lko_reg/43-LUK.usfm

\id LUK
\ide UTF-8
\h Luka
\toc1 Luka
\toc2 Luka
\toc3 luk
\mt Luka
\c 1
\cl Omuliango 1
\p
\v 1 Khulwo khubeera abaandu bangi baandiikire mubukolofu amakhuwa kala akolerera akari wefwe,
\v 2 kori ngolwa barumikhi be likhuwa lio khuchaaka, abali baloli barukanira akabalola,
\v 3 esie siesi mbwene mbwe nibilayi okhwandiikira ewe omukhuluundu Teofilo obwichufu obwa makhuwa ako, khulwo khuba esie mwene ndakonyere obwadieri obwa makhuwa ako okhurula mukhuchaaka khwako,
\v 4 mbwe onyoole okhumanya obwadieri obwa makhuwa akawekesibwa.
\p
\v 5 Muchinyaanga chia Herode, omuruki wa Ebuyaudi, yaliwo omukukhani mulala owalawangwa mbwe Sakaria, owa Abiya, naye omukhasi waye yali mulala owo lwibulo lwa Haruni owalangwa mbwe Lusabeti.
\v 6 Boosi babiri bali balungifu imberi wa Nasaye, nibachiririra mumalako komwami koosi nende amekesio kaye mubwichufu.
\v 7 Ne khasi bali nende omwana khaba, khulwo khuba Lusabeti yali omukuumba, ne boosi bali abakofu muno.
\p
\v 8 Ne ngolwa yali nakholaanga emirimo kiobukukhani imberi wa Nasaye mubikha biaye,
\v 9 ngolwa biakhoyera ikhola yobukukhani, ikuura yo khwingira munyuumba mwa Nasaye okhusaamba obubani yamukwira.
\v 10 Ne mubikha bia khusaamba obubani, omukaanda kwa baandu boosi kwali erwanyi nibalaama,
\v 11 Malayika wo Mwami yamubonekhera niyemere mukhono mulungi okwo bwali bwa khusambirakho obubani.
\v 12 Ne ngolwa Sakaria yamubona, yali nende obukanakani ne nadiirwa nende oburi.
\v 13 Naye malayika nabolera Sakaria ari oraria khaba, khulwo khuba amalaamo kao kabulirwe, naye omukhasi wao Lusabeti achia okhwibulira omwana musiani, ne eliira liaye ochia khumulaanga mbwe Yokhana.
\v 14 Nawe ochia okhuba nende obusangaafu nende ifuma, ne abaandu bangi bachia osangaalira okhwibulwa khwaye.
\v 15 Khulwo khubeera achia okhuba omukhoongo imberi womwami, khasi achia khung'wa ifini kose ebiindu bio khumesia, ne achia khwichusibwamo Roho mulafu khurula munda mwa ngina.
\v 16 Ne achia khukalusia Baisiraili bangi khu Mwami Nasaye wabwe.
\v 17 Khandi achia kurangirira imberi waye mumwoyo kwa Eliya, nende amaani kaye khulwo Khukalukhania emioyo kia basamwana khukalukhira abaana nende okhufunula amakesi kobalungifu, nende khurekekhera Omwami abaandu.
\p
\v 18 Sakaria naye nabolera malayika ari, njia khumanya endie likhuwa lino? Khulwo khuba esie ndi mukofu, naye mukhasi wange ni mukhuluundu owa chinyaanga chinyiing,
\p
\v 19 Malayika namukalusia naboola ari, esie nesie Gaburieli, owemaanga imberi wa Nasaye, ne ndumirwe mbwe njiche nomanome ninawe, khwekesie amakhuwa malayi kano.
\v 20 Ne lingeera, ochia okhuba omudiimbe, oranyala okhulomaloma, okhuula inyaanga ya makhuwa ako kachia khulirira, khulwo khuba khasi osuubire amakhuwa kange khaba, ne kachia okhulirira mubikha biako.
\p
\v 21 Ne abaandu bali nibalindire Sakaria, nibaukisibwanga khulwo khukhiinda khwaye mukhekalu.
\v 22 Ne ngolwa yarula naranyala okhulomaloma ninabo, bamanyirisia mbwe abwene amalolo mukari mwe ikhekalu, ne yachiririra khwekesia bilolero naranyalirwa okhulomaloma.
\p
\v 23 Ne chinyaanga chiaye echio khukhola emirimo kori ngolwa chiolerera, yachia munyuumba mwaye.
\p
\v 24 Olunyumma lwe chinyaanga echio, omukhasi waye Lusabeti yayera inda niyekisa miosi kirano naboola ari,
\v 25 Kano niko ako Mwami yakholere muchinyaanga chia yabwene okhumalakho echisoni imberi wa baandu.
\p
\v 26 Khu mwosi kwo khusasaba, Nasaye yaruma malayika Gaburieli okhuchia mulidokho lia Galilaya elilangwa mbwe Nasareti, khumukhana musisira owali afukirisanie khudekhisania
\v 27 nende omusaacha owalangwa mbwe Yosefu, owo lwibulo lwa Daudi, ne eliira lio mukhana oyo liali Maria.
\v 28 Yengira munyuumba mwaye naboola ari, muleembe, ewe owaberesebwa obukoosia, Omwami ali ninawe.
\v 29 Naye yaba nende obukanakani muno khulwa makhuwa kaye, niyereeba mumwoyo kwaye ari, amakhuwa kano kafwana karie.
\v 30 Malayika namubolera ari, Maria oraria khaba, khulwo khuba ewe onyolere bukoosia khu Nasaye.
\v 31 Ne lola ochia khuyera inda nende okhwibula omwana musiani, ne liira liaye ochia khumulanga mbwe Yeso.
\v 32 Ne omwene oyo achia okhuba omukhoongo, khandi achia khulangwa omwana wa ula oli akulu, ne Omwami Nasaye achia khumuberesia esisaala sioluyaali esia Daudi samwana.
\v 33 Achia khuruka inyuumba ya Yakobo chinyaanga chioosi, ne obwami bwaye khasi bwakhakame khaba.
\p
\v 34 Maria naye nareeba malayika ari likhuwa lino liakhekholekhane lirie? khulwo khuba esie siri khubakho nende omusaacha.
\v 35 Naye malayika nakalusia namubolera ari, Roho mulafu achia khwicha akulu wao, nende amaani ka ula oli akulu kachia okhufunikha kori esinikha, ne khulwa kene ako sila esichia khwibulwa sichia khulangwa esitakatifu, Omwana wa Nasaye.
\v 36 Khandi lola, omwikho wao Lusabeti yeesi ali nende inda yo omwana musiani mubukofu bwaye, ne kuno ni mwosi kwo khusasaba khu ula owabalangaanga mbwe omukuumba,
\v 37 khulwo khuba libulao likhuwa eliranyalikhana khu Nasaye.
\p
\v 38 Maria naboola ari, lola esie ndi omukholi wo Mwami, kabe khwesie kori ngolwa obolere, naye malayika narulao nabwao.
\p
\v 39 Maria namala narulao lwangu muchinyaanga echio, nachia musialo sie chinguulu mulidokho lala elia Yuda,
\v 40 niyengira munyuumba mwa Sakaria nakhesia Lusabeti.
\v 41 Naye Lusabeti ngolwa yabulira amakhesio ka Maria, akhana khadoro khaduma duma munda mwaye, ne Lusabeti niyechusibwamo Roho mulafu,
\v 42 nalomaloma mudoboosi ikhoongo naboola ari, wanirwe chikhabi akari wa bakhasi, omwibulwa wa inda yao yeesi yanirwe chikhabi.
\v 43 Elikhuwa lino liekholekhane lirie, okhuula ngina Omwami wange yanjichira?
\v 44 Khulwo khuba kori idoboosi ya makhesio kao yingire mumariwi kange, akhana khadoro khadumire muunda mwange mubusangaafu.
\v 45 Ni weyikhabi ula osuubire, khulwo khubeera ako Mwami yamubolera kachia khusirisibwa.
\p
\v 46 Maria naboola ari, omwoyo kwange kukinguula Omwami,
\q
\v 47 khandi omwoyo kwange kusangaalira Nasaye omuonia wange
\q
\v 48 Khulwo khuba abwene obudekhere bwo mukholi waye, ne khuchaaka bulano, echinjibulo chioosi chichia khunaanga mbwe owanirwa chikhabi,
\q
\v 49 khulwo khuba ula owa maani akholere amakhongo, ne eliira liaye nililafu.
\q
\v 50 Esisa siaye sili nende abo abamwechomia khu chinjibulo chioosi.
\q
\v 51 Yekesie amaani khu mukhono kwaye, akabukhanie amapaaro ke mioyo kia bala abali nende isuunga mumioyo kiabwe.
\q
\v 52 Akokere abamaani khurula khu bisaala biabwe, ne akingulire abadekheere.
\q
\v 53 Yekusie abali nende injala khu malayi, ne bala abali nende emiandu abarusisieyo mikhono mikhaya.
\q
\v 54 Akhonyere Isiraili omukholi waye, mbwe anyoole khuwichulisia esisa siaye,
\v 55 kori ngolwa yabolera basefwe, Ibraimu nende olwibulo lwaye chinyaanga chioosi.
\p
\v 56 Naye Maria yekhala ninaye khulwe miosi kidaru, olunyuma namala nakalukha munyuumba mwaye.
\p
\v 57 Indukho ya Lusabeti eyo khwibula ngolwa yola, yebula omwana musiani.
\v 58 Abamenya ambi ninaye alala nende abekho baye, babulira mbwe Omwami amuberesie esisa siaye, basangaala alala ninaye.
\v 59 Inyaanga ya munane ngolwa yola, beecha khukheba omwana, ne badakha okhumukulikha mbwe Sakaria eliira lia samwana.
\v 60 Arali ngina naye yabakania ari khaba, khasi bili birio, arali analangwa mbwe Yokhana.
\v 61 Nibamubolera bari abulao omuundu yeesi mubekho bao oli nende eliira elio.
\v 62 Bareeba samwana khubilolero ngolwa yakhadakha omwana waye alangwe.
\v 63 Naye nasaba akhabao niyandikakho ari, eliira liaye ni Yokhana. Abaandu boosi nibaukisibwa.
\v 64 Ne okhuchakira ebikha ebio omunwa kwaye nende lulimi kwekulwa, nachaaka okhulomaloma nafumia Nasaye.
\v 65 Abaandu boosi abali nibamenya ambi ninabo, badiirwa nende oburi, ne amakhuwa ako nikasalasibwa musialo siechingulu esia Buyudea.
\v 66 Boosi ababulira, bakageenga mumioyo kiabwe, nibereeba bari omwana uno achia khuba ofwana arie? Khulwo khuba omukhono kwo Mwami kubeere ninaye.
\v 67 Ne Sakaria oli samwana yechusibwamo Roho mulafu, ne yarusia obunabii naboola ari,
\q
\v 68 Omwami Nasaye owa Baisiraili afumisibwe, khulwo khuba yechere okhununula abaandu baye.
\q
\v 69 Arukinguliire olwika lwo buonia munyuumbà ya Daudi omukholi waye.
\q
\v 70 Kori ngolwa yaboola khurula mukhuchaaka khubirira khu banabii baye batakatifu,
\q
\v 71 mbwe khunyoole okhuonisibwa khurula mumikhono kia basuku befwe nende bala boosi abarukhaya.
\q
\v 72 Khulwo khukholera abasefwe esisa, nende okhwichulisia lilakaano liaye litakatifu,
\q
\v 73 esilaamo esia yalaamira sefwe Ibraimu,
\q
\v 74 mbwe achia okhurwichira, khunyoole khuonisibwa khurula mumakhono ka basuku befwe, mani khumwinamire nikhubula oburi,
\q
\v 75 muluyaali nende mubwadieri imberi waye chinyaanga chiefwe chioosi.
\p
\v 76 Nawe ewe omwana ochia khulangwa omunabii wa ula oli akulu, khulwo khuba ochia khurangirira imberi wo bweni bwo Mwami khumurereseria chingira chiaye,
\q
\v 77 wekesie abaandu baye obuonia mukhulekherwa chimbi chiabwe.
\q
\v 78 Okhubirira khu sisa sia Nasaye wefwe, esiobulafu burula akulu bwarulirakho,
\q
\v 79 khulwo khukhoseria bala abali musirima nende esinikha sie liifwa, nende okhwimirira amakulu kefwe mungira yo muleembe.
\p
\v 80 Omwana ula naye yakhula ne omwoyo kwaye nikubamo amaani, namenya mulumira okhuula inyaanga ya yabonekhera Abaisiraili.
\c 2
\cl Omuliango 2
\p
\v 1 Muchinyaanga echio, elilako liarusibwa khurula khu Kayisari Agusito mbwe abaandu boosi abomusialo banyoole khweyandikisia ameera kabwe.
\v 2 Ne okhweyandikisia khuno nikhwo okhwali okhwamberi khurula Kirenio naba omuruki wa Shamu.
\v 3 Buli muundu yachia okhweyandikisia mulidokho liaye.
\v 4 Yosefu yeesi yarula Galilaya mudokho lia Nasareti, nachia mudokho lia Daudi elilangwa mbwe Betelehemu, khulwo khuba yali owo lwibulo lwa Daudi,
\v 5 mbwe anyoole okhweyandikisia alala nende Maria omukhasi waye, owa yali nafukirisanie ninaye okhumudekhia, naye yali nende inda.
\v 6 Ne ngolwa yali nasiriyo, echinyaanga chiaye echio khwibula chiolerera,
\v 7 namala niyebula omwana, owamberi waye, namufunikha echingubo chia baana, namwalisia abuunbdu we chingoombe chiliraanga, khulwo khubeera khasi banyoola obweyaango munyuumba ya bakeni.
\p
\v 8 Ne musialo siene esio, baliwo abaayi abali mulwayiro, nibalindire ebiayo musiro.
\v 9 Ne malayika wa Nasaye yabalolekhera, ne oluyaali lwo Mwami nilubakhosia echimbeka chioosi, nibadiirwa nende oburi lukali.
\v 10 Malayika nababolera ari, muraria khaba, khulwo khuba esie bagaamire amakhuwa malayi akobusangaafu bukhoongo, obuchia khuba khu baandu boosi,
\v 11 khulwo khubeera inyaanga yino omuonia wa Kirisito Omwami yebulwe mulidokho lia Daudi khulweng'we.
\v 12 Ne sino sinaba esilolero khweng'we, munayoola omwana naboyerwe muchingubo chio mwana mudoro, niyalisibwe abuundu wechingoombe chiliraanga.
\p
\v 13 Ne mukhwichukhira, abeliyie bo mwikulu nende malayika oyo bali alala nibafumia Nasaye, nibaboola bari,
\q1
\v 14 "Nasaye afumisibwe mwikulu, ne omuleembe kube nende abaandu musialo."
\p
\v 15 Ne ngolwa malayika abo bali nibabwao mwikulu, abaayi bala baboola bari khuchie Betelehemu, khubone eliekholekhane, elio Mwami arwekesie.
\v 16 Nibachia mulwangu nibanyoola Maria nende Yosefu alala nende omwana mudoro ula nakonere abuundu we chingoombe chiliraanga.
\v 17 Ne ngolwa bamubona, balola amakhuwa ka bababolera khuloondana nende omwana oyo.
\v 18 Ne boosi ababulira amakhuwa ka baayi abo bababolera, baukisibwa lukali.
\v 19 Arali Maria naye yakageenga mumwoyo kwaye nachiririra khukapaaramo.
\v 20 Abaayi abo nibamala nibabwao nibafumia nende khulaya Nasaye khulwa makhuwa koosi akababulira nende khubona, ngolwa bali nibabolerwe.
\p
\v 21 Chinyaanga chiaye munane echio khukhebwa ngolwa chiola, yamukulikha mbwe YESO kori ngolwa malayika yamulaanga nasiri okhwibulwa.
\p
\v 22 Ne ngolwa echinyaanga chiaye chio khulabisibwa chiola khuloondana nende amalako ka Musa, bamuyira Yerusalemu okhumura imberi wo Mwami,
\v 23 (kori ngolwa kaandikwa mumalako ko Mwami, mbwe buli mwana musiani owamberi khu ngina achia khurusibwa okhuba mutakatifu khu Mwami;)
\v 24 nende okhurusia esianwa, kori ngolwa malako ko Mwami kaboola, amausi kabiri kose ebimwinyi bia makaburuku bibiri.
\p
\v 25 Ne yaliwo omuundu owali Yerusalemu owalangwa mbwe Simioni, owali mulungifu, owenamiranga Nasaye nalindaanga esisa siaye khu Baisiraili, ne Roho mulafu yali akulu waye.
\v 26 Roho mulafu yali niyamubolera ari khasi achia khubona eliifwa nasiri khubona Kirisito wo Mwami.
\v 27 Ne yamala niyeecha mukhekalu niyemirirwa nende Roho mulafu, ne ngolwa bebusi bareera omwana Yeso mukari, okhumukholera ebienyekhana khuloondana nende emilukha kia malako,
\v 28 yamubukula namukiinga mumakhono kaye, niyebasia Nasaye naboola ari,
\q1
\v 29 bulano Mwami lekhula omukholi wao mumuleembe, kori ngolwa waboola.
\q1
\v 30 Khulwo khuba echimoni chiange chibwene obuonia bwao,
\q1
\v 31 obwa warekekha mumoni chia baandu boosi,
\q1
\v 32 obulafu bwo khukhosia mubialo nende okhuba oluyaali lwa baandu bao Abaisiraili.
\p
\v 33 Ne samwana nende ngina baukisibwa nende kala akaboolwa khuniye.
\v 34 Simioni yabalaamira chikhabi, naboleera Maria oli ngina mwana ari, lingeera uno ageengerewo khulwo khukwa nende okhubuukha khwa bangi Muyisiraili okhuba esilolero esichia khulomalomwakho,
\v 35 olugaanga luchia khwingira mumwoyo kwao khulwo khufunula amapaaro ke mioyo mingi.
\p
\v 36 Ne yaliwo omunabii mukhasi owalangwa mbwe Ana, omukhana wa Fanweli, owo lwibulo lwa Sheri, yali nende emiaka mingi, ne yali amenyere emiaka saba alala nende omusaacha waye khurula nadeekha.
\v 37 Arali bulano yali omukhasi mufwire khulwe miaka amakhumi munane nende kine, ne yadoong'a mukhekalu nalaama nende khusiiba siro nende sideere.
\v 38 Omwene oyo yeecha mubikha ebio nakhubira Nasaye orio, naboleera abaandu bali nibalindirire obununuli Muyerusalemu amakhuwa kaye.
\p
\v 39 Ne ngolwa bamala okhuusirisia kala koosi akenyekhana khuloondana nende amalako ko Mwami, bakalukha Galilaya mudokho libwe elia Nasareti.
\v 40 Omwana naye yakhula niyemeeda mumaani, niyechusibwamo obumanyirisi, khandi obukoosia bwa Nasaye bwali akulu waye.
\p
\v 41 Abebusi baye bachichaanga Yerusalemu buli mwaka mumukholwa kwa pasika.
\v 42 Ne ngolwa yali nende miaka ekhumi nende kibiri, bachia Yerusalemu khulwo khusirisia pasika.
\v 43 Nibamala okhusirisia echinyaanga chioosi, bakalukha ingo wabwe, omwana naye yadoong'a Yerusalemu, arali Yosefu nende ngina mwana khasi bamanya.
\v 44 Baparaanga mbwe ali mumukaanda kwa baandu, nibakeenda olukeendo lwe inyaanga, nibamala nibachaaka okhumukoonya mubekho babwe alala nende mubeecha babwe.
\v 45 Ne ngolwa bakhirwa okhumunyoola, bakalukha Yerusalemu khumukoonya.
\v 46 Lunyuma lwe chinyaanga chidaru, bamunyoola mukhekalu niyekhale akari wa bekesia, nabarekeresie
\v 47 nende khubareeba amareebo. Ne bala boosi abemurekeresia, baukisibwa khuloondana nende obumanyirisi bwaye nende amakalusio kaye.
\v 48 Ngolwa bamubona, baukisibwa lukai, ne ngina namureeba ari mwana wange, khulwa sina orukholeere orio? Lingeera baba wao ninange khubere nikhukhukoonyaanga mukhuberera.
\v 49 Naye yabakalusia naboola ari, mungonyerenge khulwa sina? Khasi mumanyire mbwe bikhoyera okhukhola emirimo kia baba?
\v 50 Arali nabo khasi bamanyirisia akayababolera.
\v 51 Namala nabwo alala ninabo, nibachia Nasareti naye nachirira okhuba asi wabwe, ngina naye yabikha amakhuwa ako koosi mumwoyo kwaye.
\p
\v 52 Naye Yeso yachiririra khwemeeda mumakesi nende mukhukhuula omubiri, nende khufukirirwa imberi wa Nasaye nende abaandu.
\c 3
\cl Omuliango 3
\p
\v 1 Khu mwaka kwa ekhumi nende kirano ekio buruki bwa Kayisari Tiberio, Pontio Pilato nali omuruki wa Buyudea, naye Herodi nali omuruki wa Galilaya, naye omusiani wabwe Filipo nali omuruki wa Itureya nende esialo sia Tarakoniti, nende Lisania omukhoongo wa Abilene,
\v 2 muchinyaanga chia Anasi yali omukukhani mukhongo nende Kayafa, elikhuwa lia Nasaye liolera Yokhana omwana wa Sakaria nali muluumira.
\v 3 Namala nachia musialo siosi esiali ambi nende Yorodani, nayaala obubatisibwi bwe liekanira elirera okhumalao khwe chimbi,
\v 4 kori kaandikwa musitabo sio munabii Isaaya mbwe, idoboosi yo muundu olira muluumira, reresie ingira yo Mwami, kololosie ingira yaye.
\q1
\v 5 Buli likhokho lichia khwichusibwa, buli lugulu nende bigulu bichia khwikhisibwa, bila ebiekoda bichia khukololosibwa, ne bila ebilikho birugu bichia khubaachibwa,
\q1
\v 6 ne abaandu boosi bachia khubona obuonia bwa Nasaye.
\p
\v 7 Ne namala nabolera abaandu bali bachire khubatisibwa ari, eng'we olwibulo lwe chinjukha, ni wina yabalabule okhwirukha elirima liicha?
\v 8 Bulano murusie ebiamo bilondana nende eliekanira, ne murachaaka okhuboola mumioyo kieng'we mbwe khuli nende sefwe Ibraimu, khulwo khubeera babolera mbwe Nasaye anyala khukingulira Ibraimu abaana khurula mumakina kano.
\v 9 Ne bulano iyaywa yimalire khugeengwa khubisina bia misaala, khulwako, buli musaala okuraama ebiamo bilayi, kunaremwa nende khusukunwa mumuliro.
\p
\v 10 Ne omukaanda kwa baandu bamureeba bari, bulano khukhole sina?
\p
\v 11 Naye yabakalusia naboola ari, ula oli nende echikaanju chibiri, aberesie ula obula ikaanju, ne ula oli nende ebiakhulia yeesi akhole ario.
\p
\v 12 Abasololi bomusolo bosi beecha okhubatisibwa, nibamureeba bari, omwekesia, efwe nafwe khukhole sina?
\p
\v 13 Naye nababolera ari, murarosia esiindu siosi khukhira kori ngolwa mwabolerwa khukhola.
\p
\v 14 Abasikari bosi bamureeba bari nafwe khukhole sina? Naye nababolera ari, murabonera omuundu khaba, kose murasitaaka omuundu khu makhuwa kobubacha, khandi mwoseresebwe nende omuruungo kweng'we.
\v 15 Abaandu ngolwa bali nibalindiriranga okhwicha khwa Kirisito, bachiririra khupaara amakhuwa ka Yokhana mumioyo kiabwe, nikali mbwe niye Kirisito,
\v 16 Yokhana naye yakalusia nababolera ari, ni bwadieri esie babatisia khu maachi, arali aliwo omuundu wa maani khukhira esie, owandarakhoyera okhubolola echisia chie bilaro biaye, omwene oyo achia khubabatisia khu Roho mulafu nende mumuliro,
\v 17 Owesiuchiro sio muliro sili mumukhono kwaye, achia khwosia obweru bwaye lukali, ne achia khubusia ingaano musiaki siaye, ne amadeere nako achia khukasaamba mumuliro okurasima.
\p
\v 18 Yayalira abaandu khumakerako mangi.
\v 19 Ne ngolwa yalabira Herodi khulwo imbi ya yakhola nende Herodia omukhasi wo musiani wabwe,
\v 20 namala nameeda lino khu kandi koosi, ne naboya Yokhana mumboyero.
\v 21 Ne ngolwa abaandu boosi bamala khubatisibwa, Yeso yeesi yabatisibwa, nalaama, ne elikulu liekukha,
\v 22 Roho mulafu yekha niema akulu waye musilolero sieliusi, ne idoboosi yarula mwikulu niiboola yiri, ewe niwe Omwana wange mukheerwa, owandakherisibwa ninaye.
\v 23 Naye Yeso mwene ngolwa yachaaka okhwekesia, yali nende emiaka makhumi kadaru, abaandu bapaara mbwe ni Omwana wa Yosefu, Omwana wa Eli,
\v 24 omwana wa Matati, omwana wa Lawi, omwana wa Meliki, omwana wa Yana, omwana wa Yosefu,
\v 25 omwana wa Matatia, omwana wa Amosi, omwana wa Nahumu, omwana wa Esili, omwana wa Nagayi,
\v 26 omwana wa Maati, omwana wa Matatia, omwana wa Semeyi, omwana wa Yosefu omwana wa Yuda,
\v 27 omwana wa Yoana, omwana wa Resa, omwana wa Serubabeli, omwana wa Salateli, omwana wa Neri,
\v 28 omwana wa Meliki, omwana wa Adi, omwana wa Kosamu, omwana wa Elimadamu, omwana wa Eri,
\v 29 omwana wa Yoshua, omwana wa Elieseri, omwana wa Yorimu, omwana wa Matati, omwana wa Lawi,
\v 30 omwana wa Simioni, omwana wa Yuda, omwana wa Yosefu, omwana wa Yonamu, omwana wa Eliakimu,
\v 31 omwana wa Meleya, omwana wa Mena, omwana wa Matata, omwana wa Natani, omwana wa Daudi,
\v 32 omwana wa Yese, omwana wa Obedi, omwana wa Boasi, omwana wa Salimoni, omwana wa Nashoni,
\v 33 omwana wa Aminadabu, omwna wa Aramu, omwana wa Hesironi, omwana wa Peresi, omwana wa Yuda,
\v 34 omwana wa Yakobo, omwana wa Isaaka, omwana wa Ibraimu, omwana wa Tera, omwana wa Naholi,
\v 35 omwana wa Serugi, omwana wa Ragau, omwana wa pelegi. omwana wa Eberi omwana wa Sela,
\v 36 omwana wa Kenani, omwana wa Arifakisadi, omwana wa Shemu, omwana wa Noa, omwana wa Lameki,
\v 37 omwana wa Mitusela, omwana wa Enoko, omwana wa Yeradi, omwana wa Mahalaleli, omwana wa Kenani,
\v 38 omwana wa Enosi, omwana wa Seti, omwana wa Adamu, omwana wa Nasaye.
\c 4
\cl Omuliango 4
\p
\v 1 Naye Yeso niyechusibwemo Roho mulafu, yakalukha khurula muyorodani niyemirirwa nende Roho okhuchia muluumira,
\v 2 khulwe chinyaanga amakhumi kane ne Sietani namuteema. Muchinyaanga echio khasi yalichaanga esiindu siosi siosi, ne mukhumalirikha injala yamuluma.
\v 3 Sietani yamubolera ari, nikali mbwe oli Omwana wa Nasaye, bolera elikina lino libe omugaati.
\p
\v 4 Yeso naye nakalusia ari kaandikwa mbwe omuundu khasi achia khumenya khulwo mugaati kwong'ene arali khu buli likhuwa lia Nasaye.
\p
\v 5 Naye sietani namala namuninia akulu wolugulu namwekesia ebiindu bioosi ebio bwaami bwomusialo khubikha bilala.
\v 6 Sietani namubolera ari, ndakhuberesia ebiindu bino bioosi alala nende oluyaali lwabio lwoosi, khulwo khuba bioosi bili mumakhono kange, ne mberesianga omuundu yesi yeesi ngolwa ndakha.
\v 7 Bulano ewe niunyinamira, bioosi binba ebiao.
\p
\v 8 Yeso naye yakalusia naboola ari, kaandikwa mbwe omwinamire Omwami Nasaye wao, omulaame yeng'ene.
\p
\v 9 Namala namuyira Yerusalemu, namugeenga akulu we ikhekalu, namubolera ari, nikali mbwe newe omwana wa Nasaye, duuma mani okwe asi,
\v 10 khulwo khuba kaandikwa mbwe, achia okhuruma malayika baye bakhuliinde,
\v 11 ne bachia okhudiira mumakhono kabwe, oranyoola okhwegumula khukulu khwao khu likina.
\p
\v 12 Yeso naye yakalusia namubolera ari, kabolwa mbwe orateema Nasaye wao.
\p
\v 13 Ne Sietani niyamala khumuteema buli liteemo, yamala nabwao khulwe chinyaanga.
\p
\v 14 Naye Yeso yamala nakalukha Galilaya mumaani ka Roho, amakhuwa kaye nikanyoola khusalaana mubialo biali ambi bioosi.
\v 15 Ne yali niyekesianga muchisinagogi chiabwe, abaandu boosi nibamufumia.
\p
\v 16 Namala nachia Nasareti owayebulwa, ne inyaanga ya isabaato yengira musinagogi ngolwa yali yanala, niyema okhusoma.
\v 17 Bamuberesia esitabo sio munabii Isaaya, nasifunula nakoonya abuundu wa kaandikwa mbwe,
\q1
\v 18 Roho wo Mwami ali akulu wange, khulwo khuba yambakhire amafura khulwo khuyalira abamanani amakhuwa malayi. Yandumire okhuonia abajongisibwa emioyo, khuyalira abali mumboyero okhulekhulwa khwabwe nende okhukalusiria okhubona khwa bawofu, okhubolola ababoywa,
\q1
\v 19 khuboola omwaka kwo Mwami okwafukirirwa.
\p
\v 20 Namala nafunikha esitabo nakalusiria omukholi, niyekhala asi. Ne abaandu boosi abali musinagogi nibamulingeera mumoni.
\v 21 Nachaaka okhubabolera ari, inyaanga yino amaandiko kano kolerere mumarwi keng'we.
\p
\v 22 Abaandu boosi balola nibaukisibwa khulwa makhuwa kobukoosia akarula mumunwa kwaye, ne nibareeba bari, "uno siniye omwana wa Yosefu?"
\p
\v 23 Naye yababolera ari, "manyire munambolera olukaado luboola mbwe, ewe omusirikhi wesirikhe mwene, ne amakhuwa kala koosi akakhwabulira mbwe kekholekhana Kaperanaumu, kakhole ano musialo siao mwene."
\v 24 Nababolera ari, "subira babolere mbwe abulao omunabii ofukirirwanga musialo siaye mwene.
\v 25 Ne babolera mbwe baliiwo abakhasi balekhwa bangi musialo sia Isiraili muchinyaanga chia Eliya, ebikha bie likulu liekalwa khulwe miaka kidaru nende emiosi kisasaba, ne injala yinyiingi yengira musialo sioosi,
\v 26 naye Eliya khasi yarumwa khu muundu yesi yeesi arali khu mukhasi mufwire owa Sareputa musialo sia Sidoni.
\v 27 Khandi, abaandu bo bukere baliwo bangi muisiraili muchinyaanga chio munabii Elisha, ne abulao owalabisibwa arali Namani omuundu wa Shamu.
\v 28 Abaandu bali musinagogi boosi ngolwa babulira amakhuwa ako, badiirwa nende lirima.
\v 29 Nibamala nibasingira, nibamurusia erwanyi welidookho, nibamuyira akulu we sigulu sie lidookho liabwe liombakhwakho, nibadakha khumusindikha asi.
\v 30 Naye yabira akari wabwe, namala nabwao nachia abuundu wandi.
\p
\v 31 Yamala nachia Kaperanaumu, elidookho lia Galilaya, nachiririra okhwekesia buli inyaanga ya isabaato,
\v 32 ne abaandu nibaukisibwa muno khulwa meekesio kaye khulwo khuba elikhuwa liaye liali nende amaani.
\v 33 Ne mukari mwa isinagogi omwo, yalimo omuundu yali nende roho wesikhieno, naye yalira mudoboosi ikhoongo,
\v 34 nabola ari, rulekha, sina esiakhuli ninawe ewe Yeso wa Nasareti? Wichire okhurumala? Khumanyire mbwe oli omulafu wa Nasaye.
\p
\v 35 Yeso yalabira esikhieno naboola ari, funikha omunwa kwao, mani omurulemo. Ne ebikha ebio esikhieno sila siamukoka akari wa baandu, nisimurulamo nisiramunyaalire, nisimala nisibwao.
\p
\v 36 Abaandu boosi baukisibwa, nibamonyana nende okhwereeba bari, lino nilikhuwa sina, khulwo khuba yalabira ebikhieno khubunyala nende amaani nibirula.
\v 37 Amakhuwa kaye kasalaana buli abuundu musialo esio.
\p
\v 38 Namala narula musinagogi, niyengira munyuumba mwa Simoni, Naye masalang'ene Simoni, 'ngina omukhasi waye, yali nadirirwe nende omusuuja lukali, nibamusaba khulwa niye.
\v 39 Naye namala niyeema ambi naye, niyalabira omusuuja kula, nikumala nikumurulamo, ne mubikha ebio, yamala nasingira nabakhalabanira.
\p
\v 40 Ngolwa eliuba liali nilikwa, abaandu boosi abali nende abalwaye abamadekhere kabukhane babarera naye nabageengakho amakhono kaye, ne buli muundu nanyoola okhuona.
\v 41 Ebikhieno biosi biarula mubaandu bangi nibilira nibiboola biri, ewe oli omwana Nasaye. Yeso naye yabialabira nakhaya khubiberesia obweyango bwo khulomaloma, khulwo khuba biamanya mbwe ye niye Kirisito.
\p
\v 42 Ne nibwakhia ichuli, yarula nachia abuundu wa baandu babulao, ne omukaanda kwa baandu nikuchaaka okhumukonya, nibamala niboola abuundu wa yali nibateema okhumukayira okhubwao.
\v 43 Naye yababolera ari, bikhoyera okhuyaala ifanjili ya makhuwa malayi ako bwami bwa Nasaye mumadookho kandi kosi, khulwo khuba ndarumwa khulwa keno ako.
\v 44 Ne yachiririra okhuyaala muchisinagogi chia Galilaya.
\c 5
\cl Omuliango 5
\p
\v 1 Omukaanda kwa baandu kwachia owayali khubulira elikhuwa lia Nasaye, naye yali niyemere khulukuku lwe yinyaanja ya Ganasareti.
\v 2 Namala nabona amaaro kabiri akali indulo we yinyaanja, ne abanaabi nabo bali nibaruliremo nibosianga echinjero chiabwe.
\v 3 Namala niyengira muliaro elala elia Simoni, namubolera ari alisidiekho mukari mwa maachi. Namala niyekhala muliaro nachaaka okhuyalira abaandu.
\v 4 Ngolwa yamala okhuyaala, yabolera Simoni ari, muchie mumaachi mangi mulekhule chinjero chieng'we munaabe eching'eni,
\p
\v 5 Simoni naye yamukalusia namubolera ari, Omwami mukhoongo, khukholere emirimo kio khujoongia esiro siosi, ne khasi khunyolerekho esiindu siosi siosi, arali khulwa elikhuwa liao, ndalekhula echinjero.
\v 6 Ne ngolwa bakhola bario, badiira eching'eni chinyiingi muno okhuula echinjero chiabwe nichichaaka okhukhalikha.
\v 7 Nibalaanga abasiabwe abali muliaro lia khabiiri mbwe beeche babakhoonye, ne bamala beecha nibanyoola okhwichusia amaaro kabiri koosi okhuula nikachaaka okhwibira.
\v 8 Simoni Petero ngolwa yabona amakhuwa ako, yasigama mumakulu ka Yeso, naboola ari, Mwami ndulekho mani obweo, khulwo khuba esie ndi omukholi we chimbi.
\v 9 Khulwo khuba yaukisibwa alala nende abayali nabo, khulwe ching'eni chiabadiira.
\v 10 Yakobo alala nende Yokhana, abaana ba Sebedayo, basangirana nende Simon. Naye Yeso yabolera Simoni ari oraria khaba, okhuchaaka inyaanga yino ochia okhuba omunaabi wa baandu.
\v 11 Ne ngolwa bamala khukalusia amaaro kabwe khundulo, balekhao bulisiindu nibamuloonda.
\p
\v 12 Nali mulidookho lindi, omuundu wo bukere yalimo, ne ngolwa yabona Yeso, yachia nakwa mumakulu kaye, namusaba naboola ari, Mwami, nokheera onyala wanjosia.
\p
\v 13 Yeso namala namudirakho nende omukhono kwaye, naboola ari, ndakha olabisibwe. Ne ebikha ebio obulwaye bwo bukere bwamurulakho.
\v 14 Namala namukania ari, orabolerakho omuundu yesi yeesi, arali chia weyekesie khu mukukhani, mani orusie kori ngolwa Musa yaboola, ne kabe obuloli khu baandu.
\v 15 Amakhuwa kaye kachiririra khusalaana, ne omukaanda kwa baandu bangi kwebusia khulwo khubulira amakhuwa kaye nende okhusirikhwa amalwaye kabwe.
\v 16 Arali yeso yamala narula akari wa baandu, nachia muluumira okhulaama.
\p
\v 17 Inyaanga yindi ngolwa yali niyekesianga, Abafarisayo nende abekesia ba malako khurula muchingoongo chioosi echia Galilaya nende Buyudea, nende Yerusalemu, obunyala bwa Nasaye obwo khuonia bwaliwo.
\v 18 Ebikha ebio, abaandu bandi beecha nibakingire omulwaye owadaraala khusitaanda, nibadakha okhumwingisia mukari mani bamugeenge imberi wa Yeso.
\v 19 Ne ngolwa bakhirwa okhunyoola obweyaango bwo khumwingisia mukari, khulwo mukaanda kwa baandu, banina akulu we sirama, nibafudula esirama, nibamala nibekhia omulwaye nali khu sitaanda imberi wa Yeso.
\v 20 Naye ngolwa yabona obusuubiri bwabwe, yabolera omulwaye ari, olekherwe echimbi chiao.
\p
\v 21 Abaandiki ba malako nende Abafarisayo bachaaka khureebana bari, uno ni wina aboola amakhuwa ka sisinyisio? Ni wina onyala okhulekhera chimbi arali Nasaye yengene?
\p
\v 22 Yeso naye yamanya akabali nibareebananga, namala nakalusia nababolera ari, mwereebananga sina mumioyo kieng'we?
\v 23 Eliangu nilio eliriena? Okhuboola mbwe olekherwe chimbi chiao, kose khuboola mbwe singira obweo?
\v 24 Arali khumunyoole okhumanya mbwe omwana womuundu ali nende obunyala bwo khulekhera echimbi musialo, (yabolera omulwaye wadaarala ula) ari, singira okinge esitaanda sio mani obweo, ochie munyuumba mwao.
\v 25 Ne ebikha ebio yamala niyema imberi wabwe, nakiinga esitaanda sia yali nakonerekho, nabwao khuchia munyuumba mwaye, nafumia Nasaye.
\p
\v 26 Abaandu boosi baukisibwa, nibafumia Nasaye, nibaboola bari, inyaanga yino khubwene amakhuwa makeni, ne oburi bwabadiira lukali.
\p
\v 27 Olunyuma lwa makhuwa ako, yarulao ne nabona omusololi womusolo owalangwa mbwe Lawi, niyekhale abuundu wo khubusia omusolo, ne yamubolera ari noonde.
\v 28 Ne Lawi yamala nalekha ebiindu bioosi namuloonda.
\p
\v 29 Lawi yamala namukholera obukeni bukhoongo munyuumba mwaye, ne khwaliwo nende omukaanda mukhoongo okwa basololi bo musolo alala nende abaandu bandi abangi abali nibanyoola ebiakhulia alala ninabo.
\v 30 Ne abaandiki babwe nende Abafarisayo bemoonya nende abeeka baye nibareeba bari, khuhlwa sina mulia nende okhung'wa alala nende abasololi bo musolo nende abakholi be chimbi?
\p
\v 31 Yeso naye yakalusia nababolere ari, abaandu balamu khasi badakha omusirikhi, arali bala abalwaye.
\v 32 Esie khasi ndeecha khulaanga abalungifu, arali abonooni banyoole okhwekanira.
\p
\v 33 Bamala nibamureeba bari, khulwa sina abeeka ba Yokhana basiibaanga nibalaama amakhabi mangi, nende abeeka ba Babafarisayo, ne abao nabo balia nende okhungwa?
\p
\v 34 Yeso naye yabareeba ari, munyala mwakhola abaandu balangirwe musiserero basiibe ebikha biomwami we siserero ali ninabo?
\v 35 Arali echinyaanga chiicha echio Mwami wesiserero achia okhuba narusibwe akari wabwe, ne mubikha ebio bachia khusiiba.
\p
\v 36 Khandi yamala nababolera olukaado ari, abulao omuundu okhengaanga esicheeere siyakhaa nasonera khungubo ingofu, ne nakhola ario, sila siyakha khasi sinyala okhufwanana nende esikofu.
\v 37 Khandi abulao omuundu owakhachukha ifini yinjaaakha muchupa yingofu, ne nakhola ario, ifini yiba yinaadisia ichupa yingofu, ne yimala yidikha, ne ichupa nayo yisasikha.
\v 38 Ne bikhoyera okhuchukha ifini yinjaakha muchupa yinjaakha, mani bioosi bilindwe.
\p
\v 39 Khandi abulao omuundu owakhekoomba ifini yinjaakha niyakhamala okhungwa ifini yikhale, khulwo khuba achia khuboola ari, yikhale ni yindayi muno.
\c 6
\cl Omuliango 6
\p
\v 1 Inyaanga ndala eya isabaato eya khabiri ngolwa Yeso yali nabira akari weindalo, abeeka baye bafunaka amadimwa, nibakasia mumakhono kabwe nende khukalia.
\v 2 Naye balala khu Bafarisayo babareeba bari, khulwa sina mukhola ilirafukirirwa inyaanga ya isabaato?
\p
\v 3 Yeso naye yabakalusia nababolera ari, khasi mwasomakho kala aka Daudi yakhola ngolwa injala yali niyimuluma alala nende bala abayali ninabo?
\v 4 Kori ngolwa yengira munyuumba mwa Nasaye, namala nabukula emigaati kieliekesio nalia nende abasie, ne khasi biakhoyera okhulia arali abakukhani bong'ene.
\v 5 Namala nababolera ari, Omwana womuundu niye Omwami we isabaato.
\p
\v 6 Khandi inyaanga ya isabaato yindi yengira musinagogi niyekesia, ne yalimo omuundu womukhono kwaye musaacha kwali nikwafwirikhirira.
\v 7 Ne abaandiki ba malako nende Abafarisayo bali nibamulingeranga mbwe banyoole okhubona nikaba mbwe achia khumuonia inyaanga ya isabaato, mani banyoole esifune siokhumusitaaka.
\v 8 Yeso naye yamanyirisia amapaaro kabwe, namala nabolera omuundu ula owa mukhono kwaye kwali nikwafwirikhira ari singira weme akari, ne namala nasngira niyema.
\v 9 Yeso yamala nababolera ari, esie bareeba mbwe, bikhoyera okhukhola amalayi inyaanga ya isabaato, kose okhukhola amabi, okhuonia omwoyo kose okhukusasia?
\v 10 Yabalingeera mumoni chiabwe echimbeka chioosi, namala naboolera omuundu ula ari, kololosia omukhono kwao, naye nakukololosia, ne omukhono kwaye nikumala nikuba ebilayi.
\v 11 Elirima liabadiira ne nibareebana bari, khukhole khurie Yeso uno.
\p
\v 12 Ne muchinyaanga echio, Yeso yarula nachia okhulaama mulugulu, ne esiro siosi yali nalaama Nasaye.
\v 13 Ne esialo nibwakhia, yalaanga abeeka baye, namala nalobola ekhumi nende babiri akari wabwe, abayalanga ari abarume,
\v 14 Simoni owayalaanga eliira lia khabiri mbwe Petero, nende Andereya omusiani wabwe, nende Yakobo alala nende Yokhana, nende Filipo alala nende Batulumayo,
\v 15 nende Matayo alala nende Tomasi nende Yakobo wa Alufayo, nende Simoni olwangwa mbwe Seloti,
\v 16 nende Yuda wa Yakobo, nende Yuda Isikarioti owakhoba Yeso
\p
\v 17 Yamala niyekha alala ninabo, niyema abuundu wesiindu sibulao, alala nende abeeka baye bangi, nende omukaanda kwa baandu bangi abarula mubuyaudi yoosi nende Yerusamu, nende khulukuku lwe yinyaanja ya Tiro nende Sidoni, abachia okhubulira amakhuwa kaye, nende okhuonisibwa amalweye kabwe,
\v 18 nende bala abanyasibwanga nende ebikhieno boosi baonisibwa.
\v 19 Ne abaandu boosi badakha okhumudirakho khulwo khubeera amaani kamurulangamo nikasirikha abaandu.
\v 20 Namala nakingula echimoni chiaye nalingeera abeeka baye naboola ari, muli nende echikhabi eng'we abamanani khulwo khuba obwami bwa Nasaye nibweng'we.
\v 21 Muli nende echikhaba eng'we muli nende injala bulano, khulwo khuba muchia okhwikusibwa. Muli nende echikhabi eng'we mulira bulano, khulwo khuba muchia okhuchekha.
\p
\v 22 Muli nende echikhabi eng'we aba baandu bachia khubasuikhira, nende okhubakabula, nende okhubaalabira nibasukuna eliira lieng'we erwanyi kori nga elikhuwa limaanu, khulwo khubeera Omwana womuundu.
\v 23 Musangaalire inyaanga yila nimuduma duma, khulwo khuba esianwa sieng'we mwikulu nisikhoongo, khandi abasabwe bakholera abanabii akene ako.
\p
\v 24 Arali ni uuwi khweng'we muli nende emiandu, khulwo khuba mumalire okhunyoola omuruungo kweng'we.
\v 25 Ni uuwi khweng'we mwikuru bulano, khulwo khuba muchia okhuba nende injala. Ni uuwi Khweng'we muchekha bulano, khulwo khuba muchia okhuberera nende okhulira.
\v 26 Ni uuwi khweng'we aba baandu bachia okhubafumia, khulwo khuba basabwe bakholera abanabii bobubacha akene ako.
\p
\v 27 Arali babolera eng'we mubulira mbwe, mukheere abasuku beng'we, ne mukholere amakhuwa malayi bala ababasuikhira,
\v 28 mwanire echikhabi bala ababachuuba, mulaamire bala abarabadakha.
\v 29 Ula okhupaama olukhofi khuluseya, mukalukhanirie oluseya lundi lwosi, naye ula okhunyuula ingubo yao, oramukayira okhubukula ikaanju yosi.
\v 30 Beresia buli okhusaba, naye okhunyuula, oradakha mbwe akhukalusirie.
\v 31 Khandi mukholere abaandu kala akamweenya babakholere.
\p
\v 32 Ne nimukheera bala ababakheera muba mwekesia esisa siliena? khulwo khuba abakholi be chimbi bosi bakheera bala ababakheera.
\v 33 Eng'we nang'we nimukholere amalayi bala ababakholeraanga malayi, muba mwekesia esisa siliena? Abakholi be chimbi bosi bakholanga kene ako.
\v 34 Ne nimweyosia abaandu ebiindu nimudakha ikhunyoloa obukhala, muba mwekesia esisa sliena? Abakholi be chimbi bosi beyosianianga nibadakha babakalusirie bario.
\v 35 Arali mukheere abasuku beng'we, mukhole amalayi, nimweyosia muradkha khurungwa, ne esianwa sieng'we sichia okhuba esikhoongo, nang'we muchia okhuba abaana ba ula ali akulu, khulwo khuba ye nomulayi khubala abaramwebasia nende abonooni.
\v 36 Khulwa kene ako, mube nende esisa kori ngolwa Sengwe ali nende esisa.
\p
\v 37 Murakhalakira ne mwesi khasi mwakhakhalakirwe, murakhalakira esiina ne mwesi khasi mwakhakhalakirwe, mulekhere ne mwesi munalekherwa.
\v 38 Muberesie abaandu ebiindu, ne mwesi munaberesibwa, esikero siichule nende khusinyirwa okhuula okhwidikha, ako niko aka baandu banababeresia khu birifu bieng'we. khulwo khuba esikero sila esia mukereramo, nisio esimuchia khukererwamo.
\p
\v 39 Namala nababolera olukaado ari, omuundu muwoofu anyala yemirira omuwoofu wasie? Sibaba banakwa muliina boosi babiri?
\v 40 Omweeka khasi abechaanga akulu womwekesia waye, arali namala okhwekesebwa mubwichufu achia okhuba kori omwekesia waye.
\p
\v 41 Bulano khulwa sina olingeera esiindu sili mumoni mwo wasio ne khasi olingeera okuundu kuli mumoni yao omwene? Khandi wakhabolera orie owasio ori, lekha male esiindu sili mumoni mwao, ne khasi olingeera okuundu kuli mumoni mwao omwene?
\v 42 Ewe omwekaadi, rangira mberi orusie okuundu kuli mumoni mwao, khwonyoole okhubona bilayi esiindu sili mumoni mwowasio nende khusirusia.
\p
\v 43 Khulwo khuba kubulao omusaala mulayi okwamaanga ebiamo bimaanu, kose omusaala mumaanu okwamaanga ebiamo bilayi,
\v 44 ne buli musaala kumanyikhananga khuloondana nende ebiamo biakwo, khulwo khuba abaandu khasi bakhafuna esiamo khurula khu musaala kwa mabwa, khandi khasi banyala okhufuna omusabibu khurula khu muchongooma.
\v 45 Omuundu mulayi arusianga amakhuwa malayi khurula mumbikhiro yo mwoyo kwaye, naye omuundu mumaanu arusianga obwoni khurula mumbikhiro yaye eyo bwoni, khulwo khubeera omuundu alomalomaanga akechusibwe mumwoyo kwaye.
\p
\v 46 Khulwa sina munangaanga muri, Omwami, Omwami ne khasi mukhola akababolera?
\v 47 Ndabekesia esilolero siabuli muundu yanjichakho nabulira akaamboola nende okhukakhola.
\v 48 Omuundu oyo ali kori ula omuundu wombakha inyuumba, owayaba asi lukali, nende khugeengao omuse khulwaanda, ne ifula niyiicha, omwalo nikubira khunyuumba yila nende amaani, ne nikuranyala okhuyidengeyia, khulwo khuba yombakhwa ebilayi akulu wolwanda.
\v 49 Naye ula owabulira ne khasi yakhola, afwana kori omuundu ula owombakha inyuumba khuliloba libulamo omuse, ne omwalo nikwicha nende amaani, ne inyuumba yila niyimala niyikwa omwerulo mukhoongo ne obusasikhi bwayo nibukhoongo.
\c 7
\cl Omuliango 7
\p
\v 1 Ne ngolwa yamala okhuboola amakhuwa kaye koosi, kengira mumarwi kabwe, yachia Kaperanaumu.
\v 2 Ne omukholi wo mukhoongo wa mayie mulala owayali yakheera, yali omulwaye ambi okhufwa;
\v 3 ne ngolwa yabulira amakhuwa ka Yeso, yaruma abakofu ba Bayaudi okhuchia okhumusaba mbwe yeeche aonie omukholi waye.
\v 4 Ne ngolwa boola khu Yeso, bamusaba nibaboola bari, akhoyera okhukholerwa kano.
\v 5 Khulwo khuba yakheera esialo siefwe, khandi yarumbakhira isinagoogi.
\p
\v 6 Yeso yamala nachia ninabo. Arali ngolwa yola ambi nende inyuumba, omukhoongo weliiyie yaruma abeeecha baye okhumubolera mbwe, Omwami oresaandia okhwicha munyuumba mwange, khulwo khubeera esie khasi khoyera ewe okhwingira munyuumba mwange.
\v 7 Ne esio nisio esifune esikerere esie mwene nindareecha owoli, arali bulano bola sa elikhuwa ne omukholi wange anaona.
\v 8 Khulwo khubeera esie mwene ndaberesibwa obunyala, ne ndi nende abaskari abali asi wange, ne nimbolera ouundi mbwe, chia nachia, ne khuundi mbwe yicha, niyeecha, khandi nimbolera omukholi wange mbwe, khola sino, nakhola.
\p
\v 9 Ne ngolwa Yeso yabulira amakhuwa ako, yaukisibwa ninaye, namala nakalukhana, nabolera abaandu bali nibamuloonda ari, babolera, esie siri okhunyolakho obusubiri bukhoongo nga buno kata Mubwisiraili.
\v 10 Ne bala abali nibarumirwe ngolwa bakalukha munyuumba, banyoola omukholi yali omulwaye naonere.
\p
\v 11 Lunyuma lwe inyaanga ndala yachia mulidkho lia Naini, ne obungi bwa abeeka baye alala nende omukaanda kwa baandu bachia naye.
\v 12 Ne ngolwa yola ambi nende esiriwa esie lidookho, yaliwo omuundu yali nafwire nakingirwe nayirwa erwanyi, ne yali omwana mudeerwa owa ngina (owali omukhasi mufwire), ne obungi bwa baandu ba mulidookho elio bali alala ninaye.
\v 13 Omwami ngolwa yamubona, yamubonera esisa, namala namuboolera ari, oralira khaba.
\v 14 Namala nadiira khulisanduuku ne bala abali nibalikingira nibamala nibeema sirungi, naye namala naboola ari, omusiani, khubolera mbwe, singira.
\v 15 Ne ula owali nafwire yasingira, nachaaka okhulomaloma. Naye Yeso yamala namuberesia ng'ina.
\p
\v 16 Abaandu boosi badiirwa nende oburi, nibafumia Nasaye nababoola bari, omunabii mukhoongo asingire akari wefwe, khandi Nasaye akendeere abaandu baye.
\v 17 Amakhuwa kaye kasalaana mumbeka chioosi echia Yudeya, nende muchingoongo chioosi echiali ambi.
\p
\v 18 Abeeka ba Yokhana bamwekesia amakhuwa ako koosi.
\v 19 Ne Yokhana naye yalaanga abeeka baye babiri, nabaruma khu Yeso okhumureeba mbwe, ewe newe ula okhoyeera okhwicha, kose khuliinde oundi?
\p
\v 20 Ne ngolwa bola owa Yeso yali, baboola bari, Yokhana omubatisia arurumire khwiche khukhureebe mbwe, ewe newe ulia okhoyeera okhwicha, kose khuliinde oundi?
\p
\v 21 Ne mubikha ebio, yaonia amalwaye ka baandu bangi, nende obudinyu, nende ebikhieno, khandi abaofu banyalirwa okhubona.
\v 22 Yeso naye yabakalusia nababolera ari, muchie muboolere Yokhana kala akamubwene nende okhubulira, abaofu banyalirwa okhubona, abalema bakeenda, abo bukere balabisibwa, abadiimbe babulira, abafu balamusibwa, abamanani bayalirwa ifanjili.
\v 23 Niweyakhabi ula omuundu orasinyisibwe ninasie
\p
\v 24 Olunyuma lwa barumwa ba Yokhana khubwao, yachaaka okhubolera omukaanda kwa baandu amakhuwa ka Yokhana, nabareba ari mwarulaanga nimuchia musichiimi okhulola sina? elikada nilidengeyisibwa nende muyaka?
\v 25 Kose mwarula okhuchia khubona sina? Omuundu yali afwalire ebiefwalo bilayi? Mulingeere, abaandu be biefwalo bilayi, abamenyaanga obulamu bwokhwesangaasia, bali mumadaala ka baami.
\v 26 Kose mwarula okhuchia khubona sina? Omunabii? Babolera obwadieri mbwe, ni ula okhira omunabii
\v 27 Omwene oyo niye owa kano kaandikirwa mbwe, lola nduma omurumwa wange imberi wao, ochia okhurereseria ingira.
\p
\v 28 Khu kario babolera mbwe, akari wa abo abebulwa nende omukhasi abulao omunabii mukhoongo okhukhira Yokhana mubatisia: arali oyo oli mudidi mubwami bwa Nasaye ni mukhoonga okhumukhira.
\p
\v 29 Ne ngolwa abaandu boosi alala nende abasololi bo musolo abamubulira, bafukirira obwadieri bwa Nasaye, khulwo khuba bali nibabatisibwe nende Yokhana.
\v 30 Arali Abafarisayo alala nende abamalako, bakhaya amakerako ka Nasaye, khulwo khuba khasi babatisibwa nende Yokhana
\p
\v 31 Omwami yamala nareeba ari ngeranisie abaandu bo lwibulo luno nende sina? Bafwanana nende siina?
\v 32 Bafwanana nende abaana beekhala musiiro, nibalaanga abasiabwe, nibababolera bari, khubakhubiire olwika, nang'we khasi mukhinire khaba, khuberere, nang'we khasi mulirire khaba.
\v 33 Khulwo khuba Yokhana mubatisia yeecha naralia omugaati kose okhungwa ifini, nang'we nimuboola muri ali nende sietani.
\v 34 Omwana wo muundu yechere, alia nende okhung'wa, ne bulano muboola muri, lola owokuliira uno, omung'wi we ifini, omwiicha wa basololi bomusolo nende abakholi bechimbi.
\v 35 Arali obumanyirisi nabwo bumanyikhane okhuba obulungifu khu baana baye boosi.
\p
\v 36 Omuundu mulala khubafarisayo yamwingisia okhuchia khulia ebiakhulia munyuumba mwaye, ne yamala niyeengira munyuumba yo mufarisayo oyo, niyekhala okhulia ebiakhulia.
\v 37 Ne, lingeera, omukhasi mulala mulidookho elio, owali omukholi wechimbi, ngolwa yabulira mbwe ali khulia ebiakhulia munyuumba yomufarisayo oyo, yareera ichupa ya mafura kesing'aari.
\v 38 Namala niyeema inyuma ambi nende amakulu kaye, nakapanguusiria elifwiri liaye elio khumurwe, nachunjuna amakulu kaye nende khukabakha amafura kesing'aari kala
\v 39 Ne omufarisayo owamulaanga ngolwa yabona amakhuwa ako, yaboola mumwoyo kwaye ari, omuundu uno aba mbwe nomunabii niye, yakhamanyirisie mbwe omukhasi uno ni wina, khandi ali nende ebiima bifwana birie, khandi nomukholi wechimbi.
\p
\v 40 Yeso naye yakalusia namubolera ari, Simioni, ndi nende elikhuwa eliandakha okhureeba. Naye naboola ari, omwekesia, liboole.
\v 41 Namala naboola ari, omuundu mulala owokhweyosia yali nende abaandu ba makobi kaye babiri, mulala yali namubaanja echidinari echimia chiraano, ne owakhabiri naye makhumi karaano.
\v 42 Ne boosi ngolwa bali nibabula esiindu sio khuruunga, yabalekheera boosi babiri mubwadieri, bulano mbolere mbwe ni wina khunibo ochia okhumukheera lukali?
\p
\v 43 Simioni naye yakalusia naboola ari, mbaara mbwe ni ula owalekherwa echinyiingi. Yeso namala namubolera ari okhalaake ebilayi.
\v 44 Yeso yamala nakalukhanira omukhasi ula, naboolera Simioni ari, obona omukhasi uno? Esie nyingire munyuumba mwao muno, ne khasi umberesiekho amaachi kokhwosia amakulu kange, ne omukhasi uno naye yosisie amakulu kange niyekhonyera amasika kaye, khandi akapangusirie elifwiri lio khu murwe kwaye.
\v 45 Khandi ewe khasi unjunjuunire khaba, ne omukhasi uno khasi yakaame okhuchunjuuna amakulu kange khuchaaka ngolwa nyingiire munyuumba muno.
\v 46 Khandi khasi ombakhirekho amafura khu murwe kwange: arali omukhasi uno naye abakhire amakulu kange mafura kesing'aari.
\v 47 Khulwa kene ako, khubolera mbwe alekheerwe echimbi chiaye echili chinyiingi, khulwo khuba akheerere lukali, naye ula olekherwe echindidi, akheraanga budidi.
\v 48 Namala nabolera omukhasi ula ari, "olekheerwe echimbi chiao."
\p
\v 49 Abwene ao, bala abali nibalichaanga alala ninaye, bachaaka okhweraaba mumioyo kiabwe bari, "uno naye ni wina olekhera kata echimbi?"
\p
\v 50 Yeso yamala nabolera omukhasi ula ari, "obusuubiri bwao bukhuonisie, bwao nende omuleembe."
\c 8
\cl Omuliango 8
\p
\v 1 Olunyuma lwa makhuwa ako, yachiririra okhukeenda mumadokho nende muchingoongo nayaala ifanjili yo bwami bwa Nasaye, ne ekhumi nende babiri bali alala ninaye,
\v 2 nende abakhasi bangi abali nibaonisibwe khurula mubikhieno nende obudekhere, abene abo ni Maria owalangwa mbwe Magadalena, owarusibwamo ebikhieno saba,
\v 3 nende Yoana omukhasi wa Kusa, omukholi wa Herodi, nende Susana, alala nende abandi bangi, abali nibamukhalabaniranga khulwe biindu biabwe.
\p
\v 4 Omukaanda kwa baandu ngolwa kwabukanana, alala nende bala abarula mubuli lidookho okhwicha owayali, yababolera olukaado ari,
\v 5 omuraaki yarula okhuchia khuraaka imwo yaye, ne ngolwa yali naraaka, eyindi yakwa ambi nende ingira, niyisenakirwa, ne amayoni komumiyaaka nikayilia.
\v 6 Eyindi yakwa khulwaanda, ne ngolwa yamera, yoma khulwo khuranyoola obunyifu.
\v 7 Eyindi yakwa akari wa mabwa, ne amabwa kosi kamera alala nayo, ne nikayifwinya.
\v 8 Eyindi yakwa muliloba lilayi, niyinyoola okhumera, niyaama lukali amakhabi imia, ne ngolwa yali nabolaanga kene ako, yakingula idoboosi yaye naboola ari, ula oli nende amarwi kokhubulira, abulire.
\p
\v 9 Abeeka baye bamala nibamureeba bari, olukaado olwo lwekesia sina?
\v 10 Naye yaboola ari, eng'we mwaberesebwa okhumanya akobwekisi bwobwami bwa Nasaye, arali abandi nabo khu njingaado, mbwe nibabona barabona ne nibabulira baramanyirisia.
\p
\v 11 Bulano amekesio kolukaado olwa niko kano; imwo nilio elikhuwa lia Nasaye.
\v 12 Bala abali ambi nende ingira nibo ababuliranga, ne olunyuma Sietani yeecha namalamo elikhuwa elio mumioyo kiabwe, mbwe baranyoola okhusuubira nende khuonisibwa.
\v 13 Ne bala abali khulwaanda nibo bala abasangalaanga nibabulira elikhuwa, arali babula emisi, basuubiraanga sa khulwe bikha bidiidi. ne ebikha bio khuteemwa nibiicha nibakwa.
\v 14 Ne imwo yakwa mumabwa nibo bala ababuliraanga, ne khulwo khuchiririra, badiirwa nende amanyakhano nende emiandu, nende isangaalo yobulamu buno, nibaranyalirwa okhwama ebiamo ngolwa bikhoyera.
\v 15 Ne yila eyili muliloba lilayi, nibo bala ababuliraanga elikhuwa mubukololofu mumioyo kiabwe, ne balidiira, nibamala baama ebiamo bio bwesimirifu.
\p
\v 16 Abulao omuundu owakhianga itaara namala ayifunikha nende esiindu, kose khuyigeenga akulu we imeesa mbwe abengiramo banyoole okhubona bulafu bwayo.
\v 17 Khulwo khuba libulao lila eliekisa elirakhafunulwe; kose eliakisbwa elirakhamanyikhane nende khurusibwa abulafu.
\v 18 Khulwako mulingeere kori ngolwa mubulira, khulwa khuba ula oli nende esiindu achia khuberesebwa, naye ula abula esiindu achia khunyulwa kata sila esiaparisibwa okhuba nasio
\p
\v 19 Naye ngina nende abasiani babwe bachia abuundu wa yali, arali khasi banyalirwa okhusuda ambi ninaye khulwo khubeera obungi bwa baandu.
\v 20 Abaandu bamubolera bari mama wao alala nende abasiani beng'we bali erwanyi beenya okhubona.
\p
\v 21 Naye yabakalusia naboola ari, mama nende abasiani befwe nibo bano ababulira elikhuwa lia Nasaye nende khulikhola.
\p
\v 22 Ne inyaanga ndala yengira muliaro alala nende abeeka baye, nababolera ari, khwambukhe khuchie ingerekha weinyanja. Bamala nibachaaka olukeendo.
\v 23 Ne ngolwa bali nibachia, echindoolo chiamuyira. Omuyaka mungi kwachaaka okhuucha munyaanja, eliaro nilichaaka okhwichulamo amaachi, nibenyoola mubudinyu
\p
\v 24 Abeeka baye bamuchira, nibamusingisia, nibamubolera bari, Omwekesia, Omwkesia, khusasikha. Naye yasingira niyalabira muyaka nende mafinda ka maachi, nibimala nibiakama, nikhuba nende obwedemberefu.
\p
\v 25 Namala nabareeba ari, obusuubiri bweng'we buliena? Arali nabo badiirwa nende oburi, nibauka lukali, nibarebana abene khu bene bari, uno ni wina, owalabira kata muyaka nende amaachi nibimuria?
\p
\v 26 Bamala niboola khulukuku lwomusialo sia Bagerasi, esili imberi wa Galilaya.
\v 27 Ne ngolwa Yeso yola khulukuku, yabukanana nende omuundu mulala owa mulidookho elio, owalimo ebikhieno, orafwalaanga chingubo khulwechinyaanga chinyiingi, khandi khasi yamenyaanga munyuumba, arali mubirindwa.
\p
\v 28 Ne ngolwa yabona Yeso, yakhuba esioka, nakwa imberi waye, naboola mudobosi ikhoongo ari, ndi nende sina ninawe ewe Omwana wa Nasaye oli akulu? Khusaba mbwe orasandia khaba.
\v 29 Khulwo khuba Yeso yabolera esikhieno esio ari sirule mumuundu oyo. khulwo khubeera siali siamudiira mubikha bingi, kata yalindwanga naboyerwe eminyororo nende chipiingo, ne yakhalakaanga ebiindu biayali naboyerwe, khandi esikhieno simuyiraanga muluumiri.
\p
\v 30 Yeso yamureeba, nabola ari, eliira liao nilio wina? Naye yakalusia ari, eliira liange nilio Lejoni, khulwo khuba ebikhieno bingi biali biamwingiramo.
\v 31 Nibimwekweeda mbwe arabilagira okhuchia emagoombe.
\v 32 Ne echimbiichi chinyiingi chialiwo nichiayaanga khulugulu, ne ebikhieno biamusaba obweyaango bwo khuchingiramo, naye nafukirira.
\v 33 Ebikhieno biamala nibirula mumuundu ula, nibingira muchimbiichi, ne eliicho liechimbiichi liamala niliirukha chimbiro, nichiikha nende amaani, nichichia asi mulisiba munyanja nichifwiramo.
\p
\v 34 Abachilisianga ngolwa babona akekholekhana, beerukha chimbiro okhuyira amakhuwa ako mulidookho nende muchingongoo.
\v 35 Abaandu bamala nibarula okhuchia khubona akali nikekholekhane, bachia khu Yeso, nibanyoola omuundu ula owebikhieno biarulamo niyekhale mumakulu ka Yeso, niyefwalire echingubo, khandi nali nende amakesi kaye; ne banyoola okhudiirwa nende oburi.
\v 36 Ne bala abalola ngolwa kekholekhana bababolera kori ngolwa omuudu owali niyaboywa nende esikhieno yaonisbwa.
\v 37 Ne omukaanda kwoosi okwabaandu besialo sia Bageresi abali ambi ao, bamusaba bari abweo; khulwo khuba badiirwa nende oburi bungi, naye yamala nanina mumeli nabwao.
\v 38 Naye omuundu owe bikhieno biarulamu yamusaba obweyaango bwo khuchia ninaye, arali Yeso naye yamusebula nabola ari,
\v 39 kalukha ingo wao, oyaale omakhoongo ka Nasaye akhukholere. Ne yamala nachia nayaala mudokho liosi amakhuwa makhoongo aka Yeso yamukholera.
\p
\v 40 Bulano ngolwa Yeso yakalukha, omukaanda kwamwingisia mufusangaafu, khulwo khuba boosi bali nibalindire okhwicha khwaye.
\v 41 Naye omuundu mulala owalangwa mbwe Yayiro owali omukhoongo we isinagogi, yeecha nakwa mumakulu ka Yeso, namwekweeda ari achie munyuumba mwaye,
\v 42 khulwo khubeera omukhana waye, owali omwana mudeerwa owe miaka ekhumi nende kibiri, yali mumbeera yokhufwa. Ne ngolwa Yeso yali nachia, omukaanda kwa baandu kwamubodokhana.
\v 43 Bulano omukhasi mulala owadachiriranga amabaanga khulwe miaka ekhumi nende kibiri, (owali niyekhonyisiria emiandu kiaye kioosi khulwa khubersia abalesi), naranyoola okhusirikhwa nende omulesi yeesi,
\v 44 yachia inyuma wa Yeso yamala nadiira khu likemo lie ingubo yaye; ne mubikha ebio yaakama khudachirira
\v 45 Yeso yareba ari, ni wina owakhandirakho? Ne ngolwa baandu boosi bakaana, Petero yamubolera ari, Omwami, omukaanda kwa baandu bano kukhubodokhane, khandi bakhusudirekho nawe khandi orebeenga mbwe, niwina owakhandirakho?
\p
\v 46 Yeso naye yaboola ari, omuundu yakhandirakho, khulwo khuba mbona mbwe amaani kakhandulamo.
\v 47 Omukhasi ula ngolwa yabona mbwe khasi anyala okhwekisa yeecha narengerekha, nakwa imberi waye, namubolera esifune siaye esio khumudirakho imberi wa baandu boosi, nende kori ngolwa amalire okhuoana.
\v 48 naye yamubolera ari, omukhana wange, obusubiri bwao bukhuonisie bwao nende omuleembe.
\p
\v 49 Ne ngolwa yali nalomalomanga amakhuwa ako, omuundu khurula munyuumba mwo mukhoongo we isinagogi yeecha namubolera ari, oranyasia omwekesia, omukhana wao amaliri okhufwa.
\p
\v 50 Arali Yeso naye ngolwa yabulira ako, yamukalusia ari, oraba nende oburi khaba, suubira sa, ne anaona.
\v 51 Ne noglwa yola munyuumba, khasi yafukirira omuundu yeesi khwingira alala ninaye arali Petero, nende Yokhana, nende Yakobo, nende samwana mwana alala nende ngina.
\v 52 Ne abaandu boosi bali nibaliraanga nibamwelalikhira, naye yababolera ari, muralira khaba, uno khasi afwire, arali akona sa chindoolo.
\v 53 Arali nabo bamuchekha lukali, khulwo khuba bali bamanyire mbwe amalire okhufwa.
\v 54 Naye yamala namudiira omukhono, nakingulu idoboosi naboola ari, mukhaana, singira.
\v 55 Ne omwoyo kwaye kwamala nikumukalukhamo, nasingira ebikha ebio. Yeso nababolera ari bamuberesie ebiakhulia.
\v 56 Abebusi baye baukisibwa lukali, naye nabakania ari barabolerakho omuundu eliekholekhane.
\c 9
\cl Omuliango 9
\p
\v 1 Yamala nalaanga ekhumi nende babiri bala, nababeresia amaani nende obunyala akulu we bikhieno bioosi nende okhuonia amalwaye.
\v 2 Nabaruma okhuchia khuyaala obwami bwa Nasaye, nende okhuonia abalwaye.
\v 3 Nababolera ari, murakiinga esiindu mulukeendo lweng'we, kata ilauhi, kose mugaati, kose amatoongolo, kose mulala khweng'we araba nende echikaanju chibiri.
\v 4 mumenye munyuumba yosi yoosi eyamuchia okhwingiramo, okhuula kori ngolwa muchia khurula mulidookho elio.
\v 5 Ne bala abarabengisia, nimurula mulidookho elio, musisimule olufu lwa makulu keng'we, mani bube obuloli khunibo.
\v 6 Bamala nibachia nibakeenda muchingoongo, nibayaala ifanjili, nende okhuonia abaandu buli abuundu;
\p
\v 7 Ne Herodi omuruki yamala nabuliri amakhuwa akayakholaanga, naba nende obukanakani khulwo khuba abàandu bandi babolaanga bari, Yokhana yalamuukhe khurula mubafu,
\v 8 ne abandi nabo baboola bari mulala khu banabii asuikhire.
\v 9 Herodi naye yaboola ari, esie ndakheenga omurwe kwa Yokhana, bulano owambuliraanga amakhuwa kaye uno ni wina? Ne niyekoomba okhumubona.
\p
\v 10 Ne abarume ngolwa bakalukha, bamubolera amakhuwa kabakhola koosi, naye yababukula nachia nabo abuundu wabaandu babulao, mulidookho lilangwa mbwe Betisaida.
\v 11 Arali omukaanda kwa baandu ngolwa bamanya, bamuloonda, naye yabengisia, nachaaka okhulomaloma nabo amakhuwa kobwami bwa Nasaye, naonia bala abali nende elienya liokhuonisibwa.
\p
\v 12 Bulano ngolwa eliuba liachaaka okhukwa, ekhumi nende babiri bala bamubolera bari, sebula omukaanda kuchie muchingoongo nende muchindalo echili indulo banyoole abuundu wokhweyalisia nende ebiakhulia, khulwo khuba abuundu wa khuli ano ni mulumira.
\p
\v 13 Yeso naye yababolera ari, eng'we mubaberesie ebiakhulia, nabo bakalusia bari, efwe khubula esiindu siosi, arali emigaati kiraano nende ching'eeni chibiri, nibinyalikhana khuchie khukulire abaandu bano boosi ebiakhulia.
\p
\v 14 (Khulwo khuba abaandu basaacha baliiwo bali kori echilifi chiraano). Naye nabolera abeeka baye ari, mwikhasie abaandu asi mumikaanda kia makhumi karaano, karaano.
\v 15 Bamala nibakhola bario, nibekhasia abaandu boosi asi.
\v 16 Namala nabukula emigaati kiraano kila nende eching'eeni chibiri chila, nalingeera akulu mwikulu, nabianira chikhabi, nafunaka, naberesia abeeka baye mbwe baberesie mukaanda.
\v 17 Boosi balia bekura, nibanyoola okhubuusia ebikaapo ekhumi nende bibiri ebiadonga.
\p
\v 18 Ne ngolwa yali nalaamanga yeng'ene, abeeka baye bali alala ninaye: yabareeba naboola ari, abaandu babolaanga mbwe esie ndi wina?
\p
\v 19 Nabo bakalusia nibaboola bari Yokhana omubatisia, abandi babolaanga bari Eliya, khandi abandi baboola bari mulala khubanabii bakhale yasuikhire.
\p
\v 20 Naye yabareba ari, eng'we nang'we muboola mbwe esie ndi wina? Petero yakalusia naboola ari, Kirisito wa Nasaye.
\p
\v 21 Arali naye yabakania nachuchwisia mbwe barabolerakho omuundu elikhuwa elio;
\v 22 namala naboola ari, bili mbwe Omwana womuundu okhuula anyakhane amanyakhano mangi, khandi akhaywe nende abakofu nende abakukhani bakhoongo nende abaandiki, nende okhumwira, nende khulamusibwa inyaanga ya khadaru.
\p
\v 23 Ne yababolera boosi ari, omuundu yesi yeesi nadakha okhunoonda, okhuula anyoole khwekaana mwene, mani abukule omusalaba kwaye buli nyaanga mani yanoonde.
\v 24 Khulwo khuba ula odkha okhuonia bulamu bwaye, achia khubukosia, naye ula okosia obulamu bwaye khulwo khubeera esie, omwene oyo achia khubuonia.
\v 25 Niingaanga sina eyo muundu achia khunyoola nanyoola esialo siosi, naye omwene asasikha kose asukunwa erwanyi?
\v 26 Khulwo khuba yeesi ochia okhumbonera echisoni nende amakhuwa kange, omwene oyo, omwana womuundu achia khumubonera chisoni, nakalukha muluyaali lwaye, nende olwa Samwana, nende bamalayika batakatifu.
\v 27 Arali babolera obwadieri mbwe, baliwo abandi abemere ano, abarachia okhubona liifwa, nibasiri khubona obwami bwa Nasaye.
\p
\v 28 Ne olunyuma lwe chinyaanga munane namalire khuboola amakhuwa ako, yabukula Petero, nende Yokhona, nende Yakobo, nachia ninabo mulugulu khulaama.
\v 29 Ne ngolwa yali nalaamanga, obweni bwaye bwakalukhana, ne chingubo chiaye chiali chindafu
\v 30 Lingeera abaandu babiri balolekhana nibalomaloma ninaye, abene abo bali Musa nende Eliya:
\v 31 Ababonekhana muluyaali, nibalomaloma khuliifwa liaye eliachia khwolerera mu Yerusalemu.
\v 32 Naye petero nende bala abali alala ninaye bali muchindoolo chinyiingi: ne ngolwa basimukha, balola oluyaali lwaye, nende abaandu babiri abali nebemere ninaye.
\v 33 Ne ngolwa bali nibalekhana naye, Petero yabolera Yeso ari, Omwami, nibilayi efwe okhuba ano: Bulano lekha khumbakhe amayeema kadaru; lalal eliao, eliindi alia Musa nende eliindi elia Eliya; naramanyirisia kala akayaboola.
\v 34 Ngolwa yali nabolaanga kene ako, elilesi liecha, nilibafunikha: nibadiirwa nende oburi ngolwa bengira mulilesi elio.
\p
\v 35 Idoboosi yarula mulilesi elio niyiboola yiri, uno niye Omwana wange mukheerwa; mumubulire.
\v 36 Ne ngolwa idoboosi eyo yamala khulomaloma, Yeso yabonekhana nali yeng'ene. Babulera nende amakhuwa ako nibarabolerakho omuundu yeesi kala akababona muchinyaanga echio.
\p
\v 37 Bulano inyaanga yalondakho, ngolwa bekha okhurula khu lugulu, abaandu bangi babukanana ninaye.
\v 38 Ne lingeera omuundu mulala akari womukaanda yamulaanga mudoboosi naboola ari, Mwami khusaba olingerekho omusiani wange: khulwo khuba niye sa omwana wange yeng'ne.
\v 39 Lola, esikhieno simudiraanga mani akhube chimbuungu; khandi simurechangamo indulume, mani arusie lifiiro, ne khasi simulekhaanga lwangu naranyubulukhe lukali.
\v 40 Sabire abeeka bao mbwe bamurusiemo, arali khasi banyalirwe khaba.
\p
\v 41 Yeso naye yakalusia naboola ari, eng'we olwibulo lubula busuubiri, olwakora, njia okhuba ninang'we okhuula lina nimusiri musaanda? Rera ano omwana wao.
\v 42 Ne ngolwa yali nachia, esikhieno siamukoka asi, nisimuramo indulume. Naye Yeso yalabira roho imaanu, namala naonia omwana, namukalusiria samwana.
\v 43 Abaandu boosi baukisibwa khuloondana nende amaani makhoongo ka Nasaye. Kori ngolwa bali nibaukisibwaanga khuloondana nende amakhuwa ka Yeso yakhola, yabolera abeeka baye ari,
\v 44 lekha amakhuwa kano kengire mumarwi keng'we: khulwo khuba omwana wo muundu achia khureebwa mumakhono ka baandu.
\v 45 Arali nabo khasi manyirisia amakhuwa kayaboola, khulwo khubeera kakisibwa nibarakamanyirisia: ne bali nende oburi khumureeba likhuwa elio.
\p
\v 46 Olunyuma bachaaka khurebana bari niwina ochia khuba omukhoongo akari wabwe.
\v 47 Yeso naye ngolwa yamanyirisia mapaaro kabwe, yabukula omwana mudidi namusudia ambi ninaye,
\v 48 nababolera ari, omuundu yeesi ochia khwingisia omwana uno, muliira liange, achia khuba yengisie esie, ne omuundu yeesi ochia khunyingisia achia khuba yengisie ula owanduma. Khulwo khuba yesi yeesi oli mudidi akari weng'we mweesi, omwene oyo niye omukhoongo.
\p
\v 49 Yokhana yakalusia namubolera ari, Mwami mukhoongo khwabwene omuundu narusia ebikhieno muliira liao, ne nikhumukania, khulwo khuba khasi achiraanga alala ninafwe.
\p
\v 50 Yeso naye yababolera ari, muramukania khaba, khulwo khubeera yesi yeesi orayingana ninang'we ali alala nang'we.
\p
\v 51 Chinyaanga chiaye echio khuchia akulu chiali ambi khula, yaba nende elichoomo liokhuchia Yerusalemu;
\v 52 Yaruma abarume imberi waye: nibachia nibengira mulukoongo lwa Basamaria, khulwo khurekekha lukoongo.
\v 53 Arali banalukoongo khasi bamwingisia khulwo khubeera elichoomo liaye liali khuchia Yerusalemu
\v 54 Ne kori ngolwa abeeka baye Yakobo nende Yokhana babona bario, bamubolera bari Mwami, khulagire muliro kurule mwikulu kwiche kubasasie; (kori ngolwa Eliya yakhola)?
\v 55 Naye yabakalukhanira nabakania. (naboola ari, khasi mumanyire ngolwa Roho wa muli naye afwana).
\v 56 Khulwo khuba omwana womuundu khasi yeecha khusasia emioyo kia baandu, arali khukionia. Nibamala nibarula nibachia mulukoongo lundi.
\p
\v 57 Ne ngolwa bali khungira nabachia, omuundu mulala yamubolera ari, Mwami, ndakhuloonda buli abuundu wonachia.
\p
\v 58 Yeso naye yamubolera ari, amabwe kali nende ameena, amayoni nako kali nende ebiyu, arali Omwana womuundu naye abula abuundu wokhura omurwe kwaye.
\v 59 Namala nabolera oundi ari, noonde. Naye naboola ari, Omwami, mbekho mberi obweyaango njie siikhe baba wange.
\p
\v 60 Yeso namubolera ari, lekha abafu basiikhe abafu babwe; ewe nawe chia oyaale obwami bwa Nasaye.
\p
\v 61 Omuundu uundi yeesi yamubolera ari, Omwami, ndakhuloonda, arali mbekho obwayaango njie sebule abaandu beingo wange.
\p
\v 62 Yeso naye namubolera ari, abulao omuundu ogeenganga omukhono kwaye khukhulima nalingeera inyuma, okhoyera mubwami bwa Nasaye.
\c 10
\cl Omuliango 10
\p
\v 1 Lunyuma lwa makhuwa ako, Omwami yalobola abaandu bandi makhumi saba, namala nabaruma babiri babiri mbwe barangirire khuchia imberi waye mubuli lukoongo nende buli abuundu owayadakha khuchia mwene.
\v 2 Yababolera ari, bwadieri ebikese ni biingi, arali abakholi be mirimo ni badidi; khulwako, musabe Omwami wa bikese arume abakholi be mirimo mubikese biaye.
\v 3 Bulano baruma mbwe muchie kori abaana ba makoondi akari wa mabwe.
\v 4 Murakiinga esikaapo, kose esibeeti, kose bilaaro, kose murakheesia omuundu khu ngira.
\v 5 Ne nimwingira munyuumba yosi yoosi, murangirire okhuboola mbwe omuleembe kube munyuumba yino,
\v 6 naye omwana womuleembe nabaamo omuleembe kweng'we kunabamo; ne nabulamo, omuleembe kweng'we kunabakalukhira.
\v 7 Khandi mudoonge munyuumba omwo, nimulia nende khung'wa bila ebiabababeresia; khulwo khubeera omukholi wemirimo akhoyera khuberesebwa omuruungo. Murakeenda kenda khurula munyuumba nimuchia muyiindi.
\v 8 Ne mubuli lidookho lia mwingiiramo, nibabengisia, mulie ebiakhulia biamuberesebwa.
\v 9 Khandi muonie abalwaye balimo, ne mubabolere muri, obwami bwa Nasye busudire ambi nang'we
\v 10 Arali mubuli lidookho lia mwingiramo, ni bakhaya okhubengisia, murule mubweo, ne nimubira khu chingira chiabwe, muboole muri,
\v 11 kata olufu lwomulidookho lieng'we olwanda khu makulu kefwe, lwosi khubasisimulira musichubo siengwe. Arali mumanye lino mbwe obwami bwa Nasaye busudire ambi.
\v 12 Ne babolera mbwe, inyaanga yila yichia khubakho kakayi khu Sodooma, okhirakho lidokho elio.
\p
\v 13 Ni uuwi khu ewe Korosini! ni uuwi khu ewe Betisaida! khulwo khubeera akamangalimwa kekholekhana khweng'we kaba mbwe kekholekhana Tiro nende Sidoni, khuchaakira abwene ao bakhekanire nibefwala echingubo chia magunia nende khwikhala mulikokhe.
\v 14 Arali inyaanga yobukhalaki ichia khubakho kakayi khu Tiro nende Sidoni khulwe sinyasio siabwe okhirakho eng'we.
\v 15 Nawe ewe Kaperanaumu, okingulirwe khula mwikulu, ochia khwikhisibwa okhuula magoombe.
\p
\v 16 Ula obabulira, aba abuliire esie, naye ula obakhaya aba akhayire esie, naye okhaya esie, aba akhayire ula owanduma.
\p
\v 17 Ne amakhumi saba bala bakalukha nibali nende busangaafu, nibaboola bari, Mwami, kata ebikhieno birurire mulira liao,
\v 18 Yeso naye yababolera ari, mbwene Sietani nakwa khurula mwikulu kori ngolumiesi.
\v 19 Lola baberesie amaani ko khuseena khu chinjukha nende khu chingoberanyaanja, nende akula wamaani komusuku, ne sibulao esiindu sichia okhubanyaala mungeri chiosi.
\v 20 Murasangaala mbwe khulwo khubeera ebikhieno bibarire, arali musangaale khulwo khuba ameera keng'we kaandikwa mwikulu.
\p
\v 21 Ebikha biene ebio Yeso yasangaalira muroho, naboola ari, khukhubira orio Ewe Sefwe, Omwami womwikulu nende musialo, mbwe wakisa amakhuwa kano bala ababumanyirisi nende makesi, nofunulira abaana badidi, ne bibonekhana okhuba bilayi mumoni chiao ewe Sefwe.
\v 22 Naboola ari, baba yamberesia ebiindu bioosi, ne abulao omuundu omanyire omwana arali Samwana, khandi abulao omuundu omanyire Sefwe arali Omwana, naye yesi yeesi owo Mwana akheera, yekuliraanga omwene oyo.
\p
\v 23 Namala nakalukhanira abeeka baye, nalomaloma nabo bong'ene, naboola ari chimoni chiabona kala akamubona chili nende chikhabi.
\v 24 Khulwo khubeera esie babolere mbwe, abanabii bangi alala nende baruki bekoomba okhubona kala akamubona arali khasi bakabona, nende khubulira kala akamubulira ne khasi bakabulira.
\p
\v 25 Lingeera, omuundu wa malako mulala yasingira khumuteema, naboola ari Omwekesia, khole sina khunyale okhunyoola obulamu bwechinyaanga chioosi?
\p
\v 26 Yeso naye yakalusia namureeba ari, kaandikwa karie mumalako? Ewe osomaanga orie?
\p
\v 27 Naye yakalusia naboola ari, okheere Omwami Nasaye nende omwoyo kwao kwoosi, nende imbeera yao yoosi, nende amaani kao koosi, nende amapaaro kao koosi, nende mumenyeranwa wao kori nge ewe omwene.
\p
\v 28 Yeso yamubolera ari, wakhakalusia bilayi: bulano khola kene ako, nochia khumenya.
\p
\v 29 Naye ngolwa yadakha okhwelolesia okhuba mukololofu, yabolera Yeso ari, omumenyeranwa wange niye wina?
\p
\v 30 Yeso naye yamukalusia naboola ari, omuundu undi yekha khurula Yerusalemu nachia Yeriko, ne yamala nakwa mumakhono kabebi, nibamufwalula chingubo, nibamunyaala nibamulekha nali ambi okhufwa.
\v 31 Ne khulwe yikhabi indayi, omukukhani yeecha khubirira khungira eyo, ne kori ngolwa yamubona, yakabukha nabirira khundulo.
\v 32 Khandi omulawi yeesi ngolwa yola abuundu ao, yamubona, ne nabirira khundulo.
\v 33 Arali Omusamaria mulala nali khulkeendo, yola abuundu ao, namala nachia namulingeera, namubonera esisa.
\v 34 Yamala nasuda ambi ninaye, namuboya amakoonjo kaye, nakabakha amafura nende ifini, namala namura khusolo yaye namuyira munyuumba ya bakeni, nachiririra khumuliinda.
\v 35 Ne inyaanga yaloondakho, yaruunga mwene inyuumba ya bakeni chidinari chibiri, namubolera ari, chiririra okhumuliinda, ne siosi siosi esiochia khwekhonyisiria akulu, njia okhuruunga ningalukha
\v 36 Bulano khu baandu badaru bano, ewe opaara mbwe ni wina omumenyeranwa wa ula owakwa mumakhono kabebi?
\p
\v 37 Naye naboola ari ni ula owamubonera sisa. Yeso namala namubolera ari, chia mani okhole orio.
\p
\v 38 Ne ngolwa bali nibachiririraanga bengira mulukoongo lundi; naye omukhasi mulala owalangwa mbwe Marita yamwingisia munyuumba mwaye.
\v 39 Ne yali nende omukhana wabwe owalangwa mbwe Maria, owekhala mumakulu ka Yeso, nabulira amakhuwa kaye.
\v 40 Arali Marita naye yali nanyakhananga khu mirimo miingi, namala namuchira naboola ari, Mwami, khasi obonakho kori mukhana wefwe yandekheere mirimo sieng'ene? Bulano mubolere yakhonyekho.
\p
\v 41 Yeso naye yamukalusia namubolera ari, Marita, Marita, onyakhananga nende okhwesandia khulwe biindu biingi,
\v 42 arali esienyekhana ni siindu silala sa, Maria aloboole olwande lulayi, olwo muundu aranyala okhumumalakho.
\c 11
\cl Omuliango 11
\p
\v 1 Ne ngolwa yali abuundu wandi nalaama, niyamala, mulala khu beeka baye yamubolera ari, Mwami, rwekesie khulaama kori ngolwa Yokhana yekesia abeeka baye.
\p
\v 2 Naye nababolera ari, nimulaama, mubole muri, Sefwe oli mwikulu, Eliira liao liribwe. Obwami bwao bwiiche. Elienya liao liekholekhane musialo kori ngolwa liekholekhana mwikulu.
\v 3 Oruberesie omugaati kwa buli nyaanga.
\v 4 Orulekhere chimbi chiefwe, kori ngolwa fwesi khulekheraanga bala abarukholeraanga mabi. oraruyira mumateemo khaba, arali orununule khurula khu mwoni.
\p
\v 5 Khandi yababolera ari, ni wina khweng'we oli nende omwiicha, namwichira akari wesiro, namubolera ari, mwiicha wange ndeyosiekho emigaati kidaru;
\v 6 khulwo khubeera omwiicha wange oli khu lukeendo yakhanjichira, ne esie nange mbulakho esiindu sio khumuberesia.
\p
\v 7 Ne ula oli mukari amukalusia naboola ari, oraanyasia khaba, khulwo khuba muliangiro kumalirwe khwikalawao, nange nende abàana bange khweyalisie khu sitaanda; khasi nyala khusingira ndakhuberesia migaati.
\v 8 Ne babolera mbwe, kata kario khasi anasingira okhumuberesia, khulwo khuba mbwe nomwiicha waye, arali khuloondana nende khujingirisia khwaye, achia khusingira nende khumuberesia ebiadakhire bioosi.
\v 9 Khandi babolera mbwe musabe ne munaberesebwa, mukoonye ne munanyoola, mukhong'oonde ne munekulirwao.
\v 10 Khulwo khuba buli muundu osaba aberesebwa, ne ula okoonya anyoola, ne ula okhong'oonda yekulirwao.
\v 11 Khulwo khuba ni wina khweng'we owomwana waye namusaba ari, baba mberesie mugaati, naye amuberesia likina, kose ing'eeni ne mubweyaango bweing'eeni amuberesia injukha?
\v 12 Koes namusaba libuyu ne amuberesia ingoberanyaanja?
\v 13 Bulano eng'we muli abakholi bechimbi nimumanyire okhuberesia abaana beng'we ebianwa bilayi, naye Seng'we oli mwikulu khasi anaberesia okhirakho bala abamusaba Roho mulafu?
\p
\v 14 Khandi Yeso yali narusia esikhieno siralomaloma, ne ngolwa esikhieno siarula, omuundu ula owali naralomalomanga, yachaaka khulomaloma, ne abaandu nibaukisibwa.
\v 15 Abandi khunibo baboola bari, Arusia bikhieno khubirira Beelisebuli omukhoongo webikhieno.
\v 16 Abandi bamuteema khulwo khudakha esilolero khurula mwikulu.
\p
\v 17 Yeso naye namanyirisia amapaaro kabwe, naye nababolera ari, buli bwami obuyingana obwene khubwene bunyasikhaanga, khandi inyuumba niyikabukhana yene khu yene ikwichaanga.
\v 18 Naye Sietani yeesi nayingana omwene khu mwene, obwami bwaye buneema burie?
\v 19 Bulano nikaba mbwe esie ndusia sikhieno khubirira khu Beelisebuli, ne abaana beng'we nabo barusianga khubirira khu wina?
\v 20 Ne nakaba mbwe esie ndusia sikhieno khubirira khu lwala lwa Nasaye, bulano mumanye mbwe obwami bwa Nasaye bumalire okhubechera.
\p
\v 21 Omuundu wa maani alindaanga inyuumba yaye niyeboyere bilwaniro biaye, mbwe ebiindu biaye binyoole okhuba abwene mumuleembe,
\v 22 arali omuundu wamaani khumukhira namwichira mani yamukhira, aba anamunyuula ebilwaniro biaye bioosi abiabere niyesikire, nakabula bila bioosi ebiabere nabio.
\v 23 Omuundu orali nange omwene oyo khasi yandakha; naye ula orabuusia alala nange, asakulaanga.
\p
\v 24 Sikhieno nisirula mumuundu, sibiriranga abuundu wamaachi kabulao, nisikoonya abuundu wokhubulukhira, ne nisiranyoola, sibolaanga siri, ndakalukha munyuumba yange eyandarulamo.
\v 25 Ne nisikalukha nisinyoola mbwe beyere inyuumba niyindafu,
\v 26 ni simala sichia sieenda ebiasie saba ebili bimaanu khusikhirakho esiene, nibimwingiramo nende khumumenyamo: ne imbeera yaye eyimalirikha yiba imaanu okhirakho eyamberi.
\p
\v 27 Ne ngolwa yali nalomalomanga amakhuwa ako, omukhasi mulala akari wa baandu yakingula idoboosi yaye, naboola ari, inda yakhukinga nende chimbeere chiakhununia bili nende chikhabi.
\v 28 Arali naye yaboola ari, nibilayi, ne bali nende chikhabi bala ababulira elikhuwa lia Nasaye nende khulidiira.
\p
\v 29 Ne abaandu ngolwa bali nibakhebusia abuundu wa yali, yachaaka khuboola ari, olwibulo luno nolwibulo lumaanu, lukoonya esilolero, ne khasi banabersebwa silolero arali sila esilolero esiomunabii Yona.
\v 30 Khulwo khubeera kori ngolwa Yona yali esilolero khu baandu ba Ninebe, nilwo olwo Mwana womuundu yeesi achia khuba khulwibulo luno.
\v 31 Omuruki mukhasi owe bukwe achia khweema alala nende abaandu bolwibulo luno inyaanga yobukhalaki, ne achia khubakhalakira: khulwo khuba yarula musialo okhwicha khubulira obumanyirisi bwa Solomoni, khandi, lola, ula oli mukhoongo khukhira Solomoni ali ano.
\v 32 Ne abaandu ba Ninebe bachia okhwema alala nende olwibulo luno inyaanga yo bukhalaki, ne bachia khubakhalakira: khulwo khubeera bekanira ngolwa Yona yayaala, khandi lola, ula oli omukhoongo khukhira Yona ali ano.
\p
\v 33 Abulao omuundu wakhianga itaara nayikisa kose khuyigeenga asi weimeesa, arali ayigeengaanga akulu wesisindi, mbwe bala ebeecha mukari banyoole okhubona bulafu.
\v 34 Obulafu bwomubiri ni imoni: khulwako, imoni yao niyili indafu, omubiri kwao kwoosi kuli nende obulafu, ne imoni yao niyili nende obubi, omubiri kwao kwoosi kuli musirima.
\v 35 Khulwako, lingeera mbwe obulafu buli mukari mwao bureecha bwaba esirima.
\v 36 Ne nikaba mbwe obulafu busalanire mumubiri kwao kwoosi, ne lubulao olwande luli nende esirima, omubiri kwao kwoosi kunaba nende obulafu bwoosi kori ngolwa itaara yikhukhoserianga bulafu bwayo.
\p
\v 37 Ne ngolwa yamala okhulomaloma, Omufarisaayo mulala yamwingisia owaye okhuchia khulia ebiakhulia: namala nachia niyekhala khulia ebiakhulia.
\v 38 Ne Omufarisaayo oyo ngolwa yabona, yaukisibwa lukali, khulwo khuba Yeso yalia nasiri okhwesaaba.
\v 39 Arali Omwami naye yamubolera ari, eng'we Bafarisaayo mwosianga esikoombe nende isaani erwanyi, ne mukari mweng'we mwechulamo obunyuusi nende obubi.
\v 40 Basiru eng'we; khasi ni ula owakaasia ebierwanyi niye owakasia nende ebiomukari?
\v 41 Murusie ebianwa ebiomukari, ne bioosi binaba bilafu khweng'we.
\p
\v 42 Ni uuwi khweng'we Abafarisaayo, khulwo khuba murusianga ebia likhumi bia isuuga nende chimboka nende buli imbia ye eliani lio mundalo, ne mulekha amakhuwa kobukhalaki nende obukheeri bwa Nasaye; mukhoyere khukhola akaamberi kala, ne muralekha akalondakho.
\v 43 Ni uuwi khweng'we Abafarisaayo, khulwo khuba mwakheera okhwikhala imberi muchisinagogi nende okhunyoola makhesio mubiiro.
\v 44 Ni uuwi khweng'we Abaandiiki nende Abafarisaayo, abekaadi! khulwo khuba mufwanana nende ebirindwa birabonekhana, ebia baandu babirangakho akulu nibaramanyirisia
\p
\v 45 Omuundu mulala owamalako yakalusia naboola ari, Omwekesia, orunyekere efwe fwesi khukhuboola orio.
\p
\v 46 Yeso naye yaboola ari, eng'we abekesia bamalako nang'we, ni uuwi khweng'we, khulwo khuba mwadwikha abaandu emikuku misiro ekirekiinga, ne kata eng'we bene khasi mudirangakho mikuku ekio kata sa nende olwala lweng'we lulala.
\v 47 Ni uuwi khweng'we khulwo khuba mumbakhaanga ebirindwa ebia banabii, ne abaseng'we nibo ababeera.
\v 48 Khulwako, murusiango obuloli nende khufukirira ebikhole ebia abaseng'we; khulwo khuba nibo ababeera nang'we mubombakhira ebirindwa
\v 49 Ne khulwa kene ako, obumanyirisi bwa Nasaye bwaboola buri, lola njia khubarumira abanabii nende abarume, nabo bachia okhusiinja nende okhusaandia abandi khunibo nende okhuberusia,
\v 50 ne olwibulo luno lubaanjwa amabaanga ka banabii boosi akedikha khuchàaka omuse kwesialo nikurebwao;
\v 51 khuchaakira khu mabaanga ka Habili okhuula khu mabaanga ka Sakaria owafwira akari wobwali nende ikhekalu. Esie babolera obwadieri mbwe kachia khuba akulu wo lwibulo luno.
\v 52 Ni uuwi khweng'we abamalako, khulwo khuba mumalireo olufunguo lwamakesi, eng'we bene khasi mwingira, ne kata bala ababere nibengira mukari, mubekalire okhwingira.
\p
\v 53 Ne ngolwa yababolera amakhuwa ako, abaandiki nende Abafarisayo bachaaka khumukhaya mubululu nibamureeba ebiindu biingi,
\v 54 nibamureka okhubona nibakhanyoola elikhuwa lirula mumunwa kwaye eliakhakera bamusitaaka
\c 12
\cl Omuliango 12
\p
\v 1 Mubikha biene ebio, echilifu chia baandu ngolwa bebusia alala, omukaanda kwa baandu bangi, okhuula nibasenanakho, yachaaka mberi okhuboolera abeeka baye ari, mweliinde nende elimera lia Bafarisaayo, ne nilio obwekaadi.
\v 2 Ne libulao elikhuwa liekisa elirakhamanyikhane, kose eliakisibwa elirakhafunulwe.
\v 3 Khu kario, kala koosi akamwalomaloma musrima, kachia khubulirikhana mubulafu, ne kala akamwalomalomera munyuumba yo mukari, mukhurwi khwo muundu, kachia khuyaalwa akulu wesirama.
\p
\v 4 Ne baboolera ari, eng'we abeecha bange mbwe, muraria abo abeera omubiri ne lunyuma babula eliabakhakhola okhirao.
\v 5 Arali ndababoolera ula owa mukhoyere okhuria; murie ula oli nende obunyala bwo khusukuna magoombe niyakhamala okhwira, omwene oyo niye owamurie.
\v 6 Ne makaburuku karaano sikakusibwaanga amatongolo kabiri? Ne libulao elia Nasaye yebiriranga kata elala.
\v 7 Ne kata elifwiri lio khumirwe kieng'we liabalwa lioosi. Khulwako muraria khaba, khulwo khubeera eng'we muli obobukusi khukhira amakaburuku mangi.
\p
\v 8 Khandi baboolera mbwe ula ochia okhundeeyama imberi wa baandu, omwana womuundu naye achia okhumufukirira imberi wa malayika ba Nasaye;
\v 9 ne ula oondekaana imberi wa baandu, njia okhumwekaana imberi wa malayika ba Nasaye.
\v 10 Ne buli muundu ochia khulomaloma elikhuwa libi khu mwana womuundu achia khulekherwa, arali ula onasinyisia Roho mulafu khasi achia khulekherwa.
\v 11 Ne nabichia khubayira imberi wechisinagogi, nende khubayaasia nende abaruki, muraba nende obukanakani nimupaara amakhuwa keeng'we kori ngolwa munakalusia, kose kori ngolwa munaboola,
\v 12 khulwo khubeera Roho mulafu anabekesia ebikha ebio kala akamukhoyera okhuboola.
\p
\v 13 Naye omuundu mulala akari womukaanda yamubolera ari, Omwami, boolera omusiani wefwe angabe obulaame bwefwe.
\p
\v 14 Yeso naye yakalusia namureeba ari, ni wina owakhola esie okhuba omukhalaki kose omukabi akari weeng'we?
\v 15 Namala nababoolera ari muliingere munyoole khwekabula nende obwekoombi, khulwo khuba obulamu bwomuundu khasi buli mubuungi bwe ebiindu ebiali ninabio.
\p
\v 16 Namala nababoolera olukaado ari, indalo yomuondu mulala omuyiinda yali niyamire lukali;
\v 17 ne nachaka okhupaara mumwoyo kwaye niyereeba ari, khole endie? Khulwo khuba mbula abuundu wokhura ebikese biange.
\v 18 Namala naboola ari, ndakhola endi: ndafunaka ebiaka biange, nimala nyumbakha ebiindi bikhoongo lukali, ne njia okhuramo ebiakhulia biange nende ebiindu biange bioosi.
\v 19 Nindakhamala nimbolera omwoyo kwange mbwe, omwoyo oli nende ebiindu biingi bilayi ebiowebikhira khu miaka miingi; bulano nyoola okhubulukha, olie, ong'we, osangaale mani obulire bilayi.
\p
\v 20 Arali Nasaye naye yamuboolera ari, omusiru ewe, omwoyo kwao kunadakhikhana musiro sie inyaanga yino! Ne ebiindu biao ebia webikhire bichia khuba ebia wina?
\p
\v 21 Omuundu ula obikhisirianga omwoyo kwaye ne khasi yerekekhera Nasaye, afwana ario.
\p
\v 22 Namala nabolera abeeka baye ari, khu kene ako, esie babolera mbwe, muranyakhanira obulamu bweng'we mbwe munalia sina, kose emibiri kieng'we kinafwala sina.
\v 23 Khulwo khuba obulamu bukhira ebiakhulia, ne omubiri kukhira chingubo.
\v 24 Mulingere amayoni, khasi karakaanga kose khukesa; kabula siaki kose siduoli, arali Nasaye akalisianga. Nang'we simuli abobukusi lukali khukhira amayoni?
\v 25 Ni wina khweng'we onyala okhwemeeda esikero siaye kata sa mukhono mulala khulwo khupaara?
\v 26 Khulwako, nibili mbwe khasi munyala kata sa elikhuwa lididi, khulwa sina mwesandie khu kandi kala?
\v 27 Mulingeere kori ebimuli ebimeraanga, khasi bikholanga emirimo, khandi khasi bilukhaanga; nange baboolera mbwe kata Solomoni khasi yafwalwakho ebilayi muluyaali lwaye kori lala khuniko.
\v 28 Khulwako nibili mbwe Nasaye afunikhaanga bunyaasi bubechaanga musino, obubao inyaanga yino ne muchuli busukunwa mumumuliro, khasi anabakholera okhirakho eng'we abobusuubiri budidi?
\v 29 Ne murakoonya ebia munalia kose ebia munang'wa; kose murabeyabeya,
\v 30 khulwo khuba kene ako niko aka abaandu bomusialo bakonyaanga, arali Seng'we amanyire mbwe mubidakha.
\v 31 Arali mukoonye obwami bwa Nasaye, ne munamederwakho ebiindi bino.
\p
\v 32 Muraria eng'we omukaanda mudiidi, khulwo khuba Seng'we abwene mbwe nibilayi okhubaberesia obowami.
\v 33 Mukusie bila ebia muli nabio mani munyoole khurusia ebiaanwa. Mwekasirie chisao chirakofula, imbikhiro iraduduya mwikulu abuundu womwibi arakhasudao, kose echimberebende khunyasia.
\v 34 Khulwo khuba abuundu weimbikhiro yao yili, abwene ao niwo owo mwoyo kwao kwosi kuli.
\p
\v 35 Ebibuno bieng'we bibe nibiboyerwe, ne echitaara chieng'we chibe nichiadukha;
\v 36 eng'we nang'we mube kori nga abaandu balindire Omwami wabwe, ne nachia khukalukha okhurula musiserero, nakhong'oonda olwiki, banyoole okhumwikulirao lwangu.
\v 37 Bali nende echikhabi bala abakholi, abo Mwami wabwe niyeecha achia khubanyoola nibali meeso. Obwadieri babolera, mbwe achia okhweboya nende khubengisia khulia ebiakhulia, ne achia khwicha okhubaberesia ebiakhulia.
\v 38 Bali nende chikhabi abakholi abo, nikaba mbwe Omwami aneecha musiro sia khabiri nende esia khadaru nabanyoola mumbeera eyo.
\v 39 Arali mumanyirisie likhuwa lino, mbwe omwene inyuumba aba yamanya ebikha biomwibi aneecheramo, yakhamokere ne khasi yakhalekhere inyuumba yaye yifunakwe.
\v 40 Eng'we nang'we mwerekekhe, khulwo khuba Omwana womuundu yeecha mubikha ebiamuraparirisia.
\p
\v 41 Petero naye yamureeba ari, Omwami, oruboleere olukaado olwo efwe sa, kose abaandu boosi?
\p
\v 42 Omwami naye yamureeba ari, ni wina oli omwemerisi omwesikwa owobumanyirisi, owomwami waye anamugeeng'a akulu wa bakholi baye boosi, mbwe aberesie abaandu ebiakhulia khu bikha bikhoyera?
\v 43 Niwechikhabi omukholi ula owomwami waye niyeecha achia okhumunyoola nakhola ario.
\v 44 Obwadieri baboolera, mbwe achia okhumugeeng'a akulu we biindu biaye ebiali nabio bioosi.
\v 45 Ne omukholi ula naboola mumwoyo kwaye ari omwami wange akhindire okhwiicha, namala achaaka okhukhuya abakholi baye abasaacha nende abakhasi, nalia nende okhung'wa nameera;
\v 46 omwami womukholi oyo achia okhwiicha inyaanga yaraparire mubikha ebiakorerwe, ne achia khumurema ebidonye bibiri, namala amugeengera omukabo kwaye alala nende bala abarasubira.
\v 47 Ne ula mukholi owamanya elienya lio mwami waye, ne khasi yerekekha kose okhukhola elienya liaye, achia khukhuywa lukali nende emisarita mingi.
\v 48 Naye ula okorerwe, ne akholere akakhoyera okhukhuywa, achia khukhuywa budidi. Ne ula owaberesibwa ebiingi, khandi ebiingi bichia okhwenyakhana khumurulakho; ne ula owa baandu baberesia ebiindu biingi, bachia okhwenya ebiindu biingi khumurulakho.
\p
\v 49 Njichire okhwambia omuliro musialo; ne nikumala kwambisibwa, ni likhuwa sina lindi eliandakha?
\v 50 Arali ndi nende obubatisibwi obwaakhoyera okhubatisibwa, khandi ndi nende amanyakhano mangi okhuula ngolwa buchia okhulirira!
\v 51 Kose mupaara mbwe njichire okhurera omuleembe musialo? Babolera mbwe khasi bili birio khaba, arali ni bukabukhani.
\v 52 Khulwo khuba okhuchaaka bulano, khuchia khuba nende abaandu barano munyuumba abakabukhane, badaru khu babiri, ne babiri khu badaru. Samwana nende omusiani waye bachia khukabukhana, omusiani
\v 53 nende samwana; nginamwana nende omukhana waye, mukhana nende nginamwana, omukhwe nende mukhweng'ene, masaala nende mukhomusiani, mukhomusiani nende masalang'ene.
\p
\v 54 Namala naboolera abaandu ari buli nimubona elilesi niliema emuumbo, nimuchaaka okhuboola muri, ifula yiicha; ne kaba kario.
\v 55 Ne nimubona omuyaka nikuucha ebukwe, nimuboola muri khunaba nende oluuya, nikaba kario.
\v 56 Abekaadi eng'we, mumanyire khukabukhania echimbeera chiesialo nende likulu, ne bulano kabere karie mbwe khasi mumanyire okhukabukhania bikha bino?
\p
\v 57 Khandi khulwa sina kata eng'we bene khasi mukhalakaanga akali akobwadieri mumbeera chieng'we?
\v 58 Khulwo khuba nokeenda alala nende ula ochia okhusitaaka nimuchia khumukhalaki, khola sinani wambanisibwe ninaye khungira, areecha yakhuusia khumukhalaki, ne omukhalaki naye yakhuusia mumakhono ka ula orungianga, naye amala akhusukuna mumboyero.
\v 59 Khuboolera mbwe khasi ochia khurulamo okhuula ngolwa ochia khuruunga amapesa kamalirikha.
\c 13
\cl Omuliango 13
\p
\v 1 Ne mubikha ebio, baliwo abaandu bandi abamuboolera amakhuwa ka Bagalilaya aba Pilato yasasania amabaanga kabwe nende ebisakhiro biabwe.
\v 2 Yeso naye yabakalusia nabareeba ari, mupaara mbwe Abagalilaya abo bali abakholi bechimbi khukhira Bagalilaya boosi, khumakhuwa ako nikabanyoola?
\v 3 Baboolera mbwe khasi kali kario khaba, arali nimurekanira, muchia okhusasikha murio eng'we mweesi.
\v 4 Kose mupaara mbwe bala ekhumi nende munane abeliida liakwakho nilibeera ela Silaomu, bali abakholi bechimbi khukhirakho abaandu boosi abali bamenya Yerusalemu?
\v 5 Babolera mbwe khasi kali kario khaba, arali nimurekanira, eng'we mweesi muchia khusasikha murio.
\p
\v 6 Namala naboola olukaado ari; omuundu mulala yali nende omusaala okwarakwa mundalo yaye eyemisabibu, ne yachia okhulingeera ebiamo akulu wakwo, arali khasi yanyolakho khaba.
\v 7 Namala naboolera omukholi weindalo yemisabibu ari, lingeera ndakhechaanga okhukonya ebiamo khu musaala kuno khulwemiaka kidaru, ne khasi nyoolangakho esiindu khaba, bulano kureme, khulwa sina kunyasianga indalo?
\p
\v 8 Naye omukholi yamukalusia namuboolera ari, Omwami, kulekhekho mwaka kuno sa, nyoole okhukwakira nende khukurakho amasiingo;
\v 9 ne olunyuma nikwama ebiamo, nibilayi; Ne nikurama, khwakureme.
\p
\v 10 Bulano Yeso yali niyekesianga inyaanga ya isabaato musinagogi ndala.
\v 11 Ne lingeere yaliwo omukhasi mulala owali nende esikhieno sio budekhere khulwemiaka ekhumi nende munane, ne yali niyeefumba alala naranyala okhukololokha.
\v 12 Ne ngolwa Yeso yamubona, yamulaanga, namubolera ari, mukhasi ewe, bololwa khurula mubudekhere bwao.
\v 13 Namala namurakho amakhono kaye, nanyoola okhukololokha ebikha ebio, nafumia Nasaye.
\p
\v 14 Omukhoongo weisinagogo naye yasinyisibwa khulwo khuba Yeso yaonia inyaanga ya isabaato, ne yakalusia naboolera abaandu ari, khuli nende echinyaanga chisasaba echio khoyera okhukhola emirimo, bulano mwiiche muonisibwe muchinyaanga echio, ne inyaanga ya isabaato nayo khaba.
\p
\v 15 Naye Omwami yakalusia nabareeba ari, eng'we abekaadi, buli muundu khweng'we khasi abololaanga isurusi yaye kose ipunda yaye musidwoli inyaanga ye isabaato nachia nayo khuyingwesia?
\v 16 Ne khasi bikhoyera omukhasi uno okhubololwa oli owolwibulo lwa Ibraimu, owa Sietani yabooya khulwe miaka ekhumi nende munane, anyoole khurula mububoye buno inyaanga ya isabato?
\v 17 Ne ngolwa yaboola amakhuwa kano, abaandu bala boosi abali nibayingananga ninaye badiirwa nende chisoni, ne omukaanda kwa baandu boosi basangaala khulwo khubeera amakhuwa koluyaali akayakhola.
\p
\v 18 Lunyuma Yeso yareeba ari, obwami bwa Nasaye bufwana kori sina? Khandi bukeranisie nende sina?
\v 19 Bufwanana nende olufwa lwelisaaka olwomuundu yabukula nalusukuna mundalo yaye; nilumera, nikwekhola omusaala; ne amayoni nikeecha nikamenya mumasaga kakwo.
\p
\v 20 Khandi yareeba elikhabi lia khabiri ari, ngerenisie obwami bwa Nasaye nende sina?
\v 21 Bufwanana nende elimera lio mukhasi yabukula nakisa mubidonye bidaru ebiobusie, ne bumala bulusia obusie bwoosi.
\p
\v 22 Ne ngolwa Yeso yali khulukeendo lwokhuchia Yerusalemu nabirira mumadokho nende muchingongo niyekesia,
\v 23 omuundu mulala yamureeba ari, Omwami, abaandu baonisibwa ni badidi? Naye yamukalusia naboola ari,
\v 24 mwedinyi okhwingira mumuliango mudiiyu, khulwo khuba babolera mbwe abaandu bangi bachia khwenya khwingira ne khasi bachia okhunyalirwa khaba.
\v 25 Ebikha biomwene inyuumba achia khweema nende khwikalao omuliango, eng, we nang'we muchia khwema erwanyi nimukhong'onda olwiki, nimuboola muri, Ewe Mwami, ruwikulire lwiki, naye achia khukalusia nababolera ari, khasi manyire khaba owamurula;
\p
\v 26 ne muchia khuchaaka khubola muri, khwalichaanga nikhung'wa imberi wao, nawe wekesianga khuchingira chiefwe.
\p
\v 27 Arali naye achia khuboola ari, babolera mbwe esie ngorerwe owamurula, mubweo mundulekho mweesi abakholi bamabi eng'we.
\v 28 Abwene ao niwo owakhuchia khuba nende okhulira alala nende khulumasia ameno, ne muchia okhubona Ibraimu, nende Isaaka, nende Yakabo, nende abanabii boosi mubwami bwa Nasaye, nang'we abene muchia khusukunwa erwanyi.
\v 29 Abaandu bachia khwicha khurula ebukwe nende mumbo, emukulu nende mwalo, ne bachia khuwikhala okhulia ebiakhulia mubwami bwa Nasaye.
\v 30 Ne lingeera bala abali abokhumalirikha, bachia khuba abokhurangirira, ne abarangirira bachia khuba abamalirikha.
\p
\v 31 Inyaanga yene eyo, baliwo Abafarisayo abamuchiira, nibamuboolera bari, rula ano obweo ochie abuundu wandi, khulwo khuba Herodi adakha okhwira.
\p
\v 32 Naye yababolera ari, muchie mubolera elibwe elio muri, lingeera inyaanga yino nende muchuli njia khurusia ebikhieno nende khuonia abalwaye, ne inyaanga yakhadaru njia khuolerera.
\v 33 katakario bikhoyera esie okhuchiririra khungira yange inyaanga yino nende muchuli nende inyaanga yilondakho, khulwo khuba omunabii khasi akhoyera okhufwira erwanyi wa Yerusalemu.
\p
\v 34 Ewe Yerusalemu, Yerusalemu owiraanga abanabii aborumirwe nobakhuya nende makina, nimakhabi kaanga akandadakha okhubuusia abaana bao kori ngolwa ingokho yibusianga ebimwinyi biayo asi wechimbaya chiayo, nang'we khasi mudakha khaba.
\v 35 Babolera obwadieri mbwe, lingeera inyuumba yeng'we yilekherwe, ne khasi muchia okhumbona khandi okhuula ngolwa muchia khuboola muri ni wechikhabi ula owiicha muliira lio Mwami
\c 14
\cl Omuliango 14
\p
\v 1 Ne ngolwa yengira munyuumba mwo muundu mulala khubakhoongo Babafarisaayo inyaanga ya isabaato khulwo khulia mugaati, bali nibamulingeraanga.
\v 2 Ne lingeera, khwaliwo nende omuundu yeema imberi waye owali nende obulwaye bwokhufwimba omubiri.
\v 3 Yeso yamala nareeba abamalako nende Abafarisaayo ari, amalako kafukirira okhuonia inyaanga ya isabaato kose khasi khaba?
\v 4 Arali nabo babulera sa. Yeso namala namudiira, namuonia, ne namulekhuula mbwe abweo.
\v 5 Namala nabareeba ari, ni wina akari weng'we orakhaonia isurusi kose isukhiri yaye niyikwa mulina inyaanga ya isabaato?
\v 6 Nabo khasi banyalirwa okhukalusia khaba khu makhuwa kano.
\p
\v 7 Ne ngolwa Yeso yabona bala abali nibalangirwe nibalobola ebisaala bieimberi, yababolera olukaado ari,
\v 8 omuundu nakhulaanga musiserero, oreekhala khusisaala sili imberi khaba, areecha yabao omuundu olangirwe akhukhirakho oluyaali,
\v 9 ne ula obalangire mweesi niyeecha nakhubolera ari, beresia uno esisaala! Abwene ao niwo owochia khudiirwa nende echisoni nosingira okhuchia inyuma.
\v 10 Arali nolangwa, chia mani wikhale inyuma, ne ula okhulangire niyeecha nakhubolera ari, omwiicha wange yicha osude imberi eno, abwene ao niwo owochia khunyoola oluyaali imberi wa bala boosi abalangirwe alala ninawe.
\v 11 Khulwo khuba buli mulala owekingula achia okhwikhisibwa, naye ula oweyikhia asi achia okhukingulwa.
\p
\v 12 Ne yamala nabolera omuundu wamulaanga ari, noreresia ebiakhulia biesideera kose ebieingoloobe, oralaanga sa abeecha bao bong'ene khaba, kose abaana beng'we, kose abekho bao, kose abamenyeranwa bao abali nende emiandu, mbwe bosi bareecha bakhulaanga mani wanyoola omuruungo.
\v 13 Arali noreresia obukeni, laanga abamanani, abekhuyuka, abalema nende abaofu,
\v 14 nawe ochia okhunyoola chikhabi khulwo khuba abene abo babula esiokhuruunga, arali ochia khuruungwa mubulamusi bwobalungifu.
\p
\v 15 Ne ngolwo muundu mulala owali akari wa bala abali khumeesa nibalichaanga nende Yeso yabulira amakhuwa kano, yamuboolera ari, niweyikhabi ula omuundu ochia khulia omugaati mubwami bwa Nasaye.
\p
\v 16 Arali Yeso naye yamuboolera ari, omuundu uundi yareresia obukeni bukhoongo obweyingolobe, ne nalaanga abaandu bangi,
\v 17 namala naruma omukholi waye ebikha biebiakhulia bieingoloobe mbwe achie abolera bala abalangwa beeche, khulwo khuba ebiindu bioosi birekekhwe.
\p
\v 18 Arali abaandu boosi bachaaka okhusaba obweyango nende elichoomo elala. owamberi yamuboolera ari, ndakulire indalo, nibili mbwe okhuula njie yilingere, nojama undekhere.
\p
\v 19 Oundi naboola ari, ndakulire echisurusi chiokhulima amajoki karaano, njia okhuchiteema, nojama undekhere.
\p
\v 20 Oundi naboola ari, ndadeekhisie omukhasi ne khulwe sifune esio khasi nyala okhwicha.
\p
\v 21 Omukholi yeecha nabolera omwami waye amakhuwa kano. Ne omwene inyuumba yasinyikha, namala nabolera omukholi waye ari, rula erwanyi lwangu mani ochie khuchingira chikhoongo nende chindiidi echiomulidokho, onyoole khurera ano abamanani nende abekhuyuka, nende abaofu, nende abaranyala khukeenda.
\p
\v 22 Omukholi waye namubolera ari, Omwami, okolagire koosi kamalire okhwekholekhana, ne obweyaango busirimo.
\p
\v 23 Ne omwami namala nabolera omukholi waye ari, rula erwanyi ochie khumwanda nende khuchinjakho, mani oyiike baandu bengire mukari, inyuumba yange yinyoole okhwichula.
\v 24 Khulwo khuba esie babolera mbwe, abulao kata omuundu mulala akari wa bala abalangwa ochia khukhombakho obukeni bwange.
\p
\v 25 Ne emikaanda kia baandu bangi ngolwa kiali nikimulondaanga, yakalukhana nababolera ari,
\v 26 omuundu niyanjichakho, ne khasi yasiula samwana, nende ngina, nende omukhasi waye, nende abaana baye, nende abasiani babwe alala nende abakhana babwe, nende kata omwene, khasi anyala okhuba omweka wange khaba.
\v 27 Omuundu yesi yeesi orabukula omusalaba kwaye mani yanoonde, khasi anyala khuba omweka wange.
\v 28 Khulwo khuba ni wina akari weng'we nadakha khumbakha omunara orakhekhala asi mberi mani abalirire obukusi mani abone mbwe ali nende ebiindu biyera okhumala kose?
\v 29 Ne areecha yakhirwa okhumala olunyuma lwokhuchaaka omuse, mani abaandu boosi nibabona nibachaaka khumuchekha,
\v 30 nibaboola bari, omuundu uno yachaaka okhumbakha ne khane yabula amaani kokhumala.
\p
\v 31 Kose nomwaami oliena nadakha okhuchia khulwana nende omwami uundi, orakhekhala asi mberi khulwo bukeraki, anyoole okhumanya nibili mbwe ye alala nende abaandu chilifu ekhumi ananyala khulwana nende ula omwichira nali nende abaandu chilifu amakhumi kabiri?
\v 32 Ne nabona mbwe khasi ananyala, naruma abaandu khulwo khukoonya omuleembe, omuundu ula nasiri ale.
\v 33 Khulwako buli mulala khweng'we orakhalekha ebiindu bioosi ebiali ninabio, khasi anyala okhuba omweka wange khaba.
\p
\v 34 Ichumbi niindayi, arali ichumbi niinyasikha yinyala khurebwamo sina mani khandi inyoole okhuba indayi?
\v 35 Khasi yili nende obukhoonyi muliloba kose kata khureresia siduke siamasiingo, abaandu bachia khuyisukuna erwanyi. Ula oli nende amarwi kokhubulira anyoole khubulira.
\c 15
\cl Omuliango 15
\p
\v 1 Bulano abasololi bomusolo boosi alala nende abakholi bechimbi basuda khu Yeso okhubulira amakhuwa kaye.
\v 2 Ne Abafarisaayo alala nende abaandiiki bachaaka okhwekanyirisia nibabola bari, omuundu uno yengisianga abakholi bechimbi khandi alichanga ninabo.
\p
\v 3 Yeso yalomaloma nababolera olukaado ari,
\v 4 nimuundu sina khweng'we owelikoondi liaye lala akari wa makoondi imia nilikora orakhalekha amakhumi tisa nende tisa kala musichiimi, mani achie okhukoonya lila elikorere okhuula ngolwa achia khulinyoola?
\v 5 Ne namala khulinyoola alikiinga khumabeka kaye nasangalire.
\v 6 Ne niyoola munyuumba mwaye, achia khulaanga abeecha baye alala nende abamenyeranwa baye, nababolera ari, musangaala alala ninange, khulwo khuba malire khunyoola elikoondi liange eliali liakora.
\v 7 Babolera mbwe nilwo olwa khuchia okhuba nende obusangaafu mwikulu khulwo khubeera omukholi wechimbi mulala owekanira, khukhirakho abakholi bechimbi amakhumi tisa nende tisa abarekanira.
\p
\v 8 Kose khuli nende mukhasi sina oli nende echisilingi ekhumi, nakosia ndala, orakhambia itaara nende okhweya inyuumba, nakoonya musinani okhuula ngolwa ayinyoola?
\v 9 Ne namala okhuyinyoola achia khulaanga abeecha baye alala nende abamenyeranwa baye nababoolera ari, musangaale alala ninange, khulwo khubeera nyolere isilingi eyambere ngosisie.
\v 10 Baboolera mbwe kario nilwo olwobusangaafu buli imberi wa malayika ba Nasaye khulwo khubeera omukholi wechimbi mulala owekanira.
\p
\v 11 Khandi namala naboola ari, omuundu mulala yali nende abasiani babiri,
\v 12 omudiidi yabolera samwana ari, baba mberesie omukabo kwemiandu okukhoyera. Naye samwana yamala nabakaba ebiindu biaye.
\v 13 Olunyuma lwechinyaanga chinyiingi, omusiani mudiidi yamala nabusia ebiindu biaye bioosi, nasamula okhuchia musialo siale; namala nanyasia emiandu kiaye mukhumenya obulamu bwokhuradeeba.
\v 14 Ne ngolwa yali niyakhamala okhwekhonyisiria ebiindu bioosi, injala ya maani yachaaka khubao musialo esio, naye yeesi yachaaka okhuba nende ameenya.
\v 15 Namala nachia niyambana alala nende omuundu mulala mwibulanwa owomusialo esio, namala namuyira mundalo yaye mbwe anyoole khulisianga echimbichi.
\v 16 Niyekoomba okhulia ebiindu biechimbichi chialekhanga, ne abulao omuundu yamuberesiakho esiindu siosi siosi khaba.
\v 17 Ne ngolwe yeecha yemanya yamala niyereeba mumwoyo kwaye ari, abakholi ba baba banga abalichaanga ebiakhulia nibidoonga, nange esie ano ndi khufwa injala!
\v 18 Namala naboola ari, ndarula mani mbweo njie owa baba mani muboolere mbwe, baba ndakhola mabi imberi welikulu nende imberi wao,
\v 19 khasi khoyera khandi okhulangwa omwana wao, khole sa kori nga mulala khubakholi bao.
\v 20 Namala narula nachia khu samwana. Ne ngolwa yali nasiri ale, samwana yamubona, namwelalikhira, namala nachia namweburakho mukosi namuchunjuna.
\v 21 Ne omusiani naye namubolera ari, baba ndakhola mabi imberi welikulu nende imberi wao, khasi khoyera okhulangwa omwana wao.
\p
\v 22 Arali samwana naye yaboolera abakholi baye ari, murere ingubo indayi lwangu, mumufwale khandi mure ingila mulwala lwaye, nende bilaaro mumakulu kaye,
\v 23 murere imoosi ikhomefu yila mani muyisiinje khulie khusangaale,
\v 24 khulwo khubeera omusiani wange uno yali yafwa, ne bulano alamukhe, yali yakora, ne bulano abonekhane. Nibamala nibachaaka khusangaala.
\p
\v 25 Bulano omusiani waye omukhuluundu yali mundalo, ne kori ngolwa yali niyeecha nayakhasuda ambi nende inyuumba, yabulira idoboosi yechinyimbo nende amakhino,
\v 26 Namala nalaanga omukholi mulala, namureeba ari, makhuwa kano kekesia sina?
\v 27 Naya namuboolera ari, omusiani wang'we yechere mani baba wao asinjire imoosi ikhomefu, khulwa khubeera amunyolere khandi nali mulamu.
\p
\v 28 Naye namala nasinyikha nakhaya okhwingira mukari. Naye samwana yarula erwanyi namwekweeda.
\v 29 Arali naye yakalusia samwana naboola ari, lingeera esie ndakhakhukholeraanga emirimo khulwemiaka mingi kino, ne khandi khasi ndakhayakho okhukhola akawamboolera okhukhola ebikha biosi biosi, ne khasi wamberesiakho kata sa khameme mbwe nyoole okhusngaala nende abeecha bange;
\v 30 Naye omusiani wao uno, owalia ebiindu biaye alala nende bayeyi, omusinjiire imoosi ikhomefu.
\p
\v 31 Naye namubolera ari, ewe omusiani wange obechaanga ninange echinyaanga chioosi, khandi ebiindu biandi nabio bioosi ni biao.
\v 32 Okhusangaala nende khukhuba sioka bikhoyera, khulwo khubeera omusiani weng'we uno yali yafwa, ne bulano alamukhe, yali yakora, ne bulano abonekhane.
\c 16
\cl Omuliango 16
\p
\v 1 Khandi Yeso naboolera abeeka baye ari, yaliwo omuundu mulala omuyiinda, owali nende omwemirisi wemiandu kiaye, ne bamusitakakho mbwe yali nanyasirie emiandu kiaye.
\v 2 Omuyiinda oyo yamala namulaanga, namureeba ari, makhuwa sina kano akambuliraanga khuloondana ninawe? Yekesiakho kori ngolwa okholaanga emirimo kiao, khulwo khubeera khasi onachiririra khuba omwemirisi.
\p
\v 3 Naye mwemirisi oyo yamala niyeereba mumwoyo kwaye ari, khole endie? Khulwo khuba omwami wange yandusia khu bwimirisi, ne esie mwene khasi nyala okhulima, khandi mbona chisoni okhusaba.
\v 4 Bulano manyire esindakhola, nindusibwa khubwimirisi, mani abaandu bonyoole khunyingisia munyuumba chiabwe.
\v 5 Namala nalaanga buli muundu owali nende elikobi liomuyiinda waye, namala nareeba owamberi ari, omuyiindq wange akhubaanja sina?
\p
\v 6 Naye nakalusia ari, ebikero imia ebia mafura. Naye namuboolera ari, bukula obwandiike bwelikobi liao mani wikhale asi lwangu wandiike amakhumi karaano.
\p
\v 7 Namala nareeba oundi ari, ewe nawe obanjwa sina? Naye nakalusia ari, ebikero imia ebie ingaano. Namubolera ari, bukula obwandiike bwelikobi liao mani wandiike amakhume munane.
\v 8 Omwami yamala nafumia mwemirisi mubi ula khuloondana nende kori ngolwa yakhola mubumanyirisi, khulwo khuba abaandu bomusialo babechaanga nende bumanyirisi mulwibulo lwabwe okhirakho abaandu bobulafu.
\v 9 Nange baboolera mbwe, mube nende abeecha mumiandu kiobwoni, ne nikichia khubwa banyoole okhubengisia mubumenyo bwechinyaanga chioosi.
\v 10 Ne ula oli mwesikwa khubindu bidiidi, nomwesikwa mubiingi biosi, naye ula orali mulungifu mubindu bidiidi khasi nomulungifu kata mubiindu bingi biosi.
\v 11 Khulwako, nikali mbwe eng'we khasi mwali abesikwa mumiandu kiabwoni, niwina ochia okhubeesika mumiandu kiobwadieri?
\v 12 Ne nibili mbwe khasi mwali abeesikwa mumiandu kio mundu undi, ni wina ochia okhubaberesia ekieng'we bene?
\v 13 Abulao omukholi onyala khukholera abaami babiri; khulwo khuba achia khusuila mulala ne akheera mulala, kose achia khudirana nende mulala nalekeresia oundi. Khasi munyala okhukholera emiandu nende Nasaye.
\p
\v 14 Bulano Abafarisaayo, abali abakheera amapesa, babulira makhuwa ako koosi, ne nibamujaara.
\v 15 Naye yababolera ari, eng'we mwebolaanga imberi wa baandu mbwe muli abakololofu, arali Nasaye naye yamanya mioyo kieng'we, khulwo khuba sila esiekingula imberi wabaandu sibechaanga siekingula imberi wa Nasaye.
\p
\v 16 Amalako kaliiwo alala nende banabii okhuula owicha khwa Yokhana: khuchaaka ebikha ebio, amakhuwa malayi akobwami bwa Nasaye kayalwaanga, ne buli muundu ateemanga okhweyingisiamo nende amaaani.
\v 17 Arali ni biangu muno elikulu nende sialo khurulao, khukhirakho eliandiko lia malako khurulakho kata sa elala.
\p
\v 18 Ne buli muundu olekha omukhasi waye nadeekhia omukhasi undi, abechaanga akholere buyeyi, naye ula odeekhia omukhasi womusaacha waye alekhere yeesi abechaanga akholere buyeyi.
\p
\v 19 Namala naboola ari yaliwo omuundu muyiinda owefwalaanga echingubo chingwalafu echiomusambarau, nasangalira emiandu kiaye mingi bulinyaanga.
\v 20 Naye omumanani mulala owalangwa mbwe Lasaro owamakoonjo kali kechula khumubiri kwaye kwoosi, yayirangwa khusiribwa siaye,
\v 21 yekombaanga okhulia ebiindu bialakakhanga asi khurula khu meesa yomuyiinda ula, ne kata echimbwa chiechaanga khumukhomba khu bikoonjo biaye.
\v 22 Omumanani oyo yamala yafwa ne malayika nibamubukula nabamuyira khusirifu sia Ibraimu. Omuyiinda ula yeesi yamala nafwa, ne nasiikhwa.
\v 23 Ne ngolwa yali nanyoola amanyakhano nali emagoombe, yakingula chimoni chiaye nabona Ibraimu nali ale ninaye, Lasaro naye nali khusirifu siaye.
\v 24 Yalira naboola ari, ewe baba Ibraimu, nojama ndelalikhirekho, mani orume Lasaro yenikhe olwala lwaye mumaachi anyisie olulimi lwange, khulwo khubeera esie ndi khusandisibwa mumuliro kuno.
\p
\v 25 Ibraimu naye yamubolera ari, mwana wange, yichulisia mbwe ewe wanyoola amakhuwa kao malayi mubulamu bwao, arali Lasaro naye yanyoola amakhuwa mabi, ne bulano ali khulemisibwa omwoyo kwaye ano, ewe nawe osandisibwa.
\v 26 Khandi okhirakho ako, elidikho likhoongo liageengwa akari wefwe ninang'we, mbwe bala abakhadakha khurula eno khwicha oweng'we eyo baranyalirwa khaba, kose kata abaandu bali owengwe eyo baraambukha beecha wefwe eno khaba.
\p
\v 27 Omuyiinda ula namala naboola ari, mani baba, khusaba mbwe omurume munyuumba ya baba,
\v 28 khulwo khuba ndi nende abasiani befwe baraano, achie abayalire, mbwe bosi bareecha bola abuundu wa manyakhano ano.
\p
\v 29 Ibraimu naye naboola ari, bali nende Musa alala nende abanabii, lekha bababulire.
\p
\v 30 Omuyiindi ula naye nakalusia naboola ari, khaba dawe baba Ibrahimu, omuundu nabachiira khurula mubafu, banekanira.
\p
\v 31 Arali Ibrahimu naye yamuboolera ari, nibili mbwe khasi bakhabulira aka Musa alala nende abanabii, khasi bachia khufukirira kata omuundu narula mubafu.
\c 17
\cl Omuliango 17
\p
\v 1 Yeso namala naboolera abeeka baye ari, amateemo kachia khwicha, arali ni uuwi khu muundu ula okera keeche!
\v 2 Bikhoyera okhuboya elikina liokhusierakho mukosi mwomuundu oyo, mani asukunwe munyaanja, khukhira akosie mulala khu badiidi bano.
\v 3 Mwekenderesie abene, ne omusiani weng'we nakhola mabi, mwalabire, ne niyekanira, mulekhere.
\v 4 Ne nakhukholera amabi makhabi saba khu inyaanga ndala, nakhwichira makhabi saba naboola ari, ndekanira, okhoyere omulekhere.
\p
\v 5 Abeeka baye bamala nibamubolera bari Omwami, rumeede obusuubiri.
\p
\v 6 Mwami naye yababoolera ari, nimwakhaberekho nende obusuubiri bwaka kori lufwa lwe lisaaka, mwakhaboleere omukhuyu kuno muri, yiyikha ano, mani ochie orakwe munyaanja, ne kwakhababulire.
\p
\v 7 Arali ni wina khweng'we owomukholi waye alimianga kose owayaanga echingoombe, nakalukha khurula mundalo, achia khumubolera ari, yicha lwangu, wikhale, olie ebiakhulia? Khasi anamubolera ari, ndereserie
\v 8 ebiakhulia nyoole khulia, wedinyirisie okhalabanire, nimala khulia nende khung'wa, lunyuma wesi onanyoola khulia nende khung'wa?
\v 9 Achia khwebasia omukholi oyo mbwe khulwo khuba akholere akamulagirer? Anakhola ario?
\v 10 Nang'we mwesi nimumala okhukhola bulk siindu esiamulagirwe, mubole muri, efwe khuli sa abakholi abarali abeingaanga, arali khukholera sa kala aka khukhoyere okhukhola.
\p
\v 11 Ne ngolwa bali khungira nibachia Yerusalemu, Yabirira akari wa Samaria nende Galilaya.
\v 12 Ne ngolwa yengira mulukoongo lundi, yabukanana nende abaandu bobukere ekhumi,
\v 13 nibeema ale, nibakhuba sioka mudoboosi ninaboola bari, Yeso, Omwami mukhoongo, rubonerekho esisa.
\p
\v 14 Ne ngolwa yabalola, yababoolera ari, muchie mwelolesie khubakukhani. Ne ngolwa bali nibachia, banyoola khulabisibwa nibasiri khungira.
\v 15 Ne mulala khuinibo ngolwa yabona mbwe yakhalabisibwa, yakalukha nafumia Nasaye mudoboosi ikhoongo,
\v 16 namala nakwa mafumame mumakulu ka Yeso, namwebasia, ne omwene oyo yali Omusamaria.
\v 17 Yeso yamala nareeba ari, khasi balabisibwe boosi ekhumi? Ne abandi tisa nabo bali ena?
\v 18 Khasi bechere okhuberesia Nasaye oluyaali arali sa omukeni uno?
\v 19 Namala namubolera ari, singira obweo, obusuubiri bwao bukhuonisie.
\p
\v 20 Ne ngolwa Abafarisaayo bamureeba bari obwami bwa Nasaye bwakheche lina, Yabakalusia nababolera ari, obwami bwa Nasaye khasi bwicha khukhubalirira khaba,
\v 21 kose khasi bachia okhubola mbwe, lingeera, buli eno, kose ela, khulwo khuba, lingeera obwami bwa Nasaye buli mukari mweng'we.
\p
\v 22 Namala nabolera abeeka baye ari, echinyaanga chichia khwicha echia muchia okhwekoomba khubona inyaanga ndala khuchinyaanga chiomwana womuundu, arali khasi mwakhayibone khaba.
\v 23 Khandi bachia khubabolera bari, lingeera ano, kose, lingera ela: Murarula abuundu wamuli khaba, kose murabaloonda khaba,
\v 24 khulwo khuba kori ngolwolumiesi lukhosianga khurula olwande luno asi welikulu, nilwo Olwomwana womuundu achia khuba munyaanga yaye.
\v 25 Arali bili mbwe okhuula anyoole amanyakhano mangi mberi alala nende olwibulo luno khumukhaya.
\v 26 kori ngolwa echinyaanga chia Noa chiali, nilwo olwa kachia okhuba muchinyaanga Chiomwana womuundu.
\v 27 Abaandu balichaanga, nibang'wa, badiekhienga bakhasi ne abakhasi nibadeekha, okhuula inyaanga yila eya Noa yengira musafina, ifula niyikha niyisasia abaandu boosi.
\v 28 Khandi kori ngolwa biali muchinyaanga chia Lutu, abaandu balichaanga nibang'wa, bakulaanga nibukisia, nibaraaka nende okhumbakha.
\v 29 Arali inyaanga eya Lutu yarula Sodoma, esbiriti siarubulwa khurula mwikulu mani omuliro nikwadukha nikusasia abaandu boosi.
\v 30 Kachia khuba kario inyaanga yila eyo mwana Womuundu achia khufunulwa.
\v 31 Inyaanga eyo, ula oli akulu, arekha okhwicha khubukula ebiindu biaye ebili munyuumba, naye ula oli mundalo yeesi arakalukha inyuma khaba.
\v 32 Mwichulisie omukhasi wa Lutu.
\v 33 Omuundu yesi yeesi odakha okhweonia bulamu bwaye, achia khubukosia, arali ula ochia khukosia obulamu bwaye, achia okhubuonia.
\v 34 Esie babolera mbwe, abaandu babiri bachia khuba khusitaanda silala musiro esio, ne mulala achia khubukulwa, ne ouundi achia khudoonga.
\v 35 Abakhasi babiri bachia khuba nibasia alala, ne mulala achia khubukulwa, ne ouundi achia khulekhwa.
\v 36 Abaandu babiri bachia khuba mundalo, mulala achia khubukulwa, ne ouundi achia khulekhwa.
\p
\v 37 Nabo bakalusia nabamureeba bari, Owami, niena? Naye yababolera ari abuundu wesiindu sifwire sili, abwene ao niwo owechingosia chinyolekhanaga nichiebusirie alala.
\c 18
\cl Omuliango 18
\p
\v 1 Namala nababolera olukaado ngolwa bakhoyere okhulaama Nasaye chinyaanga chioosi nibarajoonga emioyo,
\v 2 naboola ari, yaliwo omukhalaki mulala mulidokho lindi, orarichanga Nasaye kose okhudeeba abaandu.
\v 3 Ne mulidokho elio yaliwo omukhasi mulekhwa, owamuchiraanga amakhabi mangi naboola ari, khonye nyoole akakhoyere khunyoola akari wange nende omusuku wange.
\p
\v 4 Naye yakhaya khulwebikhi, ne olunyuma yeecha yaboola mumwoyo kwaye ari, kata kario esie khasi namaanga Nasaye khaba, khandi khasi mberesianga omuundu esiriibwa khaba,
\v 5 arali khulwo khuba omukhasi mulekhwa uno oli khunyasia lukali, ndamuberesia akakhoyere khunyoola, areecha yachiririra khunjichangakho niyanysia.
\v 6 Omwami namala naboola ari, murekeresie kori ngolwa omukhalaki orali owobukololofu ula aboola.
\v 7 Ne Nasaye naye khasi anaberesia abalobole baye abamulamaanga esideere nende siro akabakhoyere okhunyoola, ne khandi nimwesimirifu khunibo?
\v 8 Babolera mbwe, achia okhubaberesia kala akabakhoyere okhunyoola lwangu. Naye Omwana Womuundu nachia khwicha, achia khunyoola obusuubiri musialo?
\p
\v 9 Khandi yamala nababoolera olukaado ari abaandu baliwo abebolaanga mbwe nibakololofufu, nibalekeresia abaandu bandi boosi.
\v 10 Bulano abaandu babiri bachia khulaama mukhekalu, mulala yali Omufarisaayo, ne owakhabiri yali musololi womusolo
\v 11 Omufarisaayo yeema nalaama niyebolakho ari, Ewe Nasaye, esie khwebasia khulwo khuba khasi ndi kori abaandu bandi, abanyuli abarali balungifu, abayeyi, kose kori omusololi womusolo uno.
\v 12 Esie sibaanga makhabi kabira khu ijuma, khandi ndusianga silala khwe ekhumi khurula khubiindu bianyolanga bioosi
\p
\v 13 Arali omusololi womusolo naye yeema ale, kata nakhirwa okhukingula chimoni chiaye mwikulu, arali yekhuya khuya khu sirifu siaye naboola ari, Ewe Nasaye, undekhere esie omukholi wechimbi.
\v 14 Babolera mbwe, omwene uno yabwao khuchia munyuumba mwaye nabalirwe okhuba omulungifu khukhira ouundi ula, khulwo khuba buli muundu wekingula achia okhwikhisibwa asi, naye ula oweyikhia asi, achia khukingulwa.
\p
\v 15 Abaandu bamala nibamurerera abaana badiidi mbwe anyoole okhubadirakho, arali abeeka baye nabo ngolwa balola bario, babalabira.
\v 16 Yeso naye yabalaanga mbwe bachie abuundu owayali, naboola ari, mulekhe abaana badiidi banjichekho, murabakayira khaba, khulwo khuba obwami bwa Nasaye nibwabaandu bali kori abene abo.
\v 17 Baboolera obwadieei mbwe, omuundu yeesi oranyoola obwami bwa Nasye kori ngomwana mudiidi, khasi achia okhwingira mubwami bwaye.
\p
\v 18 Khandi omurukii undi yamureeba ari, Omwekesia mulayi, khole sina khunyoole obulamu bwechinyaanga chiosi?
\p
\v 19 Yeso naye yamukalusia namureeba ari, khulwasina niunaanga mbwe omulayi? Abulao omuundu mulayi arali sa mulala, ne omwene oyo niye Nasaye.
\p
\v 20 Yeso namala namureeba ari, omanyire amalako kaboola mbwe orakhola obuyeyi khaba, oreera khaba, oreebanga khaba, orarusianga obuloli bwobubacha khaba, richaanga so nende mao.
\p
\v 21 Omuruki ula naye yakalusia naboola ari, ndadiira kano koosi khurula muluraaga lwange.
\p
\v 22 Ne ngolwa Yeso yabulira ario, yamubolera ari, lisiriwo elikhuwa elala elia waleemerwa, kusia ebiindu bioli nabio bioosi, mani okabe abamanani, nomala ni wicha unoonda, ne ochia khuba nende imbikhiro mwikulu.
\v 23 Arali omuruki ula ngolwa yabulira amwakhuwa ako yasinyisibwa lukali, khulwo khuba yali omuyiinda lukali
\v 24 Ne ngolwa Yeso yabona mbwe yali asinyikhe lukali, yaboola ari, abaandu bali nende emiandu bachia khuba nende obusiro bwaka burie okhwingira mubwami bwa Nasaye!
\v 25 Khulwo khubeera ni biangu ingamia okhubirira muliina lie isindani, khukhirakho omuundu muyiinda okhwingira mubwami bwa Nasaye.
\p
\v 26 Ne bala ababulira amakhuwa ako, bareeba bari, bulano niwina onyala okhuonisibwa?
\p
\v 27 Yeso naye yakalusia noboola ari, akaranyalikhana khubaandu kanyalikhana khu Nasye.
\p
\v 28 Petero naye yaboola ari, lingeera efwe khwalekha ebiindu biefwe bioosi nikhukhuloonda.
\p
\v 29 Yeso namala nababoolera ari, baboolera obwadieri mbwe, abulao omuundu walekha inyuumba, kose abebusi, kose omusiani wabwe, kose omukhasi, kose abaana, khulwo khubeera obwami bwa Nasaye,
\v 30 orakhanyoole lukali okhirakhao muchinyaanga chino, nende musialo siechulamo obulamu bwe chinyaanga chiosi.
\p
\v 31 Namala nabukula ekhumi nende babiri bala, nababoolera ari, mulingeere khudakha khunina khuchia Yerusalemu, ne bulano amakhuwa koosi akaandiikwa nende abanabii khuloondana nende omwana Womuundu kachia okhwolerera.
\v 32 Khulwo khuba achia khugeengwa mumakhono kabanasialo, ne bachia khumufuola, nende khumulekeresia, nende khumufuchakho mare,
\v 33 bachia khumukhuya, ne lunyuma bachia khumwira, naye achia khulamukha khandi inyaanga ya khadaru.
\v 34 Arali nabo khasi bamanyirisia amakhuwa ako kata sa budiidi, khandi bali bakisibwa elikhuwa elio, ne khasi bamanyirisia akelomaloma.
\p
\v 35 Ne ngolwa bali ambi okhuula Yeriko, omuundu mulala omwoofu yali yekhale khundulo khweingira nasabaanga obukhoonyi,
\v 36 ne ngolwa yabulira omukaanda kwa baandu nikubira, yareeba ari, ni sina esili khwekholekhanaanga?
\p
\v 37 Bamubolera bari, Yeso wa Nasareti alikho abira.
\p
\v 38 Naye omuwoofu ula yakhuba sioka, naboola ari, Yeso, Omwana wa Daudi, mbonerekho sisa.
\v 39 Abaandu bali imberi bamwalabira nibamuboolera bari abulere, arali naye yameeda khukingula idobosi yaye lukali, naboola ari, Ewe Omwana wa Daudi, mbonerekho sisa.
\p
\v 40 Yeso yamala niyeema, naboola ari bamurere abuundu wayali, ne ngolwa yasuda ambi naye, Yeso yamureeba ari,
\v 41 Odakha khukholere sina? Naye yakalusia ari, Omwami ndakha khubona.
\p
\v 42 Yeso namala namubolera ari, nyoola khubona, obusuubiri bwao bukhuonisie.
\v 43 Namala nanyoola khubona ebikha ebio, ne namuloonda, nafumia Nasaye. Abaandu boosi ngolwa babona kene ako, bafumia Nasaye.
\c 19
\cl Omuliango 19
\p
\v 1 Yeso yamala niyengira Yeriko nabira akari.
\v 2 Ne yaliwo omuundu owalangwa mbwe Sakayo, owali omukhoongo wa basololi bomusolo, ne yali omuundu muyiinda.
\v 3 Omwene oyo yateemanga okhubona Yeso mbwe nomuundu ofwana arie, arali khasi yanyalirwaanga khulwo bungi bwabaandu naye omwene yali omwimbikiri.
\v 4 Bulano yerukha chimbiro nachia imberi, nanina akulu khumusaala kwomukhuyu mbwe anyoole khumubona, khulwo khuba Yeso yali achia khubira khungira eyo.
\v 5 Ne ngolwa Yeso yola abuundu ao, yalingera akulu namala namubolera ari, Sakayo, yikha asi lwangu, khulwo khuba bikhoyera okhuwoonga munyuumba mwao inyaanga yino.
\v 6 Ne yamala niyekha lwangu, namwingisia mubusangaafu.
\v 7 Ne ngolwa abaandu boosi babona bario, bamuloonda nibabululaa bari, yengire okhulia munyuumba mwomuundu wechimbi.
\p
\v 8 Sakayo yamala niyema naboolera Omwami ari, Mwami, lingeera mberesia abamanani akari wemiandu kiange, ne naliwo ula owandanyuula esiindu khubirira khulwo khumusitaaka mububacha, njia khumukalusiria amakhabi kane.
\p
\v 9 Yeso naye yamubolera ari, obuwonia bwingire munyuumba muno inyaanga yino, khulwo khuba uno yeesi nomwana wa Ibraimu.
\v 10 Khulwo khuba Omwana Womuundu yeecha okhukoonya nende khuonia sila esiakora.
\p
\v 11 Ne ngolwa babulira amakhuwa ako, yameeda khulomaloma nababoolera olukaado, khulwo khuba yali ambi nende yerusalemu, nabo bapaara mbwe obwami bwa Nasaye bunabonekhana lwangu.
\v 12 Namala naboola ari, omuundu mulala owenyala, yasamula okhuchia musialo siale, okhunyoola buruki mani amale akalukhe.
\v 13 Yamal nalaanga abaandu ekhumi akari wabakholi baye, nababeresia ebiboo ekhumi ebia mapesa, nababoolera ari, mukhole obukhala okhuula ngolwa njia khukalukha.
\p
\v 14 Arali abaandu bomulidokho liaye bali bamusuila, ne bamala nibaruma abaandu khumuloondakho, nibamubolera bari, khasi khudakha omuundu uno aruruke.
\v 15 Ne ngolwa yakalukha namalire khunyoola obwami bwaye, yalagira ari balaange abakholi bala abayaberesia amapesa kaye, mbwe anyoole khumanya ingaanga ya buli mulala yali nanyoolere khurula mubukhala bwaye.
\p
\v 16 Owamberi yeecha naboola ari, Omwami, esiboo siao siarera ingaanga yebiboo biindi ekhumi.
\p
\v 17 Namala namuboolera ari, ni bilayi, omukholi mulayi, khulwo khuba obere omwesikwa mulikhuwa lidiidi, bulano nyoola obunyala akulu wamadokho ekhumi.
\p
\v 18 Owakhabiri yeesi yeecha naboola ari, Mwami, esiboo siao siarera ingaanga yebiboo biraano.
\p
\v 19 Naye namuboolera ari, ewe nawe obe akulu wa madokho karaano.
\p
\v 20 Ouundi yeecha naboola ari, Mwami, esiboo siao nisio sino, esia ndaboya mungubo,
\v 21 khulwo khuba esie ndaria mbwe ewe oli muundu mudinyu, obukulaanga esiorabikha, khandi okesaanga esioraraaka.
\p
\v 22 Naye yamubolera ari ndakhukhalakira khuloondana nende amakhuwa komunwa kwao mwene, ewe mukholi mubi wamanya mbwe esie mbechaanga omuundu mudinyu, obukulaanga esia ndarabikha, khandi ngesaanga esiandararaaka,
\v 23 bulano, khulwa sina norayira amapesa kange khu bala abeyosianga, ne ningalukha kanyoole alala nende ingaanga yako?
\v 24 Namala naboolera bala abali nibemere ambi naye ari, mumunyule esiboo esio mani musiberesie ula oli nende ebiboo ekhumi.
\p
\v 25 (Nabo bamubolera bari, Mwami, oyo ali nende ebiboo ekhumi.)
\p
\v 26 " Babolera mbwe, buli muundu oli nende esiindu achia khumederwakho, naye ula obula siindu achia khunyulwa kata sila esiali ninasio.
\v 27 Khandi murere imberi eno abasuku bange abali nibaradakha mbwe esie baruke, mani mubere imberi wange."
\p
\v 28 Ne ngolwa yamala khuboola makhuwa ako, yachaaka lukeendo lwokhuchia Yerusalemu niyemire imberi.
\v 29 Ne ngolwa yali ambi khula Betifage nende Betania, khulugulu lulangwa mbwe Miseyituni, yaruma abeeka baye babiri,
\v 30 naboola ari muchie mulukoongo luli imberi weng'we, ne nimwingira mukari munabona ipunda yomuundu yesi yeesi asiri khuyininakho niiboyerwe, muyibolole mani muyinderere.
\v 31 Naye omuundu namureeba ari, khulwa sina nimuyibolola? Muboole muri, khulwo khubeera Omwami ayidakha.
\v 32 Ne bala abayaruma bachia mani nibanyoola kori ngolwa yababoolera.
\p
\v 33 Ne ngolwa bali nibabololaanga ipunda, abeneeyo babareeba bari, khulwa sina muli khuyibololaanga?
\p
\v 34 Nabo babakalusia bari, Omwami ayidakha.
\v 35 Bamala nibayirerera Yeso, nibaala chingubo chiabwe akulu weipunda, nibaninia Yeso akulu wayo.
\v 36 Ne ngolwa yali nabwao, abaandu baala echingubo chiabwe khungira.
\p
\v 37 Ngolwa yali ambi okhuula khusikhiriro sio lugulu lwa Miseyituni, omukaanda kwa beeka baye boosi kwachaaka khusangaala nibafumia Nasaye mudoboosi chikhoongo, khulwo khubeera ebikhole bioosi ebio bunyala ebia babona,
\v 38 nibaboola bari, niwechikhabiu omuruki wiicha muliira lio Mwami: Omuleembe kube mwikulu alala nende oluyaali.
\p
\v 39 Ne balala khu Bafarisaayo abali mumukaanda okwo bamuboolera bari, Mwami, kaania abeeka bao.
\p
\v 40 Yeso naye yakalusia naboola ari, "esie baboolera mbwe, kata bano nibabuleera, amakina kanakhuba sioka."
\p
\v 41 Ne ngolwa Yeso yola ambi nende elidookho, yalira,
\v 42 naboola ari, biakhabere bilayi niwakhamanyire akakhoyera okhurerera omuleembe inyaanga yino! Arali bulano kakisibwe mumoni chiao.
\v 43 Khulwo khuba echinyaanga chichia okhwichakho echiabasuku bao bachia khumbakha eliida likhubodokhane, ne bachia okhubodokhana nibakhulingeera buli lwande.
\v 44 Bachia okhukoka asi alala nende abaana bao, ne khasi bachia okhulekherakho kata sa elikina elala akulu welindi, khulwo khubeera khasi wamanyirisia ebikha biao ebiokhukendera.
\p
\v 45 Yeso yamala niyengira mukhekalu, nachaaka khurusia rwanyi abaandu bali nibakhola obukhala,
\v 46 nababoolera ari, kaandikwa mbwe inyuumba yange yichia khuba inyuumba yokhulamiramo, arali eng'we nang'we muyikholere khuba elikhokho lia bebi.
\p
\v 47 Naye yachiririra okhwekesia bulinyaanga mukhekalu. Arali abakhoongo babakukhani alala nende abaandiiki, nende abemirisi babaandu, bakonyaanga ingira yokhumwira,
\v 48 arali khasi banyalirwa khunyoola, khulwo khuba abaandu boosi bali bedemberefuu nibamubulira.
\c 20
\cl Omuliango 20
\p
\v 1 Inyaanga ndala ngolwa Yeso yali niyekesianga baandu mukhekalu nende khuyaala amakhuwa malayi, abakhoongo babakukhani, nende abaandiiki alala nende abakofu bamwichira
\v 2 nibamureeba bari, rubolere mbwe okholaanga makhuwa kano khu bunyala sina? Khandi ni wina owakhubersia obunyala buno?
\p
\v 3 Naye yabakalusia naboola ari, siesi ndabareeba elikhuwa elala, mumbolere mbwe,
\v 4 obubatisibwi bwa Yokhana bwarula mwikulu kose khu baandu?
\p
\v 5 Barebana abene khu bene, nibaboola bari, nikhubola mbwe bwarula mwikulu, anarureeba ari khulwa sina simwamusuubira?
\p
\v 6 Ne nikhubola mbwe bwarula khubaandu, abaandu boosi baba banarukhuya nende makina, khulwo khuba bafukirira mbwe Yokhana yali omunabii.
\v 7 Nibamala nibakalusia bari efwe khukorerwe owabwarula.
\p
\v 8 Yeso naye nababoolera ari, esie siesi khasi ndabaolera mbwe kholaanga amakhuwa kano khu bunyala sina.
\p
\v 9 Namala nachaaka khuboolera baandu olukaado luno: ari omuundu uundi yaraaka indalo yemisabibu, ne yalekhera abaandu abayilimaanga, naye yachia okhumenya musialo siale khulwe bikha bingi.
\v 10 Ne yamala naruma omukholi waye ebikha biokhukesa mbwe abalimi bala bamuberesiekho ebiamo biomusabibu. Arali abalimi nabo, bamukhuya nibamwirukhania makhono makhaya.
\v 11 Khandi yamala naruma omukholi uundi, naye yeesi bamukhuya nibamwambia chisoni nende okhumwirukhania makhono makhaya.
\v 12 Khandi yaruma owakhadaru, uno naye bamuumisia, nibamusukuna erwanyi.
\v 13 Bulano omwami weindalo yemisabibu yereeba ari khole sina? njia khuruma omwana wange mukheerwa, aundi nibachia khumubona, bachia khumuba esiriibwa.
\p
\v 14 Arali abalimi bala ngolwa bamubona, balomaloma abene khu bene, nibaboola bari uno niye omwene bulaame buno, bulano khumwire mani obulaame buno bube obwefwe.
\v 15 Nibamala nibamusukuna erwanyi weindalo yemisabibu nibamwira. Bulano Omwami weindalo yemisabibu achia khubakhola arie?
\v 16 Achia khwicha nasasia abalimi abo, namala aberesia abaandu bandi indalo yemisabibu eyo. Ne ngolwa babulira amakhuwa ako, baboola bari, khaba dawe, kene ako karekhlekhana.
\p
\v 17 Arali Yeso naye yabalingeera, namala nabareeba ari, "amekesio kelikhuwa liandikwa mbwe: Elikina liabombakhi bakhaya, nilio likina likhongo elio muchikona ni sina?
\p
\v 18 omuundu ochia khukwa akulu welikina elio achia khufunikha, naye yesi yeesi owalichia khumukwakho, lichia khumusia abe obusie"
\p
\v 19 Ne abaandiiki alala nende abakukhani bakhoongo bakoonya ingira yokhumudiira ebikha ebio, khulwo khubeera bamanya mbwe yababolakho mulukaado olwo, arali bali nende oburi khulwobeera baandu.
\v 20 Bachaaka okhumulonderera, nibaruma abakheberi, ebekhola okhuba abaandu bobwadieri mbwe banyoole khumudiira khulondana nende makhuwa kaye mani bamale bamure mumakhano kabemirisi nende abobunyala.
\v 21 Bamala nibamureeba bari, Omwekesia, efwe khumanyire mbwe ewe obolaanga niwekesia amakhuwa kobwadieri, khandi khasi odebaanga obukhoongo bwomuundu khaba, arali wekesianga ingira ya Nasaye mubwadieri.
\v 22 Bulano, bifukirirwa mumalako khuruunga musolo khu Kayisari, kose khaba?
\p
\v 23 Arali Yeso naye yamanyirisia bikesi kesi biabwe, nababoolera ari,
\v 24 " munjekesie idinari, yilikho sifwanani nende eliira lia wina."? Nabo bakalusia nibaboola bari, "esia Kayisari"
\p
\v 25 Namala nababoolera ari, "bulano muberesie Kayisari ebia Kayisari, ne ebia Nasaye muberesie Nasaye."
\v 26 Ne khasi banyalirwa khumusitaaka imberi wabaandu khulwa makhuwa kaye, nibaukisibwa lukali khuloondana nende amakalusio kaye, mani nibadoonga nibabulerere.
\p
\v 27 Olunyuma, balala khu Basadukayo ababolaanga mbwe obulamusi bwa bafu bubulao bamuchiira,
\v 28 nibamureeba bari, "Mwami, Musa yarwandikira naboola ari, omuundu nafwirwa omusiani wabwe oli nende mukhasi, ne abula omwana, abukule omukhasi oyo, mani anyoole khuberesia musaini wabwe olwibulo.
\v 29 Bulano khwaliwo nende abasiani saba, owamberi yadeekhia mukhasi, ne yafwa nabula omwana,
\v 30 owa khabiri yabukula mukhasi oyo, naye yeesi yafwa nabula omwana,
\v 31 khandi owo khadaru yamudekhia, okhula owa saba, nibamala nibafwa nibaralekherekho abaana.
\v 32 Olunyuma mukhasi ula yeesi yafwa.
\v 33 Bulano, mubulamusi bwa bafu, achia khuba omukhasi wa wina? Khulwo khuba yadeekhera boosi saba?
\p
\v 34 Yeso yabakalusia naboola ari," abaandu bo musialo muno badekhianga nende khudeekha,
\v 35 arali bala abachia khubalwa okhuba abakhoyera okhunyoola esialo sila, nende khulamusibwa mubafu, khasi bachia khudeekhia kose khudeekha,
\v 36 khandi khasi banyala okhufwa khaba, khulwo khubeera bali kori abamalayika, khandi nibaana ba Nasaye, ngolwa bali abaana bobulamusi.
\v 37 Ne khulw khuba abafu balamusibwaanga, kata Musa yekesia musichakha kori ngolwa yalaanga Omwami khuba Nasaye wa Ibraimu, nende Nasaye wa Isaaka, nende Nasaye wa Yakobo.
\v 38 Naye khasi ni Nasaye wa bafu, arali ni wabalamu, khulwo khuba boosi bamenyaanga khuniye."
\p
\v 39 Abaandki bandi bakalusia nabamuboolera bari,"Omwekesia, obolere bilayi,"
\v 40 ne khandi khasi batemakho okhumureeba elirebo liosi liosi khaba.
\p
\v 41 Khandi Yeso yabareeba ari, abaandu babolaanga barie, mbwe kiristo nomwana wa Daudu?
\v 42 Khulwo khuba Daudi mwene aboola muchisaburi ari, Mwami yabolera Omwami wange ari, yikhala mukhono kwange musaacha,
\q
\v 43 okhuula ngolwa njia khukhola abasuku asi wamakulu kao.
\p
\v 44 Khulwako Daudi amulaanga mbwe Omwami, bulano yakhaba arie omwana waye?"
\p
\v 45 Yaboolera abeeka baye imberi wabaandu boosi abali nibamubuliraanga ari,
\v 46 mwelinde khulondana nende abaandiki, abakheera khukeenda nibefwalire chingubo chindaambi, nende khukheera khukhesibwa mubiiro, nende khwikhala imberi muchisinagogi, nende bisaala bikhoongo mubukeni.
\v 47 Bengiriraanga chinyuumba chia bakhasi bafwire, khandi balamaanga malamo maraambi mubwekaadi. Abene abo bachia khunyoola obukhalaki bukhoongo."
\c 21
\cl Omuliango 21
\p
\v 1 Yeso yamala nakiingula chimoni chiaye akulu, nalola abaandu bayiinda nibageenga ebianwa biabwe musakaapo sie imbikhiro.
\v 2 Namala lola omukhasi uundi mufwire mumanani naraamo bukhela bubiri.
\v 3 Yeso nababoolera ari,"omukhasi mufwire uno areremo chinyingi khukhira baandu boosi,
\v 4 khulwo khuba abaandu boosi barusisiengi ebianwa khurula khumiandu kiabwe miingi, arali uno naye areremo bioosi ebiali nabio khurula mubumanani bwaye."
\p
\v 5 Ne ngolwa baandu bakabukhana bali nibalomalomaanga khuloondana nende ikhekalu, kori ngolwa yaronwa nende makina malayi nende ebianwa bia baandu, Yeso naye yaboola ari,
\v 6 "chinyaanga chichia khwicha echia makina kamubona kano, liakhabuleo elichia khudoonga khuliindi elirakhalikulwe."
\p
\v 7 Nabo bamureeba nibaboola bari, "Mwekesia, makhuwa ako kachia khwekholekhana liina? Ni silolero sina esiakhabeo amakhuwa kano nikachia khwekhola?"
\p
\v 8 Naye yabakalusia nababoolera ari, mulingeere mureecha mwabachwa khaba, khulwo khuba abaandu bangi bachia khwicha muliira liange, nababoola bari, 'esie nisie Kirisito, khandi ebikha biolere, murabaloonda khaba.
\v 9 Muchia khubulira amakhuwa keliiyie alala nende obuyingani, muraba bari khaba, khulwo khubeera bili mbwe akene ako okhuula kekholekhane mberi, arali okhumalirikha khwene khasi khuchia khwicha lwangu."
\p
\v 10 Lunyuma lwa makhuwa ako yababoolera ari, esialo sichia khurula khukhuyana nende esialo siindi, khandi oburuki buchia khukhuyana nende oburuki bundi.
\v 11 Khuchia khuba nende okhurengerekha khukhoongo okhwesialo nende injala mumbeka chikabukhane, nende amalwaye makhoongo, amakhuwa kokhurisia kachia khubao alala nende ebilolero nende ebimanyisio khurula mwikulu.
\v 12 Arali keno ako koosi nikasiri khwekholekhana, bachia khubadiira nende khubasandia, bachia khubayira imberi wechisinagogi, nende muchimboyero, nibabayira imberi wabaruki nende bemirisi khulwo khubeera eliira liange.
\v 13 Ne kene kano kachia khuba obuloli khwengwe.
\v 14 Bulano mube nende elichoomo mumioyo kieng'we, muraparirisia kori ngolwa munachia khukalusia,
\v 15 khulwo khuba esie njia khubaberesia obumanyirisi muminwa kieng'we, ne bala ababasitaaka khasi bachia khunyalirwa khuyingana ninangwe kose khubakhira.
\v 16 Khandi bachia khubakhoba alala nende abebusi beng'we, nende abaana beng'we, nende abekho beng'we, nende abeecha beng'we, ne bachia okhwira abandi khweng'we.
\v 17 Abaandu boosi bachia khubasuila khubeera eliira liange.
\v 18 Arali libulao kata sa lusuiri luomrwe kwao oluchia khukora.
\v 19 Ne muliinde emioyo kieng'we mubwesimirisi.
\p
\v 20 Nimuchia khubona Yerusalemu niyibodokhanwe nende abaandu beliiyie, abwene ao mumanyirisie mbwe obusasikhi busudire ambi.
\v 21 ne bala abali mubuyaudi berukhire muchingulu, nbo abala abali mukari mwelidokho barule rwanyi, abali mubialo bierwanyi, barengira mulidokho khaba.
\v 22 Khulwo khuba echio nichio echinyaanga chioburima, ne kala koosi akaandikwa kachia khulirira.
\v 23 Uuwi khu bala abali asiro nende abanunia muchinyaanga echio! kuhlwo khuba khuchia khuba nende okhunyakhana khungi musialo, alala nende burima akulu wabaandu bano.
\v 24 Bachia khukwisibwa khuloondana nende obwoki bwo lugaanga, khandi bachia khubadiira nibabayira mubialo bioosi, ne banasialo bachia khusenakira Yerusalemu okhuula ngolwa chinyaanga chiabwe chichia okhulirira.
\p
\v 25 Khandi ebilolero bichia khubao muluiba nende mumwosi, nende muching'ining'ini; nende musialo. Amanyakhano kachia khuba musialo alala nende khubeyabeya khwomunyaanja nende mafinda.
\v 26 Ne emioyo kiabaandu kichia khujoonga khulwo buri, nibalingeera amakhuwa kachia khwicha musialo, khulwo khuba amaani komwikulu kachia khudengeyisibwa.
\v 27 Abwene ao niwo owabachia khubona Omwana Womuundu niyeecha mulilesi alala nende amaani koluyaali lukhoongo.
\v 28 Bulano amakhuwa ako nikachaaka khwekholekhana, mube meeso mani mukingule akulu mirwe kieng'we, khulwo khuba obununuli bweng'we busudire ambi.
\p
\v 29 Yababoolera olukaado ari; mulingeere omusaala mukhuyu; nende emisaala koosi,
\v 30 nikisebukha munalola nimumanyirisia abene mbwe esiminyu sili ambi.
\v 31 Khukario mwesi numuboona kano nikolerera nimumanya mbwe obwami bwa Nasaye busudire ambi.
\v 32 Baboolera obwadieri mbwe, olwibulo luno khasi luchia khubira amakhuwa kano koosi nikasiri khulirira.
\v 33 Elikulu nende sialo bichia khubira, arali amakhuwa kenge nako khasi kachia khubira khaba.
\p
\v 34 Bulano mwekenderesie abene mbwe emioyo kieng'we kireecha kiakhirwa nende obungwi bubiririre nende obumesi, nende okhwelalikhira khwobulamu; mani inyaanga yila yabanyoola nimuramanyirisie.
\v 35 kori ngomureko, nilwo olwabichia okhuba khubaandu boosi abamenyanga musialo siosi.
\v 36 Arali mube meeso mubikha bioosi, nimulaama mbwe munyoole okhuba nende amaani kokhuona mumakhuwa kano koosi akachia khwekholekhana, mani munyoole okhwema imberi Womwana Womuundu.
\p
\v 37 Bulano yekesiaanga mukhekalu esideere, ne musiro namwo achia khweyalisia mulugulu lulangwa mbwe Miseyituni.
\v 38 Ne abaandu boosi bamwichiraanga ichuli mukhekalu okhumubulira.
\c 22
\cl Omuliango 22
\p
\v 1 Ne ngolwa inyaanga ye migaati kibulamo limera eyilangwa mbwe Pasika yali ambi okhuula,
\v 2 abakhoongo ba bakukhani alala nende abaandiki bali bakoonyanga ingira yokhumwira; khulwo khuba bali baria abaandu.
\p
\v 3 Sietani yamala niyengira mumwoyo kwa Yuda, olangwa mbwe Isikarioti, owali mulala khu ekhumi nende babiri bala.
\v 4 Namala narula nachia nalomaloma nende abakhoongo babasikari kori ngolwa anyala okhura Yeso mumakhono kabwe.
\v 5 Nabo basangaala lukali, nibafukirisania okhumuberesia amapesa.
\v 6 Naye yafukirira namala nakoonya obweyaango bwo khumukhoba khunibo abuundu womukaand kubulao.
\p
\v 7 Ne ngolwa inyaanga ye migaati kibulamo limera yola, eye likoondi lia Pasika liakhoyerwa khusinjwa.
\v 8 Yaruma Petero nende Yokhana, naboola ari muchie mureresie ebiakhulia bia Pasika khunyoole okhulia.
\p
\v 9 Nabo nibamureeba bari, odakha khuchie khureresie ena?
\p
\v 10 Naye yabakalusia ari, lingeera nimunaba nimwingira mudokho, munabukanana nende omusaacha nakingire isiongo ya maachi; mumuloonde mani mwingire munyuumba eyanengiramo.
\v 11 Ne muchia khuboolera omwene inyuumba muri, Omwekesia areebanga mbwe inyuumba ya bakeni yili ena, eya ndaliramo Pasika alala nende abeeka bange?
\v 12 Naye achia okhubekesia inyuumba ikhoongo khu gorofa, niyimalirwe khureresibwa; mani mureresirie mukari omwo ebikhulia bia Pasika.
\v 13 Bamala nibachia, nibanyola kori ngolwa yababolera, ne nibamala nibareresia ebiakhulia bia Pasika.
\p
\v 14 Ne ngolwa ebikha biola, yekhala okhulia ebiakhulia alala nende abarume.
\v 15 Namala nababoolera ari, ndekombaanga okhulia Pasika yino alala ninang'we okhusandisibwa khwange nikhusiri okhuula:
\v 16 khulwo khuba baboolera mbwe esie khasi njia khulia khandi okhuula ngolwa obwami bwa Nasaye buchia khulirira.
\v 17 Namala nabukula esikoombe, niyebasia naboola ari, musibukule mani mukabanemo;
\v 18 khulwo khubeera esie baboolera mbwe khasi njia okhung'wa ebiamo bio musabibu okhuula ngolwobwami bwa Nasaye buchia okhwicha.
\v 19 Khandi yamala nabukula omugaati, niyebasia, namala nakufunaka nende khubaberesia, naboola ari, kuno nikwo omubiri kwange okurusibwa khulwo khubeera eng'we; mukholenge murio khulwo khunjichulisi.
\v 20 Khandi kario yabukula esikoombe siosi lunyuma lwo khulia, naboola ari, esikoombe sino nisio elilakaano liyaakha mumabaanga kange, akachia khwidikha khulwo khubeera eng'we.
\v 21 Arali mulingeere omukhono kwa ula ochia khukhoba kuli alala ninange khu meeesa,
\v 22 Nobwadieri Omwana Womuundu abwao kori bialakwa, arali ni uuwi khu ula omuundu omukhoba.
\p
\v 23 Bamala nibachaaka khurebena abene khu bene bari ni wina akari webwe ochia khukhola likhuwa elio.
\p
\v 24 Okhuyingana khwarulirao akari wabwe, mbwe ni wina abalirwa okhuba omukhoongo.
\p
\v 25 Naye yababolera ari, abaruki babanasialo bekesianga obukhoongo khu baandu, khandi bali nende obunyala akulu wabwe, ne balangwanga mbwe abaandu bakholaanga malayi.
\v 26 Arali khasi bili birio khweng'we, ne ula oli mukhoongo akari weng'we, abe kori omwana; khandi owimirira abe kori omukholi.
\v 27 Khulwo khuba omukhoongo ni wina? Ni ula owikhalaanga khu meesa okhulia ebikhulia kose omukhalabani? khasi ni ula owikhalaanga khulia ebiakhulia? Arali esie nange ndi kori omukholi akari weng'we.
\p
\v 28 Eng'we ning'we abakhachiririra okhuba alala nange mumateemo kange.
\v 29 Esie nange boloboleera obwami, kori sa ngolwa Baba yandobolera obwami:
\v 30 mbwe munyoole okhulia nende okhung'wa khumeesa yange mubwami bwange; nimwikhale khubisaala bioluyaali, nimukhalakira echinjibulo ekhumi nende chibiri echia Isiraili.
\p
\v 31 Omwami naboola ari Simoni, Simoni, lingeera Sietani adakhire okhubasia kori nga ingano;
\v 32 arali esie khulaamire mbwe obusuubiri bwao buradengeyisibwa khaba, nawe nomala okhuwona, onyoole okhudinyisia abasio boosi.
\p
\v 33 Naye yamubolera ari Omwami, esie nindi alala ninanwe, ndi mwerekekhe okhuchia mumboyero kose kata muliifwa.
\p
\v 34 Khandi naboola ari, Petero khubolera mbwe idaaywa khasi yinakholiokha inyaanga yino, ewe nosiasiri okhundekana makhabi kadaru noboola ori khasi umanyire khaba.
\p
\v 35 Khandi yabareeba ari, ebikha bia ndabaruma nimubula mufuko, koes esibeti, kose ebilaro, mwalemerwakho esiindu siosi siosi? Nabo bakalusia bari khaba.
\p
\v 36 Namala nababoolera ari, bulano ula oli nende omufuko akubukule, nende esibeti siosi, naye ula obula olugaanga, akusie ingubo yaye mani alukule.
\v 37 Khulwo khuba baboolera mbwe, kala akaandikwa khulondana nange mbwe; yabalirwa alala nende abakholi bamabi okhuula kolerere mwesie. Khulwa khuba kala akaloondana nange kali nende siakamo.
\p
\v 38 Nabo baboola bari, Omwami, lingeera khuli nende echingaanga chibiri. Naye nababolera ari chiyera.
\p
\v 39 Namala narula nachia mulugulu lwa Miseyituni kori ngolwa yakholaanga buli lwoosi, ne abeeka baye bosi bamuloonda.
\v 40 Ne ngolwa yola, yababoolera ari, mulaame mbwe mureecha mwengira mumateemo.
\v 41 Naye omwene yekabula ninabo muburambi kori obwo khusukuna likina, namala nasigama asi nalaama,
\v 42 nabola ari, Ewe Sefwe, nibili mbwe ofukirira, khusaba mbwe umalireo esikoombe sino, ne biraba khulwe lienya liange, arali elienya liao liekholekhane.
\v 43 Malayika bamwichira khurula mwikulu nibamuramo amaani.
\v 44 Ne ngolwa yali mumanyakhano, yadinya lukali okhulaama, ne oluuya lwaye lwali lungi kori amabale kamabaanga nikakwa khuloba.
\v 45 Ne ngolwa yarula mukhulaama, yeecha abuundu wa beeka baye bali, nabanyoola nibakona chindoolo musibeera.
\v 46 Yabareba ari, khulwa sina mukona chindoolo? Musingire, mulaame mbwe mureecha mwengira mumateemo.
\p
\v 47 Ne ngolwa yali nalomalomanga, omukaanda alala nende ula owalangwa Yuda, owali mulala khu ekhumi nende babiri bala, nabemirira bamwichira, namala namusudakho nadakha okhumuchunjuuna.
\v 48 Yeso naye yamureeba ari, Yuda, okhoba Omwana womundu khukhumuchunjuuna?
\p
\v 49 Ne bala abali ambi ninanye kori ngolwa babona kala akali kachia khwekholekhana, bamureeba bari, khubareme nende lugaanga?
\v 50 Ne mulala khunibo yamala nakhuya omukholi womukukhani, namukhalaka okhurwi khwaye okhwo mukhono muluungi.
\p
\v 51 Yeso yakalusia naboola ari, murakhola murio khaba. Namala nadiira okhurwi khwaye namuonia.
\v 52 Yeso yamala nareeba omukhongo wabakukhani alala nende abemirisi beikhekalu nende abakofu abamwichira ari, mwichire nende chingaanga nende ebikhokh kori abechera omwibi?
\v 53 Bulinyaanga ngolwa ndabechaanga mukhekalu ninang'we, khasi mwakingulangakho makhono keng'we akulu wange khaba, arali bino nibio ebikha bieng'we nende ebio bunyala bwa siirima.
\p
\v 54 Nibamala nibamudiira, nibachia ninaye munyuumba mwo mukukhani mukhoongo. Arali Petero naye yamuloonda inyuma.
\v 55 Ne ngolwa bamala okhurubula muliro akari wolubiri bekhaala alala boosi, naye Petero yeesi yekhaala akari wabwe
\v 56 Abwene ao, omukhana mukholi mulala yamubona niyekhaale ambi nende muliro, namala namulingeera makhangasia mumoni, naboola ari uno yeesi yali alala ninaye.
\p
\v 57 Arali Petero naye yamwekana, nabola ari, omukhasi ewe, esie mukorerwe.
\p
\v 58 Lunyuma lwe bikha bidiidi omuundu undi yamubona ne naboola ari, ewe wesi oli mulala khunibo. Petro yakalusia naboola ari, musaacha ewe, khasi nesie khaba.
\p
\v 59 Ambi wobweyaango bwa elisaa elala, omuundu undi yema nadinyirisia naboola ari, nibwadieri uno yeesi yali alala ninaye, khulwo khuba Nimugalilaya niye.
\p
\v 60 Petero naye yaboola ari, musaacha ewe, esie ngorerwe akobolaanga ako. Mubwangu bikha ebio ngolwa yali nalomalomaanga, idaaywa yakholiokha.
\p
\v 61 Omwami yamala nakalukhana nalingeera Petero, naye Petero yamala niyechulisia elikhuwa lio Mwami yamubolera ari, inyaanga yino onandekana makhabi kadaru idaaywa niyisiri khukholiokha.
\v 62 Petero namala narula erwanyi nalira mubuchuni.
\p
\v 63 Ne abaandu bali badirire Yeso bamubayirakho nende khumukhuya.
\v 64 Bamufunikha chimoni, nibamala nibachaaka okhumupama- pama mubweni, nibamuboolera bari, rusiakho obunabii mbwe niwina owakhupaama?
\v 65 Khandi bamuboolera amakhuwa kandi akabisinyisio.
\p
\v 66 Ne ngolwa esialo bwakhia, abakhuluundu babaandu bebusia alala nende abakhoongo babakukhani nende abaandiki, nibamala nibamuyira mulukhikho lwabwe, nibaboola bari,
\v 67 oli kirisito? rubolere. Naye yababolera ari, kata nibabolera khasi munasubira khaba,
\v 68 khandi esie siesi nibareba khasi munangalusia khaba, kose khundekhula mbwe mbweo.
\v 69 Arali khuchaaka bulano Omwana womuundu achia khwikhala mukhono muluungi okwa maani ka Nasaye.
\p
\v 70 Nabo bamala nibamureeba bari, bulano ewe niwe omwana wa Nasaye? naye yababolera ari, muboola mbwe ndi.
\v 71 Nibamala nibaboola bari, khandi khusiri khudakha obuloli obulien? Khulwo khuba efwe bene khwakhabulira khurula mumunwa kwaye mwene.
\c 23
\cl Omuliango 23
\p
\v 1 Omukaanda kwabwe kwoosi kwamala nikwema, nikumuyira khu Pilato.
\v 2 Nibachaaka khumusitaaka nibaboola bari, khunyolere muundu uno nakosia esialo siefwe, nakanianga mbwe baraberesia Kayisari omusolo, khandi naboola mbwe ye mwene niye Kirisito, Omwami.
\p
\v 3 Pilato yamureeba ari, ewe niwe omuruki wa Bayaudi? Yeso naye yamukalusia namubolera ari, ewe wakhaboola orio.
\p
\v 4 Lunyuma Pilato yamala naboolera abakhongo babakukhani nende abaandu ari esie khasi mbonakho elikhuwa lio limaanu mumundu uno khaba.
\p
\v 5 Arali nabo bali balulu lukali, nibaboola bari, achubianga baandu, niyekesia mubuyaudi yoosi, khuchaakira Galilaya okhuula eno.
\p
\v 6 Ne ngolwa Pilato yabulira ario, yareeba nibili mbwe Yeso yali Omugalilaya.
\v 7 Ne ngolwa yamanyirisia mbwe yali asi woburuki bwa Herodi, yamala namuyira khu Herodi khulwo khuba yeesi yali Yerusalemu chinyaanga echio.
\v 8 Ne ngolwa Herodi yabona Yeso, yasangaala lukali, khulwo khuba yekoombaanga okhumubona khulwe chinyaanga chinyiingi, khubeera yali nabulire amakhuwa mangi khuniyeye, ne yekoombanga okhubona esia mangalimwa siakholwa naye.
\v 9 Yamala namureeba mumakhuwa mangi, arali Yeso naye khasi yamukalusia likhuwa liosi liosi.
\v 10 Abakhongo ba Bakukhani alala nende abaandiki bema nibamusitaaka mubudinyirifu.
\v 11 Naye Herodi alala nende abasikari baye bamulekeresia nibamujaara, nende okhumufwala echingubo chio luyaali; ne olunyuma yamukalusia khu Pilato.
\v 12 Ne inyanga yene eyo, Herodi nende Pilato bambaana mubwicha, khulwo khuba babechanga nende obusuku abene khu bene.
\p
\v 13 Pilato yabusia alala abakhongo babakukhani, nende abemirisi, nende abaandu,
\v 14 nababoolera ari, mundeerere omuundu kori nga ula okosianga abaandu; arali esie nange ndakhamunoneresia imberi weng'we, ne khasi mubwenekhomo elikhuwa libi liosi liosi khulondana nende amukhuwa kala akamumustakiire,
\v 15 kose kata Herodi yeesi, khulwo khuba amukalusie khwefwe. Bulano, libulao likhuwa liosi liosi eliayakhola elikhoyera okhufwa.
\v 16 Khulwako, esie njia khumuberesia sinyasio, nimala mulekhula.
\v 17 (Khulwo khuba biali mbwe okhuula Pilato abalekhulire omuboye mulala inyanga yesiserero).
\p
\v 18 Arali abaandu nabo bakhubira alala sioka nibaboola bari, malao omuundu uno, mani orulekhulire Baraba.
\v 19 Baraba yali yasukunwa muboyere khulwo bukhubakhubania obwarulirao mulidokho alala nende obwiri.
\v 20 Khandi Pilato yamala nalomaloma ninabo elikhabi lia khabiri, khulwo khubeera yadakha okhulekhula Yeso.
\p
\v 21 Arali abaandu bakhuba sioka nibaboola bari, mubambe, mubambe. Khandi nababoolera elikhabi lia
\v 22 khadaru nabareeba ari, khulwesifune sina? Ni sina sibi esiomuundu uno yakhola? Esie khasi muwenemo elikhuwa liosi liosi ilikhoyera afwe. Bulano nimala okhumuberesia sinyasio, njia khumulekhula.
\v 23 Arali abaandu bachiririra okhuba sioka lukali mudoboosi chikhoongo, nibadakha mbwe abambwe; ne chidoboosi chiabaandu alala nende abakhoongo babakukhuni chiakhira Pilato.
\v 24 Namala nakhalaka nabakholera ngolwa badakha.
\v 25 Namala nalekhula ula owa badakha, owali yasukunwa muboyero khulwo khubeera obukhubakhubania nende obwiri, ne namala nababeresia yeso kori olwabadakha.
\p
\v 26 Ne ngolwa bali nibamurusia erwanyi, badiira omuundu undi, owalangwa mbwe Simoni Mukireni, narula musialo, ne bamurakho omusalaba mbwe amukhoonye khukinga.
\v 27 Ne omukaanda kwa baandu bangi kwamuloonda, alala nende abakhasi abakhuba chimbuungu nibalira khulwo khubeera Yeso.
\v 28 Arali naye yabakalukhanira, nababoolera ari, eng'we abakhana ba Yerusalemu, murandiriri khaba, arali mwelirire eng'we bene, nende abaana beng'we.
\v 29 Khulwo khuba echinyaanga chichia khwicha echia bachia khuboola bari, bali nende chikhabi bala abali abakuumba nende chinda echirakingakho abaaana, nende echimbeere chiranuniakho.
\v 30 Ne bachia khuboolera chingulu bari rukwekho, ne bigulu nabio, bari rufunikhe.
\v 31 Khulwo khuba nibili mbwe bakholeera kene kano omusaala mubisi, ne bulano omusaala mwomu nakwo bachia khukukholera barie?
\p
\v 32 Ne baliwo abebi babiri abayirwa alala ninaye khuchia okhwirwa.
\v 33 Ne ngolwa boola abuundu wabalaanga mbwe Kalibari, bamubamba khu musalaba alala nende abebi abo, mulala khumukhono mulungi ne oundi khumukhon mukaada.
\v 34 Yeso yamala naboola ari, Baba balekhere, khulwo khuba bakorerwe esiabakhola. Bamala nibabukula echingubo chiaye nibakhuba ikura yokhuchikabana
\v 35 Abaandu beema nibalingeera, ne abaruki boosi alala nende abaandu bandi bamujaara nibaboola bari, yaonianga abaandu; bulano yeoniekho omwene nibili mbwe niye kirisito omulobole wa Nasaye.
\p
\v 36 Abasikari bosi bamujaara nende khumuteema nibamaurerera amalwa malulu,
\v 37 nibamuboolera bari, nibili mbwe oli Omwami wa Bayaudi, bulano weoniekho mwene.
\v 38 Baandika akulu waye esimanyiro siboola mbwe; UNO NIYE OMURUKI WABAYAUDI.
\p
\v 39 Naye mulala khu bebi bala ababambwa alala ninaye yamunyeka naboola ari, ewe sinewe Kirisito? Bulano weoniekho mwene mani khandi oruonie fwesi.
\p
\v 40 Arali owasie naye yamwalabira namubolera ari, ewe khasi oriakho Nasaye khaba, ne oli mubukhalaki obwo?
\v 41 Obukhalaki buno burukhoyera efwe; khulwo khuba khuli khunyoola omuruungo kuyerana nende ebikhole biefwe: arali omuundu uno khasi yakholakho elikhuwa libi liosi liosi.
\v 42 Namala naboolera Yeso ari, unjichulisie niwingira mubwami bwao.
\p
\v 43 Naye yamukalusia naboola ari, khuboolera obwadieri mbwe, inyaanga yino ochia khuba alala ninange muparadiso.
\p
\v 44 Nengolwa chiola esa chisasaba, esirima siafunikha esialo siosi okhuula esa tisa,
\v 45 eliuba liosi liafunikhwa nende esirima, ne ipasia yomukhekalu yarandukha akari.
\v 46 Naye Yeso yalira mudoboosi ikhongo naboola ari, Baba Esie ngeenga omwoyo kwange mumakhono kao: ne ngolwa yamala okhuboola amakhuwa ako, yakhalaka omwoyo.
\p
\v 47 Naye omusikari ngolwa yabona kala akekholekhana, yafumia Nasaye naboola ari, nibwadieri omuundu uno yabere omulungifu.
\v 48 Ne abaandu boosi abali nibebusirie okhulola amakhuwa kali nikekholekhanaanga, ngolwa babona akekholekhana, babwao nibekuda ebirifu biabwe.
\v 49 Ne bala boosi abali bamumanya alala nende abakhasi bali bamulondere khurula Galilaya, bema ale nibalingeera amakhuwa ako.
\p
\v 50 Ne lola yaliwo omuundu undi owalangwa mbwe Yosefu mulala khu baandu bolukhikho, naye yali omuundu mulayi owobwadieri:
\v 51 (Omwene oyo khasi yafukirisania nende obukhalaki bwabwe,) ne yali omuundu wokhurula Arimadeya, elidokho lia Bayaudi: khandi yeesi omwene yalindiririranga obwami bwa Nasaye.
\v 52 Omuundu uno, yachia khu Pilato okhumusaba omubiri kwa Yeso.
\v 53 Ne yamala nakwakula, nakuboya muchingubo, namala nakusiikha mungani yali yabaachwa mulikina eyomuundu yeesi yali asiri khusikhwamo.
\v 54 Ne inyaanga eyo yali eyo khwerekekhera khulwao khubeera isabaato yali isida ambi.
\v 55 Ne abakhasi bala abeecha ninaye khurula Galilaya, baloondakho mani nibalola kori omubiri kwaye kwalisibwamo.
\v 56 Ne bamala nibakalukhayo, nibachia okhureresia ebiindu biesingaari nende amafura; nibabuluukha inyaanga yeisabaato khulondana nende amalako.
\c 24
\cl Omuliango 24
\p
\v 1 Bulano khunyaanga ya amberi eyeijuma yola, beecha khusirindwa ichuli lukali nibarera ebiindu biesingaari ebia bali bareresie okhubakha omubiri kwaye, alala nende abaandu bandi.
\v 2 Ne banyoola elikina nilirusibwe khusirindwa,
\v 3 ne ngolwa bengira mukari, khasi banyolamo omubiri Kwomwami Yeso.
\v 4 Ne ngolwa bali nibakankanaanga khuloondana nende elikhuwa elio, babona abaandu babiri nibefwalire chingubo ching'enang'ena nibemere indulo ambi ninabo;
\v 5 ne ngolwa badiirwa nende buri, nibenamia obweni bwabwe, babareeba bari, khulwa sina mukonyaanga omuundu mulamu mubafu?
\v 6 Khasi ali ano khaba, arali alamukhe: mwichulisie kori ngolwa yababolera nali Galilaya,
\v 7 naboola ari, bili mbwe okhuula Omwana womuundu arebwe mumakhono kabakholi bechimbi, mani abambwe, ne inyaanga yakhadaru achia okhulamukha khandi.
\v 8 Abakhasi abo bechulisia amakhuwa kaye,
\v 9 ne bamala nibabwao okhurula khusirindwa, nibachia okhwekesia ekhumi nende mulala bala amakhuwa ako, alala nende abaandu bandi boosi.
\v 10 Ne abene abo bali Maria Magadalena nende Yoana, nende Maria ngina Yakobo, alala nende abakhasi bandi abali ninabo, nibo abekesia abarume makhuwa ako.
\v 11 Ne amakhuwa kabwe kababonekhera kori nga echingacho, ne khasi basuubira akababolerwa.
\v 12 Petero naye yamala nasingira, niyerukha echimbiro okhuchia khu sirindwa; ne ngolwa yalingeera mukari yabona chingubo chiong'ene, namala nabwao nakanakana mumwoyo kwaye khulondana nende akekholekhana.
\p
\v 13 Ne inyaanga eyo, babiri khunibo bachia mulukoongo lulangwa mbwe Emausi, abuundu wokhukeenda amasaa kabiri khurula Yerusalemu.
\v 14 Ne balomaloma amakhuwa kali nikekholekhane koosi.
\v 15 Ne ngolwa bali nibakeenda nibalomalomaanga, Yeso mwene yaruliro nachaaka khuchiana ninabo.
\v 16 Arali chimoni chiabwe chiafunikhwa mbwe baranyoola okhumumanyirisia khaba.
\v 17 Namala nabareeba ari, makhuwa sina kano akamulomalomaanga bene khu bene nimukeenda, ne khandi musinyikhe?
\p
\v 18 Ne mulala khunibo owalangwa mbwe Kiliopa, yamukalusia ari, ewe weng'ene niwe mukeni muyerusalemu okorerwe amakhuwa kekholekhane muchinyaanga chino?
\p
\v 19 Naye yabareeba ari, ni makhuwa sina ako? Nabo bamukalusia bari, khulondana nende Yeso wa Nasareti, owali omunabii wamaani mubikhole nende mulikhuwa imberi wa Nasaye nende abaandu:
\v 20 nende kori ngolwa abakhoongo babakukhani alala nende abaruki befwe bamurusia mbwe bamukhalakire khufwa nende khumubamba.
\v 21 Arali efwe khwali nende obusubiri mbwe niye yakhanunule Isiraili: ne khandi okhirakho koosi inyaanga yino niyakhadaru khurula amakhuwa ako nikekholekhana.
\v 22 Ne baliwo abakhasi abo mukaanda kwefwe, abaunire ichuli okhuchia khusirindwa baruukisie,
\v 23 ngolwa banyolere omubiri kwaye nikubulao, bechere nibaboola bari, babwene amalolo kamalayika obababolere mbwe nomulamu.
\v 24 Ne mulala khunibo owali alala ninafwe yeesi achire khu sirindwa, nanyoola sa kori abakhasi bala bebere baboolere: arali omwene naye khasi bamubwene.
\p
\v 25 Namala nababoolera ari, abasiru eng'we, khandi abasiro bokhusubira kala koosi aka banabii baboola:
\v 26 khasi biakhoyera Kirisito okhusaanda mumakhuwa kano koosi, mani yengire muluyaali lwaye?
\v 27 Namala nachaaka okhubabolera amakhuwa koosi kori ngolwa kaandikwa khuchaakira khu Musa alala nende banabii boosi khulondana ninaye.
\p
\v 28 Ne bamala nibasuda ambi nende olukoongo lwa bali bachiamo, nibakabukha okhwingira, naye niyekhola kori ngomuundu owakhachire imberi,
\v 29 arali nabo bamusaba nibamuboolera bari, doonga ninafwe khulwo khuba esialo bwakhera, ne inyaanga yakhamala khubwa. Namala nachia okhuba ninabo.
\v 30 Ne ngolwa bali nibekhale khulia ebiakhulia, yabukula omugaati nakwanira chikhabi, nende khukufunaka, nababeresia,
\v 31 ne echimoni chiabwe chiamala nichifunulwa, nibanyoola okhumumanyirisia; naye yarulao nabwao nabalekha.
\v 32 Bamala nibarebana abene khu bene bari, emioyo kiefwe sikebere nikurussaamba mukari mwefwe kori ngolwa abere nalomalomaanga ninafwe khungira, khandi kori ngolwa bunule amaandiko?
\v 33 Mani nibabuukha ebikha ebio nibakalukha Yerusalemu nibanyoola ekhumi nende mulala nibebusisie alala, nende abo abali ninabo,
\p
\v 34 nibaboola barii, nobwadieri Omwami abuukhire ne yakhabonekhera Simon.
\v 35 Nibakana amakhuwa kali kekholekhe khungira, nende kori yola okhumanyikhana khunibo ngolwafunaka omugaati.
\p
\v 36 Ne ngolwa bali nibalomalomanga, Yeso mwene yema akari wabwe, nababoolera ari, muleembe kube ninang'we.
\v 37 Arali nabo bali nende oburi alala nende obukanakani, nibapaara mbwe babwene esikhieno.
\v 38 Ne yababoolere ari, khulwa sina muli nende obukanakani? Khandi khulwa sina muli nende amapaaro mumioyo kieng'we?
\v 39 Mulingeere amakhono kange nende amakulu kange mbwe nesie: mundirekho mani mubone mbwe nesie omwene; esikhieno sibula chinyama nende ebikuumba kori ngolwa mumbona.
\v 40 Ne ngolwa yamala okhulomaloma amakhuwa ako yabekesia amakhono kaye nende makulu kaye.
\v 41 Ne khandi ngolwa bali nibasiri khusuubira khulwo khubeera obusangaafu, nende khukanakana, yabareeba ari, mulikho nende inyama yosi yosi ano?
\v 42 Bamuberesia ing'eni isike,
\v 43 ne yabukula nayilia imberi wabwe nibabona.
\p
\v 44 Namala nababoolera ari, kano niko amakhuwa kandababoolera kori ngolwa ndali nisiri ninang'we mbwe, amakhuwa kala koosi akaandikibwa khuloondana ninange aka Musa nende abanabii, nende chisaburi kachia khuliririra.
\v 45 Namala nayekula obumanyirisi bwabwe, mbwe banyoole okhumanyirisia amaandiko,
\v 46 khandi nababoolera ari, kaandikwa mbwe, Kirisito achia khusandisibwa, ne achia okhulamusibwa khurula mubafu inyaanga ya khadaru:
\v 47 khandi mbwe okhwekanira nende khulekherwa khwe chimbi muliira liaye khukhoyera okhuyalwa muliira liaye mubialo, khuchaakira Yerusalemu.
\v 48 Eng'we muli abaloli ba makhuwa kano.
\v 49 Ne lingeera barumira elakaano elia Baba akulu weng'we: arali mwikhale mudokho lia Yerusalemu, okhuula ngolwa muchia okhwichusibwa amaani khurula akulu.
\p
\v 50 Ne yabemirira okhuchia Betania, namala nakingula amakhono kaye akulu nabalaamira echikhabi.
\v 51 Ne ngolwa yali nabalamiraanga chikhabi, yabukulwa nabarulakho nakingulwa okhuchia mwikulu.
\v 52 Nabo bamwinamira, nibamala nibakalukha okhuchia Yerusalemu nibali nende obusangaafu bungi:
\v 53 Bamwinamira nibakalukh Yerusalemu nende isangaalo ikhoongo ne bachiririra okhuba mukhekalu, nibafumia nende khukingula Nasaye. Amina.