\id HEB
\ide UTF-8
\h Ibrani
\toc1 Ibrani
\toc2 Ibrani
\toc3 heb
\mt Ibrani
\c 1

\s (Allah Lah Buik Melalui Anak-Nye)
\p
\v 1 Lah de maso nyo bilek, Allah beulang kali buik kenempat nenek puyang kite melalui padong nabi.
\v 2 tekalo hari-hari teaher nie, Allah buik kenempat kite melalui Anak-Nye nyo lah de peleh-Nye untok menjedi pewaris pucuk segelo sesuatu, nyo melalui-Nye jugo Allah menciptako alam semesta.
\v 3 Enye adolah cahayo kemuliaon Allah ngan gambaran nyo sempurna deri sifat-Nye, Nye pula nyo menopang segelo sesuatu dengan firman kuaso-Nye. Sesodah melakuko penyucion doso-doso, Nye duduk de sebelah kanon Nyo Mahagodong de nempat tinggi.
\p
\v 4 singgo Enye menjedi jouh lobeh tinggi deripodo padong malaikat sabab enye mewarisi namo nyo lobeh tinggi deripodo namo mike.
\v 5 Sabab, pernahkah Allah buik kenempat malaikat, “Kowe adolah Anak-Ke. Ari nie, Ake lah menjedi Bepa-Me”? 
\f + \ft Mazmur 2:7 \f* atau, pernahkah Enye buik tentang mike, “Ake bakal menjedi Bepa bage-Nye, ngan Nye bakal menjedi Anak-Ke.”? 
\f + \ft 2 Samuel 7:14 \f*
\p
\v 6 Cuma hambuk, tekalo Allah memperkenalko Anak sulung-Nye kenempat denia, Nye buik, “Biarlah segelo malaikat Allah menyembah Enye,” 
\f + \ft Ulangan 32:43 \f*
\p
\v 7 Tentang padong malaikat, Allah buik, “Nye membuat malaikat-malaikat-Nye menjedi angen, pelayon-pelayon-Nye menjedi nyala api.” 
\f + \ft Mazmur 104:4 \f*
\p
\v 8 Sedangko tentang Anak-Nye, enye buik, “Tahta-Me, Ya Allah, bakal ado selamo-lamonye. Tungkat kebonoron kerajaon-Me.
\q
\v 9 Kowe mencintai kebonoron ngan membenci kejahaton. Ulenyo iye, Allah, yaitu Allah-Me, lah mengurapi Kowe dengan minyak sukacita melobihi kanti-kanti-Me.” 
\f + \ft Mazmur 45:6-7 \f*
\p
\v 10 Ngan lege, “Kowe, Tuhan, tekalo Kowe lah meletakko dasar behumi, ngan langet bakal sayau, hambuk Kowe bakal tetap ado.
\q
\v 11 Behumi ngan langet bakal rusak upa pakoyon.
\q
\v 12 Upa jubah Kowe bakal melipotnye, ngan upa pakoyon, mike bakal de ganti. Cuma hambuk, Kowe hopi bakal beubah, ngan tahun-tahun-Me hopi perenah beaher.” 
\f + \ft Mazmur 102:25-27 \f*
\p
\v 13 Ngan, kenempat malaikat nyo mone, Allah perenah buik upa nie, “duduklah de sebelah kanon-Ke sampoi Ake meletakko musuh-musuh-Me de bewoh kuaso-Me”? 
\f + \ft Mamur 110:1 \f*
\p
\v 14 Bukankah malaikat adolah roh-roh nyo melayoni nyo de utus untok menolong urang-urang nyo bakal menerino keselamaton?
\c 2

\s (Keselamaton Godong)
\p
\v 1 Ulenyo iye, kite arus lobeh teliti memperhatiko ape nyo sodah kite enggakkonye kite hopi teheret arus.
\v 2 Sabab, sembe ajoron nyo de sampaiko ule padong malaikat tebukti hopi depot de ubah, ngan setiap pelanggaron atau kehopitaatan bakal menerimo hukumon nyo adil,
\v 3 Upamone kite depot lolos munye kite mengabaiko keselamaton nyo godong iye? yaitu, keselamaton nyo pertamo-tamo de beritako ule Tuhan, ngan de buktiko kebonoronnye kenempat kite ule urang-urang nyo mendongor-Nye.
\v 4 Seloin iye, Allah jugo membori kesaksion melalui tando-tando ngan hal-hal ajaib, berbagai mujizat sereta karunia-karunia Roh Kudus nyo de bageko menurut kehendak-Nye.
\s (Yesus Menjedi samo Upa Mendesio untok Menyelamatko Mendesio)
\p
\v 5 Allah hopi menaklukko denia nyo bakal njongok, yaitu denia nyo sedang kita buikko, kenempat padong malaikat.
\v 6 Cuma, ado sikuk urang nyo lah membori kesaksion delom sebuah nas: “siapekah mendesio sehingga Kowe memekerkonye? siapekah anak mendesio sehingga Kowe memedulikonye?
\q
\v 7 Untok setegal, Kowe membuatnye lobeh rendah deripodo malaikat; Kowe memahkotainye dengan kemuliaon ngan hormat.
\q
\v 8 Kowe menaklukko segelo sesuatu de bewoh kakinye.” 
\f + \ft Mazmur 8:5-7 \f* sabab, dengan menaklukko segelo sesuatu de bewoh kaki-Nye, mengka Allah hopi membiarko sesuatu pun nyo hopi takluk kenempat-Nye. Cuma hambuk, kinie kite bolum mengoleh segelo sesuatu takluk kenempat-Nye.
\v 9 Cuma, kite lah mengoleh Yesus nyo untok setegal de buat lobeh rendah deripodo padong malaikat, yaitu Yesus nyo de mahkotai dengan kemuliaon ngan hormat ulenyo lah menderito kemation enggakkonyo ule anugerah Allah, enye depot merasako kemation bage segelo urang.
\p
\v 10 Sodah selayaknye enye nyo bage Enye ngan melalui Enye segelo sesuatu menyempurnako perintis keselamaton anak-anak-Nye melalui penderitaon, untok mengunda mike kenempat kemuliaon.
\v 11 Sabab, beik enye nyo menyuciko maupun mike nyo de suciko, segelonye berasal deri sikuk Bepak; iyelah sababnye Yesus hopi malu menyobut mike sebage dulur-dulur-Nye.
\v 12 Dengan buik: “Ake bakal menyatako namo-Me kenempat dulur-dulur-Ke. De tangah-tangah segelo umat-Me, Ake bakal menyanyiko pujion bage-Me.” 
\f + \ft Mazmur 22:23 \f*
\p
\v 13 Ngan lege: “Ake bakal memotekko keyakinon-Ke kenempat Allah.” 
\f + \ft Yesaya 8:17 \f* ngan lage, “Nielah Ake, serompok anak-anak nyo lah de boriko Allah kenempat-Ke.” 
\f + \ft Yesaya 8:18 \f*
\p
\v 14 Ulenyo anak-anak iye adolah mendesio nyo memiliki deroh ngan dageng, mengka Yesus jugo mengambek bageon delom keadaon mike enggakkonyo melalui kemation-Nye, enye depot membinasako enye nyo memiliki kuaso pucuk kemation, yaitu beles.
\v 15 Ngan, membebasko mike nyo seumur hidopnye de perbudak ule ketakuton bakal kemation.
\v 16 Jedi, jelaslah behwo enye hopi membori pertolongan kenempat padong malaikat, hambuk kenempat keturunon Abraham.
\v 17 Ulenyo iye, delom segelo hal Yesus arus menjedi upa dulur-dulur-Nye, enggakkonyo enye depot menjedi Imam Godong nyo ponuh belos tesihan ngan setia delom pelayanon kenempat Allah. Dengan demikion, enye depot mengunda penobuson pucuk doso-doso umat.
\v 18 Sabab, Yesus dewek menderito tekalo de cuboi, mengka enye depot menolong mike nyo sedang de cuboi.
\c 3

\s (Yesus Lobeh Godong deripodo Musa)
\p
\v 1 Ulenyo iye, dulur-dulur nyo kudus, kowe nyo memiliki bageon delom pantouan sergawi, kolehlah Yesus Sang Rosul ngan Imam Godong pengakuon kite.
\v 2 Nyo setia kenempat Enye nyo lah menetapko-Nye, samo upa Musa nyo setia delom segelo rumah-Nye.
\v 3 Sabab, Yesus de anggap layak untok mendepot kemuliaon nyo lobeh godong deripodo Musa, upa halnye seurang pembengun rumah nyo mendepot kehormaton lobeh godong deripodo rumah iye dewek.
\v 4 Sabab, setiap rumah de bengun ule seseurang, hambuk pembengun deri segelo sesuatu adolah Allah.
\v 5 Musa setia delom segelo rumah Allah sebage seurang pelayon, untok membori kesaksion kenempat hal-hal nyo bakal de kehatoko de kemudion ari.
\v 6 Cuma, Kristus setia sebage Anak delom rumah Allah, yaitu kite, munye kite tetap bepogong toguh podo keyakinon ngan pengharapon nyo kite banggako sampoi aher.
\s (Toruslah Mehilui Allah)
\p
\v 7 Ulenyo iye, upa nyo Roh Kudus buikko, “podo sari nie, munye kowe mendongor suaro-Nye,
\v 8 Jengonlah karasko hatime upa delom pemberontako nyo kowe lakuko podo ari pencubaon de padang gurun.
\v 9 Yaitu tekalo nenek puyangme mencuboi Ake ngan mengoleh perbuaton-perbuaton-Ke selamo empat puluh tahun.
\p
\v 10 Sabab iyelah Ake bemarah kenempat generasi iye ngan buik, ‘Hati mike selalu sosot ngan mike hopi tereti jelon-jelon-Ke.’
\p
\v 11 Jedi, Ake besumpah delom amaroh-Ke: ‘Mike hopi bakal masuk ketempat perhention-Ke.’” 
\f + \ft Mazmur 95:7-11 \f*
\p
\v 12 Behati-hatilah dulur-dulur, jengonlah ado de antaro kowe nyo memiliki hati nyo jahat ngan hopi pecayo, nyo membuatme bepaleng deri Allah nyo hidop.
\v 13 Sebeleknye, nasehatilah sikuk dengan nyo loin setiap ari, selamo lage ado nyo de sobut “sari nie” enggakkonyo hopi ado de antarome nyo de karasko ule tipu daya doso.
\v 14 Kite lah mengambek bageon de delom Kristus, munye kite bepogong toguh podo keyakinon nyo semula sampoi podo ahernye.
\v 15 Upa tetules, “Podo sari nie, munye kowe mendongor suaro-Nye, jengenlah karasko hatime upa delom pemberontakon.” 
\f + \ft Mazmur 95:7b-9 \f*
\p
\v 16 Siapekah urang-urang nyo lah mendongor suaro Allah, hambuk memberontak? Bukonkah mike segelo nyo keluor deri Mesir de bewoh kepemempenon Musa?
\v 17 Ngan, kenempat siapekah Allah bemarah selamo empat puluh tahun? bukonkah kenempat mike nyo berbuat doso sehingga mayat mike begelimpangon de padang gurun?
\v 18 Ngan, kenempat siapekah Allah besumpah behwo mike hopi bakal perenah masuk ketempat perhention-Nye, munye bukon kenempat mike nyo hopi taat?
\v 19 Jedi, kite mengoleh behwo mike hopi depot masuk ulenyo kehopipecayaon mike.
\c 4

\s (Jenji Untok Masuk Kenempat Perhention Allah)
\p
\v 1 Ulenyo iye, selamo jenji untok masuk ketempat perhention-Nye lage belaku, biarlah kite meraso takut, munye mumunye ado de antaro kite nyo gagal mendepotko jenji iye.
\v 2 Memang bonor, kabar beik lah de beritako kenempat kite, upa jugo lah de beritako kenempat mike, hambuk berita nyo mike dongor iye hopi menguntungko mike ulenyo hopi de satuko dengan iman urang-urang nyo mendongornye.
\v 3 Ulenyo kite nyo pecayo, bakal masuk ketempat perhention iye, upa nyo de kehatoko-Nye, “Ake besumpah delom amaroh-Ke: “mike hopi bakal perenah masuk ketempat perhention-Ke,” 
\f + \ft Mazmur 95:11 \f* mengka pekerejaon Allah sodah selesai sejak penciptaon dasar denie nie.
\v 4 Sabab, delom sebuah nas, Allah buik upanio tentang ari ketujuh, “Podo ari ketujuh, Allah berenti deri segelo pekerejaon-Nye.”
\p
\v 5 Cuma hambuk, upa nyo lah de kehatoko Allah, “Mike hopi bakal masuk ketempat perhention-Ke.”
\p
\v 6 Jedi, lage ado kemungkinon untok sebageon urang masuk ketempat perhention, ngan ado sebageon urang nyo sebolumnye lah mendongor kabar beik, hambuk gagal masuk ulenyo kehopitaatan mike.
\v 7 Jedi, sekali lage Allah menetapko sikuk ari tertentu, nyo de sobut “sari nie,” nyo lah de kehatoko Daud jouh hari sebolumnye, “podo sari nie, munye kowe mendongor suaro-Nye, jengonlah karasko hatime upa delom pemberontakkon.” 
\f + \ft Mazmur 95:7-8 \f*
\p
\v 8 Sabab, Munye Yosua sodah membori mike tempat perhention, mengka Allah hopi bakal lage buik tentang suatu ari loin de kemudion ari.
\v 9 Munye upanio, mengka lage ado perhention podo ari sabat untok umat Allah.
\v 10 Untok mike nyo lah masuk ketempat perhention Allah, mike jugo lah beristirahat deri pekerejaonnye, upa nyo Allah lakuko deri pekerejaon-Nye.
\p
\v 11 Ulenyo iye, marolah kite bejuang untok masuk ketempat perhention iye, sehingga pi seurang pun titek ulenyo mehilui contoh kehopitaatan nyo samo.
\v 12 Sabab, firman Allah iye hidop ngan bekuaso, ngan lobeh tajam deripodo pedang bemato dua mone pun. Firman iye menusuk jouh sampoi memisahko jiwa ngan roh, antaro sendi ngan tulang sumsum, sereta sanggup menilai pekeron ngan kehendak hati kite.
\v 13 Hopi ado suatu mahluk pun nyo tekerawo deri pengolehon-Nye. Sebeleknye, segelo sesuatu telanjong ngan pi tekerawo deri mato-Nye. Kenempat-Nyelah kite arus membori pertanggungjawabon pucuk segelo nyo kite lakuko.
\s (Yesus Kristus Adolah Imam Godong Kite)
\p
\v 14 Ulenyo iye kite mempunyoi Imam Godong Agung nyo sodah noek ke serga, yitu Yesus, Anak Allah, marolah kite torus bepogong toguh podo pengakuon kite.
\v 15 Sabab, kite hopi memiliki Imam Godong nyo hopi depot memahami kelamahon-kelamahon kite, hambuk kite memiliki Imam Godong nyolah de cuboi delom segelo hal, samo upa kite, hambuk enye hopi bedoso.
\v 16 Ulenyo iye, dengan keyakinon, marolah kite njongok menghamperi tahta anugerah enggakkonyo kite menerimo belos tesihan ngan menomuko anugerah untok menolong kite, tekalo kite membutuhkonye.
\c 5

\p
\v 1 Sabab, setiap imam godong nyo de peleh deri antaro mendesio de tunjuk untok menjedi wakel mendesio delom hal-hal nyo berkenaan dengan Allah, enggakkonyo enye depot mempersembahko persembahon-persembahon ngan kurban-kurban pucuk doso-doso.
\v 2 Ulenyo imam godong jugo ponuh dengan kelamahon, mengka enye jugo depot besikap lombut terhadop urang-urang nyo hopi memiliki pengetahuon ngan mudah tesosot.
\v 3 Iye sababnye, enye wajib mempersembahko kurban penghapuson doso, bukon anyo untok umat, hambuk jugo untok badannye dewek.
\v 4 Hopi ado imam godong nyo depot mengambek kehormaton nie untok badannye dewek, enye anyo menerimonye tekalo enye de pantou ule Allah, upa halnye Harun.
\v 5 Demikion jugo Kristus hopi memuliako badan-Nye dewek untok menjedi seurang Imam Godong, hambuk ule Enye nyo buik kenempat-Nye, “Kowe adolah Anak-Ke. Podo ari nie Ake lah menjedi Bepa-Me.” 
\f + \ft Mazmur 2:7 \f*
\p
\v 6 De bageon loin enye jugo buik, “Kowe adolah Imam untok selamo-lamonye, menurut peraturon Melkisedek.” 
\f + \ft Mazmur 110:4 \f*
\p
\v 7 Delom hidopnye sebage mendesio, Yesus mempersembahko doa maupun permohonan dengan ratopon ngan aek mato, kenempat Enye nyo depot menyelamatko-Nye deri kemation. Ngan, enye de dongor ulenyo kesalehon-Nye.
\v 8 Walaupun Yesus adolah Anak, hambuk Nye belajor untok taat melalui penderitaon nyo de alami-Nye.
\v 9 Dengan lah de sempurnako, Nye menjedi sumber keselamaton kekal bage segelo urang nyo taat kenempat-Nye,
\v 10 Ngan Nye lah de pantaou ule Allah sebage Imam Godong sesuai peraturon Melkisedek.
\s (Bejelon Menuju Kedewasaon Rohani)
\p
\v 11 Ado lobot nyo depot de kehatoko tantang hal nie. Cuma hambuk, sulet untok menjelaskonye ulenyo kowe sodah menjedi lamban untok mendongor.
\v 12 Sabab, sekalipun saat nie kowe searusnye sodah menjedi pengajor, hambuk ternyato kowe lage membutuhko seseurang untok mengajorime lage tentang prensep-prensep dasar firman Allah. Kowe lage membutuhko susu, bukon makonon nyo padat.
\v 13 Sabab, urang nyo hidop deri susu adolah urang nyo bolum bepengalaman delom memami ajaron tentang kebonoron, enye lage abong.
\v 14 Cuma hambuk, makonon padat adolah untok urang-urang nyo sudah desawa, yaitu mike nyo sodah melateh indera mike untuk membedako ape nyo beik ngan nyo jahat.
\c 6

\p
\v 1 Ulenyo iye, maro kite tinggalko pngajaron dasar tentang Kristus ngan melangkoh kenempat kedewasaon, hopi lage mengulang-ngulang ajoron dasar tentang pertubaton deri perbuaton nyo te'elek ngan iman kepodo Allah;
\v 2 Ajoron tentang pembasuhon ngan penumpangon tangon; ajoron tentang kebangketon urang te'elek ngan hukumon kekal.
\v 3 Ngan, iyelah nyo bakal kite lakuko, munye Allah mengizinkonye.
\v 4 Sabab, hopi mungkin mempertubatko belek urang-urang nyo sebolumnye lah mendepotko pencerahon, lah merasako karunia sergawi, lah mengambik bageon serompok Roh Kudus,
\v 5 Mengicapi kebeikon firman Allah, ngan merasako kuaso deri denia nyo bakal njongok.
\v 6 Munye mike meninggalko jelon Kristus, mengka mustahil untok memperbarui belek pertubaton mike ule mike sedang menyalibko Anak Allah untok nyo kedua kalinye ngan mempermaluko-Nye secaro tebuka.
\v 7 Sabab, tanoh nyo menyerap lobot aek hujan nyo titek de pucuk nye, serta menghaselko panenan nyo bemanfaat bage mike nyo menggarapnye, bakal menerimo berkat deri Allah.
\v 8 Cuma, munye tanoh iye anyo menumbuhko unok ngan somok-somok, mengka tanoh iye hopi beguna ngan parok dengan kutuk, ngan podo ahernye de tunu.
\p
\v 9 Cuma hambuk, dulur-dulurke nyo kukasehi, sekalipun kamie buik upa nio, kamie meyakini hal-hal nyo lobih beik tentang kowe, yaitu hal-hal nyo behubungon dengan keselamaton.
\v 10 Sabab, Allah bukon hopi adel. Enye hopi melupako segelo pekerejaon ngan kasihme nyo kowe tunjukko demi namo-Nye dengan melayani urang-urang kudus upa nyo maseh kowe lakuko.
\v 11 Kowe ndelok maseng-maseng kowe menunjukko ketekunon nyo samo untok memiliki janinon pengharapon nyo sempurna sampoi aher,
\v 12 Enggak konye kowe jengon menjedi penyogon, hambuk mehalui teladan urang-urang nyo lah mewarisi jenji-jenji Allah melalui iman ngan ketekunon.
\s (Jenji Allah hopi perenah beubah)
\p
\v 13 Tekalo Allah bejenji kenempat Abraham, Enye bejenji pucuk badan-Nye dewek ule hopi ado nyo lobih godong deripodo badan-Nye.
\v 14 Allah buik, “Ake pasti bakal memberkatime,” ngan “Ake pasti bakal melipotgandako keturunanme.”
\v 15 Ngan, lah menantiko dengan sabar, Abraham menerimo jenji iye.
\v 16 Mendesio besumpah demi seseurang nyo lobih godong deripodo badanye dewek, ngan sumpah deboriko sebagai penegason untok mengaheri segelo perbentohon.
\v 17 Jedi, tekalo Allah amat menunjukko dengan lobih meyakinko kenempat ahli waris jenji-Nye behwo tujuan-Nye hopi bakal beubah, Enye menjamin dengan membuat sumpah
\v 18 Sehinggo dengan dua hal nyo hopi depot beubah iye, nyo mengenainye Allah mustahil pelato, kite nyo njongok dalak perlindungon bakal mendepotko dorongan nyo godong untok bepogong toguh podo pengharapon nyo deboriko kenempat kite.
\v 19 Pengharopon nyo kite miliki nie adolah jangkar bage jiwo kite, kuat ngan pesti, nyo menombus masuk sampoi ke balik tirai,
\v 20 Kenempat nyo lah de masuki Yesus sebage pembuka jelon bage kite untok menjedi Imam Godong untok selamo-lamonye, sesuai dengan peraturon Melkisedek.
\c 7

\s (Imam Melkisedek)
\p
\v 1 Sabab, Melkisedek, Rajo Salem ngan imam Allah Nyo Mahatinggi, menomui Abraham lah Abraham belel deri membantai rajo-rajo, ngan memberkatinye.
\v 2 Kenempat Melkisedek, Abraham jugo Memboriko sepersepuluh deri segelo reto ramposon nyo de perulehnye. Pertamo-tamo, namo Melkisedek retinye, “Rajo kebonoron”, Selanjutnye, “Rajo Salem” nyo retinye “Rajo Damai.”
\v 3 Enye hopi be bepak atau be induk, hopi besilsiloh, ngan hidopnye hopi beaol atau beaher. Cuma hambuk, upa Anak Allah, enye bakal menjedi imam untok selamo-lamonye.
\p
\v 4 Perhatikolah, betapa agungnye urang nie, bahkan Abraham leluhor kite pun menyerahko kenempatnye sepersepuluh deri segelo hasel ramposon perangnye.
\v 5 Menurut Hukom Torat, anak-anak Lewi nyo menerimo jabaton imam behak mngumpulko persepuluhon deri umat nyo adolah dulur-dulur mike, waloupun mike samo-samo keturunon Abraham.
\v 6 Cuma, Melkisedek nyo hopi deri keturunon Lewi, menerimo persepuluhon deri Abraham ngan memberkati enye nyo memogong jenji-jenji Allah.
\v 7 Ngan, hopi depot de sangkol, nyo lobih rendah de berkati uleh nyo lobih tinggi.
\v 8 Delom sikuk hal, persepuluhon de terimo ule mendesio fana nyo pacok te'elek. Cuma, delom tong nie, deterimo ule enye, nyo depastiko hidop.
\v 9 Ulehnyo iye, depot dekehatoko behwo kaum Lewi nyo behak menerimo persepuluhon pun jugo membayar persepuluhon mike melalui Abraham,
\v 10 Sabab tekalo Melkisedek menomuinye, Lewi lage ado delom badan nenek puyangme.
\p
\v 11 Kinie, munye ksempurnaon pacok de capai melalui keimanan Lewi (Nyo ulenyo, umat Israel memperoleh Hukom Torat), untok ape ado imam loin nyo arus de bangketko menurut aturon Melkisedek, ngan bukon imam deri garis keturunon Harun?
\v 12 Sabab, munye aturon keimaman beubah, mengka hukom Torat pun arus de ubah.
\v 13 Urang nyo sedang kite buikko nie berasol deri suku nyo loin, ngan hopi ado seurang pun deri suku-Nye nyo perenah betugas sebage pelayon altar.
\v 14 Sabab, sodah jelas behwo Tuhan kite berasol deri suku Yehuda, suku nyo tentangnye Musa hopi perenah ngehatoko hal ape pun nyo bekaitan dengan padong imam.
\s (Yesus adolah Imam upa Melkisedek)
\p
\v 15 Segelo tong nie menjedi semakin jelas tekalo kite ngoleh munculnye seurang Imam loin, nyo mirip dengan Melkisedek,
\v 16 Nyo menjedi imam bukon bedasarko persyaraton kturunon jasmani, hambuk berdasarko kuaso khidupon nyo hopi depot binaso.
\v 17 Sabab, Kitan Suci bersaksi tentang Enye: “Kowe adolah Imam untok selamo-lamonye, menurut peraturon Melkisedek.”
\p
\v 18 De sikuk sisi, peraturon nyo bilek sodah beraher ul memiliki kelamahon ngan hopi beguna,
\v 19 Ngan uleh hukom iye hopi menyempurnako ape pun. Cuma, de sisi nyo loin, ado pengharopon nyo lobih beik nyo de perkenalko kenempat kite, ngan pengharapon iye menarek kite untok memaroki kenempat Allah.
\p
\v 20 Ngan ule pengharapon iye de unda kenempat kite dengan sebuah sumpah- imam nyo loin menjedi imam hopi de sertai sumpau.
\v 21 Cuma, enye menjedi imam dengan sumpah nyo de buat ule Enye nyo buik kenempat-Nye, “Tuhann lah besumpah ngan Enye hopi bakal beubah pekeron: ‘Kowe adolah Imam untok selamo-lamonye.” 
\f + \ft Mazmur 110:4 \f*
\p
\v 22 Ule sumpah nie, Yesus lah menjedi jaminon deri perjenjion nyo lobih beik.
\p
\v 23 Sebolumnye, ado lobot imam sehingga tekalo ado imam nyo te'elek, ado nyo depot menggantikonye.
\v 24 Cuma, Yesus memogong keimanan secaro tetap selamonye ule Enye bakal terus hidop selamonye.
\v 25 Munye upa iye, Yesus depot menyelamatko dengan sempurna mike nyo njongok kenempat Allah melalui-Ny, ulh Enye selalu hidop untok bedoa bage mike.
\p
\v 26 Imam Godong upa iylah nyo kite butuhko, yaitu Imam Godong nyo kudus, hopi becela, murni, de pisahko deri urang-urang bedoso, ngan de tinggiko melobihi tingkat-tingkat sergawi.
\v 27 Yesus hopi upa padong imam godong nyo loin. Mike arus mempersembahko kurban setiap ari, pertamo bage doso mike dewek, mengka bage doso-doso umat. Cuma, Yesus hopi perelu melakukonye. Enye anyo mempersembahko kurban sekali untok selamonye, yaitu badan-Nye dewek.
\v 28 Hukom Musa menetapko mendesio nyo ponuh kelamahon untok menjedi imam-imam godong. Cuma hambuk, sumpah nyo berasol deri Allah, nyo njongok lah hukom Musa, nyo lah dejediko sempurna sampoi selamo-lamonye.
\c 8

\s (Yesus adolah Imam Godong Perjenjion Nyo Beheru)
\p
\v 1 Nielah pokok utamo pemboekkon kite: kite mempunyoi Imam Godong nyo duduk de sebelah kanon tahta Nyo Mahatinggi de serga.
\v 2 Enye melayoni de ruang Mahakudus ngan de kemah suci sejati nyo de togokko ule Allah dewek, bukon ule mendesio.
\p
\v 3 Ule setiap imam godong de tunjuk untok mempersembahko pemborian ngan kurban, mengka Imam Godong nie jugo arus mengunda sesuatu untok de persembahko.
\v 4 Munye Imam Godong nie hidop de behumi, Enye hopi bakal menjedi imam samo sekali sabab de behumi sodah ado imam-imam nyo mempersembahko pemborian sesuai Hukom Torat,
\v 5 Yaitu mike nyo beribadah menurut tiruon ngan bayang-bayang deri hal-hal sergawi upa tekalo Allah memperingotko Musa tekalo enye hendak menogokko kemas suci: “Pastikolah kowe membuat segelo sesuatunye sesuai dngan rancangon nyo lah kutunjukko kenempat me de pucuk gunong.”
\v 6 Cuma, Kinie, Yesus menerimo tugas pelayonon nyo jouh lobih mulia ule perjenjion beheru nyo de perantarai ule-Nye iye jugo jouh lobih tinggi ngan detetapko berdasarko pado jenji-jenji nyo lobeh beik.
\p
\v 7 Sabab, munye perjenjion nyo pertamo hopi mengandung kesalahon, hopi nak ado nyo membutuhko perjenjion nyo keduo.
\v 8 Ulenyo Allah mendepoti kesalahon mendesio, Enye boek, “koleklah, saatnye bakal sampoi, ujo Tuhan, tekalo Ake nak mengadako sebuah perjenjion beheru ngan kaum Israel ngan kaum Yehuda.
\q
\v 9 Hopi upa perjenjion nyo lah Kuadako ngan nenek moyang mike, nyoiye tekalo ake menunton mike ngan tangon-Ke untok memimpen mike keluor jak tanoh mesir. Ulenyo mike hopi setia pado perjenjion nyo kuboriko, mako Ake hopi memeduliko mike, ujo Tuhan.
\q
\v 10 Nielah perjenjion nyo bakal Kuadako ngan kaum Israel setelah masa iye, ujo tuhan: Ake bakal menaruh hukom-hukom-ke delom pikiron mike, ngan Ake bakal menuliskonye pado hati mike. Ake bakal menjedi Allah mike, ngan mike bakal menjedi murid-Ke.
\q
\v 11 Mike jugo hopi bakal lagi mengajor sesamo bengesonye atau dolornye ngan boek, Kenallah Tuhan ulenyo segelo urang bakal mengenal Ake, jak nyo kecik sampoi nyo paling godong.
\q
\v 12 Sabab, Ake bakal berbelas kasihan atas pelanggaron ngan doso-doso mike. Ngan, Ake pun hopi bakal lagi mengingot kesalahon-kesalahon mike.”
\p
\v 13 Tekaloh Allah mengucapko perjenjion beheru, Nye membuat perjenjion nyo lamo hopi berlaku lagi. Ngan, ape nyo sudah hopi berlaku lagi ngan usang bakal segera lenyap
\c 9

\s (Ibadah Delom Perjenjion Lamo)
\p
\v 1 Bahkan perjenjion nyo lamo pun berisi tentang peraturon ibadah ngan tempat kudus nyo ado de behumi.
\v 2 Ulenyo demikion Kemah Allah depersiapko: bageon luor, nyo podonye terdepot lampu, meja, ngan roti sajion, de sobut Tempat Kudus.
\v 3 De belakong tirai kedua adolah bageon kemah nyo de sobut Ruang Mahakudus,
\v 4 De tempat iye terdepot altar pedupaan nyo terbuat deri emas ngan Tabut Perjenjion nyo segelo sisinye de lapisi emas. De delom tabut iye, terdepot sebuah kendi emas nyo berisi manna, tungkat Harus nyo perenah betunas, serta dua lempeng betu perjenjion.
\v 5 De pucuknye, ado dua kerub kemuliaon nyo menaungi tutup pendamaion, hambuk saat nie bukonlah waktu tepat nak mengomongkonye secaro terperinci.
\p
\v 6 Lah segelonye iye de persiapko sedemikion rupa, padong imam masuk ke bageon pertamo deri kemah iye secaro rutin, nak melakuko pelayanon ibadah kenempat Allah.
\v 7 Cuma hambuk, anyo imam godong bae nyo de perbolehko masuk kebageon kedua deri kemah iye, iye pun anyo setahun sekali, ngan mengunda deroh nak depersembahko kenempat Allah demi badannye dewek ngan demi doso-doso umat nyo de lakuko tanpo sengajo.
\v 8 Roh Kudus menyatako kenempat kite behwo jelon menuju Ruang Mahakudus bolum tebuka selamo Ruang Kudus lage ado,
\v 9 Hal iye adolah kiason mengenai zaman nie. Demikion jugo berbagei pemborion ngan kurban-kurban nyo de persembahko hopi depot menyempurnako nurani urang-urang nyo beribadah,
\v 10 Sabab anyo bekaiton dengan makonon, minumon, ngan ritual pembesuhon nak badan jasmani nyo berlaku sampoi tibanye waktu pembaharuon.
\s (Ibadah delom Perjenjion nyo Beheru)
\p
\v 11 Cuma, tekalo Kristus njongok sebagei Imam Godong pucuk hal-hal beik nyo bakal njongok, Enye masuk melalui tempat Kudus nyo lobih godong ngan lobih sempurna; nyo hopi de buat ule tangon mendesio ngan bukonlah suatu ciptaon.
\v 12 Enye masuk ke Ruang Mahakudus sikuk kali untok selamonye, bukon dengan mengunda deroh kambing jenton ngan deroh anak sapi, hambuk dengan mengunda deroh-Nye dewek sehingga mendepotko penebuson nyo kekal.
\v 13 Sabab, munye pemercikon deroh kambing jenton ngan sapi jenton, ngan jugo abu anak sapi betina kenempat urang nyo najis depot menyuciko badan jasmani mike,
\v 14 Lobih-lobih lage deroh Kristus, yaitu Enye nyo melalui Roh nyo kekal mempersembahko badan-Nye sebagei kurban nyo hopi becacat kenempat Allah untok menyuciko hati nurani me deri perbuaton sio-sio empuknye kowe depot melayoni Allah nyo hidop.
\p
\v 15 Untok aloson nielah Kristus menjedi perantaro deri perjenjion nyo beheru empuknyo mike nyo lah de pantau Allah boleh menerimo warison kekal nyo lah de jenjiko-Nye; sabab sebuah kemation lah terjedi untok menobus mike deri pelanggaron-pelanggaron nyo mike lakuko de bewoh pernjenjion nyo pertamo.
\v 16 Munye ado surat wasiat, mengja arus ado kemation deri urang nyo membuatnye.
\v 17 Sabab, surat wasiat anyo belaku munye urang nyo membuatnye sodah te'elek; surat iye hopi memiliki kuaso selamo urang nyo membuatnye lage hidop.
\v 18 Iyelah sababnye, mengka perjenjion pertamo pun hopi belaku tanpo kurban deroh.
\v 19 Sabab, lah Musa memboritahuko setiap perentah delom Hukom Torat kenempat umat Israel, enye mengambek deroh anak sapi ngan kambing mengka mencampurnye dengan aek. Ngan, menggunako kain wol abang serta sebetong hisop, enye memercikkonye podo kitab Torat ngan podo segelo umat.
\v 20 Sambel buik, “Nielah deroh deri perjenjion nyo lah Allah perentahko untok kowe taati.”
\v 21 Ngan caro nyo samo, Musa jugo memerciko Kemah Suci ngan segelo perlengkaponye nyo de gunako delom ibadah dengan deroh.
\v 22 Menurut Hukom Torat, hamper segelo sesuatu arus de suciko dengan deroh, ngan tanpo adonye penumpahon deroh, hopi bakal ado pengampunon.
\s (Yesus Kristus adolah kurban penghapus doso)
\p
\v 23 Ulenyo iye, segelo sesuatu nyo melambangko hal-hal segawi sajo perlu de suciko dengan hal nie, hambuk segelo sesuatu nyo de serga de suciko dengan kurban nyo lobih beik.
\v 24 Sabab, Kristus hopi masuk ke delom Ruang Mahakudus nyo de buat ule tangon mendesio, nyo anyolah tiruon deri nyo sebonornye, hambuk enye masuk ke delom serga iye dewek ngan kinie berado de hadopon Allah demi kite.
\v 25 Kristus jugo hopi mempersembahko badan-Nye bekali-kali, upa imam godong nyo arus masuk deri tahun ke tahun dengan mengunda deroh nyo bukon derohnye dewek.
\v 26 Munye upanio, Kristus arus menderito beulang kali sejak denia de ciptako. Cuma hambuk, Kristus anyo menyatako badan-Nye sikuk kali bae untok selamo-lamonye podo zaman aher nie demi menghapus doso, dengan caro mempersembahko badan-Nye dewek.
\v 27 Upa mendesio, nyo de tentuko untok te'elek sikuk kali bae ngan sesodah iye menghadop penghakimon,
\v 28 Demikion jugo Kristus; Enye de persembahko anyo sikuk kali bae untok menanggung doso lobot urang, ngan bakal njongok untok kedua kalinye, bukon untuk menanggung doso, meloinko untok mengunda keselamaton bage mike nyo menantiko Enye.
\c 10

\s (Pengurbanon Yesus Kristus Sekali untok slamo-lamonye)
\p
\v 1 Uleh Hukom Torat anyo memiliki bayongon tentang hal-hal beik nyo bakal njongok ngan bukon gambaron sesungguhnye deri hal-hal iye, mengka dengan kurban-kurban nyo samo, nyo mike persembahko torus-menorus setiap tahun, hukom iye hopi bakal perenah depot menyempurnako mike nyo njongok parok.
\v 2 Munye sebeleknye, bukonkah pemborion persembahon seharusnye sodah hopi lage de lakuko ule sekali de suciko, urang-urang nyo beribadah iye hopi lage merasako adonye kesadaron bakal doso?
\v 3 Cuma hambuk, delom persembahon kurban iye, mike justru de ingotko bakal doso-doso mike deri tahun ke tahun.
\v 4 Sabab, deroh lombu jenton ngan kambing jenton hopi pacok depot menghapus doso.
\p
\v 5 Ulenyo iye, tekalo Kristus njongok ke delom denia, Enye bekehato, “Kurban ngan persembahon hopi kowe amatko, hambuk sebuah badan lah kowe siapko bage-Ke;
\q
\v 6 Kowe hopi bekenan kenempat kurban bakaran ngan kurban penghapus doso.
\q
\v 7 Mengka Ake buik, “Nielah Ake: Ado tetules tentang Ake delom gulungon kitab, Ake njongok untok melakuko kehendak-Me ya Allah.” 
\f + \ft Mazmur 40:7-9 \f*
\p
\v 8 Lah Kristus membuikko: “kurban ngan persembahon, serta kurban bakaron ngan kurban penghapus doso hopi kowe amatko, ngan hopi bekenan kenempat-Me,” (Nyo de persembahko sesuai dengan hukom Torat)
\v 9 Enye menambahko, “Nielah Ake. Ake njongok untok melakuko kehendak-Me.” Jedi, Yesus menghapusko nyo pertamo untok menetapko nyo kedua.
\v 10 Ule kehendak-Nye, kite de kudusko melalui pengurbanon badan Yesus Kristus, sekali untok selamo-lamonye.
\p
\v 11 Setiap imam melakuko pelayonon hariannye deri waktu k waktu untok mempersembahko kurban nyo samo, nyo hopi perenah depot menghapusko doso;
\v 12 Hambuk Kristus, lah mempersembahko kurban ul doso, sikuk kali bae untok selamo-lamonye, Enye duduk de sebelah kanon Allah.
\v 13 Ngan menantiko saat musuh-musuh-Nye de jediko pijakon kaki-Nye.
\v 14 Dengan sikuk kurban, Kristus menyempurnako mike nyo lah de suciko-Nye untok selamo-lamonye.
\v 15 Roh Kudus jugo menjedi saksi untok kite tenang hal nie sabab lah buik,
\q
\v 16 “Nielah perjenjion nyo bakal kuadako dengan umat-Ke lah masa iye, ujo Tuhan: ‘Ake bakal menaruh hukom-hukom-Ke delom hati mike, ngan Ake bakal menuleskonye delom pekeron mike.” 
\f + \ft Yeremia 31:33 \f*
\p
\v 17 Mengkah, Enye melanjutko, “Ake bakal melupako doso-doso mike ngan hopi bakal lage mengingot kejahaton mike.”
\p
\v 18 Kinie, tekalo pengampunon bage segelonye iye lah tersedia, mengka hopi de perluko lage kurban untok menobus doso.
\s (Memarokilah kenempat Allah)
\p
\v 19 Sabab iye, dulur-dulurke, ule kinie kite memiliki keberanion untok masuk ke delom Ruang Mahakudus ule pengurbanon deroh Yesus,
\v 20 Dengan jelon nyo beheru ngan hidop, nyo lah de bukako ule Yesus bage kite melalui tirai, yaitu badan-Nye,
\v 21 Ngan ulenyo kite lah mempunyoi seurang Imam Godong nyo mengepalai rumah Allah,
\v 22 Mngka mailah kite memaroki kenempat Allah dengan hati nyo tulus delom keyakinon iman nyo ponuh, dengan hati kite nyo lah de bersihko deri nurani nyo jahat, ngan badan nyo lah de besuh dengan aek murni.
\v 23 Maro kite bepogong toguh podo pengakuon pengharapon kite ule Allah nyo menjenjiko nye adolah setia,
\v 24 Maro kite mendalak caro untok depot saleng mengasihi ngan mengerjako perbuaton-perbuato beik,
\v 25 Ngan jengonlah menjouhko diri deri pertomuon ibadah kite besamo, upa nyo de biasako ule beberape urang. Cuma hambuk, marolah kite saleng menguatko, terlobih lage ule kowe tahuko behwo ari Tuhan sodah semaken parok.
\s (Jengon Melawon Allah)
\p
\v 26 Sabab, munye dengan sengajo kite tetap berbuat doso sesodah mendepotko pengetahuon tentang kebonoron, mengka hopi ado lage kurban untok menghapus doso-doso iye.
\v 27 Nyo ado anyolah penantion nyo menakutko bakal penghakimon ngan kobaran api nyo bakal membinasako musuh-musuh Allah.
\v 28 Bedasarko kesaksion deri dua atau tiga urang saksi, siape pun nyo hopi menaati Hukom Musa bakal de hukom mati tanpo mendepot belos tesihon.
\v 29 Munye upa nie, betapa lobih beratnye penghukumon nyo layak metinjak-tinjak Anak Allah, ngan nyo menganggap najis deroh perjenjion nyo lah menguduskonye, ngan nyo menghina Roh anugerah Allah?
\v 30 Sabab, kite mengenal Enye nyo buik, “Pembeloson adolah hak-Ke; Ak bakal menuntut pmbeloson.” Enye jugo buik, “Tuhan bakal menghakimi umat-Nye.”
\v 31 Alangko mengrikonye munye kite titek ke delom tangon Allah nyo hidop.
\s (Peliharolah Keberanion ngan Kesabaron)
\p
\v 32 Cuma hambuk, ingotlah ari-ari nyo lah lewat, lah kowe mendepot pencerahon, kowe betahan delom perjuanganme menanggung penderitaon nyo berat.
\v 33 Kadang-kadang, kowe de hina ngan de aniaya secaro tebuka de depan lobot urang, ngan kadang-kadang kowe jugo turut de delom penderitaon urang-urang nyo d perlakuko upa iye.
\v 34 Kowe jugo berbelostesihon kenempat mike nyo de penjaro, bahkan menerimo dengan sukacita tekalo reto milikme de rampok ule kowe tahuko behwo kowe mempunyoi reto nyo lobih beik ngan kekal.
\v 35 Ulenyo iye, jengonlah kowe mencampok keyakinonme ule keyakinonme iye mendetongko pahalo nyo godong.
\v 36 Sabab kowe membutuhko ketekunon untok melakuko kehendak Allah sehingga kowe mendepotko ape nyo de jenjiko-Nye.
\v 37 Sabab,’ Hopi lamo lage, Enye nyo sedang njongok, bakal sampoi, ngan hopi bakal menunda.
\q
\v 38 Cuma, urang-Ke nyo bonor bakal hidop ule iman. Ngan, munye enye mundur ketakuton, Mengka jiwo-Ke hopi bakal bekenan kenempatnye.”
\p
\v 39 kite bukonlah urang -urang nyo undur kenempat kebinasaon, meloinko urang-urang nyo beiman kenempat pemeliharaon jiwa.
\c 11

\s (Iman)
\p
\v 1 Iman adolah jaminon pucuk segelo sesuatu nyo kite harapko, ngan bukti deri segelo sesuatu nyo hopi tekelik.
\v 2 Sabab, ule iman mikelah urang-urang podo zaman bilek memperuleh pujion.
\v 3 Ule iman, kite tereti behwo alam semesta de ciptako dengan firman Allah. Jedi, ape nyo tekole hopi terbuat ule ape nyo tekole pula.
\p
\v 4 Ule iman, Habel mempersembahko kenempat Allah kurban nyo lobih beik deripodo nyo de persembahko Kain. Melalui persembahonye iye, Habel memperoleh kesaksion nyo beik deri Allah sebage urang bonor; Allah memboriko kesaksion iye dengan menerimo kurban persembahonye. Ngan, ule imannye, meskipun enye te'elek, Habel lage depot buik.
\p
\v 5 Ule iman, Henokh de angkot empuknye enye hopi arus mengalami kemation ngan enye hopi de tomuko ule Tuhan lah mengangkotnye; ule sebolum de angkot, enye mendepot kesaksion sebage urang nyo menyenangko Allah.
\v 6 Hopi mungkin menyenangko Allah tanpo iman, sabab siape pun nyo parok kenempat Allah arus pecayo behwo Allah ado, ngan behwo Allah membori pahala kenempat mike nyo mendalak Enye.
\p
\v 7 Ule iman, lah de peringotko ule Allah tentang peristiwo nyo bolum enye koleh, Nuh dengan gentar ngan taat membengun sebuah bahtera untok menyelamatko keluarganye. Dengan nie, Nuh menghukom denia ngan menjedi pewaris kebonoron nyo sesuai dengan imannye.
\p
\v 8 Ule iman, Abraham tekalo de pantou Tuhan, taat untpk bejelon ke suatu tempat nyo bakal de boriko sebage milik pusakanye. Ngan, enye bejelon, mengka hopi tahuko kemone enye bakal bejelon.
\v 9 Ule iman, enye bejelon ngan tinggal de tanoh nyo de jenjiko upa tinggal de tanoh asing, yaitu de delom kemah serompok Ishak ngan Yakub; padong pewaris deri jenji nyo samo,
\v 10 Sabab Abraham sedang nyo mempunyoi fondasi, nyo perancang ngan pembengunye adolah Allah.
\v 11 Ule iman, Sara menerimo kemampuon untok bunting ngan melaherko anak, meskipun enye mandul ngan sodah terlalu tuha untok melaherko, sabab Sara menganggap Enye nyo lah bejenjo kenempatnye adolah setia.
\v 12 Ulenyo iyelah, deri sikuk urang nyo sodah sajo tuha ngan hamper te'elek, laherlah keturunon nyo lobotnye upa bintang de langet ngan nyo jumlahnye hopi tehitung upa butiron bungen de pantai.
\p
\v 13 Mike segelo nie lah te'elek delom iman dngan hopi mndepot ape nyo de jenjiko, hambuk mike mengoleh ngan menyambut jenji-jenji iye deri jouh, dengan mengetahui behwo mike adolah padong pendetong ngan urang asing de behumi.
\v 14 Pembuikon mike nyo upa iye menunjukko dengan jelas behwo mike sedang mendalak sebuah tanoh aek bage mike.
\v 15 Ule, munye nyo mike pekerko adolah negeri nyo mike tinggalko sebolumnye, mengka mike pacok bae belek lage ke kiun.
\v 16 Cuma, mike mendelokko suatu negeri nyo lobih beik, yeitu negeri sergawi. Ulenyo iyelah, Allah hopi malu de sobot sebage Allah mike sabab Enye sodah menyediako sebuah kota bage mike.
\p
\v 17 Ule iman, tekalo Tuhan mengujinye, Abraham menyerahko Ishak sebage kurban; enye nyo sodah menerimo jenji-jenji iye rela mempersembahko anak tunggalnye.
\v 18 Tentang anak iye, Allah perenah buik, “Dengan namo Ishaklah keturunon me bakal de sobut.”
\v 19 Abraham menaruh pecayonye kenempat Allah, bahkan Allah pacok membangketko urang te'elek. Ibaratnye, Abraham lah mendepotko Ishak belek deri te'elek.
\p
\v 20 Ule iman, Ishak memberkati masa depan Yakub ngan Esau.
\p
\v 21 Ule iman, Yakub, menjelang kemationnye, memberkati anak-anak Yusuf. Enye menyembah kenempat Allah dengan besandor podo kepalo tungkatnye.
\v 22 Ule iman, Yusuf, podo aher hidopnye, buik tentang keluornye bengeso Israel deri Mesir ngan membori perentah sehubungan dengan tulang-tulangnye.
\p
\v 23 Ul iman, Musa tekalo enye laher, de kerawoko selamo tiga bulan ule induk bepaknye. Mike ngoleh behwo Musa adolah abang nyo sajo manes, ngan mike hopi takut terhadop perentah rajo.
\v 24 Ule iman, Musa lah tumbuh enye besak, menolah de sobut anak deri putri Firaun.
\v 25 Enye lobih memeleh menderito serompok umat Allah deripodo menikmati kesenangon doso nyo anyo setegal,
\v 26 Enye menganggap behwo kehinaan Kristus lobih berego deripodo segelo kekayaon Mesir sabab Musa mengoleh kenempat pahalo nyo bakal njongok.
\v 27 Ule iman, Musa meninggalko Mesir pi raso takut terhadop murko rajo Firaun seolah-olah enye depot mengoleh Enye nyo hopi tekelek iye.
\v 28 Ule iman, Musa melaksanako paskah ngan pemercikon deroh sehingga malaikat kemation jengon merabo bengeso Israel.
\p
\v 29 Ule iman, bengeso Israel bejelon menyeberangi Laut Abong, seakan-akan bejelon de tanoh koreng. Cuma, tekalo urang-urang Mesir mencubo melakuko hal nyo samo, mike de tenggelamko.
\p
\v 30 Ule iman, tembok Yerikho runtoh lah de kelilingi selamo tujuh hari.
\p
\v 31 Ule iman, Rahab, pelacur iye, hopi de bunoh serompok dengan urang-urang nyo hopi taat ule enye menerimo mato-mato Israel dengan damai.
\p
\v 32 Ngan, ape lage nyo arus ke hatoko? Ake hopi punyo cukup waktu untok mengomongko kenempatme tentang Gideon, Barak, Simson, Yefta, Daud, Samuel, ngan padong nabi,
\v 33 Nyo ule iman lah menaklukko kerajaon-kerajaon, melakuko kebonoron, mendepotko jenji-jenji, ngan mengatupko mulut singa-singa,
\v 34 Memadomko kobaran api, terlepas deri mato pedang, de kuatko deri kelamahon mike, gagak perkasa delom pertempuron, ngan menghalau rombongan tentaro asing.
\v 35 Padong betina menerimo belek urang-urang te'elek mike melalui kebangketon, hambuk ado pula nyo de aniayo ngan menolak untok menerimo pembebason empuknyo mike mendepotko kebangketon delom kehidupon nyo lobih beik.
\v 36 Tekalo iye, ado pula nyo de hina ngan de cambuk, bahkan de rantai ngan de penjarako.
\v 37 Mike de rajam, de gesek menjedi dua, ngan de bunoh dengan pedang. Ado pula nyo mengembara dengan memakoi pakoyon deri kulet domba atau kulet kambeng; mike sajo mesken, de tindas, ngan de perlakuko semena-mena.
\v 38 Denia nie hopi pantos bage mike, mike mengembara de padang gurun ngan gunong-gunong, tinggal de celah-celah gunong, ngan gua-gua de bewoh tanoh.
\p
\v 39 Walaupun mendepot kesaksion nyo beik ule iman nyo mike miliki, mik hopi menerimo ape nyo de jenjiko.
\v 40 Sabab, Allah menyediako sesuatu nyo lobih beik untok kite, sehingga pi kite, mike hopi bakal menjedi sempurna.
\c 12

\s (Meneladani Yesus)
\p
\v 1 Ulenyo kite mempunyoi lobot saksi nyo mengelilingi kite upa aban, marolah kite meninggalko segelo bobon ngan doso nyo menjerat kit ngan belari dengan tekun podo perlombaan nyo de sediako de hadopon kite.
\v 2 Biarlah mato kite tertuju podo Yesus, Sang pencipto ngan penyempurna iman kite, nyo dmi sukacita nyo lah de tetapko bage-Nye, rela menanggung salib ngan mengabaiko kehinaan salib iye. Ngan, kinie, Enye duduk de sebelah kanon tahta Allah.
\p
\v 3 Ingotlah bakal Yesus, nyo tabah menghadapi permusuhon deri urang-urang bedoso shingga jiwome hopi menjedi litak ngan putus aso.
\s (Allah iye upa seurang Bepak)
\p
\v 4 Delom perjuangonme melawon doso, kowe bolum sampoi menumpahko derohme.
\v 5 Ngan, apekah kowe lah melupako nasehat nyo de boriko kenempatme sebage anak-anak? “Hai anakke, jengon anggap enteng didikan Tuhan, ngan jengon meraso kecik hati tekalo kowe de togur-Nye.
\q
\v 6 Sabab, Tuhan menghajor urang nyo de kasehi-Nye. Ngan mncambuk urang nyo de terimo-Nye sebagoi anak.” 
\f + \ft Amsal 3:11-12 \f*
\p
\v 7 Kowe arus betahan demi didikan iye ule iye berarti Allah sedang memperlakukonme sebage seurang anak; lagepula, anak macam apekah nyo hopi perenah de didik ule bepaknye?
\v 8 Munye kowe perenah menerimo didikan nyo sarusnye de terimo ule segelo anak, kowe adolah anak harom, bukon anak nyo sah.
\v 9 Seloin iye, kite memiliki bepak-bepak de denia nie nyo mendidik kite, ngan nyo kite hormati; munye upanie, bukonkah kite arus lobeh lage menundukko diri kenempat Bepa pucuk segelo roh ngan pucuk hidop?
\v 10 Sabab, Munye bepak kite nyo ado de denia nie menghajor kite untok waktu nyo singkat bedasarko caro nyo mike anggop paleng beik, Bepak nyo ado de serga menghajor kite demi kebeikon kite dewek sehingga kite memperuleh bageon delom kekuduson-Nye.
\v 11 Segelo didikan, podo saat de boriko, memang hopi menyenangko ngan menyaketko. Cuma hambuk, sesodah iye bakal menghaselko buah kebonoron nyo membori damai sejahtera kenempat mike nyo lah de latih ule didikan iye.
\s (Perhatikolah Caro Hidopme)
\p
\v 12 Sabab iye, kuatkolah tangonme nyo lamah ngan lututme nyo goyah,
\v 13 Buatlah jelon nyo lurus bage kakime sehingga tungkai kaki nyo lamah hopi menjedi lumpoh, hambuk de sembuhko.
\v 14 Kejarlah perdamaion dengan segelo urang. ngan kejarlah kekuduson sabab pi kekuduson, hopi surnagpun depot mengoleh Tuhan.
\v 15 Pastiko empuknyo jengon ado seurangpun nyo kehingaon anugerah Allah; pastiko jugo empunyo jengon ado akor pahet nyo tumbuh ngan menimbulko masalah sehingga mencmari lobot urang.
\v 16 Ngan, pastikolah empuknyo jengon ado urang nyo berbuat cabul atau hopi suci upa Esau nyo menjuol hak kesulungonnye demi semangkuk makonon.
\v 17 Sabab kowe tahuko behwo de kemudion ari, enye de tolak ngan hopi ado lage kesempaton untok betobat sekalipun enye mendalaknye dengan mencucurko aek mato.
\p
\v 18 Sabab kowe hopi njongok kenempat gunung nyo pacok de rabo, kenempat api nyo menyala-nyala, atau kenempat kekolomon, kekelaman ngan badai.
\v 19 Kowe pun hopi njongok kenempat suaro trompet, ngan kenempat suaro nyo pembuikonye membuat padong pendongornye memohon dengan sajo empuknyo pembuikon iye hopi de buikko lage kenempat mike.
\v 20 Sabab mike hopi depot tahan mendongor perentah nyo de boriko, “Bahkan munye seekor binatong sekalipun nyo merabo gunong iye, mengka binatong iye arus de lempari betu sampoi te'elek.”
\v 21 Ngan, sedemikion mengerikonye pengolehon iye sampoi-sampoi Musa pun buik, “Ake gemitek ketakuton.”
\v 22 Cuma, kowe lah njongok ke gunong Sion, ngan ke kota Allah nyo hidop, Yerusalem sergawi, ngan kenempat malaikat nyo hopi tehitung jumlahnye.
\v 23 Kowe lah njongok kenempat perkumpulon godong jemaat nyo terdiri deri anak-anak sulung Allah nyo lah terdaftar de serga, kenempat Allah, Hakem pucuk segelo urang, ngan kenempat roh urang-urang bonor nyo sodah de sempurnako.
\v 24 Kowe lah njongok kenempat Yesus, perantaro perjenjion nyo beheru, ngan kenempat deroh nyo de percikko, nyo buik lobeh beik deripodo deroh Habel.
\p
\v 25 Pastikolah empuknyo jengon kowe menolak Enye nyo buik. Ule munye mike nyo menolak Eny nyo membori peringoton deri behumi sajo hopi depot melepasko diri, mengka kite pun hopi bakal depot melepasko diri deri Enye nyo membori peringoton deri serga.
\v 26 Bilek, suaro-Nye mengguncang behumi, “Cuma, sekali lage Ake hopi anyo bakal mengguncangko behumi, hambuk jugo serga.”
\v 27 Ungkapon “Sekali lage” menunjukko tentang pemusnahon hal-hal nyo depot de goyahko, yaitu segelo nyo sodah de ciptako, empukno hal-hal nyo hopi de goyahko depot tinggal tetap.
\v 28 Ulenyo iye, lah kite menerimo kerajaon nyo hopi tergoyahkan, marolah kite menunjukko raso syukur dengan mempersembahko ibadah nyo layak kenempat Allah, nyo de sertai rasa hormat ngan ponuh kekagumon,
\v 29 Sabab Allah kite adolah api nyo menghangusko.
\c 13

\s (Nasehat-Nasehat Untok Urang Pecayo)
\p
\v 1 Teroslah memeliharo kaseh seduluron!
\v 2 Ingotlah selalu untok membori tumpangon kenempat urang-urang asing ule dengan melakuko hal iye, beberape urang lah menjamu malaikat-malaikat pi mike sadori.
\v 3 Ingotlah urang-urang nyo depenjaro solah-olah kowe depenjaroko serompok mike, ingotlah jugo urang-urang nyo de aniayo sabab kowe pun berado de delom badan.
\p
\v 4 Perkawinon arus de junjung dengan ponuh hormat ule segelo urang, ngan jegolah dipan perkawinon empuknyo tetap murni, sabab Allah bakal menghukom urang-urang nyo cabul ngan padong pezina.
\v 5 Jouhkolah hidopme deri cinta duit, ngan cukupkolah dirime dengan ape nyo kowe miliki sabab Enye dewek buik: “Ake hopi bakal meninggalkome, ngan hopi bakal perenah mengabaikome.” 
\f + \ft Ulangan 31:6 \f*
\p
\v 6 Jedi, kite depot buik dengan ponuh keyakinon: ‘Tuhan adolah penolongke, ngan ake hopi bakal takut. Ape nyo depot de lakuko urang terhadopke?” 
\f + \ft Mazmur 118:7 \f*
\p
\v 7 Ingotlah padong pemempenme, mike nyo lah mengajarko firman Tuhan kenempatme. Perhatikolah hasel deri caro hidop mike, ngan contohlah iman mike.
\v 8 Yesus Kristus tetap samo, Kamarie, sarinie, ngan sampoi selamo-lamonye.
\v 9 Jengonlah kowe de sesatko ule pengajaron nyo bemacam-macam ngan nyo hopi kowe kenal; ule adolah hal nyo beik behwo hati de kuatko ule anugerah, bukon ule aturon tentang makonon nyo hopi membori manfaat bage mike nyo menjalaninye.
\p
\v 10 Kite mempunyoi altar nyo derinye urang-urang nyo melayoni de kemah suci hopi berhak untok makonon.
\v 11 Ngan, ule badan deri hewan-hewan nyo derohnye de unda ule imam godong ke Runag Mahakudus sebage persembahon penebuson doso de tunu de luor perkemahon,
\v 12 Mengka Yesus jugo menderito de luor gerbang kota demi mengudusko umat-Nye dengan deroh-Nye dewek.
\p
\v 13 Ulenyo iye, marolah kite menomui Yesus de luor perkemahon, ngan memikul kehinaan nyo samo dengan kehinaan nyo lah de pikul-Nye.
\v 14 Sabab, de behumi nie kite hopi mempunyoi kota nyo bakal ado untok selamo-lamonye, hambuk kite sedang menantiko kota nyo bakal njongok.
\p
\v 15 Ulenyo iye, melalui Kristus marolah kite torus menorus mempersembahko kurban pujion kenempat Allah, yaitu ucapon bibir nyo memuliako namo-Nye.
\p
\v 16 Jengonlah kowe lupa berbuat beik ngan membagiko ape nyo kowe miliki ule kurban upa iyelah nyo menyenangko Allah.
\p
\v 17 Taatlah kenempat padong pemempenme ngan tunduklah kenempat mike ule mikelah nyo menjego jiwome ngan nyo arus membori pertanggung jawabon pucuknye. Dengan demikion, mike bakal melalukonye dengan sukacita, bukon dengan merutuk ule hal iye hopi bakal membori keuntungon kenempatme.
\s (Permohonan Doa)
\p
\v 18 Bedoalah untok kamie ule kamie yakin behwo kami memiliki hati nurani nyo beik, nyo selalu beusaha melakuko segelo hal dengan caro nyo terhormat.
\v 19 Ake mendesakme untok bedoa dengan lobih besungguh-sungguh lage empuknye ake segera de kembaliko kenempatme.
\p
\v 20 Kinie, Allah sumber damai sejahtra, nyo lah membangketko belek Yesus, Tuhan kite, Sang Gembala Agung pucuk domba-domba-Nye, dengan deroh perjenjion nyo kekal
\v 21 Kiranya memperlengkapime delom setiap hal nyo beik untok melakuko kehendak-Nye. Ngan, biarlah Enye bekereja de delom kite untok menyenangko hati-Nye melalui Kristus Yesus, nyo kenempat-Nyelah kemuliaon sampoi selamo-lamonye. Amin.
\s (Salom Penutop)
\p
\v 22 Dulur-dulurke, ake mendorong kowe untok mendongorko kehato nasehatke dengan sabar sabab kehato nasehatke nie lah ketulesko kenempatme dengan singkat.
\p
\v 23 Ake amat memboritahukome behwo dulur kite, Timotius, sodah de bebasko deri penjaro. Ngan, munya enye segera njongok kenempatke, mengka ake bakal njongok serompok enye saat menomui kowe.
\p
\v 24 Sampoiko salom kamie kenempat padong pemempenme ngan kenempat segelo urang-urang kudus. Dulur-dulur kite deri Italia menyampoiko salom kenempatme.
\p
\v 25 Anugerah Allah menyertai kowe segelo.