lks_reg/59-HEB.usfm

\id HEB
\ide UTF-8
\h Abaheburania
\toc1 Abaheburania
\toc2 Abaheburania
\toc3 heb
\mt Abaheburania
\c 1
\cl Abaheburania 1
\p
\v 1 Mutsinyanga tsiakhale Nyasaye yaboola nende abakuuka okhubirira muminwa chiabanabii akhandi akhanji mutsinjira tsinyinji.
\v 2 Halali mubumaririshi bweshise yakhuboolere okhubirira mumwanawe owayahula, okhuba wobulaame bwebindu biosi. Khandi okubirira muyee yalonjeramwo eshialo.
\v 3 Niye okhwakha khwene khwoluyali lwa Nyasaye, kata nende likondo liene liobwenibwe nachiinganga bioosi khulwa likhuwalie liobunyali. Ne olwayali niyekholire eshitiso khulwa tsimbi tsiefu yekhala khumukhono omusaatsa kwobukhulundu obuli ikulu.
\p
\v 4 Niyekholeere omukhongo okhuyomba abamalaika shinga Eliira elia yanyoola olwa liayomba eliabwe.
\v 5 Shichira okhurula khale aliheena malaika yesi yesi owa Nyasaye yaboola ari, “niwe omwana wanje leero okhwibuule?" kata ari ndalamubeera Samwana naye alambeera Omwana wanje?
\p
\v 6 Khandi olwaye yenjisia omwanawe wamberi mushialo yaboola mbu, Abamalaika boosi ba Nyasaye bamwinamirenje.
\p
\v 7 Ne khubamalaika aboola mbu niye oukhola abamalaika babe omuyeka kata abakhalabanibe babe olumemu lwomuliro.
\p
\v 8 Hubutsa khukomwana ari, “eNyasaye eshifumbi shioburuchibwo shibetsenjeho ebisoni nebisoni. Ne indabushi yobwamibwo neindabushi yobwatooto.
\q
\v 9 Waheeranga obulunjishi nokiiya obumayaanu. Niko akachira Nyasaye niye Nyasayewo wakhutsushirira amafura akobusaangafu okhushira abashio.
\p
\v 10 “Okhurula mubuchachiro, Omwami, niwe owakhupa omuse kweshialo. Kata likulu nalio nemilimo chia emikhono chichio.
\q
\v 11 Ebio bilasikha pe habutsa eyiwe witsa okhuhindira. Ebio biosi bilakofula shinga ingubo olwa ikofula.
\q
\v 12 Olabifumba shinga ifuumba nabio bilakalukhasibwa shinga eshiifwalo, Khandi niwe owatsana oubetsangaho kata emiyika chiosi echirakama ta.
\p
\v 13 Ne okhurula khale nakhale aliheena malaika yesi owayaboolera mbu, yikhala khumukhono kwanje omusatsa okhuula olwa emba nikholire abasukubo babe hasii webirenjebio.
\p
\v 14 Abo boosi shibali abaroho abakhalabani, abarumwa okhukhalabana khulwa yabo abalilamirwa obuhonia?
\c 2
\cl Abaheburania 2
\p
\v 1 Niko akachira nikhuyoyire okhumeeta okhuyiririsinjia luno khukeenako aka khwahulira, khuleshe okhurerera.
\v 2 Okhuba likhuwa eliaboolwa okhubirira mubamalaika niliba nilinyoolekha niliri liraliru, buli obuyiiri nende obukhayi bioosi birungwa omurungo okuherana.
\v 3 Ifwe nakhuhonokoshe khurie nikhuba nikhurateeba likhuwa khubuhonia obuli obukhongo burio? Bwaranjirira okhurumbulwa nOmwami mana nibutinyisibwa khwifwe nende abahuliri.
\v 4 Nyasaye yesi yarumbula akobuloli halala ninabo mubilolero ebiamakana nende ebikhole biobunyali ebindi nebindi, khandi mumikabo chia Roho mutakatifu shinga okhuchama khukhwe omwene olwa khwali.
\p
\v 5 Shichira shiyaara eshialo shilia eshili okhwitsa khubamalaika hasi woburuchi bwabamalaika ta.
\v 6 Nebutswa omundu wundi yarumbula habundu wundi ari, omundu nishiina? iwe okhumwitsulirakhwo kata omwana womundu okhumukoonyakhwo?
\q
\v 7 Wamututuyiakhwo abekhwo hasi khubamalaika, wamufwala oluyali neifuma indayi, wamura hekulu khubikhole biamakhonoko.
\q
\v 8 Wara biosi muburuchi hasi abalambisiekho ebirenje, okhuba olwa yara ebindu biosi muburuchibwe shiayatog'ia eshilali muburuchibwe ta.
\v 9 Ne okhumulola ye owatutuyibwa mbu abekhwo hasi khubamalaika eshise eshititi, Naye Yesu nafwalwakho olusimbi lwoluyali khulwa obusaliru bwokhufwa mbu khulwa obukoosia bwa Nyasaye akonyelere okhufwa khulwa buli mundu.
\p
\v 10 Shichira kamukhoyere Nyasaye owa ebindu biosi bibeetsangaho khululwe ne ebitsira muye mbu olwa yenjisinjia abaana abanji muluyali amukhole omusimishi wobuhonia bwabo abe omulamba munjira yobusubiri.
\v 11 Shichira omweneyo owakhulanga nende abo abaahulwa boosi barula khulala ne niko akachira narafimbibwa omurwe okhubalanga mbu abaana babwe tawe.
\v 12 Ari ndakhabarumbulira abaana befwe eliralio, ndakheembenje nikhulaha hakari wabeikanisa.
\p
\v 13 Khandi mbu, ndalamwiisikanga khandi ari, lsie nende abaana aba Nyasaye yambeeresiiye.
\p
\v 14 Kho shinga abaana olwa basanjirana khumatsayi neinyama yomubiri eya Yesu yasanjirana ario khubiatsana mbu mana munjira yokhufwa atibie oyo ouli nende obunyali khulifwa naye ni Setani.
\v 15 Khandi mbu ababoholole abo boosi abalinji mumbohe tsindaalo tsiabo tsiosi khulwa okhuria okhufwa.
\v 16 Shichira Tooto mwene shibali abamalaika abayahabina ta halali yahabina abolwibulo lwa Aburahamu.
\v 17 Niko akachira yali nakhoyere okhufwananibwa nabaana babwe mumakhuwa kosi mbu, abe omukuhani omukhulundu owetsimbabasi, khandi omwiisikwa mu kaNyasaye okhusasania abaandu nende ebionono biabo.
\v 18 Shichira olwa omwene yasalira mubuteemwi anyala okhuhabina abateemungwa.
\c 3
\cl Abaheburania 3
\p
\v 1 Khulwa yako abaana beefu, abatakatifu, abasanjirani khumulango kwo mwikulu yiririsie khumurume khandi omukuhani omukhulundu wakobusubiri aka khwiyamanga niye Yesu.
\v 2 Yali omwisiikwa khu oyo owamuruma shinga Musa naye olwa yali omwisiikwa munzu yosi eya Nyasaye.
\v 3 Okhuba ye yabisibwa mbu, akwanire oluyali olushira olwa Musa shinga omuumbashi weyinzu olwa aba noluyali olushira olweyinzu yene.
\v 4 Shichira buli yinzu yombokhwa nomundu, ne omumbashi wa biosi ni Nyasaye.
\v 5 Ne toto mwene, Musa yali omwisiikwa munzu yosi ya Nyasaye nali omukholi wamwo narumbulanga akobuloli khukeneyako akali nikali okhuboolwa olunyumakhwo.
\v 6 Naye Kristo yali omwisiikwa hekulu khukeinzu ya Nyasaye nali omwana wamwo ne neefu, nikhuba nikhulabetsanga abeikholo inyumu nikhwiyitsialiranga obunaayi bwefu okhuula khubumalirishi obulatendeya ta.
\p
\v 7 Khulwako shinga Roho Omutakatifu olwa aboola, leero nimuba nimuhulira omwoyokwe muratinyia emioyo chienyu ta shinga
\v 8 olwa mwakhola mundaalo tsieinduli eyo kata shinga yinyanga yobuteemwi mushitsimi.
\v 9 Ne nilwo olwa abakuuka benyu bandema, kata olwa bali nibalolanga ebikhole bianje biemiika amakhumi kane.
\p
\v 10 Khulwako ndasinyishira abolwibulo olwo, nisunga mbu, tsindaalo tsiosi bashiamanga mumioyo kata shibafuchirira okhumanya tsinjira tsianje ta.
\p
\v 11 Kho ndetsuba muburima bwanje mbu shibalinjira mubuhulushi bwanje ta.
\p
\v 12 Mubeetsenje meeso, abaana beefu, aleshe okhubamwo owomwoyo omubi okulasubira ta okuchira nahanzukha okhurula khu Nyasaye oubetsangaho mwoyo.
\v 13 Nebutswa mushesaninjie obushia olwa yishilangwa “leero" mbu omundu yesi mwinywe aleshe okhutinyibwa khulwa obukaati bwobwonooni.
\v 14 Shichira nikhuba abasanjirani baKristo bobwisichi okhuula khubumalirishi shinga olwa khwali mukhuchaaka obulatendeya ta okhuba abeshisango shilala nende Kristo.
\v 15 Olwa kaboolwa mbu leero nimuba nimuhulira omwoyokwe mulatinyie emioyo chienyu ta shinga olwa mwakhola mundaalo tsienduli eyo.
\p
\v 16 Emureeba mbu, nibango wina abahulira nibakhola induli, shibali abo boosi abarula muMisiri nibemirirwa nende Musa?
\v 17 Kata nibango wina abayasinyishira emiyika amakhumi Kane? shibali abo aboonona, aba emilambo chiabwe chiakwa mushitsimi.
\v 18 Kata khandi nibango wina abayetsubira mbu shibakhenjire mubuhulushibwe ta, nibarali abo abalasubiranga ta.
\v 19 Kho khulutsi mbu oburamusuubira bwabo bwachira nibalanyala okhwinjirwamwo ta.
\c 4
\cl Abaheburania 4
\p
\v 1 Khulwesho, khuriitsenje mbu haundi olwa obusuubisie bushiriho obwokhwinjira mubuhulushibwe mbu, omundu yesi khwinywe aleshe okhulolekha shinga ouchweyire.
\v 2 Shichira tooto mwene efwe khwakambirwa amakhuwa amalayi shingabo, ne likhuwa liabahulira shiliabakasira eshindu ta, shichira khubahuliri beene shiliatsokana nobusuubiri tawe.
\v 3 Ne fwe abasuubira khwinjiranga mubuhulushi tsana obubolwakhwo burio mbu, niye shiachira nindiitsuba muburima bwanje mbu shibaleenjira mubuhulushi bwanje ta, kata nikali mbu emilimo chiene chihanwa okhukholwa okhurula khumusuule.
\v 4 Okhuba yaboola habundu khukeinyanga yasaba mbu, khandi Nyasaye yahuluukha khunyanga ya saba khumilimo chiosi.
\p
\v 5 Khandi yaho naboola ari, shibalenjira mubuhulushi bwanje ta.
\p
\v 6 Kho olwa kashiri butswa kario mbu abandi benjiremwo khandi mbu, abo abakambirwa amakhuwa amalayi khale bachweya okhwinjiramwo khulwa obukhayi bwabo.
\v 7 Kho khandi yaraho inyanga nabulebe mbu, leero naboola mumunwa kwa Daudi inyuma wetsinyaanga tsinyinji shinga olwa khuboolere anyuma yaho mbu leero nimuba nimuhulira omwoyokwe muratinyia emioyo chienyu ta.
\p
\v 8 Okhuba Yoshua alaba yabaheresia obuhulushi shiyakhababolerekhwo olunyuma akeinyanga yindi ta.
\v 9 Kho Isabato yobuhuluushi yishibatonyera abandu ba Nyasaye.
\v 10 Shichira ouba niyenjiire mubuhulushi bwa Nyasaye, yesi ario aba nahuluushire, khumilimochie, shinga Nyasaye olwa yahuluukha khumilimochie.
\p
\v 11 Khulwako khurekhwo omwoyo okhwinjira mubuhuluushi tsana mbu, omundu yesi yesi aleshe okhukwa khulwa okhulonda eshilolero shiabo shiobukhayi tsana.
\v 12 Okhuba likhuwa lia Nyasaye liri mwoyo nilikholanga niliri limemu okhuyomba olukanga olwamema tsimbeka tsiosi nilisamba okhuula khubukabukhani bwomwoyo nende roho, kata okwobunjiro nobutunduli obulimwo, khandi linyala okhwahukhasia amapaaro komwoyo nende tsiyiemi tsiakwo.
\v 13 Kata shibulaho eshilonje shiosi eshibiswa nebutswa biosi bili eshiechenyi nibibakalwa ebulafu imberi wetsimoni tsia oyo ouli omusinjiriri wamakhuwa kefu.
\p
\v 14 Kho bulano olwa khuli nende omukuhani omukhulundu omukhongo owabirira mwikulu mwosi niye Yesu Omwana wa Nyasaye, khutinye khukobusuubiri ako aka khwiyamanga.
\v 15 Shichira omukuhani omukhulundu olwa khuli ninaye shiali ouranyala okhutsuunwa ninefwe halala mubuteshere bwfu ta, ne nowateemwa shingana ifwe mumakhuwa koosi, halali okhwonoona khwosi tawe.
\v 16 Ne khulwako khuume ikholo okhusitanga ahambi khushifumbi shioburuchi shiobukoosia mbu, khubeerwe tsimbabasi nikhunyoola obukoosia obukhuhabina nikhuli mukhunaaya.
\c 5
\cl Abaheburania 5
\p
\v 1 Okhuba buli Omukuhani omukhulundu owahuulwa mubandu khandi arebwaho khulwa abandu mumakhuwa kaNyasaye mbu, ahanenje ebihanwa nende okhumala emisango khulwa ebionoono.
\v 2 Anyala okhubabeera tsimbabasi abo abakorwa, nabashiamire, shichira ye mwene afumbirungwakhwo obuteshere.
\v 3 Khulwako akhoyeere okhwimaliranga omwene emisango khulwa ebionoono shinga olwa akholeranga abandu.
\v 4 Kata abulaho owibukulira oluyali ta habula olwa Nyasaye amulanga shinga olwa yalanga Haruni.
\v 5 Kho kario kata Kristo shiyebukulira oluyali omwene lwokhukholwa omukuhani omukhulundu ta, habula oyo owamuboolera ari, niwe omwana wanje leero ekhwibuule.
\p
\v 6 Khandi haundi yaboola ari, niwe omukuhani obushia nobushia okhulonda khumera ya Melikisadeki.
\p
\v 7 Mutsinyanga tsiobulamubwe bweshinamubiri, yahaana amasaayo nende okhusaba, niyekhuula nalira amasika khumwenoyo owanyala okhumuhonia okhurula mukhufwa ne yamuhulira shichira okhuria Nyasaye.
\v 8 Ne kata olwa yali omwana yeeka ario akokhuhulira munjira yokhunyakhana.
\v 9 Ne niyakhamala okhukholwa omulamba, yekhola obuchachiro bwobuhonia bweinziayo khubalia boosi abamuhuliranga.
\v 10 Nyasaye namukulikha mbu, omukuhani omukhulundu weimera ya Melikisadeki.
\p
\v 11 Khumwenoyo khuli nende amakhuwa amanji okhuboola akali amatinyu okhurimbulula olwa muli abeshikala marwi.
\v 12 Okhuba olwa bulaano mukhoyere okhuba abeechesii nebutswa khatimba omundu yeyinie okhumwechesia akaranjirira mumakhuwa ka Nyasaye, mwakwire abakwanire okhunywesibwa amabeere nebiliibwa ebitinyu ta.
\v 13 Okhuba buli mundu ushinywesibuungwa amabeere abeetsanga nashiri okhukoonyakhwo khwikhuwa liobulunjishi ta, nomwana omutoro.
\v 14 Ne butswa ebilibwa ebitinyu nibiabandu abalamba abakhulire, balia abakhola eshinani nibanasia obumanyi bwabwe okhwahukhasia amalayi nende amabii.
\c 6
\cl Abaheburania 6
\p
\v 1 Kho khuleshe okhuboola khukeene ako akaranjirira mukaKristo nikhutsirira okhuula mubulamba; nikhulakhupa khandi omuse kwobwikalukhasi okhurula khubikhole ebiafwa, khandi kwobusuubiri khu Nyasaye.
\v 2 Okwamechesio kobubatiisi nokwokhureebwakhwo amakhono, nokwobulamushi bwabafu, nokwobuyaasi bwobumeri ta.
\v 3 Khandi khulakhola khurio, Nyasaye naba nakhwiyamira.
\v 4 Okhuba abeenabo abali nibakhosibwakhwo obulafu nibakonyerera khushihanwa shieshineekulu nibakholwa abasanjirani ba Roho Omutakatifu. Nibakonyerera khwikhuwa lia Nyasaye mbu
\v 5 nelilayi kata nende obunyali obwomubisoni ebiitsa.
\v 6 Mana nibahunzukha, kho shilinyalikha okhubakalukhasia abayiakha okhuula khubwikalukhasi khandi tawe shichira abeene khulwabo, bamubambanga khandi Omwana wa Nyasaye khumusaba, nibamuhambia tsisoni katong'ane.
\v 7 Shichira liloba elianyasibwa neifula eyikwitsangakhwo khasotsero nilimesinjia emiani echibakhoyera abaanabo aba lialimirwa, linyoolanga ikhabi okhurula khu Nyasaye.
\v 8 Nebutswa niliba nilimesinjia tsisaasaari nende ebisisia liba lilobwa niliba ahambi okhuba elieshilaamo shiobubi, eshihesi shialio nokhusambwa.
\p
\v 9 Nebutswa enywe abaheerwa banje kata olwa khuboola khurio khusuubiranga amalayi akayomba yako khunywe kata amakhuwa akali akobuhonia.
\v 10 Shichira Nyasaye shiali omukoyanu ta owakhanyala okhwibirira obukholi bwenyu kata shinga olwa mwalolesia obuheeri khuliiralie mwakhalabanira abatakatifu nimushikhalabananga okhuula bulano.
\v 11 Khandi khwikomba mbu, buli mulala khwinywe alolesinjie obulumirifu bulala bwenebo khubusubisie bwobunaayi bwenyu, okhuula khubumalirishi.
\v 12 Mbu muleshe okhutofula habula mbu mube abalondi beikhola ya balia abasuubisibwa khulwa obusuubiri nobwisumirisi.
\p
\v 13 Okhuba olwa Nyasaye yamusuubisia Aburahamu likhuwa olwa alanyala okhwitsuba khuwundi oumushira ta yetsuba khumwene.
\v 14 yaboola mbu tooto mwene okhuhaana ikhabi ndalakhuheresia ywe ikhabi khandi okhwinjiyia olwibulolwo.
\v 15 Ne Aburahamu khulwa obwisuumirisibwe yanyoola ebiayasuubisibwa.
\v 16 Okhuba abandu betsuubanga khuwundi oubayomba kata mubuli shifunane shiosi eshiababa nibali ninashio eshitsubo nishio eshimalanga shitinyisia likhuwa.
\v 17 Kho Nyasaye olwa yeenya okhumanyia obulaame bwobusuubisiebwe aketsiyemitsie shinga olwa tsiranyala okhukalukhanakhwo ta, yatsitinyisinjia nende eshitsubo.
\v 18 Mbu mubindu bibiri ebilakalukhananga tawe, ebia Nyasaye alanyala okhubeeramwo tawe, efwe abenjiire mubuulushiro bwefu khutinyisibwe muno okhutiira linaayo elo elirebwaho imberi wefu.
\v 19 Linayo lienelo likhubeeranga shinga eshiralisio shiomwoyo. Neshitinyirifu eshilareesibwa tawe, ne shinjiranga nishibirira mungubo shinga eyo.
\v 20 Olwa Yesu yenjirira khulwefu abe omuranjiriri wefu namalire okhwikhola omukuhani wobushia nobushia okhulonda khumero ya Melikizadeki.
\c 7
\cl Abaheburania 7
\p
\v 1 Khu kano Melikisadeki wa Salem, omukuhani wa Nyasaye ouli hekulu muno owa bukaana Aburahamu nachereranga okhurula okhwira abaruchi, nenamulamira ikhabi.
\v 2 Owa Aburahamu yamuheresia eshitonye shielikhumi okhurula khubiosi, olwamberi yakalulwa mbu omuruchi wobulunjishi, ne olunyuma lwa yako Omuruchi wa Salemu, elimanyisia mbu Omuruchi womulembe.
\v 3 Oubula Samwana, nyina kata olwibulo, nalali nende obuchachirobwe tsinyanga kata obumalirishi bwobulamu, nebutswa yakholwa shinga Omwana wa Nyasaye. Natong'a nali omukuhani tsinyanga tsiosi.
\p
\v 4 Henga shinga olwa omundu uno yali omukhongo, owa kata Aburahamu yaheresia eshitonye shielikhumi khu bia yalinanyolere.
\v 5 Ne obwatooto khubeene yabo abali abeyinzu ya Lawi abahebwa iyofisi yobukuhani, bahebwa lilako liokhubukula eshielikhumi okhurula khubandu okhulondokhana nende lilako, elili elia abaana babo, kata mbu burula mushirenje shia Aburahamu.
\v 6 Aboluyia lwabo shilubalirwa khubeene yabo ababukula eshielikhumi okhurula khu Aburahamu, ne namulamira ikhabi omwenoyo owali nende ubulachirisie.
\v 7 Obulali nende okhwikalirwa ta, obutiti bwalamirwa ikhabi nobulayi.
\v 8 Ne hano abandu bafwa banyoola eshielikhumi; nebutswa habwene yaho ni uyo owakarumbulwa mbu ali mumwoyo.
\v 9 Khandi shinga olwa enyala okhuboola, yesi Lawi, oubukulanga eshielikhumi, yahaana eshielikhumi khu Aburahamu.
\v 10 Okhuba yali nashiiri mushirenje shia samwana olwa Melikisadeki yabukaana ninaye.
\p
\v 11 Kakhabeere mbu, okhukholwa omulamba khwali khulwa obukuhani bwa lawi, (okhuba hasi wabo abandu banyoola lilako) kho khwali nende elienya shiina mbu khandi omukuhani abeho olwa Melikisadeki, yalangwa okhulondokhana nende obuloosie bwa Aruni.
\v 12 Okhuba obukuhani nibuba bukalukhana, kho lilako likalukhana lirio.
\v 13 Okhuba khu mwene oyo owa amakhuwa kano kaboolwakhwo mbu nowoluyia lundi, owa omundu yesi shiyakhalabanira khubwali ta.
\v 14 Ne aka habulafu mbu, Omwami wefu yarula Muyuda, oluli oluyia lwa Musa alabolakhwo likhuwa liosi okhulondokhana nende obukuhani.
\v 15 Khandi kali butswa habulafu mbu olunyuma lwobukhalabani bwa Melekisadeki, Omukuhani wundi achinguushire,
\v 16 Owakholwa, obulali okhulondokhana nende lilako liomubiri tawe, ne okhulondokhana nende obunyali bwobulamu obulahwa ta.
\v 17 Okhuba arusia akoburumbusi mbu, 'eywe oli omukuhani obushia nobushia okhulondokhana nende obunyali bwobulamu bulahwaho ta.
\p
\v 18 Okhuba khuli nende obusuubisie, mbu obuloosie bwakhale obwelilako eliaranjirira obuteshere obulali nende inganga mulio ta.
\v 19 Okhuba lilako shilikhola eshindu shiosi eshilamba ta, nebutswa okhurera obunaayi obulayi, mbu okhuburirakhwo khusuutanga ahambi khu Nyasaye.
\p
\v 20 Ne kata shinga olwa khulali nende eshitsubo shiosi ta, yakholwa omukuhani.
\v 21 Okhuba abakuhani yabo bakholwa obulali nende eshitsubo ta, nebutswa uno ali nende eshitsubo khumwenoyo owamuboolera, mbu Omwami yetsuba, kata shialeekalukhasia ta, mbu niwe omukuhani obushia nobushia.
\p
\v 22 Khu kano, Yesu yakholwa obusuubisie bwa amakhuwa amalayi.
\p
\v 23 Ne tooto mwene khwali nende abakuhani abanji, shichira shibanyala okhukhalabana nibatsirira ta, khulwa eshifunane shiokhufwa.
\v 24 Nebutswa omundu uno okhuba atsiriranga tsinyanga tsiosi, ali nende obukuhani bulakalukhananga ta.
\v 25 Okhuba ye ali nende obunyali bwokhubahonia mulibaa likhutsia khuNyasaye okhubirira khuye, okhuba alamenyanga khulwa okhubasayiranga.
\p
\v 26 Mbu omukuhani omukhulundu oufwana ario yetsa khufwe, owuli omutsienukhu, oubula eshikha, owabukhaane nobwonooni, niyemekhwa ikulu okhuyomba likulu liene.
\v 27 Oulahenda bulinyanga shinga abakuhani abakhulundu mbu, bahaane omusaango mberio khulwa tsimbi tsitsie omwene khandi khulwa tsia abandu, okhuba kano yokhola lulala, olwa yahaana omwene.
\v 28 Okhuba lilako likholanga abandu abakuhani abakhulundu, abali nende obuteshere, nebutswa likhuwa lieshitsubo, elialiho okhurula khwilako limukholanga Omwana, owatsienulwa tsinyanga tsiosi.
\c 8
\cl Abaheburania 8
\p
\v 1 Bulano eshifune shichira khuboola kano; khuli nende omukuhani omukhulundu owikhale omukhono omulunji kwe eshifumbi shioluyali eshiomwikulu.
\v 2 Nomurumishi habundu atakatifu, ihekalu yahabwene yOmwami, yomundu ta, eyakasibwa.
\p
\v 3 Shichira buli omukuhani omukhulundu yahulwa okhuhana ebihanwa nende emisango. Khulwesho kakhoyere okhuba nende eshindu shiokhuyiinyia.
\v 4 Ne nikabere mbu Yesu ali khushialo, shiyeetsa okhuba omukuhani ta, shichira khuli nende abahananga ebihanwa okhulondokhana nende amalako.
\v 5 Barumushiranga eshifwanani kata eshinini shiebindu biomwikulu. Kali butswa shinga olwa Musa yachetsiyibwa nende Nyasaye olwa yali nali ahambi okhumbakha ihekalu; "Umbashe okhulondokhana nende omufwano okwa wamanyibwa khushkulu."
\v 6 Nebutswa Kristo yamala okhunyoola obukhalabani obulayi, shinga olwa yali omulimasi omulayi weindakano, ebichomeshe khutsindachirisie tsindai.
\p
\v 7 Nikakhaba mbu indakano yamberi shiayali nende obukoyanu, eyakhabiri shilikhwo nende eshiakhanyoleshemwo ta.
\v 8 Shichira olwa Nyasaye yanyoola amakosa nende abandu, yaboola mbu, "Lola, tsinyaanga tsitsaanga - aboola Omwami - olwa ndiitsa okhukaasia indakano imbia nende yinzu ya Israeli nende inzu ya Yuda.
\q
\v 9 Shiyitsa okhuba shinga indakano eyandakhola nende bakuuka inyanga yandabukula nende omukhono kwabo okhubemirira okhurula mwitookho liaMisiri. Shichira shibayenjeresia indakano khandi shibateebakhwo tawe Omwami aboola.
\q
\v 10 Yino niyo indakano yanditsa okhukhola nende inzu ya Israeli olunyuma lwetsinyanga itsio - Omwami aboola. Ndiitsa okhura amalako kane mumapaaro kabwe, khandi nditsa okhukahandika mumioyo chiabwe. Ndiitsa okhuba Nyasaye wabo nabo betsa okhuba abaandu banje.
\q
\v 11 Shibetsa okhwechesia abebule bomwihanga khandi buli mulala nende omwanawabo, nibaboola, 'mumanye Omwami' shichira balamanya boosi, okhurula khumutiti wabo okhuula khumukali.
\q
\v 12 Shichira nditsa okhuba weshiberesi khubikhole bo biobwonooni, khandi nende etsimbi tsiabo shinditsa okhwitsulira ta".
\p
\v 13 Khulwa okhulanga indakano, "imbia" yatangasia indakano yamberi mbu nikhaya khandi ikhulu yitsa okhukora.
\c 9
\cl Abaheburania 9
\p
\v 1 Bulano kata indakano yamberi yali nende amalako kokhumwinamira Ye nende ihekalu yomushialo.
\v 2 Shichira lihema liakasibwa. Eshikoro shiamberi, aweshichibi shieyitaha, imesa, nende omukate kwokhubaho khukhwe, yalangwa mbu habundu atakatifu.
\v 3 Inyuma weingubo shialiho eshikoro mwihema, halangungwa habundu atakatifu.
\v 4 Yali nende obwali bwitsahabu nende obubane. Ne mukari mwelisanduku lieindakano, khwalimu ibakuuli ya mana neindabushi yaHaruni eyasebukha, nende olubaho lweindakano.
\v 5 Ikulu welisanduku liindakano, abakerubi boluyali nibafwimba litisiro tsana. Nebutswa bulano shikhunyala okhuboola akebindu ebio ta.
\p
\v 6 Olunyuma lwebindu bino ebiamala okhukasibwa, omukuhani buli lwosi yenjiranga mushikoro shierwanyi mwihema okhukhola omulamo.
\v 7 Nebutswa omukuhani omukhulundu niyewinjiranga mushikoro shiakhabiri, khandi nende halali amatsai kayahana khulwa yemwene nende abandu bakhola etsimbi tsiabalachomere tawe.
\v 8 Roho omutakatifu yamanyia oluhono lubirire shinga olwa elihema liamberi liali nelisinjire munjira mwahabundu atakatifu yali nashirinji okhukasibwa.
\v 9 Shino shiali eshilolero shiebise biliho. Halala ebihanwa nende emisango ebihanungwa shibiali nibinyala okhwosia obupaari bwominami.
\v 10 Bahenjerinjia tsa ebiokhulia bionyene nende ebinywerera nende ebindi biemikhoyo, amalako komubiri okhwola ebise bielilachirisio eliiya.
\p
\v 11 Kristo yetsa shinga omukuhani omukhulundu webindu ebilayi ebiitsanga. Yabirira mumakali khandi elihema lilafu elilakasibwa nende emikhono chiomundu ta, nende ndala eilakasibwa mushialo ta.
\v 12 Shiayali nende amatsai ketsimbusi nende ebimosi, halali nende amatsai keke omwene akenjira habundu hatsinukhu lulala mana khulwa lwosi khandi namalire okhunyoola obununuli bwobumeri.
\v 13 Kho nikaba mbu amatsai ketsimbusi nende etsichurushi nende elikoshe lioimoosi nelimiitswa khu abo aboononeeshe, okhuboosia khulwa khulwa obutsinukhu bwemibiri chiabo.
\v 14 nikabe kariena amatsai kaKristo, okhubirira muroho wobumeri yahana yemwene oubula eshikha khuNyasaye, yoosie amapaaro kefwe okhurula mumilimo chiafwa okhumurumushira Nyasaye oumenyanga.
\p
\v 15 Khulwa eshifune shino, niye omuungasi weindakano imbia, Kano kali kario mbu, okhurula elifwa nelikholekha liekholekha okhurera obununuli khubalia abali hasi weindakano okhurula mubula ria amalako, balia abalangwa betsa okhunyoola obusubisie bwobumeri.
\v 16 Shichira awakhuli nende elienya, elifwa liaulia owakasia okhuula litusibwe.
\v 17 Shichira elienya liiyamwa butswa niba mbu khuli nende eliifwa, shichira libula amani nikakhaba ashirinji omulamu.
\v 18 Kho kata shikali tsa mbu indakano yamberi ta eyakasibwa halali amatsai.
\v 19 Khulwa olwa Musa yali niyakhalachirisia mwilako khubaandu boosi, yabukula amtsai kebimoosi nende tsimbusi, nende amatsi, obwooya obwakhanyu, mana namiitsa halala eshikanye shiene nende abaandu boosi.
\v 20 Mana nabooola, "Kano niko amatsai keindakano ya Nyasaye eyeyalachirisia khuinywe".
\v 21 Munjira yeneyo, yamiitsa amatsai khwe hema nende emitungi echiarumikha mubukhalabani.
\v 22 Okhulondokhana nende amalako, ahambi buli shindu shiosibwa nende amatsai. Halali okhusundukha khwamatsai khubulaho obubeeri bwetsimbi ta
\p
\v 23 Khulwesho kakhoya mbu ebifwanani bwebindu bili mwikulu okhuula biosibwe nende emisango chie tsisolo. Halali, ebindu bio mwikulu biene bienya biosibwe nende emisango echili emilayi muno.
\v 24 Shichira Kristo shiyenjira habundu atakatifu akasibwa nende emikhono ta, eshiri eshifwanani shiabwene. Bukhala bwene yenjira mwikulu, okhulolekha bulano imberi waNyasaye khulwa ifwe.
\v 25 Shiyatsiayo mbu kho yehane yemwene akhandi akhaanji ta, shingana omukuhani omukhulundu, owinjiiranga habundu hatsienukhu omwaka khu kundi nende amatsayi koundi.
\v 26 Niba mbu elienelo liakhabere likhuwa, kario khoyakhanyakhane akhandi akhaanji okhurula mubuchachiro bweshialo. Halali bulano aloleshe mubumalirishi bweindukho okhuyiniaho tsimbi nende omusango kukwe omwene.
\v 27 Shinga olwa omundu yahulwa okhufwa lulala, ne olunyuma lwa yako obuyaasi bwitsa,
\v 28 kario khandi, Kristo yahanwa lulala okhuyiiniaho tsimbi tsiabaanji, mana yetsa okhulolekha olwa khabiri, obulakhalabanira tsimbi ta, halali khulwa obuhonia obwabalia abamulindiriranga.
\c 10
\cl Abaheburania 10
\p
\v 1 Khulwa amalako neshiinini shia ebindu ebilayi ebiitsanga, shibili obwatieri obwebindu biene ta. Balia abamwitsira Nyasaye shibanyala okhukholwa abalamba ta nende emisango milala echia abakuhani batsiriranga okhuhana omwika khu kundi ta.
\v 2 Kata kario, emisango chiakhasinjire okhubula okhuhanwa? Shichira abamwinamiraanga bakhoosibwe eshise shilala mana khandi shibakhabere nende amaparo kosi aketsimbi ta.
\v 3 Halali halala nende emisango echo khwakhabeere nende eshitsusio omwika khu kundi.
\v 4 Shichira nobutinyu muno, amatsayi ketsichurusi nende tsimbusi shikanyala okhuyiinyia tsimbi tawe.
\p
\v 5 Olwa Yesu yeetsa mushialo, yaboola mbu, "Emisango nende ebihanwa shimwayenya ta, halali omubiri okwamungasiriye.
\q
\v 6 Nende emisango emisambe nende emisango chietsimbi shimwatsatsaliramwo ta.
\q
\v 7 Mana nembola, lola, hano endiho - shinga olwa kahandikwa khuisie mushikanya - okhukhola elienya lilio, Nyasaye.
\p
\v 8 Olwamberi yaboola," shichiali emisango, nohomba ebihanwa, nohomba emisango chiosi emisambe, nohomba emisango chietsimbi echiamwekomba. Khandi shimwanyoola omwikhoyo mubio ta. Chino nemisanga chiahanwa okhulondokhana nende amalako.
\v 9 Mana naboola, "lola, hano endiho okhukhola akelienya lilio" ayinyiaho eshikhole shiamberi kho akhole eshikhole shiakhabiri.
\v 10 Mulienya lienelo, khwosibwa okhubirira mubihanwa biomubiri kwa Kristo lulala khulwa lwosi.
\p
\v 11 Inyanga olunyuma lweyindi buli omukuhani asinjira nende okhukhalabana,
\v 12 nayiinyia emisango chienecho akhandi nende akhandi - emisango chilanyala okhuyiinyiaho tsimbi ta.
\v 13 Halali olwa Kristo yahaana khubise bioosi omusango kwetsimbi, yeekhala omukhono omulunji okwa Nyasaye.
\v 14 Shichira khumusango mulala yalunjisia inziayo balia obosibwa.
\v 15 Mana roho mutakatifu yesi ayiinyia obukobosheri khwifwe. Olwamberi aboola,
\q
\v 16 "Yino niyo indakano yandiitsa okhukasia ninabo olunyuma olwe tsinyanga itsio, aboola Omwami. Ndiitsa okhura amalako kanje mumioyo chiabo, khandi ndiitsa okhuhandika mumapaaro."
\p
\v 17 Mana ameeta, "tsimbi tsiabo nende obularia amalako shindiitsa okhwitsulira ta."
\p
\v 18 Bulano khuli nende obuberi khukano, shikhulikhwo nende omusango kundi okwetsimbi ta.
\p
\v 19 Khulwesho, banabeefu, khuli nende itsuoni yokhwinjira habundu atakatifu khulwa amatsai ka Yesu.
\v 20 Eyo niyo imbia khandi injira yokhumenya eyakaasiye khwifwe okhubirira mushitambaa, yako ni, okhubirira mumubiri kukwe.
\v 21 Shichira khuli nende omukuhani omukhulundu khuunzu ya Nyasaye,
\v 22 Lekha khuitsiire nende emioyo chiabwene mubusubisio bwo busubiri, emioyo chiefu nichiosibwe emilafu okhurula mubupari obumayanu nende emibiri chiefu nichiosibwe nende amatsi amalafu.
\v 23 Lekha khandi khutiririre linaya eliakhurumbulangakhwo, shichira ulia owalako nomusubirwa.
\v 24 Lekha khupaarekhwo shinga olwa khwitsa okhutsatsasia mulala khuundi okhuheera nende ebikhole ebilayi.
\v 25 Khulalekha okhwakaana halala ta, shingana olwa abaandi bakholanga. Halali, hesanie omwoyo mulala khuundi, nimuhenjeresia inyanga yoMwami eyili ahambi okhwula.
\p
\v 26 Ne nikakhaba mbu khulatsirira okhukhola tsimbi olunyuma lwo khumanya obwatooto, omusango kwetsimbi shikuhindira ta.
\v 27 Halali, khwali nende oburii bwokhulindirira obuyaasi, nende omuliro omukali okwetsa okhumalirana abasuku baNyasaye.
\v 28 Omundu yesi owafukula amalako kaMusa afwa halali tsimbasi mubuloli bwa abandu babiri nohomba bataru.
\v 29 Neshichero shina eshibi eshieshinyasio eshioparaanga omundu akwanire okhunyoola ousenachira hasi omwana waNyasaye, oukholaanga amatsai keindakano shinga akalakhoyere - amatsai kaye yosibwamwo - khandi nanyeka roho wobukosia?
\v 30 Kachira khumanyire ulia owaboola mbu, okhwirunjira eshikwoli ne shianje; "ndiitsa okhurunga." Mana khandi, "Omwami yetsa okhuyaasia abandu bebe."
\v 31 Neshindu shiokhurisia okhukwa mumikhono echia Nyasaye!
\p
\v 32 Nebutswa itsulira tsinyanga etsiabiira, olwa mwali nimwakhekulwa tsimoni, shinga olwa mwefiira eminyakhano emiinji.
\v 33 Ebise biindi mwahanwa habulafu khukhunyekwa nende okhusandibwa, khandi ebise biindi mwasanga nende balia abanyakhana.
\v 34 Shichira mwali nende tsimbabasi khubabohwa, khandi mweyama nende obuyanzi bwokhutiira obuyiinda bwenyu. Mwamanya enywe beene mbu, mwali nende obuyiinda bweinziayo.
\v 35 Kho mulasukuna itswoni yenyu ta, eili nende omurungo omukali.
\v 36 Shichira mukhoyeere obwisimirisi kho mbu nimwakhakhola elienya liaNyasaye, munyoole eshiayalachirisia.
\v 37 " Shichira mubise ebititi, owitsaanga tooto aletsa neshiyetsa okhubukula oluhono tawe.
\q
\v 38 Abobulunjishi baanje balamenya khulwa obusubiri. Naba nakalukha inyuma, omwoyo kwanje shikuchamisibwa ninaye tawe".
\p
\v 39 Halali shikhuli shinga balia abakalukha inyuma mubusasishi tawe, halali khuli mubalia abobusubiri khandi abalinda emioyo chiabo.
\c 11
\cl Abaheburania 11
\p
\v 1 Bulano obusubiri nokhuba nende obusubisie bwe ebindu bwelinaya khandi obusubisie bwebindu bila lolekha ta.
\v 2 Shichira kano abakuuka beeyamwa khulwa obusubiri bwabo.
\v 3 Khulwa obusubiri khumanyirisia mbu eshialo shialongwa nende lilachirisio liaNyasaye, mbu kho eshilolekha shishiakasibwa mushilolekha tawe.
\p
\v 4 Kali khubusuubiri mbu Abeli yayiinyiria Nyasaye omusango omulayi okhushira Kaini, okhubirira muyako yabukulwa okhuba omulunjishi, khandi Nyasaye naboola obulayi khuye khulwa ebihanwa bibie, khandi khulwa obusubiri Abeli ashiboola, kata nikakhaba mbu yafwa.
\p
\v 5 Kali khulwa obusubiri Enoko yabukulwa mwikulu nalalolakhwo lifwa." shiyanyolekhakhwo ta, shichira Nyasaye yamuyiinyiaho," ne nashiri okhumubukula, kaboolwa mbu yali namuchamisiye Nyasaye.
\v 6 Bulano halali obusubiri nobutinyu okhumuchamisia Nyasaye. Shichira kakhoyere mbu omundu yesi owitsa khu Nyasaye okhuula osuubire mbu niye oumenyanga khandi niye ouhanaanga ebihanwa khubalia abamukhabaanga nende eshinani.
\p
\v 7 Ne khulwa obusuubiri mbu Noah, naheresibungwe oburume bwe shiNyasaye okhulondokhana nende ebindu bilalolekha, nende oluyali lwe shiNyasaye yombokha isafina khulwa okhuhonokosia abeyinzu yiye. Ne khulwa okhukhola endio, yakhalachira eshialo khandi naba omuhamie wobulunjishi obulondokhana nende obusuubiri.
\p
\v 8 Ne khulwa obusuubiri mbu Abrahamu, olwayalangwa, yaulira mana natsia habundu wayenyekha mbu anyoole shinga obuhamie bubwe. Yarula natsia obulamanya ewatsitsaanga ta.
\v 9 Kali khulwa obusuubiri mbu, yamenya mwitookho liobusubisie shinga omucheni. Yamenya mwihema lia Isaka nende Yakobo, abahamie balala mwilachirisio elo.
\v 10 Shichira yali nakhabanga elitokho eliemise, elio omumbashi wayo ni Nyasaye.
\v 11 Ne khulwa obusuubiri, kata kakhaba mbu, Sara yali omukumba, halali yanyoola amaani kokhuberekha. Kano kekholekha kata niyali omukofu, shichira yabala ulia owamulaka okhuba omusuubirwa.
\v 12 Khulwesho, okhurula khu mundu mulala - khandi yali ahambi okhufwa - bebulwa abebule abaanji shinga tsing'ining'ini khandi abalanyala okhubalwa shinga omuyeshe mumwalo.
\p
\v 13 Ne khulwa obusuubiri bano boosi bafwa halali okhunyoola obulachirisie. Halali, balola, khandi babashesia okhurula ehale, khandi nibeyama mbu, bali abacheni mushialo.
\v 14 Shichira ababoolanga amakhuwa kano bara habulafu mbu bakhabanga litaala.
\v 15 Ne kakhaba mbu bakhabeere nibapaaranga eshialo shiabarulamwo, bakhabeere nende obwiyangu bwokhukalukha.
\v 16 Halali shinga olwa kali, bekomba eshialo eshilayi, eshili, shiomwikulu. Kario Nyasaye shiyafimbibwa omurwe okhulaangwa Nyasaye wabo, shichira yamala okhubakasiria litookho.
\p
\v 17 Ne khulwa obusuubiri mbu Abrahamu, olwa yateemwa, yahana Isaka. Yali tsa omwana uwe yenyene owayahana, owayali niyanyoola shinga indachirisio.
\v 18 Yali Abrahamu owakali nikaboolwakho," mbu nokhubirira muIsaka mbu olwibulo lulwo lwitsa okhulaangwa."
\v 19 Aburahamu nakanakania nende Nyasaye mbu, Nyasaye yali nende obunyali bwokhumusimulukusia Isaka okhurula mubafuu, khandi okhuboola mubilolero, nokhurulana ninabo mbu yabeyama.
\p
\v 20 Kali butswa khandi khulwa obusuubiri mbu Isaka yamulamira tsikhabi Yakobo nende Esahu.
\p
\v 21 Kali khulwa obusuubiri mbu Yakobo, olwayali nafwitsanga, yalamira buli shiomwana waYusufu tsikhabi. Yakobo niyenama, nayeekha ikulu weindabushi yiye.
\v 22 Kali khulwa obusuubiri mbu Yusufu, olwa obumalirishi bubwe bwali ahambi, yaboola khukhurula khwabaana baIsreali eMisiri khandi nababoolera okhulondokhana nende amakumba keke.
\p
\v 23 Kali khulwa obusuubiri mbu Musa, olwa yebulwa, yabiswa khumiesi chitaru nende abebuli bebe shichira bamulola nali omwana omulayi. Shibariakhwo lilako liomuruchi tawe.
\v 24 Kali khulwa obusubiri mbu Musa, olwa yali nakhulire, yaloba okhulaangwa omwana womukhana wa Pharao.
\v 25 Halali yaula okhunyakhana nende abandu baNyasaye obuletsatsasia nende omwikhoyo kwobwononi khubise ebititi ta.
\v 26 Yalola okhufimbibwa omurwe khulwa Kristo shinga elienganga muno okhushira obuyiinda bweMisiri, shichira yali nahenganga imberi khu ouhananga ebihanwa.
\v 27 Kali khulwa obusuubiri Musa yarula eMisiri. Shiyaria oburuma bwomuruchi ta, yefwira shinga owali naluutsi ulia oulalolekhanga ta.
\v 28 Kali khulwa obusuubiri mbu yaliinda ipasaka khandi okhumiitswa khwamatsayi, kho owokhusasia abebulwa bamberi shiakhoyeere okhutirakhwo abaana bamberi abasiani baIsraeli.
\p
\v 29 Ne khulwa obusuubiri babiririra munyanza yinzakhanyu shinga khwiloba eliumu. Ne olwa abaMisiri bateema okhukhola bario, bamirwa abalamu.
\p
\v 30 Nikhulwa obusuubiri mbu amasisi ka Yeriko kakwa hasi, olwabali nibakabotokhane khutsinyanga saba.
\p
\v 31 Nikhulwa obusubiriri mbu Rahabu omutamba shiyafwa nende balia abalali nende okhuhulira ta, shichira yenjisia abayenjeresi mumulembe.
\p
\v 32 Nishiina eshindi eshienyala okhuboola? shichira ebise biitsa okhungosera nemba niyiinyia obubooli bwosi obwa Gidioni, Barak, Samsoni, Jepthah, Daudi, Samueli, khandi nende abanabii.
\v 33 Kali khulwa obusuubiri mbu bahula oburuchi, nibakhola akobulunjishi, mana nibanyoola obulache. Khandi basinjisia eminwa chie tsitalanyi.
\v 34 Bauleresia amaani komuliro, nibekwenya nende olumemu lwolukanga, mana nibakholwa bamaani olwa bali nibali abateshere, mana nibaba abamaani mwihe, khandi nibaula abasuku abacheni.
\v 35 Abakhasi bakalusiribwa abafu babo okhubirira mubulamushi. Kata kario khwasandibwa, nikhuleyama okhulakhulwa ta, kho mbu banyoole okhulola obulamushi.
\v 36 Abandi bakaana nende okhutseshererwa khandi kata eminyololo nende okhubohwa.
\v 37 Bakhupwa amachina, nibakabulwamwo khabiri, beerwa nende olukanga. Nibatsia nibafwalire amasero kamakondi nende aketsimbusi. Bali abalekhwa, nibafinywa, nibanyasibwa.
\v 38 Eshialo shishiali nishibakhoyere tawe. Bali nibachendachendanga mushiangalaamwe nende mubikulu, khandi mutsimbinga nende mubwina mwiloba.
\p
\v 39 Kata kario abandu bano boosi beyamwa nende Nyasaye khulwa obusuubiri bwabo. Shibanyoola obusibisie ta.
\v 40 Nyasaye yalosia eshindu eshilayi khwifwe, shibiakhakholerwe ebilunji halali fwe ta.
\c 12
\cl Abaheburania 12
\p
\v 1 Khulwesho, shinga olwa khwabotokhanwa nende lileesi likali elia abaloli, lekha khure elubeka obusiro bwosi nende tsimbi tsikhwikaliranga. Lekha khwirushe nende obwifiiri tsimbiro tsirerirwe imberi wefu.
\v 2 Lekha khuhenjeresie khu Yesu, omuchachisi kata oumalirisia obusuubiri. Shichira obusangafu obwarebwa imberi wuwe, yefwira omusalaba, naleka eshifwimba murwe shiakwo, mana niyekhala omukhono omulunji kweshifumbi shiaNyasaye.
\p
\v 3 Kho paarekhwo khuye, owefiira obutinyu yibwo, kho mulachonya mana mufwe omwoyo ta.
\v 4 Mushirinji okhukhaya ta nomba okhupana neimbi ta khushichero shiamatsai;
\v 5 khandi mwibirire amechesio kabechesia shinga abaana;' "Mwana wanje olapaara mubwangu obwechesi bwoMwami, nohomba otofule olw oba niwechesibwa ta,
\q
\v 6 Shichira Omwami yechesia ulia owayaheera, khandi ahana eshinyasio buli khumwana wanyoola"
\p
\v 7 Wifwire eminyakhano shinga okhweka. Nyasaye akhalabana ninenyu shinga abaana. Shichira nimwana shina ouliho owa samwana alechesia ta?
\v 8 Halali nimuba nimubula amechesio, akabandu boosi basangangamwo, kario shimuli habwene khandi abaana ta.
\v 9 Okhumeta khuyako, khuli nende bapapa abakhwechesinjia efwe khandi khubaheresinjia oluyali. Kakhoya kariena efwe okhubahulira bapapa beshiroho khandi abalamu!
\v 10 Bapapa beefu bakhwechesia khubise ebititi shinga olwa balola obulayi. Halali Naye yakhwechesia efwe khulwa inganga yefu efwe, kho mbu khusange mubutakatifu bubwe.
\v 11 Kho bulaho okhwechesibwa shikhubetsaanga khubise bindi okhulayi ta, halali khuhana eshibeera. Nebutswa olunyuma khwibula ebiamo biomulembe ebia obulunjishi khubalia abechesibwe ninabwo.
\p
\v 12 Kho tinyisie emikhono chienyu echitecheranga hasi khandi nende amasikamo amateshere.
\v 13 Kasia injira ikololoshe khulwa ebirenje bienyu, mbu eshili eshilema shilekota ta halali shihone.
\v 14 Khaaba omulembe nende buli shiomundu, shichira halali kwo nabube obutinyu okhumulola Omwami.
\v 15 Mube meeso kho alabaho oulali nende obukosia bwaNyasaye khandi emisi chiobululu chilakhula kho chirere eminyakhano, kho mbu abaanji balanyoola okhumaliranwa ta.
\v 16 khandi khulabakhwo nende mulala akari wenyu oukholanga akobwilasi, shingana Esau, owakusia indache yiye khulwa eshiokhulia.
\v 17 Shichira mumanyire kata kario, olwayekomba okhuhamia tsikhabi, shichira shiyanyoola obwiyangu bwokhwikanira ta, kata nikakhaba mbu yakhaba nende okhulira.
\p
\v 18 Shichira shimwitsire khushikulu eshinyala okhutiirwakhwo ta, eshikulu shio muliro kuyiitsanga, eshirima, elifumbi nende imbumbuyeka.
\v 19 Shimwetsire khubukhupi obwa iturumbeta ta, nohomba khumwoyo kuboolanga amakhuwa kwa abahuliri bakwo basaba mbu likhuwa liowundi balaboolerwa ta.
\v 20 Shichira shibakhefirire eshialachirisibwa tawe; "Ne kata nikakhaba isolo itiirakhwo khushikulu, okhuula ikhupwe amachina.
\v 21 Kho shiokhurisia nahabundu waMusa yaboola, "Erire mana khandi endecheranga".
\v 22 Kata kario, witsire khushikulu shiaZeituni khandi mwitookho lia Nyasaye oumenyanga, Yerusalemu yomwikulu, khandi ebikhumi ebietsielefu etsiomukanda kwa abamalaika mubusangafu.
\v 23 Witsire mumukhung'aano okwa abebule baamberi abehandichisia mwikulu. omukhalachi wa boosi, khandi khu tsiroho etsia abalunjishi abakholwa abalamba.
\v 24 Khandi mwitsire khuYesu, omuungasi oweindakano imbia, nende khumatsayi kokhumiitswa akaboolanga amalayi okhuyomba amatsayi kaAbili.
\p
\v 25 Lola, mulaloba ulia ouboolanga ta. Ne nikakhaba shibahonokokha olwa baloba ulia owabakondoshera khushialo, shikanyalikha okuhonokokha okhurulana nende ulia oubakondoshera okhurula mwikulu ta.
\v 26 Khushise shilala, oluyoka lulwe lwaresia eshialo. Halali bulano asubisiye khandi aboola ari," Ebise biindi khandi shindiitsa okhuresia eshibala shionyene ta, halali nende likulu"
\v 27 Amakhuwa kano, "ebise biindi khandi", khubiindu biitsa okhuyinyibwaho khulwa okhuresibwa, ebili, mubio kata ebialongwa, mbu kho ebindu bilanyala okhuresibwa ta bitong'e.
\v 28 Khulwesho, okhunyoola oburuchi bularesibwa ta, lekha khube nende orio khandi mumero yokhumwinamira Nyasaye mubukhongo nende muluyali.
\v 29 Shichira Nyasaye wefu nomuliro kumalirananga.
\c 13
\cl Abaheburania 13
\p
\v 1 Lekha obuheeri bwa baheerwa butsiririre.
\v 2 Mulalekha okhwinjisia abacheni ta. Shichira okhubirira mukano, abandi beenjisia halali okhumanya mbu benjisinjia abamalaika.
\v 3 Mwitsulire ababohe shinga nimwabohwa halala ninabo. Mwitsulire abasandibwa shinga muli mumubiri mulala ninabo.
\p
\v 4 Lekha liiria liheresibwe oluyali nende shiabuli mulala, kandi obukono bweliiria butonge obutsienukhu, shichira Nyasaye yetsa okhuyaasia abandu abelaasi nende abaheyi.
\v 5 Lekha emima chienyu chibe eyale nende obuheeri bwamapesa. Mwiyame mbu ebiamuli ninabio bimuherere, "Shindiitsa okhubalekha nohomba okhubebirira ta."
\p
\v 6 Lekha khwiyame mbu khuyerere kho khunyale okhuboola mbu, "Omwami nomukhoonyi wanje; shindiitsa okhuria ta. Nishiina eshiomundu yakhola?"
\p
\v 7 Henjeresie abemirisi beenyu, ababoola likhuwa liaNyasaye khwinywe, khandi nende ebikhole biabo. Mulondenje obusubiri bwabo.
\v 8 Yesu Kristo niulia ekoloba, luno, nende yinziayo.
\v 9 Mulayirwa heyi nende amechesio kandi amacheni ta. Shichira nobulayi mbu omwoyo kutinyisibwe nende obukoosia, halali khubiokhulia ebilakhonyanga abachenda ninabio.
\p
\v 10 Khuli nende obwali bwa balia abakhalabananga mwihema ne shibali nende obulakhuule bwokhuliakhwo ta.
\v 11 Shichira amatsayi ketsisolo keerwa khulwa tsimbi tsirerwa khu mukuhani omukhongo habundu hatsienukhu, ne emibiri chiabo nichisaambwa ebulafu.
\v 12 Kho Yesu yanyakhana erwanyi womuliango kwelitokho, kho anyale okhutsienula abandu okhubirira mumatsai keke omwene.
\p
\v 13 Lekha bulano khutsie khuye, erwanyi weikambi, nikhuchiingire eshifwimbwa murwe eshiayefiira.
\v 14 Shichira shikhuli nende litookho elia inziayo hano ta, halali, khuyenjereranga eyili okhwitsa.
\p
\v 15 Okhubirira muyee, lekha buli lwosi khuyinyie emisango chioluyali khuNyasaye, oluyali oluli ebiamo bieminwa chimanyirisie eliiralie.
\p
\v 16 Lekha khulebirira okhukhola amalayi nende okhukhalabana, shichira kali nende emisango mbu Nyasaye achamisibwa.
\p
\v 17 Mubaulire khandi mwitutuye imberi wabemirisi beenyu, shichira bahenjeresinjia emioyo chienyu shinga abetsa okhuhana amakhuwa kenyu. Be abahuliri kho abemirisi beenyu bakhole kano nende obuyaanzi, khandi halali obululu, yako ketsa okhuba amakhaya khwinywe.
\p
\v 18 Mukhusayire, shichira khumanyire mbu khuli nende obupaari obulayi khandi khwikomba okhumenya obulayi mumakhuwa koosi.
\v 19 Ebaheresia omwoyo kata okhukhola kano, mbu kho ebakalushire muhambi.
\p
\v 20 Lekha Nyasaye womulembe, owarula mubafuu omwayi omukali wamakondi, Omwami wefu Yesu kristo, khumatsayi keindakano yeinziayo,
\v 21 abaheeresie buli eshindu eshilayi shiokhukhola elienya lilie, okhukhola mwifwe akamuchamisia ye okhubirira Yesu kristo, owa oluyali lukhoyere yinziayo. Amina.
\p
\v 22 Bulano ebaheresia omwoyo, banabefu, okhwifiira nende likhuwa liokhuhana omwoyo eliandabahaandichira mubwinjipiti.
\p
\v 23 Mumanye mbu, omwana wefwe Timotseo akholerwe omulakhule, owanditsa okhulola naba niyetsa mulwangu
\p
\v 24 Bashesie abemirisi beenyu boosi, nende abandu boosi abatakatifu. Abarula Italia babashesia.
\p
\v 25 Lekha obukoosia bube ninenyu mwesi.