\id 1TI
\ide UTF-8
\h 1 Timoteo
\toc1 1 Timoteo
\toc2 1 Timoteo
\toc3 1ti
\mt 1 Timoteo
\c 1
\cl Ebwayit  1
\p
\v 1 Paulo, ohifak lo Kristo Yesu, iring defahi n’Ojok, ohoithalwahani lohothai Kristo Yesu, ayenio nahothai.
\p
\v 2 Do Timoteo, olonyi ladiri ditha eruhon: alwahio, amehina karik elik n’ahap, th’Ojok, Omonye, karik Kristo Yesu, ohobu lohothai.
\p
\v 3 Iring etotohok nang dohoi, orii handerek nang di Macedonia, iye di Ephesus dithihahina tek ohothing homok etyenio etyena nekela
\v 4 Isong dang thaang homijye bebe d’onyanyahitha h’oiisukaitha karik h’amukoko haang ingohunu. Ithalwaryo oinyahitha hulya ofereho haang ara aning nawak Ojok ehandyo, nara th’eruhon..
\v 5 Iring na, aning nawak efahi arimahina, inyong amuno n’othaji lolibo, th’ayiji thon’othaja karik th’eruhon thanaindu diri th’othaji.
\v 6 Athuk ohothing homok akenyaru th’arami hune, karik athuhi eloithoro d’ocamitha haang iyanu aning naboling nayyu.
\v 7 Owahi awonan ara ohoityenak h’oyalu, ti, aang otehi ainyong ojyori isong dia ainyong inihi isong ahwandek diruhohina.
\v 8 Ti, itek ohoi hijan oyyu pyalu, ara igyemarik lobo inyong ara nabis.
\v 9 Itek ohoi arami hajyori aang oyalu iduhuni th’othulo tholobis, ti, inyong lo l’othulo lepal karik laang hoiruk arami habis, anyo, ohothing hang otek Ojok karik ohoyak karik ohothing hang odwa karik ohoepalak, ohothing hottohyo omonye karik ahathingie, ohottohok,
\v 10 ohothing hoileru, ohothing hoiduhu obusuha ara angorwo hasong, ohothing hoholyo ohothing homok ara ongaciani, ohothing odwalak, ohoimangak karik aning naang olo tuhudik, hoityenio nadiri.
\v 11 Ettitoyo na, olo h’evanjelio nahu n’Ojok, lomuno ethafothohina donang.
\p
\v 12 Afurak nanng Ohobu lohothai ahinwarang. Ethakolyo inyong lo nang, anyo, eduhu inyong lo nang ara ohoiruhoni karik esarak nang dilangaca
\v 13 Nang nya lo, ara omerohothononi, laang odwa, ohoithathacianani karik othulo ohobisani. Ti, efothu nang amehina, anyo, ehandyo nang asang thaangan atehan ditha aangan n’eruhon.
\v 14 Karik alwahio n’Ohobu lohothai, efut, obuhoitho eruhon karik amuno ditha ho Kristo Yesu.
\v 15 Ocame lya loyenie, acohi heruhuna hijan aindu Kristo Yesu dihap dithalwahuna ohoyak hawon nang ara lahong losong.
\v 16 Ti, th’ahu thone, inyong naya isarahinerek nang amehina, dara ditha honang, lahong, dithaithak Kristo Yesu angongio bukulung. Ihandyo ne, ara ethamijani n’ohothing hocohi afuna eruk donyong d’esu namanya mak.
\v 17 Ahana na, d’Ohobu l’operi, laang oye, laang otehunu, Ojok loboithe, Ethahabuyo karik abolori thoiwona donyong mak. Amen.
\p
\v 18 Nang lesarak efahi ne dihithemi hohoi Timoteo, oitho hindang, iring ecoritha hanya ihandye thoiye, direm iye ofere Loyyu,
\v 19 Indefa eruhon rot, karik arami h’othaji. Edara arami hune, athuk esarahina homok ethalumohina eruhon nasong dith’ahari.
\v 20 Homok hosong, isong ho Hymenaeus karik Alisandro, lethafothok nang do Sitan dityenio isong thobanga asang hadwa.
\c 2
\cl Ebwayit 2
\p
\v 1 Inyong na, dihithemi h’asang fodok, etotohok nang iye, efietha h’alauni, omojitha, efifitha karik afurahina ahinwarang thihandye th’ohothing bukulung.
\v 2 Th’ohobwore karik th’ohothing bukulung thohowon dikara demanya amanya n’elik karik esuka dee ditha elajok karik asiruna fodok.
\v 3 Oyyu ahani karik iruhohini dihithemi h’Ojok ohoithalwahani lohothai.
\v 4 Owak inyong ohothing bukulung thoithalwahuni karik thoifunu d’atehan n’arami hadiri.
\v 5 Aca owon Ojok Aboithe, karik owon ohoinuthani d’Ojok karik othulo Aboithe, inyong othulo Kristo Yesu.
\v 6 Esarak ahwan ara adumit n’ohothing fodok iring ethalyehina n’arami d’orii lobis.
\v 7 Anyo, arami hune hanya onyimunerek nang ara othulo lonyahi karik ohoityenani - anyahi nang arami hadiri - ohoityenani l’ohothing hoikela th’Ojudei ditha heruhon karik arami hadiri.
\p
\v 8 Inyong na, awak ohothing d’amaji nawon thomojyoi karik thodohok dihide ahas hadwa kwong engere dia elafere.
\v 9 Th’oyihoi tholya aboithe, angorwo thoiyofoi tuhudik, ahibu isong otek ahwandek, ikara thohofir thohoicuculye dia thoifificye, dia ayel, ebindang dia abongoitho hako enyanga.
\v 10 Ti, th’asang thahayyu d’angorwu, hanyahi elajok th’egyemathik thahayyu.
\v 11 Athulo nangorwo theyeyenai ohwai, abahak omwaraha dihap.
\v 12 Aang nang awak athulo nangorwo thoityenie dia thoisukai dikara tholohide h’othulo lobusuha, ti, thoisukai ditha h’amanya ndiing, ndiing.
\v 13 Anyo, Adam nya icahi ayeuna. Thiya, ara Eva.
\v 14 Kabong nya ithadwalye Adam. Ti, ethadwalye nya athulo nangorwo, owon ara ahethorohojani.
\v 15 Ti, oindu de inyong ithalwahunu thayisuna thananyong okalifonit h’akalifonit, ara orasai ditha heruhon n’amuno karik th’ethadwaruna, th’endafaitho karik th’atehan ahwanthuhudik.
\c 3
\cl Ebwayit 3
\p
\v 1 Olwahu karik oyyu ocame lo bebe: othulo loingengelak dia ohoindefani, owak kodien igyemai ara nayyu.
\v 2 Inyong na, owak owon ohoingengelani h’ofure Loyyu. Owak inyong thoiwona ara onde l’afure aboithe. Thoisukai dihiji, atek ayiji n’ohothing homok, thoisukai ara narii, amuno angara karik thoyiniho etyenio.
\v 3 Thaang hoiwona ara ohoibothoni l’obalu, ikara oingerejani, ti, othulo lonyalam, othulo lelik othaji. Thaang hoiwona ara ohomunoni l’enyahwo.
\v 4 Thoiwona ara ohoidefani Loyyu l’ahang nanyong. Thoteha tuhudik hijan okalifinok karik akalifinok hanyong thomunoi, abangi inyong thoyihothik bukulung.
\v 5 Aca, ara aang othulo oyink endafaitho ahang nayong tuhudik, angai de ocohi inyong endafaitho Ekklesia n’Ojok?
\v 6 Thaang hoiwona iring othulo lohoithek ajingahina di kklesia th’anduhio than’asuhe karik dimomoro iring Sitan.
\v 7 Owak owon dang h’afure nayyu, h’ohothing hothondak, tek inyong apwaharu ditha h’amonyori karik ditha h’amolohe no Sitan.
\v 8 Th’oyihoi tholya, odikoni thobangi. Isong hulo thaang hoiwona h’ahuthuhye arehai, thaang homathai obalu karik thaang houdoro.
\v 9 Thoindafaithe amysterio n’eruhon th’othaji thololibo.
\v 10 Isong hulo thoicahi eruhuna, esarahini thoigyema, anyo, obisi oisukaitha hosong.
\v 11 Th’oyihoi tholya dang, angorwo hasong thobangi, esukai tuhudik, kwong amonyori, ti, abisan karik eruhon ditha h’asang fodok.
\v 12 Odikons dang thoiwona othulo Aboithe afure Aboithe. Thooindafaithe akalifinok karik ahangithek hasong.
\v 13 Aca, ohothing hoigyema tuhudik orimahini dihwandek esuka nayyu karik eruhon ditha ho Kristo Yesu.
\p
\v 14 Egero nang arami huna dothai, anyo, eyenio nang aindu nang de kwak dothai.
\v 15 Ti, ara akarhina nang, egero nang ditek iye angai indafaitho iye ahang nahoi, ahang n’Ojok dia n’Ojok, Ekklesia dia n; Ojok lomijo, karik ohalothi l’eladiri. 16 Iruk ohoi bukulung hijan abolo amysterio nelajok.
\v 16 Ethalyehini inyong lo nya ditha h’othulo, arimahini th’Ohoile hijan obis, atehuni anjelohio, anyahini dindak dimisok, eruhi donyong dihap karik eyarai inyong dihide dibolori".
\c 4
\cl Ebwayit 4
\p
\v 1 Thenene ne, ojyo Ohoile oleyore, d’omiru homok, ofuni de ohothing homok idehina eruhon amijye d’ohoilehio hodwala karik etyenitha ho Sitan.
\v 2 Th’ethatumio thon’ohodwalak, th’othaja thohosong thaahathuhi amudyo,
\v 3 ofuni de ilworo ohothing amuthayo, efiye isong thaang onye anyari nayeu Ojok nefothuna th’afurahina ahinwarang thohothing thohoiruk karik hotek eladiri.
\v 4 Anyo ayeyo n’Ojok nawon, oyyu karik aang aning nabo nefothuni th’afurahina n’ahinwarang nedari.
\v 5 Anyo, athuhi edwaryo th’ocame thol’Ojok karik th’amojo.
\p
\v 6 Ara isarak iye asang hune dihithemi h’olarok, iwon iye de ara ongaca Loyyu lo Yesu Kristo. Anyo, iye lethanye th’ocame thol’eruhon karik thetyenio thanayyu than’ethifoitho iye.
\v 7 Ti, idara enyanyahitha hamoryo asang hadwa hamuno ahabolok. Kombwo, ithethemak ahwan nahoi ditha h’elajok.
\v 8 Anyo, ethahongio n’ahwan tiibai oyyu, ti, elajok oyyu d’asang fodok.
\v 9 Olwahu inyong na esu n’ahanana karik nomwai. Obis ocame lya, oyyu diruhuna.
\v 10 Anyo, th’arami thohune, igyema ohoi ara nako, anyo, iyihi ohoi d’Ojok lomiyo, oholwahani l’ohothing fodok, kereki ohoiruhok.
\v 11 Ithethemak karik ityenie ohothing asang hune fodok.
\v 12 Lobo thaang holau elattwat nahoi, ti, thoiwona ara arijori n’ohoiruhok d’ocame, d’oisukaitha, dimuno, diruhon karik d’oisukaitha oliborok.
\v 13 Lwai nang ainduna, omijyethe dihena, dingarahina ahwandek karik dityenio.
\v 14 Hoilau esorio nawon ditha hohoi, nanya isarahini dohoi th’acorohina karik th’ethahina dihide hohoi ahas h’ohobolok.
\v 15 Omijye d’asang hune. Isukai ditha h’asang hune. Isukai dithosong doleyo ayiyijunu nahoi d’ohothing fodok.
\v 16 Omijijye dihwan hohoi karik dityenio tuhudik. Hoida awonan dith’asang hune, anyo, thehandyo ahani, ithalwahu iye de ahwan nahoi karik n’ohothing hoithaningyo dohoi.
\c 5
\cl Ebwayit 5
\p
\v 1 Hoiringyo ohoboloni, kombwo, ocamai donyong iring locama d’omonye. Ocamai d; ottwat, iring locama d’olarok.
\v 2 D’ahabolok, ocamai iring locama d’ahathingie, d’attwat, iring locama d’ahanerok, do fodok, ocamai thalibori.
\v 3 Ithahabuye aharathak, aharathak hadiri.
\v 4 Ti, ara owon aharathani h’okalifinok dia akalifinok, karik olonyirok dia angarok, isong dodo thomijye ditehan abolori n’ahang nasong. Isong thodumai omonye h’ahathingie, anyo, ithamunoyo ehandyo ahani Ojok.
\v 5 Ti, nawon ara aharathani nadiri, nedehini hamaring fodok, athuk ayenio Ojok karik amijyo ti dimomojo oharriee, ofaning,
\v 6 Ti, athulo namanya thethamunoyo ahwan nanyong, athuk aye homijo.
\v 7 Ithethemak isong ditha h’asang hune tuhudik daang hoipali.
\v 8 Ti, laang hoisarak aning nabo d’ohothing hosong dia ohothing hothong hosong, orwang iring leda eruhon karik okalak inyong lo othulo laang iruk.
\v 9 Athulo thoigerohini ara aharathani, nahara oyingathik honyong tholohop athomone inde karik thoiwona afure n’othulo aboiithe.
\v 10 Owak inyong thoiwona h’ofure Loyyu dia amijo d’okalifinok, alwahyo othohomonok, elalayo ahejek h’ohothing h’Ojok hodwa alwahyo ohothing hoithathana dia amijyo degyemathik hayyu.
\v 11 Ti, iring d’aharathak hohowahi amutha, idaratha egerohina isong dihap, anyo, ara howahi amuno ahwandek thoyihoi tholo ida Kristo, awahi amutha.
\v 12 Th’oyihoi tholya, idari de arami hasong, anyo, athuhik anyimuna arami ehethemok hawahi isong,
\v 13 Dihide h’arami hune, eyeyena dang isong afath karik edadaha di hangithek, th’ahang na d’ahang nya. Aang isong huna owoni ara afathak ija, ecacamai dang arami hamonyong, ethadahaye ahwandek karik acamai arami hang isong ira icama.
\v 14 Awak nang hathi aharathak hattik thomutha, thoyisu okalifinok, thoindafaithe ahangithek karik thaang hohorik omerok thomororo isong imonyoroi thohoi.
\v 15 Anyo, athuk homok apeharu diholu ho Sitan.
\v 16 Ara owon athulo nangorwo neruk nawon h’aharathak, inyong tholwahye isong, tek egyema eniyo Ekklesia dilwahyerek aharathak hadiri.
\p
\v 17 Ohobolok hoindafaitho ohothing thoisarahini ethahabuyo nathuna, kereki ohobolok hoigyema d’ocame karik etyenio.
\v 18 Ojyo amanini Nadwa, “Hoithayofok ohitheng lacudyo ohima ahithoi nakoryo” karik “Osiru Ohoigyemani diduma.”
\v 19 Hoiruhu arami hemangahini ohoholani, arahari ara owoni ohothing hottihak arehai dia aunihoi.
\v 20 Ithabisak ohoiyak dihithemi h’ohothing bukulung dobangi homok.
\v 21 Anyahi dohoi th’efahi, dihithemi h’Ojok karik Kristo Yesu karik anjelohio, thoindefa efahaitha huna kwong ekelio karik eruhuna hamok hamaring tho hune.
\v 22 Hoiruha di ithin othulo loboling. Hengaru eyatha holobo. Indefa ahwan nahoi ara noliboroni.
\v 23 Aang iye ira imatha ahari; ira iye imathuna obalu tiibai d’ahohye karik d’adihathik hahooi haownditha.
\v 24 Eyahta h’ohothing homok otehi karik ofwoi ahithemi nasong di kanyo. Ti, eyatha hohomok ofuni itehan diholu.
\v 25 Th’oyihoi aboithe tholya, egyemathik hamok hayyu, otehi, ti, juk homok hune aang idimunai.
\c 6
\cl Ebwayit 6
\p
\v 1 Ohothing fodok hoifitha ara ongacani, thoithahabuye ohoindefak hosong, Thoihandye ahani, daang ofure l’Ojok karik etyenio aang homorye.
\v 2 Ongacani howoni h’ohoindefak hoiruk thoithaithat dosong abangi, anyo, owoni isong ara olarok. Doigyemai dosong kombwo fodok ara okalak. Aca, ohothing hoifothu ayiji, isong ohoiruhok karik ohothing homunoi. Ityenie karik onyahi asang hune d’ohothing.
\p
\v 3 Ara isarahi lobo etyenio napala karik ara aang iruhu ocamitha hadiri ho Kristo Yesu h’etyenio nelajok,
\v 4 ara ithadara lobo karik aang otek aning nabo. Ara owon hawahan naang oyyu dithadara karik ofere d’arami heyanu ahaini, angalafa, omoritha, abangi namonyong.
\v 5 karik eribo naang obongo dihiji h’ohothing hathuk ahosi amuyahi, athuhi ethalithohina eladiri karik hodigigilo hijan awahan arami h’Ojok oyihoi leyanu enyahwo.
\v 6 Thoone ne, elajok karik efongon, owoni ara ayiji nabolo,
\v 7 aca, kabong ohothai iyanu haning nabo di hap, aang de dang aning nabo neyaru tho hop dihide.
\v 8 Kombwo halengatha anyari karik eyofo.
\v 9 Thenene ne, ohothing howak abara, opwaharai ditha esusuitha, ditha hamolohe, opwaharai dith hasang hafiyaha, heriafyo, karik adiyoro ditha hasang hetharohojo ethalicye othul fodok adi.
\v 10 Anyo, amuno nenyahwo, inyong ohahe l’opeceni lasang haang hoyiji karik hamonyori. Ohothing homok howak enyahwo, athuhi edehina eruhon karik athuhi erom ahwandek thathariha.
\p
\v 11 Ti, iye othulo l’Ojok, ingero adi th’asang hune. Othahithai abisan, arami h’Ojok, eruho n’ayiji, amuno, angongohina karik anyalami.
\v 12 Iriboi iribo nayyu neruhon, indefa amanya mak nanya ilongorik iye karik naya iwaharik iye awahan nayyu dihithemj hohottihak olwarai.
\v 13 Esarak nang iye efahitha huna dihithemi h’Ojok. l’esarak esu d’asang fodok hesu karik dihithemi ho Kristo Yesu, lonyahi dihithemi ho Ponsio Pilato karik ewaha ewaha nayyu.
\v 14 Indefa efahi kwong ehandyo aning neyanu dohoi omorit lwai d’ofaning loleyororik Ohobu lohotha Yesu Kristo.
\v 15 Ithalyehi de Ojok aleyori no Kristo d’omiru hocohi – Ojok, lomunoi, karik lowoni hamaring di kara, endafaitho ahap h’ahide karik asang fodok hayeye.
\v 16 Inyong hamaring owon haangan n’aye karik esuka ditha hafangan naang oco anyihara donyong. Aang othulo lotehu inyong dia locohi inyong anyahina. Donyong hamaring owoni Ethahabuyo karik awoni di kara mak. Amen.
\p
\v 17 Inyahi ohobarak ditha h’ahap ne, thaang hoithadarai karik thaang hoyenjie abaritha haang othenunu dimaji. Isong kombwo theyihi d’Ojok. Inyong isarak dohothai ebaritha fodok dimunorik.
\v 18 Inyahina isong thehadye ayiji, thobarai ditha h’egyema nayyu, thohorye karik thowaha angara.
\v 19 Th’ahwandek thahasong, okanahini de di koro asihothe nayyu, nainyong oindu mwai, dofuni isong indafaitherek esu nadiri.
\p
\v 20 Timoteo, ikaye aning nayyu. Ikara asang haang oyyu karik ocamitha h’othulo karik egigilitha haang iruhohunu h’aning nelongoi th’epalan ara atehan.
\v 21 Anyo isarahini ohothing homok asang hune, anyo, athuhi apeharu adi th’eruhon. Alwahio thoiwona hohoi.