\id TIT
\ide UTF-8
\h Titos
\toc1 Titos
\toc2 Titos
\toc3 tit
\mt Titos
\c 1
\cl .    Ebwayit 1
\p
\v 1 Paulo, ohoigyemani l’Ojok karik ohifak lo Yesu Kristo d’eruhon n’ohothing h’Ojok honyimuni karik atehan n’eladiri neruk h’elajok,
\v 2 h’eyihina nesu namanya mak, neruhok Ojok laang odwala dihithemi hoperi fodok h’orii.
\v 3 D’omiru hobis, ethalyehi ocame lonyong th’anyahina thananya ithafothohini donang th’efahit thon’Ojok ohoithalwahani lohothai.
\p
\v 4 Do Tito, olonyi ladiri l’eruhon nelulung nahothai. Alwahio karik elihan th’Ojok Omonye, karik Kristo Yesu Ohoithalwahani lohothai.
\p
\v 5 Aca, th’arami thohune, edehi nang iye di Krete, dihuhumahinere iye asang hakabong, ingohunu karik dithandefyo ohobolok ordine, iring nanyahinerek nang iye.
\v 6 Ohoboloni tholiboro, onde l’afure aboithe, h’okalifinok hoiruk karik ethaningye arami.
\v 7 Owak othulo loingengelak karik lendafaitho ahang n’Ojok, tholiboro. Thaang hoithadarai, ingerejyethe, iboithoyithe, thoiriboithe karik thaang hoiwona ara othulo audoroni.
\v 8 Kombwo thoiwona ara othulo loifothu ohothing, lomuno ayiji, lotek, lobis, lodwa karik lotek karik ayinik endafaitho ahwan nanyong.
\v 9 Thowethai ara losiru hocame lathuhi etyenio, disarahini homok thothiforo isong d’etyenio nadiri karik ethabisahini ohothing hoida inyong.
\p
\v 10 Aca, owoni ohothing olwarai hoida, ohocamak ija karik odwalak, kereki ohothing h’abosio.
\v 11 Owak ithawejye isong. Isong hodithalongojyo ahangithek bukulung th’etyenio dirimahina ayiji nethorohojyo ofure lothulo, aning naang oirahi ityenio.
\v 12 Athuk lobo th’ohocorok hosong ajaran, “Ohothing ho Krete juui odwalak, oicangi h’amonyori karik ofathak oudorok.”
\v 13 Obis ocame lya. Iring na, ithabisyethek isong thanako, diruhi diri ditha heruhon.
\v 14 Hoithaningyethek oyendok h’ebokwo h’Ojudei dia efahitha h’ohothing heloithoro adi th’eladiri.
\v 15 D’ohothing oliborok, olibori asang bukulung. Ti, d’ohothing hamuyak karik haang iruk, awang aning nalibo, ti, ahosi karik arami hothothaja hosong, athuhi amuyahi.
\v 16 Iruhohini hijan otek isong Ojok, ti, aang owahi Ojok thegyemitha thohosong. Ongica isong hulo, aang ithaningye arami karik aang alwahuni aning naboling degyema nayyu.
\c 2
\cl Ebwayit 2
\p
\v 1 Ti, iye, ocamai aning nasiru h’ettittoyo nadiri.
\v 2 Ityenie ohobolok thoyijo, thobangi, thosiru diruhon, dimuno, karik thokolo difwan ahithemi.
\v 3 Iring ahani ne dang, ityenie dang ongorwo ahabolok thobangi thoisukaitha thohosong, thaang hocamai imonyoroi th’ohothing thohomok, dia amatha obalu bebe, ti, thoiwona ara ahetyenak h’aning nayyu,
\v 4 karik ahani ne dang ithethemahini ongorwo hattik thomunoi obusuha karik okalifinok hosong.
\v 5 thoteha, tholiboro karik thoiwona ara ahendefak hayyu h’ahangithek, thoiruho arami h’obusuha hosong, tek acamarik ocame l’Ojok imonyoroi.
\v 6 Ingarahina ottwat thomuja d’oisukaitha hosong.
\v 7 Thoyihothik bukulung, ithaithak ahwan nahoi ara arijori n’egyemathik hayyu.
\v 8 D’etyenio nahoi, ithaithak eladiri, abolori nahoi 9 karik ocame ladiri tholohide edara, dojwu ahu n’othulo leda arami hahoi, anyo, daang orimahini thohothai aning nabo namonyong nacamai.
\v 9 Ongacani thoiwona tholohop h’ohoindefak hosong d’asang fodok, dithamunoyo isong karik thaang hoilaferejyo hosong.
\v 10 thaang hohoholye thosong, ti, kombwo, thoithaithak eruho nayyu, dara th’oyihothik fodok diyanu isong akolon d’etyenio n’Ojok ohithalwahani lohothai.
\v 11 Aca, athuk alwahio n’Ojok aleyori dithalwahuna ohothing bukulung.
\v 12 Ittittoyo inyong na ohothai edara aangan n’elajok, awahan nasang hothohop karik amanya nendafaitha nahwan nahoi, abisan karik omanyitha h’elajok h’oper lo.
\v 13 Ahibu ohoi imijo ahithemi difothuna eyihina nahothai namunoi, aleyori n’abolori n’Ojok karik ohoithlwahani lohothai lohittok, Yesu Kristo.
\v 14 Esarak Yesu ahwan nanyong dihouna ohothai thaangan n’ayano, dithaliboryo inyong ara honyong, ohothing homuno egyemathik hayyu.
\p
\v 15 Ocama th’arami thohune, ingarak ohothing thoihandye isong, karik ara iye ithabisyo th’akolon fodok. Lobo thaang olau iye.
\c 3
\cl Ebwayit 3
\p
\v 1 Ithayuhi isong thoiruho ohoindefak karik ohoiringak hosong, thoiruho arami hasong, thoihuhumye ahwandek d’egyemathik fodok hayyu.
\v 2 thaang homorye lobo othulo, thaang hoiriboi, thoyijo, ethaithak elamuha d’ohothing fodok.
\v 3 Aca, ohothis th’ahwandek, aangi nya ahosi hahothai karik aang nya dang ethaningyo arami. Ethatangarai nya ohothai karik ewon ohothai ara ongacani h’asang olwarai hewak karik hamuno. Emanya ohothai ditha amonyori karik ahaini. Engica nyana, ara ohothai ingicarik ahwandek.
\v 4 Ti, aleyori nya nayiji n’Ojok Ohoithlwahani lohotha, karik amuno nanyong d’aleyori n’othulo,
\v 5 ikara nya thegyemathik thah’abisan, ehandyo, ti, thamiehina thanyong ithalwahu ohothai, thelalayo ayisuna angejuk kari ethalengejuhyo th’Ohoile thol’Odwa.
\v 6 lojuhok Ojok th’abara dohothai thol’ohoithalwahani lohothai Yesu Kristo.
\v 7 Inyong na, athuhon nanyong ethasiruna ohothai th’alwahio thanyong, efunu iwonan ara ohoruthak howon hayenio n’amanya no mak.
\v 8 Ocame lya loko bebe. Awak nang iye thoitotohye, dara howoni heruhon d’Ojok, thoijye tuhudik d’egyemathik hayyu. Oyiji asang hune, olwahuni ohothing fodok
\v 9 Ti. Ikarahina oferek l’ananga karik enyaenyaha n’amukoko, eribo karik angalafa d’arami h’oyano. Aang aning nayyu narimahini th’asang hune.
\v 10 Idara othulo leyanu ebwa dihiji hohothai, diholu hethayuhina operok arehai,
\v 11 ahibu iye itek hijan othulo lya athuk eloyithoro adi th’oyihoi lobis, karik lodiyauna karik lodidara ahwan nanyong.
\p
\v 12 Ara nang lasulak Artmas dia Tychicus, indu kwak donang di Nikopolis, d’amaji nawak nang esukarik th’Ohirbo.
\v 13 Ehandye asang fodok hacohi dohoi disulahina Zenas, ohokanyani l’arami karik Apollos, daang icani aning nabo.
\v 14 Ohothing hohothai thomijye d’egyemathik hayyu heyanu halwahu eyanu asang hayyu, daang ecan.
\p
\v 15 Ohothing bukulung howon honing, imandaye iye. Ithamandahi ohothing homuno ohothai ditha h’eruhon. Alwahi thoiwona hothai bukulung.