\id 1PE
\ide UTF-8
\h 1 Petro
\toc1 1 Petro
\toc2 1 Petro
\toc3 1pe
\mt 1 Petro
\c 1
\cl Ebwayit 1
\p
\v 1 Tho Petro ohifak lo Yesu Kristo. D’ohothing h’Ojok honyimuni, hathuk athurohunu ara ohothing hongero difaa d’amisok ho Ponus, Galasia, Kapaddocia, Asia karik Bithynia.
\v 2 Onyimuni ithai nya, thawahan thon’Ojok Omonye, ethadwarye ithai ara ohothing th’Ohoile tholonyong; ethaliborye nya ahwandek hathai th’ahotho thananyong, diruhi arami ho Yesu Kristo. Alwahio karik elik nasong thoiwona ara nefut methelele.
\p
\v 3 Hafurahina ahinwarang d’ Ojok karik Omonye l’Ohobu lohothai Yesu Kristo! Anyo, th’amiehina thananyong thanahittok, esarak dohothai esu angejuk th’ethabuhuna Yesu Kristo thoye. Ithafongok ne ohothai th’eyihina thanamijyo.
\v 4 karik ahani ne, hamijyethek ahithemi d’aboroyothik hasom, hathuk Ojok akanahina d’ohothing honyong. Okanak dothai dihide, amaji naang isong omuyaharik, itharohojarik dia amonyororik.
\v 5 Isong huna ara hathai, hara th’eruhon, indafaitho Ojok ara hoibuha th’akolon thananyong d’ethalwahuna nethilayo ethalyehina dicuhit h’omiru.
\v 6 Omunothik, juk dwo d’orii lya othaja hothai odihari, th’opeceni olwarai thah’ethathacanitha hathemyo ithai hune.
\v 7 Onyahi isong huna hijan eruhon nathai nadiri. Juk ayel nacohi etharohoja, othemye th’ahimang; inyong na, eruhon nahoi, nakalu ayel thayiji, owak othemye, disuka fuur. Thiya, iindu iye de ifothuna emamaja, abolori karik ethahabuyo d’Ofaning lofunerek ithalyehina Yesu Kristo.
\v 8 Imuno iye inyong, juk kabong iye itehu inyong, karik iruk iye donyong juk aang iye itehu inyong thenene. Inyong na, omunoi th’amuno thanahittok karik thanabolo naang ocamitha ocohi anyahina.
\v 9 anyo, aca ithai hoifothu ohoilehio hothai, arami hewonderek ithai h’eruhon donyong.
\v 10 Arami h’ethalwahuna, hanya isarak ohocorok thofifeye tuhudik karik anyahini esorio near ithai Ojok isarahina.
\v 11 Athemye arimahina kanu omiru karik angai de oindu inyong. Isong omiru hule honya oicyerek Ohoile lo Kristo dosong, dinyahina ahithemi ethathacianitha haindu Kristo idihanina karik abolori naindu ithifohina.
\v 12 Ethalyehi Ojok d’ohocorok hulya hijan egyema nasong ikara d’ayiji nasong, ti, d’ayiji nathai, iring nacamarik isong th’arami thah’ethuk ithai ethairuna thoh’oifahak honyahi Asayo Hayyu th’akolon thon’Ohoile Lodwa losuluni thohide. Isong hune asang hawak dang anjelohio atehan hijan oyiji.
\p
\v 13 Inyong na, ahosi hathai thorai ainyong owak ihandye. Omijyethek tuhudik karik ithabisahina eyihina nathai d’aboroyo nafuni ithai isarahina ara Kristo lethalyehini.
\v 14 Iruhotho d’Ojok, karik hoiruhohina ohothing homok thoihuhumak ithai oisukaith th’awahan thananya iwon itha honyong kaang ithai itek aning nabo.
\v 15 Kombwo, odwara d’asang bukulung hehandyo iye, iring nehandyerek Ojok lathuk iye elongo.
\v 16 Ojyo amanini, “Odwara, anyo, Adwa nang.”
\v 17 Ilongo iye inyong ara Monye, ara iye lemojyo d’Ojok, lokanyo ohothing fodok th’okanyit tholobis tholo, iring ainyong athuk othulo ehandyo; ajara thiya, isukai esuka nahoi dihap ara nehyelaru dananyong.
\v 18 Aca itek ithai ainyong nya odumai dihohina ithai th’oyihoi laang oyyu disuka lonya ithafothohini dihap th’ohohonyo hothai. Ikara aning ne nya, nacohi etharohojyo; aning, iring ebindang abong dia ayel;
\v 19 Inyong na nya ethafothohina no Kristo, lonya ojahitha oker laang opala dia omonyong.
\v 20 Athuk nya Ojok anyimuna inyong, kabong hoyeuni ahap, karik ethalyehini inyong operok hothoicuhit hulya, thoithai.
\v 21 Tholonyong, iruk ithai d’Ojok, loithabuhu inyong thoye karik esarak inyong abolori; inyong na, eruhon karik eyihina nathai, indefi d’Ojok.
\v 22 Iring thenene, hijan, theruhon thanathai d’arami hadiri karik athuhi ithai th’ahwandek ethaliboryo karik ethuk ithai afuna diwonan h’amuno nadiri n’ohoiruhok hothai, omunothik ahwandek hathai thanako, thothaji tholothai.
\v 23 Aca thol’ohoiswok karik ocame mak l’Ojok, athuhi itha aisuna ikoti iring okalifinok h’omonye dia ahathingi naang oye dia naye.
\v 24 Iring ojyo amanini, “Ohothing bukulung, ojahithi amiyang, karik abolori nasong bukulung, ojahitha athuya hothofara, Inor, ara amiyang ayoho, karik ara athuya edoitha.
\q2
\v 25 Ti, ocame l’Ohobu esuka dimaji mak.” Ocame lya inyong Assayo Hayyu hanya onyahini dothai.
\c 2
\cl Ebwayit 2
\p
\v 1 Iduhuna, hoi, asang fodok hamonyori adi thohohwandek hothai. Aang adwala, ahaini karik akara n’ahuthuk.
\v 2 Ojahatha okalifinok hohoithehi iyisuna, holeng ahibothit juui n’ale h’ohoile. dibolo karik ara ithai ithalwahunu ara ithai hematha isong.
\v 3 Iring ojyo amanini, “Ethuk ithai arimahina d’ahwandek hathai hijan oyyu Ohobu.”
\v 4 Ifuna d’ohobu, omorwong lomijyo ledari ohothing ara laang acaa, ti, anyimu inyong Ojok ara loko karik loyyu bebe.
\v 5 Ifuna iring omorik homijyo, karik ithai thoduhorik Atemplo n’ohoile, nefunerek ithai igyemarik ara fadirihio hodwa, difuna ithafothohierek ehumathik h’ohoile karik heruhohini d’Ojok tholo Yesu Kristo.
\v 6 Aca ojyo amanini, “Anyimu nang omorwong loko, loyyu bebe, lesarak nang ara asihothe no Zione; Loiruk donyong, aang de ofuni ithabathahina.
\p
\v 7 Dothai hoiruk, abolo ayiji n’omorwong lya dothai, ti, d’ohothing haang hoiruk: omorwong loidari ohoduhok lya, eloitho ara omorwo loyyu, loko, okalak.
\p
\v 8 Ara amanini nabo ajyo, “Omorwong lya de lesarak ohothing eboso, omorwong lesarak isong apwaharu. Ebosoi, anyo, kaang hoiruhi d’egyema nanya owon ara awahan n’Ojok dosong.
\v 9 Ti, ithai, amukok nathuhi anyimuna, ho fadiri h’Ohobu, amiji nadwa, ohothing h’Ojok olefeng, hoilongoi thatha h’omudwe ditha h’afangan nafalangai.
\v 10 Th’omiru homok, ikara ithai ohothing h’Ojok, ti, th’orii lya, ithai ohothing h’Ojok; th’omiru homok, aang ithai itek amiehina n’Ojok, ti thenene, ethuk ithai efothuna amiehina nanyong.
\p
\v 11 Amojyo nang ithai, omorot hundang, karik ohothing ohodahak, hoidima amonyori dihap! Hoilahina ahwandek d’asang hamuno ahwan, hangalafa juui h’ohoile.
\v 12 Ira oisukaitha hothai dihiji h’ohothing haang otehi Ojok iyiji, dara ara hajyori ehandyo ithai ara namonyong, iruhuni de dodo egyemathik hathai hayyu; th’oyihoi tholya, ithahabuye de Ojok d’ofaning l’ainduna nayong.
\p
\v 13 Th’abangi thon’Ohobu, iruhohina d’othulo loindafaitho ahap, ohothing: Ohoindefani lohittok,
\v 14 ohoindefak ‘ebwayitha h’amiji, hosaryo ohothing hoihandyo ara namonyong karik hoithahabuyo ohothing hoihandyo ara nayyu. 15
\v 15 Owak Ojok ithai thoithauhye ocamitha h’ohothing honanga th’asang thahayyu thah’ehandyo ithai.
\v 16 Isukathik ara ohothing haang obangi, ti, aangan nathai abangi thoimuhok aning namonyong, ti, omanyathik ara ongacani h’Ojok.
\v 17 Obangatha ohothing fodok th’ayiji, omunothik ohoiruhok iring ithai, ithahuyethek Ojok karik obangatha ohoindefani l’ahap karik ohothing lohittok.
\p
\v 18 Ithai ohoigyemak, obangatha hahong karik ohoindefak hothai, ikara hoiyiji hamaring, karik dang omonyorok hosong.
\v 19 Oboroyo iye de Ojok th’ehandyo ara nayyu, ara ingongu iye adihari n’ethathaciana egyema d’ohoindefani l’ohothing loboling, anyo, itek iye lo ainyong awahan nanyong,
\v 20 Ainyong de nayyu irimak iye thiya, ara ingingu iye abaha nepalan nehandyo iye. Ti, juk engongok iye ethathaciana ahibu iye ihandyo aning nabis, obororoyo iye de Ojok thonyong.
\v 21 Dihandyo ahani nya ilongo iye Ojok, aca ethathaciana nya Kristo thahwan thoiye, edyaharu dohoi aryamara, diindu iye ithifoitho ahejek hanyong.
\q
\v 22 Kabong inyong iyau eyau karik kabong lethayiru th’obiyuha honyong adwala.
\p
\v 23 Nanya omoryerek inyong na, adularu nya. Kabong itharangyo th’omorit; ethathaciana nya, kabong ithabangyo, ti, edihi eyihina nayong d’Ojok, Ohokanyani lobis. Eyaru Kristo th’ahwan dihwan honyong eyatha hahothai di kruce, deye d’eyau karik emanya d’abisan.
\v 24 Ethalihyo nya ithai Kristo, th’asongosik thahanyong.
\v 25 Ijahitha ithai nya akero halitho oyihoi losong, ti, athuhi ithai enyahunu d’Ohoyohoni lothai karik Ohoindefani l’ohoilehio hothai.
\c 3
\cl Ebwayit 3
\p
\v 1 Th’oyihoi aboithe tholya, ofuretho thoiruhu arami h’obusuha hosong, dara ara aang isong iruk d’ocame l’Ojok, isarak de oisukaitha hothai isong diruhon. Aang de oindu iwahan iye acamuna ocame.
\v 2 Anyo, ofuni de isong itehuna, angai olibo karik oyyu esuka nahoi.
\v 3 Hoimuno eyofo asang hothondak dithaliboryerek ahwan nahoi, asang, iring ehuhumyo n’ohofir, eyofo n’ofaho, anyahwo dia abongo.
\v 4 Kombwo, ira alibori nahoi nadiri iwonan tholothwa hohoi, alibori tholohide h’oyingathik, ajonan, anyofodya n’ohoile, akolon karik ayiji bebe dihthemi h’Ojok.
\v 5 Aca angorwo hamuno arami h’ohoile, isarahini nya eyihina nasong d’Ojok, ethaliborye ahwandek th’eruhon thanasong arami h’obusuha hosong.
\v 6 Ahani nya ojahitha Sarah. Ithaningyo arami h’Abramo, ilongo iynong ara ohoindefani lonyong. Ewon ithai ara angarok hanyong, araihandyo ithai ara nayyu, ara ithai aang hoibang aning nabo.
\p
\v 7 Th’oyihoi tholya aboithe, isukathik h’angorwo hathai, ahibu ithai itek tuhudik hijan ojon isong thothai. Indefatha isong th’abangi thanayyu, anyo ifothuni de ara aboithe hothai, esorio n’Ojok n’esu, Ihandyethek ahani daang aning netharohojo omojitha hothai.
\p
\v 8 Dingohina, ithai thiwona hoisukai karik atehan aboithe: amunothik ahwandek ara olarok karik ahanerok, oyijoth ara ithai ilahi ahwadek hathai dihwabdek hothai.
\v 9 Hoirofyethek amonyori th’amonyori dia afecio th’afecio; kombwo odumathik th’aboroyo, anyo, th’aboroyo nya iruhok Ojok esarahina ithai aboroyo, nanya ilongorik inyong ithai.
\q
\v 10 Iring ojyo amanini, “Lowak alengan namanya karik awak engengeluna omiru hoyyu, thoidehi acama arami hamonyong karik thoithawejye adwala.”
\q
\v 11 Thoiloithoi adi th’amonyori, ehandye ayiji; isong thotahithai thanako elik nahap karik nahwandek th’othji tholosong fodok.
\q
\v 12 Aca amijyo Ohobu dihide h’ohothing hobis karik ethanigyo omojitha hosong; ti, ida ohothing hoihandyo amonyori.”
\p
\v 13 Ngai de iryafyo ithai, ara imuno ithai ehandyo aning nayyu?
\v 14 Ti, juk ithai ithathaciana dihandyo aning nabis, angai de imuno ithai! Hoibangatha othulo loboling, karik hoihandyethek aning namonyong.
\v 15 Ti, iwonatha dithaji hothai habangi nayyu do Kristo, karik ithai ithahabuyo inyong ara Ohobu. Orathik, d’omiru fodok, ditharangyo, othulo loifiyo ithai dinyahina eyihina nawon ditha hothai,
\v 16 ti, ihandyethek th’ayiji karik th’abangi thanayyu. Indafaithethek othaji loigigilorik ara lolibo, dara ara ithai hamorye, ohothing hocama amonyori thoisukaitha thohothai thohoyyu ara ohothifok ho Kristo, oju de isong ahosi th’arami thahajyo isong.
\v 17 Aca ilak iyiji dithathaciana ehandyo ara nayyu, th’ehandyo amonyori.
\v 18 Aye Kristo gelere th’eyatha; aye othulo loyyu th’ohoiyak fodok, diyaru ithai d’Ojok. Ethayeye inyong dihithemi h’ohothing, ti, ahibu inyong omijyo di hoile.
\v 19 karik ditha awonan nanyong n’ohoile, alo karik acama d’ohoilehio hoifitha.
\v 20 Isong hulya ohoilehio h’ohothing honya aang iruhi d’Ojok d’omiru h’ongongohinerek inyong eririyo Noah ahibu inyong oduho aroko nanyong. Ohothing tiibai hotho roko - isong hulo fodok tises – ethahoruni nya th’ahari.
\v 21 nanya owon ara ethaithit do batisimo, nethalwahu ithai ne. Ikara elalayo ebot n’ahwan adi bebe, ti, eruhohina nathuhi esarahina d’Ojok th’eyoitho nayyu noth’othaji. Ithalwahu ithai th’ebuhuna thono Yesu Kristo.
\v 22 lathuk aden dihide, awoni dinget h’Ojok; lendafaitho anjelohio karik elulung n’ohindefak h’ahide, h’akolon.
\c 4
\cl Ebwayit 4
\p
\v 1 Iring ethathaciana Kristo dihithemi h’ohothing, owak dang ithakolyo ithai ahwandek hathai th’oyihoi aboithe thol’egigilo thananya owon donyong; anyo, othulo lethathacian dihithemi h’ohothing, awangi omiru honyong h’eyauna.
\v 2 Th’ahanana adihithemi, hathi, amanya nathai nothohop, thoindafaithe th’awahan thon’Ojok, ikara th’awahan thon’othulo.
\v 3 Engohi ithai nya omiru dihandyo asang thoihandye iring owahi nya ohothing haang otek Ojok. Engohunu nya amanya nathai ditha h’ebot, ahure n’amonyori, ebotho n’obalu, oibwana, esur dimasok h’obalu, amojo d’arijorihio karik d’ajohi.
\v 4 Karik opagani hofalanga, anyo, aang ithai th’oisukaitha hosong hofaja hulo. D’ahani ne, amorye ithai.
\v 5 Ti, ofuni de isong ifiyo dihithemi h’Ojok, leririyo eririyo akanyo n’ohoiswok karik ohoyak.
\v 6 Arami hune hanya onyahinerek Assayo Angejuho dang d’ohoyak, d’ohothing honya athuhi akanyo howoni th’ahide, iring nakanyerek ohothing bukulung; onyahini nya dosong, domanya isong esu n’ohoile, iring namanyarik Ojok.
\p
\v 7 Aindek ecuhit n’asang bukulung. Indefatha ahwandek ara ithai imijyo tuhudik, docohi dothai dimojyo.
\v 8 Tholohide asang bukulung, omunothik ahwandek tuhudik, anyo, imuhok amuno eyatha olwarai.
\v 9 Ongahina ahangithek hathai dihwandek hothai kwong ewiwinya.
\v 10 Aboithe lothai, iring ohoindefani l’esoritha h’Ojok hekela, thoigyemarik th’ayiji thonohomok esoritha hekela hathuk inyong efothuna th’Ojok.
\v 11 Lonyahi ocame l’Ojok, thonyahi ocame l”Ojok; loigyema, thoigyemai th’akolon thanathuk Ojok inyong esarahina; dara d’asang fodok, ethahuyo thoisarahini d’Ojok tholo Yesu Kristo, lowon abolori karik akolon ara nanyong, mak.
\p
\v 12 Omorot hundang hoko, hoifalangathik d’athemio nadiha nethathacianio ithai ne, iring najaharik inyong aning nabo nekela nafuk dihiji hothai.
\v 13 Kombwo, omunothik hijan ithai hoingara ethathacianitha ho Kristo, difut amuno nathai, ara abolori nanyong nafuni ithalyehina.
\v 14 Omunothik ara omorye ithai, anyo, ithai ohothifok ho Yesu Kristo; onyahi hijan, Ohoile lobolo, Ohoile l’Ojok, lowon ditha hothai.
\v 15 Ara ithathaciana lobo thothai, ikara hijan inyong ohottohoni, ohoholani, ohodyahoni l’obafu dia ohoidamani d’arami h’ohomok.
\v 16 Ti, ara ithathaciana ithai, anyo, ithai Okristiano, ahosi hathai thaang hojwuo. Ti, ofurak Ojok ahinwarang, anyo, ithai hoiyofoitho ofure lo Kristo.
\v 17 Edwongi omiru hoculuyerek Akanyo. Ohothing h’Ojok olefeng, icahi akanyo. Oculuyo thohoi, angai de ingohunu h’ohothing haang iruhi Assayo Angejuho?
\p
\v 18 Iring ojyo amanini, “Oko dithalwahuna ohothing hoyyu; Angai de ngona ojahitha d’ohoiyak haang Ojok?
\p
\v 19 Inyong na, ohothing hoithathaciana thawaha thon’Ojok dosong, thoiruhu, th’egyemathik thahasong thahayyu, disarahina ahwandek hasong fodok d’Ohoyani losong, loindafaitho th’akolon, arami hathuk inyong eruhuna.
\c 5
\cl Ebwayit 5
\p
\v 1 Nang, ohoboloni thahwan, lamojo ohobolok h’ekklesia dihiji hothai. Nang ohoiruhoni l’ethahtaciana no Kristo, karik aindu nang de ingaruna abolori nethalyehini de. Amojo nang ithai,
\v 2 thoiwona ara ohoyohok h’ateng nengaka, nesrak ithai Ojok thoiyohoithe th’awahan, ikara th’eringahina. Igyemathik egyema nathai, ikara th’aduma hama, ti, th’awahan diri egyema.
\v 3 Hoireyo dihap ohothing hoisarahini thoigyemai dihinang hohoi. ti, iwona ara aryamara nayyu dosong.
\v 4 Karik ara Ohoyohoni Lohittok bebe laleyo, ifunu ithai de ifothuna ehithang Nahittok n’Ohobye, naang awilangi nanyong olitho.
\v 5 Th’oyihoi tholya aboithe, ithai ohothing ottwat, iruhohina arami h’ohobolok hothai. Ithai fodok thoiyofok ethamijani n’ethabuyangio n’ahwan nathai. digyemarik, iring ojyo amanini, “Ida Ojok ohothing hoithadara, ethaithak ohothing holau ahwandek, ayiji.
\p
\v 6 Ithabuyangyethe ahwandek hathai, ti do, dihinang h’Ojok nako, dodohok ithai dihide, d’omiru honyong olefeng hoyyu.
\v 7 Idehina abangi nathai fodok honyong, anyo, inyong lo ohoyohoni lothai.
\v 8 Omijyethek tuhudik! Omerohothononi lothai, Sitan, lodilor ahibu inyong iburloitho, dirimahina othulo lodiloroi.
\v 9 Okolotho ditha h’eruhon nathai karik ara ithai ida inyong, anyo, itek ithai hijan ohoiruhok hothai dihap fodok hofwo atha n’opeceni h’ethathacianitha.
\v 10 Ti, athuhon nathai ethathaciana omiru tiibai, Ojok l’alwahio fodok, loilongo ithai dingara abolori nanyong namanya mak disuduha ho Kristo, ithabisak de ithai karik esarak ithai akolon karik asihothe naming.
\v 11 Akolon thoiwona donyong, mak. Amen.
\p
\v 12 Egero nang dothai amanini nasuk na, th’alwahio thono Silas, lowon donang ara ohoiruhoni – Okristiano. Awak nang ethakolohina ithai, nang anyahi dothai eruhon hindang, hijan alwahio ne nadiri n’Ojok. Owethathik ara nako ditha honyong.
\v 13 Ahani nathai Ekklesia di Babylonia, karik nanyimu Ojok, osulak ithai emanda, olonyi hindang, Marko, dang asulak.
\v 14 Ithamandahina ahwandek abok abok, th’ejuthahina th’amuno thon’Okristiano. Elik n’ahwan karik n’ahap thoiwona hothai, howoni ara ho Kristo!