See in Reader
65 lines
9.6 KiB
Plaintext
65 lines
9.6 KiB
Plaintext
\id NAM 34. Nahum (3cc)
|
|
\ide UTF-8
|
|
\rem dat 2014
|
|
\h NAUM
|
|
\toc1 NAUM
|
|
\toc2 NAUM
|
|
\toc3 nam
|
|
\mt1 NAUM
|
|
\c 1
|
|
\p
|
|
\v 1 Kaa heka Ninive bededỹỹnamy rarybere, kia Deuxu tuu ritòbexidỹỹnyre Naum dee riwahinyre, tii heka Elcos hãwaludu rare.
|
|
\s1 Deuxu Kyarahakỹ Ninive Òludumy
|
|
\v 2 Deuxu heka iwitxira ỹnyxiwe òtaòta riraòõhyymyhỹre Deuxu heka ikyanadire kia taòludu mahãdu dee rexiòwynymyhỹre. Deuxu taòludu mahãdu ixiòwydỹỹna ritamyhỹre. Kia rakyaranymyhỹreu tahe rirarytxynymyhỹrenyre.
|
|
\v 3 Deuxu Tyhyhykỹ heka ywimy nodu rare, urile tahe iruruterehekỹre, kia iòrarurenydimy ratximyhỹrenyre rirarytxynyhyymyhỹre. Tii rariamy ratximyhỹre yhydebure ykymy kia yhy deburetyhy ykymy; biuwetyyura node heka iwati riukòmyhỹre.
|
|
\v 4 Deuxu heka berohokỹ rimymy ritxuhunymyhỹre, kia tii ruỹmyhỹre; Deuxu bero mahãdu riturỹdỹỹnymyhỹre. Basã asireny kia carmelo bera ratòò rirubudỹỹnymyhỹre, Libano bede ratòò boho noiròsòreny rirubudỹỹnymyhỹre.
|
|
\v 5 Hãwalò hãwalò ikoki ramytàtàmyhỹrenyre, kia bede ratòò mahãdu tahe rexitxiwimyhỹrenyre. Tiu tii rexitynynynymyhỹreu, suu kia ibutumy tai hãwadu mahãdu rexihumyhỹrenyre.
|
|
\v 6 Tiu Deuxu Tyhyhykỹ iky reamy ratximyhỹreu, mobo tahe làmamy rỹike? Mobo tahe riemy rỹikre ikyarana? Kia teburehỹ rejujumyhỹre bero heòty wesemy; ikoki heka mana rabrò rõderõdenymyhỹre.
|
|
\v 7 Deuxu Tyhyhykỹ heka awire rare. Kia bede isirasiramy rỹimyhỹre bedeu tii tasỹ taijoi rihedỹỹnymyhỹre kiata tarukimy ratximyhỹre iny mahãdu iixiwotena riemyhỹrenyre.
|
|
\v 8 Kia beòrahakỹ wesemy tii taòludureny rahumyhỹrenyre; tii riteònymyhỹre taòludureny rubu mahãdu ykyreny-ò.
|
|
\v 9 Aõbo heka kai boho bede teywinytenyteri Deuxu Tyhyhykỹ òludumy? Tii heka ibutuhyylemy arahurenykre. Deuxu òludumy inyõ rexilàmadỹỹnyke aõkõre inatxi ixybymy?
|
|
\v 10 Kia bede ratòò ledelede wesemy, horeru rubu wesemy, kai boho ibutuhyylemy bexihubenykre!
|
|
\v 11 Ninive hãwa-ribi hãbu nade ibinabinamy rõhõtinymy, kia aõnaõna ibinamy riywinyre Deuxu Tyhyhykỹ òludumy.
|
|
\v 12 Kiaremyta, Deuxu rarybere Israel iny mahãdu-ò: “Assírio mahãdu rexihurenykre kia riõrenykre, kia iruruterenyre hãre kia sõerenyre hãre. Diarỹ arawahinyrenyre kai boho aõhỹỹmy butỹỹnybenykremy, kia tahe ixyby tuu ariwinyõtyhy.
|
|
\v 13 Diarỹ araheddỹỹmyrenykre assírio mahãdu deburehekỹ-ribi; diarỹ aratarenykre wetxumy atximyhỹtenyte-ribi”.
|
|
\v 14 Assírio iòlò bededỹỹnanamy Deuxu Tyhyhykỹ rarybere mỹỹ: “Tii iriòrereny ihoõkre, kia kawesemy tahe ini riõkre. Diarỹ arihurenykre iinyxiwereny kia ihetoworenymy rỹimyhỹrenyre iritxoo dỹnyxireny. Kia arituunykre, kiemy dori tii aõkõ awiõhyyre”.
|
|
\v 15 Betehebeny ini. Hãwalò hãwalò-di rubewahidỹỹduõ namyhỹde ijyywiwi-di, ijyy ywimy rỹimy rarekremy. Juda iny mahãdu, abedesanareny aixenareny biwinybenyke kiata Deuxu-ò tuu maubenybenykre tuu kai tarybete mynamy. Ahãwahãkỹreny tiu ixyby iwitxira hãwa mahãdu tamy inorenyõna iny binabina mahãdu; tii boho dori ibutuhyylemy rexihurenyre.
|
|
\c 2
|
|
\s1 Ninive Su-ò Rariòwyre
|
|
\p
|
|
\v 1 Iny hududu Ninive hãwa tamy aõbinamy reakre. Bisỹnybenyke iny mahãdu atenatirenyti-di itxeredumy. Sodadu mahãdu-ò byrybenyke kiata ijesemy rexiywinyrenykre.
|
|
\v 2 Deuxu Tyhyhykỹ ixyby kidiòkesedỹỹnykre Israel iny mahãdu aõwiwihikỹ; kia ixyby iny mahãdu hãwa hãwa komy juhu ratxirenyre wese kia iòludu mahãdu ibutemy iaõnaõnareny riwymyhỹrenyre kiata ihãwahãkỹreny ririmyhỹrenyre iwese bedederade iruru sõmosõmo ihoõmy rỹimyhỹre wesemy.
|
|
\v 3 Sodadu mahãdu iòludureny retyymyhỹrenyre wyhy itxena sòhòkỹreny-di, kia ityyreny tule isòlerenyre. Tii boho rexiywiywinyrenyre Ninive-ò aõbinamy rekoarenykremy. Iitytireny heòty heka rarỹsỹnymyhỹre heòty wesemy, kia awaru mahãdu tahe ywimy ratxiõhyymyhỹrenyre.
|
|
\v 4 Wouna ityti heòty mahãdu iijarateremy raòrunymyhỹrenyre ryòreaòrea-di. Kia heka heòtyloo wesemy reamyhỹre, kiata biudelaa wesemy rekoamyhỹrenyre.
|
|
\v 5 Sodadu mahãdu wedu òludu tarybe riwahinyre taõdadureny-ò; tii boho raòrunymyhỹrenyre hãwa adohou huariòhòkỹle kia rekoamyhỹrenyreu urile wii ritorutorunymyhỹrenyre. Tii boho adohou huari ridemyhỹrenyre tamy rexiwòrenykremy.
|
|
\v 6 Biraynybenyke bero ijò ijò kia iaõmysỹdỹỹreny heto-ki aõnaõna binahakỹ ratximyhỹre.
|
|
\v 7 Iỹnyxiwereny ritxoo heka riwyrenyra, kia ityhydỹỹdu mahãdureny tahe iherenymy robumy roirenyre; tii boho rawesiruràmyhỹreny bòtòehekỹ wesemy kiata tabretireny ritehenymyhỹre bede riryryrenymy.
|
|
\v 8 Ninive iny mahãdu rexiwòrenyre iwese bee iwory-ribi rahenymyhỹre wesemy. “Bexitxuhunybenyke! Bexitxuhunybenyke!” Inyõ rirajuare, ka inyõ tahe ixiwòtelau rexitxyhunyõhyyre.
|
|
\v 9 Mana rỹsỹ òtaòta bimybenyke! Mana rỹsỹhỹkỹ biwybenyke! Hãwa heka sõemy tỹximy roireri aõnaõna tyhyna-di, kia sõemy aõnaõna wiwihikỹ-di rỹirenyreri.
|
|
\v 10 Ninive: rexihure, bederomyrelere, inyhomy aõkõ! Itelesoreny sõemy brebureny-di; Itiòhureny ramytàtàrenymy, iòsỹnyre rỹrenyrenymy; ibutumy irururenyhomy aõkõ rekoarenyre.
|
|
\v 11 Aõbo tahe hãwa rutỹỹnyre kia leaõ hãluu ijõwesemy roimyhỹre? Tai heka leão riòre boho rỹsỹna rirỹsỹnyhỹrenyre; leão boho tariòre boho-wana rexirarudewiwimy ratximyhỹrenyre, kia inyõ ribrebunyrenyõ hyymyhỹrenyre.
|
|
\v 12 Leão aõtxile iròdu rirubunymyhỹre kiata tahãwyy-wana tariòre boho-wana wimy, riwirareamyhỹre; ihãluu ijòreny tỹximy roimyhỹre iròdu iròdu rubu-di.
|
|
\v 13 Deuxu Tyhyhykỹ, ibutumy taruruteredi, rarybere mỹỹ Ninive iny mahãdu-ò: — Diarỹ aòludurenymy watxireri. Arisõkre aitytireny heòty wouna, kia asodadureny wouna-ki rururenykre. Ariwykre ibutumy aõbo kai boho tewòtenyte iny witxirareny-ribi, kia tiu ixyby ahãwareny iòlò deòdu raõtyhy iwitxira hãwa hãwa bede bede-ò.
|
|
\c 3
|
|
\s1 Ninive Dee Hii Ibru Rỹire
|
|
\p
|
|
\v 1 Ninive-di, hãwa birahakỹ, sõemy roidu kia aõbinabina-di roimyhỹre, tai rubudỹỹ rỹihyymyhỹre.
|
|
\v 2 Boholabenyke òhòte wodỹỹ-ò kia wareny wodỹỹ-ò! Kia rirahureri awaru mahãdu rawayrytòrenymy; Ityti heòty wouna heka rekoamyrirahurenyreri!
|
|
\v 3 Awaru dinodu mahãdu heka tõnori rỹsỹhỹkỹ-di turemy rojymyhỹrenyre. Rururenyre ibutu bede bedemy, sõetyhymy rubu ydò rỹire; sodadu mahãdu rariòwyrenyre rubu mahãdu ykytxi.
|
|
\v 4 Ninive, wedena, kia rararytxymy ratxireri! Iruxera kia iny dee rarybewiwimyhỹre, tahàri bedeerymy tii iny mahãdu rimyrenymy raremyhỹ kiata tabirenamy iny idee rimymyhỹrenyre.
|
|
\v 5 Deuxu Tyhyhykỹ, ibutumy tabedeery nihikỹ-di rarybere: Ninive, diarỹ aòludumy watxireri. Diarỹ atyy aritakre kiata ademy arasỹnykre kia ibutumy iny mahãdu kawesemy umy robikremy, kia aaõbinahãkỹmy robirenykremy.
|
|
\v 6 Kia aõbinabinamy adi aratxikre kia bede susu-di arahetynykre; ibutumy adi reteherenykre ibinahyylemy.
|
|
\v 7 Ibutumy iny mahãdu umy robirenykre rexiwòrenykre, myỹ raryberenymy: Ninive heka rabinatyhymy ratxireri! Mobo tahe adi rexiwobrunykre? Tikibo tahe itxi areakre mobo aranohõti tòbònykremy?
|
|
\v 8 Ninive, kai aõbo awityhymy atxite Teba-ribi, Egito hãwaty aludu? Tii heka tule bero iitxedurenyre: Nilo bero kia adoho uhuari wesemy riijemyhỹrenyre.
|
|
\v 9 Teba heka rahãỹnanymy raremyhỹ. Egitu-my kia Etiòpia-my; tii heka hãwa ruruterehekỹmy raremyhỹ bede bede-ribi, kia Libia hãwahãkỹheka ibiòware.
|
|
\v 10 Kia tahe ihãrele Teba iny mahãdu brejumy rekoarenyre; tii boho radyrenyre tahãwareny-ribi irehemy, uladu mahãdu taòmy su-ò rejujurenyre ryy rỹimy rỹimyhỹrenyrekile, kia iòludureny mahãdu (sorte) ritarenyre riterenyre kia mono ratxikremy iny mahãdu tyhyhykỹreny-di kia irahudita ridyrenyre womati reruti-di ribrejumymy ridyrenyre.
|
|
\v 11 Ninive, kai tule axaxamy biõlekre kiata matiwewetiwewemy mariamy makre, uritre aòludu mahãduribi bexiwòkemy bisỹnykre.
|
|
\v 12 Ibutumy heka aruruterehỹkỹ bederade ruru sõmosõmo wesere sõemy iraty rasònymy rỹimyhỹrenyre. Kia urile iruru raukỹukỹkremy, kia tahe iraty resekre inyõ rywotxi ixideewimy inyõ rirỹsỹkremy.
|
|
\v 13 Isodadureny heka irurutereõrenyre hãwyy mahãdureny wesemy, kia hãwa ijòtòbona sõe iraymy rỹirenyreri. Iòrudureny ixideewimy rirònyrenykre, kiemy dori heòty rihurenyre ijòwerynareny.
|
|
\v 14 Bee ihynarenywo-ò birarenybenyke, kia ihoõkre lau tiu sodadu iòludureny hãwa riyrawonykeu, kiata ixyby bexiruruterenybenyke. Suu bidewidewinybenykre kia adobo-my biwinybenykremy.
|
|
\v 15 Kia wese hãrele kai boho burubenykre heòty-di yda wouna-ki; aòludureny arahurenykre iwese sei rabrò oworu aõwi rahure wesele. Sõetyhymy bexirahòrebenyke sei rabròhòkỹ wesemy!
|
|
\v 16 Aykyrenyki heka aõnaõna-di ijohodu mahãdu ijõdirenyre kia taina biurawetyymy rỹimyhỹrenyre-ribi. Ka tahe wiji tii boho ròirenyre, iwese sabròhòky taderatyti ritehenymyhỹrenyre wesemy ruòmy ròhònyrenyre.
|
|
\v 17 Iwedureny ranehekỹ bohoreny kia iaõmysỹdỹỹdureny kia heka sei rabròhòkỹ wesena roire kia heto wetityre rurymyhỹrenyre bede rutàtàra-wana; ka txuu raòderanymy namyhỹdeu, tii boho ruòmy ròhònymyhỹrenyre, kia inyõ rieryrenyõhyymyhỹre tibedeobo ròirenyramy.
|
|
\v 18 Assíria iòlò kia ihãwa hãwareny mahãdureny rurumy ratxireri, kia isodadu wedureny tule rururenyre. Iijoireny imahãdureny hãwa hãwalò-my roberamy rỹirenyreri, kia tahe inyõ ihoõkre ixyby ributunyrekemy.
|
|
\v 19 Lauhi ihoõre iwotõmonareny lauhi; kia teytena ihoõrenyre. Ibutumy iny mahãdu iaõbinabinareny-ò roholamyhỹrenyreu kia urile rabedesamy teboube rihetehetenymyhỹrenyre. Kia dori inyõ rahenyrenyhyyrenyre aõhỹỹhỹỹmydỹỹnana-ribi kia tiu rexibuõtyhy.
|