio no Kristo.
\v 15 Kabong ohoi ithadara tholohide h’egyemathik hohomok. Kombwo, eyihina nahoi inyong de na, iring obobolorunu eruhon nathai, olalathunu de egyema nahoi dihiji hothai.
\v 16 dityenio ohoi evajelio juk d’amisok thele hothai, kwong ethadara thegyemathik thahathuhi egyema dihap holoboling.
\q
\v 17 “Ti, lethadara, thoithadarai ditha h’Ohobu.”
\v 18 Aca ikara othulo londuhyo asuhe iruhohini. arahari othulo lowalu Ohobu.
\c 11
\cl Ebwayit 11
\p
\v 1 Ajyo nang kodien iwon ithai honang, ditha h’adohoitho n’odonge nang. Ti, ithai dang hewon honang hune!
\v 2 Anyo, ahain nang hothai. Awon nang h’ahaini n’elajok dothai, gee nang eruhohina amutha h’othulo aboithe. Eruhok nang disarahina dothai ahodwothi nohoibuha do Kristo.
\v 3 Ti, abang nang tiibai, iring nanya ithatumyerek amunu Eva th’ahongon thananyog, egigilitha hathai thaang hoithapanyaru ithai adi th’eruhon nadiri karik nalibo do Kristo.
\v 4 Aca ara dwo kodien oindu lobo anyahi dindak Yesu lobo, tho lethuk ohoi enyanyahaina dothai lo, Dia ara efothu ithai ohoile loikela, tho lthuk ithai efothuna lo. Dia ara efothu ithai evanjelio nekela than’ethuk ithai efothuna ne. Aca ewon ithai h’asang hune ara hacohi!
\v 5 Egigilo nang ikara nang lotti th’ohoifahak hoilongoi ara ‘ohoifahak ohithwaha’ hulo.
\v 6 Ti, juk kabong hoityenie nang dicama d’elulung, aang nang ithehtemahini atehan. Ditha oyihothik karik dith’asang fodok, athuk nang ithai esarahina thoteha arami hune.
\v 7 Eyau nang ngona dithabuyangyo ahwan hindang hijan dithahuye ithai? Nang alefeng kwong aridihina anyahi evanjelio n’Ojk dothai.
\v 8 Ahoru nang ekklesiahio hamok thosong, th’eruhuna alwahio thosong, delangaciarik dothai.
\v 9 Orii lawondrek nang hothai, nang awak alwaha, kabong nang ethathacianio othulo loboling. Aca esarak nang nya olarok hofuni tho Macedonia asang fodok hawak nang. Dith’asang fodok, esuka nang olamarai th’ethathacianio ithai. Thenene, nang lehandyo ahani.
\v 10 Iring owon eladiri no Kristo dtha honang, aang de ethadara hindang odularu dimasok h’Achaia.
\v 11 Anyo? Aca, aang nang ithai amuno? Otek Ojok.
\v 12 Karik aning nehandyo nang, arasa nang de ehandyo, daang nang ahorik ohothing howak ahujon iring ohoi, hoihandye asang hesarak isong abolori.
\v 13 Ohothing hojak ahani hulya, oiheiek holufa karik ohoigyemak odwalak. Idima isong ditha oihejek ho Kristo.
\v 14 Aang afalanga th’arami hune, anyo, juk Sitan, idima ditha h’anjelo l’afangan.
\v 15 Ikara afangan nahittok ne, ara idima ongacani honyong iring dedimarik ongacani h’abisa. Ayiji dia amonyori nasong de aning nethaithak, aning nehandyo isong.
\p
\v 16 Ajyo nang ikoti: lobo thaang igigiloi hijan ananga nang. Ti, ara igigilo ithai ahani, ifothuna nang iring othulo lodudufo, dethoboloryo nang ahwan tiibai.
\v 17 Aning nacama nang th’enihina ahwan thethadara, aang nang thoone acama iring nacamarik Ohobu; acama nang iring othulo lonanga.
\v 18 Iring ithadara ohothing homok th’elathulo, ethadara nang de dang.
\v 19 Aca isuka itha ith’amuno h’ohothing h’odonge. Ilofioro ithai th’ahwandek thahathai.
\v 20 Aca isuka ithai tuhudik h’othulo loihandyo ithai ara ongcani, adilyo ithai. abara thoithai, ethahuyo ahwan nanyong karik anangyo ithai dihomong.
\v 21 Ajyo nang thajwuon than’ahu, hijan ilik ohoi nya bii. Ti, ara ingere othulo lob – acama nang iring othulo lonanga – engere nang de dang.
\v 22 Isong aisong, Ojudei? Nang dang l’Ojudei. Isong ho Israele? Nang dang. Isong ongerenyihio h’Abramo? Nang dang.
\v 23 Isong ohoigyemak ho Kristo? (Acama nangang iring othuhoni). Akalak nang: d’egyema nako, difitha, dibaha karik iindehai dihori h’aye.
\v 24 Th’Ojudei, efothu nang ahwaly athomone aunihoi nabahal.
\v 25 Operok aunihoi abahye nang th’ahayo ebilat. Amirye nang th’omorik gelere. Operok aunihoi amirohini nang dith’ahari nahittok. Esuka nanng oharie karing ofaning dith’ahari nahittok dindak.
\v 26 Adaha nang nya d’amasok h’abangi: n’owori, ohoholak, ohothing hundang th’ahwandek, ohothing hoikela th’Ojudei, dith’abore karik difara, ahari nahittok karik tholarok hoikela.
\v 27 Egyema nang egyema najyori egyema na, ditha ohariethik haang ajoo, dith’ahure karik ahibothit, edwa n’anyari tiibai, dith’elik karik esuka iluluyai.
\v 28 Dihide h’asang hamok hune fodok, dith’adihari n’othaji hindang th’ekklesiahio bukulung.
\v 29 Ngai ilik karik aang nang elik? Ngai nya isarahini thoibosi, karik nang aang awulo?
\v 30 Ara owak nang thoithadarai, ethadara nang de th’aning thana ithaithak elik hindang.
\v 31 Ojok karik Omonye l’Ohobu Yesu Kristo, lathuhi aboroyo mak, otek hijan aang nang adwala.
\p
\v 32 Di Damascus, ohoindefani tholohodop h’Ohobu Aretas, ikeyo nya abore no Damacus dindefuna nang.
\v 33 Ti, ethacurohini nya nang th’akati tholoithulit h’ahtwa dindak. Nang angero thohas honyong.
\c 12
\cl Ebwayit 12
\p
\v 1 Owak ethadara, juk aang nang arimak aning nabo. Ti. athifoitho nang de amijyo karik ethalyehina n’ahithemi th’Ohobu.
\v 2 Atek nang othulo ditha ho Kristo, lonya indefuni dith’ahide ethaunihoi, afwoi oyingathik tomon larangwan, dia dihwan dia adi thohwan, aang nang atek, Ojok otek,
\v 3 Karik atek nang othulo lo. dia dihwan, dia adi thohwam, aang nang atek, otek Ojok
\v 4 endefuni di paradiso, ethaninguni acama ocamitha haang ocohi othulo acama ara kabong h’ohorihini thocamai.
\v 5 Th’othulo tholojahitha ahani, ethdara nang de. Ti, thahwan thono hindang, aang de ethdara, anyo, th’elik thohindang.
\v 6 Ara onyimuni nang dithdara, aang nang de awon iring othulo lonanga, anyo, acama nang de arami hadiri. Ti, aang nang de edehi ethadara, daang othulo legigilo thonang, arahari ara otehu nang, dia ithairu nang.
\v 7 Endafaitho nang ara laang ithahuyo ahwan hindang, anyo, dithaboloryo asang hethalyehini, aromohini nang oihwai dihwan, th’ohifak lo Sitan dithagyemyo nang, daang ang ethahuyo ahwan hindang.
\v 8 Operok aunihoi efiyo nang Ohobu, thoiyaru adi thonang arami hune.
\v 9 Ti, ajyo donang, “Ocohi akolon hindang dohoi, anyo othuba akolon ditha h’elihan.” Inyong na, ira nang kombwo ithadara th’elihan thonohindang, disuka akolon no Kristo dihide honang.
\v 10 Inyong na, efong nang tho Kristo ditha elihan, omiritha, ethathaciana, ethagyemio karik oisukaith homonyori, anyo ara nang lelik, nang ako..
\p
\v 11 Awon nang ara othulo lonanga! Iye iringak nang thonangai, anyo, era nang ithahuyo ahwan hindang. Anyo, ikara nang nya lotti l’ohoifahak hoilongoi ara ohithwaha, ikara nang aning nabo.
\v 12 Ethamijanihio hadiri h’ohifak hanya ihandye dihithemi hothai fodok th’akolon, ethaithitha karik asang hafalangai.
\v 13 Angai nya aang ithai iko th’ekklesiahio hamok, ara ikara aangan hiding ethathacianio ithai? Omiehina nang epal ne!
\p
\v 14 Ottihatha! Athuba nang diinduna dothai operohothi oithaunihoi. Aang de alo ithai ithathacianio, anyo, aang nang awak asang hathai. Awak nang ithai. Okalifinok thaang holwahye omonye hah’ahathingie. Kombwo isong tholwahye okalifink.
\v 15 Amuno nang de aduma karik ethadumayo th’ohoilehio thohothai.
\v 16 Ti, ahani ne, kabong nang ithai ethathacionio. Ti, th’ahongon thono hindang, ara nang endefu ithai th’ethadwalio.
\v 17 Arimak nang ngona aning nabo thothai, thol’othulo lasulak nang dothai?
\v 18 Ikokolok nang Tito loilo dothai. Nang asulak olai lobo donyong. Arimak ngona Tito aning nabo thothai? Kabong ohothai ngona idaha ditha ohoile aboithe? Kabong ohothai idaha odahit aboithe?
\p
\v 19 Igigilo ithai omiru hulya bukulung, ohoi hoikayo ahwandek hahoi thothai? Amijio n’Ojok inyong icama ohoi ditha ho Kristo, fodok dithakolyo ithai, ohothing homunoi.
\v 20 Aca abang nang hijan, ara nang de alindu, aang nang de ithai ifuni irimahina iring awak nang. Abang nag hijan kode owon de ethethena, ahaini, afwada di ngere, angica, amorio, amonga, anduhio n’asuhe karik engolohoca.
\v 21 Abang nang hijan ara nang de lanyahu, oindu nang de Ojok hindang ithalauna dihithemi hothai. Abang nang hijan oindu de nang othaji idihari th’ohothing thoh’eyau gee th’omiru hule lwai ahanana, kabong hoburunai th’ebothi, eleru karik asang h’amuno nahwan hehandyo isong.
\c 13
\cl Ebwayit 13
\p
\v 1 Operohothi lya oithaunihoi laindunerek nang dothai. “Asang bukulung ihuhumai dimaji, th’ahuthuhye arehai dia aunihoi h’ohothing hottihak ehandio nasong.”
\v 2 Athuk nang acama d’ohothing heyau ahithemi karik dohomok fodok, orii nang diya operohothi oitharehe. Ajyo nang ikoti: Ara nang laindu ikoti, aang ithai idehi.
\v 3 Anyahi nang ithai ahani, anyo, ithai hodithifeyo ainyong ithaithak hijan Kristo locama tholo nang. Aang inyong lo ilik donang. Kombwo, oko inyong lo bebe ditha hothai.
\v 4 Aca abehohini inyong nya di kruce ditha elihan, ti, omijyi inyong th’akolon thon’Ojok, Aca ilik ohoi nya dang ditha honyong, ti, isu ohoi de ditha honyong th’akolon thon’Ojok dihiji hothai.
\v 5 Ottihatha ahwandek hathai, ottihatha ara iwon ithai ditha heruhon. Othemyethek ahwandek. Aang ithai irimak ahani dihwandek hothai, hijan Kristo loditha hothai? - ara do ti, ngona ethuk ithai apwaharu athemio.
\v 6 Karik eyihi nang itek ithai de hijan ethuk ohoi apwaharu athemio.
\v 7 Thene, imojyo ohoi Ojok ithai thaang hoihandye aning nepal. Aang nang amojyo ahani, dijahitha ohoi ohothing hokabong opwaharu athemio. Kombwo, amojyo nang ahani, dihandyo ithai aning nathenunu, juk ohothai ijahitha hathuk apwaharu athemio.
\v 8 Aca aang ocohi ohoi ehandyo aning naang owon ara nadiri. arahari ti, eladiri.
\v 9 Aca, imuno ohoi ara ilik ohoi ahibu ithai iko. Imojyo ohoi dang hijan dithuba ithai bukulung.
\v 10 Egeryo nang asang hune ahibu nang alama thothai, dara ara nang lawon hothai daang nang ithai ithabangyo th’akolon than’endafaitho ithai – nesarak nang Ohobu diduhorik, ikara dirithahinerek ithai dihap.
\p
\v 11 Dicuhit, olarok, omunothik! Igyemathik dinyahahina ahwandek diyiji, dithakolyo ahwandek karik dimanya ditha h’elihan nahwandek karik nahap. Owon de Ojok lamuno karik lelik hothai.
\v 12 Imandathik emanda n’obiyuha nadwa. Ohothing bukulung h’Ojok hodwa, emandaye ithai.
\p
\v 13 Alwahio n’Ohobu Yesu Kristo, amuno n’Ojok karik elamorot n’Ohoile Lodwa thoiwona hothai bukulung.
\v 14 14Alwahio n'Ohobu Yesu Kristo. Amuno n'Ojok karik elamorot n'Ohoile Lodwa thoiwona hothai bukulung.