kpj_reg/21-ECC.usfm

\id ECC
\ide UTF-8
\rem Silas Report:
\rem Missing Verse: c 3 v 9 (could be possible that is on the v 8
\rem Weird Symbol: c 1 v 1 *
\rem c 7 v 21 and v 22
\rem c 8 v 3
\rem c 9: v 1; 2; 3; 7; 9; 10; 11; 12 and 14
\rem c 10: v 3; 4; 6; 7; 8; 9; 10; 11 and 19
\rem c 11: v 1; 2; 4; 5; 6; 8 and 9
\rem c 12 v 1 and v 2
\rem aut Ijeseberi
\rem dat 1989
\h Bedeery Nihikỹ Iurihidỹỹnana
\toc1 Bedeery Nihikỹ Iurihidỹỹnana
\toc2 Bedeery Nihikỹ Iurihidỹỹnana
\toc3 ecc
\mt1 Bedeery Nihikỹ Iurihidỹỹnana
\mt2 Eclesiastes do Sabio  
\mt3 Eclesiaste 
\rem mt ECLESIASTES
\s1 Eclesiastes do Sabio

\c 1
\p
\v 1 Kaheka bedeery nihikỹ rybe rare. Davi riòre heka rare iwidỹỹdu. Tii Jerusale Iòlòmy raremyhỹ.
\v 2 Bòdỹỹna, bòdỹỹna heka rare. Kamy Bedeery rarybere. Kia heka ibutumy bòdỹỹnale hekỹ rare.
\v 3 Iny mahãdu heka tabededỹỹnana aõmysỹdỹỹmy rahumyhỹre, rexiaõtamyhỹre. Kia tahe ionana rehemynymyhỹreu inyboho ròtamyhỹrenyre?
\v 4 Iny mahãdureny rexijuamyhỹrenyre. Iny mahãdureny rurumyhỹrenyre kabede-ki hãwã nihikỹ.
\v 5 Txuu ixiyrybuhukỹle ròhònymyhỹre, kia tahe ixybyle talamana-ò ròòsemy rỹimyhỹre, ixybyle rohònymy rariakremy.
\v 6 Yhy heka iraru-ò rebonymyhỹre, iraru-di tahe ibòò-ò rebonymyhỹre, kia tahe ixybyle tatytyby-di ròòsemyhỹre ixihetyretyle.
\v 7 kia tahe tabutunakile rexihumyhỹre, kia heka ibutumy bero mahãdu bero nihikỹ roimyhỹre-ò rekoamyhỹrenyre, kia ribi tahe bero nihikỹ rỹxiõhyymyhỹre. Kia bee ixybyle ròòsemyhỹre tiribibo bero ròrarunymyhỹre-ò, kia ta ixyby tuu rekoamyhỹrenyre.
\v 8 Kia heka ibutumy aõnaõna inyboho deyurese nikikỹmy risỹnymyhỹrenyre deywese inihikỹmy, kia tiu inyboho idi butumy rikirarenyõtyhy. Iny ruereny heka reyweserenyõhyymyhỹre aõnaõna-di itxere-di, kia iny nohõtireny tule reyweseõhyymyhỹre aõnaõnamy ijohona-ò.
\v 9 Aõbo komy rutỹỹnyre, kia ixybyle tuu rutỹỹnyre. Aõbo komy rotỹỹnyre, kia ixybyle relekre.
\v 10 Kia aõbo ijõdire iny aõmy rarybekemy: “Beteheni, kia heka tiu kaki bebe-ki tuu rutỹỹnyõhyyre? Kõre kia ibutumy tuu rutỹỹnyre inykoreny-ki, kia iny boho ruarenyõule tuu rutỹỹnyre.
\v 11 Iny-õ heka itxi tõhõti reaõhyymyhỹre aõbo juhuu rutỹỹnyre-di; mobo irahudi kamakre, kia aõnaõna rõkõnykre tuu bedeu, kia ihãre itxi tõhõti reaõhyyre.
\v 12 Diarỹ wabedeeryre, diarỹ heka Israel Iòlòmy raremyhỹ Jerusalem bedeki:
\v 13 Diarỹ rexiywinyre aõbo kaki hãwa nihikỹ roimyhỹre arienykemy idi aratyritinykremy. Kia heka Deuxu aõmysỹdỹỹ inihikỹmy wadeereny riwahinyre, kia inihikỹmy reywesemyhỹrenyre.
\v 14 Diarỹ heka ibutumy aõbo kaki hãwa nihikỹ-ki roiremy rabimyhỹre, kia take myy rarybere: kia heka ibutumy raihyyle rare. Kia heka ibutumy iwese yhy kewo-my reomyhỹre wesele.
\v 15 Kia tiu iny-õ riõbitinyõtyhy aõ ikòemy raimyhỹre-ribi, kia tiu idi rariaõtyhy tiu ijõ rasiranymyhỹre-wana,
\v 16 Kia take myy rahõtinyre: "Diarỹ heka ixyby kãbu nihikỹ-my relere, ixyby wabedeery nihikỹmy, kia Jerusalem hãwa ridinodunyrenyre ratyre-my rỹimybỹre, aõbo rareymy rỹimyhỹre."
\v 17 Kawese-my take reijere timybo itxi areakemy arierymy bedeerynana, aõbo ibinamy rỹimyhỹre, kia heka inyle ixidi aõeli rãhõtinyõmyhỹre. Diarỹ heka itxi reamy ramyhỹre, kia heka iwese yhy wihewamy reamyhỹre wesele idi retehemyhỹre.
\v 18 Kia bede rierywiwimyhỹre-wana, kia heka ixyby iny-my reletyhymyhỹre, ka inywoxi robu robumyhỹre tahe ijodihyyre; Kia bede inihikymy rierymyhỹre-wana, kia aõtxi aõhyymy rutỹỹnylemyhỹre.
\c 2
\p
\v 1 Tai tahe areysakremy rexiywinyre, waki bedeki aõnaõwiwihikỹ-ò arexideysanykremy rexiywinyre. Kia ta itxi rearemy reeryre, kia heka bõdỹỹnaõle rare.
\v 2 Kia heka rebutunyre, iny widee rutxue mymyhỹre, kia ibina rare, kia iny widi rexiruburubunymyhỹre, kia aõmy inydee awiõhỹỹre.
\v 3 Kia fa ixybu timykibo ijõ-txi areakemy reijene, kia tahe (vinho) tori mona-di rexideysanyre. Idi rahotinyre tii aõnaõna-ribi awityhy resỹny raholare, iny ide rexideysanymy fabecledyynana riore-di kaki su-ki.
\v 4 Aõnaõna ninihikỹ heka rewinyre. Heto ixidee rewinyre, kia tahe Uva ixidee rebrònyre.
\v 5 Kia oworu riòre rebrònyre, kia ibutumy bederade òtaòta tuu rebrònyre.
\v 6 Kia suwory rewinyre idi bee alòbròna-ò reamyhỹkremy.
\v 7 Kia sõemy iny aõmysỹdỹỹdu mahãdu reõbranyre, kia ihãremy ta ijõ waki rỹira, kia wahetoki ruarenyre. Diarỹ sõemy broreni waki ijõdire, kia sõemy budoeni waki ijõdire, kia iny mahãdu wakoki Jerusalem-ki rahãwanyrenyre ratyremy wanohõ ijõdire.
\v 8 Kia manatere rỹsỹ womati rỹsỹ-wana ixidee rebutunyre, Iòlò hõrõ wahe, kia suuki redinodunyreki wahe. Hãbu mahãdu hãwyy mahãdu-wana wadireny rawiunyrenyre rexideybinymy, Kia ibutumy hãwyy mahãdu rỹire, hãbu mahãdu-ribi aõwaxina ijõmy bexitòenyke.
\v 9 Kohe, diarỹ heka ityhy nihikỹmy raremyhỹ. Diarỹ heka ityhy nihikỹmy raremyhỹ, kia ibutmy Jerusalem-ò hãwamy dirahude wakoki, kia iratyrerenymy ityhymy raremyhỹ, kia tahe tiu bedeery waki rasiranyõhyyre.
\v 10 Kia ibutumy aõmybo reamy raremyhỹ-txi ixidee remyre. Kia ixidee aõmy raroiõhyymyhỹre, aõnaõna wiwiki. Diarỹ heka awimy ixiki rahãmyhỹre waõmysỹdỹỹnaki, ka heka juhuu waõmysỹdỹỹ reeryre.
\v 11 Kia ta, ibutumy aõnaõna-di reledi rahõtinyre, kia waõmysỹdỹỹnaki rewinyredi tule, kia tahe reeryre, kia heka ibutumy bòdỹỹnale rare, kia iny aõ idi ritaõhyymyhỹre. Kia heka iwese iny yhy hewomy reamyhỹre wesenale rare.
\v 12 Tai tahe, ixyby rahõtinyre bedeery nihikỹdi, kia iny itxỹte mahãdudi tule. Beteheini iurihina:Kiaõbo Iòlò aõwaxina aõ riwinyke itỹmyramy? Kõre. Kia aõwaxina Iòlò mahãdu riwinyrenyretybyle riwinyke, kia Iòlò mahãdu ikoki ridinodunyrenyre wahe.
\v 13 Kia ikonana-ò rehemynymy reeryre, kia bedeery nihikỹ heka iny itxỹte mahãdu-ribi awire, iwese tahe loosona bedeluru-ribi awire.
\v 14 Kia tahe diarỹ reerymyhỹre, kia aõhebo bedeery nihikỹ rutỹỹnymyhỹrenyre, kia iwesele iny itxỹte mahãdu aõhe rutỹỹnymyhỹrenyre.
\v 15 Tai diarỹ myy rahõtinyre: “Aõhebo iny itxỹte mahãdu rutỹỹnymyhỹrenyre, kia iweserenyle aõhebo arutỹỹnykre. Taita, aõbo tahe tai retare bedeery nihikỹmy wahãreki?” Kia ta rerawyònyre: “Aõ retaõhyyre!”
\v 16 Tiu heka iny-õ ixitxi ikiemy tõhõti ijaraõna bedeery nihikỹmy, kia iyrybule tiu inyõ iny itxỹte mahãdutxi tõhõti reaõtyhy kiehyyle. Kia bedekonanau ibutumy iny boho rukusarenykre. Ibutumy rukururenykre, bedeery nihikỹ mahãdu iny itxỹte mahãdureny-wana.
\v 17 Iurenana heka bededỹỹnana raòrarunyre, kia aõki wadee awiõhyyre: Kia heka bedejeijeile wadee diwyde. Kia ibutumy bòdỹỹnale heka rare:diarỹ yhy hewotỹkỹna reamy raremyhỹ.
\v 18 Kia ibutumy diarỹ ijõdire, waõmysỹdỹỹnabrò-ribi ixidee rewyre, kia aõki wadee awiõhyyre. Kia reeryre ibutumy aririkre Iòlò-ò warynatyby-ò runykremy.
\v 19 Tii tahe txibo aõwaxina bedeery nihikỹ aõbo, yda txibo iny itxỹte aõbo —mobo tahe rierykre? Tai tahe tii ibutumy aõnaõna riwedunykre, ka diarỹ waõmysỹuludumy remyre wahe, kia tahe ibutumy riwedunykre, aõbo wabedeery nihikỹ wadee riwahinyre ka hãwaki. Kia heka ibutumy bòdỹỹnale rare.
\v 20 Tai tahe diarỹ ixidee rexirahere sõemy raõmysỹdỹỹnyreki, kia sõemy wanohõti rawerywerynyre iòraruki.
\v 21 Kia iny raõmysỹdỹỹnymyhỹre, tabedeerydi, taerynadi, taraywidi, kia aõ ixidee ritakremy, irahudi tahe ibutumy ixihewo-ò ririmyhỹre iny witxiradee, kia aõ riwinyõmyhỹredeele. Kia heka bòdỹỹnale rare, kia òbiti aõkõ rare!
\v 22 Iny boho heka raõmysỹdỹỹnymyhỹrenyre, iny boho rõhõtiyremyhỹrenyre bededi ibutumy, aõbo tahe iny boho idi ritamyhỹrenyre?
\v 23 Kia ibutumy aõbo iny boho riwinymyhỹrenyre, kia aõ inydeereny riwahinyõhyymyhỹre, kia heka nohõtiyrenale aõbinabinale inydeerene riwymyhỹre. Iny boho rekexielehynyrenyke ihoõre, rumy tule ihoõre. Kia heka ibutumy bòdỹỹnale rare.
\v 24 Aõbo iny awityhymy riwinyke, iny riroxike, iny monamy riõke, kia tahe rexideysanyke tanieru-di ritare wahe. Kia tahe reeryre, kia aõnaõna rỹimyhỹre, kia Deuxu-ribi namyhỹde.
\v 25 Deuxu ihoõkeki, timybo tahe aõbo rikirỹsỹrenyke, aõdibo tahe rikexideysanyrenykre?
\v 26 Tii heka bedeery nihikỹ, aõerydỹỹna, bede deysana inydee riwahinymyhỹre, momybo reòarimyhỹre-ò. Deuxu heka iny itxỹte mahãdu riaõmysỹdỹỹnymyhỹre, tanieryreny ributunymyhỹrenyre, kia iaõnarenytyhydỹỹna, kia iny witxira-ò rawahikremy, momybo sõetyhymy reòarimyhỹre-ò. Kia ibutumy bòdỹỹnale rare. Kia heka ibutumy iwese yhyhewomy reamyhỹre wesele.
\c 3
\p
\v 1 Kia heka ibutumy abededỹỹnana ikonanadi lehekỹ rỹire, kia heka biu bederawo-ò rawahimy roimyhỹre:
\v 2 Kia uladumy adiwo-ribi beakre, bobrokre, kia aõbo tebrònyte bisihekre;
\v 3 Kia beerynykre, kia beytekre; kia iny behukre, kia heto binykre;
\v 4 Kia bede biryrykre, kia tahe mabedesakre; kia mahinykre, kia tahe ta besekre ixenadi.
\v 5 Kia mana biuberanykre, kia mana widee bibutunykre; kia iny bimykre, kia iny-ribi bexilòhòrarienykre;
\v 6 Kia aõ biòrykre, aõ-ribi bexirykre; Kia aõ birarenykre, kia ahãna-ki boikre;
\v 7 Kia aõ biykakre, kia aõ biretykre; kia rybeõmy matxikre, kia marybekre;
\v 8 Kia inymy berinanykre, kia awoxiroburobukre, kia mawounykre, kia awimy wouõmy matxikre.
\rem ck last of v8. v 9 (FALTANDO)
\v 9
\v 10 Deuxu aõmysỹdỹỹnamy rabire, hãbu riòre mahãdu-ò riwahinyre tii boho-wana aõhỹỹhỹỹmy rutỹỹnyrenykremy.
\v 11 Deuxu ibutumy aõnaõnawiwi riwinyre ka hãwa bedeki raremyhỹu; kia hãbu coraçaõ-ò hedỹỹna riwahinylere, kia hãbu Deuxu aõmysỹdỹỹna rieryõhyymyhỹre, kia iòraru-ribi riòrarunyre ikonanaòhòkỹle.
\v 12 Tai tahe ibutumy bede reeryre kaki, aõbo iny riwinykre, kia heka timykibo awimy ibedesamy ratxikemy ixidi risỹnyke.
\v 13 Ibutumy heka iny boho rikiroximyhỹrenyke bemy rikiõmyhỹrenyke, awimy aõwi iny boho taõmysỹdỹỹna brò-ribi riwymyhỹrenyre. Kia heka Deuxu inydeereny riwahinymyhỹre.
\v 14 Kia heka ibutumy reeryre, Deuxu riwinyre ikiemy rỹikre; kia tiu inyõ rihejiõtyhy, kia tiu inyõ itarasaõna; kia heka Deuxu tuu riwinyre hãbu mahãdu ilau ruberurenykremy.
\v 15 Aõbo rare heka rare, kia aõmybo rarekemy raremyhỹ tule rare; Deuxu heka aõnaõna rexihure ixybyle riywinymy ritỹmyranykre.
\v 16 Kia ta ihãremy rabire txu rawo-ki, kia iny òbitimy rỹimyhỹre rynana-ki iny itxỹte riwedunymyhỹmy, kia tasỹ ijõ rynana-ki iny itxỹtele tai runyremy.
\v 17 Tai tahe ixidee rarybere: Deuxu iny inytyhy iny itxỹte mahãdu-wana ributunymy idireny rehukre; kia dori bededỹỹnana tuu roimyhỹre, ibutumy aõmysỹdỹỹna-ò tule.
\v 18 Kia ihãremy ixideele rarybere: Kia heka hãbu mahãdu riòre òraru-ki, Deuxu inatyhymy riteòsinykemy, kia tii boho ixidirenyle retehenykre iròdu iròdu wesemy.
\v 19 Aõherekibo aõbohe iwitxirare hãbu mahãdu riòre iròdu iròdu-ribi; kia heka ijõ rurumyhỹre, iwesele tahe ijõ rurumyhỹre, kia heka ibutumy wiweseweselemy rỹimyhỹrenyre, kia heka aõki hãbu riòre iròdu iròdu ratyre ròhònyhyymyhỹre; kiemy dori ibutumy irybe-ò ijohonareny rieryõre.
\v 20 Kia heka ibutumy wibedeõlehekỹ roirenykre; kia ibutumy sunode-ribi ròrarunyrenyre, kia tahe sunode-ò ròòserenykre.
\v 21 Mobo hãbu mahãdu riòre bededỹỹnana rierymyhỹre, kia biu-ò ixidireny ramyhỹremy, kia iròdu iròdu mahãdu tahe bede-ò, su-ò aõbo?
\v 22 Kia aõnaõwimy rabire heka ijõ wiribi awiõhyyre, hãbu ribedesanykemy iaõmysỹdỹỹna-ribi, kiemy kia tamy awire; mobo tahe ixyby kidiòkesedỹỹnyrenykre aõbo isỹtybyrenymy rỹikreu?
\c 4
\p
\v 1 Kia ihãremy ibutumy aõnaõna binabinamy rabire hãwa bede-ki. Kia uladu tybykõmy rỹimyhỹrenyre rubemy rabire, kia iny-õ riruxetòenyõhyylemy; kia aõhyymy rutỹỹnymyhỹrenyre deboki ehehenamy tuu rabire, kia moõ riruxetòenanyõhyylemy.
\v 2 Kia idi sõemy watximyhỹre, kia rexihurenyre, kia irumy rỹimyhỹrenyre ratyremy;
\v 3 Kia ihãremy wabedesamy idi watximyhỹre ijõ mahãdureny-ribi, kia uladumy ruaõmyhỹrenyre boho, kia dori aõmysỹdỹỹ binabinamy robiõlemy ratximyhỹrenyre, kia txu rawomy riwinymyhỹrenyre.
\v 4 Tai tahe ibutumy aõmysỹdỹỹmy rabire, aõmysỹdỹỹ utxiemy, ka heka hãbu mahãdu widee rexiwobinanymyhỹre. Kia heka xiwedele rare, yhy hewomy reamyhỹre.
\v 5 Iny itxỹte mahãdu heka aõ riwinyõlemy rỹimyhỹre, urile terowomy rerimy, kia taderenyle riròmyhỹrenyre, myy rarybemyhỹrenyre:
\v 6 Debole heka awire ixielehydỹỹna-ki, kia iny mahãdu debo sõemy aõmysỹdỹỹdi rỹimyhỹre, kia yhy hewomy reamyhỹrenyre.
\v 7 Kia ixyby ka hãwa bededỹỹnana-ki rahãre, kia awi aõkõ rare.
\v 8 Kia hãbu ixi sohojimy rỹimyhỹre, ibiòwaõmy, iriòreõmy, iseriòreõmy, kia ixyby ixybyle raõmysỹdỹỹnymyhỹre, kia tiu ixi-ki awimy rõhõtiõhyymyhỹre taityhynadi. Aõmybohe sõetyhymy naõmysỹdỹỹnymyhỹde, taõwiwi diatymy naõmysỹdỹỹnymyhỹde? Kia heka bòdỹỹnale rare, kia bede riryrymy ratximyhỹre.
\v 9 Kia iny inatxi-ki heka awire iny sohoji-ribi, kia iny inatxi wiwana raaõmysỹdỹỹnymyhỹre, kia tahe inihikỹmy ròtamyhỹrenyre.
\v 10 Txibo ijõ rariòwykeki, kia ibiòwa riwiòhenanyke rỹikremy. Kia txibo iny ixi sohoji ratxikeki tahe rariòwyke, kia tahe ibinamy tabededỹỹnanadi ratxikre, kiemy dori iny ihòõre riwiòhenanymy ritamadỹỹnykemy.
\v 11 Kia bede rutàtàkeu, kia tii boho aõwaxina wiwana rõrõrenyke, kia tahe ratòteerenyke; ka iny sohoji-ki tahe timybo rexitòteenyke?
\v 12 Iny inatxi hãbu tiu ibòdurenyõna, kia ijõ aõbina-ribi ròtake. Reruti sohoji inataõ reruti-wana kia isiramy rayròmyhỹre.
\v 13 Kia weryrybò iaõkõmy rỹimyhỹre, kia Iòlò matuari ribi ibedeerymy ratximyhỹre, kia itxỹtemy rube-ò roholaõhyymyhỹre.
\v 14 Kia hãbu-õ brejuna woribi kòdòhònyke hãrele hãwa nihikỹ wedumy runyke, kia iaõkõ ruake hãrele.
\v 15 Diarỹ ibutumy iny ka hãwamy rỹimyhỹredi rahõtinymyhỹre, kia tahe rahõtinyre kia heka hãwa bedeõ-ribi weryrybò ijõdire Iòlò ryrynadi rahỹỹnanykre.
\v 16 Kia heka sõemy iny rỹimyhỹre, kia tahe iny sohojile hãwa nihikỹ riwedunymyhỹre; kia tahe tiubo tahe Iòlò-ribi rexiixawidinykre, tiu heka iny-õ tawidỹỹnamy reàlàõhyymyhỹre. Kia heka bòdỹỹnale rỹire, kia yhyhemy reamyhỹre wesele.
\c 5
\p
\v 1 Ixidi arukimy atximyhỹke tibede-ò tamyhỹteu. Kiauritre aõsirasira iwahidỹỹõmy, iwese iny itxỹte mahãdu taõsirasira riwahinymyhỹre wese, kia tii boho rieryrenyke aõkõ, kia òbitimy aõkõ riwinyrenyreri. Bexihumy bexiywinymy mamyhỹke Deuxu rybe-ò bityhynykremy.
\v 2 Kia komy mohõtinykre marybekrekotyremy, kiauritre Deuxu aõ adee wylemy riurenykelau turybeõmykre. Deuxu heka biu-ki ratxireri, kai tahe suki atxiteri; iurenana tahe urihimyòmy mareke.
\v 3 Kia kai mohõtiuretyhykre-wana, kia ire uni atỹhimy araijekre; kia kai marybesõekre-wana, kia iny itxỹte mahãdu raryberenykre.
\v 4 Iwese tahe kai Deuxu dee arybe biwahinykre, kia wiylemy arybemy inatyhymy marybekre. Tii heka iny itxỹte mahãdu luuõre; iurenana ta aõmybo riwahinykremy rarybere biwinyke.
\v 5 Kialehe awireuritre aõ biwinykremy rubeõmyke, aõ biwinykre kotyremy, kia tahe tuu tarybeta hãrele teralemy beakre.
\v 6 Kiauritre arybetyhy òrarunamy rarybekelau iwahidỹỹõmy. Tai tahe kai timy aijoi mahãdureny-ò arybeõna, aõmybo kai marykemyra, kia aõbo raremy. Aõmybo tahe Deuxu umy radònykremy bisỹnykre? Aõherekibo tahe kai Deuxu aõnaõna aaõmysỹdỹỹuludumy ixidee tearite rihukremy biwahinykre?
\v 7 Kiemy dori iwese iny ibutumy rarasinymyhỹrenyre iximyreny, kia iwesele tahe irybereny sõere; iurenana tahe kai Deuxulau buberukre.
\v 8 uritre bede òtiidỹỹõmy, kia tiu kai tihãwa bede-ki hãwa dinodu aõnaõnabina riwinykreu, kia iny iaõkõmy rỹira mahãdudile tarukimy rexiemyhỹre, kia urile aõ ihõrõreny ilau ritòenymyhỹrenyre. Kia iny aõwedumy rỹimyhỹrenyre sohoji sohoji, kia heka tibo iratyreki ratximyhỹre wii riijemyhỹrenyre.
\v 9 Tii boho myy rarybemyhỹrenyre: “Ibutumy heka iny su-ribi aõnaõnawiwi ritamyhỹrenyre brò-ribi awimy ratximyhỹre.”
\v 10 Mobo nierumy rerinamyhỹre, kia tiu awimytyhymy ratxiõhyymyhỹre; mobo ityhymy ratxikemy ixidi rõhõtinymyhỹre, kia tiu ibutumy aõbo reamyhỹre rimyõtyhy. Kia heka tule bòdỹỹnale rare.
\v 11 Kia iny iaõdimy ityhymy rỹimyhỹre, kia iry tahe ijõdire riroxikremy. Aõbo tahe tai tii ritamyhỹre, kia iaõdimy ityhymy raeryke sohojikile awire.
\v 12 Aõmysỹdỹỹdu mahãdu aõwaxina taireny urihimyòmy txibo sõemy aõbo ijõdike irỹsỹnareny, kia heka tai awiriòre rumy rõrõmyhỹrenyre. Kia iaõdimy ityhymy rỹimyhỹrenyre, kia sõemy rõhõtiyremyhỹrenyre aõnaõnamy rõhõtinymyhỹrenyre, kia rumy rõrõrenywirenyõhyymyhỹrenyre.
\v 13 Diarỹ heka ka hãwaki aõnaõna bederyrynamy rabire: Iny mahãdureny-ò heka nieru ributunymyhỹre, kia tahe ihãrele idi aõhyymy rutỹỹnymyhỹrenyre.
\v 14 Kia heka ibutumy rihumyhỹre aõmysỹdỹỹna binaki, kia tahe aõ tariòre boho-ò ririõhyymyhỹrenyre.
\v 15 Timykibo tahe iny boho ka hãwa-ò rirònyrenyre, kia tahe iyrybyle iny riòlònymyhỹrenyre, aõnaõnahomy aõkõ. Kia iny boho iny aõmysỹdỹỹna brò-ribi aõ rikiwyrenyke ihoõre.
\v 16 Kia heka bederyry nihikỹõle rare! Iny boho heka ka hãwa-ribi rykòirenykre, iwese iny boho dòidenyde wesele. Sõemy iny boho raõmyhỹdỹỹnymyhỹrenyre, yhy rikimyrenykemy iny risỹnymyhỹrenyre, aõbo tahe iny boho tai ritamyhỹrenyre?
\v 17 Kia bederuluki bederyrymy rytxirenykrele iny boho ritamyhỹrenyre, rykõhõtiyrerenymy webinadu rykatximyhỹrenyle iny boho ritamyhỹrenyre.
\v 18 Tai tahe reerymy rebutunyre: Kiale heka awire iny-õ riroximy rỹimyhỹre, aõbo ritamyhỹre taõmysỹdỹỹna brò-ribi. Ka heka iny sohoji sohoji riònymyhỹre.
\v 19 Txibo Deuxu aõwi riwahinyre maityhynykremy, kia tahe aõdimy atximyhỹte biatyke, kia mabydesakre aõbo tetate aõmysỹdỹỹuludumy. Kia heka Deuxu adee riwahinyrerare.
\v 20 Kai tahe bede rexihumy ramyhỹre bieryõhyykre, kiemy dori Deuxu acoração bedesana-di ritỹxinykre.
\c 6
\p
\v 1 Kia ta ixybyle ijõmy rabire ka hãwaki bederyry nihikỹmy:
\v 2 Deuxu heka aõ ibutumy riwahinymyhỹre, iny aõmybo reamyhỹre wahe. Iny iaõdimy ityhymy runykremy, suu riwahinymyhỹre, ibutumy aõwiwi. Iribi tahe tamyreny riwahinyõhyymyhỹre idi elelemy ratxirenykemy. Kia aõ iwitxira tahe idi elelemy riuhemyhỹre, tii aõkõ. Kia tasỹ bònadỹỹnalerare, kia aõ òbiti aõkõ rare.
\v 3 Aõmybo tahe hãbu-ò sõemy bede beòra riemyhỹre, cem-my iriòre, kia aõnawiwidi riuhemy ratxireri wesehekỹ, kia awimy aõbo rityhynymy aõbo rituunyrenyre? Diarỹ rarybemyhỹre, uladu tarubulemy tadiwo-ribi reamyhỹre, kia heka tii iratyremy bede riòbynymy tuu reamyhỹre.
\v 4 Kia heka isirarare uladu nonana; tii heka bedelurutxi riõmyhỹre, tai rusamyhỹre.
\v 5 Kia bede loosonamy dee rehemynyõhyymyhỹre, kia timybo bede kaki roimyhỹre rieryõhyymyhỹre. Ka ixielehyna nihikỹtxi tahe reare, hãbu ratyremy.
\v 6 Kia ta inatxi wyramy bede rieke, kia kai hãwaki aõnaõna elelemy riuhemy aõkõ. Kia ikonanau tahe iny boho wihãwa weseòtyhy rykòirenytyhy?
\v 7 Kia ibutumy tarurumy raõmysỹdỹỹnymyhỹrenyre riroxirenykremy, kia ta tiu awityhymy ratxirenyõhyymyhỹrenyre.
\v 8 Aõbo tahe bedeery mahãdu itxỹte mahãdu ratyre-ribi ròtamyhỹrenyre? Aõbo tahe iny iaõkõmy rỹimyhỹrenyre mahãdu ijõdire bede rierymy ròtarenykremy, awimy ratxurenytykemy?
\v 9 Kiasỹ bòdỹỹnaõlere, iwese yhy reamyhỹre wesele. Kiale heka awityhyre, iny aõdibo ixiki idi rỹimyhỹre, kia ixyby iny aõdi risỹnymyhỹre ratyre.
\v 10 Kia ibutumy aõnaõna ròhònyre ka hãwa bedeki, kia tiwesebeu aõkõ riywinymy roimyhỹre. Kia iny uladu reakrekotyreuhykyle, kia raywimy roimyhỹre aõhebo rutỹỹnykre. Iny boho heka rierymy ratximyhỹrenyre, mobo iny ratyrerenymy inihikỹmy ratximyhỹre-wana tamy rybebina rikiwinyõrenykremy.
\v 11 Aõ sohoji heka òbiti rare: iny boho sõemy rarybemyhỹrenyre-wana, kia ire rybebinamy iny boho rarybemyhỹrenyre; kia tahe iny boho aõ idi ritarenyõhyymyhỹrenyre.
\v 12 Uriki inatyhymy, timybo tahe awityhymy rikieryrenykre, ubròrò reamyhỹre wesemy? Timybo tahe rikieryrenykre aõbo suki iny rykorenyki ròhònykre iny rubu sỹtybyrenymy?
\c 7
\p
\v 1 Inyni lyra heka deròna òwy nihikỹ ratyre-ribi awityhymy rỹimyhỹre; rubu txumy bede rỹimyhỹre heka uladu tadiwo-ribi reamyhỹre ratyre-ribi awityhymy rỹimyhỹre.
\v 2 Kia ijesuna heto-ò iny ramyhỹre heka awire, kia ixenaki heto rỹimyhỹre-ribi, kiemy dori ijesutxi iny nohõtireny reakre, kiemy dori tiu txuu tule rukururenykre. kia iny irumy rỹimyhỹrenyre mahãdu tahe tiu iribi tõhõtireny rusaõtyhy itxi.
\v 3 Bederyry heka awityhyre ajue-ribi; kia heka bederyry iny òsỹny rihumyhỹre, kia tahe icoracaõ rexiywinymyhỹre.
\v 4 Mobo kia alisidihyyle rõhõtinymyhỹre, kia heka iny itxỹte rare; mobo bedeery ratximyhỹre, kia rubudi rõhõtinylemyhỹre.
\v 5 Kia iny bedeery rybe-ò ijohonale heka awire, iny itxỹte wiu-ò ijohona-ribi.
\v 6 Iny itxỹte mahãdu jue heka iwese aõti heòty-ò roomyhỹre wesele rare — kia aõkehe aõkõre.
\v 7 Kia tiu bedeery raehehemyhỹreu, kia heka iny itxỹte wesemy relemyhỹre. Mobo aõdinodu nihikỹ dee rexiwahinymyhỹre, kia taumy ribinanymyhỹre.
\v 8 Kia aõkonana heka aõ òraruna ratyre-ribi awimy ròhònymyhỹre. Iny webinadumy rỹimyhỹre heka iny rexityhytyhynymy rỹimyhỹre raty awire.
\v 9 Kia ixidi bexiywinymy ikemy atxike; kia iny itxỹte mahãdu adebure yarale rirỹsỹmyhỹre.
\v 10 Uritre lỹỹraxiõmyke: “Aõherekibo juhu bedeu aõbo bede awimy rỹiramyhỹ?” Ka lỹỹraxi heka bedeery lỹỹraxi aõkõ rare.
\v 11 Kaki heka bedeerylehekỹ ijõdike. Bedeery ijõdimy, kia tahe iny aõwedu nihikỹmy runyke.
\v 12 Bedeery heka nieru-ribi awityhyre. Bedeery tarasana heka iny mahãdureny hãwaki rỹimyhỹrenyre riijemyhỹrenyre.
\v 13 Mohõtinyini aõbo Deuxu riwinyremy. Mobo tahe ritiòbitinykre, tii itiòemy riwinyre-ribi?
\v 14 Kia tiu aõnaõna awimy reakreu mabedesakre; kia tiu aõnaõna sirasira rehemynykreu kadi mohõtinykre: Deuxu heka bedesana riwahinymyhỹre, iwesele ta aõnaõna sirasira riwahinymyhỹre, ka iny boho aõ rieryrenyõhyymyhỹrenyre, aõbo biurasòmy rỹtỹỹnykre.
\v 15 Wabededỹỹnanaki heka bòdỹỹna ijõdilere, tai tahe diarỹ tuu ibutumy rabire. Iny awimy rỹimyhỹre rurumyhỹre, ka iny itxỹte tabededỹỹnana binadi irumy ratximyhỹre.
\v 16 Tai heka awityhyre aõkõ, kia bedetyhy tule; aõherekibo tahe kai bexirubunykre?
\v 17 Kia uritre itxỹtetyhyõmykre; urikõ-ribi bededỹỹnana wetyatxi buruheny?
\v 18 Kia aõnaõna-ribi bexilòhòrarienykre ijõ wesele. Txibo kai Deuxulau buberukre-wana, kia ibutumy bexidehedehenykre.
\v 19 Bedeery heka iny sohojile sõemy riwinyke, deboitue hãwa riòre dinodu-ribi.
\v 20 Kaki hãwa roireki heka iny ihoõhyyre aõ ikiemy òbitimy riwinyke, kia tiu aõki reòsaõmy iximy rarybeke ihoõre.
\v 21 Kia uritre ibutumy ijohonaõmyke, kia aõmy iny witxira mahãdu rarybereri-ò, kia aõmysỹdỹỹdule roholake, aõbinabinamy rybena-ò.
\v 22 Kai tahe teerylete, kia sõemy kai iny witxiramy aõnaõna binabinamy tarybemyhỹte.
\v 23 Diarỹ heka bedeery reuhere ibutumy arierytyhykremy. Diarỹ heka rexiywinyre bedeery nihikỹmy ararekremy, kia tahe bedeery nihikỹ ratyre reaõhyyre.
\v 24 Timybo tahe iny-õ bede binabinatxi rierymy reake? Kia heka inydeereny sỹytyhymy rỹimyhỹre, kia heka timybo raeryke isiratyhyre.
\v 25 Ka diarỹ tahe rexiywinyre idi aratyyritinykremy, aõnaõna arierykremy. Diarỹ heka rexihumy watximyhỹ bedeery nihikỹtxi areakremy, kia walỹỹraxina rawyòdỹỹnatxi areakremy watximyhỹ; kia arierykemy watximyhỹre, aõherekibo iny binabina mahãdu itxỹterenymy rỹira.
\v 26 Diarỹ aõnabinaõtxi reare, kia heka tii rubu ratyre txubererere iny hãwyy wesena. Kia heka hãwyy wesemy iki-wana wimy berinanykemy rexiwahinymyhỹre, kia heka brejuna heto-ò malòkemy adee rexiwahinymyhỹre, kia utura riy wesemy adi risỹnymyhỹre aramykemy; Kia iaxiò heka reruti rare idi aramykremy. Hãbu Deuxu-my reàlàmyhỹre heka iribi rexiwòmyhỹre, ka òrarudu mahãdu tahe aõkõre.
\v 27 Diarỹ heka itxi reare iòhò iòhòlemy, kia iu walỹỹraxina rawyòdỹỹna reijemy watximyhỹu.
\v 28 Kia iwitxira irawyòdỹỹna reijere, kia ta ijõtxi reaõhyyre. Kia Mil-my hãbu sõekyki sohoji hãbuõtxi reare, kia tii sohojile arityhynykre, ka hãwyy ykyki ta ijõtxi reaõhyyre.
\v 29 Kia ibutumy aõ reeryre widee rebunyre: Deuxu heka iny boho riwinyrenyre irutaõmy òbitimy, ka iny bohole tahe ibutumy risirarisiranymyhỹrenyre.
\c 8
\p
\v 1 Kia iny bedeery sohojile aõnaõna riòbitinymyhỹre. Kia iny bedeery òsỹny rarỹsỹnymyhỹre, kia iruxeramy relemyhỹre iboxieryreri hãrele
\v 2 Iòlò rybetyhydỹỹna bityhynyke, kiemy dori kai Deuxu koki iny òbiti tatemy iximy tarybete tamy
\v 3 Iòlò heka aõwaxina ao ixideewimy riwinyke. Kia uritre wylemy iko-ribi òlòmy wisỹdỹỹõmykre, kia uritre aõnaõna binabina widỹỹmy nohõtiõmykre.
\v 4 Iòlò heka tabedeery nihikỹdi rexirarexiramyhỹre, kia iny-õ aõmy tamy rybeõmy aõ riwinyra-wanaki.
\v 5 Kia kai irybetyhydỹỹna bityhynyberi-wana, tiu aõnaõnabinamy aõhe butỹỹnyõtyhy. Kia iny ibedeery ijõdimy rỹimyhỹre rierymyhỹre timybo, tiubo rexirarexirakre.
\v 6 Kia heka bede òbitimy iu aõ rỹikre ijõdire, kia aõ itỹmyramy relekre ijõdire aõnaõna sohoji sohoji-ò.
\v 7 Ka iny bededỹỹnanareny binabina nihikỹ tahe iny boho rieryrenyõhyymyhỹrenyre, aõhebo biurasòmy rukutỹỹnyrenykre, kia mobo dori inykoreny ijyyõna.
\v 8 Tiu iny-õ yhy ributumy rimyõtyhy. Iwese tahe tiu iny-õ rubulau rexieõtyhy, kia tiu iwitxira txu-ò riwahinyõtyhy. Iny boho heka ijesu rikierenykre, kia heka iny iribi rahenykre ihoõre.
\v 9 Diarỹ heka ibutumy tuu rabire, kia aõnaõnadi rahõtinyreu, ka hãwaki aõnaõna ròhònymyhỹremy. Kia juhu bedeu iny bedeery ruru nihikỹmy rỹiramyhỹ, ijõ mahãdu tahe aõhỹỹmy rutỹỹnyrenyre, iny bedeery ruru nihikỹ dori rimyrenyre.
\v 10 Diarỹ heka iny itxỹte rubu ỹnymy rabire. Kia wabede weruramy tuu rawowydymy rỹimyhỹre, kia heka ihãwakilere tai iny itxỹte mahãdu aõnaõnabina riwinymy rỹirakile. Kia heka bòdỹỹnaõle rare.
\v 11 Aõherekibo tahe iny mahãdu irutaõlemy rubumy wiko relyymy rỹimyhỹrenyre? Aõherekibo tahe rubudỹỹdu mahãdu wylemy brejuna  hetowo-ò ralòrenyõmyhỹrenyre.
\v 12 Kia rubudỹỹdu-õ aõwaxina cem-my rubudỹỹmy rarybeke, kia ixybyle irymy rareke. Kohe, diarỹ reeryre; “Txibo kai Deuxulau buberukre-wana, kia ibutumy awimy atxikre.
\v 13 Ka iny itxỹte mahãdureny-ò tahe awimy aõkõ roirekre. Ibededỹỹnanareny heka iwese bedeubròrò rỹimyhỹre wesele rekoamyhỹrenyre: Kia jyre mahãdu rururenykre, kiemy dori Deuxulau ruberurenyõre.”
\v 14 Kia heka timy turybena ihoõre. Beteheini aõbo ka hãwa bedeki ròhònymyhỹre: Kia tiwese aõkõ inywi mahãdu brejuna heto-ò rirònymyhỹrenyre, iny itxỹte mahãdu aõkõle reamy; iny itxỹte mahãdu aõwiwi ritamyhỹrenyre, inywi mahãdu aõkõlemy reamy. Aõmybo rarybemyhỹre: Kia heka bòdỹỹnale rỹimyhỹre.
\v 15 Iurenana heka diarỹ reerymyhỹre, iny boho rikexideysanyrenyke, kiemy dori tii sohojile inydeereny awityhyre, rikiroximyhỹrenyke, monamy rikiõrenymy rikexideysanymyhỹrenyke. Tii tỹỹna heka rikiwinymyhỹrenyke, kia iny boho rakaõmysyỹdỹỹnyrenyke, Deuxu inydeereny ka hãwaki bededỹỹnana riwahinyre wahe.
\v 16 Kia heka sõemy ixidi resỹnyre bedeery nihikỹmy ararekemy, kia aõnaõna ka hãwaki ròhònymyhỹre arierykemy, kia tahe reeryre iny aõwaxina irumy bede riekre txumy rumy.
\v 17 Kia hãrele tahe tiu aõ rieryõtyhy, aõbo Deuxu riwinymyhỹre. Kia iny mahãdu ixidi rarurunymyhỹre, kia tiu aõ rieryõhyymyhỹrenyre. Iny bedeery nihikỹ mahãdu aõwaxina raryberenykre aõnaõna rierymyhỹrenyremy, kia inatyhymy tii boho aõ rieryrenyõhyymyhỹrenyre.
\c 9
\p
\v 1 Diarỹ sõemy rahõtinyre, kia sõemy ixidi rarurunyre arierykremy ibutumy, kia tahe ikonana-ò rehemynyre, Deuxu heka iny bedeery mahãdu, iny òbitimy rỹimyhỹrenyre-di riywinymy ratximyhỹre, kia aõmy rerinanykre, kia aõkibo tuu radònykre rierymyhỹre. Iny-õ rieryõhyymyhỹre aõhebo biurasòmy rutỹỹnykre, kia tahe aõ tai iwitxirake ihoõre.
\v 2 Kia heka wiwesele aõhe rutỹỹnymyhỹrenyre, inywi iny itxỹte-wana, aõ awi aõ ibina, Deuxu tyhydỹỹdu mahãdu, iny Deuxu tyhydỹỹduõ-wana. Wiwesewesele heka aõhe rutỹỹnymyhỹrenyre, mobo inytyhy, mobo òrarudumy iny ratximyhỹre, kia iny rexiwahinymy iximy rarybemyhỹre, iny rexiwahinyõmy iximy rarybemyhỹre.
\v 3 Kia heka wiwesele iny ibutumy aõhe rutỹỹnymyhỹrenyre; kia heka ibinatyhy rare ibutu-ribi hãwaki rutỹỹnymyhỹre. Iny mahãdureny coraçãoreny heka sõemy rỹximy aõnaõnabina-di itxỹte-di roimyhỹre; kia tahe isitere-ribile tii boho rurumyhỹrenyre.
\v 4 Kia irumy kabede-ki ratximyhỹre, kia tahe aõ riraòmy ratximyhỹre; kia dori ijòròsa wesemy irumy ratxike dori awire, hãloè rubu-ribi.
\v 5 Kohe, iny irumy rỹimyhỹrenyre mahãdu rexierymy rỹimyhỹrenyre rururenykremy, ka rubu mahãdu tahe aõ rieryrenyõhyymyhỹrenyre. Tii boho aõ ritarenyõhyyrenykre, kia heka rexihumy rusarenyre.
\v 6 Kia terinareny, kia ikyarareny, kia ibutumy tii boho-wana rururenyre. Kia tiu ka hãwa-ki aõnaõna ròhònymyhỹre riwinyrenyõtyhy kiehykyle.
\v 7 Tai tahe, ako-ò mariake. Bexikyhykyhynymy arỹsỹna birỹsỹke, vinho-my bexideysanymy biõke, kiemy dori Deuxu adee awityhymy reòbyra aõbo tewinymyhỹte-ò.
\v 8 Kia ikiemy bedesamy awityhymy bexiemy mabekre.
\v 9 Kia tahe kai kahãwa bòdỹỹna-ki mabekre, kia hãwyymy teòarimy atximyhỹte-wana bexiywiywinymy tii-wana atximyhỹke. Kia heka ibutumy kai aõmysỹdỹỹnabrò-ribi bitakre, kia ka bededỹỹnana utxie Deuxu adee riwahinyre.
\v 10 Kia ibutumy aõ ki relekemy rỹimyhỹre, kia biwinyke awimy relekedohotamy, kia dori rubu mahãdu hãwareny-ki aõ releõhyymyhỹre, taireny heka nohõtina ihoõre, aõerynana ihoõre, kia bedeerynana tule ihoõre. Kia heka tamy kai makre.
\v 11 Diarỹ ixyby aõnaõ-txi reare kahãwaki: Kia tuhyyhyy aõkõ, ityti heòty-di ijaradu mahãdu ròtamyhỹrenyre ijarana-ki; kia tuhyyhyy aõkõ sodadu deburetyhy mahãdu ròtamyhỹrenyre woubededỹỹnana-ki. Kia iny bedeery nihikỹ mahãdu tuhyyhyy irỹsỹnareny rỹimyhỹrenyre aõkõ roire, kia irakywityhymy rỹimyhỹrenyre ibutumy aõkõ iaõdimy ityhymy rỹimyhỹrenyre. Kia iny aõ rierymy rỹimyhỹrenyre mahãdu ibutumy aõkõ rynana rarie-ò raòwònymyhỹrenyre. Kia heka ibutumy bedeòbylemy aõmy rỹimyhỹrenyre, kia aõ irutaõmy rỹimyhỹre xieryle, iny aõtxi reamyhỹre.
\v 12 Kia heka moo rieryryõhyymyhỹre, tiubo tiwese bedeubo aõnaõna binabina kedehemynykre. Iwese nawii isitere-ribile bòtòruuwo-txi resemyhỹre wesele,iwese utura rià-ribi raarimyhỹre wesele, iwesele tahe iny boho bede binabina-txi tiubo rekeserenykre.
\v 13 Kia ixyby aõmy rabire, kia heka deòsinawi heka rare, kia kaki hãwa roimyhỹre, kia bedeery nihikỹ-ò aõ awityhymy riwahinyõhyymyhỹre.
\v 14 Kia hawã riòre-ki iny ibutumy rahãwanymy rỹiramyhỹ. Iòlò debure sodadu-wana cidade rahurenyre, kia bede ratòò riòre riwinyrenyre iribi rawounyrenykremy, iwebrò-ribi tahe rexiywinymy rỹimyhỹ, hetowerura uhuari ritxiwitxiwirenykremy.
\v 15 Tahe habuõ iaõkõ rahãwanymy raremyhỹ, kia tahe aõni ibedeery nihikỹ irakywihikỹ rare; kia heka inatyhymy ibedeery nihikỹ rare, tii heka hãwa rihedỹỹnykenawile rare. Kia tahe iny-õ tõhõti itxi reaõhyyre.
\v 16 Diarỹ heka ikiemy bedeery nihikỹ retyhynymyhỹre iny ruu ratyremy; ka iny-õ tahe rityhyõhyymyhỹre, iny iaõkõ rỹimyhỹre ibedeerymy rỹimyhỹre, kia iny-õ idi reteheõhyymyhỹre aõmybo tii rarybera-wana.
\v 17 Bedeery mahãdu rybeywi-ò ijohona heka awire, iny itxỹte dinodu rirajuamy rarybemyhỹre-ribi awityhyre.
\v 18 Bedeery nihikỹ awityhymy rỹimyhỹre, woudu mahãdu debòna-ribi, ka iny aõmy ibinamy rexihumy rarybemyhỹre tahe bededỹỹnanawiwi ribinanyke.
\c 10
\p
\v 1 Iwesemy tahe òhòrati rubu, aderòna hyna ixidi ribinanymyhỹre wesele, iyrybyle tasỹ iny itxỹte mahãdureny-ò, iny bedeery nihikỹ iratyre ròhònyke.
\v 2 Mobo bedeerymy ratximyhỹre, kia heka òbitimy inatyhymy aõ riwinymyhỹre, ka iny itxỹte mahãdu tahe aõ òbitimy inatyhymy aõ ibinamy riwinymyhỹre.
\v 3 Ibutumy iny mahãdu rierymyhỹrenyre, tii itxỹtemy ratximyhỹremy; kia iny mahãdu rieryõmy rỹimyhỹre, kia tahe iinytyhy ta ihoõmy rierymyhỹrenyre.
\v 4 Txibo awedureny nihikỹ adee reburekre-wana, kiauritre aõmysỹdỹỹ-ribi òlòmy ixitòedỹỹõmykre  \f +
\fqa ixiwahidỹỹõmykre  \f* ; aõ inatyhymy reòsamyhỹre, aõwaxina iny tuu reàlàke, txibo kai ywimy atximyhỹte-ribi ixawiõkre-wana.
\v 5 Diarỹ heka ka hãwaki aõnaõnabinabinamy rabire, kia heka hãwa wedu mahãdule tuu rarybere:
\v 6 Tii boho iny itxỹte mahãdule aõmysỹdỹỹ nihikỹ rarie-ò risỹnyrenyre, kia iny òbitityhy  \f +
\fqa a MY òbitityhymy  \f* rỹimyhỹre ixihewo-ò ririrenyre.
\v 7 Diarỹ iny mahãdu deòdumy rỹimyhỹrenyremy rabire ararutureki  \f +
\fqa awarutyreki  \f* ririranyrenyrerimy, Iòlò tahe atimy  \f +
\fqa tatimy  \f* rariamyhỹ, iwese iny deòdu ririranymyhỹrenyre wesele.
\v 8 Mobo hãluu riamyhỹre, kia heka taile resekre; mobo heto uhuari ritximyhỹre,  \f +
\fqa ritxiwimyhỹre  \f* kia heka  \f +
\fqa oboheka  \f* hemylaladòmy reakre.
\v 9 Mobo mana ritamyhỹre, kia heka tiile rihãlubudỹỹnykre ; mobo hee ritxuamyhỹre, kia heka tiile riwotõmynykre.  \f +
\fqa riwotõmõnykre  \f*
\v 10 Txibo kai woma txuree bihukre-wana, kai sõetyhymy maõmysỹdỹỹnykre. Kia heka bedeerytyhymy bexiywiywinykre komy biuhekrekoki.
\v 11 Kia heka aõki adee awiõhyyre, txibo kai hemylalarywo-ò  \f +
\fqa hemylalarywò-õ  \f* bitybònymy birikre-wana.
\v 12 Mobo bedeery nihikỹmy ratximyhỹre heka rybewowydyna ixiki rimymyhỹre, ka iny itxỹte mahãdu tarybereny òbitikile rexihurenykre.
\v 13 Tii heka komy aõnaõnabina tarybe riòrarunymyhỹre, kia tahe aõnaõna binabina itxỹte tarybe rihumyhỹre.
\v 14 Iny itxỹte mahãdu heka tiu rybe-ribi ixawirenyõhyymyhỹrenyre. Iny-õ heka rieryõhyymyhỹre aõbo biurasòmy rutỹỹnykre, kia timy iny-õ turybeõna aõhebo rutỹỹnyrenykre iruburenysỹtybymy.
\v 15 Hãbu itxỹte sohojityhyle, kia tahetorytxi reaõhyymyhỹre, kia urile resemyhỹre sõemy raõmysỹdỹỹnymyhỹreki.
\v 16 Hãwa nihikỹ heka ibinamy ramyhỹre, kia hãwa dinodu iny witxira raykyrybe rityhynymyhỹreki, kia ta aõwedu ninihikỹ mahãdu iòrarudile risinymyhỹrenyre.
\v 17 Ka hãwa nihikỹ awimy ramyhỹre, kia mobo hãwa nihikỹ dinodu tarybe sohojile riuhemyhỹre, kia aõwedu ninihikỹ mahãdureny tahe ixidi aõmysỹdỹỹ rierymyhỹrenyre, kia òbitimy riroximyhỹrenyre, kia sõemy aõko monamy riõmyhỹrenyre.
\v 18 Txibo kai iny deywese aheto ratyti riywinykremy temyte, kia aheto akesedile sõemy rỹxikre, kia aheto tahe rariowykre.
\v 19 Ixena heka iny riwiòhenanymyhỹre aõ iny-ribi tõhõti rusakremy, vinho tahe iny riwiòhenanymyhỹre iny rabedesakremy; ka nieru ihoõki tahe tiu aõ inyki ijõdiuõtyhy aõkyre riòre-õ.
\v 20 Kiauritre hãwa nihikỹ dinodumy aõmy turybeõmykre araykyki, kia hãbu iaõdimy ityhymy rỹimyhỹremy turybeõmykre aherinawoki, kia dori nawii-õ tuu ikoreny relyyke aõmybo tarybetamy.
\c 11
\p
\v 1 Anieru aõmysỹdỹỹnawiõtxi birarenyke,  \f +
\fqa birarenykre  \f* kia tahe bedereherenymy  \f +
\fqa bedereherehemy  \f* raumynymy rakre.
\v 2 Anieru aõmysỹdỹỹna witxira witxiratxi birarenyke, kiemy dori kai tereryõmyhỹte  \f +
\fqa teeryõmyhỹte  \f* aõhebo biurasòmy butỹỹnykre.
\v 3 Kia tiu biuwetyy sõemy rỹimyhỹre-wana, kia biu ròamyhỹre. Kia bederade aõtxile tibedetxi resemyhỹre, kia titxibo resemyhỹrekihyyle tahe roimyhỹre.
\v 4 Mobo yhy iribi  \f +
\fqa bede  \f* ritakemy  \f +
\fqa riywinykemy  \f* riraòmyhỹre, bede awimy roikemy, kia tiu tai ròbròõtyhy kia tiu aõ iribi riheõtyhy kiehyyle.
\v 5 Deuxu heka ibutumy aõnaõna riwinymyhỹre. Timybo  \f +
\fqa Timykibo  \f* tahe kai bieryõkre, timybo tahe iny itỹmyramy ratxikre hãwyywewoki rỹimyhỹre, iwese tahe tiu aõ aerysyõna aõ Deuxu riwinymyhỹre.
\v 6 Diarỹ rudiu robrore txioromy tule, aõherekibo tahe kai teeryõte txibo alòbrona  \f +
\fqa alòbròna  \f* ibutumy raumynykre, kia tiu ijõ awityhymy wiratyre iumyõna.
\v 7 Timykiwe iny txu juxaramy reàlàmyhỹre, timykiwe iny txu-di awimy retehemyhỹre!
\v 8 Mabedesake bede hãwaki atximyhỹtesamy. Kia arymy  \f +
\fqa arumy  \f* tiwese wyramy aõkõ atximyhỹte hãrele, itxi ini õhõti reakre, kia rubu mahãdu sõemy bede rierenykre. Kia heka ibutumy aõnaõna ròhònymyhỹre heka bòdỹỹnalehekỹ rỹira.
\v 9 Jyre mahãdu, awimy atỹmyramy ahãtenytesamy awimy atximybenyke  \f +
\fqa atximyhỹbenyke  \f* . Aõ ixidewimy  \f +
\fqa ixideewimy  \f* aõ biwinymyhỹbenyke, acoraçãorenyheki aõ biwinymyhỹbenyke. Ka aõtxi tainihe õhõtireny reakre: Deuxu heka ibutumy riwirarereakre  \f +
\fqa riwirareakre  \f* aõbo tewinyte wahe.
\v 10 Kia aõ nohõtiyrenamy ririõhyykre, kia aõhỹỹmydỹỹnana tule, kiemy dori  jyre mahãdu bededỹỹnanareny  urihimyòle rỹimyhỹrenyre.
\c 12
\p
\v 1 Aumydỹdutxi  \f +
\fqa Aumydỹỹdutxi \f* iny õhõti reake, kai jyremy tatesamy, kia txuu ibinamy kanakrekotyremy, kia tahe wyrabede-ò rehemynykreu tahe kai marybekre: “Aõ heka wade awityhymy ihoõre.”
\v 2 Komy idi mohõtinykre, tiu bede-ò behemynykreu, tai tahe kai txuu loosonaki beaker  \f +
\fqa beakre  \f* , ahãdu taina-wana txuxareny  \f +
\fqa txurarareny  \f* rexihurenyre, ka biuwetyylòra  \f +
\fqa biuwetyy ròamyhỹre  \f* tahe rirahuõtyhy  \f +
\fqa rexi  \f* .
\v 3 Kia tahe axiòrenydi ikiemy texietenyte, kia tahe mamytata benykre, kia atireny inihikỹre, kia tahe atireny urile reyweserenykre. Ka ureny rariòwyrenykre, kia tahe urihimyòle rasiranykre, kai tiu arỹsỹna bidewidewinyõtyhy. Kia arue urile ibinalemy idi betehekre, kia tiu kai aõdi itỹnytyhymy aijereõmy.
\v 4 Kai õhõtitamy belekre, kia tiu rymy bewodỹỹwodỹỹ-ò boholaõtyhy. Kai aõhe-wana tiu moena ramoemyhỹre wodỹỹ-ò aijohoõna, kia wiuna rawodỹỹnymyhỹre-ò tule. Kia tahe rudihikỹ myikre, kia nawii roburenykreule.
\v 5 Tai tahe kai bede rarielau buberukre, kia mariakrehãrele iòhãrukre. Kia iradereny iuramylemy relekre, kai tahe aõnaõnaki awimy tahãmyhỹte aribi ixawikre. Iny boho heka iny ixielyhynareny konana-ò diriranymy doimyhỹdenyde; kia tiubo tuu rutỹỹnykreu, kia iny mahãdu iny bede riranareny òraruki roburenykre.
\v 6 Bede heka rexihukremy roimyhỹre, iwese atesina mana resemyhỹre wesele, kia isana rayròmyhỹreu, iwese butxi rabòhòmyhỹre wesele, tiu be hãluu sana wiwietyatxi rayròmyhỹre wesele.
\v 7 Tai tahe umyreny ixybyle su node-ò roosekre tiribibo iny boho doide-ò, ka inytyytybyreny tahe Deuxu-ò roosekre.
\v 8 Kia heka bòdỹỹnale rare, myy bedeery rarybere. Kia heka ibutumy bòdỹỹnale heka rare.
\v 9 Bedeery nihikỹ heka tabedeery nihikỹ riuhemyhỹre, kia ixyby ixybyle iny mahãdu riixinanymyhỹrenyre aõ rierymyhỹremy. Tii heka ratyyritinyre, kia tahe riywinymy wiwesewesemy rybe ritidire.
\v 10 Kia heka rybe wimy reàlàmyhỹre riuhemy ritidire, kia ibutumy tyyriti-ò riritinyre, kia heka inatyhymy òbitimy tuu rarybere.
\v 11 Iny bedeery mahãdureny rybe heka iwese wonatidese òwòru-ò rarutàmyhỹre wesemy rỹimyhỹre ralòwiwimy; Kia iwese rubedi ijohodi mahãdu hojurehedi rỹimyhỹre wese budoeni-di rariakremy rỹimyhỹre wesemy. Ka rybe heka Deuxu tuu tarybe riwahinyre, tii sohoji heka rybedi ijohodu nihikỹmy iny-ribireny ratximyhỹre.
\v 12 Wariòre, aõmamy adeereny ararybekemy watxireri: Tyyriti rirana heka ikiemy raritidỹỹmy rỹirakre; iny sõetyhymy rarytyyritinymyhỹre, kia heka inyrayky urile riteywesedỹỹnymyhỹre.
\v 13 Kia ibutumy tuu rarybere, kia heka kaa rare: Deuxulau buberubenyke, kia tahe irybetyhydỹỹna bityhynybenyke kiemy tamy dori iny boho ruamy iny boho raumynyrenyre.
\v 14 Iny boho heka ibutumy Deuxu dee iximyreny rekelyyrenykre, ibutumy aõbo iny boho riwinyrenyre wasimy, aõ awi aõ ibinamy.