lks_reg/48-2CO.usfm

\id 2CO
\ide UTF-8
\h 2 Bakorinzo
\toc1 2 Bakorinzo
\toc2 2 Bakorinzo
\toc3 2co
\mt 2 Bakorinzo
\c 1
\cl 2 Abakorinzo 1
\p
\v 1 Paulo, omurume wa Kristo khulwa okhwenya khwa Nyasaye nende Timotheo omusiani wefwe khu likanisa lia Nyasaye eliIi Korinzo, nende abaherwa bosi abali Akhaya.
\v 2 Obukosia bube khwinywe nende omulembe okurula wa Nyasaye Papa nende khu Yesu Kristo Omwami wefwe.
\p
\v 3 Alamirwe ikhabi ouli Nyasaye Papa Samwana Omwami wefwe Yesu Kristo, Papa wetsimbabasi khandi Nyasaye wobuhotseresi bwosi.
\v 4 Oukhuhotseresinjia fwe mumunyakhano chiefwe chiosi mbu nefu khunyalirwe okhubahotseresia balia abali neminyakhano shinga olwa fwesi khuhotseresibwa nende Nyasaye.
\v 5 Shinga olwa okhusanda khwa Kristo khubetsanga mufwe nendio obuhotseresi bwefu buli muKristo.
\v 6 Mbu kata nikhuba nikhusandibwa obuhotseresi nende obuhonia bwefu oburulananga nende okhwifira khwokhusandibwa khwa khusandanga, nomba nikhuba nikhuhotseresibwa; ni khulwa obuhotseresi nende obuhonia bwenyu.
\v 7 Kho obunayi bwefu munywe buli mbu shinga olwa musanganga mubusandibwi, kho nendio mulaba khandi mubusangafu.
\p
\v 8 Kho shikhwakhekomba bana befu mubule okhumanyakhwo shinga olwa khwanyakhana nikhuli muAsia, mbu khwasandibwa okhuyomba eshichero kata nikhuyombererwa amani mbu kata khuchonya nende obulamu.
\v 9 Halali khwabalirwa okhufwa abeene mbu shikhuleesubira tawe halali muNyasaye oulamusinjia kata abafu.
\v 10 Owakhuhonokosia okhurula mulumbe, niye owakhusuubiranga mbu yesi anyale okhuhonokosia.
\v 11 Mbu olwa muba nimukhukhonya mukhusaya, mbu khulwa eshihanwa eshiakhwanyola mubandu abanji, mbu abanji bakhupe orio khulwefwe.
\p
\v 12 Kho okutsatsala khwefu ni khuno, obwitsoomi bwemioyo chiefu, mbu mukhwanguya nende mubwitsulu bwa Nyasaye, oburalu mumachesi komubiri ta, halali ni mubukoosia bwa Nyasaye mbu khunyalire okhuba nende obuboli bwefu mushialo.
\v 13 Okhuba shikhubahandichira elindi liosi ta habula kalia akamwasooma nohomba okhumanyirisia, ne esuubira mbu mulakamanyira elala mukhumalirikha.
\v 14 Mbu shinga olwa mukhumanyire mubuinjikhanu, mbu efwe nefwe okhusangaala khwenyu nendio mwesi muli murio khufwe khuunyanga yokhwitsa khwa Yesu.
\p
\v 15 Mbu mutswoni yino, ndapaara mbu nditse ewenyu mberio mbu kachire mube nende inganga olwa khabbiri.
\v 16 Nebabirira okhula muMakedonia, okhubetsera mbu mana nenyu murerwe imberi wanje olwa enzia ebuYahudi.
\v 17 Ne olwandali nemalire okhupaara endio, ndali oushukhanashukhana noho? mbu kata akene yako aka enjomakhwo okhukhola ekakhola eshinamubiri noho? mbu omwene emboola mbu Ee nomba tawe.
\v 18 Halali khulwa okhubeera nowatieri, likhuwa liefukhunywe shiliali mbu Ee nende tawe, ta.
\v 19 Okhuba Omwana wa Nyasaye Yesu Kristo owakambwa munywe ninefu, kata okhubirira khusie nende Silvanos nende Timotheo, shishiali ee tawe, habula muye liali ee.
\v 20 Okhuba amalachirisio ka Nyasaye ni Ee khandi muye ni Amina mbu khubukhongo bwa Nyasaye khufwe.
\v 21 Kho bulano omwenoyo oukhuralisiria efwe nende enywe muKristo khandi oukhutsushirirekhwo amafura ni Nyasaye.
\v 22 Omwene oyo owakhurakhwo eshibalikhwa, ne nakhuheresia obulumirifu bwa roho mumioyo chiefu.
\p
\v 23 Kario emulanga Nyasaye, mbu khulwa okhumuhonokosia enywe nikhwo okhwachira nindiitsa Korinzo.
\v 24 Shikali mbu khubarukanga mubusuubiri bwenyu tawe, nebutswa khuli abakhonyereri mubusangafu bwenyu, okhuba mubusuubiri, khusinjira.
\c 2
\cl 2 Abakorinzo 2
\p
\v 1 Nebutswa ndakhola obukhalachi omwene, mbu shindalabetsera khandi mubusiro tawe.
\v 2 Okhuba mbu nemba nebasinyisia nywe, kho ne bangowina abakhola okhusangala? shimuli tsa nywe abesinyisia?
\v 3 Ne ndahandika kano mbu olwa nendiitse, ndalaberesibwa nende balia abakhoyere okhusangasia tawe, nendi neitswoni munywe mwesi mbu obusangafu bwanje nobusangafu bwenyu mwesi.
\v 4 Okhurulana nende okhunyakhana nende okhuhenda okhunji khwo omwoyo, ndabahandichira nende okhulira okhunji; shikali mbu muberere tawe ne mbu mumanye obuheri obunji obwa endi ninabwo khulwa nywe.
\p
\v 5 Ne omundu yesi naba neshiberesi, shiyamberesia sie tawe nebutswa mubuinjikhano mbu kho embule okhubakhalachira eshiina enywe mwesi.
\v 6 Ne akamukhoyere omundu shingana uyo, ne eshinyasio shio eshia abanji banyoola.
\v 7 Kho bulano mubuchesi mukhoyere okhumubeera, ne mumuhotseresie, mbu haundi mbu oufwana ninaye anyale okhumirwa nende eshibeera eshinji.
\p
\v 8 Khulwesho emusaya mbu muhenjeresie obuheri bwenyu khuye.
\v 9 Okhuula oburambi buno khandi ebahandichira, mbu enyale okhumanyirisia obwatieri bwenyu nimuba nimuli abahuliri mubuli likhuwa.
\v 10 Nimuba nimubeera yesi yesi, siesi ndalababeera, okhuba nemba nendeshere omundu likhuwa liosi, kalia akemuleshere, emuleshera khwenywe imberi wa Kristo.
\v 11 Mbu Setani aleshe okhunyoola obwiyangu khwifwe; okhuba shikhukorirwe tsiemi tsitsie shinga olwa tsili tawe.
\p
\v 12 Khandi kario, olwa ndatsia Teroa khulwa injili ya Kristo, khandi omuliango kwOmwami khunzikushira.
\v 13 Shindali nende obuhulushi mumwoyo kwanje ta shichira shindamunyoola omwana wefwe Tito tawe.
\v 14 Obukhongo bumukalushire Nyasaye, mbu muKristo Yesu akhwimiriranga mukhwikhoya khwobuhuli, nalolesia mwifwe eshiuya shiobumanyibwe buli habundu hosi.
\v 15 Okhuba efwe khuNyasaye khuli eshinosi eshilayi khu balia abahonibwa nende abakora.
\v 16 Khubandi khuli abahonia bokhufwa mukhufwa khandi khubandi abahonia bobulamu khubulamu. Ne ni wina ounyala kano kosi?
\v 17 Okhuba shikhuli abanji shinga balia abakoyasinjia likhuwa lia Nyasaye tawe? Nebutswa, mubwatieri mbu shinga abaNyasaye khuboolanga muKristo.
\c 3
\cl 2 Abakorinzo 3
\p
\v 1 Khukhoyere khandi okhwiyitsiala abeene? nomba shingana abandi khweyere khunyole tsibarua tsiobupaachi khwinywe, kata etsirula khwinywe.
\v 2 Neywe ibarua yefwe eyahandikwa mumioyo chiefwe eyamanyikha ne niyisomwe nende bosi.
\v 3 Ne kamanyishe ebulafu mbu muli ibarwa ya Kristo eyakasibwa ninefu eyilahandikwa nobwino ta habula nende Roho wa Nyasaye oubeetsangaho mumwoyo khurubao rwa machina ta habula khurubaho rwemioyo chieinyama.
\p
\v 4 Ne buno nibwo obusuubiri bwa khuli ninabwo okhuburira muKristo Yesu khu Nyasaye wefwe.
\v 5 Shikali mbu khunyala okhubala eshindu shiosi khulwefu ta halali obunyali bwefwe burula khu Nyasaye.
\v 6 Khandi niye oukhunyalile okhuba abakhalabani beindakano imbia, eyirali ibarua yahandikwa ta halali eya Roho, okhuba tsibarua tsiiranga ne roho ahana obulamu.
\p
\v 7 Ne bulano obukhalabani bwobufu obwahandikwa khumachina bwali bwoluyali kho abana ba isiraeli babule okhuhenga mumoni mwa Musa khulwa oluyali olwalimwo olwali niluweetsangaho.
\v 8 Kho obukhalabani bwa Roho shibulaba noluyali okhushira?
\v 9 Okhuba obukhalabani bwokhuyasia nilububa noluyali, kho kario obukhalabani bwobulunjishi buba noluyali.
\v 10 Okhuba kata obwenobo obwakholwa obwoluyali shibwali obwoluyali ta khulwa oluyali lwenolo lwabushira.
\v 11 Mbu kakhaba bulia obuweetsangaho bwali nende oluyali obwenobo obulawaho ta bulaba nende oluyali olukhongo muno.
\p
\v 12 Kho olwa khulolanga khuli nende obunaayi kho khuboola ebulafu kosi.
\v 13 Nikhulaba shingana Musa owefuunikha olububi mumonimwe mbu abaana baIsiraeli baleshe okhuhenga khubumalirishi bwolwenolo olwali niluhwaho ta.
\v 14 Halali amaparo kabwe kabofusibwa mbu kata okhuula luno olububi lushiriho kata olwa lihandiko lieindakano yakhale liba nilisoomwa, olububi luno lurusibwaho nende muKristo.
\v 15 Mbu kata olwa leero akaMusa kasoomwa olububu nilushifunikhe emioyo chiabwe.
\v 16 e butswa olwa kalakalukha khuNyasaye, olububi shilularusibwaho no?
\v 17 Kho bulano Omwami niye Roho; ne wa Roho wOmwami ali khuli nende obulakhuule.
\v 18 Ne fwe fwesi olwa khufunulwa mumoni nikhukalusinjia lihunjesi lioluyali lwa Nyasaye shinga eshilolero khukalukhasibungwa okhufwana khurio, okhurula khuyali okhuula khulundi, ne akarulanga khuMwami niye Riho.
\c 4
\cl 2 Abakorinzo 4
\p
\v 1 Khulwesho khuli nende obukhalabani shinga olwa khwanyoola tsimbabasi shikhuwererera tawe.
\v 2 Ne khwamala okhusira amakhuwa aketsisoni nilachenda mubuchesichesi nikhulashiamia likhuwa lia Nyasaye ta, ne munjira yokhufunula obwatoto, khwilolesi abene imberi womwoyo kwa buli mundu mumoni tsia Nyasaye.
\v 3 Ne nikakhaba mbu injili yebisa, yebisa khubalia abakoranga.
\v 4 Omunyasaye weshialo shino abofusiye emioyo chia balia ababula obusuubiri mbu obulafu bweinjili yoluyali lwa Kristo ouli likondo lia Nyasaye buleshe okhubaashira.
\v 5 Okhuba shikhukambanga abeene ta habula Kristo omwene nende fwe abali abasumba benywe khulwa Kristo Yesu.
\v 6 Okhuba Nyasaye walachirisia mbu obulafu bwashe okhurula mushirima, omwene yashire mumioyo chiefwe okhuheresia amachesi kobukhongo bwa Nyasaye mumoni mwa Kristo Yesu.
\p
\v 7 Mbu khuli nende libishiro lino mubibakuli bielitoyi mbu obukhongo bwobunyali bumanyikhe shinga olwa buli bwa Nyasaye halali khufwe ta.
\v 8 Khunyasibwa mutsimbeka tsiosi, ne shikhuhachirisibwa ta; khubeyabeyanga ne halali shikhufwitsanga omwoyo ta.
\v 9 Khunyasibuungwa, ne shikhulekhuungwa ta, khwirwa emioyo ne halali shikhumalwa ta.
\v 10 Bulinyanga khuchinganga mumibiri chiefu okhufwa khwa Yesu mbu obulamu bwa Yesu bumanyishirenje mumibiri chiefu.
\v 11 Shichira efwe abali abalamu khukhobungwa obushia nobushia khukhufwa khulwa Yesu mbu obulamu bwe bumanyishire mumibiri chiefu echieimero yobulafu.
\v 12 Kario khandi okhufwa khukholeranga mwifwe emilimo ne obulamu mwinywe.
\p
\v 13 Ne efwe nikhuli nende Roho mwene wobusuubiri, okhulondokhana shinga olwa kahandikwa; mbu ndasuubira ne nemboola; fwesi khusuubira nikhuboola.
\v 14 Nikhumanyire mbu ulia owamulamusia Kristo mukhufwa aikhulamusia fwesi halala nende Yesu nakhusinjisia halala ninenywe.
\v 15 Okhuba amakhuwa koosi kali khulweenywe mbu obukoosia butitiye khulwa obunji bwa abandu buchire okhuupa orio khutitiye mana Nyasaye ahebwe oluyali.
\p
\v 16 Niko akachira nikhulakhaywa ta, ne kata imero yefwe yerwanyi niyiba nibola imera yefwe yomukari ikalusibungwa imbia buli nynga khu yindi.
\v 17 Okhuba okhunyasibwa khwefu okhwangu okhuli khwe eshise eshititi khumeetanga okhukhukholera oluyali lweinziayo olusiro mino.
\v 18 Efwe nikhulahenganga khubindu ebilolekha ta habula khubilia ebilalolekha; okhuba bulia ebilolekha nebieshise butswa ne ebindu ebilalolekha ta nebieinziayo.
\c 5
\cl 2 Abakorinzo 5
\p
\v 1 Okhuba khumanyire mbu inzu yefu yelitiri yomushialo shino niyisasikha, khuli nende inyumbashe ya Nyasaye, eyilayombakhwa nende amakhono kabandu ta, eyinziayo mwikulu.
\v 2 Okhuba muyene yino khubinda muno nikhwikomba okhufwala halala nende inzu yefu eyirula mwikulu.
\v 3 Mbu nikhuba nikhufwala khurio shikhulanyolekha nikhuli eshiechenyi ta.
\p
\v 4 Okhuba efwe khuli mwihema lino khubinda nikhusotoherwa, shikali mbu kho khubule okhufwa nebutswa mbu khufwalwe mbu obutibanga khumirwe nende obulamu.
\v 5 Kho kario oyo owahandika khufwe omwene amakhuwa malala kene kano ni Nyasaye.
\p
\v 6 Khulwesho khuli nende itswoni buli khase nikhumanyire mbu olwa khuba nikhuli ingo mumubiri, kho khuba nikhubulaho imberi wa Nyasaye.
\v 7 Okhuba khuchendanga nobusuubiri halali okhulola ta.
\v 8 Kho khuli neitswoni, emboola khandi efuchirira okhushira okhubulaho mumubiri nende okhubaho halala nende Omwami.
\v 9 Okhuba khukhola emilimo mbu mana kachire khubeho nohomba khubule mbu mana khwiyamwe ninaye.
\v 10 Okhuba mbu fwesi khukhoye okhulolekhana imberi weshifumbi shiobuyaasi shia Kristo mbu buli shiamulala anyale okhumanyisibwa kalia akayakhola nali mumubiri, kabe amalayi nohomba amabii.
\p
\v 11 Nikhumanyirisie oburima bwa Nyasaye, khuhomberesia abandu, ne efwe khumumanyishira Nyasaye khandi esuubira mbu khumanyishira emioyo chienywe chiosi.
\v 12 Okhuba shikhwiboola abene khandi ta, nebutswa khubaheresia obwiyangu okhuba muluyali khulwa efwe, mbu mana mube nende eliamunyala okhubakalusia balia abechingula muyako akalolekha erwanyi halali mumwoyo ta.
\v 13 Okhuba mbu kata nikhuba olubeka lwefu abene, nikhulwa Nyasaye; mbu kata nikhuba namachesi kahabwene, nikhulwenyu.
\v 14 Okhuba obuheeri bwa Kristo bukhutinyisinjiia, shichira khukhalaka eshiina mbu nikakhaba mulala yafwa khulwa boosi, kho kario bosi bafwa.
\v 15 Khandi khulwa mbu yafiira boosi, mbu balia abamenyanga balamenya khulwabo abeene ta, nebutswa khulwa Ye owabafiira, ne nalamukha khandi.
\p
\v 16 Kario okhurula lwa lero shikhumumanya omundu mumero yeshinamubiri ta kata nikali mbu khwamumanya Kristo mumero yomubiri, endio khandi bulaano shikhumumanya khurio ta.
\v 17 Khulwesho omundu yesi naba muKristo, neshilonje eshiyia, amakhulu kawere loole, amakhuwa koosi namayia.
\v 18 Ne ebindu biosi birulana nende Nyasaye, owakhuliimasia fwe khuye omwene munjira ya Kristo ne nakhuheresia obukhalabani bwobulimaani.
\v 19 Mbu Nyasaye yali muKristo olwa yali nalimasinjia eshialo khuye mwene, nalababalira obumayanu bwabo ta, mana yakhuheresia likhuwa tsana liobulimaani.
\v 20 Ne bulano efwe khuli abarume ba Kristo shinga olwa Nyasaye yabareba enywe khulwefwe khubasaya muKristo, mbu mulimaasibwe nende Nyasaye.
\v 21 Okhuba yamukhola imbi khulwefwe, oulamanyire imbi, mbu nefwe khukholwe abalunjishi ba Nyasaye muye.
\c 6
\cl 2 Abakorinzo 6
\p
\v 1 Kho nefu bulano shingana abakholanga halala ninaye, khubasaaya mbu mulabukulira obukoosia bwa Nyasaye eshikhaya ta.
\v 2 Okhuba aboolanga mbu khushise shiokhukoosia ndakhuhulira, khandi khunyanga yobuhia ndakhuhonokosia lole bulaano buno neshise shiobukoosia khandi lole bulano buno neinyanga yobuhonia.
\p
\v 3 Nikhulahana eshisichirasio khwikhuwa ta, mbu mana obukhalabani bwefu buleshe okhukanakanibwa.
\v 4 Halali mumakhuwa kosi nikhwilolesia ebulafu shinga olwa khuli abakhalabani ba Nyasaye, mukhwifira okhunji, mumatinyu, mukhulobwa kata mukhufinyikha.
\v 5 Mukhupwa, mumbohe, mukhunyekwa, mubukholi bwe emilimo, mukhulindirira nende mukhuhonga inzala;
\v 6 Mubulafu, mubumanyi mubwifwiri, mubuholo, muRoho, muRoho Omutsienukhu, mubuheeri oburaliru.
\v 7 Mwikhuwa liobwatoo, mumaani ka Nyasaye, mushikhumba shiobulunjishi, khumukhono omusatsa nohomba omukhasi,
\v 8 Muluyali noho kata mukhubula oluyali, mumakhuwa akaboolwa obulayi nohomba kata akaboolwa obubi, shinga ababoola obubeyi ne khane nobwatooto.
\v 9 Shinga abalamanyikha ta, khane khwamanyikha, shinga abafwitsanga ne khane khuli abalamu, shinga abakhupungwa nikhuleerwa ta.
\v 10 Shinga abali neshibera nikhuli nobusangafu, shinga abatakha ne nikhukhola abanji abayinda, shinga abali eshikhaya, ne nikhuli ne ebindu bioosi.
\p
\v 11 Enywe Abakorinzo, omunwa kwefu kwikushe khunywe, omwoyo kwefu kuyangushire.
\v 12 Shimutirikhane mwifwe ta halali mutirikhane mumioyo chienywe abene.
\v 13 Ne bulaano emuboolera shingana abaana banje mbu muyanguulwe.
\p
\v 14 Shimulaboyerwa mwikokolo elala nende abalasuubira ta; shichira nobusanjirani shiina obuli hakari wobulunjishi nende obulali obulunjishi? nohomba nobuliimani shiina obuliho hakari wobulafu nende eshirima?
\v 15 Ne nobulala shiina obwa Kristo ali ninabwo nende Beliali? nohomba nomukabo kulena okuliho khumusuubiri nende khumwonooni?
\v 16 Khandi kata ihekalu ya Nyasaye yihulirisania yiriena nende ebifwanani ebiinamirungwa? okhuba efwe khuli ihekalu ya Nyasaye oubeetsangaho, okhuba Nyasaye aboola mbu ndiitsa okhumenya mubo, ninjendera mubo, ne ndalaba Nyasaye wabo nabo balaba abandu banje.
\p
\v 17 Khulwesho rule mubo, mwahukhasibwe ninabo, Omwami aboola, mulatiirakhwo khushindu eshichafu ta; nasi ndalabenjisia.
\v 18 Nasi ndalaba Papa wenyu, nenyu mulaba abaana baje, abasiani khubakhaana, aboola Omwami wamahe
\c 7
\cl 2 Abakorinzo 7
\p
\v 1 Nikhuli nende tsindachirisie tsino abaherwa, khukhoyere okhwiyosia abeene okhurula mushifwabi shiosi shiomuburi nende eshia Roho, nikhukholwa abalamba mubutsienukhu buokhumuria Nyasaye.
\p
\v 2 Mukhwinjisia fwe, shikhwamukoserakhwo omundu yesi yesi ta, shikhwanuulakhwo omundu yesi eshindu ta, shikhwakatia omundu yesi ta.
\v 3 Shemboola kano khulwa okhubakhalachira eshiina ta, okhuba ndaboola olwa imberi mbu muli mumioyo chiefu khukhufwa nohomba okhuba mumwoyo.
\v 4 Emboola ninenyu nende itswoni okhongo, okhwiyitsiala khwanje khunywe nokhukhongo, nditsuusibwe nende okhuleemibwa omwoyo, mbu enjamisibungwa muno muminyakhano chiefu.
\p
\v 5 Okhuba olwa khwali nikhwitsire muMakedonia, emibiri chiefu shichialikhwo nende obuhulushi ta, nebutswa khwasandibwa tsimbeka tsiosi mbu elwanyi khwakhupananga ne mukari khwali nende oburii.
\v 6 Ne kata kario Nyasaye ouhotseresinjia balia abekunjire mumioyo, yakhuheresia omwoyo khulwa okhwitsa khwa Tito.
\v 7 Ne shikhuli butswa khulwa okhwitsa khukhwe khwonyene ta, nebutswa khulwa obutinyirisi bwa mwamutinyirisia. Yakhuboolera akelikomba lienyu, okhwikhuula khwenyu, nobulumirifu bwenyu khulwanje mbu, ndasaangala okhushira.
\p
\v 8 Mbu kata ndababeresia mubarua, shindikanira tawe, kata kali mbu ndekanira shichira emanyire mbu ibarua ndala yiyo yabakhola okhuberera, ne khwali khulwa eshise butswa.
\v 9 Ne bulaano esangaala ne shikali mbu shichira muberere tawe, halali khulwa eshibeerea shienywe shiachira nimwikalukhasia, mwabererera muNyasaye mbu muleshe okhubiyilwa nelikhuwa liosi khulwefwe.
\v 10 Okhuba okhuberera khurulana nende Nyasaye bureranga obwikalukhasi bwobuhonia, nibularera obwisichirasi ta nebutswa okhuberera khweshialo khureranga okhufwa.
\v 11 Khalole bulano likhuwa lino mbu enywe okhuberesibwa khwenyu muNyasaye shinga olwa limurerera obutinyirifu, lole shinga olwa limurerera obwiteetsi, nende obusinyisi, noburii, namahoofu, nobulumirifu, toto kata nende eshikwoli! mukosi mwelolesia shinga olwa muli abeerereshe mwikhuwa elo.
\v 12 Aha! kata kali ndahandichira nywe, shindakhola khululwe mbu yali nakholere libii liosi ta, nohomba khululwe mbu yakhola likhuwa liosi libii tawe, mbu obuhenjeresi bwefu khulwa enywe, mbu tsimbeka tsia Nyasaye tsilolekhe khunywe.
\v 13 Khulwa kano kachira nikhutinyisibwa. Khandi khubutinyisibwi bwefu khusangalire okhushira muno khulwa obusangafu bwa Tito, shichira mwesi muhulusiye muroho ye.
\v 14 Okhuba nemba nindahana eshindu shiosi shiosi khuye khulwenyu, shefimbwa omurue ta, ne mbu shinga olwa khwaboola amakhuwa kosi khunywe mubwatooto, kho kario okhwiyitsiala khwefu, okhwandakhola imberi wa Tito, mbu khunyoolekhana nikhuli khwobwatoto.
\v 15 Kata obuheeri bwe bwomukari bumushiranira enywe, olwa yeetsulira obuhuliri bwenyu mwesi, shinga khulwa okhuria nokhutechera mwamwinjisia.
\v 16 Kho esangala muno mbu endi nende itswoni mumakhuwa kosi.
\c 8
\cl 2 Abakorinzo 8
\p
\v 1 Kho abaheerwa khubamanyia obukosia bwa Nyasaye obwahanwa khu makanisa keMakedonia.
\v 2 Mbu okhulondokhana nende okhuteemwa khwabo nende obusandibwi bwabali ninabwo nende obunji bwobumanani bwabo, bwashirana nikachira nibahaana mubunji.
\v 3 Okhulondokhana nende obunyali bwabo, ehaana obukobosheri okhushira obunyali bwabo, bali nibeehulilanga okhwihaana abeene.
\v 4 Nibakhusaya mubwitutuyi obuunji, mbu khufuchirire eshihanwa shiabo nende khandi mbu babe nobusanjirani mukhukhalabanira abatsienukhu.
\v 5 Ne bakhola okhuyomba shingana olwa khwapaara, shichira berusia abeene khuMwami mberio mana khandi khufwe khulwa elienya lia Nyasaye.
\v 6 Mbu shinga olwa khwekoomba Tito muno, shinga olwa yali niyachaaka, mbu mana amalire munywe obukoosia bwene yibo khandi.
\v 7 Khulwesho mbu shinga olwa mutsiriranga mumakhuwa kosi, mubusuubiri nende muburumbusi, mumachesi nende mubuheeri bwenyu khufwe, teeme khandi mulole mbu mutsirira murio mubukoosia buno.
\p
\v 8 Shemboola shinga oulachirisia ta, habula khulwa obulumirifu bwabandi enyoola eshilongoole shiobuheeri bwenyu bwosi.
\v 9 Okhuba mumanyire obukoosia bwOmwami wefwe Yesu Kristo, mbu kata kali yali omuyinda.
\v 10 Ne bulaano ehana obwibaali bwanje, shichira niko aka mukhoyere enywe abaranjirira okhuchaaka, ne shikhuli khulwa okhukhola khwonyene ta, halali nende okhurakhwo omwoyo.
\v 11 Nebutswa bulaano malirisirie elala mbu shinga olwa mwali nimwirecheeshe okhurakhwo emioyo, bulaano mumalirisirie elala obunyali bwefu shinga olwa buli.
\v 12 Mbu nikhuba nende omwoyo kulia okwiyamire, kafuchirirwa okhulondokhana nende eshiomundu ali ninashio, tawe eshia abula.
\v 13 Ne shemboola endinanwa mbu abandi bahulusibwe nenyu nimustoherwa ta.
\v 14 Nebutswa mubuherani mbu bulaano mubise bino, obwitsulu bwenyu bube khubutambi bwabo bulaano buno, mbu obwitsulu bwabo bulaba khubutambi bwenyu olunyumakhwo khube nende obuheraani.
\v 15 Mbu shinga olwa kahandikwa, mbu ulia owakhung'asia ebinji, shiyali neshindu ta, mbu ne omwenoyo owakhung'asia bititi shiyalemerwakhwo eshindu ta.
\p
\v 16 Nebutswa oluyali lumukalushire Nyasaye owenjisia mumwoyo kwa Tito obutinyirifu bulala bwene yibo khulwenyu.
\v 17 Mbu tooto yafuchirira obuchetsii bwefu, ne omwene olwa yali omulumirifu, yarula omwene niyetsa ewa mwali.
\v 18 Ne khwamurumire halala ninaye omusiani wefu owa obwitsoomi bubwe buli munjiili mumakanisa kefu kosi.
\v 19 Ne khuyako konyene ta habula mbu khandi yachakulwa okhuchenda ninefu mubukoosia buno, obukhalabanirungwa ninefu khulwa oluyali lulia olwa Omwami nende oburumbusi bwobwirecheshi bwamapaaro kenyu.
\p
\v 20 Khulwa okhwikalira kano, mbu omundu yesi abule okhukhulauma mubwitsulu buno obukhalabaniirwe ninefu.
\v 21 Alibuhana khulwa ebindu bioluyali, shikhuli butswa olubeka lwOmwami ta, nebutswa khandi olubeka lwa abandu.
\v 22 Mana khwabarumasia halala nende omusiani wefu owakhwakhateeba mubIkha ebinji, nikhunyoola akhoyere mumakhuwa amanji, ne bulaano mubulumirifu obunji, khulwa itswoni Ikhongo yendi ninayo munywe.
\v 23 Mbu kata omundu nareberesia khu Tito, noweshisango shilala ninasi khandi nomukholi washinje khulwenywe, kata abaana befwe nibaberera, bo nabarume bamakanisa, nende khandi oluyali lwa Nyasaye.
\v 24 Kho kario, mwilolesie khubo, nende khumakanisa, obuheeri bwenywe, nende obwiyitsiali bwefu khulwenyu.
\c 9
\cl 2 Abakorinzo 9
\p
\v 1 Likhuwa liokhukhalabanira abatsienukhu, endi neshifune eshikhongo shichira nemuhandichira.
\v 2 Shichira emanyire shinga mweerechekha kata ndiyitsialanga khulwenywe imberi wabaMakedonia, mbu abaRayia bamala okhwirechekha omwika omulamba, ne obulumirifu bweenywe bubuusiye obunji bwabwe.
\v 3 Nebutswa eruma abaana beefwe okhwiyitsiala khwefwe khulwenywe khuleshe okhukwisibwa khwabutswa mwikhuwa lino, khandi shinga olwa ndaboola mube nimwirecheshe.
\v 4 Mbu nemba nindiitsa nende abandi abaMakedonia nimunyoolekha nimulerecheshe ta, (ne shemboola mbu inywe) khuleshe okhwifimbia emirwe mutswoni yokhwichinjimisia.
\v 5 Khulwesho ndalola mbu nobulayi okhusaaya abaana befwe mbu bamuranjirire nywe nibeekholerera okhukasia ebiobuhani bienywe ebia mwalaka khale mbu bibe nibiarechekhwa, shinga olwa bili ebiobuhaani tooto, nibilaba ebiobwikombi ta.
\p
\v 6 Ne emboola mbu oumiitsa nolukhono, alafuna nolukhono, ulia oumiitsa mubunji alafuna mubunji.
\v 7 Buli mundu ahaane okhulondokhana shingana olwa tsiemi tsiomwoyo tsili, alakhola khulwa okhuhachirisibwa ta. Okhuba Nyasaye achamanga omundu uhaana nobusangafu.
\v 8 Ne Nyasaye anyala okhumushirasiria obukoosia, mbu nenyu olwa mubeetsanga nomwitsu bwosi mubindu biosi tsinyanga tsiosi mushiraanire buli omulimo omulayi kwosi.
\v 9 Shinga olwa kahandikwa, mbu yasalasia ebindu abulafu, yabihaabiire khubatakha, obulunjishibwe nabwo shibuwetsangho ta.
\p
\v 10 Ulia ourusirinjia omumiitsi imwo nende omukaate kwokhuliibwa, alamuyinirinjia namwinjikhasiria imwo yeenywe yokhumiitsa, nametakhwo ebiamo biobulunjishi bienywe.
\v 11 Nimuyindihasibwa mubulishindu okhuula khubuhani bwomukhono omusiro, nobwenobo obwakhumukholeranga obuchira okhubirira mufwe Nyasaye nakhupirwa mbu orio.
\p
\v 12 Okhuba oburume bwobukhalabani buno shibwitsusinjia eshichero shiobunayi bwabatsienukhu butswa ta, ne bumetekhaanga khu Nyasaye khulwa okhuupa orio khwa banji.
\v 13 Okhuba khulwa yako akalolesibwa mubukhalabani buno, bamwitsoomia Nyasaye shichira bulolesinjia obuhuliri bwenywe khukeene yako aka murumbulanga, akeinjiili ya Kristo; khandi khulwa obuhaani bwenywe nimusanjirana nibabo, khandi nabandu bosi.
\v 14 Khandi khulwa amasayo kabo nende amahoofu khunywe khulwa obunji bwobukoosia bwa Nyasaye obuli munywe.
\v 15 Orio muno khu Nyasaye khulwa eshihaanwashie eshilaboolekha ta.
\c 10
\cl 2 Abakorinzo 10
\p
\v 1 Bulano esie Paulo omwene emusaaya obuhoho nende eshisa shia Kristo Yesu, emuongoleranga nindi halala ninenywe ne nindi ehale nindiuma ikholo khwinywe.
\v 2 Halali emusaaya mbu olwa emba nendiho ninenywe endeshe okhumuumira ikholo, ne endi ninayo khulwa obwisiichi obumberesia itswoni okhufukula abakhupaarangakhwo mbu khuchenda mumero yomubiri.
\v 3 Kata kakhaba khuchendanga mumubiri, shikhuupana mumero yomubiri ta.
\v 4 Okhuba ebibanulwa bieefwe shibili ebieshinamubiri ta ne nebiobunyali imberi wa Nyasaye khulwa okhulikulula tsingoba.
\v 5 Khandi khulikululanga amayinje nende buli shindu eshili hekulu eshichinguukha shibeka nende obumanyi bwa Nyasaye, nikhutiira amapaaro kosi mbu kamuhulirenje Kristo.
\v 6 Ne nikhwirecheshe okhumala obukhayi bwosi, olwa obuhuliri bwenywe bulaba nibwikholere obulamba.
\p
\v 7 Ne muhenga butswa eshindu nende okhulolekha khwerwanyi? Omundu yesi naba niyesuubire mbu nowaKristo, ayiririsiekhwo khandi mbu olwa aba nali owaKristo fwesi khuli abaKristo.
\v 8 Okhuba ekhoyere okhwiyitsialakhwo khumakhuwa kobunyali obwa khwaheebwa, obwa Omwami yahaana khulwa okhuumbakha, nikhulali okhulikulula ta, shindalafimbwa omurwe tawe.
\v 9 Ne shindenyere kalolekhe mbu ndenya okhubariisia nende tsibarua tsianje ta.
\v 10 Okhuba tsibarua tsitstie nitsiamani ne naliho omwene mumubirikwe shialikhwo namaani ta, kata okhuboolakhwe shikhuyanzisia ta.
\v 11 Ouboola ario yeetsulire likhuwa lino mbu shinga olwa khuboola kamutsibarua efwe abeene nikhulaliho nolwa khandi khuli mubikhole abeene olwa khuliho.
\p
\v 12 Shichira shikutsalikha okhwibasa kata okhwicherasia abeene nende abandi khubo abeepaka abeene ta, nabo abeene becherasia abeene khubeene babula obuchesi.
\v 13 Nebutswa efwe shikhuletsiala okhubira eshichero ta, halali okhulondokhana nende eshichero shia Nyasaye khuheresiye, eshichero shinyala okhuula kata khwinywe.
\v 14 Okhuba shikhwiiranga ikulu shinga abalanyala okhuula ewa muli a, shichira nefwe abaranjirira okhuula ewa muli munjiili ya Kristo.
\p
\v 15 Shikhwitsiala okhuyomba eshichero shiefwe ta, eshifune mbu eminyakhano chiabandu bandi, nebutswa khwikoombanga mbu obusuubiri bwenywe olwa bukhulanga, efwe khulakaliyira mwinywe, olwakho lwefwe shinga olwa luli khukhushirana.
\v 16 OKhwirwatsa injili mutsimbeka tsili imberi fwe, halali okhwiyitsiala mushirenje shioundi khubindu bikholerwe khulwefwe.
\v 17 Ne yesi owiyitsiala yeitsialira muMwami. Okhuba ulia owipaaka
\p
\v 18 Okhuba ulia owipaaka omwene shieyamwa ta, habula uyo owomwami.
\c 11
\cl 2 Abakorinzo 11
\p
\v 1 Shiakhuha muNyasaye nimwakhanyala okhunzifwira hatiti mubusiru bwanje; ne mukhoyere okhunzifwira.
\v 2 Okhuba endi nende imbalikha khunywe ne ni imbalikha ya Nyasaye; okhuba ndamukhwesia omusaatsa mulala, mbu enyale okhubalolesia shinga na omusishira khu Kristo.
\v 3 Halali eriitsaanga, mbu okhuburira munjira tsiosi shinga olwa inzokha yamukatia Hawa mubukorakora bwayo, haundi amapaaro keenywe nako kanyala okhwonoonibwa murule khubwerereshe bwa Kristo.
\v 4 Okhuba uyo owitsa naba nalabakambira Kristo wafwe Khulakambanga ta, nohomba nimuba nimunyoola Roho undi owakhulamuheresia ta, nohomba injili eyamulafuchirira olwamberi ta, mumwinjisie obulayi.
\v 5 Okhuba enduutsi mbu sheneema khubarube abo abashira abakhulundu ta.
\v 6 Kata olwa emba nendali omusitsa mukhuboola tawe; ne amachesi shikangora ta, mbu mukosi khukhabakaliire bosi khulwenywe.
\p
\v 7 Esie ndakosaolwa ndetitiyia mbu nywe muchingulwe okhuba ebakambire injili ya Kristo eshikhaya.
\v 8 Ndali shinga omunuuli khutsikanisa tsindi olwa ndabukula omushaara mbu emukhalabanire nywe.
\v 9 Khandi olwa ndali ninenywe, neeumirwa, snindastohera omundu yesi ta, okmhuba kalia akandataamba, abaherwa okhurula eMakedonia bamberesia, ne mumakhuwa koosi ndelinda obulayi endeshe okhumustohera, khandi nadleliindanga endio.
\v 10 Shinga olwa obwatieri bwa Kristo buli musie, omundu yesi shiyanzikalira okhwiyitsiala mumatookho ka Akia.
\v 11 Ne mbushiina? shichira shindabaheera ta, Nyasaye amanyire.
\p
\v 12 Nebutswa kalia akekholanga ndalatsirira okhukhola mbu embakhalache obwiyangu mbu mukeeneako akabechinguliranga, banyoleshe nibali singana fwe.
\v 13 Okhuba yabo nabarume bobubeyi, abakholi abababi abekholanga okhuba abarume ba Kristo.
\v 14 Ne okhubulula khubulao shichira kata shetani mwene akalukhasibwa okhuba malaika wobulafu.
\v 15 Khulwesho likhuwa shiliho ta kakhaba mbu obukhalabani bubwe bwosi bukalukhasibwa okhuba bwobulunjishi, mbu obumalilishi bwabo buliba okhulondokhana nende obukholi bwabwe.
\p
\v 16 Emboola khandi, mbu omundu yesi shialambukula omuyingwa, nikakhaba kario, kata nindinjisibwa shingana omuyingwa, ndiitsa okhwiyitsialakhwo hatiti.
\v 17 Akemboola kano, shekaboola khulwa Omwami ta, halali mubusirusiru mukhwiyitsiala oburii.
\v 18 Shingana abanji beyitsiala mububi, iesi ndiitsa okhwiyitsiala.
\v 19 Shichira mwifwiranga abasiru mukhuchama khwenywe olwa abeene muli abachesi.
\v 20 Okhuba musanda kata olwa omundu aba nabakhola abasumba, kata khumulia bulia, kata okhumura mumbohe, kata okhwichichimisia, kata nibamufutsa amare mumoni.
\v 21 Emboolanga khukhwileka shingaolwa khubula amaani, Kata kakhaba mbu khubere noburii, mwikhuwa liosi elia oundi alolesiriamwo itswoni, siesi endi nitswoni.
\v 22 NabaHeburania? Siesi khandi, NabaIsiraeli? Siesi endio, Nabolwibulo lwa Aburahamu? Siesi endi endio.
\v 23 Nabakhalabani ba Kristo? (Emboola shingana omusiru) mbu ebayombere, muminyakhano echishirire, mutsicheela etsishirire, mumakhupache amanji, mukhufwa khandi akhanji.
\v 24 Okhurula khubaYahudi ndakhupwa ebiboko amakhumi kataru na shienda rusiakho shilala.
\v 25 Khataru khosi ndakhupwa emisherati, nendaswakhwo amachina lulala, kataru eliaro lieeyinikha munyanza nendimwo; ndali mumatsi kolusiba eshiro shiosi nende eshitere.
\v 26 Munjendo akhanji, mumatinyu kemialo, mumatinyi kabanuuli, mumatinyi akarula khuboluyia lwanje, mumatinyu akarula khubAmahanga, mumatinyu akomwitookho, mumatinyu akomushitsiimi, mumatinyu komunyanza, mumatinyu akomubaana befwe abobukatii.
\v 27 Mukhuchoonya nende muminyakhano nende amatinyu, mukhuba meso khandi akhanji, mukhulumwa neinzala, mukhulibwa nobuloho, mubushindu nende eshiherechene.
\v 28 Halala nende ako kosi akelwanyi, kabeetsangaho akeeneko akasitoheranga khasotsero, mbu okhuhendera tsikanisa tsiosi.
\v 29 Omutofu alihena, nasi shiendi omutofu tawe, owisichirasie ni wina? omwoyo kwanje nikurahia ta.
\p
\v 30 Nikakhaba mbu ekhoyere okhwitsiala, ndakheitsialila ako akali halubekha lwokhubula amaani khwanje.
\v 31 Nyasaye Samwana Omwami wefwe Yesu Kristo, owitsoomibwa ebisoni nebisoni amanyire mbu shembeya ta.
\p
\v 32 Ne MuDamasiko Omukafuna owareebwakhwo nende Omuruchi Areta yaliinda litookho lia Damasiko mbu yandiire.
\v 33 Nasi ndeshiribwa mwitirisha khwisisi mushimwero, nehonokokha endio mumikhonochie.
\c 12
\cl 2 Abakorinzo 12
\p
\v 1 Okhuula ndiyitsiale kata kakhaba mbu shikhoyere ta, ne enzula khumabisulo nende obufwimbuli bwOmwami.
\v 2 Ndamanya omundu mulala muKristo bulano chitsia emiyika ekhumi nachine, owabukulwa nairwa mwikulu liakhataru, naba niyali mumubiri nohomba nalali mumubiri shiemanyire ta Nyasaye niye Oumanyire.
\v 3 Ne emanyire omundu uyo; naba niyali mumubiri nohomba nalali mumubiri tawe, shiemanya ta halali Nyasaye niye oumanyire.
\v 4 Ne shinga olwa yabukulwa natsia mwikulu, ne ebweneyo yahulira amakhuwa kalaboolekha ta, akali omusiro khumundu okhurumbula.
\v 5 Ndaleyitsialira khukomundu uyo, khukanje omwene shinyala okhwiyitsiala ta, halali mukokhubula amaani khwanje.
\v 6 Okhuba kata nindakheekomba okhwiyitsiala, shindakhakhola obuyingwa ta, okhuba ndakhuboolera akatieri, nebutswa ndikaya, omundu yesi aleshe okhumbaarirakhwo akandi akashira yako akololanga kata okhuhulira khwisie omwene.
\v 7 Mbu khandi endeshe okhwiyitsiala khulwa obunji bwobufimbuli obo, obuyomba kosi, khandi mbu endeshe okhwichinjimisia muno, kata niko akachira neyebwa eshibambo mumubiri kwanje, omurume wa Setani okhungoyasia endeshe okhwichinjimisia muno.
\v 8 Khu shienesho ndamusaba Omwami okhuula khataru mbu shirulekhwo.
\v 9 Ne yamboolera, obukoosia bwanje bukhuherere, okhuba obunyali bwanje bushiranira elala ahamani kabula ne niko akachira ndileyitsialira okhubula amani khwanje khwosi nokhuchama, mbu obunyali bwa Kristo bumenye musie.
\v 10 Niko akachiranga nisaangalira okhubula amaani, namanyeko, namaraba, nokhusandibwa nende obutinyu khulwa Kristo. Okhuba olwa emba nembula amaani, endi naamani.
\p
\v 11 Ndikholere omusiru khukhwiyitsiala, ne nenywe abachirire, okhuba shembere nineemire khubarume abo abashira obukhulundu mwikhuwa liosi ta, kata nendali neshindu ta.
\v 12 Tooto mwene ebilolero biabarume bialolesibwa munywe mubwisumirisi bwosi, khulwa ebilolero nende ebiamakana nende ebikhole biobunyali.
\v 13 Kho nishiina eshiamuriisia nende tsikanisa tsindi? Ni kalali tsa mbu esiemwene nisie owali omusiko khwinywe? Mumbeere khulwesho.
\p
\v 14 Ne lole, luno lukhola olwa khataru nendirechesheranga okhwitsa khunywe, ne shindiitsa okhuba omusiko khunywe ta, okhuba abaana shibakhoire okhubabishira abebuli bwabwe liibikho ta, habula, halali abebuli mubishire abaana benywe.
\v 15 Ne enjamire butswa okhuhana ebia endi ninabio, nasi omwene ehaanwe omwene khulwa emioyo chienywe. Halali olwa obuheri bushirananga, obwenywe khwisie butitihanga.
\p
\v 16 Ne kata kario, shindabastohera ta, halali olwa ende omuchesichesi, ndamutiira munjira yobumayanu.
\v 17 Khubeene abo abandamurumira, niwina khubo owandekhonyera okhumukatia?
\v 18 Ndamuchetsiyia Tito, neruma omwana wefwe ulia ninaye, Tito yamukatiakhwo? Shikhwachenda muroho mulala oyo? Shikhwalonda mumakulu malala yako?
\p
\v 19 Khandi mupaaranga mbu khuletetsanga imberi wenywe? Khuboola imberi wa Nyasaye muKristo, ne khukhola, abaheerwa banje, khulwa okhumuumbakha nywe.
\v 20 Okhuba eriitsanga mbu olwa ndiliitsa, shindakhabanyoole shinga olwa embaranga tawe, kata omwene nimunyooleshera nendali shinga olwa mwenya ta, kata omwene nimunyooleshera nendali shinga olwa mwenya ta, mbu haundi bwaakhabeho obusoolo, likhalikhali, oburima, nobuyingani, nobuchiishi nobumoonyi, nobwichinjimisi, neindiiri.
\v 21 Ne lano olwa nendiitse khandi, Nyasaye wanje niyandutuyie hakari wenywe, nasi nimberera abanji khubo aboonona khale, nibalekalukhasia baleshe akeshifwabi nobuheyi, nobwilasi bwosi obwa bakhola ta.
\c 13
\cl 2 Abakorinzo 13
\p
\v 1 Luno nolwa Khataru nekhwitsiranga. Mbu khuminwa chiabaloli babiri, buli likhuwa lilatinyisibwa.
\v 2 Ndababoolera mana nemboola, shingana olwa ndaboola nindiho olwakhabiri nendio emboola bulaano neumaho. Emboolera abo aboonona khale nende abandi bosi, mbu nemba nengalukha khandi shindibaleshera ta.
\v 3 Emuboolera kano shichira emanyire mbu mukhabaanga eshilolesia mbu Kristo ali mwisie, khwinywe shiabula amaani ta, ne nowobunyali mwinywe mukari;
\v 4 Kata shichira yabambwa khumusalaba khulwa okhubula amaani, halali yamenya khumaani kaNyasaye. Okhuba fwesi khubula amaani muye, halali khulamenya ninaye khubunyali bwa Nyasaye khunywe.
\p
\v 5 Wihenjeresie omwene noba noli mubusuubiri, mwichere abeene. Nohomba shimumanyire khulwenywe shinga Yesu Kristo olwali mwinywe ta? habula nikakhaba mbu mwalobwa toto.
\v 6 Ne esuubira mbu mumanyire shinga olwa mulali abalobwa ta.
\v 7 Ne bulano emusaaya Nyasaye mbu mulakhole libii liosi ta, ne shikali mbu kho khuloleshe shinga abachamwa ta, habula mbu enywe mukhole akali habwene kata efwe nikhufwana shinga abalobwa.
\v 8 Okhuba shikhunyala okhukhola elindi liosi ta halali obwatoto.
\v 9 Okhuba khuchamisibwe, mbu kata nikhubula amaani, nenyu muli abamaani, ne khulwa yako, ne elia khusaba ndielino, mbu enywe khuusibwa khubulamba.
\v 10 Ne bulano ehandika kano amakhuwa kano mukhubulaho, mbu olwa ndakhabe nindiho ndalekhonyera abululu ta.
\p
\v 11 Elimala kosi ndielino mbu, abaherwa mukasibwe, mulemibwe emioyo, mube namapaaro malala, mumenyenje mumulembe, naye Nyasaye mwene obuheeri nomulembe alabetsangaho nineenywe.
\v 12 Mushiesanie nende okhutsunzunana okhutsienukhu.
\v 13 Abatsienukhu boosi bamushiesia. Obukosia bwOmwami wefwe Yesu Kristo, nende obuheri bwa Nyasaye sefwe, nende obwinjani bwa Roho omulafu, bubetsenje khwifwe fwesi. Amina.