\id JHN
\ide UTF-8
\h Yoanne
\toc1 Yoanne
\toc2 Yoanne
\toc3 jhn
\mt Yoanne
\c 1
\cl Ebwayit 1
\p
\v 1 Diculwe, awon nya Ocame; owon nya Ocame h’Ojok, karik Ocame nya Ojok.
\v 2 Hara thoculwe, owon nya Ocame h’Ojok.
\v 3 Tholonyong, ehuhumyo Ojok asang bukulung; aang aning aboithe dith’ayeyo fodok nanya ihuhumye kwong inyong.
\v 4 Ocame nya le, oyihoi l’esu, nanya iyanu afangan d’elathulo.
\v 5 Afangan nawulo ditha omudwe, karik omudwe laang ithadunyu inyong.
\p
\v 6 Asulak Ojok ohifak lonyong, othulo loilongoi ara Yoanne,
\v 7 loindu inyahina ohothing arami h’afangan, dithaninguni ocame karik eruhi.
\v 8 Aang inyong nya thahwan owon ara afangan; oindu dinyahina arami h’afangan.
\p
\v 9 Na nya afangan nadiri – afangan naindu dihap, awulo d’ohothing fodok.
\v 10 Owon inya Ocame dihap, karik juk inya ihuhumyo ahap tholonyong, kabong ahap hotek inyong.
\v 11 Aindu dimiji honyong, ti, kabong ohothing honyong ifothu inyong;
\v 12 Efothu ti, homok inyong karik eruhi donyong; esarak isong thoifunu iwonan ara olonyirok h’Ojok.
\v 13 Kabong ofuni iwonan ara olonyirok h’Ojok iring nayisunerek othulo, awon ara omonye, Ojok thahwan awon ara omonye losong.
\p
\v 14 Aindu Ocame ara othulo, ara loifut halwahio, h’eladiri, amanya dihiji hohothai. Etehu ohothai abolori nanyong, abolori nefothu inyong iring olonyi loboithe l’Omonye.
\v 15 Acama Yoanne arami hanyong. Ekor dindak, “Inyong lo lonya acama nang thonyong, najarik nang, “Oindu diput honang, ti, obolo inyong thonang, anyo, owon inyong lo kabong nang oyisuni.
\v 16 Th’efuthan n’alwahio nanyong, aboroyo ohothai bukulung, eruhok dohothai ayiji nabo diholu hanabo.
\v 17 Esarak ohothai Ojok oyalu tholo Musa, ti, alwahio karik eladiri tholo Yesu Kristo.
\v 18 Kabong othulo lobo lotehu Ojok. Olonyi loboithe, lorijoro h’Ojok karik lowon d’oyirik l’Ojok, inyong isarak inyong thotehi.
\p
\v 19 Asulahini ohithwaha h’Ojudei howon di Yerusalem ofadirihio karik Olivies do Yoanne, difiyo inyong, “Iye ngai?”
\v 20 Kabong Yoanne ida etharangyo, ti, acamu dindak karik theler, th’ajaran, “Ikara nang Omessiah.”
\v 21 ”Iye ngai, hathi?” isong efiyo, “Iye Elijah?” “A a, ikara nang,” Yoanne etharang. “Iye Ohocoroni?” isong efiyo. “A a,” inyong etharang.
\v 22 “Ara ahani, inyahi ohoi iye ngai?” isong etharang. “Owak inyaharu ohoi etharang d’ohothing hosulu ohoi. Ainyong ijyo iye d’ahwan nahoi?”
\v 23 Yoanne etharang th’ocamitha thohoh’ohocoroni Isaya, “Nang omurut l’ohoikoroni di terere; dihuhumyo oyihoi lobis dodaharik Ohobu!”
\p
\v 24 Thiya, ohothing hosulu Ofarisei hulo.
\v 25 efiyo Yoanne, “Ara ikara iye, Omessiah dia Elijah, dia lobo th’ohocorok, anyo ibuhyo iye batisimo?”
\v 26 Yoanne etharang, “Abuhyo nang batisimo th’ahari, ti, owon othulo lobo lowetha dihiji hothai laang ithai itek.
\v 27 Inyong lo loindu diput honing, ti, aang nang asiru juk dihoyo ahamuha hanyong.”
\v 28 ofuhi arami hune fodok di Bethani, d’oyirik lotho moithe lo’owor lo Jordano, amaji nabuhyerek Yoane batisimo.
\p
\v 29 Nya moithe, atehu Yoanne Yesu oindu donyong, ajyo, “Owon oker l’Ojok, leduhu adi eyatha h’ahap!
\v 30 Inyong lya lonya acama nang thonyong, anajarik nang, “Othulo loindu diput honing, ti, obolo inyong thonang, anyo, owon dihithemi h’ayisuna hindang.’
\v 31 Kaang nang nya atek, ara ngai oindu inyong iwonan, ti, aindu nang nang abuhyo bastismo th’ahari, dotehi inyong ohothing ho Israeie.
\v 32 Karik Yoanne anyahi dindak ainyong afuk, “ Atehu nang Ohoile icuru dihap thohide, awetha tholohide h’ahu nanyong.
\v 33 Kabong nang nya atek ijan inyong lya, ti, Ojok, losulu nang dibuhyo batisimo th’ahari, ajyo donang, “Itehu iye de Ohoile oindu dihap, esuka dihide h’othulo; inyong lya lobuhyo batisimo th’Ohoile tho Lodwa.’
\v 34 athuk nang atehuna inyong,” Ajyo Yoanne, “Karik anyahi nang iye hijan inyong lo Olonyi l’Ojok.’
\p
\v 35 Atehuna nayong Yesu adaha indehai ahanya, ajyo, “Ohindong l’Ojok le.”
\v 36 Ethaningu n’ohothifok hulo arehai inyong ajaran ahani, athiforoi Yesu.
\v 37 Atehuna nayong Yesu adaha indehai ahanya, ajyo, “Ohindong l’Ojok le.”
\v 38 Ethaningu n’ohothifok hulo arehai inyong ajaran ahani, athiforoi Yesu. 38 Yesu eloitho, atehu isong athifunu inyong, efiyo, “Ainyong ithifeyo ithai?” Isong etharang, “Dingai isuka iye, Rabbi?” (Ojyo ocame lya “Ohoityenani.”).
\v 39 “Ifuna otihatha,” ara inyong etharang. (Orii le nya arangwang didila h’oholong.) Thiya, afwoi honyong d’amaji nesukarik inyong; esukai honyong ofaning le.
\p
\v 40 Aboithe losong nya Andrea, lolai ho Simone Petro.
\v 41 Kwak ahani ne, arimak olai Simone Petro, anyahi inyong, “Erumak ohoi Omessiah.” (Ojyo ocame lya “Kristo,”)
\v 42 Thiya, eyaru Simone do Yesu. Jesu amijyo donyong ahani, ajyo, “Ofure lohoi Simone lolonyi ho Yoanne, ti, ilongoi iye de ara Cephas.” (Ofure lya, iring Petro, ojyo “Amorwong.”)
\p
\v 43 Nya moithe, Yesu adotho, alo di Galilea. Diya, arimak Fillipo, ajyo donyong, “Iwong honang.”
\v 44 Pillipo nya tho Baidsaida, abore nesukarik Andrea karik Petro.
\v 45 Pillipo arimak Nathanaiele, anyahi inyong, “Erimak ohoi inyong loigere Musa thonyong ditha amanini n’Oyalu karik loigero thonyong dang ohocorok. Inyong Yesu lolonyi ho Yosefo, tho Nazareth.”
\v 46 “Owon aning nabo nayyu nacohi naindu tho Nazareth?” Nathaniele efiyo. “Iwong idoro,” Pillipo etharang.
\v 47 Atehuna no Yesu Nathaniele ainduna donyong, acama inyong lo arami thonyong, “Othulo ladiri lo Israele lo, inyong lo; aang aning nabo nekela djtha honyong!”
\v 48 Nathaniele efiyo inyong, “Angai itek iye nang?” Yesu etharang, “Atehu nang iye orii hoiwetherek iye dimukok h’ohiyani dihithemi helonguna no Pillipo iye.”
\v 49 “Ohoityenani, “ Nathaniele etharang, “Iye olonyi l’Ojok! Iye Ohobu lo Israele!”
\v 50 Yesu ajyo, “Iruk iye, anyo, anyahi nang iye hijan atehu nang iye iwetha di mukok h’ohiyani?”
\v 51 Inyong ajyo dosong, “Anyahi nang ithai arami hadiri: itehu ithai de ahide onga karik anjelohio h’Ojok ofwoi dihide, afuni dihap dihide h’Olonyi l’Othulo.”
\c 2
\cl Ebwayit 2
\p
\v 1 Diholu h’operok arehai, owon nya amutha di bore ho Kana di Galilea. Iwon nya nahathigni ho Yesu diya,
\v 2 karik Yesu h’ohothifok honyong honya ilongoi di mutha.
\v 3 Engohunu nya n’obalu, nahathingi ho Yesu ajyo donyong, “Awang obalu lofithoro.”
\v 4 “Hoinyahi nang ainyong ihandye.” Yesu etharang, “Kabong omiru hundang ofuni.”
\v 5 Nahathingi ho Yesu anyahi ohoigyemak, “Ihandyethe aning nanyahi inyong dothai.”
\p
\v 6 Owoni Ojudei h’oyihothik hothifoitho isong dihandyo aning naboling, iring elala. Iring d’amutha no Kana, owoni nya amoco inde h’ahari, aboithe nasong iyaru oisahin hohittwa hulo juk athomona aunihoi.
\v 7 Yesu ajyo d’ohoigyemak, “Ithafuthahina amoco huna th’ahari.” Ethafuthahini bee methelele.
\v 8 karik thiya, anyahi dosong, “Thene, owohuna ahari hamok adi, ara ithai ithafoyhok dalahong l’ofaning lamuno ne lya.”
\p
\v 9 Isong eyahak donyong ahari. hathuk eolith th’orii lya ara obalu, athemyo, aang otek thongai oindu obalu lo (ti, diri, ohoigyemak howohunu dalahong hulo, isong otek);
\v 10 thiya elongu ohomuthani, ajyo donyong, “Isarahini othulo d’ohothing obalu loyyu bebe ahithemi, ara ohothing hoilongoi hawoni hobalu olwarai lomathai, easarak d’ohothing obalu lothene. Ti, ethuk iye akanahina obalu loyyu bebe.
\v 11 Aning ehethemoni nethafalangyo nehandyo Yesu ne Kana di Galilea. Anyahi abolori nanyong dia, ara ohothifok honyong eruk donyong.
\v 12 Diholu ho na, iduk Yesu h’ahathingi, olarok karik ohothifok honyong, afwoi di Kapernaum, esukai diya oyethik tiibai.
\p
\v 13 Aindek inya ofaning lohittok l’amuno n’Ojudei (Passover Festival), Yesu alo di Yerusalem.
\v 14 Diya di Templo, orimak ohothing ithananyangyo ahisum, akero, amami, karik ohoiloithok h’enyahwo owaniari dipogo h’obeleha hosong.
\v 15 Diya na, ehuhumu inyong lo apicuthi, angararik ecangi fodok adi tho Templo, akero karik ahisum; alafuhyo obeleha h’ohoiloithok henyahwa karik esasahacyo enyahwa hawoni ara ebilat.
\v 16 Eringak ohothing hoithanyangyo amami, “Iyatik isong adi thene! Ithawejethek ehandyo ahang na Lalamonyi ara amaji nenyangarik karik nethantangyerek!”
\v 17 Ara ohothifok honyong eyuni ajaran n’amanini, “Amuno hindang ahang nahoi, iye Ojok, omudyo nang iring ahimang.”
\p
\v 18 Hahong ‘Ojudei etharangyo inyong th’efiet, “Ainyong nafalangai nacohi iye ehandyo, di thaithahina hijan ibis iye dihandyo ahani?”
\v 19 Yesu etharang, “Itharohojahina Atemplo ne adi, d’operok aunihoi, nang aduhok dimaji.”
\v 20 “Ilo iye iduhohina inyong ikoti d’operok aunihoi?” isong efiyo. “Eyaru diduho Atemplo ne oyingathik athomone arangwan nainde!”
\v 21 Ti, Atemplo nacama Yesu ne, ocama ahwan nanyong.
\v 22 Adohuna inyong nya thoye, ohothifok honyong nya eyuuni hiajan ajyo inyong nya ahani; ara isong eruk amanini karik arami hajyo Yesu.
\p
\v 23 Orii ho Yesu di Yerusalem d’omiru h’ofaning lohittok lOjudei, eruhi ohothing holwa donyong, atehuna nasong asang hethafalangyo hehandyo Yesu.
\v 24 Ti, kabong Yesu ilahi ahwan nanyong dosong, anyo, otek inyong isong bukulung.
\v 25 Aang nya howak hijan lobo thonayhi inyong isong hongai, anyo, athuk inyong olefeng aitek ainyong nadithaja hosong.
\c 3
\cl Ebwayit 3
\p
\v 1 Owon nya lahong l”Ojudei lara Nikodemo; owon d’asuduhe n’Ofarisei.
\v 2 D’oharie nya lobo, alo do Yesu, ajyo donyong, “Ohoityenani, itek ohoi hijan iye ohoitayeyenani losulu Ojok. Aang loboling locohi ehandyo asang hafalangai hehandyo iye hune, arahari ara owon Ojok honyong.”
\v 3 Yesu etharang, “Anyahi nang iye arami hadiri: aang othulo lobo locohi atehuna Ohobye l’Ojok, ara kabong oyisuni inyong ikoti.”
\p
\v 4 “Angai oyisuni othulo labolo ikoti?” Nikodemo efiyo. Aang ocohi donyong padacut ajingara dihohe h’ahathingi, ayisuni inyong operohothi oitharehe.”
\v 5 “Anyahi nang iye arami hadiri,” Yesu etharang. “Aang othulo lobo lojinga dithah’Ohobye l’Ojok ara kabong oyisuni inyong th’ahari karik Ohoile.
\v 6 Oyisuni othulo ara othulo, th’omonye karik ahathingi, ti, ayisuni inyong th’elahoile thon’Ohoile.
\v 7 Hoifalanga, dinyahina honang iye hijan, owak oyisuni ithai bukulung ikoti.
\v 8 Owam ahomwa iring owak inyong; iye ithairu awaman nanyong, ti, aang iye itek thongai oindu dia dingai olo. Ahani ojahitha d’othulo loyisuni th’Ohoile.
\p
\v 9 “Angai ocohini arani hune awonan,” Nikodemo efiyo.
\v 10 Yesu etharang, “Iye ohoityenani lohittok d’Israele, iye aang hoitek arami hune?
\v 11 Anyahi nang iye arami hadiri: icama ohoi arami hetek ohoi, ohoi inyanyahak asang hetehu ohoi, ti, aang lobo lothai lowak eruhna arami hune.
\v 12 Aang ithai iruk nang ara nang lanyahi ithai asang h’ahap na; angai de iruk ithai nang ara anyahi nang ithai asang hothohide?
\v 13 Ngonyena, kaang lobo lalo dihide, arahari Olonyi l’Othulo, loindu dihap thohide.”
\v 14 Iring nadohinerek Musa amunu anaporong dihide h’ohalothi diterere, ahani de dang ofuni idohohina Olonyi l’Othulo,
\v 15 dofuni ohothing hoiruk donyong iwonan hesu namanya mak.
\p
\v 16 Aca, amuno Ojok ahap disarahina Olonyi lonyong lara aboithe, dara loiruk donyong, orimak de esu namanya mak.
\v 17 Aang nya Ojok osulu Olonyi dihap ara ohokanyani l’arami, ti, osulu ara ohoithalwahani.
\v 18 Aang hokanye ohothing hoiruk d’Olonyi, ti, athuhi akanyo ohothing haang iruhi d’Olonyi, anyo, kabong hoiruhi d’Olonyi lara Aboithe l’Ojok.
\v 19 Igyema akanyo n’arami ahana: aindu afangan dihap, ti, omuno ohothing omudwe th’afangan, anyo, omonyori asang hehandyo isong.
\v 20 Omani ohothing hoihandyo asang hamonyong afangan; aang isong hulo ofuni d’afangan tek asang hasong hamonyong hune aleyori.
\v 21 Ti ohothing hoihandyo asang hadiri, ofuni d’afangan, dithaithak afangan hijan asang hehandyo isong hune ara eruhon d’Ojok.
\p
\v 22 Diholu h’arami hune, Yesu karik ohothifok honyong afwo dihap ho Judea. Esuka dia amiru home hosong, ethafocyo batisimo.
\v 23 Orimak d’orii le dang dithafocyo batisimo dimiji ho Aenon indehai do Salim, anyo, th’orii le olwari ahari diya. Odaha nya ohothing donyong, efocye batisimo,
\v 24 kabong ifithahini.
\p
\v 25 Thiya, ethethena adotho dihiji h’ohothifok ho Yoanne Karik othulo lobo l’OJudei d’arami helala dimojo.
\v 26 Afwo isong hulo do Yoanne, ajyori donyong, “Ohityenani, othulo lonya owon hohoi d’oyirik lothele l’Owor lo Jordano, lonya inyahi iye arami hanyong d’ohothing lo, otiha, lodithafocyo dang batisimo; ohothing bukulung lodaha donyong.
\p
\v 27 Yoanne etharang, “Aang othulo lefothu aning nabo, ara kabong isarahini donyong thohide.
\v 28 Ithai th’ahwandek, ocohi dothai dinyahina dindak hijan ajyo nang, ‘Ikara nang Kristo,’ ti kombwo, athuhi nang nya asulahina dihithemi honyong.
\v 29 Aitho namuthaye, owon ara athulo n’ohomuthani. Omuno omothe l’ohomuthani lowetha indehai donyong, ara lethairu omurut l’ohomuthani. Ahani ne inyong amuno hindang nathuba.
\v 30 Inyong thoboloro, ti, nang thomumuthararu.
\p
\v 31 Loindu thohide, owon tholohide hasang fodok. Loindu thohop, thohop oindu karik ocama arami hothohop. Loindu thohide, owon inyong tholohide h’asang fodok.
\v 32 Onyahi inyong lo asang hedoru karik hatehu inyong, ti aang othulo leruhu arami hajyo inyong.
\v 33 Othulo loifothu anyahina nanyong asang hadiri, athuk eruhuna hijan owon Ojok diri.
\v 34 Aca, inyong lathuk Ojok asuluna lo, ocama ocamitha h’Ojok. Aca aang inyong lo ohoryo Ohoile th’athemit
\v 35 Omuno Omonye Olonyi karik athuk esarahina asang bukulung dihinang honyong.
\v 36 Loiruk d’Olonyi, owon hesu namanya mak. Ti, laang iruk d’Olonyi, aang de otehu esu, ti. engere n’Ojok nawon de dihide honyong.
\c 4
\cl Ebwayit 4
\p
\v 1 Atehan no Yesu hijan athuk Ofairsei ethaninguna hijan ethajingyo karik abuhok inyong batisimo d’ohothifok olwarai tho Yoanne,
\v 2 (juk ikara nya Yesu thahwan obuhyo batisimo, ti, ohothifok honyong),
\v 3 edehi Judea, anyaha ikoti di Galilea.
\v 4 Ti, owak nya olo inyong tholo Samaria.
\v 5 Inyong alo thal’abore no Samaria, nelongoi ara Synchar, iindehai d’ahap nanya athuk Yakobo esarahina d’olonyi, Yosefo.
\v 6 Owon nya ohiti lo Yakobe diya. Adiha nya ahwan no Yesu adaha, awoni dipogo h’ohiti; Awon nya ara orii othainde l’ofaning.
\p
\v 7 Aindu athulo no Samaria iwohoro ahari, ara yesu ajyo donyong, “Isarak nang ahari hamok hamathai.”
\v 8 Orimak athuk ohothifok honyong afwan di bore dinyanga anyari.
\p
\v 9 Athulo no Samaria ne ajyo do Yesu, “Angai ifiyo iye l’Ojudei, nang no Samaria thoisarak iye ahari hamathai? Ojahitha aang Ojudei karik ohothing ho Samaria iruhohunu?”
\p
\v 10 Yesu etharang, ajyo donyong, “Ara ira iye itehan esorio n’Ojok, ara iye itek ngai lojyo dohoi ‘Isarak nang ahari hamathai’ ira iye ifiyo inyong, karik ira inyong isarahina iye ahari h’esu.”
\p
\v 11 Athulo ne ajyo donyong, “Lahong, awang ewohit nahoi nawohyerek ahari karik oudo ohiti. Dingai de irimak iye ahari hahoi h’esu hune?
\v 12 Aang iye ibolo, dia ibolo iye, th’omonye lohoi Yakobo, loisarak dohoi ohiti, amatha dang inyong thahwan, iring namatheri olonyirol karik ecangi hanyong thiya?
\p
\v 13 Yesu etharang karik ajyo donyong, “Lomatha th’ahari huna, ibotho de ahibothit ikoti.
\v 14 ti, lomatha ahari hesarak nang donyong, aang hoibotho ahibothit ikoti. Kombwo ahari haindu nang de isarahina donyong, ofuni de iwonan ara asihothe n’ahari hanger d’esu namanya mak
\p
\v 15 Athulo ne ajyo donyong, “Isarak nang ahari hune daang nang ebotho ahibothit karik daang nang anyahu diwohoro ahari.”
\p
\v 16 Yesu ajyo donyong, “Ilo, ilongoi othulo lohoi, ara iye inyahu dini.”
\p
\v 17 Athulo ne etharang, ajyo donyong,”Aang nang awon h’othulo lobusuha.” Yesu etharang, “Ecama iye ara nabis ’Aang nang awon h’othulo lobusuha,’
\v 18 Aca iwon iye h’obusuha miyet, ara lewon iye honyong lya, ikara othulo lohoi. Arami hecama iye hune obisi.”
\p
\v 19 Athulo ne ajyo donyong, “Lahong, engengelyo nang ahani, iye ohocoroni.
\v 20 Omojo nya omonyehio hohoi dihide h’odonge lo, ti, ijyo iye Yerusalem amaji namojorik ohothing.
\p
\v 21 Yesu ajyo donyong, “Iruho donang, athulo na, omiru hofuni hoifunerek ithai imojorik Omonye, aang hara d’odonge lya dia di Yerusalem.
\v 22 Imojo ithai aning naang ithai itek. Imojo ohoi aning netek ohoi, aca owon ethalwahuna th’Ojudei.
\v 23 Ti, omiru hofuni, karik nahoi dini thenene, ara ohomojok hadiri hamojyo Omonye dihoile karik diladiri, aca Omonye lothifeyo ohothing hojahitha ahani, thoiwona ara ohomojyok honyong.
\v 24 Ojok Ohoile, ohothing homojyo inyong thomojyo dihoile karik diladiri.
\p
\v 25 Athulo ne ajyo donyong, “Atek nang hijan Omessiah (loilongoi ara Kristo) loindu. Ara laindu, oindu de inyanyahahina ohoi asang fodok.”
\p
\v 26 Yesu ajyo donyong, “Nang inyong, lecama iye donyong lya.”
\p
\v 27 Th’orii le anyahuni ohothifok. Afalanga isong hulo anyo ocama Yesu h’athulo nangorwo, ti aang othulo locama. “Ainyong ithifeyo iye?” dia “Ainyong icama iye honyong?”
\p
\v 28 Thiya, athulo ne edyaharu amothing nayong n’ahari, alo dibore dinyahina ohothing,
\v 29 “Ifuna, otihatha othulo lanyahi nang asang bukulung hehandyo nang. Aang lo ara iwonan ara Kristo diri, dia ira?”
\v 30 Edehini abore afuni donyong.
\p
\v 31 D’orii hulya, ethabuho ohothifok arosohina inyong anyo n’anyari, “Ohoityenani, “Onye”
\v 32 Ti, ajyo dosong, “Awon nang hanyari naye naang ithai itek.”
\v 33 Ara ohothifok acama dihiji hosong, “Kabong othulo leyahak inyong aning nabo dinyo, eyanai?”
\p
\v 34 Yesu ajyo dosong, “Anyari hindang inyong ehandyo aning nawak losulu nang karik engohina egyema nanyong.”
\v 35 Aang iye ijyo bai, ‘Afithoro oyefathik arangwan, ara engongocyo edwong’? Nang lajyo dohoi, omijye dihide, ingengelye amandak, aca athuhi angidari dingongocyo!
\v 36 Othulo loingongocyo, odumai karik arimak ahayocong n’esu namanya mak, domuno ohoromoni karing ohingongothoni amaji aboithe.
\v 37 Aca d’arami hune, ajaran, ‘Othulo loromo, loboling loingongocyo’ ara diri,
\v 38 Asulak nang ithai dingongocyo amana nakabong ithai iromo. Athuk homok egyema, ara ithai ijingak ditha h’egyema nohomok.”
\p
\v 39 Ohothing ho Samaria holwa d’abore nya, eruhi donyong thenyanyahit than’athulo noth’ohiti, “Anyahi nang asang fodok hathuk nang ehandyo.”
\v 40 Thiya, ohothing ho Samaria afuni donyong, efiye inyong thoisukai hosong; esuka hosong operok arehai.
\v 41 Homok holwa hosong eruhi do Yesu za arami zaha iwahak inyong dosong.
\v 42 Eruhi holwa, th’ocame tholonyong. Ajyori isong d’athulone, “Aang ohoi iruk th’anyahina thanahoi ohoi; Ithuk ohoi ethaninguna th’ahwandek thahahoi karik etek ohoi hijan othulo lo diri ohoithalwahani l’ahap.”
\p
\v 43 Diholu h’oprok arehai, Yesu alo thiya di Galilea.
\v 44 Aca Yesu olefeng ajyo, “Aang ohocoroni lethahabuye dimiji honyong.”
\v 45 Edwong nanyong di Galilea, efothu inyong ohothing ho Galilea tuhudik. Athuhi atehuna asang bukulung hathuk inyong ehandyo inyong di Yesrusalem d’amuno, aca athuhi dang afwan d’amuno.
\p
\v 46 Thene ikoti, anyahu di Kana, di Galilea, amaji naya iloicyerek inyong ahari ara obalu na. Owon nya ohoigyemani lohowore lodiha olonyi di Kapernaum.
\v 47 Ethaningu hijan aindu Yesu tho Judea di Galilea, alo do Yesu, efiyo inyong thoindu dihap, dithalihyo oitho lonyong lodiha, laindek aye.
\v 48 Yesu thiya ajyo donyong, “Ara kabong iye itehu ethamijanitha karik asang hafalangai, aang iye iruk
\v 49 Ara ohoigyemani l’ahabwore ajyo donyong, “Lahong, icuru dihap kabong oitho hindang oye.”
\v 50 Yesu ajyo donyong, “Ilo, isu loilonyi.” Othulo lya eruk arami hacama Yesu donyong. Alo adi.
\v 51 Ecur nanyong dihap, arwangarik inyong ohoigyemak honyong; anyahini inyong hijan esu olonyi. Efiyo isong, th’orii loni oculuyo ayiji.
\v 52 Isong etharang inyong, “Ngolngole th’omiru cofa idehi inyong adiha.”
\v 53 Thiya, atek omonye hijan oyyu olonyi omiru honyahinerek inyong Yesu “Ilo, isu loilonyi.” Inyong karik ahang bukulung eruhi.
\v 54 Ethamijani nya ne etharehe nehandyo Yesu ainduna nanyong tho Judea di Galilea.
\c 5
\cl Ebwayit 5
\p
\v 1 Diholu h’arami hune, awon nya ofaning lamuno n’Ojudei, Yesu alo di Yerusalem.
\v 2 Di Yerusalem, iindehai d’oyihet l’akero, owon ajor nakongarik, nelongoi th’Armaik ara Bethesda; Owon h’opohin h’athwahio miyet hafyo.
\v 3 Oferori nya ohothing olwarai hodiha, hongnodo, hongura dia haye arakang diya.
\v 4 
\v 5 Owon nya diya othulo ladiha oyingathik athomone ounihoi natises.
\v 6 Atehuna no Yesu inyong ajotho diya, karik atehan nanyong hijan aleng esuka diya, ajyo donyong, “Iwaki ye ayiji:”
\v 7 Othulo lodiha lo etharang inyong, “Lahong, aang othulo lodohok nang ditha h’ajor ara ahari hekurye.”
\v 8 Yesu ajyo donyong, “Odothoi thahide, iduhu ejothit nahoi, odohai.”
\v 9 Othulo lya kwak ayyu, eduhu ejothik nanyong, adaha. Ofaning le nya Oithacofe.
\v 10 Ara Ojudei ajyori d’othulo layyu ahwan lo, “ofaning Oithacofe lya, olwoi iye adaha h’ejothit.”
\v 11 Inyong lo etharang, “Onde loithayijyo nang lo ojyo donang, ‘Iduhu ejothik nahoi, odahai.’
\v 12 Isong efiyo inyong, “Ngai othulo ojyo dohoi, ‘Odothoi thahide, iduhu ejothit, odahai?’”
\v 13 Ti, aang dang othulo lonya ithayijye lo hotek ngai ithayijyo inyong, anyo, th’orii le alithororo Yesu thiya, ti, aang otehi amaji nanderek inyong; owon inya elulung n’ohothing d’amaji nya.
\p
\v 14 Diholu, aindu Yesu irimahina inyong di Templo, ajyo donyong, “Otiha, eyu iye! Honye eyauna, daang aning namonyong bebe ofuk dohoi.”
\v 15 Othulo lya alo inyahina Ojudei hijan Yesu nya ithayijyo inyong.
\p
\v 16 Ath’arami thohune, ethagyemyo Ojudei Yesu, anyo, ehandyo arami hune d’ofaning oithacofe l’operok cofa.
\v 17 Yesu etharang isong, “Juk thenene, Lalamonye loigyema, karik nang, dang, legyema.”
\v 18 Th’arami thohune, owahi Ojudei nya dang attohoro inyong, anyo, ikara hijan etharohojyo Operohothi Oithaboithe ti, karik dang elongo Ojok ara Omonye lonyong. Etharijyok ahwan nanyong h’Ojok.
\p
\v 19 Yesu etharang isong, “Diri diri, aang ocohi d’Olonyi l’Ojok ehnadyo aning nabo th’ahwan thananyong, ara hari aning natehu inyong omonye ihandyo, anyo aning nehandyo Omonye, ihandyo Olonyo th’oyihoi aboithe,
\v 20 Aca omuno Omonye Olonyi, ethaithak inyong asang bukulung hehandyo inyong; karik ithaithak inyong de dang egyemathik haittwa thohune, difunu ithai ifalanga.
\v 21 Aca iring ithadocyo Omonye ohoyak thoye, karik esarak isong esu, inyong dang nesarahinerek Olonyi esu d’ohothing howak inyong.
\v 22 Aca aang Omonye Okanyo, ti, athuk esarahina akanyo d’Olonyi, dithahuyo ohothing fodok Olonyi,
\v 23 iring nethahuyerek isong Omonye. Laang ithahuyo Olonyi, aang ithahuyo Omonye losulu inyong
\v 24 Diri diri othulo loithairyo ocame hindang eruk losu nang, owon hesu namanya mak, karik aang de dang ofuni ikanyo arami hanyong ara hamonyong, ti, athuk alangan thaye desu.
\p
\v 25 Diri, diri anyahi nang ithai, omiru hofuni, karik dang thenene ne, ara ohoyak de hethaningu oilolonge l’Olongi l’Ojok, ofuni de ohothing hoithairu imanya.
\v 26 Iring nawonderek Omonye hesu ditha honyong olefeng, athuk dang esarahina ditha Olonyi, dowon inyong hesu ditha honyong olefeng,
\v 27 karik dang athuk Omonye esarahina Olonyi akolon di kanyo, anyo, inyong Olonyi l’Othulo.
\v 28 Hoifalangathik arami hune, aca omiru hofuni, hofunerek ohothing hotholame, ithaninguna oilolonge lonyong.
\v 29 karik afuni dindak; hehandyo ara nayyu debuhuna nesu, karik hathuk ehandyo ara namonyong debuhuna nakanyo.
\p
\v 30 “Aang aning nacohi nang ehandyo thahwan thono hindang olefeng., Akanyo nang, iring ethaningyo nang; akanyo hindang abis, anyo aang nang athifeyo awahan hindang, arahari awahan no le, losulu nang.
\v 31 Ara anyahi nang arami hundang ara othulo lotihak, aang anyahina hindang owon ara nadiri,
\v 32 Loboling onyahi hijan inyong otihak arami hundang, karik nang atek hijan anyahina nanyong thonang ne, owon ara nadiri.
\v 33 Ethuk ithai asulahina do Yoanne. Athuk Yoanne anyahina hijan arami hune hadiri.
\v 34 Ti, aang nang efothu enyanyahahina n’arami th’othulo. Acama nang asang hune, dithalwahunu ithai.
\v 35 Owon nya Yoanne ara ahirya nawulo karik ethafangyo karik eruhu ithai nya amuno d’afangan nayong orii tiibai.
\v 36 Ti enyanyahahina n’arami nawon donang, okalu no Yoanne, anyo egyemathik hathuk nang Lalamonye esarahina dihandyo, egyemathik henadyo nang hune, ocamai thonang hijan athuk nang Omonye asuluna.
\v 37 Othuk Omonye losulu nang thahwan thannyong olefeng acama thonang. Kabong ithai ithairu oilolonge lonyong dia angai oyaa inyong omiru homok.
\v 38 Aang ocame lobo lonyong lofithoro dothai, aca aang ithai iruk othulo lonya athuk inyong asuluna.
\v 39 Ithifeyo ithai amaninihion hijan irimak ithai de ngona esu namanya mak. Isong amaninihio hune acama thonang,
\v 40 ithai aang hoiwak afuna donang dirimahina esu.
\v 41 Aang nang efothu abolori th’ohothing,
\v 42 ti, atek nang hijan aang ithai iwon hamuno n’Ojok dihwandek hothai.
\v 43 Aindu nang th’ofure tholo Lalamonye; kabong ithai nang ifothu. Ara nya oindu lobo th’ofure tholo lobo, ira ithai ifothuna inyong.
\v 44 Angai iruk ithai, ithai hoiruhu abolori th’othulo lobo, aang hothifeye abolori naindu th’Ojok lara aboithe?
\v 45 Hoijaratha ngona nag de anyahi amonyori nathai do Monye. Othulo de loonyahi ithai inyong Musa, lethuk ithai ayenio.
\v 46 Ara iruk ithai do Musa, ira ithai iruho donang, anyo, egero thonang.
\v 47 Ara aang ithai iruk egeritha hanyong, angai de iruk ithai ocamitha hundang?”
\c 6
\cl Ebwayit 6
\p
\v 1 Diholu hasang hune, Yesu alo d’oyirik lobo l’ahari no Galilea, nelongooi dang ara ahari no Tiberias.
\v 2 Athiforo elulung ‘nohothing nahittok inyong, anyo, atehuni arijorihio h’asang hehandyo inyong dithayijyerek ohothing hodiha.
\v 3 Yesu adok didonge; diya awoni dihap h’ohothifok honyong.
\v 4 (Th’omiru hulya, aindek ofaning lohittok l’Ojudei.)
\v 5 Atehuna no Yesu elulung nahittok n’ohothing ainduna donyong, ajyo do Pillipo, “Dingai de efwo inyang anyari, donyo ohothing hulya?”
\v 6 (Ti, ocama Yesu ahani do Pillipo, otek ainyong olo inyong ihandyo.)
\v 7 Pillipo etharang inyong, “Aang esihe arehai h’enyahwo helongoi isong ara adenario ocohini juk d’othulo aboithe diwonan h’anyari tiibai.”
\v 8 Aboithe th’ohothifok, Andrea, lolai ho Simone Petro, ajyo do Yesu,
\v 9 “Owoni elolongitha miyet h’anyari n’ohimai loingoi ara barli lo karik ohom arehai dini, ti, aisong hune d’ohothing olwarai ahani?
\v 10 Yesu ajyo, “Isarahini ohothing hulya thowoni dihap.” Olwa nya amiyang d’amaji nya. Ohothing esihe miyet awonieri dihap.
\v 11 Thiya, Yesu eduhu anyari nathuk elolonga ne, karik athuho nanyong afurahina ahinwarang, esarak d’ohothing howonni hulya. Ehandyo dang ahani d’ohom. Anye ara nacohi iring owahi isong.
\v 12 Efongon n’ohothing, Yesu anyahi d’ohothifok honyong, “Osuduhyethek anyari nedodoyitha ne; daang aning nalitho.”
\v 13 Isong hulo asuduhu, ethafuthahini akatino tomon h’arehai h’anyari nelolongai n’ohimai barli nafithoro th’ohothing hathuk anyo.
\v 14 Atehuna n’ohothing aning nehandyo Yesu ne, ajyori, “Othulo lya diri ohocoroni laindu dihap.
\v 15 Atehan no Yesu hijan owak ohothing inyong endefuna, eringahini inyong ara ohobu, aluya, adok didonge inyong hamaring thahwa.
\p
\v 16 Ad’athari, ohothifok honyong awawraru adi hari.
\v 17 Ecurok isong hulo di roko, abongoro tholo hari di Kapernaum. Amiru hulya, eriok aharie kabong Yesu oindu dosong
\v 18 Awam ahomwa nako bebe, nesarak ahari ahamwaitho ara namonyong.
\v 19 Ekuroro nasong agwadik tiibai ahani, abangi isong atehuna Yesu adaha dihide ahari ara loindu indehai di roko.
\v 20 Ti, inyong alo dosong, “Nang lya! Hoibangatha.”
\v 21 Thiya, eruk isong efothuna Yesu di roko. Ara aroko edwong kwak d’amaji nadwo ofwarik isong.
\p
\v 22 Nya moithe, atehu elulung n’ohothing nawetha d’oyirik lobo l’ahari, aroko aboithe, nanya ofwarik ohothifok hamaring ahibu Yesu aang thiya na.
\v 23 Ti, owoni nya arokoni hafuni tho Tiberias indehai d’amaji naya onyerek elulung n’ohothing anyari nelolonga athuhon nya n’Ohobu afurahina ahinwarang.
\v 24 Atehan inya n’elulung n’ohothing hijan aang Yesu karik ohothifok honyong, adohithi aroko, afwoi di Kapernaum dithifeyo Yesu.
\v 25 Arimahina nasong inyong d’oyirik lobo l’arai, ajyori donyong, “Ohoityenani, kanu iindu iye dine?”
\v 26 Yesu etharangyo isong ajyo, “Diri diri, ithifeyo ithai nang, anyo, ikara hijan etehu ithai ethamijanitha, ti, anyo, enyo ithai anyari, ara ithai ifong.
\v 27 Hoigyemathik th’anyari than’engohunu adi. Ti, igyemathik th’anyari thanamanya esu no mak, naindu de Olonyi l’Othulo isarahina dothai, aca athuk Ojok Omonye, attanyahina ahinang nanyong dihide honyong.”
\v 28 Thiya isong ajyo donyong, “Ainyong owak ihandyo ohoi digyema ohoi egyemathik h’Ojok?”
\v 29 Yesu etharang ajyo dosong, “Egyema n’Ojok nahoi: Iruhotho donyong, lathuk inyong asuluna.”
\v 30 Isong ajyori donyong, “Ainyong de aning ihandyo iye, ditehu ohoi ara ohoi iruk? Ainyong de ihandyo iye?
\v 31 Anyo nya omonye hohoi amana dihidyefo, iring negerorik inyong, ‘Esarak isong anyari thohide dinyo.”
\v 32 Thiya Yesu etharang isong, “Diri, diri, ikara nya Musa isarak ithai anyari thohide. Lalamonye nya isarak ithai anyari nadiri thohide.”
\v 33 Aca, anyari n’Ojoki inyong naindu thohide dihap, esarak ahap esu.
\v 34 Isong ajyori donyong, “Lahong, isarak dohoi anyyari ne juui.”
\v 35 Yaru ajyo dosong, “Nang anyari n’esu. Loindu donang; loindu donang, aang ahure oleng; loiruk donang, aang hoibotho ahibothit.”
\v 36 Ti, anyahi nang ithai diri, ethuk ithai nang atehuna, ti, aang ithai iruk donang.
\v 37 Othulo lesarak nang Lalamonye, oindu de donang; loindu donang, aang de acohoro adi.
\v 38 Anyo, aindu nang thohide, ikara dihandyo iring awak nang, ti, awaha no le, lonya asulu nang lo.
\v 39 Awahan ne no le, lonya osulu nang lo, daang juk aboithe lolitho, th’ohothing honya isarak inyong do nang, ti, oindu de ithadocyo isog thahide ofaning lothoicuhit.
\v 40 Aca awahan na Lalamonye ne, hijan othulo lotehu Olonyi, eruk donyong, owon de hesu karik ithadocye de inyong thahide ofaning lothoicuhit.
\p
\v 41 Ojudei ewiwinya, anyo, ajyo Yesu, “Nang anyari naindu thohide dihap.”
\v 42 Isong ajyori, “Ikara Yesu lya re, lolonyi ho Yosefo, letek omonye karik ahathingi? Anga hathi ojyo inyong, “Aindu nang thohide dihap?”
\v 43 Yesu etharang, ajyo dosong, “Idehina ewiwinya dihiji hothai.
\v 44 Aang othulo lobo loindu donang, ara kabong Omonye lonya osulu nang lo, ifihu inyong karik aindu inyong ithadocyo thahide ofaning lothoicuhit.
\v 45 Igero ditha hohocorok, ‘Ityenio de Ojok ohothing bukulung.’ Lathuk ethairuna karik eyeyena th’Omonye, oindu de donang.
\v 46 Aang lobo latehu Omonye, arahari inyong loindu th’Omony, otehu Omonye.
\v 47 Diri diri, loiruk. owon h’esu namanya mak.
\v 48 Nang anyari n’esu.
\v 49 Anyo holethe monye anama dihidyefo, ayethi.
\v 50 Anyari ne aindu thohide dihap, donyau othulo tiibai amanya de mak.
\v 51 Anyari de nesarak nang dothai, inyong ahwan hindang, d’esu n’ahap.”
\p
\v 52 Engere Ojudei dihiji hosong, aculuye elafere, “Angai owak othulo lya esarahina ahwan nanyong dohothai dinyo?”
\v 53 Yesu ajyo dosong, “ Diri diri, ara kabong otholu onyo ahwan n’Olonyi l’Othulo karik amatha ahotho nanyong, aang ithai iwon hesu ditha hothai.”
\v 54 Lonyo ahiringo amatha ahotho hindang owon de hesu hamanya mak. Aindu nang de dang ithadocy thahide d’ofaning lothoiicuhit.
\v 55 Aca ahiringo hindang, anyari nadiri, ahotho hindang amatha nadiri.
\v 56 Lonyo ahiringo hindang, amatha ahotho hindang, owon de ditha honang, nang awon ditha honnyong.
\v 57 Iring asulak nang Omonye lomijo, nang esu th’Omonye, lonyo nang, owon de hesu, karik omanya de thonang.
\v 58 Anyari ne naindu thohide dihap, ikara iring nanyo omonye, ayethi. Lonyo anyari na, isu de mak.
\v 59 Ti, Yesu ajyo asang hune ahibu inyong ityenio di Sinagogue di Kapernaum.
\p
\v 60 Thiya ohothifok honyong holwa, hoithairu arami hune, ajyori, “Ocame loko lo; ngai ocohi ethairuna inyong?”
\v 61 Yesu, anyo otek inyong th’ahwan hijan ohothifok honyong ewiwinyai arami hune, ajyo dosong, “Omoryo ithai arami hune?”
\v 62 Ie, angai ira ijahitha, ara dwo itehu ithai Olonyi l”Othulo olo dihide d’amaji nanya owonderek inyong?
\v 63 Ohoile inyong ithasuyo, aang ahwan ohwadu aning nabo. Arami hacama nang dothai hune, isong ohoile karik esu.
\v 64 Dihide ahani ne, owoni homok hothai haang hoiruk. Aca atek Yesu hongai haang hoiruk karik ngai de ithanyangak inyong,
\v 65 Inyong lo ajyo, “Th’arami thohune ajyo nang dothai, aang othulo locohi ainduna donang, ara kabong Omonye ohoeik donyong.”
\p
\v 66 Th’arami thohune, angerori adi ohothifok honyong holwari; aang hodahai honyong.
\v 67 Thiya Yesu ajyo d’ohothifok tomon larehai, “Aang ithai ti ingero adi dang, ingero ithai?”
\v 68 Simone Petro etharang inyong, “Hobu, dongai ira ohoi ifwan? Iwon iye hocamitha h’esu namanya mak.
\v 69 karik eruk ohoi, ohoi itek hijan iye othulo Oboithe Lodwa l’Ojok.”
\v 70 Yesu ajyo dosong, “Kabong nang anyimu ithai tomon lareha; lobo aboithe thothai awon ara omonyoroni?”
\v 71 Thene, acama tho Juda, lolonyi ho Simone Iskariot, aboithe tho tomon lareahi, lonya oindu ithanyangahina Yesu lo.
\c 7
\cl Ebwayit 7
\p
\v 1 Diholu hasang hune bukulung, Yesu alo di Galilea, aang olo di Judea, anyo, owahi nya Ojudei attohoro inyong.
\v 2 Th’orii le, aindek nya ofaning lohittok l’Ojudei l’Epahuma th’Amonyori.
\v 3 Ara olarok honyong hathi ajyori donyong, “Idehi amaji ne; ilo di Judea dotehu ohothifok hohoi egyemathik hehandyo iye.
\v 4 Aang othulo lehandyo aning nabo ara naang otehi, ara owak hijan inyong thotehi tuhudik dindak. Ara ihandyo iye asang hune, ithaithak ahwan dihap.”
\v 5 Aca juk olarok honyong aang nya iruhi donyong.
\v 6 Yesu hathi ajyo donyong, “Kabong omiru hundang ofuni, awoni omiru hothai arabo juui.
\v 7 Aang tihai ahap oman, ti, oman nang, anyo, atek nang karik anyahi dindan hijan egyemathik hanyong omonyori.
\v 8 Ifwo ithai d’ofaning lohittok l’Epahuna th’Amonyori, ti, aang nang alo d’ofaning le, anyo, kabong omiru hundang ocohini.”
\v 9 Athuhon nanyong acama arami hune dosong, esuka di Galilea.
\p
\v 10 Athuho nolarok afwan d’ofaning Lohittok, aindu inyong lo dang inden, kwong ohothing atehan.
\v 11 Athifeyo inyong nya Ojudei d’ofaning lohittol le, ajyori, “Lonjang inyong?”
\v 12 Obolo nya elafere n’elulungir h’ohothing th’arami thahanyong. Homok ajyori, “Inyong lo othulo loyyu. Homok ikoti ajyori, “Omonyong inyong lo, itharahojyo ahosi h’elulungir h’ohothing.”
\v 13 Ti, kabong othulo locama arami hanyong dindak th’abangi n’Ojudei.
\p
\v 14 Aindehi n’ofaning Lohittok engahunu, Yesu alo di Templo; aculuyo etyenio.
\v 15 Ojudei afalanga, ajyori, “Angai otek othulo lya bebe ahani? Kabong inyong l hoityenie.”
\v 16 Yesu etharang isong ajyo, “Etyenio hindang, ikara hindang, ti, no le, losulu nang.”
\v 17 Ara lowak ehandyo awahan nanyong, otek de etyenio na, dia th’Ojok oindu dia acama nang th’ahwan thono hindang.
\v 18 Locama th’ahwan thanyong, lodithifeyo abolori nanyong holefeng, ti, lothifeyo abolori no losulak inyong, lodithifeyo abolori nol’osulak inyong, othulo lya ladiri, laang aangan nabisan thothonyong.
\v 19 Kabong ithai Musa isarak oyalu? Ti, aang lobo lothai loindafaitho oyalu. Anyo iwak ithai attohoro nang?”
\v 20 Ara elulung etharang, “Iwon iye h’ohoile lomonyong. Ngai owak iye attohoro?”
\v 21 Etharang Yesu ajyo dosong, “Ehandyo nang egyema aboithe, ara ithai ifalanga thonyong.
\v 22 Esarak ithai Musa abosio (ikara hijan abosio na tho Musa, ti, th’ohohonyo), th’operohothi oithacofe, ithai ibosyo othulo.
\v 23 Ara obosye othulo d’operohothi oithacofe dobis oyalu lo Musa, anyo ingere ithai dithaijyo honang othulo d’operohothi oithacofe?
\v 24 Hoikanyo thajahitha, okanye ibisai.”
\p
\v 25 Homok hosong tho Yerusalem, ajyori, “Ikara inyong lya onde lotahitha isong ditohoro lo?”
\v 26 Idorotho, ocama arami hanyong dindak, ti, aang isong ojyori aning nabo donyong. Ikara hijan aang ohoindefak h’ohothing hotek hijan Kristo lya, dia ahani bai?
\v 27 Iteh ohoi ti thongai inyong lo. Ti, ara Kristo oindu, aang othulo lotek ijan inyong lo thai.”
\v 28 Thiya Yesu ekor di Templo, ityenio, ajyo, “Itek ithai nang, karik itek ithai thongai aindu nang. aang nang aindu th’ahwan thono hindang, ti, owon diri losulu nang; aang ithai itek inyong
\v 29 Atek nang inyong, anyo, inyong osulu nang.”
\v 30 Owahi nya endafaitho inyong, ti, kaang othulo lothin inyong, anyo, kabong omiru honyong ocohini.
\v 31 Ti, ohothing holwari ditha elulung eruhi donyong, ajyori, “Ara Kristo laindu, oindu de ihandyo egyemathik hafalangai halwa thahathuk onde lya ehandyo hune.”
\v 32 Ethaninguni Ofarisei elulungir h’ohothing ocamai arami hune tho Yesu; ara hofadiri hohittwak karik Ofarisei asulahini ohoigyemak hosong dindafaitho inyong.
\v 33 Yesu ajyo, “Esuka nang dihiji hothai orii tiibai, nang de alo dolosulu nang.
\v 34 Ithifeyo ithai de nang, ti, aang ithai nang irimak; amaji nanderek nang nya, aang ocohi ithai afwan diya.
\v 35 Ojudei acamai dihiji hosong, “D’amaji nani de olo othulo lya naang ohothai irrimahinerek inyong?” Olo de d’amaji n’athurohunu dihiji h’Ogriki karik etyenio Ogriki?
\v 36 Ainyong ocame lojyo inyong, ‘Ithifeyo ithai de nang, ti, aang ithai nang irimak; amaji nanderek nang nya, aang ocohi ithai afwan diya’?”
\p
\v 37 Thene dicuhit h’ofaning Lohitok, Yesu, awetha thahide, ajyo th’ekor, “Ara ibotho othulo lobo ahibothit, thoindu donang dimatha.
\v 38 Othulo leruk donang, iring najararik amanini, ongetta de owori h’ahari h’esu thohohye honyong.”
\v 39 Ti ocama arami hune th’Ohoile, tholonya kaang ohothing hoiruk donyong ira ifothuna; kabong nya isarahini Ohoile le, anyo, kabong nya ithabolorye Yesu.
\v 40 Ethaninguna n’elulungi hamok ocamitha hulya, ajyori, “Othulo lya diri ohocoroni.”
\v 41 Homok ajyori, “Kristo lya.” Ti, homok ajyori, “Oindu Kristo tho Galilea?”
\v 42 Aang amaninihio ojyori, oindu de Kristo th’onyakwaria ho Davide tho Bethlehem, amiji nanya owonerek Davide?”
\v 43 Thene, ebwai elulungi th’arami thahanyong.
\v 44 Ira homok indafaitho inyong, ti, kaang othulo lothin inyong.
\p
\v 45 Thiya, ohoigyemak anyahuni da Fadiri hohittwak karik Ofarisei, enyanyahahini isong, ara isong ajyori d’ohoigyemak hulya, “Anyo naang ithai iyanu inyong?”
\v 46 Ohigyemak etharang, “Kabong lobo othulo locama iring onde lya.”
\v 47 Ara Ofarisei etharang isong, “Athuhi dang ithai ethadwalyo?”
\v 48 Athuk lobo th’ohoindefak h’ohothing eruhon donyong, dia lobo tho Ofarisei?
\v 49 Ti, elulung n’ohothing naang otek oyalu, afyetha.
\v 50 Ara Nikomedo (lobo l’Ofarisei, lonya alo operok hulya do Yesu th’aharie lo) ajyo,
\v 51 “Okanyo oyalu lohothai othulo kabong ithaninguni thonyong, karik atehan, ehandyo inyong ainyong?”
\v 52 Isong hulo etharang ajyori donyong, “Iye dang tho Galilea? Othifeyethek ara ithai itihyo, aang ohocoroni loindu tho Galilea.
\p
\v 53 Thene, ohothing fodok athwuro, ngai alo dihang honyong.
\c 8
\cl Ebwayit 8
\p
\v 1 Yesu alo di donge h’Oilves.
\v 2 Thamoithe berien, alo di Templo; ohothing dang afuni; awoni dihap, etyenio ohothing.
\v 3 Ohoigerok karik Ofarisei eyanu, dihiji hosong, athulo nedefuni h’othulo.
\v 4 Ajyori donyong, “Ohoityenani, athulo na endfuni h’othulo lobo.
\v 5 D’oyano, ifahak ohoi Musa thomirye ohothing hulya th’omorik. Ainyong ijyo iye d’athulo ne?
\v 6 Ocamai ahani olohrik Yesu dorimak isong epal donyong; ti, Yesu adula, egero dihap th’ohifalai tholonyong.
\v 7 Etotohio nasong efiyo inyong, adotho Yesu thahide ajyo dosong, “Lobo thothai lokabong hoiyau, thomirok omorwong ohithemoni donyong.”
\v 8 Koti, adula, egero dihap th’ohifalai tholonyong.
\v 9 Ethaninguna nasong, afwoi adi abok abok, oculuyo th’omarwak. Dicuhit, Yesu, apwak Yesu hamaring, h’athulo nadwa indefuni, alihanini dihiji na.
\v 10 Yesu adotho thahide, ajyo donyong, “Athulo na, hojang ohothing hojyo eyau iye hulo? Owon diri juk aboithe lokaang hojyo eyau iye?”
\v 11 Inyong na ajyo, “Aang juk aboithe, Hobu.” Yesu ajyo, “Aang nang dang ajyo eyau iye. Ilo, hoinyak iyauna koti.”
\p
\v 12 Yesu acama dosong ajyo, “Nang afangan n’ahap; lothifoitho nang, aang odaha dith’omudwe, ti, owon h’afangan n’esu.
\v 13 Ofarisei ajyori donyong, “Iye inyahi ahwan nahoi hijan ibis iye, aang onyahi hijan ibis iye diri.”
\v 14 Yesu etharang ajyo dosong, “Juk ethaithak ahwan hindang hijan nang ngadi, obis; owon ara diri. Atek nang thongai aindu nang, karik dingai alo nang.
\v 15 Ikanyo ithai arami iring ohothing. Aang nang akanyo arami h’othulo loboling.
\v 16 Ti, ara akanyo nang, akanyo hindang owon ara nadiri, anyo, ikara nang hamaring, ti, awon nang h’Omonye losulu nang.
\v 17 Aa, karik igero ditha h’oyalu lothai hijan ethaithahina abisan n’ohothing arehai owon ara nadiri.
\v 18 Nang inyong lanyahi arami hundang th’ahwan thono hindang, karik Omonye losulu nang anyahi abisan n’arami hundang.
\v 19 Isong ajyori donyong, “Lojang Lemonye?” Yesu etharang, “Aang ithai itek, nang dia Lalamonye; ara dwo itek ithai nang, ira ithai itehan Lalamonye dang.
\v 20 Ocama arami hune dikoro, ahibu inyong ityenio di Templo; kabong othulo lendafaitho inyong, anyo, kabong omiru honyong ofuni.
\p
\v 21 Ajyo ikoti dosong, “Nang lalo adi, ithifeyo ithai nang de, ara ithai iye ditha heyatha hathai. Amaji nanderek nang nya, aang ocohi dothai difuna diya.
\v 22 Ara Ojudei ajyori, “Ottohok de ahwan nanyong?”
\v 23 Yesu ajyo dosong, “ifunu ithai tholohop, nang aindu tholohide. Ithai h’ahap na, ikara nang l’ahap na.
\v 24 Inyong na, ajyo nang iye ithai de dith h’eyatha hathai, ara aang ithai iruk hijan AWON NANG, iye ithai de ditha eyatha hahtai.
\v 25 Ara isong ajyori donyong, “Iye ngai?” Yesu ajyo dosong, “Arami hacama nang thoculwe,
\v 26 Awon nang hasang olwarai dicama karik dikanyerek ithai. Ti, inyong losulu nang, owon diri; asang hethaningu nang thonyong, isong anyahi nang d’ahap.
\v 27 Aang isong hulo hotek hijan ocama dosong arami h’Omonye.
\v 28 Yesy ajyo, “Ara ithai hethuk adohohina Olonyi l’Othulo, ifunu ithai de itehan hijan AWON NANG, karik aang aning nehandyo nang d’ahwan hindang. Acama nang asang hune, iring netyenierek nang Omonye
\v 29 Losulak nang lo, owon honang; kabong hoidehi nang hamaring, anyo, ehandyo nang juui aning nethamunoyo inyong.
\v 30 Dihide ho Yesu acama nasang hune, eruhi ohothing holwari donyong.
\p
\v 31 Yesu ajyo d’Ojudei hathuk eruk donyong, “Ara irasa ithai ditha h’ocame hindang, iwon ithai de diri ara ohothifok hundang.”
\v 32 Karik itek ithai de eladiri; ohohi de ithai eladiri th’efitha.
\v 33 Isong etharang inyong, “Ohoi onyakwaria h’Abramo, kabong ohoi iwonderek ara ongacani h’othulo lobo; angai ijyo iye, ‘ohohi de ithai eladiri th’efitha’?”
\v 34 Yesu etharang isong, “Diri, diri ajyo nang dothai, “Ohoiyauni, ongaca l’eyau.”
\v 35 Aang ongaca orasa dihang mak.
\v 36 Inyong na, ara ohohi ithai Olonyi, ohohini ithai de diri.
\v 37 Atek nang hijan ithai onyakwaria h’Abramo; iwak ithai nang attohoro, anyo, awang amaji n’ocame hindang thothothai.
\v 38 Acama nang aning natehu nang ha Lalamonye, ara ithai dang ihandyo aning nethairu ithai tho lethemonye.
\v 39 Isong etharang, ajyori donyong, “Omonye lohoi Abramo.” Yesu ajyo dosong, “Ara ithai oduring h’Abramo, ira ithai ihandyo egyemathik h’Abramo.
\v 40 Kombwo, thenene, ithai hoiwak attohoro nang, othulo lanyahi ithai arami hadiri hethairu inyong th’Ojok. Kabong Abramo jhandyo ahani.
\v 41 Ihandyethek egyemathik h’omonye lothai.” Isong ajori donyong, “Aang ohoi nya oyisuni th’epal than’arwanga n’omonye, h’ahathingie hahoi. Iwon ohoi h’Omonye aboithe: Ojok.
\v 42 Yesu ajyo dosong, “Ara dwo Ojok Lethemonye, ira ithai nang imuno, aca th’Ojok aindu nang, aca nang lo dini; aca kabong nang dang aindu th’ahwan thono hindang, ti, inyong osulu nang.
\v 43 Anyo aang ithai ithenu ocamitha hundang? Kode ngona de aang ithai ithairu ocamitha hundang.
\v 44 Ithai ho lethemonye, omonyoroni lo; iwak ithai ehandyo asang hawak lethemonye. Inyong nya ohottohoni thoculwe; ida arami hadiri, anyo, aangi arami hadiri thothonyong. Ara ladwala, ocama thoyet honyong, anyo, inyong lo odwalani karik omonye l’adwala.
\v 45 Inyong nara, iuk acama nang arami hadiri, aang ithai iruk donang.
\v 46 Ngai thothai ocohi ajaran eyau nang? Ara acama nang arami hadiri, anyo aang ithai nang hoiruk?
\v 47 Othulo lowon ara l’Ojok, ithairyo ocamitha h’Ojok; aang ithai ithairyo isong, anyo, ikara ithai h’Ojok”
\v 48 Ojudei etharang ajyori donyong, “Aang ohoi diri ithen dijaran iye othulo lo Samaria karik hijan iwon iye h’ohoile lomonyong?”
\v 49 Yesu etharang, “Aang nang awon h’ohoile lomonyong, ti, ethahabuyo nang Lalamonye. ara ithai nang aang hoithahabuyo.
\v 50 Aang nang athifeyo abolori hindang; owon lothifeyo, akanyo.
\v 51 Diri, diri, ajyo nang dothai, lendafaitho ocame hindang, aang otehu aye.”
\v 52 Ojudei ajyori donyong, “Thenene, itek ohoi hijan iwon iye h’ohoile lomonyong. Aye Abramo h’ohocorok; ti, ijyo iye, ‘ara lendafaitho ocame hindang, aang opil aye.’
\v 53 Aang iye ibolo th’omonye lohoi Abramo, lathuk aye, ibolo iye? Aye dang ohocorok. Ara ngai iwak iye ehandyo ahwan nahoi?”
\v 54 Yesu etharang, “Ara ethaboloryo nang ahwan hindang, aang abolori ne. Lalamonye inyong ithaboloryo nang – lejyo ithai Ojok lothai.
\v 55 Kabong ithai itek inyong, ti, atek nang inyong. Ara ajyo nang kodien, ‘Aang nang atek inyong,’ era nang ijahitha ithai, odalani. Ti, atek nang inyong karik nang endafaitho ocame lonyong.
\v 56 Amuno Abramo loithemonye, atehuna nanyong ofaning hindang. Atehu karik amuno.”
\v 57 Ojudei ajo donyong, “Kabong oyingathik hohoi iwasi athomone miyet, ara iye ijyo etehu iye Abramo?”
\v 58 Yesu ajyo dosong, “Diri, diri, ajyo nang dothai, “Kabong Abramo owon, AWON NANG.
\v 59 Isong hulo ahuro omorik, omiryerek inyong, ti, Yesu edema, thiya alo adi tho Templo.
\c 9
\cl Ebwayit 9
\p
\v 1 Awawararu nya Yesu adith’amiji. Diya, atehu inyong lo othulo lonya oisuni ara lathuk angodo.
\v 2 Ohothifok honyong efiyo inyong, “Ohoityenani, hangai eyatha isarak inyong aisuna ara ongodoni? Eyatha hanyong dia h’omonye dia h’ahathingi?”
\v 3 Yesu etharang, “awangi arami h’eyatha h’omonye dia h’ahathingi th’angodo nanyong. Oisuni inyong lo ara lathuk angodo, d’otehunerek abolori n’Ojok d’ethayiji nanyong.”
\v 4 Howon ara afaning ahani, igyemathik holonya osulu nang lo th’adodoro. Aharie naindu naang ocohi ithai egyemarik.
\v 5 Hawon nang dihap, nang afangan n’ahap.
\v 6 Engohina no Yesu ocame lya, amithak inyong lo ahamilak dihap, enyonyonu amotong, eduhu, amenyok dihonde h’ongodoni, ajyo,
\v 7 “Ilo ilalaye ahomong nahoi di jor ho Siloam (ojyo ocame lya – asulahina.” Ongodoni lo alo ilalayo ahomong nanyong, anyahu thiya ara lamijo.
\v 8 Atehuna n’ohothing hoisuka iyindehai d’ongodoni lamijo lya, emomongai ajyori, “Ikara othulo lo woniatho diyihoi emomojo lo lya?”
\v 9 Homok ajyori, “Inyong lya.” Ti homok ajyori, “Ikara inyong lya. Ihielaru inyong.” Inyong lo olefeng ajyo, “Inyong nang lya.”
\v 10 “Ti ainyong isak iye atehuna thenene?” Isong hulo efiyo inyong.
\v 11 Inyong lo etharang isong, “Eharuyo othulo lara Yesu lo amotong th’ahamilak thahanyong, amenyok dihonde honang; ajyo donang, ilo ilalaye ahomong nahoi di jor ho Siloam. Alo nang diri, nelalayo, nang atehu.”
\v 12 “Lojang inyong Yesu,” isong hulo efiyo. “Aang nang atek,” inyong etharang".
\p
\v 13 Ohothing hulya eyaru ohongodoni lamijo lo d’Ofarisi.
\v 14 Ofaning leharuyerek Yesu amotong th’ahamilak thanyong lo ofaning lodwa l’Ojok.
\v 15 Ofarisi efiyo othulo lamijo lya koti hijan angai otehu inyong. Inyong lo anyahi isong, “Amenyok Yesu amotong dihonde honang; nang elalayo ahomong hindang di jor ho Siloam; thiya nang atehu.”
\v 16 Homok th’Ofarisi ajyori, “Othulo lehandyo arami hune lya, ikara th’Ojok oindu. Ara ikara ahani anyo aang inyong othifoitho arami habis h’ofaning lodwa l’Ojok?” Homok th’Ofarisi ajyori, “Aang ohoyauni oco ehandyo asang hafalangai iring hune.” Th’orii le, ebwa ohothing.
\v 17 Ofarisi koti efiyo ohongodoni lamijo lya, “Ijyo iye esarak othulo lya iye atehuna; oyyu, ainyong ocame lohoi d’ethamijo nanyong iye?” “Inyong lo ohocoroni,” ohongodoni lamijo lo etharang.
\v 18 Aang ohobolok h’Ojudei howak eruhuna hijan ongodo nya othulo lya; ti thene ne atehu. Isong hulo koti elonguni lomonye karik nahathingi h’othulo lonya ongodo lya.
\v 19 Ohobolok h’Ojudei efiyo isong, “Lethelonyi lya? Ijyo ithai oisuni inyong lo nya ara lathuk angodo. Ara thanathai, angai oindu inyong koti imijo?
\v 20 Omonye karik ahathingi etharangi, “Itek ohoi hijan oitho lohoi lya. Ohoi koti itek hija iisu ohoi inyong lo ara lathuk angodo.
\v 21 Aning naang ohoi itek angai otehu inyong karik ngai isarak inyong atehuna. Ifiyatha inyong; abolo inyong lo. Inyong olefeng tho itharanga ithai.
\v 22 Acama no lomonye karik nahathingi h’othulo lya ahani, th’abangi thon’ohobolok h’Ojudei. Ojyo isong hulo leruhu hijan Yesu ithamijo onde lya ongaterek de adi tho Sinagogue.
\v 23 Arami hune isarak lomonye karik nahathingi h’onde lonya ongodo lya ajaran, “abolo inyong lo, ifiyatha inyong.”
\v 24 Operohothi oitharehe, isong koti elonguni othulo lonya oisuni ara ongodoni lya, ajyori donyong, “Ipithai dihithemi h’Ojok dinyahina arami hadiri! Itek ohoi hijan othulo lesarak iye atehuna lya ohoyauni.”
\v 25 “Aang nang hatek, ara inyong ara ohoyauni,” othulo lonya ongodo lya etharang isong. “Aning natek nang, angodo nang nya, ti th’orii lya, atehu nang.”
\v 26 “Ainyong ihandyo dohoi?” isong efiyo inyong. “Angai isarak inyong iye atehuna?”
\v 27 “Athuk nang ithai anyahina,” inyong lo etharang. “Aang ithai ithaningio. Anyo koti iwak ithai ethayirio; dia iwak ithai awonan ara ohothifok honyong?”
\v 28 Isong hulo afiyethak inyong, ajyori, “Iye ohothifoni l’onde le; ohoi ohothifok ho Musa. Iring d’onde lecama iye lya,
\v 29 Itek ohoi hijan ocama Ojok do Musa. Ara arami h’onde lobo le, aang ohoi hoitek thongai oindu inyong!”
\v 30 Othulo lamijo lya etharang, “Aisong arami awalihio hune! Ijyo ithai aang ithai itek thongai oindu othulo le; ti erasak nang atehuna.”
\v 31 Itek ithai hijan aang Ojok hoithaningio ohoyak; ithairio arami h’ohothing hobang inyong karik hoihandio donyong asang hawak inyong isong thoihandye.
\v 32 Gee th’ohohonyo, kabong othulo lobo lesarak othulo lonya oisuni ara lathuk angodo th’omijye.
\v 33 Ara ikara th’Ojok oindu othulo lya, aang hoira ihandyo arami hune.”
\v 34 Isong hulo etharang, “Aisuni iye; ara iye ibolo ara ohoiyauni – ara iye koti ithemyo etyenio ohoi?” Ara isong angararik inyong adi tho Sinagogue.
\p
\v 35 Ethaninguna no Yesu arami hune, arimak othulo lonya isarak inyong thomijye lo, efiyo inyong, “Iruk iye d’Olonyi l’Othulo?”
\v 36 Othulo lya etharang, ‘Inyahi nang inyong lo ngai, deruk nang donyong!”
\v 37 Yesu ajyo donyong, “Eruk atehuna inyong; inyong lecama iye donyong lya.
\v 38 “Eruk nang, Hobu;” Othulo lya ajyo, “arigongo nang dihap dihithemi hohoi, Yesu.”
\v 39 Yesu ajyo, “Aindu nang dihap dine dikanyo arami; dotehu ongodok, ara ohothing hotehu angodo.”
\v 40 Ethairu homok h’Ofarisi honya owoni d’orii h’ocamarik Yesu, efiye inyong, “Itek ohoi aang ocame lohoi lya theene ojyo ohoi dang ongodok?”
\v 41 Yesu etharang, “Ara ingodo ithai kedien, aang ithai ira iyauna; ti ajaran nathai itehu ithai, inyong nesarak ithai awonan ara ohoiyak.
\c 10
\cl Ebwayit 10
\p
\v 1 Yesu etharang, “ Anyahi nang ithai arami hadiri: othulo laang ojinga di bongit thol’oyilangit, alangitha thoyihoi tholobo hama, ohoholani lya.”
\v 2 Othulo lojinga dibongit thoyihet tholobis, ohoyohoni lya l’engaka.
\v 3 Onyahi ohoikyani l’oyihiet donyong oyihoi lobis; ithairu engakaha inyong th’omurut, ara lelongo isong th’ofuretho, karik ara leriyaru isong difara.
\v 4 Ara lathuk eruna engakaha dindak, olo inyong lo ahithemi nasong, ahibu isong athiforo inyong; otek engaka inyong th’omurut.
\v 5 Aang engakaha othiforo othulo lobo caa. Kombwo, ongerori adi th’othulo lolifa; aang h’otehi omurut lonyong.
\v 6 Onyahi Yesu isong arami hune th’erijaru; Yaa, awang otehi tuhudik ainyong onyahi isong erijaru ne.
\p
\v 7 Yesu ajo koti, “Anyahi nang ithai arami hadiri; nang oyihet l’engaka.
\v 8 Hulya bukulung hofuni ahithemi hindang hulya, ohoholak karik ohohorok; awang engakaha ithairio isong.
\v 9 “Nang oyihet. Lojingu tholo nang, ithalwahunu de. Ojingu dithwa, ajingu dignwa, arimak amaji nanyerek.”
\v 10 Ara ohoholan laindu, owak ahoholio, owak atohoro karik owak etharohojo. Aindu nang, diwon ithai h’esu – esu nefut.
\v 11 “Nang ohoyohoni loyyu; leruhok aye th’engakaha tha hanyong.”
\v 12 Ara othulo lomaje, laang ara ohoyohoni, karik laang enagkaha owon ara hanyong, latehu owo, idehi engakaha, angero; Yaa, ainyong ihandio owo? Indahaitho, athurio engakaha.
\v 13 Ongero othulo lomaje amajo; Omaje inyong lo amajo. Awang hoifu engakaha.
\v 14 Nang, zahuan, inyong ohoyohoni loyu. Atek nang akero hundang holefeng, ara akero hundang holefeng atehi nang, iring natehari nang lala Monye, karik lala Monye atek nang.
\v 15 Nang ohoyohoni loyyu; iring otek nang Omonye; Atek nang dang Omonye. Iring na atek nang engakaha hundang, isong dang atek nang; karik nang eruhu aye thosong.
\v 16 Owoni engakaha hundang hawang th’obore. Owak eyanu nang isong dibore dang. Ithaninguni omurut hindang. Ofuni de iwonan abore aboithe, ohoyohoni aboithe.
\v 17 Omuno nang Omonye, th’arami theh’eruhorik nang aye dirimahinerek esu koti.
\v 18 Awang othulo locohi eyaru esu hindang adi tho nang. Nang olefeng eruhu aye. Eruhu nang aye th’ahwan thono hindang. Enyahu nang esu hindang th’ahwan thono hindang. Arami hune hathuk nang Lalamonye anyahina thoihandie.
\p
\v 19 Awon koti nya ebwa n’ohothing th’ocamitha tho hulya.
\v 20 Ojori nya holwa hosong, “Owon Yesu hoywa! Odohoitho odonge! Ainyong ija ahani ithaningierek ithai arami hanyong?”
\v 21 Homok ajori, “Awang othulo loywa hocama ahani! Angai ocohi d’othulo loywa esarahina othulo lathuk angodo thomije, atehu?”
\p
\v 22 Orii le, ohiribo. Owon amuno n’ofaning lesorio d’Ojok di Templo di Yerusalem.
\v 23 Owon Yesu th’orii le d’oyirik la Tempolo lo ilongoi th’ofure tholo Solomone.
\v 24 Osuduhunu ohothing bukulung diker honyong, efiye inyong, “Lwai kanu ilo iye ithasukayo ohoi kwong atehan? Inyahi ohoi arami hadiri: iye ohoithalwahani (Messiah)?”
\v 25 Yesu etharangio, “Athuk nang ithai anyahina. Yaa ti awang ithai iruk arami hundang. Asang hehandio nang th’adwaran thana Lalamonye, isong ithaithak hijan nang ngai.”
\v 26 Awang ithai de ti iruk nang. Aang ithai nang iruk, anyo ikara ithai engaka hundang.
\v 27 Engaka hundang ithaninguni omurut hindang; atek nang isong, isong nang atek.
\v 28 Esarak nang isong esu n’awang ecuhit karik awang isong de oye kwong. Aang othulo locohi ahoruna isong thonang.
\v 29 Aning nathuk nang Lalamonye esarahina, obolo de th’asang bukulung nawang loboling othulo locohi eduhuna tho hinang h’Omonye.
\v 30 Omonye karik nang, ira ohoi oboithe.
\v 31 Thiya ohothing hulya ahuroi omorik, ara homirierek inyong.
\v 32 Yesu ajo dosong, “Ehandio hindang asang hayyu dihithemi hothai, hesarak nang Omonye thoihandye, isong isarak ithai awahan amirio mang th’omorik?”
\v 33 Ohothing etharangio, “Awang ohoi iye imirio th’omorik th’asang tha hayyu thahehandio iye; iwak ohoi iye amirio th’ocame tholo hoi lomonyong dihithemi h’Ojok! Iye othulo ijahani ara iye iwak ehandio ahwan ara Ojok?”
\v 34 Yesu etharangio, “Igero ditha h’amaninihio hathatha arami h’abisan hijan ojo Ojok, “Ithai ojohi.”
\v 35 Itek ohoi hijan arami hacama abibia, arami hadiri mak; karik ilongo Ojok ohothing ara ojohi ohothing hathuk inyong ethafothohina osaritha honyong.
\v 36 Tholo nang, anyimu nang Omonye, efahu nang dihap. Yaa angai hathi ijo ithai nang Ojok thajaran thono hindang nang Olonyi l’Ojok?
\v 37 Heruhotho nang, ara awang nang ehandyo asang hawak nang Lalamonye thoihandye.
\v 38 Yaa ti, ara ehandio nang isong, juk ithai awang nang hoiruk, irutho asang hayyu hehandio nang hune, ditek ithai gelere, dasang fodok hijan Lalamonye loditha honang, nang ditha ha Lalamonye.
\v 39 Koti ohothing hulya awak endafaitho inyong; Yesu ibulungusaru tho has hosong.
\p
\v 40 Yesu anyaha; alangitha owor lo Yordano; alo d’amaji nanya isarierek Yoane Battista abatisimo na; esuka dia.
\v 41 Afuni ohothing olwarai donyong. “Kabong nya Yoane ihandio asang hafalangai,” isong hulo ajori, Arami ti bukulung h’othulo lya hacama inyong arami hadiri.
\v 42 Ara ohothing holwa d’amiji nya eruhi donyong.
\c 11
\cl Ebwayit 11
\p
\v 1 Isuka nya Lazaro h’ahanerok, Maria ho Martha, di Bethani. Diya, Lazaro nya amwai.
\v 2 “(Maria nya, inyong nanya obuhok elethang dihejeha h’Ohobu, efufusio th’ohofir thohothohu honyong na. Olai lonyong Lazaro, lonya ojori odiha lo.”) 3 Ahanerok efahak ahuthuk do Yesu, “Hobu, odiha loimotte.”
\v 3 Ahanerok efahak ahuthuk do Yesu, “Hobu, odiha loimotte.”
\v 4 Ethaninguna nya no Yesu arami hune, ajo, “Awang adiha nya ithayeyo Lazaro; owon adiha ne de ara neyanu ethahuyo d’Ojok; tholo nyong de ifothu Olonyi l’Ojok ethahuyo.”
\v 5 Omuno Yesu Martha, ahani karik Lazaro.
\v 6 Yaa juk ethayiru Yesu amwai no Lazaro, akarihi th’operok arehai.
\v 7 Thiya Yesu ajo d’ohothifok honyong, “Enyaha di Yudea.”
\v 8 “Ohoithayeyenani,” ohothifok honyong etharangak inyong, “Ayindek iye dwo ohothing hule amirio th’omorik; ara iye ijo koti inyaha dia?”
\v 9 Yesu ajo, “Owon ofaning h’oriihio tomon lareha. Dia ikara ahani?” Lodaha th’afaning, awang hoiboso; otehu th’afangan than’ahab.
\v 10 Ara ti odaha th’aharie, iboso, anyo, awang afangan.
\v 11 Ocama Yesu ocame lya afonik, “Othuk omotte lohothai, Lazaro, ajothoro. Alo nang de dithahenyuna inyong th’ajoo.”
\v 12 Ohothifok honyong etharangi Yesu, “Ara ajoothoro, Hobu, ohenyu de ara loyyu.”
\v 13 Ajoothoro ne thono Yesu, ojo athuk Lazaro aye. Ara ohothifok honyong ajo ngona ajoo hadiri.
\v 14 Yesu hathi anyahi isong gwo, “Aye Lazaro.
\v 15 Th’arami thahathai amuno nang. Alama nang thonyong d’orii lya, diruk ithai. Hafatha donyong
\v 16 Tomaso, lonya ilongoi ara Didimo (ocame lojo oheritha), ajo d’ohothifok Yesu ho daha honyong, “Hafatha bukulung, defwo iiye ho Yesu dia.
\p
\v 17 Edwongon no Yesu di Bethani, orimak athuhi anuhahina Lazaro. Eyaru operok arangwan dihab.
\v 18 Awang nya Bethani olama tho Yerusalem.
\v 19 Afuni Ojudei olwarai dinyohio Marta karik Maria d’aye no Lazaro, olai losong.
\v 20 Ethaninguna no Marta hijan Yesu ledwong, arengero dikuboitho honyong, ahibu Maria opwak dihang.
\v 21 awang Lazaro ira iiye.”
\v 22 Yaa ti, atek nang, juk thenene, ocohi d’Ojok disarahina iye aning nefiyo iye thonyong
\v 23 “Ohenyu de loilai hesu,” Yesu anyahi ajo do Marta.
\v 24 “Atek nang,” Marta itharangat Yesu, “oindu de ihenyuna d’ofaning lecuhorit ahab.”
\v 25 Yesu ajo do Marta, “Nang ebuhuna karik esu.
\v 26 Loiruk do nang, juk oye, isu de. Lesu, eruk do nang, awang hoye kwong. Iruk iye arami hune?”
\v 27 “Aa, Hobu,” Marta etharang, “Eruk nang hijan iye ohoithalwahani, Olonyi l’Ojok, lonya oindu di hab.”
\v 28 Athuhon no Marta acama ho Yesu, alo. Alo ilonguna, ahani Maria, arakang, dicama honyong.
\v 29 Ethaninguna no Maria ahani elongo inyong, adotho kwak, ewawar dikuboitho honyong.
\v 30 (Th’orii lya, kabong Yesu hedwong dihiji h’amiji.
\v 31 Adotho no Maria dinden ekuboitherek Yesu, adotho ohothing fodok hofuni di nyohe athiforoi inyong. Ojori ngona dihilame olo dikor.
\v 32 Edwongon no Maria do Yesu Karik atehuna nanyong Yesu, aboco apwaharu dihejek ho Yesu. “Hobu,” inyong na ajo, “Ara dwo iwon iye dine, awang lalalai ira iiye.”
\v 33 Atehuna no Yesu Maria ekoron karik ekoron n’Ojudei fodok hofuni di nyohe, athino othaji lo Yesu bebe.
\v 34 “Dingai inuhak ithai inyong?” inyong efiyo isong. “Iwong idoro, Hobu,” isong etharang.
\v 35 Yesu ekor; Ehyo honyong abuhunu.
\v 36 Ojudei ajori, “Idorotho angai obolo amuno nanyong do Lazaro.”
\v 37 Homok thosong ajori, “Ara ethamijo othulo lya ongodoni, awang ti hoira isarahina Lazaro th’awang hoye?”
\v 38 Yesu dihide h’amijan n’othaji lonyong bebe ne, alo dihilame ha Lazaro. Ahilame nya ahulom nemuho th’omorwong.
\v 39 Yesu ajo, “Iduhuna amorwong ne adi.” Marta, nahani h’ohoyani Lazaro, ajo, “Hobu, th’orii lya, amuyak ahwan na Lazaro; ara operok honyong arangwan dihilame.”
\v 40 Yesu ajo do Marta, “Kabong nang anyahi ithai hijan ara iruk ithai, itehu ithai de ohujon n’Ojok.”
\v 41 Eduhu isong hulo amorwong adi. Yesu amijo dihide, ajo, “Monye, humo, dithaningio hohoi nang.
\v 42 Atek nang berien hijan ithaningio iye nang de; acama nang ahani, diruk elulung nalihak nang ne, hijan iye nya ifahu nang.”
\v 43 Diholu h’acama no Yesu arami hune, ajo inyong lo bebe, “Lazaro, iwong didak.”
\v 44 Ohoyani aindu didak, ahejek karik ahas hanyong ara hathora th’ahilyen; imuho dang ahomong nanyong th’ahilyen. Yesu ajo dosong, “Olahahina Lazaro; thoilo.”
\p
\v 45 Ojudei olwarai hofuni dinyohio Maria, hatehu ainyong ihandio Yesu, eruhi donyong.
\v 46 Homok thosong afwoi dinyahina Ofarisi ainyong ihandio Yesu.
\p
\v 47 Ofarisi karik ohoithamojok awoniari d’oputet. Athuhon nasong ocame, ajori, “Ainyong de ehandio? Owon othulo lya hethamijanitha olwarai.
\v 48 Ara elahi inyong ahani, iruk de ohothing fodok donyong, ohothing ho Roma afuni iyaru amaji karik amiji nahothai.
\v 49 Lobo th’ohithamojok hohitwa, lara Kaifas, ajo dosong, “Awang ithai itek aning nabo.
\v 50 Ara thanathai awang ithai itek hijan osiru d’othulo aboithe diiye th’ohothing thoholwai, didehina amiji fodok thoingohunu.
\v 51 Awang Kaifas ongau ocame lya thohu honyong. Ocama arami hune, anyo, owon inyong lo ara ohoithamojoni lohitto loyinga le. Ocorok hijan oye de Yesu dithalwahuna amiji.
\v 52 Ikara th’amiji hamaring; ocorok inyong lo ahani, doindu Yesu isuduhuna olonyirok h’Ojok hathuk athurohunu, athunak ara aboithe.
\v 53 Th’ofaning le adihithemi, owak isong hulo arimahina oyihoi lo ithayeyere Yesu.
\p
\v 54 Th’omiru hule, awang Yesu holeyo dihithemi h’Ojudei; alo adi thiya dith’amiji, thiya alo dith’ofara iindehai d’amiji nelongoi ara Efraim. Esuka diya hoh’othifok honyong.
\v 55 D’omiru hule, aiindek ofaning l’ehuma n’Ojudei nelongoi ara “Passover” na. Afwoi ohothing fodok thath’amiji di Yerusalem dithaliborio ahwandek.
\v 56 Othifeyo isong hulo Yesu th’orii le. Asuduha nasong di Tempolo, efifiai ahwandek, “Ainyong igigilo ithai? Awang de Yesu hoindu d’ofaning l’ehuma lya?
\v 57 Th’orii le athuk Ohoithamojok hohitwa karik Ofarisi anyahina hijan, othulo lotek amaji no Yesu, thoinyahi, dindefunere inyong.
\c 12
\cl Ebwayit 12
\p
\v 1 Operok inde dihithemi h’ofaning l’amuno l‘ehuma, orimak Yesu di Bethani, dihang ha Lazaro, lonya ithabuhu Yesu th’oye lo.
\v 2 Dia, amarahini Yesu anyari. Maria ehuhumak Yesu anyari ne, anye isong ho Lazaro.
\v 3 Ofaning le, eduhu Maria elethang thoihutye tholo hittok, abuhok di hejek ho Yesu, efufusio th’ohofir thohotho hu honyong.
\v 4 Lobo aboithe th’ohothifok ho Yesu, Yuda Iskariot, lonya oindu ithanyangahina Yesu lo, ajo,
\v 5 “Irahi dwo ithanyangahina elethang ne, enyangahinerek anyari d’ohoicanak.”
\v 6 Ajo Yuda ahani, ikara diri owak alwahio ohoicanak. Inyong lo ohoholani; Inyong indafaitho akoro n’ohothifok ho Yesu, anyo thiya, iring owak inyong.
\v 7 Yesu ajo, “Idehina Maria h’attitto hanyong d’ofaning l’onuhierek nang.
\v 8 Ithai de h’ohoicanak isuka. Ti, ikara nang de lo isuka hothai juii.”
\p
\v 9 Ethaninguna n’elulung nahitto n’Ojudei hijan Yesu lodi Bethani, afwoi dia do Yesu karik d’ittihio Lazaro, lonya hoithek Yesu ithabuhuna th’oye lo.
\v 10 Owahi nya dang ohoithamojok hohittwa eicam attohoro no Lazaro;
\v 11 th’arami tha hanyong ofwo Ojudei holwa adi karik eruhi do Yesu.
\p
\v 12 Nya moithe, aindu hoililye nahitto di muno. Ethaninguna nasong hijan Yesu loindu di Yerusalem,
\v 13 Akonye abene h’osohot afwoi do Yesu th’oiuluhe, “Loindu th’ofure thol’Ohobu, Ohobu lo Israele, thomunoi.”
\p
\v 14 Olo Yesu th’ahide than’akayine nohomutha; iring nathuhi egerohinere:
\q
\v 15 “Hoibang, aitho no Zion; ingengela Ohobu lohoi ainduna, th’ahide than’akayine abothor.”
\p
\v 16 Th’omiru hule, kabong ohothifok ho Yesu othenu tuhudi ainyong nawon. Otehi ti hijan ara Yesu lathuhi adohina dihide ara ohobu, isong de igyema arami hune, iring najarari amaninihio h’ocame l’Ojok.
\v 17 Ohothing h’elulung nya anyahini hijan owon isong nya dia nethabuhunere Yesu Lazaro th’oye na.
\v 18 Ahu ne nabo nanya ondere elulung difothunere Yesu; Ethaningu ohothing ethabuhuna no Yesu Lazaro th’oye.
\v 19 Ofarisi acamaru amonye, ajori, “Ethehu ithai? Awang ohothai irumak oyihoi loboling kwong. Idorotho; ahap fodok nathiforo inyong!”
\p
\v 20 Ditha h’ohothing honya ofwo di Yerusalem ofaning l’amuno n’ehumarik lo, owoni nya Ogriks.
\v 21 Ofwoi nya do Fillipo, inyong lo nya tho Besaida di Galilee, ajori donyong, “Lahong, iwak ohoi edorio Yesu.”
\v 22 Fillipo alo inyahina Andrea; isong arehai afwo inyahina Yesu.
\v 23 Yesu eruhu isong, ajo, “Edwongi omiru h’Olonyi l’Othulo difothuna ethahuyo nahitto.”
\v 24 Diri, diri, ajo nang dothai; orasa de ohonyek l’ohimai oboithe, ara kabong h’oyehini dihap, aye, amuyak. Ti, oisu ohima olwarai, ara aye, amuyak.
\v 25 Lomuno esu nanyong, ithalithok de esu nanyong; loman esu nanyong dihap dine, indefaitho de esu nanyong ara namanya n’awang ecuhi.
\v 26 Lowak egyema ho nang, thothifunu nang; amaji nawondere nang, owon ohoigyemani hindang diya. Ithahuyo de Lalamonye othulo l’egyema ho nang.
\v 27 “Odiha othaji hindang, ti, ainyong de ajo nang? ‘Monye, ipahu nang th’ethathacana?’ Th’arami tho hune edwongori nang d’omiru hulya.
\v 28 Monye, ithahuye ofure lohoi. Oilolonge aindu thohide ajo, “Athuk nang ethahabuyo inyong. Ethahabuyo nang inyong koti.”
\v 29 Ethaninguna n’elulung n’ohothing nawoitha indehai diya, ajori apeyo ahila. Homok ajori, “Anjelo ocama do nyong le.”
\v 30 Yesu etharang, ajo, “Ikara donang oindu oilolonge lya, dothai oindu.
\v 31 Omiru hulya ho kanyere ahap ne: omiru hulya ho sulunere ohobu l’ahap ne th’okara.
\v 32 Karik, ara nang ladohohini dihide, efihu nang de ohothing fodok donang.”
\v 33 Ocama Yesu ahani, dinyahinere opecen laye nanyong.
\v 34 Elulung etharang inyong, “Ithaningu ohoi th’oyano hoigero hijan oindu de Kristo imanya mak. Angai ijo iye, ‘Oyihahini de Olonyi l’Othulo dihide? Ngai inyong Olonyi l’Othulo lya?’
\v 35 Yesu ajo dosong, “Orasa de afangan hothai omiru tibia. Odahathi howon afangan, tek ithai omudwe endefu. Lodaha th’omudwe, awang otek dingai olo inyong. Howon afangan, iruhotho d’afangan, diwon ithai ara olonyirok h’afangan.”
\v 36 Ocama Yesu arami hune, alo idima adi thosong.
\v 37 Juk ehandio Yesu asang olwarai hafalanagai, kabong hoiruhi donyong.
\v 38 D’ofuni ocamitha h’ohocoroni Isaya ileyoro, hojari inyong, “Hobu, eruk ngai arami hahoi? Karik, do ngai onyahini elulung n’ohoremok h’Ohobu?
\p
\v 39 Th’arami tho hune, awang ocohi dosong eruhon, iring najari Isaya?
\q
\v 40 “Athuk ethangodoyo ahonde hasong, ethakolio othaja hosong; ara ikara ahani, irahi itehuna th’ahonde tha hasong, athenuni th’othaja tho hosong, eloyithoi. Karik nang era isong ethalihio.
\p
\v 41 Ojo Isaya arami hune, anyo, atehu abolori no Yesu, acama tho nyong.
\v 42 Ti, dihide h’ocamitha hulya, awang ohoindefak h’ahap hoiruk do Yesu; Awang hoiruhi th’arami thoh’Ofarisi. Awang hoiruhi arami hune tek isong alwoi afwan di sinagog.
\v 43 Omunoi emamajo naindu th’ohothing, tholohide thanaindu th’Ojok.
\p
\v 44 Yesu ekor bebe ajo, “Loiruh donang, ikara donang hamaring iruk; Iruk dang do lonya ifahu nang lo.
\v 45 Lotehu nang, otehu lonya ifahu nang lo.
\v 46 Aindu nang dihab ara afangan, dawang loiruk donang isuka ditha omudwe.
\v 47 Loithaningio awang hothifoitho ocame hindang, awang nang akanyo arami hanyong. Awang nang aindu di hap dikanyo; aindu nang dithalwahuna ahap.
\v 48 Loida nang karik eda ocamitha hundang, owon ohokanyani lonyong. Ocame lathuk nang anyahina oindu de inyong ikanyo d’ofaning loth’cuhit.
\v 49 Awang nang h’acama th’ahwan thono hindang; Monye ifahu nang; inyong onyahi nang ainyong ehandio nang karik ainyong acama nang.
\v 50 Atek nang. Ocame lo Monye donang, awang ecuhit nanyong. Arami hune h’acama nang – iring nathuhori Omonye acama do nang, ahanya acama nang.
\c 13
\cl Ebwayit 13
\p
\v 1 Dihithemi h’amuno karik anyari n’ofaning l’ehuma, atek Yesu hijan acohini operok honyong di edehina ahap ara inyong alo d’Omonye. Othuhon nanyong amuno ohothing honyong honya owon dihap, amuno inyong isong lwai di cuhi.
\v 2 Athuk Sitan esarahina di thaji ho Yuda Iskariot, lolonyi ho Simone, dithanyangahina Yesu.
\v 3 Atek Yesu hijan athuk Omonye esarahina asang fodok dihinang honyong, anyo, th’Ojok oindu inyong karik d’Ojok de dang onyaha inyong.
\v 4 Adotho tho nyari, eduhu ahilyen nayong nothohide. Eduhu ahilyen nabo, athorik dihwan.
\v 5 Abuhok ahari di kelebe, elalayo ahejek h’ohothifok honyong, ethayohojo th’ahilyen thana othorik inyong dihwan honyong na.
\v 6 Aindu Yesu do Simone Petro, ara Simone Petro ajo donyong, “Hobu, ara iye ilalayo ahejek hundang?”
\v 7 Yesu etharang, ajo donyong, “Aning nehandio nang, awang ithai itek thenene, ifunu ithai de itehan diholu.”
\v 8 Petro ajo donyong, “Awang iye ilalayo ahejek hundang.” Yesu ajo do Petro, “Ara awang nang helalayo ahejek hahoi, awang nang angara hohoi.”
\v 9 Simone Petro ajo donyong, “Hobu, helalayo ahejek hundang hamaring; ilalaye dang ahas h’ahu hindang.”
\v 10 Yesu ajo donyong, “Othulo lathuk ahuyoro, awang owak elala, arahari ahejek; olibo ahwan nanyong fodok; Ilibo iye, ikara ti ithai fodok.”
\v 11 (Atek Yesu othulo lolo inyong ithanyangahina; inyong najo inyong awang ithai ilibo fodok.”)
\p
\v 12 Athuhon no Yesu elalayo ahejek hasong, enyahak alyenyi hanyong dihwan, awoni dihap koti ajo dosong, “Itek ithai ayinyong ehandio nang dothai?
\v 13 Ilongo ithai nang ara ‘ohoithayeyenani’ karik ‘Hobu.’ Ithen ithai. Nang diri ohoithayeyenani karik Hobu.
\v 14 Ara elalayo nang, ohoithayeyenani karik Ohobu, ahejek hathai, ira ithai dang ilalaru ahejek hathai.
\v 15 Athuk nang ithai ethayithahina, dihandio ithai iring nathuk nang ehandiere dothai.
\v 16 Diri diri, ajo nang dothai, awang ohoigyemani hobolo th’ohoithagyemani; awang dang othulo lefahaithe obolo th’othulo lefahaitho.
\v 17 Ara itek ithai asang hune, omunothi, ara ihandio ithai isong.
\v 18 Awang nang acama thoithai fodok; acama nang th’ohothing thah’athuk nang anyimuna, dofuni arami hegero dihap ithenahunu: ‘Lonyo anyari hindang, inyong ongicari nang.’
\v 19 Anyahi nang ithai arami hune kabong holeyori, dara ara hafuni ileyori, ifunu ithai iruhon hijan NANG INYONG.
\v 20 Diri diri, ajo nang dothai, loifothu othulo lefahaitho nang, ifothu nang; loifothu nang, ifothu le, lonya ifahu nang lo.
\p
\v 21 Acama no Yesu ahani, ejoria; ethaithak arami hune, ajo, “Diri diri ajo nang dothai, lobo thothai lolo ithanyangahina nang.”
\v 22 Ethathamija ohothifok ho Yesu; ofalangai, ngai thosong ocama Yesu.
\v 23 Lobo th’ohothifok ho Yesu, lomuno inyong, oyokong d’amaji nanyere indehai do Yesu.
\v 24 Simone Petro ajo d’ohothifoni lya, “Ifiya sede inyong; ngai locama inyong lya?”
\v 25 Ohothifoni lomuno Yesu lo alo indehai do Yesu, ajo, “Hobu, ngai inyong lecama iye lya?”
\v 26 Yesu etharang, “Onde leduhu nang anyari, neduthok nang ethafothok donyong; inyong lya.” Athuhon nanyong eduthohina, esarak anyari ne do Yuda, lolonyi ho Simone Iskariot.
\v 27 Diholu h’anyari ne, ajingak Sitan ditha honyong; Yesu ajo donyong, “Ainyong hoihandyo iye; ihandye aning newak iye kwak.”
\v 28 Awang loboling th’ohothifok honyo honyong hulya lotek anyo ojo inyong ahani donyong.
\v 29 Igiglo homok thosong hijan ngona endafaitho no Yuda enyahwo hasong, inyong najo Yesu do Yuda, “Inyangai ainyong ewak d’ofaning lamuno,” dia ngona onyahi inyong thoisarak aning nabo d’ohoicanak.
\v 30 Athuhon no Yuda efothuna anyari, alo dindak. Th’orii le, awon ara aharye.
\p
\v 31 Athuhon no Yuda anden, Yesu ajo, “Thenene ne, athuhi ethahabuyo Olonyi l’Othulo. Ethahabuyo dang Ojok ditha honyong.”
\v 32 Ithahabuyo de inyong Ojok ditha honyong; ara inyong ethahabuyo inyong kwak.
\v 33 Ithai, okalifinok hottik, awon nang de hothai omiru tiibai. Ithifeyo ithai de nang, karik iring najari nang d’Ojudei, ‘Amaji nandere nang nya, awang ocohi ithai afuna diya.’ Acama nang dang ahani dothai.
\v 34 Esarak nang dothai efahit angejuk, omunohunethe; iring namunorik nang ithai, omunothi dang ahwandek hathai.
\v 35 Th’oyihoi tholya de otehi hijan ithai ohothifok hundang, ara imuno ithai ahwandek hathai.
\p
\v 36 Simone Petro ajo donyong, “Hobu, anyo nawang nang athiforo iye.” Yesu etharang, “Amaji nandere nang ne, awang ocohi dohoi diinduna thenene; ithifunu iye nang de diholu.”
\v 37 Petro ajo donyong, “Hobu, anyo nawang nang athiforo iye thenene? Ara owon ara aye, aye nang de tho iye.”
\v 38 Yesu etharang, “Iiye iye de diri tho nang? Diri diri, ajo nang dothai, kabong ohohorong isiir, irisa iye nang de operok aunihoi.”
\c 14
\cl Ebwayit 14
\p
\v 1 “Hoisarahina othaja hothai tho banga. Iruhotho d’Ojok, ara ithai iruk do nang.
\v 2 Di hang ha Lalamonye, owoni athwahio olwarai. Ara dwo ikara ahani, awang nang ira ithai inyahina hijan nang lalo ihuhumio amaji dothai.
\v 3 Ara alo nang ihuhumio amaji dothai, aindu nang de ifothuna ithai ara hundang, dara amaji nawondere nang, iwon ithai dang diya.
\v 4 Itek ithai oyihoi d’amaji nandere nang.”
\v 5 Tomaso ajo do Yesu, “Hobu, awang ohoi itek dingai ilo iye; angai itek ohoi oyihoi?”
\v 6 Yesu ajo donyong, “Nang oyihoi, arami hadiri karik esu; awang loindu d’Omonye, arahari tholo nang.
\v 7 Ara itek ithai nang, etek ithai dang Lalamonye; hara th’ahanan adihithemi, ethuk ithai etek nang karik ethuk ithai atehuna inyong.”
\v 8 Fillipo ajo do Yesu, “Hobu, ithaithak ohoi Omonye; Atehan no Omonye, ocohi ohoi.”
\v 9 Yesu ajo donyong, “Aleng nang esuka hothai, kabong ithai nang itek, Fillipo?” L’athuk atehuna nang, athuk atehuna Omonye. Angai icohi iye ajara ‘Ithaithak ohoi Omonye’?
\v 10 Awang ithai iruk hijan nang loditha h’Omonye, Omonye loditha ho nang? Ocamitha h’ajo nang dothai, awang nang acama th’ahwan thono hindang; Monye lowon ditha ho nang, inyong ihandio egyema ne.
\v 11 Iruhotho nang; nang loditha h’Omonye; Monye loditha honang; dia hibu, iruhotho egyemathik h’ehandio nang.
\v 12 Diri diri, ajo nang dothai, leruk donang, ihandio de egyemathik hundang karik oindu de dang ihandio egyemathik hahitwa tho hune; nang lalo d’Omonye.
\v 13 Aning nefiyo ithai th’ofure tholo hindang, ehandyoo nang de dithahuye Omonye ditha h’Olonyi.
\v 14 Ara ifiyo ithai nang aning nabo th’ofure tholo hindang, ehandyo nang de.
\v 15 Are imuno ithai nang, ithifoitho ithai de efahitha hundang.
\v 16 Karik amojo nang de Omonye, isarak de ithai ohoibowani lesuka hothai mak-
\v 17 Ohoile l’arami hadiri. Awang ahap ocohi efothuna inyong; awang ahap otehu karik awang otek inyong. Ti, itek ithai inyong; isuka de hothai karik isuka de ditha hothai.
\v 18 Awang nang edehi ithai hamaring; Anyahu nang de dothai.
\v 19 Ofithoro omiru tiibai, awang nang ahap olo itehuna; ti, itehu ithai nang. Awon nang, iwon ithai de dang.
\v 20 Ofaning le, ifunu ithai de itehan hijan nang loditha ha Lalamonye, ithai ditha honang karik nang ditha hothai.
\v 21 Lowon hefahitha hundang, athifoitho, omuno nang; lomuno nang, omuno de dang inyong Lalamonye, karik nang amuno inyong; nang de dang ethaithak ahwan hindang donyong.
\v 22 Yuda lobo, ikara Iskariot, ajo do Yesu, “Hobu, anyo nara dohoi ithaithak iye ahwan nahoi; anyo nangara d’ahap?”
\v 23 Yesu etharang, ajo donyong, “othulo lomuno nang, othifoitho ocamitha hundang; omuno de inyong Lalamonye, ohoi de ifunu do nyong, ohoi ihuhumak ahang nahoi honyong.
\v 24 Lawang omuno nang, awang othifoitho ocamitha hundang; ocame lethairu iye tho nang, ikara hindang; oindu th’Omonye loifahu nang.
\p
\v 25 Athuk nang acama arami hune dothai, hesuka nang hothai.
\v 26 Ohoiboboani – Ohoile Lodwa osulu de Omonye th’ofure tholo hindang – oindu ityenio ithai asang fodok; oindu de ithayuhina ithai asang h’ajo nang dothai.
\v 27 Edehi nang dothai elik n’othaja karik elik n’ahap; Edehi nang dothai elik n’othaja karik elik n’ahap. Esarak nang dothai, ikara iring nesarahinere ahap. Hoisarahina othaja hothai thobondwoi; hoibangatha.
\v 28 Ethaningu ithai ainyong ajo nang dothai, ‘nang lalo adi karik alo nang de inyahuna.’ Ara imuno ithai nang, imuno ithai de; nang lalo d’Omonye; obolo Omonye tho nang.
\v 29 Acama nang arami hune kabong oleyori, difunu ithai iruhon ara hawoni.
\v 30 Awang nang acama hothai bebe; ohoindefani l’ahap loindu; awang abolori nanyong okalu hindang.
\v 31 Ti, doindu ahap itehan hijan amuno nang Omonye, egyema nang iring nanyahinere inyong nang. Odothothi. Efwo adi thene.”
\c 15
\cl Ebwayit 15
\p
\v 1 “Nang ohiyani l’ahayo. Lalamonye ohoigyemani di mana h’oyani h’ahayo.
\v 2 Ikothu tho nang athani nawang ithadoyo ahayo; ihuhumyo thuhudi athani nedoyo ahayo, didoyo ahayo olwarai.
\v 3 Th’ocame tholo anyahina nang dothai, ilibo ithai.
\v 4 Isukathi ditha honang, nang ditha hothai. Iring nawang athani idoyere ahayo ara awang th’ohiyani, awang ithai dang ihuru aning nabo, ara awang ithai thotho nang.
\v 5 Nang ohiyani l’ahayo, ithai athandak. Lowon ditha ho nang, nang awon ditha honyong, inyong ithadoyo ahayo. Kwong nang, awang iye icohi ehandio aning nabo kwong.
\v 6 Ara lowang owon ditha ho nang, ocohoroi adi iring athani, ethayohoje, asuduhie ara athandak, amirohini dith’ahimang, edwehini.
\v 7 Ara iwon iye ditha ho nang, ocame hindang awon hohoi, ifiye aning newak iye. Isarahini de dohoi.
\v 8 Ethabolorye Lalamonye do hune; ethadoyethe ahayo olwarai, dithaithak hijan ithai ohothifok hundang.
\v 9 Iring namunori nang Omonye, amuno nang dang ithai. Isukathi dith’amuno hindang.
\v 10 Ara ithifoitho ithai efahitha hundang, irasa ithai de dith’amuno hindang; ara athifoitho nang efahitha ha Lalamonye, arasa nang de ditha h’amuno nanyong.
\v 11 Acama nang arami hune dothai, dowon amuno hindang ditha hothai, ara amuno nathai athuba.
\v 12 Efahit hindang nang dothai: omunothi ahwandek iring nathuhori nang amuno ithai.
\v 13 Awang lobo lokalu amuno nanyong n’othulo lowahu aye th’omorot.
\v 14 Ithai omorot hundang, ara ihandio ithai asang hanyahi nang ithai.
\v 15 Awang nang ithai elongo ara ohoigyemak; awang ohoigyemani otek ainyong ihandio ohoithagyemani lonyong. Elongo nang ithai ara omorot. Asang fodok h’ethairu nang tha Lalamonye, athuk nang ithai anyahina.
\v 16 Ikara ithai nang inyimu; nang anyimu ithai, nang esarak ithai thoifwa idoye ahayo; ahayo hathai owoni. Aning nefiyo ithai Lalamonye th’ofure tholo hindang, isarak de dothai.
\v 17 Anyahi nang ithai asang hune: omunothik ahwandek.
\v 18 Ara ongicarik ithai ahap, otehatha hijan ongicarik nang dihithemi hosong angicarik ithai.
\v 19 Ara ithai h’ahap, ira ithai ahap imuno. Ti, ikara ithai h’ahap. Nang anyimu ithai adi thohop, inyong nangicari ithai ahap.
\v 20 Hoikwothi ocame l’anyahi nang ithai: ‘awang ohoigyemani obolo th’ohoithagyemani lonyong.’Ara ethathacanie nang, ithahtacanie de dang ithai; ara othifoithe ocamitha hundang, othifoithe de dang ocamitha hothai.
\v 21 Ihandye de asang hune fodok dothai, th’ofure tholo hindang, anyo, awang otehi ngai ifahunu nang.
\v 22 Ara kabong nang aindu nang acama dosong, awang hoirahi iyauna; ti, awang hoikaruni eyau.
\v 23 Longicarik ho nang, ongicari Lalamonye.
\v 24 Ara kabong nang adodoro asang fodok hakabong lobo ihandiere dihithemi hosong, awang irahi iyauna; ti, athuhi atehuna, angicari nang karik Lalamonye.
\v 25 Ofwo arami hune see h’oyano hosong hoigero, ‘Amani nang kwong arami.’
\v 26 Ara de ohoiboboani, lefahu nang de th’Omonye: Ohoile l’arami hadiri, lolo th’Omonye, laindu, oindu de inyahina arami fodok hundang.
\v 27 Ithai dang hodinyahina arami karik asang h’ehandyo nang, anyo, ohothai dang isuka amaji oboithe hara th’oculwe.
\c 16
\cl Ebwayit 16
\p
\v 1 “Athuk nang acama asang hune dothai, dawang ithai idehi nang.
\v 2 Ongaterek isong de ithai tho Sinagogues. Ti orii loindu lo igigilorik ohothing bukulung hotohio hijan isong hodigyema egyema n’Ojok.
\v 3 Ainyong de isarak isong egyema ahani, anyo, awang otehi Omonye; awang otehi nang.
\v 4 Acama nang asang hune dothai, dara ara omiru hosong hafuni, diyyu ithai hijan athuk nang ithai anyahina. Kabong nang ithai anyahi asang hune th’oculwe, anyo, hesuka nang hothai.
\v 5 Ti thoone, nang lalo do lonya ifahu nang lo, ti kabong lobo thothai lefiyo nang, “Dingai ilo iye?”
\v 6 Ti, anyahina hindang ithai asang hune, ethafuthak ejiringa othaja hothai.
\v 7 Ti Anyahi nang ithai arami hadiri: oyyu de dothai ara alo nang. Ara awang nang alo, awang ohoboboani hoindu dothai; ara alo nang, efahu nang de inyong dothai.
\v 8 Ara ohoiboboani laindu, oindu de ithai ithaithahina hijan epal diri ahap d’arami h’eyau, h’abisan karik h’akanyo –
\v 9 D’arami h’eyau, anyo, awang isong iruk donang.
\v 10 D’arami h’abisan, anyo, nang lalo do Monye; Awang ithai nang hoifwo itehuna.
\v 11 D’akanyo, anyo, athuhi akanyo arami h’ohoindefak h’ahap.
\v 12 Awon nang h’arami olwarai, era nang ithai inyahina, ti awang ithai de igilu tuhudi d’omiru hulya.
\v 13 Ti, ara Ohoile l’arami hadiri laindu, aindu de ithai ithaithahina arami h’adiri; Oindu de icama th’ahwan thananyong. Oindu de icama aning nethairu inyong; oindu de inyahina asang hafuni ifuna.
\v 14 Oindu de ithahabuyo nang; oindu de iduhuna th’aning thanawon ara hindang, anyahi dothai.
\v 15 Asang fodok hawoni da Lalamonye, hundang. Inyong najo nang iduhu de Ohoile th’asang hawon ara hundang, anyahi dothai.
\v 16 Afithoro omiru tibia, awang ithai nang hoifwo itehuna. D’omiru koti homok tibai, ara ithai ifunu nang itehuna.
\v 17 Ohothifok homok honyong acamahunai dihiji hosong, “Ainyong ne, nacama inyong d’ohothai ne. ‘Afithoro omiru tibia, awang ithai nang hoifwo itehuna; ‘D’omiru koti homok tibai, ara ithai ifunu nang itehuna,’ karik, ‘Anyo, nang lalo d’Omonye’?”
\v 18 Isong hathi ajori, ““Ainyong nacama inyong ne. ‘D’omiru homok tibai’? Awang ohothai iteh ainyong ocama inyong.”
\v 19 Otehu Yesu owahi ohothifok honyong efiyo inyong; inyong ajo dosong, “Arami hune hefiyere ithai ahwandek hathai: ainyong ojo, ‘Afithoro omiru tibia, awang ithai nang hoifwo itehuna; ‘D’omiru koti homok tibai, ara ithai ifunu nang itehuna’?
\v 20 Diri diri ajo nang dothai, ifunu ithai de ikor karik othaja hothai afuni idihari, ahibu ti ahap omuno. Ithafut ithai de ijiringa, ti oindu de ijiringa nathai iloitho ara amuno.
\v 21 Ara athulo nathamana, ijiringa, anyo, afuni omiru honyong, ti, ara nathuk athamana, okworo adihari n’ahwan nayong th’amuno thon’othulo l’aiisuni dihap.
\v 22 D’orii lya, iwon ithai h’ejiringa, ti, atehu nang de ithai koti; omuno de othaja hothai; awang de loboling locohi eduhuna amuno adi thothai.
\v 23 Ofaning le, awang de ithai ifiyo nang aning nabo. Diri diri ajo nang dothai, aning n’efiyo ithai th’Omonye th’ofure tholo hindang, isarak de dothai.
\v 24 Lwai d’omiru hulya, kabong ithai ifiyo aning nabo th’ofure tholo hindang. Ifiyethe di ifothu ithai dirimahinere amuno nathai.
\p
\v 25 Athuk nang acama dothai asang hune th’ocamintha ija. Ti, omiru hufuni, h’acamarik nang dothai gwo karik h’anyahinere nang ithai arami puhek.
\v 26 Ofaning le, ifiyo ithai de th’ofure tholo hindang; awang nang ajo dothai ifiyethek d’amojo d’Omonye tho’ithai.
\v 27 Omonye thahwan omuno ithai, anyo, imuno ithai nang karik eruk ithai hijan th’Omonye aindu nang.
\v 28 Th’Omonye aindu nang. Aindu nang di hab. Koti nang ledyaharu ahab. Nang lalo d’Omonye.
\v 29 Thiya ohothifok honyong ajo donyong, “Atha icama iye thenene gwo; ikara ocamatha hulya ija.
\v 30 Itek ohoi hijan itek iye asang bukulung; ithathalik othulo lobo efiyo ija ahani. Inyong isarak ohoi eruhon hijan th’Ojok indu iye.
\v 31 Yesu etharang isong, “Eruk ithai hathi?”
\v 32 Edwong omiru hothurierek ithai bukulung: ngai dihang honyong; nang hathi apwak hamaring. Ti, ikara nang diri hamaring. Owon Omonye honang.
\v 33 Athuk nang anyahina ithai arami hune diwon ithai h’elik n’othaja karik n’ahap dithunahunu donang. Ithathacana ithai de dihap. Ithakoliethek ahwandek! Athuk nang ateluna ahap.”
\c 17
\cl Ebwayit 17
\p
\v 1 Engohina no Yesu acama n’arami hune, amijo dihide, d’amaji nelik, ajo, “Monye, edwongi omiru. Isarak ahujon do Lelonyi, dithahuyo iye.”
\v 2 Esarak iye inyong akolon tholohide akolon n’othulo, disarahinerek iye d’ohothing fodok hethuk iye esarahina donyong, esu nawang ecuhit.
\v 3 Esu n’awang ecuhit, onyahi hijan iye aboithe Ojok ladiri; isarak dang ateha Yesu Kristo lonya ifahu iye lo.
\v 4 Athuk nang ethaithahina ahujon nahoi dihap; athuk nang egyema nesarak iye donang.
\v 5 Monye! Isarak nang ahujon dihithemi hohoi, ahujon nanya owon hohoi kabong ahap hoyeuni.
\v 6 Athuk nang iye ethahuyo dihithemi h’ohothing hethuk iye nang esarahina adi thohop. Isong hulo hohoi; ara iye isarak isong donang. Athuk isong hulo eruhuna ocamitha hohoi.
\v 7 Otek isong hulo hijan asang fodok hesarak iye donang thohoi ofuni.
\v 8 Anyahi nang dosong ocame lenyahi iye donang, efothuni. Otehi isong hulo hijan thohoi diri aindu nang; eruhi dang hijan iye ifahu nang.
\v 9 “Amojo nang thosong; awang nang amojo th’ahap fodok; amojo nang th’ohothing thoho isarak iye donang; isong hulo hohoi.”
\v 10 Asang fodok hahoi, hundang; asang fodok hundang, hahoi; ahujon hindang ethaithak nang tholosong.
\v 11 Nang laindu dohoi lya; awang nang thohop; ti, ohothifok hundang hohowoni dihab. Monye Lodwa! Ikeye isong th’akolon thon’ofure lohoi, ofure lesarak iye donang, dowondere isong hulo ara aboithe, iring newondere iye honang ara aboithe.
\v 12 Nanya hawondere nang hosong na, ekayo nang isong th’akolon thon’ofure lohoi, ofure lonya isarak iye donang diyohoitherek isong kabong lolitho, araharik othulo lonya awon ara lalito dofunere arami hanya athuk egero dihab iwonan ara hadiri.
\v 13 Nang laindu do hoi lya; acama nang arami hune dihap, difut amuno hindang di thaja hosong.
\v 14 Athuk nang esarahina dosong ocame lohoi, ahap koti aman isong. Isong hulo ikara h’ahab, iring nawang nang awondere ara l’ahap.
\v 15 Awang nang efiyo iye hija diyaru isong adi thohob; efiyo nang iye diyohoitho karik dikayo iye isong th’omonyoroni okihik.
\v 16 Iring ikara nang l’ahap, ikara dang isong hulo h’ahap.
\v 17 Iduhu isong hulo dohoi th’arami thah’adiri; ocame lohoi arami ha dirir.
\v 18 Efahak nang isong di hap, iring nefahahinerek iye nang di hap.
\v 19 Th’ahwandek thaha song, esarak nang ahwan hindang dohoi, dowon isong dang diri ara hohoi.
\v 20 Awang nang hamojo thosong hamaring; amojo nang dang th’ohothing thohoiruk do nang th’arami thoh’ocame tholo song.
\v 21 Amojo nang tho song dowoni isong fodok ara aboithe.
\v 22 Esarak nang do song ahujon nesarak iye do nang; d’owon isong ara aboithe, iring newonderek iye ho nang ara aboithe.
\v 23 Awon nang ditha ho song; iye iwon ditha ho nang; d’owoni isong fodok ara aboithe; d’otek ahap hijan iye ifahu nang, karik hijan imuno iye isong, iring nemunorik iye nang.
\v 24 Monye! Ethuk iye esarahina inyong do nang. Awak nang isong thoisukai d’amaji nawondere nang d’otehuni ahujon hindang, ahujon nara iye esarak do nang, anyo, imuno iye nang kabong hoyeuni ahap.
\v 25 Monye, oyijoni! Awang ahap hotek iye. Atek nang ti iye. Otehi ohothifok hundang hijan iye ifahu nang.
\v 26 Nang esarak isong th’oteha iye. Awang nang hedehi anyahina isong th’oteha iye, dowon amuno nahoi do nang dithosong, nang dang awon dithosong.
\c 18
\cl Ebwayit 18
\p
\v 1 Athuhon no Yesu acama ocamitha hulya, alo h’ohothifok honyong d’oyirik l’owor lelongoi ara Kidron lo. Ajingari dith’amana nanya owon diya na.
\v 2 Otek Yuda, ohoithanyangani lo Yesu amaji nya. Odahaitho Yesu Karik ohothifok honyong diya d’ocame.
\v 3 Yuda ethaitharu elulung n’ohoremok ho Roma karik ohoikiak h’Atempolo hoifahak ohoithamojoni lohitto karik Ofarisi, afwoi dith’amana nya, iyarai h’attitto h’angalafari karik aryee henwahyere.
\v 4 Otek Yesu ainyong nalo iwonan donyong. Inyong lo abongoro adihithem, efiyo ohothing hulya, “Ngai ithifeyo ithai?”
\v 5 “Yesu la Nazaret,” isong hulo etharang. “Nang inyong lya,” yesu ajo, hibu Yuda, ohoithanyangani lonyong lo owoitha dikeremet h’ohothing hulya.
\v 6 Ajaran no Yesu “Nang inyong lya” isong hulo anyahari ihurongoi, ebatharai dihap.
\v 7 Yesu inyorio efiyo isong, “Ngai ithifeyo ithai?” “Yesu la Nazaret,” isong ajo.
\v 8 “Athuk nang ithai anyahina hijan nang inyong lya,” Yesu ajo. “Ara nang ithifeyo ithai, oburahina homok hulya thoifwai.”
\v 9 Ocama Yesu ahani d’ofunere arami hanya athuk inyong acama iwonan ara hadiri: “Monye, th’ohothing honya isarak iye do nang, kabong juk aboithe lolitho.”
\v 10 Simone Petro enyongu kwak odemi lonyong ohodorani esalu thonyong ehyok nenget no Malkos, ohoigyemani lo ohoithamojoni lohitto di Tempolo.
\v 11 Yesu ajo do Simone Petro, “Inyahak odemi di maji honyong. Awang iye iwak amatha oibithi l’ethathacana lathuk nang Lalamonye esarahina?”
\p
\v 12 Thiya ohoremok ho Roma, lahon losong karik ohoikyak h’Ojudei endafatho, athorye Yesu.
\v 13 eyarai Yesu do Annas. Annas lo lohomoni ho Kaifas, ohoithamojoni lohitto lo oyinga le di Tempolo.
\v 14 Kaifas nyana ocama hijan, osiru d’othulo aboithe diiye th’ohothing fodok.
\p
\v 15 Simone Petro karik loboling th’ohothifok, athiforoi Yesu. Otihahunu nya ohothifoni lobo lo Yesu lya h’ohoithamojoni lohitto. Alo inyong lo karik Yesu lwai dithath’ahang n’ohoithamojoni lohitto la Tempolo.
\v 16 Ahibu Simone Petro leru apwak dihuthuk h’oyihiet. Ohothifoni lobo lo Yesu lo anyahi aitho noth’oyihiet thohorik Simone Petro thojingai di hang.
\v 17 Aitho noth’oyihiet ne efiyo Simone Petro, “ ikara iye lobo l’ohothifok h’othulo le?” “A a, ikara nang,” Simone Petro etharang.
\v 18 Ilik ahathero bebe ofaning le. Ethaulohini ohoigyemak karik ohoikyak hothiya ahimang, asujai. Simone Petro alo do song diya, asujai ho song.
\p
\v 19 Ifyo ohoithamojoni lohitto Yesu arami h’ohothifok honyong karik etyenio nanyong.
\v 20 Yesu etharang, “Acamaitho nang arami hundang fodok dindak, dihithemi h’ohothing. Etyenio nang di Sinagogs karik di Tempolo, amasok hadahari ohothing. Awang arami hundang hamongai amonga.
\v 21 Anyo ifiyo iye nang ahani? Ifiye ohothing h’oithamingio nang. Ifiye ainyong anyahi nang isong. Otehi ainyong ojo isong.
\v 22 Acama no Yesu ahani, aboco lobo th’ohoikyak h’ohothing hahong anangio Yesu, ajo, “Ngai ojo dohoi acama ahani d’othulo lahong?”
\v 23 Yesu ajo, “Ara epal nang, inyahi ohothing hothene hulya ainyong ohipale hindang. Ara obisi arami hundang hune, anyo inangio iye nang ija ahani?”
\v 24 Annas esarak Yesu th’eyyarai do Kaifa, ohoithamojoni lohitto la Temoplo.
\p
\v 25 Orimak Simone Petro lohosuja ahimang; homok th’ohothing hosuja ahimang honyong hulya efiyo inyong, “Ikara iye loboling l’ohothifok h’othulo le?” Petro arisa, ajo, “A a, ikara nang.”
\v 26 Lobo th’ohoigyemak h’ohoithamojoni lohitto, l’orwanga h’onde lonya isalu Petro ehyok lo, ajo inyong lo do Petro, “Kabong nang atehu iye honyong di mana?”
\v 27 Petro koti ajo, “Oco, ojori hibu awang nang atek othulo lya.” Kwak ahani ohohorong aboco esir.
\p
\v 28 Nya th’amoithe berien, eyarai Yesu tho hong ho Kaifa dihang ha lahong l’ahap no Roma diya, Pilato. Idari hahong h’Ojudei ajingara dith’ahang do rasa isong alibori dinyere ofaning l’amuno n’ehuma.
\v 29 Pilato alo dindak do song, efiyo isong, “Ainyong namonyong ijo ithai nehandio othulo lya?”
\v 30 Etharang nasong ajo, “Awang ohoi ira iyanu inyong dohoi, ara kabong hoipal.”
\v 31 Pilato ajo do song, “ iyathik ithai inyong, ara ithai icama arami hanyong th’oyano thohothai.” Isong etharang, “Olwoi ohoi ethayeyo othulo l’epal.”
\v 32 Ofuni arami hune iwonan, dofuni ocamitha ho Yesu h’opecen laye nayong iwonan ara hadiri.
\p
\v 33 Pilato anyaha di hang; ethalongo Yesu. “Iye Ohobu l’Ojudei?”Pilato efiyo Yesu.
\v 34 Yesu etharang Pilato, “Thohoi oindu oifiet lya, dia ohothing homok onyahi iye ijan nang ngai?”
\v 35 Pilato etharang Yesu, “Hibu nang ti l’Ojudei? Ohothing hohoi indefu, eyanai iye do nang. Ehandio iye ti ainyong?”
\v 36 Yesu ajo, “Ohobye hindang ikara lothohop. Ara ohobye hindang lothohop, irahi nang ohothifok hundang ikauna th’endafa n’ohobolok h’Ojudei. A a, ohobye hindang ikara lothohop thene!”
\v 37 Pilato efiyo Yesu, “Hibu diri iye Ohobu?” Yesu ethanrang, “Ejo iye nang Ohobu. Aisuni nang; nang aindu di hap th’arami thohune: dicama arami hadiri. Le ithaningio arami hadiri, ithaningio nang.”
\v 38 Pilato efiyo inyong, "Ainyong nadiri?" Diholu he efiyo ofiat lia, alo dinguai acham ho hobolo ho Ojude ikoti. Ajo dosong, "Arumak nang kaang inyong izapalio omanyit lobo.
\v 39 Ti, izai Ojude iwon izai ho esuki diyinga do ofaning la amuno la Alangan, ifiyo izai nang diburahina ozulo aboize lowon dihienit. Dini iwak izai nang diburahina dozai ohobu lo Ojude?"
\v 40 Elolongoi ikoti, "Awang, heburak ozulo lia, ti oburak Barabbas! Zene Barabbas ozulo lowak ekakalunyo.
\c 19
\cl Ebwayit 19
\p
\v 1 Pilato ethafodohyo Yesu.
\v 2 Ohoremok ehuhumyo ehithang n’oihwa orokonyohini dihu honyong; ethayofohini inyong ahilyen anaporong.
\v 3 Afuni donyong, ajori, “Ohobu l’Ojudei mak!” Ehuthohini donyong koko; anangye Yesu.
\p
\v 4 Pilato koti alo dindak, ajo d’elulung n’ohothing ne, “Otihatha, eyanu nang de Yesu dindak dothai; itek ithai hijan awang arami hethayeyere inyong.”
\v 5 Yesu aindu dindak, ehithang noihwa di hu karik ahilyen anaporong dihwan. Pilato ajo dosong, “Otihatha, othulo lo, lya.”
\p
\v 6 Atehuna n’ohoithamojok hohittwa karik ohikyak ha Tempolo Yesu, emamarye, ajori obehohini inyong lo di kruce. Pilato ajo, “Iyathi, ara ithai ibehok inyong di kruce, Awang nang ti arimak arami h’attohiere inyong.”
\v 7 Elulung etharang Pilato, “Iwon ohoi h’oyano hoithayeyere inyong. Ojo Yesu inyong Olonyi L’Ojok.”
\v 8 Ithaninguna no Pilato ocame lya, abang inyong lo bebe.
\v 9 Pilato ajinga dithwa, efiyo Yesu, “Thongai indu iye?” Kabong Yesu itharang inyong kwong.
\v 10 Pilato ajo Yesu, “Awang iye nang itharangio? Awang iye itek hijan acohi nang hama ahohina dia abehohina iye di kruce?”
\v 11 Yesu etharang Pilato, “Akolon nahoi do nang th’Ojok oindu. Othulo l’ethafothok nang dohoi, adyahu obafu lohitto.
\v 12 Ethairuna no Pilato ocamitha ho Yesu hulya, athemio arimahina oyihoi l’ohohinerek inyong Yesu. Elulung n’Ojudei ne ajo do Pilato, “ara ihohi iye Yesu, ikara iye omotte l’ohoindefani lohitto l’ahap ne!”
\p
\v 13 Ethaninguna no Pilato ocame lya koti, eyaru inyong lo Yesu dindak; inyong Pilato awoni dihide okara l’okanyere arami. Ilongoi okara lya ara omorwong (th’ahuthuk thon’Ojudei “Cabbatha”).
\v 14 Orii le awon ara athari, dehithemi h’ofaning l’amuno n’ehuma. Pilato ajo d’elulung n’Ojudei ne, “Ohobu lothai, lya.”
\p
\v 15 Ajaran no Pilato ahani, euluho Ojudei, “Hoidehi inyong; hoidehi; obehok inyong di kruce!” Pilato ajo do song, “ Abehok nang ohobu lothai di kruce? Ohoithamojok hahong etharang, “Awang ohobu lohoi, arahari Cesare.”
\v 16 Pilato esarak d’Ojudei Yesu tho behohini di kruce.
\p
\v 17 Isong eyaru Yesu, afwoi, Yesu hadohoro akruce nanyong d’amaji n’elongoi ara “amaji n’akululungi,” ilongoi th’ahuthuk thon’Ojudei ara “Golgotha.”
\v 18 Dia obehohini Yesu di kruce; abehohini dang ohothing homok arehai di krucehio hosong; Isong hulo alihak Yesu dihiji.
\v 19 Pilato egerok dihu h’akruce no Yesu ne hijan: INRI, najo, “Yesu la Nazaret, Ohobu l’Ojudei.”
\v 20 Ehenuni ohothing holwa ocame lya. Oindek amaji nanya obehohinere Yesu nya dihiji h’abore. Igero nya ocame le th’ahuthuhie aunihoi: N’Ojudei, Latino karik ahuthuk n’Ogrik.
\v 21 Ohoithamojok hohittwa ajo do Pilato, “Hoigerok hijan “Ohobu l’Ojudei.” Ijara, “Ojo inyong, inyong ohobu l’Ojudei.”
\p
\v 22 Pilato etharang, “Aning nathuk nang egerio, athuk nang egerio.”
\p
\v 23 Athuhon n’ohoremok abehohina Yesu di kruce, ebwaye alyenyi hanyong dosong arangwan. Ara abongo anaporong apwak; awang oyyu di bwayo; ikela orifet lonyong.
\v 24 Ohoremok ohoikyak hulo eruhi dihiji hosong, ajori, “Awang h’orice ahilyen anaporong ne. Erwasa omorik. Ara lathenu eyaru ahilyen ara nanyong.” Ofuni arami hune ifuhon, dofuni arami hanya athuk egero iwonan ara hadiri: “Ahorai alyenyi hundang, Arwasai omorik d’ahilyen aboithe hindang.” Arami hune hanya ihandio ohoremok honya iririyo Yesu di kruce.
\p
\v 25 Owethi nya dikeremet ho Yesu lobeho di kruce ahathingi nanyong, eyanyi, Maria nafure ho Kliopas karik Maria madalina.
\v 26 Atehuna nya no Yesu ahathingi karik ohothifoni lomuno inyong bebe lo, owoitha indehai, ajo Yesu d’ahathingi, “Athulo na, indefa lelonyi lya;”
\v 27 ajo d’ohothifoni lonyong, “Iye hibu onde, omije d’enehathingi ne.” Th’orii le, ohothifoni lo Yesu eyaru nahathingi ho Yesu dihang honyong.
\p
\v 28 Diholu h’arami hwa, atehan hijan engohunu arami fodo difuna irijaru iring hathuhi egero dimanini, Yesu ajo, “Ebotho nang ahibothit.”
\v 29 Owon inyana amothing n’obalu lodwa d’amaji nya. Ara ohoremok ohoikyak etuhini ahilyen dith’obalu esarahini di huthuk ho Yesu.
\v 30 Adiloro no Yesu obalu lodwa lya, ajo, “Athuho do nang.” Yesu ethadil ahu nanyong; ara ohoile lonyong adutharu, edyaharu ahwan nanyong.
\p
\v 31 Ofaning le ofaning oithacofe lehuhumiere ohothing ahwandek d’ofaning l’amuno nasong d’ofaning lodwa. Awang owak otehuni ahwandek di kruce ofaning le. Ojudei efiyo Pilato thohorik isong thourie ahejek h’ohothing hobeho di kruce, d’oyethi kwak eyarai adi.
\v 32 Ohoremok ohoiriryak afuni, aurie ahejek h’ohothing arehai hobehohini di kruce ho Yesu hulo.
\v 33 Edwong nasong do Yesu, orimahini athuk Yesu aye, edyaharai Yesu ara lokabong ahejek ouro.
\v 34 Ti lobo th’ohoremok ohoikyak hulya arom Yesu omarai; ahotho karik ahari abuhunu thiya.
\v 35 Othulo lathehu, inyong onyahi arami hune; ocama inyong lo arami hadiri. Otek inyong lo hijan arami hune hadiri; onyahi inyong difunu ithai dang iruhon.
\v 36 Ofuhi arami hune, dowoni ara arami hanya athuk egero, “Awang de juk aboithe ohoithong lonyong louro.”
\v 37 Koti ajo arami hamok hathuk egero, “Omijo de isong donyong lonya ocuk isong lo.”
\p
\v 38 Diholu h’arami hune fodok, Yosefo lo Arimathea, ohothifoni lo Yesu lonya awang ithaliehi ahwan th’abangi thon’Ojudei, efiyo Pilato d’iyaru ahwan no Yesu. Inyong lo diri eyaru ahwan no Yesu.
\v 39 Nikodemo, lonya owararu do Yesu th’aharie lo, aindu dang diya. Iyanu inyong lo nya elethang nafuni iyeliere ahwan no Yesu.
\v 40 Isong eyaru ahwan no Yesu ara nathuk emuho karik eyela th’elethang thone iring owak oisuketha h’Ojudei.
\v 41 D’amaji nanya obehohinere Yesu di kruce na, owon amana diya. Dith’amana nya, owon ahilame angejuk nakabong h’onuhahinere othulo.
\v 42 Eyarai ethaferihini ahwan no Yesu d’ahilame nya, anyo, ofaning le, ohothing fodok dihuhumyo ahwandek d’ofaning lohitto lodwa karik dang oyindek amaji nya diya.
\c 20
\cl Ebwayit 20
\p
\v 1 Ofaning ohoithemoni d’operok cofa, adotho Maria Madaline th’amoithe berien, olo didoryo ahwan no Yesu d’ihilame. Orimak omorwong athuhi eyafulanguna adi tho hilame.
\v 2 Inyong na anyahu, ongeru angeruna do Simone Petro karik d’ohothifoni l’omuno Yesu lo, ajo dosong, “Othuhi eyaru Ohobu tho hilame; awang ohoi itek dingai isarahini inyong.”
\p
\v 3 Simone Petro karik ohothifoni lobo afwoi di hilame.
\v 4 Ongerori isong hulo see; ara ohothifoni lobo lo erwatharu Simone Petro, ecak di hilame.
\v 5 Ohothifoni lo Yesu lecak edwongon di hilame lo elunggureyo olamarai; kabong hojinga. Edwongon nanyon, Petro ecak ajingara di hilame.
\v 6 Atehu alyenyi hanya imuhohinere Yesu huna diya
\v 7 karik ahilyen nanya owon di hu ho Yesu na. Oduhuthohini inyong na amaji nanyong hamaring.
\v 8 Ohothifoni lobo, lonya icak edwongon di hilame lo, ajinga dang di hilame, atehu karik eruk.
\v 9 Lwai d’orii le, kabong h’otehi arami h’athuk egero hajo, “odotho de inyong th’ohoyak.”
\v 10 Ohothifok anyahari di hangs.
\p
\v 11 D’omiru hule, orimak Maria owetha dindak dikeremek h’ahilame; odula ahibu inyong ikor.
\v 12 Thiya Maria atehu anjelohen arehai owoni; iyofoi alyenyi abongiha, lobo tholo hu karik lobo tholo hejek d’amaji nanya ithaferihinere Yesu na.
\v 13 Anjilohen hulya ajo do Maria, “Athulo na, anyo ikor iye?” Inyong ajo do song, “Athuhi eyaru Ohobu hindang; awang nang atek dingai isahini inyong.”
\v 14 Acama no Maria ahani, amijo eker n’ahilame, atehu Yesu owetha. Awang ti otek hijan Yesu le.
\p
\v 15 Yesu ajo donyong, “Athulo na, anyo ikor iye? Ngai ithifeyo iye? Ojo ngona Maria ohoikyani l’amana lo lya, ajo donyong, “Lahong, ara iye iyaru inyong adi thene, inyahi nang dingai isak iye, d’alo nang iyaru inyong adi.”
\p
\v 16 Yesu ajo donyong, “Maria.” Inyong na eloyitho, ajo donyong th’ahuthuk n’Aramaik, “Rabboni” (najo ‘ohoithayeyenani’).
\p
\v 17 Yesu ajo donyong, “Hoithin nang, kabong nang alo d’Omonye. Ilo ijara d’olarok hundang alo nang de da Lalamonye karik le Monye, d’Ojok hindang karik Ojok lohoi.”
\p
\v 18 Alo Maria Madalina, anyahi d’ohothifok ho Yesu, “Atehu nang Ohobu,” inyong ocama arami hune do nang.
\p
\v 19 D’ofaning ohoithemoni h’operok cofa nya thathari, ehenoro n’ohothifok ho Yesu dithwa th’abangi thon’Ojudei, aindu Yesu, awoitha dihithemi hosong, ajo, “Elik n’othaja dothai.”
\v 20 Diholu h’acama nanyong ahani, ethaithak ohothifok ahas karik omarai lonyong. Atehuna nasong Ohobu, amuno ohothifok.
\v 21 Yesu ajo dosong koti, “Elik n’othaja hothai. Iring nefahaithere nang Omonye, efahaitho nang dang ithai.”
\v 22 Athuhon no Yesu ocama ahani, ehuthak ayiritha nanyong dosong, ajo, “Ifothuna Ohoile Lodwa.
\v 23 Lehohi ithai eyatha hanyong, ehohi ithai; la kabong ithai ihohi eyatha hanyong, kabong h’ohohini.”
\p
\v 24 Ofaning loindunere Yesu d’ohothifok lo, awang nya Tomaso, lonya ilongoi ara Didimo lo, th’elulung n’ohothifok.
\v 25 Anyahini ohothifok homok Tomaso hijan, “Etehu ohoi Ohobu.” Ajo dosong, “Ara kabong nang atehu ohoforo di has honyong, nang athin th’ohifala thoho hundang, nang athin omarai lonyong, awang nang eruk.”
\p
\v 26 Diholu h’operok tises, ehyenoro koti ohothifok ho Yesu dithwa. Ofaning le owon Tomaso diya. Yesu aindu dosong hibu oyihiet ihieno, ajo, “Elik n’othaja dothai.”
\v 27 Thiya Yesu ajo do Tomaso, “Othino ahas hundang th’ohifalai tholo hoi; othino omarai hindang th’ahinang thana hoi. Hoida eruhon. Iruho.”
\p
\v 28 Tomaso etharang, ajo dongyong, “Ohobu hindang karik Ojok hindang.”
\p
\v 29 Yesu ajo donyong, “Atehuna nahoi inyong neruk iye. Ohothing hoiruk kabong hotehuni, th’omunoi.”
\p
\v 30 Ehandio Yesu asang olwarai hethaithak adwaran nanyong dihithemi ohothifok honyong, ha kabong igerohini ditha amanini na.
\v 31 Egerohini ocamitha hulya, difunu ithai iruhon hijan Yesu inyong Kristo, ohoithalwahani, Olonyi l’Ojok, difunu ithai iruhon, dirimahinere esu th’ofure tholo nyong.
\c 21
\cl Ebwayit 21
\p
\v 1 Diholu asang hune, ethaithak Yesu ahwan nanyong koti d’ohothifok honyong dipogo h’ahari no Tiberiya. Ithaithak ahwan nayong ahana:
\v 2 Owon nya Simone Petro karik Tomaso, lelongoi ara Didimo, Nathaniel tho Cana di Galiliee, oduri ho Zebedeo karik ohothifok ho Yesu arehai.
\v 3 Simone Petro ajo dosong, “Nang lalo di rereha ohom.” Isong hulo ajo, “Efwo dang.” Afwoi, adohithi aroko. Oharye fodok, kabong hoindefuni juk ohome aboithe.
\p
\v 4 Th’amoithe berien, awetha Yesu di fohor h’ahari. Awang ohothifok otek hijan inyong lya.
\v 5 Yesu ajo dosong, “Otwat hulo, owon aning nanye?” Isong hulo etharang, “Awang.”
\p
\v 6 Yesu ajo dosong, “Omirohina abwoi nahitto d’oyirik le inget l’aroko. Di rimak ithai.” Isong hulo amirok iring anyahini dosong. Atelai ohothifok ho Yesu efihuna n’abwoi nefut ara ohom.
\p
\v 7 Ohothifoni lomuno Yesu lo ajo do Petro, “Hobu le.” Ethairuna no Simone Petro hijan Hobu le, eduhu ahilyen nothohide athorik dihwan, awa dith’ahari.
\v 8 Ohothifok homok hulo afuni th’aroko, ifihunai ohom bee di bwoi, indehai difohor.
\v 9 Alanguna nasong dindak, atehuni ahimang n’ahuk, ahibu ohome omuda, ahibn angiriang nelolonga owon arakang diya.
\p
\v 10 Yesu ajo dosong, “Iyanethe ohom homok tho hendefu ithai hulya.”
\v 11 Simone Petro efihu abwoi dindak, ohom dia bee; arahi 153. Dihide halwari ohom ahanya, kabong abwoi horitha.
\v 12 Yesu ajo dosong, “Ifuna dinyo anyari n’amoithe berien.” Kabong lobo th’ohothifok honyong lefiyo inyong, hijan, “Iye ngai?” Otehi hijan Ohobu lya.
\v 13 Yesu aindu, eduhu anyari th’ohom esarak dosong.
\v 14 Operohothi lya oithaunihoi lethaithahinerek Yesu ahwan nanyong d’ohothifok honyong diholu hebuhuna nanyong th’ohoyak.
\p
\v 15 Athuhon nasong anyari, Yesu ajo do Simone Petro, “Simone, oitho lo Yoane, imuno iye nang tholohide ho hulya?” Petro ajo donyong, “Aa, Hobu, itek iye amuno nang iye.” Yesu ajo donyong, “Ithanye ahando hundang.”
\p
\v 16 Enyorio koti ajaran donyong operohothi oitharehe, “Simone, oitho lo Yoane, imuno iye nang?” Petro ajo donyong, “Aa Hobu, itek iye hijan amuno nang iye.” Yesu ajo, “Iyohothe akero hundang tuhudik.”
\p
\v 17 Ajo koti operohothi oithaunihoi, “Simone, oitho lo Yoane, imuno iye nang?” Ajo donyong, “Hobu, itek iye asang bukulung; itek iye hijan amuno nang iye.” Yesu ajo donyong, “Ithanye akero hundang.
\v 18 Diri, diri ajo nang dothai, hewon ithai nya ara otwat, iyofok ithai alyenyi ara ithai iwawararu iring iwak ithai; ajara ithai imarwo, ifethak ithai ahas hathai, ithayofie ithai, lobo eyaru ithai d’amaji nawang ithai iwak afwarik.”
\p
\v 19 Ocama Yesu arami hune, dithaithahinerek ainyong oyet lo Petro loindu ithahuyo Ojok. Diholu h’ocame lya, Yesu ajo do Petro, “Othifunu nang.”
\p
\v 20 Petro afela adiholu, atehu ohothifoni lomuno Yesu othifunu isong, lonya oyokong ado Yesu, orii hanyari, efiyo lo, “Hobu, ngai de ithanyangak iye?”
\v 21 Petro atehu inyong, ajo do Yesu, “Ainyong de ihandyo onde lya?”
\p
\v 22 Yesu ajo donyong, “Ara wak nang inyong thoisukai lwai nang ainduna, aisong arami hahoi?”
\p
\v 23 Elor ocame lo Yesu lya d’olarok hijan awang de ohothifoni lya oye. Kabong dang Yesu hojyo do Petro aang de ohothifoni lobo lya oye. Ti, Yesu ajo, “Ara ajo nang thoisuka lwai nang ainduna, ainyong nahoi nawang?”
\p
\v 24 Ohothifoni lo Yesu lonyahi asang hune lya. Inyong igerio. Itek ohoi anyahina nanyong ne, nadiri.
\v 25 Owoni asang hamok olwarai hanya ihandyo Yesu. Ara igerie isong abok abok dihap, thono hindang, juk dihap, awang amaji nerahi isarahinere amaninihio hathuk egero.