See in Reader
602 lines
87 KiB
Plaintext
602 lines
87 KiB
Plaintext
\id JER
|
||
\ide UTF-8
|
||
\rem aut -being translated by Macauba K. Translators with Hilda supervising
|
||
\rem dat Terça-feira, outubro de 2017 a Dezembro de 2017
|
||
\rem Ela não sabe ler nem escrever.
|
||
\rem aut Tradução Borobe Karaja – Reside em Macaúba (Feminino)
|
||
\h JEREMIA TYYRITI
|
||
\toc1 JEREMIA TYYRITI
|
||
\toc2 JEREMIA TYYRITI
|
||
\toc3 jer
|
||
\mt1 JEREMIA TYYRITI
|
||
\c 1
|
||
\s1 Jeremia Deuxu ritare
|
||
\p
|
||
\v 1 Bejami mahãdusu-ki Anatotxi hãwã-ki xiwena wahisidỹỹduõ Iukia riòre heka Jeremia rare. Ka tyyriti iijyymy relyymyhỹre.
|
||
\v 2 Waó inatxi beòra-di Amo riòre Iukia tii Israeli mahãdu iòlòmy roireu Judásu-ki iu heka Deuxu Tyhyhykỹ tamy rarybere Jeremia rybe ribi.
|
||
\v 3 Ixityre Josia riòre iòlòmy rareu Jeoaki-ò Deuxu tamy rarybere. Jerusale mahãdu iòludu mahãdu ridyrenyre-ò Jeremia sõwemy Deuxu idihyymy riuhere, ióludu mahãdu tasureny irehemy idi ridyrenyre. Zedekia iòlòmy rareu heka tuu rotỹỹnyre waò sohoji beòrau txibo iruyre ahãdu-di iòludu mahãdu ridyrenyre tasureny irehe-ò.
|
||
\v 4 My Deuxu Tyhyhykỹ Jeremia-ò rarybere:
|
||
\v 5 Ãdiwoki juhu tỹiteu aratare bede mahãdu Deuxumy rybedumy aratare dori.
|
||
\v 6 Tai Jiarỹ Jeremia rarybere Deuxu-ò: Waha! Deuxu Tyhyhykỹ atximyhỹte! Jiarỹhe uladu jiarỹ rare! Rybe reeryõre jiarỹ.
|
||
\v 7 Deuxu dirawyònyde: — Uladumy atximahãte rybeõmy! Jiarỹ arateònykre-ò makre ibutumy arateònykremy marybekremy marybeke.
|
||
\v 8 Brebuõmyke! Awana ararekre arayrubunykremy. Jiarỹ heka Deuxu Tyhyhykỹ Jiarỹ rare. Jiarỹle adee rarybereri Jiarỹle dori!
|
||
\v 9 Tai tahe wary-ò Deuxu tebó ritidire idi rarybere: — Boholake! Rybe adee retidireri idi marybekremy.
|
||
\v 10 Wiji heka ruruna adee rewahinyreri bede mahãdu ibutumy ikorenyhe arisỹnyreri, bede iòlò mahãdu ribi idireny beatykemy, idireny relekemy, idireny biwitxikremy, idireny beatykremy, idireny bidekremy. Myta risỹnyre.
|
||
\v 11 Tai Deuxu Tyhyhykỹ wadee rarybere: Aõbo tabiteri? Jiarỹ rirawyònyre: — Aõbo wiji tabiteri? Ówóru ruru heka Amedaó ruru heka rabireri
|
||
\v 12 Tahe Deuxu rarybere: — Obitihe tarybeteri Jeremia; jiarỹ tule warybe wesemy ariwinykremy.
|
||
\v 13 Deuxu Tyhyhykỹ ixybyle wadee rarybere: — Ijõ aõbo tabiteri? Jiarỹ rirawyònyre: — Herana rabòròbòrònyre ibóó-ò doosenanymy rabireri tahe rasỹna iworibi kaò rejujureri.
|
||
\v 14 Tai Deuxu Tyhyhykỹ rarybere: — Kohe. Ibòò ribi aõbina kanakre, tai ibutu kasu ibòòsỹdu mahãdu tyre-ò ritxiwikre.
|
||
\v 15 Ibutu ibòò mahãdu ka-ò ariteònykre kidirahurenykremy ibutu taiòlò sohojisohoji tarynana riderenykre hãwã ijòtòbóna txi riderenykre Jerusale ijòtòbòna txi. Jerusale uhukari-txi taiòlòreny idi raweruwerunykre tarunanareny riderenykre, Judá hãwã hãwã-ò taiòlòreny idi tarunanareny riderenykre.
|
||
\v 16 Taisỹdu mahãdu aõhõkỹmy arisỹnykre iòrarunareny òraruki, pbpna binareny òraruki. Riwarirernyreki surioko-ò xiwena riwahinyrenyre, reàlàrenyre, tatiwotimy reserenyre suritxoo-ò.
|
||
\v 17 Jeremia bexiywinyke, myike! Tahe warybe wesemy ibutumy adee ararybekre marybekremy. Aworexieryõmy ikoreny. Jiarỹ arawiòhenanykre brebuõmy matxikemy ikoreny-ki!
|
||
\v 18 Boholake, warybe! Kasỹdu mahãdu ibutumy teramy adee reakre, iòlò mahãdu, xiwena wahisidỹỹdu mahãdu, wedu mahãdu, ibutu ibutumy teramy reareakre. Katahe wiji ruruna-di ararurudỹỹnamyhỹre kia ibutu mahãdu ribi botakremy.
|
||
\v 19 Kai hãwã uhukari terehekỹ wesemy iribireny matxikremy. Tola womati terehekỹ wesemy matxikremy arasỹnyreri. Uhukari womati tere wesemy arasỹnyreri iribireny. Tiiboho aribi rotarenyõtyhy Jiarỹ awanahyymy ararekre arayrybynykremy dori. Jiarỹ Deuxu Tyhyhykỹ, rarybetyhyre dori.
|
||
\rem dat Terça-feira, 3 de outubro de 2017 12.55 – 13.48h.
|
||
\rem aut Jeremia Tyyriti - Tradução Borobe Karaja – Reside em Macaúba (Feminino)
|
||
\c 2
|
||
\s1 Israeli mahãdu óbiti aõkõ rare.
|
||
\p
|
||
\v 1 Deuxu Rybemy wadee nade:
|
||
\v 2 — Make Israeli mahãdu nõhõti-ò marybeke: “Wamahãdu, atỹmyrau araeryre òbitidumy tateu. Weryrybò hawyy wana rariamy bederahy-ò iwesemy tariamy wamy teàlàmyhỹte.
|
||
\v 3 Israeli mahãdu wahõrõ sohojile toimyhỹte lòbròna tỹmyra iwedele wesemy wadee toite. Ibutu arabinara mahãdu-ò aõhõkỹmy resỹnyre aõ binabina ityrereny reteònyre Jiarỹ. Jiarỹ Deuxu Tyhyhykỹ, rarybetyhyre dori.”
|
||
\s1 Israeli mahãdu labiereny òrarunamy.
|
||
\v 4 Boholabenyke! Jakò riokore mahãdu, Israeli mahãdu, Deuxu Tyhyhykỹ Rybemy boholabenyke
|
||
\v 5 Tii rarybereri: Aõherewe! Aõbo alabiereny wabina-ki raharenyre riwarirenykremy! Surioko-ò reàlàre tai surioko wesemy aõaõkõ rexidelerenyre dori!
|
||
\v 6 Tii boho riwabuarenyre dori! Ihỹre heka Ejitusu ribi Jiarỹle adidydenyde. Bederahy ribi inyõ tai rariaõmy hãwãlò ribi idireny rare.
|
||
\v 7 Suwihikỹ-ò redyrenyre lòbrònawihikỹ-di rirasỹrenyre ihỹrele heka tii boho suribinanyrenyre taòrarunarenydi.
|
||
\v 8 Wahisidỹỹdu mahãdu, Warybedu mahãdu tahe riwaijeõtyhy” Titxibohe Deuxu rare!” My rarybeõtyhy. Bede ywina kerydu mahãdu watxi tõhõti reaõre dori. Iwedu mahãdu riwabuarenyre. Baali suriokonimy irybedu mahãdu ridinodunyrenyre, surioko reálárenyre dori ihỹre heka isuriokoreny riwiòhenanyõtyhy.
|
||
\s1 Deuxumy Israeli mahãdu ibinamy rahare
|
||
\v 9 Deuxu Tyhyhykỹ rarybere: — “xybyle wamahãdu-ò ararybekre aribuakre alabiereny riwarirenyre dori. Jiarỹ Deuxu Tyhyhykỹle rarybereri.
|
||
\v 10 Xibere hãwã-ò boibenykre, keda hãwã-ò inyõ biteònyke tahe boholabenyke tiu aõ iwese rahõrõnyõhyyre iwese rahõrõnymyhỹre wese.
|
||
\v 11 Bede mahãdu tasurioko riwiurònyõtyhy iwitxira surioko-ò, surioko ruidu-ò idi rawiurònyõtyhy iwese wamyhãdu riwawiurònyre surioko-ò. Surioko idi riwiòhenanyrenyõre-ó riwawiurónyre.
|
||
\v 12 Biuwetyy ariramytatanykemy sõwemy aribrebunykremy Jiarỹ Deuxutyhyhykỹ wahe.
|
||
\v 13 Wamahãdu heka inatxi òraruna riwinyrenyre: Riwarirenyre ibesòròròreny wesemy tahe iwitxira-ò reuròrenyre suterehekỹ riakemy ihỹre heka ihãlooreny biu roakreu beereareakre dori.
|
||
\s1 Israeli mahãdu iòrarunareny òraruki.
|
||
\v 14 Deuxu Tyhyhykỹ rarybemyhỹre: — “Israeli mahãdu heka wetxumy aõkõ rare, wetxu rióre aõkõ rare. Tahe aõherekibo iòludureny iwedurenymy relera.
|
||
\v 15 Iòludureny Israeli mahãdu-ò hãlòe wesemy rawolohenymyhỹre riijiradỹỹnyrenyre tarurumy. Israeli mahãdusu heka sỹtybymy relera, ihãwãreny heka bóhónamy rỹyre tai inyIsraaeli inyõ rasỹnyõtyhy.
|
||
\v 16 Israeli mahãdurati risure iòludureny Mevi mahãdu, Tavine mahãdu Israeli mahãdu rati rade rahumy risyre iraxirihikỹ risyre.
|
||
\v 17 Aòrarureny òraruki Israeli mahãdu tuu rotỹỹnyre adeereny, aòrarureny òraruki dori. Adeuxu Tyhyhykỹ terite . Bedebrasaki awanareny rariamymyhỹreu awanareny redinodunyreu heka tewaritenyte.
|
||
\v 18 Beteheinyhe wiji! Aõbijeke Ejitu su-ò makre-ò. Nilo bero bemy biõkre aõbo. Aõbiòryke Asiriasu-ò. Eufarate bero bemy biõkre aõbo.
|
||
\v 19 Abinabinadilemy bexiwotõmonykemy; Tiwarite-ki binabinamy matxike. ADeuxumy terite, tetyhynyõte tai ixidewile heka abededỹỹnana ihyremy ratxikre. Jiarỹ Deuxutyhyhykỹ rarybereri.”
|
||
\s1 Israeli mahãdu Deuxu Tyhyhykỹmy reàlànyõtyhy.
|
||
\v 20 Deuxu rarybereri: “Israeli mahãdu, irehemy bede riere warybemy tewabuateri, warybemy tetyhynyõteri. Ihỹre hãwãlò tyre-ò surioko-ò xiwena tewahinymyhỹte. Òwóru ubòròna woki heka òtaòta tewinymyhỹte tasurioko-ò tuu tewinyte.
|
||
\v 21 Jiarỹ òwòruwihikỹ wesemy arawinyre, òwòruwihikỹ wesemy tahe wijihe òwòru binabina wesemy telete, aõ aõkõmy tate.
|
||
\v 22 Sabaõ-di sõwe sõwemy bexisuhokeki ihỹre heka aisuisumy itỹnyhỹkỹlemy rỹikre aixuixumy arobikre itỹnyhỹkỹlemy. Jiarỹle Deuxutyhyhykỹ rarybereri.
|
||
\v 23 Timybohe texixunyõtemy tarybemyhỹte. Timybo suriokomy teàlànyõtemy tarybemyhỹte. Beteheinyhe tewinyte bederahy-ò iwese heka kamelu hawyy tahãbu idi riwisỹnymyhỹre wesemy toite,
|
||
\v 24 Urile weru werumy tariamahãte tiu arahydynyõtyhy. Isiraõmy heka inyõ atxi rahakemy.
|
||
\v 25 Israeli mahãdu bexihãrubenyke awa kanaròheny rira sõwe sõwereki surioko òraruki. Bexihãrubenyke abòtò anarubuheny! Ihỹre heka tarybete inatyhy: — Aõkõre! Ixinamy! Waixidewimy surioko heki arariakemy, dori! wadee awire surioko!
|
||
\s1 Israeli òraruna òraruki aõhõkỹmydỹỹna
|
||
\v 26 Deuxutyhyhykỹ rarybereri: — Wasidu heka inyõ itxi reareu riixãrudỹỹnyre iwese heka aiòlòreny mahãdu, arybedu mahãdu, axiwena wahisidỹỹ mahãdu, awedureny mahãdu
|
||
\v 27 Tulesỹ surioko deàlàna mahãdu kanaixãrunykre, ibutumy òwòru-ò rarybemyhỹre myy: “Kai waha tate!” Mana-ò rarybemyhỹre myy:” Kai nadi tate” Kai boho tabromy ròkàsere taòsanamy wadee aõkõ. Aõhõkỹmy botỹỹnybenykreu tahe wadee kanarybebenykre arawiòhenanykremy aratarenykremy aõhõkỹmydỹỹnana ribile.
|
||
\v 28 Titxibohe asuriokoreny adeerenywimy tewinymytoite! Tii boho aõhõkỹmydỹỹnanareny ribi aratarenykre dori inatyhy! Ada irurureny ihõore aõbo aratarenykremy! Judá mahãdu asuriokoreny sõwere asõwerenyre wese!
|
||
\v 29 Adeereny adỹỹraxikre myy: Aõbo wabinamy waki tahamyhỹtenyte! Aõherekibo waderamy delemy teatemyhỹtenyte.
|
||
\v 30 Aõhõkỹmy resỹnyre tahe aõke aõkõ adeerenymy roire ixiweselemy toimyhỹte. Hãloe rebure wesemy toimỹhỹtenyte arybedu mahãdule terubunymyhỹtenyte.
|
||
\v 31 Boholabenykewa! Warybe-ò! Israeli mahãdu ibutumy! Jiarỹ heka subinabinamy wesemy adeereny aõbo rare! Tahe aõherekibo adewirenylemy biwinybenymyhỹkemy tarybemyhỹtenyte ixiby wadee booseõkemy tarybemyhỹtenyte, aõherabo!
|
||
\v 32 Ijadòma hãbumy roikremy tõhõ aõbo rusare! Tahe wamahãdu heka waribi rusare irehe rehe txudi.
|
||
\v 33 Ihỹre heka aderany mahãdu heki tariamyhỹtenyte uri wahe! Iny itxỹte mahãdu kiamy aheki kidierykre dori.
|
||
\v 34 Atykyreny heka hãwãdu mahãdu hãlubumy atykyreny-ki rỹire. Tiiboho heka asỹreny tiu ribinanyõtyhy. Ihỹrele heka wamahãdu rarybemyhỹre:
|
||
\v 35 “Jiarỹ aõ rewinyõra, Deuxu wadee rebureõre dori.” Katahe wiji jiarỹ Deuxu Tyhyhykỹ aõhõkỹmy ariteònykre kai ruimy tarybete inatyhy!
|
||
\v 36 Aõherekibo Israeli mahãdu ibinabinamy taohorete inyhe! Mytahe! iwese heka asiriá mahãdu arabinara iwese heka Ejitu arabinanykremy mytabo
|
||
\v 37 Lòtiròmy, ixỹrunadi arati-ki tebó roikremy Ejitu ribi idi bohònykremy. Kia mahãdu tetyhynymahỹte jiarỹ Deuxu Tyhyhykỹ taireny rebuare dori tiu Ejitu mahãdu wana awityhymy matxiõtyhy bohe.
|
||
\c 3
|
||
\s1 Israeli mahãdu òrarunamy
|
||
\p
|
||
\v 1 Deuxu rarybemyhỹre: — Hawyy tahãbu ririkre ijó hãbu-ò. Ihãbu tyby tii wanabixyby roiõtyhy. Kiakeki Israeli mahãdu tabededỹỹnanareny rixunykre. Taheka wamyhãdu atỹῖbiòwa sõwere hỹrele wadee bodoosekremy tewisỹnymyhỹtenyte dori!
|
||
\v 2 Beteheinyhe! Hãwãlò idi betehebenyke! Anosubotxi tabiranyõtenyte bohe! Derana wesemy òtataòtamy toite! Araeryrahe! Ryy-kile heka atximahãte wasidu wesemy inyõ riramyhỹre itxi beakremy. Kiawese heka Israelisu-ki texuxunyte, aõbinabina-di, aòtaòta-di aòraruna òraruki.
|
||
\v 3 Kia òraruki heka biu roaõmyhỹre. Beteheinyhe! Aderany wesemy tate! Ihỹrele heka aixỹruna ihõõtyhy aõhe inatyhy!
|
||
\v 4 Ihỹrele heka “wahamy” wadee tarybemahãte! Wahamy kai atxiteri! Uladu ribile waluu tate!
|
||
\v 5 Wahamy tateki tahe bedebureõtyhy wadee. Aõherewe! Israeli mahãdu wahamy tewaninimyhỹte ihỹrele heka aõbinabinahakỹ, òrarunahakỹmy idihyymy toite.
|
||
\s1 Aòraruna ribi bexiraohorekremy.
|
||
\v 6 Jeremia rarybere: Aõma Josia iòlò bedeu heka, Deuxu wadee narybede myy: — Kai aõbo tabimahãte aõbo Israeli mahãdu wadee riwinyre. Hawyy binabina wesemy tabròmy roosere wadee. Aderana wesemy heka hãwãlò hãwãlòmy idi raòwonyre, òwòru òworu-ò webrò-ò aderana wesemy rare.
|
||
\v 7 Taheka idi rahõtinyre Jiarỹ, “Kia rahudi heka tii wadee roosekremy tahe aõkõhyyre, rooseõtyhy.”
|
||
\v 8 Judámy iseriòreri tuu robire, Judá heka ibinabina rare wahe. Tii kiamy robire heka tai rieryre. Israeli Jiarỹ iribi reatyre tii heka aderana wesemy roire-ki wahe, tai iribi reatyre. Kiamy heka Judá rieryre Israeli reteònyra ki ihỹre heka
|
||
\v 9 Judá iseriòre binabina ruberuõtyhy raixỹruõtyhy tii tule aderanamy relera dori. Ibutu aõ reàlàmyroire, nanamy reàlàre, õworumy reàlàre my! Tii heka tasureny rixuxunyre heka
|
||
\v 10 Judá iseriòre Israeli binabinahãkỹ iratyre Judá heka urile ribonyre wadee roosekremy tahe ityhyõre. Jiarỹle, Deuxu Tyhyhykỹ rarybera dori.
|
||
\v 11 Idi tahe Deuxu Tyhyhykỹ wadee rarybere: — Israeli wadi reatyre ihỹre heka Israeli Judá iratyre.
|
||
\v 12 Tai jiarỹ arakremy riwateònyre ibòò-ò tamyreny rybemy myy: — Israeli bina bina mahãdu bodoosekre wadee. Jiarỹ heka Deuxu Tyhyhykỹle rarybemyhỹre! Jiarỹ awi rare, tai adeereny heka adebureõmy aratxikre, wayaranadi irehemy areaõkre ãdeereny. Jiarỹle, Deuxu tyhyhykỹmy rarybereri.
|
||
\v 13 Mytahe wiji manarybeke wadee myy: — Jiarỹ heka òraruna rewinyra, adee teramy reare dori ibutu aõ reàlàrenymy; òwòru webrò-ò, suriokomyle manarybekre wadee tewatyhynyõte dori ixinamy wadee iximy belyyke. Jiarỹ heka Deuxu Tyhyhykỹle rarybera dori.
|
||
\s1 Rexiharῖrenykremy Deuxu rarybemyhỹre.
|
||
\v 14 Deuxu Tyhyhykỹle heka rarybemyhỹre: — Bodoosebedenyke! Wamahãdu itxỹtehekỹ! Bodoosekre wadee! Wahõrõ toite dori! Jiarỹ heka iny sohoji sohoji hãwã ribi arimykre. Inatxi inatxi sohoji mahãdu ribi arimykre tai aradyrenykre ixyby Siaõ hãwã-ò.
|
||
\v 15 Taile inywedureny warybe deòbymy adeereny arisỹnykre, ywimy wedumy bedeery aradinodunyrenykremy.
|
||
\v 16 Asuureny-ki asõwerenyreu heka taile òwòrudỹỹ Deuxu tykyhetowo-ki rỹimyraremyhỹ bederahy-ki Deuxu-ò deàlànamy kia òwòrudỹỹ itxi õhõtireny beaõtyhy idi aõ matxiõtyhy ijõ biwinyõtyhy.
|
||
\v 17 Iribi tahe bededỹỹnana rehemynykreu Jerusale hãwã Deuxu Tyhyhykỹ runanahakỹ taile rỹikre, bede bede mahãdu heka tamy kidirahukre wanimy ributunyrenykremy. Iworeny bina bina ribi iraykyreny binabinareny ribi aõkõ riwinyrenykremy.
|
||
\v 18 Israeli mahãdu Judá mahãdu wana rexibutunyrenykre Ibòò-ò idi tahe wiwanamy rirahurenykre suu-ò talabièreny-o rewahinyra jiarỹ.
|
||
\s1 Surioko deàlànamy ixãwikemy
|
||
\v 19 Deuxu Tyhyhykỹ rarybemyhỹre: “Israeli mahãdu, wariòre wesemy areòbykremyra suwihikỹ ariwahinyrenykremyra. Wahamy biwaninikremy sỹny rahõtinyre tiu riwariõtyhy.
|
||
\v 20 Tahe hawyy ta hãbu rityhenyre wese heka tiwatyhynyte. Jiarỹ Tyhyhykỹlemy rarybererimy.”
|
||
\v 21 Hawãlo tyre ribi ibrumy roholamyhỹre. Israeli mahãdu rahinyrenyre taòrarunamy relyymyhỹre riixãwidinykremy, tahe ibinabinamy ryy òrarunamy idi roiremyhỹ, Deuxu txi tõhõti ririõmyhỹre.
|
||
\v 22 Bodoosebedenyke ibutumy, Deuxu Tyhyhykỹ teritenyte dori tii tahe abinanareny reytykre. kai boho tarybetenymãhãte: — Kohe! Deuxu-ò Tyhyhykỹ-ò roosemyhỹrenyre Tiile heka waDeuxureny raremy
|
||
\v 23 Jiarỹboho hãwãlò ratya-ki suriokoreny reàlàrenyre tahe tii boho aõ wadereny diwahinyõde. Inywidỹỹduhukỹ Deuxu sohojile heka raremy.
|
||
\v 24 Aõwihikỹ inytybyreny wadeereny ririra heka tahe wiji ituemyramyhỹre Baali Surioko ixỹrunahakỹle reàlàrenyre-ki tai tahe sõwe aõna onawihikỹ uladu ribile heka ijõdiremy rahurenyre dori mytahe; budoini, broreni, awaru, amelu,iròdu iròdu, ibutumy heka ituere, wariòrereny tule.
|
||
\v 25 Rekexirahirenykre heka waòrarunareny ribi, rakaixỹrurenymyhỹkremy. Ejitusu ribi Deuxu riwadyrenyre ribi heka, jiarỹ boho rexiòrarunymyhỹrenymyhỹmy, inytybyreny tule. Deuxu Tyhyhykỹmy rexiòbynyrenyõmahỹrenymy.
|
||
\c 4
|
||
\s1 Deuxu-ò roosekremy
|
||
\p
|
||
\v 1 Deuxu Tyhyhyhỹ rarybereri: — Israeli mahãdu wadee bodosekre. Surioko ibinare wamyxiburare surioko ribi ixãwike wamy sohojile beàlàkemy.
|
||
\v 2 Tai dori wanimy marybekeki òbitimy matxikre. Ibutu bede mahãdu wamy reixitòenyrenykreu heka deysanamy ariwahinykremy tai wamy reàlàrenykre.
|
||
\v 3 Judá hãbu mahãdu Jerusalẽ hãbu mahãdu-ò Deuxu rarybereri: — Su lòbrònamy rexiywinyõre heka biabenyke hede-txi lòbròna itxiwixiõmy.
|
||
\v 4 Judá mahãdu Jerusalẽ mahãdu juhule wauwana tetobinyte wesemy òbitimy matxike Deuxu Tyhyhykỹ-ò awotyhy ribile wahe. Kiaõkeki tahe wayarana heòty wesemy riworonykremy. Aõbina bina òraruki heka wayarana heòty wesemy rookremy tiu iny rityrinyõtyhy.
|
||
\s1 Iny itxi reakremyra
|
||
\v 5 Juròna bujurònybenyke iteremy, byrybenykre itỹnỹlemy: Judá mahãdu Jerusalẽ mahãdu-ò hãwã òtity-di roimyhỹre-ò ijirany raòrunyrenykre.
|
||
\v 6 Siaõ ryy-ò biteòsinybenyke bexiijebenyke wylemy ibòò ribi dori Deuxu kidetehemykre aõbina binamy iny rahukremy.
|
||
\v 7 Hãlòe rebure wesemy bede mahãdu hududumy rarerimy. Judá hãwã hãwã mahãdu rahukre tusỹdu mahãdu rabynykre.
|
||
\v 8 Wijihe tyybina bina idi bexityynybenykre tyky bedewona wahe bexityynybenykre mahenybenykremy, bobubenykremy wahe Deuxu yarana dori judà-ò kanakre.
|
||
\v 9 Deuxu tyhyhykỹ rarybere: — Iu heka judá wedu mahãdu iòlò mahãdu heka irurunareny ituerenykre xiwena wahisidỹỹdu bohoruberurenykre rybedu mahãdu bederiòtinyrerenykre.
|
||
\v 10 Tai jiarỹ he rarybere: — DeuxuTyhyhykỹ Jerusalẽ mahãdu heka teitxenanyte! Kai tarybete ywinamy bedemy kanyikre tahe aõkõrehe mayrehe iny bòtò-ki rỹimyhỹre wahe.
|
||
\v 11 Jerusalẽ mahãdu-ò kanarybekremy, iu bederahy ribi yhy tòtèèhe Deuxu mahãdu-ò kanakremy ratxireri tai heka yhy reburele alòbròna idi rihitxinykremy asibinaty ribi aõbo.
|
||
\v 12 Kia yhy rebure Deuxule riteònykre heka rebure sõwe sõwemy rarekre. Wijihe Deuxule tamahãdu-ò tarybe ritadireri judá mahãdu-ò itxi reakre.
|
||
\s1 Judá-ò itxi reakremy
|
||
\v 13 Beteheinyhe biuwetyy wesemy aõbina òludu mahãdumy tahe roireri rebure wesemy doidenyde rebure wesemy roire. Hire ijira ratyre iawarureny, aõherewe iny rahukre! aõherewe iny rabynykremy ratxireri!
|
||
\v 14 Jerusalẽ mahãdu aõbina bina ribi aworeny bisuhoke aõbohe! Tarasamy matxikemy. Arayky-ki aõbina bina aõbo ratxikre.
|
||
\v 15 Dã hãwã mahãdu Efraim hãwãlò mahãdu iny itxi reakemy irybe urena dehemyny aõbina binamy.
|
||
\v 16 Tiiboho irybe urena rearearenyre iny òludureny Jerusalẽ-ò raryberenymy roire heka òludu mahãdu heka irehe ribi kàdirahukremy rawyhyrarònymyhỹkre. Kaò hãwã-ò itxi rearenykremy rarybemyhỹrenyre dori,
|
||
\v 17 Lòbròna iny idi rirurawonykre runymyhyre wese heka tii boho Jerusalẽ idi rirurawonykremy iny mahãdu heka Deuxu Tyhyhykỹ rerirenyre dori.
|
||
\v 18 Judá mahãdu kaile kaa bina binamy ixidewimy tewyta dori Jerusalẽ mahãdu bina bina òraruki bedewona ixidee riwahinyre.
|
||
\v 19 Aki! ramytxitxi nihiyre dori tuu ariòbynyõtyhy wawoki ramytxitxi nihiỹre dori! Wawohe ramytatare sõwemy! òludu mahãdu juròna rawyhyraròmy raholareri tahe rybeõmy aõkõ aratxikremy!
|
||
\v 20 Aõbina binahakỹ aõweselemy rehemynyreri! Tahaka kasu rahuke! aõhere aõwesele iny tyy heto rahukremy ratxireri iny tykyreny iere eremy riykaykamyhỹ.
|
||
\v 21 Tiwese sõwemy iny òludureny deòsinamy arobikremy watxireri. Tiwese sõwe heka inyòludu jurònamy aroholakremy watxireri.
|
||
\v 22 Deuxu rarybemyhỹre: wamahãdu itxỹtehe rare riwaeryõre dori. Waladu bedeõre weselemy roire aõbina binamy rierymyhỹre hỹre òbitimy riwinyõre,
|
||
\s1 Bede hudunamy rỹikre
|
||
\v 23 Idi tahe bede-ò retehereri taile òbitina ihõõre, iruna ihõõre biu-ò lòòsòna ihõõre tai.
|
||
\v 24 hãwãlò ramytatamy roimyhỹre bederatòò heka idi rawori worinymyhỹre kua-o kakò.
|
||
\v 25 Inyõ bede-ki roikõre nawii rihenyrenyre dori tule
|
||
\v 26 bede wihikỹmy rabire suu-ki aõ ijõõmy roire hãwã hãwã heka ituerenyre dori Deuxu idi bede rirahoremy rewinyre tayarana òraruki.
|
||
\v 27 Deuxu rarybere su bybymy relekremy ratxikre ibutumy itueõkre tahe
|
||
\v 28 bede kodubukremy biu wetyy heka rurunykre Deuxule rarybere dori raraohoreõtyhy irayky.
|
||
\v 29 Wyhydu mahãdu wodỹỹ boholabenykeu iawaru ijiranamy roholarenykeu inyõ mahãdu bederahy-ò reareakre. Hãwãlò-ò raowònyrenykre mana manahakỹ-ò. Hãwã hãwã iny tai rasỹ nyõkre dori.
|
||
\v 30 Aõherekibo Jerusalẽ mahãdu tiukekõna atykysòbina binamy texityynyte dori tykysò-di texityynyte, arue teyrinyte, arysòna, aõna õna wihikỹ-di texiywinyte? Tahe aõkõre heka ruxeramy aõkõmy matxikre! Aruxera aõkõmy tate! Abirena mahãdu heka aribuarenyre ararubunykremy riwisỹnyrenyre dori.
|
||
\v 31 Tahe raholare hawyy ramytxitxire wese ibru-ò raholare. Iriòre dela rimytxitxidỹỹnyre wese ibru raholare. Tahe Jerusalẽ mahãdu raelenymy roire tebò relerenymy roiremyhỹ rarybemyhỹre: — Arurukre! Riwarubunykre dirahudenude!
|
||
\c 5
|
||
\s1 Jerusalẽ òrarunamy
|
||
\p
|
||
\v 1 Jerusalẽ mahãdu ryy-ò bijekebenyke! Ibutumy bede bedemy bijebenyke! Aruerenydile bijebenyke! Iny òbitityhymy mahabeny kemy. Inytyhymy biòryke. Itxi mahabenykeki tahe Jerusalẽ òrarunamy Deuxu riixãwidinyke.
|
||
\v 2 Deuxunimy tarybete hỹre òbitimy tawo-ribi aõkõ tate!
|
||
\v 3 Tikiemy bityhynykremy Deuxu tuu riwisỹnymyhỹre aõhõkỹmy arasỹnyrenyre ihỹre heka adeereny aõke aõkõ. Deuxu arasurusurunyrenyre ihỹre heka teòbitiõtenyte itxỹterenymy toite Deuxu-ò tooseõhyytenyte.
|
||
\v 4 Tai jiarỹ rahõtinyre: “bedeeryõ mahãdule toimahãtenyte Deuxudewimy riwinykremy teeryõmahãtemy, tule Deuxu dewinamy teeryõtenyte.
|
||
\v 5 Hãbu bedeery mahãdu òbityhy-ò arijekre tamyreny ararybekre tiiboho Deuxumy rieryrenyre, timybo Deuxudewimy riwinykremy rieryrenykre òsỹny.” Tahe aõkõre, ibutumy Deuxu ribuarenyre rityhynyõtyhy.
|
||
\v 6 Tai haloe bederahu ribi kidirubunyrenykre iere ereny rioroororenykre ahula rexiwomy hãwã hãwã itxi reakremy hãwã ribi rohonykeki iere eremy rurukre iròdudòmy aòrarunareny sõwere dori Deuxu-ò teritenyte.
|
||
\v 7 Aõherekibo aòrarunareny araixãwididỹỹnykre, wamahãdu dori riwarirenyre suriokomy raryberenyre kia Deuxu aõ aõkõ rare, Wamahãduhe reòwenyre tii boho rihydyrenyre Jiarỹ.My tahe òta òtamy riwinyrenyre, aderana wana ratxirenyre.
|
||
\v 8 Awaru rihydymyhỹre wesemy roirenyre tawidỹỹnarenymy. Isỹweraludu hawyy hemy roirenyre.
|
||
\v 9 Tahe aõhõkymy arisyỹõkre aõbõ? kiamy riwinyrenyre dori ariòwynyõkre aõbõ? Bede mahãdu-ò kiamy riwinyre òrariki ariòwynyõkre aõbõ?
|
||
\v 10 Iòludu mahãdu-ò ararybekre ilòbrònareny idi rahukremy. Mytahe ibutu idi rehukre aõkõ uvaò irurule idi risiherenykre. Kia uvaò dori wahõrõmy aõkõ rare.
|
||
\v 11 Israeli mahãdu, judá mahãdu itỹnylemy riwatyherenyre Jiarỹ Deuxu Tyhyhykỹmy rarybereri Israeli mahãdu heka Deuxu ribuare.
|
||
\v 12 Israeli mahãdu rexiryberenyre myy: — Aõ rotỹỹnyõke Deuxu Tyhyhykỹ tuu riwinyõkre, alòremy ihõõke, rama riwarubunyke aõkõ.
|
||
\v 13 Wyhy wesele heka rybedu mahãdu rybemy rare irybereny aõ aõkõ heka rare. Deuxu Rybemy aõkõhe rare.
|
||
\v 14 Deuxu Tyhyhykỹ wadee narybede: — Jeremia, Jiarỹ adee ararybekre aõhebo rotỹỹnykre kiamy rarybemyhỹre mahãdu-ò. Mytahe, ary ribile heka warybe heòty wesemy reare reakremy j Jiarỹ ariwinykre warybe heòty wesemy ary-ò arisỹnykre. Israeli mahãdu hee wesemy rookremy.
|
||
\v 15 Israel mahãdu Deuxu Tyhyhykỹ rybe-ò boholake! — Jiarỹ Tyhyhykỹ heka su witxira ribi rurudu mahãdu adiwyke atxireny reakremy, irybereny iwitxiramy raryberenykre kai boho irybereny teeryõte.
|
||
\v 16 Kia mahãdu heka isodadureny teburere, aõwesele tawyhyrenydi iny rirubunymyhỹre aõwesele,
|
||
\v 17 Tiiboho heka alòbrònareny rahurenykre ariòrereny kidirubunyrenykre abrorenireny õhõreny kidirubunyrenykre auvaòreny rahurenykremy ahãwãreny òtity isodadureny ribòhòbòhònykre aòtityreny iruruteremy idi tahõtinymãhãtenyte heka reatykre dori.
|
||
\v 18 Ihỹre heka Israel mahãdu ibutu aõkõ arahukre Jiarỹ Deuxu Tyhyhykỹ raybereri.
|
||
\v 19 Iu Israeli mahãdu, Jeremia, adee rỹỹraxikreu, aõherekibo Deuxu kiamy rewinyre. Kai Jeremia tamyreny marybekre: — asureny-kile surioko teàlàtenyte, Deuxu teritenyte tai dori wijihe suu iwitxira-ò suriokomy beàlàbenyke.
|
||
\s1 Deuxu tamahãdu-ò ribedeerynanymyhỹre.
|
||
\v 20 Deuxu rarybemyhỹre: — Jaò riokore mahãdu-ò, Juda-ò marybekre:
|
||
\v 21 — Boholabenyke itxỹtereny mahãdu, kaiboho heka, aruerenydi hỹre heka tabiõmãhãtenyte õhõtireny-di ihỹre heka taholaõmahãtenyte.
|
||
\v 22 Jiarỹ Deuxu Tyhyhykỹ rare aõherekibo warybemy tetyhynyõmahãtenyte? Aõherekibo walau taberuõmahãtenyte. Jiarỹle ỹnyramy, berohòkỹ-ki rewinyra, bera rariaõlemy ỹnyramy resỹnyra berohòkỹ-ò, abònihiỹ idi rariaõtyhy. Jiarỹle tuu rewinyre dori!
|
||
\v 23 Ihỹre heka Israel mahãdu itxỹtemy toite waderamy rare wadi teramy teatenyte.
|
||
\v 24 Kaiboho aworeny ribi tarybeõmahãtenyte: — Deuxu Tyhyhykỹ-ò rikityhynyrenyke tii heka bede hetximy, bede riramy riwinyre dori. Deuxu-ò rekeàlàrenykre iòrarukile òwòru ruhunyre dori beòra beòramy.
|
||
\v 25 Ta aõkõ ihỹre aòrarurenydile heka abinabinarenydi aribireny aõwiwihỹ aribireny rihitxinyrenyre dori.
|
||
\v 26 Iny binabina wamahãdureny yki bòtòwe heto wese roimyhỹrehe nawii rimykrremy, tahe inyle tiiboho rimyrenykremy riwisỹnymyhỹre.
|
||
\v 27 Iwese bòtòwe heto nawii roimyhỹre iwese heka kia hãbu mahãdu ihetoreny-ki aõna õna wasimy sõwere tai. Tiiboho heka ruruduhukỹmy, hãbu ityhymy roire iaõnaõnareny wasi-di ratyhynyrenyre dori.
|
||
\v 28 Tiiboho heka idenihiỹmy roire, rama rihydyrenyre, tiibohohe hãwãdu mahadu riwiòhenanyõtyhy.
|
||
\v 29 Tahe kia òraruki heka tamyreny aõhõkỹmy arisỹnyke, sraeli mahãduhe ariòwynykre. Jiarỹhe Deuxu Tyhyhykỹmy rarybemyhỹre.
|
||
\v 30 Aõbina binahakỹmy bede-ki rỹire:
|
||
\v 31 Deuxu rybedu mahãdu inatyhyna rybemy rarybeõmyhỹrenyre, hãbu binabinareny idireny ridinodunyrenyre. Idinodureny wesemy rarybemyhỹrenyre tahe Israeli mahãdu awimy tai rahamahare dori! Tahe aõbohe riwinyrenykre ionana txuu, aõhebo kodotỹỹnykre.
|
||
\c 6
|
||
\s1 Jerusalẽ hãwã òludu mahãdu rirurawonyre.
|
||
\p
|
||
\v 1 Benjami mahãdu hena-ò bihenybenyke Tekoa hãwã txuròna bijurobenyke bibedeerynanybenyke Bete Ara Hãwã-ki aõbina binahakỹ dori kedeakre ibòò ribi.
|
||
\v 2 Jerusalẽ hãwã wikikỹtyhyre iòhòlemy iby tõmore.
|
||
\v 3 Iòlò mahãdu tasodadureny hãwã idi rirurawonyrenykre tasodadureny tai tawelòreny ridekre ixidewimy.
|
||
\v 4 Tiiboho raryberenykre: — Roikoreny hãwã-ò itxi reakremy bexiywinybenyke txutue-ò rekearenykre.
|
||
\v 5 Iu tahe raryberenykre: — Kõrehe wiji bede tururenymy hỹre tahe bexiywinybenyke wiji ruumy heka tamyreny rekekoarenyke Jerusalẽ hãwã-o.
|
||
\v 6 Deuxu Tyhyhykỹ dori iòlò mahãdu-ò rarybere òwòru biorobenykre òwòna biwinykre Jerusalẽ hãwã beabenykremy. Jiarỹ kia hãwã aõhõkỹmy arisỹnykre inybinahakỹ sõwe ijõdire tai.
|
||
\v 7 Jerusalẽ hãwã iwese haloobemy bee iribi reare iwese heka Jerusalẽ ribi òraruna rexijuare. Aõbina binamy rarybehyymy binana sõwemy wotõmona sõwere tai.
|
||
\v 8 Jerusalẽ mahãdu, boholabenykewa! Arabedeerynanymyhỹre dori! Bierybenykre! Ararirenykre heny ka hãwã bymy reakremy dori! Ariwinykrehe, taile moõ rasỹnyõkre òraruna oraruki.
|
||
\s1 Òraruna òraruki aõhõkỹmy rotỹỹnyke.
|
||
\v 9 Deuxu Tyhyhykỹ, wadee rarybere: — Israeli mahãdu iny hãwã: ribi rabynykre: iwese òwòru inatxi risihere wese idi iratyõmy rỹire iwesemy hãwã ratxikre. Lòbròdỹỹdu tauva risiherisihe wesemy kahãwãsỹdu mahãdu kai bitake.
|
||
\v 10 Tai jiarỹ rarybere moobo ararybekre? Ararybekeki inyõ warybe-ò roholaõtyhy. Tiiboho boho tõhõtireny ritòbònyrenyre roholaõkemy. Arybe-o roholaõmy arybemy ribuarenyre dori.
|
||
\v 11 Deuxu Tyhyhykỹ aykarana wawo idi rỹxire wawo-ki iutxiemy aykarana-di rỹxire wawoki. Reysemy rỹire jiaỹ ayarana di rỹireri dori. Tai Deuxu rarybere: — Ixinamy uladu mahãdu tyre-ò idi behyke wayarana-di ixinamy weryrybò mahãdu tyre idi behuke. Hãbu tule hawyy wana ròtena-ò ridyrenykre, matuari mahãdu tule hekỹ.
|
||
\v 12 Hetoreny rarikre inyõ tai rasỹnykremy, isureny, ihawyreny inyõ tai rarikre. Kahãwã-ò aõhõkỹmy arisynykre dori. Jiarỹ deuxu Tyhyhykỹlemy rarybemyhỹre.
|
||
\v 13 Ka ibutu ityhy mahãdu òbitimy aõkõ nierumy rimyreri dori xiwena wahisidỹỹdu rybedu mahãdu wana inyõ riitxenanymyhỹre.
|
||
\v 14 Iny wotõmona aõke aõkõ rare awire riki raryberenyre tahe awi aõkõ rare ibinamy roire.
|
||
\v 15 Tiiboho heka ibina binarenydi aõbõ riixãrydỹỹrenyre aõbõ? Wadee ibinatyhyre. Tiiboho kiamy idi rixãrynyrenyre aõbõ? Ixãruna rieryõrenyre tai resekre dori, iwese inyõ mahãdu resemyhỹrenyre, iu aõhõkỹmy aresỹnykreu heka bedewotyhy roikre dori. Jiarỹ heka Deuxu Tyhyhykỹ, rarybere,
|
||
\s1 Deuxury Israeli mahãdu ribuamyhỹre.
|
||
\v 16 Deuxu Tyhyhykỹ tamahãdu-ò rarybere: — Boibenykre ry òweòwe-ò tai matxibenykre idi betehebenyke idi ryy òbitile idi mariabenykre tai ywinamy mahabenykre. Tahe tiiboho raryberenyre: — Kõre kia rydi aõkõ aroirenykre.
|
||
\v 17 Tulesỹ, itxeredu mahãdu Deuxu risỹnyre jurona wodỹỹ rieryrenykremy ihỹre heka itxeredu mahãdu raryberenyre: — Aõkõrehe, aroholaõtyhy.
|
||
\v 18 Tai Deuxu rarybere: — Bede mahãdu boholabenyke aõbõ rotỹỹnykre wamahãdu-ò.
|
||
\v 19 Aõbina binahakỹ arisỹnykre warybe-ò riòbynyõre dori. Tai kia bina binamy ariteònykre warybe òby aõkõmy toite warybe ribuare dori.
|
||
\v 20 Tahe wadee lỹrena Sabá hãwã irehe ribi dirahudenyde heka awiõre wadee. Ixiwenareny riwateysaõtyhy dori.
|
||
\v 21 Jiarỹ heka Deuxu Tyhyhykỹ iwareny rotynykremy ariwinykre dori. Tiiboho tai reserenykremy ariwinykre heka. Tyby boho, iriòrereny, rururenykre, ibiòwareny isỹwera ludu mahadu tule.
|
||
\s1 Òludu mahãdu ibòò ribi dirahumyhỹde.
|
||
\v 22 Inyõ mahãdu irehe ribi kidirahukremy rurudu hukỹ rexiywinymy roireri kaò lòrenymy kanakremy.
|
||
\v 23 Tiiboho xiwahate-di wyhy-di maurehe-di tebònarenymy roire. Tiiboho ibinatyhyre iawarureny wodỹỹ reareri, rexiywinyrenyre Jerusalẽ mahãdu rirubunykremy.
|
||
\v 24 Kia rybemy reareri heka Jerusalê rarybemyhỹre tai Israeli mahãdu tebòreny iruru ituere, brebule rimyrenyre, hawyy ramytxitxi brebu wesemy ranywahãrenyrehe.
|
||
\v 25 Jiarỹ boho bederahy-ò ryy ribile aroirenyõtyhy ruberure riki. Iny oludureny heka rexiywinymy rỹireriiny rahukremy riki bede bedemy brebu ijõdire riki raryberenyre.
|
||
\v 26 Deuxu rarybemyhỹre tamahãdu-ò: Bobubenykrewa, ariòre delareny rurure wese heka mahinybenykewa, tyky bina binamy bexitykynybenyke. Bryby tyre-ki boike aõwesele heka hududumy reakre hiwa!
|
||
\v 27 Jeremia, wamahãdumy biurihikre iwese womati raweseru serunyre wese heka Jerusalê mahãdu biurihikre idi betehewiwikre timybo roimyhỹre.
|
||
\v 28 Tiiboho rybe dera mahãdu itxỹterenyre dori rybe rui idile riubỹtỹnyrenyre. Ibutumy womati tỹrỹhỹkỹ heòty raweseru serunyre wese heka wamahãdu tiu rityranỹõtyhy.
|
||
\v 29 Heòty itòtèètyhy womati urahakỹ idi raweseru serunyre wese heka wamahãdu tiu rityranỹõtyhy. Iwese taòraruna ribi rexitaõtyhy inybina bina ribi iny òbiti rexitaõtyhy.
|
||
\v 30 Iny bina mahãdu womati tỹrỹhỹkỹhakỹ ibinatyhymy raninikre Jiarỹ Tyhyhykỹ dori idireny ribuare.
|
||
\c 7
|
||
\s1 Xiwena heto-ki Jeremia runymyhỹre.
|
||
\p
|
||
\v 1-3 Xiwena ijòtòbòna heto-ò Deuxu riwateònyre taile Deuxu rybe-ò ararybekremy Judà mahãdu rirahu rirahumy deàlànamy. Tai aratxikremy riwateònyre rybe-di myy: — Abededỹỹnanareny myy rybemy roire: — Maohorebenyke! Tai kasu-ki ixinamy masỹnybeny kemy.
|
||
\v 4 Tahe rybe ruimy ityhydỹỹõ mãhãbenyke. Tahe tiiboho myy rexiryberenyreri: kaa heka Deuxu Tyhyhykỹ xiwena heto-ki inyboho rỹireri. Tahe aõhe rotỹỹnyõtyhy inydereny! Awilemy kaki Ixỹ rỹire. Kaa heka Deuxu xiwena hetohe rare! Kaa heka Deuxu xiwena hetohe rare! Kaa heka Deuxu xiwena hetohe rare!
|
||
\v 5-6 Abededỹỹnanareny maohorebenyke! Iwitxira biwinybenyke! Òbitimy wiwanalemy matxibenyke mahãmy! Aõ aõkõ mahãdu ibinamy idi matxiõbenyke, wyte mahãdu, wytese mahãdumy awimy biwinybenyke! Kasudi riradu mahãdu-ò awimy matxibenyke! Inyõ irubudỹỹõmyke! Suriokode deàlàna abinamy heka ixawike! Atuereny heny!
|
||
\v 7 Araykyreny birahaorebenykeki tahe ixinamy awilemy kaki masỹnybenyke alabiereny kasu rewahinyra heka kakile masỹnybenykemy.
|
||
\v 8 Beteheinyhe! Rybe ruile tetyhynymy mahãtenyte dori kia rybe aõ aõkõ heka rare tetyhyny mahãtenyte.
|
||
\v 9 Kakile heka inyõ terubenymãhãtenyte, inyõ tewasinymãhãtenyte, òta òtamy tewinymãhãtenyte, taruimãhãtenyte awidỹỹna òraruki, awidỹỹnarenymy wasimyreny tarybemãhãtenyte, Baali surioko xiwenamy tewahinymãhãtenyte. Surioko juhu teeryõtenyte heka wiji dori teàlàmãhãtenyte dori!
|
||
\v 10 Tyky bina binamy tewinymãhãtenyte atyky bina-di waxiwena heto wako-ò tanymãhãtenyte idi tarybemãhãtenyte: “ Aõ inydereny rotỹỹnyõtyhy inydereny, awilemy ixỹ rỹireri!”
|
||
\v 11 Waheto heka wasidu mahãdu heto aõbo rare tahõtinymahãtenyte aõbo? Aõbo tewinỹmãhãte Jiarỹ rabiwahỹre, Deuxu Tyhyhykỹmy Jiarỹhe rarybereri.
|
||
\v 12 Silò hãwã heka juhule Jiarỹ retare tai xiwenamy wadee biwahinykremy, myta itxeremy boibenykre! Aõbo rewinyre tai wamahãdu òraruna òraru-ki wahe!
|
||
\v 13 Sõwe heka óraruna tewinymahãtenyte, kiamyadeereny rarybere jiarỹ. Sõwemy idi arabederynanyrenre tahe warybemy taholaõmãhãtenyte. Adeereny rarybere uritrele taholaõmãhãtenyte. Jiarỹ heka Deuxu Tyhyhykỹ heka rarybereri.
|
||
\v 14 Tai heka iwesele Silò hãwã rewinyre heka ka xiwena heto texityhynymãhãtenyte-ki iwesele ariwinykre Silò hãwã wesehekỹ ariwinykre ka heto-ò ariwinykremy watxireri. Ka heto Jiarỹle alabiereny-ò rewahinyre dori.
|
||
\v 15 Katahe wiji arateònyrenykre waribi. Amahãdureny arateònyre ibòò mahãdu wesemynarateònyrenykre waribi.
|
||
\s1 Deuxu rybemy riòbynyõmỹhỹre
|
||
\v 16 Deuxu rarybere: — Jeremia ka mahãdu-ò idi ixitèdỹỹõmy. Wadi ixitòedỹỹõmy aixitòedỹỹnanamy aroholaõtyhy.
|
||
\v 17 Kai aõbo tabiõmãhãte Jerusalẽ hãwã-kiJuda hãwã-ki aõbo tiiboho rwinymyhỹrenyre tabiõmahãte aõbo.
|
||
\v 18 Uladu mahãdu heitxemy rirahumyhỹrenyre. Hãbu mahãdu heka heòty rioronymyhỹrenyre surioko-ò. Hawyy mahãdu bolu raheranymyhỹrenyre surioko-ò hawyymy “Biu wedumy” raninirenyremy. Tulesỹ ijõ isuriokoreny tamonareny ritxiwitxiwimyhỹrenyre ixiwenamy idi riwaixiranymyhỹre.
|
||
\v 19 Tiiboho wadi aõbo ribinamyhỹrenyre? Kõrehe. Tiiboho rexibinanymyhỹrenyredori tule kiamyhe rarybereri rexixãrumyhỹrenykmy rarybererire dori.
|
||
\v 20 Katahe wiji Jiarỹ heka Inynyrỹ Tyhyhykỹ heka wakyaranamy aritxiwikremy watxireri dorihe! Ibutu tyre-ò, nawii-ò, iròdu-ò, òwòru-ò, lòbròna-ò. Wijihe wadeburenamy aritrònykre dori. Wayarana heòty wesemy rookremy tiu inyõ rityrinyõtyhy.
|
||
\v 21 Xiwena risõtyhyre wadee rare. Tahe wadee kia aõ aõkõ heka rare. Ibutmy kia xiwenamy ibutumy biroxibenykremy, kaibohole warybe wesemy tewinyõtenyte dorihe.
|
||
\v 22 Ejitu ribi aradyrenyreu heka adeereny rarybeõre aõbo aõ xiwenamy risõtyhyrenykremy. Tahe wadee tuu aõkõ tewinymahãtenyte dori. Xiwenamy timybo risõkemy retadire Jiarỹ, aratohonyre juhuu.
|
||
\v 23 Warybe òby tamyreny rarybera Jiarỹ iwedurenymy rarekremy, riwatyhynyrenyke-ki tahe awimy ratximyhỹrenykremy.
|
||
\v 24 Tamy awilemy rewinyre awityhymy ratxikemy tahe warybe wesemy riwinyõrenyre. Awimy aõkõriwinyrenyre ierena ibinamy riwinyrenyre.
|
||
\v 25 Juhule heka adeereny rarybere Ejitu ribi alabiereny idireny rare rarybere tahe warybemy trityhynyõrenyre dori. Warybedu mahãdu reteònymyhỹre.
|
||
\v 26 Ihỹrele roholaõhyy taraykyreny wesemy iworeny teremy raoimyhỹrenyre tahe wiji kai boho alabiereny warybe-ò roholaõre rityhynyrenyõre heka kaiboho tahe wiji umyreny ararybekre aòrarunareny ditxỹxinydenyde alabiereny ratyre.
|
||
\v 27 Tai Jeremia arybe-ò roholaõmyhỹrenykre, kai tamyreny byrykremy tahe arybe-ò rirawyònyõhyyrenykre.
|
||
\v 28 Kai tamyreny marybeke tiiboho warybemy roholaõhyymyhỹrenyre iDeuxu Tyhyhykỹ. Tiiboho rybemy deòby aõkõ raremy tamyreny marybekre.
|
||
\s1 Suritxoo deàlàna òraruna òraruki.
|
||
\v 29 Ijõ heka deuxu rarybere: — Bobubenykre, mahinybenykre Jerusalẽ mahãdu, aradereny bisubenykre idi behukre. Hãwãlò tya-ò bedewona wiunamy mawiunybenykremy. Jiarỹ Tyhyhykỹ wayarana òraruki wamahãdu ararirenyre dori.
|
||
\v 30 Judá mahãdu ibina riwinyre waxiwena heto-ki isuriokoreny tai risỹnyre idi waheto-ki rixunyrenyre dori, surioko ibinabinamy wadee rare. Jiarỹ Deuxu Tyhyhykỹle rarybemyhỹyre.
|
||
\v 31 Tobete su-ò tiiboho xiwena riwinyrenyre tai tariòrereny rirubunymyhỹrenyre surioko-ò risõmyhỹrenyre. Kia warybe aõkõ heka rare. Tuu retidiõre Jiarỹ.
|
||
\v 32 Tiu txumy heka kia Tobetesu aõkõmy raninikre dori tahe rubunasumyle raninirenykre tai. Bede roimy rarekre heka tiu Tobetesu iny rieryõkremy ihỹre tai inyõ rituunykremy itxi rahaõrenyke titxibo rituunykemy.
|
||
\v 33 Tai heka nawiidò sumy relekre iròdudòmy tule.
|
||
\v 34 Bede rabynykremy ratxikre. Iu heka deysana, wyhyrarònamy ituekremy ibutu aõ deysanamy rahukremy, rybewimy, ajuwe ibutu ibutu deysanamy rahukremy ariwinykre dorihe.
|
||
\c 8
|
||
\p
|
||
\v 1 Kia bedeu heka Jerusalẽ wabede-ò riakre iòlò mahãdu heka ititybyreny ritakre, xiwena wahisidỹỹdu ititybyreny ritakre, tulesỹ Judá wedu mahãdu, rybedu mahãdu, isỹdu mahãdu ititybyreny ritakre. Jiarỹ Deuxu Tyhyhykỹle rarybemyhỹre dori.
|
||
\v 2 Ititybyreny heka raybỹtynyrenykre txu itòtèè-ò, ahãdura-ò, taina-ò kia iluurenyre dori, reàlàrenyre dori, tamyreny ritỹỹraxirenyre dori. Kia ititybyreny tiu idi riariõtyhy, rituunyõtyhy taile heka sukile ituerenykre riuriurikremy.
|
||
\v 3 Iriokorereny heka bededemy Jiarỹ idireny raybỹtỹnyrenykremy tiiboho rururenykremy idi riwisỹnyrenykre. Jiarỹ, Tyhyhykỹ, Ruruduhukỹ, rarybereri.
|
||
\s1 Aõhõkỹmydỹỹnana òraruna òraruki.
|
||
\v 4 Deuxu Tyhyhykỹ tamãhãdureny-ò ararybekremy wadee rarybere: — Inyõ resemyhỹreu heka ixyby rỹiõmy aõbo? Inyõ Ryy reòsareu ròoseõre rexiobitinykremy?
|
||
\v 5 Aõherekibo wamahãdu tabròmy wadee rỹira? Aõherewe waribi irehemy tariamyhỹtenyta? Aòrarunareny-di teximymytenyte tahe wadee dòoseõhyytenyte dori.
|
||
\v 6 Ywimy adireny raholare tahe ihỹre heka inatynamy tarybeõhyytenyte dori. Abinabinareny-di tabedewoõmyhỹtenyte. Moõ rarybeõra:”aõibinamy rewinyra? Iny tarayky hekile heka riijiranyrenyre awaru alòre-ò riijiranymyhỹre wesemy.
|
||
\v 7 Bòtòè, wyrarè, nawii tasu-ò ròosekremy roerymyhỹre. Tahe wamahãdu heka warybemy riòbynyõmyhỹre.
|
||
\v 8 Ihỹre heka bedeerymy ixidi tahõtinytenyte:” Jiarỹ boho heka Deuxu Rybemy reeryrenyre bedeywinamy reeryrenyre.” Tarybetenyte. Ihỹre heka warybe ery mahãdu òbitimy aõkõ bedeywinamy rirytinymyhỹreu òbitimy aõkõ riwinymyhỹrenyrehe.
|
||
\v 9 Ihỹre warybe ery mahãdu bedeerymy ixidi rõhõtinyrenyre reòsareòsamy ratxikremy warybemy ribuarenyre-ki. Aõhe inatyhy ibedeeryna aõ aõkõ heka rare.
|
||
\v 10 Tai dori ihawyyreny ijõ hãbu-ò areurorenykre tule isurenyijõ wedureny-ò reurokremy. Òbitimy aõkõ riwinymyhỹre-ki, òbitimy aõkõ nieru ritamyhỹrenyre-ki. Xiwena wahisidỹỹdu rybedu mahãdu tule òbitimy aõkõ riwinymyhỹrenyre.
|
||
\v 11 Tiiboho inyõ tõmona heka aõ aõkõ tamyreny rare. Wamahãdu-di awimy aõkõmy ratximyhỹrenyre ãdohotalemy idireny roire. Ibinamy roiremyhỹ ihỹrele awile roimyhỹremy rarybemyhỹrenyre dori.
|
||
\v 12 Tiiboho kia ibinabinamy riwinyrenyre-di riixârurenyre aõbo? Anõkõre! Kõrehe! Riixãrurenyõrehe. Tiiboho ixãruna rieryõrenyre dori. Tai inyõ resekreu heka ihereny reserenykremy tule. Aõhõkỹmy tamyreny arisỹnykreu heka sõwemy rabedeworenykremy. Jiarỹ heka Deuxu Tyhyhykỹlemy rarybemyhỹre.
|
||
\v 13 Iwese alòbròdu aõlòbròna risihemyhỹre idi ributunymyhỹre wese heka Jiarỹ Deuxu Tyhyhykỹ wamahãdu idi aributunykremy raruwahỹre. Tahe tiiboho uvaò iratyõ wesemy roimyhỹre wese. Tiiboho òwòru rubu wesemy heka roire dori. Tai ixinamy suwitxira mahãdu heka isureny rimyrenykremy ariwahinyre Jiarỹ.
|
||
\v 14 Tiiboho raryberenykre: — Aõhebo ixỹ tetxikilemy roimyhỹremy! Suiwitxira-ò hãwã òtity-ò rokoirenykre taile ixinamy arururenykremy. Deuxu rubu-ò inydeereny riwahinyre. Be veneni-di iny riõkremy riwahinyre Deuxu, iny tamy rexiòrarunyrenyre-ki wahe.
|
||
\v 15 Bedewihikỹmy ratxikremy raruwahỹrenyre tahe aõbinabinahakỹle ijõdire.
|
||
\v 16 Iny òludureny Dã hãwã-ò rirònyrenyre iawarureny raholamyhỹrenyre. Iawarureny tawareny-di risorusorunyreu heka bede ramytatamyroimyhỹre. Iny òludu heka suituekremy doidenyde ibutu kasu ijõdikre rahukremy doimyhỹdenyde.
|
||
\v 17 Boholabenyke! DeuxuTyhyhykỹ rarybemyhỹre: — Hemylala teburehekỹ arateònymyhỹre ararubunyrenykremy.
|
||
\s1 Judeu mahãdu wotòenamy Jeremia rabedewomyhỹre.
|
||
\v 18 Wabedewonaheka itueõkre, wawokiramytxitxire.
|
||
\v 19 Boholabenykre! Iny irà-ò raholareri myy: — “Deuxu Tyhyhykỹ aõbo kaki ratxiõre? Siaõ hãwã tai ijõõre aõbohe! Tai Deuxu Tyhyhykỹ tamyreny rirawyònymyhỹre: — ” Aõhereriwe asuriokoreny-di tiwayaranyte? Aõheririwe iwitxira bede mahãdu isuriokoreny-di tiwayaranyte? Kia suriokoreny heka aõke aõkõ heka rare! Deuxu rirawyònyre dori.
|
||
\v 20 Tai Israeli mahãdu rirajuarenyre:” Wyra beòramy rexihure, bedratysòna ribi ituemyhỹre tahe aõbina bina ribi inyboho rexitaõre dori.”
|
||
\v 21 Jeremia bedewomy taworibi rarybemyhỹre: Wawo ramytxitxire wamahãdu òrarunamy resere-ki tai wawo rexieryre, rahinyre dori.
|
||
\v 22 Xileade hãwã aõbo mona ihõõre tai? Ohotibedu tai ihõõre aõbo? Aõherekibo wamahãdu reyteõra?
|
||
\v 23 Jiarỹ heka hãlobe wese aratxikeki tahe waube sõwemy rexijuajuakremy tai txumy rumy arahinykremy dori, rurure mahãdu tòenamy arahinykremy dori.
|
||
\rem aut Ajudante Borobe Karaja (feminino) não sabe ler nem escrever
|
||
\rem dat Aldeia macaúba, Janeiro de 2018 a abril de 2018
|
||
\c 9
|
||
\p
|
||
\v 1 Wamahãdu itxỹtere irehemy iribireny aratxikremyra tii boho heka hawyy luureny hãbu luurenyre dori òbitidu aõkõmy roire.
|
||
\v 2 Ruiduhykymy roire òbitina iworeny-ki tai ihõõre Deuxu Tyhyhykỹ heka rarybemyhỹre. Wamahãdu aõbina bina ierena riwinymyhỹre waderarenyre.
|
||
\v 3 Wii seriòre ribi rexiijemyhỹre tabiòwa ribi rexiijemyhỹre taseriòrenymy rityhynyõmyhyrenyrele iseriòrereny iòbitinareny ihõõrenyre Jaò ilabiereny bodỹỹ wesemy roimyhỹrenyre. Ibutu taseriòrerenymy rajeijeimyhỹre raujõmomyhỹreny.
|
||
\v 4 Ibutumy taeryna mahãdu ribonymyhỹrenyre òbitina taireny ihõõre. Raruimyhỹrenyre ihỹre taòrarunarenyribi rexirahirenyõmyhỹre.
|
||
\v 5 Aõbina bina ierena rexijuamyhỹrerenyre ribònymyhỹrenyre ierena ribonymyhỹrenyre. Deuxu tahe rarybemyhỹre kia mahãdu uladee teramy reamyhỹre.
|
||
\v 6 Wamahãdu-ò aohõkỹmy arisynykremy dori iwese womati heòty di resuhòmyhỹre iwesele heka wamahãdu ariurihikremy Timybo ariwinykre tamy wamahãdu heka aòbina bina riwinyre dori.
|
||
\v 7 Idòròtòreny heka wyhy asi rubuna roire wesemyidòròtòreny heka ruimy rarybemyhỹrenyre tai urie ribonmhỹre, uritre rybe awimy taseriòre-ò rarybemyhỹre tahe aõkõ urile ribonymyhỹrenyre taseriòrereny-ò.
|
||
\v 8 Tai dori aõhõkymy tamyreny arisỹnyke aõkõ aõbo aõbina bina òraruki aõhõkỹmy tamyreny ariteonyõkreaõbo. Ariòwnyrenkre Jiarỹ Deuxu heka rare rarybereri.
|
||
\v 9 TaheJiarỹ Jeremia rarybere arahinykre hawalò tòenamy bederahy-ki heka biu roaõmyhỹre, broreni mahãdu heka tai ranaõmyhỹrenyre iroxinareny. rexihura dori nawii boho, iròdu boho haku aõkomy roirèri by! Ramyra myhỹrenyre dori rihenyrenyra dori!
|
||
\v 10 Tahe Deuxu rarybere: Jerusalẽ hãwã heka rejujukre! Jiarỹle tuu ariwiny kre ahula mahãdule tai rasỹnykre ahula tai rasỹnykremy!Judá hãwã heka sỹtybymy relekremy ariwinykrehe!
|
||
\v 11 Tai jiarỹ Deuxu-ò rỹỹraxire: Waha Deuxu aõherekibo inysureny rexihumyrỹireri inysureny bederahy wesemy rỹireri aõherekibo. Inysureny-ki heka iny rariaõmyhỹre suu rarubuhukỹmy rỹireri. Mobo rieryreri aõherekibo tuure. Inyõ aõbo rieryreri inyõ-ò anobo tetỹnynyte mobo rieryreri ijõ-ò rierykremy.
|
||
\v 12 Tai Deuxu rarybere: — Warybemy iny mahãdu ririra tai dori tuu rotỹỹnyre. Warybe riòbynyreõre-ki.
|
||
\v 13 Uritere Baali-ò surioko realarenyre xiwena riwahinyrenyre tamy itxỹterenyle tybyreny hekile riwiny renyre dori.
|
||
\v 14 Tahe Wijiile bieryke aõbõ ariwinykreny lòbròna hỹrele bevenena-di ariwahinykremy wamãhãdureny-ò rirasỹkremy bevenena-di riõrenykremy ariwahinykre.
|
||
\v 15 Wamahãdu ariybỹtỹrenykre bede mahãdu witxiray-ki. Iwitxira mahãdu y-ki heka raubỹtỹrenykre tii boho kidieryõtyhy mõmahãdubo tai rare rieryõtyhy ierynamahãdu aõkõmy roire. Sodadu mahãdu itxireny-ò reakremy ariteònykre wamahãdu-ò idireny rabyrenykremy.
|
||
\s1 Jerusalẽ mahãdu Deuxu-ò ryrykre
|
||
\v 16 Deuxu Tyhyhykỹle rarybere: ibru mahãdu-ò biòrybenykre robureny kremy ibrumy ratxikremy.
|
||
\v 17 Iny mahãdu rarybemyhỹre: — Wiji wylemy bodoikre bobubenykremy! waubereny resekremy arahinyrenyre dori sõwemy!
|
||
\v 18 Boholabenykewa! Siaõ mahatu robunymyhỹre rahinymyhyre kiamy: “Iny boho rexihumy ratxireri! Riwaixãrumyhỹrenyre wasureny sỹtyby wesemy roimyhỹre dori! Wasureny aririrenykre dori! Wasureny rexihura herewelàhà! Iny mahãdu sỹtybymy su riki roimyhỹre dori! Bee! Beteebenyke iny sureny rexihura Bee! Hããããã! Iny ituemyhỹre!
|
||
\v 19 Jiarỹ rarybere: — Hawyy mahãdu boholabenyke Deuxu Tyhyhykỹ rarybereri irybemy beòbybenyke. Ariòre boho idi ibrumy bierynanybenyke asỹwera ludu mahãdu ibrumy bierynanybenyke!
|
||
\v 20 Rubu iny hetoreny-ò ralora. Uladu mahãdu ryy-kile rahumy, weryrybò mahãdu rira ixãwire, weryrybò mahãdu rahymy reare.
|
||
\v 21 Iumyreny sukile reserenykremy raubỹtỹnyrenykre maki rubu raubỹtỹnymyhỹre iwesemy iumyreny suki roikremy. Kiamy Deuxu raryberedori.
|
||
\v 22 Deuxu rarybere ijõ Bedeery mahãdu heka tabedeerynamy aõkõ raxiwedekremy dori, irurutere mahãdu tarurudi ãokõo raxiwedekremy. Ityhy taaõnaõna wihikỹdi raxiwedeõkremy ratxireri.
|
||
\v 23 Iny raxiwedekeki, riwaerykemy rurumyhỹkremy, riwaerykemy idi riwisỹnymyhỹre , wamy ierysymy rurukremy. Jiarỹ heka Deuxu luuna Jiarỹ rare, aõ ibutumy òbitityhyle rewinywahỹre, kialeheka wadee awityhyremy.Kia Jiarỹle Deuxu Tyhyhykỹ rarybemyhỹre dori.
|
||
\v 24 Deuxu rarybere ijõ: My tahe: Ejitu mahãdu, Judá mahãdu, Edom mahãdu, Amõ mahãdu, Moabe mahãdu heka taradereny risymyhỹreny itxuulemy. Tii boho heka urile notyky resyna-di ibutumy roiremyhỹre ihỹre heka òbitimy aõkõ roimyhỹrenyre. Israeli mahãdu tule òbitimy aõkõ roire notyky resyna-dimy ihỹre rybe wawana ritobinyrenyre rybe wesemy aõkõ rityhynyõre dori.
|
||
\c 10
|
||
\s1 Deuxu deàlànamy òbitire suurioko deàlànake aõkõ.
|
||
\p
|
||
\v 1 Israel mahãdu Deuxu rybemy boholahenyke.
|
||
\v 2 Tii rarybereri: “bede mahãdu bededyynana wesemy aõkõmy matxibenyke. Tiiboho imasareny ruarenykre biwuetyy-ki aõhebo rotỹỹnykremy kaiboho tahe masajurarenyõmykemy.
|
||
\v 3 Bede mahãdu heka aõke aõkõ rityhynymyhỹrenyre dori. Òworule rimymyhỹrenyre idi tahe tasuriokorenytamyreny riwinymyhỹrenyre. Brekudilemy imanymy ridereny myhỹre brekudile risỹnyrenyre tasuriokoreny isuriokowa, rati, iaxiò heka brekudilemy ritamadỹỹnymyhỹre dori.
|
||
\v 4 Brekudilemy isuriokoreny womati tỹrỹrỹhỹdi rihetynyrenyre, tule brekudilemy imanymy ridemyhỹre isurioko rejuxunyke lau.
|
||
\v 5 Isuriokoreny heka rybeõmy runymyhỹre. Urile ritisanymyhỹre iitxe ranarenymy. Tasuriokorenyle idi raixỹnymyhỹre, isuriokoreny rira rieryõtyhy rariaõtyhy ixidewimy. Isuriokoreny lau breburenyõmy surioko aõbina dori riwinyõmyhỹre inyde, aõnawi tule riwinyõtyhy inyde.
|
||
\v 6 Tai heka Jeremia rarybere:“Waha Deuxu Tyhyhykỹ. Awesele heka ijoõtyhy. Awityhy wihikỹ !Ruruduhukỹ!Ani heka ibutu ratyre.
|
||
\v 7 Bede mahãdu Deuxutyhyhykỹ atxiteri! Mobo animy deàlanà riwahinyõkre. Bede-ki wedu mahãdu Iòlòmy Tate! Ibutu wedu mahãdu ratyre kai Tate! Mobo aratyhynyõkre!Awese ihõõre dori!Mobo aratyhynyõkre Bede mahãdu iòlomy! Bedeery mahãduyki heka awese ihõõre dori!
|
||
\v 8 Bedeery mahãdu aribi heka ibedeeryõrenyre. Surioko òwòru aõ araerynanyke riwinyleke aõbo?
|
||
\v 9 Surioko widỹỹ mahãdu heka womati tyrỹhỹkỹ idi riuhemyhỹre surioko rihetynykremy Xibãiásu womati tỹrỹhỹkỹ-di relerenyre, Ubasisu womati tỹrỹhỹkỹ diwymyhỹde surioko rihetynykemy, ibutu heka surioko mahãdu eryle tuu riwinymyhỹre. Surioko tyky tule idymy, isõmy ritxitanymy riwinymyhỹre tasurioko tykymy.
|
||
\v 10 Tahe Deuxu Tuuhykỹle inatyhytyhymy Deuxule inatyhynale rare. Iòlò tyhyhykỹ heka rare. Deuxu tayaranamy reareu heka bede ramytatamy bede mahãdu tiu rióludunyõtyhy.
|
||
\v 11 Bede mahãdu-ò ibutu mahãdu-ò marybeke: Isurioko mahãdulehekỹ bede widỹỹdumy aõkõ rare tii boho ituerenykre dori! Bede biuwetyy widỹỹdu aõkõmy roire rahurenykre dori! Bede ribile bymy iõmy reakre surioko.
|
||
\s1 Deuxu-ò Wiunamy rare.
|
||
\v 12 Tarurunadile Deuxu Tyhyhykỹ bede riwinyre taerynadile biuwetyy riterenyre hety wesemy.
|
||
\v 13 Deuxudewimy heka biuwetyy-ki bee rawodỹỹnyre irehe ribile biuwetyy riteònymyhỹre. Biu rebureu biu ramytxi riteònymyhỹre yhy riteònymyhỹ rakremy.
|
||
\v 14 Deuxu koki heka ibutu bede mahãdu ibedeeryõmy rỹire suu rioko widỹỹdu mahãdu heka rixãrudỹỹnyre isuriokoreny heka iruru ijõõre iru tule ijõõre dori.
|
||
\v 15 Surioko aõke aõkõ rare, bodỹỹmy rỹire rahurenykre dori Deuxu kanakreu.
|
||
\v 16 Jaò Deuxu Tyhyhykỹ kia wese aõkõ rare; ibutu aõna ona Tii riwinyre Israeli mahãdu tamahãdumy ritare Deuxu. Tii heka Deuxu Tyhyhykỹ Tuhyy ratximyhỹre, Ruruduhukỹ heka ini rare.
|
||
\s1 Bede mahãdu tasureny ribi riteònykre.
|
||
\v 17 Jerusalẽ mahãdu ahawãreny òludureny riwokrore aõna onareny bimybenyke!
|
||
\v 18 Deuxu arateònyrenykre asureny ribi idi óbitimy matxibenykemy dori. Jiarỹ Deuxu Tyhyhykỹle hekararybemyhỹre.
|
||
\v 19 Israel mahãdu ryrymyhỹre: — Jiarỹ boho rawotõmomy rỹireri! wawotõmona reytẽõtyhy! Arawinyleke sỹny rohõtinyrenyre!
|
||
\v 20 Wawelòreny rexihumy rỹireri òtity imynana rejujure. Wariòre boho ramyramyhỹrenyre! Hetowidỹỹ ihõõre dori!
|
||
\v 21 Jiarỹhe rarybere: Iny wedu mahãdu bedeeryõmy rỹire Deuxu tamyreny ridinodunykemy idi rexitoenyõmy rỹire. Tai dori ribinanyre iny mahãdu raubỹtỹnyrenyre dori.
|
||
\v 22 Boholabenyke! Irybe urena rehemynyre. Iboo-ki sõweny ijõdire sodado jei jei mahãdu kidirahukre judásu-ò rabynykremy, taile ahula rasỹny kremy isỹtybymy. Rybe nina dehemynyde rybe urena dehemynyde Jeremias tamahãdu-di Deuxu-ò reixitòenyre.
|
||
\v 23 Waha Deuxu reeryrahe bede mahãdu heka aõhebo rotỹỹnykremy rieryõ tyhy. Iny tabededỹỹnana ridinodunyõtyhy.
|
||
\v 24 Deuxu adee arexitòenykre. Wamahãdurenymyidi biòbitinyke adebureke aõkõ, urihimyòmy Deuxu. Adeburetyhydi heka iny rahuke yarana-di.
|
||
\v 25 Su witxira mahãdu-òle yarana-txi beake, kia adera mahãdu-òle. Tii boho Jaò riokore mahãdu-ò rirubunyrenyre inysureny ribinanyrenyre dori.Tamyreny yarana-txi beakre.
|
||
\c 11
|
||
\s1 Jeremia wana Deuxu ritobinyre.
|
||
\p
|
||
\v 1 Deuxu Tyhyhykỹ rarybere wadee.
|
||
\v 2 Boholake! Israel wana rybe widee raryberenyre õhõtilusaõmyke! Judá sỹdu mahãdu Jerusalẽsỹdu mahãdu warybemy biwahinykre.
|
||
\v 3 Aritxuhotyhykre kia rybe rityhynyõre mahãdu labiereny kia rybe rewinyre.
|
||
\v 4 Kia rybe heka iwese ywina rybe juhu alabrireny riwahinyre Ejitu ribi retareu bederahy ribi idireny redinodunyreu. Tamyreny rarybere: Wary bemy beobybenykeki tahe ibutu biwinykeki wamahãdumy matxibenyke a Deuxurenymy aratxikre.
|
||
\v 5 Tai heka warybe weselemy ariwinykre alabiereny-ò. Suwihikỹ adeereny rewahinyra tai jiarỹ rarybere: Inatyhymy heka rare. Waha Deuxu.
|
||
\v 6 Tai Deuxu wadee rarybere: Judá hãwã-ò Jerusalẽ hãwã-ò make warybe-di tii boho warybemy reòbyrenyke marybeke tamyreny warybe wesemy riwi nyrenykemy.
|
||
\v 7 Ejitu ribi ilabiereny redyreu tamyreny inatyhymy rebedeerynyre warybemy reòbykemy juhu bedeu ribi wiji hỹre.
|
||
\v 8 Tahe tiiboho warybemy roholaõrenyre uritere rarybewahỹre tamyremy nõhõtitxyrenyre bina binamy roimyhỹrenyre wiji-ò retxuhorenyre-ki aõhõkỹmy rotỹỹnyrenyre warybe weselemy rarybere wese.
|
||
\v 9 Deuxu Tyhyhykỹ wadee rarybere rayaramyhỹrenyre Judá Jerusalẽ hãwã myhỹ. Rybe bina binamy wadee rarybemyhỹre.
|
||
\v 10 Tiibohota labiereny òrarunamy riwinymyroiremyhỹ tamyreny rarybere tahe riòbynyõre surioko reàlàrenyre. Warybe wesemy riwinyõre.
|
||
\v 11 Tai dori aribedeerynanyrenykre Deuxu TyhyhyKỹ rarybere aõhõkỹmy arisỹnykremy watxireri mõõ rihenyõtyhy. Tii boho wadee ryryrenykreu aritaõtyhy.
|
||
\v 12 Judá mahãdu surioko-ò ryryrenykre tahe aõhõkỹmy arisỹnykreu heka isuriokorereny ritarenyõtyhy.
|
||
\v 13 Judá mahãdu ihãwãreny sõwe isuriokoreny sõwe wesemy. Tahe xiwena bina Baali tasuriokoreny riwahinymyhỹrenye. Jerusalẽ-ò hãwã sõwe xiwena riwinyrenyre ihawãreny sõwe wese.
|
||
\v 14 Jeremia Deuxu Tyhyhykỹ rarybere wadee idireny ixitòedỹỹõmy tiiboho aõhõkỹmy rotỹỹny arisnykreu heka aroholaõtyhy.
|
||
\v 15 Deuxu Tyhyhykỹ rarybere: Kia mahãdu jiarỹ waluure aõbina bina ri winymyhỹrenyre timykibo heka xiwena wadee riwahinykremy doidenyde. Taxiwenarenydi aõhõkỹmy riixawidỹỹnykemy idi rohõtinyre renykreny aõbõ. Kiadi riteysarenyke aõbõ!
|
||
\v 16 Deuxu Tyhyhykỹ: Juhule heka Judá Jerusalẽ reninire olivera bederaty ratỹnyre sõwe. Wiji tahe bw delya-dile aritoonykre.
|
||
\v 17 Jiary Deuxu Tyhyhykỹ Ruruduhukỹ Israeli Judá rebiònyreihyre wiji aohokỹmy arisỹnykre. Tii boho ixityre reny aobina reserenykre dori. Baali surioko-ò deàlàna riwahinyre-ki.
|
||
\s1 Aõtxu heka Jeremia rirubunyrenykremy idi rohõtinyrenyre
|
||
\v 18 Iu heka Deuxu Tyhyhykỹ wadee ritỹnynyre waòludu mahãdu riwarubunykremy idi riwisỹnyre-ki.
|
||
\v 19 Wabedeeryõmy rỹiredori. Tiiboho riwarubunykremy rohõtinymyroire my rarybemyroire: Wylemy Jeremia rikerubunyrenykre wii retobinymy roiremyhỹ iny iribi tohõti rusakremy.
|
||
\v 20 Tai Jiarỹ Deuxu Tyhyhykỹ rarybere: Waha Deuxu iruruterehekỹ, wahisidỹỹdu wihikỹ. Iny rayky wydyna òbiti tate iny woreny teerymy hỹte. Ixinamy iny òludureny aõhõkỹmy bisỹnykre adeele jiarỹ rexiwahinyre dori.
|
||
\v 21 Anatote mahãdu wamy rabemyhỹre arybe òraruki riwaruburenykremy idi riwisỹnyrenyre. Myy rarybere.
|
||
\v 22 Tai Deuxu Tyhyhykỹ rirawyònyre wadee: — Jiarỹ aõhõkỹ arisỹnykre tamyreny imahãdurenyò alòremy roimyhỹkreu iweryrybòreny, iròrereny alòre-kile rururenykre ramamy rirubunykre.
|
||
\v 23 Anatote iny howa akõ tai ratxikremy wadebò ribile kiamy ariwinykreu.
|
||
\c 12
|
||
\s1 Jeremia Deuxu-ò rỹỹraxire.
|
||
\p
|
||
\v 1 Tai Jeremia Deuxu-ò rỹỹraxire: — Waha Deuxu timybohe rare. Kaihyyle òbitimy tate, kaihyylemy ixiki tanymahãte. Adee arỹỹraxikre timybohe rare, kai iny wedu atxiteri, aõherekibo binabina mahãdu ratyhyra? Aõherekibo itxỹteitxỹte mahãdu rotamyhỹre?
|
||
\v 2 Kai òwòru wesemy idi tebrònymyhỹte sukile iraruteremy imyremyrỹimyhỹre riumydỹỹrenyre òwòru wesemy raratynymyhỹre tii boho. Ahyy rarybemyhỹre hỹre adi rohõtinyõmyhỹre urile amy rarybemyhỹrenyre.
|
||
\v 3 Waha Deuxu Tyhyhykỹ! Kai tiwaeryte; aõ jiarỹ rewinymyhỹre Kai tabimahãte, jiarỹ aluuremy kai teeryte. WaDeuxu idireny bitusinyke! Broreni wesemy idireny bitysinykerubu-ò! Idireny bihitxinyke rubu txu-ò!
|
||
\v 4 Tiwese bohe asi rubumy ratxikremy inysureny-ki? Tiwesebo bede rijekremy asi rubu rubumy idi rỹimyhỹkremy ibutu hãwã hãwã-ki? Subede mahãdu aõbinabinamy riwinymyhỹrenyre iòraruki heka iròdu iròdu, nawii nawii, broreni broreni rurumyrỹirenyre dori. Kia ibina mahãdu urile rarybemyhỹrenyremy:”Tiu Deuxu robiõtyhy wawidỹỹnareny, rieryõre dori!”
|
||
\v 5 Tai Jeremia-ò Deuxu rirawyònyre: — Jeremia. Kai hãbu mahãdu wana ijira-ki ele arasamyhỹre, timybo tahe awaru mahãdu ribi botakremy ijira-ki beakreu? Bededỹỹnamy ywinamy rỹimyhỹre adee isirare tahe timybo matxikremy Jordão bederahy-ki
|
||
\v 6 Aseriòrereny heka ityhedỹỹdureny heka rỹireri, tiiboho heka itxenadỹỹdure. Akõna-kilemy umy ibinamy rarybemyrỹimyhỹre. Irybereny bityhynyõkre adee awimy raryberenykre hỹre ityhydỹỹõmy.
|
||
\s1 Deuxu rabedewore tamahãdu-ò
|
||
\v 7 Deuxu Tyhyhykỹ rarybere: “Wamahãdu heka rerira! Israel mahãduhe jiarỹ retare wamahãdumy. Taòludureny-ò jiarỹ rewahinyre dori!
|
||
\v 8 Tii boho heka waribi rexirahaorere bederahy-ki leaõ rexirahaoremyhỹre wesemy, tiiboho waderamy ryryrenyre riwayaranynyre.
|
||
\v 9 Wamahãdu heka iwese nawii brebumy reamyhỹre idi rekoamyreny hire mahãdu sõwe itxi rearenyre lau. Myy heka rarybemyhỹre:“Bodoibedenykewa! Rarỹỹ-ò bodoibedenyke! Bederahy iròdu!
|
||
\v 10 Suiwitxira wedu mahãdu heka wauvaò heka ribinanyrenyre, wasureny risorusorunyre tai wasuwihikỹ bederahymy relera.
|
||
\v 11 Tai wakoki wasu ibinamy rỹimyhỹre suiwitxira bede wedu mahãdu wasumy ribinanyrenyre dori. Bedebrasahakỹ ixihyyle rỹire moõ heka aõ rotỹỹnyõhyyre!
|
||
\v 12 iny binahakỹ hãwãlò hãwãlò ribi rubehemy iny itxi rearenyre. Jiarỹle alòremy reteònyre sumy rahukemy; ywinamy ixãwikemy!
|
||
\v 13 wamahãdu heka tiriku ribrònyre hỹre heka edele ruhunyre dori! Sõwemy raõmysỹdỹỹre tahe aõ risiheõtyhy. Wayarana heòty wese heka iòraruki ilòbrònareny ruhunyõtyhy.
|
||
\s1 Israeli sỹweraludu mahãdu.
|
||
\v 14 Deuxu Tyhyhykỹ rarybere: Wiji tahe Israeli sỹweraludu mahãdumy ararybekremy watxireri. Tiiboho Israeli mahãdusule ribinanyrenyre. Israeli mahãdu iribi sỹyweraludu mahãdu heka irehemy idi arehukremy iwese lobróna ritamyhỹre wese idireny arehuke. Judá mahãduyribi arehuke.
|
||
\v 15 Irehemy aridyrenykre iribi tahe idireny ariwotòenykremy ixyby adidydenyde sohoji sohoji tasureny-ò ixyby adidydenyde tahawã hãwãmy.
|
||
\v 16 Tiiboho juhu Baali surioko deàlànamy Israeli mahãdu-ò rierynanyre heka. Tai iweselemy Israeli mahãdu hekile riwatyhynyrenykre, Deuxu Tyhyhykỹmy reàlàrenykremy. Riwatyhynykeki tahe wamahãdumy relekremy Israeli mahãdu wesemy idi awimy roikremy.
|
||
\v 17 Mytahe aõ bede mahãdu riwatyhynyõkre wana. Deuxu Tyhyhykỹle rarybere heka òwòru raruti ribile wesemy aritakre.
|
||
\c 13
|
||
\s1 Tyky binabinamy
|
||
\p
|
||
\v 1 Deuxu Tyhyhykỹ wadee rarybere rueremy ariwykremy tahe idi aratxikremy arisuhoõkremy.
|
||
\v 2 Iwese Deuxu rarybere rewinyra rueremy remyra idiwatxire rexityynyre.
|
||
\v 3 Ixyby tii wadee rarybere: — make Euvarate bera-ò taile manarurewotxi rueremy biràtyke biwokemy.
|
||
\v 4 Euvarate bero-ò jiarỹ rare iwese Deuxu rarybere rewinyra manawotxi rewora watyky.
|
||
\v 5 Iwese Deuxu rarybera rewinyra.
|
||
\v 6 Juhu wadee rarybere, iribi tahe roimy rare, iribi tahe ixyby wadee narybere; Ixyby aroosekremy tai tyky rewora-ò riòrykemy Deuxu rarybere.
|
||
\v 7 Ixyby roosere manawoki tyy rewora-ò tahe tyy ratybyra dori.
|
||
\v 8 Tai Deuxu Tyhyhykỹixybyle wadee rarybere:
|
||
\v 9 — Kia wese heka Jerusalẽ mahãdu ixiwedenareny Judá mahãdu ixiwedena reny arixãwidinykre.
|
||
\v 10 Tii boho heka warybe-ò roholaõmyhỹrenyre tõhõtitxyhyky dori. Tii boho suriokole reàlàmyhỹrenyre tai dori kia tykyratybyre wesemy ratxirenykremy.
|
||
\v 11 Iwese ruere weretysana-ki rarutxinymyhỹre wese heka Israeli mahãdu Judá mahãduwawanahyy rỹikemy tiiboho wamahãdumy ratxikremy wani-di reàlànykremy tahe warybemy rityhynyõre dori.
|
||
\s1 vii behyna wesenamy
|
||
\v 12 Deuxu Tyhyhykỹ rarybere: — Jeremia Israeli mahãdu-ò marybekre: Jiarỹ adee rarybere: — Ibutu vii behyna tỹximy rỹikre tai tii boho adee raryberenykre, reeryrenyrehe viihyna tỹxihikỹlemy rỹikre.
|
||
\v 13 Tai heka tamyreny marybekre. Iwese heka deuxu Tyhyhykỹ kasusỹ mahãduhe vii-di sõwemy aritỹxinykremy ibutumy rururenykremy; Davi riokore mahãdu, Deuxu rybedu mahãdu, xiwena wahisidỹỹdu mahãdu, Jerusalȇ mahãdu ibutumy.
|
||
\v 14 Matuari mahãdu, wijina mahãdu aribohòbohònykre iwese viihyna widee ribohònyre wese idi arahurenykreny ariwotòenyõtyhy.
|
||
\s1 Ixiwedena, Iaõhõkỹmydỹỹnanamy
|
||
\v 15 Israeli mahãdu deuxu heka rarybemyhỹre adeereny. Ixiwederenyõmy mahãbenyke, boholabenyke.
|
||
\v 16 Aòrarunarenymy belyybenykre aDeuxu-ò wylemy belyyke bede riturunyke lau tai awa suu tòò tòò riweke lau. Bede tynỹlemy adeereny awi, tahe bede tany iribi bedelurumy relekre, bedeturuhukỹ.
|
||
\v 17 Boholaõbenykeki axiwedenareny òraruki Jiarỹ aribireny arexiwokre arahinykremy, boholaõbenykeki aòludureny wetxumy aradyrenykre dori tai ihĩ teremy aratxikremy.
|
||
\v 18 Ijõhe Deuxu Tyhyhykỹ wadee rarybere: Iòlò-ò Iòlòse-ò marybekre: tarunanareny-ò budubehekremy, iratireny iribi iratuanareny wihikỹ resere dori.
|
||
\v 19 Iraru mahãdu heka ihãwãreny iòludureny rirurawonymyhỹrenyre moõtamy rehemynyõtyhy. Judá mahãdu wetxumy ridyrenyre tasureny ribi ireheny.
|
||
\v 20 Jerusalȇ mahãdu, boholabenyke ibòò ribi aòludureny dirahudenyde. Titxibo kia iny mahãdu itxeredumy tesỹnytenyte? Titxibo kia mahãdumy roire. Kia mahãdu ohõreny wesemy roire, titxirabo?
|
||
\v 21 Abiòwareny mahãdu sỹny tahõtinytenyte awedurenymy rexisỹnykemy.Timybo matxibenykremy? Iwese hawyy ramytxitximyhỹre uladu ijiranamy wesemy matxibenykre,
|
||
\v 22 Jerusalẽ mahãdu iximy marybebenykre: Timybo heka tuu rotyynỹre wadee? Watyky ritarenyre aõmybo? aõherekibo heka iny riwabinanyre? Tai bierybenykre aòraruna sõwere-ki tuu rotỹỹnyre dori.
|
||
\v 23 Halõe iraryti rexiwitxiranykreaõbo? Hãbu lyby tatyky rawitxiranykre aõbo? Idi rawitxiranyke wana tahe kaiboho aõbinabina teeryte tahe aõwihikỹ biwinykemy aõhe aõbo?
|
||
\v 24 Noboere yhy ritusòdỹỹnyre wese heka kaibohole ariubatỹnyrenykre.
|
||
\v 25 Deuxu Tyhyhykỹ umyrenymy rarybere. Deuxu ribi tohõtireny rusare-ki tai kiamy riòwynykre suriokomy tetyhynytenyte-ki.
|
||
\v 26 Deuxule atyyreny ritakre aixỹrunareny-di matxikremy.
|
||
\v 27 Aõbinabina tewinymahãtenyte Deuxu umyrenymy robimyhỹre. Asỹweraludu ihawyy hekitariamyhỹre wesemy, awaru tahawyy heki reamyhỹre wesemy toimahãtenyte. Kia wesele heka surioko heki tariamyhãtenyte hawalo-ò bederahy-ò. Kia iòwy dire tiubo kia rib bexilyranymahãbenykre?
|
||
\c 14
|
||
\s1 Bee rahumy reare
|
||
\p
|
||
\v 1 Deuxu wadee rarybere bee rahumyreu.
|
||
\v 2 Judá mahãdu rasỹbinarenyre ubru ihi tai yodire. Bedetxile hãwã hãwã reserenyre rexijuarenyre Deuxu-ò bee rahureri-ki. Jerusalẽ hawã mahãdu rurymyhỹrenyre idi riwiòhenanykremy. Bedewomy roire.
|
||
\v 3 Ityhy mahãdu tadeòdu mahãdu-ò riteonymyhỹre be òrysymy. Haloobe-ò be rahumy reare, bee ijõõre dori ibutxireny-ki bee ijõõre tai tii boho iratireny rihetynyrenyre rabedeworenyre.
|
||
\v 4 Lòbrònadỹỹdu mahãdu tule taratireny idi rihetynyrenyre biu ijõõre dori bede raruburubumyhỹ.
|
||
\v 5 Bederahy-ki watxi mahãdu heka tariòrereny ririmyhỹre asi ijõõre dori.
|
||
\v 6 Jumentu hãwãlò-ki herimy roimyhỹ ele risamyhỹre asi ijõõre dori. Tiiboho ahula wesemy raelewysenanymyhỹre. Bederahy-ki heka asi rarubuhukỹmy rỹire tai ibinamy retehemyhỹre ahula mahãdu wesemy.
|
||
\v 7 Wamahãdu rarybere: “Waòrarunareny òraruki heka ibinabinamy ixỹ roireri mytabo adee reixitòenymyhỹre biwawiòhenanykre arybemy tarybete wesemy. Aribi irehemy ratximyhỹrenyre sõwemy umy raòrarunyrenyre dori.
|
||
\v 8 Wararòsònamy sohojile tate Israeli mahãdu raròsònamy tate aõbina bina-kiratxiwahỹrenyreu heka watarasadurenymy tate. Aõhe wasubede-ki urihimyò wakireny atxiteri, riradu mahãdu wesemy ruumy sohojilemy bede wakireny rijemyhỹre.
|
||
\v 9 Hãbu iny aõweselemy itxi reare wesemy tate, sodadu iruruõre wesemy iny riwiòhenanyõre iwesemy tate. Waha Deuxutyhyhykỹ, inyyreny-ki atximahãte, jiarỹ boho amahãdureny jiarỹ boho rare. Wadireny beriõkre!
|
||
\v 10 Kia mahãdumy Deuxu Tyhyhykỹ rarybereri: -Tiiboho rirarenymy roimyhỹre reximymyõtyhy. Tai dori idireny wadeysamy ratxiõtyhy iaõbinabinareny ribi wanõhõti itxi areakremy iòrarunareny ariòwynykre.
|
||
\v 11 Ijõsỹ Deuxu Tyhyhykỹ rarybere: Idi arawiòhenanyrenykremy ixitòedyyõmy wadee.
|
||
\v 12 Tiiboho naroorehenyrenykeki reixitòenyrenykekihỹre arohola renyõtyhy; xiwenamy wadee iròdu riwahinykeki aõtxile bede raty xiwenamy wadee kidiwyrenykeki ariobynyõtyhy. Mytahe ariwinyke, alòre-kile arirubunyrenykre, ramamy arirubunyrenykre, webinadumy arirubunyrenykre.
|
||
\v 13 Tai jiarỹ, Jeremia rarybere: — Waha Deuxu, rybedu mahãdu heka ruimy rarybemyhỹ rearemyhỹ teeryteri tiiboho rarybemyhỹre heka alòre dori ijõõremy, rama dori, iny rahuõtyhy. Ywinalemy inysyreny ijõdikremy rarybemyhỹrenyre.
|
||
\v 14 Tai Deuxu rirawyonyre myy: kia rybedu mahãdu wanimy ruimy rarybemyhỹrenyre. Tamyreny rarybeõre dori. Tiiboho reteònyõre, irasinareny rui rare, irudeòsanareny rui rare aõ aõkõ rare, araitxenanyrenyre dori.
|
||
\v 15 Jiarỹ Deuxu Tyhyhykỹ heka adee ararybekre aõbo ariwinykreny tamyreny wanimy rarybemymyhỹre tahe tii boho raruirenyre jiarỹ reteònyõre. Rama rahuõkremy raryberenyre urile raruirenyre tiiboho alòre-ki arirubunyrenyre, ramamy arirubunyrenyre;
|
||
\v 16 Ibutu rybedu mahãdu rybemy roholare tule alòre-ki rururenykre, rama rirubunyrenykre iumyreny sutxile idi rehumy rỹikre Jerusalẽ hãwã-ki moõ ritunỹõkremy. Kia rotỹỹnykre tariòre boho-ò tahawyy boho-ò iòrarunareny òraruki tuukre.
|
||
\v 17 Tai Deuxu rarybere wadee wabedewonamy iny-ò arelyykremy: “Warue ube rejujukremy watxireri txumy ruumy tuhyy arahinykremy watxireri wamahãdu rawotõmonymy rỹireri webinaduhyy rỹire.”
|
||
\v 18 Bederahu-ò ramyhỹreu tuu rabimyhỹre unyumyreny alòreki rururenyreu. Hãwã-ò ralowahỹreu heka iny rama rahumy rabimyhỹre. Kia rybedu mahãdu, xiwena wahisidỹỹdu mahãdu heka taõmysỹdỹỹrenydilemy rỹimyhỹrenyre tahe rieryõrenyre timybo riwinyrenyre.
|
||
\s1 Taòrarunareny relyymyhỹrenyre.
|
||
\v 19 Deuxu Tyhyhykỹ kai Judá mahãdu tebuamyhyyte aõbo. Sião mahãdu amyxiburare aobo? Aõherekibo tiwaotõmõnyte tai wadeytena ihõõre dori. Ywinamy reraòrenyre tahe ònõsõnahe rehemynyõre dori wadeytenamy idi rahõtinyrenyre tahe aõbinabinanihiỹle iny-txi reare.
|
||
\v 20 Deuxu Tyhyhykỹ waòrarunareny atxi relyyymyhỹnyre iny labiereny òrarunareny relyymyhỹreny tule inatyhy heka adee raòrarunyrenyre.
|
||
\v 21 Arybetyhy-txi ohõti beake tahe wadireny ibuaõdỹỹõmy. Jerusalẽ rabedewobinamy aõkõmy ratxikremy idi maotòenykre. Deuxu Jerusalẽ hãwã heka arynanawihikỹ heka rare, Deuxu amahãdu wana tetobinyte heka ohõti rusaõmyke wadireny!
|
||
\v 22 Bede mahãdu suriokoreny aõ aõ heka rare, biu roakremy ruru tai ijõõreny, biuwetyy heka tiiboho riteònyõtyhy biu roakremy. kaile warasòsònany tate, wa Deuxu Tyhyhykỹ atximahãte. Kaile ibutu aõwihikỹle tewinymyhỹte.”
|
||
\c 15
|
||
\s1 Judá mahãdu aõhõkỹmydỹỹnana
|
||
\p
|
||
\v 1 Deuxu Tyhyhykỹ rarybere: moisesi Samuel kaki roimyhỹre wana wadee adireny reixitòenykeki tiu kaa mahãdu idi arewotòenyõtyhy dori. kia mahãduhe biòlududỹỹnyke waribi!
|
||
\v 2 Adee rỹỹraxirenykeu titxibo roirenykremy tahe marybeke myy jiarỹ rarybera: “kai boho heka binana dilemy burubenykremy ijõ alòrekile burubenykre. Kia wesemy kodotỹỹnykre. Ijõ ramamy rirubunykre, ijõ ròtena-ò ridyrenykre. Kia wesemy kodotỹỹnykre.”
|
||
\v 3 Jiaryhe Deuxu Tyhyhykỹ heka resỹnyre inaubiòwa adeereny rotỹỹnykremy aõbinabinamy: alòre-ki rururenykre iumyreny-di ijòròsa sudile rirurehemy idi rare nawii tai rirokre iumyreny uhe tahe iròdu bederahy kidirokre.
|
||
\v 4 Ibutu bede mahãdu ibinabinatyhymy iribireny rieryke. Esekia riòre Manasesi òraruki heka tuu kodotỹỹnykre Jerusalẽ iolòmy rareu ibina bina riwinyre òraruki.
|
||
\v 5 Deuxu rarymyhỹre: “Mobo adireny raruxetòenyke Jerusalẽ sỹdu mahãdu? Mobo umyreny nohõtiurere? Mobo adeereny rỹỹraxikre timybo atximahãtenyte.
|
||
\v 6 Tewabuatenyte dori! Tabroreny-di toosetenyte dori! Tai jiarỹ wadebò reukore idi arasorusonyre, araixãwididỹỹnyre heka wawo rexieryre dori. Jiarỹ hka Deuxu Tyhyhykỹ rarybemyhỹreri.
|
||
\v 7 Yhy-ò idi rehure kaa hãwã mahãdu iwese tiriku tatyy ribi rihitxinymyhỹ re wese, tahe arahurenyre ariòrereny rerubunyra dori ary binabina dori teriõmyhỹtenyte.
|
||
\v 8 Tulesỹ ỹnyra ruxõmomy ratyre wese heka ayreny-ki wytese hawyymy roire, jiarỹ tuu rewinyre, ariòrereny tymỹra rerubunyre; isereny ribedewonyre, aõwesele heka ityrereny aõbinabina rehemynyre.
|
||
\v 9 Ise debó inatxi reurò iriòre sõwere tai aõwesele ibutumy rurure idi ise tõhõtibrera. tuu rewinyre jiarỹ; tii rabedewotyhymy roire sõwemy rirajuamyhỹ. Irulemy rỹire mahãdu heka ixinamy óludu mahãdu ararubunyrenykre. Jiarỹ Deuxu Tyhyhykỹ rarybere.
|
||
\v 10 Wabededỹỹnana heka isiratyhyrewa! Aõherewe jiarỹ nadi ribi reare! Boreka! Jiarỹ ibutu ka mahadu-ò arejeijeinykre inyõ ribi nieru remyõra nieru tule huòtemy iribi remyra aõkõ rewahinyre, ihỹre heka ibina binamy jiarỹ tamyremy ratximyhỹre riwabuarenyre dori!
|
||
\v 11 Waha Deuxu òbitimy aõkõ adee rewinyra ãobo waòludu mahãdu idireny adee rexitoenyõre ixinamy ibinabinamy tiiboho ratxirenykremy.
|
||
\v 12 Womati ibòò ribi heka iny riòròõtyhy idi wiuriurimy rỹire ijõ brõse womati wana riuriurimyhỹ kia riòròõtyhy.
|
||
\v 13 Deuxu Tyhyhykỹ wadee rarybere: Jeremia, aõnaõna wihikỹ heka àoludureny riwyrenykre aòrarunareny òraru ki arisỹnynykre.
|
||
\v 14 Tulesỹ aòludureny wetxumy suiwitxiramy teryõheki matxibenyke wayrana òraruki heòty wese heka rare rooryymyrỹimyhỹ.
|
||
\v 15 Tai jiarỹ Deuxu-ó rerawonyre: — Deuxu Tyhyhykỹ kaile teeryte. Watxi õhõti beake biwawiòhenanyke. Waòludu mahãdu waheki ratximynhỹre biòwynyke. Idireny ihehemy matxikre riwarubunyke lau. Aòraru-kile riwabuare, riwalahire dori.
|
||
\v 16 Kai wadee tarybete tahe arybe sohoji sohojimy raholare. Deuxu Tyhyhykỹ! Ahõrõ jiarỹhe rare! tai dori arybemy wawo-ò awimy rybewimy ditỹxinade, wadeysare sõwemy.
|
||
\v 17 Ajuwemy awihikỹmy aõkõmy rỹiwahỹre iny mahãdu wana reysamy aõkõ ranywahỹre wabededỹỹnanamy aõmysỹdỹỹ sõwemy wadee tewahiny iòraruki tahe ixisohojimy jiarỹ rare tai iehehemy ranywahãre.
|
||
\v 18 Aõherekibo jiarỹ aõhõkỹmy ratỹỹnywahỹre? Waxiridòreny heka rubererehyymy rỹimyhỹre. Aõherekibo riteytenyõmy rỹire? Idi hyymy aratyhynykre aõbo? Besòròrò aõweselemy rarubumyhỹ weselemy kai aõbo tate?
|
||
\v 19 Deuxu Tyhyhykỹ wadee rirawyònyre: — Wadee bodoosekeki araòbykremy ixyby, wadeòdumy matxikremy, rybe òbitimy marybekeki tahe warybedỹỹdumy matxikre. Iny mahãdu heka adee rakre tahe kai tamyremy booseõtyhy.
|
||
\v 20 Womati òtity wesemy arasỹnyke kaa mahãdureny-ò adee araòbinanykemy tahe adee raõbinanyrenykre ihỹre rotaõtyhy awanamy ararekre arayrybynykremy, arawióhenanykremy aratakremy.
|
||
\v 21 Iny mahãdu binabina tebòreny ribi irurunareny ribi aratakremy. Jiarỹ Tyhyhykỹ rarybere.
|
||
\c 16
|
||
\s1 Jeremia bededỹỹnana deòsinamy rare
|
||
\p
|
||
\v 1 Ixybyle heka Deuxu Tyhyhykỹ narybere wadee:
|
||
\v 2 Hawyy wana boiõtyhy kaa suuki, tule kaki mariòreõtyhy.
|
||
\v 3 Tahe adee ararybekre kaki aõhebo rotỹỹnykremy inyriòreny-ò inysereny-ò iny tybyreny-ò.
|
||
\v 4 Aõbinana binabinahakỹmy rururenykre. Moõ idireny robuõtyhy tule idi rituunyrenyõtyhy. Raybytỹnymy iumyreny su-ki roikre. Alòre-ki rururenykre ada rama rirubunyrenykre, iumyreny nawii nawii kidiròkre, iròdu iròdu kidiròkre.
|
||
\v 5 Heto ibru ijõdire wana tai maloõkre. Idiremy mahinyõkre mabedewoõkre iny òraruki. Waywina-di aratxiõtyhy idireny arewotòenyõtyhy idireny aluuõtyhy. Jiarỹhe Tyhyhykỹ rarybereri.
|
||
\v 6 Kasuki heka ityhy mahãdu hawãdu mahãdu rururenykre ihỹre mõõ rituunyrenyõtyhy moõ rahinyõtyhy robuõtyhy.Moõ tadereny risureny õkre ibedewonareny òraruki.
|
||
\v 7 Rubu ijõdireu moô iny wana riroxiõtyhy idireny rawotòeõtyhy tule idi awi rybe-di rarybeõkre. Tyby ada tadi rurure hỹre awimy rarybeõkre.
|
||
\v 8 Tule heto-ki worona bedehesi ijõdikre tai rynamy rynyõkre tiiboho wana riroxiõkre
|
||
\v 9 Boholake Deuxu Tyhyhykỹ ruruduhukỹ Israeli Deuxumy rarybereri. Iwyhy raròsònareny arixãwidinykre hawyy hãbu wana herimy deysana wodỹỹreny arixãwidinykre. Kaiboho ibutumy kiamy bobibenykre kasukilemy kodotỹỹnykremy.
|
||
\v 10 Kia rybemy tamyreny belyykreu adee rỹỹraxirenykre aõhe aõhõkỹmy resynyre jiarỹ. Tii boho kàdỹỹraxirenykre: “aõbo rewinyremy aõòranamy waDeuxu Tyhyhykỹ-ò rewinyra dori.”
|
||
\v 11 Tai kai marybekre Deuxu Tyhyhykỹ irawyònamy heka rare: “Alabiereny dori riki riwarirenyra surioko-òle riki reàlàmy roiremyhỹ. Riwarirenyre warybemy reòbynyõtyhy riki.
|
||
\v 12 Tahe kaiboho riki iratyre tewinytenyte. Itxỹtemãhãtenyte ibutumy ibina binamy tewinymahãtenyte warybemy teòbynyõmahãtenyte riki.
|
||
\v 13 Tai doi kasu ribi arateònyrenykre suiwitxira-ò aradyrenykre dori kia su teeryteõtenyteri, riki alabiereny tule rieryõrenyre. Taile riki heka surioko beãlabenykre tahe arawotòenyrenyõtyhy riki.”
|
||
\s1 Tasureny roosenamy.
|
||
\v 14 Deuxu Tyhyhykỹ rarybemyhỹre. Tiu bedeubo bede rijeke ijõbedeu kiditehemynykre inyõ wanimy Deuxu iruhykỹmy rarybeõtyhy. Ejitusu ribi Israeli mahãdu jiarỹle rihedỹỹnyre dori.
|
||
\v 15 Tahe wanimy rarybekre ibòò ribi iwitxirasu iwitxirasu ribi Israeli Deuxu Tyhyhykỹ raubatỹnyre idi ixyby didydenyre tasureny-ò talabièreny-ò rewahinyre juhuu. Jiarỹhe Deuxu Tyhyhykỹ rarybere.
|
||
\s1 Surioko deàlàna òraruki aõhõkỹmy kàdàtỹỹnyre.
|
||
\v 16 Deuxu Tyhyhykỹ rarybemyhỹre: — Waxidu mahãdu kia mahãdu idi rawaxinykremy ariteònykremy. Riudu mahãdu ariteònykre idireny rariunykremy ibutu hãwãlò-ki ibutu mana hãwãlòwoki idireny rariunykremy, Deuxu Tyhyhykỹlemy rarybemyhỹre.
|
||
\v 17 Jiarỹhe ibutu tiiboho riwinymyhỹrenyre rabimỹhỹre dori. Waribi wote ijõõre iòrarunareny warue ribi wote ijõõre dori.
|
||
\v 18 Inatxi sõwe heka ariòwynykre iòrarunareny òraruki ibinabinareny òraruki. Wasureny heka ribinanyrenyre suriokoreny deàlànamy surioko heka rubudu rubu wesemy roire; wasureny heka ritỹxinyre tasuriokorereny aõ aõkõmy rare-ki
|
||
\s1 Bede mahãdu witxira witxira Deuxu-ò kodoosekremy.
|
||
\v 19 Jiarỹ rarybere. — Deuxu Tyhyhykỹ kai tewayrybynymyhỹte tewaruru dỹỹnymyhỹte waõhõkỹmy dỹỹnanahe tiwawiòhenanymyhỹte. Bede mahãdu witxira witxira irehe iribi adee kàdoidenykre tai raryberenykre: “inylabièrenymy heka isuriokoreny aõ aõkõmy roiremyhỹ isuriokoreny ruimy roiremyhỹre.
|
||
\v 20 Bede mahãdu aõbõ tasuriokoreny riwinykre aõbõ tadeuxureny. Kõre. Tiiboho riwinyke wana heka Deuxu tyhyhykỹ tiu aõkõmy roirekremyra inatyhynamy aõkõmy suriokomy roikremyra.”
|
||
\v 21 Deuxu Tyhyhykỹ rarybere: — Tiiboho warurunamy rieryrenykremy warurutyhymy rieryrenykremy tuhyymy. Tai rieryrenykre Deuxu Tyhyhykỹ wanityhy heka rare.
|
||
\c 17
|
||
\s1 Judà iòrarunamy iãõhõkỹmydỹỹnanamy
|
||
\p
|
||
\v 1 Deuxu Tyhyhykỹ rarybemyhỹre: Judá mahãdu aòrarunareny womati dese-ki rorytinymy rỹire, mana wihikỹ dese-ki awoki rorytinymy rỹire, axiwenareny mana desse-ki rorytinymy rỹire.
|
||
\v 2 Ariòreny aserá surioko-ò xiwena riwahinyrenyremy tõhõtireny itxi reamyhỹrenyre hãwãlò ratya-ki riderenyre surioko-ò tòò.
|
||
\v 3 Tai riderenyre tõhõtireny itxi reamyhỹrenyre. Aòludu mahãdu aõna õna reny wiwihikỹ riwyrenykremy aòrarunareny oraruki.
|
||
\v 4 Su adeereny rewahinyre heka tai maubenykre. Wetxumy matxibenyke my ariwinykre. Aoludureny wetxumy belekremy su teeruõ tenyte ki tai aradyreny kremy. Wayarana heòty wese heka roohyymyhỹre dori.
|
||
\s1 Bedeeryna rybemy
|
||
\v 5 Deuxu Tyhyhykỹ rarybemyhyre “Inyõ waribi rexirareamyhỹre aribuakremy, inyõ hãbu rurunamy rityhynyre-ki, iny ixiki rityhynyre tawo ki.
|
||
\v 6 Bederahy bede bina-ki aõ ruhunyõtyhy wese kia iny taruruna-di Tabedeeryna-di rexityhynykeki aõwihikỹ tamy aõkõ nade.
|
||
\v 7 Inyõ riwatyhynykeki tahe Deysanamy ariwahinykre tii wadi Deuxu Tyhyhykỹ riwatyhynytyhy kia iny-ò deysanamy ariwahinykre.
|
||
\v 8 Hãbu heka bederade ryimyhỹre wesena rare kia bero riòre ijàki rỹimyhỹre wesena; kia iratynareny òbitimy raratynymyhỹrenyre tairaruti bera-ò idi raybytỹnyre. Kia hãbu ruberuõre bede itòtèè nadeu iradereny heka awihikỹ rỹire, kia hãbu biu roareu heka nohõtiureõmy rỹire raratynymyhỹre dori.
|
||
\v 9 Mobo tawo-ki rierymyhỹre, inywo heka iny riitxenanymyhỹre. Inywo heka webinadu wesemy rỹire tiu riteyteõtyhy.
|
||
\v 10 Jiarỹ heka Deuxu Tyhyhykỹ iny raykywydynanymyhỹre. Iny sohoji sohoji heka tabededỹỹnana tawidỹỹna wesemy rewahinymyhỹre.
|
||
\v 11 Taheka hãbu obitiõmy ratyhynyre heka nawiisi witxiramy renarehe myhỹre wese kia hãbu rare. Tabededỹỹnana heka iaõna õna rianonykremyra ramatuarinyreu heka bedeeryõre mahãdu wesemy relere.
|
||
\v 12 Taheka iny deàlàna heto biukihikỹlemy rỹire ihetxiu ribile wahe.
|
||
\v 13 Deuxu Tyhyhykỹ Iny mahãdu raròsònamy tate. Ararire mahãdu heka rabedewotyhymy ratxikre, inireny heka ỹnyra rorytinyre wese heka tiiboho rabynyrenykremy, aribi reatyrenyre mahãdu heka besòròrò wihikỹle ribuare kia iwesele Deuxu Tyhyhykỹ inydereny tate.
|
||
\s1 Deuxu-ò Jeremia reixitòenymyhỹre riwiòhenanykremy
|
||
\v 14 Waha Deuxu Tyhyhykỹ biwateytenykre tai arateytenykre; biwatake tai aratamy aratxikre, adee arawiunymyhỹkremy dori.
|
||
\v 15 Inyõ wadee rarybemyhỹre. Tikibo Deuxu rybemy kodotỹỹkremy? Ixinamy wijihe kanake irybe wesemy!
|
||
\v 16 Tahe jiarỹ waDeuxu! Adee reixitòenyõre aõbina bina ityrereny resekremy, adee reixitòenyõre dori aõhõkỹmy tamyreny reixitòenyõre adee. Waha Deuxu warybemy teeryte dori!
|
||
\v 17 Wabrebudyyõmy waDeuxu wahedỹỹdu wihikỹ tate!
|
||
\v 18 Waòludu mahãdule heka ixinamy rabedeworenykre dori, jiarỹ tahe aõkõre. Tiibohole bibrebunykre tahe jiarỹ aõkõ. Ityrereny ixinamy aõbinabinahakỹmy biwahinyke; idireny mahukre.
|
||
\s1 Sábado txumy
|
||
\v 19 Deuxu wadee rarybere: Jeremia hãwã ijòtòbòna-ò makre taile iòlò mahãdu iribi ralòmyhỹre idi rohònymyhỹre iribi. Ijõ hãwã rirurawo ijòtòbònamy tule idi makre.
|
||
\v 20 Ijotobona-ki matxikreu tahe ibutu raloreri mahadu-ò warybemy marybekre, ibutu Judá mahãdu-ò warybemy marybekre Jerusalẽ mahãdu-ò ijòtòbòna ribi ralòmyhỹre-ò warybemy marybeke.
|
||
\v 21 Tamyreny marybekre uritre sábado txumy aõdi raixỹnyõtyhy tai irumy matxibenyke; sábado txu heka Jerusalẽ hãwã-ò aõ bidiwyõtyhy.
|
||
\v 22 Asỹreny ribi aõ idi ixenaõmyhỹbenyke. Sabado txu heka idi maõmysydỹỹõmyhỹbenyke; sábado txu heka txu wihikỹmy rarekre Deuxu-ò iwese alabièreny-ò rarybere Jiarỹ.
|
||
\v 23 Tahe warybe-ò roholaõmyhỹrenyre wirile warybemyreòbynyrenyõre rityhynyrenyõre tõhõtitxurenyre dori.
|
||
\v 24 Tamyreny marybeke: Biwatyhynybenykemy taworeny ribi. Sábado txu heka aõitxutaka hawa-ò idi raixỹnyõtyhy sabadu txu heka awihikỹ tyhy Deuxu-ò. Sabado txuu aõwidỹỹõmymahãbenyke, tamyreny marybeke.
|
||
\v 25 Tai ixiery iòlo mahãdu Jerusalẽ ijòtòbòna ribile heka rironyrenykre, Davi alabièreny Davi iòlò ityhy wesemy rarekre tai karru-di rariarenykre awaru-di Judá mahãdu wana Jerusalẽ mahãdu wana rariarenykre dori Jesusalẽ hãwã sỹdu mahãdu tuhyymy rỹikremy.
|
||
\v 26 Tiiboho Judá hãwã ribi, Jesuralẽ hãwã ribi, Benjami suulutu ribi, iraru mahãdu kia mahãdu xiwenamy heka kidirahukremy rawosikremy bederaty xiwenamy, xiwena deàlànamy kidiwydenyde xiwena heto-ò.
|
||
\v 27 Ihỹre tahe sábado txuu heka rityhynyõkeki aõitxutaa raixỹnykeki, hãwã-ò ijòtòbòna ribi riwykeki tahe aritoonykre hãwã ijòtòbònamy. Tai heòty inyõ rityrinyõtyhy Jerusalẽ hãwã ituekre dori.
|
||
\c 18
|
||
\s1 Butximy Deuxu riwesenanyre.
|
||
\p
|
||
\v 1 Deuxu Tyhyhykỹ wadee rarybere:
|
||
\v 2 Bubeheke butxi widỹỹdu heto-ò tai adee ararybekre.
|
||
\v 3 Rare butxi widỹỹdu heto-ò heka tai tii butximy relemyrỹireri su òwòru tyre-ò roiremyhỹre.
|
||
\v 4 Butxi iu widỹỹdu tebò-ki butxi ribinanymyhỹreu heka iwitxira suu tii rimymyhỹre ta ijõ delemy riwinymyrare ixidewimy.
|
||
\v 5 Tai Deuxu Tyhyhykỹ wadee rarybere:
|
||
\v 6 Israeli mahãdu iwese aõbo adireny ariwinyõkremy aõbo? Iwese butxi widỹỹdu butxi riwinymyhỹre Israeli mahãdu wese ariwinyõkre aõbo. Iwese butxi tawidỹỹdu tebòki rỹireri iwese heka wadebò-txi tỹimahãtenyte. Deuxu Tyhyhykỹle rarybemyhỹre.
|
||
\v 7 Aõwesele wadewimy bede mahãdu aritakremy watxireri iòlònamy arahukremy wadewikeki.
|
||
\v 8 Ka mahãdu heka taõbina binareny ririkeki tai jiarỹ ariwinyõkre aõmybo rarybere, arisynyõtyhy atyrereny.
|
||
\v 9 Tulesỹ ararybekeki kasu hãwãmy ariwinykremy tai iny mahãdu iòlònareny ijõdi kremy, ararybekeki
|
||
\v 10 tahe kia mahãdu aõbina binamy riwinyrenykeki, warybemy riobynyõkeki tahe ariixãwidinykre warybemy ariwinyõtyhy warybe wesemy.
|
||
\v 11 Taheka wijihe Jeremia marybeke Judá mahãdu-ò Jerusalẽ mahãdu-ò aohokỹmy dỹỹnanamy tamyreny arisỹnykremy rahõtinymyhỹre. Tamyreny bibedeerynanykre tiiboho-ò iaõbina bina ribi ixãwikemy rexiòbitinyrenykremy.
|
||
\v 12 Tiiboho adee raryberenykre: aõkorẽ wadewimyle ariwinyrenykremy idi rahõtinyrenyre iwese ariwimyrenykremy dori, wawobina bina iwesemy ariwinyrenykre waitxỹtenareny weselemy ixinamy aratxirenykremy, waworeny weselemy aratxirenykremy.
|
||
\s1 Deuxu iny mahãdu ribuamyhỹre.
|
||
\v 13 Tahe Deuxu Tyhyhykỹ rarybemyhỹre: “Ibutu bede bede mahãdu-ò bỹỹraxikre Israeli mahãdu aõbinahakỹ bede riòtiinyre aõbo? Israeli mahãdu heka aõbina binahakỹ riwinyre aõbo?
|
||
\v 14 Boholabenyke Libanosu aõbo hãwãlò-ki gelo wese aõbo rabynyra? Hãwãlò ribi bee ituere aõbo.
|
||
\v 15 Ihỹre heka wamahãdu waribi tõhõti rusare surioko-ò xiwena lỹnyre ritoonyre tamyreny. Ryy òbitidi rariakremy iwareny rytynymyhỹre. Ihetxiu ryy aõkõmy roirenyrehe tahe iwitxira ryy idi ikotxidi roirenyre kia ryy heka iwaryreny ijõõre dori.
|
||
\v 16 Kaa suu-di ribinabinatyhymy, tii boho tai dori kasu heka ibinatyhymy relekre. Kaasu heka inyõ iribi rariarenykreu heka ibinamy kasuki raharenykremy.
|
||
\v 17 Jiarỹ wamahãdu-di ariubỹtỹnyrenykre iòlòdureny-ytxi iwese yhy ribonymyhỹre iwese idireny ariybỹtỹnykre. Wabròmy tamyreny aròosekre arawiòhenanyrenyõtyhy aõbina binahakỹ rehemynykreu ariwiòhenanyrenyõtyhy!”
|
||
\s1 Jeremia rirubunyrenykremy rõhõtinymyhỹrenyre.
|
||
\v 18 Inyõ mahãdu raryberenyre Jeremia-ò: — Timybo ariwinyrenykre! Inyboho heka Deuxu rybedu mahãdu tuhyy ijõdire inykireny, rybedu bedeery heka ijõdire Deuxu rybemy wadeereny rarybekremy. Jeremia-ò ibinabinamy araryberenykre irybe-ò rokoholarenyõtyhy.
|
||
\v 19 Tai jiarỹ Jeremia Deuxu-ò rexitòenyre myy: — WaDeuxu Tyhyhykỹ waòludu mahãdu wamy rarybereri boholake.
|
||
\v 20 Aõwihikỹ aõbinabina-di aõbo iny riòwynymyhỹkre aõbo. Tiiboho heka hãloo riarenyre jiarỹ tai resekremy. Waha Deuxu ohõti itxi beakre idireny adee reixitòenyre ayarana-di tamyreny idi mahuõkemy.
|
||
\v 21 Wiji tahe ixinamy iriòrereny rama rirubunyrenykremy alòre-ki ixinamy rururenykremy. Ihawyy mahãdureny wytesemy relerenykremy, iriòrereny rururenykremy, binana ihãbureny rirubunyrenykremy, iriòrereny weryrybõ alòreki rururenykremy.
|
||
\v 22 Ixinamy aõbina mahãdule wasilemy ihetoreny itxi rearenykremy, tai heto wedureny heka rirajuarenykremy brebu-di, tiiboho hãloo heka wadee riarenyre dori riwamykremy.
|
||
\v 23 Deuxu Tyhyhykỹ kai tahe teeryte ibutu aõbina bina tii boho riwinyrenyre riwarubunyrenykremy iòrarunareny heka bisuhõõkre, bede-ò idireny behukre. Ayarana dilemy tuu biwinykre.
|
||
\c 19
|
||
\s1 Butxi webòhònamy
|
||
\p
|
||
\v 1 Deuxu Tyhyhykỹ wadee rarybere butximy ariòrykremy. Iny matuari boho wana arakremy tule xiwena wahisidudỹỹdu wawanamy aridykremy.
|
||
\v 2 Behimõ su-ò ijòtòbòna-txile nihiỹmy taile irybemy ararybekremy rybe teremy.
|
||
\v 3 Tahe Deuxu wadee rarybere: — Judá iòlò mahãdu, Jerusalẽ mahãdu bohalabenyke Deuxu Tyhyhykỹ rybe-ò, kasu-ò aõbina binahakỹ ariteònykremy ibutu aõbina bina ariteònykremy iu heka inyõ mahãdu ibutumy ruberurenykre, rohola mahãdu tule kuduberurenykremy.
|
||
\v 4 Kiamy ariwinykre heka Israeli mahãdu riwarira, kasu ribinanyrenyre-ki suriokoreny-ò xiwena risõre-ki. Kia suriokoreny heka iny mahãdu ilabiereny Judá iòloreny kia suriokoreny aõ rieryõrenyre dori. Inyõ mahãdu hãlubu-di ritỹxinyre kasu-ki.
|
||
\v 5 Baali surioko-ò tariòrereny xiwenamy rirubunyreny. Kiamy aõkõ Jiarỹ reixitòenyre, tuu retidiõre, rarybeõre.
|
||
\v 6 Tai dori Jiarỹ Deuxu Tyhyhykỹ rarybewahỹre tiutxubo kaa Tobete hãwã aõkõ raninikremy Behino aõkõmy raninikremy rubusumy raninikre.
|
||
\v 7 Kasu-ki heka Judá mahãdu Jerusalẽ mahãdu iòludureny ixinamy rirubunyren kre tai nawii nawii-ò iumyreny rirokremy bederahu iròdu tule.
|
||
\v 8 Tai tahe kaa hãwã arahukremy watxireri riradu mahãdu kaa ribi rariakreu heka ibinamy tai rahakre aõbina binahakỹmy robirenykreu.
|
||
\v 9 òludu mahãdu heka hãwã riruraworenykre idi sỹdu mahãdu rirubunyrenykremy. Ibina binatyhytyhykre tai dori tariòrereny umy riròrenykre dori, tasỹ weraludu mahãdu umy riròrenykre tule ibinatyhytyhymy heka rarekre.
|
||
\v 10 Tai heka wawana rare mahãdu butxi aribòhònykremy Deuxu riwateònyre.
|
||
\v 11 Tai Deuxu wadee rarybere ararybekremy myy: Butxi ribòhònyre tiu iyreyrereny-di ixyby releõtyhy, iwese ka mahãdu ka hãwã idi arehukre. Tobete ka hãwã-kile rurukre mahãdu kaki rituunyrenykre ijõsu-ò itxi rahaõkre dori.
|
||
\v 12 Ka hãwã Tobete wese arisỹnykremy. Jiarỹ Deuxu Tyhyhykỹ rarybemyhỹre.
|
||
\v 13 Tobete wese heka Jerusalẽ hetoreny ixu wesemy ratxikremy, iòlò hetoreny heka Tobete ixu wesemy relekre.Kia heka ibutu surioko-ò xiwena lỹnyrena risõkeki tai ixumy ratxikre, ibutu heto heto taina-ò deàlànamy, titxibo mona xiwenamy tewahinytenyte-ki wahe.
|
||
\v 14 Tobete ribi jiarỹ rabuareri tai Deuxu rarybere irybemy ararybekremy. Tai jiarỹ xiwena heto-ò rare lamamy rỹire ibutu taile mahãdu rỹire-ò relyyre.
|
||
\v 15 Deuxu Tyhyhykỹ rarybere: Kaiboho õhõtitxurenyre warybe-ò boholaõtyhy tai kaa hãwã, isỹweraludu ibutu aõbina binahakỹmy rarybere-ki adiwisỹnyde dori.
|
||
\c 20
|
||
\s1 Pasu, Jeremia wana
|
||
\p
|
||
\v 1 Xiwena heto Ime riòre Pasu xiwena wahidỹỹdu heka warybe-ò roholare heka.
|
||
\v 2 Tai riwahetenykremy riteònyre wadera-ki womati-di riwatyakemy Bejami ijòtòbòna-ki riwawokrore templo iòhòmy.
|
||
\v 3 Ijõ ibiurasòmy tahe Pasu womati ribi riwatare iribi heka jiarỹ rarybere: — Pasu, Deuxu ani rawitxiranyre Pasumy aõkõ araraninikre tahe ibutu mahãdu alau kuduberukre.
|
||
\v 4 Ani heka rarekre ibutu aõ aõ ribi brebunamy kanakemy abiòwa mahãdu adee tule. Abiòwa mahãdu heka aòludureny maurehereny-dilemy rururenykremy tuu bobikre. Tai heka Judá mahãdu heka Babilonia iòlò ridykre. Ijõ mahãdu Babilonia-ò ridyrenykre wetxumy, ijõ heka rirubunykre.
|
||
\v 5 Kaa hawã heka aõna õna wihikỹ ixinamy òludu mahãdu ridykre. Ibutu iòlò aõna õnawiwihikỹ Babilonia-ò ridykre.
|
||
\v 6 Kai Pasu tule amahãdu wana rotena-ò ralokre. Abiòwa mahãdu wana aratuunyrenykre, tai Babilonia-ò abiòwareny-ò ruimy tarybete tii wanareny buburkre tai.
|
||
\s1 Jeremia aõbina binamy rexirubenymyhỹ.
|
||
\v 7 Waha Deuxu tiwaitxenanyte-ki tai itxenadỹỹnamy rỹireri. Waribi ratyre tiwabòdunyta. Iny ibutumy riwalahirenyre ruudimy bederatxioronyre-ò.
|
||
\v 8 Tuhyymy iteremy rarybemyhỹre myy: — “Òhòtemy kanỹikremy! arahurenykre!” Deuxu Tyhyhykỹ iny mahãdu riwabuarenyre dori! Riwalahirenyre arybemy rarybemyhỹreu.
|
||
\v 9 Tahe jiarỹ aribi wanõhõti rusakemy idi rahõtinymyhỹreu heka animy tule ararybeõkremy tai wawo-ki arybemy reyremy ryimyhỹre wawo-ki heòty wesemy roomyrỹire, arybemy wawokihyy reyrybunyre wadeehe iutxiere dori.
|
||
\v 10 Iny sõwe sõwe wasimy raryberybemy rỹimyhỹre “aobina binamy ibutu aõ ribi kanake Jeremia òraruki.” Tahe rarybemyhỹrenyre. Wabiòwatyhy heka aresekremy reraòmyhỹrenyre. Tiiboho ritobinymyhỹrenyre timybo riwamykremy reraòrenyre riwaòwynykremy.
|
||
\v 11 Ihỹre Deuxu wawana atximahãte ruruduhykỹ atxiteri. Waijedu mahãdu iwareny sutoò iwa riwekre, tahe sõwemy raixỹrurunykre bede-ò reserenykreu tai ibededỹỹnanareny ibinatyhyre tiu rexiuõtyhy.
|
||
\v 12 Waha Deuxu Tyhyhykỹ aòbitina-di tewaurihimyhỹte warayky wydynamy teeryte wawo-ki teerymyhỹte ixinamy waòludu mahãdu aõhõkymỹdỹỹnany bisỹnykreu heka arobikremy. Jiarỹ dori wabededỹỹnana heka ebòkile retadire wahe.
|
||
\v 13 Deuxu-ò Tyhyhykỹ beàlàbenykre aõbina mahãdu ribi hawãdu mahãdu tetamyhỹte.
|
||
\v 14 Waijirana txu heka ibinatyhyrare! Nadi ribi reare txu heka õhõti rusakre!
|
||
\v 15 Inyõ waha-ò rarybere heka, ariòre weryry reare, kia hãbu ibinamy rỹikre.
|
||
\v 16 Sõwe hãwã Deuxu rahuremy iwesemy kia hãbu rarekre. Alòre-ki iny raohitxinymyhỹre wesemy roholakremy, aõma rudile ribi ijesu txuberere wesemy roholakre txutue-ò.
|
||
\v 17 Aõherikibo wajirana txuu tewarubunyõte tahaka! Nadiwo arurukremy awire wadee tai nadiwo-ki rarura wana wabede wesemy hãloo wesemy riatuunykremyra iny! Tai jiarỹ tiu reaõkremyra dorihe!
|
||
\v 18 Aõherekibo nadi ribi reare jiarỹ? Bedewona-ò sohojilemy aõbo? Rybererelemy aõbo wabededỹỹnana ibinatyhymy ratxikremyra aõbo jiarỹ reare?
|
||
\rem Missing Chapters 21-52
|