\id HEB
\ide UTF-8
\h Ohibru
\toc1 Ohibru
\toc2 Ohibru
\toc3 heb
\mt Ohibru
\c 1
\cl Ebwayit 1
\p
\v 1 Nya berien, ocamaitho nya Ojok d’ohohonyo hohothai thol’ ohocorok th’omiru karik th’oyihothik olwarai.
\v 2 Ti, operok hulya ne, ocama Ojok d’ohothai thol’Olonyi lathuk inyong anyimuna ara ohoidefani l’asang bukulung. Tholonyong oyeu Ojok ahap fodok.
\v 3 Inyong lo afangan nabolori n’Ojok, ohoindefani locohi awetha dimaji hawonan nanyong. Indafaitho inyong asang fodok amaji Aboithe th’ocame thol’okolon nanyong. Di holu helalayo nanyong eyatha, awoni dinget d’Abolori nothohide.
\v 4 Athuk awonan ara lahong l’anjelohio iring nathuhorik ofure loruthu inyong alibori okalak ofure losong.
\v 5 Aca, do honi anjelohio nya bai ocama Ojok hijan, “Iye Olonyi hindang, ahanana awon nang ara Lemonye?” Dia do honi anjelohio ojyo nya Ojok, “Awon nang de ara Omonye donyong, karik owon de inyong donang ara Olonyi?”
\p
\v 6 Ti, koti, ara oyisu Ojok oitho ohoithemoni di hap, ojyo inyong lo, “Anjelojio h’Ojok bukulung thorigongoi dihithemi honyong.”
\p
\v 7 Th’arami thah’anjelohio, inyong lo ajyo, “Inyong oyeyo anjelohio ara ohoilehio karik ohogyemak honyong ongadiefa h’ahimang.”
\p
\v 8 Ti, inyong lo ajyo d’Olonyi, “Okara lohoi, Ojok lomanya mak. Othelek l’abisan, inyong othelek l’ohobye lohoi.
\q
\v 9 Ethuk iye nya amuno abisan ara iye iman aangan n’oyalu. Inyong na, Ojok, Ojok lohoi, athuk iye aboroyo th’elethang than’amuno nakalu n’omorot hohoi.”
\q
\v 10 “Di culwe, Hobu, ehuhumak iye asihothe n’ ahap. Ahide, egyema n; ahas hahoi.
\q
\v 11 Ingohunu de asang hune, ti, irasa iye de. Ingwenwenyahunai de iring n’abongo na.
\q
\v 12 Iyofo iye de isong iring abongo nauk na, Karik iloyitho isong de iring akerehethohio h’abongoitho. Ti, irijoro iye de ara aboithe, karik aang de oyingathik hohoi ingohunu.”
\p
\v 13 Ti. Do honi anjelohio athuk Ojok anyahina d’omiru bukulung hijan, “Owoniara dinget honing lwai nang esarahina omerok hothai ara awethit n’ahejek hathai?”
\p
\v 14 Aang anjelohio bukulung owoni ara ohoigyemak, karik honi hosulahini dindafaitho ohothing hofuni irimahina ethalwahuna?
\c 2
\cl Ebwayit 2
\p
\v 1 Iring na, hamijyethek tuhudi d’aning nethuk ohothai ethairuna, daang ohothai epeharu adi thonyong.
\v 2 Aca, ara arami hua nya hacama anjelohio, ithaithak hijan arami hua habis, difothu ethathalihina esuka karik aangan eruhon arami aduma nabis.
\v 3 angai ecohi ekarahini, ara aang etek ethalwahuna nabolo ahani ne? Ethalwahuna ne ehethemoni nanya onyahi Ohobu dohothai thol’ohothing hethairu inyong.
\v 4 D’omiru hule dang, anyahi Ojok inyong na th’ethamijanitha, th’asang hafalangai karik th’ahoryo esoritha h’Ohoile Lodwa, iring owak inyong.
\p
\v 5 Aca, aang ara nya d’anjelahio ithafothok Ojok ahap naindu, necama thonyong ne.
\v 6 Ti, athuk othulo lobo anyahina d’amaji nabo, ajyo, “Othulo ainyong, neyoitherek ithai inyong ne? Dia olonyi l’othulo, lemijyo ithai donyong lya?
\q
\v 7 Esarak ithai 0thulo thomuthara th’anjelo, ethayofok ithai inyong th’abolori karik th’ethahabuyo.
\q
\v 8 Esarak ithai asang bukulung thoiwona tholohop h’ahejek hanyong. Ti, th’orii lya ne, kaang ohoi itehu asang bukulung thohop honyong.
\v 9 Ti, etehu ohoi othuhi inyong ethamutharyo th’anjelohio, orii tiibai, Yesu, ethayofye inyong th’abolori karik th’ethahabuyo than’ethathaciana karik n’aye nanyong, dara th’alwahio thon’Ojok, dopil aye th’ohothing fodok.
\v 10 Aca, ocohi nya d’Ojok, iring nawonderek asang fodok thonyong karik tholonyong, diyanerek olonyirok dilobolori. Obis donyong diyanu othulo lorimak ethalwahuna nebuha thal’ethathacianitha hanyong.
\v 11 Dosong arehai bukulung, hoithaliboryo karik hoithaliborye, ofuni th’oyihoi aboithe. Inyong na, aang ahu nanyong ojwu dilongo olarok.
\v 12 Inyong ajyo, “Anyahi nang de ofure lohoi d’olarok hundang, Ido nang de thoitha ditha elulung.”
\p
\v 13 Inyong ajyo ikoti, “Ayenio nang de iye.” Karik ajyo ikoti, “Idoro, nang lo hokalifinok hathuk nang Ojok esarahina.”
\p
\v 14 Inyong na, ara ongara okalifinok ahwan hahotho, ongara dang inyong asang hamok hune thoyihoi tholya aboithe, dara thal’aye docohi donyong dithorohojo othulo aboithe lowon hakolon n’aye, omonyoroni lara Sitan lo.
\v 15 Owon nya ahani, doindu inyong ihohina ohothing fodok homanya ara ongacani th’abangi than’aye.
\v 16 Ara ojyori ocamai arami hadiri, ikara anjelohio olwahyo inyong, ara hari ohothing hofuhu th’Abramo.
\v 17 Inyong na, ocohi nya donyong diinduna iring olarok honyong thoyihothik bukulung, doindu inyong iwonderek ara fadiri lohottok lomehinu karik leruk doisukaitha h’asang h’Ojok, karik docohi didumarik eyatha h’ohothing.
\v 18 Anyo, athuhi ethathacianio karik athemye Yesu Kristo, acohi inyong lo alwahyo ohothing hothemye.
\c 3
\cl Ebwayit 3
\p
\v 1 Inyong na, olarok hodwa, ingara ithai elongo nothohide. Igigilothik tho Yesu, oihejek karik fadiri lohittok l’ewaha nahothai.
\v 2 Iruk nya inyong d’Ojok, lonya onyimu inyong iring Musa, lonya irul fodok d’ahang n’Ojok.
\v 3 Aca, orimahini nya Yesu, ara losiru d’abolori tho Musa, anyo, aca, ohoduhoni l’athwa, ohu inyong th’athwa.
\v 4 Aca, athwa na, loboling Oduho, ti, loduho asang fodok, inyong Ojok.
\v 5 Aca, Musa nya ohoiruhoni, ara Ohoigyemani l’ahang n’Ojok bukulung. atihahinda asang fodok hanya ofuni de icamaitho mwai.
\v 6 Ti, Kristo ohoiruhoni, iring Olonyi loindafaitho ahang n’Ojok. Ewon ara ahang nanyong, ara endafaitho rot th’othaja thohoko karik th’ayenio than’ethararik thoone.
\v 7 Iring na, ojahitha iring najararik Ohoile Lodwa, ”Ahanana, ara ithairu ithai omurut lonyong,
\q
\v 8 hoithakolyethek othaji hothai iring d’edara, d’omiru h’othemyerek ditha oduyaru.
\q
\v 9 Ahani nyana, nanya idararik holoithehohonyi ethairyo nang, othemyerek nang, diholu athuhon nasong atehuna egyemathik hundang ditha oyingathik athomone arangwan.
\q
\v 10 Inyong na, engere nang hoper le. Nang ajyo, ‘Athuk isong epalan ditha othaja hosong. Athuk isong aangan natehan oyihothik hundang.’
\q
\v 11 Ojahitha iring nathuk nang epitharik ditha engere hindang: ‘Aang isong ojingak dith’ayiri hindang.’
\p
\v 12 Omijyethek tuhudik, olarok, lobo thothai thaang hoiwona h’othaji laang hoiruk, othaji loiloitho adi th’Ojok loisu.
\v 13 Ti, ithakolyethek ahwandek hathai juui, iring nelongorik inyong “Ahanana.” daang lobo thoithai ithakolye th’adwala than’eyau.
\v 14 Aca, ethuk ohothai awonan ahang aboithe ho Kristo ara endafaitho thanako enihina ahwandek donyong thoculwe lwai dicuhit.
\v 15 Th’arami thohune, athuhi ajan, “Ahanana, ara ithairu ithai omurut lonyong, hoithakolyethek othaja hothai iring ditha edara.”
\p
\v 16 16 Angai nya ethairu Ojok karik eda? Aang ara ohothing honya ofuni tho Egypto tholo Musa?
\v 17 Do ngai nya ingere inyong ditha oyingathik athomone arangwan? Ikara d’ohothing honya eyau, ahwandek hasong hathuk ayetha, adoro dith’ofara?
\v 18 D’angai nya ipitha inyong, hijan aang isong ojingak dithah’ayiri nanyong, ara ikara d’ohothing honya ida inyong?
\v 19 Etehu hijan aang isong nya ocohi ajingahina dithah’ayiri nanyong thaangan th’eruhon.
\c 4
\cl Ebwayit 4
\p
\v 1 Iring na, iring nathuhi eruhohinerek ajingahina dithah’ayiri nanyong thowethai, habangatha, tek lobo thothai ajahitha laang thoithorit.
\v 2 Aca, anyahini nya ohoi assayo hayyu, iring nanya owonerek isong. Ti, aang ocame le olwahu ohothing honya aang osuduha ditha eruhon n’ohothing hoiruk arami hanyong.
\v 3 Aca, ohothai hoiruk, ohothai ijingak ditha ayiri nya, iring najarik inyong, “Iring nathuhorik nang epitha death h’engere hindang. Ojingahini de isong dithah’ayiri hindang.” Juk ahani ne, athuhi nya egyemathik hanyong tho sihothe h’ahap.
\v 4 Aca, athuk acama d’amaji naboling th’arami thoh’ofaning oithacofe: “Karik, oyiri Ojok d’ofaning oithacofe th’egyemathik hanyong fodok.”
\v 5 Karik d’ocame aboithe lya ajyo, “Aang isong ofuni de ijingahina d’ayiri hindang.”
\p
\v 6 Inyong na, afithoro dohomok dijinagara d’ayiri nya, karik hule honya awoni h’assayo hayyu hanyahini dosong, anyo, kabong ofwoi diya, thaangan th’eruhon nasong.
\v 7 Thiya ikoti, Ojok esarak inyong ofure loboling, elongoi inyong ara “Ahanana” inyong acama tholo Davide th’ocamitha thohodwo athuhi elecyo thohulo. “Ahanana, ara ethayiru ithai omurut lonyong, hoithakolyethek othaja hothai.
\p
\v 8 Ara nya esarak isong Joshua ayiri, ira Ojok icama th’ofaning tholoboling.
\v 9 Inyong nesarahini ofaning oithacofe ara ofaning l’ayiri l’ohothing h’Ojok.
\v 10 Aca, lethajingak ahwan ditha h’ayiri n’Ojok, oyiri dang th’egyemathik hanyong, iring nayiriarik Ojok thegyemathik hanyong.
\v 11 Inyong na, hawahatha dang ajingahina dithah’ayiri daang lopwaharu d’edara nehandyo isong.
\v 12 Aca, owon ocame l’Ojok, igyema, ofi okalak odemi dingocyo. Orom lwai dibwayo othaji h’ohoile, ethandefitha karik olutho, karik ocohi donyong dikakayo egigilitha karik asang hawahi h’othaji.
\v 13 Aang aning nabo nayeuni nacohi edema th’Ojok., ti, oleyo asang fodok, ongai d’ahonde honyong lenyahi donyong arami hahothai.
\p
\v 14 Inyong na, iring ewon hofadiri lohittok, lathuk anden tholohide, Yesu, Olonyi l’Ojok, hendefatha rot d’ewaha nahothai.
\v 15 Aca, aang ewon ho fadiri lohittok laang omehinu elihan nahothai. Kombwo, ewon holoboling, lathemye thoyihothik fodok iring ohothai, arahari aangi eyatha thonyong.
\v 16 Hafatha thenihina ahwandek d’okara l’alwahio, defothu amehina karik erimak alwahio d’omiru hewaharik.
\c 5
\cl Ebwayit 5
\p
\v 1 Aca, fadiri lohittok, lowuluni th’ohothing, isarahini thoigyemai th’ohothing d’asang h’Ojok, dithafothok d’Ojok esoritha karik ehumathik.
\v 2 Ocohi donyong digyema dee h’ohothing hang otehi aning nabo karik hathuhi ethadwalyo, anyo, owon inyong dang h’elihan ne.
\v 3 Th’arami thohune, inyong dang thodohok d’Ojok ehumathik th’eyatha thahanyong, iring nehandyerek inyong th’eyatha thoh’ohothing.
\v 4 Aang othulo leyaru ethahabuyo ne adi thnyong. Kombwo Ojok ilongo inyong, iring nanya ilongorik Aaron.
\v 5 Thoyihoi tholya aboithe, kabong Yesu ithaboloryo ahwan nanyong, thawonan thanyong ara fadiri lohittok. Kombwo locama donyong ajyo,”Iye Lalalonyi; ahanana awon nang ara Lemonye.”
\p
\v 6 Orwang iring najararik dang d’amaji nabo, “Iye fadiri mak, thoyihoi tholo Melchizedek.”
\p
\v 7 D’operok howonderek inyong ara othulo, ethafothok Kristo omojitha karik oifietha thekor bebe karik ehiyo d’Ojok, locohi ethalwahuna inyong thoye, karik ethaninguni inyong th’esu than’elajok nanyong.
\v 8 Juk owon inyong nya ara Olonyi, eyeyenu inyong eruhon th’ethathaciana.
\v 9 Ayeuni inyong lo lobis karik aindu, d’ohothing hoithairyo arami hanyong, ara ohode l’alwahuna naang ingohunu.
\v 10 Atherok Ojok inyong lo ara fadiri lohittok th’oyihoi tholo Melchizedek.
\p
\v 11 Ewon h’arami Olwarai hacamai tho Yesu, ti, oko dinyanyahahina dothai, anyo, ethuk ithai ajwuijyo dithaningyo.
\v 12 Aca, juk dwo ewon ithai th’orii lya ara ohoithayeyenak, hoiwak ithai othulo lobo thoityenie ithai etyenitha ehethemok h’arami h’Ojok hanyahi.
\v 13 Atha, othulo lohomatha ale, aang otek ocame l’abisan, anyo, howon inyong iring okalifonit lohomutha.
\v 14 Ti, angiryang nako, ara n’ohothing habi. Isong hulya ohothing habi howon, th’abijan thanasong, hatehan nasong nethemahini ara nekelyerek ayiji th’amonyori.
\c 6
\cl Ebwayit 6
\p
\v 1 Inyong na, hedehina aculwe n’ocame lo Kristo, efwo ahithemi d’abijan. Ohothai ikoti thaang hobehok asihothe n’aburun th’egyemathik haye karik h’eruhon d’Ojok,
\v 2 ikara dang asihothe n’etyenio no batisimo, attanyahina n’ahas, ebuhuna n’ohoyak karik akanyo naang ingohunu.
\v 3 Ehandyo de dang asang hnne ara ohorik Ojok.
\v 4 Aca, aang ocohi d’ohothing honya athuhi anyahina, honya apil esorio no paradise, honya awoni ara ohongarak h’Ohoile Lodwa,
\v 5 karik ohothing athemu ocame loyyu l’Ojok karik akolong n’oper loindu,
\v 6 ti, hathuk apwaharu adi - oko dinyahahina isong ikoti di burunu. Owon ahani, anyo, abehok isong di kruce Olonyi l’Ojok th’ahwandek thahasong ikoti karik ethajwuye inyong ahu dihithemi h’elulung.
\v 7 Aca, ahap namatha ahari h’ohuju loindu donyong, karik oyandik holwahu ohothing honya eyeunerek isong hulo abuli diya, inyong ne ahap nefothu aboroyo th’Ojok.
\v 8 Ti, ara obu oihwa karik ayani hayoho, aang aca hanyong karik oindek difietha. Ecuhit nanyong, awulo ditha h’ahimang.
\p
\v 9 Ti, ohoi hegigilo th’asang thahathai hayyu, ohothing homunoi, asang h’ethalwahuna, juk ohoi icama ahani.
\v 10 Aca, aang Ojok olwo othulo lobo ayiji nanyong. Aang okworo egyemathik hathai, amuno thethaithak ithai th’ofure tholonyong, anyo, igyema ithai th’ohothing thohonyong hodwa, karik ithai hohoigyema thosong
\v 11 Iwak ohoi kodien hijan ithai fodok thoithaithak ahongon lwai dicuhit, dowon ayenio nathai ara nadiri.
\v 12 Owoni arami hune ahani, tek ithai ifatha, ti, owak diwon ithai iring ohothing homiru theruhon karik adihahina aruthahini asang hanya esarahini arakang ara hasong.
\p
\v 13 Aca, eruhohina nya n’Ojok d’Abraham, epitha th’ahwan thananyong, anyo aang ocohi donyong dipitha th’othulo tholokalu inyong.
\v 14 Ajyo nya, “Aang opwak, aboroyo nang iye de, nang esarak iye ohoruthak hohoi olwara.”
\v 15 Th’oyihoi tholya, arimak Abramo asang hanya eruhohini donyong, athuhon nanyong ethilauna dee.
\v 16 Aca, ipitha ohothing th’ohothing thohokalu isong. Dicuhit hanabo n’ofereho hosong, isarak epitha thoiruhohini ara nabis.
\v 17 Ara Ojok lathuk awahuna ethaithahina ara naleyo d’ohoruthak h’aning neruhohini daangan neloitho nawahi ehandyerek inyong, ithakolok inyong lo eruhohina th’epitha.
\v 18 Ihandyo ahani, dara th’asang arehai thahaang iloitho, thahaang ocohi d’Ojok adwalarik, ohoi hathuk angeroro didima, iwon ohoi de hothaja dindafaitho th’akolon thon’othaji dindafaitho ayenio nesarahini dihithemi hohoi.
\v 19 Ewon h’ayenio ara nekau karik akolon n’othaji, ayenio najinga tholothwa tholohurong h’emuhet.
\v 20 D’amaji nathuk Yesu, lolo ahithemi nahothai, ajingahina dimaji hohothai. Athuk awonan ara fadiri lohittok mak, thoyihoi tholo Melechizedek.
\c 7
\cl Ebwayit 7
\p
\v 1 Inyong nya Melechizedek lo, Ohobu lo Salem, fadiri l’Ojok lothohide, arwangai h’Abramo, ahibu unyong onyahu th’angocyo n’ohobwore, karik aboroyo inyong.
\v 2 Donyong nya isarak Abramo athomnne aboithe n’asang fodok, Enyanyahyo ofure ofure lonyong ara abisan, koti inyong lo ohobu lo Salem, ohobu l’elihan n’ahwandek.
\v 3 Inyong lo aang omonye, aang ahthingi, aang ohohnyo, aang acukwe n’operok dia ecuhit n’amanya. Ojahitha oleyo d’Ojok, arasa ara fadiri mak.
\p
\v 4 Otihatha angai nya obolo othulo lo, disahinerek h’Abramo inyong athomone aboithe n’asang hanyanu inyong th’ofere?
\v 5 Onyakwariat ho Levi hoifothu elafadiri, owoni helafadiri iring najararik oyalu, diduduhuna engara th’ohothing olwarai: th’olarok, juk thosong onyakwariat h’Abramo
\v 6 Ti, Melechizedek, laang amukok nanyong oleyo thosong, ara onyakwarit l’Abramo, karik aboroyo inyong aboithe leruhohini donyong.
\v 7 Aang arisa dijaran aang oitho lotti ocohi aboroyo othulo lohittok.
\v 8 Iring ahani ne, ohothing ohoyak, efothuni engara, ti, d’arami hune, onyahi hijan homanya inyong.
\v 9 Karik, d’ocamarik, Levi, lefocyo engaritha karik aduma dang engaritha tholo Abramo.
\v 10 Anyo, owon nya Levi dithwa h’ohohonyi, d’omiru horwanagarik melechizedk Abramo.
\p
\v 11 Thenene ne, ara osiru elefadiri tholo Levi, ainyong ikoti howaharik elafadiri nabolling thodothoi diholu h’oyihothik ho Melechizedek, haang howoni ara oyihothik ho Arone?
\v 12 Aca, ara iloyito elafadiri, iloyitho dang oyalu.
\v 13 Aca, aboithe locamarik arami hune lya, ojyori l’amukok nake, nakabong othulo loboling legyemarik diwangat.
\v 14 Thenene, aleyo theler, hijan Ohobu lohothai oisuni tho Juda, amukok nakabong Musa ilecyo dilafadiri.
\v 15 Arami hejyo olyeyori theler hune, ara fadiri loboling ladothunu dijahitha iring Melechizedek.
\v 16 Oindu lya ara fadiri, ikara thoyalu tholowahari ahwan, ti, th’adwaran than’amanya no mak.
\v 17 Iring najararik amaninihio hadwa thonyong, “Iye fadiri mak, th’oyihoi tholo Melechizedek.”
\p
\v 18 Aca, kabong nya isarahini efahit nya arakang, anyo, ilik nya karik aang aca.
\v 19 Aca, aang oyalu ithayijyo asang, ti, iyanu ayenio nayyu dihuthunerek koko d’Ojok.
\v 20 Karik aang nyana epitha! Afuni homok ara hofadiri kwong epitha.
\v 21 Ti, aindu ara fadiri th’epitha thol’othulo tholocama donyong. Ara athuk ohobu epitha, aang hokalunyo ahu nanyong.
\p
\v 22 Th’arami tho hune, athuk Yesu esarahina, ethakolok emora angejuk.
\v 23 Ofadirihio ongoro honya hulo, olwari, aang aye ohorik isong egyema dimaji hosong.
\v 24 Ti, orasa Yesu amanya, owon inyong lo helafadiri namanya mak.
\v 25 Inyong nacohi donyong ethalwahuna ohothing fodok hofuni donyong thol’Ojok, anyo, omanya inyong lo th’amojo thohomok.
\v 26 Aca, osiru nya dohothai diwonan ho fadiri lohittok, lodwa, lolama th’eyau, lolibo thilathila, loikeluni th’ohoyak, lethahuye tholohide h’ahide.
\v 27 Aang inyong lo ottwo, iring nattwori hofadiri homok hohittwak, dithafothohina ehumetha juui, ahithemi dodo th’eyatha thahanyong karik hathi th’eyatha thoh’ohothing. Ehandyo nya ahani th’ohothing fodok arabo, thananya ithafothohinerek inyong ahwan nanyong.
\v 28 Anyo, ithagyemayo oyalu hofadiri, ohothing hohittwak howon helihan. Ti, tharami theh’epitha hafuni diholu hoyalu. Ti, ocame l’epitha loindu diholu h’oyalu, ithagyemayo Olonyi, lathuhi ehuhumahina arabo ara lobis mak.
\c 8
\cl Ebwayit 8
\p
\v 1 Thenene, lobo thocamitha, hoicama ohoi hulya lo: Ewon ho faidiri lohittok, lathuk awoni dihap dinget h’okara l’adwaran dihide.
\v 2 Inyong ara Ohoigyemani d’amaji nadwa, atabernakola hadiri nathuk Ohobu, ikara othulo, ehuhumahina.
\v 3 Aca, ithagyemaye fadiri lohittok, dithafocyo esoritha karik ehumetha. Inyong na, owak aning nabo nethafothohini d’orii h’ehuma.
\v 4 Thene, ara ojyori, owon Kristo dihap, aang ara iwonan ara fadiri kwong, aca, owoni ohothing hoithafocyo esoritha iring nawaharik oyalu.
\v 5 Igyema isong hulo arijori karik obibile l’asang hothohide. Ojahitha iring nanya iringyerek Ojok Musa ahibu inyong aindek aduho atabernakola. Ojok ajyo, “Otiha hijan ihuhumyo iye asang bukulung ara harwang d’arijori nanya ithaithahini di donge.”
\v 6 Ti, thenene, arhuk Kristo efothuna amaji negyema nakalu, iring dang nawonderek inyong ara ohoithatharijoni l’emora nakalu nawoni dihide h’aning nayyu neruhohini.
\v 7 Aca, ara awang epal th’aning ehethemoni neruhohini, aang irahi ithifeyo etharehe ikoti.
\v 8 Aca, ara nya Ojok larimak epal h’ohothing, onyahi nya isong, “Otihatha, operok hofuni – ojyo Ohobu - haindu nang ihandyerek emora angejuk h’ahang no Israele karik no Juda.
\q
\v 9 Aang de ojahitha emora nanya ehandyo nang h’ohohonyo hosong d’ofaning leyarik nang isong th’ahas thahasong adi th’ahap no Egypto. Aca, kabong nya isong hulo iruhu emora hindang tuhudik karik dang alau nang nya isong – ojyo Ohobu.
\q
\v 10 Emora na de nehandyo nang h’ahang no Israele diholu h’operok hule, ojyo Ohobu. Esarak nang de dihosi hosong oyano hundang. Egerok nang de dang isong di thaja hosong. Awon nang de ara Ojok losong, isong de awoni ara ohothing hundang.
\q
\v 11 Aang de isong ityenio, ngai h’othulo lonyong, karik ngai h’olai lonyong, hijaran, ‘Oteha Ohobu.’Aca, otehi de isong fodok nang, tholotti lwai dolohittok bebe.
\q
\v 12 Aca, aang nang de alo imiehina egyemitha hasong amonyorok karik eyatha hasong, aang nang alo iyuna koti.”
\p
\v 13 Th’elongo emora ne ara “Angejuk,” anyahi inyong lo hijan emora ehethemoni, amonyong, karik hijan aning namonyong karik angoroi, olitho de malayang.
\c 9
\cl Ebwayit 9
\p
\v 1 Thene, juk emora nothoculwe, owon hoyano homojorik.
\v 2 Aca, ehuhumahini athabernacula. Athwa ethaboithe ara n’ewothi n’mathik h; afangan, amaji nanyari nanya owon ara nadwa na.
\v 3 Tholo hurong hemuhit etharehe, owon nya athwa nabo ditha hatabernakula, nelongoi ara athwa nadwa bebe.
\v 4 Owon Alatare n’ayel d’alotogong. Owon dang h’aroko nemora nanya ithayofo tuhudik th’ayel. Ditha honyong owon ehulo nethwejihinerek amana, othelek l’Arone lopek karik ahabohaboi nemora
\v 5 Tholo hide haroko n’emora, emuhok Okerubin hohu emuhet naburunu, naang ocohi ohothai enyanyahyo tuhudik d’orii lya.
\v 6 Athuhon nya ehuhumyo asang hune, hofadiri nyaafwo thohurong h’atabernakula, dihuhumy egyema nasong.
\v 7 Ti, fadiri lohittok lo hamaring nya ojinga ditha hathwa etharehe, gelere d’ofaning, karik ikara kwong ohotho, newasak inyong th’ahwan thananyong karik th’ahwandek thoh’ohothing heyau eyatha hattik.
\v 8 Ethaithak Ohoile Lodwa hijan, iring nanya howetharik atabernakola ethaboithe, kabong oyihoi ditha hamaji nadwa bebe holeyo. 9
\v 9 Ethamijani nanya nya, d’omiru hulo, aang ehumetha karik esoritha, hesarahini hune, ocohini ethabisahina arami hotho thaji h’ohomojoni.
\v 10 Isong hulo omijyo tuhudik d’anyari, amatha karik elalaitha hamok d’omiru hamojo, oithaithitha hendafaitherek ahwan lwai d’orii hoisuket ongejuk.
\p
\v 11 Aindu Kristo ara fadiri lohittok l’asang hayyu hafuni. Alo thal’atabernakula nayyu bebe, naang ara n’ahap nayeuni ne.
\v 12 Ikara nya th’ahotho than’ahidi karik n’attagwohi, ti, th’ahotho thananyong olefeng ojingak inyong fodok adi d’amaji nadwa bebe, arimak ethalwahuna nahothai namanya mak.
\v 13 Aca, ara ithadwaryo ahotho n’ahidi, n’ohisum karik ewasyo th’ahinwarang na hejfer d’ohothing honya athuhi ethabocyo, dithaliboyerek ahwandek hasong,
\v 14 angai de okalu ethaliboryo th’ahotho thono Kristo, lethafothok ahwan nanyong ara nalibo d’Ojok thol‘Ohoile lomanya mak, dithaliboryo othaja hohothai th’egyemathik fhahaye digyemarik d’Ojok lomijo?
\v 15 Th’ahu thohune, inyong lo ohoithatharijoni l’emora angejuk. Owon ahani, dara, anyo, athuk aye afuhon, dithalwahuna ohothing h’emora angejuk th’amesio n’ohothing hoilongoi difothuna aruthahina namanya neruhohini dosong.
\v 16 Aca, amaji nawonerek awahan, aye n’othulo leyanu inyong thoithaithahini.
\v 17 Aca, owon awahan ara nadiri, ara athuk aye awonan, anyo, aang akolon nanyong homijo ohoyeuni lonyong.
\v 18 Inyong na, juk emora ehethemoni, aang ihuhumunu kwong ohotho.
\v 19 Aca, jOmiru hoisarahinerek Musa efahitha ditha oyalu d’ohothing bukulung, eyaru ahotho n’atagwohi karik n’ahidi, ahari, awaro adoru karik ahyssop, ewasyo amanini naduhutho thahwan karik ohothing buklung.
\v 20 Diya ajyo, “Ahotho na nemora, nathuk Ojok efahahina dothai.”
\v 21 Th’oyihoi tholya aboithe, ewasyo th’ahotho atabernakula karik attitto hakanierek hothomaji h’egyema.
\v 22 Iring najarik oyalu, ethaliboro karik elala asang fodok th’ahotho. Aang amiehina, kwong ahotho.
\p
\v 23 Ahana ne, owak nya hijan arijorihio h’attitto fodok hothohide thethaliborye thehumetha thah’ecangi huna.
\v 24 Aca, kabong Kristo ojingak ditha hamaji nadwa bebe nehuhuma th’ahas, aning nawon ara arijori ija n’aning nadiri. Kombwo, ajinga di paradiso thahwa, aleyo dihithemi h’Ojok thohothai.
\v 25 Aang olo diya disarahina ahwan nanyong dihumarik operok olwarai, irinng nehandyerek fadiri lohittok, lojinga d’amaji nadwa bebe gelere d’oyinga th’ahotho thono loboling.
\v 26 Ara nyana ahani, aang hora iinduna ithathaciana operok olwarai ge th’asihothe nahap. Ti, thenene, athuk aleyori dicuhit h’operi diduhuna eyau adi thehuma thananyong olefeng.
\v 27 Iring nathuhi ajaran oye othulo gelere, karik deholu honyong akanyo aindu,
\v 28 ahani nya dang, esarahini nya Kristo thoiduhu eyatha h’ohothing olwarai karik oindu de ileyori operohothi etharehe, ikara d’arami h’eyau, ti, dithalwahuna ohothing hoithilayo inyong.
\c 10
\cl Ebwayit 10
\p
\v 1 Aca, oyalu obibile ti l’asang hayyu hafuni. Ikara iring oisuket ladiri l’asang hune thahwandek. Ohothing hofuni d’Ojok, aang ithaliborunai thehumetha thaheyanu fadiri d’oyinga.
\v 2 Ara ikara ahani, aang esorio n’ehumathik ira iwetha? Aca irahi ohomojok ithaliborunu gelere, aang hoirahi iyoitho th’eyau ikoti.
\v 3 Ti, th’ehumathik thohuna, owon eyuhina th’eyatha d’oyinga.
\v 4 Aca, aang ocohi d’ahotho n’ohisum karik n’ahidi diduna eyatha adi.
\v 5 Aindu nya no Kristo dihap, ajyo, “Ehumathik karik esoritha, kabong ithai iwak, ti, ahwan ethuk ithai nang ehuhumahina;
\q
\v 6 th’esoritha thaha nuda karik h’eyau haang ithai ileng amuno.
\q
\v 7 Thiya, nang ajyo, “Idorotho, nang lo – iring negerorik inyong thonang ditha h’amaninihio haduhutho dihandyo awahan nahoi, Ojok.”
\p
\v 8 Ahithemi, ajyo inyong, “Ikara nya ehumetha, ikara esorith, ikara esoritha hamuda fodok, ikara esoritha h’eyau haang ithai iwak, hakaang ithai ileng amuno.” Ehumetha hune hesorye th’oyalu.
\v 9 Thiya inyong ajyo, “Nang lo digyema awahan nahoi.” Eduhu inyong lo ehandit ehethemoni adi, dihuhumahinerek ehandit etharehe.
\v 10 Th’awahan thonya, ethuk ohothai ehuma th’esorio than’ahwan no Yesu Kristo, gelere do fodok.
\v 11 Juui ewetha fadiri ho fadirihio disoryo ehumetha haang iduhu adi eyatha.
\v 12 Ti, esoryo nya Kristo th’ohothing fodok gelere ehumathik h’eyatha, awoni dinget h’Ojok.
\v 13 Lodithilayo lwai ehuhumio n’omerok ara ewethik n’ahejek hanyong.
\v 14 Aca, th’esorio aboithe ethabisak mak ohothing hathuhi ethadwaryo.
\v 15 Ohoile Lodwa dang onyahi dohothai. Ethaboithe ojyo inyong,
\q
\v 16 “Emora na naindu nang ihandyo hosong diholu h’operok hulo, ojyo Ohobu. Aindu nang de isarahina oyano hundang dithaja hosong, aindu nang de igerohina dihosi hosng.”
\p
\v 17 Thiya afonik, “Eyatha karik aangan n’oyalu hosong, aang nang aindu iyuna.”
\p
\v 18 Thenene, amaji nawonderek amiehina th’eyatha thohune, aang thiya ehama nabo th’eyatha.
\p
\v 19 Inyong na, olarok, ewon h’emihina nahwandek dijingahina ditha h’amaji nadwa bebe th’ahotho thono Yesu.
\v 20 Inyong lya oyihoi ongejuk lomijo lathuk inyong iehumahina dohothai thal’emuhit, iring nejarik, th’ahwan thananyong.
\v 21 Anyo, ewon ho fadiri tholodihide h’athwa n’Ojok,
\v 22 Hadahathik ditha h’othaja hadiri ditha hakolon n’eruhon, athuhon nahothai ethaliboryo arami hoth’othaja karik athuhon nahothai elalayo ahwandek hahothai th’ahari thahalibo.
\v 23 Hendefatha dang ara nako eyihina newak, anyo, othulo leruhok inyong lo, aang odwala.
\v 24 Hegigilothik tuhudik, angai ethakolyo ahwandek di muno karik d’egyemathik hayyu.
\v 25 Hothai thaang hoidehi asuduha amaji aboithe, iring henadyerek homok. Kombwo, hethakolyethek ahwandek tuhudik ara ithai hetehu oholong lalo ilumon.
\p
\v 26 Ara erasa eyauna ahibu ohothai ethuk efothuna atehan n’arami hadidir, awang ehuma neyau.
\v 27 Kombwo, owon abangi n’arauna n’akanyo n’arami, engere n’ahimang naindu ingohina omerok h’Ojok.
\v 28 Loida oyalu lo Musa, oye kwong amiehina nengengelak ohothing arehai dia aunihoi.
\v 29 Asario ngona namonyong angai igigilo iye iasarahini d’othulo loikalyo ahejek ho Olonyo l’Ojok, othulo leduhu ahotho n’emora ara naang odwa, ahotho nanya ethadwaryerek inyong karik amoryo Ohoile l’alwahio?
\v 30 Aca, itek ohoi, inyong lonya ojyo, “Arofuna, hindang. Arofu nang de.” Koti, “Okanyo de Ohobu ohothing honyong.”
\v 31 Aning nabangi bebe, inyong apwaharu dihas h’Ojok!
\p
\v 32 Ti, hoikworo operok honya, diholu hethaithahina iye, angai ongongohini ethathaciana.
\v 33 Th’omiru homok, amorye karik ethagyemye nya iye karik th’omiru homok, engaru iye ainyong nya ihandye dohomok.
\v 34 Aca, emiehunu iye nya ohothing hoifitha karik ara iye iruhok th’amuno attitto hahoi hahororoi. Itek iye thanahoi hijan iwon iye th’ahwan thanahoi hatitto hayyu hamanya.
\v 35 Inyong na, hoicohoro enithina nahoi ahwan d’eruhon, nawon hesorio nahittok.
\v 36 Aca, iwak iye aden ahithemi, dara ara, ara iye lethuk ehandyo ainyong owak Ojok, iindu iye de ifothuna aning nathuk inyong eruhohina.
\q
\v 37 Aca, d’omiru tiibai, oindu de loindu le iinduna. Aang okarihi.
\q
\v 38 Hindang lobis lo, oindu de imanya th’eruhon. Ara onyha adiholu, aang de otheji hindang omuno honyong.
\p
\v 39 Ti, aang ohoi th’ohothing hoiloyitho adi holu ditrohoja. Ohothai had’elulung howon h’eruhon karik n’ohoilehio hosong hofwo ahithemi.
\c 11
\cl Ebwayit 11
\p
\v 1 Thenene, owon eruhon n’asang heyihini karik asang hamok haang ingengelunu.
\v 2 Aca, anyo th’arami thohuna, esarahini nya ohohonyo amasok hegyemarik isong deruhon nasong.
\v 3 Th’eruhon etek hijan oyeye nya ahap th’efahi thon’Ojok, dara aning natehunu aang nya oyeuni th’asang hanya otehunu.
\p
\v 4 Theruhon nya isoryo Abel d’Ojok ehuma nayyu thono Kaino, inyong nanya orimahinerek inyong ara lobis karik Ojok acama thonyong ara nayyu; thesoritha, karik theruhon, Abel lohocama, juk athuk aye.
\p
\v 5 Th’eruhon nya thananyong iyaru Ojok Enoka adi, tek atehu aye, “Kabong nya orimahini inyong, anyo, eyaru inyong Ojok adi.” Aca, dihithemi heyaru nanyong adi, arimahini karik eruhohini hijan ethamunoyo Ojok.
\v 6 Kwong eruhon, oko dithamunoyo Ojok. Aca, owak, othulo loindu d’Ojok thoiwona heruhon hijan owon Ojok karik hijan inyong lo ohoisarani l’esoritha d’ohothing hothifeyo inyong.
\p
\v 7 Th’eruhon nyana oduho Noah thayifuna thon’Ojok, aroko than’ethalwahuerek inyong nya ahang nanyong. Th’ehandyo ahani ne, Eda ahap, aindu ara ohoruthani l’abisan neruhon.
\p
\v 8 Th’erohon nya iruhu karik alo Abramo, nanya ilongorik inyong na, d’amaji nanya olo inyong ifothuna, aruthak endafaitho.
\v 9 Alo nya dendak aang otek dingai olo inyong. Th’eruhon nya isuka inyong iring ohodahani d’ahap nanya eruhohini ara naruthak inyong. Esuka di morokohio isong ha Isako karik Yacobo, ara ohoruthak h’ahap neruhohini dosong.
\v 10 Aca, iriryo nya inyong abore nawoni asihothihio hanya ara harik Ojok ohokerani karik ohoduhoni.
\v 11 Juk nya Sarah iholofi, aindu imoho th’eruhon. Ofuk arami hune juk nya dang emarwo inyong, anyo, eduhu inyong lonya iruhok donyong, ara lehandyo asang hadiri.
\v 12 Inyong na, th’othulo lo aboithe – karik aindek nya aye – ayisuni onyakwarihio olwarai iring ohilyefi didou karik aang hoiherunai iring akujo difohor h’ahari.
\p
\v 13 Dith h’eruhon nya oyetha hulo kwong efothuna asang hanya eruhohini dosong. Kombwo, atehuni karik emandaye isong olamarai, karik eruhohini hijan isong ohodahak karik ohothiing hangararik dihap.
\v 14 Aca, d’ohothing hocama asang hajak ahani, ethaithahini tuhudik hijan isong hothifeyo ahap nasong.
\v 15 Ara ir igigilo isong th’amiji thanya ofwarik isong adi thiya, irahi isong irimahina oyihoi lonyaharik isong.
\v 16 Ti, ahani ne, owahi isong amiji neyak iyiji, nawon ara paradiso. Inyong na, aang ohu n’Ojok ojwu, dilongorik hosong inyong ara Ojok losong, aca, athuk inyong ehuhumahina abore dosong.
\p
\v 17 Ahibu inyong nya athuhi athemyo, theruhon nya isoryo Abramo Isako. Oitho nya lonyong le loboithe, lonya athuk efothuna asang hanya eruhohini.
\v 18 Abramo lonya ojyori donyong, “Tholo Isako mwai ofuni ilongo ongerenyihio hohoi.”
\v 19 Egigilo nya Abramo hijan Ojok ocohi ethabuhuna Isako th’oye, dicama thegigilo, thosong nya, oindu inyong ifothuna inyong ikoti.
\v 20 Theruhon inya dang d’asang thahafuni ifuna, oboroyo Isako Yakobo karik Esau.
\v 21 Theruhon inya oboroyo Yakobo, omiru hoyerik inyong, olonyirok arehai ho Yosefo. Amojo Yakobo ahibu inyong okiyo dihu h’othelek lonyong.
\v 22 Theruhon inya ocama Yosefo, ahibu engohunu nanyong aindek, thafwan thon’okalifinok ho Israele afwan adi tho Egypto karik etotohok dosong arami h’ohot hosong.
\p
\v 23 Theruhon inya idimaitho oyefathik aunihoi omonye karik ahathingi Musa, orii hoyisunerek inyong, anyo, atehuni nya inyong ara oitho lolibo.
\v 24 Theruhon inya ida Musa, ahibu inyong athuk abolori, inyong thoilongoi ara lolonyi hanangaring ho Pharaoh.
\v 25 Anyimu ethagyema h’ohothing h’Ojok th’alengan amuno n’amanya n’eyau omiru tiibai.
\v 26 Eduhu ajwuon n’ahu th’arami thoho Kristo aning nakalu ayiji nayong ebarithi ho Egypto, aca, inyong lo nya lomijo ahithemi d’esorio nanyong.
\v 27 Th’eruhon inya idyaharu Musa Egypto. Aang inyong lo nya obang engere n’ohobu, aca, angongu inyong nya, ojahitherek lengengelu le, laang otehunu lo.
\v 28 Th’eruhon inya orasa inyong endafaitho ofaning l’ehuma n’Ojudei karik ewasio n’ahotho daang ohoitharohojani othin okalifinok hoicahi ayisuna h’oduring ohoithemok ho Israelites.
\p
\v 29 Th’eruhon nya odaha Ojudei athan’ahari nahittok n’apadongo, ojahitherek hodaha dindak. Athemio nya n’ohothing ho Egypto adaha iring isong, ahari adiloro.
\v 30 Th’eruhon inya apwaharu agoromi ho Jeriko, diholu hekolohina isong d’operok cofa.
\v 31 Th’eruhon nya aang Rahab amwak oye h’ohothing hoiminge, anyo, athuk inyong na efothuna odwalak th’elik.
\p
\v 32 Ainyong de nabo acohi nang acama? Aca, obunyok nang de omiru, ara acama nang arami ho Gideone, Baraka, Samsone, Jephthah, Davide, Samuele, karik arami h’ohocorok.
\v 33 Th’eruho nya ohoru isong ahabworehio, abisan nawahuni karik efothuni asang heruhohini ara hasong. ethawejye ahuthuhye h’oumeho,
\v 34 ethadunye akolon n’ahimang, ekarahini afijan n’odemi lohittok, ethakolye nya isong ara helik, engereji nya diremon, karik atteluni elulungir halifa h’ohoremok.
\v 35 Efothu angorwo ohoyak hosong th’ebuhuna. Ethagyemye homok, hoidari ahohina nasong, dofuni isong itehan ebuhuna nelak iyiji.
\v 36 Homok arimak ejwalayo karik afodoho, karik athora th’eririk karik efitha.
\v 37 Amirye isong th’omorik. Akwahye isong areh arek. Attohori isong th’odemio thohohittwak. Adahai dithah’amuhun h’akero karik h’ahidi. Icani isong inya, oreye isong, ithagyemye isong.
\v 38 Aan g nya ahap osiru thosong. Ithabuhoi nya eyambaritha diterere karik didongiok, dilomi karik digulumehio dihap.
\p
\v 39 Juk nya eruhohok Ojok ohothing hulya bukulung th’eruhon, kabong hoifothuni aning nathuhi eruhohina dosong.
\v 40 Ehuhumu Ojok aning nayyu dohothai, dara kwong ohothai, aang ocohi dosong difuna iwonan ara ohothing hoiyji bebe.
\c 12
\cl Ebwayit 12
\p
\v 1 Inyong na, juk okamahini ohothai th’adiko thanahittok thon’ohothing hottihak, hesarahina arakang auhan karik eyau nalohu ara nelik bii gwotohok ne. Hangerotho th’akolon angetha nathuhi esarahina dihithemi hohothai.
\v 2 Hamijyethek tuhudik do Yesu, ohoyani karik ohoithaliboroni th’eruhon. Aca, d’amuno naya isarahini dihithemi honyong ne, angongu akruce, alau ajwuon n’ahu kark awoni dihap dingek h’okara l’Ojok.
\v 3 Igigilothik thonyong, inyong lathuk angonguna edara inyong th’ahwan th’ohoyak, ara ithai ithalithok othaji.
\p
\v 4 Ethuk ithai edara ara ithai iriborik eyau lwai d’ahotho;
\v 5 ethuk ithai akworo engarahina netyenio ithai iring olonyirok: “Oitho hindang, hoilau oindefit tuhudik l’Ohobu, dia ara iye ingunya, ara lethabisak iye.
\q
\v 6 Aca, Ohobu indafaitho tuhudik othulo lomuno inyong, karik asaryo olonyi loifothu inyong.”
\p
\v 7 Ongongok ethathaciana ahana nendafaitho tuhudik na. Igyema Ojok hothai, iring h’olonyirok. Aca, ainyong oitho lowon diya lya laang omonye indafaitho tuhudik?
\v 8 Ti, ara aang endafaitho tuhudik thohoi, nangara ohothing bukulung diya, aang oyalu lonyong hobis karik ikara isong olonyirok honyong.
\v 9 Ikoti, iwon ohoi nya h’omonye howoni araohothing hoindafaitho ohoi tuhudik, ohoi ibang isong.
\v 10 Endafaithok ohoi omonye ohoi tuhudik d’omiru tiibai iring igiglo isong ara nayyu bebe. Ti, indafaitho ohothai Ojok tuhudik d’ayiji nahothai, docohi ohothai angara adwaran nanyong.
\v 11 Aang endafaitho tuhudik d’omiru, najahitha nesarak amuno, ti, isarak athariha. Ti diholu, oyisu ahayocong n’abisan d’ohothing hoithathethemyo inyong.
\v 12 Inyong na, ithakolyethek ahas hathai hayiha adihap, karik ahungitho hathai helik bii hune.
\v 13 Ithabisahina oyihothik d’ahejek hathai, daang amaji napala okunyo, ti, dithalihyo.
\p
\v 14 Othifoithethek elik nahap th’othulo, karik adwaran, aca, kwong inyong, aang othulo de lotehu Ohobu.
\v 15 Omijethek tuhudik, daang otholu laang owon h’alwahio n’Ojok, karik daang ohode l’adwaran n’othaji obolo diyanu ethathaciana, daang oindu ithabocyo ohothiing holwari,
\v 16 daang othulo leleru iring Esau, lonya ithanyangak aruthahina n’asang hedyaharu ohohonyo h’omonye d’anyari oboithe.
\v 17 Aca, itek ithai hijan diholu, awahan nya nanyong arimahina aboroyo, edari donyong, anyo, aang orimak oyihoi loburunerek inyong, juk othifeyo nya th’ehio.
\p
\v 18 Aca, ethuk ithai nya afuna d’odonge, locohi ethin, odonge l’ahimang nawulo, omudwe, eryohon karik olotutu.
\v 19 Kabong ithai ifunu d’afwada n’amo dia opilo d’omurut locama ocamitha d’ohoithayirak hoifiyo hijan ocamitha kodien homok thaang hocamai dosong.
\v 20 Aca aang nya isong ocohi adihuna arami hefahahini: “Juk kedien othin ecang odong, inyong thomirye th’omorik”
\v 21 Ithabangyo nya arijori ne ahani, inyong nanya ojyo Musa, “Ethabanga nang karik ehihira nang.”
\v 22 Kombwo, ethuk iye aindu d’Odonge lo Zion karik d’abore n’Ojok lomijo, Yerusalem no paradiso karik d’anjelohio esihe athomone tomon d’asuduhe namuno.
\v 23 Ethuk ithai afuna d’asuduhe n’ohothing hoicahi ayisuna, hathuhi egerohina di paradise. Ethuk ithai afuna d’Ojok, Ohokanyani lo fodok karik d’ohoilehio h’ohothing hobis hathuhi ehuhumunu ara hosiru.
\v 24 karik ethuk ithai afuna do Yesu, ohoithatharijoni l’emora angejuk karik d’ahotho newasye nacama tuhudik th’ahotho n’Abele.
\v 25 Otihatha hijan othulo locama, thaang olwaoi. Aca, ara kabong isong oburaru, orii ledararik isong othulo leringyo isong dihap, efunu de iburaru tiibai, ara eloitho ohothai adi thole leringyo ohothai tho paradiso.
\v 26 Th’orii homok, ithahihiryo de omurut lonyong ahap. Ti, thenene, eruhok inyong lo karik ajo, “D’omiru homok ithahihiryo de omurut hindang ahap karik paradiso.”
\v 27 Ocamitha hulo, “Domiru homok koti” ojyo eyaru adi n’asang huna hacohi ethahihiryo, ahana, h’asang hathuhi ayeyo, dara asang haang ocohini ethahihiryo, ofithoroi de.
\v 28 Inyong na, efothuna ohobye laang ithahihirunu, hejaratha humo karik th’oyihoi tholya, hamojothik Ojok th’abangi karik th’ehihir.
\v 29 Aca, Ojok lohothai, ahimang nanyo.
\c 13
\cl Ebwayit 13
\p
\v 1 Amuno n’elalai, thoilo ahithemi.
\v 2 Hoikworo ethamunoyo ohodahak. Aca, tholya ethaithak homok ayiji d’anjelohio kwong atehan.
\v 3 Hoikwothik ohothing hoifitha, iring ithai hefithahini hosong. Hoikworo ohothing hoithathacianye, iring near iye iwonderek iring isong ditha hahwan.
\v 4 Amutha thoindafaithe thethahabuye th’ohothing bukulung, karik ofyel l’amutha thoindafaithe th’alibori. aca oindu de Ojok ikanyo omwahi karik ohothing hoijwalayo angorwo hohomok ohothing.
\v 5 Amuno nahoi tholamara th’amuno n’enyahwo. Ifonga th’asang thahawoni dohoi, aca, Ojok th’ahwan ojyo, “ Aang nang iye idehi dia idyaharu.”
\p
\v 6 Hefongatha dewon halwahio dijan, “Ohobu, oholwahani hindang, aang nang de abang. Ainyong ocohi othulo ehandyo donang?”
\p
\v 7 Iduhu ohithwaha hohoi, ohothing hacama ocame l’Ojok dohoi, karik indefu ayiji n’oisukaitha hosong, omiru eruhon nasong.
\v 8 Orijoro Yesu Kristo ngolengole, ahanana karik mak.
\v 9 Iye thaang hoithapanyarai adi th’etyenitha thahalwa karik halifa. Aca, oyyu kodien hijan othaji thoithakolye th’alwahio ikara th’anyaitha thahaang olwahu ohothing hodaha thosong.
\v 10 Ewoh h’altare naang ohothing hoigyema di tabernakola onyo thiya.
\v 11 Aca, ahotho n’ecangi hattohori iyanu fadiri d’amaji nadwa, ahibu ahwandek hasong omudye dingwai.
\v 12 Ethathaciana dang Yesu ahani dindak h’oyihet lohittok l’abore, dithadwaryerek ohothing th’ahotho nanyong. olefeng.
\v 13 Hafatha, iring ahani ne, donyong adi th’amaji ne, eyaru h’amonyori nangongok inyong.
\v 14 Aca aang ohothai iwon h’abore namanya mak hini. Kombwo, ohoi hoithifeyo le, loindu de lo.
\v 15 Tholonyong, hathi, hesoryethek ehumathik h’emamajyo d’Ojok, emamajyo neyanu ahayocong n’obiyuha hoiruhu ofure lonyong.
\v 16 Ohothai thaang okworo ehandyo ayiji karik angara, aca thehumathik thohune omuno Ojok bebe.
\v 17 Ithayiryethek ara ithai itharuhu da hahong hothai, aca ikeyo isong hulo ohoilehio hothai, anyo, isong de ofuni ifiyo. Ithayiryethek dofuni hahong hothai ihandyo ahani th’amuno, karik ikara thewiwinya, naang de ohwadu aning nabo nayyu dothai.
\p
\v 18 Omojothik thohoi, aca itek ohoi hijan iwon ohoi h’othaja hoyyu karik iwak ohoi amanya ibisai ditha h’asang bukulung.
\v 19 Engarak nang ithai thoihandye ahani okalak, dofuni nang inyahunu dothai kwak.
\p
\v 20 Thenene, Ojok l’elihan n’ahap, pwanga, inyong lonya inyahunu th’ohoyak, ohoyohoni l’akero, Ohobu lohothai Yesu, th’ahotho than’emora naang ecuhit,
\v 21 thesarak iye asang bukulung hayyu dihandyerek awahan nanyong, negyema ditha hohothai, nethamunoyo inyong, tholo Yesu Kristo, lowon donyong ethabolorio mak. Amen.
\p
\v 22 Thenene, akihi nang ithai, olarok, theyethe ocame l’engarahina, lehethek nang tiibai egerohina dothai.
\v 23 Otehatha hijan olai lohothai Timoteo, laindu nang de honyong itihyo ithai, ara oindu kwak, ahohini.
\p
\v 24 Ithamandahi hahong hohoi fodok karik ohothing bukulung hodwa h’Ojok. Howon d’Italia, ithamandaye iye.
\p
\v 25 Alwahio thoiwona hothai fodok.