kpj_reg/39-MAL.usfm

\id MAL 39. MALAQUIAS
\ide UTF-8
\h MALAQUIAS
\toc1 MALAQUIAS
\toc2 MALAQUIAS
\toc3 mal
\mt1 MALAQUIAS
\c 1
\p
\v 1 Ka heka rybe Deuxu Tyhyhykỹ riwahinyre Malakia dee riwahinykremy Israel iny mahãdudeereny.
\v 2 Deuxu Tyhyhykỹ rarybere tasỹrenydeereny taijoideereny: — Diarỹ tikiehyymy umyreny rerinanymyhỹre. Kaa tii boho rỹỹraxirenyre: — Timybo tahe arieryrenykre kai wamyreny terinanymyhỹtemy? Deuxu rirawyònyre: — Esau kia Ijaó seriòre roire, kiaremyta diarỹ Ijaó-my rerinanyre kia irioreriorerenymy,
\v 3 Kaa Esau tahe riwakyaranyre kia irioreriorereny. Diarỹ rewinyre Esau hãwalò bede ibijiuömy rexirahorekremy, ka tahe wiji isu iròdu iròdu debure tai rahãwanyrekrekile awire.
\v 4 Txibo Esau rioreriore bohoreny, ka boho, edomita boho raryberenyrenykreki: “Iny hãwareny heka ibinamy doimyhỹde, ka iny boho tahe ixybyle rikitỹmyranyrenykre”, kia Deuxu Tabedeery Nihikỹ-di rirawyònykre: “Txibo tii boho riwinyrenykre-wana , diarỹ aritxiwitxiwikre. Isureny heka raninimy rarekre Aõbinabina mahãdu su kia ihãwahãwareny-di Deuxu Tyhyhykỹ ikyaramy ratximyhỹre ikiemy.”
\v 5 Israel iny mahãdu tuu robirenykre kiata ibutumy raryberenykre: — Deuxu Tyhyhykỹ heka ihikỹre, kia ibedeery nihikỹ ramyhỹre Israel su konana bedeòhòkỹle!
\v 6 Deuxu Tabedeery Nihikỹ-di rarybere Deuxu Rybe-di Ijohodu mahãdureny-ò: — Uladu tyby rityhynymyhỹre, kia wetxu tawedu rityhynymyhỹre. Kia diarỹ tahe bureny rare, aõherekibo tahe kai boho tiwatyhynyõmyhỹtenyte? Kia diarỹ awedureny rare, aõherekibo tahe walau taberuõmyhỹtenyte? Kai boho tiwaatymyhỹtenyte, kia ihãremy tahe tỹỹraximyhỹtenyte: — Timybo tahe araatymyhỹrenyre?
\v 7 Kia rỹsỹna binahãkỹ-ki kia kai boho wadee taxiwetenyte. Kia ihãremy kai tỹỹraxomyhỹtenyte: — Timybo tahe diarỹ boho umy rahitxirenyreri? Kia kai boho wamy tahitximyhỹtenyte tiu kai boho tai tahãmyhỹtenyteu waxiwenadena bisubisunybenykremy.
\v 8 Kia wamy tahitxilemyhỹtenyte kiemy dori tahõtinymyhỹtenyte wadee ibinaõremy wadee xiwena tewymyhỹtenyte iròdu ruebetà, itikre yda iwebinadu. Kia biebeny aõboini biwahinybenykremy kawesena iròduõ Hãwa wedu dee! Kia aõbo riki idi tahõtinytenyteri tii tamy awityhymy reobykremy kia aixitòedỹỹnareny? Diarỹ, Deuxu Ibutu Wabedeery-di rarybere.
\v 9 Ka tahe wiji, Deuxu rybe-di ijohodu, bexitòenybenyke Deuxu dee kia tamy bexitòenybenykre tii iny boho tarybewiwihikỹ inydeereny riwahinykremy. Ka kia aõbo riki adee reòbyrenykre tiu kai boho tamy tewahinymyhỹtenyte xiwena kawemy?
\v 10 Deuxu Ibutumy Tabedeery nihikỹ-di rarybere Deuxu rybe-di ijohodu mahãdureny-ò: — Kai bohoõ warybena heto ijò bitobonybenykre. Kawesemy tahe kai boho heòty itoodỹỹrenyõmykre aõmy waxiwena dena-ki. Diarỹ awimy aõkõ adireny watxireri, tamy areòbyõkre axiwenareny-ò.
\v 11 Diarỹ heka wamy derina rỹimyhỹre ibutumy hãwa hãwa bede bedemy, kia ibutumy bede bedemy heòty ritoonymyhỹrenyre wamy derinanamy kia tahe wadee riwahinymyhỹrenyre xiwena wityhy. Ibutumy wamy rexieletynymyhỹrenyre.
\v 12 Ka kai boho tiwahitxinymyhỹtenyte tiu tahõtinymyhỹtenyteu kia òbitimy rikihe waxiwena dena texutexunymyhỹtenyte kia xiwena tewahinymyhỹtenyte aõki awiõhyyre.
\v 13 Kai boho tarybemyhỹtenyte: — Diarỹ boho heka reywesemy watxirenyreri ibutumy ka bede-ribi! kiata waki tatxuenymyhỹtenyte kia ixi-ribi tiwatamyhỹtenyte. Kia ihãremy wadee xiwena tewahinymyhỹtenyte iròdu wasinahãkỹle yda iròdu itikre, iwebinadu.Kai boho tahõtinymyhỹtenyte kia Diarỹ, Deuxu Tyhyhykỹ, tamy areòbykremy?
\v 14 Bede binahãkỹ roidu mahãdudeereny kia rarybemyhỹrenyre tairòdu wihikỹõ wadee riwahinyrenykremy, ka xiwena bedeu tahe iròdu binahãkỹle riwahinymyhỹrenyre! Diarỹ Iòlò Bedeery nihikỹ, kia ibutumy hãwa hãwa bede bede wamy rerinanymyhỹre. Diarỹ, Deuxu Ibutumy wabedeery nihikỹ, rarybere.
\c 2
\p
\v 1 Deuxu Ibutumy Tabedeery nihikỹ-di rarybere: — Warybe-di ijohodu mahãdu, diarỹ adeereny rarybereri.
\v 2 Txibo warybe wahidỹỹna bitynyõbenykreki kia txibo wamy berinanybenyõrenykreki, tai tahe diarỹ atyrereny ariatykre aõnaõna binabina aratxuhòrenykre ibutumy kai boho aõ temymyhỹtenyte aõmysỹdỹỹbrò-ribi. Kia aratxuhòrenyre kiemy dori kai boho texiywinytenyõte wamy berinanybenykremy.
\v 3 Kia arirarytxynyrenykre ariorereny kia aòsynyrenymy ariòkaòkarenykre iròdu iròdu rỹny xiwenamy tewahinymyhỹtenyte. Kia ihãremy kai boho madybenykre tibedekibo ijỹny adehuna rỹimyhỹre-ò.
\v 4 Kawesemy tahe bierybenykre kia diarỹ tuu warybe rewahinyreri kia warybe-di ijohodu mahãdu-wana, Levi rioreriorereny rakròkròõkremy. Diarỹ, Deuxu Ibutumy Tabedeery nihikỹmy tuu rarybereri.
\v 5 –Warybe tamyreny rewinyre, diarỹ tamyreny rarybere ariwahinykremy umytuedỹỹna kia bede ywihikỹ. Kia rewinyre aõmybo rarybere, tii boho riwatyhynyrenykremy; kia inatyhymy tii boho riwatyhynyrenyre kia walau ruberurenyre.
\v 6 Kia ikiemy rotohodỹỹmy roiremyhỹ òbitihyylemy kia tiu roimy iõnamy rotohodỹỹõhyyrenyre. Kia awihyylemy wawana roirenyremyhỹ, aõ òbitimy riwinymy roiremyhỹ kia sõemy riwiòhenanyrenyre rybinabina riatyrenykremy.
\v 7 Warybe-di ijohodu mahãdu heka òbitityhymy wabededỹỹnanamy rotohodỹỹmyhỹrenyke, kia ibutumy tamy rexitòenymyhỹrenyke dohodỹỹnamy tamyre kia rieryrenykremy aõbo òbitiremy, kiemy dori warybe-di ijohodu mahãdu warybe-di ijaradu roirenyre.
\v 8 –Ka tahe wiji kai boho , Deuxu rybe-di ijohodu mahãdu, ry òbitina-ribi tahònymy atxitenyteri, kia adohodỹỹnanareny sõemy iny mahãdu òrarunamy riatyrenyre. Kai boho tekròtenyteri rybewi rewinyre Deuxu rybe-di ijohodu mahãdu dee.
\v 9 Iurenana diarỹ ariwinykre kia iny mahãdu adi rehukre arahitxinyrenykre, kiemy dori kai boho tiwatyhynyõletenyte, tiu aõmy òbitimy rarybemyhỹreu, kia òbitityhymy aõkõ iny mahãdu-di atximyhỹtenyte. Diarỹ, Deuxu Ibutumy Wabedeerymy, rarybere.
\v 10 Òbiti kỹny rare ibutumy iny boho tybyreny sohojihyy rare? Iny boho kỹny Deuxu riwinyrenyre? Aõherekibo tahe iny boho inyiny wii ribònymyhỹrenyre, kawesemy ribinabinanymyhỹrenyre rybewihikỹ Deuxu riwinyre iny hỹỹnarenydeereny?
\v 11 Juda iny mahãdu Deuxu dee òbiti aõkõ roire, kia Israel iny mahãdu Jerusalẽ-ki hãwadu mahãdu aõnaõna binabinahãkỹ riwinyrenyre. Juda iny mahãdu rixurixunyrenyre Deuxu Tyhyhykỹ tuu terinanymyhỹtemy?rybena hetomy, kia hãbu mahãdu hãwyymy raydònymyhỹrenyre iwitxira deusi rityhymyhỹrenyre-wanahãkỹle.
\v 12 Kia Deuxu Tyhyhykỹ riteònyrenykre iny bedereny-ribi iny mahãdu tuu riwinymyhỹrenyre, aõtxile mobo tuu riwinyre, kia xiwena riwahinykrehãrele Deuxu Tyhyhykỹ dee!
\v 13 Ixyby ijõdire aõnaõna kai boho tewinymyhỹtenyte: mawesiruràmy kia mahinybenyke bobubenyke, arubereny-di bihetynybenykre Deuxu xiwena dena kiemy dori tii axiwenareny-ò reòbyõhyyreri tamy tewahinymyhỹtenyte.
\v 14 Kai boho sohoji sohoji tỹỹraximyhỹtenyte: “Aõherekibo?” Kiemy dori Deuxu araeryre ahãwyy dee òbitimy aõkõ atximyhỹtemy, kia hãwyy-wana herimy taite weryrybòu. Tii heka juhu arawyò rare. Ka kai tahe tebinabinanyte tuu biwinykremy tarybete Deuxu ruki kia òbitimy tamy mabekremy.
\v 15 Inatyhymy kỹny Deuxu sohojihyy iny riwinyre, kia inyde-ribi tyytyby-ribi relere? Aõbo tahe Deuxu tamywireri? Kia iriòrereny ijõdikre Deuxu dee rawahikre. Kiaremyta, bexiebenykre kai bohoõ ibinabina ahãwyyreny-di norenyõmy.
\v 16 Kiemy dori, Israel Deuxu Ibutumy Tabedeery nihikỹ-di, rarybere: — Diarỹ riwayaranyre hãbu hãwyy-wana wii riatymyhỹrenyre; diarỹ riwayaranyre hãbu kawesemy ibinahỹkỹmy riwinymyhỹre.Kiaremyta bexiemy atximyhỹbeny, kia inyõ dori òbitityhymy ratxiõhyymyhỹre tahãwyy di.
\v 17 Kai boho sõemy tarybemyhỹtenyte, kia Deuxu Tyhyhykỹ reywesemy ratxireri ibutumy arybereny-ki. Kia ihãremy kai boho tỹỹraximyhỹtenyte: “Timybo tahe Deuxu reteywedỹỹnyrenyra?” Kia myỹ raryberenyreki aõbo: “Deuxu Tyhykỹ rõhõtinymyhỹre kia aõnaõna bina riwinymyhỹrenyre awirenyre, uriki tahe Deuxu tii boho tamyrenywire.” Yda kai boho tỹỹraximyhỹtenyte: “Tikibo Deuxu òbitihikỹ ratxireri?”
\c 3
\p
\v 1 Deuxu Ibutumy Tabedeery nihikỹ-di rarybere: — Diarỹ ariteònykre warybe-di ijaradu wary wadee riywiywinykremy. Kia bureny kai boho tadiijemyhỹtenyte isitere-ribile rehemynymy reakre Deuxu rybena heto-ò. Kia rehemynymy rareri Deuxu rybe-di ijaradu kai boho tadiraòmyhỹtenyte, kua kidiwykre rybe ywidỹỹ kia adeereny ariwinykre.
\v 2 Ka mobo tahe riekre tii kanakre txuu? Mobo tahe awimy reximymy rỹikre tiu tii kanakreu? Kiemy dori tii heòty wesemykre, iny boho risuhosuhorenykremy, kia heka sabaõ wesemykre iny boho rihòrenykremy.
\v 3 Tii rexisỹnykre Deuxu rybe-di ijohodu mahãdu risuhosuhokremy, Levi rioreriore bohoreny, kia iwese inyõ mana rỹsỹ òtaòta mana rỹsỹtyhyhykỹ rityratyradỹỹmyhỹre Kawese heòty-ò. Kawesemy tahe tii boho aõwaxina xiwena riwahinyrenykre Deuxu dee tii tuu reamyhỹremy.
\v 4 Taita tahe xiwena kanawykre Juda iny mahãdu kidiwydenykre kia Jerusalẽ-ki hãwadu mahãdu kidiwydenykre Deuxu dee tai awityhytyhymy rahãkre, iwesemy juhuu hỹỹna bedeu tuu rutỹỹnymy rỹiramyhỹ wesemy.
\v 5 Deuxu Ibutumy Tabedeery nihikỹ-di rarybere tasỹ dee taijoi dee: — Diarỹ anakre aradyrenykremy araatyrenykremy. Kia raroorehenymy aõkõ ararykre ibutumy inymahãdu riwatyhynyõmyhỹrenyre òludumy, kia heka, hàri mahãdu, tahãbureny ririmyhỹrenyre, tahãwyy ririmyhỹrenyre, kia òbitimy aõkõ rarybemyhỹrenyre, kia aõmysỹdỹỹdu mahãdumy rarỹỹnymyhỹrenyre kia teramy rekoamyhỹrenyre wytese weribi, wyte mahãdureny-ribi kia hãwa witxira mahãdu akyreny-ki rahãwanymyhỹrenyre.
\v 6 Deuxu Tyhyhykỹ rarybere: — Diarỹ heka Tikiehyymy nodu rare kia nohõtibetà aõkõ. Iurenana heka kai boho Ijaò rioreriore boho, texihutenyõtenyte.
\v 7 Kai boho heka ahỹỹnareny wesena toitenyte: warybe wahidỹỹna teatytenyte kia iwesemy tewinytenyõhyymyhỹtenyte. Wadee bòdòòse bedenyke kia diarỹ tahe adeereny aroosekre. Kia kai boho tỹỹraximyhỹtenyte: “Timybo tahe aròòserenykre?”
\v 8 Diarỹ rỹỹraxira: “Inyõ aõbo Deuxu riwasinyke?” Kai boho tahe tiwawasinytenyte kia ihãremy tiwatỹỹraxinymyhỹtenyte: “Timybo tahe arawasinyrenyreri?” Kai boho tiwawasinymhỹtenyte ofeta-ki kia dizimo-ki.
\v 9 Ibutumy kai boho tiwawasinytenyteri, kia iurenana diarỹ retxuhòre ibutumy hãwa hãwa bede bede.
\v 10 Diarỹ Deuxu Ibutumy wabedeery-di, rarybere ibutumy bidiwybedenykre adizimoreny Deuxu rybena hetowo-ò, kia sõemy tai rỹsỹna ijõdikremy wahetoki. Wadeeini atyydỹỹnareny bilidibeny kiata bobibenykre kia diarỹ ariraynykre biuwetyy ijaniela kia atyrereny aritxiwikre sõehekỹmy warybewiwihikỹ.
\v 11 Kia ariwahinyõtyhy sei rabròhòkỹ rihurenykemy alòbrònareny, kia mona besò raty alòbrònareny sõemy rỹikre.
\v 12 Ibutumy iny mahãdu raryberenykre kia kai boho iny mahãdu bedesahãkỹ deysahãkỹ toitenytemy umyreny raryberenykre, kiemy dori kai boho tahãwanymy atximyhỹtenyte su wihikỹ-ki suu iaõdityhy-ki. Diarỹ, Deuxu Ibutumy Wabedeery nihilỹ-di rarybere.
\v 13 Deuxu Tyhyhykỹ rarybere: — Kai boho wamy ibinabinamy tarybetenyte kia ihãremy tỹỹraximyhỹtenyte: “Aõmybo tahe raryberenyre aribiòtumy?”
\v 14 Kai boho tarybetenyte: “Aõki heka awiõhyyre Deuxumy rybena. Kia aõke heka aõkõre iny boho rikiwinyrenyke aõmybo Deuxu Ibutumy Tabedeery nihikỹ-di rarybere yda rykexityynyrenykremy rubu-ò tyyna-di kia tamy rykexideòsinyrenykremy iny boho ixideereny rexiraherenyremy.
\v 15 Kia heka irutaõre iny mahãdu rexityhytyhynymy ratximyhỹrenyre ibedesahãkỹmy rỹimyhỹrenyre, kia diarỹ boho ibutumy retehemyhỹrenyre òbitimy rimykremy iny binabina mahãdureny-ò; tiu Deuxu Tyhyhykỹ ritidimyhỹrenyreu, tii boho rararytxyrenyõhyymyhỹrenyre.”
\v 16 Taita Deuxu Tyhyhykỹ lau ruberumy ratximyhỹrenyre raryberenyre widee wideereny, kia tii tahe roholawityhyre aõmybo wideereny rarybemyhỹrenymy. Kia irurenyki tyyriti-ò raritidỹỹrenyre ni mahãdu motyhytyhybo Deuxu rityhynymyhỹrenyreni kia tuu rerinanymyhỹrenyreni.
\v 17 Deuxu Ibutumy tabedeery nihikỹ-di rarybere: — Tii boho wasỹrenymy waijoirenymykre. Kia txuu rehemynykreu reywinymy idi watxireri, tii boho wasỹreny waijoirenytyhymyrenykre. Diarỹ idireny arexiwobrunykre iwese uladu tyby tariòre-di rawobrumyhỹre kia rityhynymymyhỹre.
\v 18 Kia ixyby wasỹreny waijoireny robirenykre iwitxirarenymy, aõhebo rutỹỹnymyhỹrenyre inywi mahãdudeereny kia iny binabina mahãdudeereny, kia wamy awimy rarybemyhỹrenyre kia riwatyhynyõrenymyhỹrenyre-wana.
\c 4
\p
\v 1 Deuxu Ibutumy Tabedeery nihikỹ-di rarybere: — Kia txuu rehemynymy rareri ibutumy iny rexityhytyhynymyhỹrenyre mahãdu kia ibutumy iny bina mahãdureny roorenykre horeru wesemy heòty-ò. Kua txuu tii boho roorenykre kia tahe ibutumy rexihurenykre.
\v 2 Ka kai boho tahe walau taberumyhỹtenyte, wahedỹỹnana rarỹsỹnyhỹkỹkre txu wesemy, umytuedỹỹna tarahetoti-ki kidiwykre. Kai boho mawayrytòbenykre bedesamy uhuariki.
\v 3 Kua txuu diarỹ reywinyreri, kai boho biriranybenykre iny binbina mahãdu tyrereny kia tii boho ry ỹnysi weselemy.
\v 4 —Õhõtireny rea wadeòdu Moiseisi rybe wahidỹỹna, kia ibutumy warybe wahidỹỹna kia wadohodỹỹna kia diarỹ tamy rewahinyre Sinai hãwalò-ki ibutumy Israel iny mahãdu rityhynyrenykremy.
\v 5 Ka, komy kua txu binahäkỹ kedehemynykre koki, diarỹ Deuxu Tyhyhykỹ, adeereny aditeònykre warybedỹỹdu Elia.
\v 6 Tii riwinykre tyby mahãdu kia iriòre mahãdu widee rawoixirenykremy kia diarỹ arirarytxynyõkremy bede hãwa hãwa kia arihumy ibututyhymy.