kpj_reg/16-NEH.usfm

\id NEH
\ide UTF-8
\rem aut Mabulewe, Uhuari, Woubedu  wana
\rem dat 2007
\h NEEMA TYYRITI (13 cc)
\toc1 NEEMA TYYRITI (13 cc)
\toc2 NEEMA TYYRITI (13 cc)
\toc3 neh
\mt1 NEEMA TYYRITI (13 cc)
\c 1
\s1 Neema Jerusale-di rexitòenyre
\p
\v 1 Kaa heka Neema ijyy rare, tii heka Hakari riòre rare. Kileu ahãdu-u waawiò beòra-my tai bede rijemy raremyhỹ Ataxeki, Pexia wedu rare, moma wanire Neema, xuxa-ki rarewahã hãwãnihikỹ-ki.
\v 2 Hanani, waseriòreõ rare, tii Judá ribi dehemynyde taijoi judeu mahãdu wana. Tai tahe jiarỹ amy rexitòenyre timybo Jerusale hãwã roimyhỹremy tule judeu mahãdu ròòserenyre abilônia-ò wetxu-my.
\v 3 Tiiboho wako relyyrenyre tureny ruruõle-my ratximyhỹrenyre-my. Tiiboho riki ròòserenyre Babilonia hãwã-ò tai isiratyhymy bede rije-my roiremyhỹ. Tule relyyrenyre iwitxira tori tai rasỹnymy rỹiramyhỹmy awimy aõkõ. Raryberenyre, nonana-my Jerusale hãwã uhuari resemy roimyhỹre-my tule riki txitòbòna roore-my kia tariki tiu ixyby riywinyõhyyrenyre.
\v 4 Kiata tuu roholareu, jiarỹ, ranyre rahinyre. Tuhyyhyy jiarỹ rahinywahãre aõtxumy tule aõrerỹsỹõhyywahãre. Tahe urile rexitòenywahãre Deuxudee.
\v 5 Deuxu biu ludu tyhy-ò, kai atyhy tate, jiarỹboho umy raruwahãrenyre. Kai òbitityhy tate tule abidedỹỹnana nihiỹ tate. Aratyhywahãrenyre sõwemy atyhyna wihikỹ-keki, tule aratyhynywahãrenyre abidedỹỹnana awire-ki.
\v 6 Deuxu wade bedeteheke rumy, txu-my adee rexitòenywahãre-ò taholamahãte wadee làhàna biwahinyke-my Ijaeli ijoi boho atyhydỹỹdu roire. Jiarỹ waratyrereny ijaeli ijoi boho heka òraruna ijõdire tule ihetxina mahãdu òraruna ijõdire.
\v 7 Aribiòtyhykỹle rexibutunymy roirewahã tai tahe urile raòrarunywahãrenyre. Abededỹỹnana retyhynyõrenyre-ki. Tule arybe retyhynyõrenyre kia Moiseisiyribi, arybeò ijohonadu.
\v 8 Ohõti itxi reake timybo tamy rarybe-my rarewahã. “Kaiboho ijaeli ijoi, òbiti aõkõ toite wadee, tai tahe jiarỹ ibutu-my arihitxihitxinykre wiribi iwitxirawitxira-my.
\v 9 Iribi tahe, kaiboho wadee bidiòkesebedenykre bidiwatyhynybedenykre wabededỹỹnana. Tai tahe jiarỹ ixyby araòkesedỹỹnyrenykre tai toitemyhã-ò tai tahe ixidewi aritakre wamy reàlàkre-my, tule iwese kaiboho tobỹtỹnytenyte bede konana-ò”
\v 10 Wanyrỹ, kaa heka atyhydỹỹdu rare, aijoireny. Kai tahe biditakre wetxuribi aruru-my tule aruruteretyhy-di.
\v 11 Bodoholake wiji waixitòedỹỹnana-ò tule ibutu ixitòedỹỹna-ò tule ijõ atyhydỹỹdu mahãdu umy reàlàkre-my. Biwinyke ani sõwe-my ròhònykre awityhy-my wiji tai tahe bede wedu aki awihikỹ-my rahakre tiki wana matxibeke. Jiarỹ heka wiji bede-my watxiwahãre bede- dinodu wade reòbykemy tamy ibesòhòkỹ-ò reòbykemy.
\c 2
\s1 Neema rakre Jerusale-ò
\p
\v 1 Tuu arelyykre timybo rohònyre-my inaubiòwa ahãdu wiji òratyhy aõkõ, wawiò beòramy tai bede rijere Ataxexi-ki. Aõtxumy tahe hãwã wedu rabedesòbyrena-my runymyhỹ-ò, jiarỹ remyre monabesòhòkỹ-my tahe tuu reõre. Tiu heka hãwã dinodu-di wabedewomy wadi reteheõmyhỹre.
\v 2 Tai tahe rỹỹraxire: — Aõherekibo kai abedewo-my tatxiteri? Kai dori webinadu aõkõ tatxiteri kia tahe kai awityhy-my aõkõ tatxiteri. Tahe jiarỹ sõwe-my raberure.
\v 3 Tai tahe rirawyònyre: — Hãwãdinodu iruhyy rarekre tuhyy! Timybohe wabedewona aririkre, timybohe, timybo ihetxina mahãdu wii rituunymy rỹiramyhỹ ibina-my, txiòtòbònareny dori roore.
\v 4 Hãwãdinodu rỹỹraxire: — Aõbo adee awire. Jiarỹ rexitònyre Deuxu biu ludu-ò.
\v 5 Iribi tahe hãwãdinodu-ò rarybere: Wanyrỹ kai aõbo eysa-my atxiteri wadee tahe waixitòedỹỹna ixideewikeki wadee bidiwinyke jiarỹ arakre judá hãwã-ò ixyby aritomoranykre ihetxina mahãdu wabede.
\v 6 Tai tahe hãwã wedu, ijadòma ruxerahakỹ runykre tiiwana. Tahe waixitòedỹỹna-ki awimy rahare. Tii rỹỹraxire tiwesebededỹỹnanamybo tai arijekre tahe tiubedemybo adoosekre tahe jiarỹ rarybere.
\v 7 Tahe rexitòenyre hãwãwedu-ò làhà-my tyyriti hãwãwedu-ò riwykre-my kia Erai txuròtena aõna toana wadee bidiwahinyke idi arahemyny rakre kia judá bede-ò.
\v 8 Tule rexitòenyre tyyriti sohoji-õ riwyke-my Asae-ò, hãwãdinodu bede-di itxeredu-ò, diwahinyde òwòru-my ijòbòna-my relekre-my awityhy-my kia idi hetonihikỹ-di taruki- my roirekrem-my tule hãwã uhuari riwinykre-my tasỹ tule heto titxibo tai arasỹnykre. Tahe hãwã wedu wadee ibutu-my riwahinyre waixitòedỹỹna-ki aõherekibo Deuxu dori wawana ratximyhỹre.
\v 9 Hãwãwedu diteònyde hãbumynydu tyhy wawana ratxikre-my tule sohoji awaru-ò diteònyde. Tahe jiarỹ rare Efra txuròtena bedehekỹ-ò tahe rewahinyre hãwãdinodu tyyriti kia hãwã ibutu-my rierymyhỹre-ò.
\v 10 Kia tahe Xãbalae Beti-hõrõ hãwã rare, tule Obia, Amò hãwã ludu sohoji òbitityhy rare, tahe tiiboho sõwe-my reburerenyre. Kia rieryrenyree-u inyõ nade Ijaeli mahãdu wiòhedỹỹ-my.
\v 11 Inataõ txuu-riwy-di tahe jiarỹ rehemynyre Jerusalĕ-ò.
\v 12 Tuu releõhyykre inyõdee idi raraykynymy rarewãhã hãwãhãkỹ widỹỹmy Deuxudeewi- My Deuxu dori watelesõ-ki rasỹnymy raremyhỹ. Tahe jiarỹ rãire ruwetya-u tahe ròhònyre, inyõ wana rahònyre wabiòwa-wana. Tahe redyre sohoji awaru, tahe jumetu tyre ranyre.
\v 13 Rumy heka jiarỹ rahònyre hãwã-hakỹ ribi ijòtòbònale-my txuròtena-weribi-ò, tule rare wara hewo-ò, tahe aõni brebuna-my reare, kia tule aõxuxu ijòtòbòna-my ixideewi-my rariare, jiarỹ tuu rarure hãwãhaãkỹ uhuari-ò itxere-my tii dori resere-ki tule txiòtòbòna heòty riworonyre-ki.
\v 14 Tahe jiarỹ rexiwiurònyre wako-ò tahe rare ijòtòbòna nihiỹtyhy-di kia rare hãwãwedu beroriòre eresyna-ò. Kia tahe timy jumeto reuròke tamy ihõõre eseterehekỹ-di.
\v 15 Tai heka, jiarỹ rare kedoro weribi-di tahe tuu reare, uhuari-di hyy reteh-my. Tasỹ adoosede warytyby-dile kia idi rare-dile tahe ralore hãwãhãkỹ ijòtòbò nihiỹ-dile.
\v 16 Timyhe hãbuninihikỹ hãwãhãkỹ mahãdu rieryõle-my titxibo wanonana, tule aõbo ariwinykre. Tahe timy jiarỹ aõmy rarybeõhyy rare txiòinyhe inyõ judeu sohojiõ-ò arelyyke - timy teòdureny-ò, tule hãbuninihikỹ-ò òbitihikỹ-ò tule ijõ hãbu ixidee aõmysỹdỹỹna rimyheny.
\v 17 Tai tahe jiarỹ tamyreny rarybere: — Betehebeny iny isiratyhyre inybededỹỹnanareny! Jerusalĕ hãwã heka ibina-my rare ribi.
\v 18 Kia tahe ikore-ny relyyre Deuxu riwatare-my tule riwawiòhenanyre-my. Tule timybo hãwãwedu wadee relyyre-my tule wadee rarybere-my. Tiiboho raryberenyre: —Rikiòrarunyrenyke iwidỹỹ. Tahe rexiywinyrenyre taaõmysỹdỹỹnareny riòrarunyrenykre-my.
\v 19 Kie Xãbalae, Obia haka arabi ijoi-õ rare ini Sese tahe rieryrenyre waaõmysỹydỹỹnareny. Tahe tiiboho txuèreny riòrarunyrenyre iny itxenadỹỹrenymy. Tahe raryberenyre: —Aõbohe kaiboho tewinytenyteri? Hãwãwedu òludu aõbo ixyby bòòsebenykre?
\v 20 Jiarỹ rarawuónyre: — Deuxu biuludunyhukỹ inydeereny kadiwahinykre awihikỹ. Inyboho heka teòdu roire tahe rikiòrarunyrenykre iwidỹỹ. Kaiboho heka Jerusalĕ wedu aõkõ toite, tule inyõ iruru ijõõre tulesỹ inyõ timy Ijaeli mahãdu Deuxu rybe ihõõre.
\c 3
\p
\v 1 Hãwãhakỹ uhuari ixyby riwinyrenyre myy: Elisebe, tii ityhydỹỹdu nihiỹ rare tule tabiòwa-wana riwinyre budoini ijòtóbòna. Imy rexihu-di tahe teysana rỹire kia tahe ibutu-my ijòtòbòna ritidirenyre taherina-ò. Tiiboho uhuari ritõmoranyrenyre tule xeĩ iraiehekỹ kia tule Hanane irariehekỹ ritõmoranyrenyre.
\v 2 Jeriò hãbu mahãdu tahe ijõ riwinyrenyre. Aku heka Iri riòre rare, ijõ iwitxira riwinyre.
\v 3 Hasenaa ijoi heka utura ijòtòbònahakỹ riwinyrenyre. Tiiboho tamy ritidirenyre iijesena tule ijòtòbòna teherinaò tule tamy ritidirenyre itỹrỹrỹna irarutxi-wana.
\v 4 Kia heka inataõ bededỹỹnana hãbu mahãdu widỹỹna rare: Mememoe juhutyhyu widỹỹna, tii heka Uri riòre rare Hao riòkore tahe rare, Meulỹ tahe ihewomy diwinyde tii heka Berei riòre rare Meeabe riokòre tahe rare. Iheworenytyhy-my tahe Xadoe riwinyre, Bana riòre heka rare.
\v 5 Teoa hãwãhakỹ mahãdu hãbu tahe iwitxira riwinyrenyre. Hãwãhakỹ mahãdu hãbu irurutere boho tahe taaxiò-di widỹỹ derale-my reoarenyre. Kia iwedureny tuu tamyreny rarybere derarenyre.
\v 6 Joia, tahe Baxé riòre rare, Meulỹ, tahe Bexoji riòre. Tiiboho ixyby riwinyrenyre ijòtòbòna ihetxina. Tiiboho ritidirenyre ijòtòbòna ijesena ibutu ijòtòbòna-ò tule ritidirenyre itỹrỹtỹrỹna tule iruritxina,
\v 7 Melati, Xibeõ, Jado, Meroote, tiiboho heka Xibeõ hãwãhãkỹ ludu roire tule Mixatxa kia bede riwinyrenyre, hãwãwedutyhy heto-ò hòkỹle rehemynyrenyre kia Erai txuròtena-bede- di.
\v 8 Uxie, tae Haroi riòre rare. Tii heka bededỹỹnana riwinyre. Hanai, heka lynyrena-di nodu rare tule riwinyre uhuari rehe.
\v 9 Heai, tahe Ru riòre rare, Jerusalĕ riwedunymynymy raremyhỹ iere-my tule riwinyre.
\v 10 Jedai, Harumae riòre rare, tule riwinyre taheto ribi iòhòle-my. Hau Habene riòre rare, tii tule riwinyre.
\v 11 Malakia tahe Haari riòre rare, tii tule riwinyre irariehekỹỹ.
\v 12 Salu tahe Halo riòre rare tule tii Jerusalĕ riwedunyre iere-my tule ijõ riwinyrerenyre. Tiiboho ibutumy ijòtòbòna iherina-ò ritidirenyre itỹrỹrỹna tule irarutxina kia tahe riywinyrenyre uhuari iruyre inatxi iwetuu-my he irehe kia ijòtòbòna Xuòhòkỹle.
\v 13 Ranu tahe ijõ ixyby ritymoranyrenyre kia kanoa rasỹnymy rỹira mahãdu wana ijòtòbòna riwinyrenyre. Tiiboho ibutumy ijòtòbòna iherina-ò ritydirenyre itỹrỹrỹna tule irarutxina kia tahe riywinyrenyre uhuari iruyre inatxi iwetuu-my he irehe kia ijòtòbòna Xuòhòkỹle.
\v 14 Malakia, Heabi riòre, tii Beti-Hakere hãwãhãkỹ wedu rare ixyby ijòtòbòna xu riwinyre. Tii ijòtòbòna ritydire iherina-ò, itỹrỹtỹrỹna, irarutina tamy ritydire.
\v 15 Salu, Ka-Hoe riòre, Mixatxa wedu rare, ixyby riwinyre ijòtòbòna, tii iratyti riwinyre tamy tahe txiòtòbòna ritydire iherina-ò tule itỹrỹrỹhỹkỹ, irarutxina ritydire. Kia Xea bee okeresyna-ò, hãwãwedu lòbròna webrijanaò, Salu riwinyre uhuari, kia òwòna Dawi Hãwãhãkỹ-ò ruberehemyhỹreòhòkỹle.
\v 16 Neema, tahe abuke riòre rare, tii iere-my bee-xu riwedunymyhỹre, tii riwinyre ijõ kia tule Dawi wabede, tule bee eseterehekỹ, kia tule rutàsàdu mahãdu hetonihikỹ-òhòkỹle. Leita mahãdu uhuari-ki raõmysỹdỹỹrenyre.
\v 17 Leita mahãdu tule uhuari-ki raõmysỹdỹỹrenyre. Uhuari widỹỹ-ki Inireny ibutu-my raritire. Here tahe Bani riòre rare, riwinyre tule Haabi tahe Bani riòre rare, riwinyre tule Haabi, Kela riwedunyre iere-my tule riwinyre ijõ.
\v 18 Bawa, Hanaji riòre rare, ijõ kela Hãwã ieremy riwedunyre tule riwinyre ijõ kia-my
\v 19 Exe, tahe Jesu riòre rare, Mixatxa wedu rare, kia riwinyre ijõ kia-my, kia debòna hyna koo titxibo uhuari weryna òhòkỹle;
\v 20 Baruke, Jaba riòre rare, ijõ kia riwinyre, uhuari werynabedeu-le Eliaxi ijòtòbòna-òhòkỹle rexiònananyre, ityhydỹỹdu nihiỹ-ò.
\v 21 Mereno, uria riòre rare tii heka Hao riokore rare kia riwinyre ijõ kia-my, kia Eliaxi ijòtòbòna bedeu hukỹle ta iheto onana-ò hòkỹle. Teòdu mahãdu uhuari riwinyrenyre.
\v 22 Teòduboho tule riwiòhenanyrenyre uhuari ixyby widỹỹ-ki. Tahe inireny ròhònyre. Teòduboho heka Jerusalĕ webòrò-di rasỹnymy roiremyhỹre, tahe riwinyrenyre ijõ kia-my.
\v 23 Bejami Habuxi wana riwinyrenyre kia ijõ, tahetoreny oreny-txi. Aria, Maaxe riòre rare, tii heka Anawi riokore rare, tahetokotxi ijõ riwinyre.
\v 24 Bino tahe Henaji riòre rare, ijõ riwinyre. Kia Aria heto bedeu kia uhuari weryna-ò hòkỹle.
\v 25-26 Bala, tahe Uxi riòre rare, ijõ riwinyre ryweryna ribi rikỹle riòrarunyre tule Hãbuninihikỹ raõmysỹdỹỹna biu-ki irariehekỹ rỹimyhỹre ribi iòhòmyhe. Bedai, tahe Barò riòre rare, ijõ riwinyre kia txuòlòna bede ribi, bee ijòtòbòna iòhò-my tule kia irariehekỹ, Deuxu rybe yrybuna iòhò-my tule kia irariehekỹ, Deuxu rybe yrybuna iòhò-my kia Hawahỹhakỹ Óke inire kia heka hãwã iòhòmy roire, hãbu mahãdu heka tuu rasỹnymy roiremyhỹ tule Deuxu rarybera heto riwinyrenyre.
\s1 Ijõ widỹỹ boho.
\v 27 Teoa Hãwãhakỹ hãbuboho riwinyrenyre ijõ, tii heka ihewo-my ijedure sohoji urihixina, tahe iweribi aõkõ bedeu heka Deuxu rybe yrybuna nihiỹkỹ kia Oke urihixina iòhòmy.
\v 28 Xiwena wahidỹỹdu mahãduijoi riwinyrenyre ijõ, kia awaru Ijòtòbòna-ò hòkỹle ròhònymy riwinyre kia iraru weribihikỹ-ò rexidorunymy iny sohoji sohoji taheto riwinyre tahetotyhy kotxi;
\v 29 Jadoke, tahe Xenaki riòre rare. Tii heka Txuòlana Ijòtòbòna-di itxeredu rare, tahe riwinyre ijõ kawese.
\v 30 Haani, tahe Xeleni riòre rare, Hanu, tahe Jalae debòsohoji reurò riòre rare. Tii riwinyrenyre ijõ. Kaa heka tiiboho riwinyrenyre ijõ juhuu riwinyrenyre hewo-my. Mejulỹ, tahe Bereki riòre rare, tii riwinyre ijõ taheto kotxi;
\v 31 Sohoji womati tỹrỹhỹkỹ-di ijohodu-õ heka Malakia inire ijõ riwinyre kawese-my, kia-òhikỹ-le sohoji heto aõmysỹdỹỹdu mahãdu Deuxu dohodỹỹna riuhe-my rỹiramyhỹ-ò hàkỹle tule kia aõdi ijohodu mahãdu-ò hòkỹle. Kaa heka heto rỹimy raremyhỹ kia Ijòtòbòna yrybuna bire-ki, kia utàna iòhò-my tai rỹiramyhỹ iraru weribi uhuari bede weryna iòhòmy.
\v 32 Kia womati tỹrỹrỹ ijohodu mahãdu tule aõnaõna-di ijohodu mahãdu riwenyrenyre ijõ konana-my, kia utàna budoini Ijòtòbòna weryna-ò hòkỹle.
\c 4
\s1 Neema òludu mahãdu.
\p
\v 1 Kia Xãbale tuu roholareu judeu mahãdu ixyby uhuari ritomoranyrerimy, tahe urile reburere kia riàrurenyre iyboho rityhynyõrenyre.
\v 2 Inybiòwareny ko-txi tule Xamarita xoladu mahãdu-ò raryber: —Aõhebo kaa judeu mahãdu aõke aõkõ riwinyrenyrei? Tiiboho aõbo inatyhy-my hãwãhãkỹ ixyby riwinyrenyreri taruru-my? Tiiboho aõbo inatyhymy xiwena tamy riwahinyrenykre-my raraykynyreri, tahe sohoji txu-dile rahurenykre-my taõmysỹydỹỹnareny? Inatyhymy kia mana ratòbòna ibutu-my roare tiiboho ixina-my ritarenykre mana ixyby riwyrenykre-my?
\v 3 Tobi tahe Amo bede ludi irehehekỹ ludu rare, tahe tiiwana ratximyhỹ tahe rerybere:—Timybohe tiiboho uhuari ixyby riwinyrenykre? Kia sohoji ijòrò inatyhyhykỹle-my aõtaxina kidiatykre!
\v 4 Inydeuxureny, roholamyhỹre tiiboho inymyreny bedeherina-ò! Kia tahe iratireny tyre bede yarana kadesekre. Aõdibo tiiboho rawasinyrenyre òraru-ki. Tiiboho riwyrenyre tasureny-ò irehetyhy-ò tawedureny-ò.
\v 5 Kia timy ruxetòena aõbo ibina riwinyrenyre òraru-ki aõ ijõõhyyre timy tõhõtireny rusaõhyyrenyre taòrarunareny ribi tahe inyboho riwinyrenyre òraru-ki.
\v 6 Tai tahe uhuari widỹỹ ixyby rikiòrarunyrenykre, tahe aõwesele irarie iwetya-txi rỹire sõwe-my dori ijoi mahãdu aõmysỹdỹỹ rururenyre.
\v 7 Xỹbalae, Tobia wana tule Arabi mahãdu wana, Amo Adoji wana urile reburerenyre sõwe-my kia Jerusalĕ uhuari widỹỹ ixyby riòrarunyrenyre-ki. Kia-ò roholarenyreu tahe timy tamyre aõ ijõõhyyre kia dori irarutxi-my roimyhỹ-ki.
\v 8 Tahe tiiboho rexibutunyrenyre widee raryberenyre urile Jerusalĕ rahurenykre-my tule tai sõwemy aõbinahakỹ rỹikre-my.
\v 9 Tahe urile jiarỹboho rexitòenyrenyre waDeuxureny-ò tahe hãbu mahãdu resỹnyrenyre itxeredu-my ijoi òludu ijesedu-my ru-my, txu-my ijoi retehemyhỹrenykre-my.
\v 10 Tahe Judá ijoi kawese-my rawinymyhỹrenyre: “Id iwisỹdỹỹdu mahãduhe iworeny rexieryre, ta ihãrele sõwemy tuu rururenyre saõsaõ-my riwyrenyke-my.” Tiibohe rahurenykre uhuari widỹỹ?”
\v 11 Iny òludureny timybo raraykynymyhỹrenyre kia inyboho tuu rakobirenyõke-my aõbo tai ròhònymyhỹre-ò. Kia tahe tiiboho wese heka inymyreny rahaỹnanyrenyreri, iny rubudỹỹrenymy tule iny aõmysỹdỹỹnarenymy.
\v 12 Tiwese wase aõkõ heka judeu mahãdu tai rasỹnymyhỹrenyre iny òludureny mahãdu wana doidenyde iny bedeerydỹỹrenymy timybi riwinymy roiremyhỹ warirenyòtu.
\v 13 Tai tahe jiarỹ may wedesehekỹ reyterenyre ijoi mahãdu-ò, tõnori tule xiwahate, wyhywana ijoi mahãdu-ò rewahinyre, tahe uhuari webòrò-my kia ibutu-my tibo iywidỹỹõmy roiredihe ritòòsenyrenyre.
\v 14 Tahe tureny rabire sõwemyhe ijoi mahãdu rohõtiyrerenyre tai tahe rarybwere tamyreny idi hãbuninihikỹ mahãdu-ò tule idinodurenytyhy mahãdu-ò. Iny òludureny lau breburenyõmy. Ohõtireny reake timybo hãbu Deuxu rare, tii nihiỹ rare tule ibina kia tahe resumyhỹre iny òrarurenyki, tariòremy òraruki tule tahawyreny òraruki kia tule taaonareny òraruki.
\v 15 Tahe inyòludureny-he inymyreny bede rieryrenyre inybohohe itxi rekoaremy aõbo timybo tiiboho bede riywinyrenyreri-my tahe rieryrenyre timybo Deuxu iaõmysỹdỹỹnareny rikorore-my. Tai tahe inya~mysỹdỹỹnarenyòhe rikioresereny-kre ixybyle uhuari rikiwinyrenykre-my.
\v 16 Kia tahe, hãbu ibutehekỹ-my raõmysỹdỹỹnyrenyre ijõ mahãdu tahe urile itxeredu-my roiremyhỹ, tebònareny ijõdi-my kia tõnori wahe, wyhy, xiwahate wana. Kia tahe hãbuninihikỹ mahãdu ibutumy tarurureny tamyreny riwahinyrenyre.
\v 17 Kia uhuari ixyby riwinymyhỹre-ki; iny sohoji sohojihe aõnaõna tebò-my riwyrenyre, ijõ mahãdu tahe tebòna riwyrenyre.
\v 18 Tahe tiiboho riwyrenyre taaõmysỹdỹỹnareny-ò maydese desehekỹ tarexiàki. Iijesedu mahãdu tahe urile rotoarenyre ajuròna-di kia bedeeryna riwahinyke-my, kia waribi iòhòl-my.
\v 19 Tahe jiarỹ rarybere waijoi-ò, tule hãbu òbiti mahãdu-ò, kia tule hãbuninihikỹ mahãdu-ò. —Kia tahe sõwe-my aõmysỹdỹỹna rauberare, tai tahe jiarỹboho irehetyhymy iribi roire kia ijỹo uhuari ribi.
\v 20 Kia kaiboho ajuròna jurò-ò boholabenykre wana, bexibutunybenykre wade. Inydeuxureny kadesukre inykire-ny.
\v 21 Txuỹotxuỹole-my kawese kia txuu ròhònymyhỹyre bedeu kia taina tahe rumy rexitynynymyhỹre, tahe jiarỹboho ibute-my uhuari widỹỹki raõmysỹdỹỹrenyre, ijõ mahãdu hãbu tahe itxeredu-my roiremyhỹy tõnori tebònarenymy.
\v 22 Iwese bedeule tahe, jiarỹ rarybere tule aõmysỹdỹỹna wedu-ò tureny ibutu-my kia aõmysỹdỹỹna wedu-ò tureny ibutu-my kia tule iwiòhedỹỹdureny wana tureny rarure, rumy roirenykre-my Jerusalĕ-ò tai inyboho kia wese-my rakaõmysỹdỹỹnyrenyke txu-my rumy tahe hỹawãhakỹ-di itxeredu-my rakatxirenykre.
\v 23 Jiarỹ aõkõre, tule iny ijoireny aõkõre, tule timybo inyaõmysỹdỹỹdureny da inytỹhinareny rakatxireõkre inybòròreny-ribi rakõrõrenykelau. Tahe ibutu-my inyboho tuhyy rokoirekre inydebònareny-di inydebònareny-di inydebònareny-ki.
\c 5
\s1 Hãwãdu mahãdu bede hudunamy.
\p
\v 1 Ijỹo bededỹỹnana hewo-my, iny sõwe-my, hãbu mahãdu hãwyy wana sõwe-my wiwesehyy tahe ribemy ijara riòrarunyrenyre judeu mahãdu ribi òtu
\v 2 Ijõ mahãdu raryberenyre:— Wasỹ mahãdu heka iruterere sõwe-my, tahe maixõmonirỹsỹ-my rarurenyre awi-my iru-my ijoi rỹikõ-my.
\v 3 Ijõ mahãdu raryberenyre:— Ramamy ijoi ruruhenylau, ijoi ixybyle tasu riywinymyhỹke, tuu ijoi bederatysò ribòrònymyhỹke-my tule inyhetorenyki maixomoni riki õbaranyhenylau.
\v 4 Tasỹ mahỹdu-sỹ kia-my raryberenyre:—Rekexitòenyrenyke iubeweri huòte-my hãwãwedu-ò inyaõmydỹỹreny idi rikiòwynyrenyke-my kia kia inysure-ny inybederatysò lòbòròdỹỹ idi riòwynyrenyke-my.
\v 5 Betehebeny iny boho heka judeu mahãdu wesetyhyle roire, tahe iny riòre boho heka iratyrereny awityhyre iribire-ny. Kia tahe inyboho rikiwinyrenyke ijõdire aõherekibo inyriòrereny iòwykõmo raõmysỹdỹỹnymyhỹrenyre. Iny riòrereny ijadòma-ò heka ijohona-my reare. Kia iny iòwyõmy raaõmysỹdỹỹnymyhỹre wese-my. Tahe timyhe rikiwinyrenyke ihõõre, tahe inybederoreny tule kia inybederatysòreny lòbròna heka inyribireny riwyrenyre.
\v 6 Jiarỹ Neema kia rybe-ò raholareu, tahe reburere,
\v 7 Jiarỹ ariwinykre aõtxile aõbo. Tahe hãbunihikỹ mahãdumyhe tule hãbu òbiti mahãdumyhe reeryre tahe rarybere: — Kaiboho heka waseriòre mahãdu aõhõkỹmy tesỹnytenyteri. Kia idi rahõtinyre ribi, tahe ijoi rebutunyre timybo bede riywinykre-my ibina ribi.
\v 8 Tahe rarybere: — Inydeewirenykeki tahe inyhõrõre-my, inyboho riwyrenyre kia bade hãwã iwitxira ribi inywedureny judeu mahãdu heka ixidireny rohonyrenyre tamyreny iòwyõle-my. Wiji tahe kaiboho, judeu mahãdu sõwe-my taruru-my ixiòbitile-my ixidi rohonymyhỹrenyre tawedu-ò òtyhyle. Tahe hãbuninihikỹ mahãdu rybeõle-my ratxirenyre tahe timy irawyònareny-txi rekoarenyõhyyre.
\v 9 Tahe jiarỹ rarybere: — Aõbo kaiboho tewinytenyteri heka òbiti aõkõ rare! Kaiboho tuu burubenyke Deuxu ko-txi tahe biwinybenyke aõbo òbiti, aõhe-ki tamy rikiwahinyrenyke inyòludureny-ò, aõ judeu ijoi aõkõ, inykireny rarunyrenyke-my aõkõ.
\v 10 Jiarỹ, wabiòwa boho wana, hãbumahãdu wadee raaõmysỹdỹỹmyhỹre mahãdu tahe jiarỹboho iubeweri reheòterenyre tule waixomoni ijoi mahãdu-ò. Tahe wiji jiarỹboho awatxityyrenymy aritomonykre.
\v 11 Tahe, kaiboho ibutu-my bitomonybenykre ibutu-my iwatxityyreny iubeweri, monabesò tule aõuri. Tahe wijityhyle bidiòesedỹỹbedenykre abederoreny, tule abederatysòreny lòbòròna tule aòwòrureny kia tule ahetoreny.
\v 12 Hãbuninihikỹ mahãdu rirawyònyrenyre:—Awirehe. Jiarỹboho ariwinyrenykre kai aõmybohe taryteri. Rikiòsedỹỹnyrenykre isureny tamyreny timy iwatxityyrenymy tamyreny ribeòle-my iòwydỹỹ-my. Tahe jiarỹ xiwenawahidỹỹdu mahãdu-ò raryre tahe riwinyre hãbuninihikỹ mahãdu riwatyhynykremy kaa rybeheki ratxirenykre-my.
\v 13 Iribi tahe retare tyyre tarexiàtiki riuhemyhỹre tahe reòhowire. Tahe rarybere:—Kawesemyhe Deuxu riòhòwikre aõtxile kaibohoõ rybe bityhynyõbenykre. Deuxu tahe kiditakre iribireny ihetoreny tule ibutu-my aõbo tiiboho ijõdire ririrenykre aõkõ hyky. Aõbo tiiboho ijõdirenyre tahe tiiboho raryberenyre:— Tiòtòi tuke! Kawese rare! Tahe Deuxu-my reàlàrenyre, inynyrenymy. Tahe irybe-my reòbyrenyre aõbo riwinyre-my.
\s1 Neema telesõwihikỹ tule ityhyna nihikỹ ijõdire.
\v 14 Tahe debòinatxi reurò beòra-my tuhyy judà bede dinodu-my raremyhỹ, kia wawiò-my Ataxaxa kia hãwã-ki bede riije-my raremyhỹu kia inataõ inatxi beòra-myhe timy jiarỹ, timy waseriòre woludu boho wana reroxirenyre tule tabyrena òbiti-my jiarỹ òbiti-my wedu-my ararekre.
\v 15 Wahe waribi, tahe wedu mahãdu kia riwyrenyre ijoiboho kiawese-my riwinyrenyre inaubiòwa sohoji wetuu òwy womati ura tỹrỹrỹhỹkỹ xiery he rỹsỹna mona besò riwyrenyrekre sohoji txu-my. Kia tahe teòdu mahãdu ijoi mahãdu aõhõkỹmy risỹnyrenyre. Tahe jiarỹ he iwitxira-myhe ritidire wiri iwirawitxira-my. Deuxu-my reòbyre-ki wahe.
\v 16 Raõmysỹdỹỹnyre kia warurutyhy-my uhuari ixyby widỹỹ-ki.
\v 17 Tahe wahetotyhykihe bede reijerenyre sohoji, iruyre, iwetuu ibire-ò myhe judeu mahãdu wana kia iwedu mahãdu wana, ijõ mahãdu wana kia iwedu mahãdu wana, ijõ mahãdu ibutu-my bedebede ribi doidenyde waheto-ò.
\v 18 Txuõtxuõle-my heka jiarỹ sohoji tamyreny bòròreni hãbu reyreynymyhỹre, tule deboosohoji reurò-myhe budoeni wihikỹtyhy tule sõwe-my hãnie idòrenymy reyrybunymyhỹre. Debòwiò bede rijedi tahe monabesòhòkỹ-my warybe rewahinywahãre kanake-my. Tahe reerymy rarewãhã timybo ijoi mahãdu tai raaõmysỹdỹỹnymyhỹre tai isira-my, tai heka timy iubeweri-my rexitòenyõhyywãhãre byrena òwy-my kiaki heka jiarỹ wedu òbiti rare-ki.
\v 19 Waha Deuxu adee jiarỹ arexitòenykre aãbo tamyreny rewinyremy ibutu-my kia ijoi mahãdu-ò.
\c 6
\s1 Neema òludu-my riwinyrenyre
\p
\v 1 Xỹbalae, Tobi,Jese tule inyòludureny uhe rieryrenyreu kia uhuari widỹỹ ixyby inyboho rehurenyremy tahe timy ixyby inydeereny aõ ihõõhyykre, tahe heka urile ij`tòbòna iherina-ò inyboho ritydirenyõhyyre.
\v 2 Tai tahe Xỹbalae, Jese wana riwahinyrenyre tarybereny wadee. Tiiboho heka wamy rururenyre wawana witxi rekoarenyke-my kia Õno iwyryhykỹ bede-ki. Tahe iraykyreny heka kiamyre tamyreny aõ ibina ariwenyke-my rexinohõtinyrenyre.
\v 3 Kia tahe jiarỹ reteòny rybe-di nodu tamyreny warybe-my rarybekre-my. —Jiarỹ sohoji aõmysỹdỹỹna risi-my rahõtinyõre awanareny rybe òrarukile.
\v 4 Tahe tiiboho tarybereny tuhyy riwahinyrenyre inaubiòwa-my wadee, tahe jiarỹ warybe rewahinywãhãre tuhyy.
\v 5 Tahe Xãbalae tarybe iiruyrena-my wadee riwahinyre, kia biritiny-my kanakre. Kia heka tyyriti rare, tahe adiwyde Xãbalae deòduõ ribi.
\v 6 Tahe tyyriti irayhykỹle-my roire tahe rarybere:— Jese heka wadee rarybere tiiboho heka tabireludu mahãdu wana sohoji aõmydỹỹna hewo-my rekoarenyreri. Tiiboho raryberenyre awese kia judeu mahãdu riwinyrenyre sohoji aõmysỹdỹỹna ihetxina, taiki tahe tiiboho ixyby uhuari riwinyrenyre. Tii raryber aõbo riwinykre-my tule tii riki iwedurenymy ratxikre-my.
\v 7 Kai aõbohe aõtxi teate”Deuxu rybedutyhy tamyreny rarybere Jerusalĕ mahãdu-ò kia tii heka Juda wedu rare. Tii heka Arataxa wedu rare tii heka rierykre òbiti-my tuu tai tahe aritidikre inyhyyle witxi rekeamy widee ibededỹỹnana-my rakarybekre-my.
\v 8 Tahe jiarỹ rewahinyre irawyòdỹỹna kia-my: —Aõmybo kai tarybeteri heka òbiti aõkõ rare. Kaile heka aõnaõna tuu tewinyte.
\v 9 Tiiboho brebu-my roiremyhỹ tahe kia wese-my rururenyre taaõmysỹdỹỹnareny ixyby rewinyõrenyke-my. “Wiji tahe, waruru Deuxu rexiòlòdỹỹnykre.”
\v 10 Wiji bede-my, Xemai, Delaa riòre kia Metabe, riokore, riokorore heto ribi ròhònyke lau, tai tahe irura-my rare. Wadee tii rarybere:—Inyhyyle tureny rurumyhỹre tahe Bade wihikỹ-ò rekexiòrenykre tiiboho wana Deuxu rybena heto-ò. Tahe rakiratòbònyrenykre ibutu-my ijòtòbòna tiiboho dori arubudỹỹmy kadoidenykre. Kohe, tiiboho heka aõtxule-my kadoidenykre rubudỹỹ-my.
\v 11 Kia tahe rerawyònyre: —Jiarỹ hãbu lau brebu-my arahenykre wadee ijõõre tule arexiwòke wadee ihõõre. Kai tarynymãhãte jiarỹ wau-my arihedỹỹnyke-my tule Deuxu rybena-ki arexiwokemy? Tahe jiarỹ kia wese ariwinyõtyhy, tiu.
\v 12 Jiarỹ reòrarunyre idi rayky, reeryre dori Deuxu, Xemai-ò rarybeõre-my. Kiaki Tobi, Xỹabalae boho dori riòwynyrenyre tamy ariwahinykre-my dohodỹỹ.
\v 13 Tiiboho riwahinyrenyre tamyreny iubeweri ilaureny aruberuke-my tule wadee iky kadeadenykre.
\v 14 Waha Deuxu, õhõti reake timybo Tobi, Xỹabalae wana riwinyre-my tamyreny yaara riteònyrenyre tule õhõti reake noaji Deuxu-my rybedu nihikỹ ijõ mahãdu tule riwinyrenyre ilaureny aruberuke-my.
\s1 Uhuari widỹỹ rexihure
\v 15 Waa wiò, iruyre txu ahãdu elu-u tahe uhuari widỹỹ rahurenyre, kia iruyre, inatxi txu-my riwyre-di wahe iwidỹỹ.
\v 16 Tai tahe inyòludureny bedebede-my iòhò-my rỹirenyra rieryrenyreu ibutu-my rexityhynyrenyõhyyre tiiemy dorihe tiiboho rieryrenyre Deuxu riwiòhenyre widỹỹaõmysỹdỹỹna.
\v 17 kia bedeu heka judeu wedu mahãdu sõwe tyyriti riwahinyre Tobia-ò. Tii tule sõwe tyyriti tamyreny riteònyre.
\v 18 Sõwe Judá mahãdu Tobiamy awimy tai rahamyhỹre tii wanale idi rarurunymy roire. Tobia heka Sekania iralyby rare, Sekania, riòre labié rare. Tobia riòre heka Joanã rare tii Mesulã iriòre wana roire, Musulã heka Berekia riòre rare.
\v 19 Tii boho heka waru-kile Tobia aõmysỹỹdỹỹnamy awimy rarybemy roiremyhỹ, tule Tobia-ò ibutu warybe relyyrenymy roirenyre. Tobia tyyritimy idihyymy wadee riteònymy roire riwabrebunynykremy.
\c 7
\s1 Manaòtity nihikỹ
\p
\v 1 Ixyby Manaòtity nihikỹ riwinynyroiremyhỹ ijòtòbòna heka ibutumy riderenyre tai. Ibutu Levi mahadu iaõmysỹdỹỹ, heto itxeredu mahadu iaõmysỹdỹỹ, iwiudu mahadu iaõmysỹdỹỹ ibutumy ritidimy roiremyhỹ.
\v 2 Jerusale wedumy inatximy resỹnyre waseriòre boho Hanani Hanania resỹnyre. Hanania heka Manaòtity nihikỹ wedumy rare tii òbitidỹỹdumy rare Deuxu tyhydỹỹdu iratyre ijõ habu ribi heka rare.
\v 3 Tamyreny rarybere txuu ratòteenykreu heka tai xiery ijòtòbòna nihikỹ heka biraynybenykre. Tule kia ijòtòbòna nihikỹ riratòbònyke itxeredu mahadu taõmysỹ rexihukre koki bede ratxioronykreu. Tulesỹ rarybere heka Jerusalesỹdu mahadu ritakemy bededi itxeredumy. Ijõ heka itxeredumy rexisỹnykre, ijõ tahe tasỹkokile itxeredumy rexisỹnykre.
\s1 Suwitxira ribi dòhònyde mahadu. (Exidara Tyyriti 2.1-70)
\v 4 Jerusale heto heka hawa nihikỹ rare ihỹre tahe heto ibutere.
\v 5 Tai Wawo heka Deuxu ritidire wedu mahadu iny mahadu wana ributunykemy iny tamahadunimy tyyritiki rijekemy. Tyyriti-ki rahare heka Babilonia ribi juhu roosere mahadu.
\v 6 Nabukodonoso heka Babilonia wedu heka Isaeli mahadu ridyre juhuu jud· hawa ludu sõwe rare. Tii boho rooserenyreu ijõ Jerusale hawa-ò roirenyre ijõ tahawareny-ò roirenyre Juda-ò.
\v 7 Kia inirenymy roire: iwedurenyni Zorobabeli, Josué, Neema, Azaria, Ramia, Nami, Neu Baaná.
\v 8-25 - Katahe Babilonia ribi dirahude, kiamy roireri inirenyre iwedureny tamahãdu tamamahãdu wana:
\m Barò wana dirahude 2.172 iny sõwe.
\m Sewatxia wana dirahude 372 iny sõwe.
\m Ara wana dirahude 652 iny sõwe.
\m Bate Moabé wana dirahude- Moabe ludu Jesua iriòkorereny inatxi nihikỹmy 2.818iny sõwe.
\m Elõ wana dirahude 1.254iny sõwe.
\m Satu wana dirahude 845 iny sõwe.
\m Sakaí wana dirahude770 iny sõwe.
\m Binuki wana sõwe dirahude 648 iny sõwe.
\m Bebai wana sõwe dirahude 628 iny sõwe.
\m Asikadi wana sõwe dirahude 2.322 iny sõwe.
\m Adònikã wana sõwe dirahude 667 iny sõwe.
\m Bikiwai wana sõwe dirahude 2.067 iny sõwe.
\m Adi wana sõwe dirahude 655 iny sõwe.
\m Até (ijõni Esekia heka rare) wana sõwe dirahude- 98 iny sõwe.
\m Hasu wana sõwe dirahude 328 iny sõwe.
\m Besaí wana sõwe dirahude 324 iny sõwe.
\m Hariwe wana sõwe dirahude 112 iny sõwe.
\m Xibeaõ wana sõwe dirahude 95 iny sõwe.
\v 26-38 Kia boho Ilabiereny hawã-ò rasỹnykremy dirahude:
\m Belẽ, Nevotá hãwã-ò dirahude 188 iny sõwe.
\m Anatotxi hãwã-ò dirahude 128 iny sõwe
\m Betxi- asamevetxi hãwã-ò dirahude 42 iny sõwe
\m Kiarite-xeari, Sivirá, Beroté hãwã-ò 743 iny sõwe
\m Hamá, Sebá hãwã-ò dirahude 621iny sõwe
\m Mikimasi hãwã-ò dirahude 122 iny sõwe
\m Beteli, Aí hãwã-ò dirahude 123 iny sõwe
\m Ijõ Nebo hãwã-ò dirahude 52 iny sõwe
\m Ijõ Elaõ hãwã-ò dirahude 1.254 iny sõwe
\m Harí hãwã-ò dirahude- 320 iny sõwe
\m Jeriò hãwã-ò dirahude- 345 iny sõwe
\m Lode, Hajije, Onó hãwã-ò dirahude- 721iny sõwe
\m Sená hãwã-ò dirahude- 3.930 iny sõwe
\v 39-42 - Xiwena wahidỹỹdu mahãdu Babilonia ribi dirahudenyde:
\m Xedaia riòkore Jesua mahãdu heka 973 iny sõwe
\m Imer tahe 1.052 iny sõwe
\m Basu tahe 1.247 iny sõwe
\m Harí tahe 1.017 iny sõwe
\v 43-45 Xiwena heto aõmysỹdỹỹdu mahãdu Babilonia ribi dirahudenyde:  Jesua Kamijiel wana (Hodaria riòkorereny tahe) – 74 iny sõwe Xiwena heto wiudu mahãdu (Asase riòkorereny tahe) – 148 iny sõwe Xiwena heto itxeredu (Salu, Até, Tamo, Akubi Hatxita, Sobaí iriokorereny tahe) – 138 iny sõwe.
\v 46-56 Xiwena heto iaõmysỹdỹỹdu tamahãdu tamahãdureny iwedureny sõwe dirahude: Siá, Hasurá, Tabaòté, Keròsi, Sia, Padõ, Lebaná, Hakabá, Samaí, Hanã, Xideu, Kaa Heaiá, Hesi, Nekodá, Kasá, Usá, Paseiá, Besáí, Meuni, Nefisi, Bakebuké, Hakuba, Haru, Baxilite, Meda, Hasa, Bakòsi, Siserá, Tamá, Nesiá, Hatxiba.
\v 57-59 Salomaõ heto iaõmysỹdỹỹdu tamahãdu tamahãdureny sõwe dirahude: Setaí, Soberede, Berida, Jaala, Sakõ, Xideu, Sebatxia, Hatiu, Bokereji-Sebai, Amõ wana.
\v 60 Salomaõ heto iaõmysỹdỹỹdu tamahãdu tamahãdureny 392 iny sõwe dirahude
\v 61-62 Kiareny heka Delaia, Tobia, Nekoda heka 642 iny sõwe imahãdureny dirahude Hãwã hãwã ribi. Temelá, hãwã ribi Tehasa hãwã ribi, Kerube hãwã ribi, Adõ hãwã ribi, Ime hãwi ribi dirahudenyde hỹre heka Israeli mahãdumy roirerimy rexininirenyre tahe moõ rieryõre inatyhymy Israeli mahãdumy roireri-ki.
\v 63-64 Tulesỹ Hobaia, Ako, Basilai mahãdumy roirenyre tii boho heka xiwena wahidỹỹdu mahãdu roirenyre tamahãdu tamahãdureny dirahudenyde tahe itxi rahaõre inatyhymy imahãdurenymy roireri moõ rieryõre. Juhu heka basilai riòre wana roire tai iriòre labie inimy rexininire. Inireny rahaõrenyre-ki tai raloõrenyre Israeli mahãdu xiwena wahidỹỹdumy.
\v 65 Kia òraruki heka hãwã wedu tamyreny rarybere wahidỹỹdu rasỹna irasỹdỹỹrenyõkemy tiemy dori xiwena wahidỹỹdu rehemynykeu mana idi rehukre tai rieryke timybo tii boho ratxirenykremy. Uri Tumi juhuu bede-ò rehukremy xiery tai rierykre.
\v 66-69 Israeli mahãdu ibutu sõwe dirahude heka 42.360 iny sõwe:
\m Iwetxu mahãdureny, hãbu, hãwyy- 7.337 iny sõwe.
\m Wiudu mahãdu hãbu, hãwyy- 245 iny sõwe.
\m Awaru heka 736 sõwe.
\m Jumetu hãwyy heka 245 sõwe.
\m Kamelu 435 sõwe
\m Jumetu hãbu 6.720 sõwe
\s1 Xiwena heto tỹmyra
\v 70-72- Sõwe iny nieru riwahinyre Xiwena heto tỹmyra relekremy. Hãwã wedu heka womati tỹrỹrỹhỹkỹ debò inataõ utxiena weremy riwahinyre, 50 hyna tule xiwena wahidỹỹdu tyky 530 sõwe riwahinyre. Ijoi mahãdu heka tamahãdu tamahãdureny riwahinyre womati tỹrỹrỹhỹkỹ 158 iutxiena, 1.257 womati tỹrỹrỹhỹkỹ iura riwahinyre. Iuhe mahãdu heka womati tỹrỹrỹhỹkỹ 168 iutxiena riwahinyre, 1142 womati tỹrỹrỹhỹkỹ iura riwahinyre, tule xiwena wahidỹỹdu tyky debò inatxi reurò riwahinyre.
\v 73 Israeli mahãdu tasỹreny riwinyrenyre ritelenyre rasỹnykremy judá hãwã-ki, ibedeu su iòhòmy.  Tii boho heka xiwena wahidỹỹdu mahãdu roire, Deuxu heto itxeredu mahãdu roire, wiudu mahãdumy roire, Deuxu heto aõmysỹdỹỹdumy roire.
\c 8
\s1 Exidara Deuxu bedeywina tyyriti-di rariare inyde
\p
\v 1 bede roimy rare iribi tahe Debò inatxi reurò ahãdumy heka isaeli mahãdu hãwã hãwãmy rasỹnyroiremyhỹ. Tii heka ahãdu riòrarunyreu rexibutunyrenyre Jerusale hãwã-ki ijòtòbònabe-ki rexibutunyrenyre. Tai heka Exidara-ò rexitòenyrenyre Moisesi Bede ywina rybe Deuxu riwahinyre kidiwykremy idi rariakremy. Exidara heka xiwena wahisidỹỹdureny rare irybedurenymy.
\v 2 Tai riwyre heka rexibutunymyhỹreu kia hãbu hãwyy mahãdu  uladu mahãdu tule rierykeki roholake.
\v 3 Taile heka ijòtòbònabe-ki txu reare ribi txutyemy idi rariare tamyrenyò-le. Ibutumy tahe roholawiwirenyre.
\v 4 Tii boho taba-di rirarienyre ityre-ki heka Exidara Deuxu rybe-di rariamyhỹ. Exidara ruru weribi heka roire mahãdu: Exidara huwe weribi heka roire mahãdu:
\v 5 Exidara tabatyre-ki idi rariamyroire tai ibutumy tamy retemy roire. Tyyriti-di rariareu heka ibutumy lamymy roirenyre:
\v 6 Tai Exidara rarybere:—Deuxu Tyhyhykỹ beàlàmyhỹbenyke Tuhyyle rareki beàlàmyhỹbenyke. Tai ibutumy tera riteòsinyre biu-ò tai raryberenyre: Rekeàlàrenyke inatyhymy! Rekeàlàrenyke inatyhymy! Idi tatiowomy reserenyre rexiratytiròmy Deuxu-ò reàlàrenyre.
\v 7 Idi heka lamymy rỹirenyre ixybyle runyre. Idi heka Levi mahãdu bede ywinamy tamyreny ritỹnynyrenyre. Kia Levi mahãdu heka roire:
\v 8 Tii boho heka bede ywina tyyriti heka rariarenyre idi rybe riwiurònyre, ritỹnynymy tamyreny rierytyhyrenykremy.
\v 9 Deuxu rybemy roholarenyreu heka sõwemy bede riòtiinyrenyre tai rahinyrenyre roburenyre. Tai Exidara, Neema iwedureny, wahisidỹỹdureny mahãdu bedeywina rybedu mahãdu heka tamyreny raryberenyre: — Wiji heka Deuxu txuwihikỹ heka rare hirenyõmy! ibruõmyreny! Wiji heka Deuxu txuwihikỹ heka rare!
\v 10 Asỹreny-ò boibenykre! Worana bedehesi-ò biwinybenykre. Arỹsỹnyreny biroxibenykremy ijõ iaõkõ mahãdu-ò biwahinybenybe arỹsỹnareny-ó bitxuatxuake. Amonareny vii bitxuatxuake iaõkõ mahãdu-ò. Wiji heka Deuxu txuwihikỹ heka rare! Tai dori beysabenyke bedeworenyõmy! Deuxu deysanamy ararurudỹỹnykremy!
\v 11 Tai Levi mahãdu inyky-di roirenyre rybe ixãwidina-di iny boho reysarenykremy kia txu heka Deuxu txuwihikỹmy rare-ki wahe.
\v 12 Tai dori tasỹreny-ò idi roirenyre tai riroxirenyre, riõrenyre deysamy. Inyõ iaõnaõna dire heka ritxuarenyre ijõõre mahãdu-ò tiiboho rieryrenyre tamyreny irybe rarybere-ki
\v 13 Ijõ ibiurasò heka iny mahãdu Exidara-ò ributunyrenyre wedu mahãdu, xiwena wahisidỹỹdu mahãdu, Levi mahãdu heka roirenyre Deuxu Rybemy rieryrenykemy
\v 14 Tai Deuxu Rybe-ki rieryrenyre worana bedehesimy Deuxu ritidire Moisesi-ò tyky hetowomy rasỹnyrenykremy worana bedehesisỹ-ò.
\v 15 tai ibutu hãwã hãwã-ò rarariòwyre:— Ijoi ròhònyke heka aõma òwòru ruru biòròbenykemy nobò, roreru, olivaò, òwòru ruru-di heka Deuxu Rybe wese heka inyheto rikiwinyrenykemy.
\v 16 Tai ròhònyrenyre òwòru ruru diwydenyde tahetomy riwinyrenykemy. Ihetorenyube-ki tawelòreny riderenyre, taheto ratyky-ki tawelòreny riderenyre, xiwena hetoube-ki tawelòreny riderenyre Efarai ijòtòbòna-ki tule Beijòtòbòna-ki ijô riderenyre.
\v 17 Ibutu mahãdu suwitxira wetxumy roire iribi ròhònyrenyre mahãdu heka tawelòreny  riderenyre iwo-ki rasỹnyrenyre tai. Josue bedeu iribi tuu riwinyrenyõre wiji heka riwinyrenyre dori tai sõwemy reysarenyre ibutumy.
\v 18 Tai heka worana bedehesi Welòheto riòrarunyreu ribi heka Deuxu Rybe idi rariarenyre txuõtxuõlemy. Titxibo heka rare debò inatxi reuròna txumy worana bedehesimy roire iònanana tai txu heka nihiỹmy reysarenyre
\c 9
\s1 Iōrarunareny Deuxu-òrelyyrenyre
\p
\v 1-2 Isaeli mahãdu heka rexibutunyrenyre taōrarunareny Deuxu-ò relyyrenykremy, tai renarehenyrenyre rabedewonyrenyre taōrarunareny ōraru-ki rexibutunyrenyre. Wawiòinaubiōwa txu heka iahãdu rare. Judeuõdu mahãdu ribi heka rexitarenyre dori. Tule Xau tyy rexityynyrenyre ibedewonareny teōsina iratireny suu ritxiwirenyre tule. idi heka relyyrenyre  ilabiereny ōrarunareny ijyymy.
\v 3 Deuxu bedeywina rybe-òheka roholarenyre Inataõ hora-dile heka taōrarunareny relyyrenyre Deuxu-ō. Kiamy heka Deuxu reālārenyre.
\v 4 Taba tyre-ki heka lamymy Deuxu-òrexitōenyrenyre.
\v 5 Levi mahãdu heka iny mahãdu-òryryrenyre Deuxu-òreālārenykremy tii boho raryberenyre: —Myibenyke! Deuxu-ō beālābenyke! Deuxu Tyhyhykỹ heka tuhyyhyy rare! Iniwihikỹ heka Beālāmyhỹbenyke! Tii wana wii reōbynyõhyyrenyre iny deālānareny!
\s1 ōraruna ixitōedỹỹna
\p
\v 6 Tai isaeli mahãdu heka rexitōenyrenyre: "Deuxu! Kai sohijihyyle heka tuhyyhyyte! Kai heka taina boho heka Biuwetyy widỹỹdu tate!Bede, berohokỹ,heka ibutu bede-ki rỹire widỹỹdu tate! Aōraru-kile heka iny irumy ratximyhỹre wahe! ỹju mahãdu heka umy reālāmyhỹre wahe!
\v 7 Kai heka Deuxu Tuhyyhyyte! Babilonia suribi heka Abraõ tetate, Ur hãwã ribi! ini heka tewitxiranyte dori! Abraaõni tewitxiranyte dori!
\v 8 Tii heka aratyhynyre-ki wahe! Tii wana tetobinyte Wahe! Kananeu mahãdusu heka biwahinykemy tamy tarybete dorihe! iriōkorereny tai rasỹnyrenykremy tarybete wahe! Arybe wesemy dori tewinyte! Ōbitityhymy tateki!
\v 9 Ejitusu-ki iny labiereny dori tabite! Aõhõkỹmy roirenyrenyreu wahe! Berosō-ki adee rexitōenyrenyreu taholate! Ejitu mahãdu-òaruru heka teteōsinyte!
\v 10 Amahãdureny dori aõhõkỹmy risỹnyrenyreu aõwiwihikỹ heka tewinyte! Ejitu wedu ko-ki dorihe! Aruru-di heka Ejitu wedu mahãdu tebrebunyte teramy adee rearenyreu wahe! Kia ōraru-ki heka arybenina reamyhỹre dorihe! Arybenina reamyhỹre wijihyyle!
\v 11 Iny labiereny koki heka berosòwirareare dori! Tai dori tii boho reurōrenyre bede ityti-di. Iherenymy rearenyre mahãdu heka rubumy tewahinyte berahatxi-òmana utxie wesemy! Biuwetyyura-di txumy idireny tate, ruumy heka heóty-di idireny tate wahe bidiwahinykre
\v 12 Txumy biuwetyky-di idireny toite, rumy heòty-di idireny toite wojixuranamy rariarenykemy txibo roirenykemy.
\v 13 Sinai hãwãlò-Txi tesete amahãdureny rybemy taile heka bedeywina tewahinyte bedeeryna inatyhynamy tewahinyte tamyreny.
\v 14 Sabadu ityhynatxulemy adee tetate, Moisesi adeòdu ribile bedeywina tewahinyte.
\v 15 Biu ribi orotxu (paõ) tyhy tewahinyte rimarisarenyreu bee manawo ribi rohonykremy tewinyte. Kai tarybetyhymy Israeli mahãdu su-òle rasỹnykremy teteònyte.
\v 16 ihỹre walabiereny xiwederenymy nõhõtitxumy roire arybereny-ò roholaõtyhyy.
\v 17 Tiiboho terarenyre aõnaõnawihikỹ tewinyte ribi tõhõtireny rusare. Tiiboho tawedurenymy ritarenyre ixiery. Egitu-ò ixybyle rooserenykremy wetxumy relerenykremy idi riwisỹnymyroire. Ihỹre heka Deuxu iny òraruna ixãwidỹỹdu tate. Ruxetòedỹỹdumy tate iny luure. Irehemy riraòmyhỹre iykaramy. Aruxetòena nihiỹmy rare-ki tai heka iny teriõmyhỹte.
\v 18 Tiiboho womati tỹrỹhỹkỹ iròdu ritxoo riwinyrenyre ideuxurenymy raryberenyre Egitu ribi tii didydenydemy. Waha Deuxu tiiboho ibinamy aki raharenyre! Ibinamy adee riwinynyrenyre!
\v 19 heka bederahy-ki tiiboho teriõmyhỹte. Aruxetòena nihỹre-ki txuõtxuõlemy biuwetyky txumy idirenymy toite rumy heòty-di idirenymy tate ryy tiiboho rieryrenykremy.
\v 20 -Atykytyby wihikỹ-di tebedeerynanyte timybo riwinyrenykremy. Orotxu biu ribi teòwenyte, imarisarenyre ixãwikemy, bemanawo ribi temonyte bemy risamy ixãwikemy.
\v 21 Bederahy-ki iny inaubiòwa beòra wesemy teòwenyte aõ rasiranyõtyhy. Itykyreny ritybyyõhyyre iwareny ratarinyõhyyre.
\v 22 Ibutu bede mahãdu ribi Israeli mahãdu rotakemy tarurumy tate. Ibutu sỹwera ludu mahãdu ribi rotakemy terurunyte. Seõ Hexibõ wedu ribi rotarenyre, Oké Basã wedu ribi rahaananyrenyre.
\v 23 Iwese taina rudera wese iriokore riokore tewahinyte tiiboho tedyte tasureny-ò rasỹnykremy kia ilabiereny tarybetyhyte juhuu.
\v 24 Kanaãsu-ki tiiboho rahaananyrenyre. kia sỹdu mahãdu kai tahaananyte kia mahãdu ixinamy aõbo riwinykremy tewahinyte.
\v 25 Amahãdureny hãwã òtity nihikỹ ribi rahaananyrenyre suwihikỹ ritarenyre heto aõnaõna wihikỹ-di ritarenyre, hãlobe, bederaty sõwe, òwòru sõwe aõnaõna wihikỹtyhy rahaananyreny tai awihikỹmy riroxirenyre, radenyrenyre kai tamy tewahinyte-ki.
\v 26 Ihỹre heka Israeli mahãdu ibinabinamy relerenyre. Abedeywina rybe ribi tahewo-ò roire arybedu mahãdu tamyreny rarariòwyde adee ixybyle rooserenykremy tai rybedu mahãdu tiiboho rirubunyrenyre. Sõwetyhymy ibinamy adee riwinynyrenyre!
\v 27 Tai dori iòludureny mahãdu rahaananykremy tewahinyte iòlòreny rexisỹnykremy tewinyte. Iòhotỹreny-ki adee rexitòenyrenyre kai biu ribi terawyònyte dori. Aruxetòena nihiỹ-dile idinodurenymy tesỹnyte tai iòludureny ribi ritarenyrenykremy.
\v 28 Idi tahe ywinamy awilemy bedemy roireu heka ixybyle òrarunatxi reserenyre. Tai ixityre heka iòludureny tamyreny itxi rearenyre tewahinyte. Ixybyle heka Israeli mahãdu rexirahirenyreu heka reixitòenyrenyreu biwiòhenanykremy, biu ribi taholate, ixyby ixybyle tawiòhenanyte aruxetòena nihiỹdile wahe.
\v 29 Arybe riòbynyrenykremy kai tamyreny tarybete ihỹre heka xiwederenyre-ki tai arybereny roholaõhyyre. Arybena riòbynykeki iruna ryy heka rare. Itxỹterenymy, nõhõtxurenymy tai roholaõhyyre dori.
\v 30 Beòra beòramy rybeywinamy tamyreny tarybete. Atykytyby wihikỹ ribile tarybete, arybedu mahãdu ribi tarybete ihỹre heka notihõtiõmy roirenyre. Tai dori iòludu mahãdureny tamyreny reare adewimy.
\v 31 Aruxetòena nihiỹre dori tai teriõtyhy, terubunyõtyhy. Kai Deuxutyhyhykỹ ruxetòedỹỹdumy tate luunamy. Wadireny teriõhyyte tewahuõhyyte aruxetòena òraruki xiery! Kai Deuxu luunatyhy tate awihikỹmy!
\v 32 Waha Deuxu wihikỹtyhy kai tate! Ruruduhukỹ, brebunahakỹ! Tiwaòhòtỹdỹỹnyte òbitimy. Iny òrarunamy resemyhỹre hỹre òbitimy tate. Arybe wesemy òbitimy tewinymahãte Asiria mahãdu heka riwabinanyrenyreu ribi sõwemy jiarỹ boho aõhõkỹmy rotỹỹnyrenymy roiremyhỹ. Waiòlòreny mahãdu, wawedureny mahãdu, waxiwena wahisidỹỹdu mahãdu, waDeuxu rybedu mahãdu mahãdu, walabiereny mahãdu, ibutumy aõhõkỹmy rotỹỹnyrenyre! Waõherewe waõhõkỹmydỹỹnanareny õhõti itxi beake!
\v 33 Waõhõkỹmydỹỹnana òbitimy tewinyte. Òbitimy tate iny òraruna txi resemyhỹre hỹrele.
\v 34 Waiòlòreny mahãdu, wawedureny mahãdu, waxiwena wahisidỹỹdu mahãdu, waDeuxu rybedu mahãdu mahãdu, walabiereny mahãdu, abedeywina rybemy riwinyõhyyre, a rybe mana riòbynyõhyyre, aijohona rybe rityhynyõre dori.
\v 35 -Deuxu! Adeysanadile heka iny iòlò mahãdu ridinodunymy roiremyhỹ kiasu wihikỹ inydereny tewahinyte; ihỹrele tii boho arawowydynyõtyhy tule rexirahiõtyhy taõbina bina ribi wahe.
\v 36 Tai dori inyboho wiji inysurenykile wetxumy roiremyhỹ kaasu-ki kai wadeereny tewahinyte su wihikỹ-ki iny rexiòwenyre dori.
\v 37 Iny órarunareny òraruki aõhõkỹmy rotỹỹnyrenyre, iòlò mahãdu-ò kai tesỹnyte wasureny-ki wiji walòbòrònareny ribile tamyreny rewahinyrenyre. Wabororenirenydi wadirenydi aõbo tamy awimy riwinymyhỹrenyre tai sõwemy riwaòhotỹnymy rỹire.
\v 38 Kia òraruki heka Israeli mahãdu awana ritobinyreri wiji rokorytikremy; hãwã wedu, xiwena wahidỹỹdu mahãdu, xiwena heto aõmysỹdỹỹdu mahãdu.
\rem dat 2016
\rem aut Ijooko
\c 10
\s1 Wii rybe tobina
\p
\v 1 Tai tahe Neema juhule idi rorutinyre tii Israeli wedumy rare. Akalia riòre tii rare. Ihewomy tahe Zedekiasi rorytinyre. Iribi tahe kaa mahãdu idi rorytinyrenyre:
\v 2-8 Xiwena wahisidỹỹdu mahãdu: Seraia, Asaria, Jeremia,Basu, Amariá, Makiasi, Hatusi, Sebaniasi, Malike, Harῖ, romote,Obadiasi, Danili, Sineto, Baruke, Mesulã, Abiasi, Miami,Maasiasi, Bikai,Semaiasi.
\v 9-13 Deuxu heto aõmysỹdỹỹdu mahãdu (Lebita): Asania riòre, Jesua, Henadade mahãdu Binui, ijõ Kamadieli. Sebania ijõ, Hodiasi, Kelita, Belaiasi, Hanã, Mika, Reobe, Hasabiasi, Saku, Seberiasi, Sebania ijõ, Hoduasi, Bani, Beninu.
\v 14-27 Israeli mahãdu wedu mahãdu: Barò, Baate Moabe, Elaõ, Satu, Bani, Buni, Asikade, Bebaí, Adoniasi ijõ, Bikivaí, Adῖ, Atehi, Esekiasi, Asu, Hodiasi ijõ, Hasu, Besai, Harive, Anatotxi, nobaí, Makibiasi, Mesulã ijõ, Hesi, Mesesabeli, Sadoke, jaduá,Belatxiasi, Hanã ijõ Anaíá, Oseiasi, Hananiasi, Hasubé, Halòé, Bileá, Sobeké, Heu, Hasabiná, Maaseisi, Aiasi, Hanã ijõ, Anã, Maluke ijõ, Harῖ ijõ, Baaná. Wii ritobinyrenyre Tyyriti myy rare:
\v 28 Jiarỹ boho heka Israeli mahãdu wana Deuxu bede ywina rybe òbymy roire, ibutumy ijõ iny ribi rexiijemyhỹre roiõkemy kaki rasỹnyre mahãdu hỹre rexiijemyhỹre, jiarỹ boho wahyyreny wariòrereny kia rybemy rieryre.
\v 29 Katahe tyyriti ribile heka iny wedureny wana warybereny wijile aritydikremy ratxirenyre: Moisesi ribi Deuxu bedeywina riwahinyre inydereny kia rybe wesemy rikiwinyrenykremy. Deuxu Tyhyhykỹ ibutu wadeereny ritydire heka riwiwinyrenykre iwesemy, ibutu waDeuxureny rarybetyhyre iwesemy inatyhymy rikeòbynyrenykremy. Katahe irybemy rikiwinyrenyõkeki tahe iny boho ritxuhonyrenykremy.
\v 30 Wamahãdureny ribi iwitxira mahãdu inyyrenyki rasỹnyre mahãdu heka wariòrereny ariwahinyõtyhy, tulesỹ iriòrereny-ò wariòrereny ariwahinyõkre.
\v 31 Israeliõdu mahãdu ityhyna txuu aõnaõna-di kidirahukeki ijohonamy ariõbaranyrenyõtyhy.  Debò inatxi txuu heka aõnaõna arisiheõrenyõtyhy oworu ribi.
\v 32 Iny sohoji sohoji beòra beòramy heka inaubiòwa urihixina womati parata heka ariwahinyrenykre xiwena heto wiòhenamy.
\v 33 Xiwena heto-ò orotxu ariwahinyrenykre Deuxu ritydire wese; triku, sewada, txuõtxuõlemy riòbynymyhỹre wese. Txuõtxuõlemy iròdu risõkre tai ariwawahinyrenykremy. Sabadu txu-ò aõ ariwahinyrenkre, ahãdu tỹmyra txu heka aõnaõna ariwahinyrenykremy, ijõ txuu tule ariwahinyrenykre aõnaõnamy. Israeli mahãdu òraruna ixãwidina xiwena aõ ariwahinyrenykremy ibutu aõnaõnamy rurumyhỹrenyre ariwahinyrenykre xiwena heto-ò.
\v 34 Beòra Beòramy heka aritarenykremy deòsina ribi momahãdubo heitxemy roikre xiwena heto-ò taile Deuxu Tyhyhykỹ-ò xiwena riwahinykremy iwese bedeywina ritydire wesemy.
\v 35 Beòra beòramy juhu lòbròmy ariwahinyrenykre xiwena heto-ò.
\v 36 Tariòre riòredelareny aridyrenykremy xiwena wahidỹỹdu mahãdu-ò Deuxu-ò riteòsinykremy iwese bedeywina rybe wesemy. Tulesỹ wabororeni riòre juhu ariwahinyrenykre xiwena-ò, watxini riòre juhu, budoini riòre juhu ariwahinyrenykre xiwena-ò.
\v 37 Tule ariwyrenykre xiwena heto-ò juhu lòbòrònadi orotxu ariwinyrenykre, juhu viibe, juhu bederaty, juhu aõnaõnamy. Xiwena heto aõmysỹdỹỹdu-ò waoworu ribi sohoji debowiò ribi ariwahinyrenykre. Tii boho heka hãwã oworu-ki rỹireri tahe sohoji debowiò ribi tamyreny roire.
\v 38 Xiwena wahidỹỹdu heka Araõ mahãdumy rareki heka xiwena wahidỹỹdureny wanamy ratxikre iu oworu ribi sohoji debowiò ribi riwahinyrenykreu. Idi heka xiwena heto-ò riyrubunykremy ibutu sohoji debowiò ribi riwahinyrenykremy iyrubuna-ki.
\v 39 Xiwena iyrubuna heto wo-ò sohoji debowiò ribi heka riwyrenykre ibutu Israeli mahãdu, xiwena aõmysỹdỹỹdu mahãdu, viibe, tiriku, adỹỹ txibo aõnaõna tai roireri riyrubunykremy. Taile xiwena wahidỹỹdu mahãdu raõmysỹdỹỹmy roire, wiudu mahãdu, itxeredu mahãdu tai roire-ò riyrubunykremy.  Xiwena heto aririõtyhy dori.
\c 11
\s1 Jerusalẽ hãwã-ki rasỹnymyroire.
\p
\v 1 Wedu mahãdu heka tamahãdureny Jerusalẽ hãwã-ki rasỹnymyroire. Iuhe mahãdu tahe debòwiò imahãdu ribi ritare sohoji sohojimy Jerusalẽ hãwã-ki rasỹnykremy tarasana dehuna ribile ritare. Iuhe mahãdu tahe hãwã iòhòmy, ijõ hãwãreny-ò rasỹnyroire.
\v 2 Deysanadilemy Israeli mahãdu awimy tai rahare inyõ Jerusale-ki ixidewimy rasỹnykremy tuu rurumyhỹrenyre.
\v 3 Israeli mahãdu, xiwena wahisidỹỹdu mahãdu, Deuxu heto aõmysỹdỹỹdu (lebita) mahãdu, Salomaõ riòkore mahãdu heka tahãwã-ki rasỹnymy roireri tai runyre, ijõ mahãdu tasỹreny hãwã irehe riòre roireri tai runyre. Tiiboho Jerusalẽ hãwã-ki rasỹnyrenyre Inireny iòtenymyhỹre:
\v 4 Judá mahãdu: Judá riòre mahãdu, Uzia, Zakaria riòkore, ityby Usiasi heka rare iriòkore mahãdu tahe Amariá, Sebatxiasi, Maalaleli, tahe Beré iriokorenymy roire.
\v 5 Baruke riòre, Maasesi, Koli Hosé riòkore rare. Hasiasi, Adaiasi, Joiaribe,Sakariamy tahe Selá riokoremy roire, tii Judá riòreõ roire.
\v 6 Beré riokore Tahe 458 hãbutyhyhykỹ sõwe.
\v 7 Bejamῖ mahãdu: Meslã riòre Salu, Joedé riokore. Joede ilabiereny tahe Bedaíasi, Kolaíasi, Maaseíasi, Itieli, Jesaíasi;
\v 8 Kabi, Salaí, Salu imahãdutyhy. Bejamῖ mahãdu heka 928 hãbu sõwe Jerusalẽ-ki rasỹnyrenyre.
\v 9 Sikiri riòre Joeli, heka wedumy roire Senua riòre Judá heka wedu hewo ludu roire.
\v 10 Xiwena wahisidỹỹdu mahãdu: Joaribe riòre, Jedaiasi, Jakῖ;
\v 11 Hilkiasi riòre Seraíasi, Mesulã riokore. Iriokore mahãdu Zadoke, Meraiote, Aitube tii Deuxu heto aõwidỹỹ itxeredumy roire.
\v 12 Kia mahãdu Deuxu heto iaõmysỹdỹỹdu 822 hãbu sõwe roire; Jeoraõ riòre Adaiasi, Belaliasi riokore. Ilabiereny heka Ãsi, Sakariasi, Basu, Maukiasi.
\v 13 Kia mahãdu 242 hãbu sõwe tamahãdureny wedumy roire; Asareli riòre Amasaí, Asaí riokore. Ilabiereny Mesilemote, Imehi.
\v 14 Kia mahãdu 128 hãbu sõwe sodado rurutereremy roire. Iwedureny Sabiel tasỹreny ribi ityhyhykỹ ijõ mahãdu ribi heka rare, Israeli mahãdutyhy imahãdureny rare.
\v 15 Deuxu heto aõmysỹdỹỹdu mahãdu (Lebita) Hasube riòre Semaíasi, Asirikỹ riokore. Ilabiereny Asabiá, Buni
\v 16 Sabetaí, Sosabadé Deuxu heto aõmysỹdỹỹdu mahãdu (Lebita) awityhy ijõ Lebita ribi tiiboho ahana-kile idi raõmysỹdỹỹnymyroire.
\v 17 Mika riòre Mataniasi, Sabidi riokore. Asabe Ilabierenyre. Mataniasi Wiudu wedu rare. Tii Deuxu deàlàna wiunamy rawiunymy roire, wiòhedỹỹdu Bakebukiasi heka rare, Samua riòre Abida, Kalau riokore Jetudu ilabiereny.
\v 18 Jerusalẽ-ki rasỹnyrenyre 284 Deuxu heto aõmysỹdỹỹdu (lebita) mahãdu sõwe.
\v 19 Deuxu heto itxeredu mahãdu: Akubé, Tamo imahãdureny – 152 hãbu sõwe.
\v 20 Iuhe mahãdu tahe tahãwã-ki rasỹnymy roireri tai runyre, xiwena wahisidỹỹdu iuhe mahãdu, Deuxu heto (lebita) iuhe mahãdu tasỹreny Judá hãwã irehe riòre roireri tai runyre.
\v 21 Deuxu heto aõmysỹdỹỹdu heka Obeli hãwã-ki rasỹnymy roireri Jerusalẽ hãwã iòhòmy kia boho heka Zia, Jiba iwedurenyre.
\v 22 Deuxu heto aõmysỹdỹỹdu (lebita) mahãdu Jerusalẽ-ki rasỹnyrenymyroire Usi iwedureny heka rare. Bani riòre, Hasabiá riokore. Ilabiereny heka Mataniá, Mika. Tiiboho Asabe mahãdu heka rare Deuxu heto Wiudu wedu mahãdumy roire.
\v 23 Iòlò rybemy ritidire aoma wiudu mahãdu ijõ txu ijõ rawinymyhỹ txuõtxuõlemy rawiunykemy xiwena heto-ò (Templo).
\v 24 Judá mahãdu heka Zerá mahãdu iriokorereny Petaíasi, Mesesabeli riòre heka tariòkore mahãdu deòsidỹỹdu Persia iòlò-ò riteòsinymy roire.
\s1 Hãwã irehe riòre mahãdu
\v 25 Sõwe Israeli mahãdu heka iaõna heto hãwã iòhòmy rasỹnymyroire. Kiriaté Aba hãwã-ki rasỹnymy roire, Dibõ hãwã-ki rasỹnymy roire, Xiwena heto aõmysỹdỹỹdu mahãdu (Lebita) Judá hãwã-ki rasỹnyrenyre tahe Bejami mahãduy-ki rasỹnykremy riteònyrenyre.
\m
\v 26 Tiiboho tule Jesua hãwã-ki, Molada hãwã-ki, Bete Balete hãwã-ki rasỹnymyroriremyhỹ.
\m
\v 27 Asa Suaõ hãwã-ki, Bereseba hãwã-ki tule isỹ weraludu rasỹnymyroriremyhỹ.
\m
\v 28 Xikake Mekoná hãwã-ki rasỹnymyroriremyhỹ, isỹ weraludu mahãdu tule.
\m
\v 29 Ehimo hãwã, Sora hãwã, Samute hãwã-ki rasỹnymyroriremyhỹ.
\m
\v 30 Tulesỹ Samua hãwã-ki, Adulã hãwã-ki kiasỹ weraludu kia hãwã iòhòlemy rasỹnyre mahãdu. Tiiboho Lakisi hãwã rasỹnymyroire iòhòmy su-ki tule rasỹnymyroriremyhỹ, tule sỹweraludu-ki. Judá mahãdu tahe Bereseba hãwã-ki ribi rasỹnymyroiremy, iraru ribi hino hãwã-ò ibòò-ki.
\m
\v 31 Bejami mahãdu tahe Sebasu ibòò ribi Mikimasu-ò rasỹnymyroriremyhỹ tule Aiasu, Beteusu iòhòmy rasỹnymyroriremyhỹ.
\m
\v 32 Anatotxi, Nobe, Anania hãwa rare,
\m
\v 33 Hasò, Hamá, Xitai hãwã rare,
\m
\v 34 Hadide, Seboi, Nebalate hãwã rare,
\m
\v 35 Lade, Ono ribi, bedeery mahãdu su-ò,
\m
\v 36 Lebita mahãdu heka riteònyrenyre Bejamim mahãdu wana rasỹnyrenykremy.
\c 12
\s1 Xiwena wahidỹỹdu mahãdu, xiwena heto aõmysỹdỹỹdu mahãdu iòtenamy.
\p
\v 1 Salatieli riòre Sorobabeli, Josué Xiwena wahisidỹỹdu mahãdu wedu iherenymy Babilonia wetxu su ribi roosere mahãdu iòtenamy.
\v 2-7 Xiwena wahisidỹỹdu mahãdu: Seraíasi, Jeremiasi, Exidara, Amarià, Maluke, Hatusi, Sekania, Heu, Meremote, Ido, Jinetoi, Abiasi, Miami, Maadiasi, Bilk, Semaiasi, Joiaribe, Jedaíasi, Salu, Amoke, Hiukiasi, Jedaíasi. Kia boho xiwena wahisidỹỹdu mahãdu wedureny roire tabiòwareny mahãduy-ki Josué bedeu.
\v 8 Deuxu heto aõmysỹdỹỹdu mahãdu Levita: Jesua, Binui, Kadimieli, Serebia, Judá, Mataniasi wiunamy rawiunymyroire.
\v 9 Kia mahãdu heka Deuxu heto-ki levita ijõ rawinymy ijõ rawinymy irawyònamy: Bakebukiasi, Uni, tabiòwareny mahãdu wana rawiunyrenymyroire.
\s1 Josué riokore mahãdu Xiwena wahisidỹỹdu mahãdu heto wedumy rare.
\p
\v 10 Josué Joiakῖ tyby rare, Joiakῖ heka Eliasibe tyby rare. EliasibeJoiada tyby rare.
\v 11 Joiada Jonatasi tyby rare, Jonatasi Jadua tyby heka rare.
\s1 Xiwena wahisidỹỹdu mahãdu inireny iòtena.
\p
\v 12-21 Xiwena wahisidỹỹdu mahãdu Joiakim bedeu iwedurenymy roire heka kia mahãdu xiwena wahisidỹỹdu mahãdumy wedumy roire:
\tr
\th1 Xiwena wahisidỹỹdu  
\th2 Xiwena wahisidỹỹdu mahãdu wedumy
\tr
\tc1 Maraíasi  
\tc2 Seraiasi
\tr
\tc1 Hanani  
\tc2 Jeremiasi
\tr
\tc1 Mesulã  
\tc2 Exidara
\tr
\tc1 Joanã  
\tc2 Amariá
\tr
\tc1 Jonatasi  
\tc2 Maluki
\tr
\tc1 José  
\tc2 Sebaniasi
\tr
\tc1 Adna  
\tc2 Harῖ
\tr
\tc1 Heukai  
\tc2 Meraiote
\tr
\tc1 Sakariasi  
\tc2 Ido
\tr
\tc1 Mesulã  
\tc2 Jineto
\tr
\tc1 Sikiri  
\tc2 Abiasi
\tr
\tc1 — — — -  
\tc2 Mῖjiamῖ[1]
\tr
\tc1 Piutai  
\tc2 Moadiasi
\tr
\tc1 Samua  
\tc2 Biuka
\tr
\tc1 Jonatasi  
\tc2 Semaiasi
\tr
\tc1 Matenai  
\tc2 Joiaribe
\tr
\tc1 Usi  
\tc2 Jedaiasi
\tr
\tc1 Kalai  
\tc2 Salai
\tr
\tc1 Hebe  
\tc2 Amoke
\tr
\tc1 Asabiasi  
\tc2 Iukiasi
\tr
\tc1 Netaneli  
\tc2 Jedaisi
\s1 Imahãdu imahãdureny wedureny rorytirenyre.
\p
\v 22 Imahãdu mahãdureny wedureny rorytirenyre. Dario Pesa wedumy rareu kianireny iòtena  rorytikremy rahure. Eliasibe, Joiada, Joanã, Jadua xiwena wahisidỹỹdurenymy bedeu.
\v 23 Ihỹre heka (lebita) mahãdu inireny iòtena heka idi rorytinyre Joanã bedeule.
\s1 Xiwena heto aõmysỹdỹỹ ritxua txure
\v 24 Deuxu heto aõmysỹdỹỹ mahãdu tamahãdu tamahãdu riteòtenyre. Iwedureny heka Hasabia, Serebia, Jesua, Binui, Kadieli. Inatxi ijoi wiudumy roire. Ijõ rawiuny ijõ rirawyònyre wiunadi. Wiudu mahãdu heka tawiunarenydi Deuxu-ò reàlàmyroire iwesele Davi iòlò tyyriti-ki rierynanyre wesemy. Davi heka Deuxu tyhydỹỹdutyhyhykỹ rare.
\v 25 Mataniasi, Bakebukiasi, Obadiasi, Mesulã, Taumõ, Akube, tii boho heka yràbudỹỹdu mahãdu iaõnaõna yràbuna heto idi itxeredumy roire xiwena heto ijòtòbòna-ki iòhòmy roire.
\v 26 Kia mahãdu heka idi roiremyhỹ Joiakῖ Josue riòre bedeu, Sosadake ilabie bedeu, Neema iwedureny bedeu, Exidara Xiwena wahisidỹỹdu, Bede ywina Erydỹỹdu bedeu tiiboho idi roiremyhỹ.
\s1 Hãwã òtity deysana txumy
\v 27 Jerusale hãwã òtity rexihumy roireu heka xiwena aõmysỹdỹỹdu levita mahãdu hãwã hãwa mahãdu tamy diwydenyde deysana txuu rawiunykemy *taharpa *tatoanarenydi.
\v 28 Deuxu heto aõmysỹdỹỹdu wiudu mahãdu levita heka ibutu hãwã ribi dirahudenyde, tasỹreny ribi dirahudenyde Netoba hãwã ribi
\v 29 Bete Jukali hãwã ribi, Seba hãwã ribi Asamabete hãwã ribi dirahudenyde,
\v 30 Ibutu Deuxu heto aõmysỹdỹỹdu mahãdu rexilyrarenyre Deuxu koki, Israeli mahãdu tule Deuxu koki rityranyrenyre idi rexitòenyrenyre taòrarunareny relyyrenyre Deuxu riixãwidinykremy idi rituranyrenykremy. Tule ijòtòbòna sõwe rityranyrenyre taixitòedỹỹnarenydi; Deuxu koki reixitòenyrenyre hãwã weijiti-ò, Deuxu rityranykremy.
\v 31 Jiarỹ Neema Israeli wedureny reteònyre hãwã wejiti tyre-ò rexibutunykremy. Tulesỹ inatxi mahãdumy reteònyre hawã-di riwerunykemy Deuxu-ò reálányrenykremy. Juhu mahãdu heka ruruweribi-ò rariarenyre ranysityby ijòtòbòna-ò.
\v 32 Iheworenymy heka Osaiasi rariamy roire Osaiasi hewomy tahe Judá wedureny mahãdu rariarenymy roire.
\v 33-35 Xiwena wahisidỹỹdu mahãdu heka idi ritxuronymy roire iheworenymy: Asariasi, Exidara, Mesulã, Judá, Bejamῖ Semaiasi, Jeremiasi. (Ilabiereny ini heka rare Mataniasi, Mikaiasi, Saku, Asabe mahãdu wiudu mahãdu, toado mahãdu)
\v 36 Sakariasi hewomy tahe Ijõ mahãdu rariamy roire: Semaiasi, Asareli, Milalai, Jilalai, Maai, Netaneli, Judá, Hanani wana. Ibutu teborenydi tatoanadile rariamy roire.
\v 37 Su ribi berohonyre heka òwòna rawonyrenyre *Davi hãwã idi rare, Davi heto ribi rariamyhỹre idi rooserenyre hãwã weijiti-ò ijòtòbònabe hãwã iburura-ò.
\v 38 Ijõ mahãdu heka hywe ribi-ò roire hãwã weijiti tyre-ki ihewomy jiarỹ rare israeli mahãdu weremy. Idireny rariarenyre òwòna rariehekỹ wobiuna heòty ribi hãwã weijiti wohãra-ò.
\v 43 Kia txu heka sõwe xiwena riwahinyrenyre, Deuxu deysana-di iworeny rỹxirenyre tai reysarenyre sõwemy. Hãwyy mahãdu, uladu mahãdu heka tule rironyrenyre tai iwodỹỹreny heka irehemy ribile roholarenymyroire. Xiwena wahidỹỹdu mahãdu, xiwena heto aõmysỹdỹỹdu mahãdu byrenamy.
\v 44 Kia txuule heka ritarenyre hãbu mahãdu heto yràbuna wedumy tai heka xiwena heto riyràbynyrenyre tulesỹ debòwiò ribi sohoji sohojimy ioworureny ribi riwahinykremy, ibederaty kia juhu ruhunyre tule riwahinykremy beòra beòramy. Kia hãbu mahãdu tii boho ritare Xiwena heto aõmysỹdỹỹdureny-ò, xiwena wahisidỹỹdureny-ò hãwã hãwãmy iòhòmy roireri iaõna onareny riarirenymy iwesele heka Bedeywinamy rorytimy roimymyhỹre wesemy. Wahisidỹỹdureny mahãdu aõmysỹdỹỹ, tule heto aõmysỹdỹỹdureny aõmysỹdỹỹ idireny Israeli mahãdu ibutu teysanamy roire.
\v 45 Tii boho heka tyrana aõmysỹdỹỹ riwinyrenyre-ki tule Deuxu rarybere wesemy riwinyrenyre-ki. Wiudu mahãdu tule yràbudỹỹdu mahãdu taõmysỹdỹỹnareny riwinyrenyre iwese Davi tyyriti-ki riteònyre wesemy Salomaõ tyyriti-ki riteònyre wese.
\v 46 Davi bedeu ribi Asawe bedeu-ò heka wiudu mahãdu juhuu tawiunadi Deuxu-ò reàlàmy roire.
\v 47 Zorobabeli bedeu Neema bedeu heka txuõtxuõlemy aõnaõna riwahinyrenyre xiwena wahisidỹỹdu mahãdu-ò,wiudu mahãdu-ò, xiwena heto yràbudỹỹdu mahãdu-ò. Xiwena heto aõmysỹdỹỹdu mahãdu-ò txuõtxuõlemy Israeli mahãdu xiwenawihikỹ riwahinyre tule xiwena wahisidỹỹdu mahãdu-ò ihõrõreny riwahinyre.
\s1 Judeu mahãduõdu ribi rihitxinyre.
\c 13
\p
\v 1 Israeli mahãdu-ò ieremy idi rariamyroire Moiseisi bedeywina rybemy iu raharenyre judeõdu mahãduy-ki tai ratxiõkemy Amõ mahãdu Moabe mahãdu Deuxu mahãduy-ki ratxiõkemy.
\v 2 kia dori Israeli mahãdu bederahu ribi doidenydeu heka Amõ mahãdu Moabe mahãdu heka rasỹnamy bemy riwahinyõmyhỹre Ejitu ribi dohonydeu juhuu. Ihỹre heka Amõ mahãdu Moabe mahãdu Balaaõ riòwynyrenyre tamyreny rybe binamy rarybekremy. Tahe irybe binamy deysanamy rirahorere Deuxu tuu riwinyre.
\v 3 Israeli mahãdu bedeywina rybemy roholarenyreu heka kia judeõdu mahãdu riteònyrenyre iyreny ribi.
\v 4 Juhuu heka Eliasibe Tobia wana mahãdumy relera Eliasibe (Templo) Deuxu heto iheto yrubuna wedu raremy
\v 5 tai dori Tobia heto okresynawoki risỹnyre tai ratxikremy, tai-ki rasỹna xiwenamy roire, lỹnyre xiwenamy roire, womati aõna õnamy roire, wahisidỹỹdu mahãdu iaõnaõnamy roire, debòwiò sohoji rasỹnamy roire, debòwiò sohoji vii roire kia lebita mahãdu ihõrõrenymy, iitxeredu mahãdu ihõrõrenymy, wiudu mahãdu ihõrõrenymy ibutumy iyrubunamy roire taile.
\v 6 jiarỹ Jerusale-ki ratxiõre kiamy rotỹỹnyreu, 32 beòramy iòlò Ataxexi bedeu jiarỹ Babilonia-ò roosere tamy rybemy. Iribi heka tii riwateònyre ixyby
\v 7 Tai tahe reeryre ibinamy Eliasibe riwinyre Tobia kia heto wokresyna risỹnyre-ki.
\v 8 Jiarỹ reburetyhyre tai heka Tobia iaõnaõnareny idi rehure xiwena heto ribi ahana-ò.
\v 9 Idi heka ibutu xiwena heto rexilyranymyhỹkremy riteònyre iaõnaõna rexilyranymyhỹkremy Deuxu koki.  Tule xiwena heto rasỹnamy, ixiwenareny, iaõnaõnareny heto okresyna woki ixyby riyrubunykremy
\v 10 Tule reeryre (lebita) mahãdu xiwena wahisidỹỹdu mahãdu heka tasureny-ò rooserenyre Israeli mahãdu irasỹnareny riwahinymy roiree riòbynyõre.
\v 11 tai jiarỹ Israeli mahãdu wedureny-ò rarybetyhyre tiiboho Deuxu heto heka ririrenyre-ki. Iribi redyre Lebita mahãdu, wiudu mahãdu taaõmysỹdỹỹnareny-ò.
\v 12 Tai ibutu Israeli mahãdu ixyby diwydenyde Deuxu heto-ò vii debòwiò sohoji, rasỹna debòwiò sohoji, wena debòwiò sohoji.
\v 13 Tai jiarỹ heto wokresynamy kia hãbu mahãdu resỹnyre: Selemiasi, Sadoke tyyritidỹỹdu, Pedaiasi (lebita) iiwòhedỹỹdu Saku riòre, moma Hanã Mataniasi riokore. Jiarỹ idireny retyhynyre tiiboho heka òbitimy tabiòwa aõmysỹdỹỹdu rasỹna ritxuatxuarenyre dori.
\v 14 waha Deuxu õhõti itxi beake ibutumy aõ rewinymyhỹre xiwena heto-ò.
\v 15 iu heka jiarỹ robire sabadu txumy Israeli mahãdu raõmysỹdỹỹnymy roire uvadi rimowenyre vii riwinykremy. Ijõ tahe tajumetudi tyre-di vii-di rohonymy, vikudi rohonymy roire ijõ, iaõnaõna idi rohonykremy Jerusale hãwã-ò rironyrenymy roire. Tai jiarỹ rarybere sabadu txumy idi rohonyõkemy.
\v 16 Tulesỹ Tiro hãwã mahãdu utura witxira witxira-di dirahumy doidenyde sabadu txumy ijohonykremy.
\v 17 Tai Jiarỹ rarybetyhyre Israeli wedu mahãdu-ò: Aõherewe! Ibinamy tewinytenyte. Sabadu txuu òrarunamy tewinytenyte dori!
\v 18 Kia òrarukile heka alabiereny dori Deuxu aõhõkỹmy risỹdỹỹnyre, kaa hãwã ribinanykremy ririremyhỹ! Ihỹre heka kaiboho tuhyylemy sabadu txumy idihyymy aõnaõna tewinyte. Ibinare dori! Kia wese heka Deuxumy teteburedỹỹnyte Israeli mahãdu-ò.
\v 19 Tai dori jiarỹ reteònyre sabadu txu bede ijirana koki ijòtòbòna ritòbònykremy, bede ratxioronyreu heka iraydỹỹõkremy sabadu txu rexihukre xiery. Tulesỹ hãbu mahãdu hãwã ijòtòbòna-ki resỹnyre inyõ aõitxytaa sabadu txumy idi ralòõkemy hãwã-ò.
\v 20 Sohoji, inatxi heka ijohonadu mahãdu sexta feira hãwã ahana ribile heka tai roire ruumy txu reare ribi.
\v 21 Jiarỹ tahe tamyreny raberytyhyre: Tiukõnare sexta rumy matxibenykemy txudeadehukule tahe aõkõ riraynyõtyhy! Ixyby bodoibedenyke wàxi adeereny areake! Tai heka sabado txu ixãwire dori.
\v 22 Lebita mahãdu jiarỹ reteònyre hãwã ijòtòbòna rilyranykremy Dexu koki. Taile riyrubunykremy inatyhymy sabadu txumy ityhynamy ratxikemy Deuxu-ò. Waha Deuxu õhõti watxi beake kiamy rewinyremy. Wadi maruxetòenykemy aluuna òraruki.
\v 23 Tulesỹ reeryre sõwe Israeli mahãdu Asidodi hãwã mahãdu, Amo hãwã mahãdu, Moabe mahãdu hãwyy mahãdu wana roire.
\v 24 Iriòrereny ieremy mahãdu heka Asidodi rybemy rarybemyroire, iriorereny mahãdu ijõ rybe witxiramy raryberenyre tahe Israeli rybemy rieryõrenyre.
\v 25 Tai jiarỹ rybe sõwemy hãbu mahãdu-ò rarybe rarybemy ritxuhónyre, tamyreny rihetenyre, iradereny resihere. Tai Deuxunidi tamyreny rarybetyhyre tiiboho heka inatyhytyhymy tariòrereny Israeli mahãduõdu-ò riwahinyõtyhy hãbu hawyymy roikremy.
\v 26 Tamyreny rarybere jiarỹ: — Juhuu kiamy Israeliõdu mahãdu hãwyy mahãdu heka Salomaõ idi raòrarunyrenyre. Tii heka Israeli iòlòmy ibutu bede mahãdu iòlò ribi ratyremy rare. Deuxu iluure Israeli mahãdu iòlòmy risỹdỹỹnyre, ihỹre heka tii hãwyy Israeliõdu mahãdu riòrarunyre.
\v 27 Iwesele aõbo rikiwinyrenykre hãwyy Israeliõdu mahãdu wana aroirenykremy Deuxu rybe ariòbynyõkemy aõbo.
\v 28 Ijõsỹ Joiada rare. Tii Eliasibe riòre rare. Eliasibe xiwena wahisidỹỹdu wedumy rare.Joiada iriòre heka sabalá riòre wana roira Bete Orohãwãdu mahãdu ihawyy rare. Tai jiarỹ oiada reteònyre erusale ribi.
\v 29 Waha Deuxu õhõti itxi beake iòrarunareny-Txi tii boho heka xiwena wahisidỹỹdu aõmysỹdỹỹ heka rexibinanyrenyre. Tule Lebita xiwena mahãdu wana tetobinyte heka ribinanyrenyre dori!
\v 30 Jiarỹ Israeli mahãdu rexihitxinyre judeuõdu mahãdu ribi. Bedeywina rewinyre xiwena wahisidỹỹdu aõmysỹdỹỹnamy lebita mahãdu-ò aõmysỹdỹỹna rieryrenykremy.
\v 31 Hee wahisidỹỹdu mahãdu òbitimy riwykemy xiwena-ò. Tule rasỹna wahisidỹỹdu bederaty delemy risiherenykremy òbitimy riwykremy. Ibutu tamyreny ritidire. Waha Deuxu kia ibutumy õhõti itxi beake WaDeuxu deysanamy bidiwahinykre!