\id JUD
\ide UTF-8
\h Juda
\toc1 Juda
\toc2 Juda
\toc3 jud
\mt Juda
\c 1
\cl Ebwayit 1
\p
\v 1 Juda, ohoigyemani lo Yesu Kristo karik olai lo Yakobo, d’ohothing hoilongoi, amunoi ditha h’Ojok Omonye, endafaithe tuhudik ara Yesu Kristo.
\p
\v 2 Amiehina, elik n’ahap karik n’ahwandek karik amuno thoyothoi dothai.
\p
\v 3 Ohothing homunoi, dihuhumyo honang egero dothai th’ethalwahuna thanahothai, egero nang dinyahina ithai thomijye tuhudik d’eruhon, nanya ithafothohini gelere d’ohothing bukulung d’ohothing hodwa h’Ojok.
\v 4 Aca athuhi nya ohothing homok dihiji hothai arutharu, aang hotehi. Atherohini nya isong ara hangocye. Ikara isong hulo ohothing h’Ojok, hathuhi eloyicyo alwahio n’Ojok lohothai ara ethamunoyo n’ahwandek; arisa isong hulo, ohoidefani karik Ohobu lohothai loboithe, Yesu Kristo.
\p
\v 5 Thenene, awak nang ithai ethayuhina – juk etek ithai tuhudik – hijan alwahu nya Ohobu ohothing thohop h’Egypto, ti, diholu, ethalicyo nya ohothing haang iruhi.
\v 6 Karik dang, anjelohio honya edehi amasok hasong h’akolon, ti, edehini amasok hesukarik isong, edehi isong Ojok thoifithai mak, ditha h’omudwe tok angocio n’arami d’ofaning lohittok.
\v 7 Karik dang esarahini ho Sodomo, Gomorrah karik abothok hohoiker hosong ahwandek hasong dileru karik oisukaitha hoibot. Awon isong hulo ara hoithaithak ohothing hoithathaciana abahio n’ahimang naang odunya.
\v 8 Ti, th’oyihoi tholya aboithe, ithabocyo dang ohothing h’etharikahio hulya ahwandek hasong. Edari akolon n’endafaitho, etharohojye ofure l’ohothing hohittwak.
\v 9 Ti, juk Mikaele Arkanjelo, orii hoilaferejyorik isong ho Sitan arami h’ahwan no Musa, kabong homwarye ethorohojyo ofure lonyong, kombwo ajyo, “Ohobu kodien thoiringye iye!”
\v 10 Ti, omoryo ohothing hulya aning naang isong otek hijan oyyu, ara aning natek isong ara ohothing, iring ecangi haang igigilo, isong hathi asang hetharohojyo isong.
\v 11 Ofwoi de ahani ara afuro! Aca, hodithifoitho oyihoi lo Kaino karik athuhi amirohina ahwandek ditha h’epal no Balaam d’arimahina n’aning nalwahu esuka ara nayyu. Engohunai d’amesio no Korah.
\v 12 Ohothing hulya amiyang nayeyer d’amuno n’amutha nahoi – ithakolye ahosi dimuno – isong hulo ohoyohok hoithanyo ahwandek. Isong hulo adikolo hewahaitho ahomwa kwong ohuju, oyandik h’ohomio kwong ahayocong; ayethi operok arehai; athuhi arutho.
\v 13 Isong hulo eyolongitha hadoria hathatha h’ahari nahittok; iyafuthi ajwuon n’ahosi hasong; isong hulo ohilyefi hoiyambaritha, hathuhi ehuhumahina dosong eriohon n’omudwe mak.
\v 14 Enoka, oithacofe tho Adam, ocoryo thosong hijan, “Otiha! Ohobu loindu ho alif karik alif n’ohothing honyong hodwa.
\v 15 Loindu dikanyo arami h’ohothing fodok abok abok. Loindu dinyahina epal n’ohothing haang owoni ara h’Ojok th’egyemathik thahathuk isong ehandyo th’oyihothik thohaang owoni ara h’Ojok, karik h’ocamitha fodok hohodwa hathuk ohothing haang owoni ara h’Ojok acamarik inyong.
\v 16 Ohoiwiwinyak hulya hothifoitho asang amonyorok hawahi isong. Ocamai ahuthuhye hasong ethadara ara nahwat. Iwuwulyo isong hothing homok dirimahinerek aning nabo.
\p
\v 17 Ti, ithai, ohothing homunoi, hoikwothik ocamitha honya ocamaitho ohoifahak h’Ohobu lohothai Yesu Kristo.
\v 18 Ojyori nya dothai, “D’omiru hothoicuhit, ofuni de ohoithalubangak, hothifoitho asang hawahi isong hamonyori, haang owoni ara h’Ojok.
\v 19 Isong hulya ohothing hoiyanu ebwa; Isong hulo ohothing h’ahap, haang owoni h’Ohoile.
\v 20 Ti, ithai, ohothing homunoi, oduhothik h’ahwandek hathai ditha h’eruhon nathai nadwa bebe, ara ithai imojo d’Ohoile Lodwa.
\v 21 Indefahina ahwandek hathai ditha h’amuno n’Ojok, ara ithai ithilayo amiehina n’Ohbu lohothai Yesu Kristo, loiyanu dothai esu namanya mak.
\v 22 Omiehi ohothing hoidyangayo; ithahoru ohothing homok thath’ahimang;
\v 23 dohomok, ithaithak amiehina th’abangi, th’edara juk abongo nathuhi ethabocyo th’elathulo.
\p
\v 24 Do le locohi epahuna ithai thoiboso; le lesarrak ithai awetha dihithemi honyong nabolo kwong amonyori karik th’amuno thanabolo,
\v 25 D’Ojok aboithe, Ohoithalwahani lohothai tholo Yesu Kristo, Ohobu lohothai, abolori, abangi n’abolori, akolon nendafaitho karik acohina n’endafaitho, thoiwona donyong dihithem h’omitu bukulung, thenene karik mak. Amen.