kpj_reg/18-JOB.usfm

\id JOB
\ide UTF-8
\rem two chapters: Cc 23,24 of JÒÒ, also, Cc 35-38 are in the Green book and digitaled but cannot locate the files
\rem dat jan- jun1990
\rem aut Ijeseberi
\h JÒÒ
\toc1 JÒÒ
\toc2 JÒÒ
\toc3 job
\mt1 JÒÒ
\c 1
\p
\v 1 Uza suki hãbuõ rahãwanymy raremyhỹ Jo heka inire. Tii heka awirare òbitimy nodu heka rare, kia Deuxulau ruberumyhỹre, kia heka tiu aõ ibinamy riwinykelau rexiijemyhỹre.
\v 2 Jo heka debo-ò inatxi reurò-my iriòre hãbu sõe, kia inataõ-my hãwyy sõe.
\v 3 Tii heka debo-ò inatxi mil-my ibudoeni sõe, inataõ mil-my camelo sõe, 1.500-my iburu sõe. Kia deòdu mahãdu sõere. Kia ribi tahe Jo hãbu ityhytyhy rare ibutumy-ribi, ka Oriente hãwa roire-ribi.
\v 4 Jo riòre boho heka wiheto wiheto-ò roimyhỹrenyre, kia tahe rynana wideereny riwahinymyhỹrenyre, iny sohoji sohoji-ò. Kia hãwyy inataõ iseriòre boho ixyby ixybyle riteòarinymyhỹrenyre byrena-ò mona momo-my.
\v 5 Kia rynana rurawona rexihumyhỹreu, Jo txu ijara iòhòmy rỹimyhỹre, kia tahe taaõwiwimy Deuxu-ò reàlàmy rexitòenymyhỹre, kia tariòre boho sohoji sohoji-my rarybemy rexitòenymyhỹre, kia inireny tyramy ratxirenykremy. Jo ixyby ixybyle tuu riwinymyhỹre, kiemy dori myy rõhõtinymyhỹre, txibo iriòreõ òraruna riwinykelau, txibo taraykyki Deuxumy radònyketxi.
\v 6 Kia tahe txu-ò rehemynyre, iu Deuxu rybe-di aõmysỹdỹỹdu mahãdu dirahudenyde Deuxuko-ò rexideòsinyrenykremy, kia ityarenyki tahe Santanás nalede.
\v 7 Deuxu ritỹỹraxinyre: — tiribibo kai tareri? Santanás rirawyònyre: — Kia su tyadi rariamy watxireri, kaki kuaki.
\v 8 Tai Deuxu myy raeybere: — Kai aõbo waijoi Jo-di tetehete? Ibutumy hãwa hãwa roire-ribi moo awimy òbitimy ratxiõhyymyhỹre iwesemy. Tii walau roberumyhỹre, kia tahe tiu aõ ibinamy riwinykelau rexiijemyhỹre.
\v 9 Santanás rirawyònyre: — Kia aõbo ixideewi-ribi aõkõo alu ruberumyhỹre?
\v 10 kai aõbina ityre resekelau tetòenymyhỹte, kia iriòre boho tule, kia ibutumy aõbo tuu rỹimyhỹre. Kia arybewiwi ibutumy tewahinymyhỹte Jo aõ riwinymyhỹreki, ka hãwa nihikỹ roire-ribi tii heka sõemy broreni-di ratximyhỹre.
\v 11 Kia ibutumy iaõnaõna iribi ratakeki tahe, kai idi betehekre tii urile aratxuhòkre aõmy aratyhynymy aõkõ.
\v 12 Deuxu, Santana-ò rarybere: — Awire. Aõwaxina aõ ixideewimy aõbo Jo-my rỹimyhỹre biwinykre, kia uritre ta aõhe Jo isỹdỹỹõmykre. Tai tahe Santanás Deuxuko-ribi rare.
\v 13 Tiu txuu, Jo riòre boho rynanaki roruumyhỹrenyu, taumydelareny hetoki.
\v 14 Kia Jo heto-ò teòduõ rehemynyre, kia ta myy rarybere:  — Diarỹ boho suu rearanymy watxirenyreri broreni-di, kia buru tahe wabirerenyki asimy riroximy ratximyhỹ.
\v 15 Kia isitere-ribile tahe Sabeus mahãdu aõbinamy wadeereny reare, kia ta ibutumy aõnaõna riwyrenyre. Tii boho heka tõniri-di adeòdu mahãdu rirubunyrenyre, kia diarỹ sohoji rahenymy ijyy-di rareri.
\v 16 Kia rarybemy rỹireri-wana wana, kia teòduõ rareri, kia ta myy rarybere: — Biudelaa biu-ribi resere, kia tahe ibutumy abudoenireny rirubunyrenyre, asi tule. Kia diarỹ sohoji rahenymy ijyy-di rareri.
\v 17 Kia rarybemy rỹireri-wana wana, iinataõna rehemynyre, kia ta myy rarybere:  — Inataõmy Caldeus mahãdu sõereny wadeereny aõbinamy rekoarenyre, kia ibutumy camelo ridyrenyre. Tii boho heka tõnori-di adeòdu mahãdu rirubunyrenyre, kia diarỹ sohoji rahenymy ijyy-di rareri.
\v 18 Kia rarybemy rỹireri-wana wana, ixyby ijõõ rehemynyre, kia ta myy Jo-ò rarybere:  — Ariore boho rynana tyaki roruumyhỹreny, taumydela hetorenyki.
\v 19 Kia isitere-ribile bederahy-ribi yhydere nihikỹ rayhynymy reare heto mynamy, kia heto ariòre boho tyrehekỹle resere. Kia ibutumy tii boho rururenyra; kia diarỹ sohoji rahenymy ijyy-di rareri.
\v 20 Tai tahe Jo rexilamadỹỹnyre, kia rabederyryreu tatyy ritxuatxuare, kia taratyy ribrasanyre. Irahudi tahe tatiòhumy su-ò taòsỹnymy resere, kia tahe Deuxumy rerinanyre.
\v 21 Tai tahe myy rarybere:  — Diarỹ wademy ruare, aõhoaõkõ, kia ta aõhomyaõkõ arurukre. Deuxu wadee riwahinyre, Deuxu waribi ritare; taniwiwihikỹmy.
\v 22 Kawesemy tahe ibutumy aõhỹỹhỹỹmy rutỹỹnyre, Jo òraruna riwinyõre, kia Deuxu òraruki tuu rutỹỹnyramy rarybeke aõkõre.
\c 2
\p
\v 1 Kia ixybyle txuu tamy remynyre, iu Deuxu rybe-di aõmysỹdỹỹdu mahãdu dirahudenyde Deuxuko-ki rexideòsinyrenykremy, kia Santanás ikyrenyki nalede.
\v 2 Deuxu ritỹỹraxinyre: — Tiribibo tateri? Santanás rirawyònyre: — Kia su tyamy rariamy watxireri, kaki kuaki.
\v 3 Deuxu tamy rarybere: — Kai aõbo waijoi Jo-my tabite? Kia hãwa hãwaki inyõ awimy òbitityhymy ratxiĩhyymyhỹre iwesemy. Tii heka walau ruberumyhỹre, kia tahe aõ ibinamy riwinykelau rexiijemyhỹre. Kia ribi tahe kai arybenahemy tiwaatyte, diarỹ Jo aõhỹỹmy rutỹỹnykremy rewahinyre, kia heka aõ iòraruõhyyre. Kia hãre tahe tii ixiyrybule awimy òbitimy ratximyhỹre ikiemy.
\v 4 Santanás rirawyònyre:  — Kia ideòle aderexi rỹikre aõhebo rutỹỹnykremyini. Iny mahãdureny heka ibutumy iaõnareny rexihurenykelau ruberurenyõhyymyhỹrenyre, kia heka tabededỹỹnanareny riywinymy ratximyhỹrenyre.
\v 5 Ka tahe wiji, txibo wadebò aritetekre, kia tahe iumy ariwotõmonykre, kia idi betehekre, kia aõmy aratyhynymy aõkõ aratxuhokre.
\v 6 Deuxu myy Santanás-ò rarybere: — Awire. Aõwaxina aõ ixideewimy Jo-ò biwinykre, kia uritreta irubudỹỹõmykre.
\v 7 Tai Santanás Deuxuko-ribi rare, kia tahe Jo umy ibutumy yjybina nihikỹ-di rỹxire, kia iwaube-ribi iratiòhòkỹle raonananyre.
\v 8 Jo bryby ratòòtyre runyre, kia tahe sauõ rimyre idi rexiysekremy.
\v 9 Kia ihãwyy myy rarybere: — Kai anobo awihykylemy atxiteri? Deuxu bitxuhòke rurukemy
\v 10 Jo rirawyònyre: — Kai heka aõnaõna binabinalemy tarybeteri! Iny boho heka Deuxu-ribi aõnaõnawiwi rimymyhỹrenyre, aõherekibo tahe aõnaõna binabinahãkỹ rikimyreõkre? Kawesemy tahe ibutumy aõhỹỹhỹỹmy rutỹỹnyre, Jo òraruna riwinyke aõkõre, kia rybe sohojiõmy Deuxu òludumy rarybeõhyyre.
\v 11 Jo heka inataõmy ibiòwa ijõdire: Elifaz, Temã bede ludu; Bildade, Sua bede ludu; Zofar, Naama ludu. Tii boho heka Jo aõhỹỹhỹỹmy rutỹỹnyremy rieryrenyre, kia tahe bede widee riywinyrenyre tamy itxeremy roirenykremy, tamy raryberenykremy, timybo bede riryrymy ratxirerimy riixawidỹỹnyrenykremy.
\v 12 Kia irehe-ribi tii boho Jo rieryrenyõhyyrenyre, irahudi tahe tiimy rieryrenyreu, tii boho rahinyrenyre katxiterehekỹmy. Kia tahe bederyry deòsinamy tatyyreny ritxuatxuarenyre, kia suỹnysi-di biutxi rehurenyre taratyyreny-ò.
\v 13 Kia-ribi tahe sutyretxi runyrenyre Jo biretxi, kia tahe tai bede rierenyre debò inatximy txumy debò inatxi rumy; kia aõmy raryberenyõhyyrenyre, kiemy dori Jo aõhỹỹmy sõemy rutỹỹnyreri-di reteherenyreriki.
\c 3
\p
\v 1-2 Ikonanau tahe Jo rybeõmy ratximyhỹre-ribi rexiixawidỹỹnyre, kia tahe tiu txuubo reare ritxuhore. Jo:
\v 3 Aõherewekỹ txu binahãkỹu uladumy reare! Aõherewekỹ ru binahãkỹu myy raryberenyre: "Uladumy ruara! Hãbu heka rare!"
\v 4 Kia kua txu bedelurumy rexirahorere! Kia Deuxu biuludu, idi aõmy rõhõtinyõhyykre, kia tiu ixyby loosona roosoõtyhy!
\v 5 Kia bedeluru e as trevas rimyrenykre; kia biuwetyy ritybònymy riturinykre biu loosona.
\v 6 Kia ruu ikiemy turumy roikre, kia tyyriti rirana-ribi riõkre.
\v 7 Kia ixiyhylemy rabedewomy ruu roikre, kia tai tiu iny bedesa rajuana-ò iijohonaõna.
\v 8 Kia hyri mahãdureny urile ritxuhòrenykre, kua boho ibedeeryreny irurureny ijõdimy ratximyhỹrenyre Monstro Levitã ratyremy.
\v 9 Kia rudiu taina rỹimyhỹre rurunykre; kia heka tii loosona riraòmyhỹre, kia tahe loosona raõhyylere; kia bede rarawetyamy ramyhỹre rehemynyõhyyre.
\v 10 Kiemy dori tii heka nadiwo-ribi areakremy riwawahinyre, kia heka aõhỹỹmydỹỹnana wadee ritidiõlere.
\v 11 Aõherekibo warubumy ruaõre? Aõherekibo uladumy reareule raruõre?
\v 12 Aõherekibo nadi tawyòtyreki riwamyre? Aõherekibo tahuỹ wadee riwahinymy riwahuỹtònyre?
\v 13 Txibo diarỹ kua bedeule arurure-wana, ka wiji taini arõrõmy aroireri, arexielehynymy awityhytyhymy.
\v 14 Kia Iòlò-wanaini aratxireri, kia wedurarie nihikỹ palácio ehetxina riwinyrenyrekiini.
\v 15 Kia aõhe-wana Governadores mahãdureny-wana aratxireri, tii boho heka tahetoreny manarỹsỹrỹsỹ-di ritỹxinymyhỹrenyre.
\v 16 txibo nadi weiõnomy reare-wana wasimy, diarỹ ire-wana tiuini watxiõhyyreini, kia iwese uladu tiu txu loosona robiõmyhỹre wesemyini aratxire.
\v 17 Hãluuranaki heka iny itxỹte mahãdu lòrelòrena rexihumyhỹrenyre, kuaki heka iny reywesemyhỹrenyre raydònymyhỹrenyre.
\v 18 Tai heka brejudu mahãdu ibutumy rexielehynymyhỹrenyre, kia tawedureny rajua-ò roholarenyõhyymyhỹrenyre.
\v 19 kia heka iny aõnityhytyhymy tai rỹimyhỹrenyre, iny uritremy ijaradu tai rỹimyhỹrenyre, iny deòdumy rỹimyhỹrenyre, kia tai ixideewimy ratximyhỹrenyre tawedureny-ribi.
\v 20 Aõherekibo tahe ibederyrymy rỹimyhỹrenyre mahãdu aloosonamy rbihyymy ratximyhỹrenyre? Aõherekibo tahe iny icora,cão txubereremy rỹimyhỹrenyre, irumy rỹirenykremy tewahinymyhỹte?
\v 21 Tii boho heka rubu riraòmyhỹrenyre, kia tahe tamyreny naõhyymyhỹde, kia tii boho iny ityhymy rỹimyhỹrenyre ratyremy rexitòenymyhỹrenyre.
\v 22 Tii boho heka sõemy reysamy rabedesamyhỹrenyre, kia tiu hãluurana konana-ò resemyhỹrenyreu.
\v 23 Deuxu heka iny iruebetàmy rỹimyhỹrenyre mahãdu ririradỹỹnymyhỹrenyre, kia wiòwiòmy riuhuarinymyhỹrenyre.
\v 24 Ariroxikemy watximyhỹreu diarỹ urile rahinymyhỹre, kia raohitxinymyhỹre heka be wesele rejujumyhỹre.
\v 25 Kualau heka diarỹ raberumy raremyhỹ tuu aõhỹỹmy ratỹỹnyre, kia ilau raberumy raremyhỹ heka wadee rehemynymy riwamyre.
\v 26 Ywimy aratxike heka wadee ihoõre, arexielehynyke ihoõre, ixi sohojimy aratxike ihoõre, bede jeijeile heka waki ijõdire.
\c 4
\p
\v 1 Elifaz Tema ribi rybe:
\v 2 Jo, kai aõbo dònamy beakre diarỹ ararybekreki? Mobo tahe rybeõmy ratxikre?
\v 3 Kai heka sõemy iny mahãdu teixinanyte, kia aruru tewahinyte iny sõemy teywesemy bederyrymy rỹimyhỹrenyre-ò.
\v 4 Kia tiu iny ratiyròmyhỹreu reywesemy iryryõmy, kia arybe tahe riteyrewedỹỹnymy ritamadỹỹnymyhỹrenyre.
\v 5 Ka tahe abededỹỹnana-ò bede rehemynyre aaõhỹỹmydỹỹnana-ò, timybo tahe kai ywityhymy texiuaremy atximyhỹte teenodỹỹnyte?
\v 6 Deuxu tetyhynymyhỹte adee tyhydỹỹna riwahinyõreri? Abededỹỹnanawiwi òbitimy atimyhỹte rarysòna-di rỹxiõreri?
\v 7 Kai aõbo inyinybòmy rỹimyhỹretxi õhõti reaõre, kia aõhỹỹmydỹỹnanatxi reseretxi, aõhe-wana iny òtimy rỹimyhỹre rururetxi?
\v 8 Diarỹ heka idi reerymy retehere, kia bederomy aõnaõna binabinale riaranymy rỹimyhỹrenyre, kia tahe alòbrònaty binabinale ribrònymyhỹrenyre, kia tahe aõnaõna binabinale iribi rihemyhỹrenyre.
\v 9 Kia yhydebure wesele, Deuxu takyaramy rahumyhỹrenyre.
\v 10 Tii boho heka hãlòe debure wesemy rawobrumyhỹrenyre, ka Deuxu tahe iwobrureny riixawidỹỹnymyhỹre, kia txureny riyròyròmyhỹrenyre.
\v 11 kawesemy tahe iwese hãlòe mahãdu rariunyrenyõhyymyhỹrenyre, tii boho heka ramale rirubunymyhỹrenyre, kia iriòre boho rauberamyhỹrenyre.
\v 12 Wadee rybe inytyhy nade, iwasimy kia tiu awityhymy tamy aijohoõna.
\v 13 Kia rumy, iu iny mahãdureny rõrõtyhymyhỹrenyreu, diarỹ uni watyrereare, kia tahe bedejeijeimy riwasỹnyre.
\v 14 Kia bede binabinanihikỹ riwamyre, kia waumy ibutumy ramytatare.
\v 15 Yhy waòsỹnybymy reare, diarỹ ibutumy watyy raõrirehesinyre.
\v 16 Inyõ heka kuaki ratximyhỹ, kia tahe retehewiwire, kia ta tuu rabiwityhyõhyyre. Kia bede rabynyre irahudi tahe rybewodỹỹ-ò myy raholare:
\v 17 "Iny aõbo òbitityhymy Deuxukoki ratxike? Inyõ aõbo iximynatyhy taruetyhy-di tawidỹỹduruki ratxike?
\v 18 Deuxu heka teòdu mahãdu dori rityhynyõhyymyhỹrenyre, kia ta anjoki dori aõ tai ibinamy rahãmyhỹre.
\v 19 Tai tahe kai tahõtinyte iny rỹimyhỹre rityhynykemy, kia heka su-ribi relerenyre, kia sỹnode-ribi raumydỹỹrenyre, kia heka aõwaxina iròdusõmo wesemy iny rasurusurumyhỹrenyre.
\v 20 Aõwaxina iny boho biurasòmy irumy rakatxirenykre, kia txioromy tahe ikiemy rukururenykre, kia tahe tiu inyõ idi rexinohõtinyõtyhy.
\v 21 Iny boho heka rexihumyhỹrenyre, kia iwese heto riore rejujumyhỹre wesele, kia tahe iny boho bedeery rimyrenymy aõkõ rururenymyhỹrenyre."
\c 5
\p
\v 1 Birajuake Jo; txibo inyõ ararawyònykemy. Tiwesena anjo obo tahe kai byrykre?
\v 2 Kia ibinamy aumy rubrerenymy, kia heka itxỹtena rare, kia heka iny inytyhy sirana heka iny rubu-ò ridymyhỹre.
\v 3 Sohoji ha~bu itxỹteõmy rabire, kia heka tabededỹỹnanadi raòwònymy rare, ka diarỹ tahe iriòrereny-wana rextuhòrenyre.
\v 4 Iriòre boho heka imynydureny ihoõre; kia rybena-ò ròimyhỹrenyreu ibutumy rexihurenykremy ratximyhỹrenyre ibinatyhymy, kia iny iitxedureny ihoõre.
\v 5 Ramasadu mahãdureny heka rikokròmyhỹrenyre raityhynyrenykederamy; kia ixybyle iaõwirenyredena tamyreny ròòsemyhỹre, kia mai bedeykyki ruhunymyhỹre dorile riòwynymyhỹre.
\v 6 Aõhỹỹmydỹỹnana tiu s-ribi ròhònyõhyymyhỹre; bede binabina tiu bede-ribi ruaõhyymyhỹre:
\v 7 Iny bohole heka aõhỹỹhỹỹmydỹỹnana ixideereny riòlòdỹỹnymyhỹrenyre, kia òbitimy iwese nawiisõmy biu-ò ruòmy rỹimyhỹrenyre wesemy.
\v 8 Jo, txibo diarỹ kaikeki, kia Deuxuòle aròòseke, kia tahe waaõbinabina ibutumy tamy ariwahinyke.
\v 9 Iny boho heka tiu ierysyrenyõna, kia aõnaõnawiwihikỹ tii riwinymyhỹre, kia ibedeòtidỹỹna ionana ihoõre.
\v 10 Deuxu biulòra riwahinymyhỹre su-ò; tii bee riwinymyhỹre bederotyre resekremy.
\v 11 Deuxu heka iny rybeõmy rỹimyhỹrenyre biu-ò ritidimyhỹrenyre, kia irynanareny rimywiwimy tamy risỹnymyhỹrenyre rahinymyhỹrenyreki.
\v 12 Deuxu heka iny bedeery mahãdu bededỹỹnanareny riixawidỹỹnymyhỹre, kia ibedeywidỹỹnareny ribinabinanymyhỹrenyre.
\v 13 Tii heka bedeery mahãdu ibedeeryrenydile rimymyhỹrenyre, kia tahe (intrigas) iribireny rahumyhỹrenyre.
\v 14 Txumy heka tii boho bedeluruki ratximyhỹrenyre, kia txutyemy tahe inyruebetà mahãdu ririranymyhỹrenyre, Kia tahe ruwesemy (rapalpanymyhỹrenyre).
\v 15 Deuxu heka iny iaõkõmy rỹimyhỹrenyre mahãdu rubu-ribi rihedỹỹnymyhỹrenyre; tii heka iny aõmy rekoamyhỹre mahãdu iwedureny-ribi ritamyhỹrenyre.
\v 16 Deuxu heka iny iruruõmy rỹimyhỹrenyre-ò rarysòna riwahinymyhỹrenyre, kia tahe iny itxỹte mahãdurenyry urile ritòbònymyhỹre.
\v 17 Kia awityhymy mobo Deuxu riywinymyhỹre! Iurenana heka tiu Deuxu rarytxyna idi rehuõtyhy.
\v 18 Deuxu heka inyki rojymyhỹre, kia tahe tiiòbitile iny rituahinymyhỹre; tii iny riwotõmonymyhỹre, kia tebole iny riteytenymyhỹre.
\v 19 Irahudi, Deuxu bedeòhãru-ribi arahedỹỹnykre, kia tahe tiu aõbinabina adee riwahinyõtyhy.
\v 20 Kai rama reakreu Deuxu tiu burukremy arawahinyõtyhy, kia wounana bedeu tii tõniri-ribi arahedỹỹnykre.
\v 21 Tii heka rybebinabina-ribi arawokre, kia tahe kai tiu buberuõtyhy tiu ixihuduna rỹikreu.
\v 22 Kai urile butxuenykre tiu bede binabina rỹikreu, kia rỹsỹna rasiranykreu, kia tahe tiu iròdu iròdu deburelau buberuõtyhy.
\v 23 Asyraroki mana rỹimyhỹre tiu aradu ribòhònyõhyymyhỹre, kia iròdu debure mahãdu tiu riròrenyõtyhy.
\v 24 Ahetoki heka kai aõbinabinaõmy mahãwanykre, kia tiu aaõnaõnamy belyykreu, kia tiu aõ aki rasiranyõtyhy.
\v 25 Kai sõemy mariòrenykre, kia ariorerio boho tahe rasõerenykre, kia asirade rỹimyhỹrenyre wesehekỹle.
\v 26 Kai heka mamatuariny-di aruru ijõdimy burukre, kia maixõmo rabutudỹỹmy rahemyhỹre wesemy.
\v 27 Jo, kawesemy heka bededỹỹnana iny boho riixinanymyhỹrenyre. Ka heka inatyhy òbiti rare; idiini mohõtinyke ixideewityhymy.
\c 6
\p
\v 1-2 Jo rybe: Txibo waõhỹỹhỹỹ utxiedỹỹna-ò ralidikeki,
\v 3 Kia òbitimy arautxienyke berònihikỹ ỹnyra rỹimyhỹre ratyremy. Iurenana heka adeburerybemy rarybere.
\v 4 Deuxu bedeery nihikỹ wyhy debure waki nyimyhỹde, kia veneno tahe wauni-ò nalòmyhỹde. Deuxu heka taòhòte-di desenadi sõemy riwatỹxinyre.
\v 5 Buru heka reysamyhỹre tiu asimy riroximyhỹreu, broreni tahe aõmy rarybeõhyymyhỹre asi ijõdi-wanaki.
\v 6 Modeebo tahe awire rỹsỹna saõmy rỹimyhỹre? Aõbo tahe tai awimy rỹimyhỹre hãniesiuraki?
\v 7 Kia heka arirỹsỹke wadee ihoõre, kia ibutumy rerỹsỹmyhỹreu aõhỹỹmy riwasỹnymyhỹre.
\v 8 Txibo Deuxu-ò rexitòenyreri wadee kidiwahinykeki! Txibo Deuxu waixitòedỹỹna kidirawyònykeki!
\v 9 Kia tahe tii wabededỹỹnana-ribi riwatake; tii riwahetenymy riwarubunyke!
\v 10 Txibo diarỹ tuu bede arierykeki Deuxu tuu wadee riwinykeki, kia diarỹ wabedesamy arawayrytòke, kia aõdese inihikỹmy ratỹỹnyreri hãrele. Kiemy dori Deuxutyhy rare, kia diarỹ tiu iòludumy reaõhyymyhỹre, aõ riwinymyhỹreu.
\v 11 Titxibo tahe waruru roire idi arexiijekremy? Aõherekibo tahe warumy ararekre, aõ reraòmy aõkõ watximyhỹre-ribi?
\v 12 Diarỹ aõbo watyhyre mana wesemy? Waumy aõbo bronze wesena rare?
\v 13 Diarỹ heka arexiwiòhenanyke ihoõre, kia inyõ ihoõre riwawiòhenanyke.
\v 14 Iny rõhõtiyremy werymy reamyhỹre heka tiukekõna ibiòwareny idi rexiwobrunymyhỹrenyre, kia Deuxulau ruberuõmy rityhynyõmy rỹimyhỹre hãrele.
\v 15 Ka diarỹ tahe aõmy adeereny warybeõna wabiòwareny, kia heka riwajurykròrenyre iwese ahu riòre wyrau ruỹmy ramyhỹre wesemy.
\v 16 Komy heka tii tỹximy bejutàtàrara-di roimyhỹ, ranonoenymy,
\v 17 Ka irahudi tahe bemy rexirahòrere, kia bederatòteemyhỹreu urile riõmy ramyhỹre, kia tahe iherina rarubumy raterenymyhỹre.
\v 18 Kia karavana mahãdureny reòsamyhỹrenyre bee rierenymyhỹrenyreki; kia tahe bederahy-ki reburerenymy taile rurumyhỹrenyre.
\v 19 Kia iny mahãdu Tema-ribi Sabá-ribi dirahumyhỹdenyde, kia ahu riòre riemyhỹrenyre, kia heka sõemyrarysònadi roimyhỹre,
\v 20 Kia tahe ritehemynymyhỹrenyreu, kia ibutumy jurydeserenyrayròmyhỹrenyre, kia iraròsòreny tahe taile rexihumyhỹrenyre.
\v 21 Kai boho heka ahu riòre wesena toite; kai boho heka waõhỹỹhỹỹ-ò tadòimyhỹtenyte, kia tahe urile taberumyhỹtenyte.
\v 22 Diarỹ aõbo aõ wadee biwahinybenykremy adeereny aõbo rexitòenyre? Aõ aõtxi wadee biwahinybenykemy?
\v 23 Diarỹ aõbo rexitòenyre waòludu-ribi biwahedỹỹnybenykemy, kia aõbo itxỹte mahãdu debowo-ribi biwatabenykemy aõbo adeereny rexitòenyre?
\v 24 Biwaixinanybenyke, tai diarỹ rybeõmy aratxikre; aõbo ibinamy rewinyre wadee biteòsinybenykre.
\v 25 Mobo `bitimy rarybemyhỹre irybe rahãỹnanymyhỹre, ka arybereny roimy tarybemyhỹtenyte tahe aõbo teòbitinyõhyymyhỹtenyte.
\v 26 Kai boho aõbo diarỹ rarybereri bitxiỹnybenykemyreri, kai boho aõbo hãbu aõhỹỹmy werymy ratximyhỹre rybe tetxiõnytenyteri, kia yhy wesemy rỹimyhỹrenyremy aõbo?
\v 27 Kai boho heka õhõtireny ijõdire, kia uladuõ tybyõmy rỹimyhỹre-di bohonybenykemy iny sõeykyki; kai boho abiòwareny-di dori tahonytenyte!
\v 28 Warue-di betehewiwibenyke, manarybebedenyke txibo diarỹ raroirerimy.
\v 29 Iribi bitabenyke aõmybo raryberenyramy; kia dori òbitityhyaõkõ rare. Uritre warubudỹỹrenyõmykre; diarỹ dori warybeònana ijõdimy rarybereri.
\v 30 Kai boho heka wadi roilemy aõmy rarybemyhỹremy tahõtinymyhỹtenyte? Diarỹ aõbo reeryõre, aõ òbitimy aõ òbitimy aõkõ rỹimyhỹre?
\c 7
\p
\v 1 Kabedeki bededỹỹnana iteremy roimyhỹre, sodadu mahãdu aõmysỹdỹỹnana wesemy; ibutumy heka iny sohoji sohoji raõmysỹdỹỹnymyhỹre iutxiemy,
\v 2 iwese deodu (escravos) mahãdu bedeubròròmy... iwese aõmysỹdỹỹdu mahãdu taòwydỹỹnareny riraòmyhỹrenyre wesemy.
\v 3 Ahãdu irahudi ahãdu-di heka diarỹ aõnaõna òbitimy rarybemyhỹre, kia ruu wadi rurunymyhỹre heka sõemy waõhỹỹmydỹỹnana ruu ririnymyhỹre.
\v 4 Ka ruu heka irehemy raroorehenymyhỹre; diarỹ heka waumy reywesemyhỹre waherinaki raimyhỹre-wanaki txuijara iòhòmyhỹreu, kia tahe rỹỹraximyhỹre: "Ka aõbo lamanaòra-ò aõbo rehemynyra?"
\v 5 Waumy heka aõixỹjydibo rahetynymy roireri, kia watyy raruterenymy roireri; Wade tahe ruamyhỹre iribi tahe wadeyysy reamyhỹre.
\v 6 Watxu heka wytyhylemy rariamy ralòmy ramyhỹre, kia tyyretydyna ròretymyhỹre ratyremy, kia tahe roimyhỹrenyre raròsòna ririrenymy aõkõ.
\v 7 Deuxu itxi aõbo õhõti reare, wabededỹỹnana yhy rabudỹỹmyhỹre wesenale rare; warue heka tiu aõnaõna bedesanamy tobixiõna.
\v 8 Kai heka wiji wamy tabiteri, kia tahe tiu ixyby wamy obixiõna; kai watxi betehekre, kia tahe diarỹ wakõrawanahãkỹle.
\v 9 Iwese biuwetyy reamy riõmyhỹre wesele, iwese iny rubu mahãdu bede-ò resemy ramyhỹre tiu ixyby ròòseõtyhy;
\v 10 tii tiu ixyby taheto-ò iõkeseõna; tiu inyõ ixyby itxi tõhõti reaõtyhy.
\v 11 Iurenana tahe tiu rybeõmy aratxiõtyhy. Diarỹ heka aõhỹỹhỹỹmy ratỹỹnyreri rarybereriki, diarỹ heka areburekemy watximyhỹre, kiemy dori wacora,cão sõemy aõnaõna binabina tỹximy roireri.
\v 12 Diarỹ aõbo aõni bero nihikỹwomy rỹimyhỹre wesena aõbo rare, kia wadi reteherenymy ratxirenyreri?
\v 13 Kia diarỹ herinanadi rahõtinyre ixielehynatxi rearemy, kia tỹhiki tahe waõdesedese rewetaridỹỹnymyhỹre,
\v 14 tai tahe warasi riwabrebunymyhỹre, uni watyre reamyhỹre-wana wabrebu rityranymyhỹre.
\v 15 Diarỹ heka estrangulado-my aratxike wadeewire; rubule heka awityhyre ka warumy waumy-di watximyhỹre-ribi.
\v 16 Warumy aratxike heka riwaojinyre; kia ixyby warumy aratxikõkemy watximyhỹre. Biwarike aõbinabinaõmy, kiemy dori wabededỹỹnana aõki awiõhyyre.
\v 17 Aõbo tahe iny boho roire, aõmybo tahe iny boho aõ aõtyhymy riwahinymyhỹrenyre, kia aõmybo iny-di texinõhõtiyrenymyhỹtenyte?
\v 18 Aõherekibo tahe iny boho txuu iyhyõmy inydireny retehykymyhỹrenyre, kia ibutumy iny boho prova ratyre ròhònymyhỹrenyre?
\v 19 Tiubo tahe wadi ijere-ribi ixawikre, kia diarỹ awityhymy ixisohojimy aratxikremy?
\v 20 Txibo òraruna rewinyra-wana, aõbo tahe ibina adee rewinyra, kia iny mahãdu wadihyyle retehemyhỹrenyre? Aõherekibo tahe awyhy brebuna nihikỹ wadee tewinyta? Diarỹ aõbo aõnahyna nihikỹutxie rỹimyhỹre wesena aõbo rare?
\v 21 Aõherekibo tahe waòrarumy urile teàlàõte, aõherekibo waõbinabina tesuõte? Kia heka iòhòtyhylemy hãluuroki aroikre; kai uritre biwaijekre, kia tahe diarỹ tiu ixyby aratxiõtyhy.
\c 8
\p
\v 1 Bildade rybe:
\v 2 Jo, tiubo tahe kai kawesemy marybekre? Tiubo tahe arybe yhydebure wesemy marybekre?
\v 3 Kia Deuxu aõbo aõ òbitimy rỹimyhỹre rimoenykre aõbo? Kia aõbo ibutumy tabedeery-wana riwinykre aõ òbitimy rỹiõmyhỹre?
\v 4 Kia aõhe-wana inatyhymy ariòre boho Deuxu deewiõmy òraruna riwinyrenyra, tai tahe tii rirarytxynyrenyre tuu rekoamyhỹrenyremy.
\v 5 Ka tahe wiji Deuxu boosekre, kia tahe ibutumy ibedeery nihikỹ-ò bexitòenykre.
\v 6 Txibo kai inatyhymy òbitimy atximyhỹte-wana, Deuxu aõtamaõkõ awiòhedỹỹmy kanakre, kia tahe ixybyle aõwiwihikỹ adee riwahinykre tuu tesỹnymyhỹtemy.
\v 7 Kia aõnaõna ityhyna nihikỹ aribi riõre, kia heka aõ aõkõ rare, kia Deuxu adee irahudi kidiwahinykre-wana biurihinanykre.
\v 8 Iny ehetxina mahãdureny-ò myyraxike; juhuluduna mahãdu bedeerynana bieryke.
\v 9 Kia heka iny boho kau uladumy ruarenyre, kia aõ iny boho rieryrenyõhyyrenyre; iny txureny sumy rỹimyhỹre heka bedeubròrò wesele rariamy rexihumyhỹre.
\v 10 Kia ixinamy iny ehetxina mahãdureny adee rarybemy araixinanykre. Tabedeeryreny bedeerydỹỹna-di heka tii myy raryberenykre:
\v 11 "Kia aõbo taboa aõwaxina brejo webròki raumynykre, yda atehõ aõbo bee ihoõmy raumynykre?
\v 12 Kia atehõ iru ibòreri hãrele, kia rakròrerimy aõkõ rarubumy ramyhỹre, ijõ iru kanakreko-ribi.
\v 13 Kawesemy tahe iny aõhe rutỹỹnymyhỹre, kia iny Deuxu-ribi tõhõti rusamyhỹre; kawesemy tahe aõ iny itxỹte mahãdureny-ò rarysònareny-ò rehemynyõhyymyhỹrenyre.
\v 14 Imynydureny heka ariteti wesena rare; ityhydỹỹnareny heka teia de aranha wesena rare.
\v 15 Tii boho heka teia-ò rexiwiòhenanymyhỹrenyre, ka tii tahe riòludunyõhyymyhỹre; kia ariteti wesena-ò reximymyhỹrenyre, kia tahe lamamy rỹiõhyymyhỹrenyre."
\v 16 Iny itxỹte mah~dureny raumynymyhỹrenyre, iwese bederade txu-ò alòbrònamy roberamyhỹre wesele.
\v 17 Irarutireny heka urile manaki rỹtenymyhỹrenyre, kia urile manaurahãkỹki rahãletemyhỹrenyre,
\v 18 Ka txibo inyõ ritakeki, tiu inyõ rieryõtyhy tai ratxirenyremy.
\v 19 Kawesemy bedesana nihikỹ rawahimyhỹre iny itxỹte mahãdureny-ò; kia iny witxira rehemynymyhỹrenyre, kia tahe ihãwareny-di rahãỹnanymyhỹrenyre.
\v 20 Kia heka inatyhymy òbitimy Deuxu iny òbitimy rỹimyhỹre tiu riatyõhyymyhỹre, kia tiu tebò riwahinyõhyymyhỹre iny itxỹte mahãdureny wiòhenadỹỹmy.
\v 21 Tii heka ixybyle butxuenykremy arawinykre, kia tahe bedesa nihikỹmy birajuakre;
\v 22 Ka aòludu mahãdureny tahe bedejeijeiykytxi rahãwanymy ratxirenykre, kia iny itxỹte mahãdureny heto tahe rejujurenykre.
\c 9
\p
\v 1 Jo rybe:
\v 2 Diarỹ heka sõemy reeryre aõnaõna kawesemy rỹimyhỹre. Timybo tahe iny Deuxu rityhynykre tii òbitimy ratxireri hãremy?
\v 3 Mobo tahe Deuxu-wana rybebina riwinymyhỹre? Tii aõwaxima mil-my lỹỹraxi riwinykre, kia ta inyõ ibedeery ihoõre rirawyònykemy.
\v 4 Ibedeery nihikỹ sỹymy rỹimyhỹre, ini heka inihikỹmy bedebedemy rỹimyhỹre; mobo tahe itxesuki iratyre ròhònykre?
\v 5 Kia moõ riteòarinymy aõkõ tii hãwalò rihejimyhỹre, ka reburemyhỹreu tahe rihumyhỹre.
\v 6 Deuxu heka suu ramytanykremy rarybemyhỹre, kia tahe suu ramytàtàmyhỹre; tii heka suweijàti suu rimymy roimyhỹre rimyawanymyhỹre.
\v 7 Deuxu heka tarybe riwahinymyhỹre, kia tahe txuu ròhònyõhyymyhỹre, tii heka taina loosòna riturinymyhỹre.
\v 8 Deuxu ixisohojile biuratyy riterenyre; tii bero nihikỹ bròtya tyreki rararynyre.
\v 9 Deuxu heka taina ibutumy rỹikremy riwinyre: a Ursa Maior, hãti deòte, lòròbòtò, kia taina iraruludu riwinylere.
\v 10 Deuxu heka aõanõna ninihikỹ riwinymyhỹre, kia ibedeòtiidỹỹnana heka ionana ihoõre.
\v 11 Deuxu heka wabiredile ramyhỹre, diarỹ tahe tuu rabiõhyymyhỹre.
\v 12 Txibo Deuxu aõmy reakeki, mobo tahe ialu ritòenykre? Txibo inyõ rỹỹraximyhỹre: "Aõwe riwinyreri?"
\v 13 Deuxu tiu ixyby tatyrymy tebure-ò ròòseõhyymyhỹre; kia heka iwatireny Raabe-txile rejujumyhỹrenyre.
\v 14 Mobo diarỹ rare, ka tahe Deuxu arirawyònykre? Tikibo tahe rybetxi areakre tii-wana widee rybebina ariwinykremy?
\v 15 Txibo diarỹ warybeònawidu ijõdike hãrele diarỹ tiuwarawyòdỹỹõna. Tii heka wadinodu rare; kia wadi rexiwobrunyke sohijilemy tamy arexitòenykre.
\v 16 Kai diarỹ tribuna-ò arakremy wadee rybe kanakre, kia tahe tii wadee rexideòsinykre, kia tahe diarỹ waõnaaònamy aroholakre arityhynyõhyykre.
\v 17 Deuxu heka riwasurusurunymyhỹre tayhy debure nihikỹ-di, kia tahe aõ iòrarumy aõkõ wawotõmona ranihikỹ ramyhyỹre.
\v 18 Tii heka araelenykelau riwatòenymyhỹre, kia tahe aõnaõna binabinadile wabededỹỹnana ritỹxinymyhỹre.
\v 19 Waruru nihikỹ ariuhekre? Tii heka irurutere nihikỹ rare. Deuxu-ò aryrykre tribunal kanakremy? Mobo tahe kanakremy riteranykre?
\v 20 Diarỹ heka wainybòmy òbitimy watximyhỹre, ka warybele tahe riwararytxynykre, kia tahe waòraruna riòbitiòbitinykre.
\v 21 Diarỹ heka wainybore, kia ta tai rexilòrelòrenyõhyymyhỹre; diarỹ heka reywesemy watximyhỹre.
\v 22 Wadee heka ibutumy wiesewesehyyre; tai heka Deuxu-ò myy rarybemyhỹre, kia inywiwi inybinabina-wana rexihurenykremy.
\v 23 Kia txibo isitere-ribile aõbinabinahãkỹ iny inybò mahãdu rirubunykreki, kia Deuxu urile rutxuenykre.
\v 24 Deuxu heka bede bede nihikỹ rỹimyhỹre iny itxỹte mahãdu debowo-ò riwahinyrenyre, kia inywedureny ruereny ritybònyrenyre aõdi ijohonadi. Kia txibo Deuxu aõkõ tuu riwinyre, mobo tahe tuu riwinyre?
\v 25 watxu heka wytyhylemy reamyhỹre alòwededu mahãdureny raryremy; tii boho heka aõnaõna bedesanamy robiõlemy rexiwòmyhỹrenyre.
\v 26 Wabededỹỹnana heka reamyhỹre, bera heòty wesele, kia nawiwihikỹ coelho-ò ixidi rehumyhỹre wesele reamyhỹre.
\v 27 Diarỹ wadebure-ribi wanohõti rusakremy ixidi arisỹnykre, diarỹ aõwaxina wabederyry ixi-ribi ariatykre, kia ka wabedesamy ramyhỹ-ò aroosekre,
\v 28 Kia ta aõtamaõkõ waõhỹỹmydỹỹnana wytyhylemy riwarikre, kia dori diarỹ reeryre, tiu Deuxu wainybòmy watximyhỹre ityhydỹỹõna.
\v 29 Txibo tii diarỹ waòrarukile tureri-wana, kia aõmy ixi waruruõna.
\v 30 Tyysuròna tiu waòraruna isuròõna; tyysuròna rurutere tiu aõbinabina rewinyre isuròõna.
\v 31 Deuxu heka beususu-ò wadi rehumyhỹre, kia watyy dorile wamy raybimyhỹre.
\v 32 Deuxu heka iny aõkõ rare, wawesena aõkõ rare, iurenana tahe tiu warawyòdỹỹõna, kia tiu iny bededỹỹnanareny tribunal-ò rikiywinyrenyõtyhy.
\v 33 Iny inatxidee inywedureny ihoõre, kia Deuxu sohojile riwatamy riwahitxinykre.
\v 34 Deuxu, wararytxudỹỹ-ribi ixawike! Uritre abrebuna  binabinahãkỹ-di watỹxidỹỹõmyke!
\v 35 Tai tahe diarỹ ararybekre, tiu aruberuõtyhy, kiemy dori warayky tiu araroiõtyhy.
\c 10
\p
\v 1 Diarỹ heka reywesemy watxireri. Diarỹ bedebinabina-ribi arexiywinykre, kia tahe wacora, cãoki bedejubrere rỹirerimy ararybekre.
\v 2 Deuxu, uritre hãluuro nihikỹtxi wadidehuõmykre! Wadee marybeke timybo raroimyhỹremy!
\v 3 Kaile heka tiwawinyte. Timybo tahe ibinamy tiwaatymy, aõanõna binabina wadee tewinyteri?
\v 4 Kai aõbo waruereny wesemy aruedi atximyhỹte? Kia aõbo aõnaõnamy tabimyhỹte, iwese diarỹ boho retehemyhỹrenyre wesemy?
\v 5 Kia abedeedỹỹnana-di aõbo itxuumy atximyhỹte, waweserenymy? Kia aõbo urihimyole arumy atimyhỹte, iny rỹimyhỹrenyre-ribi?
\v 6 Aõherekibo tahe ibutumy waòraru bierykemy tesỹnyteri? Aõherekibo tahe adee tuu rarybemyhỹre aõ ibinamy rewinyremy?
\v 7 Kia heka teeryte diarỹ waòraruki aõkõ tuu ratỹỹnyreri, kia ta tiu inyõ ebowo-ribi riwataõtyhy.
\v 8 Adebò heka riwawinyre, kia inymy riwawahinyre, ka wiji tahe tiiòbitile riwahureri.
\v 9 Itxi aõbo õhõti reare su-ribi tiwawinytemy; kia aõbo ixybyle sonodemy biwarahorekre?
\v 10 Kai, wahã nadi-wana riwawinykremy tewinyte, ka warumy bedeki ararekremy.
\v 11 Kai waumy watidi wadelete-wana tewinyte, kia watityy wadedi tehetynyte.
\v 12 Kai heka warumy arekremy tewahinyte, kia iny arerinamy ararekremy tewahinyte, kia iny-di arukimy atximyhỹte tahe warumy aratxikremy riwaijemyhỹre.
\v 13 Kia heka diarỹ reeryre, acora,cãoki juhuhukỹle wasimy roimy raremyhỹ tuu biwinykremy:
\v 14 Kia diarỹ òraruna ariwinymy betehekemy wadi tesỹnyte, kia irahudi wamy beàlàke deramy beakemy.
\v 15 Txibo diarỹ ixi waòraruki tureri-wana, diarỹ heka wakõmy rare; txibo diarỹ wainybòreri-wana, diarỹ heka wawoki warati alilàmadỹỹnyke ihoõhyyreri, kiemy dori diarỹ urile raixỹrureri waõbinabinadi retehereriki.
\v 16 Txibo diarỹ warati alilàmadỹỹnykeki, wabedeeryõtyhyhykỹ, kai leaõ wesemy wadi wahemy teamyhỹte; kia tahe aõbedeòtiidỹỹna tewinymyhỹte biwarubunykremy.
\v 17 Kai heka ikiemy wadiitxeredu wadi teitxeredỹỹnymyhỹte wanimy aõmy rarybekremy; aehehe heka waòludumy ire raumynymy ranihikỹmy ramyhỹre, kai tahe wamy taòhòtemyhỹte texitxuhunymy aõkõ, exército wesemy.
\v 18 Deuxu, aõherekibo uladumy aruakremy tiwawahinyte? Diarỹ heka inyõ wamy komy robiõdile raruõre.
\v 19 Diarỹ heka nadiwo-ribile hãluuro-ò raõre, kia inymy aratxiõhyykemy ixidi rahõtinyre.
\v 20 Wabededỹỹnana heka ionana-ò dehemynymy namyhỹde. Iurenana tahe ywityhylemy biwarike! Kia diarỹ urihimyòmy bedesanadi biwarike
\v 21 kia bederehe iòkesenaõ-ò arakrekoki, kia hãwa nihikỹ bedeluruhukỹ-ò arakrekoki,
\v 22 Kia hãwahãkỹ ubròròna-ò, hãwahãkỹ binabina-ò, tai loosona òbitile bedeluru wesemy roimyhỹre.
\c 11
\p
\v 1 Zofar rybe:
\v 2 Kia aõbo ibutumy kaa (palavróri) irawyòdỹỹõmy rỹikre? Kia aõbo mobo sõetyhymy rarybemyhỹre aõbo tairybena ijõdityhymy rỹimyhỹre?
\v 3 Jo, kai aõbo irawyòdỹỹna ihoõrerimy tahõtinyteri? Kia aõhỹỹhỹỹmydỹỹnana iny rybereny ikokròkemy aõbo tahõtinyteri?
\v 4 Kai heka tarybemyhỹte, kia timybo tahõtinymyhỹte òbitimy tuu tarybemyhỹte, kia ihãremy ainybòmy Deuxukoki atximyhỹte.
\v 5 Diarỹ, Deuxu rarybekemy idi watxireri adee arybe rirawyònykemy!
\v 6 Kia tii bedeery iwasimy rỹimyhỹremy araixinanykre, kia aõbo iwasimy rỹimyhỹre ibutumy adee riòbiti òbitinykre. Kiamy tahe Deuxu-di betehekre aõhỹỹhỹỹmy arasỹnyrerimy, kia heka iylamy tuu teamyhỹte.
\v 7 Kai heka Deuxu bededỹỹnana bierykemy tahõtinymyhỹte, kia ibutumy ibedeery nihikỹ bierykemy tesỹnymyhỹte?
\v 8 Biuwetyy heka Deuxu dee ikonana aõkõ rare, kai tahe aõmy tamy ehemysỹõna; Deuxu heka rubu mahãdu bededỹỹnanareny rierymyhỹre, kia kai tahe teeryõte.
\v 9 Tii heka inihikỹ rare suratyre, kia beri nihikỹ ratyre ròhònymyhỹre.
\v 10 Txibo Deuxu inyõ rimykeki, iribi tahe brejuna heto-ò ridyke riròtenykremy, mobo tahe rikokròkre?
\v 11 Deuxu heka iny rierymyhỹre, kia iny aõki awiõhyymy rỹimyhỹre; kia tii aõnaõna binabina riwinymyhỹre-di retehehyymy ratximyhỹre.
\v 12 Kia buru bederahyludu iinytyhymy ruarenykreu, kia iny mahãdu iitxỹtemy rỹimyhỹrenyre ibedeeryreny ijõdikre.
\v 13 Jo, acoraçaõ Deuxu-ò birahòreke, kia tahe tamy bexitòenykre ebò tamy biterenymy.
\v 14 Kia aòraru ebòmy rayjynymy rỹimyhỹre ixiribi biatykre, kia uritre aõbinabina ahetoki rasỹnykemy iwahidỹỹõkre.
\v 15 Tai tahe kai aratidi òbitimy mariakre, iximynamy aõlau buberumy aõkõ.
\v 16 kai tiu aaõhỹỹhỹỹmydỹỹnanatxi õhõti iijaraõna, kia iwese bee reamyhỹre wesemykre, iny boho iribi tõhõti rusamyhỹrenyre.
\v 17 Abededỹỹnana heka txuemy txuu raòderanymyhỹre ratyremy rarỹsỹnykre (ou) raòderanykre, kia (ahora) turumy roimyhỹre-ribi kia itỹnymy roikre iwese txuu itỹnymy roimyhỹre wesemy.
\v 18 Kai heka amynydu ijõdimy matxikre, kia sõemy aõ biraòmy mabekre; Deuxu heka araijemy adi rarekre, kai tahe ixiki bimykre awityhytyhymy.
\v 19 Txibo tiu kai bexielehynymy matxikreu, kia tiu aõ abrebudỹỹõna; kia tahe sõemy iny mahãdu adee reamy rỹirakre ixiwiòhenadỹỹmy adee rexitòenymy.
\v 20 Kiaremy tahe iny binabina mahãdu adee retehemy rỹirakre werymy rekoarenykre, kia tahe tiu bedeõtxi iijararenyõna tamy rexiwòrenykemy; tamyreny heka rubuna sohoji riraòmy ratximyhỹrenyre.
\c 12
\p
\v 1 Jo rybe:
\v 2 Kia heka timy iny aburarenyõna kai boho heka iny mahãdureny rubedu toite, kia tiuboho burubenykreu, kia tiu ixyby bedeery ijõdiõtyhy...
\v 3 Ka diarỹ tahe aõnaõna reerylemyhỹre, kia diarỹ aòkirenyre aõkõre. Mobo tahe rieryõre tuu tarybetenyteri?
\v 4 Diarỹ heka ajueòdehyna rare wabiòwa mahãdureny-ò —  diarỹ heka òbitimy nodu rare, diarỹ heka wainybore; diarỹ Deuxu-ò rexitòenymy raremyhỹ, tii tahe riwarawyònymy raremyhỹre.
\v 5 Kia aõ reximywiwimy rỹimyhỹre, kia ityre aõnaõna binabina rejujumyhỹre, kia tahe aõbo iriòwysy iòhòmy rỹimyhỹre, kia ire ritorunymyhỹrenyre rariòwykremy.
\v 6 Iny itxỹte mahãdu heka aõwiwimy tahetorenyki rỹimyhỹrenyre, kia Deuxumy radònymyhỹre heka awityhytyhymy rỹimyhỹrenyre, kia tahe ideuxurenyle irururenymy ratximyhỹrenyre.
\v 7 Zofar, nawii nawii iròdu iròdu mahãduòini bỹ~raxike, kia tahe tii boho araixinanykre.
\v 8 Aõni aõni sumy rỹimyhỹrenyre-ò bexitòenyke, kia utura bero nihikỹmy rỹimyhỹrenyre-ò bexitòenyke, kia tahe tii boho adee tyyriti-di rirana riwahinyrenykre.
\v 9 Kia heka ibutumy aõniaõni bede rierymy rỹimyhỹrenyre, Kia Deuxu tebòdi aõnaõna riwinyremy.
\v 10 Aõnaõna irumy sumy beramy rỹimyhỹrenyre heka Deuxu debowokihyy rỹimyhỹrenyre; tii heka iny bededỹỹnana-di rimymy ratximyhỹre.
\v 11 Wabiòwa mahãdureny, iwese kai boho rybe-ò ijohonadu  mahãdu rybe tetxiõnymyhỹtenyte, kia dòròtò tahe rỹsỹna rierywityhymyhỹre, kawesemy tahe diarỹ raholamyhỹre, aõmybo tarybemyhỹtenyte-ò, kia tahe aõbo rybe òbitimy rỹimyhỹrele remymyhỹre.
\v 12 Matuari mahãdureny heka bedeerymy rỹimyhỹrenyre, kiemy dori inywyra inydee aõwiwihikỹ riwymyhỹre.
\v 13 Kiaremy tahe Deuxu heka ibedeery nihikỹ rare; tii heka ibedeerytyhy ijõdire, kia aõ rierymyhỹre.
\v 14 Kia tiu inyõ ixyby aõ iwidỹỹõna Deuxu idi rehumyhỹre-di; kia txibo tii ritòenykeki, kia tiu inyõ iribi ritaõtyhy.
\v 15 Kia Deuxu biulòra rimymyhỹreu, kia bede rarubumy ramyhỹre; kia bee riòlòdỹỹnymyhỹreu, kia bee iu rariamy bee rỹximy ramyhỹre.
\v 16 Deuxu heka iruruteremy aõnaõna-ribi ròtamyhỹre; tii heka ibedeery nihikỹ ijõdimy ratximyhỹre, kia suki bòdỹỹdu ratximyhỹre ratyremy.
\v 17 Tii heka iny rynana rarieki runymyhỹre-ribi ibedeery-wana iribi ritamyhỹre, kia tahe iijoi mahãdureny tabedeeryreny-ribi rexierymyhỹrenyre.
\v 18 Deuxu heka Iòlò irynana-ribi ritamyhỹre, kia tahe brejuna heto-ò risỹnymyhỹre.
\v 19 Deuxu heka sacerdote rihitxinymyhỹre (iofício-ribi); tii heka mobo ibedeerymy inidehemy ratximyhỹre-di rehumyhỹre.
\v 20 Deuxu heka dohodỹỹdutyhy mahãdu rirybekokròmyhỹrenyre, kia matuari mahãdu bedeeryreny riixawidỹỹnymyhỹre.
\v 21 Tii heka aõnaõna-di dehunana riteòsinymyhỹre aõdinodu nihikỹ mahãdureny-ò, kia tahe ibedeeryrenyruru rahumyhỹrenyre.
\v 22 Deuxu heka aõ iwasimy bedelurumy rỹimyhỹre ritỹnynynymyhỹre, kia bedeluru yky-ribi bede ratỹnymy reamyhỹre.
\v 23 Deuxu heka ibutumy iny hãwa hãwamy rỹimyhỹre riwahinymyhỹre tabedeery nihikỹ-wana, kia irahudi ixihudunana riwahinymyhỹre.
\v 24 Tii heka iny mahãdu dinodureny (juízo-ribi) riixierynymyhỹrenyre, kia tahe bederahy-ò ridymyhỹrenyre iriranareny ihoõmy.
\v 25 Tii boho heka bedeluru-di ririranymyhỹrenyre, kia iruebetà mahãdu rejujumyhỹrenyre, axaxa mahãdureny weserenyle.
\c 13
\p
\v 1 Diarỹ heka ibutumy tuu rabire warue òbitidi; kia ibutumy wanohõtidi tamy raholare, kia tahe reeryre.
\v 2 Wabiòreny, diarỹ heka aòkirenyle aratxile aõkõre: diarỹ heka reerylemyhỹre aõmybo  arybemyhỹtenytemy.
\v 3 Ka diarỹ tahe Deuxu bedeery nihikỹ-wana widee  ararybekemyreri, iki-wana widee bede ariywinymy wabededỹỹnanamy.
\v 4 Kai boho heka aõmy roilemy aõmy texiònanymyhỹtenyte; kia heka luahidỹỹdu weselemy heka atximyhỹtenyte, kia iny teteytenyõhyymyhỹtenyte.
\v 5 Aõhere taheka! Txibo kai boho rybeõmy matxibenykeki, kia bedeery nihikỹmy belebenyke!
\v 6 Waitxesedu-ò tahe boholabenykre, kia ywimy boholabenykre wabededỹỹnana-ò.
\v 7 Kia aõbo Deuxu biitxebenykreki kai boho aõbo roimy aõmy marybebenykre? Kia aõbo bòdỹỹmy marybebenykre tai?
\v 8 Kia aõbo kai boho iweribiki matxibenykre? Kia aõbo iaõbinabina dohodỹỹna heto-ki tai besukre?
\v 9 Kia aõbo tai awike tamy betehiwiwibenykeki? Kai boho heka Deuxu bibònykemy tahõtinymyhỹtenyte, kia iwese iny tebònymyhỹtenyte wesemy?
\v 10 Txibo kai boho òbitimy aõkõ matxibenykre-wana, aõmy wasimy matxibenykrehãrele, kia tii atxireny araeryrenymy aramyrenykre;
\v 11 kia iaõninihikỹ brebunadi aratỹxinyrenykre, iaõbinabina nihikỹ tahe atyrereny reserenykre.
\v 12 Kia tahe juhuluduna adeereny riòbitinyretxi õhõtireny reakre, kia heka bryby wesena rare, aõki awiõhyyre; kia aitxesedureny heka ityhyõre, suu tòrariemy rỹimyhỹre wesele.
\v 13 Rybeõmy matxibenyke, diarỹ ararybekre-ò, kia heka bede tuu rutỹỹnykre.
\v 14 Diarỹ heka rexihumy rare, wabededỹỹnanadi timybo ararekremy, kia heka rexihumy rare arurukremy.
\v 15 Diarỹ heka wararòsòna ixyby ihoõhyymy watxireri, keimy dori Deuxu riwarubunykre; Ka ihãremy tahe waõbinabinaki aresumy ararekre ikoki.
\v 16 Kia aõhe-wana wabrebuterena riwahedỹỹnykre, kia tiu iny itxỹte mahãdu tamy iko-ò inoõna.
\v 17 Ywityhymy sõemy boholabenyke diarỹ rarybereri-ò; warybe òbitidỹỹna-ò boholabenyke.
\v 18 Diarỹ heka rexihumy rare waõbinabinaki aresumy ararekremy, kia heka rexiemy watxireri òbitimy watxirerimy.
\v 19 Ka txibo Deuxu myy rarybekeki: "Mobo tahe rybebinabinamy wadee rarybekemy ratxireri dohodỹỹna heto-ki?" tai tahe rybeõmy arurukre.
\v 20 Deuxu, diarỹ inatxilemy aõmy adee arexitòenykre, kawesemy tahe diarỹ alau arexiwòõtyhy:
\v 21 kia uritre ixyby aõhỹỹhỹỹmy wasỹdỹỹõmykre, kia uritre sõetyhymy raberumyhỹremy wasỹdỹỹõmykre.
\v 22 Deuxu, dohodỹỹna heto-ò wadee manarybeke, kia diarỹ tahe ararawyònykre; ada diarỹ komy ararybekre, kai tahe bidiwarawyònykre.
\v 23 Tiwesebo tahe waõre, aõòrarunabo tahe rewinyre? Aõbo tahe ibinamy rewinyre, aõòrarynabo tahe rewinyreki tuu wahãre?
\v 24 Aõherekibo tahe kai walau tadexiwòmyhỹte? Aõherekibo tahe waòludu wesemy wadi ahãmyhỹte?
\v 25 Diarỹ heka bederade iru yhy ridymyhỹre wesena rare: Aõhekibo tahe tadiwabrebunymyhỹte? Diarỹ heka horeru rubu wesena rare: aõherekibo tahe wahekihyy tadeamyhỹte?
\v 26 Kai heka tyyryti iutxiemy teritinyte wamy waòludumy, kai heka diarỹ ariònykemy watxireri, kia weryrybou aõbinabina rewinymy raremyhỹ wahe.
\v 27 Wawa rerutidi bitaake, kia ibutumy wariranadi betehekre, kia wary suti rerimyhỹredi betehewiwikre.
\v 28 Kawesemy tahe diarỹ arexihumy arakre, òwòru rubu wesemy, kia iwese tyy iròdu sõmo tuu riroximyhỹre wesemy.
\c 14
\p
\v 1 Ibutumy heka diarỹ boho watyhyõrenyre, kia uladumy ruarenyreuhyyle; wabededỹỹnanareny itxuutyhyre, kia sõemy bedejeijeidi rỹimyhỹre.
\v 2 Iny heka noiròsò wesena rare, kia noiròsò rexiraynymy reamyhỹre, kia tahe aõtamaõkõ rarubumy reamyhỹre; kia heka bede ubròrò wesena rare, kia tii ròhònymy riõmyhỹre.
\v 3 Diarỹ boho aõkõ roire; aõherekibo tahe wadeereny tarybemyhỹte? Mobo tahe diarỹ rare, aõmybo tahe dohodỹỹna heto-ò riwadykre?
\v 4 Iny heka inytyhy aõkõ rare, kia tiu aõ awityhymy idi rỹiaõkõ rare.
\v 5 Kai heka tiwese ahãdu txumy teywinymy idi atximyhỹte, iny sohoji sohoji-di irumy rỹikremy; kia heka rexihumy roimyhỹre, kia tahe tiu inyõ riwiurònyõtyhy.
\v 6 Wadireny itxere-ribi ixawike, aõwiwimy biwaribenyke, kia watxurenyònana-ò rehemynykreuhukỹle, timybo tahe ionana-ò rehemynykre aõmysỹdỹỹdu txu-ò.
\v 7 Bederade rỹimyhỹre-ò rarysòna ijõdire; txibo rakròkre-wana, kia ixyby rabròmy raumynykre.
\v 8 Kia iraruti retybykehãrele, kia irarutiwo tahe suki rurukre.
\v 9 Kia bee urihimyòmy tamy bitxiwike, kia tahe tii ruhunykre, kia txiru (ou) iiru raumynykre, aõwitỹmyra wesehekỹle.
\v 10 Kia iny rurumyhỹreu iny rexihumyhỹre; kia irahudi tauni riwahinymyhỹre, iribi tahe tiobo ramyhỹre?
\v 11 Kia ahu ruỹmyhỹre wesemy, kia iwese bero reaõmyhỹre wesemy,
\v 12 kawese tahe biuwetyy ratxikre wana wana, kia ibutumy rukurenykre. Iny boho rubu tỹhimy rỹkõrõrenykre, kia tiu ixyby lamamy rỹkỹirenyõtyhy.
\v 13 Aõhere taheka! Txibo kai rubu mahãdureny hãwayky-ò biwawahinyekeki, tai tahe diarỹ arexiwòmy aroikre, kia adebure ixawikemy, kia tahe bedeõ ixidee biywinyke watxi õhõti reakremy!
\v 14 Kia inyõ aõbo ixyby irumy ratxikre rurukre sỹtybymy? Diarỹ tahe ariraòmy ararekre bedewiwimy, kia waijesu rexihukrexihykỹle.
\v 15 Tai ta he wadee bydyrykre, kia diarỹ tahe ararawyònykre; kai waki beysakre, kia tahe biwaumydỹỹnykre.
\v 16 Kia wadi arukimy mabekre aõ ibinamy ariwinyhenylau, kia tahe wadee raijòsinymy rỹimyhỹrenyre, kia òraruna ariwinymy wadi reteherenykemy.
\v 17 Kia waòraru-ribi wanõhõti rusakre, kia aõbinabina rewinymy raremyhỹ arisukre.
\v 18 Kia wesemy tahe hãwalò rejujumy ramyhỹre, kia manaura nihikỹ taherina-ribi rexihejimy ramyhỹre,
\v 19 Kia iwese bee suu riamy ramyhỹre, kia tahe beesetere suu riwymyhỹre, kawesemy tahe kai iny mahãdureny rarysòna tehumyhỹte.
\v 20 Kai heka teixierynymyhỹtenyte, tii tahe ikiemy ramyhỹre, kia tahe iaõnaõna rexiwitxiranymy ramyhỹre, tiu bede riteòarinymy ramyhỹreu.
\v 21 Txibo ariòre boho bedesanawiwi tamyreny rawahimyhỹrenyreu, kia tii rieryõhyymyhỹre, kia txibo aõbinabinatxi resemyhỹreu, kia tii ibededỹỹnana rieryõhyymyhỹre.
\v 22 Tii taumymytxitxina sohojilemy rarutaamyhỹre, kia tauni itxỹte itxỹtelemy rõhõtiyremyhỹre.
\c 15
\p
\v 1 Elfin rybe:
\v 2 — Jo, bedeeryõ tiu rybebinamy iny rirawyòny aõkõ rare, kia uritre taritariõmy, kia rybeureraru aõki awiõhyy rỹimyhỹre.
\v 3 Bedeeryõ tiu rybesõmosõmomy irybeõna, kia tiu tarybe aõkõnadi aõmy ihỹỹnaõna.
\v 4 Kai aõbo Deuxu rybetyhydỹỹnana biatykemy idi tesỹnyteri; txibo aribi raòrarunyreki, kia tiu inyõ Deuxu-ò iixitòedỹỹõna.
\v 5 Kai heka kawesemy tarybemyhỹte aòraruna òrarukile, kia tahe iny witxira bibònykremy tesỹnymyhỹte arybedi.
\v 6 Diarỹ heka inymy roimy ararybeke aõkõre, kia heka arybe òbitikile texiaõhỹỹmydỹỹnymyhỹte.
\v 7 Kai heka tahõtinyteri komy iny uladumy ruaremy? Kai aõbo komy ka hãwa bede-ò tanate hãwalò hãwalòkomy?
\v 8 Kai aõbo Deuxu bededỹỹnana wasimy rỹimyhỹre aõbo teerymyhỹte? Kia aõbo kai sohojile abedeerymy atximyhỹte?
\v 9 Kia aõbo kai teeryte diaỹ boho aõ reeryrenykõreri, ada aõnaõna aõbo awityhymy waratyrereny teerymyhỹte?
\v 10 Diarỹ boho heka aõ reerymyhỹrenyre, kia heka iny iumymy rỹimyhỹrenyre-ribi reerymyhỹrenyre, kia heka bu koki uladumy ruarenyre.
\v 11 Aõherekibo tahe kai Deuxu ruxetòenaderamy teateri? Kia inimy heka diarỹ boho adee rarybemyhỹrenyre.
\v 12 Aõherekibo tahe kai acora,cão tewahinyteri? Aõherekibo tahe kai adebure òsỹnymy teteheteri?
\v 13 Aõherekibo tahe taeheheteri, Deuxu òludumy tebureteri? Aõherekibo tahe kai kawesemy texideburedỹỹnyteri?
\v 14 Kia aõbo inyõ òbitityhymy ratximyhỹre? Kia aõbo inyõ òbitimy Deuxu koki ratximyhỹre?
\v 15 Txibo Deuxu (anjos) rityhynyõhyymyhỹre, txibo biuwetyyle iximynamy roimyhỹre, kia tamy òbitimy irueki roimyhỹre,
\v 16 Iny boho iny mahãdureny susu binabinahãkỹ-ò  rykaryberenykre, kia òrarunamy iõmyhỹrenyre bee rỹimyhỹre wesele?
\v 17 Jo, boholakre diarỹ ariòbitinykre; diarỹ arelyykre tuu rabiremy.
\v 18 Iny bedeery mahãdureny heka òbitityhymy roixinadỹỹmyhỹrenyre, kia heka tybyreny-ribi rieryrenyre,
\v 19 kia heka suuki rahãwanymy roimyhỹ, kia heka iny witxira mahãdureny-ribi aõ rieryrenyõhyyrenyre.
\v 20 Kua ibinamy iitxỹtemy ratximyhỹre, kia heka iny witxirahelemy rariamy ratximyhỹre, kia bede iyhyõmy aõhỹỹmy rutỹỹnymy ratximyhỹre.
\v 21 Aõnaõna binabina wodỹỹ heka õhõtiwo ritỹxinymyhỹre, kia awityhy reximymy ratximyhỹrenyreu, kia iny itxỹte mahãdu tuu raòhòtemyhỹrenyre.
\v 22 Tii heka bedeluru rubuna-ribi rahenykemy ihòõhyyre, kia maydese heka rexihumy roimyhỹre rorubudỹỹkremy.
\v 23 Kia rara boho heka riraòmy ratximyhỹrenyre, kia iumyde riròrenykremy; kia tii bederurunykre-ò iòhòmyhỹre rierymyhỹre.
\v 24 Tii heka aõnaõna binabina rimykre, kia aõhỹỹmy rutỹỹnykre, kia iwese tiu Iòlò tàludu mahãdu òhòtena riraòmyhỹre wesemy.
\v 25 Iny itxỹte mahãdureny heka tebòreny riterenymyhỹrenyre Deuxu òludumy, kia tahe Deuxu bedeery nihikỹreny-wana resumyhỹrenyre.
\v 26 Tii heka iitỹte rare, kia tahe òhòte utxiedi rexiijemy ratximyhỹre, kia tahe idi Deuxu dee rehumyhỹre.
\v 27 Kia inydi retehemyhỹreu heka urile rexityhytyhynymyhỹre, kia icora,cão heka ixi sohojile ratxikemy ixi rõhõtinymyhỹre.
\v 28 Ka hãbu binahãkỹ heka hãwa ixidee rimymy idi ratximyhỹre, kia tahe heto ixiyhymy rỹimyhỹredi ratximyhỹre, ka hãwa-ò hetoreny-ò tahe aõnaõna binabinahãkỹ sõemy kanakre.
\v 29 Tii heka tiu ihytyhymy iaõdimy bede irehemy inoõna, kia ibutumy iribi rexihukre. Kia iubròrò dorile su-ribi riõkre.
\v 30 Hãbu bina heka tiu bedeluru-ribi rahenyõtyhy. Tii heka iwese bederade ruru roomyhỹre wesele roorenykre, kia tõiròsò yhy ridymyhỹre wesele ridyrenykre.
\v 31 Kia heka ibedeery nohõtiwihikỹ ihoõre, kia rybe roilemy rỹimyhỹre rityhynymyhỹrenyre, kia roile heka tamy awityhymy rỹimyhỹre.
\v 32 Tii heka rarubukre bedekokile, kia iwese bederade rarubumyhỹre wesele, kia tiu ixyby ruhunyõhyymyhỹre.
\v 33 Tii heka (parreira) wesena rare, kia (uvas) iwebòdile rexihumyhỹre wesele, kia iwese (oliveira) tanoiròsò riatymyhỹre wesele.
\v 34 Iny itxỹte mahãdureny heka tiu irioreriorereny ijõdiõtyhy, kia heòty iny binabina mahãdureny heto risõrenykre.
\v 35 Tii boho heka aõnaõna binabinale widee bede riywinymyhỹrenyre, kia tahe aõ ibinamy tuaõkõ riwinymyhỹre, kia heka iny witxira bòdỹỹlemy rõhõtinymyhỹrenyre.
\c 16
\p
\v 1 Jo rybe:
\v 2 Diarỹ heka ibutumy tamy raholare juhuhukỹle; kai boho tiwaruxetònyõlemy, kia urile tiwaitxỹte itxỹtedỹỹnytenyte.
\v 3 Kia aõbo ka rybetybyhykỹ ikonana ihoõre? Aõherekibo tahe kai boho waitxenadỹỹ-ribi ixawirenyõreri?
\v 4 Txibo kai boho warynanaki atxibenykeki, kia diarỹ aweserenyle aõmybo tarybetenyterimy ararybeke. Diarỹ warati ariukỹukỹnyke, bedeery mahãdureny wesemy, kia tahe rybe sõemy arisurusurunyke.
\v 5 Ada txibo rybewimy inyruxetòedỹỹmy ararybeke, kia iaõhỹỹhỹỹ raujakemy.
\v 6 Ka txibo ararybekre waaõdesedese ruhuõhyyreri, kia tahe rybeõmy watximyhỹre, kia ta waõhỹỹhỹỹ rayjaõhyyreri.
\v 7 Kai, Deuxu waruruhomyaõkõ tiwasỹnyte, kia ibutumy wariore boho waribi tehutenyte.
\v 8 Kai heka brejuna heto-ò tiwasỹnyte, iurenana heka diarỹ umy rarybereri. Kia heka diarỹ wadehomyaõkõ wadimy rabire, iurenana heka iny witxira mahãdu wadi rõhõtinyrenyre, diarỹ ixi waòraruki turerimy.
\v 9 Deuxu teburedi aõhỹỹ nihikỹmy riwasỹnyre; tii wamy radònymy wadi retehemyhỹre, kia iwese iròdu debure wahemy reamyhỹre wesemy warubudỹỹmy.
\v 10 Ibutumy heka warubudỹỹmy reamyhỹre, kia tary riraynymyhỹre wadi risinykremy, kia wamy rybebinabinamy rarybemyhỹre riwaixỹrudỹỹnykremy.
\v 11 Deuxu heka hãbu binahãkỹ-ò riwawahinyre; tii heka iny itxỹte debowotxi aresekremy riwawahinyre.
\v 12 Diarỹ heka awityhymy aõbinabinaõmy raremyhỹ, ka tii tahe riwasurusurunyre; Deuxu heka wabòtòki riwamymy riwakròkròre. Tii heka tabrysi wesemy riwasỹnyre
\v 13 kia ibutumy bede bede-ribi tawyhy wadee riterenyre; kia wyhy heka waweryridi ròhònyre, kia timy wadi rexibrunyõhyylemy, kia waweryriòte suòhòkỹle resere.
\v 14 Kia sodadu wesemy tii wamy raòludure, kia heka tii riwaòròòròre sõemy wamy raohotere.
\v 15 Kia bederyry deòsinamy tyyyxeyxedi rexityynyre, kia tahe bede reryrymy suỹnỹsityre ranyre.
\v 16 Kia heka sõemy rahinyre, kia waòsỹny roore, kia heka waruedena raweluumy turumy roimyhỹ.
\v 17 Kia ihãremy tahe tiu rebureõhyyre, kia waixitòedỹỹnana ikiemy òbitihyylemy ròhònymyhỹre.
\v 18 Kia suu heka aõnaõna binabina walau riwòõhyylemyhỹre, aõbo waòludumy riwinyrenyre mahãdureny!
\v 19 Diarỹ heka reerymyhỹre mobo biu bedeki riwaijemyhỹre; waitxesedu heka tai rahãwanymyhỹre.
\v 20 Wabiòwa mahãdureny heka urile wadi risinymyhỹrenyre; diarỹ tahe Deuxu deele roosemyhỹre waruebetuudi.
\v 21 Kawesemy inyõ tabiòwa riijemyhỹre, diarỹ heka mobo wii riijemyhỹre wesena reijemyhỹre Deuxu koki.
\v 22 Wawyra bededỹỹnana heka raywiywinymy roimyhỹre, kia tahe diarỹ rydi arariamy arakre, ryy iòkesena ihoõdi.
\c 17
\p
\v 1 Kia heka diarỹ urihimyole raelewesenanymyhỹre. Wabededỹỹnana heka dexihumy namyhỹde; aõbo wiji diwaraòmyhỹde, kia hãluu sohoji diwaraòmyhỹde.
\v 2 Diarỹ heka wadi alisidu mahãdureny riwaurawonymy wadi nyimyhỹdenyde, kia tahe diarỹ tisireny ninihikỹ reitxemyhỹre.
\v 3 Deuxu, kia kai sohojile bede wadee reytekemy biwahinyke; tibo tahe tiirenyre, diarỹ aõbo iwyhyjuryrenykre?
\v 4 Kai heka wadilisidureny rati birarytxynykre, kia aõnaõna rieryrenykremy; kia uritre tamyreny arexiõkelau biwatòenykre.
\v 5 Iwese rybe rỹimyhỹre: "Kia rana rahurenykre, kua mahãdure riòre tabiòwareny-ribi nieru ritamyhỹrenyre."
\v 6 Iny mahãdureny heka kaa rybe wadee riuhemyhỹrenyre wamy òludumy, kia waòsỹny-ò rarybexinymyhỹrenyre.
\v 7 Diarỹ heka waruebetàmy relereri aõhỹỹhỹỹmy ratỹỹnyreriki; ka waumy heka ubròròtỹỹnyla rare.
\v 8 Wadee retehemyhỹrenyreu, kia hãbu mahãdureny ibinamy ratximyhỹrenyre, kia aõhỹỹmy riwasỹnymyhỹrenyre, iwese (ateu) rỹimyhỹre wesele.
\v 9 Kaa hãbu mahãdu òbitimy rỹimyhỹrenyre, kia òbitityhymy rỹimyhỹrenyre taureraru riwahinyrenykrekoki, kia heka ire òbitityhymy ratximyhỹrenyre, tarybe riwahinymyhỹrenyreu.
\v 10 Ka txibo kaò kòdòòsedenykeki, diarỹ tiu taireny ibedeeryrenymy walahãsaõna.
\v 11 Wabededỹỹnana heka rariamy ramyhỹre; kia aõ ariwinykremy reywinymyhỹre heka urile rayjamy ramyhỹre, kia wacora,cõa riraòmy ratximyhỹre tahe rirahure.
\v 12 Kia wabiòwa mahãdureny myy rarybemyhỹrenyre, ruu riki heka tamyreny txuu rare; kia bedelurureri hãrele, kia tii bede loosoma ityymy itỹnymy tamyreny rỹimyhỹremy tuu rarybemyhỹrenyre.
\v 13 Waheto heka rubu mahãdureny heto ykyki rỹikre, tai aroimy arõrõkremy bedeluruhukỹki.
\v 14 Kia hãluu heka wahã raremy tuu ararybekre, kia mohõ tahe nadi waseriòre raremy tuu ararybekre.
\v 15 Txibo kawesereriki, titxibo tahe wararòsòna rare? Inyõ aõbo wararòsòna wadee riijekre?
\v 16 Kia aõbo tii rubu mahãdureny hetowo-ò aõbo rubehekre, tamy ikiwana ibutumy surawoki arexielehynyrenykremy?
\c 18
\p
\v 1 Bildade rybe:
\v 2 Jòò, aõherekibo kai rybeõmy atxiõteri? Rybe-ribi heka ixawike, kia ta ywimy boholake, kia tahe iny widee rakaryberekre.
\v 3 Aõherekibo tahe kai wadireny tahõtinymyhỹte wainytyhyreny ihoõmy, kia diarỹ boho iròdu wesemy wadi tahõtinymyhỹte?
\v 4 Kia heka aehehedi kai òbiti sohojile texiwotõmonyteri. Kia aki aõbo reburereri, kia bede aõbo bijiumy aõbo rexirahorekre? Kia aõbo aiòraruki, hãwalò hãwalò tàmana-ribi rexihejikre?
\v 5 Iny binabina mahãdureny bededỹỹnana heka rexihurenykre, kia iwese loosòna rurimyhỹre wesele,  kia iwese heòtyrade rexihumyhỹre wesele.
\v 6 Kia iheto loosòna tiu raòderyõhyykre; kia loosòna rỹikewihikỹle, kia urile bedelurule ijõdikre.
\v 7 Iny binabina mahãdureny heka awityhytyhymy ririranymy ratximyhỹreny, ka tahe wiji urile nariòwymyhỹdenyde; kia tabededỹỹnanareny òbitikile rexiriòwysydỹỹnymyhỹrenyre.
\v 8 Tii heka riytyre rỹimyhỹre, kia iwatireny tahe rararytxymy rỹimyhỹrenyre.
\v 9 Kia ibòtòruureny iwararooki rimymyhỹrenyre, kia reruti tahe ritxynymyhỹrenyre.
\v 10 Kia bòtòruu heka iwasimy suki roimyhỹ, kia tikibo tii rariakreko.
\v 11 Kia tiribo tiribile aõbinabina tamyreny ròhònymyhỹre, kia tahe tii boho urile iworeny rahitxihitximyhỹrenyre; tii boho iriranareny iyhyõmy riijemyhỹrenyre.
\v 12 Tii heka iaõdi rare, ka tahe wiji urile rama disamyhỹde; kia aõbinabina heka rexihumy roireri ityre resekremy.
\v 13 Binana rubuna heka iumymy roberare, kia tahe iaxiò iruti risudỹỹnyreri.
\v 14 Tii heka iheto-ribi risiherenyre, tai awityhymy reximywi raremyhỹ-ribi, kia tahe Iòlòòhòkỹle ritusinyrenyre, kia heka rubu rare.
\v 15 Ka heto heka (enxofre-di) rasuhòsuhòkre, irahudi tahe inywitxira tai rasỹnykre.
\v 16 Iny binabina mahãdureny heka bederade rubu wesenareny rare, kia iraruti-ribi ròrarunymy rarubumy ramyhỹre, kia tahe iruru biuluduòhòkỹle rehemynymyhỹre.
\v 17 Tiu heka inyõ itxi tõhõti iijaraõna; kia ini heka rusakre tai rasỹnymy raremyhỹki.
\v 18 Tii heka iny irumy rĩmyhỹrenyre-ribi rateòdỹỹkre, kia loosòna-ribi idi dehu rỹikre bedelurutxi.
\v 19 Kia tariòre tarioreriore ririõhyykre; kia irioreriore ihoõhyykre ihetoki rasunykemy.
\v 20 Kia ibutumy bedebede-ribi iny mahãdureny inina-ò ikonanamy roholarenykre, kia tahe urile brebumy ramytàtàrenykre.
\v 21 Ka heka iny binabina mahãdureny konana rare, kua mahãdu Deuxu rieryõkemy rỹimyhỹrenyre.
\c 19
\p
\v 1 Jò rybe:
\v 2 Tiubo tahe kai boho aõhỹỹhỹỹmy biwasỹnybenykre, kia heka aryberenydi tadiwabinanymyhỹtenyte?
\v 3 Kai boho heka tiwese weseaõkõ wadi tisinytenyte. Kia aõbo taixỹrutenyõhyymyyhỹtenyte aõbo wadi tadisinymyhỹtenyteki?
\v 4 Kia txibo diarỹ ixi waòrarukikeki, kia aõbo diarỹ ikiemy arararytxymy aratxike?
\v 5 Kai boho heka waratyre awityhymy atximyhỹtenytemy ixidireny tahõtinymyhỹtenyte, kia heka waaõhỹỹhỹỹ riwatỹnynyremy wadi tahõtinymyhỹtenyte ixi waòrarukiremy.
\v 6 Kia heka idi bierymy boibekre Deuxu wadi awimy aõkõ ratxiremy; tii heka bòtòruu riterenyre riwamykremy.
\v 7 Diarỹ heka rexitỹnynymy rarybereri adebure òludumy watxirerimy, kaa inyõ tahe wadee roholaõhyyreri; diarỹ ixiwiòhedỹỹmy rexitòenyreri, kia tahe aõ òbitimy rỹimyhỹre ihoõhyyre.
\v 8 Deuxu heka wary ritxynyre adobowetidi, kia idi aròhònyõkremy; tii heka wary bedelurudi rihetynyre.
\v 9 Deuxu heka ibutumy waõna waityhyna waribi ritare, kia wanidehedehedỹỹnana ibutumy wearibi rahure.
\v 10 Tii heka tiribi tiribile riwahetenyre riwahukremy, kia wararuti-ribi reraòmy raremyhỹ waribi ritare.
\v 11 Kia tebure heka waòludumy heòty wese roore; tii heka taòludu wesemy wadi ratxire.
\v 12 Tii heka aõbinabinadi ritỹxinyre; tii boho heka sodadu wesemy tii boho hãluu taixiwòtenamy riarenyre, kia tahe wahetoweruramy rexideòtenyrenyre.
\v 13 Deuxu heka waseriòre boho riwarirenykremy tuu riwinyre; kia waeryreny mahãdu wade ratximyhỹrenyre, kia inywitxira wesemy.
\v 14 Wasỹreny mahãdu waribi rexilòhòrarienyrenyre; kia wabiòwa mahãdureny watxi tõhõtireny reaõhyymyhỹrenyre.
\v 15 Kia waki hãwadureny mahãdu, kia riwaeryõwesemy wadi rỹimyhỹrenyre; kia wadeòdu mahãdureny, kia iwitxira suludu wesemy wadi ratximyhỹrenyre.
\v 16 Kia wadeòduõ-ò rarymyhỹre, kia tahe tii riwarawyònyõhyymyhỹre, kia tiu diaỹ ywityhy aõmy rexitòenymyhỹre hãrele.
\v 17 Wahãwyy heka waryworòmy ruruõhyymyhỹre; waseriòre wamy raybimyhỹrenyre.
\v 18 Kia uladu sõmo dori wadi risinymyhỹrenyre; kia raimyhỹreu urile wadi risinymyhỹrenyre.
\v 19 Kia ibutumy wabiòwatyhyreny mahãdu wamy raojinanymyhỹrenyre; kia iny mahãdu-wana awimytyhymy watximyhỹre dorile wamy ròludure.
\v 20 Diarỹ wadesityymy watimy rabire; kia ibinamy raremyhỹ.
\v 21 Wabiòwa mahãdureny wadi bexiwobrunybenyke, kia Deuxu debò dori riwawotõmõnyre.
\v 22 Aõherekibo tahe kai boho waheki tekoatenyteri Deuxu wadi wadi reareri wesemy? Aõherekibo tahe waaõhỹỹhỹỹdỹỹ-ribi ixawirenyõrenyreri?
\v 23 Timykibo warybe tyyritina rybemy raritidỹỹke!
\v 24 Ada waomati juràwese aõbo, kia tii ikiemy rararemy roike, manatere-ò!
\v 25 Kia heka wahedỹỹdu ratximyhỹre heka diarỹ reerymyhỹre; kia ikonanau tahe tii wadee kanakre waki suki resukremy.
\v 26 Kia wadesityy binana riròreri hãrele, kia ka waumy raredile Diarỹ Deuxumy arobikre.
\v 27 Diarỹ waruedi tuu arobikre; kia warue heka tuu robikre, tii tahe wadee inywitxira aõkõ wadee rare. Kia ixyby tuu reareri tuu ratỹỹnyremy!
\v 28 Kai boho myy tarybemyhỹtenyte: "Timybo tahe iny boho aõhỹỹhỹỹmy risỹnyrenyre? Kia iòraruna aõbo taityhyle ratxireri."
\v 29 Kia heka tõnorilau ruberumyhỹre, kia tõnori idi Deuxu iaõbinabina rirarytxymyhỹre wahe. Kia bierybenykre kia inyõ iny boho ritarenykre.
\c 20
\p
\v 1 Zofar rybe:
\v 2 Jò, kai heka tiwaixiranymy tiwarita, tai heka aõtamaõkõ rarawyònyreri.
\v 3 Abededỹỹnana heka ibinatyhytyhyre, ka diarỹ tahe rarawyònyke òbitimy ijõdire.
\v 4 Kai heka teerywiwite juhuu bededỹỹnana rỹiramyhỹuhỹỹle, iny mahãdu suki rahãwanymy rỹiramyhỹ, kia ikiemy tuhyyre:
\v 5 Mobo bedesanadi ibinamy ratximyhỹre heka urihimyole rỹimyhỹre; kia iaõwiwi wytyhylemy riõmy reamyhỹre.
\v 6 Tii aõwaxina irarieke biurarie wesehekỹle, kia iratyy biuwetyyòhỹkỹle rỹike,
\v 7 ka tii tahe rexihukre ikiemy iwese bryby rexihumyhỹre wesele, kia ieryreny mahãdu rieryrenyõhyylerenykre aõhemy rutỹỹnyremy.
\v 8 Tii heka rasi wesemy riõkre, kia iny rumy retehemyhỹre wesemy, kia tiu ixyby inyõ tuu robiõtyhy.
\v 9 Kia iny mahãdu tii-wana rahãwanymy rỹiramyhỹ, kia tiu ixyby tuu robirenyõtyhy.
\v 10 Kia iriòre boho heka iny iaõkõmy rỹiramyhỹ-ò rawahirenykre tii riwasinyre hewa, kia ibinatyhymy ixidee rimyre hewa.
\v 11 Kia iumytỹra ruruterehekỹ, kia iòhòtyhylemy su nodemy relekre.
\v 12 Mobo aõbinabinamy ratximyhỹre heka aõnaõna bina tamy ibreere. Tii tòròtòrawo-ò riwòmyhỹre
\v 13 kia tahe tòròtòki idi ratximyhỹre, kia tỹnyremy ixityyki tuu rurukremy.
\v 14 Kia irahudi tahe iwonawoki, kia aõhyrebinahãkỹlemy rexirahòremyhỹre.
\v 15 Hãbu itxỹte heka taityhyna riwasinymyhỹredi urile rahylòimyhỹre; Deuxu heka iwonawo-ribi ritamyhỹre.
\v 16 Tii heka hemylala aõhyrebina ijõdire, kia aõhyre iny rirubunymyhỹre.
\v 17 Mobo ibinamy rỹimyhỹre tiu awityhymy broreni huysy bidi itòrenyõna, kia bero wesele rekoamyhỹrenyre.
\v 18 Kia tii ibutumy aõbo taaõmysỹuludumy rimyre ririkre, kia tiu taõwidi taityhynadi awimy ratxiõhyykre.
\v 19 Kia heka aõhekibo tukre, kiemy dori urile iny iaõkõ rỹimyhỹrenyredi aõhỹỹhỹỹmy risỹnymy ritusadỹỹnymyhỹrenyre, kia urile iny witxira riwasinymyhỹrenyre, kia tahetoreny riwinykewihikỹle wahe.
\v 20 Tii heka tiu awityhymy ratxiõhyymyhỹre aõdi ratximyhỹredi; kia ire ixybyle aõmy reamyhỹre.
\v 21 Kia ibutumy adeburelemy aõnaõna rimymyhỹre, ka iaõnaõna tahe rexihukre.
\v 22 Kia aõ riwinymyhỹredi rexinidehedehenymyhỹre irariemy, kia tahe aõhỹỹmy rutỹỹnykre; kia ibutumy aõnaõna binabinahỹkỹ utxie ityre resekre.
\v 23 Tii heka iwe ritỹxinymyhỹre! Deuxu heka tadebure ityre riatykre; Deuxu heka takyara nihikỹ ityre ritxiwikre.
\v 24 Kia womati debòna-ribi rahenykre hãrele, wonati wyhymyjurà iwetuatxi rohorekre.
\v 25 Kia wyhy tabrò-ribi ritarenykre, kia wyhyjurà iribi ròhònykre raòderanymy ihãluburenydi. Kia tahe brebuhyylemy ratxirenykre.
\v 26 Kia ibutumy aõbo ributunyre, kia rexihukre; kia heòty heka iny debò aõkõ ritoonykre, kia rirubunykre ibutumy iriòre boho-wana.
\v 27 Kia biu heka iòraru tamy rite`isinykre, kia suu tahe tamy lamamy rỹikre inimy rarybekre.
\v 28 Kia tiu txu bedeu Deuxu debure ityrereny rejujukreu, kia ibutumy iaõnarenywiwihikỹ rexihurenykre.
\v 29 Ka heka Deuxu riwinymyhỹre iny itxỹtemy rỹimyhỹrenyre-ò; ka bede binahãkỹ heka tii iny itxỹte mahãdureny-ò rirarenymyhỹrenyre.
\c 21
\p
\v 1 Jò rybe:
\v 2 Kia heka nihõtilusanawihikỹ wadee biwahinybenyke, kia ywimy warybe-ò boholabenyke.
\v 3 Kia heka boholawityhymy matxibenyke diarỹ ararybemyhỹkeu; kia diarỹ ararybe sỹbytymy tahe aõwaxina wade bisinybenyke.
\v 4 Kia inyõdi aõkõ heka wabinamy watxireri, iurenana heka diarỹ wajeijeimy watxireri.
\v 5 Txibo kai boho wadee betehebenykreu, kia kai boho urile ebòreny aryrenydi bitybònybenykre buberubenymy.
\v 6 Kia tiu aõhỹỹhỹỹmy ratỹỹnyredi rahõtinymyhỹreu, diarỹ urile rexilòrelòrenymyhỹre, kia waumy ibutumy ramytàtamyhỹre.
\v 7 Kia iny bina mahãdureny aõbo ixybyle irumy ikiemy rỹirakre? Aõherekibo tahe tii boho iaõhyylemy ityhymy matuari-ò rehemynymyhỹrenyre?
\v 8 Tii boho heka iriòre irioreriorereny ijõdire, kia tahe tureny raumynymy robimyhỹrenyre, iweruramy rariarenymy.
\v 9 Kia tiu aõbinamy iny tamyreny reaõhyymyhỹre, kia ihetoreny iitxesedu ijõdimy ratximyhỹrenyre, kia Deuxu tahe aõhỹỹmy risỹnyõhyymyhỹre.
\v 10 Kia ibrorenireny aõbinabinaõlemy tamyreny raumynymyhỹrenyre, kia ruamyhỹrenyre ijõ weiõnomy reaõhyylemy.
\v 11 Kia iròre boho heka budoeni riòre wesemy raòrunymyhỹrenyre, kia rabedesamy rawayrytòmyhỹrenyre;
\v 12 tii boho rawiunymyhỹrenyre, kia tahe wiuna wodỹỹna òtaòta-ò rexideysanymyhỹrenyre.
\v 13 Iny binabina mahãdureny heka aõwiwi ijõdirenyhyylemy ratximyhỹrenyre, kia tahe awimy rurumyhỹrenyre, aõhỹỹhỹỹmy rutỹỹnyrenymy aõkõ.
\v 14 Kia ribi tahe myy Deuxu-ò rarybemyhỹrenyre: "Kia ywimy aõnaõnabinaõmy biwaribenyke; diarỹ boho heka arybetòdỹỹna arieryrenyõkemy watxirenyreri.
\v 15 Mobo tahe Deuxu Bedeerynihikỹmy ratximyhỹre tuu arerinanyrenykemy? Aõbo tahe wadeereny rawahikre tamy arexitòenymyhỹrenykeki?"
\v 16 Iny binabina mahãdureny myy rarybemyhỹrenyre, tii boho taaõtereteremy tako-ò roimyhỹrenyremy, ka diarỹ tahe wadee awiõhyyre, tuu raraykynymyhỹrenyremy.
\v 17 Tibedeubo iny itxỹte mahãdureny loosòna rurire? Tiwese sõemybo tahe tii boho aõbinabinatyre rejujurenyre?  Kia Deuxu aõbo tibedeu aõbo tureny radònymy aõhỹ~hỹỹmy risỹnyrenyre aõbo?
\v 18 Tibedeubo tahe tii horeru wesemy riuberanyre, ada ỹnysi wesemy yhyhykỹ ridyre?
\v 19 Kai boho heka Deuxu uladu riratxynymyhỹremy tarybemyhỹtenyte, tyby òraryna òraruki. Ka uladu tyby heka rararytxymyhỹke, kia tyyritidi rira rierykemy.
\v 20 Kia òrarudu tararytxyna rimymyhỹkemy, kia tii Deuxu debureutxie nihikỹdi rarutaakemy!
\v 21 Ka tii tahe rurumy roimyhỹre, kia txibo iwitxira bedeki ratxireri, kia heka tii tariòre boho aõhỹỹmy risỹnyrenykemy aõbo ratximyhỹre?
\v 22 Kia aõbo inyõ tyyriti-di rirana Deuxu bedeery nihikỹ-ò riwahinyke, kia iny cerealista mahãdu ritarenykemy?
\v 23 Kia hãbu mahãdurenyõ heka awimy ratximyhỹrenyre tabededỹỹnanareny-di ibedesarenymy ywimy, kia tahe iaõdimy ityhymy rurumyhỹrenyre,
\v 24 kia idewimy irurureny sõemy.
\v 25 Ijõ mahãdureny tahe iribireny òtumy rỹimyhỹrenyre, kia tiu bedesanayre riòreõ riurihirenyõhyyrenyre, kia tahe tawonareny hyrehyrenadi sõemy rurumyhỹrenyre.
\v 26 Kia ta ijõ aõtxile rexihumy rurumyhỹrenyre, kia su-ò ruumyhỹrenyre, kia mohõle ityrereny rỹimyhỹrenyre.
\v 27 Diarỹ araykyreny rybe reerymyhỹre, kia heka reerymyhỹre wadi ibinamy tahõtinymyhỹtenytemy.
\v 28 Kai boho tỹỹraximyhỹtenyte: "Tibedekibo wiji hãbu nihikỹ heto nyimyhỹde, kia òraruna bededỹỹnana-di raremyhỹ?
\v 29 Kia aõbo kai boho iny tiõtxi ratỹhinymyhỹre-wana tarybetenyõtenyte aõbo? Kai boho aõbo iijyyreny-ò aõbo taholatenyõtenyte aõbo?
\v 30 Kia iny mahãdureny myy rarybemyhỹrenyre, kia tiu Deuxu reburemyhỹreu iny rirarytxynymyhỹre, kia hãbu bina mahãdu tuhyy ikiemy rahenymyhỹrenyre.
\v 31 Tiu heka inyõ winimy rarybeõhyymyhỹre, kia aõ ibina riwinymyhỹreki; kia heka tiu inyõ taõbinabina òwydỹỹmy riwisỹnyõhyymyhỹre.
\v 32 Tii heka wabede-ò radymyhỹre, kia tahe hãluuro-ò rituunymyhỹre rirarenywiwimy.
\v 33 Kia tiwese sõemy iny mahãdureny riheludunymyhỹrenyre irubu, kia suu idi rihetynymyhỹre dorile iwetarire.
\v 34 Wabiòwareny boho aruxetòenadỹỹnareny heka iyhylemy roimyhỹrenyre; kia ibutumy kai boho aõmybo tarybetenyte, kia roihyylemy tarybetenyte.
\c 22
\p
\v 1-2 Kia aõbo iny sohoji ibedeerymy Deuxu deewimy ratxike?
\v 3 Kia aõbo Deuxu aki awimy rahãmyhỹre, kai awimy òbitimy atximyhỹteti? Aõbo tahe tii ritamyhỹre, kai òbitimy aõnaõnaki atximyhỹteki?
\v 4 Txibo tii arararytxynykre, kia tahe adee rarariòwykre aaõnaõna biòbitinykremy, aõherekibo tahe kai tuu tetyhynymy terinanymyhỹte,
\v 5 kohe, aõherekibo tahe òraruna nihikỹ tewinyte, kia aõbinabina heka iaõbinabina ihoõre.
\v 6 Timybo tahe huòteriòre-di beximykre, kai heka abiòwareny tyydile texityynymy tatemyhỹ, kiaremy tahe tademy ityyrenyõmy tesỹnymyhỹte.
\v 7 Kai heka bee tewahinyõhyymyhỹte iny mahãdu reywesemy ratximyhỹrenyre-ò, kia txi-ò rỹsỹna riòreõ biwahinyke aõkõre, kia iny mahãdu byremy rekoamyhỹrenyre-ò.
\v 8 Kai heka arynana abedeery nihikỹ-wana teuhete, kia su dinodumy atxikemy.
\v 9 Kai heka uladu tybyõmy rỹimyhỹrenyre tewasinytenyte, kia teywinymy aõkõ idireny atxitenyte, kia tiu wytese mahãdu tewiòhenanyõhyytenyte.
\v 10 Iurenana heka kai wiji bede òhãrunadi tayrawomy atxiteri, kia isitereribile brebu adee rehemynymy adi ratxikre.
\v 11 Bedeluru heka sõe rare, kia heka kai tuu tabiõhyymyhỹte, kia bedeluru tỹximy sõemy iny ridymyhỹre.
\v 12 Deuxu heka biuwetyy rarienihikỹki ratxireri; tii bedetxi retehemy tainamy robimyhỹre, kia ihãre tii boho biu rariekile ratximyhỹrenyre.
\v 13 Ka kai tahe myy tỹỹraximyhỹte:"Kia Deuxu aõtxile aõbo aõ rierymyhỹre? Biuwetyyluru heka iwotyaki roimyhỹre; timybo tahe tii iny boho rieryrenykre?"
\v 14 Jò, kai aõbo biuwetyyyxe Deuxu ijerena  riwòmyhỹremy aõbo idi tahõtinyõhyymyhỹte, kia txibo tiu tii biu bedemy rariamyhỹreu?
\v 15 Kia aõbo kai iny itxỹte mahãdureny ry-di mariakemy tahõtinymyhỹte, kia tii boho juhuu bede ròrarunyreuhukỹle idi rirareny riranyrenyre-di?
\v 16 Tii boho heka isitere-ribile rururenyre, kia beòrahãkỹ rariamyhỹre wesele riõrenyre.
\v 17 Tii boho myy Deuxu-ò raryberenyre:"Aõbinaõmy biwaribenyke!" Kia myy rexirybenyrenyre:"Aõbo tahe Deuxu inydeerenywimy riwinykre?"
\v 18 Kia Deuxu heka iny itxỹte mahãdureny heto aõnaõnawiwi-di ritỹxinyre, kia ribi tahe diarỹ iwesereny arõhõtinyke aõkõre.
\v 19 Iny awityhymy rỹimyhỹrenyre heka rabedesamyhỹrenyre, kia òbitimy iny rỹimyhỹrenyre tahe rutxuenymyhỹrenyre,
\v 20 Kia iny mahãdu iaõdimy rỹimyhỹrenyre aõnaõnawiwi rexihumyhỹre-di reketeherenyke, kia aõbròrò tahe heòty risõmyhỹre.
\v 21 Jò, Deuxu dee bedesawihikỹ iki-wana biwinyke, kia aòludumy idi atximyhỹte-ribi bexiixawidỹỹnyke, kia wese tahe tii ibutumy aaõnawiwi adee riwahinykre.
\v 22 Kia Deuxu araixinanykemy bexiwahinyke, kia irybe aumywoki birarenyke.
\v 23 Txibo kai Deuxu-ò bòòsekeki; txibo bexiwahinykeki, txibo kai aõbinabina mahukeki ahetowo-ribi,
\v 24 txibo manatererỹsỹ adee iaõtyhy ihoõkeki, kai txibo suỹnysi wesele idi mohõtinykre, ada (Ribeirinho-my) manateresõmo rỹimyhỹre wesele,
\v 25 Tai tahe Deuxu amanatererỹsỹtyhymy relekre.
\v 26 Tii heka abedesadỹỹdukre, kai tahe tamy betehekre bityhynymy.
\v 27 Tii heka aixitòedỹỹna-ò roholakre, kia tahe kai tamy biwahinykre aõmy biwahinymy marybekre.
\v 28 Kia ibutumy aõbiwinykre, kia awimy òbitimy ròhònykre, kia loosòna ary ritoosònykre.
\v 29 Deuxu heka iny rexityhynymyhỹrenyre mahãdu riixawidỹỹnymyhỹrenyre, kai iny ywimy rỹimyhỹrenyre tahe rihedỹỹnymyhỹrenyre.
\v 30 Tii arahedỹỹnykre txibo kai uladu wesemy bedeeryõmy atxikre-wana, txibo òbitimy atxikre-wana, kia ibutumy aõ adee riwinykre.
\rem Where are cc 23,24[SC3]
\rem We have these two books of JO in the Green book and digitated, but cannot Locate them
\c 25
\p
\v 1 Bildade rybe:
\v 2 Deuxu heka aõninihikỹ ratximyhỹre, kia brebuna nihikỹ ratximyhỹre; tii heka aõwiwihikỹ biuki rỹimyhỹre riwinymyhỹre.
\v 3 Kia aõbo inyõ (ianjoreny-ò) tuu relyyre?  Kia aõbo iny-ò, ityre runykre toosòna raòderanyõmyhỹre?
\v 4 Kia aõbo inyõ òbitimy ratxikre Deuxukoki? Kia aõwaxina ruburiòre òrarumy ririkre?
\v 5 Deuxu dee heka kia ahãdu dorile toosònaõre, kia tainaki aõ ibinamy tai rahãmyhỹre.
\v 6 Kia iny-ribi aõbo aõ raonananymyhỹre? Aõbo tahe ixỹdòki awityhymy Deuxu tai rahãmyhỹre?
\c 26
\p
\v 1-2 Bildade, diarỹ heka wabereberemy watxireri waruruõmy; timybo tahe kai biwawiòhenanymy biwaruxetòenykre!...
\v 3 Aõhewe kai dohodỹỹduki awire, kia abedeery nihikỹ tehumyhỹte iny binaki diarỹ wawesenamy!
\v 4 Mobo tahe arawiòhenanyre kawesena rybemy marybekremy? Mobo tahe tuu araerynananyre kawesemy marybekremy? Bildade rybe:
\v 5 Kia rubu mahãdureny heka brebumy ramytàtàmyhỹrenyre beraki surawoki.
\v 6 Deuxu dee heka rubu mahãdureny bede iraymy roimyhỹre; kia heka aõ rihetynymyaõkõ riwòõhyymyhỹre, aõbo kuaki rutỹỹnymyhỹre.
\v 7 Deuxu heka biuwetyy rarie ritere bedeykytxi, kia tahe suu riukòmy rimyre aõtyreki aõkõ.
\v 8 Tii heka bee biuwetyyuraki rimymyhỹre, kia tii tahe raykaõhyymyhỹre iutxiedi.
\v 9 Tii heka ahãdudi taòsỹny riwòmyhỹre, kia heka ityredi biuwetyyura riterenymyhỹre.
\v 10 Deuxu heka bedeloosòna bedeluru-ribi rihitxinyre, kia rurawo beranihikỹki (radesenhamy) roimyhỹre-di.
\v 11 Kia tiu tii biurarietxi rimymy rỹimyhỹre-di risỹnymyhỹre riatykemy, kia tii boho ruberumyhỹrenyre, kia brebumy ramytàtàmyhỹrenyre.
\v 12 Taaõni nihikỹ-di Deuxu bero nihikỹ rimyre; kia tabedeery nihikỹ-di Raabe aõnihikỹ rirubunyre.
\v 13 Kia tary budỹỹnadi Deuxu biu rarie risuhòre, kia tadebòdi hemylalani rirubunyre.
\v 14 Ka aõnaõna heka deòsidỹỹnale rare, kia rybe rauninymyhỹreõ iwasimy Deuxu-ribi, kia heka aõ riwinyke. Mobo tahe rierywike ibedeery nihikỹ òbitityhymy?
\c 27
\p
\v 1 Jò rybe:
\v 2 Inatyhymy diarỹ Deuxu-ò rarybereri ibutumy ibedeery nihikỹ-ò, kia diarỹ aõwiwimy òbitimy riwasỹnyõkremy, kia wawo aõhyrehyre-di ritỹxinykre,
\v 3 kia inatyhymy, tii ruu wadee kidiwahinykre-wana araelewesenanykremy,
\v 4 kia waryijeti tiu aõbinabinamy irybeõna, kia wadòròtò tiu roimy rarybeõtyhy.
\v 5 Kia tiu diarỹ ararybeõtyhy, kai boho òbitimy wanimy tarybetenyterimy; kia diarỹ warumy watxireri-ribi, kia diarỹ idi arisỹnymy ararekre wainybò-di.
\v 6 Diarỹ awimy òbitimy watxireri, kia diarỹ ixawiõtyhy iximy òbitimy rarybereri-ribi, kiemy dori warayky tiu ibinamy iximy rarybeõhyymyhỹre.
\v 7 Kia ibutumy waribiòtumy ratximyhỹrenyre, kia waòludumy ratximyhỹrenyre, kia boho heka rararytxyrenykre iny itxỹte weserenyle.
\v 8 Aõbo tahe (ateus) mahãdu riraòrenykre, tiubo Deuxu ibededỹỹnanareny-ribi ritarenykreu?
\v 9 Kia tiu tii boho aõsirasiramy rekoarenykreu, kia tii irajuareny-ò roholaõtyhy,
\v 10 Kiemy dori Deuxu ibedesanarenyaõkõ rare, kia tii boho tiu tamy ibedeery nihikỹ-ò rexitòenyrenyõhyymyhỹrenyre.
\v 11 Diarỹ araixinanyrenykre timybo Deuxu ibedeery nihikỹmy ratximyhỹremy, kia adeereny ariòbitinykre timybo iaõmysỹsỹỹna bede riywinymy roimyhỹre.
\v 12 Aõkõre, kia tuu ararybeõkre, kiemy dori kai boho ibutumy tuu tabitenyte. Aõherekibo tahe kiaki aõnaõnabinalemy tarybetenyteri? Zofar rybe:
\v 13 Diarỹ Deuxu bedeery nihikỹ wesemy ararybekre, hãbu mahãdureny binabina debure mahãdureny birarytxynyke.
\v 14 Kia ariòrereny ramamy rekoarenykre, kia ariòrereny sõerenykrehãrele, kia wouna rỹikreu rexihurenykre;
\v 15 kia irumy ratxirenykre rubunamy rexihurenykre, kia iwytesereny irahireny roburenyõhyyrenykre.
\v 16 Kia iny itxỹte mahãdureny aõwaxina manatererỹsỹ sõemy ributunyrenykre, kia aõwaxina ityyreny sõemy ijõdikre, kia ijõdityhymy,
\v 17 kia tiutxuule iny òbitimy rỹimyhỹre mahãdu riuhekre, kia hãbu inytyhy tahe imanarỹsỹreny-di ratxikre.
\v 18 Kia hãbu bina heto riwinyre heka urihimyole bede idi rỹimyhỹre, kia otxuruusirihĩkỹ (teia) wesele rỹimyhỹre ada oworu biramy nobò heto rỹimyhỹre wesele.
\v 19 Hãbu binahãkỹ heka iaõdimy ityhymy ramyhỹre herityre-ò, kia heka ikonamy tamy ramyhỹre, kia heka tiubo rexixamyhỹreu, kia iaõnaõnawiwihikỹ riõmy ramyhỹre.
\v 20 Kia bedebinabinahãkỹ heka ityre rariamy ridykre, kia iwese beòranihikỹ rariamyhỹre wesele, kia rumy tahe yhydebure nihikỹ bede irehetxi idi rehukre.
\v 21 Ibryra-ribi yhy debure nihikỹ kedebonykre heka iheto-di risihemy rehukre,
\v 22 kia heka iribiòtumy kedebonykre idi rawobrumyaõkõ, iwana-wana tahe tii tahenana riwinymy ratxireri-wana.
\v 23 Tii heka raijaranykre, kia yhy tahe raijòsinykre, kia werymy riijaradỹỹnykre tarubudỹỹna nihikỹ-di.
\c 28
\p
\v 1 Minas heka iribi manarỹsỹura ratamyhỹre, kia tai heka manarỹsỹhỹkỹ rititxirienymyhỹre.
\v 2 Kia womati heka su-ribi ratamyhỹre, kia (cobre) tahe manatere-ribi sõdenymy rejujumyhỹre.
\v 3 Kia mineiro mahãdureny heka loosòna su hãluuwo-ò riwymyhỹrenyre; tii boho heka hãluuwo ritòatòamyhỹrenyre, tai tahe bedeluruki manarỹsỹhỹkỹ riemyhỹrenyre.
\v 4 Kia hãwa-ribi iheremy tuu riwinymyhỹrenyre, kia tai inyõ rariõmyhỹrenyre bedeki, tii boho heka manarỹsỹki be hãluu riraynymyhỹrenyre. Kia heka ixi sohojile raõmysỹdỹỹnymyhỹrenyre, kia heka rexibererunymy rexiukỹukỹnyrenymy raõmysỹdỹỹnyrenyre wiribi rahitxi rahitximy.
\v 5 Kia ityrerenyki heka suu sõemy maixõmoni-di roimyhỹre, kia iraworenyki tahe ibutumy raykaykamy rỹimyhỹre rasurusurumy.
\v 6 Kia imanareny tỹremy rỹimyhỹre, kia ibrybynodeki tahe manatererỹsỹtxi rekoamyhỹrenyre.
\v 7 Kia nawiihikỹ heka ry-ò naõhyymyhỹde, kia manatererỹsỹ-ò rubehemy ramyhỹre-ò, kia (falcões) tule rieryõhyylemyhỹre.
\v 8 Kia leaõ mahãdu, kia iròdu iròdu witxira debure mahãdureny, kia tiu ryy-di ririranyrenyõhyymyhỹrenyre.
\v 9 Hãbu mahãdureny heka manauraterehekỹ riamyhỹrenyre, kia tahe hãwalò riòròmyhỹrenyre bedeòhòkỹle.
\v 10 Tii boho heka manaykytxi ryy ritòamyhỹrenyre, kia taruereny riraynymy, kia ibutumy aõmybo rekoamyhỹrenyremy.
\v 11 Kia tii boho riamyhỹrenyre beraòhòkỹle riamyhỹrenyre, kia tahe bede loosòna-ò riwymyhỹrenyre, aõbo iwasimy roireri wahe.
\v 12 Ka tikibo tahe bedeery nihikỹtxi lahãna rỹikre? Tibedekibo tahe bedetyhytyhykỹ rỹimyhỹre?
\v 13 Kia iny mahãdureny heka bedeery timybo awityhymy rỹimyhỹre rieryrenyõhyymyhỹrenyre, kia heka ka hãwa bedeki aõkõ itxi lahãsa rỹimyhỹre.
\v 14 Oceano riòbitinyre:"Kaki aõhoaõkò rare", kia Bero nihikỹ rarybere:"Kaki tule aõkõre."
\v 15 Tii heka manatererỹsỹ-di raõbradỹỹõhyymyhỹre, kia manatereura-di ratroaõhyymyhỹre.
\v 16 Kia bedeery nihikỹ tiu raõbraõhyymyhỹre manatererỹsỹtyhy-di, kia mana ruxera-di tule (safira) wesemy ada (agata) wesemy.
\v 17 Tii heka manatererỹsỹ ratyremy rỹimyhỹre; kia manatere lòysana-di ratròaõhyymyhỹre.
\v 18 Kia (coral-my) (cristal-my) uritre rybeõmyke; kia bedeery nihikỹ heka (peròlas) ratyremy ròtamyhỹre.
\v 19 Kia (topázio Etiópia) ludu-wana widee raurihinanyõhyymyhỹre; tii manarỹsỹtyhy-wana widee raurihike aõkõre.
\v 20 Tiribibo tahe bedeery namyhỹde? Tibedekibo tahe bedeerywiwihikỹ roimyhỹre?
\v 21 Kia inyõ tuu robiõhyymyhỹre, kia nawii dorile biumy ruòmyhỹrenyre tuu robirenyke aõkõre.
\v 22 Kia Bedehudunarenyle Rubunarenydorile raryberenyre:"Diarỹ boho uritỹỹna tamy raholarenyre."
\v 23 Kia Deuxu sohojile iry rierymyhỹre; kia tii sohojile rierymyhỹre tikibo bedewihikỹ ratximyhỹre
\v 24 kiemy dori iitxerena bede irehe-ò retehemyhỹre bedebede hãwaki ibutumy; tii ibutumy aõbo ka suki ròhònymyhỹre rierymyhỹre.
\v 25 Kia tiubo Deuxu yhy ruru riyjanyre, kia ta bero nihikỹ herinana riurihinanyre;
\v 26 kia tiubo rexiywinyreu titxibo biube rejujukremy, kia titxibo yhy debure reamy rarekremy;
\v 27 kia iu heka tii bedery nihikỹmy robire, kia riurihimy tai òbitimy ròhònyre.
\v 28 Kia tahe tii iny mahãdureny-ò rarybere:"Kia iny bedeerymy ratxikemy, kia heka iny Deuxu lau ruberumy rityhynykre; kia aõ rierykemy, kia heka iny inytxỹte mahãdureny-ribi rexilòhòrarienykre."
\c 29
\p
\v 1 Jò rybe:
\v 2 Aõherewe! Txibo diarỹ aròòsekeki juhu bedemy ahãdu rỹimyhỹ bedeu, kia txuu iu Deuxu riwawòmy wadi ramyhỹ-ò!
\v 3 Kia bedeu heka Deuxu wary ritxuxaranymy raremyhỹ, kia toosòna-di diarỹ aõwaxina bedeluruhukỹdi rariamyhỹre.
\v 4 Kia bede txuu heka diarỹ awimy wabededỹỹnana-di raremyhỹ, kia Deuxu-wana rabiòwanymy raremyhỹ heka waheto itxesedu rare.
\v 5 Kia ibutumy iaõninihĩkỹ waki raremyhỹ, kia wariòre boho heka wawesiwesimy roiremyhỹ.
\v 6 Kia wahetoki heka ixyby ixyby broreni huysy rỹimyhỹ ixideewimy, kia (azeite) tule, kia (oliveiras-ribi) rihemyhỹrenyre, kia heka manaykyki rebrònymy rỹimyhỹre.
\v 7 Kia tiu diarỹ rybe butuna hetoki rỹimyhỹre-ò ramyhỹreu, kia heka diarỹ (juízes) mahãdureny ykyki ranymyhỹre,
\v 8 kia weryrybò wamy robimyhỹrenyreu, kia ryy warymy riraynymyhỹrenyre, kia matuari mahãdureny tahe lamamy ritàmanymyhỹrenyre.
\v 9 Kia iny mahãdu tyhynihikỹreny rybe-ribi ixawimyhỹrenyre, kia tahe rybeõmy rỹimyhỹrenyre.
\v 10 Kia inyrarieninihikỹreny mahãdu rybeõmy rỹimyhỹrenyre; kia aõmy raryberenyõhyymyhỹrenyre.
\v 11 Mobo warybe-ò roholamyhỹrenyre, kia wamy reàla`myhỹrenyre; kia iny mahãdureny wamy rarybemyhỹrenyre awimy òbitimy,
\v 12 kiemy dori diarỹ iny aõkõ mahãdureny rewiòhenanymy raremyhỹ ixiwiòhedỹỹmy rexitòenymyhỹrenyre-ò, kia uladu wytemy rỹimyhỹrenyre-di reywinywiwimy idireny raremyhỹ, kiemy dori inyõ ihoõre idireny tarukimy ratxirenykemy.
\v 13 Kia iny mahãdureny bedebinabinaki ratximyhỹrenyre, kia wamy reàlàmyhỹrenyre, kia wytese mahãdureny rabedesamyhỹrenyre tamy wiòhedỹỹnana rewahinymyhỹreu tamyreny.
\v 14 Kia wainytyhy waòbitinana heka waribi raòrarunymyhỹre; kia heka watyy wesemy idi raremyhỹ, kia txuu iyhyõmy reuhemyhỹre.
\v 15 Diarỹ heka juhuu warue iruebetàmy rỹimyhỹrenyre rue rare, kia wawa tahe itikremy rỹimyhỹrenyre wa rare.
\v 16 Diarỹ heka juhuu iny iaõkõmy rỹimyhỹrenyre tybyreny heka rare, kia iwitxira hãwaludu mahãdurenyki rybedu rare.
\v 17 Diarỹ heka iny aõhỹỹmy risỹnymyhỹrenyre rurunihikỹ rehumyhỹre, kia tahe retamyhỹrenyre rubureny-ribi.
\v 18 Diarỹ myy rahõtinymy raremyhỹ;"Diarỹ heka irehetyhymy warumy ararekre, kia tahe wahetowoki arurukre, kia ibutumy waõnawiwidi.
\v 19 Diarỹ heka iwese bederade raruti bera-ò rehemynymyhỹre wesemy arehemynykre, kia bederade ruu iyhyõmy nonoe rituumyhỹre.
\v 20 Kia ibutumy wasohojilemy raryberenykre wamy awityhymy, kia tahe diarỹ ikiemy wanidehemy watyhymy ararekre."
\v 21 Kia ibutumy iny mahãdureny wadee raraybirenyre, kia tahe tii boho rybeõmy wadohodỹỹna-ò roholarenyre.
\v 22 Kia warybe rehumyhỹreu, kia inyõ warybeki ibinamy rahãõhyymyhỹre. Kia warybe heka iratirenywo-ò ralòmyhỹre, kia iwese berutàtuu ỹnyraki rỹimyhỹre wesemy.
\v 23 Kia heka ibutumy riwaraòmyhỹrenyre aõ tamyreny ariwinykremy, kia iwese iny biulòra riraòmyhỹre wesemy, bede ratòteemyhỹre bedeu.
\v 24 Diarỹ heka ratxuenymyhỹre, kia iny mahãdu aõrarysòna ihoõmy ròraòmyhỹrenyreki; kia waòsỹny bedesa ire rexiuaremyhỹre.
\v 25 Diarỹ heka juhu ixỹ dinodu wesena rare, kia aõ reywinymyhỹre, kia tii boho riwinykremy, diarỹ heka idireny rariamy raremyhỹ, kia iwese Iòlò tasodadu koki ramyhỹre wesemy, kia heka rebedesadỹỹnymyhỹrenyre, kia aõhỹỹmy rutỹỹnymyhỹrenyre bedeu.
\c 30
\p
\v 1 Ka tahe wiji hãbu mahãdureny wauladule wadi disinymyhỹdenyde. kia tybyreny heka aõki awirenyõhyyrenyre; diarỹ heka tiu ka iny mahãdureny tiu ijòròsa-wana arilidirenyõtyhy wabudoeni-di itxeredurenymy.
\v 2 Aõkibo tahe wadee awikre iaxiòreny rurutere? Kia heka hãbu mahãdureny ideõdeõrenyre,
\v 3 kia ibereberemy ratximyhỹrenyre sõemy ramamy rekoamyhỹrenyre, aõnaõnabinabinamy. Kia rumy bederahy ykyki ratximyhỹrenyre, kia tahe tii boho òwòruraruti rubu-di rahylòimyhỹrenyre.
\v 4 Kia bederade òwòrutyy-wana rimymyhỹrenyre, kia tahe  òwòrurarutimy riroximyhỹrenyre, kia heka òwòruraruti rỹsỹnaki awi aõkõ rare.
\v 5 Kia heka tii boho urile rateòdỹỹmyhỹrenyre iny mahãdureny yky-ribi, kiemy dori urile iny ribrebunymyhỹrenyre rirajuamyhỹrenyreu, kia wasidu wesemy.
\v 6 Kia heka (medonhos-ki) rasỹnymyhỹrenyre, manaura ninihikỹ rawoki.
\v 7 Kia (uivam) (moitas) ykyki, kia tahe bederade rawoki rexibutunymyhỹrenyre.
\v 8 Kia heka iny (inútil) roire, iny mahãdureny inirenyõre, kia heka (enxotados) hãwanihikỹki.
\v 9 Ka tahe wiji iny mahãdureny wadee dòimyhỹdenyde, kia tahe wadi disinymyhỹdenyde; kia tamyreny diarỹ rybe lisinamy ararybeke aõkõre.
\v 10 Kia heka tii boho wamy raybimy rexilòhòrarienymyhỹrenyre, kia tahe wadee ritehemynymyhỹrenyre waòsỹny-ò rarybexinymyhỹrenyre.
\v 11 Deuxu heka waruru rahure, kia tahe wamy raòjinanyre, iurenana heka iny debure mahãdureny waòludumy rekoarenyre.
\v 12 Kia iny mahãdureny binabinahãkỹ wamy raòhòterenyre, kia riwaijaradỹỹnymyhỹrenyre, kia riwahukemy riwaijemyhỹrenyre.
\v 13 Tii boho heka arexiwòkelau riwatòenymyhỹrenyre, kia ta riwarubunyrenykemy riwaijemyhỹrenyre, kia inyõ ixawikemy rarybeõhyymyhỹre.
\v 14 Kia tahe adobo ijytitxi ralòmyhỹre, kia iwotyareny binabina-ribi tahe wadee rahunanymyhỹrenyre waòludumy.
\v 15 Diarỹ heka werymy reamyhỹre. Wawowydyna nihikỹ heka, kia iwese bede rawysydỹỹmyhỹre wesemy yhydebona heki; kia wararòsònawihikỹ reare, kia iwese biuwetyyura reamyhỹre wesele.
\v 16 Ka tahe wiji warumy aratxikemy ixidi aratxikemy rahõtinyõhyymyhỹre; kia bedejeijei riwamywiwimy wadi ihãre.
\v 17 Kia rumy heka wati ramytxitximyhỹre sõemy; kia watimytxitxi diwarati werywerynymyhỹde heka duhuõhyymyhỹde.
\v 18 Deuxu heka wabytòki riwamyre tadebure nihikỹ-di, kia watyy ribinabinanyre.
\v 19 Tii beubetuu-ò wadi rehure; diarỹ sunode ratyremy aratxike aõkõre, kia bryby ratyremy aratxike aõkõre.
\v 20 Deuxu diarỹ heka nanahinymy adee nadexitòenymyhỹde biwawiòhenanykemy, kia tahe tadiwarawyònyõhyymyhỹte; diarỹ heka adee rexitòenymyhỹre, kia tahe aõmy kai tadiwarawyònyõhyymyhỹte.
\v 21 Kai heka ibinatyhymy wadi atximyhỹte, kia wahekihyyle ibutumy abedeery nihikỹ-di tiwaheludunymyhỹte.
\v 22 Kia yhy riwadykremy tewinymyhỹte, kia yhy debure nihikỹtxi wadi tehumyhỹte tiribi-tiribile.
\v 23 Kia heka rexierymyhỹre rubu bede su-ò biwadykremy atximyhỹte, kia heka tai raywimy roimyhỹre, iny irumy rỹimyhỹrenyre tai witxi rekoarenykremy.
\v 24 Aõherekibo tahe hãbu itxỹte tehetenymyhỹte, kia heka aõ riwinyõhyylemyhỹre, aõhebo tahe rexiruxetòenymy rexitòenykeki?
\v 25 Kia aõbo diarỹ rahinyõre iny mahãdureny aõhỹỹmy rutỹỹnyrenyre-wana? Kia iny aõkõ mahãreny-di aõbo rawobruõhyyre aõbo?
\v 26 Diarỹ heka bedesawihikỹ reraòmy raremyhỹ, kia tahe bede binabinahãkỹle wadee nade; diarỹ heka bede loosòna reraòmy raremyhỹ, kia tahe bedeluruhỹkỹle rehemyhỹnyre.
\v 27 Wawo heka sõemy naukỹukỹmyhỹde, kia heka dexielehynyõhyymyhỹde; kia aõhỹỹhỹỹlemy txumy dutỹỹnymyhỹde.
\v 28 Kia bede ryryle heka nadiwymyhỹde, kia txuijara txuu ihoõmy roimyhỹre wesemy; diarỹ heka ibutukorenyki lamamy raimyhỹre, kia tahe ixiwiòhenadỹỹmy rexitòenymyhỹre.
\v 29 Kia warybe wodỹỹ heka ibederyrymy raohitxinymyhỹre, kia iwese ahula rirajuamyhỹre wesemy, kia iwese usehewe robumyhỹre wesemy.
\v 30 Kia wadesityy heka ilybymy relereri, kia waumy tahe rubunadi ratòteemy rasõreri.
\v 31 Diarỹ heka wiuna bedesana-ò raholamy raremyhỹ, ka tahe wiji iny mahãdureny rahinymyhỹreòle nadoholamyhỹde.
\c 31
\p
\v 1 Diarỹ heka inatyhymy iximy rarybere tiu warue-di ijadòòma tyhy-di areteheõtyhy.
\v 2 Txibo diarỹ arayròyròkeki warybetyre-di, aõbo tahe Deuxu wadee riwahinykre, timybo tahe kuaki biu bedeki ibutumy taõninihikỹreny-wana tarybewiwihikỹ wadee riwahinyrenykre?
\v 3 Kia heka Deuxu bede binabinahãkỹ riwahinymyhỹre, aõhỹỹhỹỹ riwahinymyhỹre, kia iny mahãdureny aõnaõna binabinahãkỹ riwinymyhỹrenyre-ò.
\v 4 Deuxu heka ibutumy riwaerymyhỹre aõbo rewinymyhỹre; tii heka wamy robimyhỹre tibede-ò rariamyhỹreu.
\v 5 Kia heka diarỹ inatyhymy iximy rarybereri aõ ibinamy rewinyõremy, kia tiu iny witxira bòdỹỹmy rahõtinyõhyyre.
\v 6 Kia Deuxu heka utxienatyhy-ò riwasỹnymyhỹre wautxie rierykremy, tii heka inatyhymy diarỹ wainyboreny riwaerykre.
\v 7 Kia txibo diarỹ ry òbitina-ribi arexitiòreanykeki, kia txibo warue iny witxira-di aretehekemy riwadykeki, txibo òraruna rewinyre-wana, kia iny witxira aõnadi arataxikeki,
\v 8 kia tahe iny witxirale rirỹsỹkre diarỹ rebrònyrele wahe, ada walòbrònaõbo rexihuke.
\v 9 Txibo wawo tiu bedeu aõmy rõhõtinyre waribeludu hãwyy-ò, txibo diarỹ rexiwòmy raimyhỹ-wana raijòsinymy iheto ijòwebròki,
\v 10 kia tahe wahãwyy txibo iny witxira deòdulemy rexirahòreke, kia iny witxira iki-wana rõrõmyhỹke.
\v 11 Kia txibo diarỹ rubudỹỹmy binahãkỹmy areakeki, kia sodadu mahãdu wedureny riwabrejunyke.
\v 12 Kia òraruna heka heòty loosòna binahãkỹ wesemy releke, kia ibutumy rihuke aõbo wamy ibitumy rỹimyhỹre.
\v 13 Kia tiu aõmysỹdỹỹdu wamy rexiramy rarybemyhỹreu waòludumy, diarỹ heka rybe reywinymy rewinymyhỹre òbitimy.
\v 14 Kia txibo diarỹ tuu rybe ariwinyõkeki, aõbo tahe ariwinyke tiu Deuxu riwatỹỹraxinykeu? Timybo tahe arirawyònykre, kia tiu tii waõnaaõnamy rarybekeu?
\v 15 Kiemy dori Deuxule riwaumydỹỹnyre, kia wadeòdureny riumydỹỹnyrenylere; tii heka wadee bede awimy riwahinyre, kia tamyreny tule bede awimy riwahinyre.
\v 16 Kia tiu iny iaõkõmy rỹimyhỹrenyre iwihedỹỹrenyõmy reriõhyymyhỹrenyre, kia wytese mahãdureny wojewojimy roburenykelau rewahinyõhyymyhỹre.
\v 17 Kia tiu ixi sohojimy warỹsỹna rerỹsỹõhyymyhỹre, kia heka ixyby ixybyle warỹsỹna uladu tybyõmy rỹimyhỹrenyre-wana rewirareamyhỹrenyre.
\v 18 Diarỹ heka idireny reywinywiwimy raremyhỹ tybyreny wesemy, kia ikiemy wytese mahãdureny reijemy reòhãrunymy idireny raremyhỹ.
\v 19 Kia tiu diarỹ inymy rabimyhỹre-wana yhy rirubunymy ratximyhỹre-wana ityy ihoõ-wanaki, ada kia reerymyhỹre iny iaõkõmy rỹimyhỹre aõdi iixihetydỹỹõna,
\v 20 diarỹ heka tamy tyytòtee rewahinymyhỹre, kia heka tyytòee wabudoeni tyyle heka tuu rewinyre, kia tahe tii tawoki wamy reàlàmyhỹre.
\v 21 Kia txibo tibedeu diarỹ reburere wyte mahãdyreny-ò, kia diarỹ rexierymy juizes mahãdu riwawiòhenanyrerimy,
\v 22 tai tahe wadera rayròkre, kia waaxiò-ribi rasihekre.
\v 23 Diarỹ tiu kia wesena ariwinyõtyhy, kiemy dori diarỹ sõemy ibinamy Deuxu rarytxydỹỹnaki rahãmyhỹre, kia tai tiu ibededỹỹnanawiwihikỹ-ò wadehemysỹõna.
\v 24 Kia diarỹ juhuu manarỹsỹhỹkỹ retyhynyre; tii tiu wararòsòna òrarunamy roiõhyyre.
\v 25 Kia tiu diarỹ iximy rawowydyõhyyre waaõnadimy waityhymy aratxikemy, kia sõemy nieru aritakemy tule.
\v 26 Diarỹ heka txumy rabire rarỹsỹnymyhỹremy, kia ahãdu ibutumy ibedewihikỹmy rariamyhỹremy,
\v 27 kiaremy heka tiu tuu rerinanyõhyyre, kia ibededỹỹnana wasimy roimyhỹremy arerinanyke aõkõre, diarỹ wadebòdi arirytòkemy tamy reaõhyyre.
\v 28 Kia txibo òraruna binahãkỹ ariwinykeki, kia diarỹ Deuxu aritxiõnymy areake, kia biuki ratxirerimy, kia sodadu mahãdureny wedu riwabrejunyke.
\v 29 Kia tiu arabedesaõtyhy wabiòwareny aõhỹỹmydỹỹnanareny-di, kia tiu wabedesamy aratxiõtyhy txibo aõhỹỹmy rutỹỹnyrenykre-wana.
\v 30 Kia tiu Deuxu-ò rexitòenyõhyyre, kia ijõrenyõ rururenykemy.
\v 31 Kia wadeòdureny wadee raõmysỹdỹỹnymyhỹrenyre, kia heka rierymyhỹrenyre iny mahãdureny reteòarinymyhỹrenyre waheto-ò, tii boho heka ixideewimy riroximyhỹrenyre, kia heka awityhy rirỹsỹmyhỹrenyre.
\v 32 Kia tiu iwitxira hãwa ludu rytyaki rõrõkemy rewahinyõhyymyhỹre; kia tỹhinamy rirahumyhỹrenyre mahãdu ixyby ixybyle wahetoki rõrõmyhỹrenyre.
\v 33 Kia tiu waõnaaõna rewoõhyymyhỹre, kia iwese inyõ riwinymyhỹre wesemy, kia tiu wawoki rewòõhyymyhỹre waòraru.
\v 34 Kia tiu ilau raberuõhyymyhỹre, kia iny witxira tuu rarybemyhỹre lau; kia diarỹ hetowoki watxiõhyyre, rybeõmy, kia wadireny risinyrenyekelau raberuõhyyre.
\v 35 Timykibo tahe inyõ warybe-ò roholake! Kaki rehura, kia tahe waitxedu reriritinyre; kia taaõni bedeery nihikỹ-wana riwarawyònymyhỹre! Kia waòludu heka wamy roilemy ròritidỹỹmyhỹre,
\v 36 kia tuu arawowydymy, diarỹ waaxiòti tyreki idi aretyykre, kia tahe irati-ò aritidikre, kia Iòlò rataana wesemy.
\v 37 Kia Deuxu dee ibutumy aõnaõna rewinyre ariwahinykre, kia ta ikoki tahe warati `bitimy aritidikre.
\v 38 Kia wasyreny tiu rahinyrenyõhyyrenyre, kia biu-ò rirajuarenyke aõkõre waòludumy.
\v 39 Keimy dori txibo iraty arirỹsỹkeki, kia ikiemy aõmysỹdỹỹdu mahãdureny reòwynymy raremyhỹ, tuu raòwydỹỹmyhỹremy, kia tiu ramasamy rururenykelau aritòenyrenyke.
\v 40 Txibo diarỹ òbitiao~kõ rarybereri-wana, iurenana heka wasuki bedeledelede raumynyke maixõmoni-ribi, bederahyle raumynyke alòbròna-ribi. Kaki heka Jò rybe rexihura.
\c 32
\s1 Eliu rybe
\p
\v 1 Jò heka tainybò-ribi iwo rexierymy ratximyhỹ, iurenana heka inataõ ibiòwareny iribi ixawirenyre widee rybereny-ribi.
\v 2 Kia tahe tai hãbuõ ratximyhỹ Eliú riki inire, Baraquel riòre, Bruz rioreriore hewa, kia heka Rão sỹreny boho heka rare. Eliú heka sõemy radònyre Jò-my, kiemy dori riki tii ibedeeryõmy uladu wesemy iximy rarybere, kia Deuxu deele bede riratere.
\v 3 Kia Jò biòwa inataõrenymy radònylere, kiemy dori tii boho Jò rirawyònyrenyõlerenyre, kiamy heka taraykyreny rybe riwahinyrenyre Deuxu òbitimy aõkõ riwinyremy.
\v 4 Eliú heka rybeõlemy riraòrenymy rỹimyhỹ ikonanau rarybekremy, kia ijõreny heka iiumyreny rare.
\v 5 Kia iu tureny robireu, kia tii boho timybo rirawyònyrenykemy rieryrenyõre Jò-ò, Eliú reburere
\v 6 kia tahe tarybe riòrarunyre.
\s1 Eliú rybe òraru Diarỹ heka uladu rare, kai boho tahe iumy tòite. Iurenana heka diarỹ aõmy warayky rybe rewahinyõhyyre.
\v 7 Kawese rahõtinyre: "Kia heka taeryna rybe-di rarybereri, kia heka tiwese wyra wyramy aõkõ tabedeery nihikỹ riteòsinymyhỹre!"
\v 8 Kia-ribi tahe iny woki aõtybytyy ratximyhỹre, kia tarubudỹỹna ibutumy aõnihikỹmy bedeery riwahinymyhỹre.
\v 9 Iny boho heka bedeery nihikỹmy aõkõ ratxirenyre iumynadi, kia ikiemy iumy mahãdu rieryõhyymyhỹre, aõbo òbitimy rỹimyhỹremy.
\v 10 Iurenana tahe boholabenykre ararybekre-ò, kiemy dori diarỹ warayky rybe ariwahinylekre.
\v 11 Diarỹ araraòrenyre marybebenykremy, kia raholare òbitimy. Iwana-wana kai boho rybewiwihikỹ tetamyhỹteny,
\v 12 diarỹ heka ywimy rybeõmy raholamyhỹ. Kia-ribi tahe ijõreny kai bohoõ Jòò tewoywinyõhyytenyte, kia alỹỹraxinareny rirawyònyõhyyre.
\v 13 Timybo tahe kai boho marybebenykre bedeerytxi tekoatenytemy? Kia heka Deuxu rare, kia aõ iny aõkõ, mobo tahe Jò dee rybe rirawyònykre.
\v 14 Diarỹ tiu aweserenymy arirawyònyõtyhy; kia Jò heka iki boho-wana widee tarybetenyteri wa-wana aõkõ.
\v 15 Jò kia heka inataõmy ratxirenyreri heka rabòdurenyre, kia irybereny ihoõre iki boho-wana widee marybebenykemy.
\v 16 Tii boho heka ruhurenyra; kia ixyby raryberenyõhyyrenyreri. Kia aõbo diarỹ ariraòrenykre rybeõmy ratxirenyreri wana-wana?
\v 17 Kõre; diarỹ wijityhy arirawyònykre, kia tahe ararybekre timybo rybe-di rahõtinymhỹremy.
\v 18 Diarỹ heka sõemy warybe ijõdireri, kia rybeõmy aroholake heka wadee ihoõhyyreri.
\v 19 Txibo diarỹ ararybeõkreki, kia heka diarỹ urile arawebòhòke (odre) wesele, kia monabesò tỹmyra-di tỹximy rỹimyhỹre.
\v 20 Diarỹ heka reòludunyõhyyreri; kia urile (arexidesabafarnykre), diarỹ heka warayky rybe ariwahinykemyreri.
\v 21 Diarỹ rybenana ariwedunyõkre, kia inyõ aridularnyõkre.
\v 22 Diarỹ heka bajulari rewinyõhyymyhỹre; kia txibo bajulari ariwinykeki, Bededinodu nihikỹ riwararytxynykre.
\c 33
\p
\v 1 Iurenana heka Jò warybe-ò boholakre, kia boholawiwikre ibutumy ararybekre-ò.
\v 2 Diarỹ heka rexihumy rare warybe ariòrarunykremy, diarỹ waraykymy rybe-di ararybekre.
\v 3 Kia warayky rybe inatyhymy òbitimy ariwahinykre; kia warybe heka òbitityhy rare, kia heka wawo-ribi namyhỹde.
\v 4 Kia Deuxu deòdu heka tuu riwawinyre, kia tarybudỹỹna-di ibutumy tabedeery nihikỹ-di wadee wabededỹỹnana riwahinyre.
\v 5 Kia bidiwarawyònykre, txibo arayky ijõdikre-wana; kia bexiywiywinykre widee rykarybekremy.
\v 6 Deuxu dee heka kai diarỹ-wana iny heka wiwesewesele rare; diarỹ heka su-ribile inymy relere.
\v 7 Iurenana heka diarỹ ixilau raberuõhyymyhỹre; wanohõti heka arasurusurunykemy aõkõ rahõtinyreri.
\v 8 Kia heka diarỹ aratyhynymy raholare, kai myy tarybeteki:
\v 9 "Diarỹ ixi waòraruki aõkõ; diarỹ aõ ibinamy rewinyõhyyre. Diarỹ wainybòmy watxireri; kia òrarunaõ rewinyõhyyre.
\v 10 Kia Deuxu heka tuu ritxienyre riwarubunykremy; tii heka wadi ratximyhỹre taòludu wesemy.
\v 11 Tii heka wawa womati rerutidi ritaare, kia heka ibutumy wadi retehemy ratximyhỹre aõbo rewinymyhỹremy."
\v 12 Ka diarỹ tahe adee ararybekre kai òbitimy aõkõ atxiterimy, kia heka Deuxu ibutu ratyremy inihikỹmy ratximyhỹre iny sõmy sõmy rỹimyhỹrenyre-ribi.
\v 13 Aõherekibo tahe kai Deuxumy tarybeteri, kia tii inydeburerenyki inydeereny raraybiõmyhỹremy?
\v 14 Deuxu heka sõemy inydeereny rarybemyhỹre, kiaremy tahe iny boho irybe-ò roholaõhyymyhỹrenyre.
\v 15 Kia rumy herinanaki, kia tiu rõrõtyhymyhỹrenyreu, kia tii inyrasireny-ribi iny boho retehemyhỹrenyre tii inydeereny rarybemyhỹremy.
\v 16 Deuxu heka iny nohõtireny-ò rarybemyhỹre, kia teòaridỹỹna heka iny brebunadi ritỹxinymyhỹrenyre.
\v 17 Tii heka inydeereny rarybemyhỹre iny òrarunareny rikirirenykemy, kia iny boho rekexityhytyhynymy rakatxirenyõkemy.
\v 18 Kawesemy heka tii iny boho rubu-ribi rihedỹỹnymyhỹre, kia heka iny boho hãluurotxi rekeserenykelau iny boho ritòenymyhỹrenyre.
\v 19 Kia ixybyle Deuxu ròrarytxydỹỹmyhỹre, kia aõdese inihikỹmy tiu ruhuõhyymyhỹre.
\v 20 Webinadu heka iny byrenana riõnodỹỹnymyhỹre, kia rỹsỹnawihikỹ robikemy ratximyhỹre.
\v 21 Kia tii radeõmy ramyhỹre, kia rexihumy ramyhỹre, ikonanau tahe idesityyle itimy rexirahòremyhỹre.
\v 22 Tii heka rubuna ijòki ratximyhỹre; kia iòhòtyhylemy hãluuro-ò radykremy ratximyhỹre.
\v 23 Kia txibo aõhe-wana anjo rihedỹỹnyke, kia sõemy Deuxu anjoõ, tii heka iny boho riixinanymyhỹrenyre aõ òbitimy rikiwinymyhỹrenykemy.
\v 24 Kia anjo heka idi rawobrukre, kia tahe Deuxu dee rexitòenykre: "Biatyke! Tii rubu mahãdureny hãwa-ò reseke aõkõre. Kaki tewedỹỹna òwydỹỹna roire."
\v 25 Kia tahe tii ixybyle awimy ibinaõmy relekre, kia iumy inihikỹmy relekre iwese juhuu itỹmyramy raremyhỹ wesemy.
\v 26 Kia tiu rexitòenykreu Deuxu rirawyònykre. Tii heka bedesamy tuu rerinanykre, kia Deuxu ixybyle tamy reobykre hãbu òbitimy nodu wesemy.
\v 27 Tii iny dee ibutumy rarybekre: "Diarỹ òraruna rewinyre, kia bedebinabinahãkỹ rewinyre, ka Deuxu tahe riwararytxynyõhyyre.
\v 28 Tii heka rubu-ribi riwahedỹỹnyre; diarỹ bede loosònamy arobilekre."
\v 29 Deuxu heka ibutumy iny mahãdudeereny tuu riwinymyhỹre, kia sõemy tuu riwinymyhỹre.
\v 30 Tii heka iny boho rukururenykelau iny boho ritòenymyhỹrenyre, kawesemy tahe iny boho ikiemy ratximyhỹrenyre bede loosòna iny ritoosònyrenymy.
\v 31 Ka tahe wiji Jò boholawiwikre; rybeõmykre, diarỹ ararybekre.
\v 32 Txibo kai aõmy arybe ijõdireri-wana biwarawyònykre, kiemy dori diarỹ aki òbitimy rahãrerimy adee ararybekemyreri.
\v 33 Txibo ihoõkeki tahe rybeõmy boholakre, kia diarỹ aratohodỹỹnykre timybo bedeery nihikỹmy atxikremy.
\c 34
\p
\v 1 Eliu rybe:
\v 2 — Kai boho bedeerymy atximyhỹtenyte, boholabenykre ararybekre-ò.
\v 3 Kawesemy tahe ijohonadu mahãdureny rieryrenykemy ratximyhỹrenyre rybewihikỹ-di, kia dòròtòube tahe rỹsỹna rierywityhymyhỹre,
\v 4 kia wesemy tahe iny boho rikieryrenykre bededỹỹnana,  kia tahe rikiywinyrenykre tai awimy ròhònykremy.
\v 5 Jò heka iximy rarybereri iinybòrerimy, kia Deuxu riki aõ òbitimy tamy riwinyõhyyreri.
\v 6 Kia ta rỹỹraxire: "Timybo tahe diarỹ araroikre, diarỹ òbitimy aõkõ watxirerimy? Kia binana deytesira-di  aõhỹỹmy ratỹỹnyreri, kia heka òrarunaõ rewinyõhyyre."
\v 7 Ka hãwa bedeki heka inyõ Jò wesemy ratxiõhyymyhỹre, kia inyõ dee heka irutaõre Deuxu-di risinymy rỹimyhỹre, kia iwese bedeò sohojimy bemy iny riõmyhỹre wesemy.
\v 8 Tii heka hãbu mahãdureny binabina-wana rariamyhỹrenyre, kia tahe rexibutunymyhỹrenyre iny mahãdureny-wana aõki heka awirenyõhyyrenyre.
\v 9 Kia tahe myy rarybemyhỹrenyre: "Kia iny Deuxu dee aõ riwahinymyhỹre heka iny aõ ritaõhyymyhỹre."
\v 10 Ka tahe wiji kai boho ainytyhy ijõdimy atximyhỹtenyte wadee boholabenykre. Kia Deuxu aõbo aõ ikõnamy riwinymyhỹre aõbo? Kia aõbo ibutumy taõnihikỹ-wana aõ ibinamy aõbo riwinymyhỹre aõbo?
\v 11 Tii heka iny boho rimymyhỹrenyre, kia aõ iny boho riwinymyhỹrenyre-di, kia tahe sohoji sohoji aõ riwahinymyhỹre tuu rekoamyhỹrenyremy.
\v 12 Kia inatyhymy Deuxu taõnihikỹ-wana aõ bedebina riwinyõhyymyhỹre, kia inyõ-di ibinamy ratxiõhyymyhỹre.
\v 13 Mobo tahe ibedeery nihikỹmy rarekremy tamy riwahinyre? Mobo tahe bede bede hãwa nihikỹ wedu riwinyre"?
\v 14 Txibo Deuxu tuu riwinykeki, kia ixybyle riòkesedỹỹnyke (folego), iny mahãdu elewesedỹỹnana;
\v 15 kia tahe iurenana ibutumy iny mahãdureny rururenyke, iutyhyle, kia ixybyle sunode-ò ròòserenyke.
\v 16 Ka wiji Jò, txibo abedeeryre-wana, boholawiwikre ararybekre-ò.
\v 17 Txibo Deuxu bedeòbitinamy radònykeki, kia tiu bede bede hãwa nihikỹ riwedunyõtyhy. Kia aõbo kai birarytxynykemy idi atxiteri kua iny òbitimy inidehemy rỹimyhỹre-di?
\v 18 Deuxu heka Iòlò mahãdureny aõwedureny ninihikỹreny-wana rirarytxynymyhỹrenyre, kia tiu ibinamy aõ riwinymyhỹrenyreu, kia tiu aõki awiõmy ratximyhỹrenyreu.
\v 19 Tii heka inydeereny rexideòsinyrenyõhyymyhỹrenyre rynana rarieki runymy ratximyhỹremy, kia iaõnadimy ityhymy rỹimyhỹrenyre bedebinabinale iny aõkõ mahãreny-ò riwahinymyhỹrenyreki ibinamy rahãõhyymyhỹre, kia heka ibutumy iribirenylehekỹ raumynyrenyre.
\v 20 Kia heka rubuna isitere-ribile kanakre ruwetya-ribi. Iny heka irubuna ijõdimy rỹimyhỹre, kia tahe rurumyhỹre. Deuxu ixiwiòhedỹỹdumy reaõhyymyhỹre, kia iny ninihikỹ mahãdureny rirubunykemy.
\v 21 Kiemy dori tii ibutumy rierymyhỹre aõbo iny boho riwinymyhỹre, kia ibutumy iny riranarenymy robimyhỹre.
\v 22 Kia heka tibedeki bede ihoõhyyre bedeluru ratyremy, titxibo tahe òrarudu mahãdu Deuxulau rexiwokre.
\v 23 Deuxu heka txuu riywinykemy reaõhyymyhỹre, kia iny ikonanau rierykemy.
\v 24 Tii heka iny nihikỹ mahãdureny riurihinanykemy reaõhyymyhỹre, kia rihurenykemy, kia tahe iny witxira-ò irynanatyby riwahinykre.
\v 25 Kia heka Deuxu rierymyhỹre aõbo tii boho riwinymyhỹre; rumy heka tii boho ròatymy risurusurunymyhỹrenyre.
\v 26 Kia iny mahãdureny ykyki ibuturuki, Deuxu rirarytxynyrenykre, kia rubudỹỹdureny weserenyle,
\v 27 kiemy dori tii boho iribi rexilòhòrarienyrenyre, kia irybe wahidỹỹna tyhydỹỹderalemy rekoarenyre.
\v 28 Tii boho heka iny iaõkõmy rỹimyhỹrenyre ihidỹỹnareny iaõhỹỹmydỹỹnanaremy Deuxuòhòkỹle riòwòdỹỹnyrenyre, tai tahe tii tamy roholare.
\v 29 Kia txibo Deuxu rarybeõkeki tiu inyõ rirarytxynyrenyõtyhy. Txibo tii taòsỹny riwòkeki, kia iny mahãdu hãwa hãwa mahãdureny iitxedurenyõmy rekoarenykre,
\v 30 kia tahe tiu aõ iwidỹỹrenyõna, kia hãbu bina mahãdureny riwedunyrenykemy aõhỹỹmy risỹnyrenylelau rexiijenykemy.
\v 31 Jò, kia aõbo kai texieryte Deuxu koki, kia kai aõhỹỹmy tatỹỹnyte aòraruna òraruki, kia iximy tarybete tiu ixyby biwinyõkremy?
\v 32 Kia aõbo Deuxu dee texitòenyte aõmy ixihewo-ò terite adee riteòsinykremy, kia aõbo texiixawidỹỹnyte aõnaõna binabina ixyby biwinyõkremy?
\v 33 Txibo kai Deuxu aõ riwinymyhỹre deramy teamyhỹteki, timybo tahe kai teraòmyhỹte aõmybo teamyhỹte tii adee riwinykemy? Kia kai heka birawyònykre, diarỹ aõkõ; manarybeke wadeereny aõmybo tahõtinytenyterimy.
\v 34 Iny bedeery mahãdureny iny ywimy iinytyhymy rỹimyhỹrenyre heka warybe-ò roholamyhỹrenyre, kia tahe òbitityhymy myy raryberenykre:
\v 35 Jò heka aõmybo rarybereri rieryõhyyreri; kia tii aõmybo rarybereri heka aõ rybemy rarybeõhyyreri.
\v 36 Kia heka urile tarybe rierywiwikre, kia tahe diarỹ boho arirawyònyrenykre iny itxỹtereny wesemy.
\v 37 Jò heka òrarudu rare, òrarudu binanihikỹ rare. Kia diarỹ boho watximyhỹrenyrekoki Deuxu-my aõnaõnamy binamy rarybemyhỹre, kia heka Deuxu òludumy rybe-ribi ixawiõhyymyhỹre".
\rem MISS. cc35-c38[SC4]
\c 39
\p
\v 1 Kai aõbo teeryte tiubo watxini bederahu ludu ruamyhỹre ada budoe ruaremy aõbo tabite bederoki ruaremy?
\v 2 Kai aõbo teeryte tiwesemybo bòtòmy ahãdu idi bede riemyhỹre, ada timybo rỹimyhỹre ruamyhỹreu?
\v 3 Kai aõbo teeryte tiu tii boho su-ò rexibedenymyhỹrenyreu reakremy, kia tariòre boho kahãwabede-ò didymyhỹdenydeu?
\v 4 Kia iriòre boho idedimy ityhymy bederoki raumynymyhỹrenyre; irahudi tahe roimyhỹrenyre kia ixyby dòòsedenyõhyymyhỹrenyre.
\v 5 Mobo tahe bedeki awimy ratxirenykremy buru bederahymyhỹrenyre-ò riwahinyre? Mobo tahe ixinamy ixideewimy ririranyrenykremy riwahinyrenyre?
\v 6 Diarỹ heka bederahy tamyreny rewahinyre ihetorenymy, kia su jubrereki rahãwanyrenykremy rewahinyrenyre.
\v 7 Tii boho heka hãwa wodỹỹ rieryrenykemy aõkõ ratximyhỹrenyre; kia heka tiu (domado-my) ratxiõtyhy, tiu inyõ tamy irybeõna iaõnautxie-di retyykemy.
\v 8 Tii boho heka hãwalò asimy riroximy ratximyhỹrenyre, kia tai aõtxile asilỹremy rarunymyhỹrenyre rirỹsỹrenykemy.
\v 9 Kia aõbo broreni bederahyludu adee aõmysỹdỹỹmy reakre? Kia aõbo tii auhuariwoki rumy aõbo tai bede riijekre?
\v 10 Kia aõbo kai reruti-di bitaakre, kia suu adee riaranykemy ada adee idi rarurunymy?
\v 11 Kia aõbo kai iruru nihikỹ bityhynykre ijõdimy ratximyhỹre, kia tamy aõmysỹdỹỹ utxie nihikỹ birikre adee riwinykremy?
\v 12 Kia kai biraokre tii adee maixõmini idiwykremy, kai bihekremy, kia su-ò bitxiwikremy?
\v 13 Kia iwese useheweni teratyti rihetenymyh`yre wesemy! Kia heka tiu useheweni ruòõhyymyhỹre (cegonha) wesemy.
\v 14 Useheweni heka tasi su-ò riydònymyhỹre, kia ỹnyra tòtee ritxuakremy.
\v 15 Tii heka rõhõtinyõhyymyhỹre inyõ ityre rariakemy, ada iròdu debure risurusurunykemy rõhõtinyõhyymyhỹre.
\v 16 Tii heka rexideysanymy rexiukỹukỹnymy reamyhỹre, kia isi ihoõreri wesemy, kia heka taõmysỹdỹỹnamy awimy rahãõhyymyhỹre.
\v 17 Kia heka diarỹ kawesemy rewinyre, iinytyhy ihoõmy, kia tamy bedeery rewahinyõre.
\v 18 Iurenana heka tii tiu reamyhỹre tarurumy, kia urile awaru-di awaru-di riradu mahãdureny-di risinymyhỹre.
\v 19 Jò, kiaremy kai aõbo awaru ityhytyhymy tewinyte? Kia kai aõbo ibòtò teixiwidỹỹnanyte irade-di?
\v 20 Jò, kiaremy kai aõbo tewayrytòdỹỹnymyhỹte sei wesemy, kia iny mahãdureny ribrebunymyhỹrenyre tarajuareny-di?
\v 21 Kia ywimy aõkõ tii boho tawareny-di sumy ririranymyhỹrenyre, kia tahe aõbina bededỹỹnana-ò raòrunymyhỹrenyre tarururenymy.
\v 22 Tii boho ibrebureny ihõre. Kia aõlau ruberurenyke aõkõre, kia tõnori.
\v 23 Kia iratyareny-di wyhy rurònymy reamyhỹre, kia tõnori tahe urile raòderanymy reamyhỹre.
\v 24 Kia ywimy aõkõ ramytàtàmyhỹrenyre, kia tii boho rawayrytòmy ròhònymyhỹrenyre, kia tiu ajuròna rawodỹỹnymyhỹreu, kia ywimy ruhurenyõhyymyhỹrenyre.
\v 25 Kia tii boho tarajuareny-di ajuròna wodỹỹna rirawyònymyhỹrenyre; kia ireheribihikỹle aõbina silỹnymy rurumyhỹrenyre, kia iiryreny-ò roholamyhỹrenyre, iwedureny tamyreny rarybemyhỹrenyre-ò.
\v 26 Kai aõbo nawiihikỹ ruokremy teixinanymyhỹte, kia tee teraynymyhỹte ruokremy iraru bede-ò?
\v 27 Kia nawiihikỹ lyby aõbo tamy marybeke aõbo riraòmyhỹre, kia biu rarie-ò rasinykemy?
\v 28 Tii heka mana rarie nihikỹki rasỹnymyhỹre, kia manaura nihikỹki tahe tasinana rimywiwimy riwinymyhỹre.
\v 29 Kia iribi tahe iròdumy robimyhỹre tii rirubunykremy, kia iruereny heka ireheòhỹkỹle aõmy robimyhỹrenyre.
\v 30 Kia tibedeki iròdu rubumy robimyhỹrenyre, tai tahe nawiihikỹ lyby rexibutunymyhỹrenyre, kia iriòre boho ihãlubu ritòmyh`yrenyre.
\c 40
\p
\v 1 Wanyry rarybera:
\v 2 —Jò, kai wawana ijesumy teate, Deuxu ibutumy tabedeery nihikỹ-di. Kia bexiixawidỹỹnyke ada bidiwarawyòkremy aõbo?
\s1 Jò rybe:
\p
\v 3-4 Deuxu bedery nihikỹ, diarỹ tiu aõki aõdemy areaõtyhy; ararywyòdỹỹderamy? Diarỹ rybeõlemy atxike wadeewire.
\v 5 Kia sõetyhymy rarybere, ka tahe wiji aõ ihoõre ararybekemy.
\s1 Inatxina Deuxu ròrawyòdỹỹre
\p
\v 6 Tai tahe yhydere yky-ribi Deuxu Jòò kawesemy rirawyònyre:
\v 7 Kia eburemy atximyhỹtemy wiji bexideòsinykre, kia tahe bidiwarawyònykre adee lỹỹraxi ariwinykre-ò.
\v 8 Kia aõbo kai diarỹ òbitimy aõkõ watximyhỹremy biwaerykemy wadi tahõtinyteri, kia diarỹ waòraruki tuu tatỹỹnytemy, kia kai ainybòmy iximy tarybeteki?
\v 9 Kia aõbo arurutere warurutere wesemy teurihinanyteri? Kia aõbo kai aõwaxina warybe wodỹỹ wesemy marybeke, kia iwese diarỹ tarurumy rarybemyhỹre wesemy?
\v 10 Txibo kai aõwaxina tuu biwinykeki, tai tyyura nihikỹ-di bexityynykre, inyninihikỹ wesemy bexiywidỹỹnanykre.
\v 11 Kia ibutumy iny rexityhytyhynymyhỹrenyre mahãdureny-di betehekre; kia ebure-di bihubenykemy tuu biwinyke iòludurenymy, kia aòhỹỹmy bisỹnybenykre.
\v 12 Kohe, kia tamyreny betehekre, kia tahe aõhỹỹmy bisỹnybenykre; kia iny itxỹte mahãdu bisurusurunykre tikibo ratxirenyreriki.
\v 13 Kia ibutumy su hãluu-ò bituunybenykre; kia rubu mahãdureny bedeki bitaabenykre.
\v 14 Txibo kai tuu biwinykreki, diarỹ komy umy arerinanymy umy arawowydykre, kia tahe kai bexierykre ararurutere òbitidile ibuturatyre tahònytemy.
\v 15 Kia Beemote iròdu debure-di betehekre, kia Diarỹ reumydỹỹnyre, kia iwese kai araumydỹỹnyre wesemy. Tii heka asi rirỹsỹmyhỹre broreni wesele,
\v 16 kia tahe idi betehekre tiwesebo irurutere ijõdiremy, kia heka iwese arurutere inihikỹtyhyre!
\v 17 Kia tõheraru heka imyremy lamamy rỹimyhỹre, kia teri-ò rade rỹimyhỹre wesele, kia irutiki sõemy iruru inihikỹmy roimyhỹre.
\v 18 Kia iti heka ityhymy iruruterere, kia manatere txiriedese rỹimyhỹre wesele, kia iruti tahe womatijieti wesemy roimyhỹre.
\v 19 Tii heka brebudỹỹdutyhymy ratximyhỹre wawidỹỹna wahe. Diarỹ sohojile Iwidỹỹdure, diarỹ heka wabedeery ijõdire tuu arahãynanykemy.
\v 20 Kia asimy riroximyhỹre heka hãwalòmy ruhunymy rỹimyhỹre, kia tai iròdu debure mahãdu risinymy rỹimyhỹrenyre bedeki.
\v 21 Tii heka (espinheiros) rawoki roimyhỹrenyre, kia bijiuykyki rexiwòmyhỹrenyre, wyhyhykỹ bedeykyrawoki.
\v 22 Kia espinheiros bede rade tamy bedeubròrò riwahinymyhỹre; kia ribeiraõ sadỹỹdu mahãdureny iweijàtimy rekoamyhỹrenyre.
\v 23 Kia beòra nihikỹ bede-ò bede rehemynymyhỹreu, kia tii ruberuõhyymyhỹre; kia tii awityhyhyylemy ratximyhỹre, kia Jordaõ bero tamy raòwònymyhỹre hãrele ihetowo-ò.
\v 24 Mobo tahe iratyremy ratxike riruebetànymy rimyke, ada iixiwòtena-wana aõbo ribrejunyke brejuna heto-ò.
\c 41
\p
\v 1 Kia ribi tahe Levitã iròdu debure, kia aõbo kai waxidi biwaxinyke aõbo, ada tòròtò aõbo reruti-di bitaake aõbo?
\v 2 Kai aõbo teasỹwo-ribi reruti aõbo biòlòdỹỹnyke, ada txuraru aõbo waxinihikỹ-di bitòake aõbo?
\v 3 Kia aõbo tii adee rexitòenykre biatykemy, ada idi bexiwobrunykemy aõbo adee rexitòenyke?
\v 4 Kia aõbo tii iki-wana aõbo widee bede biuwinykre, kia ikiemy adee raõmysỹdỹỹnymy rarekremy?
\v 5 Kia aõbo kai iki-wana bisinykre aõbo, kia idi nawii wesemy? Kai aõbo bitaakre aõbo, kia alisina wesemy rarekremy, kia adeòdu mahãdureny idi risinymy roirekremy?
\v 6 Kia aõbo idi bohonykre waxidu mahãdu ijoireny-ò?  Kia tai aõbo ide riòheòherenykre aõbo?
\v 7 Kia aõbo kai tõnori bituunykre ityy-di, ada deòreru waxina wesemy aõbo irati rỹikre?
\v 8 Tamyini ebò-di biurihimy tamy berike, kia sohojihyyle tamy berikre, kiaremy kai tiu ijesu-ribi õhõti rusaõhyymy mabekre.
\v 9 Kia iny Levitã iròdu debure-di retehemyhỹrekile heka iny mahãdu ibutumy taixiuaresena riinodỹỹnymyhỹre, kia tahe brebulemy iny rõhõtibremyhỹre.
\v 10 Txibo iny riitxenanymyhỹreki, kia tii teburehekỹmy relemyhỹre. Mobo tahe tamy ixidi rohonyke iki-wana resukemy?
\v 11 Mobo tahe riijeke iribi iwotõmoõmy ròhònykemy? Kiehyyle, hãwa hãwamy bede bedemy rỹimyhỹrenyre.
\v 12 Ka tahe wiji Levitã rutimy ararybekre, kia tiwesebo inihikỹmy, kia iruruteremy wiribi lahitxi lahitximy.
\v 13 Mobo tahe idesityy rihetynymyhỹre iribi ritake, ada idesityywibrowibro ritòake?
\v 14 Mobo tahe ityhymy txuraru riraynyke, kia txu desedese-di reòtemy rỹimyhỹre?
\v 15 Kia ibròki heka sõemy ibròjuràdese reòtemy rỹimyhỹre, kia heka widee widee ruràrurànymy rỹimyhỹre, kia imyremy rỹimyhỹre manatere wesemy.
\v 16 Kia heka widee rahãletemy rỹimyhỹre, kia tiu yhy rebonymyhỹre idi ròhònyõtyhy.
\v 17 Kia heka widee ròròtyhyhykỹlemy rỹimyhỹre, kia inatyhymy tiu inyõ wiribi itarasaõna.
\v 18 Kia tiu Levitã raelewesenanymyhỹreu, kia roosòroosòmy ròhònymyhỹre; kia irue heka raòderanymyhỹre, kia iwese txuu rudi ròhònymyhỹre wesele.
\v 19 Kia irywo heka heòty rade-di rehumyhỹre, kia iribi tahe heòtyloosò ròhònymyhỹre.
\v 20 Kia teàrà-ribi wydysi ròhònymyhỹre, kia iwese bederadejiru herana rawoki roomyhỹre wesemy.
\v 21 Kia irybudỹỹna heka heòty riworonymyhỹre, kia irywo-ribi tahe heòtyrade ròhònymyhỹre.
\v 22 Kia irurutere heka ibòtòki roimyhỹre, kia irati tahe ibutumy iny mahãdu ribrebunymyhỹre.
\v 23 Kia ibròsityyki heka tai ibreymy roike heka ihoõre; tii heka awityhymy imyremy roimyhỹre womati wesemy.
\v 24 Kia icoraçaõ binahãkỹ ibrebu ihoõre; kia imyrewimy roimyhỹre, kia mana may judỹỹna wesemy.
\v 25 Kia tiu tii lamamy rỹimyhỹreu, kia inihikỹtyhymy rỹimyhỹre werymy reburemy reamyhỹre; kia ilau brebule heka iny aõbo rexiuaremyhỹre rikokròmyhỹre.
\v 26 Kia tiu tõnoriõ riwotõmonyõtyhy, tõnori webese, kia wyhy tiu iwotõmodỹỹõna.
\v 27 Kia tamy womati horeru wesenale rare, kia manateredeòsa òwòru rubu wesenale rare.
\v 28 Kia tiu wyhylau rexiwòõhyymyhỹre. Kia iny tamy mana-di rehumyhỹre, kia heka iny asi-di rehumyhỹre wesenale rare.
\v 29 Kia iny òhòte-di rihetenyke, kia heka iwese iny horeru moe-di rihetenymyhỹre wesenale rare; tii heka urile risinymyhỹre, kia hãbu mahãdureny tõnori jurà webese-di tamy rehumyhỹrenyreki.
\v 30 Kia iwe heka (cacos-di pontudos)-di rahetynymy roimyhỹre, kia subururumy rirahòremyhỹre, kia womati ijòtòbòna wesemy.
\v 31 Tii heka bee riybòdỹỹnymyhỹre, kia tahe bee iwese heranaki rabòrònymyhỹre wesemy risỹnymyhỹre, kia iwese aõòlỹre herananihikỹki rabòrònymyhỹre wesemy.
\v 32 Tii heka beranihikỹki tarytyby raòderanymy ririmyhỹre, kia iwese beranihikỹki radeeresydu ura ijõdimyhỹre wesemy.
\v 33 Kia aõ heka kaki hãwanihikỹki roireki tamy riurihinanyõhyylemyhỹre, kia heka tuu rawidỹỹre iny ilau ruberukemy aõkõ.
\v 34 Kia Leviata heka ibutumy aõnaõna-di retehemyhỹre, kia idireny rehurenykremy, kia ibutumy iròdu iròdu rexityhytyhynymyhỹrenyre, kia tahe tii Iiòlòreny rare, idinodureny wesena wahe.
\c 42
\s1 Kia ikonamy Jòò ròrawyòdỹỹre
\p
\v 1 Tai tahe Jòò myy rirawyònyre:
\v 2 Diarỹ heka ixyby reeryre Deuxu tyhyhykỹ, kiemy dori adee aõ isiraõhyyre, kia abededỹỹnana teywinymy rỹimyhỹre, kia tiu aõ rikokròmy ribinanyõhyymyhỹre.
\v 3 Kai tiwatỹỹraxinyte timybo aõnaõnabinamy raryberemy, kia abedeery nihikỹ retxiõnymyhỹremy, kia heka diarỹ aõki rexirarexiralemy watximyhỹre. Kia heka rarybere aõnaõnamy, diarỹ aõnaõna reeryõmy, kiabo heka aõnaõna wityhyhykỹbo heka rare wadee, kia diarỹ timy waerysyõna.
\v 4 Kai wadee tarybete aroholakremy aõmybo tarybeteri-ò, kia alỹỹraxidỹỹna arirawyònykremy.
\v 5 Juhuu heka diarỹ araeryre, kia urile adee raholamy raremyhỹ, ka tahe wiji warue òbiti-di umy nadobimyhỹde.
\v 6 Iurenana heka diarỹ raixỹrumy watxireri, kia ibutumy aõnaõnamy rarybereki, diarỹ heka ixidee rexirahemy watxireri, kia sutyrekile rarynyreri, kia bryby sõetyreki.
\s1 Bededỹỹnana onana
\p
\v 7 Kia Jò-wana widee rybe ixawireu, Deuxu tyhyhykỹ Elifaz-ò rarybere: — Diarỹ heka sõemy waky adee reareri, kia inatxi abiòwareny dee tule, kiemy dori kai boho òbitimy aõkõ wamy tarybetenyte, kia iwese Jòò waijoi rarybere wesemy.
\v 8 Ka tahe wiji debo-ò inatximy broreni hãbu bimykre, kia debo-ò inatximy budoeni sõemy bimykre, kia tahe Jò-ò biwykre, idi xiwena wesemy riwinykremy, kia adeerenytòemy. Kia Jòò waijoi umyreny rexitòenykre, kia tahe diarỹ iixitòedỹỹna-ò areobykre, kia diarỹ arararytxynyrenyõkre, kia iwese tuu tekoamyhỹtenytemy, kia heka kai boho wamy tarybetenyõhyytenyte, kia Jòò rarybere wesemy.
\v 9 Tai tahe Elifaz, Bildade, Zofar boho roirenyre, kia tahe tuu riwinyrenyre, Deuxu tuu tamyreny raryberemynamy, kia tahe tii Jò ixitòedỹỹna-ò reobyre.
\v 10 Kia irahudi Jòò taixitòedỹỹna-ribi rexihureu tabiòreny inataõrenymy, kia Deuxu tyhyhykỹ ixybyle iaõdimy ityhymy risỹnyre, kia iratyre ibutumy sõemy tamy iaõnaõna riwahinyre, aõbo juhuu tai rỹiramyhỹ.
\v 11 Kia ibutumy iseriòre boho, kia ibutumy ibiòwareny boho tamy itxeremy roirenyre, kia iribi irynana deòteõ riwyrenyre iheto ludu. Kia raryberenyre timybo ibederyrymy raremyhỹu, kia juhuu tuu rutỹỹnyreu, kia ibutumy riruxetòedỹỹnyrenyre, kia aõnaõna binahãkỹ Deuxu ityre riatyreu. Kia tahe iny sohoji sohoji nieru tamy riwahinyre, kia manatererỹsỹ debò tamy riwahinyre.
\v 12 Deuxu tyhyhykỹ tarybewihikỹ Jò bededỹỹnana konana-ò riwahinyre, kia ibededỹỹnana kodele-ribi. Kia tii waò inaubiòwamy reurò mil-my ibudoeni sõe, kia debo-ò inatxi reuro mil-my icamelo sõe, kia inatxi mil-my ibroreni sõe, kia mil-my iburu hãwyy sõe.
\v 13 Kia tule debo-ò inatximy iriòre hãbu sõe, kia inataõmy iriòre hãwyy sõe.
\v 14 Kia iadelareny Jemima inire; kia ihelỹỹna ta Quezia inire; kia iinataõna ta Querém-Hapuque inire.
\v 15 Kia heka bede bedew hãwa hãwa rỹimyhỹrenyre iruxerarenyõrenyre, kia Jò riòrereny ruxera wesemy. Kia tybyreny iaõnareny-di itxeredumy rimyrenyre, kia hãbu iseriòre bohoreny-wana.
\v 16 Kia irahudi tahe Jòò irumy raremyhỹ, kia 140 wyra-di urure, kia sõemy tariòreriòrerenymy robire.
\v 17 Kia tahe matuarityhy-di rurure.