lko_reg/48-2CO.usfm

\id 2CO
\ide UTF-8
\h 2 Abakorinto
\toc1 2 Abakorinto
\toc2 2 Abakorinto
\toc3 2co
\mt 2 Abakorinto
\c 1
\cl Omuliango 1
\p
\v 1 Paulo omurume wa Yeso Kiristo khulienya lia Nasaye, nende Timoteo omusiani wefwe, khu likanisa lia Nasaye eliri Korinto, alala nende abatakatifu boosi abali musialo sia Akaya.
\v 2 Obukoosia bube khweng'we nende omuleembe khurula khu Nasaye Sefwe, nende Omwami Yeso Kiristo.
\p
\v 3 Nasaye Sefwe oli samwana mwami wefwe Yeso Kirisito afumisibwe. Niye Sefwe owesisa khandi Nasaye wobudinyisi bwoosi.
\v 4 Nasaye orudinyisianga mumadinyu keefwe koosi, mbwe khunyoole khudinyisia bala abali mubudinyu bwosi bwosi. Khudinyisianga abandi khubirira mubudinyisi bula obwa Nasaye yekhonyera khurudinyisia.
\v 5 Kori ngolwa manyakhano ka Kirisito kali mwefwe, nilwo olwa khudinyisibwa khwefwe khuli khubrira mu Kirisito.
\v 6 Ne kata efwe nikhusandisibwa, ni khulwo khudinyisibwa khweng'we nende obuwonia, ne nikhudinyisibwa, ni khulwo khudinyisibwa khweng'we. Khudinyisibwa khweng'we khuli nende amaani mukhwesimirisia mumanyakhano akafwesi khunyakhananga.
\v 7 Elinaya liefwe khweng'we nelidinyirifu, khulwo khuba khumanyiri mbwe kori mwambana ninafwe mumanyakhano, nilwo olwa mwambana nafwe mukhudiyisibwa.
\p
\v 8 Ne khasi khwenya eng'we abakheerwa mukhaye okhumanya obudinyu bwarunyoola mu Esia. Khwasidoyerwa lukali okhira amaani kefwe, nikhurusiakho mwoyo kwokhumenya.
\v 9 Nibwadieri khwali nende obukhalaki bwaliifwa. Kene ako kali karukhola khuresika efwe bene, arali khwesike Nasaye, olamusianga abafu.
\v 10 Owaruwonia muliifwa likhongo elio, khandi achia okhuruwonia. Khurere elisuubira liefwe khuniye mbwe achia khuruwonia.
\v 11 Achia khukhola kene kano engwe mwesi nimurukhoonya mumasaayo keng'we. Ne abaandu bangi bachia okhwebasia khulwobukoosia bwa khwaberesibwa khubirira mumasaayo kabaandu bangi.
\p
\v 12 Okhusangala khwefwe nikhwo khuno, obuloli bwokhubasirisia khwefwe, mbwe mubutakatifu nende obulafu bwo bunasaye oburali nende obumanyirisi bwomubiri, arali khulwobukoosia bwa Nasaye khwachirira musialo lukali muno khulwe'ngwe.
\v 13 Khulwo khuba sikhubandikira eng'we amakhuwa kandi arali kala akamusoma nende khufukirira.
\v 14 mwafukirira musidonye, mbwe efwe khuli esifune siokhwelaya khwe'ngwe, ngolwa eng'we mwesi muli khwefwe munyaanga yila eyomwami wefwe Yeso.
\p
\v 15 Muchwoni ino ndapara mbwe bolere imberi mbwe munyoole ingaanga ya khabiri,
\v 16 mbwe babirire ninjia Makedonia, khandi nikhurula Makedonia nikhukalukha oweng'we, nikhuchia ninang'we Ebuyudea.
\v 17 Kori ngolwa ndaparaanga ako ndali nende khukanakana? Kose akandakha khukhola kalondana nende mubiri mbwe esie mwene mboole mbwe ee ee kose khaba khaba?
\v 18 Ngolwa Nasaye ali owobwadieri, elikhuwa liefwe khweng'we khasi liali eee nende khaba.
\v 19 Khulwo khuba omwana wa Nasaye Yeso Kirisito owayaalwa akari weng'we nende efwe, kata ninange nende Siliwano, nende Timoteo, khasi kali eee nende khaba, arali muniye kali eee.
\v 20 Khubeera ebilakwa bioosi ebia Nasaye muniye ni eee khandi muniye kabe kario muluyaali lwa Nasaye khu efwe.
\v 21 Bulano arugumia efwe alala ninang'we mukari mwa Kirisito, ne khandi owarubakha mafura ni Nasaye,
\v 22 khandi niye owarurakho esibalikho naruberesia Roho mumioyo kiefwe.
\p
\v 23 Khwongesiakho, esie nanga Nasaye abe omuloleri akulu womwoyo kwange, khulwokhubelalikhira, nisiri okhuula Korinto.
\v 24 Sibili mbwe khwaruka obusubiri bweng'we, arali khuli abakhoonyi beisangalo yeng'we, khulwo khuba mwema khubusubiri bweng'we.
\c 2
\cl Omuliango 2
\p
\v 1 Arali mumapaaro kange ndapaara mbwe ndareecha khweng'we mubusiro.
\v 2 Khulwo khuba ningera mwabeerera niwina onasangasia esie, arali ula owakholere yaberera?
\v 3 Esie ndabandikira elikhuwa elio, mbwe ninjicha ndaranyoola esibeera khurula khu bala abakhoyera khusangasia, esie besika eng'we mweesi mbwe isangalao yange ni yeng'we mweesi.
\v 4 Khulwo khuba ndabandikira mubudinyu bungi nende okhunyakhana khwomwoyo nende amasika mangi, ne khasi bili mbwe muberere, arali munyoole okhumanya obukheeri bwange obuli khweng'we kori ngolwa buli bungi.
\p
\v 5 Arali niyakhabao yeesi oreera esibeera, khasi aberesie esie sibeera khaba, arali mulwande ndareecha ndabajongia eng'we mweesi.
\v 6 Kakhoyera omuundu weimbeera ino esinyasio sila esia yaberesibwa nende abali bangi.
\v 7 Ne inyuma wako mumulekhere, nende khudinyisia omuundu oli ario mbwe areecha yamirwa nende esibeera sibira esikero.
\p
\v 8 Bulano basaba mbwe mubeekesie obukheeri bweng'we.
\v 9 Khulwako ndabandiikira khulwe sifune sino, mbwe munyoole okhumanya obwadieri bweng'we, mwali abaandu bokhuria mumakhuwa koosi.
\v 10 Ne omuundu yesi yeesi owamulekhera esindu siosi, esie siesi mulekheera, khulwo khuba nindalekhera ula owandakhera, khulwa eng'we ndamulekhera mukari mwa Kirisito.
\v 11 Ne Sietani areecha yanyoola khurukhira khulwo khubeera khasi khukhirwa khumanya amapaaro kaye.
\p
\v 12 Khulwe esio kori ndoola Teroa okhuyaala ifanjili ya Kirisito, Omwami yanjikulira omuliangiro.
\v 13 Khasi ndalola isangaalo mumwoyo kwange, khulwo khuba khasi ndanyoola Tito omusiani wefwe, arali ndabasebula nimala nimbwao okhuchia Makedonia.
\v 14 Bulano khukhubira Nasaye orio oruberesianga obukhiri bulilwosi mukari mwa kirisito, nende khuloliesa isaami yokhumanya buli abuundu.
\v 15 Khulwo khuba khuli isaami ya Kirisito indayi khu Nasaye, mubala abaonisibwa nende bala absasikha.
\v 16 Khu mulala khuli isaami yeliifwa khu liifwa, ne khuundi isaami yo bulamu khu bulamu. Niwina oyera mumakhuwa ako?
\v 17 Khulwo khuba efwe khasi khuli kori baandu abandi abakusianga ellikhuwa lia Nasaye. Arali khulomalomaanga obulafu bwa machoma mukari mwa Kirisito, mumoni chia Nasaye ngolwa arurumire.
\c 3
\cl Omuliango 3
\p
\v 1 Khandi efwe khwakhachaaka okhwefumia abene? Kose khudakha chibarua chiokhufumia khweng'we kose khurula khweng'we kori nga abaandu bandi?
\v 2 Eng'we bene neng'we ibarwa yefwe eyokhufumia, eyandikibwa khumioyo kiefwe, eyamanyikhana niyisomwa nende baandu boosi.
\v 3 Ngolwa mwamanyisibwa obulafu okhuba ibarwa ya Kirisito eya efwe khwareresia, eyirandikibwa nende obuyino, arali nende Roho wa Nasaye olimulamu. Ne khasi kaandikwa khu chimbao chiamakina, arali ni khu mioyo kiabaandu.
\p
\v 4 Ne khuli nende elisuubira elieingira ino imberi wa Nasaye khubirira khu Kirisito.
\v 5 Khasi bili mbwe efwe bene khuyera okhubola mbwe esindu siosi sirula khwefwe, arali okhulira khwefwe khurula khu Nasaye.
\v 6 Nasaye niye yarukhola okhuba abakholi belilakaano liyaakha. Ne lino khasi nililakaano lieliandiko arali nilia Roho. Khulwo khuba eliandoko liira, naye Roho areera obulamu.
\p
\v 7 Arali okhukhola khweliifwa okhwandikwa nende khuchorwa khumakina, kali akoluyaali, kata mbwe abaana ba Isiraili sibeenya khulola obweeni bwa Musa khulwo khubeera oluyaali lwali khubweeni bwaye, ne lwali oluyaali lubira.
\v 8 Okhukhola khwa Roho nakhwo sikhuchia khukhirakhoo muluyaali?
\v 9 Khulwo khuba nikali mbwe obukholi bwobukhalaki bwali nende oluyaali, ne obwobulungifu nabwo buchia khuba nende oluyaali lwaka lurie?
\v 10 Khulwo khuba sila esiakholwa okhuba esioluyaali khasi siali oluyaali mumbeera yino, khulwe sifune esio oluyaali olusikhira.
\v 11 Khulwo khuba nakali mbwe sila esiali sibira siali nende oluyaali, ne sila esiechinyaanga chiosi sichia khuba nende oluyaali lwaka lurie?
\p
\v 12 Bulano kori khuli nende elisuubira elio, khuli nende ichuoni.
\v 13 Efwe nafwe khasi khuli kori Musa owefunikha olububi mubweni bwaye mbwe abaana ba Isiraili baranyalirwa khulola obumalirikhi bwoluyaali lula olubira.
\v 14 Arali amapaaro kabwe kakholwa okhuba amomu. Khulwo khuba okhuula inyaanga yino nibasoma elilakaano likhale, olububi lula lubasirikho sa. Lusiri khumalwao, kuhlwo khuba bili mbwe lumalweo mukari mwa Kirisito.
\v 15 Arali okhuula inyaanga yino, olububi lufunikhanga emioyo kiabwe nibasoma khu Musa.
\v 16 Kata kario, omuundu niyeecha khu Kirsito, olububi lurusibwao.
\v 17 Bulano omwami ni Roho, ne owa Roho wa Mwami ali, obulekhule buliwo.
\v 18 Bulano efwe fwesi abali nende obweni bwamalwakho olububi, khulolanga oluyaali lwo Mwami. Ne khukalukhanisibwanga nikhwingisibwa mufwani yoluyaali lwene olwo khurula khu luyaali nikhuchia khu luyaali lundi, kori khurula khu Mwami, oli Roho.
\c 4
\cl Omuliango 4
\p
\v 1 Khulwesio kori khuli nende obukhalabani buno, ngolwa khwanyoola esisa, khasi khwafwa emioyo khaba.
\v 2 Arali khwakhaya ebiindu ebia mubwekisi nende ebiechisoni. Khasi khukenderanga mubikeskesi khandi khasi khukodianga elikhuwa lia Nasaye, arali khubufunuli bwobwadieri, nikhwelolesia efwe abene imberi womwoyo kwa buli mundu mubweni bwa Nasaye.
\v 3 Arali ifanjili yefwe niyekisa, yekisa khu abo abakora.
\v 4 Nibo bala aba Nasaye wesialo sino yofusia amapaaro kabwe akarasubira. Khulwa kene ako, khasi banyalirwa okhubona obulafu bweifanjili yoluyaali lwa Kirisito, oli ifwani ya Nasaye.
\v 5 Khulwo khuba khasi khweyaala efwe bene, arali Omwami Yeso Kirisito, nende efwe abene kori abakholi beng'we khulwa Yeso.
\v 6 Okhuba Nasaye bwaboola mbwe obulafu bwadukhe musirima, yaakha mumioyo kiefwe, okhulwokhuberesia obulafu bwo bumanyirisi bwoluyaali lwa Nasaye imberi wa Yeso Kiristo.
\p
\v 7 Arali khuli nende imbikhiro ino mubikaye bieliloba, mbwe obukhoongo obwobunyala bumanyikhe kori buli obwa Nasaye oburarula khwefwe abene.
\v 8 Muchimbeka chioosi khunyisibwa, arali khasi khukoyana, khubeyabeyisibwa arali khasi khufwa mioyo,
\v 9 khusandisibwa, arali khasi khulekhwa, khufwa, arali khasi khusasibwa,
\v 10 Buli lwosi nikhukinga mumibiri kiefwe eliifwa Liomwami Yeso, mbwe obulamu bwa Yeso bunyoole khubonekhana mumibiri kiefwe.
\v 11 Khulwo khuba efwe abali balamu, buli lwoosi khufwa khulwa Yeso, mbwe obulamu bwa Yeso bunyoole okhubonekhana munyama chiemibiri kiefwe.
\v 12 Eliifwa likhole emirimo mwefwe arali likhole obulamu mweng'we.
\p
\v 13 Khulwo khuba khuli nende omwoyo kula okwobusubiri, ngolwa kaandikwa mbwe, ndasubira, ne khulwesio khulomaloma,
\v 14 nikhumanya mbwe ula owabuusia Omwami Yeso achia khurubuusia efwe fwesi mu Yeso, ne achia khurulolesia alala ninang'we.
\v 15 Khulwo Khuba amakhuwa kosi ni khulweng'we, mbwe obukoosia bungi obwokhubirira mukhwebasia khwabangi khumeedwe khulwo luyaali lwa Nasaye.
\p
\v 16 Khulwesio sikhufwa mwoyo khaba, kata kario omuundu wefwe owerwanyi asasikha, omuundu womukari naye achiririra okhukholwa muyaakha inyaanga khunyaanga.
\v 17 Khulwo khuba amanyakhano kiefwe maangu, akaliwo khulwe bikha, karukholera oluyaali oluralibwayo oluli lungi lukali.
\v 18 Ne khuralingeera khu biindu bila ebibonekhana, arali khubila ebirabonekhana, khulwo khuba ebiindu bila ebibonekhana nibiebikha bidiidi sa, ne bila ebirabonekhana nibiechinyaanga chioosi.
\c 5
\cl Omuliango 5
\p
\v 1 Khulwo khuba khumanyiri mbwe inyuumba yobumenyo bwefwe obwomusialo muno niinyasikha, khuli nende esiumbakhe esirula khu Nasaye, inyuumba eyirakasibwa nende amakhono kabaandu, eyirabwayo mwikulu.
\v 2 khulwo khuba munyuumba yino khunyakhana nikhwekoomba mbwe khufwasibwe inyuumba yefwe eyirula mwikulu.
\v 3 Ne nikhumala okhufwasibwa khasi khunabonekhana okhuba esiekenye.
\p
\v 4 Ne efwe nikhuli muliyeema lino, khuchunisibwa, nikhusidoyerwa, sibili mbwe khudakha khufwalulwa, arali khufunikhwa, ne sila esieliifwa sinyoole khumirwa nende obulamu.
\v 5 Bulano ula owarureresia khulwa makhuwa kene kano ni Nasaye, owaruberesia Roho okhuba esilolero siamakhuwa kala akachia khwicha.
\p
\v 6 khulwako mube nende ichuoni nimumanyire mbwe nikhusiri nikhumenyere mumubiri, khuli ale nende Omwami. khulwo khuba khasi khukenderanga.
\v 7 mukhulola, arali khukenderanga mubusubiri.
\v 8 khulwako khuli nende ichuoni. Khwakhekombere okhuba ale nenede mubiri, ne khube alala nende Omwami.
\v 9 Khulwako khwedinyanga mbwe nikhuliwo kose nikhubulao, khunyoole khufikirirwa ninaye.
\v 10 Khulwo khuba efwe fwesi khukhoyera khubenekhana imberi wesisaala siobukhalaki esia Kirisito, mbwe buli muundu anyoole omuruungo kwa makhuwa akayakhola mumubiri, kata nikali malayi kose mabi.
\p
\v 11 Khulwako khumanyire mbwe okhuria Khwomwami khunakhweesa abaandu, nafwe khubonekhana khu Nasaye, nange suubira mbwe kene ako nimakhakhu mumapaaro keng'we.
\v 12 Khandi khasi khwefumia efwe bene khweng'we, arali khubaberesia esifune siokhwebulisia khulwefwe, mbwe munyoole elikalusio khubala abebulisia khulwo khubeera bila ebibonekhana ne khasi nikhubila ebili mumwoyo.
\v 13 Ne nikakhaba mbwe efwe khulalukhe mubwongo bwefwe, ni khulwa Nasaye,
\v 14 Khulwo khuba obukheri bwa Kiristo bunarwimirira, nende sifune mbwe, omundu mulala oyo yafwira baandu boosi, ne khulwako boosi bafwa.
\v 15 Yafwira baandu boosi, mbwe bala abamenya, baramenya khulwabwe bene arali bamenye khulwa ula owabafwira mani khandi nalamusibwa.
\p
\v 16 Khulwe sifune sino, khuchaaka bulano nikhuchiririra khasi khumanyirisia omuundu yeesi khulondana nende mubiri, khandi efwe khwamumanya khurio.
\v 17 Khulwako, omuundu yeesi nali mukari mwa Kirisito, ali esiloonge siyaakha. Amakhuwa makhale kabirire, ne bulano lingeera kechere mayaakha.
\v 18 Amakhuwa kano koosi karula khu Nasaye owarwambania khuniye mwene khubirira khu Kirisito, narubersia emirimo kiokhwambania.
\v 19 Ne ako kali mbwe Nasaye alikhwambanianga esialo khuniye mwene mukari mwa Kirisito, narabala ebionono biabwe. Ne aruberesie elikhuwa liokhwambania.
\v 20 Khulwako, khuli abarumwa khulwa Kirisito, kori nga Nasaye yakhasaba khubirira muminwa kiefwe, khubasaba eng'we khulwa kirisito mbwe mwambanisibwe nende Nasaye.
\v 21 Khulwo khuba yakhola ula orali yamanya imbi okhuba imbi khulwo khubeera efwe khunyoole okhuba abalungifu ba Nasaye muniye.
\c 6
\cl Omuliango 6
\p
\v 1 Nafwe abakholi alala ninaye khubasaba mbwe, muranyoola obukoosia bwa Nasaye esikhaya.
\v 2 Khulwo khuba aboola ari, ebikha biafukirirwa ndakhubulira, inyaanga yobuonia ndakhukhoonya, lingeera inyaanga yobuonia niyo yino.
\p
\v 3 Khuraba esisikirasio esieimbeera yosi yosi mulikhwa liosi liosi, mbwe oburumikhi bwefwe buranyolekhanamo imbi.
\v 4 Bulano khunyoole khweberesia ifuma yindayi mubuli likhuwa kori nga abakholi ba Nasaye, mukhwesimirisia khungi, mukhusandisibwa, mumasira, mumanyakhano,
\v 5 mukhukhuywa, mububoye, mukhubachirwa, mukhusaanda, mukhukhiesia, mukhusiiba,
\v 6 mukhuba balafu mukhumanya, mukhwesimirisia, mumbeera yindayi muroho mulafu, mubukheeri bubulamo obwekaadi,
\v 7 mbwe mulikhwa liobwadieri mumaani ka Nasaye, mubilwaniro biobulungifu ebiomukhono musaacha nende ebiomukhono mukhasi.
\v 8 Muluyaali nende muchisioni khulomalomakhwo ebibi nende khulomalomakhwo bilayi, kori nga khuli abaandu bobwadieri,
\v 9 kori nga abaramanyikhana arali abamanyikhana lukali, kori nga abafwa khane khuli balamu, kori nga abalabirwa, arali abarerwa,
\v 10 kori nga abali nende esibeera arali muchinyaanga chioosi khuli basangafu, kori nga abamanani arali khukholwa okhuba bayiinda, kori nga ababula siosi siosi, arali khuli nende ebiindu bioosi.
\p
\v 11 Kkhulomalomere obwadiere bwoosi eng'we Abakorinto, nemioyo kiefwe nimiakhakhu,
\v 12 Khasi mufwinywa mukari mwefwe, arali mufwinywa mumioyo kieng'we.
\v 13 khulwako, munyoole khulondana ngolwa mwaberesibwa (mboola nang'we kori nga abaana) eng'we mwesi mukhongoyisibwe mioyo.
\p
\v 14 Muraboywa lijoki alala nende bala abarasubira, kori nga birakhoyera, khulwo khuba khuli nende bwambani sina akari wabalungifu nende abarali balungifu? Khandi khuli nende bwambani sina akari wobulafu nende esirima?
\v 15 Khandi khuli nende okhukheresia sina okhuli akari wa Kiristo nende Beliali? Kose khuli nende mukabo sina akari wa ula owasubira nende orasubira?
\v 16 Khandi khuli nende khufukirisania sina akari weikhekalu ya Nasaye nende ebifwanani? khulwa khubeera efwe khuli ikhekalu ya Nasaye oli mulamu, ngolwa Nasaye aboola ari, ndekhala mukari mwabwe khandi ndakeenda akari wabwe, nabo banaba abaandu bange.
\p
\v 17 Khulwako, Omwami aboola ari, murule akari wabwe, mwekabule ninabo, muradiira khusiindu simali nange ndabengisia.
\v 18 Omwami onyala bioosi aboola ari, nangwe munba abaana bange abesisiani nende abesikhana.
\c 7
\cl Omuliango 7
\p
\v 1 Bulano abakheerwa bange, khulwo khuba khuli nende amalakano kano, khunyoole khwelabia echimbeera chiefwe khurula mubumali bwoosi obwomubiri nende mwoyo, nikhusiirisia obutakatifu mukhwechomia Nasaye.
\p
\v 2 Muruberesie obweyango mumioyo kieng'we, khasi khwakholera omuundu yeesi libi, kose khusasia omuundu yesi yeesi.
\v 3 Khasi mboola elikhuwa elio khulwo khubakhalakira, khulwo khuba ndangirire khuboola mbwe eng'we muli mumioyo kiefwe, kata mukhufwa alala nende khumenya alala.
\v 4 Ndi nende ichuoni khweng'we, khandi ndi nende oluyaali lukhoongo khweng'we, njichusibwe nende khulemisibwa omwoyo, khandi njichusibwe nende obusangaafu okhira sikero mumanyakhano kefwe koosi.
\p
\v 5 khulwo Khuba ngolwa khwola Makedonia emibiri kiefwe khasi kianyoola khubulukha, arali khwasandisibwa buli chimbeka, erwanyi khwali nende eliiyie, mukari khwali nende oburi.
\v 6 Arali Nasaye adinyisianga badekhere, yarudinyisia khubirira mukhwicha khwa Tito.
\v 7 Ne khasi nikhukhwicha khwaye sa, arali okhudinyisibwa khula okhwa yadinysibwa ninang'we, narubolera amakhuwa keng'we akobuluwo nende khulirira khweng'we, nende esinani sieng'we khulwo khubeera esie, nange ndachiririra khusangaala lukali.
\p
\v 8 Khulwo khuba kata nakali mbwe ndabasinyisia mubarwa yila, khasi ndekanira, ne kata nindekanira mbona mbwe ibarwa yila yabadinyisia, kata kario khu bikha bidiidi sa.
\v 9 Bulano sangaala, ne khasi ni khulwo khusinyisibwa khweng'we, arali khulwo khubeera khusinyisibwa khweng'we khwabanyalira okhwekanira, khulwo khuba mwasinyisibwa mumbeera ya Nasaye mbwe muranyoola khukosia mulikhwa liosi liosi.
\v 10 Khulwo khubeera esibeera esieyifwani ya Nasaye sikholanga okhwekanira okhurera obuonia obubula esifune siokhuberera, ne esiomusialo sireraanga liifwa.
\v 11 Ne mulingere mbwe okhubererera khwene khwo okhwa imbeera ya Nasaye khwakhola okhuria mukari mweng'we, nende khwerusiamo, nende khusinyikha, nende oburi, nende obuluwo, nende khwedinya, nende khuruunga libi khu libi, mungira yoosi muyekesie abene khuba abalafu khu likhuwa elio.
\v 12 Khulwako, kata kario ndabandiikira, khasi ndabandiikira khulwa ula owakhola mabi, kose ula owakholerwa mabi, arali mbwe esinani sieng'we khulwo khulwefwe sibonekhane imberi wa Nasaye.
\v 13 Khwadinyisibwa khulwa kene ako, mukhudinyisibwa khwefwe khwasangaala okhira esikero, khubeera obusangaafu bwa Tito, khulwo khuba eng'we mweesi mwsangasia omwoyo kwaye.
\v 14 Khubeera mbwe nindelaya imberi waye mulikhuwa liosi khubeera eng'we, khasi ndambisibwa echisoni, arali kori ngolwa khwababoolera amakhuwa koosi mubwadieri, khukario okhwelaya khwefwe khu Tito khwali okhwobwadieri.
\v 15 Ne obukheeri bwaye khwengwe bubere obungi okhukhira sikero, niyechulisia okhuria khweng'we mweesi ngolwa mwamwingisia muburi nende khurengerakha.
\v 16 Khulwa kene ako, ndi nende ichuoni mweng'we mumakhuwa koosi.
\c 8
\cl Omuliango 8
\p
\v 1 Khandi abakheerwa, khubaboolera amakhuwa kobukosia bwa Nasaye, obwamakanisa ka Makedonia kaberesibwa,
\v 2 khulwo khuba ngolwa bali nibateemwa mumanyakhano mangi, obungi bweisangaalo yabwe nende obumanani bwabwe bwali bungi obwamwamederwa obuyiinda bwobwani bwabwe.
\v 3 Khulwo khuba babarusiria obuloli mbwe khulwo bunyala bwabwe, nende khulwo khukheera khwabwe bene, barusia ebiindu biabwe,
\v 4 nibarusaba lukai alala nende okhurwekweeda khulwa makhuwa kobukosia buno, nende obwambani buno, nende khukhalabanira abatakatifu.
\v 5 Ne kene kano khasi kekholehana kori nga khwali khuparire, arali barangira berusia khu Mwami, ne nibamala niberusia khwefwe khulwe lienya lia Nasaye
\v 6 Khulwako khwasaba Tito owachakisia emirimo kino, mbwe amalirisie emirimo kio bukoosia kino.
\v 7 Ne muli nende obungi bwa makhuwa koosi, mubusubiri, nende mukhulomaloma, nende mumakesi, nende esinani sioosi, nende mubukheeri bweng'we khwefwe, khandi kario munyoole khuchiririra muyikhola yobukosia yino.
\p
\v 8 Khasi mboola khulwo khubaberesia elilako, arali ni khulwo khudakha khumanyirisia obwadieri bwobukheeri bweng'we nikhukerania nende esinani sia baandu bandi.
\v 9 Khulwo khuba mumanyire obukoosia bwo Mwami wefwe Yeso Kirisito, mbwe kata kario yali omuyiinda, yekhola omumanani mbwe eng'we munyoole okhuba abayiinda.
\v 10 Lino nilio elikerako liange ilibakhoyera mulikhuwa lino. Omwaka kwabwere khasi mwali abamberi mukhurusia khwongene, arali nende okhuba nende omwoyo kwo khukhola.
\v 11 Ne bulano musirisie okhukhola khula ngolwa mwali abarekekhe khwenya okhola murio, kario mube abarekekhe okhusirisia mubunyala bwamuli nabwo.
\v 12 Khulwo khuba elinaaya niliriwo, omuundu afukirirwa khulondana nende ebiali nabio, ne khasi nikhulondana nende ebiabula nabio.
\v 13 Ne khasi mboola kano mbwe abaandu bandi banyoole isangaalo nang'we munyoole ebidinyu,
\v 14 arali amakhuwa kabe akayeraana mubikha bia bulano, obungi bweng'we bubakhoyera mubulemufu bwabwe, ne obungi bwabwe bubakhoyera eng'we nimuralemerwa mani khube nende khuyeraana.
\v 15 Kori kaandikwa mbwe owabusia ebingi khasi yali nende bingi okhirao, ne ula owabusia bidiidi khasi yalemerwa siosi.
\p
\v 16 Arali khwebasie Nasaye Ula Orechaanga esinani sila mukari mwomwoyo kwa Tito khulweng'we.
\v 17 Nibwadieri mbwe yafukirira amakerako, khandi niyedinya okhuba nende esinani, yasamula khuchia oweng'we khulwo khukheera khwaye mwene.
\v 18 Ne alala ninaye, khwaruma omusiani wefwe ula oweifuma yaye khubirira khuyifanjili yasalaana mumakanisa koosi.
\v 19 Khandi khasi nako kongene sa, arali yalobolwa nende amakanisa, mbwe asamule alala ninafwe khulikhuwa liobukosia buno, obwakhalabaniranga, mbwe Omwami afumisibwe ne oburekekhe bwefwe bubonekhane.
\p
\v 20 Nikhwekaya nende elikhuwa lino, omuundu areecha yarubululira khulwa makhuwa ke sianwa sino esia khwekhonyisiria.
\v 21 Khasi khupaara okhola akali malayi imberi wo Mwami sa, arali nende imberi wabaandu.
\v 22 Nafwe alala nabo khurumire omusiani wefwe owakhwabona ebikha bingi mumakhuwa mangi nali nende esinani, ne kata bulano ali nende sinani muno khulwe linaaya likhoongo elia ali nalio khweng'we.
\v 23 Bulano omuundu niyenya amakhuwa ka Tito, ye niye omwambani, khandi omukholi wemirimo alala nange khulweng'we, khandi khulwa makhuwa kabaana befwe, ne nibo abarumwa bamakanisa nende oluyaali lwamakanisa,
\v 24 mbwe mubekesie imberi wa makanisa obwadieri bwobukheeri bweng'we, nende okhwelaya khwefwe khulweng'we.
\c 9
\cl Omuliango 9
\p
\v 1 Khulondana nende amakhuwa akokhukholeranga abatakatifu, esie mbula esifune esiokhubandiikira,
\v 2 khulwo khubeera manyire oburekekhe bweng'we obwandelayirakho khubaandu ba Makedonia, mbwe Akaya yali yerekekha khurula omwaka kwabwere, khandi esinani sieng'we siberesie mwoyo abaandu bangi.
\v 3 Bulano, ndaruma abakheerwa abo mbwe okhwelaya khwefwe khulwengwe khurakalukhanisibwa mulikhuwa lino, ne munyoole okhuba abarekekhe ngolwa ndaboola,
\v 4 nende elichomo mbwe Abamakedonia nibeecha alala nange, ne nikhubanyoola nimurali abarekekhe, khureecha khwambisibwa echisoni, (khasi mboola esiindu khweng'we) khulwokhubesika.
\v 5 Khulwako ndabona mbwe bikhoyera okhuboolera abakheerwa bano mbwe barangirire okhwicha eyo mani banyoole khurekekha ebianwa bieng'we ebiamwalaka, binyoole okhuba birekekhe kori ngechikhabi, ne biraba kori nga esindu sirusiibwe mukhuyikwa.
\p
\v 6 Ne mboola mbwe, oraaka mubudiidi achia khukesa mubudiidi, naye oraaka mubungi achia khukesa mubungi.
\v 7 Buli muundu akhole kori ngolwa aparire mumwoyo kwaye, ne arakhola musibeera kose mukhuyikwa khaba, khulwo khubeera Nasaye Yakheera ula orusianga khurula mumwoyo mulekhule.
\v 8 Ne Nasaye anyala okhwichusia obukoosia mubungi, mbwe eng'we nimuba nende obunyoolero bufwana burio echinyaanga chioosi, munyoole okhwedinya musikhole silayi siosi,
\v 9 kori ngolwa kaandikwa kari, Yabisalania naberesania abamanani, ne obulungifu bwaye nibwechinyanga chioosi.
\p
\v 10 Ne ula oberesania yimwo khu ula oraaka nende omugaati kwo khulia, achia khuberasania nende khumeeda mubwichufu yimwo yeng'we eyokhuraaka, khandi achia khumeeda ebikese biobulungifu bweng'we.
\v 11 Ne muchia khuyindisibwa mubiindu bioosi mbwe munyoole okhuba nende obwani, obuchia khukera Nasaye yebasibwe khubirira mwefwe.
\p
\v 12 Khulwo khuba oburumikhi bwemirimo kino khasi bwosirisiria abatakatifu obunyolero obwabaleemerwa sa, arali bumeeda okhuba nende ingaanga khulwokhwebasia Nasaye khulwo bunyala bwaye,
\v 13 khulwo khuba nimuteemibwa muburumikhi obwo, Nasaye afumisibwa khulwo khuria khweng'we mukhfukirira likhuwa lia Kirisito, nende khulwobwani bweng'we obwamwambanisiwamo nende abaandu boosi,
\v 14 nabo ebene nibasaba khulwo khumenya khweng'we khandi nibababonera obuluwo khulwo khubeera obukoosia bwa Nasaye obwechula mukari mweng'we.
\v 15 Kkhwebasia Nasaye khulwe sianwa esiakhuranyala khufumia kori nga bikhoyera.
\c 10
\cl Omuliango 10
\p
\v 1 Bulano esie Paulo mewene basaba mukhweduduya nende obwedemberefu bwa Kirisito, esie oli owo khweyikhia asi nindi alala nang'we, kata nimbulao ndi nende ichuoni khweng'we,
\v 2 arali basaba mbwe kata nindiwo, ndareecha ndaba nende ichuoni yo khupaara mbwe esie ndi akulu wa baandu bala abapaaranga mbwe efwe khukenderanga mumbeera yomubiri
\v 3 Khulwo khuba kata kario khukendera mumubiri, khasi khukhuyananga mumbeera yomubiri,
\v 4 (khulwo khuba ebilwaniro bie liiyie liefwe khasi nibiomumubiri khaba, arali bili nende obunyala mu Nasaye khulwo khukoka echingoba,)
\v 5 Khandi nikhukoka amapaaro nende buli sindu esiekingula akulu wa makesi ka Nasaye, nikhudiira buli mapaaro kosi mbwe kanyoole khuria Kirisito,
\v 6 khandi nikhuba aberekekhe khukalukhania amabi koosi, okhuula kori ngolwa okhuria khweng'we khuchia khulirira.
\p
\v 7 Mulingale kala akali imberi weng'we. Ne omuundu niyesubiramo omwene mbwe ali omuundu wa Kirisito, kario Khandi apaare mumwoyo kwaye kori ngolwa ali omuundu wa Kirisito, nilwo olwa efwe fwesi khuli.
\v 8 Khulwo khuba kata nindakhefumiakho budiidi khulwo khubeera obunyala bwefwe (obwa khwaberesebwa nende Omwami, mbwe khunyoole okhubombakha, ne khurabakwisia), khasi njia okhwambisibwa echisoni khaba.
\v 9 Ne ndareecha ndabonekhana kori nga owenya khubarisia khulwe chibarwa chiange.
\v 10 Khulwo khubeera abaandu bandi baboola bari, chibarwa chiaye nichisiro chiamaani, arali omwene naliwo mumubiri nomudekhere, khandi makhuwa kaye khasi nisindu sikhoyera khurekeresia.
\v 11 Omuundu kori oyo amanye mbwe kori ngolwa khuli muchibarwa chiefwe nikhuraliwo, nilwo olwakhuli mubikhole nikhuliwo.
\p
\v 12 Khulwo khuba khasi khwakhateema khwebalira alala nende bala abefumia abene, kose khwekerania ninabo, arali abene nibakerania chimbeera chiabwe abene khu bene, khasi bali nende obumanyirisi khaba.
\v 13 Ne efwe nafwe khasi khunefumia akulu wobunyala bwefwe, arali khulwo bunyala bwesikero esiakhwapimirwa nende Nasaye, mbwe khunyoole obunyala bwokhuboolera.
\v 14 Khulwo khuba khasi khwekhwesa okhira obunyala bwefwe, obeera ori khasi khubolereranga, khubeera khwarangirira khubolerera khubirira muyifanjili ya Kiristo.
\p
\v 15 Ne khasi khwefumia akulu wobunyala bwefwe, khubirira mubunyakhani bwabaandu bandi, arali nikhuli nende elinaaya mbwe obusubiri bwefwe nibukhula, khunakhusibwa khweng'we mubunyala bwesikero siefwe nende khunyoola obwichufu,
\v 16 kata khuyaala ifanjili mubialo bili imberi weng'we, ne khuranyoola okhwefumia musikero sioundi khulwa makhuwa kamala khukasibwa.
\v 17 Ne ula owelaya, yeleyire Mumwami.
\p
\v 18 Khulwo khuba omuundu ofukirirwa khasi ni ula owelaya mwene okhuba okhoyera, arali ni ula olaywa nende Omwami.
\c 11
\cl Omuliango 11
\p
\v 1 Biakhabere ebilayi nimwakhesimiriesie budiidi mubusiru bwange mu Nasaye, ne murajoonga nange khaba.
\v 2 Khulwo khuba esie babonera imbalikha yo Bunasaye, khubeera ndabambania khu musaacha mulala, mbwe nyoole khurerera Kirisito omusisira mulafu.
\v 3 Arali ndi nende oburi mbwe, karakhaba mungira yosi, kori nga injukha yabachirisia Hawa mubikesi kesi biayo, areecha yanyasia amapaaro keng'we karusibwa khu khweduduya khuli mukari mwa kirisito.
\v 4 khulwo khuba omuundu undi neyecha okhuyaala Yeso undi owefwe khurayaala, kose nimunyoola roho undi owamuranyoola, kose ifanjili yindi eyamurafukirira, nibilayi mwesimirisie ninaye.
\v 5 Khulwo khuba mbaara mbwe khasi ndalemerwa nende esiindu siosi esiabarume bakhoongo bali nasio.
\v 6 Ne kata nindaramanyire okhulomaloma mubumanyirisi bwa makesi kange, khwamanyisibwa khweng'we mubuli siindu.
\p
\v 7 Nange esie ndakhola sibi siosi khulwo khweduduya mbwe eng'we nang'we munyoole khukingulwa? khulwo khuba ndabayalira ifanjili ya Nasaye mubwakhakhu.
\v 8 Ndebera amakanisa kandi emiandu kiabwe, nimbukula omukabo kwange khubakholera eng'we.
\v 9 Ne nga ndali alala ninang'we, nindi mukhwenya, khasi ndayekhera omuundu yesi yeesi, khulwo khuba bila ebiali nibilemukhe, abakheerwa abarula Makedonia bamberesia ebiindu khulondana nende amenya kange, nange esie omwene ndeelinda mbwe ndarabayekhera mumakhuwa koosi kata budiidi, ne khandi ndachiririra okhweliinda.
\v 10 Ne okhulondana nende kori obwadieri bwa Kirisito buli mukari mwange, abulao omuundu ochia okhungayira okhwefumia khuno, mumbeka chia Akaya.
\v 11 Khulwa sina? Ni khulwobeera mbwe khasi ndabakheera? Nasaye amanyire.
\p
\v 12 Arali eliakhola ndachiririra khulikhola, mbwe nyoole okhwakamia bala abakonyanga omwoyo kwange baranyoola obweyaango, mani babonekhana kori efwe mulikhuwa elio eliabelayirangakho.
\v 13 Khulwo khuba abaandu kori abo nibarume bo bubacha, abakholanga emirimo mubwekaadi, abekalukhanianga okhuba abakholi ba Kirisito.
\v 14 Ne elio khasi liukisia khulwo khuba Sietani mwene yeesi yekalukhanianga aba kori malayika wobulafu.
\v 15 Khulwako, khasi nilikhuwa likhoongo abakholi baye bosi nibekalukhania okhuba kori nga abakholi bobwadieri, ne obumalirikhi bwabwe bwakhafwane kori emirimo kiabwe
\p
\v 16 Khandi mboola mbwe, omuundu arapaara mbwe esie ndi omusiru, ne kata kario nimumbarira murio, mufukirire sa kori nga omusiru, mbwe nange nyoole okhwefumia budiidi.
\v 17 Ne eliamboola khasi ni lilako lio Mwami khaba, arali ni kori nga khubusiru, muchuoni yokhwelaya khuno.
\v 18 Khulwo khuba abaandu bangi befumianga mumbeera yomubiri, ne esie siesi ndefumia.
\v 19 Eng'we nang'we, muchiiranga alala nende abasiru mubusangaafu, khulwo khuba muli abakesi.
\v 20 Khulwo khuba muchiiranga alala nende omuundu kata nabara mububoye, nabamira, nabadira, niyekingula, nabakhuya mubweni.
\v 21 Nomanoma mumbeera yokhweleka obeera ori efwe khwali abadekhere. Ne omuundu nali nende ichuoni khulikhuwa liosi liosi, (nomanoma mubusiru), esie siesi ndi nende ichuoni
\v 22 Ni Abayiburania nibo? Nende esie siesi. Ni Abayisiraili nibo? Nende esie siesi. Nibolwibulo lwa Iburaimu? Nende esie siesi.
\v 23 Nibakholi ba Kirisito? (nomanoma kori nga omusiru), esie nange khirakho, mukhusanda lukali, mukhuboywa lukali, mukhukhuywa khubira sikero, muliifwa buli lwoosi
\v 24 Ndanyoola makhubake amakhumi kane nomalokho ndala khurula khu Bayaudi makhabi karano.
\v 25 Makhabi kadaru ndakhuyirwa musarita, likhabi lala ndakhuyirwa makina, imeli yafunikha makhabi kadaru nindi munyaanja, ninyoola khuonga siro nende sideere mulusiba lwe inyaanja,
\v 26 ndali mukhusamula makhabi mangi, mubudinyu bwa machi, mubudinyu bwa banyuli, budinyu nende abaandu besialo siange, budinyu khu bialo bindi, budinyu bwomudokho, budinyu bwesialo siomulumira, budinyu bwomunyaanja, budinyu bwabaana befwe abo bubacha,
\v 27 mukhusanda nende mumanyakhano, mukhuranyalirwa khukona makhabi mangi, munjala nende buluo, mukhusiiba makhabi mangi, khuba mumboo nende siekenye.
\v 28 Ne nolekhana nende akerwanyi ako, kaliwo kandi anganjichiraanga buli nyaanga, khulondana nende obwayi bwamakanisa koosi.
\v 29 Niwina olimudekhere, nange esie ndakhaya okhuba mudekhere? Niwina owasinyisibwa nange ndakhaya khubulira buchuni mukari mwange.
\p
\v 30 Ne nibikhoyera okhwalaya, ndelaya khulwa makhuwa kobudekhere bwange.
\v 31 Nasaye oli Samwana Mwami Yeso, owoluyaali chinyaanga chioosi, amanyire mbwe khasi mbacha.
\p
\v 32 Ne omukhoongo asi womuriki Areta owa Damesiki, yali nalindanga elidookho liabaandu ba Damesiki, mbwe anyoole khundiira,
\v 33 ne nibanjikhisiria musikapo khubirira mulidirisa, ninyoola okhuona khurula mumakhono kaye.
\c 12
\cl Omuliango 12
\p
\v 1 Esie nyala ndelaya, kata kario khasi bikhoyera, arali njia khwolerera mumalolo nende obufwimbuli bwo Mwami.
\v 2 Aliwo omuundu mulala mukari mwa Kirisito owa manyire, akulu wemiaka ekhumi nende kine, (ne nibi mbwe niyali mumubiri, kose erwanyi womubiri, esie khasi manyire khaba, arali Nasaye niye amanyire). Ne omuundu oyo yabukulwa nayirwa akulu mulikulu liakhadaru.
\v 3 Khandi manyire mbwe omuundu oyo, (kata niyali mumubiri kose erwanyi womubiri, esie khasi manyire arali Nasaye niye amanyire),
\v 4 yabukulwa nayirwa muparadiso, ne nabulira amakhuwa akarakherumbula, akomuundu arafukirirwa khukarumbula.
\v 5 Nange esie ndelaya mubweyango bwomuundu oyo, ne khasi ndelaya khulwange mwene, arali khulwo budekhere bwange.
\v 6 Khulwo khuba esie mba ndenya okhwelaya khasi ndakhabere omusiru khaba, khubeera mboola obwadieri. Arali ndeyikalira mbwe omuundu arambalira okhira kala akaboona kose akabulira khwesie.
\v 7 Ne ndaranyoola khwebulisia khubira esikero, okhulondana nende obungi bwobufwimbuli obwa ndaberesebwa elibwa mumubiri, omurumwa wa Sietani mbwe anyoole okhusandia, ne ndarelaya okhubira sikero
\v 8 Ne khulondana nende esiindu esio, ndasaba Omwami makhabi kadaru mbwe anyoole khusindusiamo.
\v 9 Naye nayamboolera ari, obukoosia bwange bukhuyera, khulwo khubeera bunyala bwange buliriranga mubudekhere. Khulwako ndebulisiria obudekhere bwange mubusangaafu bungi, ne obunyala bwa Kirisito bunyoole khuba akulu wange.
\v 10 Khulwako, esie kheresibwa nende obudekhere, nende khulekeresibwa, nende amasira, nende amateemo, nende obudinyu, khulwo khubeera Kirisito. Khulwo khuba nindi mudekhere khumbandi nende amaani.
\p
\v 11 Esie mbere omusiru, ne ningwe mukholere okhuba endio, khulwo khubeera biakhoyera mbwe esie fumisibwe alala ninangwe. khubeera khasi ndali asi wabarume bakhongo mulikhwa liosi, kata nindarali esindu.
\v 12 Nibwadieri mbwe ebikhole biabarume biakholwa akari weng'we mubwedemberefu bwoosi, mubikhole nende ebiukisia nende amangalimwa.
\v 13 Khubeera nisina esiamwalemerwa okhira amakanisa kandi, arali khulwo khuba esie sindabayekhera? Mundekhere mwako.
\p
\v 14 Lingeera, lino ni likhabi lia khadaru esie khuba murekekhe okhwicha oweng'we, ne khasi ndabayekhera. khulwo khuba khasi ngonyanga ebiindu bieng'we, arali ngonyanga eng'we, khubeera khasi bikhoyera abaana khubiikhira abebusi babwe imbikhiro, arali abebusi nibo bakhoyere babikhire abaana babwe.
\v 15 Esie nange ndasalania mubusangafu, khandi ndasalaania khulwo khubeera emioyo kieng'we. Ne ngolwa njiririra khubakheera lukali, khukherwa khwange khududuyanga?
\p
\v 16 Ne ngolwa kali, esie khasi ndabayekhera, arali ndabadiira mububeeyi khulwa makesi kandali nako.
\v 17 Ne esie ndabukulakho esiindu khweng'we khubirira khumuundu owandabarumira?
\v 18 Ndakania Tito, ne ndamuruma alala nende omusiani wefwe undi. Tito yababukulakho esiindu? kose khasi khwakenderanga mu Roho mulala ula nende mubusenero bula bula?
\p
\v 19 Mupaara mbwe kata bulona khudakha khwelolesia khweng'we? Khulomalomaanga imberi wa Nasaye mukari mwa Kirisito. Ne kene ako koosi ni khulwo khubombakha eng'we abakheerwa.
\v 20 Khulwo khubeera ndi nende oburi mbwe ninjicha khasi ndabanyoola mumbeera eya ndakha, ne mbonekhane khweng'we kori olwa muradakha, ndareecha ndanyoola amayingani nende imbalikha, nende lirima, nende busoolo, nende khukhikhirao, nende khubulula, nende khweninia, nende milwano,
\v 21 nange ninjicha khandi, Nasaye wange areecha yanjikhia asi imberi weng'we, ndelalikhira abaandu bangi abokhola mabi khurula khale, ne khasi bekanira obumali bwabwe, nende obuyirani, nende obulaangu bwabakhola.
\c 13
\cl Omuliango 13
\p
\v 1 Lino ni likhabi liange elia khadaru okhwicha oweng'we. Buli likhuwa lichia khulirira khu minwa kia baloli babiri kose badaru.
\v 2 Malire khubabolera, khandi kori nga ndaliwo elikhabi lia khabiri, khandi kario nindaraliwo, mbolera bala abakhola echimbi khurula mukhuchaaka, nende abandi boosi, mbwe ninjicha, khasi njia khubelalikhira khaba,
\v 3 khulwo khuba mukonyaanga esimanyiro sia Kirisito olomalomanga mukari mwange, orali mudekhere khweng'we, arali ali nende obunyala mukari mweng'we.
\v 4 khulwo khuba yabambwa mubudekhere, ne yamenya khulwa maani ka Nasaye. Ne efwe fwesi khuli badekhere mukari mwaye, ne khuchia khumenya ninaye khulwo bunyala bwa Nasaye obuli mukari mweng'we.
\p
\v 5 Mwelingale eng'we abene nibili mbwe muli mubusuubiri, mwemanyirisie abene. Kose khasi mwemanyire eng'we bene, mbwe Yeso Kirisito ali mukari mweng'we? Muraba abakhayibwa.
\v 6 Arali subira mbwe munamanyirisia mbwe efwe khasi khwakhaywa khaba.
\v 7 Bulano khusaba Nasaye mbwe murakhola elibi liosi liosi, khasi bili mbwe efwe khunyoole khubonekhana okhuba abafukirirwe, arali eng'we mukhola elikhoyera, kata efwe nikhuli kori abaandu bakhayibwa.
\v 8 Khulwo khuba efwe khasi khunyala okhukhola likhuwa liosi elirali eliobwadieri, arali ni khubwadieri sa.
\v 9 Khubeera efwe khusangaala nikhuli badekhere, nang'we nimuli nende amaani. Khandi khusaba mbwe lino liolerere khweng'we.
\v 10 Khulwako, esie nyandiika kano nimbulao, ne nimbao, ndarekhonyera obwalaba khulwo bunyala bula obwandaberesibwa nende Omwami, khulwo khumbakha ne khasi ni khulwo khukoka khaba
\p
\v 11 Mukhumala, abakheerwa, muchiririre bilayi, mulirire, mulemisibwe, mube nende mapaaro malala, mumenye mumuleembe, ne Nasaye wobukheeri nende muleembe achia khuba ninang'we.
\v 12 Mukhesanie mukhuchunjunana khutakatifu.
\v 13 Abatakatifu boosi babakhesia. Obukoosia bwo Mwami Yeso Kirisito, nende obukheri bwa Nasaye, nende obusngirani bwa Roho mulafu bube ninang'we mweesi. Amina.