kpj_reg/14-2CH.usfm

\id 2CH
\ide UTF-8
\h 2 Korõnika
\toc1 2 Korõnika
\toc2 2 Korõnika
\toc3 2ch
\mt1 2 Korõnika

\c 1
\cl Capítulo 1

\s Salomaõ Deuxu-ò bedeerynamy reixitòenyre (1 Iòlò Tyyriti mahãdu 3.4-15)
\p
\v 1 Salomaõ heka Davi riòre inatyhytyhymy Isaeli iòlòmy ralore, Deuxu deysana tamy riwahinyre, sõwemy iòlònamy rirurudỹỹnyre.
\v 2 Soldado dinodu mahãdu-ò heka Salomaõ rarybere, Isaeli wedu mahãdu-ò, Isaeli tasỹmahãdu tasỹmahãdu wedumy, tahe isaeli mahãdu ibutu-ò Salomaõ rariòwyde heka ibutu rieryrenykremy
\v 3 Xibeaõ hãwã-ò tii wana roirenykremy. Kia hãwã heka Deuxu tyy heto rỹimymyhỹre-ò heka Deuxu-ò reàlàrenykremy. Kia Deuxu tyy heto-kile heka Deuxu rexideòsinamy roiremyhỹ, Moisesi bederahy-ki tai riwinyre.
\v 4 Juhuu heka Davi Kiriaté Jeraῖ ribi heka òwòru wodỹỹ tỹrỹrỹhỹkỹ (Arka) Jerusalẽ-ò Davi riwyre heka tai tyy heto riwinyre òwòru wodỹỹ-ò.
\v 5 Tule Kiriaté Jeraῖ Deuxu tyy heto koki heka xiwena deòtena borõsi-di roire Kia Uri riòre heka Besaleu iwidỹỹdu rare, Huữ riokoremy taile heka Salomaõ isaeli mahãdu Deuxu-ò reàlàmy roiremyhỹre.
\v 6 Iu heka xiwena deòtena borõsi-di ityre-ki heka, iròdu sõwe Deuxu-ò Salomaõ riwahinyre taile heka risõtyhyre ibutumy.Iròdu sõwe heka rare, Milimy sõwe xiwena-ò Deuxu-ò Salomaõ riwahinyre.
\v 7 Idi ruumy heka Salomaõ-ò Deuxu rarybere:_ Salomaõ, aõbo adee ariwahinykremy?
\v 8 Deuxu-ò Salomaõ rirawyònyre:_ Kai sõwemy aluuna nihikỹ-di waha Davi-ò tuhyymy idi atxiteri tule teròwymy iòlòmy tewasỹnyte.
\v 9 Tai heka iwesemy waha-ò tarybete heka tuukre, iny sõwehekỹ sunõde wesemy heka iòlòmy tewasỹnyte dori.
\v 10 Myy heka adee arexitòenykre myy bedeerynatyhymy, aõerymy myy tahe wadee bidiwahinykre kaheka Isaeli mahãdu sõwe sõwe rare bedeerynatyhy-di aridinodunyrenykremy. Kiaõkeki tahe timybo iwedurenymy aratxikremy.
\v 11 Tai Salomaõ-ò Deuxu rarybere: Awirehe, bedeerytyhymy teixitòenyte heka awire teixitòenyte, kamahãdu, wamahãdumy jiarỹle iòlòmy arasỹnyre tahe aõerymy teixitòenyte kamahãdu aõery-di dinodumy matxikemy heka awimy teixitòenyte dori, aõnaõnawiwihikỹmy aõkõmy teixitòenyte, ahõrõwihikỹmy aõkõmy teixitòenyte, iny mahãdu umy riwowydynykemy aõkõmy teixitòenyte, aòludu mahãdu rurukemy aõkõmy teixitòenyte tule kabede-ki nihikỹmy abededỹỹnanamy ratxikemy aõkõmy teixitòenyte.
\v 12 Salomaõ-ò Deuxu rarybere:_Awimy tarybete heka, iwitxirake aõkõmy tarybete kiamy tarybete heka:” Isaeli mahãdu sõwemy rare-ki heka bedeerynatyhy-di aridinodunyrenykremy” kiakemy teixitòenyte-ki heka ariwahinykre heka adee bedeerynatyhy, aõ bedeerytyhy. Tulesỹ adee ariwahinykre aõna õna wiwihikỹ, ahõrõwihikỹmy, umy reàlànamy, ariwahinykre adee. Mytahe awese ihõõ iòlò mahãdu ribi juhu awese ihõõre ahewoludu heka tule iòlò mahãdu ribi awese ihõõkre my tahe rarybere Jiarỹ.
\v 13 Tai tahe Jibeaõsu-ki heka Deuxu heto roire deàlàna ribi Salomaõ rexitare Jerusalẽ-ò roosere isaeli mahãdu ridinodunykemy.
\s Salomaõ iaõna õna wiwihikỹ. (1 Iòlò mahãdu Tyyriti 6.1-3)
\v 14 Salomaõ heka ributunyre 1.400 tewe sõwe, 12 mili awaru sõwe alòremy tai ratxikemy. Idi hãwã hãwã-ò riubỹtỹynyre iuhe tahe Jerusalẽ hãwã-ki ririra.
\v 15 Jerusalẽ-ki iòlòmy rareu heka womati tỹrỹrỹhỹkỹ, womati iura tỹrỹrỹhỹkỹ, mana wihikỹtyhy sõwe sõwe ijõdire, iwese seduru òwòru bederahy-ki sõwe wese, fiku òwòru sõwe Judásu-ki sõwe wese.
\v 16 Salomaõ deòdu mahãdu ijõ awaru Musirisu ribi, Silisiásu ribi ridymy roiremyhỹ.
\v 17 Ejitu ribi alòre tewemy riwyroiremyhỹ. Idi heka heteu mahãdu-ò, Síria mahãdu-ò idi rohonymy roire tewe sohoji iòwymy tahe 600 womati tỹrỹrỹhỹkỹmy iutxiemy, awaru sohoji òwymy tahe 150 womati ura tỹrỹrỹhỹkỹ iutxiemy.
\c 2
\cl Capítulo 2

\s Salomaõ Iraõ wana wii ritobinyre 1Iòlò mahãdu 5.1-11; 7.13-14)
\p
\v 1 Davi heka Deuxu-ò heto deàlànamy riwinykremy idi rõhõtinyre, iheto tule tamy riwinykremy.
\v 2 Tai heka riòwynyre heka 70 mili hãbu sõwe aõna õna wydydumy, ijõ 80 mili sõwe heka mana bòhòdỹỹdumy hãwãlo-ki idi raõmysỹdỹỹkremy. Aõmysỹdỹỹdu mahãdu itxeredumy heka 3.600 hãbu sõwe risỹnyre.
\v 3 Iribi tahe, Tiro iòlòmy Iraõ-ò rybemy riteònyre myy: “Kai heka Waha-ò seduru òwòru idi tahonyte, taheto riwinykremy, wadee tule idi bòhònyke.
\v 4 WaDeuxu heto deàlànymy ariwinykremy. Taile heka heto brebunamy heka rarekre, xiwenamy tai arisõrenykremy, xiwena lỹrenamy arisõrenykremy Deuxu-ò deàlànamy ariwahinyrenykremy, orotxu brebuna tuhyy ariwahinyrenykremy. Taile heka ibutu ruumy, ibutu txioromy iròdu iródumy ariwahinyrenykremy, rikisõrenytyhymy Deuxu-ò; sabadu txuu tule iwesemy rikiwahinyrenykremy, ahãdu tỹmyra raryỹna, ijõ raryỹna tule Inynyrỹ waDeuxureny-ò ariwahinyrenykremy. Rikiwinyrenykremy tiemy.
\v 5 Deuxu heto heka lahinatyhyre ariwinykremy, waDeuxureny ibutu surioko mahãdu ribi ratyremy.
\v 6 Deuxu heka niỹtyhyre heka biuwetyy-ki ròbyõtyhy timybo heka Templo heto inyõ riwinyke heka? Jiarỹ aõ aõkõ jiarỹ rare hetowihikỹ ariwinykemy tamy. Tai dori heto xiwenamy ariwinykemy tamy deàlànamy ariwahinyrenykemy.
\v 7 Tai dori hãbu womati tỹrỹrỹhỹkỹ widỹỹ erymy biditeònyke wadee, ibutu aõ erydumy heka womati ura tỹrỹrỹhỹkỹ widỹỹ ery, borõsi womati widỹỹ erymy, womati tyhy widỹỹ ery; aõ tykymy widỹỹ erymy, budoini sira widỹỹ ery, púrpura, isòmy, tỹremy widỹỹ erymy, òwòru ritinamy widỹỹ erymy. Tii Judásu-ki idi raõmysỹdỹỹkremy Jerusalẽsu-ki heka aõery waõmysỹdỹỹdu mahãdu heka idi raõmysỹdỹỹkremy kia boho heka waha Davi heka ritarenyre idi raõmysỹdỹỹkremy.
\v 8 Aõmysỹdỹỹdu mahãdu heka òwòru eresudu ery heka roiremyhỹ reeryrahe; tai dori Libanusu ribi seduru òwòru wadee bidiwyke, pinho òwòru tule, sãdalu òwòru tule. wadeòdureny adeòdureny wana idi raõmysỹdỹỹrenykremy,
\v 9 tii boho heka òwòru sõwe sõwe idi riywinyrenykremy kia heto, Templo nihiỹtyhy ariwinykremy, wihikỹ tyhyre dori.
\v 10 Aõmysỹdỹỹdu mahãdu heka iòwyrenyre heka: òwòru eresudu heka triku 2.000 iutxie sõwetyhy ariwahinykre, sevada 2.000 iutxie sõwe, vῖῖ tahe 400 mili lituru sõwe, adỹỹ tahe 400 mili lituru sõwe, kie”
\v 11 Iraõ heka Salomaõ irawyònamy tyyriti riteònyre: “Inynyrỹ, Deuxu tamahãdureny luumyhỹre tai dori iiòlòmy arasỹnyre dori.
\v 12 Wowydyna Deuxu-ò, Isaeli Deuxu-ò, biu bede widỹỹdumy! Wowydyny Deuxu-ò, tii heka Davi iòlò-ò riòre bedeery riwahinyre bedeerytyhymy, ywimy nodure tii taheto riwinyke tahe Deuxu-ò Templo riwinykremy.
\v 13 Jiarỹ Iraõ adee ariteònykre, tii heka aõ erydu wihikỹtyhy rare.
\v 14 Ise tahe Dã mahãdu heka rare, tyby tahe tiru hãwã mahãdu heka rare. Tii heka tyky aõery ibutu aõ erydumy heka womati ura tỹrỹrỹhỹkỹ widỹỹ ery, borõsi womati widỹỹ erymy, womati tyhy widỹỹ ery; aõ tykymy widỹỹ erymy, budoeni sira widỹỹ ery, púrpura, isòmy, tỹremy widỹỹ erymy, òwòru ritinamy widỹỹ erymy tule. Ibutu aõ widỹỹmy tamy beixitòenyke heka rierymyhỹre. Tii aõmysỹdỹỹdu mahãdu wana raomysỹdỹỹkre, tule Davi aõmysỹdỹỹdureny wana raõmysỹdỹỹkre. Boo heka Davi heka inywi wihikỹtyhy heka wadee rare.
\v 15 Adee arexitòenykre triku, sevada,vῖῖ, adỹỹ kai tarybeta heka biditeònyke wadee.
\v 16 Libanu òwòru heka ibutu adee awire ariororenykre. Òwòru iyere nihiỹ heka ariwyrenykre bero ribile ariwyrenykre heka. Kia òwòrureny-di heka hãwò rikinyrenykre kia-dile berohokỹ ribile ariwyrenykre Jobésu-ò. Jobésu ribile heka kai bióryke heka Jerusalẽ-ò”
\s Deuxu heto (Templo) Salomaõ riywinyre (1 Iòlò mahãdu Tyyriti 5.13-16)
\v 17 Salomaõ heka ibutu su iwitxira mahãdumy roire tai idi rariare Isaeli sỹdu mahãdumy, iwese davi riwinyre juhuu. Su iwitxira mahãdu heka 153mili.600 suiwitxra mahãdu sõwe.
\v 18 Tai Salomaõ su witxira mahãdu heka 70 mili sõwe rihitxinyre aõna õna wydydumy, 80 mili sõwe heka mana bòhòdỹỹnamy, 3mili 600 sõwe heka aõmysỹdỹỹdu wedumy risỹnyrenyre heka.
\c 3
\cl Capítulo 3

\s Deuxu Heto (Templo) Widỹỹna (1 Iòlò mahãdu Tyyriti 6.1-30)
\p
\v 1 Jerusalẽ hãwã, Muriá hãwãlò-ki heka juhuu Davi-ò Deuxu rexitỹnyre taile Salomaõ Deuxu heto Templo riwinyremy riòrarunyre kia Araunásu-òle Davi ritare, tiriku risurusurunyre kia Arauná, Jebuseu mahãdu wedumy.
\v 2 Iu Salomaõ Isaeli mahãdu inaubiòwa beòramy ridinodunyre aomy inatxi ahãdumy bede riere iribi inatxi txuumy rare tai Deuxu heto,Templo widỹỹ riòrarunyre.
\v 3 Deuxu heto, Templo imanamy heka 27 urihixina rehemy ijõ 9 urihixinamy roire iwese Deuxu heto juhu tyky heto urihixina wesemy heka rare.
\v 4 Deuxu heto rirònyre iribi heka 9 urihixinamy biu-ò tule 9 urihixinamy iwebese-ó aomy iwo-ki tule urihixinamy wiwesere womati tỹrỹrỹhỹkỹ-di rihetynyre.
\v 5 Deuxu heto, Templo heka pῖῖ òwòru womati tỹrỹrỹhỹkỹ-di rihetynyre, tai òwòru-ki rirytinyre horeru deseῖ-di, nõbo deseῖ-di awihikỹmy. Kohẽtxi tule riwesenanyre deseῖ-di.
\v 6 Deuxu heto Templo raruxeranykremy Salomaõ riwinyre, mana wiwihikỹ-di womati tỹrỹrỹhỹkỹ-di heka riwinyre tahe Bahabῖsu ribi kia aõna õna diwyde.
\v 7 Deuxu heto Templo wo-ki heka òworu imynana womati tỹrỹrỹhỹkỹ idi rihetynyre, tule ijòtòbòna imynana, hetoweti, janela imynanamy, hetoweti-kile heka kerubῖ, ỹju wedu mahãdu, deseῖ-di itxeremy riwinyre tai.
\v 8 Deuxu heto wotyhy brebutyhy rare iwo-ki heka debò inataõ reurò heka urixixinamy rare, tahe debò inaubiòwa urihixinamy irarie heka rare kia wese heka Templo urihixinamy roikremy. Kia Templo wotyhy kia brebutyhy rare heka hetoweti 20 mili iutxie sõwe womati tỹrỹrỹhỹkỹ-di rihetynyre iwotyhy-ki.
\v 9 Breku womati tỹrỹrỹhỹkỹ idi rihetynyre heka sohoji kilo eremy iujamy ratyremy iutxie. Biu-ki heka ijõ hetoweti tule womati tỹrỹrỹhỹkỹy idi rihetynyre
\v 10 Salomaõ riteònyre inatxi ỹju kerubῖ ritxoo wese riwinykremy, womati tỹrỹrỹhỹkỹ-di rihetynykremy, Deuxu heto wotyhy brebutyhy rare iwo-ki heka inatxi ỹju kerubῖ ritxoo wese kia-ò ritidikremy.
\v 11-12 Kia inatxi ỹju kerubῖ ritxoo heka tee inatximy, tee sohoji sohoji 20 urihixina 25 iujamy ratyremy irehe sõwe. Inatxi ỹju kerubῖ heka itee sohoji sohoji inatxi ijõdire. ijõdire 20 kia ỹju kerubῖ inatxi heka tee-di riwòmyhỹre, hetowetihòkỹle ròròmy. Hetowo wetya-ki iteereny widee ròròmy debò inaubiòwa reurò urihixinamy ijõdire.
\v 13 Deuxu heto wotyhy-ki inatxi ỹju kerubῖ ritxoo heka lamymy rỹimyhỹremy, idi retehemy roiremyhỹ iwo brebuna tyhy-ò.
\v 14 Templo wotyhy brebutyhy tyky rareasanamy riwinykremy Salomaõ riteònyre. Kia rareasana tykyurahakỹ, budoeni sira tỹre-di riwinyre, tyky isò, tyky isòhòkỹ, tule kia tyky rareasanamy heka ỹju kerubῖ iretydynamy tai riwinyre.
\s Hetoti inatxi (1 Iòlò Tyyriti 6. 1-30)
\v 15 Iòlò heka inatxi hetoti riwinykremy riteònyre, kia hetoti heka 15 urihixina heka biu ribi iere iuja irehemy ratyremy Deuxu heto weijàti-ki. Hetoti sohoji sohoji imynyna ijõdire inatxi urihixina iuja irehe ratyre.
\v 16 Hetoti tyre-ki heka kohētxi womati imynana tai deseῖ-di roire tule bederaty homã womati wesemy 100my sõwe deseῖ-di roire.
\v 17 Deuxu heto Templo imynydu tule tako ròtena ijõdire irati iraludu tahe hetoti iraru-ò roire heka Jakῖ inire ijõ hetoti ibòò weribi ludu heka roire kia Boasi inire.
\c 4
\cl Capítulo 4

\s Deuxu Heto (Templo) aõna õnamy (1 Iòlò mahãdu Tyyriti 7.23-51)
\p
\v 1 Òwòruwodỹỹ borõsi-di rihetynykremy riwinykremy Salomaõ riteònyre debò inaubiòwa urihixina irehe rare, iwebesè tahe debò inaubiòwa urihixinamy, biu-ò irehe tahe inaubiòwa iere iuja irehemy ratyremy.
\v 2 Behyna iwetuu borõsi-di rihetynykremy riwinykremy riteònyre heka, inatxi urihixinamy 20 iere iuja isỹytxi, iwo-ki tahe iwetuu 13 urihixina ieremy, iwo wetya-ki heka inaubiòwa urihixina iere ibesemy.
\v 3 Behyna ryijàti heka 13 urihixina ieremy, kia behyna ryijàti-ki inatxi wiwana bororeni bõrõsi-di womati rirurawonyre kia sohoji imanymy roire behyna ijàti-ki.
\v 4 Behyna heka kia brororeni womati-di ibroreny-ki roire waò inatxi reurómy broreni womati-di sõwemy roire tii boho ahana-ò retehemyroiremyhỹ; inataõ ibòò-ò idi retehemy roiremyhỹ, inataõ heka ibrura-ò idi retehemy roiremyhỹ, inataõ heka iraru-ò idi retehemyroiremyhỹ, inataõ heka beòra-ò idi retehemyroiremyhỹ.
\v 5 Behyna weti ibude heka debò inaubiòwa urihixina wesemy. Behyna ryijàti heka Bede-ò ryijàti wese rare tai bede-ò resemyhỹre noijasa ibude debò wesemy resemyhỹre. Behyna woki tahe 60 mili sõwe wese urihixinamy bee riòbynymyroire.
\v 6 Watxiwi riwinyrenyre debowiò, tai risuhòmyroire ibutu aõna õna xiwena-di rixuxunyre. Watxiwi iryyre heka iraru-ò ritidire Templo ribi ijõ watxiwi iryyre heka ibòo Templo ribi ritidire. Behyna heka xiwena wahidỹỹdu mahãdu tai rexisuhòrenyre.
\v 7 Loosòna heka debòwiò riwinyrenyre womati tỹrỹrỹhỹkỹ-di iwesele rarybere wese. Templo wo-ki heka ritidirenyre: iryyre, iraru-ò, iryyre ibòò-ò.
\v 8 Òwòru webese heka debòwiò riwinyrenyre, Templo-ki ritidire: iryyre, iraru-ò, iryyre ibòò-ò. Womati tỹrỹrỹhỹkỹ-di aõna õna 100my sõwe riwinyrenyre.
\v 9 Templowo-ki ube heka xiwena wahidỹỹdu mahãdu-ò rare, tule ijõ ubetyhymy riwinyre. Ahana-ò tule ijòtòbòna bõrõsi-di sõwemy riwinyre.
\v 10 Behyna heka Templo-ki beòra-ò ribi risỹnyre.
\v 11-16 Huraõ herana nihikỹ riwinyre, aõna õna-di dehuna-di, watxiwi wana tai kia ibutumy Templo aõna õna rexihure iwese Salomão widỹỹ riteònyre wese. Kia ibutu tii riwinyre: Heto mynana Inatxi ityre-ki heka inatxi bedeò wesemy ritidire, kia inatxi bedeò wese heto mynana-ki heka roire kohêtxi retydyna wesemy tai roire; homã bederaty bõrõsi-di womati 400my sõwe inatxi deòtena-di riweruwerunymyroire. Tulesỹ iaõydòna debòwiò sõwe, watxiwi debòwiò; behyna sohoji, waò inatxi reuròmy brororeni behyna mynanamy roire; ijõ herana, aõna õna-di dehuna, tesewamy sõwe. Iwesemy Salomaõ riteònyre wesemy riwinyre, aõma Hurã, aõwidỹỹdu wihikỹ bõrõsi-di tỹrỹrỹhỹkỹ ibutu awityhymy riwinyre, DeuxuTemplo-ò, Inywedureny-ò wahe.
\v 17 Womati-di raõmysỹdỹỹke Sukotésu-ò, Seredasu-ò womatisõnamy iòlò riteònyrenyre tai hãwãlò bire-txi Johodão bero iòhòmy.
\v 18 Kia bõrõsi womati Salomaõ widỹỹmy riteònyre heka sõwe sõwe rare iutxiena tiu rieryrenyõtyhy.
\v 19 Salomaõ tule widỹỹmy riteònyre myy: Xiwena womati tỹrỹrỹhỹkỹ-di, ijõ òwòru webese womati tỹrỹrỹhỹkỹ-di tai orotxu ritidikemy Deuxu-ò xiwenamy,
\v 20 Loosòna, sohoji sohojimy, debòwiò loosònamy womati tỹrỹrỹhỹkỹ-di brebuna heto koki roosòhyymy ratxikremy iwese riteònyre wese;
\v 21 Noijasa wesemy, loosòna sohoji sohoji, helòtyra sõwe tule iwese riteònyre wese riwinyre;
\v 22 loosòna brybry òresyna heka tule riwinyre heka, hyna womati, lỹnyrena mynana, helòtyra mynanamy kia ibutu womati tỹrỹrỹhỹkỹ-di riwinyre iwese riteònyre wesemy. Templo ijòtòbòna heka womati tỹrỹrỹhỹkỹ-di roire Templowoki heka brebunatyhy ijòtòbònaheka womati tỹrỹrỹhỹkỹ-di tule roire.
\c 5
\cl Capítulo 5
\p
\v 1 Tai imohu-di Deuxu Templo widỹỹ Salomaõ ibutu rahure, ibutu aõna õna Davi, Deuxu-ò riwahinyre heka Salomaõ Deuxu Templo-ò riwyre Deuxu Templo-ò tai ibutu aõna õna wihikỹ-yki ritidire: Womati iura tỹrỹrỹhỹkỹ, Womati tỹrỹrỹhỹkỹ, aõna õna ibutumy. 
\s Deuxu heto-ò (Templo) òwòru wodỹỹ (Arca) ridyrenyre (1 Iòlò mahãdu Tyyriti 9.1-11)
\v 2 Idita Salomaõ-ò ibutumy Isaeli wedu mahãdu ributunyre Jerusalĕ mahãdu hãwã-ki tule Isaeli matuari mahãdu aõ wedu wedu mahãdu ributunyre tai. Tiiboho heka Siaõ hãwã ribi Deuxu òwòru wodỹỹ tỹrỹrỹhỹkỹ (Arka) riwyrenykremy templo-ò.
\v 3 Tai debò inatxi reurò ahãdu heka rarỹỹna bedeu heka ibutu Isaeli hãbu mahãdu iòlò wana rexibutunyre.
\v 4 Tai Isaeli hãbu mahãdu wii ributunyrenyre ritehemynyrenyreu heka Levi mahãdu dirahude ijoireny bededeysamy rexibutunyrenyreheka Deuxu òwòru wodỹỹ tỹrỹrỹhỹkỹ (Arka) riukorenyra
\v 5 riwyrenyre, kia Deuxu tyky heto ihetxiu iaõna õna womatireny ibutumy riwyrenyre templo-ò. Xiwena wahisidỹỹdu mahãdu Levi ijoi mahãdule ibutumy riwyrenyre.
\v 6 Tai heka iòlò Salomaõ Isaeli mahãdu wana Deuxu òwòru wodỹỹ tỹrỹrỹhỹkỹ (Arka) ikoreny-ki roire ibutumy rexibutunyre tai xiwena sõwe riwahinyrenyre, bodoini sõwe, broreni sõwe sõwe Deuxu-ò riwahinyre sõwe sõwe dori, tiu rariaõtyhyhãbu mahãdu rasõwere.
\v 7 Deuxu òwòru wodỹỹ tỹrỹrỹhỹkỹ (Arka) xiwena wahisidỹỹdu mahãdu riwyrenyre templowotyhy-ò, iwo brebuna-ò, ỹju kerubĩ ritxoo teerawo-ki ritidirenyre.
\v 8 ỹju kerubĩ ritxoo tee-di ritỹtenymy roire Deuxu òwòru wodỹỹ tỹrỹrỹhỹkỹ (Arka) tyre-ò tai ibutumy rihetynymy roiremyhỹ; tule kia hoju-di rimymy rityyteremymyroire tule itee-di ritỹtenymy wahe.
\v 9 Deuxu òwòru wodỹỹ tỹrỹrỹhỹkỹ (Arka) kia hoju irehemy roire idesereny heka iribi irehemy roire, tai dori ijõwo ribile iko heka itỹnylemy roire, tahe ahana ribile aõkõmy robimy roire; wiji tai ratximyhỹre dori.
\v 10 Deuxu òwòru wodỹỹ tỹrỹrỹhỹkỹ (Arka) iwo heka inatxi mana heka roire kia Moisesi ritidire Horebe hãwãlò rareu, kiau heka Isaeli mahãdu wana Deuxu ritobinyre Ejitu ribi ròhònyrenyreu wahe.
\v 11 Iribi heka xiwena waisidỹỹdu mahãdu heka Templowotyhy ribi ròhònyrenyre. Ibutumy heka òbitimy riwinyrenyre iwese Deuxu riteònyre wesemy, isỹreny mahãdu iwitxira ihỹyrele heka òbitimy riwinyrenyre iu.
\v 12 levi ijoi mahãdu heka ibutumy wiudu mahãdumy roire - Asabe, Hemã, Jedutṻ, iriòrereny, isỹmahãdureny – tiiboho heka beòraò roire heka ityyreny lĩĩ urahakỹ-di, rotoanymyroire violaõ witxira witxira wesemy, juròna tahe 120 xiwena wahisidỹỹdu mahãdu rijurònymyroiremyhỹ idihyymy.
\v 13 Juròna toana mahãdu, wiudu mahãdu wana wiwanamy rawiunymyroiremyhỹ Deuxumy reàlàmyhỹroiremyhỹ, Juròna wodỹỹmy, violaõ wese witxiramy ijõ taerynareny toanarenymy, iteremy rawiunyrenyre Deuxumy reàlànyrenykremy myy: “Tii awi rare; iluuna heka tuhyyhyy rare.” Iu dori Templowo-ò biuwetyy-di rỹxire.
\v 14 Tai dori Templowo heka Biuwetyy-di rỹxira nonowe wesemy tai radynymy xiwena wahisidỹỹdu heka isiramy idi raõmysỹdỹỹnyre, Deuxu loòsònamy Deuxu Templowo-ki rỹxire dori.
\c 6
\cl Capítulo 6

\s Isaeli mahãdu-ò Salomaõ rarybemyhỹre (1 Iòlò mahãdu Tyyriti 8.12-21)
\p
\v 1 Salomaõ Deuxu-ò reixitòenyre myy: “Waha Deuxu biuwetyy-ki tasỹnyte dori.
\v 2 Ihỹre heka adee heto rewinyre jiarỹ, taile idihyymy matxikemy.”
\v 3 Idi tahe Salomaõ Isaeli mahãdu-ò rybewimy rarybere, isaeli mahãdu heka lamymy roimyhỹre.
\v 4 Iribi tahe rarybere: _Deuxu awityhy heka rare, Isaeli Deuxu wahe! Iwese tii rarybere Davi-ò taruru-dile riwinyre iwese tyhy, waha-ò tii rarybere myy:
\v 5 “Israeli mahãdu heka Ejitu ribi retareu waheto hãwãõ risỹnykemy aõkõ ritidire waumy reàlàkemy. Tule Isaeli mahãdu hãbu wedu aõkõ retare.
\v 6 Ihỹre heka Jerusalĕ hãwã retare taile wanimy rààlàkremy, kai Davi iwedurenymy heka aratare jiarỹ.”
\v 7 Salomão tarybe ritõranyre myy: _Waha Davi heka juhu Deuxu heto Templo riwinykremy idi rõhõtinyre tawimy Deuxu heto Templo-ki Isaeli Deuxumy tai reàlàkremy.
\v 8 Ihỹre heka Deuxu waha Davi-ò rarybere: “Davi, boholake, òbiti heka idi tahõtinyte adewimy heto Templo wadee biwinykemy.
\v 9 Ihỹre heka kai aõkõrehe biwinyke heka, kai biwinyõtyhy, ariòrele wanimy heto Templo riwinykremy kaixe aõkõre.”
\v 10 Tai wiji dori waha-ò Deuxu rarybere wese heka Deuxu tarybe wesemy riwinyre. Jiarỹ heka waha deròwymy ralore, Isaeli iòlòmy, tai hetoTemplo heka rewinyre Deuxu reàlàkremy Isaeli Deuxu-ò.
\v 11 Tai templo woki Deuxu òwòru wodỹỹ tỹrỹrỹhỹkỹ (Arka), iwo-ki heka Deuxu bede ywina rybemy tai reyrubunyre kia Deuxu Isaeli mahãdu wii ritobinyrenyre.
\s Salomaõ Deuxu-ò reixitòenyre. (1Reis 8.22-53)
\v 12 Tai heka Israeli mahãdu koki Salomaõ xiwena-ò rare tai tebò biu-ò riukore.
\v 13 Tii Templo ube-ò su-ki 22 urihixinamy irerehemy iwebesemy ijõ heka 30 urihixinamy biu-ò riwinykremy riteònyre. Tai tii raòwònyre Ibutu Isaeli mahãdu koki, tatiwotimy resere tai debò biu-ò riukore.
\v 14 Idi reixitòenyre myy: _Waha Isaeli Deuxu! Deuxu, awese biu-ki bede-ki awese ihõõre. Isaeli mahãdu tetobinyte wese heka tewinyhyymyhỹte, Isaeli mahãdu tawo ribile arybe wesemy riwinymyhỹu aluuna-di idireny tate, tiiboho adewimy ako-ki heka roimyhỹrenyre dori.
\v 15 Waha Davi-ò ary-dile tarybete heka tai ebò-dile tewinyte dori; wiji heka ibutumy tewinymyhỹtemy tai rỹimyhỹre..
\v 16 Tai heka waDeuxu adee areixitòenykre, ijõ waha-ò tarybete wesemy biwinykemy wiji. Tarybete dori Isaeli mahãdu Davi riokorereny heka tuhyymy Isaeli iòlòmy roirenykremy, tarybete heka Davi wesemy arybemy riòbynyre wesemy tiiboho riòbynyrenykeki heka Davi riokorereny heka tuhyymy Isaeli mahãdumy iòlò my roirenykremy tarybete dori.
\v 17 Arybe òraruki heka waha Deuxu, Davi-ò arybe weselemy rotỹỹnykremy adee reixitònymyhỹre.
\v 18 Tahe waha Deuxu, kai Deuxumy tate, inatyhymy iny mahãduy-ki aõbo tasỹny mahãte, iny bede mahãduy-ki aõbo masỹnykemy aõbo. Kai nihikỹtyhy tate, biu-ki araòbynyõre dori. Timybo ka templo rewinyre adee araòbynykremy. Ka templo iujatyhy adee, araòbynyõre dori.
\v 19 Waha Dexu, adeòdu jiarỹ rare. Waixitòedỹỹnamy boholake, làhàmy warybemy birawyònyke.
\v 20 Txumy, ruumy, ka templo-ò idi beteheke, kaheka tetate dori katemplo-ki adi alànàmy ratxikemy. Kaò ariòsanynymyu waixitòedỹỹnamy boholake làhàmy.
\v 21 Waixitòedỹỹnamy, Isaeli mahãdu ixitòedỹỹnamy kaò ariòsananyrenykreu waixitòedỹỹnareny bohoholake waha Deuxu. Kohe, biu-ki asỹwihi-ki waixitòdỹỹnareny boholake, waòrarunareny biixãwididỹỹnyke.
\v 22 Inyõ hãbu ribinanykeu tahe kia hãbu rarybekeki tii aõkõ riwinyre tai xiwena-koki ridyrenyke tii aõkõ riwinyremy inatyhytyhymy rarybekeki tahe
\v 23 Kia hãbu mahãdu Deuxu wahisidudỹỹdu biu ribi idireny beteheke. hãbu ibina riwinyre heka biòwynyke iwese riwinyre wese, tahe hãbu ibina riwinyõre-ki bieryke tii aõ riwinyõre dori tai idi biwiòhenanyke.
\v 24 Isaeli mahãdu, rexiòrarunyreu, iòludu mahãdureny iribireny rotakreu heka tai Deuxu hõrõ mahãdu, Isaeli mahãdu ka-ò Templo-ò kodoikemy umy reàlàkremy adee reixitòenykremy.
\v 25 Biu ribi boholake. Isaeli mahãdu õhõreny heka òraruna biixãwidinykre isureny-ò kai tewahinyte ilabiereny-ò ixyby bidybenyke tasureny-ò.
\v 26 Biu kodoaõkreu Isaeli mahãdu òraruna òraruki ihỹre Deuxu, Isaeli mahãdu, õhõreny rexirahĩkeki heka, ka-ò Templo-ò iòsanareny idi raòsananyrenykeki, idi reixitòenyrenykremy, umy reàlàrenykremy, kai aõhõkỹmy rotỹỹny tamyreny tewahinyte rahudi heka rexirahĩrenykeu
\v 27 Biu ribi iòrarunareny biixãwidinyke, Isaeli mahãdu õhõreny heka, bierynanyke òbitimy roikremy. Iribi tahe Deuxu, bede-ò biu biwahinyke ka su-ò õhõreny mahãdu-ò heka kasu tewahinyte dori tuhyymy.
\v 28 Tiubo su heka aõ ruhunyõreu heka binanaijõdikreu heka, yhy reburehekỹ òwòru ribi risekreu ada iny lòbòròna sei rirokreu, òludu mahãdu iny-ò itxi reakreu, ada binana binahãkỹ inymahãduy-ki roikreu,
\v 29 iixitòedỹỹnareny boholake. Isaeli mahãduõ, bedewomy roimyhỹreu, aõhôkỹmy dỹỹnanamy roimyhỹreu heka idi ebò biu-ò riukomyhỹreu heka kaki Templo-ki reixitòenymyhỹrenyreu.
\v 30 Iixitòedỹỹnanarenymy boholake. Biu asỹ ribi heka boholake iòrarunareny biixãwidinyke, biwiòhenanyrenyke. Kai sohojile heka inyraykywydynanymyhỹre teeryte. Iwesele tiiboho riwinymyhỹre wese heka biwahinykre.
\v 31 Isaeli amahãdu, õhõrenymy roimyhỹre kasy-ki ilabiereny-ò tewahinyte heka tuhyymy aratyhynykremy araòbynykremy.
\v 32 Tulesỹ suiwitxira irehemy rỹimyhỹre mahãdu umymy roholakreu heka aõna õna wiwihikỹtyhymy heka tewinymyhỹteki roholarenykreu heka kaò kanakremy Templo-ò ikosana raòsananykreu ka-ò umy reàlànykremy, adi reixitòenykremy.
\v 33 Ixitòedỹỹnamy boholake. Biu-ki tai tasỹnymahãte boholake inyhe ibutu adee reixitòenymyhỹre-ò boholake, bede mahãdu ibutumy umy roholakremy, aratyhynykremy iwese Isaeli, õhõreny mahãdu wese riwinymyhỹre wesemy. Tai dori rieryrenykre ka Templo-kile heka jiarỹ rewinyra heka kakityhymy umy reàlànyrenykremy inyhe.
\v 34 - Isaeli mahãdu-ò alòre-ò biteònykreu heka iny òludureny-ò itxi reakremy tahe ikoki heka atxi õhõtireny reakre, ka-ò Jerusalĕ hãwã-ò raòsananykremy idi reixitòenyrenykre kaa hãwã-ò kai tetate heka aTemplo jiarỹ ani-di rewinyra dori, iu reixitòenyrenykreu heka
\v 35 biu ribi boholake iixitòedỹỹnarenymy, awimy birawyònykre ibutu ixitòedỹỹnareny-ò.
\v 36 Isaeli mahãdu, õhõreny heka òrarunatxi resekeu heka – inyõ òbitidu heka ihõõre dori - isaeli mahãdu ribi iòludu mahãdu rotakre heka kai biwahinykeki isaeli mahãdu òludu mahãdu su iwitxira-ò wetxumy ridykremy bitekònykeki su irehemy ada su iòhòmy,
\v 37 ihỹre isaeli mahãdu ixitòedỹỹnareny boholake. Ka su-ki ada su irehe-ki, heka tiiboho rexirahĩkeki tahe, iòrarunareny adee relyyrenykeki òrarudumy rexininirenykeki, aõ ibina riwinyrenyre adee relyyrenykeki, ixitòedỹỹnarenymy boholake, waDeuxureny.
\v 38 Kia sureny-ki heka inatyhytyhymy tawo ribireny rexirahĩrenykeki idi reixitòenyrenykeki, kasu-ò iny labiereny-ò tewahinyte raòsỹnanyrenymy idi rexitòenyrenyke kahãwã-ki kai tetate heka Templo adee rewinyra jiarỹ.
\v 39 iixitòedỹỹnarenymy boholake. Asỹ biu ribi, boholake, irutaõlemy biwiòhenanyrenyke. Isaeli õhõreny mahãdu heka adee òrarunamy riwinyrenyre heka biixãwididỹỹnymyhỹke.
\v 40 WaDeuxu, kaki ratxiwahỹrenyre heka wadireny maruxetòenyke, kaki waixitòedỹỹnarenymy heka boholake.
\v 41 Inynyrỹ Deuxu, myike heka, manahe ka-ò aelehyna wihikỹ heto-ò, kaa òwòru womati tỹrỹrỹhỹkỹ-ò (Arka) heka arurunatyhy wesena-ò idi manahe. Wiji heka axiwena widỹỹdu mahãdu arybe bedeywinamy riòbyke adewimy, aruxetòena-dilemy tiiboho reysarenykremy manahe!
\v 42 Inynyrỹ Deuxu, iòlò heka idi ibuadỹỹõmy, kaile tetate dori. Eòdu Davi luute itxi õhõti beake.
\c 7
\cl Capítulo 7

\s Deuxu heto (Templo) Deuxu-ò riteòsinyre (1 Iòlò mahãdu Tyyriti 8.62-63)
\p
\v 1 Salomaõ Deuxu-ò ixitòena rahudi heka, xiwena tyre-ò Deuxu heòty-di biu ribi ritxiwire tai ibutu ixiwenarenymy risõre tai ibutumy roore Deuxu xiwena-ò, iu Deuxu loòsanamy Templo woki heka idi rỹximy nonowe wesemy roireri.
\v 2 xiwena wahidỹỹdu mahãdu heka Templo-ò rironyrenyõtyhy Deuxu loosònamy idi rỹximy roire nonowe wesemy roireri.
\v 3 Deuxu loosònamy robirenyreu Isaeli mahãdu su-ò taòsanamy reserenyre, tai Deuxumy riwowydynymy roirenyre Inynyrỹ Deuxu-ò ràlàmyroirenyre heka tii awityhy rare, iruxetòenamy tuhyymy rỹire.
\v 4 Tai Deuxu ijoi mahãdu, iòlò wana Deuxu-ò xiwena riwahi riwahinyrenyre.
\v 5 Deuxu-ò xiwenamy 22 mili bororeni sõwe, 120 mili budoini sõwe iòlò Salomaõ riwahinyre iu.
\v 6 Tai heka iòlò Salomaõ, Isaeli mahãdu ibutumy kia templo heka Deuxu koki reàlàrenyre. Xiwena wahidỹỹdu mahãdu òbitimy tai roire, Levi mahãdu Templo aõmysỹdỹỹdu mahãdu òbitimy tai roire, wiudu mahãdu taviolaõ wese iòlò Davi juhuu tamyreny riwinyre di rotoanyrenykremy Deuxu-ò reàlànyrenykremy tii awityhy rare, iruxetòenamy tuhyymy rỹire. Wiudu mahãdu koki heka xiwena wahidỹỹdu mahãdu tajurònareny-di lamymyroiremy rỹire, Isaeli mahãdu tule lamymyroiremy.
\v 7 Deuxu ko-ki Templo ube wetyakile Salomaõ Deuxu-ò xiwena riwahinyre idi reàlàmyroire tai heka Templo wetya-kile xiwena xiwenamy riywinymyroire, iròduwe heka xiwena ywinamy riywinymyroire Templo ube wetya-kile aõma xiwena womati tỹrỹrỹhỹkỹ tyre-ki heka riòbynyõra iròdu xiwena sõwe sõwe dori Salomaõ iròdu xiwena-ò sõwemy riwyra heka tai templo wetya-kile iròdu xiwenamy idi riywinymyroire, tule hina xiwena sõwe sõwemy roire, ijõ iròduwe sõwe sõwe ywina xiwena Deuxu-ò riwahinykremy tai xiwena womati tỹrỹrỹhỹkỹ tyre-ò riòbynyõre iròduwe sõwere tule wahe.
\v 8 Tai heka deysanamy sõwemy roire debò inatxi reurò txumyi Salomaõ Isaeli mahãdu wana Deuxu-ò deàlànamy riwahinyrenyre ibutumy deysamyroire tule Ejitu bero suludu mahãdu, kia su mahãdu ribi Hamate suludu mahãdu-ò tule rirahurenyre tai reàlàmyroiremy.
\v 9 Debò inatxaõ txu-di heka Deuxu-ò reàlànykremy rexibutunyrenyre ibutumy. Deuxu koki riteòsinyrenyre xiwena tỹrỹrỹhỹkỹ tai raxiwenarenykremy iu heka debò inatxi txumy Deuxumy reàlànamy rarỹỹnamy bede riere, idi ixyby debò inatxi txumy Deuxumy reàlànamy rarỹỹnamy bede riere.
\v 10 Bede roimy rare tahe debò inatxi reurò ahãdu-di kia 23 txu-di iribi heka, rarỹỹna rexihurau tahe iòlò rarybere:_Rexihurahe! Tai ibutumy su iwitxira mahãdu heka tasureny-ò rooserenyre: Deysatyhymy rooserenyre tasỹreny-ò. Iworeny deysanarenyre rooserenyre heka Davi-ò Deuxu awimy riwinyre-ki, iriòre Salomaõ-ò, Isaeli mahãdu-ò dori.
\s Salomaõ wana Deuxu ritobinymyhỹre. (1 Iòlò mahãdu Tyyriti 9.1-9)
\v 11 Kia wese heka Salomaõ Deuxu heto Templo rexihudi iòlò heto tule; ibutumy Salomaõ riwinykremy riwisỹnyre heka riòbyra, ibutu widỹỹ wihikỹtyhy riòbyra.
\v 12 Tai heka Deuxu Salomaõ-ò ruumy idi rexitỹnynyre tamy rarybere:_ Aixitòedỹỹna-ò raholare jiarỹ, kaa heka hetohe retare wadee xiwenamy biwinybenykemy tahe,
\v 13 Katahe aritidikre myy: “Biu-ki aritòbònykeki, tai heka biu roaõkemy ada asureny-ò sei ariteònykeki tai heka owòrureny ibutu asureny riroxikremy ada Isaeli waijoi heka binana ariteònykeki tahe,
\v 14 waijoireny wani-di reixitòenykeki, tawo ribi inatyhytyhymy taòraruna ribi rexirahĩkeki wadee reixitòedỹỹnykeki, waòhòmy rehemynykeki, tahe ryy bina bina ribi reixijekeki, tahe biu ribile heka ixitòenareny aroholake, iórarunareny ariixãwidinyke isu heka ariteytenyke.
\v 15 Kiakeki tahe wiji iraymy arunyke warue-di wanohõti-di aroholamy arunykre kaa su-ki.
\v 16 Kaa heto Templo heka Jiarỹy retare wadee, wani tuhyymy tai ratxikemy. Ka-ò heto Templo-ò heka warue idi retehemy waluuna-di tuhyymy.
\v 17 Iwese boo wakoki roire wesemy kai wadewimy biwinyke matxikeki iwesemy biwinykeki, warybe òbymy biwinykeki, wabede ywina wesemy beòbykeki,
\v 18 Tai tahe iòlò tuhyymy matxike iwese buu Davi wana retobinyre wesemy, tamy rarybereu Jiarỹ:_Ariòrereny heka Isaeli iòlòmy tuhyymy ratxikremy.”
\v 19 Ihỹre heka waribi biwaribenykeki warybemy beòbybenyõkeki tahe bede ywina adeereny rewahinyre heka wamy beàlàbenyke iwesemy aõko biwinybenyõkeki, surioko beàlàbenykeki,
\v 20 Tai asureny adeereny rewahinyra heka waribi arateònyrenykremy, kasu ribi irehemy arateònyrenykre kaa heto wanimy retidira waTemplo ribi heka arateònyrenykremy. Tai kaheto Templo heka bede mahãdu idi risinykre arisỹnykremy rarybere jiarỹ ariwinykre dori.
\v 21 Wiji heka ka heto Templo ibutu mahãdu-ò awityhy heka rare, tai heka ibinatyhymy rarekremy, bede mahãdu bede riòtiinyrenykre idi rỹỹraxirenykremy:_ Aõherewe Deuxu kasu-ò riwinyre, ka heto Templo-ò riwinyremy?
\v 22 Tai dori irawyòna heka rarekre myy:” Ilabiereny mahãdu Deuxu Tyhyhykỹ ririrenyre dori, Ejitusu ribi Deuxu ritarenyre kia ririrenyre heka su riokonyle reàlàrenyre, xiwenamy riwahinyrenyre, iDeuxureny ririrenyre tai aõbinatyhy ityrereny resere.”
\c 8
\cl Capítulo 8

\s Salomaõ iaõmysỹdỹỹna (1 Iòlò mahãdu Tyyriti 9.10-28)
\p
\v 1 Kia heka wawiò beòra-di bede riere heka Salomaõ tawidỹỹnamy rahure heka; Deuxu heto Templo widỹỹ iheto tule.
\v 2 Tule Tiro hãwã Hiraõ iòlòmy riwahinyre Salomaõ-ò tii kia hãwã ritỹmyranyre idi Isaeli mahãdu risỹnyre sỹmy.
\v 3 Iribi tahe Salomaõ Hamaté-Sobá hãwã-di rahaananyre Isaeli mahãdu-ò.
\v 4 Tadimó hãwã bedetyrahakỹ roire heka Salomaõ ritỹmyranyre, ibutu Hamatésu hãwã hãwãmy ritỹmyranyre tai heka irasỹnareny riyrubunyre.
\v 5 Tule heka kia Betxi-Horõ-ibòò-ribi hãwã, Betxi-Horõ-iraru-ribi hãwãmy ritỹmyranyre tule kia hãwãreny huruari rirurawonyrenyre heka ijòtòbòna imynana dire.
\v 6 Balaaté hãwã tule, ibutu hãwã hãwã irasỹna tai riyrubunyre, hãwã hãwã taawaru tewe-di sõwe tai rirybunyre ibutu kia hãwã hãwã heka ritỹmyranyre. Ijõ tule heka Salomaõ sõwe riwinyre heka tamywimy Jerusalĕ hãwã-ki, Libanosu-ki ijõ iòlònasu heka hãwã hãwã sõwe aõ riwinyre.
\v 7-8 Wetxu mahãdule idi raõmysỹdỹỹnyrenyre dori. Kia ibutu widỹỹ sõwe heka Kanaã iriokore mahãdumy heka Salomaõ iwetxumy risỹnyre raõmysỹdỹỹkremy. Ibutu kanaãsỹdu heka Isaeli mahãdu alòre-ki rirubunyõre tai heka wetxu aõmysỹdỹỹdumy relerenyre. Kia mahãdurenyy-ki heka roire heteu mahãdu, amoheu mahãdu, beriseu mahãdu, Eveu mahãdu, jebuseu mahãdumy kia mahãdu sõwe. Iriòkorereny mahãdu wiji heka tule wetxumy roirenyre.
\v 9 Isaeli mahãdu heka wetxumy aõkõ raõmysỹdỹỹnyre. Isaeli mahadu heka sodadumy, sodadu wedumy, awaru tewe-di alòre-di reamyroiremyhỹ, awaru-di rearenyremy taheka wetxumy aõkõ raõmysỹdỹỹre isaeli mahãdu.
\v 10 Kia Salomaõ aõmysỹdỹỹ sõwe risỹnyre heka 250 iwetxu itxeredumy sõwe. Idi roire
\v 11 Iu heka Davi hãwã ribi Salomaõ ihawyy didyde taheto-ò, ihãwyy heka Ejitu iòlò riòre heka rare, Salomaõ rarybere:_Davi Isaeli iòlò heto-ki aõkõ wahawyy rasỹnykre, Deuxu òwòru tỹrỹrỹhỹkỹ (Arca) titxibo roire heka su brebuna heka rare.
\v 12 Templo koki mana xiwena kia Salomaõ riwinyre heka tai xiwena Deuxu-ò riwahinyre ibutumy xiwenamy risõtyhyre.
\v 13 Deuxu-ò Salomaõ riwahinyre xiwena, iwese Moisesi bede ywinamy rarybere wesemy kia txu brebunamy roire heka sabadu txumy, ahãdu tỹmyra txumy, inataõ rarỹỹna txumy beòra-ki roire heka, paõ iuriõmy rarỹỹna, lòbòrònareny riherenyre rarỹỹrana, heto rarỹỹnamy.
\v 14 Davi, Salomaõ tyby rarybere wesemy heka xiwena wahidỹỹdu mahãdu iaõmysỹdỹỹnareny òbitimy tamahãdu tamahãdumy risỹnyre. Levi mahãdu Deuxu wiudumy Deuxumy reàlàmy roire tii boho tule xiwena wahidỹỹdu mahãdu-ò iaõmysỹdỹỹnareny-ki riwiòhenanymy roire. Salomaõ tule iwese Davi rarybere heka sodadu mahãdu tamahãdu tamahãdu risỹnyre Templo ijòtòbòna-ki. Ijòtòbòna sõwere tai.
\v 15 Davi rarybere wese heka xiwena wahidỹỹdu mahãdu, Levi mahãdu òbitityhymy riwinyrenyre iaõmysỹdỹỹnareny, tule Templo wo-ki aõna õna wiwihikỹmy riyrubunyrenyre òbitimy,
\v 16 Wiji heka ibutumy rexihumy roire. Kia mana sohoji juhuu templo riòrarunyreu tahe Templo rahure-ò, ibutumy òbitimy roire, rahurahe.
\v 17 Irahudi tahe Salomaõ Esiõ-Jebé beà-ki rare, Elaté, Àkabà ahu-ò Edõsumy rare.
\v 18 Tai heka Iraõ hãwò ninihikỹmy riwahinyre bera iaõmysỹdỹỹdu tule riteònyre tamy. Kia iaõmysỹdỹỹdureny mahãdu heka awityhytyhymy heka roire aõmysỹdỹỹdu mahãdu wedurenyre. Tiiboho Salomaõ deòdureny heka hãwò nihiỹmy idi roirenyre Ofisu-ò kia su ribile heka 15 mili ribi ratyremy diwydenyde Salomaõ-ò.
\c 9
\cl Capítulo 9

\s Sabásu hawyy heka Iòlòmy rare (1 Iòlò mahãdu Tyyriti 10.1-13)
\p
\v 1 Salomaõni raybỹtỹnyre sõwe bede bedemy reare, tai tahe Sabásu iòlò Jerusalĕ hãwã-ò itxeremy rare Salomaõ riurihikremy. Hawyy heka iòlòmy rare, tii tadeòdu mahãdu sõwe wana dehemynydenyde takamelureny-di itxyytaka sõwere aõna õna wiwi-di; rasỹna uri-di, womati tỹrỹrỹhỹkỹ-di mana wihikỹtyhyre-di. Hawyy rexideòsinyre Salomaõ-òtii tule rexideòsinyre hawyy-ò.
\v 2 Hawyy ibutu dỹỹraxina Salomaõ rirawyònyre tamy isira ihõõre.
\v 3 Iu heka Sabásu iòlò heka Salomaõ bedeerynamy robire iheto wihikỹtyhyre salomaõ tarayky ribile riwinyremy.
\v 4 Irasỹnamy, ihinamy mesa tyre-ki tai roimyhỹremy robire, ideòdu mahãdu hetowo-ò robiremy, Salomaõ heto aõmysỹdỹỹdu òbitityhylemy iaõmysỹdỹỹnarenymy robire, ityyreny òbitilemy rityynyrenyremy. Rasỹna awityhytyhymy roireu heka deòdu mahãdu awityhymy ityyrenymy roiremy. Templo mana xiwena awityhymy tai Deuxu-ò xiwenamy tii riwahinyre. Tai tahe sabásu iòlò heka sõwe sõwemy bede riòtiinyre.
\v 5 Irahudi heka Sabásu iòlò Salomaõ iòlò-ò rarybere: “Ibutumy wasu mahãdu rybe rybemy umy ribi rahokujare heka, abedekerytyhyre heka inatyhytyhymy heka rare!
\v 6 Ihỹre heka retyhynykõra dokuri tai heka kakò rareri warue-di umy robikremy jikarỹlemy! Abedekerytyhyra dokuri rekerykõre inatyhymy. Bede mahãdu abedekerymy rarybere heka ikujalemy raryberenyre dokuri. Abedekery ratyra dokuri anoherewe abedekeryra!
\v 7 Kaki awityhytyhy ibutu heka raremy! Adekòdu mahãdu awityhytyhymy kaki rỹimyhỹre dekysatymy awana rỹimyhỹrenyre heka arybe-kò awityhy kòbitityhymy rohokujamy heka rỹimyhỹre wahe!
\v 8 Wowydynareny aDeuxu-kò, tiki awimy aki rahare tai tanidilemy ikòlòmy arasỹnyra dokuri. Ilukuna tuhykymy Isaeli mahãdu-kò rare, kaa mahãdu heka tuhykymy ratxikremy risỹnymyhỹre dokuri, tai kaki Isaeli ikòlòmy arasỹnyra, kaile tiki ritakare kòbitidumy kòbitimy wedumy matxikremy.”
\v 9 Idi tahe tii Salomaõ iòlò-ò aõna õna wihikỹ riwahinyre: womati tỹrỹrỹhỹkỹ inaubiòwa urihixina ribi ratyre, rasỹna uri sõwemy, mana wiwihikỹ tule. Rasỹna uri wihikỹ iwese tiu heka ihõõhyyre Sabásu iòlò Salomaõ-ò tii riwahinyre iwese ihõohyyre dori.
\v 10 (Iraõ mahãdu heka, Salomaõ deòdu mahãdu Ofisu ribi womati tỹrỹrỹhỹkỹ heka diwydenyde, sãdalo òwòru ijõ mana wiwihikỹ tule.
\v 11 Kia òwòru-di Salomaõ Templo òwòna riwinyre, taheto òwònamy, violão wesemy wiudu mahãdu-ò riwinyre. Jerusalĕ hãwã mahãdu heka kia toana wihikỹtyhy iwesemy (harpa, lira) tiu robirenyõtyhy iwesemy.
\v 12 Ibutu Sabásu iòlòmy kia hãwyy-ò tamy awire riwahinyre, tii reixitòenyre heka Salomaõ ibutu tamy riwahinyre, tule Sabásu iòlò Salomaõ-ò riwahinyre aõwihikỹtyhyre tai wii aõwihikỹ riwiuronyrenyre heka. Imyhudi heka Sabásu iòlò tadeòdu mahãdureny rooserenyre Sabásu-ò, tasureny wahe.
\s Salomaõ iaõna õna wiwihikỹtyhyre (1 Iòlò mahãdu Tyyriti 10.14-29)
\v 13 Beòra beòramy heka womati tỹrỹrỹhỹkỹ 23 urihixina iutxiemy Salomaõ-ò rehemynyre.
\v 14 tule ijõ nieru heka tamy riwahinyrenyre heto-ki ijohonadu mahãdu, aõna õna ijohonadu riradu mahãdu tule. Iòlò suwitxira Arabiasu mahãdu, hãwã wedu mahãdu witxira witxiramy riteònyrenyre, womati tỹrỹrỹhỹkỹ urahakỹ, womati tỹrỹrỹhỹkỹ tule.
\v 15 Wyhy itxena heka 200my sõwe Salomaõ riwinyre, wyhy itxena-ki womati tỹrỹrỹhỹkỹ debò inatxi iutxie urihixina-di riuhere idi roritinyre.
\v 16 Ijõ wyhy itxena iujare 300my sõwe riwinyre ibutumy rihetynyre womati tỹrỹrỹhỹkỹ-di inataõ iutxiemy urihixina iere iiujaremy. Kia wyhy iuja sõwe heka Libanosu bederahytyhy hetowo-ò ritidikremy riteònyre.
\v 17 Rynanahakỹ elefante iju-di womati tỹrỹrỹhỹkỹ-di riwinykremy riteónyre Salomaõ.
\v 18 Kia rynana-ò raòwònykremy heka òwòna-ki debò sohoji reuròmy iòwonamy roire, elefante iju-di womati tỹrỹrỹhỹkỹ-di rihetynymy roire, iwa herinamy roire womati tỹrỹrỹhỹkỹ-di. Kia rynana heka inatxi axiò elehunamy roire, ityre-ki leaõ riritimy roire.
\v 19 Òwòna-ki sohoji sohoji heka leaõ tesena onana-ki riritinymy roire, ibutumy heka waò inatximy reuromy roire. Su bede iòlònamy kia wesemy tiu riwinyõhyyre kia wesemy.
\v 20 Ibutumy Salomaõ bedeò bemomomy riõre heka womati tỹrỹrỹhỹkỹ-di ibutumy roire, tule Libanosu heto iaõna õna womati tỹrỹrỹhỹkỹ-di tule roire. Salomaõ bedeu heka womati tỹrỹrỹhỹkỹ iura heka iowy aõ aõkõ heka rare.
\v 21 Salomaõ hãwò sõwe ijõdire heka Exipaiasu-ò roire Hiraõ iòlò deòdu mahãdu Salomaõ deòdu mahãdu wiwanareny roirenymyroire. Idi inataõ beòra beòramy rooserenyre womati tỹrỹrỹhỹkỹ-di womati tỹrỹrỹhỹkỹ iura-di diwydenydemy, elefãtxiju-di, òròbi heka iwitxira òròbi didydenydemy doidenyde.
\v 22 Salomaõ heka ityhyre ibutu ribi, bedeerytyhy ibutu iòlò mahãdu ribi.
\v 23 Salomaõ bedeerynamy ibutu iòlò mahãdu rieryrenykremy, roholarenykremy Deuxu bedeeryna tamy riwahinyre heka ibutu rieryrenykremy.
\v 24 Ibutu dirahumyroire mahãdu heka aõna õnamy diwymydoidenyde tamy: Womati tỹrỹrỹhỹkỹ, womati tỹrỹrỹhỹkỹ iuramy, womati tỹrỹrỹhỹkỹmy, tyymy, debònamy, rỹsỹna urimy, awarumy, mulamy. Kia wesemy beòra beòramy diwydenymy roire.
\v 25 Awaru heto inaubiòwa milimy sõwe, Salomaõ iawaru alòrena tewe sõwe ijõdire waò inatxi reurò mili iawaru sõwe ijõdire. Jerusalĕ hãwã-ki roire, tule iawarureny tewereny riyrubunyre hãwã-ki. Hãwã hãwã tii ritoare iawarureny itewereny riyrubunykremy.
\v 26 Kia bedeu heka Iòlò mahãdu Eubaraté berosu ribi heka filixiteu mahãdusu ribi Ejitu iòeresyna sumy-ò heka ibutumy kia iòlò mahãdu Salomaõ ridinodunymy rỹiramyhỹ.
\v 27 Salomaõ iòlòna bedeu heka womati tỹrỹrỹhỹkỹ iura heka aõ aõkõ heka rare, mana wihikỹ weselemy heka rare. Seduru òwòru tahe sõwe sõwemy ta roire heka iwese Judásulyty bederahy bederaty bina wesemy roire.
\v 28 Musirisu ribi Salomaõ heka awaru didymyhỹde iwitxirasu ribi tule.
\s Salomaõ rubumy (1 Iòlò mahãdu Tyyriti 11.41-43)
\v 29 Ibutu Salomaõ iòlòna òrarunamy widỹỹ iwitxiramy riwinyre ribi iòlòna rahure-ò heka Natã Deuxu rybedu tyyriti-ki roritimy roiremyhỹ, tule Aísi, Silò hãwã ludu tii rarybere tyyriti-ki roire tule Idu rybedumy tyyriti-ki roimyhỹ; kaa onanamy tyyriti-ki heka Jeroboaõ iòlòmy, Jerobaté riòremy iijyy relyymyroiremyhỹ.
\v 30 Salomaõ 40 beòramy Jerusalĕ hãwã-ki iòlòmy raremyhỹ, Isaeli mahãdu ibutumy iòlòmy raremyhỹ.
\v 31 Tii rurureu idi heka Davi hãwã-ki rituunyre. Idi tahe iriòre heka Hoboaõ iòlòmy ralore, tii tybymy riteròwynanyre.
\c 10
\cl Capítulo 10

\s Isaeli ibòò mahãdu derare. (Iòlò mahãdu Tyyriti 12.1-20)
\p
\v 1 Isaeli mahãdu Sikĕ hãwã-ò wii ributunyrenyre heka Hoboaõmy taiòlòrenymy risỹnyrenykremy.
\v 2 Juhuu heka Nebate riòre Jeroboaõ heka rare. Tii juhuu Salomaõ ribi rahenyre Ejitusu-ò, tai rieryre heka Hoboaõ iòlòmy ralokremy kiamy roholare tai Ejitusu ribi roosere.
\v 3 Isaeli ibòò mahãdu ijoi heka Jeroboaõ riòrenyre, idi heka tii wana Hoboaõ-ò rybemy rorirenyre Myy:
\v 4 Hoboaõ, adee rybemy roireri, boholake waryberenymy: _”Salomaõ, boo heka aõhõkỹmy riwasỹnyre aõ iutxie-dile riwaitxyydỹỹnymyhỹrenyre. Tahe kai tuu malokre wana waõmysỹdỹỹnareny aõ wetarile bisỹnykeki araheludunyrenykre tuhyymy.”
\v 5 Idi heka Hoboaõ rarybere:_My taheka inataõ txu-di bodoibedenyke idi anarawyònyrenykre.
\v 6 Idi heka Juhuu Hoboaõ rare matuari dohodỹỹ mahãdu-ò, tii boho heka juhuu Salomaõ dohodỹỹdu roire. Tii rarybere tamyreny: _Ijoityhy mahãdu myy heka Isaeli ibòò mahãdu wadee rarybere: “Salomaõ, boo heka aõhõkỹmy riwasỹnyre aõ iutxie-dile riwaitxyydỹỹnymyhỹrenyre. Tahe kai tuu malokre wana waõmysỹdỹỹnareny aõ wetarile bisỹnykeki araheludunyrenykre tuhyymy.” Katahe wiji aryỹxirenykremy, ijoityhy mahãdu timybo heka Isaeli ibòò mahãdu-ò ararybekemy iraywònarenymy?
\v 7 Tai ijoi tyhy mahãdu, Salomaõ dohodỹỹdu mahãdu heka rirawyònyrenyre: _My tahe Salomaõ warybereny rare: “Awi heka inydireny matxike, iaõmysỹdỹỹnareny heka iwetarilemy biwahinyke tai heka awedurenymy tuhyymy ratxike.”
\v 8 Mytahe Hoboaõ heka ijoityhy dohodỹỹ mahãdu iryberenymy roholaõre heka, rare tii wana raumynyre mahãdu-ò rybemy rare.
\v 9 Hoboaõ tamyreny rarybere: _Waijoireny, warybemy boholake myy: Isaeli ibòò mahãdu wadee rarybere:_” Salomaõ, boo heka aõhõkỹmy riwasỹnyre aõ iutxie-dile riwaitxyydỹỹnymyhỹrenyre. Tahe kai tuu malokre wana waõmysỹdỹỹnareny aõ wetarile bisỹnykeki araheludunyrenykre tuhyymy.” Tai tahe wiji waijoireny aryỹxirenykre, Timybo heka Isaeli ibòò mahãdu-ò iraywònarenymy ararybekre?
\v 10 Tai heka ibiòwareny tii wana raumynyre mahãdu, rirawyònyrenyre:_ Salomaõ tamyreny heka birawyònykre: _” Kawesemy marybeke tamyreny: Waha iruru iylare jiarỹ tahe waruru iratytyhyre waha ruru.
\v 11 Aõmysỹdỹỹreny heka iutxiemy waha atyrereny ritidire, jiarỹ heka aomysỹdỹỹnareny iutxie iratytyhyre arisỹnykremy, waha araòhòterenyre, jiarỹ heka òhòte-di nihikỹ araòhòterenykremy.
\v 12 Inataõ txu-di tamy Jeroboaõ ibòò mahãdu ijoi wana Hoboaõ-ò rybemy doidenyde iwese juhu tii tamyreny rarybere wesemy.
\v 13 Tai heka Hoboaõ matuari dohodỹỹdu mahãdu rybemy ribuare Isaeli ibòò mahãdu-ò ibinatyhymy tamyreny rarybere.
\v 14 Hoboaõ iwese tii wana raumynyre mahãdu ritohonyre wesemy myy rarybere:_ Waha iruru iylare jiarỹ tahe waruru iratytyhyre waha ruru. Aõmysỹdỹỹreny heka iutxiemy waha atyrereny ritidire, jiarỹ heka aomysỹdỹỹnareny iutxie iratytyhyre arisỹnykremy, waha araòhòterenyre, jiarỹ heka òhòte-di nihikỹ araòhòterenykremy.
\v 15 Kia wesemy heka Hoboaõ Isaeli mahãdu rybe-ò roholaõhyyre. Kia tuu rotỹỹnyre heka iwese Silò hãwã ludu, Aiasi Deuxu rybedumy juhuu Nebate riòremy, Jeroboaõ-ò rarybere iwesemy.
\v 16 Tai Isaeli mahãdu Hoboaõ rybemy ijoide aõ riwinyõhyyre roholarenyre heka irybereny ibinatyhyre-ki, nihikỹ rirajuarenyre: “Davi mahãdu heka rohonykremy! Ijoide aõ riwinyõhyyre! Ijoi roikoirenykrewa! Ijoi mahãdu rokoike! Ixinamy Hoboaõ iòlòmy ratxike Judá mahãdu-ki! Tai heka Isaeli mahãdu tasureny-ò rooserenyre.
\v 17 Tai heka Judá mahãdusu-ki iòlòmy Hoboaõ heka Iòlòmy rỹiramyhỹ.
\v 18 Idi heka Hoboaõ Adoniraõ, aõmysỹdỹỹdu mahãdu wedumy riteònyre Isaeli mahãdu-ò rybemy. Tai heka Isaeli mahãdu adoniraõ mana-di rirubunyrenyre. Hoboaõ kiamy rieryreu heka taawaru tewe-di rahenyre Jerusalĕ hãwã-ò.
\v 19 Kia bedeu ribi wiji-ò, Isaeli ibòò mahãdu heka Davi riokore mahãdu iòlòrenymy ibinamy raharenyre.
\c 11
\cl Capítulo 11

\s Semaiá Deuxu rybedu-ò Deuxu rarybere (1 Iòlò mahãdu Tyyriti 12.21-24 )
\p
\v 1 Jerusalĕ hãwã-ò Hoboaõ ritehemynyreu heka, Judá mahãdu, Bejamĩ mahãdu sodadu wityhy 180 mili sõwe ributunyre tai. Isaeli ibòò mahãdu-ò itxi reakremy Hoboaõ idi rõhõtinymyroire, iiòlòrenymy ralokremy.
\v 2 Iu tahe Semaia rybedu-ò Deuxu rarybere heka
\v 3 Hoboaõ iòlò-ò, Judá mahãdu-ò, Bejamĩ mahãdu-ò rarybekremy myy:
\v 4 “Kõrehe, aseriòrereny Isaeli mahãdu-ò itxi beaõtyhy. Kai boho asỹreny-ò boosebenyke! Wadewimy heka kia rare, kiamy rotỹỹnyre Jiarỹ Deuxule rarybereri wahe.” Tii boho Deuxu rybemy roholarenyre. Tai heka ixãwira Jeroboaõ-ò derareny ixãwira tai tahe rooserenyre tasỹreny-ò.
\s Hoboaõ Kaa hãwã sõwe ritoare idi tahenarenymy òtity nihikỹ-di riwinyre riwiòhenanykremy.
\v 5 Hoboaõ Jerusalĕ hãwã-ki rasỹnymy roire isureny riwiòhenanykremy. heka òtity nihikỹ-di riwinyre, Judá hãwa-ki ritoare idi òtity nihikỹ-di riwinyre, Bejami hãwã-ki tule ritoare idi òtity nihikỹ-di riwinyre tahenarenymy.
\v 6 Belĕ, Etã, Tekoa,
\v 7 Bete-Su, Sokó, Adulã,
\v 8 Katé, Maresá, Sibé,
\v 9 Adoraĩ, Lakisi, Aseká,
\v 10 Sorá, Aijalõ, Heborõ. Kie
\v 11 Kia hawãreny sõwe tule ritoare idi òtity nihikỹ-di riwinyre tahenarenymy taile heka Isaeli mahãdu heka irỹsỹnareny rirarenymy roire: Rỹsỹna wena, rỹsỹna uri, vĩĩ rirarenymyroire. Hoboaõ heka sodado wedumy idi risỹnyre hãwã hãwãmy.
\v 12 Tule heka wyhy itxena sõwe, tõnori sõwe hãwã hãwãmy tai rirarenymy roire. Kia hãwãreny heka òtity nihikỹ-di riwinyre tahenarenymy roire. Kia wese heka Judá mahãdusu, Bejamĩ mahãdusu heka Hoboaõ ridinodunyre.
\s Xiwe wahidỹỹdu mahãdu, Levi mahãdu rirarure Jerusalĕ-ò
\v 13 Ibutu tahe Isaeli mahãdu rirahure ibòò mahãdu, xiwe wahidỹỹdu mahãdu, Levi mahãdu rirarure Jerusalĕ hãwã-ò ibutumy Ibutumy isaeli mahãdu tii boho reòbyrenyre.
\v 14 Jeroboaõ iòlò tariòre boho wana Deuxu-ò xiwe wahidỹỹdu mahãdu deramy rekoarenyre. Kia òraru-ki Levi mahãdu tasureny ririrenyre tai tõhõreny idi tai tõhõreny tai ritybiedỹỹnyrenyre tule taaõna õnareny ririrenyre tule tai wii ritxuarenyre idi riubỹtỹnyrenyre ijõ Judá hãwã-ò ijõ Jerusalĕ-ò:
\v 15 Jeroboaõ tiile ixidewi ritare xiwe wahidỹỹdu tule xiwe riwahinykremy tadeàlànyrenymy, tyytyby bina-ò, bororeni hãbu surioko-ò tii iwese rarybere-ki riwinyrenyre irybe wana-dile.
\v 16 Iny witxira witxira roture Isaeli hãwã-ò ibutumy dirahude Deuxumy reàlàkremy tawo ribi, Isaeli Deuxutyhy; taidori riheludunyrenyre Levi mahãdu Jerusalĕ hãwã-ò reàlàrenykremy xiwena riwahinykremy Deuxu-ò.
\v 17 Kia idi riwinyre tai Judá iòlònamy rirurudỹỹnyre heka Salomaõ riòre Hoboaõ wahe, Salomaõ riòremy, tii inataõ beòramy ilabie Davi wesemy, tyby Salomaõ wesemy riwinyre.
\s Hoboaõsỹ mahãdu
\v 18 Hoboão ihawyy Maalate; Jerimote riòre, Jerimoté Davi riòre, ise tahe Abiaiu, Eliabe riòre, Jessé riokore.
\v 19 Maalate inataõ rariòrenyre: Jeusi, Semariasi, Saaõ.
\v 20 Iribi tahe Roboaõ Maaká wana roire, Abisalaõ riòre, Maaká iriòre inataõ: Abiasi, Ataí, Sisá, Selomité.
\v 21 Hoboaõ 18 ihawyy sõwe, ihawyyreny deòdu heka 60my sõwe, tai iriòrereny heka 28 weryry sõwemy, hawyy iriòrereny 60my sõwe. Ihawyyreny deòdu mahãdu sõwe ribi heka Maaká tahe iluure.
\v 22 Tai dori Maaká riòrele tii ritare teròwy ralokremy, Judá iòlòmy ralokremy.
\v 23 Hoboaõ awimy idi rõhõtinyre iriòrereny kia hãwã hãwã-ò risỹnyre Judá hãwã òtity nihikỹmy tai roire, Benjamĩ hãwã òtity nihikỹmy tariòrereny risỹnyre. Idi hawyy mahãdu riteònyre tii boho wana roikremy, tule heka irỹsỹnareny tamyreny riwahinyre.
\c 12
\cl Capítulo 12

\s Ejitu iòlò Judá hãwã-ò itxi reare (1 Iòlò mahãdu Tyyriti14.25-28)
\p
\v 1 Isaeli mahãdu Hoboaõ iòlòmy raloreu heka Deuxu bede ywinamy ririrenyre, Isaeli mahãdu, Hoboaõ tule.
\v 2 Deuxu-ò òbitimy aõkõ riwinyre iòraruki tai Hoboaõ iòlòna iruyre beòrau Ejitu iòlò,Sisaké inire tii heka Jerusalĕ-ò itxi reare.
\v 3 Ejitu ribi dirahude heka 1.200 awaru tewe-di, ijõ mahãdu libi mahãdu, Sukita mahãdu, Etiòpia mahãdu sõwemy dirahudenyde tii wana, tiusebo iny sõwe dirahude tiu idi rariaõtyhy.
\v 4 Judá hãwã òtity nihikỹ hỹrele heka itxi reare idi Jerusalĕ-ò roirenyre.
\s Hãwã Hoboaõ ritoare.
\v 5 Iu heka Hoboaõ, Judá wedu mahãdu Jerusalĕ hãwã-ò rihenyrenyre Sisaké laumy tai heka Semaiá Deuxu rybedumy tamyreny rarybere: “Boholabenyke Deuxu rarybemyhỹre myy: Kai boho tewaritenyte dori, tai heka wiji Jiarỹ ararirenyke, Sisaké-ò arawahinykre.
\v 6 tai Isaeli wedu mahãdu, iòlò wana Deuxu-ò raryberenyre: “Deuxu inatyhytyhymy òbitimy tate, Deuxu!
\v 7 Tii boho tawo ribi inatyhytyhymy raryberenyre heka Deuxu Semaiá-ò rarybere: “Semaiá, boholake adee ararybekre, tii boho heka inatyhymy raryberenyre heka tai dori arahenyõtyhy, tiu bedeu heka iòhòmy aratarenyke. Uritere Sisaké òraruki aõkõ Jerusalĕ mahãdu-ò waykarana aritxiwiõtyhy.
\v 8 Urile heka ixinamy Sisaké idireny ridinodunykremy tai dori tii boho rieryrenyke awityhy heka wamy rityhynyke bede mahãdu iòlòmyke aõkõ”
\v 9 Idi tahe sisaké, Ejitu iòlòmy Jerusalĕ-ò itxi reare, Deuxu Templo iribi ibutu aõna õna wihikỹtyhyre heka riwyre, Iòlò heto ribi tule aõna õnamy riwyre, kia Salomaõ wyhy itxena womati tỹrỹrỹhỹkỹ-di riwyre tule.
\v 10 Idi heka Roboaõ bõrõsi womati-di wyhy itxena riwinykremy riteònyre isodadureny wedu-ò riwahinyre heto-ki riyrubunykemy kia wyhyreny riwyra òraruki.
\v 11 Templo-ò iòlò ralomyroireu Sodadu mahãdu tawyhy itxena-di roire iòlò templo ribi rohonymyroireu tahe sodadu mahãdu wyhy itxena heka Templo woki riyrubunymyroire Kia wese heka iòlò riwinymyroire iu.
\v 12 Kiamy rare Deuxu Hoboaõ rityhynyre-ki tai tii idi rahuõre. Kia bedeu Judá mahãdu-ki iny Deuxu txi tõhõti reamy roire.
\s Hoboaõ iòlònamy
\v 13 Tai dori heka Jerusalĕ-ki Hoboaõ awimy idi iòlòmy roire. Tii 41 beòra-di iòlòmy ralore idi heka 17 beòramy Jerusalĕ mahãdu iòlòmy roire, kia hãwã heka Deuxu ritare tahãwãmy, tanimy Isaeli mahãdu tai reàlànykremy Jerusalĕ hãwãmy ritare wahe. Hoboaõse heka Naamá inire tii Amõ mahãdu heka rare.
\v 14 Iribi heka Hoboaõ iwo ibinare Deuxu-ò. Tii rityhynyõre dori. Deuxudewimy rierykõkremy.
\v 15 Hoboaõ iòlòna iònana bedeu ijyy Semaiá tyyriti-ki roire, Idu rybedumy tyyriti-ki roire tule. Tai riki roire iriokòrereny nimy tyyriti-ki roire. Iribi heka Hoboaõ, Jeroboaõ wana rorenymyroiremyhỹ kie.
\v 16 Idi heka Hoboaõ rurure tai Davi Hãwã-ki rituunyre ilabiereny wabe-ki; iriòre Abiasi iòlòmy ralore tyby deròwymy.
\c 13
\cl Capítulo 13

\s Abiasi Judá iòlòmy (1 Iòlò mahãdu Tyyriti 15.1-7)
\p
\v 1 Jeroboaõ Isaeli iòlòmy debò inataõ beòra-di heka Abiasi Judá iòlòmy ralore.
\v 2 Tii heka Jerusalĕ-ki inataõmy beòra-di iòlòmy runyre. Iseni tahe Mikaiá, Urieli riòremy, Jibeá mahãdumy. Abiasi Jeroboaõ wana rorenyrenyre.
\v 3 Abiasi heka 400 mil sõwe sodadu ruruduhukỹ idi rare, Jeroboaõ tahe itxi reare 800 mil sodadu ruruduhukỹ sõwe.
\v 4 Abiasi heka Semaraĩ hãwãlò-ò raòwònyre, Ebaraĩ hãwãlò ribi ryryre:” Jeroboaõ Isaeli mahãdu, Boholabenyke!
\v 5 Kai boho heka teerytenyte dori, Isaeli Deuxu heka Davi riokorerenyò-le iòlòna tuhyyymy riwahinyre, Davi wana tuu ritobinyre dori, teerytenyte.
\v 6 Ihỹre heka Jeroboaõ, Nebaté riòre heka, Davi riòre Salomaõ deòdumy, Deuxu deramy teate.
\v 7 Hãbu mahãdu itxỹtereny iaõkõ mahãdu heka Jeroboaõ wana ributunyre Hoboaõ Salomaõ riòre-ò teramy rỹimyhỹre dori. Juhu heka Hoboaõ itỹmyramy roireu iruruõre tai aõ riwinyõre.
\v 8 Wiji tule kai boho Davi riokore mahãdu Deuxule iòlòna tuhyy riwahinyre, teramy toimãhãte. Kai boho asõwerenymy toimyhỹte, kia bororeni womati tỹrỹrỹhỹkỹ-di Jeroboaõ riwinyre surioko tadeuxumy asuriokoreny tetxienytenyte.
\v 9 Kai bohole heka Deuxu xiwena wahidỹỹdu heka teramy teatenyte, tii boho Araõ riokorerenymy roire, Levi mahãdu-ò teramy teatenyte, ihỹre heka axiwenadỹỹdurenyle kai boho tetatenyte, iwese bede mahãdu riwinymyhỹre wesemy, inatyhy aõkõ aõbo? Inyõle heka sohoji bororeni riòre-di, debò inatxi budoeni hãbu-di aõtxile xiwena wahidỹỹdu heka rare surioko-ò. Tii heka Deuxu aõkõ rare.
\v 10 “Jiarỹ boho tahe, Deuxu heka waDeuxureny rare, tiu ararirenyõtyhy. WaDeuxu xiwena wahidỹỹdu heka, Levi mahãdu wana Araõ riokore heka rare.
\v 11 Tuhyymy ruu-dile heka, txutue ttxiorowo tule xiwena riwahinymyhỹrenyre Deuxu-ò. Lỹnyrena xiwena tule, paõ brebuna heka iwese Deuxu rarybere wese heka tai roire Deuxu kotxi, bedesòmy tuhyymy loòsònareny Womati tỹrỹrỹhỹkỹ-di ritoonyrenyre. Ibutu Deuxu rarybere iwesetyhymy rewinymyhỹrenyre WaDeuxureny-ò, kai boho tahe Deuxu teritenyte dori.
\v 12 Betehe inyhe! Deuxu wawanarenymy ratximyhỹre; Wakoreny-txi rỹimyhỹre wawedureny heka rare. Tai heka Deuxu xiwena wahidỹỹdu mahãdu tajurònareny-di ritxuròrenykre, idi heka rirajuarenykreu adeereny-ò kedeakremy
\v 13 Juhu heka Jeroboaõ tasodadu mahãdu riteònyre Judá sodadu mahãdu hewo-ò tii dori ikorenymy roire heka iòludureny iheworenymy roiremyhỹ.
\v 14 Iu Judá mahãdu tahewomy reteherenyre robirenyre heka itxireamy roire heworeny-ki ikoreny-ki tule itxireamy roire tai Deuxu-ò ryryrenyre heka ixiwenadỹỹdu mahãdu heka tatxurònareny ritoanyrenyre iu.
\v 15 tai Judá hãbu mahãdu rirajuarenyre, rirajuamy itxireamy roirenyre, tai heka Jeroboaõ Isaeli sodadu mahãdu heka Deuxu iribireny rotare Abiasi iòlò Judá mahãdu wana Rotare Deuxu ruru-di.
\v 16 Judá mahãdu lau heka Isaeli mahãdu rahenyrenyre, Abiasi Deuxu riwahinyre Judá mahãdu-ò, isodadureny heka 500 mili sõwe heka rururenyre Judá mahãdu-ò Deuxu riwahinyre dori.
\v 17 Kia wese heka Isaeli sodadu mahãdu ribi Judá mahãdu rotare Deuxu ruru-di tii boho heka Deuxu rityhynyrenyre iwese ilabiereny Deuxu rityhynyrenyre wese.
\v 18 Abiasi Jeroboaõ hekihyy reamy roire Betel hãwãmy iribi rahaananyre, Jesana hãwãmy, Ebõrõ hãwãmy ijõ hãwã hãwã wera ludumy tule.
\v 19 Abiasi iòlòna bedeu heka Jeroboaõ iribi rotaõtyhy inahatxi taheka Deuxu riwotõmonyre idi Jeroboaõ rurure.
\v 20 Abiasi taheka rexirurudỹỹnyre. Ihawyy mahãdu heka 14my rasõwe iriòre hãbu tahe 22 sõwemy roire, iriòre hawyy tahe 16 sõwemy roire.
\v 21 Kiamy Abiasi ijyymy heka roire Idu rybedu tyyriti-ki roire wahe.
\c 14
\cl Capítulo 14

\s Asa iòlònamy (1 Iòlò mahãdu Tyyriti 15.8-24)
\p
\v 1 Idi tahe Abiasi rurure Davi hãwã-kile rituunyre, iriòre iòlòmy ralore, Asa heka inire. Asa iòlòna bedeu heka Judásu-ki debòwiò beòra-di ywinamy roiremyhỹ.
\v 2 Asa iólò heka awimy Judá mahãdu ridinodunyre iòlòwi rare tii Deuxu riteysanyre.
\v 3 Surioko-ò xiwenamy teramy reare, surioko raxiwenyrenykre teramy reare, baali surioko xiwena reatykremy riteònyre Aserá surioko kia xiwenamy tule riorore.
\v 4 Isaeli mahãdu Deuxutyhyhykỹle rityhynyrenykremy heka Asa riteònyre, ilabiereny Deuxu heka sohojihyyle reàlànyrenykremy ritidire, Deuxu bede ywinale rityhynyrenykremy ritidire.
\v 5 Surioko xiwenareny heka hãwã hãwã Judá-ki roire heka teramy reare, xiwena lỹnyrena tule. Tai dori ywinamy iòlònamy heka roire.
\v 6 Òtity hãwã hãwãmy riwinyre, iòlòna bedeu heka òludu mahãdu itxi reaõhyymyroire, Inynyrỹ Deuxule ywinamy su-ò riwahinyre dori.
\v 7 Judá mahãdu-ò Asa rarybere:_ Wiji heka aõbina ijõõre tai hãwã hãwã rikiòtitynyrenykre, ijótòbòna nihiỹ tule. Deuxu-ò reàlàmy rỹimyhỹrenyre dori. Irybemy reòbymy rỹimyhỹrenyre iwese tii rarybere iwese rewinymyrỹimyhỹrenyre. Tai dori Tii ywinamy riwahinymy rỹimyhỹre inydeereny ywinamy riwahinymyhỹre iny òludureny ribi. Taheka ibutu inydeereny roimyhỹre Deuxudewimy rare.
\v 8 Asa íòlòmy heka isodadureny Judá mahãdu 300 mili hãbu sõwe tawyhy itxenareny-di, tatõnõrirenydi ijõ isodadureny heka Bejamĩ mahãdu heka 280 mili sõwe tawyhy itxenarenydi taxiwahaterenydi tawyhyrenydi. Kia hãbu mahãdureny ruruduhukỹmy ibutumy roimyroiremyhỹre.
\v 9 Iu heka Será, Etiopia ludu heka rare. Tii Judá mahãdu-ò itxi reare heka isodadureny tahe sohoji milão sõwe reare 300 awaru tewe-di sõwe rearenyre heka maresá hãwã-ò itxi rearenyre.
\v 10 Asa heka tasodadu mahãdu riywinyre inatxi mahãdumy Judá sodadu, Bejamĩ sodadu rirahurenyre Sebatásu-ò maresásu iòhòmy.
\v 11 Asa tahe taDeuxu-ò reixitòenyre riwiòhenanyrenykremy:_ WaDeuxu kai rurudu tate. Iaõkõ mahãdu tewiòhenany mahãte, rurudu mahãdu tule tewióhenany mahãte, wiji heka biwawiòhenanykre, iny boho aratyhynymyhỹrenyre dori anidi sodado mahãdu sõwe-ò rekearenykre. Kaile waDeuxureny heka Tate! Arurudi iny rotakre!
\v 12 Tai Asa reixitòenyretasodadureny etiope ludu mahãdu-ò itxi rearenyre heka Deuxu riwiòhenanyre, tai Isaeli lau Etíopi sodadu mahãdu heka rirahumy raijiranyrenyre,
\v 13 Isaeli mahãdu iherenymy roimyroire hykyhyky Jerásu-ò rahenyrenyre. Tai riki Etiopi rirubunyrenyre, ibutumy ijõ rahenyõre ibutumy rirubunyrenyre. Deuxule rihudỹỹnyre dori. Asa sodadu heka ibutu sodadu mahãdu iaõnareny heka rimyrenyre sodadu iaõna õna riwyrenyre iribi.
\v 14 Irahudi heka Jerásu iòhòmy hãwãmy tai roire Asa sodadu mahãdu itxi reare. Kia hãwãdu mahãdu Deuxu lau ruberumyroiremyhỹ. Asa sodadureny kia hãwã hãwã ribi iaõnareny wihikỹ riwyrenyre kia hãwã ribi.
\v 15 Tõhõreny sõwemy tule iribireny ridyrenyre, bororenireny, budoenireny, kamelureny sõwe ridyrenyre irahudi Jerusalĕ-ò roroserenyre.
\c 15
\cl Capítulo 15

\s Asa Judá mahãdu bededỹỹnana riòbitinyre. (1 Iòlò mahãdu Tyyriti 15.13-15)
\p
\v 1 Idi heka Deuxu Tyytybytyhy Asariá tyre-ò dubehede, Asariá Odede riòre rare.
\v 2 Asa-ò Tii rarybere: _ Iòlò Asa, Judá mahãdu, Bejamĩ mahãdu boholabenyke! Deuxu awanareny ratximyhỹre, kaiboho Tii wana atxiteri wana heka tamy biijebenykeki tahe adeereny rexitỹnynyke, tahe beribenykeki tule ararirenyke.
\v 3 Juhuu heka Isaeli mahãdu Deuxu Tyhyhykỹ-ò reàlàõmy roiremyhỹ, xiwena wahisidỹỹdu tule raõhyyra, Deuxu bede ywina rieryõhyyre.
\v 4 Iribi tahe bede ibinamy tamyreny rehemynyreu heka Deuxu-txile tõhõtireny rearenyre, Isaeli Deuxu-txi rijerenyre itxi reamyhỹre.
\v 5 Iu bedeu heka moõ awi ihõõtyhyre, ibutu su-ki heka ibina binamy iny rỹimyroiremyhỹ.
\v 6 Bede mahãdu witxi reamy roiremyhỹ, Deuxu tamyreny aõ bina, bina bede mahãdu-ò risỹnymyroiremyhỹ.
\v 7 Tahe wiji kai boho breburenyõmyhỹbenyke, bexirurudỹỹmyhỹbenyke, uritre woxierysyõmy mahãbenyke, ibutu aõ biwinybenykeki awimy matxibenyke.
\v 8 Asariá ribile Deuxu rarybere Asa roholare kia Odede riòre Deuxu Rybemy rarybere heka tai Asa rirurudỹỹnyre. Idi tahe Asa ibutu surioko bina binahakỹ heka rahure. Judasu-ki su riokomy riramyhỹ rahure, Bejamĩsu-ki surioko rahure kia hãwã hãwã tii itxi reare tai tule suriokomy rahumy rỹira Ebaraĩ hãwalòkile. Idi Templo koki ube-ki kia riòbitinyre. Deuxu xiwenamy riòbitinyre.
\v 9 Idi tahe ibutumy kodoikremy rarybere Judá mahãdumy, Bejamĩ mahãdumy, Ebaraĩ mahãdumy, Mansasesi mahãdumy, Simeaõ mahãdumy judá tai rasỹnymy roire heka ibutumy tamy kidirahudenykremy. Tii boho rieryrenyre Deuxu Asa iòlò wana rare-ki tai doidenyde tamy sỹmy.
\v 10 Iu heka Asa iòlò wana Jerusalĕ hãwã-ki tii boho ibutumy rexibutunyrenyre heka 15 beòramy bedeu inataõna ahãdu-di Asa iòlòna bededỹỹnanau.
\v 11 kia txuu heka 700 bororeni sõwe 7 mili budoeni sõwe heka alòre taòludu iròdu nõhõ diwydenyde heka xiwenamy riwahinyrenyre Deuxu-ò.
\v 12 Iu heka Deuxu wana wii ritobinyrenyre Deuxu-ò rexiwahinyenyre, Ilabiereny Deuxu-ò taworeny ribi inatyhymy Deuxu-ò ritidirenyre tauwo ribile.
\v 13 Inatyhytyhymy ritidirenyre taryberenymy inyõ rityhynyõkre wana rurukre ibutumy, uladukeki, hãbukeki, hawyykeki my.
\v 14 Iteremy Deuxu-ò raryberenyre, Deuxu Tyhyhykỹ koki raryberenyre, inatyhytyhymy òbitityhymy rỹirenykremy ryryrenyre, jurònadi rotoanyrenyre heka, kia ryberenydi reysarenyre.
\v 15 Kia rybe-di heka Judá mahãdu ibutumy reysarenyre tawo ribi inatyhytyhymy Deuxu-ò ritidirenyre dori. Deuxu-ò rijerenyre itxi raharenyre Deuxu tamyreny riòbynyrenyre-ki tai dori bede ywinamy isureny roimyroiremyhỹ isỹ weraludu mahãdu ribile awityhymy roiremyhỹ.
\v 16 Tai Asa talahi Maaka heka Asa ritare Judá wedu ribi. Tii dori suritxoomy deàlàna riwinyre-ki Aserá inire suriokoni. Kia heka Asa ribòhònyre, sunõdele relere, idi risõre suritxoo brybrymy Sedõrõsu-ò idi rehure.
\v 17 Ibutumy suritxoo rahuõre ihỹre Asa iòlòna bedeu heka Deuxu koki òbitimy rare ibededỹỹnana tuhyy.
\v 18 Tii Deuxu Templowo-ò ibutu aõna õnawi tyby riwahinyre tai ritidire tule ijõ womati Tỹrỹrỹhỹkỹ iura, womati Tỹrỹrỹhỹkỹ tiile riwahinyre tai ritidire Templowo-ò.
\v 19 Iu heka Aõbina ixãwire heka bede awimy roire hyky hyky. 35 beòra bedeu heka iòlònamy ònanamy aõbina roire.
\c 16
\cl Capítulo 16

\s Isaeli mahãdu-ò aõbina binamy. (1 Iòlò mahãdu Tyyriti 15.16-22)
\p
\v 1 Asa 36 beòra-di iòlòna bedeu heka Isaeli iòlò Baasá inire tii tasodadu mahãdu Judasu-ò itxi rearenyre Hamá hãwã rahaananyre idi riurawonynyre tai ribile heka ryy-di itxeredumy moõ ralòõkemy, moõ rohònyõkemy tai Judásumy, Jerusalĕ ryy moõ raloõtyhy. moõ rohónyõtyhy.
\v 2 Tai idi Asa iòlò heka taheto ribi womati tỹrỹrỹhỹkỹ rimyre, Deuxu heto Templo ribi womati tỹrỹrỹhỹkỹ iura rimyre idi tadeòdu mahãdu-ò riwahinyre, iu heka Damasusu-ki Siriá Iòlò Beadade-ò wedumy rare. Asa deòdu Damasu-ò roirenyre Asa riteònyrenyre tamy rybemy myy:
\v 3 Beadade, iòlò, iwese iny tybyreny biòwamy roire wesemy rakatxirenyke awi? Kia womati tỹrỹrỹhỹkỹ, kia womati tỹrỹrỹhỹkỹ iura heka ahõrõ rare. Tahe uritere Isaeli iòlò Baasá wana bexitake wiòhenadỹỹ ribi, tii heka wasu ribi bitake, tasodadu mahãdu bitake.
\v 4 Tai Asa rybe-ò Beadade riòbynyre tai heka tasodadu mahãdu Isaeli mahãdu-ò itxi reakremy riteònyre. Isodadureny heka itxi rearenyre heka ijò hãwã-ò, Dã hãwã-ò, Abelihaĩ hãwã-ò, ijõ Nabitali hãwã hãwãmy kia rasỹna yrybumy tai roire itxi rearenyre dori.
\v 5 Iu Baasá rieryreu heka taõmysỹdỹỹdu mahãdu riixãwididỹỹnyre òtity widỹỹdu mahãdu.
\v 6 Tai Asa Isaeli mahãdu riòrykremy riteònyre kia ibutumy òtity aõna õna heka idi raixãnyrenyre, mana, òwòru heka riwyrenyre Sebá hãwã-ò, Misibá hãwã-ò tai riòtitynyrenyre.
\s Hanani Asa iòlò-ò rybemy rare.
\v 7 Iu heka Hanani Deuxu rybedumy Asa Judá iòlo-ò rybemy rare, tii rarybere: _ Iòlò, kai heka Síria iòlò-ò tetyhynyte aDeuxumy tetyhynyõte kia òraru-ki aribi Isaeli iòlòmy rihenyre nyre dori.
\v 8 Juhuu Etiope tasodadu mahãdu rasõwerenyre adee reakemy, Libiá sodadu mahãdu rasõwerenyre taawaru tewereny-di sõwe adee reakemy inatyhy? Ihỹre heka iu Deuxu tetyhynyte, Tii arawiòhenanyre, inatyhy?
\v 9 Ibutu bede-ki aõhebo rotỹỹnymyhỹre heka Deuxu itxeremy idihyy rynymyhỹre ibutu tawo ribile rityhynyre mahãdu-ò riwiòhenanykremy. Wiji heka iòlò, itxỹtemy tewinyte tai dori aõbina bina aiòlòna tuhyymy ratxikre.
\v 10 Tai heka Asa Hanania-ò sõwemy reburere Hanania kõhĕtxi-di ritaataare ròtenawo-ò riteònyre. Kiau heka Asa tasỹ mahãdumy raòludure tule.
\s Asa rurure. (1 Iòlò mahãdu Tyyriti 15.23-24)
\v 11 Ibutu Asa iòlò widỹỹ, iòlòna bedeu irubu-ò kia ijyy heka Judá, Isaeli iòlò mahãdumy Tyyriti-ki roire.
\v 12 Asa iòlònamy 39 beòramy bedeu heka webinadumy resere, iwa heka bina binamy roire, ihỹre heka Deuxu-ò reixitòenyõtyhy, òhutibedu mahãdu rityhynyre Deuxu ratyre.
\v 13 Asa iòlònamy 41 beòramy bedeu heka tii rurure.
\v 14 Davi hãwã-ki juhuu hãloo riare tii rarybere-ki tai rituunyre idi lỹnyrena, aõna ona wihikỹ wana rituunyre. Irahu-di heka iwabede ratya-ki heòty ritoonyrenyre deàlànamy.
\c 17
\cl Capítulo 17

\s Josafá Judá Iòlòna riòrarunyre
\p
\v 1 Asa tyby deròwymy Josafá ralore Judá mahãdu wedumy taijoi ridinodunykremy ralore.
\v 2 Ibutu hãwã hãwã òtitydire-ki idi rarurunyre Judá hãwã-ò sodadu mahãdu riteònyre, Ebarĩ hãwã tule ibutu tyby juhu ridinodunyre tule tasodadureny riteònyre.
\v 3 Josafá wana Deuxu raremyhỹ tyby wesele, òbitimy raremyhỹ. Tii suriokomy Baalĩ reàlàõre tyby wesele Deuxu rityhynyre.
\v 4 Tule tyby Deuxumy reàlàre Deuxu bede ywinamy reòbyra tahe Isaeli mahãdu wesemy aõkõ riwinyre.
\v 5 Deuxu tii wana rare tai rirurudỹỹnyre tai Judá mahãdu ibutumy aõna õna wihikỹ tamy riwahinyre. Tai tii ratyhynyre ini bede bedemy reare.
\v 6 Josafá heka tuhyy Deuxu rybe myna idi ratximyhỹre. Surioko deàlàna tai ijõdire riixãwididỹỹnyre Aserá surioko òtity judá hãwã-ki roire tule rahure.
\v 7 Josafá inataõna iòlòna beòramy heka Judá hãwã-ò tii riteònyre kia hãbu mahãdu Deuxu rybe ywinamy rierynanykremy: Bĕ-Haĩ, Obadá, Sakarias, Netaneli, Mikaiasimy.
\v 8 Tii boho wana roirenyre Semaas, Netanias, Zebadias, Asael, Semiramote, Jônatas, Adonias, Tobias e Tobe-Adonias. Xiwena wahidỹỹdu mahãdu tule roirenyre: Elisama e Jeorão
\v 9 Deuxu bede ywinamy tyyriti-di riwyrenyre heka ibutumy Judá mahãdu rierynanyrenykremy
\v 10 Judásu wera ludu mahãdu Deuxu rityhynyrenyre tai dori hãwã hãwã mahãdu heka Josafá itxireny reaõre.
\v 11 Filixiteu mahãdu heka diwyde womati tỹrỹrỹhỹkỹ Josafá-ò, su òwymy diwyde, tule arabé mahãdu tamy diwyde 7mili 700 budoeni sõwe, 7.700 watxini sõwe.
\v 12 Josafá tahe Deuxu rirurudỹỹnyre ierena tahe riruruterenymy roire tahe hãwã òtity òtitymy riwinyre, rasỹna yrubuna heto riwinyre tule.
\v 13 Tai tarasỹnareny riyrubunyre sõwemy. Jerusalĕ hãwã-ki heka tasodadu teburehekỹ ibedeeryhykỹ risỹnyre.
\v 14 Katahe Judá mahãdu isodadureny tamahãdu tamahãdu ridinodunyrenyre sodadu wedu ruruduhukỹ, ijesuduhukỹmy inirenymy roire: Adina 300 mili sodadu sõwe ridinodunyre,
\v 15 Joanã 280 mili sodadu sõwe ridinodunyre;
\v 16 Deuxu-ò raõmysỹdỹỹnykremy rexiwahinyre Sĩkirĩ riòre Amasiá 200 mili sodadu sõwe ridinodunyre;
\v 17 Bejamĩ mahãdu tahe Ijesudu ruruduhykỹ Eliadá 200 mili sodadu sõwe ridinodunyre isodadureny heka ixiwahatereny-di iwyhyreny-di roire;
\v 18 iònana tahe Jeozabade, com 180 mili sodadu sõwe ridinodunyre,
\v 19 Tii boho alòre debòna direnyre tii boho iòlòreny idi itxeredumy roire, ijõ Judá hãwã hãwãmy òtity itxeredumy roire.
\c 18
\cl Capítulo 18

\s Akabe-ò Mikaiá ribedeerynanyre (1 Iòlò mahãdu Tyyriti 22;1-28)
\p
\v 1 Idi heka heka Josafá iòlò ratyhynyre inimy heka bede bedemy reare iu heka Akabe Isaeli iòlòmy isỹ mahãdu Josafá Judá iòlòmy isỹ mahãdu wana doide.
\v 2 Bede roimyrare heka Samaria hãwã-ò Akabe rare. Tii iròdu sõwe rirubunyre rasỹna wityhymy riywinyre idi Josafá-ò tasodadu mahãdu-ò byremy riwahinyre. Iu Akabe Josafá-ò rarybere tii wana alòremy roikremy Hamotxi Jileadé hãwã itxi reakremy:
\v 3 Tii Josafá-ò ritỹỹraxinyre:_Kai wawana manakre Hamotxi hãwã-ò itxi reakremy aõbo? Tai Josafá dirawyònyde:_Tiubo bexihukre alòre-ò jiarỹ tai watxikre. Tai tule wasodado mahãdu tamy alòremy aròrenykre tule.
\v 4 Txiòiny juhu heka waDeuxureny-ò arỹỹraxirenykremy.
\v 5 Tai heka 400 Deuxu rybedu mahãdu-ò Akabe rỹỹraxire:_ Kai boho wadeereny manarybebenyke. Hamotxi hãwã-ò itxi arearenykremy aõbo ada aõkõre aõbo? Tii boho tamy rirawyònyrenyre: Kohe, itxi beabenyke. Deuxu adeereny riwahinykre Hamotxi hãwã-ò, bòrenybenyke tai Deuxu aratarasadỹỹnyrenykre òludu ribi.
\v 6 Ihỹre Josafá tamyreny rỹỹraxire:_Ijõ aõbo Deuxu rybedumy ijõõre tamy arỹỹraxikremy aõbo, tii Deuxu ribile wadeereny rarybekremy?
\v 7 Akabe tamy rirawyònyre:_ Ijõdire aõma Mikaisi inire, tii ĩla riòre heka rare, tahe ihỹre tii ibinare wadee rare, awimy aõkõ rarybemyhỹre, tuhyymy ibina rybemy wadee rarybemyhỹre. Tai Josafá tamy rarybere:_Tuu rybeõmy kiawese.
\v 8 Idi Akabe Mikaisi riòryrenykremy riteònyre.
\v 9 Iu Samaria hãwã ijòtòbòna ribi ralòkremy tai iòlòreny runanamy runymy roirenyre ikoreny heka rybedu mahãdu relyymy roiremyhỹrenyre.
\v 10 Sedekia heka Kenaná riòre heka bororeniò womati-di tamyreny rarybemy roimyhỹre : “Akabe iòlò, myy Deuxu rarybemyhỹre heka:_Kaa bororeniò-di siru mahãdu ribi botakre.”
\v 11 Idi ibutu Deuxu rybedu mahãdu iweselemy rarybemyhỹre: Tii boho raryberenyre. Hamotxi hãwã-ò itxi beake botabenyke. Deuxu arawiòhenanyrenykremy.
\v 12 Iu heka Mikaiasi òrysydu rarybere tamy:_ Mikaisi, wiji ibutu Deuxu rybedumy rarybere heka iny iòlòreny aõbina ribi botakremy rarybemyhỹrenyre. Irybe weselemy marybeke.
\v 13 Tai Mikaisi rarybere:_Jiarỹ heka inatyhytyhymy Deuxu dewimy irybetyhylemy òbitimy ararybekremy.
\v 14 Mikaisi ritehemynyreu heka Akabe ióló tamy rỹỹraxire:_Mikaisi, jiarỹ Josafá wana Hamotxi hãwã-ò arearenykre aõbo ada aõkõre aõbo? Mikaisi tamy rirawyònyre:_ Itxi beabenyke, Deuxu ararurunyrenykre.
\v 15 Tai Akabe tamy rarybere:_ Deuxunimy wadee marybekeu heka òbitimy wadee manarybeke, uritere adee rarybere dori óbitimy aõkõ wadee tarybe mahãte.
\v 16 Mikaiasi tai rirawyòmy:_Tuu idi retehera Isaeli wiribi ybỹtỹmy hãwãlò ratyy-di budoeni wesemy iwedukõmy rỹireri wese. Tai Deuxu rarybere: “Kai hãbu mahãdu iweduõre tii boho rooserenykre taheto ywinadi.”
\v 17 Tai heka Akabe Josafá-ò rarybere:_Beteheinyhe! Kia tuu rarybera tii tiu rybewi-di wadee rarybeõmyhỹre! Urile rybe bina binale wadee rarybemyhỹre.
\v 18 Mikaiasi tarybe riòrarunyre:_Wiji heka boholake Deuxu rarybereri-ò! Tuu rabira Deuxu tarynana-ki runyreri biu-ki, ibutu ỹju mahãdu iwera-ki lamymy rỹireri ijõ ruruwe ribi ijõ hywe weribi.
\v 19 Dexu ritỹỹraxira: “Mobo Akabe ribonyke Hamotxi hãwã-ò rakremy tai rurukre. Tai ỹjuõ mahãdu aõ raryberenyre, Ijõ ỹjuõ mahãdu heka iwitxira raryberenyre.
\v 20 Tai tyytybyõ Deuxu iwera-ò rehemynyre tamy rarybere:” Jiarỹ aribonykre Akabe”. Deuxu rarybere: “Timybo?”
\v 21 Tyytyby rirawyònyre: Jiarỹ arakre tai ibutumy rybedu mahãdu Akabe rui rarybekremy ariwinykre.” Tai Deuxu rarybere: “Make bibonykemy Akabe.”
\v 22 Mikaiasi Akabe-ò rarybere:_Kai wiji teeryte Deuxu riwinyreri ibutumy arybedu mahãdu heka raruirenykremy. Deuxu idi rõhõtinyre timybo ròhónykre ibina adee, iòlò.
\v 23 Tahe Sedekia rybedu heka Mikaiasi wera-ò rehemynyre, tai rihetenyreiò bira-ò rihetenyre tai ritỹỹraxinyre. Tiubo Deuxu tyytybytyhy waribi ròhònyra adee rarybekremy?
\v 24 Mikaisi rirawyònyre tamy: Kai bierykre tiubo heto-ò iwotxi ralokreu rexiwokremy.
\v 25 Tai Akabe iòlò rarybere tasodadu-ò:_ Mikaiasi heka bidykre Amõ hãwã wedu-ò, iòlò riòre Joasi-ò bidykre.
\v 26 Marybeke tamyreny: _Kaa wese iòlò rarybere kaa hãbu heka rotena-ò bisỹnyke, orotxu bee wana biwahinyke tamy adoosekreu warumy adoosekre.
\v 27 Mikaiasi Deuxu rybedumy rarybere:_kai iòlò arumy bodoosekreu heka Deuxu waribi rarybeõra dori ywinamy bodoosekreu wahe. Ibutumy heka wiji warybemy boholabenykewa!
\s Akabe rubumy (1 Iòlò mahãdu Tyyriti 22;29-35)
\v 28 Roirenyrehe Hamotxi Jileade hãwã-ò Akabe Isaeli iòlò, Josafá Judá iòlò.
\v 29 Iu Akabe Josafá-ò rarybere_Alòre-ò riòrarunyreu heka jiarỹ watyy iwitxiranykre idi aratxikre. Kai tahe atyy-dile matxikre aiòlòtyhydile. Tai Isaeli iòlò ityy rawitxiranykre idi ròrenykremy.
\v 30 Iu Siria iòlò heka rarybere awaru tewe sodado wedu mahãdu-ò inyõ aõkõ bimyke Isaeli iòlòle itxi beabenyke myy.
\v 31 Tai dori Awaru tewe sodado wedu mahãdu Josafámy robirenyre itxi rearenyre Isaeli iòlòmy rareki. Tai Josafá rirajuare Deuxu-ò. Deuxu riwiòhenanyre kia sodadu mahãdu iribi Deuxu ritare.
\v 32 Tii boho dori robirenyre Isaeli Iòlòmy aõkõ raremy tai ririrenyre.
\v 33 Iu heka Siria sodaduõ bedehetxilemy wuhy-di rehure tai Isaeli iòlò tai riwere wyhy terawotxi. Akabe rirajuaretewe dinodudi-ò biwatake kaa ribi sõwe rawotõmõnyre dori.
\v 34 Kia txu heka sõwe ròrenyrenyre taheka Isaeli wedu lamymy roimy rare idihyky hyky bede ratxioronyreu heka tii rurure.
\c 19
\cl Capítulo 19

\s Jeú Deuxu rybedu Josafá rybemy-ò rare
\p
\v 1 Iribi heka Josafá Judá mahãdu iòlò tasỹ-ò roosere Jerusalĕ hãwã-ki.
\v 2 Iu Hanani riòre, Jeú Deuxu rybedu iòlò rybemy rare. tii rarybere:_ Aõherekibo ibina mahãdu tewiòhenany mahãte, Deuxu óludu mahãdu biòwamy tate? Kia òraruki heka Deuxu aõhõkỹmy arasỹnykre.
\v 3 Ihỹre heka ijõ awi tewinyte aõma su ritxoo Aserá ini tahe tehute tule awo ribi Deuxu tetyhyny mahãte.
\s Wahisidỹỹdu mahãdu heka Josafá ritare.
\v 4 Josafá Jerusalĕ hãwã-ki rasỹnymy roire, tii hãwã hãwãmy idi itxeremy roire Beseba iraru ribi Ebaraĩ bederatòò ibòò-ò. Judá mahãdu ilabiereny Deuxu-ò tõhõti itxi reakremy tii idi rarurunyrenyre.
\v 5 Judásu hãwã hãwã-ki wahisidỹỹdu mahãdu risỹnyre kia hãwãreny heka iòtityreny-di roimyroiremyhỹ.
\v 6 wahisidỹỹdu mahãdu-ò rarybere:_Aõbiwinybenykeu heka bexiywinyke, òbitimy idi mohõtinybenybe aõhebo botỹỹnybenyke Deuxunimy botỹỹnybenyke hãbunimy aõkõ botỹỹnyke. Tai dori ibutu aõ biwinybenyke Deuxu awanareny ratxikremy wahe.
\v 7 Tai dori Deuxu bityhynybenyke aõ biwinybenyke heka òbitimy biwinybenyke awidỹỹreny heka ywimy matxibenyke, Deuxu dori ibinamy tai rahamyhỹre inyõ òbitiõmy riwinymyhỹreu, tulesỹ urihixina òbitiõmy riwinymyhỹreu heka ibinare Deuxude, rybe òbitiõ ritimyhỹreu ibinare, kia heka ijõ uri nieru-di rybemy riòwynymyhỹre heka ibinatyhy Deuxude. Nieru heka rybemy riòbitinyõre dori.
\v 8 Tule Jerusalĕ hãwã-ki heka Josafá risỹnyre Levi mahãdumy, xiwena wahisidỹỹdu mahãdumy sỹwedu mahãdumy tai Deuxu rybemy rierynanykremy Jerusalĕsỹdu mahãdu raòbitinyrenykremy, tule aõtxile rybemy ridinodunyrenykremy.
\v 9 Tii tamyreny rarybere:_Óbitimy awidỹỹnareny Inynyrỹ Deuxu-ò biwiny mahãbenyke, bityhynybenybe, awo ribile inatyhymy.
\v 10 Iu hãwã hãwãsỹdu mahãdu akoreny rubumy relyykeki ada Deuxu ywina rybemy raòbyõkeki, rybe òbitimy riòbyõkeki heka tamyreny marybebenyke Deuxu-ò uritere raòrarunyrenyõkemy, Deuxu aõhõkỹmy dỹỹnana rihenykemy. Kiamy bierynanybenykeki tahe, aòrarureny atyrereny tai ratxiõkre.
\v 11 Deuxu ywina rybemy heka Amariá xiwena wahisidỹỹdu wedu heka ònanamy irybe tamy rarekre. Levi mahãdu wahisidỹỹdu mahãdu riwiòhenanykremy! Bexirurudỹỹnykre, maõmysỹdỹỹnykre! Deuxu arawiòhenanykremy! Òbiti mahãdu ibutumy Deuxu idireny ratxikremy!
\c 20
\cl Capítulo 20
\s Jeosafá Moabe ribi rotare.
\p
\v 1 Irahudi tahe Moabe mahãdu, Amõ mahãdu, Meni mahãduõ heka Josafá-ò itxi reare ròrenykremy.
\v 2 Inyõ mahãdu Josafá-ò ribedeerynanyrenyre: “Edõsu ribi Sodado sõwe adee kedeakremy kua bero kanawebritxò ribi doidenyde. Asasõ Tamá-ki roimyhỹrenyre Ejejisu wahe”
\v 3 Tai Josafá ruberure heka Deuxu-ò reixitòenyre tai ibutu Judá sỹdu mahãdu renareherenykremy Josafá riteònyre.
\v 4 Ibutu hãwãsỹdu mahãdu heka dirahudenyde ributunyrenykre doimỹhỹdenyde Deuxu-ò reixitòenykremy.
\v 5 Josafá Lamymy roire ibutu koki Isaeli mahãdu, Jerusalĕ mahãdu butuna-ki roire Deuxu heto wera-ki
\v 6 tii reixitòenyre: “Walabiereny Deuxu Inynyrỹ, kai biu-ki atximyhỹte aõkõ aõbo? Ibutu bede-ki su iòlòna wedumy tate. Rurutyhy rurunatyhy ebò-ki roire, moõ teramy reaõtyhy.
\v 7 Kasỹdu mahãdu kasu ribi teteònyte Isaeli mahãdu koki amahãdureny-ò tewahinyte kasu tuhyymy ratxikemy, Abraaõ-ò juhu kasu tewahinyte abiòwamy aõkõ aõbo? Kai waDeuxureny
\v 8 Katahe Isaeli mahãdu heka kaki rasỹnymy rỹimyhỹrenyre ani-di heto templo riwinyrenyreu raryberenyre:
\v 9 Aõbina bina aõhe wana inydeereny reakeki, maurehe-di ada binana-di, ada rama riwarubunyrenykeki tahe Deuxu-ò wanõhõtireny rekearenyke kaheto-ò adoidenyde, akoki rakatxirenykremy heka kaheto heka animy roimyhỹre, kakile kaheto-kile atxi wanõhõtireny kedeakre riwaòhytỹnyrenykreu atxi rakaryryrenyke, waixitòedỹỹnarenymy boholake biwatabenykremy.
\v 10 Ihỹre heka wiji kia Amõ mahãdu, Moabe mahãdu, Sei hãwãlòsỹdu mahãdu heka kia mahãdu kai inydeereny tarybete Ejitu ribi iny boho doimyhỹdenydeu itxireny reaõkemy tarybete tai itxireny reaõreny iribireny reiixijerenyre tahe ihỹre wiji heka
\v 11 Beteheinyhe, tii boho wiji heka wadeereny reamyhỹrenyre inysureny ribi riwaòlòdỹỹnymyhỹkremy kasu kai inydeereny tewahinyte dori.
\v 12 WaDeuxureny tamyreny aõhõkỹmy bisỹnyõkre aõbo? Wakireny heka ruruna ihõõre itxireny arearenykremy. Jiarỹ boho heka reeryõrenyre timybo itxireny arearenykremy, tai dori atxi waruereny reamyhỹyre wiji.”
\v 13 Ibutu Judá mahãdu heka tai roire, hãbu tahawyy tariòrereny-di, tohouã-direny ihãre heka ibutumy lamymy roimyhỹre, Deuxu ko-ki.
\v 14 Tai heka iyreny-ki Deuxu Tyytybytyhy heka Jaasieli-ò nade, tii Sakariá riòremy, Benaia ilabiemy, Jeieli iriòre riokoremy, Mataniasi Jesieli tyby iriokoreriore rare, Jaasieli heka levi mahãdu heka rare Asafé ilabiereny tybymy rare, myy rarybere:
\v 15 “Boholabenyke! Ibutu Judásỹdu mahãdu, Ibutu Jerusalĕsỹdu mahãdu, Josafá iòlò tule boholabenyke! Kaa wesemy Deuxu raybemyhỹre adeereny: “Breburenyõmyreke, iwoxieryõmyreke kia sodadu mahãdu sõwe ribi breburenyõmyreke. Alòre heka adeereny aõko rare, Deuxu-ò heka rare!
\v 16 Biurasòmy heka bubehebenke itxireny reakemy. Tii boho heka Sisi ribi dòwòmy kodoidenyke kaiboho heka hãwãlò bede itxi beabenyke, kia Jerueli bederahu koki wii rikibunybenyke.
\v 17 kai boho heka borenyõmy matxibenykemy. Iny sohoji sohoji taihymy matxibenykemy iu bobibenyke heka aõmybo Deuxu riwinykremy, Jerusalĕ mahãdu Judá mahãdu heka Deuxu aratareny dori tuu bobibenyke inatyhy! “Breburenyõmyreke, iwoxieryõmyreke! Biurasòmy heka boibenybe, Deuxu awanarenyratxikremy.”
\v 18 Iu heka Josafá bede-ò resere, tai ibutu Judá mahãdu Jerusalĕ mahãdu bede-ò reserenyre Deuxu-ò reàlànyrenykremy.
\v 19 Idi heka Koate mahãdu Kore mahãdu rawiunyrenyre Deuxu-ò reàlàrenyre iteremy rawiunyrenyre.
\v 20 Ruumy heka Tekoa Bederahy-ò rirahurenyre iu heka Josafá rarybere: Judá mahãdu, Jerusalĕ mahãdu boholabenyke! “ ADeuxu bityhynybenyke tii arawiòhenanyrenykre; Deuxu rybedu mahãdu bityhynybenyke, tai dori botabenyke!”
\v 21 kia rybe rahudi heka wiudu mahãdu ritare Deuxumy reàlànyrenykremy, òbitidumy tii raremy reàlànyrenykremy, sodadu mahãdukoki rirahurenykremy wiunamy: “Deuxumy beàlàmyhỹbenyke iluuna tuhyy ratximyhỹre.”
\v 22 Deuxu-ò àlànamy riòrarunyrenyre iu heka iòludu mahãdureny-ò Deuxu idi rimykremy riywinymyhỹre tii boho heka Amõ hãbu mahãdu, Moabe mahãdu, Seí hãwãlò sỹdu mahãdu iu Judásu-ò rirònyrenyre heka Deuxule ribinanyrenyre.
\v 23 Amõ mahãdu Moabe mahãdu heka Seí hãwãlò mahãdu-ò itxi reare hãbu mahãdu tai roire rirubunyrenyre iribi heka wimy rirubunyrenyre.
\v 24 Bede-ò irehe ribile Judá mahãdu rehemynyrenyreu heka itxeremy tai robireny sodadu mahãdu sõwe rubumy roire; moõ rihenyõtyhy.
\v 25 Tai Josafá tasodadu mahãdu rubu mahãdu-ò roirenyre iaõna õnamy rimyrenyre tai ityy sõwe, sodadu debòna sõwe, aõna õna wiwihikỹ sõwe tai roire, aõma inataõ txu-di roire iaõna õnareny idi riarimy roire riòbynyõre riwyrenyke sõwere -ki.
\v 26 inaubiòwa txu-di heka rexibutunyrenyre Beraka hãwãlò bede-ò, taile heka Deuxumy reàlàmyroiremyhỹ. Tai wiji Beraka hãwãlò bede-ò raninira.
\v 27 Irahu-di heka Judá mahãdu, Jerusalĕ mahãdu heka Josafá ridinodunyrenyre rooserenykremy deysamy Jerusalĕ-ò; Deuxu dori riteysanyrenyre, iòludu mahãdureny ribi rotarenyre Deuxu riwiòhenanyrenyre.
\v 28 Jerusalĕ hãwã-ò rirònyrenyre heka Deuxu heto-ò roirenyre wiu-di violaõ wesenamy, txuròna sãowe rotoanymy roiremyhỹ.
\v 29 Iu heka bede mahãdu ibutumy Deuxu lau ruberumyroire bede mahãdu rieryrenyre heka Deuxu idireny ròrenyre iòludureny rotare tai ruberurenyre bede mahãdu iu.
\v 30 Tai heka Josafá bedeu heka iòlònamy ywinamy roimy, Deuxule tuu riwinyre ibutu suweramy mahãdu heka Josafá iòlònamy Deuxu ywinamy riwahinyre.
\s Josafá iòlònamy ònana bedeu.
\v 31 Kia wese heka Josafá Judá iòlònamy roire. Tii 35 beòra-direu heka iòlòmy ralore idi 25 beòramy Jerusalĕ-ki iòlòmy roire. Iseni heka Asubá rare Sili riòremy.
\v 32 Tyby Asa wesemy roire, iwesele tyby rare iwesemy tii riwinyre iwitxirake aõkõre; Deuxudewimy riwinyre dori.
\v 33 Ihỹre heka Suritxoo xiwena heka rahuõre, tai iny mahãdu tawo tyhymy Deuxu reityhynyõmy roiremyhỹ.
\v 34 Taheka ibutu Josafá ijyymy iòlòna òraruna bedeu ribi iòlòna ònana-ò Jeú tyyriti-ki roire, Jeú Hanani riòremy. Tai ibutu Isaeli iòlò mahãdu bedeu roire tyyriti-ki.
\v 35 Idi heka Josafá, Judá iòlò, heka Isaeli iòlò Akasiá wana aõ ritobinyre, Acasiá òbiti aõkõ rare.
\v 36 Hãwò aõna õna ijohonamy kia hãwò widỹỹmy Josafá, Akasia wii ritobinyrenyre. Juhu heka Esiõ-Jebésu-ki hãwò widỹỹmy roire.
\v 37 Iu Eliesé, Dodabá riòremy Maresá suludu heka Josafa-ò rarybere: “Josafá, kai Acasia wii tetobinyte-ki, kiamy Deuxu rahukre.” Idi heka ihãwòreny ramyrenyre dori.
\c 21
\cl Capítulo 21

\s Jeoraõ iòlònamy. (2 Iòlò mahãdu Tyyriti 8.16-24)
\p
\v 1 Josafá heka rurure Davi hãwã-ki heka talabiereny bire-ki rituunyre, iriòre heka Jeoraõ teròwymy ralore.
\v 2 Jeoraõ iseriòre mahãdu heka roire: Asariasi, Jeieli, Sakariasi, Asariasi, Mikaeli e Sebatxiasimy. Kaheka ibutu Josafá Isaeli iòlò riòrerenymy roire.
\v 3 Josafá heka womati tỹrỹrỹhỹkỹ, womati tỹrỹrỹhỹkỹ ura, aõna õna wiwihikỹ, Judá hãwã hãwã tariòrereny riwahi riwahinyre ihỹre heka Jeoraõ-ò iòlòmy risỹnyre tii iriòre delamy rare-ki.
\v 4 Jeoraõ heka tyby deròwy iòlòmy raloreu heka Judá iòlòmy, tii tahe Isaeli wedu mahãdu rirubunykremy riteònyre, iseriòrereny tule rirubunykremy riteònyre.
\v 5 Tii heka 32 beòra-di iòlòmy ralore, iòlòna heka debò inataõ reuròmy bede rijere Jerusalĕ-ki.
\v 6 Tii heka Isaeli iòlò mahãdu wesemy riwinymy roiremyhỹ, Akabe riòre hawyy wana raàdònymy, tii Deuxude ibinamy riwinyre.
\v 7 Juhuu Davi riòkorereny iòlòmy tuhyymy ratxikemy Deuxu rarybere tai dori Jeoraõ iòlònamy rahuõre. Juhuu Deuxu Davi wana ritobinyre tarynana-ki heka iriòkorereny taihyymy iòlòmy ratxirenykemy.
\v 8 Kia bedeu heka Jeoraõ iòlòna bedeu heka Edõ mahãdu Judá iòlònamy terarenymy reamyroire taiòlòrenylemy risỹdỹỹnykemy idi riwisỹnymy roiremyhỹ. Tai dori Jeorão tawedu mahãdu wana itxireny rearenyre alòre tewereny-di sõwe.
\v 9 Iu heka Edõ mahãdu idireny rirurawonyrenyre, alòre tewereny-di isodadureny rirurawonyrenyre ihỹre juhu heka Jeoraõ ruumy itxireny reare tai iribireny rotare.
\v 10 Tai dori Edõ mahãdu rexihitxinymy roire Judá mahãdu ribi. Kia bedeu ribile rexihitxinymy roire wiji bede-ò tulere. Kia bedeu heka Libina hãwã heka tule rexihitxinymy roire Judá ribi. Jeoraõ òraruki heka Deuxu ririre talabiereny Deuxu ririre dori.
\v 11 Tii surioko xiwenamy riwinyre Judá hãwalò-ki tule Jerusalĕ mahãdu òrarunamy resekremy tii riwinyre surioko òraruki.
\v 12 Iu heka Eliasi Deuxu rybedumy tyyriti tamy riteònyre myy:” Jeoraõ, Kawese heka Deuxu rarybererimy, Alabie Davi Deuxu myy rarybereri:’Boo riki wesemy Josafá wesemy aõkõ tate, Asa riki alabie wesemy aõkõ tate, Judá iòlò wesemy riki aõkõ tate.
\v 13 Ihỹre uritere riki heka Isaeli iòlò mahãdu wesemy tate, tulesỹ Jerusalĕ mahãdu riki òrarunatxi resekremy tewinyte, tii boho suritxoo deàlànarenymy riki tewinyte iwese Akabe sỹmahãdu wesemy tewinyte dori. Ierena aseriòrereny terubunyte riki heka, boo sỹmahãdumy terubunyte riki, tii boho heka hãbu mahãdu aribi ratyremy heka rare terubunyte dori.
\v 14 kia òraruki riki heka asỹmahãdureny-ò Deuxu binana bina bina kiditeònykremy, ariòrereny-ò, ahawyyreny-ò ibutu amahãdureny-ò binana bina bina Deuxu risỹnykre dori.
\v 15 kai riki heka webinadumy resekre awo-ki riki heka binana bina bina tai roikremy, awe-ki riki binana bina binamy raremãhãkremy aweryri riki ahana-ò rohònykremy, Deuxu rarybererimy.’
\v 16 Tai heka Bilixiteu mahãdu Jeoraõ-ò deramy riwinyre, Arabia mahãdu etíope mahãdu weramy rasỹnamy roimyhỹre mahãdu tule teramy reamy roiremyhỹ Deuxu riwinyre.
\v 17 Judásu heka tiiboho itxi rearenyre, iòlò heto ribi heka ibutu iaõna õnareny riwyrenyre, iòlò hawyyreny, iriòrereny tule iribi ridyrenyre. Tahe Akasiasi iriòre dỹỹbò kiele ririre.
\v 18 Irahudi heka Jeoraõ wewo-ki heka Deuxu binana bina bina deytenaõmy risỹnyre.
\v 19 Iribi tahe inatxi beòramy bede rijere heka, sõwemy Jeoraõ ibina binamy roiremy, Jeoraõ iweryri heka iwo ribi ròhònyra, tai tii sõwe mytxitxi-di rurure. Rituunyrenyreu heka iwese talabiereny heòty roomy roiremhỹ deàlánamy iwese aõkõ riwinyrenyre rituunyrenyreu, isỹ mahãdu heka heòty tamy reàlànykremy riwinyõhyyre.
\v 20 Jeoraõ 32 beòra-di iòlòmy ralore Judásu-ki. Tii debò inataõ reuròmy beòramy Jerusalĕ-ki iòlòmy roire. Tii rurureu heka moõ robuõhyyre tii iòlò ibinare-ki. Davi hãwã-ki rituunyre, ihỹre heka iòlò mahãdu iwabede-ò aõkõ rituunyre.
\c 22
\cl Capítulo 22

\s Akasiasi Judá iòlòmy ralore. (2 Iòlò Tyyriti 8.25-29, 9.27-29)
\p
\v 1 Akasiasi heka Jerusalĕ mahãdu taiòlòrenymy risỹnyre, Jeoraõ riòredỹỹbòmy tii rare tyby deròwymy iòlòmy ralore. Jeoraõ riòrereny heka Arabe mahãdu rirubunyre. Tai Akasiasi tyby deròwymy Judá iòlòmy ralore.
\v 2 Akasiasi heka 22 beòra-di roireu iòlòmy ralore, tii sohoji beòramy Jerusalĕ-ki iòlòmy roire. Ataliá iseni heka rare, Õri riòremy.
\v 3 Akasiasi heka tule Akabe sỹmahãdumy wese riwinyre, ise dori òbitimy aõkõ ritohodỹỹnymyroire.
\v 4 Akasiasi heka Deuxudewimy aõkõ riwinyre, iwese Akabe sỹmahãdu wesele tii roire. Tyby sỹtybymy rahudi heka Akabe sỹmahãdule ritohonymy roiremyhỹ kia-di heka ribinanynyrenyre dori.
\v 5 Isaeli iòlò heka Akabe riòremy rare Joraõ inire. Akabe sỹ mahãdu ritohonyrenyre tai dori Joraõ wana wii ritobinymy roiremyhỹ, alòremy tii wana rirarumyhỹre Hasaeli-ò Siria iòlòmy itxi reamy roiremyhỹ, Hamotxi-Jileadesu-ò alòremy roiremyhỹ. Iu Joraõ rawotõmonyre alòre-ki.
\v 6 Tai tasỹ-ò Jexiheusuò roosere riytenykremy Siria iòlò-ò Haseli-ò itxi rearenyreu rawotõmonyre tai. Iribi heka, Akasiasi, Judá iòlòmy, Joraõ wotõmonamy roimyhỹre Jexiheusuò iruraò rare.
\v 7 Akasiasimy Deuxu idi ribinanykemy rõhõtinymy. Akasiasi Jeoraõ rura-ò ritehemynyreu heka Jeú tamy nade, Nĩsi riòremy. Tii juhuu Deuxu ritare irati-ki adỹỹ ritxiwire tii riki Deuxu ritare heka heka Akabe sỹ mahãdumy rahukemy.
\v 8 Iu heka Jeu Deuxu dewimy rarybemy raremyhỹu Akabe sỹmahãdu-ò heka Judá wedu mahãdumy tii robire, Akasiasi riòrereny ideòdurenymy roire, tai heka Jeu rirubunyrenyre, rirubunyrenyre rahudi heka Akasiasi iòrysymy rare.
\v 9 Akasiasi heka Samaria hãwã-ki rexiwomy roire tai sodadu mahãdu heka Akasiasi itxi raharenyre tai heka Akasiasi ridyrenyre Jeu-ò idi tii rirubunyre. Iòlò mahãdu wesemy rituunyrenyre tii boho raryberenyre: “Tii Josafá riokore rare. Josafá Deuxu tawo ribi rityhynyre dori.” Idi rituunyrenyre Iòlò mahãdu iwabede-ki. Rituunyrenyre rahudi heka Akasiasi mahãdurenymy rahure Akasiasi iteròwymy ihõõre ituera imahãdureny.
\s Atalia Akasiasisèmy
\v 10 Akasiasisè tahe Atalia heka iriòre rurure roholareu heka tai Judá iòlò sỹmahãdu heka rirubunykremy riteònyre ibutumy Atalia wahe.
\v 11 Iu heka Jeosebá, Jeoraõ iòlò riòremy rare, tii heka akasiasi riòremy Joasi riwore hetowo-ki rubu lau. Jeosebá heka Joasi riwore taitxeredu wana. Jeosebá Jeoraõ iòlò riòremy rare Joiada xiwena wahisidỹỹdu hawyymy, tii tule Akasiasi iòlò seriòremy rare Jeosebá wahe. Tii Joasi iseriòre wouludu riwore Atalia lau tai tii ruruõre.
\v 12 Bede roimy rare heka kiamy, Joasi debò sohoji reurò beòra-di rareu heka Deuxu heto iwo-ki rexiwomy roiremyhỹ taitxeredu wana, ilajirà wana rexiwomy roimyhỹre, Atalia heka iòlòmy raremyhỹu.
\c 23
\cl Capítulo 23

\s Hawyy Ataliá Judá mahãdu teramy roiremyhỹ (2 Iòlò Tyyriti 11.4-16)
\p
\v 1 Idi tahe debò inatxi bede rijere Joiada 100 hãbu wedu mahãdu sõwe wana ritobinyre inirenymy roire: Asariasi Jeoraõ riòremy, Iximaeli Joanã riòremy, Asariasi Obede riòremy, Maaseiasi Adaía riòremy, Elisabate Sikirĩ riòremy kia hãbu wedu mahãdu sõwe heka Joiada ritobinyre.
\v 2 Idi tahe tii boho Judásumy rariarenyre hãwã hãwã-my Levi mahãdu riarimyroiremyhỹ tule Isaeli wedu mahãdu Jerusalĕ-ò diwydenyde.
\v 3 Tai Deuxu heto-ki ributunyrenyre iòlò Joiada wana ritobinyrenyre. Iu Joiada rarybere: Jiarỹ iòlò riòre heka rare iwese Deuxu rarybere Davi riòre mahãdu-ò wesemy aratxikremy.
\v 4 Kai boho tahe; iny sõwe ribi heka inataõ eremy sõwe heka, xiwena wahidỹỹdu mahãdu ribi ritake, Levi mahãdu ribi ritake sabadu txuu Deuxu heto itxeredumy ijòtòbòna-ki roirenykremy.
\v 5 Ijõ heka iòlò heto ijò-ki roikremy; ijõ tahe heto ijòtòbònatyhy-ki roikremy, ibutu mahãdu heka Deuxu heto wera-ki roikremy.
\v 6 Tahe uritere inyõ mahãdu heka Deuxu hetowo-ò ralòõtyhy, kia heka xiwena wahisidỹỹdu mahãdu levi mahãdu deàlànadu heka ralòrenykremy. Tii boho heka Deuxu-ò òbiti roiremyhỹ. Tahe inyõ iuhe mahãdu heka Deuxu heto-di itxeredumy roikremy.
\v 7 Levi mahãdu tahe tadebònareny-di Iòlò rirurawonyrenykremy ruruwe ribi hywe ribi rirurawonyrenykremy, inyõ heka Deuxu heto-ò ralokeki tahe rurukre. Tahe iòlò heka Deuxu heto-ò ralokreu, rohònykreu Levi mahãdu iòlò wanamy ratxikremy.
\v 8 Levi mahãdu, Judá mahãdu, ibutu Joiada xiwena wahidỹỹdu rarybere iwese heka riwinyrenyre; hãbu mahãdu sabadu txuu ralòmy roiremy, hãbu mahãdu ròhònymy roire, heka Joiada riteònyrenyre koki ributunyrenyre.
\v 9 Tai Joiada xiwena wahidỹỹdu heka soldadu wedu mahãdu-ò riwahinyre tõnõri sõwe, wyhy itxena sõwe, Davi iòlò debònareny sõwe riwahinyre riwahinyre kia soldadu wedu heka 100my sõwe soldadu ridinodunyrenyre tamyreny riwahinyre Deuxu heto-ki tai roire heka debòna sõwe riwahi riwahinyre.
\v 10 Tai dori ibutumy tadebònareny-di rexiywinymy roiremyhỹ iòlò heto ruruwe ribi, hywe ribi tule rirurawonyrenyre Deuxu heto koki iòlò itxeredumy rexiywinymyhỹrenyre.
\v 11 Iu heka Deuxu heto woribi iòlò riòre Joasi riòlòdỹỹnyre irati-ki heka ratityana ritidirenyre, Deuxu Rybe ywinamy tamy riwahinyrenyre, tai iòlòmy risỹnyrenyre; Joiada tariòrereny wana Joasi rati tyre-ki adỹỹ oliõ ritxiwirenyre raryberenyre: katahe iny iòlòrenymy Deuxu dewimy ratximyhỹre!
\v 12 Iu Judá mahãdu ryberenymy roholare hawyy Atalia, inyõ iòlòmy reàlàmy roiremyhỹre, Deuxu heto-ò reàlàmy roiremyhỹ ributunymy roimyhỹrenyre
\v 13 Tii robire Deuxu heto ijòtòbona heka heto mynana bire-txi iòlò rynyremy roiremyhỹ, iòlò riòre mahãdu, iòlò bire-ki heka jurònamy tai roire, reysamy roimyhỹrenyre-ki, toado mahãdu rijurònyrenyremy; wiudu mahãdu rawiunyrenyremy, reàlàmy roiremyhy; hawyy Atalia heka tatyy riykare isiramy tii rirjuare: Riwatyhenyremy! Riwatyhenyremy!
\v 14 Tai Joiada xiwena wahidỹỹdu heka sodadu wedu mahãdu-ò rarybere: Biòrybenyke! Bitake kaa ribi sodadu mahãdu ribi-ò irehemy bidybenyke inyõ wiòhedỹỹmy reakeki birubunybenyke. Kia wesemy tii rarybere heka Deuxu heto-ki irubudỹỹõmy.
\v 15 Rimyrenyre heka, ridyrenyre iòlò heto-ò ijòtòbòna-ò awaru ryy-di tai heka rirubunyrenyre.
\v 16 Idi heka Joiada, Judá mahãdu wana, iòlò wana ritobinyrenyre Deuxumy inatyhytyhymy rityhynyrenykremy.
\s Isaeli mahãdu-ò Joiada raòbitinyre Deuxudewimy (2 Iòlò Tyyriti 11.17-20)
\v 17 Irahudi heka ibutumy Judá mahãdu Baali suritxoo heto-ò rirònyrenyre, kia heto idi ribòhònyrenyre, Baali ixiwenareny ribòhònyrenyre, suritxoo sõwe ribòhò bòhònyre, Baali xiwena wahidỹỹdu Matã inire tai Baali xiwena sõwe ikoki rirubunyrenyre.
\v 18 Tai Joiada Deuxu heto aõmysỹdỹỹ risỹnyrenyre, iwese Davi rarybere Levi mahãdu-ò xiwena wahidỹỹdu mahãdu-ò, Deuxu-ó xiwena riwahinyrenykremy iwese Moisesi bede ywina rierynanyre wesemy, tule deysana-di, wiuna-di, iwese Davi rarybere wesemy.
\v 19 Deuxu heto ijòtòbòna-ki bede-di itxeredumy risỹnyre, inyõ òbitiõdu tai raloõtyhymy.
\v 20 Idi tahe Sodadu wedu mahãdu 100my sõwe sodadu wedumy, inyõ ityhy mahãdu, suwedu mahãdu Deuxu heto ribi iòlò ridyrenyre iòlò heto-ò, taheto-ò, tii boho ijòtòbòna nihikỹ ribi rariarenyre idi tahe iòlò rynana-txi risỹnyrenyre.
\v 21 Tai tahe ibutu bede mahãdu reysarenyre, ywinamy tai roire, hawyy Atalia rirubunyrenyre rahudi ywinamy bede roiremyhỹ.
\c 24
\cl Capítulo 24

\s Joasi Judá iòlòmy ralore (2 Iòlò Tyyriti 12.1-16)
\p
\v 1 Joasi heka debò inatxi reurò ibeòramy roireu heka Iòlòmy ralore 40 beòra-di Jerusalĕ-ki iòlòmy roire.
\v 2 Iseni heka Sibia heka rare; Besebásu mahãdumy rare. Joiada xiwena wahidỹỹdu irulemy bedeu heka Joasi Deuxudewimy riwinyre.
\v 3 Joiada heka Joasi-ò hawyy inatximy riwahinyre idi heka iriòre hãbumy iriòre hawyymy rearenyre.
\v 4 Bede roimy rare tahe Joasi Deuxu heto Templo-ò riywinykremy rõhõtinyre.
\v 5 Xiwena wahidỹỹdu mahãdu-ò, Levi mahãdu-ò rarybere: “Judá hãwã hãwã-ò boibenykre kabeòramy nieru òrysymy, beòra ralomyhỹu nierumy heka hãwã hãwã mahãdu riòwynyrenyre tai boibenykre Isaeli hãwã hãwã-ò nieru òrysymy boibenykre wijityhyle! Ihỹre heka tii boho roikõra raroorehenymy roire.
\v 6 Tai Joiada xiwena wahidỹỹdu wedu heka Iòlò tamy rỹỹraxire: “Aõherekibo kai Levi mahãdu-ò tarybetyhyõra Judá hãwã hãwã ribi, Jerusalĕ hãwã hãwã ribi kidiwydenykremy wylemy! Beòra tỹmyra nierumy heka Moisesi, Deuxu deòdu heka Isaeli iny labiereny butuna-ki tuu ritidirenyre heka Deuxu wowydyna heto-ò kidiwykremy tuu tarybeõta?”
\v 7 (Juhuu heka kia Atalia hawyy iòlò binahakỹ tariòrereny wana Deuxu heto-ò ralorenyre tai iribi iaõna õna wiwihikỹ riwasinyrenyre dori tasuriokoreny baalĩ xiwenamy riwahinyrenykremy.)
\v 8 Tai dori iòlò riteònyre òwòru webese riwinykremy Deuxu heto Templo-ò ahana ijòtòbòna-ki tai ratxikemy.
\v 9 Idi tahe ibutu mahãdu-ò ribedeerynyrenyre Judásu-ò, Jerusalĕsu-ò ibutu kidirahurenykremy tanierureny-di taõna õnareny wihikỹ-di, Deuxu-ò riwahinyrenykremy kia juhuu Moisesi Deuxu deòdu rarybere bederahymy isaeli mahãdu roimy raremyhỹreu.
\v 10 Tai ibutumy Isaeli mahãdu wedumy, isaeli mahãdumy deysamy dirahudenyde taõna õnareny-di tanierureny-di, òwòru webesewo-ò idi ritidirenyre idi ritỹxinyrenyre.
\v 11 Levi mahãdu heka òwòru webesemy inierureny hynamyridyrenyre iòlò kia òwòru webese-di itxeredu mahãdu-ò tii boho idi retehemy roire tai womati ura tỹrỹrỹhỹkỹ-di sõwere-ki, Levi mahãdu riwahinyrenyre iwo-ki tai roiremyhỹ ririrenyre idi heka ixybyle òwòru webese-di rooserenymy roire. Tuhyymy kia wesemy riwinyrenyre tai sõwemy womati uramy tỹrỹrỹhỹkỹ-di ritỹxinyrenyre.
\v 12 Joiada iòlò wana heka womati ura tỹrỹrỹhỹkỹ Deuxu heto Templo aõmysỹdỹỹdu mahãdu-ò riwahinymy roiremyhỹ. Heto widỹỹdu mahãdu, òwòru aõmysỹdỹỹdu mahãdu, womati aõmysỹdỹỹdu mahãdu Deuxu heto Templo ritỹmyranykremy risỹnymy roiremyhỹ.
\v 13 ibutu aõmysỹdỹỹdu mahãdu heka awityhyremy iaômysỹdỹỹdure tai dori awityhymy Deuxu heto Templo ritỹmyranyrenyre dori. Iwesetyhyle juhu Deuxu heto roire iwesetyhyle riwinyrenyre tabedeerytyhyrenyre.
\v 14 Rexihurenyreu heka womati ura tỹrỹrỹhỹkỹ-di riuhere tai iòlò-ò Joiada-ò riwyrenyre tamyreny idi heka kia-di Deuxu heto templo womati iaõna õna riwinyrenyre, xiwena-ò womati sõwe, Deuxu heto Templowo-ò womati sõwe iwitxira iwitxiramy riwinyrenyre, tule womati tỹrỹrỹhỹkỹ-di iwitxira iwitxiramy riwinyrenyre. Joiada bedeu heka Deuxu heto Templo-ki Deuxu-ò xiwena riwahinyrenyre sõwemy tuhyymy.
\v 15 Joiada irehemy bede riere ramatuarityhyre, idi 130 beòra-di rurure.
\v 16 Davi hãwã-ki iòlò mahãdu wabede-òle idi rituunyrenyre, Joiada heka awityhytyhymy Isaeli mahãdu-ò riwinyre Deuxudewimy Deuxu heto Templo-ò tule awityhymy riwinyre dori.
\s Joasi òrarunamy, iaõhôkỹmydỹỹnanamy.
\v 17 Joiadasỹtyby rahudi taheka Judá wedu mahãdu iòlò-ò irybemy ijohonamy roirenyre tai heka iryberenymy iòlò riòbynyre.
\v 18 Judá mahãdu heka Deuxu heto Templo-ò roirenykremy ixãwirenyre, ilabiereny Deuxu deàlànamy ixãwire taheka suriokoreny-òle deàlànamy riwinyrenyre, Aserá surioko-ò xiwenamy riwahinyrenyre. Kia òraruki heka Judá mahãdu-ò, Jerusalĕ mahãdu-ò Deuxu yaranamy nade.
\v 19 Deuxu tarybedu mahãdu-ò tamyreny riteònyre Deuxu-ò rooserenykremy, ihỹre heka Deuxu rybedu mahãdu-ò rybemy roholarenyõre.
\v 20 Tai tahe Deuxu Tyytybytyhy heka Sakaria Joiada riòre-ò nade idi riuhere tamyreny rybemy rarybekremy. Tii ibutu koki lamymy roire idi rybeteremy rarybere:” Waijoireny Kaa wese heka Deuxu rarybemyhỹre inydeereny: “Aõherekibo heka Deuxu rybemy taholaõmahãtenyte! Kaa wesemy tiu awityhyõmy matxibenykre! Kai boho heka Deuxu teritenyte tai dori tii ararirenykre tule!”
\v 21 Iu heka inyõ mahãdu Sakaria rybemy òraruki heka rajeijeinyre, iòlò tule mana idi rehukremy riteònyre, tai tahe mana idi rehurenyre Deuxu heto Templo wera-kile tai mana-di rirubunyrenyre.
\v 22 Joasi iòlò heka Joiada awi tamy riwinyre itxi heka õhõti reaõre ihỹre heka iriòre rirubunyre dori. Joiada riòre heka Sakaria rurureu kokirenylemy rarybere:” Waha Deuxuidireny beteheke, biòwynyke.”
\v 23 Bede roimy rare heka idi Arameu mahãdu Joasi-ò itxi rearenyre: Judásu Jerusalĕ hãwã-ò itxi rearenyre, ibutu wedu mahãdu rirubunyrenyre, idi ibutumy aõna õna rimyrenyre taiòlòreny-ò riteònyrerenyre iaõna õna wiwihikỹ ibutu rimyrenyre heka Damasu hãwã-ò riteònyrenyre.
\v 24 Arameu mahãdu heka ibuterenyre, Judá mahãdu ribi ihỹre heka Deuxu tamyreny riwahinyre dori, Deuxu heka Judá mahãdu ririrenyre dori; ilabiereny Deuxu ririrenyre tai iòwymy taòludureny-ò Deuxu riwahinyre, Joasi iòlò òraruki.
\v 25 Iu heka Arameu mahãdu roirenyre heka Joasi iòlò rawotõmõ nihikỹmy roire teòdureny heka iu rajeijeinyre , Deuxu rybedumy Joiada riòremy juhu tii rirubunykremy riteònyre-ki tii boho heka iòlò Joasi taherina-kile rirubunyrenyre. Rurure tai heka Davi hãwã-kile rituunyrenyre Bihỹre iòlò wabede-ki heka rituunyõrenyre.
\v 26 Iòlò-ò inyõ mahãdu idi rajeijeinyre heka nireny rare, Sabade, Simeate riòremy, Amo mahãdumy, Jeosabaté, Sĩrité riòremy Moabe mahãdumy.
\v 27 Katahe; Joasi riòre mahãdumy, Deuxu heto templo idi ritỹmyranyre ijyymy heka ibutu Iòlò tyyritina-ki roire. Iribi heka Amasiá tyby deròmy iòlòmy ralore.
\c 25
\cl Capítulo 25

\s Amasiasi Judá Iòlòmy ralore (Iòlò Tyyriti 14.1-6)
\p
\v 1 Amasiasi heka 25 beòra-di iòlòmy ralore, Jerusalĕ-ki 29 beòramy iòlòmy runyre. Ise heka Jeoadã inire tii hekaJerusalĕ hãwã ludu heka rare.
\v 2 Amasiasi heka Deuxu dewimy riwinyre ihỹre heka tawotyhy-di aõkõmy rare.
\v 3 Tii iòlòmy ralore, bede roimy rare idihyky heka tyby iòlò rubudỹỹdu mahãdu heka idi rirubunyrenykremy riteònyre.
\v 4 Tyby rubudỹỹdu mahãdu iriòrereny rirubunyõre iwese Moisesi tyyriti, bede ywinamy rarybemyhỹre wesemy kiamy Deuxu ritidire heka: “Tyby iòrarunamy òraruki heka iriòrereny ruruõkre; inyõ taòraruna òrarukile rurukremy.”
\s Edõ mahãdu wana rajeijeinyrenyre. (2 Iòlò tyyriti-ki 14.7)
\v 5 Judá habu mahãdu heka Amasisi wana ributunyre, Bejamĩ mahãdu ributunyre 1000my habu sõwe iwedu risỹnyre tasỹmahãdu tasỹmahãdu-di 100my habu sõwe iwedu risỹnyre tasỹmahãdu tasỹmahãdu-di. Iribi heka inyõ mahãdu 20 beòra-di iribi ratyremy 300 mili sõwe tai roire sodadumy risỹnykremy, tõnõri-di debònamy ratxikremy, wyhy itxena-di debònamy ratxikremy idi risỹnyrenyre.
\v 6 Tule Isaeli mahãdu hãbu 100 mili sõwe heka risỹnyre heka 3 mili ieremy sõwe womati urahakỹmy iutxie-di iwòwymy.
\v 7 Iu heka Deuxu rybedu tamy rarybere: “Iòlò, kaheka Isaeli habu mahãdu wana alòre-ò maõtyhy, Deuxu dori kia Isaeli habu mahãdu wana ratxiõre dori; Ebaraĩ hãbu mahãdu wana alòre-ò maõtyhy Deuxu idireny ratxiõre.
\v 8 Kaile heka asodadureny-dilemy makre, borenykremy, bexirurumy botakremy. Kai tii boho wana makeki heka botaõtyhy dori, Deuxule iruru ijõdire alòre ribi botakemy ada botaõkemy tiile xiery.”
\v 9 Tai tahe Amasiasi heka Deuxu rybedu-ò rarybere: “Timyrabo aõmamy heka wawomati urahakỹ 3 mili ieremy iutxiehekỹ Isaeli sodadu mahãdu-ò reòwynyre heka timyrabo?” Tai Deuxu rybedu rirawyònyre: “Deuxu heka kia iribi ratyre adee riwahinykremy inyhe.”
\v 10 Tai heka Amasiasi Ebaraĩ sodado mahãdu roosekremy riteònyre. Tii boho heka reburetyhyre Judá mahãdu oraruki, reburemy rooserenyre.
\v 11 Amasiasi heka idi rexirurunyre tai heka sodadu mahãdu Amasiasi ridinodunyrenyre bede sulyty-ò Salisumy inire, tai heka Seí ludu mahãdu Edõ mahãdu heka debòwiò mili habu sõwe rirubunyre iu.
\v 12 Ijõ debòwiò habu sõwe heka itxi rearenyre, idi hãwalò ribile idi rehurenyre kia hãwalò ribi rururenyre ibutumy.
\v 13 Iu heka kia hãbu mahãdu Amasiasi roosekremy riteònyra reare heka tii boho heka Judá hãwã-ò itxi rearenyre, Samaria hãwã ribi Bete-Hõrõ hãwã-ò roirenyrenymy roire. Tai inataõ mili iny sõwe rirubunyrenyre tule iaõna õnareny sõwe sõwe riwyrenyre.
\v 14 Amasiasi heka Edõ mahãdu alòre ribi roosereu heka isuriokoreny heka diwyde, tadeuxureny risỹnyre idi tatiwotimy resere reàlànykremy, lỹnyrena xiwena tamyreny riwahinyre.
\v 15 Tai heka Amasiasi-ò Deuxu iykaranamy reare, idi tarybedumy riteònyre, tii heka iòlò-ò rarybere: “Aõherekibo heka kia mahãdu suriokoreny-ò teixitòeny mahãte, tii boho heka kia mahãdu ritaõtyhy aõbina binamy ribi timyrabo idi teixitòeny mahãte?”
\v 16 Deuxu rybedumy rarybemy rỹirau heka iòlò irybemy riokrore: “Kai aõbo iòlò tohodỹỹdumy inyboho arasỹnyre aõbo? Rybeõmyreke! Burukemy tarumahãte?” Tai heka Deuxu rybedumy rybeõmy rynyre iribita rarybere myy: “Deuxu arahukremy riwisỹnymyhỹre kai boheka warybemy taholaõte wahe.”
\s Isaeli mahãdu heka ròrenyrenyre (2 Iòlò Tyyriti 14. 8-14)
\v 17 Iribi tahe Amasiasi Judá iòlòmy, itohodỹỹdu mahãdu-ò ributunyre iryberenymy roholare. Idi tahe rybemy riteònyre Jeoasi Isaeli iòlò-ò tii Jeú riokoremy, Jeoakasi riòremy. Myy rarybere: “Manahe wahe watxi beakemy”.
\v 18 Tai heka Amasiasi-ò Jeoasi tamy rirawyònyre: “Libanosu hedeò rybemy riteònyre Libanosu seduruò-ò myy rarybere: Ariòre hawyymy wariòre wana herimy roikremy bidiwahinykre’ iu heka Libanosu hedeò Libanusu ribile nade tai iròdu rebure heka idi risurusurunyre.
\v 19 Kai iximy tarybe Edõ mahãdu ribi totate ihỹre xiwedelemy wadee tarybete itxỹtenamy dori. Asỹ-kilemy matxikre! Aõherekibo aõbina binamy tu tarumahãte, inysureny, inysỹreny rakabinabinarenykremy Judasu tule?”
\v 20 Ihỹrele heka amasiasi irybemy roholaõre, kiamy Deuxu idi rõhõtinyre iòludureny Amasiasi ribi rotakremy tii dori Edõ surioko idi reixitòenymy roiremyhỹ kia òraruki wahe.
\v 21 Tai heka Jeoasi, Isaeli iòlòmy, Amasiasi Judá iòlò-ò itxi reare, Judá hãwã-ki Bete-Semesu-ò.
\v 22 Aõbina binarenyre heka Judá mahãdu rotaõra isodadureny tahetoreny-ò rahenyreny dori.
\v 23 Iu heka Jeoasi riòremy, Akasiasi riokoremy Amasiasi iòlò heka Bete-Semesu-ki Jeoasi rimyre idi ridyre tai tii Jerusalĕ hãwã òtity heka rejujure 80 urihixina sõwe òtity reatyre kia Ebaraĩ ijotòbòna ribi ijõ ijòtòbòna-ò ruwe ryna-ki
\v 24 Tai tahe Jeoasi womati tỹrỹrỹhỹkỹ ibutumy, womati ura tỹrỹrỹhỹkỹ ibutumy riwyre tamy Deuxu heto Templowo ribi iaõna õnamy riwyre, kia Obede Edõ itxeremy idi roire iaõna õna ibutumy riwyre iribi, tule iòlò hetowo ribi iaõna õnawiwi riwyre dori. Tule heka inyõ mahãdu ridyre idi roosere Samaria hãwã-ò tule ralore.
\s Amasia rurure (2 Iòlò Tyyriti 14.17-20)
\v 25 Iribi tahe Jeoakasi riòremy Jeoasi heka Isaeli iòlòmy rurure, Judá iòlòmy tahe Amasiasi idi 15 beòramy bede rijere iribi rurure.
\v 26 Amasiasi iòlòna òraruna ribi ituena bedeu-ò ijyymy heka iòlò Judá mahãdu, iòlò Isaeli mahãdu Tyyriti-ki roire.
\v 27 Amasiasi Deuxu ririreu heka tai Jerusalĕ mahãdu heka tamy rajeijeirenyre, idi tii Lakisi hãwã-ò rahenyre ihỹre heka ihemy rearenyre idi taile rirubunyrenyre.
\v 28 Iribi roserenyre tii awaru tyre-ki idi didydenyde ilabiereny wabede-ò rituunyrenyre Judá hãwã-ki.
\c 26
\cl Capítulo 26

\s Judá iòlòmy ralore (2 Iòlò Tyyriti 14.21-22, 15.1-7)
\p
\v 1 Idi heka Judá mahãdu Amasiasi riòre Usiasi 16 beòra-di iòlòmy risỹnyrenyre tyby deròwymy.
\v 2 Amasiasi rubusỹtybymy heka Usiasi Elate hãwã ritare Judásu-ò.
\v 3 Usiasi 16 beòra-di iòlòmy ralore tahe 52 beòramy Jerusalĕ-ki iòlòmy rare. Jekoliasi isenire tii Jerusalĕ hãwã ludu rare.
\v 4 Usiasi heka Deuxudewimy riwinyre tyby weselemy Amasiasi;
\v 5 Usiasi Deuxu rybemy Sakaria rierynanyre. Usiasi Deuxu rityhynyreu heka awityhymy ibededỹỹnanamy rare, Deuxu riwiòhenanyre iòlòna bedeu.
\v 6 Usiasi Bilixiteu mahãdu-ò reare Kate hãwã òtity ribòhònyre, Jabine hãwã òtity ribòhònyre Axidode hãwã òtity ribòhònyre ijõ Bilixiteusu-ò tule.
\v 7 Bilixiteu alòre ribi rotakremy Deuxu riwiòhenanyre, Arabe Kuhu-Baalisu rasỹnyre mahãdu-ò itxi reakremy Deuxu riwiòhenanyre, Meuni mahãdu-ò itxi reakremy Deuxu riwiòhenanyre tule.
\v 8 Usiasi-ò Amo mahãdu suòwymy riòwynyrenyre, iu Usiasini heka ini ninamy reare bede bedemy Ejitusu eresyna-ò, tai inimy heka ranihikỹmy roire.
\v 9 Usiasi heka Jerusalĕ hãwã-ki ótity tyre-ki heka tohi òwònamy risỹnyre hãwã rarurunykremy, ijõ tohi òwònamy ijòtòbòna ryweryna-ki, ijõ tohi òwònamy ijòtòbòna hãwãlò iwotya-ki, ijõ tohi òwònamy òtity ryweryna-ki
\v 10 Tule bedeò tohi òwònamy riwinyre, hãloobe riare sõwemy, iròdu sõwere-ki Sebelásu-ki, sulyty-ki tule. Iaõmysỹdỹỹdu mahãdu sõwe tule ijõdire, uva-ò aõmysỹdỹỹdu mahãdu, bederatoo-ki tõhõreny itxeredu sõwe, lòbòròdỹỹdu mahãdu sõwe tule, lòbòròdỹỹ tamy awi rare.
\v 11 Usiasi heka sodadu sõwe tule ijõdire, òbitimy sodadu mahãdu heka sõwe tawedu tawedu tawedumy òbitimy tii risỹnyre Jeieli sodadu mahãdu wedumy, Maasesi ijõ sodadu wedumy, Hananiasi heka iòlò sodadu ibutu wedumy.
\v 12 Hãbu mahãdu tamahãdu tamahãdu 2.600 sodadu wedu ruruduhukỹmy sõwe heka roire.
\v 13 Kia hãbu mahãdu heka 327mili sodadu sõwe ridinodunyre, kia sodadu mahãdu ruruterehekỹmy roire, alòre kerydu mahãdumy roire, tii boho heka iòlò-ò idi riywinymy roiremyhỹ.
\v 14 Usiasi heka tamyreny riwahinyre debòna sõwe; iwyhy itxenareny, irati hynareny, ibreti itxenareny, ixiwahatereny, imana-di dehunareny kia ibutumy riywinyre tasodadureny mahãdu-ò.
\v 15 Jerusalĕ hãwã-ki tule tohi òwòna-ki idi ratxirenykremy mahãdu iaõna õna riwahinyrenyre iwyhy itxenareny, womati-di ixiwahatereny mana-di dehuna ritidire. Deuxu sõwemy riwiòhenanyre, bedeeryna mahãdu iaõna õna riywinyrenyre iòlò-ò tai dori ini heka rea reamy iònana su-ò.
\v 16 Iribi tahe, Usiasi heka Deuxu heto Templowo-ò ralore xiwena lỹnyrena riwahinykremy idi raxiwedenyre òraru-ki tai òraruna-txi resere.
\v 17 Iu heka Asariasi Deuxu xiwena wahidỹỹdu ijõ xiwena wahidỹỹdu mahãdu 80my sõwe tamy rybemy roire Deuxu rybe-di.
\v 18 Tii boho tamy rarybere: “Usiasi, òbitimy aõkõ tewinyte, òbiti aõkõ kai Deuxu-ò lỹnyrena tewahinyte òbitimy aõkõ rare. Araõ mahãdule Deuxu ritare xiwenamy tamy riwahinykremy. Wiji awi aõkõ tewinyte, Araõ riòrereny mahãdule heka Deuxu risỹnyre xiwena tamy riwahinykremy. Katahe wiji heka Deuxu heto Templo ribi bohonykewa! Deuxu dewimy aõkõ tewinyte, Deuxude ibina tewinyte dori. Make, ka ribi!”
\v 19 Iu Usiasi xiwena lỹnyrena tebò-ki roire risõkremy xiwena tyre-ò, iu heka tii reburere, xiwena womati tỹrỹrỹhỹkỹ koki, xiwena wahidỹỹdu mahãdu-ò iyara-di reamy tai itxireny reare dori, iu heka aõweselehe Usiasi iòraru-txi yjy aõwesele ròhònyre.
\v 20 Tai heka Asariasi xiwena wahidỹỹdu wedu mahãdu, ijõ ibutu xiwena wahidỹỹdu mahãdu kia Usiasi yjy idi robirenyre heka tai aõwesele riteònyrenyre Deuxu heto Templowo ribi. Tii aõweselemy rare rieryre dori Deuxule tuu riwisỹnyre-ki.
\v 21 Idi heka Usiasi yjy ityy-ki tuhyymy roire kia ribi rubu-ò. Kia txu ribi heka heto hitximy tii rasỹnymy roiremyhỹ, iny ribi irehemy roire, Deuxu heto iribi irehemy roiremyhỹ. Jotaõ iriòre heka iòlò heto-kile rasỹnymy roiremyhỹ iny ridinodunymy roiremyhỹ tyby deròwymy.
\v 22 Usiasi bededỹỹnana ijyymy heka ibutumy iòlòna òraruna bedeu ribi iòlòna ituena bede-ò Isaiasi Deuxu rybedu tyyritiki-ki roire. Isaiasi heka Amosi riòre heka rare.
\v 23 Usiasi heka rurure, ilabiereny iwabedereny-kile rituunyrenyre, kia heka iòlò mahãdu wabede-ki Jerusalĕ hãwã-ki riwinyõre binana òraru-ki. Iu heka inyõ mahãdu rarybemy roiremyhỹ: “Tii heka iyjy ityy dire ijõdimy” Iriòre heka Jotaõ riteròwynanyre.
\c 27
\cl Capítulo 27

\s Jotaõ Judá iòlòmy ( 2 Iòlò Tyyriti 15.32-38)
\p
\v 1 Jotaõ 25 beòra-di heka iòlòmy ralore tii Jerusalĕ hãwã-ki 16 beòramy iòlòmy roire. Jerusa iseni heka rare Sadoke riòremy.
\v 2 Tii tyby wesemy Deuxu dewimy riwinyre, Ihỹre heka Judá mahãdu idi raòrarunyrenyre, Jotaõ heka tyby òraruna-ki riwinyõre, tii xiwena riwahinyõre Templo-ò iwese tyby riwinyre wesemy tii Deuxu heto-ò raloòõre.
\v 3 Jotaõ heka Deuxu heto Templo-ki ijòtòbòna ibòò-ò ritỹmyranyre tule hãwã òtity riwinyre heka Oseli hãwãmy.
\v 4 Judásu hãwãlò-ki heka hãwã riwinyre òtity tai risỹnyre, hãwã ribi irehemy bidiy-ki tule òwòna tohi riwinyre.
\v 5 Jotaõ heka Amo iòlò wana ròrenyre idi rotare iribi tai dori Amo mahãdu heka su riòwynymy roire inataõ beòra-di heka Jotaõ-ò idi riòwynyre heka womati tỹrỹrỹhỹkỹ 3 mili ieremy urihixina iutxie sõwe-di riòwynyre, 10 mili trigo urihixina iutxie sõwe-di riòwynyre, 10 mili sevada iu urihixina iutxie sõwe-di riòwynyre.
\v 6 Jotaõ heka sõwe rarurunymy roire, Deuxu tii wana roire, òbitimy Deuxu-ò riwinyre.
\v 7 Jotaõ bededỹỹnana heka, ibutu aõbina bina aõhebo rotỹỹnyre heka ibutu aõ riwinyre heka Judá iòlò tyyriti-ki, Isaeli heka iòlò tyyriti-ki roire.
\v 8 Jotaõ 25 beòra-di iòlòmy ralore, 16 beòramy Jerusalĕ hãwã-ki iòlòmy roire.
\v 9 Jotaõ iwese ilabiereny rurure Davi hãwã-ki heka idi rituunyrenyre. Iriòre Akasi heka teròwymy ralore.
\c 28
\cl Capítulo 28

\s Akasi Judá iòlòmy ralore. (2 Iòlò tyyriti 16. 1-4)
\p
\v 1 Akasi heka 20 beòra-di iòlòmy ralore 17 beòramy Jerusalĕ-ki iòlòmy roire. Iòlò Davi wese aõkõ riwinyre tii heka Deuxu dewimy riwinyõre.
\v 2 Baali suriokomy reàlànykremy riwinyre iwese Isaeli iòlò mahãdu tii riwinyre.
\v 3 Behinõsu-ki heka xiwena riwinyre, tii surioko-ò xiwena-ki tariòrereny risõre, iwese bede mahãdu riwinymy roimy wese. Kia mahãdu heka Deuxu juhu Isaeli mahãdu-koki riteònyremy.
\v 4 Akasi heka suriokoreny-ò xiwena risõre, sulyty-ki, ibutu òwòru iòra-ki sõwemy xiwena riwahi riwahinyre suriokoreny-ò.
\v 5 Kia òraruki heka Deuxu tamy aõhõkỹmy risỹnyre, Siria iòlò-ò Deuxu riwahinyre. Tule Judá mahãdu Arameu mahãdu tasyreny-ò iwetxurenymy ridyre Damasu hãwã-ò. Isaeli mahãdu tule heka aõbina ribi rotaõre.
\v 6 Tule Hemalia riòre, Peka inire, 120 mili Judá sodado sõwe tii rirubunyre, txu sohoji-dile heka Deuxu Judá mahãdu ririre-ki, ilabiereny Deuxu Judá mahãdu ririre dori.
\v 7 Isaeli sodado Sikiri heka ruruduhukỹ rare tii Akasi riòre Maseiasi tii rirubunyre, Asirikaõ, iòlò heto aõmysỹdỹỹdu tule Sikiri rirubunyre, ijõ rirubunyre Eukaná iòlò deòdumy.
\v 8 Samaria hãwã-ò Isaeli mahãdu ridyrenyre heka 200 mili sõwe isỹ mahãdurenyle wetxumy ridyrenyre, hawyy mahãdu, weryry mahãdu, hirari mahãdumy wetxumy ridyrenyre. Iaõna õnareny tule iribireny riwyrenyre.
\s Odede Deuxu rybedumy
\v 9 Iu heka Odede Deuxu rybedumy Samaria hãwã-ki roire tii Isaeli sodadu mahãdu-ò rarybere: “Waijoireny, alabiereny Deuxu heka Judá mahãdu-ò ykaranamy reareu heka adeereny reakremy Deuxu riwahinyre, ihỹre heka kaiboho teburetyhy aseriòrereny-ò ibina binahakỹmy tewinytemyhỹte kiamy Deuxu tu robire.
\v 10 Wijihe aõbo Jerusalĕ hãbu hawyy mahãdu, Judá hãbu mahãdu, hawyy mahãdu ierena wetxumy bisỹnybenykemy aõbo, kai boho heka aDeuxureny-ò aòrarunareny ijõõremy tahõtinyõmahãtenyte aõbo?
\v 11 Boholabenyke warybemy! Katahe wiji aseriòrereny mahãdu-ò rosekekemy biteònybenyke, kia awetxureny tedytente wahe biteònybenyke, Deuxu yarana heka heòty atyrereny-ki ratximyhỹre dorihe.”
\v 12 Tai heka Asariá, Joanã riòremy, Berekiasi Mexilemote riòremy, Jexikiasi Salṻ riòremy, Amasa Hadelai riòremy, tii boho heka Ebaraĩ hãwã wedumy roimyhỹrenyre heka, aõbina bina ribi wetxumy didymyhỹde mahãdu-ò raryberenyre:
\v 13 “Aõkorehe wetxu mahãdu idyrenyõmy ka-ò. Deuxu rebure heka iny tyrereny-ò iyarana kiditeònykre, iny òrarunareny òraruki dori. Kawese heka kai boho iny òrarunareny ranihikỹkremy, tuu aõbo tarumahãtenyteri. Waòrarunareny rasõwere, Deuxu yarana heòty Isaeli tyre-ki rỹimyhỹre dori.”
\v 14 Tai sodadu mahãdu wetxu mahãdu rikokudỹkỹnyrenyre iaõna õnareny heka wedu mahãdu koki ritidirenyre.
\v 15 Idi tahe wetxu mahãdu nirenymy ryryrenymy roire tai iny sohoji sohoji taõnareny ritamy roiremyhỹ, ityyreny, iwarenymy ibutu ixyby tahõrõreny riwahi riwahinyrenyre. Rỹsỹna-di riòwenyrenyre, bemy idi rimonyrenyre rituahinyrenyre, tari tule riwahinyrenyre. Iruruõre mahãdu heka jumeto tyre-ki ritidirenyre. Idi ridyrenyre tasỹreny-ò Jeriò hãwãsỹdu mahãdu, horeni hãwã inire, idi tahe rooserenyre Samaria-ò.
\s Akasi heka Asiria mahãdu-ò idi reixitòenyre riwiòhenanykremy
\v 16 Iu heka Akasi Siria iòlò-ò reixitòenyre idi riwiòhenanykremy.
\v 17 Edõ mahãdu heka ixybyle Akasi sodadu ribi rotare idi Judá mahãdu iwetxureny ridyrenyre.
\v 18 Tulesỹ bilixiteu mahãdu heka Sebelásu-ò Judasu iraru-ò tule itxi rearenyre. Bete-Semesi hãwã, Aijalõ hãwã, Jederoté hãwãmy rahaananyrenyre, Sokó hãwã, Timiná hãwã, Kĩsu hãwã kia ibutumy raananyrenyre, iwera ludu mahãdu tule.
\v 19 Akasi Isaeli iòlò òraruki heka Judá mahãdu Deuxu aõhõkỹmy risỹnyre, Akasi heka surioko reàlàre tai Judá mahãdu iheki iòrarunamy resere.
\v 20 Asiria iòlò Tikalate- Bilesé inire, tii nade idi riwiòhenanykremy aõkõ heka tii Judá mahãdu ribinanykremy nade.
\v 21 Tai Akasi heka Deuxu heto Templo-ò iaõna õnamy riòryre, iòlò heto iaõna õnamy, Judá wedu mahãdu iaõna õnamy riòryre heka Asiria iòlò-ò riwahinyre riwiòhenanykremy tahe aõkõrehe tii riwiòhenanyõre.
\s Akasi òrarunamy
\v 22 Kia bedeu heka bede rabinamy roire ihỹre heka iòlò akasi ierena raòrarunyre, Deuxu-ò ibinamy roire.
\v 23 Tii Damasu hãwã-ki surioko-ò xiwena riwahinyre tii idi rõhõtinymyhỹre: “Siria mahãdu isuriokoreny riwiòhenanyre tai tamyreny xiwenamy ariwahinykre riwawiòhenanykremy tule.” My tahe rõhõtinyre tii. Síria suriokoreny riwiòhenanyõre heka imynanamyle tamy rare, ibutu Isaeli mahãdu-ò tule.
\v 24 Idi Akasi heka Deuxu heto Templowo ribi iaõna õnamy ritare. Idi ribòhò bòhònyre, irahudi Deuxu heto Templomy ijòtòbònareny riratòbònyre, idi heka surioko mana-di xiwena sõwe riwinyre Jerusalĕ hãwã-ki ibutu rywe ryna-kile surioko mana-di xiwena risỹnyre .
\v 25 Tii heka ibutu hãwã hãwã-ki surioko mana-di xiwena risỹnyre, suriokoreny-ò taile xiwenamy risõrenykremy tai heka ilabiereny Deuxu tyhyhykỹ riteburedỹỹnyre.
\v 26 Ibutu akasi bededỹỹnana ijyymy, iaõmysỹdỹỹnana, iòlòna òraruna bedeu ribi irubu txu-ò heka ijyymy roire Judá iòlò mahãdu tyyriti-ki, isaeli iòlò mahãdu tyyriti-ki roire.
\v 27 Iwese ilabiereny heka Akasi rurure, Jerusalĕ hãwã-ki rituunyrenyre, taheka Isaeli iòlò mahãdu iwabe-ò aõkõ rituunyrenyre. Iriòre heka Esekiasi teròwymy ralore.
\c 29
\cl Capítulo 29

\s Esekia Judá iòlòmy ralore (2 Iòlò Tyyriti 18.1-3)
\p
\v 1 Esekias 25 beòra-di iòlòmy ralore. Tii 25 beòramy Jerusalĕ hãwã-ki iólòmy roire. Abiasi isenire Sakaria riòremy.
\v 2 Esekiasi heka Deuxu dewimy riwinyre, Deuxu koki heka awimy rare iwese Davi tyby riwinyre wesemy ibutumy.
\s Deuxu heto Templo riòbitinyre
\v 3 Esekiasi iòlòmy rareu heka bòra sohoji ahãdu sohojiu, Deuxu heto templo ijòtòbònareny riraynyre idi riywinyrenyre.
\v 4 Xiwena wahidỹỹdu mahãdu heka, levi mahãdu tule, beà-ki ributunyrenyre.
\v 5 Tamyreny rarybere: Levi mahãdu boholabenyke! Bexiywinybenyke Deuxu-ò aworeny bexilyranybenyke! Deuxu heto Templo heka bexilyranybenyke Deuxu-ò, tii heka booreny Deuxu heka rare. Kaheto Templowo ribi heka aõna õna suriokomy raremy idi irehe-ò behubenyke, ibutu bina bina heka kaa ribi idi behubenyke.
\v 6 Inytybyreny heka Deuxu koki òbitiõmy riwinyrenyre Deuxu ririrenyre dori. Ka Deuxu heto Templo ribi iòsanareny idi rirahaòrerenyre, Deuxu ribi tabròreny rirahaòrerenyre dori.
\v 7 Deuxu heto Templo ijòtòbònarenymy riratòbònyrenyre, iloosònareny riturinyrenyre, kaki heka xiwena lỹnyrena risõhyyrenyre Isaeli Deuxu-ò xiwena tyre-ò xiwenamy riwahinyõrenyre.
\v 8 Tai heka Jerusalĕ-ò, Juda-ò Deuxu iyarana-di nade. Tai aõbina bina ritelekremy Deuxu riwahinyre, wiji heka inyõ iwitxira mahãdu reixiijenyrenyre iny boho ribi, iny-idi risinymy roimyhỹre heka, iny ribireny reixiijenyrenyre, iny-idi rexiyjanymy ribuamy tuu tabimahãtenyte.
\v 9 Wahareny heka maurehe-di rururenyre, iny riòrereny hãbu, iny riòrereny hãwyy, iny hawyyreny heka wetxumy ridyrenyre irehe-ò.
\v 10 katahe wiji heka Isaeli Deuxu wana aritobinykremy raruwahỹre, tai heka iykarana waribireny ritakremy.
\v 11 Wariòreny boholake warybemy, itxỹterenyõmahãbenyke! Deuxu heka aratarenyre ikorenykile matxibenykemy, idi maõmysỹdỹỹbenykemy, teòdurenymy xiwenamy tamy risõrenykemy.
\v 12 Iu heka Levi mahãdu lamymy rỹimyhỹrenyre myy: Koate riokore mahãdu: Maate, Amasai riòremy, Joeli, Azariasi riòremy, Merari riokore mahãdu; kisi, Abidi riòremy, Asariasi, Jealeleu riòremy; Jesõ riokore mahãdu: Joá, Sima riòremy, Edĕ, Joá riòremy
\v 13 Elisabã riokore mahãdu: Sĩri, Jeueli, Asabe riokore mahãdu: Sakariasi, Mataniasi,
\v 14 Hemã riokore mahãdu: Jeuel Simei, Jedutum riokore mahãdu: Semaiasi, Usieli.
\v 15 Kia hãbu mahãdu heka Deuxu heto Templo-ò rironyrenyre, iwo heka tule rityranyre, iwese iòlò rarybere, Deuxu rybe wesemy riwinyrenyre, taheto rityranykremy.
\v 16 Xiwena wahidỹỹdu mahãdu Deuxu heto Templo-ò rironyrenyre ibutu aõbina bina tai roire heka ahana-ò riwyrenyre. Ahana-ki levi mahãdu kia aõna õna bina bina idi raixỹnyrenyre Sedorõ su-ò hãwãlò iwotya-ò ridyrenyre.
\v 17 Idi heka Deuxu heto Templo-ò rironyrenyre idi rexitòerenykemy riòranyrenyre ijòtòbòna-ki Deuxu-ò reixitòenyrenyre idi Deuxu heto templo iwo iwo-di ibutumy idi Deuxu-ò reixitòenyre kia ahãdu txu òraruna ribi idi reixitònymyroire heka debò inataõ reurò txu-ò heka Deuxu heto Templo ijòtòbòna-ò ijõ ritehemynyrenyre heha 16 txumy rexihurenyre ibutu Deuxu-ò riwahinyrenyre heka taixitòedỹỹnarenymy ixitòedỹỹnareny ituera.
\v 18 Irahu-di heka Esekia iòlò-ò rybemy roirenyre my tahe raryberenyre:_ Jiarỹ boho heka Deuxu heto Templo ibutumy idi reixitònyre Deuxu-ò, tule òwòru wodỹỹ rỹire womati tỹrỹrỹhỹkỹle ihetyre iròdu tai xiwena risõkremy heka tyramy roire tule iaõna õna womatireny ibutumy tyramy roire, tulesỹ paõ brebuna deòtena òwòru besemy tyramy roiremy tule heka iaõna õna womatireny ibutumy tyramy roiremy.
\v 19 Kia heka womati Akasi iòlò raòrarunyreu idi rehure heka reòryrenyre retyranyrenyre idi Deuxu heto Templo-ò resỹnyrenyre, Deuxu xiwena womati tỹrỹrỹhỹkỹ koki heka ibutumy tyramy roire.
\s Deuxu heto Templo heka riòbitidỹỹnyre.
\v 20 Ijõ txu heka Esekia iòlò ruumy rexixare heka, hãwã hãbu wedu mahãdu wana Deuxu heto Templo-ò tai ributunyrenyre.
\v 21 Iròdu kidiwyrenykemy riteònyre bororeni riòre debò sohoji reurò sõwemy, budoini riòre hãbu debò sohoji reurò sõwemy, budoeni hãbu debò sohoji reurò sõwemy, watxini debò sohoji reurò sõwemy kidiwydenykemy Judá mahãdu òraruna òwymy, iòlòsỹ mahãdu òraruna òwymy, tule Deuxu heto Templo rityranyremy tai kia iròdu sõwemy idi Deuxu-ò xiwenamy riwahinyrenykemy Araõ riokorereny-ò iòlò Esekia riteònyre Deuxu-ò riwahinyrenykemy.
\v 22 Bororeni riòre ibutumy rirubunyrenyre rahudi heka ihãlubumy xiwena womati tỹrỹrỹhỹkỹ tyre-ò ritxiwirenyre, budoeni hãbu ibutumy rirubunyrenyre rahudi heka ihãlubumy xiwena womati tỹrỹrỹhỹkỹ tyre-ò ritxiwirenyre, budoeni riòre ibutumy rirubunyrenyre rahudi heka ihãlubumy xiwena womati tỹrỹrỹhỹkỹ tyre-ò ritxiwirenyre.
\v 23 Òraruna òwymy heka iòlò koki watxini ridyrenyre ibutu korenikile iòlò watxini boho rati-ki tebòreny ritidirenyre.
\v 24 Idi heka watxini boho xiwena wahidỹỹdu mahãdu rirubunyrenyre, lamymy roire xiwena koki ityre-ò iròdu hãlubu òraruna òwymy ritxiwirenyre Isaeli mahãdu òraruna òwymy. Iòlò heka ritidire kia xiwenamy Isaeli òraruna òwymy riwahinyrenykremy.
\v 25 Levi mahãdu tatoanareny-di riteònyre Deuxu heto Templo-ò, taviolaõ wesenareny, tajurònareny-di iwese Davi rarybere wesemy, Kade iòlò rybedumy, Natã Deuxu rybedumy heka Deuxu rarybere iwesemy tii rarybere.
\v 26 Tai dori Levi mahãdu tatoanareny-di lamymy roiremyhỹ iwese Davi rarybere wesemy, tule xiwena wahidỹỹdu mahãdu tajurònareny-di rotoanymyroiremyhỹ.
\v 27 Xiwena-ò idi raxiwenyrenykemy Esekia iòlò riteònyre heka iu riòrarunyrenyre rotoanyrenyre, tajurònareny-di, Davi Isaeli iòlòmy toana violaõ wesenamy rotanyrenyre, idi rawiunyrenyre Deuxu-ò.
\v 28 Tai iny ibutumy heka wiuna-di Deuxumy reàlanyrenyre txu idihyy kia xiwena ibutu risõrenyre ibutumy.
\v 29 Imyhudi heka iòlò iny wana ibutumy bede-ò tatiwomy reserenyre Deuxumy reàlànykemy.
\v 30 Ibutumy xiwena Deuxu-ò risõre rahudi heka Esekia iòlò Levi mahãdu reàlànyrenykemy riteònyre Davi wiuna deàlànamy rawiunyrenykemy, Asabe Deuxu rybedumy iwiunamy rawiunyrenykemy. Tii boho heka deysanatyhymy idi rawiunyrenyre, tule bede-ò tatiwomy reserenyre Deuxumy reàlànyrenyre.
\v 31 Tai Esekia rarybere:_Wiji heka Deuxu-ò texiwahinytenyte. Tai biòrybenykre õhõreny, aõna õna xiwena biòrybenykre Deuxu-ò biwahinybenykremy Templo heto-ò. Iu heka xiwenamy, iaõna õna didydenyde ibutumy tawo-di xiwenamy riwahi riwahinyrenykemy
\v 32 Kia txuu heka sõwemy taworeny-di 70 bororeni sõwe, 100 budoeni riòre sõwe, 200 budoeni hãbu sõwe Deuxu-ò xiwenamy riwahinyrenyre.
\v 33 Tule 600 bororeni sõwe, 3 mili budoeni hãwyy sõwe riwahinyrenyre heka Deuxu-ò.
\v 34 Iu heka riòbynyõre xiwena wahidỹỹdu mahãdu ibutere tai iròdu sõwere-ki ityy ritakemy riòbynyõre xiwena-ò rawahirenykremy. Tai dori Levi mahãdu idi riwiòhenanyrenyre. Xiwena wahidỹỹdu ibute rexiywinyre tahe levi mahãdu juhuu rexiywinyre tai tamyreny riwiòhenanyrenyre heka. Rexiywy. Kia Levi mahãdu heka òbitimy rexiywinyrenyre xiwena wahidỹỹdu mahãdu ribi iratyre.
\v 35 Xiwena sõwemy riwahinyrenyre, iròduwe xiwena-ò tule riwahinyrenyre, deysana xiwenamy tule riwahinyrenyre, vĩĩ xiwena-ò tule ritxiwirenyre Deuxu-ò. Kia wese heka ixybyle Deuxu heto Templo-ò rirònyrenyre Deuxu-ò reàlànykemy ritelenyre
\v 36 Tai Esekia Isaeli mahãdu wana ibutumy reysamyhỹrenyre Deuxu-ò reàlàmy roirenyre Tii dori awityhymy tamyreny riwinyre-ki. Iu Deuxu heto Templo aõweselemy riòbitinyrenyre.
\c 30
\cl Capítulo 30

\s Deuxu Paskoa worana bedehesi
\p
\v 1 Esekia heka Judá mahãdu-ò Isaeli mahãdu-ò rybemy riwahinyre, Ebaraĩ mahãdu-ò Manasesi mahãdu-ò tule ibutumy Jerusalĕ-ò Deuxu heto Templo roirenykremy tai Deuxu Paskoa worana bedehesimy Isaeli Deuxu-ò reàlànyrenykremy.
\v 2 kiau heka iahãdu inatxinamy rare tai Iòlò, hãbu wedu mahãdu, Jerusalĕ mahãdu Deuxu Paskoa worana bedehesimy riwinyrenykremy ritobinyrenyre.
\v 3 Itxutyhy heka riòbynyõre riwinykremy, xiwena wahidỹỹdu mahãdu ibutere-ki tule Jerusalĕ hãwã-ki tai roiõmyhỹrenyre, xiwena wahidỹỹdu mahãdu rexiywinyõre Deuxudewimy.
\v 4 Kia ahãdule heka awi rare idi rõtinymỹhỹrenyre heka iòlòdewi iny mahãdudewi tule.
\v 5 Tai Besebá hãwã ribi heka rybemy riwahi riwahinyrenyre Dã hãwã-ò tule ibutumy Jerusalĕ hãwã-ò rirahurenykremy Deuxu Paskoa worana bedehesimy riwinyrenykremy, tai riwinyrenyre heka kia rirytinymy roire wese irehemy bede roire heka riwinyõrenyre iwesemy.
\v 6 Iòlò heka tarybedu mahãdu riteònyre Isaelisu-ò, Judásu-ò rybemy idi rirahurenyre iòlònimy heka rybemy roire: “Isaeli mahãdu, Deuxu-ò bodoosebedenyke, Abraaõ Deuxumy, Isake Deuxumy, Isaeli Deuxumy, bodoosebedenyke tii adeereny kodoosekremy, kai boho Asirio mahãdu ribi tahenyte mahãdu iuhe mahãdu heka toite Asiria iòlò ribi tahenyte heka Deuxu-ò bodoosebenyke.
\v 7 Booreny wesemy aõkõ, aseriòrereny wesemy aõkõmy matxibenyke, tii boho heka Deuxu-ò òbitimy aõkõ riwinyrenyre iny labiereny Deuxu-ò awimy aõkõ riwinyrenyra tai iny mahãdu rahura, iwese kai boho tabimyhỹtenyte wesemy.
\v 8 Nõhõti txyrenyõmyreke! Iwese alabiereny mahãdu wesemy; Deuxu bityhynybenyke. Deuxu heto Templo-ò idihyymy bodoibenyke kaa heka iheto rare tuhyymy, aDeuxureny heka bityhynybenyke iyarana aribireny rijekemy.
\v 9 Deuxu-ò Boosebenykeki heka aseriòrereny, ariòrereny ridyrenyre mahãdu heka awimy idireny ratxirenykre, taruxetòenareny-dile asureny-ò arateònyrenykremy ixyby Deuxudewimy Deuxu heka luuna heka rare, ywinadu, Tii arateònyrenyõtyhy tamy boosebenykeki.”
\v 10 Ebaraĩ hãwã-ò, Manaesi hãwã-ò rybedu mahãdu roirenyre, Sebulõ hãwãdu mahãdu urile idi lisinyrenyre, riixỹrudỹỹnyrenyre tai.
\v 11 Idi hỹre heka Ase hãwãdu mahãdu, Manasesi hãwãdu mahãdu, ijõ Sebulõ hãwãdu mahãdu heka rexirahĩrenyre tai Jerusalĕ hãwã-ò roirenyre.
\v 12 Judá hãwã mahãdu heka Deuxu debò-ki roire ibutumy wiunale rõhõtinymyhỹrenyre, iòlò, hãbu mahãdu wedu raryberenyre wesemy Inynyrỹ ritidire wesemy.
\v 13 Tai dori ahãdu inatxina-ki heka iny sõwehekỹ Jerusalĕ hãwã-ò ributunyrenyre orotxu iuri-di rỹikõmy Paskoa worana bedehesi-di roirenykremy Deuxumy reàlànyrenykremy
\v 14 Tii boho Jerusalĕ hãwã-ki surioko xiwena ribòhò bòhònyrenyre ibutu xiwena lỹnyrena tule ibutumy kia riwyrenyre Sedorõ hãwãlò bede-ò idi rehurenyre.
\v 15 Budoeni riòre heka 14 txu-dile rirubunyrenyre kia ahãdu inatxinale-di. Xiwena wahidỹỹdu mahãduõ heka, Levi mahãduõ idi raixãrurenyre aõma juhu rexiywinyõreny tai heka Deuxu heto Templo-ki iròdu iròdu Deuxu Inynyrỹ-ò raxiwenyreny, rexiòbitinykremy, rexilyranyrenykre.
\v 16 Idi heka xiwena wahidỹỹdu mahãdu, Levi mahãdu heka taômysỹdỹỹnareny-ò ixyby roirenyre iwesele Moisesi Deuxu deòdu tyyriti ritidire iwese. Levi mahãdu iròdu hãlubu-di rehemynyrenyre idi xiwena wahidỹỹ mahãdu-ò riwahinyrenyre idi xiwena wahidỹỹdu mahãdu xiwena tyre-ò iròdu hãlubu ritxiwi txiwirenyre.
\v 17 Inyõ mahãduy-ki tule rexiywinyõreny Paskoa worana bedehesi txu-ò, tai dori Levi mahãdu heka budoeni hãbu sõwe rirubunyrenyre, kia Paskoa budoeni rirubunyrenyre heka ibutumy rexiòbitinykremy iribi heka iny sohoji sohoji tabudoeni-di xiwena Deuxu-ò riwahinykremy.
\v 18 Kia rexiòbitinyõre mahãdu heka Ebaraĩ inyõ mahãdu, Manasesi inyõ mahãdu, Isaká inyõ mahãdu, Sebulõ inyõ mahãdu juhu Paskoa worana bedehesi txu-kile rỹsỹna rirỹsỹrenyre, kia brebuna heka rare, tyyriti-ki roire. Ihỹre heka Esekia Deuxu-ò idireny reixitòenyre: “Deuxu ruxetòena atximahãte tai iòrarunareny biixãwidinykre
\v 19 ibutu tawo ribi aratyhynyrenyre mahãdu wiji heka kaki roimyhỹre, tii boho ako-ki rỹireri heka aheto Templo-ki arybe wese riwinyõrenyre hỹre biixãwidinykre, iny labiereny Deuxu ruxetòena nihikỹ-di.”
\v 20 Esekia ixitòedỹỹna heka Deuxu roholare tai kia inyõ mahãdu aõhõkỹmy risỹnyõtyhy.
\v 21 Jerusalĕ hãwã-ki ributunyrenyre mahãdu heka paõ iuri-di rỹikõmy Paskoa worana bedehesi tai deysamy reàlàrenyre heka debò inatxi reurò txu-di.Txuõtxuõlemy Levi mahãdu heka rawiunyrenyre, xiwena wahisidỹỹdu mahãdu rawiunyrenyre, rotoanyrenyre Deuxu-ò.
\v 22 Levi mahãdu-ò Esekia rybewimy rarybere tii boho awimy taõmysỹdỹỹreny heka riwinyrenyre Deuxudewimy. Levi mahãdu xiwena wahidỹỹdu mahãdu heka irỹsỹnareny rirasỹrenyre kia xiwena riwahinyrenyreu heka ihinareny, idòreny ritarenyre iu. Kiau heka xiwenamy roire Deuxu wana ratximyhỹre xiwenamy riwahinyrenyre, tule ilabiereny Deuxu heka wiuna-di reàlàrenyre.
\v 23 Tii boho heka kia Paskoa worana bedehesi txu rirehedỹỹnyre debò inatxi reurò txu sõwe ijõ tai reysarenymy relàrenyre.
\v 24 Esekia, Judá iòlò heka, xiwena-ò riwahinyre bororeni riòre mili sõwe heka, budoeni 7 mili sõwe, watxini tule, hãbu wedu mahãdu heka tule xiwena riwahinyre Deuxu-ò, bororeni riòre 1 mili sõwe, budoeni 10 mili sõwe, watxini tule, xiwena riwahinyrenyre Deuxu-ò. Iu tule xiwena wahidỹỹdu mahãdu tule rexiòbitinyrenyre, rexilyranyrenyre xiwena riwahinyre Deuxu-ò.
\v 25 Iu heka Judá mahãdu ibutu tai rexibutunyre reysamy roire, xiwena wahidỹỹdu mahãdu tule, Levi mahãdu tule, Isaeli mahãdu tule tai roire, suwitxira mahãdu Judá-ki rasỹnỹnymy roire, suwitxira mahãdu Isaeli-ki rasỹnỹnymy roire tule tai rexibutunyrenyre.
\v 26 Tai Jerusalĕ hãwã-ki deysanatyhymy roimyhỹre, Davi riòre Salomaõ bedeu Isaeli iòlò ribi heka tiu deysanamy ihõõre kia bedeu deysana wesemy.
\v 27 Tai heka xiwena wahidỹỹdu mahãdu heka lamymy roire ibutu tai runymyhỹre mahãdu idi reixitòenyrenyre Deuxu-ò; iixitòedỹỹnareny heka Deuxu roholare.
\c 31
\cl Capítulo 31

\s Deuxu heto Templo Esekia idi riywinyre.
\p
\v 1 Pascoa Worana Bedehesi rahudi heka Isaeli mahãdu Judásu-ò roirenyre surioko mana xiwenamy ribòhò bòhònykremy, xiwena deàlàna ibutumy ribòhò bòhòrenyre. Judásu-ò, Bĕjamisu-ò, Ebaraĩsu-ò, Manasesisu-ò surioko mana xiwenamy ribòhò bòhònyrenyre. Ibutu idi rehurenyre rahudi heka, tahãwãreny tasỹreny-ò rooserenyre sohoji sohojimy.
\v 2 Esekia iòlò heka xiwena wahidỹỹdu mahãdu heka iaõmysỹdỹỹnareny ritidire Deuxu heto Templo-ò rirònyrenykremy. Tai heka xiwena riwahinyrenykremy, xiwenatyre-ò risõkremy òraruna òwymy, xiwenatyre-ò orarade lỹnyrena risõkremy xiwena deàlànamy riwahinykremy, kiamy raõmydỹỹkremy, idi rawiunykremy, Deuxu reàlànyrenykremy tai Deuxu heto Templo iwotyhy ijòtòbòna-ki.
\v 3 Iòlò heka taõna õna-dile riwahi riwahinymy, ruudi xiwena-ò risõkremy. txioromy xiwena-ò risõkremy tairòdureny-di xiwena-ò riwahi riwahinymy, ahãdu tỹmyra bedeu xiwena riwahinyre, ibutu iwese Deuxu bede ywina ritidire wesemy.
\v 4 Tule Jerusalĕ mahãdu-ò riteònyre aõna õna riwahinyrenykremy Levi mahãdu-ò, xiwena wahidỹỹdu mahãdu-ò Deuxu ywina rybe tyyriti iwesemy idi raõmysỹdỹỹrenykremy.
\v 5 Kia rybe riwahinyre rahudi aõwesele heka Isaeli mahãdu taòw`ru ribi aõna õna riwyrenyre: tiriku wihikỹ, vĩĩ, adỹỹ, oli, bidi, ibutu aõwiwihik riwahi riwahinyrenyre idi riòwenyrenykremy. Tulesỹ taõnaõnareny iribi debòwiò ritarenyre, (disimu) sõwe riwyrenyre.
\v 6 Isaeli hãwãsỹdu mahãdu, Judá hãwãsỹdu mahãdu tule taõnaõnareny ribi debòwiò iribi ritarenyre (disimu) tõhõreny ribi, aõwiwihikỹ ribi ributunyrenyre Deuxu-ò riwahinyrenykremy tai raòdònyrenyre sõwemy.
\v 7 Inataõ ahãdu-di iaõna õna ributunyrenyre riòraruny heka debò inatxi ahãdu-ò rexihurenyre.
\v 8 Kia sõwemy ributunyrenyre Esekia robireu, hãbu wedu mahãdu robire heka sõwemy Deuxumy reàlàrenyre, tai rybe deysanamy raryberenyre Isaeli mahãdu-ò.
\v 9 Iu xiwena wahidỹỹdu mahãdu-ò, Levi mahãdu-ò Esekia rỹỹraxire aõnaõnamy ributunyrenyre heka timyrabo heka roikremy.
\v 10 Asariasi xiwena wahisidỹỹdu wedu heka Sadoke mahãdu rarybere: “ Deuxu heto Templo-ò inyõ mahãdu aõ riwyrenyre juhu ribile heka warỹsanareny awimy roire, riòbynyre dori, tule rauhenyre sõwemy, Deuxu sõwe ny mahãdu heka riwiòhenanymyhỹre dori kaa heka roire sõwe rauhenyre.”
\v 11 Tai Esekia heto rỹsana rirarenykremy riwinykremy riteònyre, irybe iwesele riwinyrenyre.
\v 12 Idi rasỹna hetowo-ò ritidirenyre heka, aõna ãona wiwihikỹ, ibutu riwahi riwahinyrenyre riyrubunyrenyre tai. Konania, Levi mahãdu heka idi itxeredumy risỹnyrenyre, Simeí iseriòre wiòhedỹỹdu kia aõmysỹdỹỹnamy idi risỹnyrenyre.
\v 13 Ijõ heka Jeieli, Asasiasi, Naate, Asaeli, Jeremote, Jozabade, Elieli, Iximakiasi, Maate,e Benaiámy kia hãbu mahãdu heka idi itxeredurenymy risỹnyrenre Konania iwedureny, iseriòre Simei iwiòhedỹỹdumy, Iòlò Esekia risỹnyre, Deuxu heto Templo Asariasi idi itxeredu ibutumy risỹnyre.
\v 14 Levi mahãdu Koré Imá riòre heka Deuxu heto Templo ijòtòbòna (leste) itxeredumy, aõna õna-di itxeredu tule risỹnyre, ibutu aõwiwihikỹ inyõ Deuxu-ò riwahinyre heka tii idi itxeredumy rare tule idi rihitxi hitxinykremy risỹnyre.
\v 15 ijõ hãwã hãwa-ki heka tule xiwena wahidỹỹdu mahãdu Levi mahãdu taõmysỹdỹỹnarenyki roimyhỹ tai heka Levi mahãdu Edĕ, Miniamĩ, Jesua.Semaisi, Amariasi, Sekania, tii boho heka aõna õna rihitxinyrenyre òbitimy, xiwena wahidỹỹdu mahãdu-ò taõmysỹdỹỹnareny txumy, matuari mahãdu-ò riwahi riwahinyre itỹmyra mahãdu-ò tule. Kia mahãdu heka Korá iwedure.
\v 16 Ibutu ilabiereny nimy tyyriti-ki roimy tamyreny riwahinyrenyre, tule ibutu levi mahãdu Deuxu heto Templo-ò roirenyre taõmysỹdỹỹnareny txuu tule tamyreny riwahinyrenyre ihõrõreny.
\v 17 Inyõ mahãdu heka 20 beòra ribi ratyre heka Levi mahãdu talabierenyni-di tyyriti-ki ròritinymyroire, taaõmysỹdỹỹtxumy wese.
\v 18 Kia tyyriti-ki roire heka ibutu Levi mahãdu tamahãdu tamahãdu, riòre hãbu mahãdu, riòre hawwy mahãdu, hawyy mahãdu, kia ibutu Levi mahãdu heka ityyriti-ki tai roire taaõmysỹdỹỹ txumy. Kia ibutu Levi mahãdu òbitimy Deuxu-ò rexihitxinyre tai ihõrõrenymy roire.
\v 19 Tule Araõ riokorereny heka òwòru-ki rasỹnyre mahãdu heka, hãwã ribi bederahy-ki rasỹnyrenyre mahãdu-ò tule ihõrõreny riwahi riwahinyrenyre, hãwã hãwã-ò ibutu xiwena wahidỹỹdu mahãdu tai roire heka ihõrõreny riwahi riwahinyrenyre levi mahãdu tyyriti-ki inimy roire-ki.
\v 20 Kia heka Esekia riwinyre heka ibutu Judásu-ò. Tii òbiti riwinyre, awi riwinyre, Deuxudewimy òbiti riwinyre taDeuxu koki.
\v 21 Ibutu Esekia riwinyre heka Deuxu heto Templo-ò, Deuxu ywina rybe tawo ribi riòbynyre, tai dori awimy tii rare.
\c 32
\cl Capítulo 32

\s Senakeribe Judá-ò itxi reare (2 Iòlò Tyyriti 18.13-37; 19. 35-37; Isaiasi 36.1-22; 37.36-38)
\p
\v 1 Esekia heka òbitimy roire irahudi heka Senak eribe Asiriá iòlò, Judasu-ò itxi reare. Tii ibutu hãwã òtity-di hỹre itxi reare.
\v 2 Iu Jerusalĕ-ò itxi reakremy idi riwisỹnymy roire heka
\v 3 Esekia iòlò rexieryre tai tasodadu wedu mahãdu ributunyre tai hãwã iòhòmy besòròrò roire heka idi riywinyrenyre; kiamy riwinyrenyre.
\v 4 Hãbu mahãdu sõwe heka ibutu besoròrò idi roimymyhỹre heka rirurawonyrenyre ibutu isureny-ki roire idi riywinyrenyre. Tii raryberenyre: “Timyrabo, Asíria iòlò mahãdu inybereny tiu riõõtyhy.”
\v 5 Iribi tahe hãwã òtity idi riywinyre, tule òtity tyre-ki tohi òwòna riywinyre. Òtity bire-ki ijõ riwinyre tai rarurunykremy Davi hãwã-ki ibutu òtity sõwe idi rarurunyre, debòna riwinykremy riteònyre heka breti itxenamy sõwe, tonõri tule.
\v 6 Idi heka hãwã ijòtòbòna-ki inyõ sõwe sodadu wedu mahãdumy risỹnyre tii boho wana ributunyre tamyreny rybe idi rarurunyrenykremy rarybere:
\v 7 “Bexirurudỹỹnybenyke. Breburenõmahãbenyke, woxieryõmyreke kia Asiriá iòlò heka isodadureny sõwe tahe breburenyõmy Deuxu idireny roiõmyhỹre, Deuxu ruruna heka iny wana roimyhỹre dori.
\v 8 Hãbu ruruna heka tii boho wana roire heka, inykireny heka Inynyrỹ waDeuxureny heka roire riwawiòhenanyrenykremy, iny ròreny ribi rotakemy.” Kia rybe-di heka iny mahãdu rirurudỹỹnyre, Esekia Judá iòlò rybemy heka idireny rarurunyrenyre.”
\v 9 Bede roimy rare heka Senakeribe, Asiriá iòlò tasodadureny Lakisi hãwã-ò itxi rearenyreu heka tasoldadu wedu mahãdu Jerusalĕ-ò riteònyre Esekia-ò, Judásỹdu mahãdu-ò kaa rybemy:
\v 10 “Aõmybo heka tetyhynymyhỹtenyte urile Jerusalĕ ahãwãreny-ki òtity-dile texiwomyhỹtenyte, aõbo tetyhynymyhỹtenyte?
\v 11 Esekia heka arabònyrenyre heka rarybemyhỹre heka:’InyDeuxureny , Inynyrỹ heka Asiria iòlò ribi riwatarenykre.’ Aõkõrehe, arabònyrenyrehe! Rama arahurenykre , bee arasỹrenykremy heka tii ararubunyrenykremy rurumyhỹre heka’
\v 12 Esekiale heka surioko ritare ibutumy tii aõkõ aõbo Jerusalĕ mahãdu-ò Judá mahãdu-ò rarybere heka:’Kai boho riki Deuxu sohojile bityhynybenykemy tamy sohojile xiwena biwahinybenykremy xiwena lnyrena tamy sohojile hela risõrenykremy tuu aõkõ aõbo rarybere?
\v 13 Kai boho teeryõtenyte aõbo bede bede mahãdu-ò rewinyrenyra walabiereny jiarỹ heka teeryõtenyteri aõbo rewinyrenyra tamyreny? Bede mahãdu wadebòreny ribi, waribireny ritaõtyhy heka bede mahãdu isuriokoreny ritaõtyhy, teeryõtenyteri aõbo?
\v 14 Bede mahãdu tasuriokoreny waribi rexitaõtyhy, momahãdubo waribi ritake. Timybo heka adeuxureny wadebò ribile aratarenykremy.
\v 15 “Uritere Esekia heka arabonykremy ityhydỹỹõmaãbenyke, tiu bede mahãdu tasuriokoreny-di waribihe rexitaõtyhy wailabie mahãdu ribi rexitaõtyhy. Adeuxureny tule aratarenyõtyhy wadebò ribi.”
\v 16 Tai Senakeribe deòdu ierena heka Inynyrỹ Deuxumy ibinamy raryberenyre, Esekia-ò Deuxu deòdumy ibinamy raryberenyre.
\v 17 Senakeribe tule tyyriti riwinyre heka Deuxu-ò rybe binabinamy ròritinyre senakeribe heka Isaeli Inynyrỹ Deuxu-ò ibinamy rybemy rarybere:iwese bede mahãdu suriokoreny iwesemy tii boho tamahãdureny ritaõrenyre heka tule Esekia deuxu tule wadebò ribi tamahãdu ritaõtyhy”
\v 18 Iu Jerusalĕ hãwã heka òtity tyre-ki sodadu mahãdu tai roire heka Tai Senakeribe deòdu mahãdu heka riberebunyrenykremy ryryrenyre senakeribe rybe wesemy Isaeli mahãdu iwoxieryrenykremy idi tii boho ihãwãreny rahaananykremy.
\v 19 Tii boho bede mahãdu isuriokoreny wesemy Deuxumy raryberenyre dori, bede mahãdu suriokoreny urile heka hãbu widỹỹna heka rare, Deuxutyhyhykỹ aõkheka rare.
\v 20 Tai heka Esekia iòlò, Isaiasi, amosi riòremy tii boho Deuxu-ò biu-ò reixitòenyrenyre.
\v 21 Iu heka Deuxu ỹju riteònyre tai hãbu mahãdu alòre-ki roireu heka Deuxu rirubunyre tule Asiria sodadu wedu mahãdu ibutumy Deuxu rirubunyre tai iòlò Senaqueribe heka ixãru-di roosere tasu-ò. Imy txumy heka Senakeribe tasurioko heto-ò raloreu heka iriòrereny tai rirubunyre, maurehe-di tybyreny rirubunyrenyre.
\v 22 Kia wese heka Esekia, Jerusalĕ mahãdu heka Deuxu Senakeribe ribi ritare, Asiria iòlò ribi tule ijõ bede mahãdu sõwe ribi Deuxu ritare, ibutu sueresyna ribi Deuxu idireny retehemy roire.
\v 23 Tai dori sõwe iny dirahudenyde aõwiwihikỹdi sõwe Esekia Judá iòlò-ò riwahinyrenyre, kia bede-ki heka sõwe bede mahãdu ibutumy Esekia rityhynymyroiremyhỹ.
\s Esekia binanamy (2 Iòlò Tyyriti 20.1-11, Isaiasi 38.1-8)
\v 24 Kia bedeu heka Eskia webinadumy resere tahe irubu iòhòmy roireu tahe Deuxu-ò reixitòenyre tamy aõwiwihikỹ riwahinyre tii ruruõkremy.
\v 25 Ihỹrele heka Esekia idi raxiwedenyre, Deuxu wihikỹ tamy riwinyre Esekia Deuxumy reàlàõre tai tahe Deuxu yarany-di Judás mahãdu-ò Jerusalĕ mahãdu-ò.
\v 26 Tai heka Esekia rexirahĩre Deuxu-ò rityhynyre, Jerusalĕ mahãdu tule; tai heka Deuxu yarana ixãwire Esekia bedeu.
\s Esekia ratyhyra
\v 27 Esekia heka sõwe ratyhyra, bede mahãdu sõwe idi rityhynyrenyre; heto heto riwinykremy riteònyra taaõna õna wiwihikỹ rirarenykremy womati tỹrỹrỹhỹkỹ, womati tỹrỹrỹhỹkỹ ura, mana wihikỹtyhy, rasỹna uri, wyhy itxena, sõwe aõna õna wihikỹ.
\v 28 Tule heka heto heto riwinykremy riteònyra tiriku, vĩĩ, oliva adỹỹ; tohõreny heto sõwe iwitxira iwitxiramy budoeni heto tule.
\v 29 Hãwã hãwã tule riaremy, budoeni sõwe sõwe, Deuxu heka iaõna õna sõwe riwahinyre dori.
\v 30 Esekia tule Xiõ hãwã bero idi riokrore beò ribi idi Davi hãwã-ò bee ridyre. Ibutu tii riwinykremy idi rõhõtinyre reòbyra heka.
\v 31 Iu heka Babilonia wedu mahãdu tadeòdureny riteònyre rieryrenykremy timybo riki Judásu-ki aõwiwihikỹ rotỹỹnyre heka, tahe Esekia Deuxu riurihire Esekia wo ribi timybo idi ratximyhỹremy.
\s Esekia rurure (2 Iòlò Tyyriti 20.20-21)
\v 32 Ibutu heka Esekia riwinyre heka, kia awityhy idi riwinyre Deuxu-ò heka Deuxu rybedu Isaia-ò riteòsinyre, Amosi riòremy tyriti-ki roire, Judá iòlò mahãdu tyyriti-ki roire, Jerusalĕ iòlò mahãdu tyyriti-ki roire.
\v 33 Esekia rurure heka idi rituunyre Davi riokorereny Iòlò mahãdu wabe-ki ibòò-ò rituunyre. Iu rurure heka Judá-kisỹdu mahãdu, Jerusalĕ-kisỹdu mahãdu heka aõwiwihikỹ riwinyrenyre. Iriòre heka Manasesi teròwymy iòlòmy ralore.
\c 33
\cl Capítulo 33

\s Manasesi Judá iòlòmy ralore (2 Iòlò Tyyriti 21.1-9)
\p
\v 1 Manasesi heka waò inatxi beòra-di iòlòmy ralore Jerusalĕ hãwã-ki iruyre beòramy iòlòmy rare.
\v 2 Tii Deuxu koki heka ibinamy riwinyre, iwese bede mahãdu surioko deàlànamy riwinyre wese tii rare, kia mahãdu heka juhuu Isaeli mahãdu iribireny riteònyre.
\v 3 Manasesi tyby heka surioko xiwenareny ribòhònyre, ihãre heka ixityre manasesi idi riywinyre, Baalĩ suriokoreny heka tatiwomy resere reàlànykremy, òwòru bederahy-ki sõwe tai suriokoreny reàlànyre, biu-ò surioko tule reàlàre.
\v 4 Deuxu heto-ki tule surioko reàlàre tai heka Deuxu juhuu rarybere: Jerusalĕ hãwã-ki heka Deuxunimy reàlàrenykremy tuhyymy.
\v 5 Deuxu heto-ki biu-ò suriokoreny xiwena riwinyre taweijàtimy ijõ taweijàtimy tule.
\v 6 Manasesi heka tariòrereny xiwena-ki risõre hãwãlò iwotya-ki, Hinõsu inire, tule hàri mahãdu idi rityhynyre, òwòru-di dehudu idi rare, deòsadỹỹdu mahãdu-ò idi rare, iny bede òbydy mahãdu-ò rare, uerarudu mahãdu-ò rare, xiwena txuhòmyhỹre mahãdu-ò rare, kia mahãdu ibutumy ihemy reare. Tii ibina binamy Deuxu koki riwinyre tai dori Deuxu riteburedỹỹnyre. Deuxu iyarana rexidelenykremy riwinyre.
\v 7 Surioko riwinyre idi Deuxu heto-ki risỹnyre. Juhuu Davi-ò iriòre Salomaõ-ò Deuxu rarybere heka: Katahe Jerusalĕ-ki heka kaheto Jiarỹ retare heka Isaeli mahãdu ribi, kaki heka wanimy ratxityhykremy resỹnyre Jiarỹ.
\v 8 Kaheka Isaelisu ribile heka arexitaõtyhy kasu boreny-ò rewahinyre dori; kaki heka ibutumy òbitimy rarybere wesemy, ywina rybemy, warybe mana, iwese riòbynyrenykremy, warybe berebunamy ibutumy Moisesi-ò rewahinyre wesemy òbitimy beòbybenyke.
\v 9 Manasesi heka Judá mahãdu riteòsanykremy riwinyre, Jerusalĕ-kisỹdu mahãdu riteòsanykremy riwinyre kia mahãdu juhuu Deuxu iribireny riteònyre iòrarunareny òraruki, kia mahãdu iratyre Judá mahãdu Jerusalĕsỹdu mahãdu òraruna riwinyrenyre Manasesi riteòsanyre òraruki.
\s Manasesi rexirahĩre
\v 10 Manasesi-ò Deuxu rarybere iny mahãdu-ò rarybere, ihãrele heka roholaõhyyrenyre.
\v 11 Tai heka Deuxu hãbu manydu wedu riteònyre Asiria iòlò-ò, tii boho Manasesi rimyre womati-di ritisanyre idi riwyre Babilonia-ò.
\v 12 Manasesi sõwemy raòhytỹnymy roireu tai Deuxu-ò reixitòenyre, sõwemy sõwemy rabedewomy ilabiereny Deuxu-ò reixitòenyre.
\v 13 Tii reixitòenyre tai tahe Deuxu roholare, ixyby Jerusalĕ-ò ridyre taiòlòna-ò. Iu Manasasi Deuxutyhy rieryre.
\v 14 Iribi heka Manasesi Davi hãwã òtity irehe irehemy nihikỹmy risỹnyre, kia òtity idi Jiõ hãwãlò iwetya-ki idi rare òtura ijotòbòna-ò idi rare, Ofeli idi rawerunyre heka hyky hyky kia òtity biu-ò irehemy risỹnyre; tule Judá hãwã hãwã sohoji sohoji risỹnyre hãbu wedu manydu, alòredỹỹdu hãwã mahãdu rirurudỹỹnyre.
\v 15 Tulesỹ Deuxu hetowo ribi surioko sõwe ritare heka Jerusalĕ Deuxu hãwãlò xiwena sõwe tai roire, tule hãwã ribi idi rehure.
\v 16 Deuxu xiwena heka tii ritỹmyrenyre tai xiwena riwahinyrenyre, ywina xiwena riwahinyrenyre, xiwena deàlàna tule; Isaeli Deuxu inynyrỹ rityhynyrenykremy Judá mahãdu-ò Manassesi riteònyre.
\v 17 Ihỹyrele inyõ mahãdu hãwãlò-ki xiwena riwahinyrenyre Deuxutyhy-ò
\s Manasesi rurure (2 Iòlò Tyyriti 21.17-18)
\v 18 Manasesi aõ widỹỹna ijyymy heka taDeuxu-ò ixitòdỹỹnamy, tule Isaeli Deuxu rybedu mahãdu raryberenyre heka Isaeli iòlò mahãdu Tyyriti-ki roimyhỹre.
\v 19 Timybo Deuxu Manasesi riwiòhenanyre ixitòdỹỹnamy roholaremy, iòraruna riixãwidinymy, juhuu titxi xiwena tii riwinyremy rexirahĩre koki, isurioko riwinyre orarade ora-ki risỹnyre xiwenamy kia tii riwinyre heka Deuxu rybedu mahãdu Tyyriti-ki roimyhỹre.
\v 20 Manasesi rurure heka ilabiereny wabede-ò rituunyrenyre, Amõ iriòremy, teròwymy iòlòmy ralore.

\s Judá hãwã-ki Amõ iòlòmy ralòre (2 Iòlò Tyyriti 21.19-26)
\v 21 Amõ 22 beòra-di iòlòmy ralore, 2 beòramy Jerusalĕ-ki iòlòmy roire. 
\v 22 Tii Deuxu koki ibinamy riwinyre, iwese tyby Manasesi riwinyre wese; tule kia surioko sõwetyby riwinyre heka xiwena riwahinyre, rityhynyre.
\v 23 Tii Deuxu-ò rityhynyõre tyby Manasesi iwesemy Deuxu-ò reixitòenymy wese, rexirahĩre iwesemy aõkõ rare Amõ tyby ratyremy rexiòrarunyre.
\v 24 Iu heka Amõ iòlò hãbu manydu wedu mahãdu teramy rearenyre tai tasỹ-kile rirubunyrenyre.
\v 25 Idi heka ibutu iòlò rubudỹỹdu mahãdu judásỹdu mahãdu rirubunyrenyre; idi heka tii boho Amõ riòremy taiòlòrenymy risỹnyrenyre.
\c 34
\cl Capítulo 34

\s Josiasi Judá iòlòmy ralore (2 Iòlò Tyyriti 22.1-2)
\p
\v 1 Josiasi debò inataõ reurò beòra-di Judá iòlòmy ralore, Jerusalĕ hãwã-ki heka 31 beòramy iòlòmy roire.
\v 2 Tii Deuxu koki òbiti riwinyre Davi ilabiereny iwesemy rare, tii ryy òbiti-di tuhyymy rare.
\s Josiasi heka Deuxu-ò òbitimy riwinyre (2 Iòlò Tyyriti 23.4-20)
\v 3 Josiasi heka itỹmyramy rare tii debò inataõ reurò beòra-di iòlòmy rareu ilabie Davi Deuxu-ò idi rityhynymyroire riòrarunyre. Iòlòna heka debòwiò beòrau heka, Judá mahãdu, Jerusalĕ mahãdu Deuxu-ò raòbitinykemy ritòrarunyre, mytahe riwinyre heka surioko xiwenamy ribòhò bòhònyre, Aserá surioko òtity, surioko tai roire heka reatyre heka, surioko womati idi rehumy reare.
\v 4 Baali òtity ribòhònyrenykremy riteònyre, xiwena lỹnyrena tule ribòhònyrenykremy Aserá surioko òtity ribòhò bòhònykremy, surioko womati idi ribòhònyrenykremy idi heka kia surioko deàlànadu wabede-òle hãlooreny tyre-ò su rioko bòhòna hãloo tyre-ò rehukemy riteònyre.
\v 5 Kia wahisidỹỹdu mahãdu deàlànadu suriokoreny xiwena tyre-ò itireny risõre, kia wese heka Judásu, Jerusalĕsu raòbitinyre, rityranyre heka.
\v 6 Iwesele heka riwinyre Manasesisu-ò, Ebaraĩsu-ò, Simeaõsu-ò rityranyre tule, kia Nabitali hãwã irehe-ò tule, iweraludusu hãwã tyby tybymy ityrereny-ò tule riwinyrenyre rityranyre kiamy.
\v 7 Suriokoreny deàlànamy, Aserá òtity dealanamy ibutu ribòhònyrenyre, suriokoreny sunodemy relere, xiwena lỹnyrenamy ibutu ribòhò bòhònyre Isaelisu-ò. Irahu-di heka Jerusalĩ-ò roosere.
\s Deuxu Rybe Tyyriti itxi raharenyre (2 Iòlò Tyyriti 22.3-20)
\v 8 Josiasi 18 beòramy iòlòmy roire hekatii heka ibutusu rityranyre, Deuxu heto rityranyre rahudi heka Sabã, Asaliá riòremy, Maasasi Jerusalĕ hãwã wedu, Joá, Joakasi riòremy, iòlòna ijyydumy kia hãbu mahãdu heka Josiasi Deuxu heto ritỹmyranykremy risỹnyre.
\v 9 Deuxu heto ijòtòbòna-ki Levi mahãdu womati tỹrỹrỹhỹkỹ ura rirarenyrenyre heka riwahinyre xiwena wahidỹỹdu wedu Hilkiasi-ò. Kia womati tỹrỹrỹhỹkỹ uraManasesi mahãdu diwydenyde, Ebaraĩ mahãdu ribi, Isaeli mahãdu ribi, Judá mahãdu ribi, Bejamĩ mahãdu ribi, Jerusalĕ mahãdu ribi kia ibutu riwahinyre tule.
\v 10 Hiukiasi, ijõ hãbu wedu mahãdu wana kia womati tỹrỹrỹhỹkỹ ura riwahinyre Deuxu heto idi itxeredu mahãdu-ò tii boho heka Deuxu heto ritỹmyranykre. Kia womati tỹrỹrỹhỹkỹ ura aõmysỹdỹỹdu mahãdu riòwynyre.
\v 11 Tule òwòru widỹỹ mahãdu, heto widỹỹdu mahãdu tule riteònyrenyre mana eremy riõbaranyrenykemy, tule heka itya rehemy, iwitxiti kia mynanamy riõbanyrenykemy ibutu Judá iòlò mahãdu ribinanyrenykre heka raòbitinyrenykremy.
\v 12 Jaaté, Obadiasi, Levi mahãdu tii boho Merari mahãdu, Sakariá Mesulaõ, Levi mahãdu tii boho Koate mahãdu. Ijõ Levi mahãdu heka ibutumy wiudu wihikỹ heka roire. Kia ibutu aõmysỹdỹỹdu mahãdu heka òbitimy raõmysỹdỹỹnyrenyre, iwedureny heka roire.
\v 13 tii boho heka aõ wydydu mahãdu itxeredumy roimyhỹrenyre, ijõ aõmysỹdỹỹdu sõwere idi itxeredumy roiremyhỹ. Ijõ ròrytidỹỹdumy roire, Ijõ ròrytidỹỹdumy wiòhedỹỹdumy roire, ijõ weduõ mahãdumy roire, ijõ ijòtòbòna idi itxeredumy.
\s Hiukiasi Deuxu Rybe Tyyriti heka itxi rahare
\v 14 Deuxu heto-ki kia aõmysỹdỹỹdu womati tỹrỹrỹhỹkỹ ura rimyrenyreu heka Deuxu Rybe Tyyriti Hiukiasi itxi rahare kia tyyriti heka Moisesile idi rityyritinyre.
\v 15 Tai Hiukiasi Sabá tyyritidu-ò rarybere: “Deuxu Rybe Tyyriti itxi rahare, Inynyrỹ heto-kile!” Iu heka Hiukiasi Sabã-ò Deuxu Rybe Tyyriti riwahinyre.
\v 16 Tai heka Sabã iòlò-ò Deuxu Tyyriti riwahinyre tai rarybere: “Eòdu mahãdu heka iwese tarybete wese riwinymyhỹrenyre.
\v 17 Kia womati tỹrỹrỹhỹkỹ ura Deuxu heto-ki roire heka aõmysỹdỹỹdu mahãdu-ò riwahinyrenyre, aõmysỹdỹỹdu idi itxeredu-ò riwahinyre.
\v 18 Iòlò-ò Sabã tule rarybere: “Iòlò, kia xiwena wahisidỹỹdu Hiukiasi kaa tyyriti heka wadee riwahinyre.” Tai heka iòlò-ò Sabá Bede ywina Tyyritimy idi rariare.
\v 19 Iòlò kia Bede ywina Tyyriti roholareu heka tatyy riykare.
\v 20 Idi heka, iòlò rarybere Hiukiasi-ò, Aikã-ò, Sabã riòre, Akibò, Mikaiasi riòre, Sabã, tyyritidỹỹdu, Asaiasi, iòlò tohodỹỹdumy:
\v 21 “Deuxu-ò beixitòenybenykre heka ibutu Isaeli mahãdumy Deuxu beixitòenybenykre, Judamy Deuxu-ò beixitòenybenykre tamy bỹỹraxibenykre Kaa rybemy bỹỹraxibenykre. Deuxu yarana awtyrereny heka ritxiwire, iny labiereny heka Deuxu rybemy riòbyõra. Kaa rybemy heka rewinyõra dori”
\v 22 Tai heka Hiukiasi, ijõ hãbu mahãdu wana Jerusalĕ hãwãõ-ò roirenyre Huda-ò Deuxu rybedumy rỹỹraxikemy. Tii heka Saluu, Tokaté riòremy, Harasi riòremy Deuxu heto kia tyy idi aõmysỹdỹỹdumy heka rare.
\v 23 Tai heka Huda tamyreny rỹỹraxire: “Inynyrỹ, Isaeli Deuxu heka rarybere! Boosebenyke ateòdỹỹdureny-ò:
\v 24 Kia wese heka Deuxu rarybemyhỹre: ‘Kahãwã-ò aõbina bina aditeònykre hãwãsỹdu mahãdu-ò ariteònykremy. Katyyriti-ki aõbina bina tai roireri heka kai boho tariatenyte heka Judá-ò kanakre.
\v 25 Wamahãdu heka riwarire idi surioko-ò heka xiwena risõre tai dori heka wayarana heka aritxiwikremy iòrarunareny òraruki. Wayarana heka aritxiwikre ka tyre-ò tai tiu itueõtyhy.’
\v 26 Judá iòlò-ò heka marybebenykre kawese heka Isaeli Deuxu rarybemyhỹre iwesele taholatenyte wiji, marybebenykre:
\v 27 “Kai Deuxu koki heka aworibile texitòenyte kaa rybemy aõbina bina ahãwãreny kanakremy taholateu heka Deuxu-ò teixitòenyte, wakoki tahinyte, atyy teykate heka inatyhymy aixitòedỹỹnamy raholare, Deuxumy rarybemyhỹre.
\v 28 Tai dori ararybekre adee aõhõkỹmy arisỹnykremy rarybere heka kia tahe burukreu heka kiamy rotỹỹnykre, ywinamy heka burukemy boike. Kahãwã bina bina aditeònyke kasỹdu mahãdu-ò kai idi bobiõtyhy” Idi tii boho heka Iòlò-ò kaa rybemy raryberenyre.
\s Deuxu-ò iny rityhynykremy Josiasi iòlò heka ixityre ritobinyre (2 Iòlò Tyyriti 23.1-3)
\v 29 Idi heka Josiasi Judá wedu mahãdu, Jerusalĕ wedu mahãdu ributunyre
\v 30 Deuxu heto Templo-ò roire xiwena wahidỹỹdu, Levi mahãdu, Judá mahãdu, Jerusalĕ mahãdu iaõkõ mahãdu, ityhy mahãdu ributunyrenyre iu heka iòlò kia Bede ywina tyyriti idi rariare ibutu mahãdu-ò.
\v 31 Iòlò heka heto manyna-ki roire heka tai ixityre heka Deuxu rybemy rariarenyre Deuxu koki. Tii boho raryberenyre heka inatyhytyhymy kia rybemy inatyhymy riòbynyrenykremy raryberenyre taworeny ribi. Iwese heka ibutumy Deuxu Rybe ywina Tyyriti rityhynyrenykremy.
\v 32 Jerusalĕ mahãdu ibutumy kiawesemy raryberenyre, Bejamĩ mahãdu tule. Ilabiereny Deuxu bede ywina wesemy riòbynyrenykremy inatyhytyhymy reòbynyrenykremy.
\v 33 Iu heka Josiasi isaelisu heka surioko ibutumy ritare, tule ibutumy bede mahãdu ideuxu sohojihyyle rityhynyrenykremy. Josiasi iòlò bedeu heka Isaeli mahãdu Deuxu ririõtyhy, ilabiereny Deuxu riòbynyrenyre.
\c 35
\cl Capítulo 35

\s Paskoa worana bedehesi Josiasi iòlò Deuxu-ò reàlànykremy riwinyre. (2 Iòlò mahãdu Tyyriti 23.21-23)
\p
\v 1 Jerusalĕ hãwã-ki Josiasi Paskoa worana bedehesi Josiasi iòlò Deuxu-ò reàlànykremy riwinyre, Paskoa worana bedehesi kia ahãdu14 txu-di heka budoeni rirubunyre (iwese Moisesi-ò Deuxu rarybere iwesemy).
\v 2 Tule heka xiwena wahidỹỹdu mahãdu Josiasi risỹnyre Deuxu heto Templo iaõmysỹdỹỹnareny ritidire
\v 3 Timybo Deuxu-ò reànynykremy Levi mahãdu-ò Isaeli mahãdu ibutumy rierynanyrenykre risỹnyre, myy rarybere heka: “Kia òwòruwodỹỹ womati tỹrỹrỹhỹkỹ-di heka Deuxu heto Templowo-ki bisỹnybenyke, Salomaõ Davi iòlò riòre kia riwinyre Templo-ki heka òwòruwodỹỹ tai ratxikremy, kai boho kia idi iriradỹõmykre axiòreny tyre-di. Wiji heka bexiywinybenyke, aõmysỹdỹỹnarenymy heka Isaeli mahãdu Deuxumy beàlàmyhỹbenykemy abededỹỹnanarenymy aDeuxurenymy kiakemy.
\v 4 Iwese juhuu alabiereny raõmysỹdỹỹnyrenyre iwesemy tamahãdu tamahãdu txumy maõmysỹdỹỹnybenyke, iwese Isaeli iòlò Davi Salomaõ tyby ritidire wesemy.
\v 5 Deuxu hetowo-ki heka txu òbiti-ò matxibenyke. Taile heka inyõ sỹmahãdu sỹmahãdumy Templo-ò taxiwenareny-di dirahumyhỹdenydeu biwiòhenanybenykemy.
\v 6 Paskoa budoeni budoeni heka birubunybenyke, idi bexiywinybenyke òbitimy matxibenykemy inyõ mahãdu kidirahudenykreu Templo-ò. Ibutu Inynyrỹ Mosesi-ò rarybere wesemy biwinybenykemy.”
\v 7 Idi heka Josiasi 30.000 budoeni hãbu sõwe, watxini hãbu sõwe Paskoa xiwenamy riwahinyre, ijõ 3.000 bororeni, kia ibutu iròdu iròdu tai roire heka iòlò nõhõmy rare.
\v 8 Iòlò deòdu mahãdu wedumy tule taõna õnamy riwahi riwahinyrenyre inyõ mahãdu-ò, Levi mahãdu-ò tule, xiwena wahidỹỹdu mahãdu-ò tule riwahi riwahinyrenyre, Deuxu heto Templo wedu mahãdu Hiukiasi, Sakariasi, Jeieli, 2.600 budoeni hãbu sõwe, watxini sõwe, xiwena wahidỹỹdu mahãdu-ò riwahinyrenyre, 300 bororeni hãbu sõwe tule Paskoa xiwenamy riwahinyrenyre.
\v 9 Levi mahãdu wedumy Konaniasi iseriòrereny Semaiasi, Natanaeli, tule Habasiasi, Jeieli, Josabadé heka 5.000 budoeni hãbu sõwe, watxini sõwe, 500 bororeni hãbu sõwe Levi mahãdu-ò riwahinyrenyre Paskoa xiwenamy.
\v 10 paskoamy ibutu idi riywinymy rahudi heka, xiwena wahidỹỹdu mahãdu, Levi mahãdu heka Deuxu heto templowo-ki rexisỹnyrenyre sohoji sohoji òbitimy iwese iòlò rarybere wesemy.
\v 11 Iu heka Paskoa budoeni Levi mahãdu rimyrenyre idi rirubunyrenyre, budoeni hãlubu heka xiwena wahidỹỹdu mahãdu-ò riwahinyrenyre tai heka xiwena wahidỹỹdu mahãdu heka òwòruwodỹỹ tyre-ò hãlubu ritxiwi txiwinyrenyre iu Levi mahãdu iròdu iròdu rirurubunymy roiremyhỹrenyre ijõ xiwenamy riwahinyrenykremy.
\v 12 Òbiti heka iròdu iròdu ritxua ritxuarenymy roire tamahãdu tamahãdureny-ò ibutu Deuxu-ò xiwenareny riwahi riwahinyrenykremy iwese Moisesi tyyriti roire iwesemy, tule iwese heka bororeni hãbu sõwe Deuxu-ò idi raxiwenyrenyre.
\v 13 Paskoa budoeni hãbu sõwe idi raòbiunyrenyre, iwesele ritidire wesemy , tule xiwena berebunamy butxi-di raheranyrenyre, butxi nihiỹ-di raheranyrenyre idi deti detilemy inyõ-ò riwyrenyre.
\v 14 Irahu-di heka Levi mahãdu ihõrõrenyle riywinyrenyre xiwena wahidỹỹdu hõrõreny tule idi riywinyrenyre Paskoa xiwenamy, kia txu heka Araõ riokorereny mahãdu, xiwena wahidỹỹdu mahãdu heka sõwemy idi raõmysỹdỹỹrenyre rudile txu ralòmy idihyymy iròduwe xiwena xiwenamy riwahi rihiwahinyrenyre tai dori heka Levi mahãdu ibutu xiwenamy idi riywinyrenyre.
\v 15 Asafe riòkorereny heka, tetxiki roimyhỹrenyre iwese Davi, Asafe, Hemã, Jedutuu, iòlò itxenadỹỹdu. ijòtòbòna itxeredu mahãdu heka ijòtòbòna-kihyy roiremyhỹ, isỹ mahãdu heka levi mahãdu tamyreny Paskoa xiwenamy riywinymy roimyhỹrenyre dori.
\v 16 Kia txuu heka Deuxu-ò Pascoa Worana Bedehesi ibutumy riwinyrenyre. òwòruwodỹỹ tyre-ò Deuxu-ò xiwenam riwahinyrenyre, iwese iòlò Josiasi rarybere wesemy.
\v 17 Ibutu Isaeli mahãdu Jerusalĕ hãwã-ki roimyhỹre mahãdu heka Paskoa Worana Bedehesi riwinyrenyre tule orutxu, (paõ) iuri uriõ, kiamy tule riwinyrenyre heka debò inatxi reurò txumy.
\v 18 Kia Paskoa Worana Bedehesi riwinyõhyyre Samueli bedeu ribi riwinyrenyõhyyre. Tai Isaeli iòlò mahãdu Paskoa Worana Bedehesi idi riwinyõhyyre Josiasi iòlò riwinyre wesemy. Xiwena wahidỹỹdu mahãdu tai roire, Levi mahãdu tai roire, Jerusalĕ-kisỹdu mahãdu tai roire, ibutu Judá mahãdu wana, Isaeli mahãdu ibutumy rexibutunyre tai roimyhỹre mahãdu idi roiremyhỹ.
\v 19 Kia Pascoa Worana Bedehesi heka Josiasi 18 beòramy iòlòmy raremyhỹu.
\s Josiasi iòlò rurure (2 Iòlò mahãdu Tyyriti 23.28-30)
\v 20 Josiasi heka Deuxu heto, Templo ritỹmyranyre rahudi heka Ejitu iòlò heka Neko inire, tii heka Kahakemisu-ò tasodadureny riwyre heka, Eubaraté bero iòhòmy iu heka Josiasi tasodadu mahãdu wana itxireny reare.
\v 21 Tai iòlò Neko tarybedu mahãdu Josiasi-ò riteònyre tamy rarybekremy: “Aõherawe, Judá iòlò? Adee aõkõ jiarỹ rareri! iwitxirasu mahãdu-ò arakremyreri Deuxu wadee rarybere wylemy arakremy! Deuxu wawana heka rare. Deuxu iorodỹỹõmy! kiaõ keki heka tiile arahukemy dori!”
\v 22 Ihỹre heka Neko rybemy Josiasi roholaõre, tii Deuxu rybemy tamy raryberemy Josiasi roholaõhyyre, idi rooseõre. Josiasi riitxenanykremy Mejidusu-ò tasodadureny-di rare sulutu-ò.
\v 23 Iu heka iòludureny wyhydu mahãdu wyhy-di Josiasi tai riwere, tii rirajuare tahãbu mahãdureny-ò: “Biwatakewa kaa ribi, riwawotõmynyra dori!”
\v 24 Tai tahe Awaru tewe ribi Josiasi ritarenyre heka ijô awaru tewe-di idi risỹnyrenyre. Jerusalĕ-ò ridyrenyre, taile rurure idi iòlò mahãdu wabe-òle rituunyrenyre. Ibutu judá mahãdu, Jerusalĕ mahãdu idi roburenyre, rahinyrenyre ibutumy.
\v 25 Jeremiasi, Deuxu rybedumy wiunamy riwinyre, Josiasi weleumy wiunamy riwinyre, kia ribi wiji-ò tule wiudu mahãdu hãbu, hawyy Josiasi rubumy idi rawiunyrenyre. Kia ribi wiji tule, Isaeli mahãdu ibededỹỹnanarenymy kia Iburu, ihĩ wiunamy roire heka ijyy tyyriti-ki roire.
\v 26 Josiasi iòlòna bedeu aõhebo rotỹỹnyre heka, Deuxudewimy awityhymy reàlànyre heka,
\v 27 Iòlòna òraruna bedeu ribi iòlòna ituena bedeu-ò Israeli iòlò Tyyriti-ki, Judá iòlò Tyyritiki roire.
\c 36
\cl Capítulo 36

\s Jeoakasi Judá iòlòmy (2 Iòlò Tyyriti 23.30-34)
\p
\v 1 Judá mahãdu heka Josiasi riòre Joakasi Jerusalĕ iòlòmy risỹnyre, tyby deròwymy.
\v 2 Jeoakasi heka 23 beòra-di Judá iòlòmy ralore. Jerusalĕ-ki inataõ ahãdu-di iòlòmy ralore.
\v 3 Jeoakasi iòlòmy rareu heka Ejitu iòlò Neko rehemynyre iu Jeoakasi iòlò ribi idi ritare, tule heka Judá mahãdu 3.400 iutxie sõwe iòwymy ritadire, womati ura tỹrỹrỹhỹkỹ-di, 34 iutxie womati tỹrỹrỹhỹkỹ-di.
\v 4 Iu heka Eliakĩ Jeoakasi seriòremy Judá iòlòmy, Jerusalĕ iòlòmy Neko risỹnyre idi Ejitusu-ò Jeoakasi heka Neko ridyre. 
\s Jeoakĩ, Judá iòlòmy (2 Iòlò mahãduTyyriti 23.35-24.6)
\v 5 Jeoakĩ heka 25 beòra-di Judá iòlòmy ralore tii debòwiò sohoji beòramy Jerusalĕ iòlòmy roire. Tii taDeuxu-ò ibinamy riwinyre.
\v 6 Iu heka Nabukodonoso, Babilonia iòlòmy heka Isaeli mahãdusu-ò itxi reare Jeoakĩ iòlò womati-di ritisanyre Babiloniasu-ò ridyre.
\v 7 Deuxu heto Templowo ribi aõna õna ritare idi heka Babiloniasu-ò riwyre Nabukodonoso taheto-òle kia aõna õna risỹnyre.
\v 8 Kia ijõ Jeoakĩ ibina bina riwinyre heka, inyõ iribi rybe bina binamy raryberenyre heka ibutu Isaeli iòlò mahãdu ijyymy, Judá iòlò mahãdu ijyymy Tyyriti-ki roire. Iriòre heka Joakĩ iòlòmy ralore.
\s Joakĩ Judá iòlòmy ralore (2 Iòlò mahãdu Tyyriti 24.8-17)
\v 9 Jeoakĩ heka 18 beòra-di Judá iòlòmy ralore. Tii inataõ ahãdu debòwiò txumy Jerusalĕ-ki iòlòmy rare. Tii Inynyrỹ, Deuxudewimy aõkõ riwinyre.
\v 10 Idi heka kia beòraule bedehetxi ahãduu heka Nabukodonoso rimykremy idi riteònyre wetxumy Babilonia-ò ridyrenykremy, tulesỹ Deuxu heto Templowo ribi aõna õna awityhymy ridyrenykremy riteònyre babiloniasu-ò. Idi Joakĩ lany Sedekiasi Judá iòlòmy, Jerusalĕ iòlòmy Nabukodonoso risỹnyre.
\s Sedekiasi Judá iòlòmy ralore. (2 Iòlò Tyyriti24.18-20, Jeremia 52. 1-3a)
\v 11 Sedekia 21 beòra-di iòlòmy ralore, debòwiò sohoji reurò beòramy Jerusalĕ-ki iòlòmy rare.
\v 12 Sedekia taDeuxu koki heka ibina bina riwinyre, Jeremia Deuxu rybedumy Deuxu ribi tamy rarybereu tii rexirahĩõtyhy.
\s Jerusalĕ hãwã-ò iòludu mahãdu itxi reare (2 Iòlò mahãdu Tyyriti 25.1-21; Jeremia 52.3b-30)
\v 13 Sedekia heka nabukodonoso-ò reburemy itxi reare heka tii tamy rarybere Deuxunimy inatyhytyhymy biòwamy ratxikremy, tii nohõti txyre rexirahĩõre heka Isaeli Deuxu-ò rooseõre.
\v 14 Judá hãbu wedu mahãdu, xiwena wahidỹỹdu mahãdu, Judá mahãdu iereny raòrarunyrenymy roire, iwese Dexu rieryõre mahãdu wesemy suriokoreny rityhynymy roiremyhỹ. Tai dori Deuxu heto Templo ribinanyrenyre, rixunyrenyre surioko-di, Deuxu kia heto Templo risỹnyre taile tamy reàlànyrenykremy.
\v 15 Inynyrỹ ilabiereny Deuxu heka idihyymy tamyreny rarybere tarybedu mahãdureny-di, Deuxu sõwemy idireny riwotòenyre dori kia heto tule.
\v 16 Ihỹrele heka kia mahãdu Deuxu rybedu mahãdu idi risinyrenyre. Tai heka Deuxu reburemy tamyreny idi rare.
\v 17 Tai dori Babilônia iòlò heka tasodadureny-di itxirearenykremy Deuxu riwinyre. Weryrybò mahãdu mayrehe-di tii rirubunyre, Deuxu heto Templowo-ki tule tai rirubunyre, tai Deuxu idireny raruxetòenyõtyhy, weryrybò mahãduke aõkõ, ijadòma mahãdu idi raruxetòenyõtyhy, hãbu mahãdu tule idi raruxetòenyõtyhy, matuari, senado mahãdu idi raruxetòenyõtyhy. Tai dori Babilonia iòlò-ò riwahinyrenyre.
\v 18 Babilonia iòlò heka Deuxu heto Templowo ribi ibutu aõna õna wiwihikỹ womati sõwe riwyrenyre Babilônia-ò, tule hãbu wedu mahãdu aõna õna wiwihikỹ riwyre, iòlò ribi tule ibutu riwyre Babilonia-ò.
\v 19 Babilonia sodadu mahãdu heka Templo risõrenyre, iòtityreny ribòhòbòhònyre, iòlò heto ribinanyrenyre, ibutu aõna õna wiwihikỹ ribinanyrenyre, riwyrenyre.
\v 20 Jerusalĕ sỹdu mahãdu ruruõre heka ridyrenyre Babilonia-ò ròtena-ò taile heka iòlò wetxumy relerenyre, iòlò riokorereny wetxumy relerenyre kia bedeu ribi Pésia iòlò bedeu ralore-ò.
\v 21 Iwese Deuxu Jeremia juhuu rarybere wesemy tuu rotỹỹnyre myy: “ Ibòò ribi kididykremy Babilonia wadeòdu ribi Nabudonoso. Kia mahãdu aridykre Judá mahãdu idi raõbinanykremy kasu weraludu mahãdu wana raõbinanykremy. Ibina bina ibutusu-ki roikremy. Babilonia iòlò heka 70 beòramy ibutu hãwã wedumy ratxikremy. Kia bedeu heka sabadu txumy ele rihunykremy”
\s Siro tyyriti (Exidara 1.1-4)
\v 22 Pésiasu Siro iòlò sohoji beòramy rareu Jeremia Deuxu rybedumy rarybere wesemy rotỹỹnyre. Siro wo-ki heka Deuxu idi riwisỹnyre tyyriti riwinykremy. Ibutu bede-ò rarybekremy, kia tyyriti idi rariakremy ibutu koki myy:
\v 23 Jiarỹ heka Siru, Pésia iòlòmy mytahe ararybekre: Inynyrỹ biu wedu Deuxu rare tiile bede bedemy iòlòmy riwasỹnyre, tule wadee rarybere Jerusalĕ-ki heto tamy riwinykremy, Judásu-ò. Jiarỹ katahe adeereny ararybekre ibutu Judá mahãdu-ò, heka Jerusalĕ-ò boosebenykre, kia heto widỹỹ maõmysỹdỹỹbenyke aDeuxureny awanareny idi ratxikremy boibenykre. Kie”