\id PHM
\ide UTF-8
\h Filemone
\toc1 Filemone
\toc2 Filemone
\toc3 phm
\mt Filemone
\c 1
\cl Ebwayit  1
\p
\v 1 Paulo, othulo lefitha tho Kristo Yesu, karik olai Timoteo, do Philemone, omotte lohoi loko karik ohoigyemani hohoi,
\v 2 D’Apphia, ahani nahoi, karik d’Archippus, ohoremoni hohothai, karik d’Ekklesia, nawonditha h’oputet dihang hohoi,
\p
\v 3 Alwahio karik elik n’ahwandek karik nahap thoiwona dothai thol’Ojok, Omonye lohothai karik Ohobu Yesu Kristo.
\p
\v 4 Afurak nang juui Ojok hindang ahinwarang, ara nang lelecyo iye ditha homojitha hundang.
\v 5 Anyo, ethairu nang th’eruhon thana iwon iye honyong d’Ohobu Yesu karik amuno newon iye honyong d’ohothing fodok honyong hodwa.
\v 6 Amojo nang doko angara neruhon nahoi karik diwon iye h’atehan nefut d’aning nayyu newon honnyong ditha ho Kristo.
\v 7 Aca awon nang nya h’amuno karik alengan n’amuno nahoi, anyo, ethakolyo iye, olai, othaja h’ohothing hodwa h’Ojok.
\p
\v 8 Inyong na, juk awon nang nya h’akolon nahu fodok ditha ho Kristo difahahini iye dihandyo aning nanya ira iye ihandyo,
\v 9 ti, anyo, th’amuno, amojo nang iye kombwo – nang, Paulo, othulo omarwani, karik othulo, lefitha thenene tho Kristo Yesu.
\v 10 Nang lamojo iye th’arami thohoitho hindang Onesimo, layisu nang ahibu nang efitha.
\v 11 Aca, awangi nyana ajoo hanyong thohoi orii le, ti th’orii lya, alwahu ohothai arehai, iye karik nang.
\v 12 Athuk nang asulahina inyong ikoti dohoi, inyong lawon ara othaji hindang lo.
\v 13 Awak nang nya kodien hijan isuka ohoi honyong dolwahu nang thoiye, ahibu nang efitha, th’arami thah’evanjelio.
\v 14 Ti, aang nang nya awak ehandyo aning naboling kwong eruhohina nahoi. Awang nang nya awak hijan egyema nahoi nayyu thoindu th’eringahina, ti, thoindu th’othaji loyyu.
\v 15 Kode th’arami thohune nya ithapehuni inyong thohoi orii tiibai, doindu inyahara dohoi arabo mak.
\v 16 Aang inyong lo oindu iwonan ara ongaca, ti, th’awonan ara ongaca, oindu de iwonan ara olai lomunoi. Omunoi de inyong lo kereki thonang, amunoi dang inyong bebe thoiye, ara othulo karik ditha h’Ohobu.
\v 17 Inyong na, ara awon nang dohoi ara ohoingarani, ifothu inyong ara nang.
\v 18 Ara amoryo inyong iye dia iwon iye h’ahoros donyong, nang de aduma.
\v 19 Nang, Paulo, egero amanini na, th’ahinang thono hindang. Nang de aduma - ikara hijan ike iye th’ahwan hindang!
\v 20 Aa do, olai. nang dang thorimak aning nabo thohoi ditha h’Ohobu; ithakolye othaji hindang ditha ho Kristo.
\p
\v 21 Dinihina honang ahwan d’eruhon nahoi, nang legero dohoi. Atek nang hijan ihandyo iye de aning nabolo than’efiyo nang dohoi.
\v 22 D’omiru hulya dang, ihuhumak athwa n’othohomononi donang. Aca, eyihi nang th’omojitha thohohoi, ofuni nang de inyaharu dothai.
\p
\v 23 Imandayo iye Epaphras, ohoifithani honang ditha ho Kristo Yesu.
\v 24 Imandayo iye dang ohigyemak honang: Marko, Aristharchus, Demas karik Luka.
\p
\v 25 Alwahio n’Ohobu lohothai Yesu Kristo thoiwona h’ohoile lohoi. Amen