kpj_reg/33-MIC.usfm

\id MIC Micah Miquéias (7cc)
\ide UTF-8
\rem aut Mabulewe
\rem dat 2016
\h Miquéias
\toc1 Miquéias
\toc2 Miquéias
\toc3 mic
\mt1 Miquéias
\c 1
\p
\v 1 Kaa heka Deuxu tarybe wihikỹ riwahinyre Mikeia-ò, kia Moresete hãwãhãkỹludu-ò. Mikeia heka retehemy raremyhỹ Xamaria hãwã tyhynadi tule Jerusale tiubo Jotaõ bedewehikỹle, Akai e Ejeki, Juda hãwã-ki.
\v 2 Boholabenykeỹ, ibutumy, ywimy ibutumy kaki sỹdu mahãdu! Tii heka rarurunykre aweribireny aõkõ taheto-ki biu-ki, tule raryberakre.
\v 3 Tii rubehekre titxibo rasỹnymyhỹre ribi tahe rariakre hãwãlò tyredi.
\v 4 Awa rawo-di, hãwãlò riõkre iwese iny heòty-di tebora rahumyhỹre wesele. Tahe bede raraykre, kia beora wesemy tahe riokre ityatxi.
\v 5 Kia heka inatyhymy rỹikre aõherekibo Israeli mahãdu rexiòrarunyrenyreki tule Deuxu ribi rexihitxinyrenyreki. Mobo tahe iòrarure ixyby Israeli mahadu; Tule Xamaria mahãdu! Mobo tahe ierysydutymy ratxikre suritxoo òwodỹỹdumy Juda òraru-ki Jerusale mahãdu.
\v 6 Tai tahe, Deuxu rarybere. — Jiarỹ ariwinykre aõtxile aõdibo Xamaria hãwã sõwemy ibinahãkỹmy ratximyhỹrenyre itynyhỹkỹlemy; ariwinykre kia bederaty uva làbrona wesemy. Ariwinykre kia mana ritynykre hãwã ribi hãwãlò rawotxi tule ihetoreny wararu Xamaria wararu riõkre.
\v 7 Ibutumy aõbo riteòsinymyhỹre ituekre, iaõnareny kia tai wiwana aõ ibinamy riwinymyhỹrenyre heto ariworonykre, ibutumy itxõnaõna mahãdu rirahukre hãwãlò binahãky-ò. Ibutumy tibo iubeweri-di riwyrenyre hãwyy uriurimy rỹira mahãdu owydỹỹna ijõ. Tahe heto luruhukỹ-ò resekre.
\v 8 Tai tahe, jiarỹ arahinykre, arirajuakre txuberemy tahe bidiwona kedesekre tahe arariakre waubehetyõmy tule wademy, araõtxinymy ijoro wesemy tule tarurutyhymy arirajuakre txubreremy nawiie wesemy.
\v 9 Ihãre tahe tiu Xamaria mahãdu wotamonareny tiu reytenyõtyhy, riwinyre, rahure Juda tii Jerusale hãwã ribi iòhòmy, tai wasỹ mahãdu rasỹnymyhỹre.
\v 10 Tuu ijyyomy iny onodỹỹrenymy jate-ò, irutere ahireny orarudỹỹmy. Bete-Lifra mahãdu sulemy rexirahoremy bededỹỹnana ibinatyhy deosina oraru-ki.
\v 11 Xafimy sỹdu mahãdu, roirenykre tademy ixỹrumy tai ijõ mahãdu rỹimyhỹreò! Mobo Jaanỹ rasỹnymyhỹre mahãdu tahe uritere òlòõmy, tiubo bohobenykre Beti-Ejeò mahãdu ibru-ò, tahe bierybenykre tiiboho wiòdỹỹna riwahinyrenyõkre.
\v 12 Mobo Marotximy rasỹnymyhỹre mahãdu tahe sõwemy iny tamyreny rakemy rururenykre, iribi tahe Deuxu ibina riwinyre Jerusale iòhòmy.
\v 13 Leakimy rasỹnymyhỹre mahãdu taawarureny riywinyrenyre ityti heòty hewomy rinykremy! Kaiboho Israeli mahãdu wesetyhyle tewinyta , tai tahe Jerusale mahãdu bedebinahãkỹ-ò ridyrenyre.
\v 14 Taita tahe heka Juda mahãdu, tureny rarybere aõherewe  Morejete-Jati mahãdu. Mobo Akiibe mahãdu aõbohe debònamy roirekre Israeli wedu-ò.
\v 15 Deuxuhe rarybere: Ariwahinykre Marexamy rasỹnymyhỹre mahãdu iòludureny debò, tahe Israeli mahãdu hãbu mahãdu rurutereheky (wedu) rexiworenykre hãluukỹ-ò kia iòhòmy Adulỹhãwã ribi.
\v 16 Juda mahãdu aradereny biorobenykre tule rawelyramy marasybenykre kia bedewona kanakrekoki; iribi tahe ariorereny aluunadutyhyreny ridyrenykre wetxumy irehety-ò asyrenyribi.
\c 2
\p
\v 1 Kia rỹirenykrekoki rudi-u tahe juhule riywinyrenyre rahurenykremy tule riywinyrenyõkre ijõ mahãdu. Kia tahe tiiboho rutamanyrenyre aõbo riwinyrenykre hyy iraykyrenyre tiiboho heka iruruterenyre.
\v 2 Tiubo aõbo riwyrenykremy rõtõtinymyhỹrenyre suu aõbo da heto aõbo kia inatyhykỹlemy riwymyhỹrerenyre. Iny  riywinyõhyymyhỹrenyre ijõ iny witxira tule rityhynyõhymyhỹrenyre aõtxile iny suu wedu aõbo aõtxile.
\v 3 Tai heka Deuxu rarybere: Ariwinykre jiarỹ aditeonykre aõbinahãkỹ atyrereny resekremy, tiu iribi bihenybenyõtyhy. Tii aõbohe bededỹỹna aõhõkỹmydỹỹna kaiboho tiu maxiwedenybenymy biròranyõtyhybeny.
\v 4 Tiubo itxuu rehemynykreu ijõ ritxienykre rybe erysyna tyhyhykỹ adeereny rawinykremy bedewomy. Inyboho heka ibinatyhymy roire! Deuxu heka ritara inysureny inyribireny Tii ritare aõ inyhõrõreny riwahinyre aõ ritarenyre mahãdu-ò.
\v 5 Tai tahe tiubo inydeereny suu riwahinykreu rikitxuatxuarenykre Deuxu ritynymyhỹre mahãdu-ò, tiu heka kaiboho ijõ bitabenyõtyhy.
\v 6 Tii boho mahãdu raryberenyre: Txioiny biyryke Deuxu rybedu mahãdu! Tuu ryberenyõmy! Tii dori inatyhymy rare Kia Deuxu riwinyke aõhõkỹmydỹỹnana inytyrerehy reseke.
\v 7 Kia aõbo Israeli mahãdu-ò raykarananyre? Tii aõbo tamyreny radònykre? Kawese heka tii iky reakre? Deuxu rarybere: Kaa heka warybe wihikỹ rewahinywãhãre iny mahãdu wihikỹ-ò.
\v 8 Kaiboho wahe,kia òludu wesemy, tamyreny tekoatenyte. Tahe hãbu mahãdu aõbina ribi riòaserenyre, biu-ò henadihyy rõhõtinyrenyre, tahe kaiboho tawasinytenyte atyyreny-di.
\v 9 Kaiboho biteònybenykre ixiribireny aluunadutyhyreny hãwyyboho asỹrenyludu tule ariòrereny dela tiu aõwihikỹtyhy riaõtyhy kia tuu rarybere.
\v 10 Karibi rahònyrenyre! Tahe ròirenyre! Kia suu tamy boibenykre-ò aõki tai bexielehynybenykre aõ ihoõki awihikỹmy. Kaki tahe sõwemy iny ijõdikre iny òbiti-õ tule iixỹrutere. Kia sõwemy aõnaõna ludu kynyikre sõwemy.
\v 11 Deuxu rybemy rybedutyhy tuu riywinyre inydeereny tahe kia inydeereny Deuxu rybemy òbitimy aõkõ rarybemyhỹre ruilemy, mona besòhòkỹmy ibexibeximy rikiõmyhỹrenykemy rarybemyhỹrenyre inydeereny.
\v 12 Deuxu rarybere Israeli mahãdu-ò. Jiarỹ ibutumy arabutunyrenykre aõbo akireny rasiranyreri tule anadydenykre kia suu adeereny tuu rarybere-ò, kia Deuxumy rybedu mahãdu budòeni rihimy ramyhỹre ibyrena-ò da iòtilyreny-ò. Kia tahe ixyby hãwãkỹ rexiorykre sõwemy iny-di tỹxihikỹlemy roikre.
\v 13 Deuxu kidiraynykre inydeereny ryy tiiboho riòlònyrenykre aõ tamyreny ròhònyõhyy bedebina tiiboho heka hãwãhãkỹ ijòtòbònadile riòlònykre. Wedu Deuxu heka ikoreny rakre ehekile tiiboho roikre.
\c 3
\p
\v 1 Boholabenyke ijoi mahãdu tule hãbu tyhyhykỹ Israeli ijoi. Kaiboho bierybenyke tyhyna.
\v 2 Kia tahe rayranymyhỹrenyre iny weò tahe hãbu bina luurenyre.
\v 3 Kaiboho biròbenyke waijoreny, waijoi detyy tule bisihebenyke iderenytyy biròbenybenyke iti tule ide bitxuatxuabenyke - txurasòmosòmomy, tahe heramy bidebenykre idereny.
\v 4 Anakre tiubo kaiboho wamy beàlàbenykreu Deuxumy, tahe tiu aratyhynyrenyõtyhy; Kaiboho tewinymyhãtenyte aõbo ibina, tai tahe tiu aexitoedỹỹnareny-ò aroholaõtyhy
\v 5 Deuxu rybedu riitxenanymyhỹre ijoi. Kia tamy riòwynymyhỹrenykemy tahe ritidemyhỹre aõ awihikỹ-di ratxirenykemy, tahe tamyreny riwahinymyhỹre aõbinaki ròtarenyõke ritidemyhỹre. Tahe Deuxu rarybere  Kia Deuxu rybemy rarybemyhỹre mahãdu-ò.
\v 6 Aõhe wana aruereny turumy kaiboho betebenyke, aõhe wana tule ityytyby tule turumy adeereny relekre. Kia txuu loosona riõkre aribireny, kia bedeluruhukỹ atyrereny resekre.
\v 7 Aurerarumy tainyhe marybeke aõbo rỹikremy kia itomora mahãdu timybo ryirakre ixỹrumy aõbo. Aõkõre tiiboho kiditadenykre irawyona Deuxu ribi tai tahe tiiboho roirekre ityhynarenyõhy.
\v 8 Kia jiarỹ watxireri ule, Deuxu tyytybytyhy wadee ruruna riwahinyra, luuna rurunahãkỹtule rurutere iny aritamyhỹkemy iòraru ribi iaõnaõna binabina ribi Israeli mahãdu.
\v 9 Boholabenyke, ijoi koludu mahãdu tule hãbutyhyhykỹ Israeli ijoi. Kaiboho akyreny tamyreny reamyhỹre aõbo awi  tewymahãtenyte bedewihikỹ-ò.
\v 10 Kaiboho tewinytenytere Jerusale hãwã wihikỹmy, kia heto ityre-ki relemyhỹre ijòòmy ityhynyõmy kia bedebina hãlubu-di.
\v 11 Hãbu mahãdu tyhyhykỹ Jerusale mahãdu reòbyrenyre iubeweri-ò kia riywinykre bededỹỹnanaywina, kia xiwewahidỹỹdu mahãdu ributunymyhỹrenyre rybe tuu roimyhỹremyna ròerydỹỹnymyhỹrekemy. Kia Deuxu rybe rybedu mahãdu riwinyrenyre òwydỹỹ rybe erysydu mahãdu biu-ò.
\v 12 Tahe ihãrele tiiboho reòbyrenyre Deuxu rybe wiòdỹỹna ritarenyre. Tiiboho raryberenyre; tiu inyõ aõbina rỹiõtyhy aõrekibo kia Deuxu inyweribireny ratxireri. Tai tahe , aõrarurenyki, Jerusale rexirahokre mana sõwe hekymy, Xiaõ hãwãlò su rirahorekre bedero su wesemy tai ryimyhỹre Deuxu rybena heto rexirahorekre bedeyxemy.
\c 4
\p
\v 1 Kia biu-ò tahe Deuxu rybena heto irarie tyhymy butu ribi rỹikre, kia rỹikre ibutumy hãwãlò ribi. Ibutumy hãwãhãkỹ ribi tamy reakre.
\v 2 Tahe tiiboho kanarybedenykre rkaõwonyrenyke Deuxu hãwãlo-ò rikoirenyke Israeli Deuxu rybena hetoo tii inyboho rierynanykre aõbo rikiwinyrenykremy, inyboho rikiriranyrenykremy irydi. Tai tahe Deuxu dohodỹỹna kanakre Jerusale tule Xiaõ hãwãlomy inydee kanarybekre.
\v 3 Tii heka itxeredu tyhy ratxikre ibutumy inydeereny tii tuu ritidikre ibutu irehemy rỹira mahãdu tuu rarybekremy. Tiiboho rexirahorerenykre tebonareny mabese rarahoremy etõriorireny irarubumy. Tiu heka bedebede mahãdu aõbina riwinyõtyhyreny tule tiu rexiywinyrenyõtyhy ixyby aõbinamy.
\v 4 Tiiboho heka awimy ratxirenykre iny sohoji sohoji rexielehynykre ywimy alobrona oworu oraò da tawidỹỹbededỹỹnana bire-ki aõbo. Kia heka irybe rare. Deuxu ruruterehekỹwahe.
\v 5 Iwitxira bedebidi mahãdu reàlàmyhỹrenyre rityhynymyhỹrenyre tadeuxureny tahe, inyboho Deuxu ruruterehekỹrityhynymyhỹrenyre tuu inyboho reàlànymyhỹrenyre irybe rikeobymyhỹreny tuu raktximyhỹreny.
\v 6 Deuxu rarybere: Tahe kanakre bedetyhy iu tahe jiarỹtamyreny anarybekre tibo aõhõkỹmy rutỹỹnymyhỹmahãdu-ò kia jiarỹaõhõkỹmy resenyrenyre mahãdu-ò, tiubo ritare iaõmydỹỹna ribi.
\v 7 Anadykre ixyby abede ribi irehe ribi ibutumy aõbo irumy tahe ariwinykre ijõ sỹdumy iruruterehekỹmy. JiarỹDeuxu bede ariywinykre Xiaõ hãwãlo-ki, tahe kia wamy reobykre wana tuhyy rarekre awimy, tule tiiboho wahõmy roirekre ixybyle.
\v 8 Ei Jerusale, tiludubo jiarỹrare, budoeni-di itxeredu idireny retehewãhãrereywinywãhãre wamahãdu adoosekr e hãwahãkỹtyhy-ò bede webro ribi, hãwahãkỹwihikỹ-ò Israeli hãwa.
\v 9 Jerusale, aõherekibo kai tabuteri tii hãwyyreri wana uladu desemy robureri? Aõrekibo kai aõbo ahãwa wedu ihoõre da rybeywisidỹỹdu aõbo ituerenyre?
\v 10 Jerusale, bidiwiyke txubrere tule rajua tii hãwyy ratxireri loosona riwahinyreri, tahe kaki sỹdu mahãdu rohonykre bedero su-ò rasỹnykremy iribi tahe roirenykre babilonia hãwa-ò. Kia tahe Deuxu kiditadenykre, ritakre ioludu ruruterehekỹribi.
\v 11 Sõwemy bedebede mahãdu rexibutunyrenyre kia Jerusale hãwa hudumy. Kia rarybere: “Jerusale ijoi rahukre aõ tai rariõhyykre”.
\v 12 Tahe tii rieryõrenyre tii Deuxu bede riywinyremy timybo rõhõtinyremy. Rieryõrenyre tii rexibutunyrenyre ihudurenymy, kia mai ru wesele aõhebo iny ributunymy risykremy tule kia todeura tyy iny ributunymyhỹre wese.
\v 13 Tahe Deuxu rarybere: Jerusale hãwa mahãdu, bitamanybenyke biorybenyke aõludureny. Jiarỹadeereny ruru ariwahinykre broreni hãbu iodi woma wesuru terehekỹtule hãwo lyby. Kaiboho mahubenykre sõwemy iny wade bidiwahibedeny, ibutu bedebede Deuxu rare, tatyhynareny tiiboho ritarenyre tarurutererenymy.
\c 5
\p
\v 1 Jerusale mahãdu bexiywinybenyke kaiboho bexihedỹỹnybenykemy kia aòludureny ahãwãreny rirurawonymy ratxirenyreri tiiboho Israeli wedu iòlò rubudỹỹmy ratxirenyreri.
\v 2 Tahe Deuxu rarybere: Bele-Efrata kai hãwã iyja- ò tate Juda hãwã-ki. Tahe ariwinykre ahãwãrenyyribi heka ijõ ròhònykre Israeli wedu iòlòmy ratxikremy. Tii heka juhuu rybena heto riòrunyre riokore-le rarekre juhuu ihetxiutyhy mahãdu irehetyhyludu.
\v 3 Deuxu riwahinykre Israeli mahãdu iòludureny debò wo-ò tuhyy tureny rasaõsaõmy roirekre tiu hãwyy riòre reakreu hukỹle tahe tii tamyreny loosahãkỹ riwahinykre. Tai tahe Israeli mahãdu heka rotena-ki iny rỹimyhỹre wesemy roiremyhỹ iribi tahe kidexibutunydenykre kia Su Wihikỹtamyreny ritidire-ò.
\v 4 Kia wedu iòlò kdobikre kia aõbohe deuxumy rybedu wamahãdule rare, riwedunymy tarurumy tahe Deuxu tahe tamy rawihinyre tanimy, tabedeywinatyhy Deuxu riwahinyre. Aijoi  tahe rasỹnyrenykre iijesedudimy kia heka tamy rehemynykre tarurumy irehetyhytyhymy bedebina ribi.
\v 5 Tahe kidiwykre aõwityhyhykỹ. Tiubo axiria mahãdu iny hãwãreny rihurenyre ròtarenyre iny rurureyribi, inyboho  tahe rikiteonyrenykre hãbu ruruterehekỹ tiiboho wana resurenykremy.
\v 6 Tiiboho Neroji mahãdu hãwa-ò rirònyrenyre, kia heka rare, axiria, tahe rotarenykre. Kiamyre heka, tiubo axiria mahãdu inydeereny raaõbinamy renykreu inyhãwãreny-ò tahe inywedureny inyboho kidihedỹỹnykre.
\v 7 Israeli mahãdu tahe iruhyy roirekre kia iny iwira mahãdu- ò tamyreny nonoe kiditeònykre isureny ò Deuxu riwahinykre, aõhebo biu alòbrònatyre resemyhỹre wese. Tiiboho rawinyrenykre Deuxu riwiòhenanyrenyraki aõ inymy aõkõ rawowydyrenyre.
\v 8 Israeli mahãdu heka iruuhyy roirekre tuhyy iny mahãdu yki aõhebo iròdu deburehekỹ bederahy ludu wesemy, aõhebo iròdu debure itomora budoeni mynymy reamyhỹre tahe rimymyhỹre tahe riyreyrenymyhỹre tiu iny iribi rihedỹỹnyõtyhy.
\v 9 Kia wesemy heka Israeli mahãdu ròtamy ròrubydỹỹnymy roirekre ibutumy taòludureny rahumy roirekre.
\v 10 Tahe Deuxu rarybere Israli mahãdu-ò. — Kia txuu, tahe arirubunykre aawarureny adibinanykre aaõbinareny ityti heòty.
\v 11 Adirikre ahãwãreny ibinatyhymy adehukre arurunareny-di.
\v 12 Adihukre ãhàrireny tule aaõresydurenyõlemy beòbenykre.
\v 13 Adihukre kia iòtaòta rityhymyhỹre tule adeuxureny Baa-ò , tiu heka tuu beàlàbenyõtyhy awidỹỹnarenymy.
\v 14 Adihukre ibutumy adeuxureny deòsena asera-ki tule adihukre ahãwãreny.
\v 15 Wanonanamy, wahõrõtyhymy, jiarỹ adiòwynytyhykre ibutumy bedebede warybe rityhyõrenyre-ki wahe.
\c 6
\p
\v 1 Boholabenyke ariwinykre-ò kia Deuxu riwinykre-ò  aweribireny  aõkõ rarurunykre. Myike, Deuxu dori adee riwahinykre rybewi aõkõ hãwalò hãwalò  tule hãwalò  rariehekỹ roholakre irybe-ò.
\v 2 Hãwalò dori bede wararu rare, bohobenyke kia ibinahãkỹ kanakre-ò Israeli mahãdu òludumy tahe tii aõbo ijõdire riwinykremy tii heka ibinahãkỹ riwahinykre Israeli mahãdu-ò.
\v 3 Deuxu rarybere: Waijoi, aõbohe jiarỹ rewinyre òbitimy aõkõ? Sõwemy aõbo rewinywãhãre umyrehy? Bidirawyònybenyke!
\v 4 Jiarỹ anatadenykre Ejito hãwã ribi anahedỹỹdenykre uri taaõmysỹnymahãtenyte ribi, reteònyra Moseisi, Araõ tule Miriỹ-di riyrubunymy rakremy aõ tai ijõõhõdi.
\v 5 Waijoireny õhõtireny itxi reake kia Balake, wedu Moabi riwinyre aõludurenymy kia Balaõ, kia Beti riòre wahe adee riwahinyre, ibutumy õhõtireny itxi reake aõ ròhònyremy kia tai tatxitenyte ribi ròhònyre Akaxia-ò tahe tule rehemynyre Giogaõ ò hãwãhãkỹ. õhõtireny lusaõmy tiu dori Deuxu tõhõti rusaõtyhy aõbo riwahire tarasana.
\v 6 Aõbo tahe jiarỹ adisuhokre tiubo deuxumy areàlàkre-u? Aõbo adiwahinykre Deuxu biuludu tyhy-ò? Tamy aõbo adite òsinykre broreni riòre hãbu Deuxu-ò sohoji beòra tamy kedookremy.
\v 7 Kia aõbo Deuxu kedeysakre tamy budoeni sõwetyhy-di da bee awihikỹsõwetyhy-di aõ kedeysakre? Kia aõbo tamy wariore dela adiwahinykre xiwenamy reakremy waaõna binabina òwydỹỹnamy tule waòraru owydỹỹnamy?
\v 8 Tahe Deuxu riteòsinyre aõbo awi, tii rarybere kia widỹỹna inyribireny. Aõmybo ruruke inyboho rikiwinyrenyke aõbo òbiti inohõrõrenytyhy, kia wiiluumy sõwe tyhymy rikatxirenyke tule awimy ywimy  òbitimy rikarenyke iny tybyreny-ò. Deuxu-ò wahe.
\v 9 Deuxu rarybereri Jerusale hãwã mahãdu-ò, moõbo ibedeerymy ratxireri roholake tyhyna-di Deuxu tuu rarybereri. Tii rarybereri: Iny Juda mahãdu tule Jerusalemy sỹdu mahãdu boholabenyke.
\v 10 Iny bina mahãdu heto kia ityhy mahãdu rexibutunyrenyre iny  òeòe mahãdu. Tiiboho riuherenyre urihixina òbiti aõkõ, ibinamy tai rahare.
\v 11 Timy tahe jiarỹ iòraru arisuhòõtyhy tii dori ibinatyhymy riwinyre tule iutxietyhymy sõwemy ibinabina-di rare?
\v 12 Jerusale-ki hãbu iaõdi tyhy mahãdu sõwemy aõhõkỹmy risỹnyre, ibutumy tai sỹdu mahãdu ruihikỹ tule iaõnaõna mahãdu.
\v 13 Tai tahe, jiarỹ reeryre aõhõkỹmy arasanynyrenykremy, aòrarunareny òraru-ki wahe, arahurenykre kaiboho.
\v 14 Kaiboho tiu byrena-di awihikỹ-di matxibenyõtyhy kiamy boibekre rama arasahyymy. Biijebenykre bibutunybenykre atyhynareny ihãreleta aõ akireny ijõõkre ijõõkre; kia aõbo biyrubunybenykre wana adihukre iwese aõbina-ki rehuwãhãrewesele.
\v 15 Bòbròbenyke ihãreta aõ birasỹbenyõtyhy; bisurusunybenykre ihãreta uweruny tahe tiu tamy bitehemynybenyõtyhy kia tiu biuhebenyõtyhy bewitxira bederatysõ tyre biriranybenykre, tahe tiu ibemy aworenyõna.
\v 16 Kia heka ibutumy kynyikre aõhekibo kaiboho dori aõ ibinahãkỹ teryrymahãtenyte ibinatyhy kia wedu iòlò õri tule iriòre, wedu iòlò Akabe, itõhõdỹỹna heki tatximahãtenyteki wahe. Tai tahe, arihukre Jerusale ibutumy heka rexihukre tai sỹdu mahãdu wahe. Kaiboho heka ibutumy aõ akireny rariõtyhy.
\c 7
\p
\v 1 Kia waribi! Jiarỹhãbu byretyhy rare tahe uritere tuu bederatymy rarunyre ibutumy lobrona figomy tule bederaty somy tomy tahe aõkõ ijõtxi reaõhyyre aõrekibo isona bedemy rỹimyhỹreu dori ibutumy risihimyhỹre.
\v 2 Ibutumy bedebedemy hãbu ibiti ijoõkre, tule deuxu rybe kidityhynoõkre. Ibutumy iwitxira rubu dỹỹle kanarunydenykre iny sohoji sohoji tarotenalemy rỹikre rotenawoki.
\v 3 Ibutumy rexiywinymy aõbo ibina widỹỹmy. Hãbu ruruterehekỹtahe iubewerile riwahinykemy, bede erydu tahe kiale tamy rehemynymyhỹre bedeywinale kia iruterehekỹmahãdu tahe timybo tamyremy riwahinykremy rõhõtinymyhỹrenyre. Ibutumynkia riywinyrenyre riwinyrenykremy ibinahakỹ.
\v 4 Iwese tyhyle hãbu wihikỹmahãdu, kia hãbu obiti mahãdu, aõmy ratxiõhyymyhỹrenyre kia edeho wesemy. Tiubo Deuxu kedehemynykreu tahe aõhõkỹmydỹỹnana ityrerimy riatykre kia idireny dori retehemyhỹre obitimy, kia heka Deuxu rybedu mahãdu tuu rarybere. Iu tahe, kynyikre aõna aõna binabina ibutumy bedeki.
\v 5 Retyhynyõre wabireludu, tule wabiowa retyhynyõwãhãre. Iny sohoji sohoji bexiõhãruny mahãbeny tule ahãwyy manamanareny-ò marybemahãbeny.
\v 6 Wiji bedemy uladu mahãdu tyby rityhynyõhyymyhỹre tule tariolahi wana raaõbinanymyhỹre, tahe ibinatyhymy oludumy ratxikre seriore woludu tyhyle wana wahe.
\v 7 Jiarỹ, kia retidiwãhãre wararosona Deuxu-ò, tii heka retyhyny wãhãre inatyhytyhymy tii dori kidiwatakre. Wadeuxu dori kidiwawiohenanykre.
\v 8 Waõludureny, uritere wadireny nohõtiõmy! Inatyhymy rejuxunyrenyre, tahe ixybylemy retamynyrenyre lamamy, katahe, wiji watxirenyreri bedeluru-ki, tahe Deuxu iny loosonarenymy rare.
\v 9 Inyboho rexiora runyrenyre Deuxu ribi tahe wiji inyboho rkexiywinyke tamy rokoikremy. Tii dori iny riywinyrenykre inyorarurenyki inydeereny ywina riwahinykre. Tii inyboho ridykre loosonahãkỹ-ò, tahe inyboho ritakre.
\v 10 Tiubo inyoludureny inymyreny robirenykreu tahe raixyrurenykre, arieryrenykre arotarenykre; tiiboho heka ityrereny arariakre iwese subruru hãwakỹeryesy-di reamyhỹre wese.
\v 11 Jerusale mahãdu rehemynyreri wahe otity relekre txu-ò itamoramy hãwaki tahe rexirahorekre irehetyhymy kia iwitxira bedebede ribi.
\v 12 Kia txuule, inywedutyhyreny kodoosekre Jerusale-ò. Tiiboho robirenykre Axiaramy, tule Ejitumy tule Eufratxi mahãdu beraludu ijoimy; tule robirenykre beronihikỹmahãdumy tule hãwalo rariehekỹirehemy.
\v 13 Kia tahe ibutumy bedebede rexirahorekre aõ tai ijõõhõkỹmy kia oraruna oraruki wahe tu sỹdu mahãdu ibutumy.
\v 14 Deuxu, inydireny itxeredu, iny ywisidỹỹdu inyboho ihõrõ roire ibroreni. Inyboho irehemy ratximyhỹrenyre iribi bedeyxeke suu wihikỹotity woki tule su wihikỹtyhy-ki.
\v 15 Ariwinykre aõwihikỹtyhy inylahanarenyki, iwese adiwinykre tiubo aritarenykre-u Ejitu ribi.
\v 16 Bedebede ruruterehekỹtuu robirenykre, kia ibutumy tarururiny ribi tiiboho raixỹrurenykre. Ijõ mahãdu tahe urile ruberurenykre, taryreny rarutxinykre kedexihetenydenykre tõhõtireny-ò.
\v 17 Tii bededi rexirureherenykre brybymy, tiiboho roirenykre taruruterena ribi, tỹxihikỹle ibinahãkỹdi, riòòserenykre inytybyreny-ò inydeuxureny-ò wahe.
\v 18 Deuxu heka ijõõre iwitxira Deuxu iwese, tahe riixare imahãdu ribi  irumy ratxirenykremy. Kai uritere tuhyy nõmy, tahe kiamy inydeereny aluuna biteosinykre.
\v 19 Itamora rayky inydireny kanaruxetoe denykre, kanahudenykre iny aõbinabinareny-di kedehukre iny orarureny-di ahu bero nihikỹ-txi.
\v 20 Timybo adeereny retidire juhuu inykorenymy roiremyhỹ-ò mahãdu-ò, kai òbitityhymy mabekre tule biteòsinykre aluna wadeereny, Abraõ, Ijaò (Jacó) riòre riòre wahe.