lko_reg/41-MAT.usfm

\id MAT
\ide UTF-8
\h Matayo
\toc1 Matayo
\toc2 Matayo
\toc3 mat
\mt Matayo
\c 1
\cl Omuliango  1
\p
\v 1 Esitabo esio lwibulo lwa Yeso Kirisito Omwana wa Daudi, omwana wa Ibraimu.
\v 2 Ibraimu yebula Isaaka; Isaaka yebula Yakobo; Yakobo yebula Yuda nende abaana babwe.
\v 3 Yuda niyebula Faresi nende Zera mu Tamari; Faresi niyebula Esiromi; Esiromi niyebula Aramu;
\v 4 Aramu niyebula Aminadabu; Aminadabu niyebula Nasoni; Nasoni niyebula Salumoni;
\v 5 Salumoni niyebula Boasi mu Rakhabu; Boasi niyebula Obedi mu Ruthi; Obedi niyebula Yese;    
\v 6 Yese niyebula Daudi omuruki; Daudi omuruki niyebula Solomoni mu ula owali omukhasi wa Uria;
\v 7 Solomoni niyebula Roboamu; Roboamu niyebula Abiya; Abiya niyebula Asa;
\v 8 Asa niyebula Yosafati; Yosafati niyebula Yoramu; Yoramu niyebula Osia;
\v 9 Osia niyebula Yotamu; Yotamu niyebula Akhasi; Akhasi niyebula Esekia;
\v 10 Esekia niyebula Manase; Manase niyebula Amoni; Amoni niyebula Yosia;
\v 11 Yosia niyebula Yekonia nende abaana babwe, muchinyaanga chiokhudiirwa okhuyirwa Babeli:
\p
\v 12 Ne olunyuma lwo khuyirwa Babeli, Yekonia yebula Salatieli; Salatieli niyebula Serubabeli;
\v 13 Serubabeli niyebula Abiudi; Abiudi niyebula Eliakimu; Eliakimu niyebula Asori;
\v 14 Asori niyebula Sadoku; Sadoku niyebula Akimu; Akimu niyebula Eliudi;
\v 15 Eliudi niyebula Eliasari; Eliaseri niyebula Matani; ne Matani niyebula Yakobo;
\v 16 Yakobo niyebula Yosefu omusaacha wa Maria, owebula Yeso, olangwa mbwe Kirisito.
\p
\v 17 Kario echinjibulo chioosi khurula khu Ibraimu okhuula khu Daudi ni ekhumi nende chine; khandi okhurula khu Daudi okhuula nibairwa Babeli nichinjibulo ekhumi nende chine; khandi okhurula nibayirwa Babeli okhuula khu Kirisito nichinjibulo ekhumi nende chine.
\p
\v 18 Bulano okhwibulwa khwa Yeso Kirisito khwali khuri: Maria ng'ina olwa yali nafukirire okhudekhisania nende Yosefu, nibasiamenya alala, yanyolekhana nali nende inda eya Rokho Mutakatifu.
\v 19 Ne Yosefu omusaacha waye, khulwo khuba yali omuundu mulungifu nareenya okhumwambia chisoni, yapaara khumwerusiakho mubwekisi.
\v 20 Arali nga olwa yali naparaanga amakhuwa kano, lola, malaika wo Mwami namulolekhera mumalooro, naboola ari, Yosefu, ewe omwana wa Daudi, oraria dawe khumubukula Maria omukhasi wao: okhuba sila esili muunda mwaye ni sia Rokho Mutakatifu.
\v 21 Ne achia okhwibula omwana omusiani, ne ochia okhumulaanga eliira mbwe Yeso: okhuba achia okhuwonia abaandu baye okhurula muchimbi chiabwe.
\v 22 Bulano kano koosi kekholekha, mbwe kolerere akomwami yalomaloma obirira khu munabii, naboola ari,
\v 23 Lingeera, omusisira achia oyera inda, niyebula omwana musiani, ne bachia omulaanga eliira mbwe Emmanueli, elikalulwa mbwe, Nasaye alala ninafwe.
\v 24 Ne Yosefu olwa yabuukha okhurula muchindoolo yakhola ngolwa malaika wo Mwami yali namubolere, nabukula omukhasi waye:
\v 25 Ne nareyalisia ninaye okhuula olwayebula omwana waye musiani wa mberi: ne namulaanga eliira mbwe YESO.
\c 2
\cl Omuliango 2
\p
\v 1 Bulano nga Yeso yebulwa Betelekhemu eya Buyaudi muchinyaanga chio muruki Herodi, lingeera, abakesi okhurula ebukwe beecha Yerusalemu,
\v 2 Nibaboola bari, "Aliena oyo owibuulwe, Omuruki wa Abayaudi? khulwo khuba khubwene ing'ining'ini yaye ebukwe, ne khwichire okhumwinamira."
\p
\v 3 Olwa omuruki Herodi yabulira amakhuwa kano, yabeyabeya, alala nende Yerusalemu yoosi.
\v 4 Ne olwa yali nakhung'anisie alala abakhongo ba bakukhani nende abaandiiki ba baandu, yabareeba ari, "Kirisito akhoyere okhwibulwa ena?".
\v 5 Ne nibamubolera bari, ni mu Betelekhemu ye Buyaudi: okhuba nilwo olwakaandiikwa nende omunabii mbwe,
\v 6 arali ewe, Betelehemu, musialo sia Yuda, khasi oli omudidi akari wa bemiresi ba Yuda: khulwo khuba omuruki achia khurula mwiwe, owakharuke abaandu bange ba Isiraili.
\p
\v 7 Ne Herodi, yalaanga abakesi abo mubwekisi, okhubabanoneresia mbwe ni bikha sina ebia ing'ining'ini yalolekhaniramo.
\v 8 Nabaruma Betelehemu, naboola ari, muchie mumukoonye ebilayi omwana mudoro; ne nimumunyoola munderere elikhuwa, mbwe nyale siesi okhuchia okhumwinamira.
\p
\v 9 Nibakhamala okhubulira ako muruki yababolera, babwao; ne lola ing'ining'ini, eyabalola ebukwe, niibemirira, okhuula nga olwayoola niyeema abuundu wo mwana mudoro yali.
\v 10 Olwabalola ing'ining'ini, basangaala nende obusangaafu bukhoongo.
\v 11 Ne olwa bengira munyuumba, balola omwana mudoro nende Maria ng'ina, bakwa asi, nibamwinamira: Babolola chimbikhiro chiabwe, nibamuberesia ebianwa; idakhabu, obubani, nende manemane.
\v 12 Ne olwabalabulwa nende Nasaye mumalooro, mbwe barakalukhira owa Herodi, bakalukha musialo siabwe obirira ingira yindi
\p
\v 13 Ne olwabali nibabwereo, lola, malaika wo Mwami nalolekhera Yosefu mumalooro, naboola ari, singira, obukule omwana nende ng'ina, mwirukhire Misiri, ne mumenyeyo okhuula olwandakhakhurerere elikhuwa: okhuba Herodi anakoonya omwana mudoro khumwira.
\v 14 Olwayabuukha, nabukula omwana nende ng'ina musiro, nibachia Misiri:
\v 15 Ne namenyayo okhuula okhufwa khwa Herodi: mbwe kolerere akaboolwa nende omwami khubirira khu munabii, naboola mbwe, "okhurula Misiri ndalaanga omwana wange."
\v 16 Ne Herodi, olwa yalola mbwe abachirwe nende abakesi, yadiirwa nende lirima likhoongo, naruma mbwe, beere abaana basiani boosi abali mu Betelekhemu, nende mumbeka chiayo, khuchakira emiaka kibiri okhwikha asi, olondana nende bikha ebia yali nanoneresie orula khu bakesi.
\v 17 Manu nikolerera kalia akaboolwa nende Yeremia omunabii, mbwe,
\q
\v 18 "Mu Rama yaliiyo idoboosi nibulirikha, niyekaniaya nende okhulira, nende chimbuungu chikhongo, Raeli nalirira abaana baye, oburanyala okhudemberesibwa, okhuba abaana baye baumao.
\p
\v 19 Ne olwa Herodi yali namalire okhufwa, lola malaika wo Mwami namulolekhera Yosefu mumalooro mu Misiri,
\v 20 " Naboola ari, buukha, obukule omwana mudoro nende ng'ina, ne muchie musialo sia Isiraili: okhuba abakonyanga okhumalao obulamu bwa omwana mudoro baafwa.
\v 21 Naye nabukha, nabukula omwana mudoro nende ng'ina, nibachia musialo sia Isiraili.
\p
\v 22 Arali olwa yabulira mbwe Arikelao yali aruka Ebuyaudi mubweyango bwa simwana Herodi, yali omuri okhuchiayo, ne oburalindirira, nga olwayali nalabulwe nende Nasaye mumalooro, yakodokha nachia mubidonye bia Galilaya:
\v 23 Manu niyeecha namenya mudokho lilangwa mbwe Nasareti, mbwe kolerere akabolwa nende abanabii, achia okhulangwa mbwe omunasarini.
\c 3
\cl Omuliango 3
\p
\v 1 Munyaanga echio yeecha Yokhana omubatisia, nayala musichiimi sie Buyaudi,
\v 2 " Naboolanga ari, mwekanire eng'we; okhuba obwami bwo mwikuli buli ambi.
\v 3 Okhuba uno niye owalomalomwakho nende omunabii Isaaya, naboola ari idoboosi ya oyo olangirisianga musichiimi, mureresie ingira yo Mwami, mukololosie chingira chiaye.
\p
\v 4 Ne Yokhana mwene oyo yali nende ingubo yo bwoya bwe Ingamia, nende olukhoba lwe isiinga musibuno siaye; ne ebiakhulia biaye biali chisike nende obuukhi bwo musichiimi.
\v 5 Lunyuma Yerusalemu, nende Buyaudi nende chimbeka chioosi echiabodokhana Yorodani nibarula.
\v 6 Nibabatisibwa ninaye muyorodani, nibekanira echimbi chiabwe.
\p
\v 7 Arali olwa yalola obuungi bwa Abafarisaayo nende Abasadukayo nibeecha mbwe ababatisie, yababoolera ari eng'we olwibulo lwe chinjukha, obalabuule okhwirukha lirima eliicha niwina?
\v 8 Bulano mwame ebiamo bilondana nende okwekanira.
\v 9 Ne murapaara nimwebolera mbwe, khuli nende Iburaimu sefwe; okhuba mbabolera mbwe Nasaye anyala okingula abaana ba Iburaimu okhurula mumakina kano.
\v 10 Ne bulano iyaywa irerwe khubisina bie misaala; khu kario buli musaala okuraama ebiamo bilayi kunaremwa ni kusukunwa mumuliro.
\p
\v 11 Obwadieri esie mbabatisia nende amaachi mbwe mwekalukhanie. Ne owiicha inyuma wange ni wamaani okhuukhira owandarakhakinga ebilaro biaye: achia okhubabatisia nende Rokho mutakatifu nende omuliro.
\v 12 Owo luderu lwaye luli mumukhono kwaye, ne achia okhulabia olwanyi lwaye, mani abusie ingaano yaye musiaki, ne achia osaamba omukhuchi nende muliro okurasimisibwa.
\p
\v 13 Yeso yamala niyeecha khurula Galilaya khu Yokhana mu Yorodani okhubatisibwa ninaye.
\v 14 Arali Yokhana namukania naboola ari, nisie okhoyera obatisibwa ninawe, khusiina ewe wiiche khwesie?
\v 15 Ne Yeso namukalusia namubolera ari, fukirira kabe kario bulano, khulwo khuba kekholekha okhusirisia akobukololofu koosi, naye namufukirira.
\p
\v 16 Naye Yeso olwayabatisibwa, nabuukha narula mumaachi: ne lola, elikulu nilimwikukhira naye nalola Rokho wa Nasaye niyeekha nga eliuusi, namwemakho:
\v 17 Ne idoboosi khurula mwikulu, niboola iri, uno niye Omwana wange, mukheerwa owa wasagasibwa ninaye.
\c 4
\cl Omuliango 4
\p
\v 1 Naye Yeso niyemirirwa nende Roho okhuchia musichiimi mbwe ateemwe nende sietani.
\v 2 Ne olwayali naongere nende okona injala chinyaanga nende ebiro makhumi kane yabulira injala.
\v 3 Ne omurekekhi namwichira namuboolera ari, nikaba mbwe oli Omwana wa Nasaye, lagira mbwe amakina kano kekalukhanie omugaati.
\v 4 Naye namukalusia naboola ari, kaandikwa mbwe, omuundu khasi achia khumenya khulwo mugaati kwong'ene, arali khulwa elikhuwa elirula mumunwa kwa Nasaye.
\v 5 Ne sietani nabukula namuyira akulu mulidokho litakatifu namura akulu khusisuli esie ikhekalu.
\v 6 Namala namuboolera ari, nikali mbwe oli omwana wa Nasaye, wesikune omwene asi: okhuba kaandikwa mbwe, anaruma abamalaika baye khwewe: ne mukhano kabwe banakhukinga akulu, kata mbwe ebikha bioosi okhukulu khwao khasi khunegumula khulikina.
\v 7 Yeso namuboolera ari, kaandikwa mbwe, ewe orateemanga Omwami Nasaye wao.
\p
\v 8 Khandi, sietani namuyira akulu wo lugulu luleyi, manu namwekesia oburuki bwoosi obwe sialo, nende oluyaali lwabwo;
\v 9 Namuboolera ari, ebiindu bino bioosi ndakhuba ewe, nikaba mbwe okwa asi manu onyinamire esie.
\v 10 Ne Yeso namuboolera, bwao, sietani: okhuba kaandikwa mbwe, ewe omwinamirenge omwami Nasaye wao, ye yeeng'ane omurumikhire.
\v 11 Manu sietani namulekha, ne, lola, abamalaika nibeecha nibamukhalabanira.
\p
\v 12 Bulano olwa Yeso yali nabulire mbwe Yokhana yasukunwa mumboyero, nachia mu Galilaya;
\v 13 Ne narula Nasareti, niyeecha namenya Kaperenaumu, eyiri khunyanja, khulwakho lwa Sabuloni nende Nafutalimu.
\v 14 Mbwe kolerere akaboolwa nende Isaya omunabii, nabola ari,
\q
\v 15 esialo sia Sabuloni, nende esialo sia Nafutalimu, mungira yokhunyanja, ingerekha wa Yorodani, Galilaya ya Banasialo;
\q
\v 16 Abaandu bekhala musiirima babwene obulafu bukhongo; nende khubalia abekhala mumbeka nende musiinikha sia elifwa obulafu bubafumbukhiire.
\p
\v 17 Okhurula ebikha ebio Yeso yachaka okhuyala, nende okhuboola ari, mwekanire: okhuba obwami bwo mwikulu buli aambi.
\p
\v 18 Ne Yeso, nakendanga khundulo khwe inyanja ya Galilaya, yaloola abasiani babiri abomunyumba ndala, Simoni olangwa Petero, nende Anderaya omusiani waabwe, nibareka chinjero munyanja: okhuba bali abanaabi.
\v 19 Naye nababoolera ari, munoonde ne ndabakhola mube abanaabi ba baandu.
\v 20 Ne abwene ao nibalekha echinjero chiabwe, nibamuloonda.
\p
\v 21 Ne olwa yali nasuda imberi, yaloola abasiani bandi babiri, Yakobo omwana wa Sebedayo, nende Yokhana omusiani wabwe, nibali muliaro nende Sebedayo saabwe nibakasianga echinjero chiabwe; namala nabalanga.
\v 22 Abwene ao nibalekha eliaro nende saabwe, manu nibamulonda.
\p
\v 23 Manu Yeso nachia buli abuundu mu Galilaya yoosi, niyekesia musinagogi chiabwe, nayala ifanjili yo bwami, nende okhuwonia obudekhere bwa buli ingeri nende amalwaye ka echimbia chioosi mubaandu.
\v 24 Ne ifuma yaye nichia buli abuundu mu Siiria yoosi: manu nibamurerera abaandu badekhere boosi abali nibaingirwe nende amalwaye kabuli ingeri nende amachuuni, nende balia abalimo ebikhieno, nende balia abali abalalu, nende abeindulume; ne nabaonia.
\v 25 Ne emikaanda mikhongo ekia baandu nikimuloonda okhurula Galilaya, nende okhurula Dekapolis, nende Yerusalemu, nende okhurula Ebuyaudi, nende okhurula ingerekha wa Yorodani.
\c 5
\cl Omuliango 5
\p
\v 1 Ne olwa yalola omukaanda, yanina akulu khulugulu: ne olwa yali niyekhaale, abeka baye nibamwichira:
\v 2 Naye niyekula omunwa kwaye, nabekesia, naboola ari,
\q
\v 3 Nibeikhabi abali abamanani mumwoyo: okhuba obwami bwomwikulu nibwabwe.
\q
\v 4 Nibeikhabi abo ababeerera: okhuba bachia olemisibwa emioyo.
\q
\v 5 Nibeikhabi abo abeduduyia: okhuba bachia khunyoola obulaame bwesialo.
\q
\v 6 Nibeikhabi abo abali nende injala nende obuluwo obwa obukololofu: okhuba bachia okhwichusibwa.
\q
\v 7 Nibeikhabi abo abesisa okhuba bakhanyoole esisa.
\q
\v 8 Nibeikhabi abo abemioyo milafu: okhuba balilola Nasaye.
\q
\v 9 Nibeikhabi abo abareresianga omuleembe: okhuba bakhalangwe abaana ba Nasaye.
\q
\v 10 Nibeikhabi abo abasandisibwa khulwa obulungikhi: okhuba obwami bwomwikulu nibwabwe.
\q
\v 11 Muli abeyikhabi eng'we, nga olwa abaandu babanyeka, nende obasaandia, nibaboola amabi koosi akabuli ingeri khweng'we mububacha, khulwange.
\v 12 Mwekhoye, nimuba abasangaafu lukali: okhuba esianwa sieng'we mwikulu nesikhoongo: okhuba babasaandia bario abanabii abaliwo okhubarangirira eng'we.
\p
\v 13 Eng'we muli omunyu okwe sialo: nikaba mbwe omunyu kukosisie ichamu, kunarebwamo kurie ichamu? khulwesio sikukhoyeera esilayi siosi, arali kusukunwa erwanyi, nikusenwakho nende amakulu kabaandu.
\v 14 Muli obulafu obwe sialo. Elidookho eliombakhwa khulugulu siliakhekisa
\v 15 Khandi abaandu sibakhambia itaara, nibaifunikha musimwero, arali baira khusituuti siayo; niibakhoseria boosi abali munyuumba.
\v 16 Lekha obulafu bweng'we bwaakhe imberi wa baandu, mbwe banyale okulola ebikhole bieng'we ebilayi, nibamuba oluyaali Seng'we oli mwikulu.
\p
\v 17 Murapara mbwe ndeecha okhurusiayo amalako, kose abanabii: sindeecha okhusasia, arali okhusirisia.
\v 18 Okhuba mbaboolera obwadiera, Okhuula likulu nende esialo olwa bichia okhubira, inyukuta ndala kata indonyero ndala khasi ichia okhurusibwa khu malako, okhuula kori koosi olwakakholerere.
\v 19 Oyo yeesi khulwesio ochia okhufunaka kata silala khu bidiidi bia malako kano, manu khandi yekesie abaandu ario, achia olangwa omudiidi mubwami bwo mwikulu; arali ulia ochia okhola manu akekesie oyo achia okhulangwa omukhongo mubwami bwomwikulu.
\v 20 Okhuba mbaboolera mbwe, obulungikhi bweng'we niburachia okhira obulungikhi bwa Bandiiki nende Abafarisayo simwakhengire mubwami bwomwikulu.
\p
\v 21 Mwabulira mbwe, kaboolwa nende abakhale, oreeranga dawe; ne oyo ochia okhwiira aliba mubudinyu obwa okhukhalakirwa:
\v 22 Arali mbaboolera, mbwe oyo yeesi owelirima khu musiani wabwe oburali nende esikera, achia okhuba mubudinyu bwo khukhalakirwa: ne oyo oboolera omusiani wabwe mbwe, oli musiru, achia okhuba mubudinyu obwe siina: arali oyo ochia oboola ari, omusiru ewe, achia okhuba mubudinyu obwo muliro okwemagoombe.
\v 23 Khu kario ewe norera esianwa siao khu bwaali, niwichulisia mbwe simubulirisania nende omusiani weng'we;
\v 24 lekha ao esianwa siao imberi wo bwaali, nobweo mberi; ochie obulirisanie nende omusiani weng'we, manu okalukhe orusie esianwa siao.
\v 25 Fukirisania nende omusuku wao lwangu, nimusiri khuungira ninaye; biroola ebikha omusuku yakhuyira khumukhalaki wesiina, naye omukhalaki yakhuberesania khu musikari, manu wasukunwa mumboyero.
\v 26 Mbaboolera obwadieri mbwe, sochia olekhuulwa, okhuula olwa wakharuunge isende ila yoosi eyokhoyera khuruunga.
\p
\v 27 Wabulira mbwe kaboolwa nende abakhale, orayirananga da:
\v 28 Arali mbaboolera, mbwe olingeera omukhasi namwekoomba amalire okhuyirana ninaye, mumwoyo kwaye.
\v 29 Ne imoni yao eyomukhono musaacha nikhwonoonia, irusiemo oyisukune ikhurulekho; okhuba nibieingaanga khwewe mbwe silala khubiomubiri kwao sisasikhe, okhira omubiri kwao kwoosi kusukunwe emagoombe.
\v 30 Ne omukhono kwao musaacha nikukhwononia, kukhalakeyo, manu okusukune kukhurulekho: okhuba nakeingaanga khwewe mbwe silala khubiomubiri kwao sisasikhe, okhira omubiri kwao kwoosi kusukunwe emagoombe
\p
\v 31 Kaboolwa mbwe, oyo owirukhania omukhasi waye, akhoyere amube obwandike bwokhulekhana:
\v 32 Arali mbaboolera, mbwe oyo owirukhania omukhasi waye, oburali khulwa obuyeyi, akera ye yairana: ne oyo odekhia omukhasi wirukhanisibwe akhola obuirani.
\p
\v 33 "Khandi, mwabulira mbwe kaboolwa nende abakhale mbwe orechubaanga ewe omwene, arali kholera Omwami ebiawasubisia:
\v 34 Arali mbaboolera, orechuba buli lwoosi; kata khulwelikulu; okhuba niwo owesisaala sioburuki esia Nasaye:
\p
\v 35 kata khulwesialo; okhuba niwo oweisimbi ya makulu kaye ili, kata khulwa Yerusalemu, okhuba nilio elidokho elia omuruki omukhongo.
\p
\v 36 Kata orechuba khulwomurwe kwao, okhubeera khasi onyala okhukasia efwiri elala elilafu kata elimali.
\v 37 Arali lekha okhulomaloma khweng'we khube, mbwe kario kario kose khaba khaba kosi kosi akakhira ao karula khuumbi.
\p
\v 38 Mwabulira mbwe kaboolwa mbwe, imoni khumoni, ne liino khuliino:
\v 39 Arali esie mbaboolera mbwe, muraingana nende owobwononi; arali yeesi oyo okhupama oluyu khundama eyo mukhono musaacha muberesie nende indama indi yosi.
\v 40 Kata omuundu nakhuyira musiina esia malako, nabukula elikoti liao, lekha abukule nende ikanju yao yosi.
\v 41 Ne oyo ochia okhuyiika okhuchia imaili ndala, chia ninaye echimaili chibiri.
\v 42 Beresia oyo okhusaba, ne oyo okhweyola oramwirukhania dawe.
\p
\v 43 Mwabuliire mbwe kaboolwa, mbwe okheere owasio ne omusiule omusuku wao.
\v 44 Arali mbabolera, kheere abasuku beng'we, mubabe chikhabi abo ababachuba, mubakholere amalayi abo ababasiula, ne nimubalamira bala ababekhonyera mukhubalekeresia, nende okhubasandia:
\v 45 Mbwe munyoole okhuba abaana ba seng'we oli mwikulu okhuba akholanga eliuba okhwakhira abonooni nende abalayi, nabakwisirianga ifula abalungifu nende abakhiamu.
\v 46 Okhuba nimukheera sa bala aababakheera, sianwa sina esiamuli nasio? Abanasialo boosi sibakholanga sa bario?
\v 47 Ne nimukhesia sa abebulanwa bong'ene, ni sina esiamukhola okhukhira abandi? abanasialo bosi sibakholanga bario?
\v 48 Khu kario mube abakololofu, kori olwa seng'we oli mwikulu ali omukololofu.
\c 6
\cl Omuliango 6
\p
\v 1 Mulingere mbwe murakhola amalayi keng'we imberi wa baandu, mbwe mulolekhane nabo; okhuba nimukhola murio mubula esiaanwa khurula khu seng'we oli mwikulu.
\v 2 Khu kario ewe norusia ebiaanwa biao, oroba oluika imberi wao, nga abekaadi bakholanga mumasinagogi nende khuchingira mbwe baberesibwe oluyali nende abaandu mbaboolera obwadieri bamalire okhunyola omurungo kwabwe.
\v 3 Arali ewe norusia ebiaanwa, kata omukhono kwao mukaada kuramanya akomukhono kwao omuluungi kukhola.
\v 4 Arali ebiaanwa biao bibe ebiobwekisi: ne babao olola mubwekisi ye omwene anakhurunga mubwakhakhu.
\p
\v 5 Ne khandi eng'we nimulaama, muraba nga abekaadi: khuba   bakheera osaba nibemere mumasinagogi nende muchimbeka chie chingira mbwe balolekhe nende abaandu. mbaboolera obwadieri mbwe bamalire okhurungwa.
\v 6 Arali ewe nosaba ingira musigoro mwao, manu wikale olwiki lwao, saba khu babao, oli mubwekisi; ne babao alolanga mubwekisi anakhurunga mubwakhakhu.
\v 7 Arali eng'we nimusaba, murekalukhira kalukhiramo, nga abesialo bakholanga: okhuba bapara mbwe banabulirwa khulwa mangi akabalomaloma.
\v 8 Khu kario muraba nga nibo; okhuba seng'we amanyire ebiindu biamwenya, kata nimusiamusaba.
\v 9 Bulano musabenge muri: Seefwe oli mwikulu, elira Liao liribwe.
\q2
\v 10 Obwami bwao bwiche. Elienya liao liekholekhe musialo, nga liekholekha mwikulu.
\q2
\v 11 Oruberesie inyanga ino ebiakhulia biefwe bia bulinyanga.
\q2
\v 12 Ne orulekhere ebinono biefwe, kori nga olwakhulekheranga abaruononera.
\q2
\v 13 Ne orarura mukhurekekhwa, arali, oruwonie orula Muchibi: Okhuba obwami no bwao, nende obunyala, nende oluyali, chinyanga chioosi, Kabe kario.
\p
\v 14 Okhuba nimulekhera abaandu ebiononi biabwe, seng'we oli mwikulu yesi anabalekhera:
\v 15 Arali nimuralekhera abaandu ebionono biabwe, Kata seng'we sachia okhubalekhera ebinono bieng'we.
\p
\v 16 Khumeedakho nimuli mukhusiiba, muraba nga, abekaadi, nimukhuluusia obweni: okhuba bakhuulusianga obweni mbwe, balolekhane nende abaandu mbwe basiiba. mbaboolera obwadieri banyolere omurungo kwaabwe.
\v 17 Arali ewe, nosiiba, bakha omurwe kwao amafura, khandi wosie bweni bwao.
\v 18 Mbwe oralolekha khu baandu mbwe osiiba, arali khu babao oli mubwekisi; ne babao, olola mubwekisi, anakhuruga mubwakhakhu.
\p
\v 19 Murara chimbikhiro chieng'we khusialo owa masiriri nende chimberebende chisasia, nende owa abebi bafunaka nibeeba.
\v 20 Arali mure chibikhiro chieng'we mwikulu, owa masiriri nende chimberebende, birasasia, khandi owa abeebi barakhafunaka beeba:
\v 21 Okhuba owa embikhiro yao iri, awo niwo owa omwoyo kwao Kuchia Okhuba.
\p
\v 22 Itara yomubiri ni imoni; Manu: nikaba mbwe imoni yao iri abwene, omubiri kwao kwoosi kwechulamo obulafu.
\v 23 Arali imoni yao niiri imbi omubiri kwao kwoosi kwechulamo esiirima. Khu kario obulafu bukhuliimo nibuba esiirima, esiirima esio sinesikhongo!
\p
\v 24 Abulao omundu onyala orumikhira abami babiri: Okhuba anasiula mulala, ne akheera oundi; khasi munyala orumikhira Nasaye alala nende emiandu.
\p
\v 25 Khulwesio mbaboolera, murabeyabeera obulamu bweng'we, mbwe munalia murie, kose esiamunang'wa; kata mbwe munefwaala sina khumibiri kieng'we. Bulamu sibukhoyera okhira ebiakhulia, ne mubiri okhira ebiefwaalo?
\v 26 Lingera amayoni komumiyaka: sikaraka, khandi sikafuna, kata sikabusia kaara mubiaki; Arali seng'we owomwkulu akalisianga. eng'we simukhoyera lukali okakhira?
\v 27 Niwiina khweng'we mukhubeyabeya onyala okhwemeedakho sikero silala khubukhomefu bwaye?
\p
\v 28 khulwasina mubeyabeera ebiefwaalo? Muparekho khubimuli ebiomumukunda nga olwabikhulaanga; sibinyakhananga, khandi sibilukhanga.
\v 29 Ne khandi mbabolera mbwe, kata Sulemani muluyali lwaye lwoosi siyefwalakho nga silala khubino
\v 30 Khu kario nibiri mbwe Nasaye afwala obunyasi bwomumukunda ario, obuluwo inyanga ino, ni muchuli busambwa, khasi achia obafwaala lukali okhirao, eng'we ababusubiri budiidi?
\v 31 Khulwesio murakhendegana, nimuboola mbwe, nisina esia khunalia? Kata nisina esiakhunang'wa? kata mbwe khunefwaala khurie?'
\v 32 (Okhubeera ebindu bino bioosi abesialo bakonyanga:) okhuba seng'we womwikulu amanyire mbwe mwenya ebiindu bino bioosi.
\v 33 Arali mukonye mberi obwami bwa Nasaye, nende obukololofu bwaye, ne biindu bino bioosi munamederwakho.
\v 34 Khu kario murayendera aka muchuli, okhuba muchuli inekhalabanira ebiindu bienyekhana yene. Buli inyanga ibechanga nende eminyakhano kiayo ekiyiyera.
\c 7
\cl Omuliango  7
\p
\v 1 Murayasianga omuundu esiina, mbwe mwesi murecha mwayaasibwa.
\v 2 Okhuba nga olwamuyaasia abaandu nilwo olwa muchia okhuyaasibwa, ne esikero esia mukereramo, khandi nisio esiamuchia okhukererwamo.
\v 3 Ne khusina ewe ololanga khakokha khali mumoni yowasio, nekhasi ololakho elikina eliri mumoni mwao?
\v 4 Kata khandi onyala oboolera orie owasio mbwe, lekha ndusie akhakokha mumoni mwao, ne khasi olola elikina liri mumoni yao mwene.
\v 5 Omwekaadi ewe, mberi rusia elikina mumoni mwao, khu onyale olola ebilayi okhurusia esikokha mumoni yowasio.
\p
\v 6 Oraberesia biria ebiri ebitakatifu chiimbwa, kata murafuubira echimbiichi echilulu, chireecha chiasenakira, nende amakulu kachio, manu chiakhukalukhanira nende okhurandula.
\p
\v 7 Saba ne onaberesibwa, koonya ne onanyoola, khong'onda ne onekulirwa.
\v 8 Okhuba buli oyo osaba aberesebwa; ne oyo okoonya. Anyoola; ne oyo okhong'onda yekulirwa.
\p
\v 9 Kata muundu sina khweng'we, owa omwana waye namusaba omugaati, namuberesia elikina?
\v 10 Kata khandi namusaba ing'eni, naye amuba Injukha?
\v 11 Nikali mbwe eng'we abali ababi mumanyire okhuberesania ebianwa bilayi khu abaana beng'we, seng'we oli mwikulu sanababeresia ebiindu bilayi lukali balia abamusaba?
\p
\v 12 Khu kario ebiindu bioosi ebia mwenya abaandu babakholere, mwesi mubakholere murio; okhuba kano niko amalako nende abanabii.
\p
\v 13 Mwingire okhubirira musiribwa sinyerere; okhuba esiribwa nesikhongo khandi ingira ni imambali eyichia mubusasikhi, ne nabangi balia abayiloonda.
\v 14 Okhubeera esiribwa nesidiidi khandi ingira ne inyerere eyichia mubulamu, ne nabadiidi abainyoola.
\p
\v 15 Mube meso khulwa abanabii bobubacha, ababeechera mubiefwalo ebiamakondi, arali mukari mwabwe ni mabwe malaaba.
\v 16 Muchia khubamanya khulwa ebiamo biabwe, abaandu babusianga emisabibu mumabwa, Kata amakhuyu mumarakalu?
\v 17 Kata kario buli musaala mulayi kwamanga ebiamwo bilayi; aràli musaala mubi kwamanga ebiamo bibi.
\v 18 Omusaala mulayi sikwakhama ebiamo bibi, khandi omusaala mubi sikwakhama ebiamo bilayi.
\v 19 Omusaala kwoosi okuraama ebiamo bilayi kuremwa kukwe asi manu kusukunwe mumuliro.
\v 20 Mungeri eyo ebiamo biabwe munabimanya.
\p
\v 21 Si buli muundu omboleranga, mbwe Omwami, Omwami, achia okhwingira mubwami bwo mwikulu; arali ulia okholanga elienya lia baba wange oli mwikulu.
\v 22 Abaangi bachia okhumbolera inyanga eyo, mbwe, Omwami, Omwami, khasi khwarusia obunabii muliira liao? khandi muliira liao nikhurusia ebikhieno? khandi muliira liao nikhukhola emirimo miingi ekiukisia!'
\v 23 Ne njia okhubakalusia mbwe, simbamanyire dawe, mundulekho eng'we abakholi bamabi.
\p
\v 24 Khulwesio oyo yesi obulira amakhuwa kange kano, nakakhola, ndamukeranisia khumuundu mukesi, owombakha inyumba yaye khulwanda:
\v 25 Ne ifula niyikha, nemiyembo nikiicha, nende omuyaka nikuucha nikukhuya inyumba eyo; nirakwa khaba, okhuba omuse kwayo kwarebwa khulwanda.
\v 26 Ne Oyo yeesi obulira amakhuwa kange kano ne sakakhola dawe, achia okhukeranisibwa khumuundu omusiru, owombakha inyumba yaye Khu musenye:
\v 27 Manu ifula niyikha emiyembo nikiicha, khandi omuyaka nikuucha nikuuba inyumba eyo; manu nikwa: ne okhukwa khwayo khwali okhukhongo.
\p
\v 28 Olunyuma lwako, olwa Yeso yali namalire khuboola amakhuwa ako, abaandu baukisibwa nende mekesio Kaye.
\v 29 Okhuba yabekesia nga ulia oli nende obunyala okhukhira bandiiki.
\c 8
\cl Omuliango 8
\p
\v 1 Olwayali niyekhere okhurula khulugulu, emikanda mikhongo kiamulonda.
\v 2 Ne, lola yeecha omukere namwinamira naboola ari, Omwami noba nojama onyala khundabia.
\p
\v 3 Ne Yeso nakolola omukhono kwaye, namudirakho, naboola, ari njamire; ba omulafu. Ne abweneao obukere bwaye nibwosibwa.
\v 4 Yeso naye namubolera ari, lola orabolerakho omuundu: arali bwao, ochie weyekesie khumukukhani, manu orusie esianwa esia Musa yalagira, khulwa obuloli khubo.
\p
\v 5 Ne ngolwa Yeso yali niyengira mu Kaperenaumu, omukhongo wa mayie yamwichira namusaba,
\v 6 naboola ari, Omwami, omukholi wange yeyalisie ingo, nomudekhere wekhuyuka, ne achunisibwa lukali.
\p
\v 7 Yeso naye namuboolera ari, ndeecha muwonie.
\p
\v 8 Naye omukhongo wa mayie yamukalusia naboola ari, Omwami, sikhoyera ewe okhwicha munyumba yange: arali lomaloma sa elikhuwa liong'ene, ne omukholi wange anaona. Okhuba esie ndi omuundu oli asi wobunyala, khandi ndi nende
\v 9 abasikari abali asi wange: ne mboleranga mulala mbwe chia nachia: ne oundi mbwe icha, ni yeecha; ne khumukholi wange mbwe, khola sino, ne asikhola.
\p
\v 10 Olwa Yeso yabulira ako, yauka, naboolera abo abamulondakho ari, mbaboolera obwadieri, siiri khunyoolakho obusubiri bukhongo kori nga buno khaba mu Isiraili.
\v 11 Ne mbaboolera mbwe, abaangi bachia okhwicha khurula ebukwe nende mumbo ne bachia okhwikhala asi nende Iburaimu, nende Isaaka, nende Yakobo, mubwami bwo mwikulu.
\v 12 Arali abaana bobwami bachia okhusukunwa erwanyi musiirima sia rwanyi: eyo khuchia okhubaayo okhulira nende okhusia meno.
\v 13 Naye Yeso yaboolera omukhongo wa mayie ari, bwao: ne kori ngolwosuubire, nilwo olwa kakhwekholekhekho. Ne omukholi waye naona mubikha ebio.
\p
\v 14 Olwa Yeso yachia munyumba ya Petro, nalola ng'ina mukhaye waye nakonere, naali omulwaye womuyaka.
\v 15 Ne namudira mukhono kwaye, omuyaka nikumulekha; nabuukha nabakhalabanira.
\p
\v 16 Ingolobe olwayola, bamurerera abaangi abali nibechuulemo ebikhieno; nawonia boosi abali abalwaye.
\v 17 Mbwe kanyale okhulirira akaboolwa nende Isaya omunabii, naboola ari, ye mwene yabukula obulwaye bwefwe, niyedwikha obudekhere bwefwe.
\p
\v 18 Bulano olwa Yeso yalola emikanda emikhongo ambi naye, nalagira mbwe babweo bachie ingerekha olwande lundi.
\v 19 Ne omwandiiki undi niyeecha, namuboolera ari, Omwami, njia okhuloonda woosi owa oba nochia.
\p
\v 20 Ne Yeso namuboolera ari, Amabwe kali nende ameena, ne amayoni kaakulu kali nende ebiyu; arali Omwana womuundu khasi ali nende owa yalisia omurwe kwaye.
\p
\v 21 Ne oundi khu beka baye namuboolera ari, Omwami, lekha mberi njie siikhe baaba wange.
\p
\v 22 Naye Yeso namuboolera ari, noonde; lekha abafu basiikhe abafu baabwe.
\p
\v 23 Naye olwa yali niyengiire muliaro, abeka baye bamuloonda.
\v 24 Ne, lola, omuyaka mukhongo nikubuukha munyanja, lukali kata eliaro nilifunikhwa nende amafwiinda: arali ye yali mundoolo.
\v 25 Ne abeka baye nibamwichakho, nibamusimusia, nibaboola bari, Omwami, rwambule khusasikha.
\p
\v 26 Naye nababoolera ari, khusina muli abari eng'we abobusuubiri budiidi? Manu nabuukha, niyalabira omuyaka nende inyanja; obuyenjeefu obukhongo nibubao.
\p
\v 27 Abaandu abo bauka, Nibaboola bari, "uno nimuundu sina; owa kata omuyaka nende inyanja bimubulira!
\p
\v 28 Ne olwayola ingerkha musialo sia Abagerasi, yabukanana nende abaandu babiri abali nende ebikhieno, nibarula mubiriindwa, ne bali abaalaba, kata abarakanyira omuundu yesi yesi abire khungira eyo.
\v 29 Ne, lola, balira nibaboola bari, khuli nawe sina, Yeso, ewe mwana wa Nasaye? Wichire orukhaniakhania ebikha nibisiola?'
\v 30 Ne kwaliwo ale omukanda okwechimbiichi nichiayanga.
\p
\v 31 Manu ebikhieno nibimusaba, nibiboola mbwe, nikaba mbwe orurusia erwanyi, orulekhe khuchie mumukanda okwe chimbiichi.
\p
\v 32 Naye nabiboolera ari muchie; Ne olwabiali nibirurile erwanyi biachia mumukanda okwe chimbiichi; ne lola omukanda kwoosi okwe chimbiichi kwerukha nende esioka nikwikhirira okhuchia munyanja, nikhusasikha mumachi
\v 33 Abo abaayi bachio niberukha nibachia mudookho, nibaboola bulisindu nende akali nikekholere khu abo abebikhieno.
\v 34 Ne lola edookho lioosi liecha obukanana nende Yeso ne olwabamulola, bamusaba mbwe abweo arule khuchinjakho chiabwe.
\c 9
\cl Omuliango 9
\p
\v 1 Manu niyengira muliaro niyambukha niyeecha mudookho liaye liene.
\v 2 Ne lola, nibamurerera omuundu omulwaye wakwa owekhuyuka nakonere khusitanda; ne Yeso olwayalola obusuubiri bwabwe naboolera omulwaye wekhuyuka ari; omwana lema omwoyo ebiibi biao bilekheerwe.
\p
\v 3 Ne lola abandi khu bandiiki nibaboola mu mioyo kiabwe mbwe, omuundu uno yekeranisia khu Nasaye.
\v 4 Ne Yeso olwaya manya amapaaro kabwe naboola ari, khusina muparanga amabi mumioyo kieng'we.
\v 5 Okhuba nisiina esiangu, okhuboola mbwe, ebibi biao bilekheerwe; kose okhuboola mbwe buukha manu okeende.
\v 6 Arali mbwe munyale okhumanya mbwe omwana womuundu ali nende obunyala khusialo okhulekhera echiimbi, manu naboolera omulwaye wokhwekhuyuka ari, buukha obukule esitanda siao, ochie munyumba mwao.
\v 7 Manu nabuukha nachia munyumba mwaye.
\v 8 Arali olwa omukanda kwalola elio bauka nibaberesia Nasaye oluyaali, owaberesania obunyala kori obwo khubaandu.
\p
\v 9 Ne olwa Yeso yabira narulire awo, nalola omuundu olangwa mbwe Matayo, niyekhaale musiribwa sia obusololi bwobusuru; namuboolera ari, "Noonde" Naye nasingira namulonda.
\v 10 Ne olunyuma Yeso yekhala nalia ebiakhula munyumba, lola abanasialo nende abonooni beecha nibekhala asi alala ninaye nende abeka baye.
\p
\v 11 Ne olwa Abafarisayo balola ako, baboolera abeka baye bari, "khulwasina Omwami weng'we alia nende abanasialo nende abonooni?"
\p
\v 12 Arali Yeso olwayabulira ako, nababoolera ari, balia abali abalamu sibenya omulesi, arali abo abali abalwaye.
\v 13 Arali muchie eng'we manu mumanyirisie olwa ako kekesia, nyenya esisa okhukhira emisango; okhuba sindecha olanga abakololofu arali abonooni mbwe bekanire.
\p
\v 14 Manu abeka ba Yokhana nibamwichira, nibaboola bari, "khusiina efwe nende abafarisayo khusiiba buli, nabo abeka bao sibasiiba?"
\p
\v 15 Naye Yeso nababoolera ari, Abaana ba omugole banyala okhulira, omugole nali nabo? arali chinyanga chakheeche, olwa omugole achia obarusibwakho, ne abweneao bakhasiibe.
\p
\v 16 Abulao omuundu orechanga esiraka sie ingubo injiakha khungubo ingofu, okhuba esio esirerweo okhwichusiao sirandukhayo okhurula khungubo, ne oburandukhe bwaaba obubi.
\v 17 Kata abaandu sibakhachukha ifini injiakha muchichupa chingofu; okhuba echichupa echio chiadikha, manu ifini yiidikhe, ne echichupa chiasasikha; Arali bara ifini injiakha muchichupa chinjiakha, ne bioosi biba binamenya.
\p
\v 18 Olwayali naboolanga amakhuwa kano, lola niyeecha omuruki undi, namwinamira, naboola ari, omukhana wange kata bulano afwire, arali icha omurekho omukhono kwao, ne anaona.
\v 19 Ne Yeso nabuukha namuloonda abeka baye boosi nibakhola bario.
\v 20 Ne lola omukhasi, owali omulwaye owadachirira emiaka ekhumi nende kibiri, namwichira inyuma, nadiira khulikemo lia ingubo yaye.
\p
\v 21 Okhuba yaboola mumwoyo kwaye ari, nikaba sa mbwe ndiira khungubo yaye ndaona.
\p
\v 22 Arali Yeso nakalukhana, ne olwa yamulola, namuboolera ari, "omukhana wange, weberesie omwoyo; obusuubiri bwao bukhuwonisie"ne omukhasi oyo naona khurula ebikha ebio.
\p
\v 23 Ne olwa Yeso yola munyumba mwa omuruki oyo, yalola aboobi ba malere nende abaandu nibayokera.
\v 24 Nababoolera ari, "mubweo; okhuba omukhana safwiire, arali akona". Nabo nibamuchekha mukhumulekeresia.
\v 25 Arali olwa baandu barusibwayo, niyengira mukari, namudiira omukhono, omukhana nabuukha.
\v 26 Ne ifuma nisalana musialo siosi.
\p
\v 27 Ne olwa yali nabwereo abaandu baofu babiri bamulondakho, nibalira nibaboola bari, "Ewe omwana wa Daudi rubere sisa!"
\v 28 Ne olwayali niyengire munyumba, abaandu baofu nibamwichira, Yeso nababoolera ari, "musuubira mbwe nyala okhukhola kano?' Nibamukalusia bari Eee Omwami.
\p
\v 29 Manu nadiira khumoni chiabwe, naboola ari, khulondana nende busuubiri bweng'we kababeere kario.
\v 30 Ne chimoni chiabwe nichiikukha ne Yeso nabalabula, nababoolera ari, 'mulole mbwe omuundu aramanyakho ako."
\v 31 Arali olwabali nibabwereo, balandaasia ifuma yaye musialo esio sioosi.
\p
\v 32 Olwabali nibarula erwanyi, lola bamurerera omuundu omusiru owaliimo esikhieno.
\v 33 Ne olwa esikhieno siakhungwa erwanyi, omusiru nalomaloma; ne omukanda nikuuka nikuboola kuri "kasiiri okhubakho kari mu Isiraili!"
\p
\v 34 Arali Abafarisayo baboola bari, "Arusianga ebikhieno, okhubirira khumwami webikhieno."
\p
\v 35 Ne Yeso nachia mumadookho koosi nende echingoongo niyekesia muchisinagogi chiabwe, nayalanga ifanjili eyobwami nende okhuonia obudekhere bwoosi nende buli amalwaye mubaandu.
\v 36 Arali olwa yalola omukanda, yadirwa nende esisa khubo, okhubeera bali nibajong'ere, nibasalanire, kori amakondi kabula omwayi.
\v 37 Manu naboolera abeka baye ari, elikesa bwadieri neliingi, arali abakholi bemirimo nabadiidi.
\v 38 Khu kario sabe Omwami welikesa, mbwe anyale okhuruma abakholi bemirimo mulikesa liaye
\c 10
\cl Omuliango 10
\p
\v 1 Olwa yalanga abeka baye ekhumi na babiri yababeresia obunyala akulu wa echirokho chiesifwaabi okhuchirusia erwanyi nende okhuwonia buli ingeri ya madekhere nende amalwaye koosi.
\v 2 Bulano ameera ka beka ekhumi na babiri niko kano. Owamberi Simoni olangwa Petero nende Anderea omusiani wabwe, Yakobo omwana wa Sebedayo, nende Yokhana omuisani wabwe.
\v 3 Filipo nende Matulumayo; Tomasi, nende Matayo omusololi wo busuru, Yakobo omwana wa Alufayo, nende Lebayo owa eliira lilangwa mbwe Tadeyo;
\v 4 Simoni mukanani, nende Yuda musikarioti oli niye owamukhoba.
\p
\v 5 Ekhumi na babiri bano Yeso yabaruma imberi, nabalagira mbwe murachiakho khungira ya banasialo, nende mulidookho liosi liosi elia Basamaria murengiramo.
\v 6 Arali muchie khumakondi keinyumaba ya Isiraili akakora.
\v 7 Ne nimuchia muyaale nimuboola muri, 'Obwami bwomwikulu buliambi.'
\v 8 Muwonie abalwaye, mubuusie abafu, mulabie abobukere, mukhunge bikhieno. Ebikhaya eng'we mwanyoola, ebikhaya muberesanie.
\v 9 Murakiinga idakhabu, kata ifesa kose echisende mumifuko kieng'we dawe,
\v 10 kata omufuko kwolukendo, kose echikanju chibiri kose ebilaro, kata sa indaukhi, okhuba omukholi wemirimo akwanira okhuberesebwa ebiakhulia biaye.
\v 11 Mulidookho kata lukongo lwosi olwa mwingiramo, mureberesie mbwe niwiina okhoyera, ne abweneao mumenyeo okhuula olwamubwao.
\v 12 Ne nimwingira munyuumba, mubakhesie.
\v 13 Ne nibiri mbwe inyumba eyo ikhoyera, lekha omulembe kweng'we kube khuyo; arali nibiri mbwe siikhoyera lekha omulembe kweng'we kubakalukhire.
\v 14 Ne ulia yesi orabengisia kata obulira amakhuwa keng'we, nimurula erwanyi we inyumba eyo kata mulidookho musisimule olufu okhurula khubirenge bieng'we.
\v 15 Obwadieri mbaboolera mbwe kaliba maangu musialo sia Sodoma nende Gomora inyanga yobukhalaki okhira nga kaabe khulidookho elio.
\p
\v 16 Lola mbaruma imberi nga amakondi akari webisuuje khu kario mube abakesi ngechinjukha, ne abedemberefu nga Amausi.
\v 17 Arali mube meso nende abaandu; okhuba bachia okhubayira mubiina, nibabarocha muchisinagogi chiabwe.
\v 18 Ne muchia okhuyirwa imberi wa abaami nende abaruki khulwange, khulwa obuloli khubo nende abesialo.
\v 19 Arali nibabayira murakanakana akamuchia oboola nende olwamuchia okaboola; okhuba muchia oberesibwa ebikha biene ebio akamuchia oboola.
\v 20 Okhuba sineng'we abalomaloma arali Rokho wa Seng'we niye olomaloma mweng'we.
\v 21 Omusiani anakhoba musiani wabwe yeerwe, ne samwana ario khumwana, ne baana banakalukhana khu bebusi babwe, bakere beerwe.
\v 22 Ne muchia okhusiulwa nende abaandu boosi khulwa eliira liange; arali ulia owesimirisia okhuula khubumalirikhi achia okhuwonibwa.
\v 23 Arali olwa babasandia mudookho lino, mwirukhire mudookho lindi; okhuba obwadieri mbaboolera, nimusiri okhurula mumadookho ka Israili, omwana womuundu aliba niyechere.
\p
\v 24 Omweka siyakhaba akulu womwekesia waye, ne omukholi sakhira omwami waye.
\v 25 Kayera omweka okhuba nga omwekesia waye nomukholi okhuba nga omwami waye. Nibiri mbwe balangire mwenengo mbwe Belisebabu, sibanakhira okhulanga abomungo waye bario?
\p
\v 26 Khu kario murabaria okhuba sibulao esiindu siafunikhwa esirachia okhufunulibwa, kose esiekisa esirachia omanyikhana.
\v 27 Akambaboolera musirima mukalomalome mubulafu, ne akamubulira mukhurwi ako muyaale khubirama biechinyumba
\v 28 Ne murabaria abo abeera omubiri, ne sibanyala okhuwiira omwoyo; arali murie oyo onyala okhusasia omwoyo nende omubiri emagombe.
\v 29 Amakaburuku kabiri sikakulwanga isende ndala? ne kata elala khuniko siliakhakwa khuuloba oburali khulwa seng'we.
\v 30 Kata efwiri liokhumirwe kieng'we lioosi liabalwa.
\v 31 Khukario muraria, muli abobukusi okhukhira amakaburuku amaangi.
\v 32 Khulwesio oyo ofukirira imberi wa baandu siesi njia omufukirira imberi wa baaba wange oli mwikulu.
\v 33 Arali oyo ondekaana imberi wabaandu siesi njia omwekaana imberi wa baaba wange oli mwikulu
\p
\v 34 Murapara mbwe njichire okhurera omulembe khusialo, sindeecha okhurera omulembe arali olugaanga.
\v 35 Okhuba ndeecha okhurera obulekani akari womuundu khusamwana ne omukhana khung'ina, ne mukhomwana, khumasalang'ene.
\v 36 Nabasuku bomuundu bachia okhuba abainyumba yaye omwene.
\v 37 Oyo okheere samwana kata ng'ina lukali okhuukhira, khasi akhoyeera; noyo okheera omusiani waye kata omukhana waye okhuukhira khasi akhoyeera.
\v 38 Noyo orabukula omusalaba kwaye manu anoonde esie, khasi akhoyeera.
\v 39 Oyo okoonya obulamu bwaye achia okhubukosia; noyo okosia obulamu bwaye khulwange achia obunyoola.
\p
\v 40 Oyo obengisia eng'we anyingisia esie, noyo onyingisia yengisia oyo owanduma esie.
\v 41 Oyo owingisia omunabii mulira liomunabii anyoola esiaanwa siomunabii; noyo owingisia omuundu mulungifu muliira liomuundu mulungifu anyola esianwa siomuundu mulungifu.
\v 42 Noyo oberesania esiokhung'wa mulala khu badiidi bano esikombe siamachi manyifu muliira liomweka, bwadieri mbaboolere, khasi achia okhukosia esianwa siaye.
\c 11
\cl Omuliango 11
\p
\v 1 Ne olunyuma lwa ako, olwa yali namalire okhubalagira abeka baye ekhumi nende babiri yarulao nachia okhwekesia nende okhuyaala mumadookho kabwe.
\p
\v 2 Bulano olwa Yokhana yali nabuliire mumboyero emirimo kia, Kirisito yaruma babiri khubeka baye,
\v 3 namureba ari,"ewe newe oyo okhoyere okhwicha kose khulindirire oundi?"
\p
\v 4 Yeso nakalusia nababolera ari, muchie mwekesie Yokhana ebiindu biria ebiamubulira nende okhulola.
\v 5 Aboofu balola, nende abalema bakenda, abakere balabisibwa, nende abadiimbe babulira, abafu babusibwa, ne abamanani banyola oyalirwa ifanjili.
\v 6 Ne noweikhabi ulia arasinyisibwa nange.
\p
\v 7 Nolwa bali nibabwao, Yeso yachaaka oboolera omukanda olondana nende Yokhana, "mwachia erwanyi musichiimi okhulola sina, elikada liyuyisibwa nende omuyaka?
\v 8 Nikarari kario nisina esiamwacha erwanyi okhulola? omuundu owefwalire engubo endorondoro? lola abo abefwaala engubo endorondoro bali munyumba chiabaruki.
\v 9 Ne mwachia erwanyi okhulola sina? omunabii? kario mbaboolera mbwe, khandi okhira omunabii.
\v 10 Okhuba uno niye owa kaandikwa olondana naye mbwe, lola nduma omurumwa wange imberi wao ochia okhurekekha ingira yao imberi wao.
\p
\v 11 Obwadieri mbaboolera, akari wa abo abebulwa nende abakhasi asiri okhubao omukhongo kori Yokhana mubatisia. Oburamanyirisia mbwe ulia omalirikha muburuki bwomwikulu nomukhongo omukhira.
\v 12 Ne okhurula munyanga chia Yokhana mubatisia okhula leero oburuki bwomwikulu bunyolekhana khumaani, nabamaani babunyoola khumaani.
\v 13 Okhuba abanabii boosi nende amalako barusia obunabii okhuula khu Yokhana;
\v 14 Ne nibiri mbwe ofukirisania nende kano, uno ni Eliya owakhoyera okhwicha.
\v 15 Oyo oli nende amarwi kabulira, lekha abulire.
\p
\v 16 Arali fwananisia olwibulo luno nende sina? luli nga abaana bekhaale khusiiro ne balanga abasiabwe.
\v 17 Nibaboola bari, khwabakhubira olwika ne khasi mwakhina,
\v 18 Okhuba Yokhana yeecha naralia kata okhug'wa, nibaboola, mbwe ali nende sikhieno.
\v 19 Omwana womuundu yeecha nalia khandi nang'wa, ni baboola mbwe lingera omuundu wokulira, khandi omumesi, omwicha wa banasialo nende abonooni arali obukesi bulirira khubaana baye.
\p
\v 20 Manu nachaaka okhwalabira amadookho ako omwa emirimo kiaye emikhongo kiekholekha, okhubeera khasibekanira.
\v 21 Wuuwi khwewe, Korosini, wuuwi ewe Betisaida! okhuba biba mbwe emirimo mikhongo ekiekholekha mwewe, kiekholekha Tiro nende Sidoni, bakhekaniire khale muno muchingubo echia amangunia nende likokhe.
\v 22 Arali mbaboolera mbwe, kaliba maangu khu Tiro nende Sidoni inyanga ya obukhalaki obakhirakho eng'we.
\v 23 Nawe ewe Kaperenaumu, owakingulwa okhuula mwikulu, ochia okhukalusibwa asi, emagombe; okhuba akamakana, kekholekha mwewe, kekholeekhe mu Sodoma, yakhabere iriwo okhuula inyanga ino.
\v 24 Arali mbaboolera mbwe, kachooba mangu khu sialo sia Sodoma inyanga yobukhalaki okhukhirakho ewe.
\p
\v 25 Ebikha ebio Yeso yakalusia naboola, khwebasia Baaba Omwami welikulu nende sialo okhubera ewe wakisa ebiindu bino khubakesi nende abasomi nobafunulira abaana abadiidi.
\v 26 Kata kario Baaba: khulwesio biabonekhana ebilayi mumoni chiao.
\p
\v 27 Ebiindu bioosi ndaberesebwa nende Baaba; ne abulao omuundu omanyire omwana arali samwana; kata omuundu omanyire samwana omalao omwana nende ulia owa omwana achia omufunulira.
\v 28 Mwiiche mwesi eng'we abanyakhana nende okhusidoyerwa emikuku, nasie ndababeresie esiulukho.
\v 29 Mwefwale ejooki liange nimweka khwesie okhuba esie ndi omwedemberefu, khandi omweocherefu mumwoyo, ni muchia okhunyola esiuulukho mumwoyo kieng'we.
\v 30 Okhuba elijooki liange nelilayi nomukuku kwange nomwangu.
\c 12
\cl Omuliango 12
\p
\v 1 Ebikha ebio Yeso nachia inyanga ya sabato mundalo ya mandimwa, ne abeka baye bali injala ni nibachaka okhufuna amadimwa madoro nibalia.
\v 2 Arali olwa Abafarisayo balola ako, nibamubolera bari, "lingera abeka bao bakhola akarakhoyera mu malako, okhola inyanga ya sabato."
\p
\v 3 Arali nababoolera ari, khasi mwasomakho aka Daudi yakhola olwayali injala alala nende abayali nabo?
\v 4 Nga olwayengira munyumba ya Nasaye manu nalia emigaati ekiokhwekesia ekiali kirakhoyera khu ye okhulia kata balia abali naye arali abakukhani bong'ene.
\v 5 Kata musiasomakho mumalako nga inyanga ya sabato abakukhani abali mukhekalu bonoonianga isabato, nibarabalirwa amabi dawe?
\v 6 Arali mbaboolera mbwe abuundu ano aliwo mulala okhira ikhekalu.
\v 7 Arali mumanyire esisina sielikhuwa lino, mbwe nyenya esisa okhira sisakhiro, simwakhabakhalakira esiina balia ababula esibi.
\v 8 Okhuba omwana wo muundu niye omwami weisabato.
\p
\v 9 Ne olwayali narulire ao nachia musinagogi yabwe.
\v 10 Ne lola yalimo omuundu owa omukhono mulema. Ne nibamureeba nibaboola, kalakirwa okhuwonia inyanga ya sabato? mbwe banyole okhumusitaaka.
\p
\v 11 Naye nababoolera ari, ni muundu sina akari weng'we oli nende ekondi elala, nilikwa muliina inyanga ya sabato, khasi anyala okhwingiramo yalirusia erwanyi?
\v 12 Ne biaka birie omuundu okhira elikondi? kata kario nelilako okhukhola amalayi inyanga ya isabato."
\v 13 Manu naboolera omuundu oyo mbwe kololosia omukhono kwao, nakukolola manu nikukalukha abwene nga okundi.
\v 14 Manu Abafarisayo nibachia erwanyi, nibakhola omukhung'ano khulwaye ngabakhanyoola omusasia.
\p
\v 15 Arali olwa Yeso yamanya ako narula abweneao; ne emikanda mikhongo nikimulonda naye nabaonia boosi.
\v 16 Ne nabakaania mbwe baramukhola yamanyikhana.
\v 17 Mbwe kolerere akalomalomwa nende Isaiah omunabii naboola ari.
\q
\v 18 Lola omukholi wange owandalobola omukherwa wange, owa omwoyo kwange kukherisibwa muye; njia okhura omwoyo kwange khuyie, naye achia okhukhalakira esina abanasialo.
\q
\v 19 Sachia okhwiyingana kata okhulira, kata omuundu sachia okhubulirakho idoboosi yaye khuchingira.
\q
\v 20 Elikada liumiye sachia okhufunaka ne olutambi lurusia omuosi sachia olusimia okhula olwachia okhurera obukhalaki mubukhiri.
\q
\v 21 ne mulira liaye abanasialo bachia okhwesika.
\p
\v 22 Manu nibamurera omulala owali nende esikhieno, omwofu khandi omusiru; mani namuwonia mani nanyala okhulomaloma nende okhulola.
\v 23 Omukanda khwosi kwauka, ni baboola, uno sinomwana wa Daudi?"
\p
\v 24 Arali olwa Abafarisayo babulira ako, nibaboola bari, 'Omuyia uno sarusia sa ebikhieno arali khulwa Belizebuli omwami we bikhieno.
\p
\v 25 Ne Yeso namanya amapaaro kabwe, nababoolera ari, buli oburuki obwakabukhana obwene khubwene bumalirikhiranga mubusasikhi, ne buli edookho kata inyumba eyakabukhana eyene khuyene siyakheema.
\v 26 Ne nibiri mbwe esikhieno sirusia esikhieno, siakabukhana esiene khusiene; oburuki bwasio buneema burie?
\v 27 Ne nibiri mbwe esie khulwa Belisebuli njirusia ebikhieno abaana beng'we barusia khumaani kawiina? khulwesio bachia okhuba abakhalaki beng'we.
\v 28 Ne nibiri mbwe khung'a ebikhieno khulwa Rokho wa Nasaye manu oburuki bwa Nasaye bwichire khweng'we.
\p
\v 29 Kata kario omuundu yakhengira arie munyumba yomuundu wamaani, manu anyasie ebiindu biaye, nibirali mbwe arangirira yaboya omuundu wamaani naamala anyasia inyumba yaye.
\p
\v 30 ulia orali nange nomusuku wange ne ulia orabuusia nange asalania.
\p
\v 31 Khulwesio mbaboolera mbwe engeri chioosi echia ebionoono nende amanyeko bichia olekherwa abaandu; arali elinyeko khu Rokho mutakatifu silichia olekherwa abaandu.
\v 32 Ne Yesi olamaloma khumwana womuundu, achia olekherwa, arali yesi olomaloma khu rokho mutakatifu sachia olekherwa musialo muno kata musialo siicha.
\p
\v 33 Khola omusaala kube omulayi; nebiamo biakwo binaba ebilayi, kose okhole omusaala okhuba omubi, nebiamo biakwo biosi binaba ebibi: okhubera omusaala kumanyikhana khulwebiamo biakwo.
\v 34 Olwibulo lwechinjukha, munyala murie, olwamuli abonooni, olomaloma ebiindu bilayi? okhuba okhurula mubungi obwa akari mumwoyo omunwa kulomalomanga.
\v 35 Omuundu omulayi okhurula mumbikhiro indayi eyo mumwoyo arusianga ebiindu bilayi; nomuundu omwonooni orula mumbiikhiro yobwonooni arusianga ebiindu biobwoni
\v 36 Arali mbaboolera mbwe, buli elikhuwa elirakhoya elia baandu bachia olomaloma bakhurusia obubali bwalio, inyanga yobukhalaki.
\v 37 Okhuba khumakhwa kao ochia obalirwa obulungikhi, ne khulwa amakhuwa kao ochia okhalakirwa.
\p
\v 38 Abweneao balala khubandiiki nende Abafarisayo nibakalusia nibaboola bari, omwekesia khwenya esilorero okhurula khwewe.
\p
\v 39 Arali nakalusia nababoolera ari, olwibulo lwonooni nende oluyeyi lukonyanga esilolero; nesibulao esilolero sialuchia oberesibwa, arali esilolero sia nabii Yona.
\v 40 Mbwe nga olwa Yona yali echinyanga chidaru nende biro bidaru munda mweing'eni; nilwo olwa omwana womuundu achia okhuba enyanga chidaru nende biro bidaru mumwoyo kwesialo.
\v 41 Abaandu ba Ninawi bakhabuukhe khulwa obukhalaki alala nende olwibulo luno, ni balukhalakire esiina okhubera bekanira mukhuyaala khwa Yona, ne lola omukhongo okhira Yona aliano.
\v 42 Omuruki mukhasi owemwalo achia obuukha mubukhalaki nende olwibulo luno ne achia okhulukhalakira esiina; okhuba yeecha okhurula mumbeka chiesialo siaale okhubulira obukesi bwa Sulemani; ne, lingera, omukhongo okhira Sulemani aliano.
\p
\v 43 Irokho ibi niirula mumuundu ikendanga mumbeka chiesiumira okhunyoola okhubuluukha, ne niranyoola wosi.
\v 44 Manu imala iboole iri, njia okalukha munyumba yange yandarulamo, ne niikalukha inyoole niyakhakha manu yeyerwe, ikhwanisiibwe.
\v 45 Ibwao, niichia niibukula alala nayo echirokho chindi saba echiakoyana lukali oyikhira, nichingira mukari nichimenyamo: ne imbeera imalirikha yomuundu oyo ikoyana okhirakho eyamberi, kata kario nilwo olwakachia okhuba khulwibulo olukoyanu luno.
\p
\v 46 Olwayali nasiri nalomaloma nende baandu, lola ng'ina nende abaana babwe beecha nibekoomba olomaloma naye.
\v 47 Manu mulala namuboolera ari, lola mama wao nende abaana beng'we bali rwanyi bekoomba olomaloma nawe.
\p
\v 48 Arali nakalusia namuboolera oyo owamuboolera ari, mama wange niye wiina? nabaana befwe niwiina?
\v 49 Ne nakolola omukhono kwaye khubeka baye naboola ari, lola mama nende abaana befwe!
\v 50 Okhuba yeesi okhola elienya lia Baaba oli mwikulu oyo niye omusiani nende omukhana wefwe nende mama.
\c 13
\cl Omuliango 13
\p
\v 1 Inyaanga yeneyo Yeso yarula erwanyi weinyuumba, nachia niyekhala khundulo khwe inyanja.
\v 2 Ne omukaanda omukhoongo nikwebuusia alala khuniye, okhuula olwa yachia muliaro niyekhala; ne omukaanda kwoosi nikweema khulukuku.
\v 3 Ne Yeso nababolra ebiindu bingi muchingaado naboola ari, lola, omuraaki yachia okhuraaka.
\v 4 Ne olwayaraaka, imwo yindi yakwa khungira, amayoni keecha nikayiboocha:
\v 5 Eyindi nikwa khulwaanda oweliloba liingi libula: ne ebikha bidiidi niimera okhuba siyali nende eloba elioloberera.
\v 6 Ne olwa omubasu kwafwa, yalala; ne okhubeera siyali nende emisi, niifwa.
\v 7 Ne eyindi niikwa mumabwa; amabwa nikamera nikaifumira.
\v 8 Arali eyindi yakwa muloba elilayi; niyaama ebiamo, eyindi imia khumia, eyindi kasasaba khumia, neyindi kadaru khumia.
\v 9 Oli nende marwi kabulira, abulire.
\p
\v 10 Ne abeka nibeecha nibamuboolera bari; "khusina abalomalomeraanga mu chingaado?"
\p
\v 11 Nakalusia nababoolera ari, okhubeera kaberesibwa khweng'we okhumanya aka mubwekisi akobwami bwo mwikulu, arali khunibo sikaberesibwa.
\v 12 Okhuba oyo olinabio, khuye bichia khuberesibwa, ne achia oba nabio mubungi; arali oyo obula, orula khuniye bichia obukulibwa kata esiali ninasio.
\v 13 Khulweso mbalomalomera muchingaado: okhuba bali nende chimoni nesichilola, kata kario amarwi nisibabulira kata khandi sibamanyirisia.
\v 14 Ne niko kosirisibwa obunabii bwa Isaya obubola mbwe, okhubulira munabulira, arali simunamanyirisia, ne okhulingera munalingeera arali simunalona.
\p
\v 15 Okhuba emioyo kia Baandu bano kibere emiomu mbwe barachia ebikha bioosi balola nende chimoni chiabwe nibabulira nende amarwi kabwe, nibamanyirisia nende emioyo kiabwe nibakalukhanisibwa, mani ndabaonia.
\p
\v 16 Arali chiongerwe ikhabi echimoni cheng'we okhuba chilola: namarwi keng'we okhuba kabulira.
\v 17 Okhuba obwadieri mbaboolera mbwe, abanabii baangi nende abaandu abakolofu bekoomba okhuola amakhuwa akamulola kano, nisibakalola; nende okhubulira amakhuwa kano akamubulira, arali sibakabulira.
\p
\v 18 Khulwesio mubulire olukaado olwomuraaki.
\v 19 Omuundu yeesi obulira elikhuwa elioburuki, naralimanyirisia, omukoyaani yechaanga, narusia s esirakirwe mumwoyo kwaye. uno niye owanyoola imwo yakwa khungira.
\v 20 Arali ulia owanyoola imwo yakwa khulwanda, oyo niye obulira ekhuwa nende obusangaafu nalifukirira.
\v 21 Omalao siali nende emisii muyie arali yedemberesia khulwe bikha bidiidi: okhuba amanyakhano kose obunyakhani nibwiicha khulwa elikhuwa, ebikha nende bikha asinyisibwa.
\v 22 Ulia yesi owanyoola imwo yomumabwa niye oyo obulira elikhuwa, namanyakhano kiesialo sino nende obubacha bwo buyiinda bufwiinyaa elikhuwa nakhirwa okhwama ebiamo.
\v 23 Arali ulia onyoola imwo muliloba elilayi niye oyo obulira elikhuwa nalimanyirisia; niyama ebiamo obukhumi imia, abaandi amakhumi kasasaba, na abaandi amakhumi kadaru.
\p
\v 24 Olukaado lundi yababoolera ari, obwami bwomwikulu bufwananisibwa nende omuundu owaraka imwo indayi mundalo yaye.
\v 25 Arali olwa baandu beyalisia, omusuku waye yeecha naraaka amabaye akari weingano, mani nabwao.
\v 26 Arali olweingaano yasebukha niyibula ebiamo amabaye koosi nikalolekha.
\v 27 Kario abakholi bomweneengo beecha nibamuboolera bari, Omwami siwaraaka imwo indayi mundalo yao, bulano khandi elibaye lurulire ena?
\p
\v 28 "Nababoolera ari, omusuku akholere kano. Abakholi nibamuboolera bari, wakharufukirira khuchie khukeyake nende okabuusia alala?'
\p
\v 29 Arali naboola ari, khaba; mumanya mwaba nimubusia amabaye mweyaka khandi ingano yosi alala nako.
\v 30 Mulekhe bioosi bikhulire alala okhuula mulikesa: nebikha bielikesa ndakhababoolere abakesii mbwe "mubusie mberi alala amabaye nimukaboya mumikaanda khukasaamba; arali mubuusie ingano mure musiaki siange."
\p
\v 31 Olukaado lundi yabakanira naboola ari, obwami bwomwikulu buli nga imoni yeimwo yelisaaka eyomuundu yabukula naraaka mundalo mwaye.
\v 32 Eyiri niyo eyindiidi imalirikhayo mumwo yoosi; arali niyikhulire niyiba ikhoongo akari we misaala amayoni akomumiyaka keecha nikamenya khumasaga kakwo.
\p
\v 33 Nababoolera olukaado lundi mbwe, obwami bwomwikulu buli nga elimera, eliomukhasi yabukula, mani nakisa mubikero bidaru ebia obusie okhuula olwabwoosi bwekhola elimera.
\p
\v 34 Amakhuwa kano koosi Yeso yaboolera omukaanda muchingaado, ne oburali muchingaado siyabalomalomera.
\v 35 Mbwe kanyale okhuulirira akalomalomwa nende omunabii naboola ari, ndafuunula omunwa kwange muchingaado ndaboola ebiindu ebiebikha mubwekisi okhurula khumuse okwesialo.
\p
\v 36 Mani Yeso naseebula omukaanda, niyengira munyuumba; abeeka baye nibamwichira, nibaboola bari, 'Rumanyisie olukaado olwa mabaye komundalo."
\p
\v 37 Nabakalusia naboola ari, ulia oraaka imwo indayi nomwana womuundu.
\v 38 Indalo nesialo; imwo indayi nabaana aboburuki; arali amabaye nabaana bomukoyani.
\v 39 Omusuku owaraaka nomukhieni; elikesa nobumalirikhi bwesialo; ne abakesii nibamalaika.
\v 40 Khu kario ngolwa amabaye kanasambibwa mumuliro; nilwo olwakachia okhuba mubumalirikhi obwomusialo sino.
\v 41 Omwana womuundu achia oruma imberi abamalaika baye, nibachia obuusia orula mubwami ebiindu bioosi ebisinyisia, nende boosi abakhola akobwononi.
\v 42 Ne achia okhubasukuna mutanuru eyomuliro, eyo khuchia okhubayo okhuuba echimbuungu nende okhusia ameno.
\v 43 Ne ao abalungifu bachia okhwakha kori eliuba mubwami bwa sabwe. Oli nende marwi kabulira abulire.
\p
\v 44 Khandi obwami bwomwikulu buli nga imbikhiro eyakiswa mumukunda eya omuundu yanyoola nayikisa, ne khulwo busangaafu khulwayo yachia nakusia bioosi ebiyali nabio, mani nakula indalo eyo.
\p
\v 45 Khandi obwami bwo mwikulu buli nga omuundu weingaanga okoonya echilulu echindayi.
\v 46 "Owa, niyakhanyoola ilulu ndala eyobukusi bukhoongo, yachia nakusia bioosi ebiyali nabio ".
\p
\v 47 "Khandi obwami bwo mwikulu buli nga olwero olwasukunwa munyaanja, nilubuusia echindi buli ingeri.
\v 48 Olwa lwali nilwichule, balukhwesa khulukuku; nibekhala asi, mani nibabusia ebialimo ebilayi nibabira mubisero, arali ebiibi nibabisukuna."
\v 49 Nilwo nga olwa kakhabe mubumalirikhi bwesialo. Abamalaika bakheeche, nibakabula abonooni okhurula mubalungilfu.
\v 50 "Nibachia obasukuna mutanuru yomuliro, eyo khuchia okhuuba chimbuungu nende okhusia ameno."
\p
\v 51 Yeso nababolera ari "mumanyirisia ebiindu bino bioosi? "nibamuboolera bari "kario omwami".
\p
\v 52 Mani nababoolera mbwe, khulwesio buli omwandiiki owekesibwe khu komubwami bwo mwikuli ali nga omuundu mwene inyuumba orusia erwanyi ebiindu biyakha nende bikofu ebiomumbikhiro yaye."
\p
\v 53 Ne olwa Yeso yamala okhubola echingaado chino, yabwao.
\v 54 Ne olwayola musialo saiye, yabekesia musinagogi yabwe nibaukisibwa nibabola bari," omuundu uno yarusia ena amakesi kano, nende ebikhole bikhongo bino?
\v 55 "Uno sinomwana womubachi we chimbao? ng'ina sialangwa Maria? ne abaana babwe si ni Yakobo, nende Yosesi, Simoni nende Yuda?
\v 56 " Na bakahana babwe, sibali boosi alala nafwe? Bulano omuundu uno arusia ena biindu bino bioosi?
\p
\v 57 Mani nibamusinyikhira. Arali Yeso nababolera ari, "omunabii khaba siali noluyaali, arali musialo siaye, nende munyuumba mwaye mwene".
\v 58 Bulano siyakhola emirimo mikhongo mingi ebweneyo khulwo burasubira bwabwe.
\c 14
\cl Omuliango 14
\p
\v 1 Muchinyaanga echio omuruki Herode yabulira akeyifuma ya Yeso.
\v 2 Nababoolera abakholi baye ari, "uno ni Yohana omubatisia; abukhire mubafu, khukario amaani kano kakhola emirimo muniye."
\p
\v 3 Okhuba Herode yali nadirire Yokhana namuboyere, namusukene mumboye, khulwa Herodia, omukhasi wa Filipo omusiani wabwe.
\v 4 Okhuba Yokhana yali namuboolere ari, sibifikirirwa khwewe okhudekhia".
\v 5 Ne kata niyali yenyere okhumwira, yaria omukaanda khubeera bamubala nga omunabii.
\p
\v 6 Arali musiserero sio khwibulwa esia Herode, omukhana wa Herodia yakhina imberi wabwe, namusangasia Herode.
\v 7 Namulaka mukhwechuba okhumuberesia siosi siosi esiyakhasbire.
\v 8 Naye olwayali nakerakwe nende ng'ina, naboola ari, "mberesie ano omurwe kwa Yokhana omubatisia khuluderu".
\v 9 Ne omuruki naberera; kata khukario khulwa okhwechuba nende khulwa balia abali nibekhale naye, nalagira mbwe bamuberesie.
\v 10 Mani narumanisia okhukhengwa Yokhana omurwe mumboye.
\v 11 Ne omurwe kwaye nikurerwa khuluderu nikuberesibwa omukhana, naye nakuirira ng'ina.
\v 12 Mani abeka nibeecha nibabukula omubiri, nibakusiikha, manu nibachia nibaboolera Yeso.
\v 13 Yeso nga olwayabulira ako yarula ao muliaro nachia abuundu owa baandu babula yeng'ene. Ne olwa abaandu babulira, bamulonda khumakulu okhurula mumadookho.
\v 14 Ne Yeso nachia imberi nalola omukaanda omukhoongo: mani nabaloolera esisa naonia abalwaye babwe.
\p
\v 15 Ne olwabiola ingolobe, abeka baye bamwichira, nibaboola bari, abundu ano nolumira khandi ebikha bichire, ruma omukaanda kubweo, bachie muchingoongo, bekulire ebiakhulia."
\p
\v 16 Arali Yeso yababoolera ari, sibienyekhana babweo; eng'we mubaberesie ebiokhulia."
\p
\v 17 Nabo nibamuboloera bari," khuli sa ano nende emigaati kirano nende eching'eeni chibiri".
\p
\v 18 Naboola ari, "mubinderere ano."
\v 19 Ne nalagira omukaanda khwikhala asi mubunyasi, ne nabukula emigaati kiraano nende eching'eeni chibiri nalingeera akulu mwikulu nabiberesia echikhabi nisonyola naberesia abeeka baye emigaati; nibaberesia obo mukaanda.
\v 20 Manu bosi nibalia nibekura; nibabusia ebikusu biadong'a ebikono ekhumi nende bibiri ebichuule.
\v 21 Ne abo abali nibaliire bali ambi abasaacha echilifu chiraano norusiakho abakhasi nende abaana.
\p
\v 22 Ne abweneao Yeso naboolera abeeka baye okhwngira muliaro, bachie imberi waye, ingerekha naye nabasebula emikaanda khubwao.
\v 23 Ne olwayali namalire okhusebula emikaanda yachia akulu mulugulu yeng'ane okhulama, ne olwa ingolobe yola yaliyo yeng'ane.
\v 24 Arali obwaro bwali bulano akari we inyaanja, nibuyuywa nende amafinda; okhuba omuyaka kwali omuungi.
\v 25 Ne mundiriro ya khune eye siro Yeso yabachira nakeenda khunyaanja.
\v 26 Ne olwa beeka bamulola nakeendanga akulu khunyaanja babeyabeya, nibaboola, "nesikhieno"! nibalira khulwa oburi.
\v 27 Arali abwenao Yeso nabalomalomera, naboola ari, "mweberesie omwoyo; neesie: muraria;"
\p
\v 28 Petero namukalusia naboola ari, "Omwami, nibiri mbwe newe, nange njiche ao oli khumaachi."
\p
\v 29 Naye Yeso naboola ari, "icha". Ne Petero olwayekha asi khurula mubwaro, yakeenda khumaachi, nachia khu Yeso.
\v 30 Arali ngolwa yalola omuyaka muungi, yaba omuri; nachaaka okhwibira niyayula, naboola ari, Omwami njabine!
\p
\v 31 Ne mubwangu Yeso nakolola omukhono kwaye, namudira, namuboolera ari, ewe owobusubiri budidi, mbwe sina okanakana?"
\v 32 Ne olwa bengira mubwaro omuyaka nikwakama.
\p
\v 33 Mani abo abali mubwaro beecha nibamwinamira, nibaboola bari, "obwadieri ewe oli omwana wa Nasaye."
\p
\v 34 Ne olwabali nibambuukhe bola musialo esia Abagerasi.
\v 35 Ne olwa baandu ba abuundu ao bamumanyirisia, nibarumanisia mubialo ebio bioosi ebibodokhana ao, nibamurera abalwaye boosi.
\p
\v 36 Ne nibamusaba mbwe banyoole sa odiira khulikemo lia ingubo yaye; ne abaangi abamudirakho balamusibwa ebilayi.
\c 15
\cl Omuliango 15
\p
\v 1 Manu nibamwichira Yeso abandiiki nende Abafarisayo abali Yerusalemu nibaboola bari,
\v 2 Khulwasina abeeka bao nibakhaya amekesio ka abakhulundu? okhuba sibesaaba amakhono nibalia omugati.
\p
\v 3 Arali yakalusia nababoloora ari khulwasina eng'we mwesi mukhayanga elako lia Nasaye khulwa amekesio keng'we?
\v 4 Okhuba Nasaye yalaka naboola ari, beresianga so nende mawo oluyali; ni oyo olomaloma amabi khu simwana kose ng'ina lekha afwe elifwa.
\p
\v 5 Arali           mboola mbwe, yesi ochia oboolera simwana kose ng'ina mbwe, ni esianwa esiewe onyala onyola nga obukhala khwesie;
\v 6 Ne saberesia simwana kose ng'ina oluyali, achia oba omulekhule khwesio eng'we mwakhola elako lia Nasaye oba elibula amani khulwa amekesio ken'gwe.
\v 7 Eng'we abekaadi, kali nga Isaya yarusia obunabii khweng'we naboola ari,
\v 8 abaandu bano basuda ambi nange nende minwa kiabwe, ni bamba oluyali khubinwa biabwe; arali emioyo kiabwe kiri ale nange.
\v 9 Arali bakhola ebikhaya okhunyinamira ni bekesia amekesio akali amalako kabaandu.
\p
\v 10 Ne nalanga omukanda nakuboolera ari, bulira ne mumanyirisie.
\v 11 Si nisiria esichia mumunwa esionoonianga omuundu arali siria esirula mumunwa nisio esionoonianga omuundu.
\p
\v 12 Manu abeeka baye nibeecha nibamuboolera bari omanyire mbwe Abafarisayo basinyikhe olwababulire inomanoma yino?'
\v 13 Arali nakalusia naboola ari, 'buli sirake, esia Baba womwikulu araraka sichia okhwiyakwa.
\v 14 Mubalekhe bong'ene; babe abaoofu bemirisi ba abaoofu, ni omwofu niyemira omwofu boosi bachia okwa mulina."
\p
\v 15 Manu Petero nakalusia namuboolera ari, 'Rubolererkho ako lukado luno."
\p
\v 16 Ne Yeso naboola ari, Eng'we mwesi mubula obumanyirisi?
\v 17 Eng'we khasi mumanyirisia mbwe siosi siosi esingira mukari khumunwa sichia munda, ni sirusibwa erwanyi muchoo?
\v 18 Arali ebiindu biria ebirula mumunwa birulira mumwoyo; ne bionoonia omuundu.
\v 19 Okhuba okhurula mumwoyo karula amaparo mabi obwiri, obuirani, obwifi, obuloli bwa bubacha, amanyeko.
\v 20 Bino nibio ebiindu ebionoonia omuundu; arali okhulia oburesaaba makhono sibioonia omuundu dawe.
\p
\v 21 Mani Yeso narulao nachia khu nyanja ya Tira nende Sidoni.
\v 22 Ne nalola omukhasi mukanani narula khumbeka chia inyanja eyo, ne namulirira naboola ari, mbere sisa omwami ewe omwana wa Daudi, omukhana wange asandisibwa lukali nende sikhieno.
\p
\v 23 Naaye naramukalusia elikhuwa liosi. Ne abeka baye nibeecha nibamusaba nibaboola bari, murume abweo; okhuba arulirirakho.
\p
\v 24 Naye nakalusia naboola ari, sindaruma arali khumakondi kakora aka inyumba ya Isiraeli.
\p
\v 25 Manu niyeecha namwinamira, naboola ari, omwami khonye.
\p
\v 26 Arali nakalusia naboola ari sinebilayi okhubukula omugati kwa baana, mani otupire chibwa.
\p
\v 27 Naye naboola ari, obwadieri omwami, echimbwa chilichanga ebikusu bikwa okhurula khumesa ya omuruki wachio.
\p
\v 28 Manu Yeso nakalusia namuboolera ari, ewe omukhasi obusubiri bwao nobukhongo; kabe khwewe nga olwa odakhire. Ne omukhana waye nakholwa omulamu okhurula ebikha ebio.
\p
\v 29 Ne Yeso narulao, niyeecha ambi nende inyanja ya Glilaya; naniina khulugulu niyekhala asi ebweneyo.
\v 30 Ne omukanda mukhongo nikumwichira, nibali alala nende balia abali abalema, aboofu, ababungafu, nende abaandu baangi nibabara asi mumakulu kaye nabaonia.
\v 31 Omukanda kwaukisibwa, olwakwalola ababungafu nibalomaloma, abalema nibakenda, abakwa makara nibabukha nende abaoofu nibalola; nibaberesia Nasaye wa Isiraeli oluyali.
\p
\v 32 Mani Yeso nabalanga abeeka baye, naboola ari, ndolere esisa omukanda okhubera bachiririre nange bulano, enyanga chidaru ni babula esiabalia; ne sindakhabasebula babweo nibasiiba barecha bakwa olumbuchu khungira.
\p
\v 33 Ne abeka baye nibamuboolera bari, "wakhanyola ena emigati mingi mulumira, ekilisia omukanda mokhongo nga kuno?"
\v 34 Ne Yeso nababoolera ari, "muli nende emigati kiinga? nibaboola bari saba nende ebing'eni bididi"
\p
\v 35 Mani Yeso nalagira omukanda okhwikhala asi khuloba.
\v 36 Ne nabukula emigati saba nende ching'eni niyebasia, mani nakidonyola naberesia abeka baye, nabeka baye nibaberesia omukanda.
\v 37 Mani boosi nibabilia nibekura; nibabusia ebikusu bie biakhulia ebiali nibodong'ere ebikono saba nibichule.
\v 38 Ne balia abalia bali abasacha chilifu chine, norabalire abakhasi nende abaana.
\p
\v 39 Mani Yeso nasebula omukanda, mani niyengira muliaro, nachia mumbeka chia Magadani.
\c 16
\cl Omuliango 16
\p
\v 1 Abafarisaayo boosi alala nende Abasadukayo beecha, nibamuteema nibamusaba mbwe abekesiekho esilolero okhurula mwikulu.
\p
\v 2 Naye nakalusia nababoolera ari, nibili ingolobe, muboola mbwe, esialo siyenjerere: khuba elikulu liakhanye,
\v 3 Ne ichuli muri inaba eyolukeka lero; okhuba elikulu liri liakhanyu khandi lirisia. 'Eng'we abekaadi! mumanyirisie okhulabula ifwani yelikulu, arali simunyala okhulabula ebilolero bie bikha.
\v 4 "Olwibulo olumaanu khandi olucheke lukoonya esilolero: ne sibulao esilolero esialunaberesebwa arali esilolera esia omunabii Yona." nabalekha, nabwao.
\p
\v 5 Ne olwa abeeka baye beecha ingerekha bali nibebirire obukula emigaati.
\v 6 Mani Yeso nababoolera ari, "mwekenderesie nimuba meeso khulwa lmera eya Abafairisaayo nende Abasadukayo."
\p
\v 7 Nibarebana abeene khubene, nibaboola bari, 'khulwokhuba sikhubukule emigaati'.
\p
\v 8 Arali Yeso namanyirisia yababoolera ari, eng'we abobusubiri budiidi, khusina murebana abeene, mbwe khulwokhuba simurerere emigaati?
\v 9 Eng'we khasi mumanyirisia kata okhwichulisia emigaati kiraano ekia baandu echilifu chiraano, nende ebikono binga ebiamwabusia?
\v 10 "Kata emigaati saba ekia abaandu echilfu chine, nende ebikono bikhoongo ebiamwabuusia?
\v 11 Kakhaba karie mbwe eng'we simumanyirisia mbwe sindalomloma nang'we olondana nende migaati, arali mbwe mwekenderesie khulwa emera eya Abafarisayo nende Abasadukayo."
\v 12 Mani nibamanyirisia mbwe siyababoolera okhuba meeso nende elimera liomugaati arali amekesio kabafarisayo nende abasadukayo.
\p
\v 13 Olwa Yeso yeecha mumbeka chia Kaisaria Filipi nareeba abeeka baye, naboola ari, "abaandu baboolaanga mbwe Omwana womuundu ni wina?"
\p
\v 14 Nabo nibaboola bari, abaandi baboola mbwe oli Yokhana omubatisia; abaandi bari Eliya, ne baandi Yeremia, kose mulala khu banabii.'
\p
\v 15 Naye nababoolera ari, "Nang'we mubolaanga mbwe ndi wina?"
\p
\v 16 Simoni Petero nakalusia naboola ari, 'Ewe newe Kirisito Omwana wa Nasaye oli mulamu.'
\p
\v 17 Yeso nakalusia namuboolera ari, oli oweikhabi ewe Simoni wa Yona; okhuba omubiri nende amabaanga, khasi biakhufunulira kano arali Sefwe oli mwikulu.
\v 18 Ne siesi khuboolera mbwe, ewe oli Petero, ni khulwanda luno njia khumbakha likanisa liange, ne emiliango kia emagoombe sikinayikhira.
\v 19 "Ne njia okhuberesia echifunguo echia obwami bwomwikulu, ne siosi esia ochia obooya khusialo sichia oboywa mwikulu, ne siosi esia ochia obolola khusialo sichia obololwa mwikulu.
\v 20 Mani nabakania abeeka baye mbwe baraboolerakho omuundu mbwe ye niye Yeso Kirisito.
\p
\v 21 Okhurula ebikha ebio okhuchiririra Yeso yachaaka okhwekesia abeeka baye, mbwe akwanirwa okhuchia Yerusalemu, mani asandisibwe khu biindu biingi khubakhulundu nende abakukhani bakhoongo nende abandiiki nende okhwirwa, mani alamusibwe inyaanga ya khadaru.
\v 22 Mani Petero namubukula nachia namukania naboola ari, "kabe ale nawe Omwami; kano sikachia okhubao;"
\p
\v 23 Arali Yeso yakalukhana naboolera Petero ari, chia inyuma wange ewe sikhieno; ewe oli esiuku khwesie; okhuba ewe sodeeba ebiindu ebia Nasaye, arali ebiindu ebia abaandu.
\p
\v 24 Mani Yeso naboolera abeeka baye ari, omuundu yeesi owekoomba okhwicha khwesie yekaane ye omwene mani abukule omusalaba kwaye anoonde.
\v 25 "Okhuba yeesi yeesi ochia owonia obulamu bwaye achia obukosia; ne yeesi yeesi ochia okosia obulamu bwaye khulwange achia okhubunyoola.
\v 26 Okhuba nibieingaanga sina khu muundu okhunyoola esialo siosi ne akosie omwoyo kwaye? kose nisina esiomuundu yakhaberesiania okhukulasania khulwa omwoyo kwaye?
\v 27 Okhuba omwana womuundu yakheche muluyaali lwasamwana nende abamalaika baye; ne awo yakhaberesie buli muundu olondana nende emirimo kiaye.
\v 28 Obwadieri mbaboolera, baliwo abaandu bandi abemere ano abarachia okhulolakho eliifwa, okhuula olwabachia olola omwana womuundu niyeecha mubwami bwaye.
\c 17
\cl Omuliango 17
\p
\v 1 Ne olunyuma lwechinyaanga chisasaba Yeso yabukula Petero, Yokobo nende Yokhana omusiani wabwe, nabemirira okhuchia akulu mulugulu luraambi bong'ane.
\v 2 Naye nakalukhanisibwa imberi wabwe; ne obweni bwaye nibwadukha nga eliuba, ne chingubo chiaye chiali echindafu kori obulafu,
\v 3 Ne lola, Musa nende Eliya nibabalolekhera nibalomaloma ninaye.
\v 4 Mani Petero nakalusia naboolera Yeso ari, 'Omwami nibelayi efwe okhuba ano; nikakhaba mbwe wenya, lekha khukaasie amayema kadaru, elala eliao, ne elala elia Musa, ne elala elia Eliya".
\p
\v 5 Olwayali nasialomalomanga, lola elilesi lilafu lukali nilibafunikha, ne lola idoboosi khurula mulilesi niyiboola iri, "Uno niye Omwana wange mukheerwa, owasangasibwa muniye; mumubulire"
\v 6 Ne olwa abeeka babulira ako, bakwa asi khubweni bwabwe nibaria muno.
\p
\v 7 Yeso niyeecha nabadirakho naboola ari, "mubuukhe muraba abari."
\v 8 Ne ngolwa bakingula akulu echimoni chiabwe, khasi balola omuundu yeesi, arali Yeso yeng'ene.
\p
\v 9 Ne olwabali nibeekha asi khurula khulugulu, Yeso yabakania nababolera ari murabolerakho omuundu yeesi amalolo okhuula olwa Omwana womuundu achia khubuukha khurula mubafu."
\p
\v 10 Ne abeeki baye nibamureeba nibaboola bari, khulwasina abandiiki babolaanga bari bill mbwe okhuula Eliya yeeche mberi?"
\p
\v 11 Ne Yeso nakalusia nababolera ari, "nobwadieri Eliya achia khurangirira okhwicha, ne achia okhukalusia ebiindu bioosi.
\v 12 Arali mbabolera mbwe Eliya yamala okhwicha, nabo sibamumanya, arali bamukholera koosi akabeenya. Nilwo olwakachia okhuba Omwana womuundu achia okhusandisibwa mumakhono kabwe.
\v 13 Mani abeeki nibamanyirisia mbwe yabalomalomera khulondana nende Yokhana omubatisia.
\p
\v 14 Ne ngolwa boola khumukaanda omuundu yamwichira, namusigamira, naboola ari,
\v 15 "Omwami lolere sisa Omwana wange okhuba niweindulume, khandi achunisibwa lukali; okhuba ebikha bindi akwichaanga mumuliro, ne ebikha biindi mumaachi.
\v 16 " Ne ndamurera khubeeki bao, arali sibanyala okhumuonia."
\p
\v 17 Mani Yeso nakalusia naboola ari, "eng'we abo lwibulo lurasubira khandi olwakhayukha, njia okhuba nang'we okhuula liina? Njia okhubesimirisiria okhuula lina? mumunderere ano."
\v 18 Ne Yeso niyalabira esikhieno; nisimurulamo; ne omwana naona khuchaaka ebikha ebio.
\p
\v 19 Lunyuma abeeki bachiira Yeso mubwekisi, nibaboola bari, khulwasina efwe sikhwanyala okhusirusia erwanyi?"
\p
\v 20 Ne Yeso nababolera ari, okhubeera oburasuubira bweng'we; mbabolera obwadier mbwe, nimuba nende obusubiri kori imoni yolule, muchia khubolera olugulu luno mbwe, 'rula ano ochie olwande lula; niluchia okhuchia; nisibulao esiranyalikhana.
\v 21 Kata kario ebifwana biri khasi birula arali khulwa okhusaaya nende okhusiiba.
\p
\v 22 Ne olwabali nibamenyere Galilaya Yeso nababolera ari, Omwana womuundu achia okhobwa mumakhono kabaandu,
\v 23 Ne bachia okhumwira, ne inyaanga ya khadaru achia okulamusibwa khandi." Nabo nibaba nende esibeera singi lukali.
\p
\v 24 Ne ngolwa boola Kaperenaumu, abaandu babusiangaanga omusolo kwe ikhekalu beecha khu Petero, nibaboola bari, omwekesia wao khasi arungaanga omusolo dawe?"
\v 25 Naboola ari, "Eee". Ne olwayengira munyuumba, Yeso yamukania namubolera ari, oparaanga sina Simoni? Abami abokhusialo babukulaanga omuruungo kose omusolo okhurula khuwina? Okhurula khubaana babwe, kose khubakeni?"
\p
\v 26 Petero namukalusia ari, khubakeni, "Yeso naye namubolera ari, khulwesio abaana nabalekhule.
\v 27 Ne khulwo khuba mbwe, khurabasinyisia, chia munyaanja ne osukune elobo, orusia ing'eeni eyirangirira okhwicha akulu, ne niwakhamala okhwikula omunwa kwayo, ochia onyoola isende; bukula obaberesia khulwange ninawe.
\c 18
\cl Omuliango 18
\p
\v 1 Mubikha ebio abeeka nibeecha khu Yeso, nibabola bari, "Niwina omukhoongo mubwami bwomikulu?"
\p
\v 2 Ne Yeso nalaanga omwana omudidi khuye, namwikhasia akari wabwe,
\v 3 ne naboola, "Mbabolera obwadieri mbwe, nimurakalukhana, mwaba nga abaana badidi, simuchia okhwingira mubwami bwomwikulu.
\v 4 Khulwesio ulia yeesi ochia okhweduduyia omwene kori omwana mudidi, oyo niye omukhoongo mubwami bwomwikulu.
\v 5 Ne yeesi ochia okhwingisia mulala khubaana badidi kori uno muliira liange anyingisia esie.
\p
\v 6 Arali ulia ochia okhola mulala khubadidi bano abasubira mwesie, okhwonona biakhabere ebilayi khuye mbwe elikina liakhaboyerwe mukosi mwaye, mani yebisibwe mulusiba lwe inyaanja.
\v 7 " Uuwi khusialo okhubeera ebisikirasio; okhuba ebisikirasio bikhoyera okhwicha; arali uuwi khumuundu oyo owebisikirasio bichirakho.
\v 8 "Khulwesio omukhono kwao kose okhukulu khwao nibikhukhola okhukhola echimbi, bikhengeyo mani obisukune bikhurulekho; nebilayi khwewe okhwingira mubulamu noli omulema mukhalake, okhira obe nende amakhono kabiri kose amakulu kabiri nofubwa mumuliro okuralibwayo.
\v 9 Ne imoni yao niikeera okhole imbi irusieyo yikhurulekho, nebilayi khuwewe okhwingira mubulamu nende imoni ndala, okhukhira obe nende chimoni chibiri nosukunwa mumuliro okuralibwayo.
\p
\v 10 Mwekenderesie mbwe muralekeresiakho kata mulala khubadidi bano okhuba mubolera mbwe, mwikulu abamalaika babwe bamenya nibalingeera obweni bwa baba wange oli mwikulu.
\v 11 Okhuba Omwana womuundu yecha okhuwonia silia esiali siakora.
\v 12 Mupaara murie eng'we? omuundu naba nende amakoondi imia, nelala likora, khasi alekha amakoondi amakhumi tisa nende tisa, nachia mulugulu mani akonye liria elikorere elala?
\v 13 Ne olwaba nalinyolere, mbabolera obwadieri mbwe asangalira lukali elikoondi elio, okhira kalia amakhumi tisa nende tisa akarakorere.
\v 14 Kata kario sinokhwenya khwa seng'we oli mwikulu, mbwe mulala khubadidi bano akore.
\p
\v 15 Khumedakho nikaba mbwe omusiani weng'we akhwononera, chia omubolere amabi kaye akari weng'we nali yengane; nikaba mbwe akhubulira omunyoolere omusiani wengwe.
\v 16 Ne narakhubulira bukula mulala kose abandi babiri abakhukhira mbwe mumunwa kwa abaloli babiri kose badaru buli elikhuwa linyoole okhumanyikhana.
\v 17 Ne nibili mbwe achia okhaya okhubabulira, bolera elikanisa; arali nakhaya okhubulira elikanisa; lekha abe khweng'we kori orasubira kose omunasialo.
\v 18 Mbabolera obwadieri mbwe, siosi esiamuchia okhuboya khusialo sichia okhuobywa kata mwikulu; ne siosi esiamuchia obolola musialo sichia okhubololwa mwikulu.
\v 19 Khandi mbabolera mbwe, babiri khwengwe nibachia ofukirisania khusialo okhulondana nende esiindu siosi esiabachia okhusaba, bachia okhukholerwa nende baba wange oli mwikulu.
\v 20 Okhuba owa babiri kose badaru bakhung'ana alala muliira liange, abwene ao ndi akari wabwe.
\p
\v 21 Mani Petero namwichira naboola ari, Omwami, omusiani wefwe akhoyere okhukholera amabi amakhabi kanga nimulekheraanga? okhuula amakhabi saba?"
\p
\v 22 Yeso namumbolera ari, sikhubolera mbwe, okhuula amakhabi saba, arali okhuula amakhabi makhumi saba mara saba.
\v 23 Khulwesio obwami bwo mwikulu bufwananisibwa nende omuruki undi owabukula obubali obwa abakholi baye.
\v 24 Ne olwabachaaka okhubala, mulala yarerwa khuniye, owali nende elikobi liaye elia echitalaanta echilifu ekhumi.
\v 25 Arali okhubeera siyali nanyalirwa okhuruunga, omwami waye yalagira mbwe akusibwe, nende omukhasi waye, nende abaana baye nende bioosi ebiayali nabio, mani elikobi liruungwe.
\v 26 Khulwesio omukholi nakwa asi, namwinamira naboola ari, Omwami ndesimirisirie njia okhuruunga bioosi.
\v 27 Mani Omwami womukholi oyo nadiirwa nende esisa, namulekhuula, namulekhera elikobi.
\v 28 Arali omukholi mwene oyo yarula erwanyi, nanyoola omulala khu bakholi basie, owali nende elikobi liaye, echidinari emia ndala: namudiira mamiro naboola ari, nduung'e biria ebiawandeyola.
\p
\v 29 Ne omukholi wasie namukwa mumakulu, namusaba naboola ari, ndesimirisirie njia okhuruunga bioosi.
\v 30 Naye siyafukirira; arali yachia namusukuna mumboyero okhuula olwa yaruunga elikobi.
\v 31 Kario olwa bakholi basie balola esiali nisiekholekhe belalikhira lukali nibeecha nibabolera Omwami wabwe koosi akekholekha.
\p
\v 32 Mani Omwami waye, namalire okhumulaanga, yamubolera ari, ewe omukholi mumaanu ndakhulekhera elikobi lilia lioosi, okhubeera ewe wandekweeda.
\v 33 Ewe wesi siwakhamulolerekho esisa omukholi wasio, ngolwa siesi ndakhulolera esisa?'
\v 34 Ne omwami waye naluluma, namuberesania abakhaniakhani okhuula olwa yakharuunge bioosi ebiayali nabanjwa.
\v 35 Kario nilwo olwa achia okhola Sefwe oli mwikulu, khweng'we, nikaba mbwe okhurula mumioyo kieng'we simulekhera buli mulala omusiani wabwe ebionono biaye.
\c 19
\cl Omuliango 19
\p
\v 1 Ne olunyuma Yeso namalire okhuboola amakhuwa kano, yarula Ebugalilaya niyeecha echimbeka echia Buyaudi ingerekha wa Yorodani.
\v 2 Ne emikaanda emikhoongo nikimuloonda, naye nabaonia ebwene eyo.
\p
\v 3 Abafarisayo boosi nibamwichakho, nibamuteema, nibamureeba bari, nelilako khu musaacha okhumulekha omukhasi waye khulwa esifunane siosi siosi?
\p
\v 4 Naye nakalusia nababolera ari, simwasomakho, mbwe ulia owabalonga mukhuchaaka yabaloonga omusaacha nende omukhasi.
\v 5 Naboola ari, khulwesio omuundu achia obalekha samwana nende ng'ina, ne achia okhwambaana nende omukhasi waye; ne babiri bachia oba omubiri mulala.
\v 6 Khulwesio khasibali babiri arali omubiri mulala, khulwako esia Nasaye yambaniisie alala omuundu yeesi arakabukhania."
\p
\v 7 Nabo nibamubolera bari, "khulwasina Musa bulano yalagira okhuberesania obwandike obwokhulekhana, nende okhumwerusiakho?"
\p
\v 8 Naye nababolera ari, Musa khulwokhubera obwomu bwemioyo kieng'we yabafukirira eng'we okhulekhana nende abakhasi beng'we; arali okhurula mukhuchaka sikali kario.
\v 9 Nimbabolera mbwe, ulia yeesi ochia olekhana nende omukhasi waye, oburali khulwobuyirani, mani adeekhie oundi, akhola obwirani; ne ulia yeesi odeekhia oyo olekherwe yeesi akhola obuyirani.
\p
\v 10 Abeeka baye nibamubolera bari, "Nikaba mbwe omusaango kwomuundu imberi womuundu nende omukhasi waye kuli kurio sibikhoyera okhudekhia."
\p
\v 11 Arali ye nababolera ari, abaandu boosi sibabukula olukaado luno, arali balia ababeresibwe.
\v 12 Okhuba baliwo abachiri abebulwa bario okhurula munda mwa bang'inabwe; ni baliwo abachiri, balia abaladwa nende abaandu; ne babao abachiri, balia abachiri khulwobwami bwomwikulu. Oyo onyala okhufukirira ako, akafukirire."
\p
\v 13 Mani nibamurerera abaana badiidi mbwe abarekho omukhono mani abalaamire, ne abeeka nibabalabira.
\v 14 Arali Yeso naboola ari, mufukirire abaana badiidi, murabakaira, okhwicha khwesie; okhuba obwami bwomwikulu bufwananà burio.
\v 15 Mani nabarakho amakhono kaye, nabwao.
\p
\v 16 Ne lola omulala namwichira namuboolera ari, omwekesia omulayi, siindu sina esilayi esianyala okhukhola, mbwe nyale onyoola obulamu buralibwayo?
\p
\v 17 Naye namuboolera ari, khulwasina onaanga esie omulayi? Abulao omulayi arali omulala oli Nasaye; ne nibiri mbwe wenya okhwingira mubulamu, diira amalako.
\p
\v 18 Naye namubolera ari, akali ena?" Yeso naboola ari, ewe oreranga da, orakholanga obwirani da, orebaanga da, orabachikhiranga da.
\v 19 Oriichenge soo nende mao; khandi kheera omumenyeranwa wao nga ewe mwene."
\p
\v 20 Omuundu muraaga namubolera ari, 'Ebiindu bioosi ndadiira okhurula muluraaga lwange; nisina esia siri mbula?"
\p
\v 21 Yeso namuboolera ari, nibiri mbwe wenya obe omulungifu chia okusie biria bioosi ebioli nabio mani oberesanie abamanani, ne ewe ochia okhuba nende ibikhiro mwikulu, mani wiiche onoonde."
\v 22 Arali muraaga olwayabulira elikhuwa elio yabwao nasinyikhe, okhuba yali nende emiandu mingi muno.
\p
\v 23 Mani Yeso naboolera abeek baye ari, "mbabolera obwadieri mbwe biabe ebidinyu omuyinda okhwingira mubwami bwomwikulu.
\v 24 Khandi mbabolera mbwe, ne biangu ingamina okhubirira mumulu kweisindani, okhukhira omuyiinda okhwingira mubwani bwa Nasaye."
\p
\v 25 Olwa beeka baye babulira elio, baukisibwa lukali, nibaboola bari, "Bulanu niwina onyala okhuwonisibwa?"
\p
\v 26 Arali Yeso yabalingeera nababoolera ari, "Khu muundu kano sikanyalikhana; arali khu Nasaye ebiindu biosi binyalikhana."
\p
\v 27 Naye Petero nakalusia namubolera ari, "Lingeera khulekhere bioosi, nikhukhuloonda ewe, nisina esiakhuchia okhunyola?"
\p
\v 28 Naye Yeso nababolera ari,"mbabolera obwadiera mbwe, eng'we abanoondere esie, musialo siicha olwa omwana wo mundu achia okhwikhala khusisaala sioburuki bwoluyali lwaye, eng'we mwesi muchia okhwikhala khubisaala bio buruki ekhumi nende bibiri nimukhalakira echimbia ekhumi nende chibiri echia Isiraili.
\v 29 Ne buli mulala ulia owalekha chinyuimba, kose abasiani babwe, kose abakhana babwe, kose samwana, kose ng'ina, kose omukhasi waye, kose abaana baye, kata obulimo bwaye, khulwa eliira liange, achia okhunyoola obukhumi imia ne khandi achia okhulamirwa obulamu oburalibwayo.
\p
\v 30 Arali bangi abeimberi bachia okhumalirikha; ne abamalirikha bachia okhuba imberi.
\c 20
\cl Omuliango 20
\p
\v 1 Okhuba obwami bwomwikulu buli nga omuundu omwenengo, owarula ichuli mumabwibwi okhwandiika abakholi mundalo yaye yemisabibu.
\v 2 Ne olwayali nafukirisanie nende abakholi, khunyaanga idinari, yabaruma mundalo yaye yemisabibu.
\v 3 Mani narula khusaa yakhadaru, ne nalola abandi nibemere nibarakhola siosi.
\v 4 Ne nababoolera ari, eng'ewe mwesi muchie mundalo yemisabibu, ne ndababeresia esimukhoyera. Nibabwao nibachia.
\v 5 Khandi narula khusaa yakhasasaba nende eya tisa, ne nakhola ario.
\v 6 Khandi khusaa yekhumi nende ndala yarula, nachia nanyoola abandi nibemere, nibarakhola esiindu ne nababooolera ari, khulwasina eng'we mwemere ano nimurakhola siosi inyaanga yoosi?
\p
\v 7 " Nabo nibamubolera bari, okhuba abulao omuundu orwandikire. Naye nababolera ari, eng'we mwesi muchie mundalo yemisabibu, ne siosi esimukhoyera nisio esiamunanyoola.
\p
\v 8 Olwabiola ingoloobe omwami weindalo yemisabibu, nabolera omwemereri waye ari, laanga abakholi obaberesie omuruungo kwabwe, okhuchaaka khuwamalirikha okhula khu warangirira.
\v 9 " Nw olwa beecha balia abali nibaandikirwe khusaa ya ekhumi nende ndala, banyoola buli muundu idinari.
\v 10 Arali abamberi olwabeecha bapaara mbwe bananyolakho okhira ao, nabo boosi nibanyoola sa buli muundu idinari ndala.
\v 11 Ne olwa bamala onyoola, babuluulira omuundu mulayi omwenengo.
\p
\v 12 Nibaboola bari, 'Abamalirikhi bano ne ewebakhola sa isa ndala, ne ewe abakhola sa okhwakana nafwe, abakingire omukuku nende obubafu bwinyaanga.'
\p
\v 13 Arali nakalusia mulala khunibo naboola ari, omwicha, sikhukholere elibi lioosi dawe; khasi khufukirisanie khu idinari ndala?
\v 14 Bukula siria esiri esiao mani obweo. Ndaberesania omumalirikhi uno okhwakana as ninawe
\p
\v 15 Sinelilako esie okhola esianyenya nende ebiange mwene? Oli nende ikhiinda khubeera esie ndi mulayi?
\v 16 Kario omalirikha yakhabe oweimberi, ne oweimberi yakhamalirikhe." okhuba abangi balangwa, arali badiidi balobolwa.
\p
\v 17 Ne Yeso nachia Yerusalemu nabukula abeeka ekhumi na babiri, indulo weingira, nababoolera ari,
\v 18 " Lingeera khuchia Yersalemu, ne omwana womuundu achia okhukhobwa khubakhongo babakhukhani nende abandiiki, ne bachia omukhalakira okhufwa.
\v 19 Khandi bachia omura mumakhono kabanasialo khumubayirakho nibamukhuya, nende okhumubaamba. Ne inyaanga yokhudaru achia olamukha khandi."
\p
\v 20 Mani namwichira ng'ina wa abaana ba Sebedayo nende abasiani baye, nibamwinamira, nibamusaba esiindu nabulebe.
\v 21 Yeso naye namureeba ari nisina esiawenya? Naye namubolera ari, "Fukirira mbwe abasiani bange babiri bano bekhale mulala khumukhono kwao musaacha ne oundi omukhono kwao omukhasi mubwami bwao."
\p
\v 22 Arali Yeso nakalusia naboola ari, "Okororwe esioli okhusaba. Munyala eng'we okhung'wera esikoombe esianjia okhung'wa?" nende okhubatisibwa obubatisibwi obwa njia okhubatisibwa nabwo? nibamukalusia bari "khunyala".
\p
\v 23 Naye nababolera ari, nobwadieri muchia okhungwa khusikoombe siange nende obubatisibwi obwndabatisibwa nabwo; arali okhwikhala khumokhono kwange musaacha, kata omukhasi sinesie oberesania arali bichia oberesanibwa khwabo abakheerwa nende baba wange.
\p
\v 24 Ne olwa balia ekhumi babulira ako, badiirwa nende elirima khulwa abasiani babiri abo.
\v 25 Arali Yeso nabalaanga owayali, naboola ari, "Mumanyire mbwe oburuki obwa banasialo, babarukaanga nende amaani, ne khandi balia abali abakhoongo babaruka nende obunyala.
\v 26 Arali sikakhoyera okhuba kario khweng'we; arali oyo yeesi owenya okhuba omukhoongo mweng'we abe omurumwa weng'we,
\v 27 Ne ulia yeesi owenya okhuba omuruki mweng'we, abe omukholi weng'we,
\v 28 Kata kori Omwana womuundu yeecha okhurarumikhirwa, arali okhurumikha, nende okhuberesania obulamu bwaye bube omuruungo khulwa abangi.
\p
\v 29 Ne olwabali nibarula Yeriko omukaanda mukhoongo kwamuloonda.
\v 30 Ne lingeera abaandu babiri abaoofu nibekhale khundulo khweingira, olwa babulira mbwe Yeso abira ao bayula, nibaboola bari, "Rubeere esisa, Omwami, ewe Omwana wa Daudi.
\v 31 Nakwo omukaanda nikubalabira, nikubabolera mbwe babulere; arali bayula lukali, nibaboola bari, "Rubeere esisa Omwami, ewe Omwana wa Daudi"
\p
\v 32 Naye Yeso niyema tiiri nabalaanga, nabareeba ari, "Ni sina esiamwenya mbakholere?
\v 33 Nibamubolera bari "Omwami mbwe emoni chiefwe chinyale khulola."
\v 34 Yeso nabalolera esisa nadiira khu chimoni chiabwe; ne abwene ao echimoni chiabwe nichinyoola okhulola nibamuloonda.
\c 21
\cl Omuliango 21
\p
\v 1 Ne olwabali ambi okhuula Yerusalemu, nibolere Betifage, khulugulu lwa Miseituni, Yeso yaruma abeeka babiri,
\v 2 nababolera ari, muchie mulukoongo olurekekhane nang'we, ne abwene ao munanyoola isukhiri iboyerwe alala nende imoosi yayo. Bolole mani munderere.
\v 3 Naye omuundu yeesi nabareeba elikhuwa mumubolere muri Omwami ayienya, ne abwene ao anarumanisia.
\p
\v 4 Kano koosi kekholekha, mbwe kanyale okhulirira akabolwa nende omunabii naboola ari,
\v 5 " Bolera omukhana wa Sayuni mbwe, 'Lingeera omuruki wao akhwichira, omwedemberefu, niyekhale khusukhiri, nende omwana we isukhiri.
\p
\v 6 Ne abeeka nibachia, nibakhola nga olwa Yeso yabalagira.
\v 7 Nibarera isukhiri nende Omwana wayo, nibachialakho echingubo chiabwe, nibamwikhasiakho.
\v 8 Ne omukaanda mukhoongo nikwaala echingubo chiabwe khungira; abandi nibarema amasaga okhurula khumisaala, nibaklandaasia khungira.
\v 9 Ne omukaanda kwemira nende okwalondakho, kwayula nikuboola kuri," Khosana khu mwana wa Daudi! Noweikhabi oyo owicha muliira lio Mwami; Khosana akulu Mwikulu"
\p
\v 10 Naye Yeso olwayola Yerusalemu, elidookho lioosi nilibuukha, nibareeba bari, "Uno niwina?" V
\p
\v 11 Nakwo omukaanda nikuboola kuri, "Uno niye Yeso omunabii wa Nasareti eya Ebugalilaya".
\p
\v 12 Mani Yeso niyengira mukhekalu lia Nasaye, naberusia boosi abakusianga nende okhukula mukhekalu, nafumamia echimesa echia abakalukhasi be echisende, nende ebisaala bia abo abakusianga amakaburuku.
\v 13 Naye nababoolera ari, "Kaandikwa mbwe, 'Inyuumba yange ichia olang'wa inyuumba ya malaamo; arali eng'we muyikholere eliina lia abeebi"
\p
\v 14 Ne omuofu nende omulema nibamwichikho mukhekalu; naye nabaonia.
\p
\v 15 Ne olwa abakukhani bakhoongo nende abandiiki balola ebiamangalimwa ebiayakhola nibabulira abaana ni bayula mukhekalu nibaboola bari, "Hosaana khu mwana wa Daudi" basinyikha lukali.
\p
\v 16 "Ne bamuboolera bari, obuliraanga akabaana balia babolaanga?" Naye Yeso nababoolera ari, "eee! eng'we simwasomakho mbwe, okhurula muminwa kia abaana nende abanuuna ewe werereseria ifuma?"
\p
\v 17 Mani nabalekha nachia erwanyi mulidookho elia Betania; niyeyalisiayo.
\p
\v 18 Bulano ichuli nakalukha mudookho yali injala.
\v 19 Ne olwayalola omusaala kwe mikhuyu khungira, yakuchiakho, narakunyolakho esiindu siosi, arali amasafu kong'ene, nakuboolera ari, esiamo siosi sirakhwamakho ochaaka lero okhuchiririra obumeri" ne abwene ao omusaala okwo nikwoma.
\p
\v 20 Ne olwa beeka baloola ako, bauka nibabola bari, omusaala kwomere kurie lwangu?
\p
\v 21 Yeso nakalusia nababoolera ari, obwadieri mbaboolera mbwe, eng'we nimuba nende obusuubiri oburakanakana simuchia okhola kano kongane akekholekhe khumusaala kwomukhuyu, arali muchia obolera olugulu luno mbwe, yiyikha mani wesukune munyaanja, kachia okhwekholekha.
\v 22 Ne bioosi bioosi ebia muchia okhusaba mumalaamo, nimusubiriire muchia okhunyoola."
\p
\v 23 Naye olwayengira mukhekalu abakhukhani bakhoongo nende abakhulundu ba baandu bamwichira olwa yali niyekesianaga, nibaboola bari, "Ebiindu bino okhola khubunyala bwa wina? ne niwina owakhuba obunyala buno?"
\p
\v 24 Naye Yeso nakalusia nababoolera ari, "Esie siesi ndabarebakho esiindu silala. Esio nimumboolera, siesi ndababoolera mbwe, nikhubunyala sina kholaanga ebiindu bino.
\v 25 Obubatiisi bwa Yokhana bwarula ena? bwarula mwikulu kose khu baandu? "Nabo nibabwererana abeene khu beene, nibabola bari, "Nikhunaboola khuri, 'Bwarula mwikulu, anarureeba ari, 'Khulwasina bulano simwasuubira?'
\v 26 Arali nikhuboola khuri, khubaandu, khuria abaandu okhubeera abàandu boosi balola Yokhana kori omunabii"
\v 27 Nibamukalusia Yeso nibaboola bari, "Sikhumanyire" Naya nababolera ari, "Siesi sindababolera khubunyala sina khola ebiindu bino.
\p
\v 28 Arali eng'we mupaara murie? Omuundu undi yali nende abaana babiri, niyeecha khuwamberi naboola ari, 'Omwana chia okhole inyaanga yino mundalo yange ye misabibu.'
\p
\v 29 Naye nakalusia naboola ari sindakha; arali lunyuma niyekanira, mani nachia.
\p
\v 30 "Naye niyeecha khuwa khabiri namuboolera yeesi ario. Naye nakalusia naboola ari, njia omwami, naye narachia dawe.
\v 31 Ni wina khubabiri abo owakhola elienya lia samwana? "Nabo nibamubolera bari, owamberi. Yeso nababolera ari, obwadieri mbaboolera, mbwe abanasialo nende abadaamba bachia mubwami bwa Nasaye okhubarangirira eng'we.
\v 32 Okhuba Yokhana yabechera mungira yobulungikhi nang'we simwamusubira dawe, arali abanasialo nende abadaamba bamusubiramo, nang'we eng'we olwa mwalola ako, simwekanira, olunyuma mbwe munyale okhumusubira.
\p
\v 33 Rekeresia olukaado lundi; yaliwo omwenango undi, owaraaka indalo ye misabibu, nayisirira olukaka nayibodokhania eliina elie ifini, niyombakha omuniniro, nabalekhera abalimi naye nachia musialo esiaale.
\v 34 Ne olwabikha biebiamo biali ambi, yaruma abakholi baye khubalimi, mbwe bababeresiekho ebiamo okhurula mundalo.
\v 35 Nabo abalimi nibababukula abakholi baye, nibakhuya mulala nibamwira ouundi nibamukhuya makina.
\v 36 Khandi naruma abakholi baandi okhukhira abamberi; nibabakholera boosi bario.
\v 37 Arali mukhumalirikha okhwa koosi yabarumira omwana waye, naboola ari, banamuria omwana wange.
\p
\v 38 Ne olwa abalimi baloola omwana waye, nibaboola abeene bari, uno niye owo bulaame; mwiche khumwire, mani khubukule obulaame bwaye.
\v 39 Nabo nibamudiira nibamusukuna erwanyi we indalo ye misabibu, nibamwira.
\v 40 Olwa omwami omwene indalo yeecha, ni siina esiachia okhubakhola abalimi abo?
\p
\v 41 Nibamubolera bari, achia obasasia ebibibi abaandu bamaanu abo, nende oberesia abalimi baandi indalo yaye ye misabibu, abachia omuba ebiamo munduukho yabio"
\p
\v 42 Yeso nababoolera ari, "Eng'we simwasomakho mumaandiko mbwe, Elikina liria elia abombakhi bakhaya, elienelio liekhola elikhulundu eliomukoona; ino neikhola yomwami nayo neyiukisia mumoni cheefwe?
\p
\v 43 Khukario esie mbaboolera mbwe obwami bwa Nasaye buchia obukulibwa orula khweng'we nibuberesibwa khusialo esireera ebiamo biasio.
\v 44 Naye ulia yeesi ochia okhukwa khulikina lino achia ofunikha funikha; Arali ula yeesi owa lichia okhukwakho, lichia omusia ebinyukhe."
\p
\v 45 Ne olwa abakukhani bakhoongo nende abafarisaayo bababulira olukaado lwaye, bamanyirisia mbwe abalomalomekho.
\v 46 Arali olwabateema okhumudiira, baria omukaanda, okhubeera bamubukula ngo munabii.
\c 22
\cl Omuliango 22
\p
\v 1 Ne Yeso nakalusia nabalomalomera khandi muchingaado, naboola ari,
\v 2 Obwami bwo mwikulu buli nga omuruki uundi, owakhola esiserero khulwo mwana waye,
\v 3 Naye naruma abakholi baye okhulaanga balia abali nibalangwire musiserero; nabo nibareecha dawe.
\v 4 Khandi, naye naruma abakholi bandi naboola ari, Boleere abo abalangwa mbwe, lingeera ndekekhe ebiakhulia bie ingolobe; sinjire ing'ombe isurusi yange nende ebinulu biange ne ebiindu bioosi nibirekekhe; mwiche musiserero.
\v 5 Arali nabo nibamukholera echingacho, mani nibabwao okhuchia mulala mundalo yaye, ne ouundi khubio bukhala baiye.
\v 6 Nabo abadoonga nibababukula abakholi baye, nibabakhola akesifwabi, mani nibabeera.
\v 7 Arali olwa omuruki yabulira akene ako, yadirwa nende elirima, narumayo abamayie baye, nibabasasia abeeri abo, mani nibasaamba elidookho liabwe.
\v 8 Naye yaboolera abakholi baye ari, esiserero nesirekekhe, arali balia abalangwa sibali abakhoyera.
\v 9 muchie eng'we khulwesio khuchingira chikhoongo, ne abaangi abamunyoola, mubalaange musiserero.
\v 10 Kario abakholi abo bachia erwanyi khu chingira, nabo nibabusia alala boosi abaangi ababanyoola boosi ababi nende abalayi; mani esiserero nisichulamo abakeni.
\v 11 Ne olwo omuruki yeecha mukari okhulola abakeni balimo, yalolamo omuundu owali narefwalire esiefwalo esie siserero.
\v 12 Naye namureeba ari, Omwiicha, wichire orie mukari muno nobula esiefwalo sie siserero? Naye nang'ang'aala oburalomaloma.
\v 13 Mani omuruki naboolera abakholi ari, mumuboye amakhono nende makulu, mani mumurusieo, mumusukune musirima erwanyi, eyo khuchia okhubayo okhulira nende okhusia ameno.
\v 14 Okhuba abaangi balang'wa, arali badidi balobolwa.
\p
\v 15 Mani abafarisaayo nibachia nibaulirisania nga olwabakhanyala okhumudira mukhulomaloma khwaye.
\v 16 Nabo nibamurumira abeeki babwe nende aBakherodia, nibaboola bari, Omwekesia khumanyire mbwe ewe oli owo bwadieri, khandi wekesianga ingira ya Nasaye mubwadieri, khandi siodebaanga akomuundu yeesi; okhuba ewe solingeraanga ifwani yabaandu.
\v 17 Ruboleere bulano ewe opaara orie? Nelilako okhuberesia Kaisari omusolo kose khaba?
\p
\v 18 Arali Yeso namanyire obumaanu bwabwe, naboola ari, khulwasina abekaadi eng'we mundeema?
\v 19 Munjekesie isende eyo musolo, Nabo nibamurerera idinari.
\v 20 Naye nabareeba ari, elikoondo lino nende eliandiko nibia wina?
\p
\v 21 Nabo nibamuboolera bari nibia Kaisari. Naye nababoolera ari, khulwesio beresie Kaisari ebiindu ebiri ebia Kaisari; ne Nasaye ebiindu biri ebia Nasaye.
\v 22 Olwabali nibabulire amakhuwa kano, bauka mani nibamurulakho nibabwao.
\p
\v 23 Inyaanga yeneyo Abasadukaayo nibamwichakho, ababoolaanga mbwe obulamukhi bubulao, nibamureeba,
\v 24 nibaboola bari, omwekesia, Musa yaboola ari, omuundu nafwa, nabula abaana, omusiani wabwe adekhie omukhasi waye, mani amwibusirie imwo omusiani wabwe.
\v 25 Bulano khwaliwo nende abasiani saba: naye owamberi, olwayali nadekhisie omukhasi, nafwa, narali nende olwibulo, nalekhera omusiani wabwe omukhasi waye:
\v 26 Mani owakhabiri yeesi nakhola ario, nende owakhadaru, okhuula khu wasaba.
\v 27 Ne obumalirikhi obwa koosi omukhasi nafwa yeesi.
\v 28 khulwesio mubulamukhi achia okhuba omukhasi wa wina khu saba abo? okhubeera boosi baali naye.
\p
\v 29 Yeso nakalusia nababolera ari, Eng'we mukora, oburamanya amaandiko, kata obunyala bwa Nasaye.
\v 30 Okhuba mubulamukhi khasi badiekhia, kata okhudekha, arali bali kori abamalayika ba Nasaye mwikulu.
\v 31 Arali okhulondana khubulamukhi bwa bafu, Eng'we simwasomakho kalia aka Nasaye yabalomalomera, naboola ari,
\v 32 Esie nesie Nasaye wa Ibraimu, nende Nasaye wa Isaaka, nende Nasaye wa Yakobo? Nasaye khasi ni Nasaye wa bafu, arali owabalamu.
\p
\v 33 Ne olwa obomukaanda babulira kano, bauka khulwa amekesio kaye.
\p
\v 34 Arali olwa bafarisaayo babulira mbwe abulesisie Abasadukaayo, bebusia alala.
\v 35 Mani mulala wabwe, owali omukhuluundu wa malako, namureeba ereebo, omuteema, naboola ari,
\v 36 Omwekesia, esilaagiro sikhoongo nisio esiliena mumalako?
\p
\v 37 Yeso namubolera ari, Ewe okherenge Omwami Nasaye wao nende omwoyo kwao kwoosi, nende amakesi kao koosi.
\v 38 Lino nilio elilako elikhoongo okhukhira koosi.
\v 39 Ne eliakhabiri lifwanana nalio, ewe okheere owasio nga ewe mwene.
\v 40 Khu malako kano kabiri kadirire amalako koosi nende abanabii.
\p
\v 41 Olwa Abafarisaayo bali nibebusirie alala, Yeso yabareeba,
\v 42 Naboola ari, mupaara murie eng'we okhulondana nende Kirisito? Nomwana wa wina? Nabo nibamubolera bari, nomwana wa Daudi.
\p
\v 43 Naye nababolera ari, khulwesio bulano Daudi muroho yamulaanga mbwe Omwami, naboola ari,
\v 44 Omwami yaboolera Omwami wange ari, yikhala ewe khumukhono kwange omusaacha, okhuula nga olwanjia okhukhola abasuku bao obusenero bwa makulu kao.
\v 45 Ne nikali mbwe bulano Daudi amulaanga mbwe Omwami, aba arie Omwana waye?
\v 46 Naye omuundu yeesi siyanyala okhumukalusia elikhuwa lioosi, kata omuundu yeesi ochaaka inyaanga eyo siyamurebakho amareebo kandi dawe.
\c 23
\cl Omuliango 23
\p
\v 1 Bulano Yeso nalomalomera omukaanda, nende abeeka baye,
\v 2 Naboola ari abaandiki nende Abafarisaayo bekhalaanga khusisaala sia Musa: Khwelwesio koosi kala akabababolera mbwe
\v 3 muloonde, ako muloonde nimukakhola; arali murakhola eng'we kori olwabakholaanga emirimo kiabwe: Okhuba baboolaanga, ne sibakhoola dawe.
\v 4 Okhuba baboyaanga emikuku misiro khandi ekibayeresia okhukiinga, nibara khumabeka kabaandu; arali nabo abeene sibanyala okhukisudia nende lulala khunjala chiabwe.
\v 5 Arali emirimo kiabwe kioosi bakholaanga mbwe balolekhe nende abaandu: babambaliyaanga amayirisi kabwe, nibakhongoyia amakemo ke biefwalo biabwe,
\v 6 Nibakheera obwikhalo bukhoongo mubiserero, nende ebisaala bia imberi muchisinagogi,
\v 7 nende amakhesio mubiiro, nibalangwa nende abaandu mbwe, Rabi, Rabi.
\v 8 Arali eng'we muralaangwa mbwe Rabi: Okhuba omwekesia weng'we ni mulala oli Kirisito, nang'we eng'we mwesi muli abakheerwa.
\v 9 Ne muralaanga omuundu yeesi khusialo mbwe Seng'we: Okhuba Seng'we ni mulala, oli mwikulu.
\v 10 Khandi muralaangwakho mbwe abekesia: Okhuba omwekesia weng'we ni mulala, niye Kirisito.
\v 11 Arali oyo oli mukhoongo mweng'we achia okhuba omukholi weng'we.
\v 12 Naye ula yeesi ochia okhwekinguula omwene achia okhududuyisibwa; naye ula ochia okhweduduyia omwene achia okhukingulwa.
\p
\v 13 Arali ni uuwi khweng'we, abaandiki nende Abafarisayo, abekaadi! Okhuba mwikalira abaandu obwami bwomwikulu: Okhuba kata eng'we abeene simwingira mukari, khandi simukanyira abo abengira okhwingira mukari.
\v 14 Uuwi khweng'we, abaandiki nende Abafarisaayo, abekaadi! okhuba mulichaanga munyuumba chia bakhasi balekhwa, nimulaama amalaamo maraambi mubwekaadi: khulwesio eng'we muchia okhunyoola okhukhalakirwa okhukhongo.
\p
\v 15 Uuwi khweng'we, abaandiki nende abafarisaayo, abekaadi! okhuba mubodokhananga inyaanja nende esialo okhukhola mulala akalukhane, naye olwaba nakalukhane, ne eng'we mumukhola amakhabi kabiri lukali okhuba omwana wamagoombe okhukhira eng'we abeene.
\p
\v 16 Uuwi khweng'we abemerisi baoofu, ababoola mbwe, oyo yeesi owechuuba khukhekalu, sinesiindu; arali oyo ochia okhwechuba, khudakhaabu yomukhekalu, nowelikobi!
\v 17 Eng'we basiru khaandi abaoofu: esiliena esikhoongo, idakhabu, kose ikhekalu eyilabia idakhaabu?
\v 18 Khandi, yeesi ochia okhwechuba khubwali, sinesiindu, arali yeesi owechuuba khusianwa esili akulu wabwo, yeboyere okhukhwechuba khwaye.
\v 19 Eng'we abasiru khandi abaoofu: esiliena esikhoongo, ni esianwa kose obwali bwalabia esianwa?
\v 20 Oyo yeesi khulwesio owechuba khubwali, yechubira khubwene nende ebiindu bioosi ebibulikho.
\v 21 Ne yeesi ochia okhwechuba khukhekalu, yechubira eyene, nende ula omenyere mukari mwayo.
\v 22 Naye ula owechuba khulikulu, yechuba khusisala esio luyali esia Nasaye, nende khu ula osikhalekho.
\p
\v 23 Uuwi khwen'gwe, abaandiki nende Abafarisaayo, abekaadi! okhuba murungaanga esidonye sia elikhumi esia minana nende binjari nende echijiira nimulekha amakhuwa masiro akamalako, akobukhalaki, akesisa nende akobusuubiri: kano niko akamwakhakhoyere okhukhola, nende oburalekha nikarakholerwe.
\v 24 Eng'we abemirisi baoofu abajong'ia isuna, nimumira ingamia.
\p
\v 25 Uuwi khweng'we, abaandiki nende Abafarisaayo, abekaadi! okhuba eng'we mulabia erwanyi owesikoombe nende esikaye, arali mukari bichulemo obunyuli nende oburaba nende esikero.
\v 26 Eng'we Abafarisaayo baoofu mulabie mberi bila ebili mukari mwsikoombe nende sikaye khu erwanyi wabio bioosi bibe ebilafu.
\p
\v 27 Uuwi khweng'we, abaandiki nende Abafarisaayo, abekaadi! okhuba muli nga ebirindwa ebiarachari, ebibonekhana khung'enang'ena erwanyi arali mukari mwabio biechulemo ebikumba bia baandu bafwa, nende obumali bwoosi.
\v 28 Kata kario eng'we mwesi erwanyi mubonekhanaanga abalungifu khubaandu, arali mukari mweng'we bwechulamo obwekaadi nende obukhayukhi.
\p
\v 29 Uuwi khweng'we abaandiki nende Abafarisaayo, abekaadi! okhubeera mumbakhaanga ching'ani echia banabii nimurereyia ebirindwa bia abalungifu,
\v 30 Nimuboola mbwe, khubeere muchinyaanga echia basefwe, khasi khwakhabere abasangirani nabo mumabaanga ka banabii.
\v 31 Khulwako eng'we muli abalolereri beng'we ebeene, mbwe eng'we muli abaana ba balia abeera abanabii.
\v 32 Eng'we mwichusie bulano esikero esia baseng'we.
\v 33 Eng'we chinjukha, eng'we olwibulo lwe chinjukha muneonia murie eng'we nende obusasikhi obwe magoombe?
\v 34 Khulwako, lingeera, mbarumira abanabii, nende abakesi nende abaandiki: ne abaandi khunibo eng'we muchia okhubera nende okhubabamba: ne abaandi khunibo eng'we muchia okhubakhuya muchisinagogi chieng'we, nimubasandia khurula khudookho khuchia khulidookho lindi.
\v 35 Mbwe khweng'we kanyale okhwicha amabaanga akabalungifu bwoosi akedikha khusialo khurula khu mabaanga komulungifu Abeli okhula khu mabaanga ka Sakaria omwana wa Barakia owamwerera akari welikhekalu nende obwali.
\v 36 Obwadieri baboolera, ebiindu bino bioosi biakheche khulwibulo luno.
\p
\v 37 Ewe Yerusalemu, Yerusalemu, ewe owiraanga abanabii, nokhuya amakina bala abarumwa khwewe, amakhabi kaanga akandakhabusie abaana bao alala kori ingokho ibusianga ebimwinyi asi we chimbaya chiayo, nang'we nimurakanya!
\v 38 Lingeera, inyuumba yeng'we yibadong'ere ikhaya.
\v 39 Okhubeera esie mbaboolera mbwe, engwe simuchia okhumbonakho khuchaaka bulano nende okhuchririra, okhuula olwa muchia okhuboola mbwe, niweyikhabi oyo owiicha muliira lio Mwami.
\c 24
\cl Omuliango 24
\p
\v 1 Naye Yeso nachia erwanyi ne narula mukhekalu mani abeeka baye nibamwichakho nibamuekesia ebiumbakhe bie ikhekalu.
\v 2 Naye Yeso nababolera ari, khasi mulola ebiindu bino bioosi? Obwadieri mbaboolera mbwe, silichia okhulekhwa ano kata elikina lala khulindi, elirachia okhusukunwa asi.
\p
\v 3 Ne olwayali niyekhale khulugulu lwa Miseituni abeeka bamwichira mubwekisi, nibaboola bari ruboolere ebiindi bino bichia okhuba liina? Nisina esichiaoba esilolero siokhwicha khwao, nende esiobumalirikhi bwe sialo?
\p
\v 4 Naye Yeso nakalusia nababoolera ari, mwekenderesie mbwe omuundu yeesi arababacha. Okhuba abaangi bachia okhwicha muliira liange,
\v 5 nimbaboola bari, esie nesie Kirisito: ne bachia okhubacha abaangi.
\v 6 Nang'we muchia obulira akamayie nende echimbweeru echia mayie: lingeera mbwe mureecha mwakanakana: okhuba ebiindu bino bioosi kali mbwe biekholekhane, arali obumalirikhi busiiri.
\v 7 Okhuba esialo sichia okhwekalukhania khu sialo siasie, nabwo oburuki nibwekalukhana khuburuki buundi: nikhuchia okhubao injala, nende amalwaye, nende okhurengerekha khwe sialo, muchimbeka chikabukhane.
\v 8 Kano koosi nikhwo okhuchaaka okhwobuchuuni.
\p
\v 9 Mani bachia okhubaberesania musandisibwe, nibabeera, muchia okhukiiywa nende ebialo bioosi khulwa eliira liange.
\v 10 Ni bulano abaangi bachia osinyikha nibakhobana mulala khu uundi, muchia okhusiulana mulala khu uundi.
\v 11 Nabo abanabii bobubachia abaangi bachia okhubukha nibabacha abaangi.
\v 12 Ne khulwo khubeera okhumederakho obumaanu, obukheeri bwa baangi buchia okhunyira.
\v 13 Arali ula ochia okhwesimirisia okhuula khubumalirikhi, omwene oyo achia owonibwa.
\v 14 Ne ifanjili ino eyo bwami ichia oyalwa musialo siosi khulwo buloli khu bialo bioosi: ne bulano obumalirikhi buchia okhwicha.
\p
\v 15 Khulwesio nimuchia olola elisinyisio eliobusasikhi eliabolwa nende omunabii Danieli, yeme abuundu andakatifu"(yeesi osoma lekha ye amanyirisie),
\v 16 manu lekha bala abali Ebuyaudi berukhire muchingulu:
\v 17 Lekha ula oli khusirama esie inyuumba areekha asi okhubukula esiindu siosi okhurala munyuumba yaye.
\v 18 Kata ula oli mundalo arafunya inyuma obukula chingubo chiaye.
\v 19 Ne uuwi khubo abali chiinda nende abo abanunia muchinyaanga echio!
\v 20 Arali eng'we mulaame mbwe okhwirukha khweng'we khuraba muroocho kose inyaanga ya isabaato:
\v 21 Okhuba khuchia okhuba nende obunyakhani bukhoongo, oburalikhoo okhurula okhuchaaka khwesialo okhuula ebikha bino, kata khasi buchia khubao khandi.
\v 22 Ne kabeere mbwe enyaanga echio khasi chakhaduduyisibwa abulao omuundu yeesi owakhalokokhe: arali khulwa abalobole enyaanga echio chichia okhududuyisibwa.
\p
\v 23 Bulano omuundu yeesi nachia obaboolera mbwe, lole Kirisito nguyu ano, kose alia: murasuubira ako dawe.
\v 24 Okhuba bachia obukha Kirisito bo bubacha, nende abanabii bo bubacha ne bachia okhwekesia abilolero bikhoongo nende akamangalimwa: mubuungi mbwe kata nikakhanyalikhane bachia obacha abalobole beene.
\v 25 Lingeere mbaboleere khalekhale.
\v 26 khulwasio nibachia obaboolera mbwe, lingeere, ali muluumira: murachiayo: lingeere ali mubisenge bio bwekisi: murasuubira ako dawe.
\v 27 okhuba ngolwa olumiesu lwichaanga okhurula ebukwe nilukhosia okhula muumbo: nilwo olwa okhwicha khwa omwana wo muundu khuchia okhuba.
\v 28 okhubeera wosi wosi owo mulambo kuli eyo niwo owe chingosia chiebushianga alala.
\p
\v 29 Abwene ao lunyuma lwa manyakhano ke nyaanga echio eliuba lichia okhwirima ne omwosi sikuchia orusia obulafu bwako ne ching'ining'ini chichia okhukwa okhurula mwikulu ne obunyala bwe likulu buchia orengesibwa:
\v 30 Ne bulano esilorero esio Mwana wo muundu sichia obonekhana mwikulu: Ne bulano echimbia chiosi echia khusialo bachia okhulira, nibachia olola omwana wo muundu niyeecha mumaleesi ko mwikulu nende obunyala nende oluyaali lukhoongo.
\v 31 Naye achia oruma abamalaika baye nende omulaango mukhoonge okwo luyoka, nabo bachia obuusia alala abalobole baye okhurula embeka chine echiemiyaka okhurula olwande lulala olwo mwikulu okhuula khu lundi.
\p
\v 32 Bulano mweeke olukaado lwo musaala kwo mokhuyu: Amasaga kakwo nikasiri madoro, nikarusia masaafu, mumanya mbwe esiminyu sili ambi:
\v 33 Eng'we mwesi murio, olwa eng'we muchia olola ebiindu bino bioosi, mumanye mbwe bili ambi, kata khumiliangiro.
\v 34 Obwadieri mbaboolera, olwibulo luno khasi luchia obwao, okhula ebiindu bino bioosi biulirire.
\v 35 Elikulu nende esialo bichia obwao, arali amakhuwa kange sikachia obwao.
\p
\v 36 Arali akeyinyaanga eyo nende ebikha abulao omuundu yeesi omanyire kata abamalaika bo mwikulu, arali Baba wange yeng'ane.
\v 37 Arali nga chinyaanga chia Noa chiali, nilwo olwa kachia okhuba khwicha khwo Mwana womundu.
\v 38 Okhuba kori chinyaanga chiali amaachi nikasiechula balichaanga nibang'wa nibadekhia nende okhudekha okhuula inyaanga ila eya Noa yengira muliaro.
\v 39 Ne nibaramanya khaba okhuula olwa amaachi kechuula nikabarusiayo boosi nilwo olwakachia okhuba khandi khukwicha khwo mwana womuundu.
\v 40 Bulano babiri bakhabe mundalo: mulala yakhabukulibwe, naye ouundi yakhalekhwe.
\v 41 Abakhasi babiri bakhabe nibasia khulukina, mulala yakhabukulwe naye ouundi yakhalekhwe.
\v 42 Mube meeso khulwesio: okhuba eng'we simumanyire ebikha bio Omwami weng'we yecheremo.
\v 43 Arali mumanye kano, mbwe khane omusaacha mulayi oweinyuumba amanyire ebikha ebia omwiibi yecheramo, yekhabeere meeso naye siyakhakanyire inyuumba yaye okhufunakwa.
\v 44 khulwesio eng'we mwesi mwerekekhe: okhuba mubikha ebio ebia eng'we murapariramo Omwana wo muundu yeecha.
\p
\v 45 Niwina bulano omukholi mwesikwa khandi omukesi, owa omwami waye yakhola omwemereri weinyuumba yaye, okhubaberesia ebiakhulia mubikha?
\v 46 Noweikhabi omukholi oyo owa omwami waye niyeecha achia omunyoola nakholaanga ario.
\v 47 Obwadieri mbaboolera mbwe achia omukhola omwemeresi we biindu biaye bioosi.
\v 48 Arali nikaba mbwe omukholi mumaanu oyo achia oboola mumwoyo kwaye mbwe, omwami wange achelewe okhwicha khwaye:
\v 49 Mani achaake okhukhuya abakholi basie, nende okhulia nende okhung'wa nende abameesi:
\v 50 Omwami wo mukholi oyo achia okhwicha munyanga yayakhabe naramulindiliraanga, nende mubikha ebia yakhabe naramanyire.
\v 51 Naye achia omuremamo akari bitundu bibiri, namukabira omukabo kwaye alala nende abekaadi ne ebweneyo khuchia okhuba okhulira nende okhusia ameno.
\c 25
\cl Omuliango 25
\p
\v 1 Abwene ao obwami bwo mwikulu buchia khufananisibwa khu bakhana basisira ekhumi ababukula chitaara chiabwa, nibachia obukanira omwami we siserero.
\v 2 Baraano khunibo bali abakesi ni baraano basiru.
\v 3 Bala abali abasiru bakinga chitaara chiabwa nibarakiinga alala nende amafura:
\v 4 Arali abakesi bakiinga amafura mubibuka alala nende echitaara chiabwe.
\v 5 Olwa Mwami we siserero yakhiinda okhwicha boosi bakunukha mani nibakona echidoolo.
\p
\v 6 Ne musiro akari oluungu nilwechiira luri, lingeere Omwami wesiserero yeecha: murule erwanyi mumubukanire.
\v 7 Ao abasisira abo boosi babukha nibakasia chitaara chiabwe.
\p
\v 8 Nabo abasiru nibaboolera abakesi bari, murubekho amafura keng'we: okhuba chitaara chiefwe chisimire.
\v 9 Arali abakesi nibabakalusia nibababoolera bari sikali kario: kanyala okhaya oruyera efwe nende eng'we: arali eng'we muchie khwabo abakusia mani mukule akeng'we.
\v 10 Nabo olwabachia okula Omwami we siserero niyeecha: nabo bala abali nibarekekhe nibengira mukari naye musiserero: mani muliangiro nikwikalwa.
\p
\v 11 Ne olunyuma lwako obasisira baandi abo boosi nibeecha, nibaboola bari, Omwami, Omwami, rwikulire.
\v 12 Arali ye nakalusia naboola ari, obwadieri mbaboolera mbwe simumanyire eng'we dawe.
\p
\v 13 Khukario mube meeso okhuba eng'we simumanyire kata inyaanga kose ebikha ebia Omwana wo muundu yecheramo.
\p
\v 14 Okhuba obwami bwo mwikulu buli nga omuundu owali nasamule musialo sia ale, owalaanga abakholi baye abeene nabalekhera emiandu kiaye.
\v 15 Naye omulala namuba chitalaanda chiraano ouundi chibiri ne ouundi ndala: khubuli muundu olondana nende obunyala bwaye mani abwene ao narula nachia olukeendo lwaye.
\v 16 Mani oyo owanyoola chitalaanda chiraano nachia nakholeramo ingaanga, niyebusia chitalaanda chindi chiraano.
\v 17 Owanyoola chibiri yeesi yakhola ario ne yebusia echindi chibiri.
\v 18 Arali ula owanyoola ndala yachia nayabira muloba nakisa echisende chio Mwami waye.
\p
\v 19 Lunyuma lwe bikha biraambi Omwami wa bakholi abo niyeecha, nabaliirira nabo.
\v 20 Naye ula owaberesebwa chitalaanda chiraano yeecha narera chitalaanda chindi chiraano, naboola ari, Omwami wamberesia chitalaanda chiraano: lingeera ndeebusie chitalaanda chindi chiraano akulu khu chila.
\p
\v 21 Omwami waye namuboolera ari, okholere ebilayi, ewe omukholi mulayi khandi omwesikwa: ewe obere omwesikwa khu biindu bididi, esie ndakhukhola omwemereri we biindu biingi: Ingira ewe musangaalo yo Mwami wao.
\p
\v 22 Oyo yeesi owanyoola chitalaanda chibiri yeecha naboola ari, Omwami, wamberesia chitalaanda chibiri, lingeera njibusie chitalaanda chindi chibiri akulu wa chila.
\p
\v 23 Omwami waye namuboolera ari, okholere bilayi omukholi mulayi khandi omwesikwa: ewe obere omwesikwa kubiindu bididi esie ndakhukhola omwemereri wa ebiindu biingi: ingira ewe musangaalo eya Omwami wao.
\p
\v 24 Naye owanyoola italaanda ndala yeecha naboola ari, Omwami, esie ndamanya mbwe ewe oli, omuundu mwomu okesaanga owa orarakire, khandi obusianga owa orabakale:
\v 25 Mani ndaali omuri, ninjia ningisa italaanda yao muloba: lingeera, eyili eyao niyo yino.
\p
\v 26 Omwami waye nakalusia namuboolera ari, ewe omukholi mumaanu khandi omudofu, ewe wamanya mbwe ngesaanga owandararakire, nimbusianga owandarabakale:
\v 27 Ewe wakhaparire khulwesio okhura esende yange mubakhola obukhala nimukhufunya khwange ndakhanyolere eyange yene nende ingaanga yayo.
\v 28 Mumurusiekho khulwesio italaanda, mani mumbersie oyo oli nende chitalaanda ekhumi.
\v 29 Okhuba khubuli mulala oli nabio achia oberesibwa, ne achia oba nende ebiingi: arali khurula khula obula achia orusibwakho kata silia esiali ninasio.
\v 30 Ne mumusukune eng'we omukholi obula ingaanga oyo erwanyi musirima: eyo khuchia okhubayo okhulira nende okhusia meno.
\p
\v 31 Olwa Omwana womuundu achia okhwicha muluyaali lwaye alala nende abamalaika abatakatifu boosi, abwene ao achia okwikhala khusisaala sio buruki sio luyaali lwaye:
\v 32 Ne mubweni bwaye ebialo bioosi biakhakhung'anisibwe; naye achia okhubakabula mulala okhurula khu uundi, nga omwayi akabulaanga amakoondi kaye okhurula muchimbusi:
\v 33 Ne achia okhwikhasia amakoondi khumukhono kwaye omusacha arali chimbusi khumukhono mukhasi.
\p
\v 34 Abwene ao Omwami achia oboolera abo khumukhono kwaye musacha ari, mwiche eng'we abongerwa echikhabi nende Baba wange, mubukule obwami obwamwarekekherwa okhurula khu muse kwe sialo:
\v 35 Okhuba ndali injala, nimumberesia ebiokhulia: ndali obuluwo nimumberesia esiokhung'wa: ndali omureende, nang'we nimunyingisia:
\v 36 esiekenye, nang'we nimufwala: ndali omulwaye, nang'we nimungendera: ndali mumboye nang'we nimunjulira.
\p
\v 37 Abwene ao abalungikhi bachia omukalusia nibaboola bari, Omwami, lina olwa khwakhulola noli injala, mani khwakhulisia? kata noli nobuluo manu khwakhuba esiokhung'wa?
\v 38 Lina olwakhwakhulola omureende nikhukhwingisia? kata esiekenye mani khwakhufwala?
\v 39 Kata lina olwakhwakhulola omulwaye, kose mumboye, mani khwakhulirira?
\p
\v 40 Naye Omwami achia okalusia nababolera ari, obwadieri mbaboolera mbwe ngolwa mwakholera mulala khu baana befwe badiidi abo, eng'we mwakholera esie.
\p
\v 41 Abwene ao achia okhubolera boosi abomukhono mukhasi ari, mundulekho eng'we, abachubwa muchie mumuliro okurasima okwarekekherwa omukhieni nende abamalaika baye:
\v 42 Okhuba ndali injala nang'we simwamberesia ebiakhulia: ndali obuluo nang'we simwamberesia esiokhung'wa:
\v 43 Ndali omurende nang'we simwanyingisia: esiekenye, nang'we simwafwala: omulwaye khandi mumboye, nang'wa simwangenderakho.
\p
\v 44 Abwene ao bachia boosi omukalusia, nibaboola bari, Omwami, lina olwa khwakhulola noli injala, kata obuluo, kose omureende, kose esiekenye, kata omulwaye, kose mumboye mani khwakhaya okhukhalabanira?
\p
\v 45 Abwene ao achia obakalusia naboola ari, obwadieri mbaboolera mbwe mukala maangi akeng'we mwakholera mulala khu badiidi bano eng'we simwakholera esie.
\p
\v 46 Ne bano bachia ochia musinyasio esirabwayo arali abalungikhi bachia khuchia mubolamu oburalibwayo.
\c 26
\cl Omuliango 26
\p
\v 1 Ne, olwa Yeso yamala omakhuwa kano koosi yaboolera abeeki baye ari,
\v 2 Mumanyire mbwe olunyuma olwa chinyaanga chiibiri nelisabo lia Pasika, naye Omwana womuundu okhoyerwe khumbabwa.
\p
\v 3 Abwene ao nibakhung'ana alala abakukhani bakhoongo nende abaandiki nende abakhuluundu ba baandu, mulubiriri lwa omukukhani mukhoongo, owalangwa mbwe Kayaba,
\v 4 Nibekhoba mbwe banyale omudiira Yeso mubukesi kesi, mani bamwire.
\v 5 Arali nimubabolera muri, iraba inyaanga ye siserero, sireecha siabao esioka mubaandu.
\p
\v 6 Bulano olwa Yeso yali mu Betania, munyumba mwa Simoni Omukereni,
\v 7 ebwene eyo omukhasi yamwichakho nali nende ichupa ya mafura ko bukusi bukhoongo, nakachukha khu murwe kwaye, olwayali niyekhale khu mesa nalichaanga.
\v 8 Arali abeeki baye olwabalola ako, nibasinyisibwa, nibaboola bari, khulwa sina kanyasibwa kano?
\v 9 Okhuba amafura kano kakhakusibwe obukusi buungi mani baberesia abamanani.
\p
\v 10 Olwa Yeso yamanyirisia ako nababoolera ari, mbwe sina musaandia omukhasi oyo? okhubera akholere omulimo mulayi khwisie.
\v 11 Okhuba abamanani muli nabo buli lwoosi: arali esie simulinange buli lwoosi.
\v 12 Okhuba mbwe achukhire amafura kano khumubiri kwange, akholere ario khulwa okhusiikha.
\v 13 Obwadieri esie mbaboolera mbwe, woosi woosi owa ifanjili ino yichia okhuyalwa musialo siosi eyo woosi kano ako mukhasi uno akholere kachia okhubolwa khulwa obwichilisi bwaye.
\p
\v 14 Abwene ao mulala khwe khumi nende babiri, olang'wa Yuda Isikarioti, yachia khu bakukhani bakhoongo,
\v 15 mani nababoolera ari, siina esiamunamberesia nasie mbaberesie eng'we omwene oyo? Mani nabo nibamubalira nibamuberesia echisilingi amakhumi kadaru.
\v 16 Mani okhurula ebikha ebio ye yakoonya ingira ya omukhoba.
\p
\v 17 Bulano inyaanga ya mberi ya lisabo lie migaati kibulamo elimera abeeka beecha khu Yeso, nibamureeba bari, wenya khukhureresirie ena okhulia Pasika?
\p
\v 18 Naye naboola ari, muchie mudookho khu muundu mani mumuboolere muri "omwekesia aboola ari, ebikha biange biurile: ndakholera Pasika munyuumba mwao nende abeeka bange."
\v 19 Nabo abeeka nibakhola nga olwa Yeso yali nabarumire: nabo nibarekekha Pasika.
\p
\v 20 Bulano olwa ingolobe yola, yekhala asi nende ekhumi nende babiri.
\v 21 Ne olwabali nibalia naboola ari, obwadieri mbabolera mbwe mulala khweng'we achia khukhoba.
\p
\v 22 Nabo nibaba nende esibeera esiingi, nibachaaka bulimulala khunibo omureeba bari, Omwami, esie nesie?"
\p
\v 23 Naye nakalusia naboola ari, oyo odoonga omukhono kwaye nange musikae, omwene oyo achia khukhoba.
\v 24 Omwana wo muundu abwao nga olwa kaandikwa olondana naye: arali uuwi khu muundu oyo owa omwana womuundu akhobwa obirira khuye: biakhabere ebilayi omuundu oyo narakheebulwe.
\v 25 Abwene ao Yuda, owamukhoba nakalusia nareeba ari, omwekesia esie? naye namuboolera ari, ewe wakhabola.
\p
\v 26 Ne olwa bali, nibalichaanga, Yeso yabukula omugaati nakuberesia echikhabi nakunsonyola, mani naberesia abeeka naboola ari, bukule mulie kuno nikwo omuibiri kwange.
\v 27 Khandi nabukula esikoombe, nakhuba orio mani nababeresia naboola ari, mung'we mweesi mu sino.
\v 28 Okhuba kano niko amabaanga kange akelakano liyakha akedikha khulwa abaangi khulwo bulekherwi bwe bionono.
\v 29 Arali mbaboolera mbwe sinjia okhung'wakho okhuchaaka lero khusiamo sino esio musabibu okhuula ngolwa ndaying'we injakha mubwami bwa Baba wange.
\p
\v 30 Nabo olwa bali, nibamalire okhwemba olwimbo, nibarula erwanyi nibachia mulugulu olwa Miseituni.
\p
\v 31 Abwene ao Yeso yababoolera ari, eng'we mwesi munasinyisibwa khulwange esiro sino okhuba kaandikwa mbwe, esie ndakhuya omwayi, ne makondi komukaanda kwaye kanasalaana.
\v 32 Arali olunyuma esie nimalire okhubukha mubafwa khandi ndakhache imberi weng'we mugalilaya.
\p
\v 33 Petero nakalusia namuboolera ari, kata abaandu boosi nibachia okhusinyisibwa khulwao, esie nasie sinjia okhusinyisibwa.
\p
\v 34 Yeso namuboolera ari, obwadieri khubolera, esiro sino idaywa nisiakhooliokha, ewe ochia khundekaana makhabi kadaru.
\p
\v 35 Petero namuboolera ari, kata nikaba mbwe fwe nawe esie sinjia okhwekaana! nabo abeeka boosi boosi nibaboola bario.
\p
\v 36 Abwene ao Yeso niyeecha ninabo abuundu alangwa mbwe Getesimane, naye naboolera abeeka ari, mwikhale eng'we ano ninjia okhulama ela.
\v 37 Mani nabukula Petero nende abasiani ba Sebedayo babiri naye nachaaka okhuberera nende obusiro.
\v 38 Abwene ao nababoolera ari, omwoyo kwange kuberera lukali kata okhula okhufwa: mudoong'e eng'we ano nimuba meso alala nange.
\v 39 Naye nachia imberi budidi nakwa khubweni bwaye nalaama naboola ari, ewe Baba wange, nikakhaba mbwe kanyalikhana esikoombe sino simbirekho, kata kario singa olwa esie nyenya, arali kori olwa ewe wenya.
\v 40 Mani niyeecha khubeeka naye nambanyoola nibakona ne naboolera Petero ari, khulwa sina eng'we khasi munyalire okhuba meso alala nange kata elisaa elala?
\v 41 Mube meeso ni mulaama mbwe eng'we mureecha mwengira mumateemo: omwoyo kwenya, arali omubiri nomudofu.
\p
\v 42 Naye nakalukhayo khandi olwa khabiri, nalaama naboola ari, ewe Baba wange, nikaba mbwe esikoombe sino sisiakhandulakho, abula mbwe sing'we, elienya liao liekholekhe.
\p
\v 43 Naye niyeecha nabanyoola nibakona khandi: okhuba echimoni chiabwe chiali esiro.
\v 44 Naye nabalekha nabwao khandi nalaama olwa khadaru naboola amakhuwa kala sa.
\v 45 Abwene ao yeecha khu beeka baye nababoolera ari, musiri mukona nende okhubulukha? Lingeera ebikha bili ambi naye Omwana womuundu akhoberwe mumakhono ka bakholi be chimbi.
\v 46 Buukhe lekhe khubwao: lingeere ali ambi oyo okhoba esie.
\p
\v 47 Ne olwayali nasiri nalomalomanga bona Yuda mulala khwe khumi nende babiri yeecha alala nende omukaanda mukhoongo nende echiganga' nende ebikhokho, okhurula khubakhoongo ba bakukhani nende bakhulundu ba baandu.
\v 48 Bulano oyo owamukhoba yababeresia esilolero naboola ari, ula owa esie njia okuchunjuna omwene oyo niye, mumudire lwangu.
\v 49 Ne abwene ao niyeecha khu Yeso naboola ari, emileembe, omwekesia mani namuchunjuna.
\p
\v 50 Naye Yeso namureeba ari, omwiicha wakhecha orulira ena? abwene ao nibeecha nibamukwakho Yeso, nibamubukula.
\v 51 Ne lola omulala khunibo abali nende Yeso nakolola omukhono kwaye, narusia olugaanga lwaye narema omukholi wa omukukhani mukhoongo, namukhalakakho okhurwi khwaye.
\v 52 Abwene ao Yeso namuboolera ari, kalusia olugaanga lwao khandi abuundu walwo: okhuba abo boosi ababukula olugaanga bachia khusasikha nende olugaanga.
\v 53 Eng'we mupaara mbwe sinyala osaba bulano Baba wange naye amberesia ebikha bino abamalaika ba mayie emikaanda ekhumi nende kibiri nende kata okhirao?
\v 54 Arali bulano amaandiko ako nikarakhabere kario?
\p
\v 55 Mubikha ebiene ebio Yeso naboolera omukaanda ari, murulire sa kori nga abeecha okhudiira omwibi nende echigaanga nende ebikhokho okhwicha okhumbukula? Ndekhala buli nyaanga nang'we ninjekesia mukhekalu nang'we simwandirakho dawe.
\v 56 Arali kano koosi kekholekhe, mbwe amaandiko ka banabaii kolerere abwene ao abeeka boosi nibamulekha niberukha.
\p
\v 57 Ne abo abali nibamudirire Yeso nibamurusiao nibamwiyira khu Kayaba omukukhani mukhoongo, owa baandiki nende abakhulundu bali, nibakhung'anire.
\v 58 Arali Petero namulondakho inyuma ale okhuula mulubiriri lwo mukukhani mukhongo niyengira mukari niyekhala nende abakholi, olola obumalirikhi.
\p
\v 59 Bulano abakukhani bakhoongo nende abakhulundu abe sina boosi bakoonye obuloli bwo bubacha khu Yeso mbwe bamwire:
\v 60 Arali sibanyolakho siosi kata abaloli bo bubacha becha abaangi nibaranyolakho siosi. Mulumalirikhi nibeecha abaloli bo bubacha babiri,
\v 61 Nibaboola bari, omuya uno yabola ari, esie nyala okhusasia ikhekalu ya Nasaye mani ngiumbakhe munyaanga chidaru.
\p
\v 62 Naye omukukhani mukhoongo nabukha, namuboolera ari, khasi okalusiakho siindu siosi? nisina esia baana babola khwewe?
\v 63 Arali Yeso nadira omuleembe kwaye. Naye omukukhani mukhoongo nakalusia namuboolera ari, esie khwechubira khu Nasaye omulamu mbwe oruboolere nikali mbwe newe Kirisito Omwana wa Nasaye.
\p
\v 64 Yeso namuboolera ari, ewe wakhabola: kata kario esie baboolera mbwe okhuchaaka bulano muchia olola omwana wo muundu niyekhale khu mukhono musaacha okwa maani, niyeecha mumalesi ko mwikulu.
\p
\v 65 Abwene ao omukukhani mukhoongo narandula echingubo chiaye naboola ari, alomalome akokhwekerania khu Nasaye: khulindiriranga buloli sina? lingeere bulano mwabulira nga yakeranisie khu Nasaye.
\v 66 Mupaara murie eng'we? Nabo nibakalusia nibaboola bari, akhoyera khufwa.
\v 67 Abwene ao nibamufuchakho amare mubweni nibamukhuya ebifusi: ne abandi nibamukhuya echinju,
\v 68 Nibaboola bari, rulakulekho ewe Kirisito niwina oyo okhukhuyire?
\p
\v 69 Bulano Petero yekhala erwanyi wa olubiriri: naye omukhana mukholi namwichakho naboola ari, ewe wesi wali nende Yeso wa Ebugalilaya.
\p
\v 70 Arali ye nakaana imberi wabwe boosi, naboola ari, esie simanyire esia ewe obolaanga.
\p
\v 71 Olwayali nabwereo erwanyi musiribwa, omukholi mukhana undi namulola, naboolera abali ao ari, omuya uno yesi yali nende Yeso wa Nasareti.
\p
\v 72 Khandi ye niyekana mukhwebwaba ari esie simanyire uno muundu.
\p
\v 73 Ni olunyuma lwe ebikha bididi bamwichakho abo abali nibemere ao nibaboolera Petero bari obwadieri ewe wesi oli mulala khu nibo: okhuba akhulomaloma khwao khwekesia.
\p
\v 74 Abwene ao nachaaka okhwechuba nende okhwebwaba naboola ari, esie ngorerwe uno muundu. abwene ao idaywa niyikholiokha.
\p
\v 75 Naye Petero niyelichusia elikhuwa lia Yeso eliayamubolera mbwe ewe ochia khundekaana amakhabi kadaru mani nachia erwanyi nalira ebichuni.
\c 27
\cl Omuliango 27
\p
\v 1 Olwabiola ichuli, abakukhani bakhongo nende abakhulundu bakholera Yeso esina esia okhumwira:
\v 2 Ne olwabamuboya bamurusia ao nibamuberesania khu Ponjo Pilato omuruki.
\p
\v 3 Abwene ao Yuda owali namukhobere, olwayalola mbwe akhalakirwe yekanira omwene, nakalusiria khandi abakukhani bakhongo nende abakhulundu echisende amakhumi kadaru.
\p
\v 4 Naboola ari, nyonoonere okhuba mbwe khobere amabaanga kabula esibi. Nabo nibaboola bari nisiina esio khwefwe? kalole ako omwene.
\v 5 Naye nasukuna asi echisende mukhekalu mani nabwao nachia niyemika omwene.
\p
\v 6 Nabo bakukhani bakhongo babukula echisende, nibaboola bari, sinelilako okhuchira mumbikhiro okhubeera nobukusi bwa mabaanga.
\v 7 Nabo nibabulirisania nibachikulamo omukuunda kwa omulongi okwo khusiikhamo abarende.
\v 8 Khulwesio omukunda okwo kwalangwa mbwe omukanda kwa mabaanga okhuula inyaanga ino.
\p
\v 9 Abwene ao nikolerera okaboolwa nende Yeremia omunabii, naboola ari, mani nibabukula echisende amakhumi kadaru, obukusi bwa oyo owali akhoyera esikero esio, oyo owa abaana ba Isiraili babona mbwe asikhoyera
\v 10 nibachiberesania khumukunda okwo muloongi nga olwo Mwami yandagira.
\p
\v 11 Ne Yeso niyema imberi wo muruki: naye omuruki namureeba naboola ari, ewe newe muruki wa Bayaudi? naye Yeso namuboolera ari, ewe oboola.
\p
\v 12 Ne olwa yali nasitakibwe nende abakukhani bakhoongo nende abakhulundu, siyakalusia esiindu.
\p
\v 13 Abwene ao Pilato namuboolera ari, khasi obuliraanga ebiindu biingi ebia bali okhubolaangakho?
\v 14 Naye naramukalusi kata elikhuwa liosi okhula olwa omuriki yauka lukali.
\p
\v 15 Bulano mulisabo erio omuriki yenya okhubalekhuulira abaandu omuboye, ula owabeenya beene.
\v 16 Nabo bali abwene ao nende omuboye owamanyikha, owalangwa mbwe Baraba.
\p
\v 17-18 Khulwesio olwabali nibakhung'anire alala, Pilato nareeba ari, niwina owamweenya mbalekhulire, Baraba kose Yeso olangwa mbwe Kirisito? Khulwo khuba yamanya mbwe bamurera khuye khurulana nende ikhiinda.
\p
\v 19 Olwa yekhala asi khusisaala sio bukhalaki, omukhasi waye yamurumira elikhuwa naboola ari, orabakho ewe nende esiindu siosi olondana nende omuundu mulingikhi oyo okhuba nyakhaane nende abiindu bingi inyaanga ino mumaloro khulwaye.
\p
\v 20 Arali abakukhani bakhoongo nende bakhulundu bekweeda mukaanda mbwe khusabe Baraba, mani basasie Yeso.
\v 21 Omuruki nakalusia nabareeba ari, niwina khu babiri bano owamwenya mbwe mbalekhulire? nabo nibaboola bari, Baraba.
\p
\v 22 Pilato nabareeba ari, nisiina esiakhole bulano nende Yeso olangwa Kirisito? nabo boosi nibamuboolera bari, lekha abaambwe.
\v 23 Naye omuruki naboola ari, khusiina, sibi siina esia akholere? arali nabo bachiririra okhwayuula nibaboola bari, lekha abaambwe.
\p
\v 24 Olwa Pilato yalola mbwe siyakhakhola siosi, arali mbwe indoboyoo yenya okhwekholekha yabukula amaachi niyesaaba amakhono kaye imberi wo mukaanda naboola ari, mbulakho esibi siosi nende amabaanga ko muundu mulungikhi uno: mukelolerekho abeene.
\p
\v 25 Abwene ao abaandu boosi nibamukalusia nibaboola bari amabaanga kaye kabe khwefwe nende khu baana befwe. Abwene ao nabalekhulira Baraba:
\v 26 ne olwa bamala okhukhuya Yeso nibamuberesania mbwe abaambwe.
\p
\v 27 Abwene ao abasikari abomuruki nibayira Yeso mupritorio mani nibamukhung'anirakho olukhukhumuli lwosi olwa abamayie.
\v 28 Mani nibamufwalula khandi nibamufwala ikaanju injakhanyu.
\v 29 Ne olwabo bali nibalukhire olusiimbi lwa mabwa ni bamura khumurwe kwaye nende elikada mumukhono kwaye omulungi nibasigama khumakhumbo imberi waye nibamuchekherakho nibaboola bari, muleembe omuruki wa Bayaudi!'.
\v 30 Nabo nibamufuchakho nibabukula elikada nibamukhuya khu murwe.
\v 31 Ne olunyuma lwa khumuchekherakho nibamufwalula ikaanju nibamufwala ebiefwalo biaye, mani nibamurusiayo nibachia omubaamba.
\p
\v 32 Nabo olwabali barula erwanyi, nibanyoola omuundu wa Kirene owalangwa mbwe Simoni nibamuyika okiinga omusalaba kwaye.
\v 33 Nabo olwa boola abuundu alangwa mbwe Goligota niye khuboola mbwe abuundu we esianga.
\v 34 Nibamuberesia efini eyisasibwemo indusie okhung'wa: Naye olwayayikhombakho siyanyala okhung'wa.
\v 35 Nabo nibamubaamba, mani nibakabana ebiefwalo biaye, nibakhuba ikura: mbwa kanyale okhulirira okabolwa nende omunabii mbwe bakabana ebifwalo biange akari wabwe nekhusiefwalo siange nibakhubira ikura.
\v 36 Mani nibekhala asi nibamulingera ebweneyo.
\v 37 Mani nibakikha akulu khumurwe kwaye akabamukhalakira esiina mubwandiike mbwe UNO NIYE YESO OMURUKI WA BAYAUDI.
\v 38 Abwene ao baliwo abebi babiri nibabaambirwe ninaye, mulala khumukhono muluugi naye ouundi khu mukaada.
\v 39 Nabo ababira ao bamunyeka nibayuya emirwe kiabwe,
\v 40 nibaboola bari, ewe onyala osasia ikhekalu, mani wayumbakha munyaanga chidaru, weonie omwene nikali mbwe oli omwana wa Nasaye ikha okhurula khu musalaba.
\p
\v 41 Kata abakukhani bakhoongo nende abandiiki nende abakhuluundu bamuchekherakho nibaboola bari,
\v 42 Yaonia abaandi ye mwene siayakheonia. Nikaba mbwe ni muruki wa Isiraii, lekhe bulano yekhe asi arule khu musalaba ne efwe khunamusubira.
\v 43 Yesika mu Nasaye lekha amuonie bulano naba namwenya: okhuba yaboola mbwe esie ndi mwana wa Nasaye.
\v 44 Abebi bosi abali nibabaambirwe ninaye bamuboolera keene ako.
\p
\v 45 Bulano okhuchaaka khu sa ya khasasaba esirima sialiwo okhuula isaa ya tisa.
\v 46 Manu khu isaa ya tisa Yeso yalira nende omwoyo mukhongo naboola ari, Eloi, Eloi, lama sabakathan? Nikhwo okhuboola mbwe Nasaye wange Nasaye wange khulwasiana ondekhere?
\v 47 Khwabo abali nibemere ao olwababulira nibaboola bari, omuundu uno alangaanga Eliya.
\v 48 Ne abwene ao mulala khubo yerukha nabukula esiangu niyechusiamo ifini nara khulikada mani namuberesia okhung'wa.
\p
\v 49 Abadoong'a nibaboola bari, lekha abe lekha khulole nikaba mbwe Eliya aneecha okhumuwonia.
\v 50 Yeso olwayamala okhulira khandi nende omwoyo mukhoongo yakhalaka omwoyo.
\v 51 Ne lingeera, isuka yo mukhekalu nikhalikhamo makhabi kabiri okhurula akulu khuula asi: ne esialo nasio nisirengerekha ne echinyaanda nichiadikha.
\v 52 Ne ebirindwa nibiikukha mani emibiri miingi ekia batakatifu abali nibafwa nikilamusibwa.
\v 53 kiarula mubirindwa olunyuma lwa ye okhulamukha mani nachia mudookho litakatifu nabonekhera abaangi.
\p
\v 54 Bulano olwa omusikari nende abo abali naye nibalingeraanga Yeso balola okhurengerekha khwe sialo, nende ebiindu ebio ebiekhola, nibaria lukali nibaboola bari obwadieri uno yali Omwana wa Nasaye.
\p
\v 55 Ne abakhasi baandi baliyo nibalingereranga ale, abaloonda Yeso okhurula Galilaya nibamukhalabanira.
\v 56 Munibo bali Maria Magadalena nende Maria ng'ina Yakobo nende Yoses nende ng'ina baana ba Sebedayo.
\p
\v 57 Olwa ingolobe yoola omuundu muyiinda owa Arimatea olangwa mbwe Yosefu yeecha, Yesi omwene yali omweka wa Yeso:
\v 58 Yachia khu Pilato mani nasaba omubiri kwa Yeso. Abwene ao Pilato nalagira mbwe aberesebwe omubiri.
\v 59 Olwa Yosefu yali nabukule omubiri yakuboya mungubo indafu eya kitani.
\v 60 Mani nakwalisia mung'ani yaye injakha eyayali nayabire mulwanda: naye nasiringisia elikina likhoongo khumuliangiro kwa esirindwa mani nabwao.
\v 61 Ne yaliwo Maria Magadalina nende Maria oundi nibekhale nibachoomere esirindwa.
\p
\v 62 Inyaanga ya khabiri eyiloonda inyaanga yo khwerekekha, abakukhani bakhoongo nende abafarisaayo beecha alala khu Pilato,
\v 63 nibaboola bari, omwami wichulisia mbwe omubacha ula yabolanga, olwayali nasiri omulamu mbwe olunyuma lwe chinyaanga chidaru 'njia olamukha khandi'.
\v 64 Khwelwesio lagira mbwe esirindwa esio silindwe okhuula inyaanga ya khadaru, abeeka baye bareecha esiro bamwiba, mani baboolera abaandu mbwe alamukhe khurula mubafu mani obubacha bumalirikha bwakhaba obubi lukali okhira obwamberi.
\p
\v 65 Pilato nababolera ari, muli nende abaliindi: mubweo muchie mukhole obuliindi kori olwa munyalirwa.
\v 66 Kario nibachia mani nibaliinda esirindwa nibekalao elikina nibarereo obulindi.
\c 28
\cl Omuliango 28
\p
\v 1 Mukhubwa khwa isabaato, olwabwachaaka okhukhia nyaanga ya mberi eya ijuma, yeecha Maria Magadalina nende Maria undi okhulola esirindwa.
\v 2 Ne lingera khwaliwo okhurengerekha khwe esialo khukhoongo: okhuba malaika wo Mwami yeecha okhurula mwikulu niyeecha mani nasiringisia inyuma elikina okhurula khumuliangiro mani naliikhalakho.
\v 3 Ifwani yaye yali nga olumiesu nabio ebiefwalo biaye bilafu kori elinang'ong'o:
\v 4 Ne khulwa oburi abaliindi barengerekha nibaba nga abaandu bafwire.
\p
\v 5 Naye malaika nakalusia naboolera abakhasi ari, muraria dawe eng'we: okhuba manyire mbwe mukoonya Yeso owabambwa.
\v 6 khasi ali ano: okhuba alamukhe kori olwa yaboola. mwiche mulole abuundu owo Mwami yakona.
\p
\v 7 Mani muchie lwangu moboolere abeeka baye mbwe alamuukhe okhurula mubafu: ne lingeera achia imberi weng'we mu Galilaya ebwene eyo muchia omulola, malire obabolera.
\p
\v 8 Nabo nibarula lwangu khusirindwa nende oburi nende isangaalo ikhoongo niberukha okhurerera abeeka baye elikhuwa.
\v 9 Ne olwa bali nibachia obaboolera abeeka baye, lingeera Yeso nabukanana nabo, naboola ari, mireembe mwesi. Nabo nibeecha nibamudira khumakulu nibamwinamira.
\v 10 Abwene ao Yeso nababoolera ari, muraba abari muchie muboolere abasieng'we mbwe bachie mu Galilaya ni ebwene eyo bachia okhundoola esie.
\p
\v 11 Bulano olwabali nibachichaanga, lingeera abandi khubaliindi beecha mudookho nibekesia abakukhani bakhoongo ebiindu bioosi ebiekholekhe.
\v 12 Ne olwa bali nibakhung'anire nende abakhulundu nibakhobare baberesia abasikari echisende chinyiingi,
\v 13 nibaboola bari eng'we muboole mbwe abeeka baye beecha musiro mani nibamwiba kori khwali nikhukona.
\v 14 Ne kano nikoola mumarwi ko muruki efwe khuchia omwekweeda khumulemo oburi bwoosi.
\v 15 Nibabukula echisende nibakhola nga olwabekesibwa ne likhuwa lino liaswana Mubayaudi okhuula inyaanga ino.
\p
\v 16 Abwene ao abeeka ekhumi nende mulala nibabwao nibachia mu Galilaya, mulugulu owa Yeso yali nabalakire.
\v 17 Ne olwa bamulola bamwinamira: arali abaandi khunibo bakanakana.
\v 18 Naye Yeso yeecha nabalomalomera naboola ari, obunyala bwoosi mberesebwe mwikulu nende musialo.
\v 19 Khulwesio muchie, mwekesie ebialo bioosi, nimubabatisia mulira lia Sefwe nende Mwana nende elia Roho omutakatifu:
\v 20 Nimubekesia okhukhola ebiindu bioosi ebia esie mulagira: ne lola, esie ndi nang'we buli lwoosi kata okhuula okhumalirikha khwe sialo. Amina.