See in Reader
349 lines
46 KiB
Plaintext
349 lines
46 KiB
Plaintext
\id EZR
|
||
\ide UTF-8
|
||
\h Exidara
|
||
\toc1 Exidara
|
||
\toc2 Exidara
|
||
\toc3 ezr
|
||
\mt1 Exidara
|
||
|
||
\c 1
|
||
\cl Cap 1
|
||
|
||
\s Besiasu ribi Isaeli mahãdu Siro riteònyre rooserenykremy tasureny-ò (2 Iólò mahãdu Tyyriti Ijyy 36.22-23)
|
||
\p
|
||
\v 1 Besiasu, Siro iòlò sohoji beòramy rareu heka iwese Deuxu rarybere juhuu Jeremia ribi rotỹỹnyre. Sirowo-ki heka Deuxu ritidire tyyriti riwinykremy kia tyyriti heka ibutu bede bedemy reakremy.
|
||
\v 2 Besia, Siro iòlò kiamy rarybemyhỹre: “Inynyrỹ Deuxu heka, Biu wedu heka ibutu bede bedemy wadee riwahinyre heka. Jerusalĕ hãwã-ki, Judá hãwã-ki taheto riwinykremy wadee rarybere.
|
||
\v 3 Deuxu rityhynyre mahãdu heka, Jerusalĕ-ò roosekre, Judá-ò roosekre Deuxu heto Templo ritỹmyranykremy. Isaeli Deuxu Jerusalĕ-ki roimyhỹre. Roosekre mahãdu heka Deuxu wana boibenykre!
|
||
\v 4 Inyõ Isaeli mahãdu titxibo rasỹnymy rỹireri heka isỹ wera ludu inyõ riwiòhenanykremy rỹsana-di, womati tỹrỹrỹhỹkỹ-di, womati ura tỹrỹrỹhỹkỹ-di, iròduõ riwahinykremy, aõtxile aõna õnamy riwahinykre taworeny ribile Deuxu heto Templo-ò aõna õna riwykremy Jerusalĕ-ò”.
|
||
\s Jerusalĕ-ò isaeli mahãdu rooserenyre.
|
||
\v 5 Iu Xiwena wahidỹỹdu mahãdu, Levi mahãdu, Judá hãbu wedu mahãdu, Bejamĩ hãbu wedu mahãdu iworeny Deuxu idi rare Jerusalĕ-ò roirenykemy Deuxu heto Templo-ò idi raõmysỹdỹỹkremy.
|
||
\v 6 Ibutu isỹ wera ludu mahãdu idi riwiòhenanyrenyre, rỹsana-di, womati tỹrỹrỹhỹkỹ-di, womati ura tỹrỹrỹhỹkỹ-di, iròduõ riwahinyrenyre, aõtxile aõna õnamy riwahinyrenyre taworeny ribile.
|
||
\v 7 Siro iòlò tule aõna õna riarire heka juhuu Nabukudonoso Deuxu heto Templowo ribi riwyre, Jerusalĕ ribile riwyre tasuriokoreny-ò.
|
||
\v 8 Besia, Iòlò Siro heka ta aõna õna itxeredu-di heka Mitedaraté-ò rarybere ibutu kia Deuxu heto Templo ribi riwyrenyre heka idi rariakremy sohoji sohojimy idi Sebsá-ò riwahinykremy, Sebasá heka Judá roosekremy mahãdu idi itxeredumy rare.
|
||
\v 9 Kaa heka aõna õna deòtenamy rare, ibutu ixyby riwyrenykremy Deuxu heto Templo-ò. 30 womati tỹrỹrỹhỹkỹ-di iwebesemy, 1.000 womati ura tỹrỹrỹhỹkỹ-di iwebesemy, 29 womati tỹrỹrỹhỹkỹ-di xiwena lỹnyreny hynamy,
|
||
\v 10 30 womati tỹrỹrỹhỹkỹ-di iwebese ujamy, 410 womati ura tỹrỹrỹhỹkỹ-di iwebese ujamy, 1.000 aõna õna iwitxiramy.
|
||
\v 11 Tai heka 5.400my sõwe aõna õnamy riòbyra womati tỹrỹrỹhỹkỹ, womati ura tỹrỹrỹhỹkỹmy. Kia ibutu Sebasá diwyde Jerusalĕ-ò Babiloniasu ribi Judá mahãdu rooserenyreu.
|
||
\c 2
|
||
\cl Cap 2
|
||
|
||
\s Babilonia ribi Sorobabeli wedureny wana rooserenyre (Neemiá 7.4-73)
|
||
\p
|
||
\v 1 Babiloniasu ribi heka wetxumy Isaeli mahãdu rooserenyre tasureny-ò. Juhuu heka Judá mahãdu, Jerusalĕ mahãdu Nabukodonoso Babilonia-ò ridyrenyre heka idi heka judeu mahãdu tasureny-ò rooserenyre Jerusalĕ-ò, Judá-ò tahãwã hãwãreny-ò.
|
||
\v 2 Tahãwareny-ò rooserenyre mahãdu heka kaa wedu mahãdu heka roire: Sorobabeli, Jesua, Neemia, Seraiasi, Heelaíasi, Mahadokeu, Biusã, Mixibá, Bikivaí, Heu. Baaná. Ka heka isaeli mahãdu tiwese sõwemy rooserenyre heka:
|
||
\v 3 Barsi, sỹ mahãdu heka 2.172 iny sõwe;
|
||
\v 4 Sebatiasi, sỹ mahãdu heka 372iny sõwe;
|
||
\v 5 Ará, sỹ mahãdu heka 775 iny sõwe;
|
||
\v 6 Baaté-Moabé(Jesua riokorereny, Joabe riokorereny), heka 2.812 iny sõwe;
|
||
\v 7 Elaõ, sỹ mahãdu heka .254iny sõwe;
|
||
\v 8 Satuu, sỹ mahãdu heka 945 iny sõwe;
|
||
\v 9 Sakai, sỹ mahãdu heka 760 iny sõwe;
|
||
\v 10 Bani, sỹ mahãdu heka 642 iny sõwe;
|
||
\v 11 Bebaí, sỹ mahãdu heka 623 iny sõwe;
|
||
\v 12 Axikadé, sỹ mahãdu heka 1.222 iny sõwe;
|
||
\v 13 Adonikã, sỹ mahãdu heka 666 iny sõwe;
|
||
\v 14 Bikivaí, sỹ mahãdu heka 2.056 iny sõwe;
|
||
\v 15 Adĩ sỹ mahãdu heka 454 iny sõwe;
|
||
\v 16 Esekia riokore mahãdu heka, 98 iny sõwe;
|
||
\v 17 Besaí, sỹ mahãdu heka 323 iny sõwe;
|
||
\v 18 Jora, sỹ mahãdu heka 112 iny sõwe;
|
||
\v 19 Hasuu, sỹ mahãdu heka 223 iny sõwe;
|
||
\v 20 Gibar, sỹ mahãdu heka 95 iny sõwe;
|
||
\v 21 Belĕ, sỹ mahãdu heka 123 iny sõwe;
|
||
\v 22 Netobá, sỹ mahãdu heka 56 iny sõwe;
|
||
\v 23 Anatote, sỹ mahãdu heka 128 iny sõwe;
|
||
\v 24 Bete-Aximabeté, sỹ mahãdu heka 42 iny sõwe;
|
||
\v 25 Kiriate-Jearĩ, kebira, Beeroté, sỹ mahãdu heka 743 iny sõwe;
|
||
\v 26 Hamá, Jebá, sỹ mahãdu heka 621 iny sõwe;
|
||
\v 27 Mikimisi, sỹ mahãdu heka 122 iny sõwe;
|
||
\v 28 Beteli, Aí, sỹ mahãdu heka 223 iny sõwe;
|
||
\v 29 Nebo, sỹ mahãdu heka 52 iny sõwe;
|
||
\v 30 Makibisi, sỹ mahãdu heka 156 iny sõwe;
|
||
\v 31 Elaõ, sỹ mahãdu heka 1.254 iny sõwe;
|
||
\v 32 Harĩ, sỹ mahãdu heka 320 iny sõwe;
|
||
\v 33 Lodé, Hadidé, Onõ, sỹ mahãdu heka 725 iny sõwe;
|
||
\v 34 Jerikó, sỹ mahãdu heka 345 iny sõwe;
|
||
\v 35 Senaá, sỹ mahãdu heka 3.630 iny sõwe;
|
||
\v 36 Kaa heka xiwena wahidỹỹdu mahãdu wetxu bedeu ribile rooserenyre tasureny-ò: Jedaiasi (Jesua riokore), sỹ mahãdu heka 973 iny sõwe;
|
||
\v 37 Imehi, sỹ mahãdu heka 1.052 iny sõwe;
|
||
\v 38 Pasuu, sỹ mahãdu heka 1.247 iny sõwe;
|
||
\v 39 Harĩ, sỹ mahãdu heka 1.017 iny sõwe;
|
||
\v 40 Kaa heka Levi mahãdu wetxu bedeu ribile rooserenyre tasureny-ò; Jesua, Kadimieli (Hodabiasi riokorereny), sỹ mahãdu heka 74 iny sõwe;
|
||
\v 41 Asafe, wiudu mahãdu sỹ mahãdu heka 128 iny sõwe;
|
||
\v 42 Saluu, Até, Talmõ, Akube, Hatxita e Sobaí, ijòtòbòna itxeredumy sỹ mahãdu heka 139 iny sõwe.
|
||
\v 43 Kaa heka Deuxu heto aõmysỹdỹỹdu mahãdu wetxu bedeu ribile rooserenyre tasureny-ò: Sia, Hasuba, Tabaoté,
|
||
\v 44 Kerosi, Siá, Padõ,
|
||
\v 45 Lebaná, Hakabá, Akubé,
|
||
\v 46 Hakabeé Salumai, Hanã,
|
||
\v 47 Jideli, Kahá, Heaiasi,
|
||
\v 48 Hesĩ, Nekodá, Kasaõ,
|
||
\v 49 Usá, Baseá, Besaí,
|
||
\v 50 Asiná, Meunĩ, Nebusĩ,
|
||
\v 51 Bakebuke, Hakubá, Haruu,
|
||
\v 52 Basiluté, Meidá, Hasá,
|
||
\v 53 Bahakó, Siserá, Tamá,
|
||
\v 54 Nesiasi, Hatxibá.
|
||
\v 55 Salomaõ iòlò aõmysỹdỹỹdu mahãdu iriokorereny wetxu bedeu ribile rooserenyre tasureny-ò: Sotaí, Sobereté, Perudá,
|
||
\v 56 Jaalaá Dahakõ, Jideli,
|
||
\v 57 Sebatiasi, Hatxili, Bokereté-Hasebaĩ e Amĩ.
|
||
\v 58 Ibutu Deuxu heto Templo aõmysỹdỹỹdu mahãdu riokorereny, Salomaõ iòlò aõmysỹdỹỹdu mahãdu iriokorereny. wetxu bedeu ribile rooserenyre tasureny-ò 392 iny sõwe.
|
||
\v 59 Kia bedeu heka, ijõ mahãdu heka hãwã hãwã ribi doosedenyde Teli-Melá, Teu-Hasá, Kerube, Adã e Imehi. Ihãre heka rierytyhyõrenyre heka kia mahãdu Isaeli mahãdu riokorerenymy roire rieryõrenyre.
|
||
\v 60 Tii boho wana heka Delaiasi mahãdumy roire, Tobiasi mahãdumy roire, Nekodá mahãdumy roire myy: 652 iny sõwe.
|
||
\v 61 Ijõ tule rooserenyre heka xiwena wahidỹỹ mahãdu sõwe inataõ tasỹmahãdu tasỹ mahãdureny myy: Habaiasi, Hakosi, Bahasilai. (Basilai hawyy heka Bahasilai riokorereny Jileade suludumy rare, tii hawwy mahãdunimy kiamy rininirenyre.)
|
||
\v 62 Kia mahãdu heka inireny tyyriti-ki rierenyre momahãdumy roire uritere rierenyre tahe itxi rahaõrenyre tai dori tii boho xiwena wahidỹỹdu mahãdu-ò raloõrenyre.
|
||
\v 63 Suwedu heka rarybere xiwena wahidỹỹdu mahãdu juhu Deuxu-ò rỹỹraxikremy kia mana inatxi-di Urĩ inire ijõ Tumĩ inire kiadile heka Deuxu koki idi rehukre tai rierykremy timybo Deuxude rirawyònykre kia rahudi heka xiwena wahidỹỹdu mahãdu rỹsana heka rirasỹrenyke irỹsanareny heka xiwena uhe heka irỹsanareny rare uri riraòrenyke.
|
||
\v 64 Kaa heka ibutu Judásu-ò rooserenyre mahãdu heka 42.360 iny sõwe myy,
|
||
\v 65 Ijõ heka deòdu mahãdu hãbu, deòdu mahãdu hawyy heka 7.337 iny sõwe, ijõ wiudu mahãdu hãbu, wiudu mahãdu hawyy heka 200 iny sõwe
|
||
\v 66 Tulesỹ ridyrenyre awaru heka 736 sõwe, mula 245 sõwe
|
||
\v 67 kamelo 435 sõwe, jumetu 6.720 sõwe
|
||
\v 68 Jerusalĕ-ò ritehemynyrenyreu heka Deuxu heto Templo-ò hãbu wedu mahãdu heka xiwena ixidewireny riwahi riwahinyrenyre taile Deuxu heto-kile.
|
||
\v 69 Hãbu wedu mahãdu heka taaõnarenyre-di riwahi riwahinyrenyre. Kia xiwena ibutu heka 525 iutxie womati tỹrỹrỹhỹkỹ-di, 3 mili iutxie womati ura tỹrỹrỹhỹkỹ-di, 100 xiwena wahidỹỹdu mahãdu tyy-di kia ibutu heka riwahinyrenyre.
|
||
\v 70 Kia wese heka xiwena wahidỹỹdu mahãdu, Levi mahãdu, wiudu mahãdu, Deuxu heto,Templo ijòtòbòna idi itxeredu mahãdu, Deuxu heto Templo idi aõmysỹdỹỹdu mahãdu, inyõ mahãdu, Jerusalĕ weramy rexisỹnyrenyre. Iuhe mahãdu heka Isaelisu tahãwã tahãwãreny sỹmy roirenyre.
|
||
\c 3
|
||
\cl CAP 3
|
||
|
||
\s Òwòruwodỹỹ womati tỹrỹrỹhỹkỹ ixyby riywinyrenyre.
|
||
\p
|
||
\v 1 Isaeli mahãdu debò inatxi reurò ahãdu-di tahãwãrenymy rasỹnymy roimyhỹreu heka Isaeli mahãdu rexibutunyrenyre Jerusalĕ-ki ibutumy wiwesemy rõhõtinymy roiremyhỹ.
|
||
\v 2 Tai heka Seosadaké riòre heka Jesua, tabiòwareny wana rare, xiwena wahidỹỹdu mahãdu tule, Seatieu, Sorobabeli riòremy tabiòwa boho wana rexibutunyrenyre Deuxu-ò òwòruwodỹỹ womati tỹrỹrỹhỹkỹ ixyby riywinyrenykremy. Taile iwese Moisesi, Deuxu deòdu rarybere wese riwinyrenykremy.
|
||
\v 3 Iaõmysỹdỹỹnareny òraruna heka xiwena denamy riòrarunykemy idi riwisỹnyre heka ihãre kia sumahãdu lau ruberumyroire hãre xiwena dena riywinykremy taile juhuu roire wesemy. Idi Deuxu-ò xiwena riwahinyrenyre txuõtxuõlemy ruumy txioromy riwahinyrenyre.
|
||
\v 4 Tai heka tyy heto narỹỹna riwinyrenyre, iwese bede ywina wesemy, itxu òbiti heka xiwena riwahinyrenyre.
|
||
\v 5 Idi heka xiwena riwahinyrenyre ahãdu tỹmyra rarỹỹna heka ibutu xiwena Deuxu-ò riwahinyre. Isaeli mahãdu tule aõ diwydenyde xiwena Deuxu-ò riwahinymyroiremyhỹ.
|
||
\v 6 Deuxu heto Templo narỹỹna debò inatxi txu koki xiwena wahidỹỹdu mahãdu Deuxu-ò xiwena riwahinymyroiremyhỹ Deuxu heto dena riwinyre koki xiwena riwahinyrenyre.
|
||
\s Deuxu heto templo ritỹmyranyre.
|
||
\v 7 Òwòru orodỹỹdu mahãdu, òwòru widỹỹ mahãdu-ò nieru, bemy, rasỹnamy adỹỹ riwahinyrenyre heka tiiboho sedoro òwòru kidiwykremy Libanosu ribi Jope hãwã-ò iwese Pesiasu Siro iòlòmy ritidire wesemy.
|
||
\v 8 Isaeli mahãdu Jerusalĕ-ki heka inatxi beòrau inatxi ahãdu-di bedemy riòrarunyre Deuxu heto Templo widỹỹ. Aõmysỹdỹỹdu mahãdu heka Sorobabeli, Seautieli riòre, Jesua Jeosadake riòremy, ibiòwa mahãdu, xiwena wahidỹỹdu, Levi mahãdu. Levi mahãdu 20 beòra-di ratyremy heka Deuxu heto Templo widỹỹ idi itxeredumy.
|
||
\v 9 Jesua, iriòrereny, isỹ mahãdureny, Kadimieli, iriòrereny, Hodaviasi iriokorereny Deuxu heto Templo widỹỹdu mahãdu idi itxeredumy. Levi mahãdu heka Henadade mahãdu heka itxeredu mahãdu idi riwiòhenanyrenyre.
|
||
\v 10 Deuxu heto Templo dena riwinyrenyreu rahudi heka xiwena wahidỹỹdu mahãdu tatyyreny-di rexityynyrenyre idi tajurònareny heka ritoanyrenyre. Asabe mahãdu, wiudu mahãdu tule rexiywinymy roire heka taviolaõre wesemy Deuxu-ò Inynyrỹ reàlàrenykremy iwese Davi iòlò rarybere wesemy.
|
||
\v 11 Taworeny ribi rawiunyrenyre Deuxu-ò, reàlàrenyre myy: “Tii awimy rare! Isaeli mahãdu Inynyrỹ idi luutyhyre!” Idi Isaeli mahãdu ibutumy iteremy Deuxu-ò reàlàrenyre, Deuxu heto Templo dena risỹnymyhỹre kia txu-di.
|
||
\v 12 Iu heka xiwena wahidỹỹdu mahãdu, Levi mahãdu, matuari mahãdu heka juhuu Deuxu heto Templo widỹỹmy robirenyre-ki sõwemy rahinyrenyre dena risỹnyrenyre kia txu-di.
|
||
\v 13 Inyõ roholarenyre mahãdu rierytyhyõrenyre timybo raryberenyremy ihĩreny, ibrureny iteremy wiwanalemy reysamy rarybemyhỹrenyre irehe ribile heka roholarenyre iwodỹỹreny-ò
|
||
\c 4
|
||
\cl CAP 4
|
||
|
||
\s Òludu mahãdu heka teramy rearenyre
|
||
\p
|
||
\v 1 Isaeli Deuxu heto templo riwinymyroiremyhỹ Judá mahãdu Benjamim mahãdu wetxusu ribi ditehemynydenyde idi raõmysỹdỹỹnyrenyre iòludureny heka rieryrenyreu
|
||
\v 2 Sorobabeli-ò rybemy roirenyre tii hãbu mahãdu wedumy rare tamy raryberenyre: “Awanareny araõmysỹdỹỹnykremy aõbo, awesereny jiarỹ boho heka aDeuxureny-ò xiwena rewahinyrenykre tamy reàlàwahỹrenykre juhule Esa-Hadõ bedeu heka kaò diwateònydenyde juhu ribile heka reàlámywahỹrenyre dori.”
|
||
\v 3 Ihãre heka Sorobabeli, Jesua, ijõ Isaeli hãbu wedu mahãdureny heka rirawyònyrenyre: “Aõkõrehe kai boho iny boho wana Deuxu heto rikiwinyrenykre tuu aõko heka rare. Iny bohole Wanynyrỹ-ò Isaeli Deuxureny ka heto rikiwinyrenykremy iwese heka Siro, Pesiasu iòlò rarybere iwesemy.”
|
||
\v 4 Iu heka Isaeli mahãdu kiasu mahãdu ribinanykremy, ribrebunykremy iworeny iribi rexierykre idi riwisỹnymy roiremyhỹ.
|
||
\v 5 Inyõ mahãdu-ò nieru riwahinyrenyre heto aõmysỹdỹỹdu mahãdu-ò riokokremy. Tii boho kia riwinyrenyre Siro bedeu ribi Dario bedeu-ò, Pesiasu iòlòrenymy bedeu.
|
||
\s Iòlò-ò tyyriti riwahinyrenyre.
|
||
\v 6 Idi heka jeijei mahãdu heka Xexé-ò Pesiasu iòlòmy raloreu Jerusalĕ mahãdumy, Judá mahãdumy rybe binamy riteònyrenyre.
|
||
\v 7 Ataxexé-ò, Pesia iòlò, Bixilaõ, Miteredaté, Tabeeli, ijõ biòwa mahãdu wana heka tyyriti rityyritinyrenyre heka Aramaiko rybemy.
|
||
\v 8 Heữ, suwedu, Sisaí tyyritidỹỹdu wana Jerusalĕ mahãdu teramy tyyritimy riwinyre myy:
|
||
\v 9 “Kaa tyyriti heka Heữ, suwedu, Sisaí tyyritidỹỹdu, hãbuõ mahãdu wana, wahisidỹỹdu mahãdu wana, hãbuõ wedu mahãdu wana, Tiripoli ludu hãbu wedu mahãdu, Pesiasu ribi, Ereké ludu hãbu wedu mahãdu, Susã ludu hãbu wedu mahãdu Elã hãbu wedu mahãdu Babiloniasu ribi,
|
||
\v 10 iny boho ijõsu ribi dirahude mahãdu wana kia heka Asunibali taruru-di isureny ribi ritare Samaria hãwã-ki idi riwisỹnyrenyre Eubaratésu bedebrò-ki idi risỹnyrenyre heka tiiboho wanareny heka roiremyhỹre.”
|
||
\v 11 Tyyriti tõranamy kaa heka rare: “ Ataxexé iòlò-ò, eòdureny mahãdu-ò Eubaratésu bedebrò-kisỹdu mahãdu adeereny rerytinyrenyre kia rybemy:
|
||
\v 12 ArabedeerynynyrenykreKia judeu mahãdu heka kaò Jerusalĕ-ò teteònyte heka òbiti aõkõ riwinyroiremyhỹrenyre. Kaa òtity ritỹmyranyrenyre heka òtity denamy raòbitinymyroire.
|
||
\v 13 Iòlò katahe arabedeerynanykremy kai heka bierykemy kaa Jerusalĕ hãwã kia mahãdu ixyby ritỹmyradỹỹnykeki, iòtityreny ritỹmyranykeki heka tii boho sunierumy tiu araòwynyõtyhy, aõriòwynyõtyhy, iòlò nierumy riwahinyõtyhy, iòlò anierymy rexieryke lau. (perder, sobrar) (ao rei prejuízo) rexikeryra sobrar
|
||
\v 14 Iny boho heka aõmysỹdỹỹdu mahãdu heka roire tai ibinamy rare waiòlòreny rexierykemy, kia òraruki heka kaa tyyriti waiòlòreny ariteònyrenyre.
|
||
\v 15 Warybereny heka myy: Ihetxiu mahãdu tyyriti-ò rijerenykremy biteònykre, iòlò mahãdu ihetxiu tyyriti-ki idi rariakremy tai raharenykre, kaa Jerusalĕ hãwã mahãdu heka ibina bina heka iòlò mahãdu-ò teramy rearenyre juhuu kia òraru-ki heka kaa hãwã ribòhòbòhònyre, rituerenyre dori.
|
||
\v 16 Tai adee raryberenyre heka ixyby kaa Jerusalĕ hãwã ritỹmyranyrenykeki heka, iòtityreny ritỹmyranyrenykeki heka Eubaratésu bedebrò-kisỹdu mahãdu tiu aratyhynyõtyhy bierykemy aratyhynyõtyhy.”
|
||
\s Iòlò irawyònamy
|
||
\v 17 Idi heka iòlò tamyreny tyyriti irawyònamy riteònyre myy: “Kaa tyyritimy reteònyreri heka Heữ-ò, Sisaí-ò, ibutu hãbuõ mahãdu tii boho wana roire-ò, Samariasỹdu mahãdu-ò, ibutu Eubaratésu bedebrò-kisỹdu mahãdu-ò: Ywinamy!
|
||
\v 18 Atyyritireny wakoki idi rariarenyre.
|
||
\v 19 Irahudi heka jiarỹ reteònyre ihetxina tyyriti iòlò ihetxiu bedeu idi rijerenykremy tai heka idi rariarenyre heka inatyhymy kia hãwã mahãdu heka ibina binamy juhuu riwinyrenyre, rajeijeinyrenyre iòlò mahãdu-ò.
|
||
\v 20 Jerusalĕ iòlòreny ruruduhukỹ juhuu roire heka ibutu Eubaratésu bedebrò-kisỹdu mahãdu-ò sunierumy idi riòwynyrenyre taiòlòreny-ò.
|
||
\v 21 Tai dori wiji heka kia hãbu mahãdu-ò iaõmysỹdỹỹnarenymy ixãwikemy marybebenykre, kia hãwã widỹỹrenymy ixãwikemy warybe òraruki wahe. Ararybeke ixyby xiery.
|
||
\v 22 Uritere ywimy marybebenykre heka aiòlòreny arabinanyrenyke lau”. ²² "Tenham cuidado, não sejam negligentes neste assunto, para que os interesses reais não sofram prejuízo".
|
||
\v 23 Kia iòlò Ataxexé tyyriti-di rariarenyre rahudi heka Heữ, Sisaí, ibutu hãbuõ mahãdu tii boho wana wylemy roirenyre Jerusalĕ-ò judeu mahãdu rybemy, tarurumy idireny rare hãwã widỹỹmy ixãwirenykremy.
|
||
\v 24 Tai kia wesemy heka Jerusalĕ-ki Deuxu heto Templo idi ritỹmyranykremy ixãwire, ixãwire heka idihyy Pesia Dario iòlò inatxina bedeu-ò.
|
||
\c 5
|
||
\cl Cap 5
|
||
\p
|
||
\v 1 Kia bedeu heka Judá mahãdu-ò, Jerusalĕ mahãdu-ò, Ajeú Deuxu rybedumy, Sakariá Deuxu rybedumy, Ido riòre heka tii rare, tii boho raryberenyre Deuxu ribile heka raryberenyre heka Deuxunidilemy Isaeli Deuxu ityytybytyhy tii boho wana roire.
|
||
\v 2 Deuxu rybemy òraru-ki heka Sorobabeli, Sealatieli riòre, Jesua, Jeosadaké riòre wana Deuxu heto templo widỹỹmy riòrarunyrenyre heka Jerusalĕ-ki wahe. Ijõ Deuxu rybeduõ mahãdu tii boho wanamy roire tule wiòhedỹỹrenymy.
|
||
\v 3 Tatenaí heka Eubaratésu bedebrò-kisỹdu mahãdu wedumy, Setá-Bosenaí, ijõ hãbu mahãdu wana Jerusalĕ-ò roirenyre idi tamyreny rỹỹraxirenyre: “Mobo arateònyrenyre kaa heto Templo widỹỹymy ritỹmyranyrenykremy, òtity tule ritỹmyranyrenykremy mobo arateònyrenyre”
|
||
\v 4 Tii boho tule kia heto Templo aõmysỹdỹỹdu mahãdunirenymy ritỹỹraxinyrenyre.
|
||
\v 5 Ihãre heka isaeli wedu mahãdureny Deuxu idireny retehemy roiremyhỹ, tai dori tetximy roikõmy roiremyhỹ hykyhyky iribi heka Dario iòlò-ò tyyriti riteònyrenyre-ò.
|
||
\s Tatenai tyyriti riteònyre Dario iòlò-ò
|
||
\v 6 Kaa heka Tatenai Eubaratésu bedebrò-kisỹdu mahãdu wedumy, Setá-Bosenaí, ijõ hãbu wedu mahãdu wana tyyriti wesemy heka idi ròrytinyrenyre wesemy, kiamy Dario iòlò-ò riteònyrenyre:
|
||
\v 7 “Dario iòlò-ò kaa tyyritimy rare, iòlò ywihyymy matxike.
|
||
\v 8 Adeehe arabedeerynanykremy iny boho heka Deuxu Tyhyhykỹ heto templo widỹỹ ijobisimy roirenyre Judásu-ò. Kia templo heka mana-di wihikỹle heka riwinymyroiremyhỹ, iwitxiti tule dena-kile roire. Iaõmysỹdỹỹnareny heka ibyỹmy riwinymyroimyhỹrenyre awimy rỹireri dori.
|
||
\v 9 Iwidỹỹdureny mahãdu-ò rỹỹraxirenyre heka: ‘Mobo arateònyrenyre kaa heto Templo widỹỹymy ritỹmyranyrenykremy, òtity tule ritỹmyranyrenykremy mobo arateònyrenyre”
|
||
\v 10 Tule inirenymy retỹỹraxirenyre adee iòlò aratỹnynykremy mobo iwedurenymy roiremyhỹre.
|
||
\v 11 Kia wesemy diwarawyònydenyde myy: ‘Deuxu biu wedumy bede wedumy deòdumy iny boho roiremyhỹ, kaa heto Templo juhuu Isaeli iòlò wihikỹ riwinyre dori wiji heka retỹmyranyrenyre.
|
||
\v 12 Iny labiereny heka juhuuDeuxu riykaradỹỹnyrenyre dori, tai tii Babiloniasu iòlò Nabukodonoso-ò Isaeli mahãdu riwahinyre, tai heka Babiloniasu-ò ridyrenyre.
|
||
\v 13 Ihãre heka Babiloniasu iòlò ijõ Siro, iòlòna sohoji beòrau heka, tyyriti riwinyre heka ixinamy Deuxu heto Templomy rikitỹmyranyrenykremy riteònyre.
|
||
\v 14 Tiile Siro iòlò heka ibutu Nabukodonoso Deuxu heto Templo ribi aõna õna riwyre Babilonia surioko heto-ò risỹnyre heka kia womati tỹrỹrỹhỹkỹ, womati tỹrỹrỹhỹkỹ ura, ibutu aõna õna riwyre heka Dario iòlò ixybyle riwahinyre ibutumy Sebasá-ò tule tamy risỹnyre heka Judá wedumy ratxikremy.
|
||
\v 15 Iòlò Sebasá-ò rarybere heka kia aõna õna ibutu Jerusalĕ-ò ritidikremy, Deuxu heto Templo ritỹmyranykremy iwese juhuu tai roire iwesemy.
|
||
\v 16 Tai dori nade Sebasasi heka Deuxu heto Templo dena riwinyre heka Jerusalĕ-kile. Idihyy inyõ mahãdu idi raõmysỹdỹỹnymyroiremyhỹ, ihãre rexihuõhyyre dori’.
|
||
\v 17 “Iòlò-ò arexitòenyrenyre heka tamy awire-ki heka Babilônia iòlò mahãdu tyyriti-ki ihetxina-ò rijerenykremy, itxi raharenykremy kia tyyriti Siro iòlò heka rityyritinyreu heka riteònyreu Deuxu heto Templo ritỹmyranyrenykremy, Jerusalĕ hãwã-ò. Idi heka iòlò inydeereny rarybekre kia rybemy inatyhy aõbo raremyhỹ”.
|
||
\c 6
|
||
\cl Cap 6
|
||
\p
|
||
\v 1 Dario iòlò heka Babilonia iòlò hetxina mahãdu tyyriti rijekemy riteònyre tai aõna õna wihỹkỹmy rirarenyre kia woki.
|
||
\v 2 Tii boho rijerenyreu heka Ekibatana hãwã-ki, Mediasu-ki itxi raharenyre tyyriti-ki Dario rybemy:
|
||
\v 3 “Siro sohoji beòra-di iòlòmy rareu heka Jerusalĕ-ki Deuxu heto Templo tyyritimy riwinyre myy: “Jerusalĕ-ki Deuxu heto Templo riwinykremy taile xiwenamy riwahinyrenykremy, ixinamy kia heto denamy riakemy. Kia 27 urihixina-di biu-ò riwinykremy 27 urihixina-di iwebese bede-ò riwinykremy,
|
||
\v 4 inataõ mana nihiỹ-di riòtenanykremy sohoji òwòru-di òtenamy rỹikremy. Iòlò nieru ribi idi riòwynykremy.
|
||
\v 5 Deuxu heto Templo iaõna õnamy Nabukodonoso Templowo ribi diwyde heka Babiloni-ò ixyby heka riwyrenykremy Jerusalĕ Templo-ò; Deuxu hetowo-ki ridekremy.”
|
||
\v 6 Kia rybe rahudi heka Dario iòlò riteònyre myy: “Wiji, Tatenai Eubaratésu bedebrò-kisỹdu mahãdu wedumy Setá-Bosenaí, ijõ hãbu wedu mahãdu wana kia ribi bohonybenyke,
|
||
\v 7 Iaõmysỹdỹỹnareny binadỹỹõmyrenykre! Ixinamy kia Isaeli wedu mahãdu, hãbu wedu mahãdu wana Deuxu heto Templo taile juhuu wesemy roire riwinyrenykremy.
|
||
\v 8 Tulesỹ warybemy aritidikre kai boho heka kia Isaeli mahãdu-ò biwinybenyke heka judeu mahãdu heka Deuxu heto Templo riwinymyhỹrenyre-ki heka Eubaratésu bedebrò-kisỹdu kia nierumy iaõmysỹdỹỹdu mahãdu-ò biwahinybenyke, kia iaõmysỹdỹỹnareny rexihuõkemy lau.
|
||
\v 9 Aõmamy tamyreny rasiranyrenyre heka: bororeni riòremy, budoeni riòremy, budoeni hãbumy xiwenamy riwahinyrenykremy Deuxu biu wedu-ò, Jerusalĕ xiwena wahidỹỹdu reixitòenyrenykeki heka aõma jiyramy, tirikumy, vĩĩmy, adỹỹmy, òbitimy txuõ txuõlemy ibutumy biwahinybenykremy,
|
||
\v 10 tai Deuxu biu wedu-ò xiwenawi riwahinyrenykremy tule iòlò idi beixitòenybenykremy, iòlò riòrereny idi beixitòenyrenykremy.
|
||
\v 11 Katahe ijõ kaa tyyriti-ki aritidikre moõ kaa tyyriti-ki ijõ rybemy ritidikeki, kaa rybemy rawitxiranykeki heka taheto iwitxi-di taumy-di riwekremy idi ritamadỹỹnykremy. Taheto tule idi reatykremy idi ribòhò bòhònykremy,
|
||
\v 12 Deuxu tani-di tai risỹnyre heka, iòlòõ mahãdu, iwitxira mahãduõ kaa tyyriti rawitxiranykeki ada Jerusalĕ Deuxu heto Templo rahukemy riwisỹnykeki, Jiarỹ Dario, katahe retidira. Iwesetyhyle heka riwinykremy, rarybere Jiarỹhe!”
|
||
\v 13 Tai dori Dario iòlò tyyriti ritidire heka Tatenai Eubaratésu bedebrò-kisỹdu mahãdu wedumy Setá-Bosenaí, ijõ hãbu wedu mahãdu wana heka iòlò rybemy iwesele òbitityhy riwinyrenyre.
|
||
\v 14 Kia rybe-di heka judeu mahãdu Jerusalĕ Deuxu heto Templo widỹỹmy idihyymy raõmysỹdỹỹmy roiremyhỹ. Ajeú Deuxu rybedumy, Sakariá Deuxu rybedumy, Ido riòre heka tii rare, Deuxu idireny rare irybreny òraruki heka idi rarurunymy roiremyhỹ idi raõmysỹdỹỹmyroirenyre. Tai dori Deuxu heto Templo widỹỹmy rexihurenyre Iwesele heka Isaeli Deuxu rarybere iwesemy, kia Pesia iòlòreny heka Siro tyyriti-di, Dario tyyriti-di, Ataxexé tyyriti-di tule.
|
||
\s Deuxu heto Templomy deysamy roire
|
||
\v 15 Kia Ada ahãdumy inataõ txu-di heka Deuxu heto Templo widỹỹmy rexihurenyre heka Dario iòlò debò sohoji reurò beòrau.
|
||
\v 16 Tai heka Isaeli mahãdu, xiwena wahidỹỹdu mahãdu, Levi mahãdu, wetxu ribi riuhenyre mahãdu mahãdu, Deuxu hetomy reysarenymy roimyhỹrenyre Deuxu-ò riwowydynyrenyre.
|
||
\v 17 Iu heka Deuxu heto Templo-ki Deuxu-ò xiwenamy riwahinyrenyre bororeni hãbu 100my sõwemy, budoeni hãbu 200my sõwemy, budoeni riòremy 400my sõwemy, ijõ Isaeli mahãdu ibutumy iòrarunareny òraruki heka xiwenamy boji 12my sõwe riwahinyrenyre iwese Isaeli mahãdu ilabiereny 12my wesemy.
|
||
\v 18 Idi heka xiwena wahidỹỹdu mahãdu Deuxu-ò iaõmysỹdỹỹnareny txuumy riywinyrenyre, Levi mahãdu tamahãdu tamahãdumy Deuxu-ò iaõmysỹdỹỹnareny txuumy riywinyrenyre, Jerusalĕ-ki, iwesele Moisesi heka Tyyriti-ki rityyritinymy roire iwesemy.
|
||
\s Paskoa worana Bedehesi riwinyrenyre.
|
||
\v 19 Idi heka sohoji ahãdu-di 14 txumy Paskoa Worana Bedehesimy riwinyrenyre.
|
||
\v 20 Xiwena wahidỹỹdu mahãdu heka Levi mahãdu heka ibutumy wiweselemy rexiywinyrenyre Deuxu-ò; ibutu wetxu ribi dirahude mahãdumy, xiwena wahidỹỹdu mahãdumy, iseriòrerenymy, tamyreny Paskoa budoeni riòremy heka rirubunyrenyre Deuxu-ò.
|
||
\v 21 Kiawesemy heka isaeli mahãdu wetxu ribi dirahudenyde heka ijõ mahãdu iherenymy dirahude tule, su witxira mahãdu ribi rexiywinyrenyre rexiòbitinyrenyre heka Isaeli Deuxu-ò rexiòbitinyrenyre dori.
|
||
\v 22 Paskoa worana bedehesi orotxu uriõmy rirasỹrenyre debò inatxi reurò txu-di, deysanamy narỹỹnamy roire, Deuxule riteysanyrenyre heka Asiria iòlò iwo-ki Deuxu rawitxiranyre kiamy isaeli Deuxu tamyreny riwinyre, iu tebòreny idi rarurudỹỹnyre Templo widỹỹmy tii boho idi raõmysỹdỹỹnyrenyreu.
|
||
\c 7
|
||
\cl Cap 7
|
||
|
||
\s Jerusalĕ-ò Exidara rehemynyre.
|
||
\p
|
||
\v 1 Pesiasu-ki Ataxexé iòlòna bedeu ribi irehemy roire heka hãbuõ Exidara heka Babiloniasu ribi Jerusalĕ hãwã-ò rare, Seraiasi tyby rare, Seraisi tyby heka Asariá, Asariá tyby heka Hiukiasi.
|
||
\v 2 Exidara ilabiereny mahãdu heka rare: Saluữ, Sadoki, Aitubè,
|
||
\v 3 Amariasi, Asariasi, Meraiotxi,
|
||
\v 4 Seraiasi, Usi, Buki,
|
||
\v 5 Abisuá, Bineiasi, Eleasá, Araõ xiwena wahidỹỹdu kie.
|
||
\v 6 Exidara heka Moisesi bede ywina erydu rare, kia Deuxu bede ywina Isaeli mahãdu-ò riwahinyre dori. Exidara Babilonia ribi Jerusalĕ hãwã-ò rareu heka ibutumy aõ rurumyrarehỹre tii reixitòenyre heka Babilonia iòlò-ò tii tamy riwahinyre, Exidara heka Deuxu idi raremy.
|
||
\v 7 Ijõ Isaeli mahãduõ tule ihemy rare, xiwena wahidỹỹduõ mahãdu, Levi mahãduõ, wiudu mahãduõ, ijòtòbòna idi itxeredu mahãduõ, Templo aõmysỹdỹỹdu mahãduõ. Kia bedeu heka rare Ataxexé iòlòna debò inatxi reurò beòrau Jerusalĕ-ò roirenyre.
|
||
\v 8 Kia beòra-dile agosto òtusi ahãdu, sideriòsò bedeu-ò ritehenynyrenyre.
|
||
\v 9 Exidara Babilonia ribi rexitare heka beòra tỹmyra iòraruna txuu heka behetxi ahãdu itxu òrarunamy (judeu bededỹỹnanamy) aõma òtusi ahãdu, isideriòsò Jerusalĕ-ò ritehemynyre heka kia inaubiòwa txuu. Exidara Deuxu idi raremyhỹ, Deuxu tebò-dilemy ridyre wahe.
|
||
\v 10 Exidara heka Deuxu bede ywina erydu rare tii heka inatyhytyhymy Isaeli mahãduò Deuxu bede ywina rybemy óbitina rierynatyhykemy idi riwisỹnymy rurumyraremyhỹ.
|
||
\s Exidara-ò Ataxexè tyyriti riwahinyre.
|
||
\v 11 Exidara xiwena wahidỹỹdu rare, tyyritidỹỹdumy tule Deuxu bede ywinamy rierytyhyre idi Isaeli mahãdu-ò rierynanymyrare. Exidara-ò iòlò Ataxexé kaa tyyriti iwesemy riwahinyre myy:
|
||
\v 12 “Ataxexé, ibutu iòlò ratyre, Exidara xiwena-ò, Deuxu biu wedu bede ywina bedeerydỹỹdu, adee ywinamy.
|
||
\v 13 My heka wiji kaa tyyriti-ki warybemy retidiwahãre Isaeli mahãduõ kakisỹdu mahãdu heka Jerusalĕ hãwã-ò roosekremy rurumyhỹkeki ixinamy awanamy roosekremy, xiwena wahidỹỹdu mahãdumy, Levi mahãdumy, mobo roosekeki rurumyhỹre heka ixinamy boibenyke.
|
||
\v 14 Jiarỹ waraybididu mahãdu wana arateònyrenyre heka Judá hãwã, Jerusalĕ hãwã ijòbisinyrenykemy taile aõbo aDeuxu bedeywina rybemy òbitimy tai rityhynyrenykremy.
|
||
\v 15 Tule heka adeereny rewahinyrenyre heka womati tỹrỹrỹhỹkỹ ura, womati tỹrỹrỹhỹkỹ wadeewimy rewahinyrenyre Deuxu-ò xiwenamy idi biwykemy Jerusalĕ- hãwã tii rasỹnymyhỹre-ò.
|
||
\v 16 Tulesỹ Babilonia womati tỹrỹrỹhỹkỹ ura, womati tỹrỹrỹhỹkỹ riwahinyrenyre heka ixinamy kai biwykemy, inyõ mahãdu tamywimy xiwenamy riwahinyrenyre, xiwena wahidỹỹdu mahãdu tamywimy riwahinyrenyre heka aDeuxu heto Templo-ò Jerusalĕ-ki roimyhỹre biwykemy.
|
||
\v 17 Kia womati tỹrỹrỹhỹkỹ rewahinyrenyre heka idi biwykemy bororeni riòre, budoeni hãbu riòremy aõna õna xiwenamy, vĩĩ, adỹỹ òbitimy biòwynykremy. Kia ibutumy heka xiwena tyre-ò aDeuxu heto Templo Jerusalĕ-ki roimyhỹre rewahinyre.
|
||
\v 18 Kia womati tỹrỹrỹhỹkỹ ura, womati tỹrỹrỹhỹkỹ rewahinyrenyre iuhe-di heka ixinamy idi biwinykemy adewimy, inyõ mahãdu tamywimy, Deuxudewimy biwinyke.
|
||
\v 19 kia womati heka aõna õna adee rewahinyrenyre aDeuxu heto Templo-ò idi raõmysỹdỹỹnykremy Deuxu Jerusalĕ-ki ratximyhỹre ikoki ibutu koki biwahinyke tai.
|
||
\v 20 Aõ ijõ rasiranykeki aDeuxu heto Templo-ò, aõtxilemy aõ burukeki heka iòlò nierumy bitakemy.
|
||
\v 21 “Jiarỹ Ataxexé iòlò heka, kaa tyyriti, nieru rerarenyre mahãdu-ò Eubaratésu bede-ò mahãdumy roire heka rewahinymyhỹre warybe myy: ‘Exidara xiwena wahidỹỹdu Deuxu biu wedu bede ywina bedeerydỹỹdu, aõbo tii ibutu rurumyhỹre ixinamy biwahinybenyke tamy.
|
||
\v 22 Tamy biwahinybenyke womati tỹrỹrỹhỹkỹ ura, 3.500 iutxe sõwe, 100 weriri tiriku-di sõwe, 100 hyna vĩĩ-di sõwe, 100 hyna adỹỹ-di, jiyra heka aõtxile sõwe biwahinybenyke.
|
||
\v 23 Òbitimy heka ibutu Deuxu biu wedu taheto Templo-ò rarybere wesemy biywinybemyke: kia aõkeki heka Deuxu deburena iòlò-ò, iòlò riòrereny-ò iiòlòna-ò tyre-ò kanakremy iòhãru heka raremy.
|
||
\v 24 Tule warybemy retadimyhhỹre heka Ibutu Deuxu heto Templo-ki rasỹnykre mahãdu heka xiwena wahidỹỹdu mahãdumy, Levi mahãdumy, wiudu mahãdumy, Ijòtòbòna idi itxeredumy, ijõ taile raõmysỹdỹỹkeki tahe sunierumy riwahinyõkemy, ibutu aõ iòwymy heka riòwynyõtyhy.’
|
||
\v 25 Kai Exidara, tahe aDeuxu bedeerynamy idi matxikremy inyõ heka wahisidỹỹdu mahãdu idi bitakemy Deuxu bede ywina erydurenykremy ibutu Eubaratésu mahãdumy iny mahãdu ridinodunyrenykremy. Bede ywinamy iny ibutumy bierynanykremy ibutu rieryõre mahãdu-ò tule.
|
||
\v 26 Inyõ aDeuxu bede ywina rybemy riòbynyõkeki, iòlò rybemy riòbynyõkeki heka rubumy ratxike, ada asureny ribi irehemy rasỹnykremy, iaõna õnareny heka iribi riwykemy ada ròtena-ki raloke.”
|
||
\s Exidara heka Deuxumy reàlàkre.
|
||
\v 27 Inynyrỹ iny labiereny Deuxu heka, beàlàmyhỹbenykre tiile heka iòlòwo-ò ruruna riwahinyre Deuxu heto Templo-ò awimy riywinykremy Jerusalĕ-ki.
|
||
\v 28 Jiarỹ heka idi raraykynyre timybo Deuxu heka taluuna-di wadi rare, tii riwarurudỹỹnyre, iòlò wadi ruxetòena-di rare, iòlò iraybididu tule awimy idi rare, hãbu mahãdu tule wimy wadee rarybemy roire tai heka Isaeli hãbu mahãdu heka rebutunyre tamyreny rarybere wanamy Jerusalĕ-ò rooserenykremy.
|
||
\c 8
|
||
\cl Cap 8
|
||
|
||
\s Jerusalĕ-ò Exidara wana roosere mahãdu inirenymy
|
||
\p
|
||
\v 1 Ataxexé bedeu Babilonia ribi wawana rooserenyre heka hãbu mahãdu tamahãdu tamahãdureny myy: Elioenai, filho de Zeraías, da família de Paate-Moabe, com duzentos homens; Secanias, filho de Jaziel, da família de Zatu, com trezentos homens;
|
||
\v 2 Bineasi, mahãdumy mahãdumy Jesõ heka rare; Itamá mahãdumy Danieli heka rare; Davi mahãdumy Hatusi heka rare;
|
||
\v 3 Sekania riòremy, Sakariasi mahãdu Barosi heka rare; 150 hãbu mahãdu sõwemy
|
||
\v 4 Baate-Moabe riòremy, Elioenai riòremy, Zeraíasi heka rare; 200 hãbu mahãdu sõwemy.
|
||
\v 5 Sekaniasi mahãdumy, Jaaziel mahãdumy, Satu heka rare tii wana, 300 hãbu mahãdu sõwemy.
|
||
\v 6 Adĩ mahãdumy, Jônatasi Ebede riòremy tii wana, 50 hãbu sõwemy.
|
||
\v 7 Elaõ mahãdumy, Jesaiasi, Ataliasi riòremy tii wana, 70 hãbu sõwemy.
|
||
\v 8 Sebatiasi mshãdumy, Sebadiasi, Mikaeli riòremy tii wana, 80 hãbu sõwemy.
|
||
\v 9 Joabé mahãdumy, Obadiasi Jeieli riòremy tii wana, 218 hãbu sõwemy.
|
||
\v 10 Bani mahãdumy, Selomite, Josibiasi riòremy tii wana, 170 hãbu mahãdu sõwemy.
|
||
\v 11 Bebai mahãdumy, Sakariasi, Bebaí riòremy tii wana, 28 hãbu sõwemy.
|
||
\v 12 Asikadé mahãdumy, Joanã, Hakatã riòremy, tii wana, 110 hãbu sõwemy.
|
||
\v 13 Adonikaõ mahãdumy, tii boho iònanamy ritehemynyre: Elibeleté, Jeieli, Semaiasi tii boho wana, 60 hãbu sõwemy.
|
||
\v 14 Bikibaí, Utaí, Sabudé tii boho wana, 70 hãbu sõwemy.
|
||
\s Exidara heka Levi mahãdu riòrynyrenykemy riteònyre.
|
||
\v 15 Jiarỹ iny mahãdu rebutunyre Aavaá bero iòhòmy, taile iny boho rorukurenyre inataõ txumy tai heka jiarỹ inyõ tamahãdu tamahãdureny idi retehere heka Levi mahãdu robiõre.
|
||
\v 16 Idi heka hãbu wedu mahãdumy retare Eliesé, Arieli, Semaiasi, Eunatã, Jaribé, Eunatã, Natã, Sakariasi, Mesulaõ, inatxi tyyritidỹỹdu tule retare Joiaribé, Eunatã, bedeery mahãdumy.
|
||
\v 17 Idi tii boho reteònyre Kasibiasu-ò Ido hãbu mahãdu wedumy reteònyre warybemy riwahinyre Templo idi aõmysỹdỹỹdu mahãdu-ò, kididyrenykemy waDeuxureny heto-òle idi raõmysỹdỹỹnykemy.
|
||
\v 18 Deuxudewimy heka didydenyde hãbu bedeerymy, Mali riòre mahãdumy, Levi riòremy, Isaeli riòre mahãdu, Serebiasi iriòrereny, iseriòrereny, 18 sõwemy;
|
||
\v 19 Hasabiasimy tii wana Jesaisi, Merari riòremy, iseriòreny wana, iriòrereny, sõwemy;
|
||
\v 20 Deuxu heto aõmysỹdỹỹdu roire tii boho heka ihetxiu Templo aõmysỹdỹỹdu riokore mahãdumy heka roire Levi mahãdumy roire, 220 sõwemy.
|
||
\s Renarehemy
|
||
\v 21 Idi heka Aaavá bero iòhò-ki ixỹ roire heka rekenarehenyrenykremy rarybere jiarỹ Deuxu koki rekenarehenyrenykremy, rekexitòenyrenykremy riwawiòhenanyrenykremy, awimy iny bededỹỹnanarenymy teysamy ratxikremy, wariòre boho tule reysamy ratxikremy, ibutu iny boho heka riteysanyrenykremy, ibutu iny hõrõreny awimy ratxikremy.
|
||
\v 22 Jiarỹ heka iòlò-ò reixitòenyõre sodadu wadireny ratxikremy ryy-dile wawanareny- di roikremy tamy reixitòenyõre, raixỹrure dori juhule riki jiarỹ tamy rarybera: “Deuxu inytybyreny tariòre mahãdu-ò idi itxeredu wityhy raremy, ibutu tamy reixitóenyre mahãdu-ò òbitityhymy riwahinyre; ihỹre heka ririre mahãdu-ò iyaranamy irurunamy ityrereny resemyhỹre dori.”
|
||
\v 23 Tai dori iny boho renareherenyre, Deuxu-ò reixitòenyrenyre tii riwarawynyrenyre dori.
|
||
\s Xiwena wahidỹỹdu mahãdu hõrõmy iwahidỹỹ.
|
||
\v 24 Idi heka waò inatxi reurò hãbu tyhy mahãdumy retare Serebiasi, Hasabiasi, iseriòrereny debòwiò sõwemy.
|
||
\v 25 Tamyreny rewahinyre aõwihikỹtyhy iòlò waDeuxureny heto-ò riwahinyre womati tỹyrỹrỹhỹkỹ ura, womati tỹyrỹrỹhỹkỹ idi iutxiereny reyrihira, tule iòlò iraybididu mahãdu aõna riwahinyrenyre, ijõ iòlò riòrereny aõ riwahinyrenyre tule iutxie reurihira, Isaeli mahãdu aõna ibutu riwahinyremy.
|
||
\v 26 Ijõ 22 mili womati ura iutxie rewahinyre Serebiasi-ò, Hasabiasi-ò, iseriòrereny-ò, 100 womati aõna õnamy 70 iutxie wesemy, 3.500 womati tỹyrỹrỹhỹkỹmy iutxiemy tebòreny-ò rewahinyre
|
||
\v 27 tule ijõ 20 behyna womati tỹrỹrỹhỹkỹ debò inataõ reurò ieremy iutxie wesemy, inatxi womati borõsi, kia womati tỹyrỹrỹhỹkỹmy wihikỹ wesemy.
|
||
\v 28 Irahu-di tamyreny rarybere: “Kai boho aõ ribi texihitinytenyte Deuxu-ò maõmysỹdỹỹkemy, alabiereny Deuxu-ò. Kaa womati ura tỹyrỹrỹhỹkỹ sõwe, womati tỹyrỹrỹhỹkỹ sõwe aderenywimy tewahinytenyte heka tule kia Deuxu-ò rehitxinyrenyre tamy.
|
||
\v 29 Idi biywinybenybe Templo-ò biwybenykemy. Deuxu Templowo-ò biwybenykeu heka iutxiemy biurihike idi xiwena wahidỹỹdu mahãdu-ò biwahinybenyke, Levi mahãdu-ò, Jerusalĕ-ki Isaeli hãbu wedu mahãdu-ò biwahinybenyke.
|
||
\v 30 Idi tahe xiwena wahidỹỹdu mahãdu, Levi mahãdu, kia womati ura tỹyrỹrỹhỹkỹ, womati tỹyrỹrỹhỹkỹ DeuxuTemplo Jerusalĕ-ò ridyrenykremy.
|
||
\s Jerusalĕ-ò ritehemynyrenyre
|
||
\v 31 Ixỹ mahãdu heka Ava bero ribi rexitarenyre heka, Beòra òraruna ahãdu-di waò inatxi reuròna txuu, Jerusalĕ-ò roirenykremy; Deuxu iny wanareny roimyhỹre iny òludu mahãdu ribi riwaijerenyre kia ryy-di inyõ itxena mahãdu ribi tule.
|
||
\v 32 Jerusalĕ-ò retehemynyreny heka tai inataõ txu-di ele rehynyrenyre tai.
|
||
\v 33 Irahudi heka waDeuxureny heto, kia womati ura tỹyrỹrỹhỹkỹ, womati tỹyrỹrỹhỹkỹ, womati ijõ ibutumy rewahinyrenyre xiwena wahidỹỹdu Meroté-ò Uriasi riòremy; tii wanaroire heka Eleasá, Bineiasi riòremy, ijõ Josadabé, Jesua riòremy, ijõ Noajiasi, Binui riòremy, tii boho levita mahãdumy roire.
|
||
\v 34 Idi heka ibutu womati ura tỹyrỹrỹhỹkỹ, womati tỹyrỹrỹhỹkỹ, womati ijõ ibutumy idi rautxienyrenyre heka riurihirenyre idi ibutumy ròrytinyrenyre tyriti-ki.
|
||
\v 35 Ibutu Babilonia ribi dirahude mahãdu heka Isaeli Deuxu-ò raxiwenyrenyre, Isaeli mahãdumy waò inatxi reurò bororeni sõwemy riwahinyrenyre, 96 budoeni hãbu sõwemy, 77 budoeni riòre sõwemy, òraruna òwymy, waò inatxi reurò watxini sõwe; ibutumy xiwenamy risõrenyre Deuxu-ò riwahinyrenyre.
|
||
\v 36 Irahudi heka iòlò-ò rybemy riwahinyrenyre, Eubaratésu hãbu wedu mahãdu-ò tule; tii boho heka Deuxu heto Templo idi riywinykremy riwiòhenanyrenyre.
|
||
\c 9
|
||
\cl CAP 9
|
||
|
||
\s Exidara ixitòedỹỹnamy
|
||
\p
|
||
\v 1 Kia rahudi heka hãbu mahãdu wedu boho wadee raryberenyre: “Isaeli mahãdu heka hãbu bohomy, xiwena wahidỹỹdu mahãdumy, Levi mahãdumy òbitimy aõkõ roimyhỹrenyre, tii boho heka inysu wera ludu mahãdu ribile heka rexihitxinyõtyhy, isuriokoreny deàlànamy wesemy riwinyrenyre heka iwese kana mahãdu isu riokoreny deàlànamy riwinyrenyre, kia Heteu mahãdu isu riokoreny deàlànamy riwinyrenyre, kana mahãdu isu riokoreny deàlànamy riwinyrenyre, Bereseu mahãdu isu riokoreny deàlànamy riwinyrenyre, Sebuseu mahãdu isu riokoreny deàlànamy riwinyrenyre, Amõ mahãdu isu riokoreny deàlànamy riwinyrenyre, Ejitu mahãdu isu riokoreny deàlànamy riwinyrenyre, Amoheu mahãdu isu riokoreny deàlànamy riwinyrenyre ibutu kia bede mahãdu surioko deàlànamy riwinyrenyre ibinamy kia rare.
|
||
\v 2 Tii boho tule kia mahãdu hawyyreny-di raàdònyrenyre tule iriòrereny riwahinyrenyre kia mahãdu riòrereny-di raàdònykremy kia wese heka Isaeli mahãdu kia mahãdu wana riuriurinyrenyre. Hãbu wedu mahãdu tule iweselemy ibinamy riwinymyhỹre!”
|
||
\v 3 Kia rybemy raholareu heka watyy reykare, warade resihere, waijòsiri tule resihere bede-ò ranyre heka bedewotyhymy dori.
|
||
\v 4 Iu heka ibutu Isaeli Deuxu rybemy rityhytyhynyre mahãdu heka idi rirurawonyrenyre wawana rexibutunyrenyre Isaeli mahãdu òraruna òraruki heka wawana rabedewonyrenyre. Jiarỹ heka sõwemy bedewonyre, sõwemy wabedewo hyky hyky bederatxioronymy.
|
||
\v 5 Idi bederatxiorou heka xiwena wahidỹỹu, jiarỹ lamymy rỹire, watyy iykamy roimyhỹre tatiwomy jiarỹ rare wadebò biu-ò reteòsinyre waDeuxu-ò, Wanynyrỹ-ò
|
||
\v 6 idi reixitòenyre: “Waha Deuxu, jiarỹ sõwemy raixỹrumy rỹimyhỹre ako-ki sõwemy raixỹrumy rỹimyhỹre waòrarunareny òraruki, iny òrarunareny rasõwere iny tyrereny-ki roimyhỹre tai wiji waòrarunareny waDeuxureny ribi riwomyhỹre.
|
||
\v 7 Iny labiereny bedeu ribile heka iny òrarunarenymy sõwe sõwemy rỹimyhỹre, waòrarunareny inytyrereny-ki roimyhỹre heka tai iny òrarunareny òraruki heka iny iòlòreny mahãdu, xiwena wahidỹỹdu mahãdu iòlò su iwitxira mahãdu redyrenyra dori, wetxumy riwadyrenyre, iny tii boho rirubunyrenyre, waõna õnareny ribòhònyrenyre, iòlò koki, bede iwitxira mahãdu koki heka wiji iny boho wadireny risinymyhỹre, umyreny ribuarenyre.
|
||
\v 8 Wiji tahe Inynyrỹ Deuxu heka aruxetòena-di wadireny tate, tai wiji heka iny boho wetxu ribi rihenyre mahãdu heka inysureny-ò tedyta kaa Deuxu heto-ki iny boho roire heka tai wiji heka iny bededỹỹnanareny awimy tewinytemyhỹte wadeereny.
|
||
\v 9 Wetxumy inyboho roire, taile tewariõhyyte Pesia iòlò mahãdu wadireny raruxetòenykremy tewinyte dori tai aheto Templo aritỹmyranykremy riwateònyrenyre, kia juhuu ribòhònyre heka ixyby Judásu-ki, Jerusalĕ-ki awilemy ixỹ mahãdu roire.
|
||
\v 10 Tai dori wiji timybo araryberenykre kiamy inydeereny rotỹỹnyre heka arybemy reòbyõrenyre-ki.
|
||
\v 11 juhule heka arybedu mahãdu heka riwabedeerynanyrenyre. Tii boho raryberenyre heka kiasu iny boho idi rirònyrenykremy heka taile inyõ sỹdu mahãdu heka òrarudureny sõwemy roire, tii boho heka ixurenymy roiremyhỹ taòrarunareny-di su ribinabinanyrenyre dori.
|
||
\v 12 Arybedu mahãdu heka raryberenyre heka tiu wiwanareny raàdònyrenyõtyhy. Tulesỹ tii boho wana wimy ratximyhỹrenyõtyhy, ywinamy idireny ratximyhỹrenyõkemy, tai dori awimy rikibròrenykemy, awimy rikiroxirenykemy, tai dori wariokorereny-ò kaasu idi reuròrenykremy tuhyymy.
|
||
\v 13 Kia ibinabinamy rewinyrenyre irahudi heka waòrarunareny òraruki heka, kai aõhõkỹdỹỹnanamy inydereny tesỹnyte, waòrarunareny òraruki heka tesỹnyte inytyrereny-ò ihỹre heka sõwe aõkõ inydereny aõhõkỹmy tesỹnyte, iny boho irulemy roimyhỹre dori.
|
||
\v 14 Timybohe wiji ixyby arybemy aroholaõkremy, kaa ibina bina riwinymyhỹre mahãdu wiwanamy raàdònyrenykremy. Kiamy rikiwinyrenykeki heka aykaranamy ranihikỹkremy inydereny tai iny idi rahukemy tiu iny idi ratxiõtyhy, hena ihõõre.
|
||
\v 15 Inynyrỹ Isaeli Deuxu, òbitityhy heka tate, ihỹre heka iny irumy ratximyhỹre wiji. Akokile rarybemyhỹre heka iny boho heka òrarudumy roimyhỹre wiji. Akoki heka iny boho idi ratxiõtyhy bohe rare.
|
||
\c 10
|
||
\cl CAP 10
|
||
|
||
\s Isaeli mahãdu taòrarunarenymy Deuxu-ò relyyrenyre.
|
||
\p
|
||
\v 1 Templo koki Exidara tatiwomy reixitòenymy roimyrareu heka Isaeli mahãdu òrarunamy relyymyraremy tahe hãbu mahãdu, hawyy mahãdu heka idi rirurawonymy rexibutunyrenyre. Tii boho rahinymyroiremyhỹ, robumyroiremyhỹ sõwemy.
|
||
\v 2 Iu heka Sekaniasi, Jeieli, Elaõ mahãdumy tii Exidara-ò rarybere:_Iny boho Deuxu-ò raòrarunyrenyre heka Hawyy iwitxira mahãdu wana dori raàdònyrenyre, Deuxu rieryõre mahãdu wana raàdònyrenyre. Ihỹre heka raròsòna Isaeli mahãdu-ò ijõdiremy.
|
||
\v 3 Wijile heka Deuxu koki heka rikiteònyrenykremy hawyy suwitxira mahãdu, tariòre boho wana rikiteònyrenykre. Arybemyle ariòbynyrenykre, Deuxu rybeòby mahãdu rybemy ariòbynyrenykre. Tai dori Deuxu ywina rybe wesemy rikiwinyrenykre.
|
||
\v 4 Myita! kaile heka kaa rybemy marybeke ibutu iny-ò. Awana heka ararekremy heka. Bexirurudỹỹmyke!
|
||
\v 5 Tai heka Exidara lamymy rỹire xiwena wahidỹỹdu mahãdu wana, Levi mahãdu wedu wana idi riteònyrenyre heka iwese Sekaniasi rarybere iwesemy riwinyrenykremy. Idi heka riwinyrenykremy rarybetyhyrenyre.
|
||
\v 6 Kia rybe rahudi heka Exidara Templo ribi rexitare heka Joanã-ò rare, Eliasibé riòremy. Tai heka idi roire heka rabedewomy roire heka ibutu Babilonia ribi rooserenyre mahãdu iòrarunareny òraru-ki rỹsỹna rirasỹõhyyre heka, bemy riõõhyyre heka sõwemy rabedewore dori.
|
||
\v 7 Iribi heka Judá mahãdu-ò Jerusalĕ mahãdu-ò ribedeerynanykremy raryberenyre ibutu Babilonia ribi rooserenyre mahãdu heka rexibutunyrenykremy Jerusalĕ hãwã-ò.
|
||
\v 8 Tulesỹ raryberenyre heka inyõ kidirahuõkeki heka inataõ txu-di heka inyõ dehemynyõkeki heka ihetoreny heka iribi ritarenykremy, dehemynyde mahãdu heka Isaeli mahãdu ribi imahãdureny heka ixãwikemy raryberenyre dori.
|
||
\v 9 Inataõ txuu idi heka, debò inaubiòwa ahãdu-di wawiò txu-di heka, ibutu Judá sỹdu mahãdu, Bejamisỹdu mahãdu, Jerusalĕ-ò ritehemynyrenyre Templo ube-ki rexibutunyrenyre. Iu heka biu sõwemy roare, Isaeli mahãdu heka ramytatarenyre brebumy.
|
||
\v 10 Idi heka Exidara lamymy rỹira idi rarybere: “Waijoireny òbitimy aõkõ toitenyte tai Isaeli mahãdu iny boho heka waòrarunyreny rasõwerenyre dori hawyy suwitxira mahãdu wana taàdònytenyte tai dori iny òrarunareny rasõwerenyre dori.
|
||
\v 11 Katahe wijihe ararybekre, Inynyrỹ-ò iny labiereny Deuxu-ò aòrarunareny belyybenyke, Tamywimy wijihe biwinybenyke. Inysureny iwitxirasu mahãdu ribi bexitabenyke, hawyy iwitxira mahãdu ibutumy biteònybenyke ahawyyreny biteònybenyke.”
|
||
\v 12 Tai iny ibutumy iteremy raryberenyre: _Rikiwinyrenykre! Ibutumy Inynyrỹ rarybemyhỹre heka rikiwinyrenykre heka!
|
||
\v 13 Ihỹre heka iny mahãdu rasõwerenyre dori biu sõwere wiji, kaa ahanamy ixỹ roire-ki tahe isira heka rare. Wijityhylemy ariwinyrenykremy heka riòbynyõra wiji, iny òrarunareny rasõwere-ki wahe.
|
||
\v 14 Ixinamy iny wedureny mahãdu heka Jerusalĕ-kile rarirenykre iribi heka inyõ suwitxira hawyy wana roire heka itxu bitidikemy, kia txu heka tahãwã wedu mahãdu wana, inyõ tahawyy wana dirahudenyde wahisidỹỹdu mahãdu wana tai ixiery Deuxu yarana waribireny rakemy.
|
||
\v 15 Awire heka rahareny kia rybemy tahe dera mahãdu heka moma Jonatasi, Asaeli riòremy, Jaseiasi, Tikibá riòremy, Mesulã, Sabetaí, kia levi mahãdu raremy kia teramy rearenyre.
|
||
\v 16 Babilonia ribi dirahude mahãdu heka kia rybemy riòbynyrenyre. Tai Exidara xiwena wahidỹỹdu heka hãbu mahãdu wedumy ritare Isaeli mahãdu mahãdumy inirenymy rirytinyrenykremy. Kia hãbu mahãdu wedumy mahãdu sohoji sohojimy ijobisimy riòrarunyre, kiau heka rare waò sohoji reurò ahãdu-di rare.
|
||
\v 17 Idi inataõ ahãdu-di rijerenyre heka ibutu hawyy iwitxira mahãdumy wana hãbumy roira heka rare.
|
||
\s Hawyy suiwitxiraludu mahãdu wana raàdònymy roire mahãdu.
|
||
\v 18 Myy inireny heka roire tamahãdu tamahãdumy: Xiwena wahidỹỹdu: Jesua mahãdu Jeosadake riòremy, iseriòrereny mahãdumy: Maaseiasi, Eliesé, Jaribé, Kedaliasi.
|
||
\v 19 Tii boho heka inatyhytyhymy raryberenyre tahawyyreny riteònyrenykremy, iòrarunareny òraruki heka budoeni hãbu xiwena-ò riwahinyrenyre.
|
||
\v 20 Imehé mahãdu heka: Hanani Sebadiasi.
|
||
\v 21 Harí mahãdu heka: Maaseiasi, Eliasi, Semaiasi, Jeieli, Usiasi.
|
||
\v 22 Pasu mahãdu heka: Elioenai, Maaseiasi, Ismaeli, Netaneli, Josabadé, Elasá.
|
||
\v 23 Levi mahãdu: Josabadé, Simeí, Kelaias, Betaiasí, Judá, Eliesé.
|
||
\v 24 Wiudu mahãdu: Eliasibé. Deuxu heto Templo ijòtòbòna idi itxeredumy: Salữ, Telĕ, Uri.
|
||
\v 25 Ijõ mahãdu: Barosi mahãdu: Hamiasí, Jesiasí, Maukiasí, Miamĩ, Eleasá, Maukiasí, Benaiasí.
|
||
\v 26 Elaõ mahãdu: Mataniasí, Sakariasí, Jeielí, Aiji, Jerimoté, Eliasi.
|
||
\v 27 Satu mahãdu: Elioenaí, Eliasibé, Mataniasí, Jerimoté, Sabadé, Asisá.
|
||
\v 28 Bebaí rmahãdu: Jeoanã, Hananiasí, Sabaí, Atlaí.
|
||
\v 29 Bani mahãdu: Mesulã, Maluké, Adaiasí, Jasubé, Seaú, Jeremoté.
|
||
\v 30 Baaté-Moabé mahãdu: Ajina, Kelaú, Benaiasí, Maaseiasí, Mataniasí, Besaleú,Binuí, Manasesí.
|
||
\v 31 Harĩ mahãdu: Eliesé, Josiasi, Maukiasí, Semaiasí, Simeaõ.
|
||
\v 32 Bejamĩ, Maluke, Semariasí.
|
||
\v 33 Hasữ mahãdu: Matenaí, Matatá, Sabadé, Elibeleté, Jeremaí, Manasesí, Simeí.
|
||
\v 34 Baní mahãdu: Maadaí, Ãraõ, Ueú,
|
||
\v 35 Benaiá, bedeiasí, Keluí,
|
||
\v 36 Baniasí, Meremoté, Eliasibé,
|
||
\v 37 mataniasí Matenaí, Jaasaí,
|
||
\v 38 Binuí mahãdu: Simeí,
|
||
\v 39 Selemiasí, Natã, Adaiasí,
|
||
\v 40 Makinajibaí, sasaí, Saraí,
|
||
\v 41 Asareelí, Selemiasí, Semariasí,
|
||
\v 42 Salữ, Amariasí, José.
|
||
\v 43 Nebo mahãdu: Jeieli, Matxitxiasi, Sabadé, Sebiná, jadaí, Joeli, Benaiá.
|
||
\v 44 Kaa hãbu mahãdu heka ibutumy hawyy iwitxira mahãdu wana raàdònyrenyre, ijõ tule heka rariòrenyrenyre tiiboho wana.
|