kpj_reg/17-EST.usfm

\id EST
\ide UTF-8
\rem dat 1990
\rem aut Ijeseberi
\h ESTER
\toc1 ESTER
\toc2 ESTER
\toc3 est
\mt1 ESTER
\c 1
\p
\v 1 Assuero bedeu bede rỹimy raremyhỹu, Assuero ‘India hãwa bede-ribi riwedunymy raremyhỹ, kia Etiopatia konanabede-ò ibutumy kia bedewo-ki tule riwedunymy raremyhỹ, 127 bede sõmo sõmo.
\v 2 kua bede txuu, Iòlò Assuero tarynana-ki runymy raremyhỹ, kia heka Susãhãwã-ki rỹimyhỹre,
\v 3 Inataõ wyramy hãwã wedumy raremyhỹu, kia ibutumy taijoi mahãdureny-ò rynana tamyreny riwahinyrenyre, kia Persia Media-wana riwedunymy idireny retehemy roiremyhỹ.
\v 4 Tai tahe taIòlò wiwityhyhykỹ riteòsinyre, txuu sõe-di, 180 txu-di.
\v 5 Kia txuu iribi ròhònyreu, kia Iòlò rynana riwahinyre ibutumy iny mahãdu Susãhãwã-ki rahãwanymy rỹimyhỹrenyre-ò, iny inihikỹmy rỹimyhỹre-ò, kia iyrybule iny iyjamy rỹimyhỹre-ò tule, kia debò-ò inatxi reurò txu-di, Iòlò rynana heto ubekile.
\v 6 Kia Iòlò ube awimy rexiywinymy roimyhỹ, tyyesi urahãkỹ-di, ijõ tỹremy, kia ta reruti tidesesò-di ritaamy rỹimyhỹ. Kia suu tahe tỹremy, ijõ iuramy roimyhỹ, kia heka mana rỹsỹrỹsỹ-di taubereny risunyre. Kia ubeki tahezmana rỹsỹrỹsỹ rynana tai rỹimyhỹ.
\v 7 Kia manarỹsỹ berysyna tamyreny riwahinyrenyre idi bemy riõrenykremy, kia sõemy manarỹsỹ berysyna òtaòta tamyreny riwahinyrenyre, kia sõemy (vinho)tyhy ijõdire, kia Iòlò bededỹỹnawiwi riwahinyre.
\v 8 Kia ilau ruberurenymy aõkõ tuu riõrenyre, iwese iritina rybe roimyhỹ yrybule, kiemy dori Iòlò tuu rybe riwahinyre ibutumy wedu ninihikỹ rỹimyhỹrenyre-ò, kia aõwaxina ixyby ixideewimy iny sohoji sohoji tuu riõrenykremy.
\v 9 Kia tule deridu Vasti rynana riwahinyre hãwyy mahãdureny-ò, Iòlò Assuero hetotyhykile.
\v 10 Kia debo-ò inatximy txuu reurò-di, kia Iòlò  rayky awimy reysamy resere vinho-di, kia tahe riteònyre Meumã, Bizta, Harbona, Bigtá, Abagta, Zetar e Carcas, debo-ò inatximy reurò eunuku sõe Iòlò Assuero ruki ratximyhỹreny,
\v 11 kia Iòlò itxerenamy deridu Vasti ratxikremy, Iòlò taijoireny riteònyre, deridu Vasti kanakremy tarataanatyhy-di taijoi mahãdureny-ò riteòsinykremy, taõnawiwihikỹ-di, kiemy inatyhymy iruxerare.
\v 12 Kiaremy tahe deridu Vasti noderalemy reare eunucos mahãdu-wana kanakederalemy, kia Iòlò tahe sõemy tai ibinamy rahãre, kia tahe Iòlò reburere.
\v 13 Tai tahe Iòlò bedeery mahãdu rỹimyhỹrenyre riteòarinyrenyre, kiemy dori tii boho bededỹỹnana rierymyhỹrenyre, kiemy dori kawesemy Iòlò aõ riwinykremy reamyhỹre riwinymyhỹrenyre, kia ibutumy bedeery mahãdureny ruki, kia bededỹỹnana òbitimy rierymyhỹrenyre;
\v 14 kia ityytyhymy rỹimyhỹrenyre idi kaboho: Carsena, Setar, Adamata, Társis, Meres, Marsena e Memucã, debo-ò inatximy reurò sõe Persas ijoi, kia tii boho idi retehemyhỹreny iximynamy Iòlò-wana, kia tahe Iòlò wesetyhymy rynanaki roruumyhỹreny,
\v 15 Aõhebo tahe timybo relekre rybe ratyhydỹỹkremy,  deridu Vasti Iòlò Assuero rybe rityhynyõraki, eunucos mahãdu tamy raryberenyreki.
\v 16 Tai tahe Memukã rarybere Iòlò ruki iijoi mahãdureny ruki: deridu Vasti, Iòlò Assuero sohoji deramy aõkõ reare, kia ibutumy teòdu mahãdu, iijoi mahãdureny deramy reare, Iòlò Assuero hãwa sõmo sõmo deramy.
\v 17 Kia heka tiubo ibutumy hãwyy mahãdureny tuu bede rierykreu Iòlò hãwyy riwinyramy, tii boho heka urile tahãbureny riatyrenykre. Kia tahe myy raryberenykre: "Iòlò heka tahãwyy-ò rarariowyre tamy rakremy, kia tahe tii tamy raõhyyre."
\v 18 Wijityhyle — Memukã ixybyle rarybere — Pérsiamy Médiamy hãbuninihikỹ rỹimyhỹrenyre hãwyy mahãdureny kia heka bede rieryrenykre, Iòlò hãwyy tuu riwinyramy, kia tahe tahãburenyko tuu relyyrenykre. Kia tahe ibutumy bedebedemy hãwyy mahãdu rỹimyhỹrenyre tahãbureny rityhynyrenyõtyhy, ka ihãbureny tahe tai reburerenykre tahãwyy mahãdureny-ò.
\v 19 Kia tahe txibo ixideewikre-wana Iòlò tyyriti-ò tani riwinykre Iòlò hãwyy Vasti Iòlò dee kanaõkremy. Kia ibutumy Pérsia Média-wana rybetyhydỹỹna tyyritina-ò riritinykremy tuu marybekre, kia tiu iryberitidỹỹna raixawidỹỹõkremy. Irahudi tahe iwitxiramy hãwyyõtxi beakre Vasti-ribi awityhymy, kia irynanatybytyre Iòlò hãwyymy runykremy.
\v 20 Kia tiubo Iòlò rybewahidỹỹna ibutumy iny bedebedemy rỹimyhỹrenyre mahãdu ieryrenykreu, kia tahe iu ibutumy hãwyy mahãdu tahãbureny awityhytyhymy riywinymy idireny rỹirakre, kia iny ityhymy rỹira, kia iny iaõkõmy rỹimyhỹre tule.
\v 21 Iòlò taijoi mahãdureny-wana awimy irybeki rahãrenyre, kia tahe tii tuu riwinyre Memukã tuu rarybere wesemy.
\v 22 Tii heka tyyriti ibutumy taijoi mahãdureny-ò riwahinyre, tyyriti sohoji sohoji heka rybemy, ijõ riritinyre hãwa hãwa mahãdureny ijoi-ò, kia heka tyyriti rybeki roimyhỹ, ibutumy hãbu mahãdu heto wedu wesemy rỹirakre, kia tahe tiihyyle ikonanau rarybemyhỹkre.
\c 2
\p
\v 1 Irahudi tahe bede irehemy ratxiorony-di Iòlò debure ixawire, ihãremy tahe tii ixidi rõhõtinylemyhỹre Vasti òludumy tyyriti-ò tani riwinyremy.
\v 2 Tai tahe teòdu mahãdure-õ tii-wana widee rarybetyhymyhỹre tamy rarybere: — Iòlò, ijadòòma iruxeratyhy iuredeõ-ò kanakemy marybeke.
\v 3 Kia hãwa hãwamy aõmysỹdỹỹdu rỹira-ò arybe biwahinykre, ijadòòma iruxetyhy-õ kididydenykremy harém-ò kaki Susã-ò. Hekai eunuku-wana idi itxeredurenykre harém òbitidi, kia tahe tii boho idi itxeredurenykre, kia tahe ibinana binana rituahinyrenykre.
\v 4 Tai tahe Iòlò, ijadòòma-ki awityhymy rahãkre deridu Vasti deròwymy risỹnykre. Iòlò heka irybe-ki awimy rahãre, kia tahe tuu riwinyre, tuu raryberenyremy.
\v 5 Susã hãwaki judeu-õ rahãwanymy raremyhỹ, moma inire Mordecai, Jair riòre, Simei, Kixi rioreriore boho, Benjamim ta iixỹjunanire.
\v 6 Kia Iòlò Nabucodonosor Babilonia-ki raremyhỹu, Iòlò Nabucodonosor Jerusalẽ-ribi Iòlò Joakĩ-Judá ridyre rabrejukremy, Mordecai heka ijõmy brejunayky-ki rare Joakĩ-wana.
\v 7 Mordecai heka ixihemy terỹ Hadassa ridyre, kia heka Ester rare, ijadòòma ruxera heka rare, inidehedehe wahe. Ester tyby boho heka rururenyre, kia ta Mordecai tabedeòbynamy ixiki rimyre, kia tahe tariòre wesemy riumydỹỹnyre.
\v 8 Kia Iòlò tuu tarybe riwahinyreu, kia ijadòòma sõemy rirahure Susã hãwa-ò, kia tahe Hekai-ò riwahinyrenyre idireny tarukikremy, kia heka harém aõmysỹdỹỹdu dinodu rare. Kia ijadòòma mahãdu ykyki heka Ester rare.
\v 9 Hekai heka tai awimy rahãre, tii tahe iaõwiwiki ixiki rimyre. Kia tahe wytyhylemy tamy luahinawihikỹ riwahinyre, kia rỹsỹnawihikỹ tule. Kia debo-ò inatximy reurò sõemy tamy aõmysỹdỹỹduwityhy ritare, idi raõmysỹdỹỹnyrenykremy, kia tahe Ester idi aõmysỹdỹỹdurenywiwihikỹ-wana harém hetowowihikỹ-ò riwiurònyrenyre.
\v 10 Ester heka tuu Mordecai tamy raryberemy ratximyhỹre, kia uritre inyõdee rybeõkremy tihãwa ludubo raremy, mobo isỹrenyremy.
\v 11 Kia heka txuu iyhyõmy Mordecai harém ubemy rariarerimy ihỹre, kia Ester timybo ratximyhỹremy rierykemy, kia aõhebo tai rutỹỹnykre rierykemy.
\v 12 Kia ijadòòma mahãdu luadidỹỹna heka wyra sohoji rimydi ixawimyhỹre; kia debo-ò sohoji reurò ahãdumy heka mirra deròna riuhemyhỹre, kia ijõ ahãdu uhe tahe iwitxira deròna, iwitxira luahina riuhemyhỹrenyre. Kia ijadòòma mahãdu taluahinareny rahumyhỹrenyreu, kia Iòlò Xerxe-ò ridymyhỹrenyre.
\v 13 Kia rakre bedeu rehemynymyhỹreu harém-ribi palácio-ò, kia ijadòòma sohoji sohoji, kia ixideewimy aõ ibutumy riwymyhỹre.
\v 14 Txiorou heka ijadòòma palácio-ò ramyhỹre, ijõ biurasò rudiu tahe ijõ harém-ò ramyhỹre, kia tahe idireny itxeredu-ò riwahinymyhỹre Saasga-ò, eunuku heka Iòlò hãwyysõe-di tarukimy ratximyhỹrenyre. Ijadòòma heka ròòseõhyymyhỹre Iòlò-wana witxi reakemy, aõhebo tahe tii tuu reòarikeki tamy inimy ryryke.
\v 15 Kia tahe Ester bede-ò rehemynyre, Abiail riòre, Mordecai lerỹ, ijadòòma heka Mordecai riumydỹỹnyre, kia ijadòòma ibutumy iny iny tai awimy rahãmyhỹre, iny rierymyhỹre mahãdureny. Kia tahe Ester rakremy bede-ò rehemynyre, Iòlò-wana witxi reakremy, tii heka aõbo Hekai e eunuku harém dinodumy ratximyhỹrenyre, riwykremy tamy rarybere sohojile riwyre.
\v 16 Ester heka rare palacio-ò Iòlò-ò Xerxes-ò rexideòsinykremy, dezembro ahãdu bedeu, deboò-ò inatxi reurò wyramy Iòlò-di bede rỹireu.
\v 17 Kia tahe Iòlò, ijadòòma Ester-ki awityhymy rahãre, ijadòòma mahãdureny-ribi, kia tahe tii ixi-ki awityhymy rahare, idi sõemy bede riòtiinyreki, kiemy dori tiu ijadòòma-õ tuu risỹnyõre. Kia Iòlò tamy rataanarỹsỹ ritidire, kia tahe deridumy risỹnyre Vasti deròwymy.
\v 18 Irahudi tahe tamy rynana nihikỹ riwahinyre Ester-ki awityhymy rahãreki, kia tahe ibutumy taijoi mahãdu, taõmysỹdỹỹdureny mahãdu riteòarinyrenyre kydòidenykremy. Kia tii rybe riritinyre ibede txuu bede aõmysỹdỹỹ ihoõkremy, kia ibutumy aõnaõna urile riywinymy riõriõre, kia heka Iòlò sohojile tuu riwahinyre.
\v 19 Kia ijadòòma mahãdu iwitxira harém-ò rawiuròdỹỹmy rỹira bedeu, Mordecai, Iòlò governo dee raõmysỹdỹỹnykremy ini ritidire.
\v 20 Kia heka Mordecai dohodỹỹna-di Ester tõhõtikile  raremyhỹ, Kia Ester modee rarybeõlemy raremyhỹ tii Judia raremy. Tii Mordecai rybe rityhynymy raremyhỹ, timybo hirarimy raremyhỹ bedeu, kia tii riumydỹỹnymy raremyhỹ bedeu.
\v 21 Kia bede txuu Mordecai taõmysỹdỹỹna riwinymy raremyhỹ palácio-ki, kia tahe Bigtã e Teres, inatximy eunucos sõe, kia heka tii boho palácio ijòludu roire, kia tahe Iòlòmy radònymy roiremyhỹ, kia widee bede riywinyrenyre rirubunyrenykremy.
\v 22 Tai tahe Mordecai tuu deridu Ester-ko relyyre, kia tahe tii Iòlò-ò rarybere, Mordecai tuu bede rieryremy.
\v 23 Kia tahe tuu rỹỹraxirenyre, kia tahe itxi rearenyre, kia inatyhymy tuu raryberenyremy; tai tahe inatxi  boho bòtòtaamy rururenyre. Kia Iòlò tarybe riwahinyre, kia raritidỹỹmy relekremy tyyriti-ò.
\c 3
\p
\v 1 Irahu-di tahe Iòlò Xerxes, sohoji hãbu-õ risỹnyre, kia heka Hamã inire, ministro-my raõmysỹdỹỹnykremy. Hamã heka Hamedata riòre rare, Agague rioreriore wahe.
\v 2 Iòlò heka tarybe riwahinyre, kia ibutumy palácio-ki aõmysỹdỹỹdu mahãdu rexiyrawonyrenykre, kia tahe tatiòhumy reserenykre Hamãkoki wahe, kia heka iny wii rityhynymyhỹre tuu resemyhỹre. Kia tahe  aõmysỹdỹỹdu mahãdureny tuu riwinyrenyre, Mordecai sohojile tuu riwinyõre; tii rexiyrawonyke aõkõre, kia tatiòhumy reseke aõkõre.
\v 3 Tai tahe iwitxira aõmysỹdỹỹdu mahãdu Mordecai-ò rỹỹraxirenyre, aõherekibo Iòlò rybe rityhynyõrerimy.
\v 4 Kia heka txuu iyhyõmy idi risỹnymyhỹrenyre, Iòlò rybe rityhynykemy, kia tahe aõkõhyyre. Tii rexiòbitinyre kiemy riki tii judeu mahãdu rare. Tai tahe tii boho tuijyymy Hamã-ò rybemy ròirenyre, kia iny aõbo ixybyle Iòlò rybe rityhyõnykremy.
\v 5 Hamã heka sõemy iwoxi roburobure, kia Mordecai tatiòhumy runyõreki tamywimy.
\v 6 Kia Mordecai judeu mahãdu raremy bede rieryreu, Hamã Mordecai sohoji rurukremy aõkõ bede riywinyre, kia ibutumy Judeu mahãdu Iòlò deòdumy rỹimyhỹre mahãdu rururenykremy bede riywinyre.
\v 7 Kia waò inatxi reuròmy Iòlò Xerxes rimyreu, kia komy mar,co ahãdu rỹireu, Hamã tarybe riwahinyre Judeu mahãdu sorte ratarenykremy, kia heka "purĩ-my" rininimyhỹrenyre, kia itxuu iahãdureny rubunatxumy bede raywikremy. Kia tahe waò inataõ reurò txumy fevereiro ahãdu rimyreu tiubo rururenykre txuu ritarenyre.
\v 8 Kia Hamã rare, kia myy Iòlò-ò rarybere: — Kia hãwa hãwa sõmomy iny mahãdu rauberamy rỹimyhỹrenyre, kia heka iwitxira rybe rityhynymy rỹimyhỹrenyre. Kia heka Iòlò, tii boho arybe wahidỹỹna rityhynyreõhyymyhỹrenyre, iurenana tahe kai uritre ixiwesehyymy tuu ratxirenykremy iwahidỹỹõmykre.
\v 9 Txibo kai adeewikeki, ani tyyriti-ò biwinyke, kiamy biritinykre tii boho ibutumy rururenykremy. Kia diarỹ 342.000-my manarỹsỹ nieru hyna-ò arihykre, kia governo-ò ariòwynykre.
\v 10 Iòlò tadebòtyhy tadebò juhu-ribi ritare, kia heka tani tyyriti-ò riwinymyhỹre yrybule tarybe riwahinymyhỹre, kia Hamã dee riwahinyre, Hamedata riòre, Agague rioreriore wahe, kia heka Judeu mahãdu òludu roire.
\v 11 Kia ta Iòlò rarybere: — Anieru-di ixinamy atxike, kia Judeu mahãdu tahe diarỹ adebowo-ò ariwahinykre. Kia ixideewimy aõbo tamyreny biwinykre.
\v 12 Waò inataõ reurò txumy bede rỹireu, komy ahãdu rỹire bedeu, Hamã palácio-my secretária rỹira mahãdureny-ò rarariòwyrenyre, kia tamyreny Iòlò rybe tyyriti-di rariakremy. Tii heka tarybe riwahinyre, kia ibutumy iwitxiramy rybe rỹimyhỹremy raòbitidỹỹkremy, kia ibutumy hãwa ãwamy. Iòlò rybe ritina heka ibutumy Iòlò deòdumy rỹimyhỹrenyre-ò rybe reare rieryrenykremy, hãwa ihikỹ wedu mahãdureny-ò, ki ibutumy iny mahãdu riwedunymy rỹimyhỹrenyre-ò. Kia heka Iòlònimy raritidỹỹre, kia heka tebòdi tani riritinyre.
\v 13 Kia tahe rybewahi-di rekoamyhỹrenyre-ò riwahinyrenyre, kia ibutumy hãwa hãwamy Iòlò ijoi mahãdu rỹimyhỹrenyre rieryrenykremy. Kia rybe ritinadỹỹna heka ibutumy Judeu mahãdu rururenykremy txu sohojiuhyyle, riywinyre, fevereiro ahãduu. Kia heka ibutumy Judeu mahãdu rururenykre, idireny wobruõhyylemy: weryrybò mahãdu, matuari mahãdu, hãwyy mahãdu, kia uladu mahãdu tule. kia Iòlò rybe tyyriti wahidỹỹna, kia ibutumy Judeu mahãdureny aõnaõna Governo dee rawahikremy.
\v 14 Hãwa hãwa nihikỹ wedureny heka iny sõemy rỹimyhỹnyre ruki tyyriti-di rira awike, tuu rybe rawahirerimy, kia tiu itxu tuu raywimy roireri-ò rehemynykreu, kia ibutumy rexihumy ratxirenykremy.
\v 15 Iòlò heka tuu tarybe riwahinyre, kia tahe rybe wahidi ijaradu mahãdu wytyhylemy hãwa ninihikỹ rỹimyhỹre-ò roirenyre; Susã-õ, kia Iòlò rybe tarybe riwahinyre, kia ibutu ruki idi rariarenyre. Iòlò heka Hamã-wana runyrenyre monamy riõrenykremy, kia iwanawana tahe bede binabina hãwa hãwamy roberamy ratximyhỹ.
\c 4
\p
\v 1 Kia Mordecai ibutumy tuu bede rieryreu, kia tatyy ritxuare, kia heka bederyrymy iny rỹimyhỹreu tatyy ritxuamyhỹre, kia ỹnydesau tyby yxeyxe-di rexityynyre, kia bryby taratyy-ò ritxiwimy ròhònyre hãwa tya-ò, kia rahinymy rirajuamy ratximyhỹ.
\v 2 Kia palácio ròtena ijò-ò rehemynyreu, tii ralòõhyyre, kiemy dori iny kuawesemy ratyynymy ratximyhỹre dori tiu raloõhyymyhỹre.
\v 3 Kia ibutumy hãwa hãwa, ibutumy bede bedemy Iòlò ryberitidỹỹna-di rariarenyreu, kia Judeu mahãdu katxiterehekỹmy rahinyrenyre. Tii sõemy rahinyrenyre, kia tii boho renareherenyre, kia sõemy ijõ mahãdu ỹnyde sau tyby yxeyxe-di rexityynyrenyre, kia tahe brybytyre raydònyrenyre.
\v 4 Ester heka sõemy inihikỹmy aõhỹỹmy rutỹỹnyre, kia teòdu mahãdureny, kia idi iitxeredureny tuu iko relyyrenyreu, aõhebo bede rutỹỹnyrerimy. Ester tyy Mordecai-ò riwahinyre idi rexityynykremy, kia tahe tii teralemy reare.
\v 5 Tai tahe Ester, Hataque-ò rarariòwyre, ixidi itxereduõle wahe, kia tamy rarybere, Mordecai-ò rybemy rakremy, aõhebo rutỹỹnyrerimy, kia aõbo iòraru ibutumy rierykremy.
\v 6 Tai Hataque rare Mordecai-ò rybemy palácio ijòki ratxireri-ò.
\v 7 Kia tahe Mordecai ibutumy iko relyyre aõhebo rutỹỹnyremy. Kia myy rarybelere, kia Hamã rarybere Iòlò nieru hyna-ò tanieru rihynykremy, kia iòwymy ibutumy Judeu mahãdu rururenykremy.
\v 8 Mordecai, Hataque-ò Iòlò rybe tyyritina wahidỹỹna riwahinyre, kia ibutumy Susã hãwa bede idi rira rỹire, kia rybe riwahinyre ibutumy Judeu mahãdu rururenykremy. Mordecai, Hataque-ò rexitòenyre tyyriti cópia Ester-ò riwykremy, kia ibutumy tamy riòbitinykremy, kia Ester-ò riòbitinykremy, kia Iòlò-ò rarybekremy tule, kia iijoireny-di rexiwobrunykremy.
\v 9 Hataque tuu riwinyre Mordecai tuu rexitòenyremy,
\v 10 Ester, Hataque riteònyre Mordecai-ò irybe rirawyònyre:
\v 11 "Kia heka ibutu erynana rare, kia palácio aõmysỹdỹỹdu mahãdu-ribi, kia hãwa hãwa rasỹnymy rỹimyhỹrenyreòhòkỹle, aõtxile hãbu yda hãwyy aõbo, kia aõwaxina palácio ube-ò ralokre Iòlò-ò rarybekremy, aõhebo tahe txibo rybe tuu rieryra-wana. Ka heka rybetyhyre: mobo ywimy rexitòenyõmy ralokre heka rurukre, aõhebo tahe Iòlò tamanarỹsỹ iny-ò kiditeòsinykeki. Kia heka ahãdu sohoji rimyra, kia heka txiò Iòlò wadee kanarariòwyke."
\v 12 Kia Ester rybe rieryreu, Mordecai myy tarybe Ester-ò riwahinyre:
\v 13 "Kia uritre palacio-ki sỹmy nohõtiõmykre kai sohoji, kia ibutumy Judeu mahãdu ralokre, kia rubu-ribi rahenyrenykremy.
\v 14 Txibo kai rybeõmy atxikre-wana, ka bededỹỹnana kawesemy roirerimy, biu-ribi heka hedỹỹna kanakre, kia tahe wiòhenadỹỹ Judeu mahãdu-ò kanakre, kia tahe tii boho rahenyrenykre; iu tahe kai burukre, kia buseriòre boho rexihurenykre. Mobo tahe rieryre? Aõhe-wana kai deridumy tanyte Judeu mahãdu biwiòhenanykremy, kawesemy bededỹỹnana rỹirerimy!"
\v 15 Ester tarybe Mordecai-ò myy riwahinyre:
\v 16 "Make kia ta ibutumy Judeu mahãdu bibutunykre, kia Susã-ki rỹimyhỹrenyre mahãdureny-wana, kia ibutumy kai boho wamy Deuxu-ò bexitòenybenykre, kia ta benarehebenykre. Kia txuu inataõmy aõrỹsỹõmy, bemy momorenyõmykre, kia rumy txumy tuu morenyõmykre. Diarỹ wadekòdureny-wana karenarehelerenykre. Irahudi tahe Ikòlò-kò rybemy karakre, kia irybekõnareri hãrele; txibo dikarỹ ikòraruki karurukreki, dikarỹ karurukre."
\v 17 Tai tahe Mordecai rare, kia ibutumy riwinyre timybo Ester tamy raryberemy.
\c 5
\p
\v 1 Kia inataõ txumy renarehereu, Ester taderidu tyy-di rexityynyre, kia tahe rare, kia hetonihikỹ rynanawoki riraòmy runymyhỹ, tai Iòlò runymyhỹre ijòki. Tii tahe tarynanawoki runymyhỹ.
\v 2 Kia Ester-my Iòlò robireu ahãnaki riraòmy runyrerimy, kia tai awityhymy rahãre, kia tamanarỹsỹ tamy riteòsinyre. Kia Ester ralore, kia ityy-ò rehemynymy imanarỹsỹ jury-ki rimyre.
\v 3 Kia ta Iòlò ritỹỹraxinyre: — Deridu Ester, aõhewe bede rutỹỹnyreri? Aõmybo kai teateri? Ixideewimy bedexitòenyke, kia diarỹ adee ariwahinykre, kia waIòlòtyhy wirareamy ariwahinyke.
\v 4 Ester rirawyònyre: — Txibo adeke awikre-wana, dikarỹ aratekòarinyreri kai Hamã-wana rynanakò rykakurukurenykremy, kia dikarỹ wiji rekywinyreri adeke.
\v 5 Tai Iòlò tarybe riwahinyre: — Hamã-ò marybebenykre, wytyhylemy kanakremy, kia Ester deòarina-ò areòbyrenykremy. Kawesemy tahe Iòlò Hamã-wana roirenyre, Ester rynana tamyreny riywinyre-ò.
\v 6 Kia vinho monamy riõmyhỹrenyu, Iòlò, Ester-ò rỹỹraxire: — Aõbohe aixitòedỹỹnareri? Ixideewimy aõmy bedexitòenyke, kia diarỹ adee ariwahinykre, kia waIòlòtyhy wirareamy ariwahinyke.
\v 7 Ester rirawyònyre: — Myrerikie:
\v 8 Txibo dikarỹ awityhy Ikòlò adekewikeki waixitòedỹkỹna birawykònykre, dikarỹ kratekòarinykre kai Hamã-wana, kia iwitxira rynana karikyrinykre bikurasòmy. Iku tahe adeke kararybekre anomybo reakarerimy.
\v 9 Hamã rynana-ribi teysawityhymy ròhònyre. Kiaremy, kia hetonihikỹ ròtena tyy-ò rehemynyreu, tii Mordecai-txi reare, tai tahe tii sõemy iwoxi roburobure, kiemy dori Mordecai rayrawomy tatiòhumy tamy reseõhyyre, kia timy aõriòremy tamy rarybeõhyyre rityhynykemy.
\v 10 Ka tii tahe reximyre, kia taheto-ò roosere. Tai tahe tabiòwa mahãdureny-ò rarariòwyrenyre, kia tahãwyy Zeres-ò tule rarariòwyre kanakremy.
\v 11 Hamã tahe taityhymy rarybere, tiwesebo tariòre sõemy rarybere, kia aõnaõna Iòlò tamy riwahinyremy, ka wiji tahe Iòlò rynananihikỹ rariekirunymyhỹre, kia ibutumy ministro mahãdu ratyreki runymyhỹre, kia ibutumy Iòlò aõmysỹdỹỹdu ratyrerenyki.
\v 12 Kia tahe ixyby rarymyhỹ: — Kia-ribita, diarỹ sohojile deridu Ester riwateòarinyre Iòlò ariheludunykremy rynanaIòlò-ò riywinyre-ò. Kia ta tii wadee rexitòenyre diarỹIòlò-wana iwitxira rynana-ò biurasòmy aroikremy!
\v 13 Kia heka aõ wadee awiõhyyre, iwanawana Mordecai-my arobimy aratxikre, kua Judeu hetonihikỹ ijòki runyreri.
\v 14 Tai ihãwyy, kia ibutumy ibiòwana boho tamytaurerarumy raryberenyre myy: — Ruruna-õ relekemy marybeke,waituemy irarie urihina, kia biurasò rudiu tahe Iòlò-òbexitòenykre Mordecai rabòtòtaakremy. Tai tahe kaiabedesamy Iòlò-wana makre rynana-ò. Hamã heka iurerarurenyki awimy rahãre, kia tahe iruru relekremy tuu rarybere.
\c 6
\p
\v 1 Kia iruutyhyle Iòlò tỹhisiramy ròrenymyhỹ; tai tahe tyyriti tamy kanakremy rarariowyre, aõbo tai riritinyre rierykremy, kia tahe taõmysỹdỹỹdureny-ò rarybere iko tyyriti-di rariarenykremy.
\v 2 Kia tahe tyyriti-di rariarenyre, timybo Mordecai Iòlò rurukremy bede rieryremy, kia heka Bigtã Teres-wana tuu bede riywinyrenyre, iny inatxi eunuku, kia boho heka hetonihikỹ ijòki lamadu roire.
\v 3 Kia tahe Iòlò rỹỹraxire: —Aõbo tahe tamy rawahire, aõwityhybo tahe Mordecai-ò rawahire, tuu riwinyreki? —Kia aõ releõhyyre tuu rarybereki. —Kawesemy Iòlò aõmysỹdỹỹdu mahãdu rirawyònyrenyre.
\v 4 Iutyhyle tahe Hamã hetonihikỹwo-ò ralore, Iòlò herina roimyhỹre wyòna-ò, kia Iòlò dee rybemy rare, Mordecai rabòtòtaamy rurukremy, kia Hamã relekremy tuu rarybere-ò wahe. Iòlò rỹỹraxire: —Mobo ubeki ratxireri?
\v 5 —Moma Hamã. —Iaõmysỹdỹỹdureny rirawyònyre. —Kanalòkemy tamy marybebenyke. —Iòlò tuu rarybere.
\v 6 —Hamã ralore, kia tahe Iòlò tamy rarybere myy: —Diarỹ heka awityhymy bede bedesa hãbu-ò ariwahinykre. wadee manarybe aõbo tamy ariwinykremy.  Hamã myy rõhõtinyre: Mobo tahe hãbu, Iòlò sõetyhy tuu rawowydykre? Kia heka diarỹle rare!"
\v 7 Kia Hamã Iòlò-ò rarybere:
\v 8 —Atyy teuhemyhỹte bidiwahinyke, kia awaru tyy tule ityre tanymyhỹte wahe, kia ta rataana urahãkỹ awaru rati-ò roikremy bidiwahinyke.
\v 9 Kia tahe tyy tamy riwahinyre, kia awaru tule tamy riwahinyre, kia aõmysỹdỹỹdu rarienihikỹ-ò, kia hãbumy rawowydykremy idi ratxireri rityynykremy. Irahudi tahe tii hãbu ridykre awaru tyreki runymy, hãwa tya-di, kia tahe myy katxiteremy rarybekre: "Ka heka Iòlò hãbu dee riwinyre, momybo rawowydykremy idi ratxireri!"
\v 10 Kia tahe Iòlò Hamã-ò rarybere: —Wylemy make, kia ta tyy awaru-wana bimymy Judeu Mordecai bityynymy awaru tyreki idi makre, kia ibutumy kai tuu tarybeta wesemy. Tii heka hetonihikỹ ròtena ijòki runyrerimy ihỹre. Kia uritre aõmy tamydỹỹõmykre, tuu tarybeta wesemy.
\v 11 Hamã rare, kia tyy rimyre awaru-wana, kia ta Mordecai idi rityynyre, idi awaru tyreki rare hãwa tyaki, kia ta myy katxiterehekỹmy rarybere: "Ka heka Iòlò hãbu dee riwinyre, mo hãbumybo rawowydyreri wahe!"
\v 12 Irahudi tahe Mordecai hetonihikỹ ròtena ijò-ò roosere, iwana tahe Hamã sõemy raixỹrumy bede riryrymy taheto-ò raijaranyre.
\v 13 Kia tahãwyyko iximy relyyre, kia tabiòwa mahãdurenykò tule iximy ibutumy relyyre, timy rutỹỹnyremy. Kia ta ihãwyy ibiòwareny-wana, kia heka ibedeery roire, kia tahe myy tamy raryberenyre: —Kai heka Mordecai-wana ijesuki tabòduta. Tii heka Judeu rare, kai tahe tiu iribi atarasaõna kiehyyle. Kai heka iribi mabodukre òbitityh my.
\v 14 Tii boho heka rarybelemy ratximyhỹreny, kia eunuku boho Iòlò-ò aõmysỹdỹỹki ratximyhỹrenyu, kia tahe ritehemynyrenyreu, kia wytyhylemy Hamã rynana-ò ridyrenyre Ester riywinymy ratximyhỹ-ò.
\c 7
\p
\v 1 Tai tahe Iòlò Hamã-wana ixybyle deridu Ester rynana-ò roirenyre.
\v 2 Kia ta ixiyrybyle, kia vinho-my riõmyhỹreny, kia ta Iòlò Ester-ò rỹỹraxire: — Aõbohe aixitòedỹỹnareri? Aõwaxina ixideewimy wadee bedexitòenykre, kia diarỹ adee ariwahinykre, kia txibo waIòlòtyhy wirareamy adee ariwahinyke.
\v 3 Kia ta tii rirawyònyre: — Txibo dikarỹ Ikòlòdekewikre-wana, txibo anobo wadeke riwahinykre-wana, kia heka ano sohojilemy reakareri, kia heka kai wabededỹkỹnana bitekytenykre, kia wasỹreny waitxoireny bededỹkỹnana tule.
\v 4 Kia heka wasỹreny waitxoiny, dikarỹ boho itxohokunamy rekokuarenyre, dikarỹ boho karexihurenymy karururenykremy. Kia txibo wakòrarureny ijõdikeki tahe ixinamy dekòdumy karekokuarenykemy ijohokunamy, dikarỹ tahe anomy kararybekõhykyke, kiaremy tiku arabinanyrekõhykymyhỹrenyre, kia iny itxỹte wesemy.
\v 5 Iòlò Xerxes deridu Ester-ò rỹỹraxire: — Tiwesena hãbubo tuu riwinykremy rõhõtinyreri, tibo tiire?
\v 6 — Wakòludureny, wadiitxeredureny Hamã heka rare, hãbu binahãkỹ wahe! — Ester kawesemy rirawyònyre. Kia tahe Hamã sõemy ruberure, kia Iòlò-di retehemyhỹ, deridu Ester-di tule retehemyhỹ.
\v 7 Iòlò sõemy reburemy salaõ rynana-ribi ròhònyre, kia tahe alòbròna rỹimyhỹre-ò rare. Kia tahe Hamã rieryhyyre Iòlò irarytxydỹỹmy rexiywunyremy, iurenana tahe salaõkile ratximyhỹ Deridu Ester-ò rexitòenykremy ibededỹỹnana rahenykremy.
\v 8 Kia tahe tii rynana tyre ixidi rehure, tai Ester rynymyhỹ-ò, tamy rexiruxetòenymy rexitòenykremy, tamyòle tahe Iòlò alòbròna-ribi doosede. Kia Hamãmy robireu, Iòlò myy rarybere: — Kia aõbo deridu Ester wapalácio-ki waruki riòbinanykemy aõbo rõhõtinyreri? Kawesemy Iòlò tarybe rihuresỹtybyule deòdu mahãdu witxira Hamã rati rihetynyrenyre.
\v 9 Ijõ heka Harbona inire, myy rarybere: — Hamã heto bireki forca ijõdire waò reuròmy irarie urihina, kia heka tii tuu relekremy rarybere Mordecai tamy rirubynykremy, kia hãbu arahedỹỹnyre wahe. — Tamybo Hamã bibòtòtaabenykre.  — Myy Iòlò rarybere.
\v 10 Tai tahe Hamã ribòtòtaarenyre, forca riwinyrekile, kia heka tii Mordecai ribòtòtaakremy riwinyre. Kia tahe Iòlò debure raywimy rare.
\c 8
\p
\v 1 Kia itxuule Iòlò Xerxes, deridu Ester-ò Hama heto riwahinyre, kia ibutumy Hamã aõna~1na, Judeu mahãdu òludu wahe. Mordecai Iòlò-ò dee Ester riteòsinyre, kiemy dori Ester sỹreny rare.
\v 2 Kia tahe Iòlò iteborỹsỹ ritare, Hamã-ribi ixybyle riwyre wahe, kia, tahe Mordecai-ò riwahinyre. Kia tahe Ester, Mordecai aõmysỹdỹỹdu wedumy risỹnyre, kia ibutumy Hamã aõnadi rareleremy.
\v 3 Irahudi tahe Ester, Iòlò watyre ixidi rehure robumy, kia tamy rexitòenyre Hamã tuu tarybe riwahinyre riixawidỹỹnyremy, Agagire riòreriòre boho heka Hamã rare, kia urile Hamã bedeywodỹỹnana binahãkỹ iwahidỹỹõmykremy.
\v 4 Iòlò tamanarỹsỹ riterenyre Ester-ò; tii lamamy ikoki rỹimyhỹ.
\v 5 Kia tahe myỹ rarybere: — Txibo Ikòlò wadeke riwahinykre-wana txibo dikarỹ ronytyhykò karexiwokuwesekre, titxibo kai awimy kòbitimy waki taha tori-wana waixi tòedỹkỹki, ikuronana tahe ani tykyriti-kò biritinykre, Hamã tuu tarybe riritinyre biixawidỹkỹnykremy, Hamã heka Hameduta ritxòre rare, Agague ritxòreritxòre boho wahe, kia heka ibutumy Iòlò mahãdu ijoimy riuberanyre, Judeu mahãdu ibutumy rexihurenykremy.
\v 6 Kiemy dokuri dikarỹ tiku wasỹreny waijoireny ixihudunaki awimy karatxikõtyhy.
\v 7 Iòlò Xerxes Ester-o Mordecai-ò rarybere: — Diarỹ heka Hamã rabòtòakremy rewahinyre, kia ibededỹỹnana araruki, kia Judeu mahãdu rubudỹỹmy bede riywinyreki, kia tahe ibutumy iaõnaõwiwi Ester-ò rewahinyre.
\v 8 Ka rybeõ tahe Iòlònimy, teborỹsỹtyhy-di riritinyre, kia heka tiu raixawidỹỹõtyhy. Kia ribi tahe urile tyyriti biwinybenykre aõmybo Judu mahãdumy teatenyterimy, kia tahe wanimy biritinybenykre kia tahe tyyriti brò wadee rỹsỹtyhy biritinybenykre.
\v 9 Kia heka 23 txumy maio ahãdu tuu rutỹỹre. Mordecai heka Iòlò ritidu mahãdureny-ò rarariòwyrenyre, kia tahe Judeu mahãdu-ò tyyriti rybe-di rariare.
\v 10 Kia tyyryti heka iòlònimy rorytinyrenyre, Iòlò debò-di rityyritinyre, rybedu mahãdu heka awaru tyre-kile rearenyre kia awaru mahãdu heka iòlò awaru heka rare  isỹ ribile ridyrenyre.
\v 11 Kia tyyriti-ki heka iòlò riteranymyhỹre ibutu hãwã hãwãmy judeu mahãdu tai rasỹnymy roire ixinamy reixijekremy rorenykremy iny itxirearenykreu, inyõ itxirearenykreu judeu mahãdu ixinamy rirubunyrenykremy. inyõ aõtxile tamyreny rearenykeki ixinamy tamyreny idi rorenykremy, iòludu mahãdu ibutumy iny; hawyy, uladu, itxirenyrearenykreu ixinamy rahukremy, iaõnaõnareny tule.
\v 12 Kia heka ibutumy hãwa hãwa witxira witxiramy rỹimyhỹrenyre Judeus mahãdu rybe wahidỹỹna rỹire tuu relekremy, Kia heka txuu bede raywimy roire ròrubudỹỹrenykremy, kia heka waiyre-ò inataõ-my reurò txumy riywinyrenyre, fevereiro ahãduu.
\v 13 Iòlò rybe tyyriti wahidỹỹna-õ heka tyyritimy relekre iwese rybe raritidỹỹmy roimyhỹre wesemy,kia tahe ibutumy hãwa hãwa mahãdurenyruki tyyriti-di rira rỹikre, Kia iu txuuriywimyrenyremy Judeus mahãdu rexiywinymy rexihurenykreu taòludu mahãdureny-ò rexiòwynyrenykremy.
\v 14 Iòlò heka tuu tarybe riwahinyre, kia rybe-di ijaradu mahãdu taawaru tyrereny wylemy runyrenymy riòlònyrenyre. Rybe ritina rybe heka ibutumy tyyriti-di rira rỹire, kia Susã Capital-ki tule idi rira rỹire.
\v 15 Mordecai palácio-ribi ròhònyre tyy lỹre iura-wana riuhemy ròhònyre, kia manarỹsỹ rataana nihikỹ-di taratiki ròhònyre, kia yhy itxena sòhòkỹ-di ijõmy ròhònyre. Kia ibutumy Susã hãwalu hãwadu mahãdu sõemy rabedesarenyre, kia tahe katxiterehekỹmy bedesamy rirajuarenyre.
\v 16 Judeus mahãdureny-ò tahe bede loosòna wihikỹ rasỹnyre, bedesamy ròtarenyreki.
\v 17 Kia ibutumy hãwa hãwaki Iòlò tyyriti rybe-di rariareki, Judeus mahãdu reysamy rabedesarenyre, kia ixenamy idi risinyrenyre. Kia-ribi tahe ibutumy iny witxira mahãdureny-wana ixyby Judeus-my rexirahòrerenyre, ka wiji tahe ialureny ruberurenyreri.
\c 9
\p
\v 1 Kia waiyre inataõ-ò txuu rehemynyre fevereiro ahãdu-ò, kia itxuu Iòlò rybe wahidỹỹna ratyhydỹỹmy relekremy. Kia heka itxuu Judeus mahãdu òludu rimyrenykremy riraòmyhỹreny; kia tahe iribiòtumy aõhỹỹmy rutỹỹnyre; Judeus mahãdu taòludu mahãdureny-ribi ròtarenyre.
\v 2 Kia ibutumy hãwa hãwamy Judeus rỹimyhỹrenyre, tii rexibutunyrenyre, kia mobo irubudỹỹdurenymy rarybemyhỹrenyre rirubunyrenykremy. Tiu heka iny-õ irumy ratxiõtyhy iòhòterenykoki, kiemy dori ibutumy inymahãdu ilaureny ruberurenyre.
\v 3 Kia ibutumy iny mahãdu wedureny, Iòlò ijoireny mahãdu, Wedunihikỹmy (Governadores) mahãdureny, Judeus mahãdu riwiòhenanyrenyre, kiemy dori Mordecai lau ruberurenyre.
\v 4 Mordecaini heka ibutumy hãwa hãwamy ròberare, kia ibutumy iny mahãdu rieryrenyre, tii wedunihikỹmy Governo-ki ratxirerimy. Mordecai ruru tahe ire ixyby ranihikỹmy raòwònymy rare.
\v 5 Tai tahe Judeus mahãdu taòludu mahãdureny dee aõ ixideewimy riwinyrenyre. Kia ibutumy tatõnorireny-di rirubunyrenyre; kia iny-õ rihedỹỹrenyõhyyrenyre.
\v 6 Susã hãwa Capital-ki tii boho 500-my hãbu sõe rirubunyrenyre.
\v 7-10 Kia Hamã riòre boho rirubunyrenyre debòituemy sõereny, Hamã heka Hamedata riòre rare, Parsandata, Dalfaõ, Aspatá, Porata, Adalias, Aridata, Parmasta, Arisai, Aridai, Vaizata. Ka Judeus mahãdu tahe iaõnaõnareny-di ixikireny rimyrenyõre.
\v 11 Kia itxuutyhyle Iòlò riòbitinyre tiwesebo iny sõe Susã hãwaki rururemy.
\v 12 Kia tahe Ester-ò rarybere: —Kaki Susã-ki Judeus mahãdu 500-my hãbu sõe rirubunyrenyre, kia Hamã riòre tule debowiòmy, sõe rirubunyrenyre. Kia hãwa hãwa nihikỹmy tiwesebo tahe tii boho ròrubudỹỹrenyre? Aõmybo tahe kai wiji teateri? Kia aõwaxina bedexitòenykre. Txibo ixyby aõmybo teateri-wana adee ariwahinykre.
\v 13 Ester rirawyònyre: —Txibo Ikòlò adekewikre-wana, Judeus Susã-my rỹimyhỹre mahãdu-kò arybe biwahinyke, kia ikyrybutyhyle bikurasòmy riwinyrenykremy, ka wiji arybe wahidỹkỹna riwinyrenyra wesemy. Kia karexitòenylekre Hamã ritxòre rubureny bikukò ratakarenykremy.
\v 14 Iòlò tai awimy rahãre, tarybe wahidỹỹna tyyriti-di ibutumy iny mahãdureny ruki Susã hãwaki idi rariarenyre. Kia Hãma riòre irubureny biu-ò rataamy riònyrenyre.
\v 15 Waiyre-ò inaubiòwa reurò fevereiro ahãduu, Susã-ki Judeus mahãdu rỹimyhỹrenyre, rexibutunyrenymy ixyby 300-my hãbu sõe rirubunyrenyre. Kia ta iaõnaõnarenywiwi-di ixikireny rimyrenyõlere.
\v 16-17 Waiyre-ò inatão reurò txumy fevereiro ahãduu, Judeus hãwa hãwa nihikỹmy rỹimyhỹrenyre mahaãdu rexibutunyrenymy rexiijerenyre. Kia 75.000 mil-my taòludureny rirubunyrenyre, kawesemy tahe rexitarenyre ibutumy iximyreny dòdu-ribi. Kia ta iaõnaõnarenywiwi-di ixikireny rimyrenyõlere. Waiyre-ò inaubiòwa reurore txumy tahe tii boho rexielehynyrenyre, kia tahe iu bede nihikỹỹ ixenamy riwinyrenyre.
\v 18 Waiyre txuu, kia heka waiyre-ò inataõ reurò-di waiyre-ò inaubiòwa reuròu heka tii taòludu mahãdureny riruburenyrenyre, kia waiyre txu rimyrexiery tahe rexielehynyrenyre.
\v 19 Iurenana heka Judeus mahãdu vila-my rahãwanymy rỹimyhỹrenyre mahãdu, kia waiyre-ò inaubiòwa txuu rỹimyhỹreu fevereiro ahãdu, iu heka alisinanihikỹ riwinymyhỹrenyre, rynana ixenamy ixideereny rexibedebiòwanymyhỹrenyre, kia tahe wideereny rỹsỹna riwahiwahinymyhỹrenyre.
\v 20 Mordecai ibutumy tyyritimy riritinyre, kia tahe tyyriti riwahinyre ibutumy Judeus mahãdu hãwa hãwamy rỹimyhỹrenyre mahãdureny-ò, kia iòhòmy rỹimyhỹrenyre-ò, kia irehemy rỹimyhỹrenyre-ò tule.
\v 21 Tyyriti-ki heka myy tarybe riwahinyre, kia ikiemy wyra tỹmyra-ò bede ralòmyhỹkreu fevereiro ahãduu, tii itxuu idi rexibedebiòwanymy risinyrenykremy.
\v 22 Kiemy dori ka txuu Judeus mahãdu rexihedỹỹnyrenyre taòludu mahãdureny-ribi, ka ahãdu bedeu bederyry ijesu nihikỹ bedesanamy ixenanamy rexirahòrere. Iurenana heka rynana rawahimyhỹke, ixenana rawahimyhỹke, kia rỹsỹ rawahimyhỹke wide wideereny, kia tahe iny iaõkõmy rỹimyhỹrenyre-ò aõtxile aõ biwahiwahinymyhỹbenyke.
\v 23 Kawesemy tahe Judeus mahãdu, tuu Mordecai tarybe tyyriti-ò riritinyre mynalemy tahe tabedebiòwanareny riòrarunyrenyre, ka txuu wahe.
\v 24 Hamã, Hamedata riòre, Agague riòreriòre heka Judeus mahãdu òludureny rare, tii heka bede riywinyre Judeus mahãdureny rexihurenykremy, kia ibedeòbynareny ratarenykremy tuuu rarybere, (kia heka aõna inire Pur) kia tiu txuubo rururenykremy bede riywinykremy.
\v 25 Ka Ester tahe Iòlò-ò rybemy rare, kia tahe tii tarybe tyyriti-ò riritinymy riwahinyre, kia Hãma bede binabina riywinyre Judeus mahãdu òludu, kia ixideele tuu riywinyre. Iurenana tahe Hamã ribòtòtaare iriòre boho-wanale.
\v 26 Iurenana ka txuu (feriadumy) ixielehynatxumy rỹimyhỹre, aõma heka inire “Puri”, rybesõe-ò rybenana heka rare, rybe sohoji-ò rybena tahe “Pur” bedeòbyna heka rare. Timybo Mordecai tyy riti rybe ròhònyre, ibutumy Judeus mahãdu tuu robirenyre, aõnaõna rutỹỹnyremy.
\v 27 Kia tii bohotyhyle rexiywinyrenyre ibutumy tariòreriòre boho-wana rexibedebiòwanymy roirekremy, inatxi txu tuu Mordecai tyyritimy riwinyremy.
\v 28 Kia tahe tuu bede riywinyrenyre, kia ikiemy Judaica tariòre boho-wana, tasỹreny-wana, kia ibutumy hãwa hãwamy rỹimyhỹrenyre mahãdu, Puri ixena ribedebiòwanymy roirekremy, kia Judeus mahãdu ikiemy aõhebo rutỹỹnyrenyre-txi tohõtireny reamy roirekremy. Kia tiu bedeu tabedebiòwanareny-ribi tõhõti rusarenyõtyhy ixena-ribi.
\v 29 Deridu Ester, Abihai riòre, kia tule tyyriti riwinyre Judeu Mordecai-wana ibutumy, kia ibutumy tawiòhedỹỹna tyyriti-ki riwahinyre, Puri ixenamy rarybemyhỹ.
\v 30 Tyyriti biòwa ibutumy Judeus mahãdureny-ò riwahinyrenyre,127-my hãwa hãwa sõe, Kia awimy aõbinabinaõmy rỹirakremy tuu tatyyriti rybe riwahinyre.
\v 31 Kia riòbitinywiwimy Puri ixena, tuu txuu raywireu idi bedebiòwana rỹimy rarekremy. Kawesemy tahe ixideereny òbitile riywinyrenyre, kia ibutumy tariòreriòre mahãdureny-ò, ixena txu inarehena txu-wana, tii boho heka ka rybe wahidỹỹnaheki ikiemy idi roirekre, Judeu Mordecai heka tuu tarybe riritinymy riwahinyre, Deridu Ester-wana.
\v 32 Ester rybe wahidỹỹna heka riòbitinytyhymy riwahinyre, Puri ribedebiòwanymy roirekremy, Kia heka tyyriti riranaki tuu riritinyre.
\c 10
\p
\v 1 Iòlò Xerxes, iny ihãwarenymy rahãwanymyhỹrenyre riteranyrenyre, kia bero ijymy, kia hãwa wesiwesimy rahãwanymyhỹrenydyre, kia aõmysydỹỹ inihikỹmy raõmysỹdỹỹnyrenykremy.
\v 2 Kia ibutumy inihikỹmy, aõnaõnawiwihikỹ Iòlò Xerxes riwinyre, kia ijyy òbitimy Judeu Mordecai tadeòdutyhyhykỹmy risỹnyre, kia ibutumy tyyritiki riritinyre, Média-ki Iòlò-my runyrenyre mahãdu, kia Pérsia-ki Iòlò-my runyrenyre tule.
\v 3 Judeu Mordecai heka Iòlò rynana rarie riòhòdỹỹnymy aõmysỹdỹỹdumy runyre. Mordecai heka ibutumy Judeus mahãdu idi bede riòtiinyrenyre. Tii ibutumy riwinyre aõbo awikre-my taijoi mahãdureny-ò, kia taixyjuna tako-ò ririradỹỹnyre.