kpj_reg/10-2SA.usfm

\id 2SA
\ide UTF-8
\rem dat 2017
\h 2 Samueli
\toc1 2 Samueli
\toc2 2 Samueli
\toc3 2sa
\mt1 2 Samueli
\c 1
\s1 Sau rubu nina rieryre.
\p
\v 1 Sau rubu sỹtybymy, Davi aõmaribi nade amalekita mahãdu-ò aõbina ribi ta inatxitxumy Ziklague hãwa-ki bede riere.
\v 2 Ijõtxuu ta weryryboõ dehemynyde Sau tai ratximyhỹ bederibi. Tabederyry deòsidỹỹmy, tatyy riykare tule tarati-ò suu riòdònyre. Ta weryrybo rare tai Davi ratximyhỹ òhòkỹle, ta tatiowomy resere tule taòmy su-ò resere tyhydỹỹ bededỹỹnana heka rare.
\v 3 Tahe Davi tamy rỹỹraxire: —Tiribibo heka tateri? —Israelita mahãdu tai rỹireri ribi rahenyreri! —Kawesemy rirawyònyre.
\v 4 Tuuini bedelyyke timybo wou rohonyramy! Davi tamy rarybere: —Waijoireny raòrunyrenyra aõbiribi, tule sõemy waijoireny ituerenyra! Weryrybo rirawyònyre: —Sau tariòre Jonata wana rururenyra.
\v 5 Timykibo heka Sau Jonata wana rururamy teeryta? Davi rỹỹraxire.
\v 6 Tahe weryrybo kiamy rirawyònyre: —Tamykie rehemynyre, jiarỹ, Gilboa hãwalò-ò ta Saumy rabire tõnori-di ixiki roimyhỹ-ò. Iòludu mahãdu kahu ta iawarureny iòhòlemy tamy nariamy dirahude.
\v 7 Tii rexirahorere, ta wamy robireu wadee ryryre. Ta rerawyònyre: Kakile watxireri, wawedu!
\v 8 Ta Sau rỹỹraxire mobo watxirerimy, taxe rerawyònyre amalekita mahãdu watxirerimy.
\v 9 Ta kiamy tii rarybere: Inihikỹmyhe rawotõmora arurukre heka. Manata ka-ò biwarubunykremy.
\v 10 Tahe tamy raòwònyre tai roimyhỹò taxe rerubunyre reeryre dori rurukremy, iòhòlemy rariowykremy sutxi, rurukremy. Tahe irataana iribi retare ta teòruta taana ijõmy retare tahe adee ka idi rareri.
\v 11 Iòraruki tahe Davi tatyy ritxuare tabederyry deòsidỹỹmy, tule iwesele ijoi mahãdu riwinyrenyre.
\v 12 Rahinyrenyre aõhõkỹy rutỹỹnyrenyre tule renareherenyre txioromyta ixãwirenyre Sau rubu òraruki, Deuxu ijoi mahãdu wahe, wedu nihikỹ ijoi, sõemy ituerenyre aõbinaki.
\v 13 Tahe Davi tamy rỹỹraxire weryrybo rybewahidi nade dee. —Tiludubo heka atxiteri? —Jiarỹ inihe amalekita mahãdu watxireri, ta kakile rasỹnyreri wiji ahãwã bede-kile! — Kawesemy rirawyònyre.
\v 14 Aõherekibo heka wedu terubunyta tetyhynykõtyhymy Deuxu tuu ritare, wedu nihikỹ? — Davi rỹỹraxire:
\v 15 Tahe taijoi mahãduõ-ò ryryre riteranyre: Birubunyke! Tahe hãbu amalekita dee raõbinanyre rirubunyre.
\v 16 Kiamy Davi amalekita dee rarybere: —Kai òbitihikỹle heka bede-ò rarura. Kai òbitihikỹle heka texitỹnynyta iximy telyyta wedu nihikỹ wedumy ritare terubunytamy. Davi rahinyre Sau tòenamy tule Jonata tòenamy.
\v 17 Davi wiu riwinyre taõhõkỹmy dỹỹnana Sau òraruki tule iriòre Jonata òraruki.
\v 18 Ta kiamy rarybere Juda mahãdu idi rierynanyrenykremy. (Ka wiu heka tyyriti justu-ki iritina roimyhỹre).
\v 19 Iny ijoireny heka ituerenyra Israel mahãdu hãwalo-ki!
\v 20 Tuu ijyyrenyõmykre Gate hãwa-ò tule askelõ-ò, filisteia hãwyy mahãdu rexideysanyke lau, ityhydỹỹkõdu mahãdu riòre reysarenymy rexiwayrytònymy ratxirenyke lau.
\v 21 Biu roake ihoõre tule nonoè rejuxunyke ihoõre Gilboa hãwalò-txi, asureny tiu aõ ixyby tai txuhuõna. Kia-ki dori woudu deburehekỹ mahãdu debone rabròmy roireri, tule Sau debone toosona ituera.
\v 22 Jonata waxiahate heka rubunarare, Sau mayrehe tasỹ tuu rexieryõhyymyhỹre iny debure atysy-ki tule taòludu mahãdu rirubunymyhỹre.
\v 23 Sau Jonatamy boho, heka waderina wihikỹ roire; butumy waumyreny, tule butumy  r`abub-ki! Nawiikỹ ratyre teti roire tule halòe mahãdu ratyre ityhy roire!
\v 24 Israel mahãdu hãwyy, Sau dee bobubeny! Tii tyysò wihikỹ-di aratyynymyhỹrenyre tule (ouro) wihikỹ-di araywinymyhỹrenyre.
\v 25 Sodadu deburetyhy mahãdu  rariòwyrenyre tule wouki ituerenyra. Jonata hãwalò-ki rurumy roireri.
\v 26 Adee arahinykre, waseriòre Jonata aratyhynymyhỹre jiarỹ! Erina heka wadee awi rare, hãwyy mahãdu derina ratyre wadee erina awi rare.
\v 27 Sodadu deburetyhy mahãdu rariòwyrenyre, tule ebònareny ituera ixãwira.
\c 2
\s1 Davi Juda mahãdu wedumy runyre.
\p
\v 1 Imyrahudita Davi Deuxu dee rỹỹraxire, wedu nihikỹ-ò: —Aõaxina aõbo arakre Juda bede-ò aõtxi hãwaõ ariwedunykremy? —Kohe! — wedu nihikỹ rirawyònyre. —Tibo tahe tiikre? — tii rỹỹraxire. —Hebrõ hãwa! — kamyhe rirawyònyre.
\v 2 Tahe Davi Hebrõ hãwaõ rare, tahãwyy tabiraludu wana ixihemy ridyre. Ijõ heka Ainoã inire, Jezreel hãwã ludu, ijõ tahe Abigail rare, Nabal wytese, Karmelo hãwã ludu.
\v 3-4 Davi tule tasodadu mahãdu ixihemy ridyrenyre ihãwyyreny wana butumy, hãwaõ Hebrõ bireki roimyhỹreki rahãwanymy roiremyhỹ. Tahe Juda mahãdu roirenyre Hebrõ hãwa-ò tahe Davi wedumy (riratyysbenyrenyre) Juda hãwã butumy riwedunykremy. Ka Davi rieryreu Jabe hãwaludu mahãdumy ijyy, Gileade bedeludu mahãdu, Sau rituunyrenyremy.
\v 5 Hãbu mahãduõ riteònykremy tamyreny myỹ rarybekremy: —Wedu nihikỹ 1 wawedureny teywiywinymy tetuunytenyta òraruki!
\v 6 Wedu nihikỹ awimy adireny ratxikre òbitimy! Awi tewinytenyta òraruki, jiarỹ tule awimy adireny ararekre.
\v 7 Atyhymy boibekre tule awodeburemy! Sau heka awedureny rare, rururexe, tahe Juda mahãdu heka tawedurenymy (riwaratyysbenyrenyra).
\v 8 Sau sodadu dinodu, Abner my nidu, Ner riòre, kia heka Isbosete rahenyra, Sau riòre-di, Maanai bede-ò, Jordaõ bero kanaweribi-ò.
\v 9 Taita, Abner Isbosete wedumy (risnyra) Gileade bede-ki, Asser hãwã Jezreel hãwa, Efrai hãwã tule Benjami hãwa; òbitityhy tahe ibutumy Israel hãwã hãwã wedumy runyra.
\v 10 Iu Isbosete quarenta wyradile Israel wedumy runyre ta inatxi wyramy bede riere wedumy. Ka Juda mahãdu tahe òbitimy roiremyhỹ Davi dee.
\v 11 Sete wyra weeremy bede riere wedu-ki. Israel mahãdu Juda mahãdu wana widee rawounyrenyre.
\v 12 Abner Isbosete ijoi mahãdu wana Maanai hãwã ribi roirenyre Gibeõ hãwã-ò.
\v 13 Joabe-se, heka Zeruia rare, tahe Davi ijoi mahãdu roirenyre Gibeõ syrawo beroijà-ki witxi rekoakremy. Tai tahe ibutumy rexibutunyrenyre, ijõ mahãdu ijõ weribiò rexibutunyre ijõ mahãdu tasỹ ijõ wyònare.
\v 14 Tahe Abner Joabe dee rarybere: —Txioini wajyre mahãduõ ajyre mahãdu wana resurenyke, debonadi kỹnyhỹ. —Awire! — Joabe rirawyònyre.
\v 15 Kaa doze sodadu, heka Isbosete weribireri Bẽjami mahãdu tulesỹ Davi sodadu dozemyre tiiboho wana resurenyre.
\v 16 Iny sohoji sohoji taòludu iratiribile rimymy tai rojyrenyre. Kawesemy ibutumy tarubulemyy rariòwyrenyre. Iòraruki Gibeõ hãwã bedeki kiamy rininirenyre mayrehe bederomy.
\v 17 Iubedeu ixyixybyle wou rohonyre, iu Abner ta Israelita mahãdumy boho sõemy ituerenyre Davi sodadu mahãdu tureny rarubudỹỹnanyrenyre.
\v 18 Joabe, Abisai ta Asaelmy boho, ibutumy tai ratximyhỹreny Zeruia riòreboho, ibedeki. Asael heka, (iijratere) rare iròdu (ijratere) wese heka reamyhỹre.
\v 19 Abner-di tarukire, ihewomy reamy rare.
\v 20 Ta Abner ixihewo-ò retehere ta rỹỹraxire: —Asael, kaiwe atxiteri? —Kohe, jiarỹ! — Kawesemy rirawyònyre:
\v 21 Wahemy (ijraribi) ixãwike! Kawesemy Abner rarybere: —Sodadu mahãdu heõmyta beake iaõnaõna ixidee bimykre. Asael ihãrele ihemy reamy rare.
\v 22 Ixybysỹ Abner tamy rarybere: — Ixãwikehewa wahemy (ijraribi) ! Ixirubudỹỹmy heka wadi atxiteri! Timybo heka iu anatxikre, irahudi, aseriòre wana widi aretehemy?
\v 23 Ihãrele ihemy Asael reamy rare rexitxuhunykõlemy. Tahe Abner tatõnori-di ixihewo-ò myỹ idi deade. Tahe Asael weki rojyre iweribi ibròsirurehekỹle rohonyre. Tarubulemy rariòwyre sutxi, aõtxile iny tamy rehemynymyhỹ tamy rexitxuhumyhỹ tai resemy roimyhỹ-ò.
\v 24 Joabe Abisai wana ihewomy raòrarunymy roire Abner hemy, txuròte iòhòmy, Ama hãwalò-ò ritehemynyre, Gia hãwa-o, Gibeõ bedetyahakỹ-ò ryy ramyhỹredi.
\v 25 Benjami mahãdu sodadu ixybyle rexibutunyrenyre Abner werura-di hãwalòò ta rexitxuhunyrenyre.
\v 26 Tahe Abner Joabe dee ryryre: Tiiemy wexe wiwana rakaaõbinanymy rokoikre? Tiuhe ixyby tuu (obxikõna), ionanau, aõ rauhenyke ihoõre, aõhebo tahe bederyry? Jiarỹboho heka aseriòre roire! Tiubo heka asodadu-ò marybekre waherenymy (ijra) ijãwikremy?
\v 27 Kiamy Joabe rirawyònyre: Deuxuni adee reuhera ka, marybeõma wana inihe, waijoireny txuu idireny ini reareri aherenymy (ijradi).
\v 28 Tahe Joabe corneta ritokanyre. Tahe ibutumy sodadu mahãdu rexitxunyrenyre israelita mahãdu hemy (ijraribi), aõbinaxe ixãwire.
\v 29 Irumyleta, Abner tasodadu mahãdu wana ramaxanyrenymy ruu idireny nade Jordaõ bedeki. Ihyy riòhòrerenyre Jordaõ berokotxi, txumy ramaxanyreny rahudi, Maanai hãwa-ò rironyrenyre.
\v 30 Ka Joabe ixãwireu iherenymy (ijra), ibutumy tasodadureny ributunyre ta iijõrenyõ rasiranymyhỹ dezenovemy sõereny ihãremysỹ Asael ijõmy iõmyhỹ.
\v 31 Urile tahe Davi sodadu mahãdu trezento e sessentamy Abner sodadu rirubunyrenyre, Beami mahãdu lehekỹ ituerenyre.
\v 32 Tahe Joabe tasodadu mahãdu wana Asael rubu riwyrenyre ta rituunyrenyre tasỹreny mahãdu wabedewo-ò, Belẽ bede-ki. Tahe ramaxanyrenymy ruu idireny nade, (txuijramyta), Hebrõ-ò ritehemynyre.
\c 3
\p
\v 1 Irehemy raõbinanymy roiremyhỹ Sau sỹ mahãdu Davi ijoi mahãdu wana. Davi ijoi mahãdu ire ratyhymy roire, ka Sau ijoi mahãdu tasỹ ire raõkõmy roire. Davi riòre boho.
\v 2 Davi riòre boho Hebrõ-ki juradu mahãdu kaa tiirenyre: Kotyhymy (ijra) moma inire Amnõ, Ainoa riòire, Jezreel hãwã ludu.
\v 3 Ihewomy tasỹ Kileabe ruare, Abigail riòre, Nabal wytese, Karmelo hãwã ludu. Inataõna tahe Absalaõ duade iheworenymy, Maaka riòre, Taomai riòre, Gesur hãwã wedu.
\v 4 Inaubiowa tasỹ Adonia duade, Hagite riòre. Iiruyrena tasỹ Sefatia duade, Abital riòre.
\v 5 Idebòò sohoji deuròsòna tasỹ Itreaõ duade, Egla riòre, Davi hãwyy tyhy wahe. Ka Davi riòre mahãdu heka Hebrõ kilehekỹ ruarenyre.
\v 6 Ka aõbina rohonymy raremyhỹ wanawana Sau sỹ mahãdu Davi ijoi mahãdu wana, Abner ire ratyhymy rare Sau sỹ mahãdu kyki.
\v 7 Tiutxumybota Isbosete, Sau riòre, Abner my rarybere Sau weleu biraludu wana wityyò reseremy Rispamy nidu wana, Aia riòre.
\v 8 Abner iòraruki reburere ta kiamy rarybere: —Aõmywe wadi tahõtinyteri itxỹitxỹtemy nodumy? Da Juda mahãdu weribi aõbo rahoreramy wadi tahõtinyteri? Ixybysỹ rarybere: —Juhu bedeuhukỹle Sau dee òbitimy raremyhỹ, buu wahe, aseriòre mahãdu tule abiòwa mahãdu-ò tasỹ Davi ribi tule arahedỹỹnyre aribi rotakeribi. Wiji tahe kai awimy tarybeteri hãwyy wana wide raòtaòtaramy!
\v 9-10 Deuxu wedu nihikỹ  kiamy rarybere Davi-ò wedu Sau ribi ritakremy tule iriòreriòre mahãdu ribi Davi ta wedumy runykre ibutu hãwã hãwã wedumy Israel ta Judamy, ibutu wedumy runykremy. Deuxu he ixinamy riwarubunykre tuu ariwinyõkre wana tuu rutỹỹnykre!
\v 11 Isbosete Abner lau ruberure; iòrarukita aõmy rarybeõhyyre.
\v 12 Iu bedeu Davi Hebrõ hãwa-ki ihỹmyhỹ, Abner teòdu iu riteònyre rybewahidi myỹ idi rare rybedi: —Mowexe kaa suu riwedunykre? Wideeini bede rikiywinyke, arawiòhenanykre ibutumy Israel mahãdu adee aridykre.
\v 13 Kiamy Davi rirawyònyre: —Awire. Jiarỹ sỹ myỹ adee ararybekre, ywimy: wadee rybemy manakre-u, Mikal wadee bididykre Sau riòre.
\v 14 Tahe Davi teòdu mahãduõ riteònyre Isbosete dee rarybekremy: —Wahãwyy Miakl he wadee bidiwahinykre. Reòwynyre dori filisteu mahãdu-di taita tiukõnamy tii wana aroikre.
\v 15 Taita Isbosete ihãbu ribi riatykremy tuu rarybere Paltiel ribi, Lais riòre.
\v 16 Iòraru-ki Paltiel rahinymy ihemy rydi rare, ihyy Bauri hãwa-ò rirònyre. Tahe Abner tamy rarybere: —Bòòsesekehewa asỹ-ò. Tiixe roosere.
\v 17 Tahe Abner Israel mahãdu dee rybemy rare. Kiamy tii rarybere: —Aõ òhòkõmy Davi di toitemyhỹ Israel mahãdu wedumy runykemy.
\v 18 Katahe itxuòhe rehemynyra. Wedu nihikỹ rybetxi ini õhõtireny reake: Wadeòdu Davi ariuhekre Israel mahãdu hedỹỹdumy, filisteu mahãdu-ribi tule ijõ iòludu mahãdu ribi.
\v 19 Tule sỹ Abner Benjami mahãdu-ò rarybere irahudi tasỹ Hebrõ-ò rare Davi-ko ijyymy timybo Benjami mahãdu Israel mahãdu wana bede riywinyrenyramy.
\v 20 Abner rare, hãbu mahãduõ wanarare, Hebrõ hãwa-ò Davi wana witxi reakremy, worana bedehesi riwinyrenykremy.
\v 21 Kiamy Abner Davi dee rarybere: —Ka wiji arakre ibutumy Israel mahãdu-ò ararybekre adee reòbyrenykremy. Tahe tawedurenymy adee reòbyrenykre. Iu tahe ibutumy ihãwareny biwedunykre. Tahe Davi Abner ywilemy riteònyre. Abner rurure bededỹỹnana.
\v 22 Iroorehetyhymy aõkõta, Joabe ijõ mahãdu wana ditehemynydenyde Davi ijoi mahãdu aõbina eleele ribi, sõemy aõnaõna diwydenyde taòludu mahãdu ribi. Abner xe iu Hebrõ-ki ratxiõmyhỹ Davi ruraki ywilemy ixiribi riteònyre.
\v 23 Joabe tasodadu mahãdu wana ritehemynyreu tahe, iko relyyrenyre Abner Davi-ò rybey rarerimy ta ywilemy riteònyra.
\v 24 Taita Joabe Davi-ò rybemy rare. Kiamy rarybere: —Aõhewexe tatỹỹnyta? Abner ka-ò rareri, aõherekibo kua teteònyta aõhe tamy tatỹỹnykõlemy?
\v 25 Bòdỹỹmy heka kia rareri, aõmamyhỹka kia rare timybo aõnaõna ibutumy rỹireri rierykremy tiubo tamyhỹte aõbo tewinymyhỹte erysymy. Kai heka teeryteri ibededỹỹnana!
\v 26 Davi ribi rohonyre rahudi, Joabe teòdu riteònyre iheworibi Abner hewomy. Sira hãluubeò ta tamy ritehemynyre ta ixybyle diòkesedỹỹnydenyde. Urile tahe Davi rieryõhyyre.
\v 27 Ka Abner rehemynyreu Hebrõ-ò, Joabe idi rare ijòtòbona weribi-ò, tamy aõmy rarybekre wesemy, tahe maydeedi tai rojyre iweki. Kawesemyhe Abner, Ner riòre, rurure Asael rirubunyre òraru-ki, Joabe seriòre.
\v 28 Ka raeryreu, kiamy Davi rarybere: —Wedunihikỹ Deuxu he rieryreri jiarỹ waijoi mahãdu wana Abner rubu watyrereny rautxienyke ihoõre.
\v 29 Abner tyrexe rautxienykre teery rubu isỹreny mahãdu wana ibutumy! Binana asỹreny-ki tule ahãbureny-ki rasiranyke ihoõre dà banana aõbo adetyyreny-ò reurokre, dà kõmy aõbo hãwyy aõmysỹdỹỹnale biwinymy boibekre, dà kõmy aõbo wouki burubenykre, dà kõmy aõma ràma adeereny reakre!
\v 30 Kawesemy Joabe taseriòre Abisai wana Abner rirubunyrenyre Asael, iseriòrereny rirubunyre òraru-ki, Gibeaõ-ki wou rohonyre bedeu.
\v 31 Tahe Davi Joabe dee rarybere tasodadu mahãdu wana rahinyrenykremy Abner dee, bederyry bededỹỹnanamy, atyyreny biykakeki ijõmy  awire, tule iny (hibdỹỹnana) tyy riuhemyhỹre-di bexityynybenykeki ijõmy awire. Ka ituudỹỹ bedeu iwedureny katxiterehekỹmy rahinymyhỹ iwabede raki. Imahãdureny iweselehekỹ riwinyrenyre.
\v 33 Kiamy Davi Abner dee wiu riwinyre: Aõherekiwe Abner rurura iny itxỹte mahãdu rubulemy?
\v 34 Ebò itaake aõkõ, awake tule itaake; iwese aleerydu inymy reerynymyhỹre wese tii rurura! Ixybysỹ ixỹ mahãdu Abner rahi rasỹbinarenyre.
\v 35 Ixỹ mahãdu Davi-di ratutaamyhỹreny aõ (rirsỹkemy) txuu ralokre koki, ta tii kiamy rarybere: —Deuxu ixinamy riwarubunykre aõ (arirsỹkre) wana txuròtena koki!
\v 36 Ibutumy ixỹ roholare irybe-ò tule awimy tai raharenyre. Òbitityhyta, ixỹ ibutumy tai awimy rahamyhỹre wedu aõ riwinymyhỹreki.
\v 37 Tai òraru-ki xe ibutumy Davi ijoi mahãdu tule Israel mahãdu rierynyrenyre Abner rubudỹỹ tamy roroke.
\v 38 Kiamy tii rarybere taijoi mahãdu-ò: —Wijihe ibutumy bierymy atxibenybekre Israel mahãdu wedu rururamy.
\v 39 Jiarỹhe Deuxu wedumy riwatare, wiji heka warurukõmy ixidi rahõtinyreri. Zeruia riòreboho heka iehehetyhyrenyre wadee! Wedu nihikỹxe aõhõkỹmy risinyrenykre  tii ixidi tuu rierenyra wenana!
\s1 Isbosete rurure bededỹỹnana.
\c 4
\p
\v 1 Isbosete, Sau riòre, Abner rururemy rieryreu Hebrõ hãwaki, tebure ixãwire, tule ibutumy Israel mahãdu sõemy ruberurenyre.
\v 2 Isbosete sodadu wedu iny inatxire tii riwedunymyhỹre aõbina rohonykre bedeu taòludu mahãdu wana. Inireny heka Baana ta Hekabe my inirenyre Himo riòre heka roire, Beeròtxi hãwaludu, Benjami mahãdu heka roire. (Beeròtxi hãwã heka Benjami sumy turybe rỹimyhỹre.
\v 3 Beeròtxi-ki juhuu hãwadu mahãdu heka Gitãi hãwa-ò rihenyrenyre ta tai hãwã witxira mahãdu wesemy tai ratximyhỹrenyre wiji (yrbu) tuu ratximyhỹrenyre).
\v 4 Ka Sau taJonata my boho ituerenyreu Jezreel-ki, Mefibosete, Jonata riòre, iu iuyremyre iwyra. Sau taJonata my boho rubunina rehemynyreu, hãwyy Mefibosete-di huruhurumy iòraru-ki uladu relere.
\v 5 Hekabe ta Baana Isbosete heto-ò roirenyre ta tatyy ritareri-ò tamy ritehemynyre byrena sỹtybyu.
\v 6 Hãwyy trigo riuatymyhỹre tỹhi risamyhỹ tahe rõrõre. Iurenana tahe Baana ta Hekabe tahe itỹhiole rirubunyrenyre. Tahe irati riòròrenyre tule ixihemy riwyrenyre. Rumy rariamy roire Jordaõ bede-di.
\v 8 Hebrõ-ò ritehemyny bedeu, Davi dee Isbosete rati riteòsinyrenyre kiamy tamy raryberenyre: —Kaa roire Isbosete rati, aòludu Sau riòre, arubudỹỹmy adi raremyhỹ. Wijihe Deuxu wedu nihikỹ tai rexixara, wawedu, Sau-ki tule iriòreriòre mahãdu wana.
\v 9-11 —Jiarỹ heka rybewahidi wadee rare remyre tule irubudỹỹmy inyõ reteranyre Ziklague hãwa-ki, aõmamyhe ixidi, rõhõtinymyhỹ rybewahidi awimy wadee rarerimy, Sau rururemyhe wako relyymyhỹ. Wedunihikỹ, Deuxu inimy noduni ariuhekre, sõemy riwahedỹỹnyre aõnaõna iòhãru ribi, kiaremy heka hãbu bòdỹỹdu mahãdu aõhõkỹmy (arisnykre) kiemy dori hãbuõ aõ iòkõlemy rirubunyrenyra taheto-ki rõrõmy roireriòle! Tahe adeereny araõbinanykre Isbosete terubunytenyta òraru-ki iwesetyhyle kaiboho wijityhyle su ribi aõbenykre.
\v 12 Tahe Davi tasodadu mahãduõ tamyreny riteranyre rirubunyrenykremy tahe rirubunyrenyre Hekabe ta Baana ituerenyre. Irahudita tebòreny ta iwarenymy riòròrenyre ta Hebrõ syraro bira-ò riònyrenyre. Irahudita Isbosete rati rituunyrenyre Abner wabede roò Hebrõ bede-ki. Davi Israel wedumy ta Juda mahãdu wedumy runyre.
\c 5
\p
\v 1 Tahe ibutumy Israel mahãdu rirahure Davi wana witxi rekoakremy Hebrõ hãwã bede-ò ta kiamy raryberenyre: —Jiarỹboho heka asỹrenyle watxirenyreri, wedu.
\v 2 Juhu bedeu, Sau wawedurenymy raremyhỹ bedeu, kai Israel mahãdu wou bededỹỹnana-ki tewedunymy tatemyhỹ. Deuxu wedu nihikỹ kiamy rarybere kai wou bededỹỹnana-di atxikremy tule ibutumy ixỹ biwedunykremy.
\v 3 Kawesemy Israel mahãdu Davi wana witxi rekoarenyre Hebrõ hãwa-ki. Davi xe reòbyre tamyreny, tahe riratyysebenyrenyre Israel mahãdu wedumy.
\v 4 Trintamy iu iwyra ratximyhỹ iu wedumy runyre ta quarenta wyramy bede riere wedumy.
\v 5 Juda riwedunyre Hebrõ-ki, debo-ò inatxi reuro ribi iweeremy, tulesỹ Israel ta Judamy riwedunyre Jerusalẽ trinta wyramy.
\v 6 Davi tasodadu mahãdu wana Jerusalẽ aõbinamy roirenyre. Jebuseu mahãdu, tai sỹdu mahãdu, kiamy rõhõtinyrenyre tiu irutaõmy raloke ihoõmy iòraru-ki kiamy raryberenyre: —Tiu ka-ò malokeho aõkõ. Mobo araijekre aròtedỹỹ-ò, irueta mahãdu ta itibina mahãdumyle aitxesedukre.
\v 7 Ihãrele Davi iribireny idi rahãỹnanyre ihãwareny-di, ihyy Davi hãwamy raninire. Kawesemyhe rutỹỹnyre.
\v 8 Iu bedeu kiamy Davi rarybere tasodadu mahãdu dee: —Inyõ Jebuseu mahãduõ rirubunykeki, kua irueta mahãdu ta itibina mahãdu, my mahãdu heka sõemy riwakyaranymyhỹrenyre, (beijrana) hõrõdita maòwònybenyke ta tamyreny maõbinanybenykre. Iòraru-ki myỹ rybe roimyhỹre: Irueta mahãdu ta itibina mahãdu my heka tiu Deuxu heto-ò ralòõtyhy.
\v 9 Davi xe tai rasỹnymy raremyhỹ ta Davi hãwamy raninire. Iwerura riywinyre taitxesedumy ihyy wedu heto òhòkỹle rehemynyre.
\v 10 Davi xe ihyy raruruteremy rare kiemy dori wedu nihikỹ, Deuxu tuhyhykỹ, kia wana raremyhỹ.
\v 11 Wedu Hiraõ, Txiro hãwaludu, teòdu mahãdu riteònyre Davi dee. Tii òwòru-ò tamy riwyre ta òwòru-di aõmysỹdỹỹdu ijõre tule heto widỹỹdu ijõmy ralere, tahe heto Davi dee riwinyrenyre.
\v 12 Kawesemyxe Davi rieryre wedu nihikỹ tuu ritaramy Israel mahãdu wedumy, taijoi mahãdumy rerinanymyhỹre òraru-ki, tule wedu aõmysỹdỹỹna tako-ò rakremy.
\v 13 Ka Davi Hebrõ hãwã ribi rohonyre rahudi tasỹ, ixyby hãwyyõ tabiraludumy rimyre ta tahãwyy tyhymy ijõ rimyre Jerusalẽ bede-ki tiiboho wanata ixyby rariòrenyrenyre weryry ta hirarimy.
\v 14 Ka Davi riòreboho Jerusalẽ-ki juradu mahãdu nire: Samue, Sobabe, Natã, Salomaõ..
\v 15 Ibar, Elisua, Nefegue, Jafia.
\v 16 Elisama, Eliada ta Elifete. Davi filisteu mahãdu ribi rotare.
\v 17 Ka filisteu mahãdu Davimy ijyy rieryrenyreu Israel mahãdu wedumy runyremy, tasodadu mahãdu riteònyrenyre rimykremy. Ka rieryreu ibededỹỹnana, Davi rare tai tikibo riraòrenykre-ò.
\v 18 Tahe filisteu mahãdu tamy ditehemynyde bedebese wihikỹ-ò rexibutunymy roire.
\v 19 Tai tahe Davi Deuxu-ò rỹỹraxire, wedu nihikỹ-ò: —Ixinamy aõbo aõbinanykre filisteu mahãdu wana? Biwatarasa dỹỹnykre aõbo? —Make! Wedu nihikỹ rarybere:—Aratarasadỹỹnykre.
\v 20 Tai tahe Davi rare Bali (Baal)-Perazi òhòkỹle rehemynyre tai tahe filisteu mahãdu ribi rotare. Kia tii rarybere: —Iwesebre bee rariawana ibutumy aõnaõna ritxiwimyhỹre, iwese tahe wedu nihikỹ waòludu mahãdu aõwesele ritxiwirenyra. Iòraru-ki tahe hãwã kiamy raninire Bali-Perazimy.
\v 21 Taile filisteu mahãdu tadeuxureny ririrenyre, Davi tasodadureny wana riwyrenyre idi roirenyre.
\v 22 Tahe filisteu mahãdu ixybyle bedebese wihikỹ-ò rexibutunyrenyre.
\v 23 Ixybylesỹ Davi wedu nihikỹ-ò rỹỹraxire, ta kiamy dirawyònyde. —Karibi tamyreny aõbinaõmykre. Kuadita bodowerykre, ihyy bederaty hoòhòkỹle behemynykre ta iheworibi tamy maõbinanykre.
\v 24 Ka bedewodỹỹ-ò boholakre wana bederaty ratyatxi, iuhe bexiywiywinymy atxikre aõbina-ò kiemy dori kiamy bierykre jiarỹ akoki watxierimy filisteu mahãdu ijoi arahukremy.
\v 25 Ibutumy Davi wedu nihikỹ rybe manymynamy riwinyre ta filisteu mahãdu roirenyre ribuarerenyre Geba ribi ihyy Gezer òhòkỹle ritehemynyre. Arka Jerusalẽ-ò riwyrenyre.
\c 6
\p
\v 1 Davi ixyby Israel sodadu mahãdu awiawi ributunyrenyre, 30 mil-my hãbu sõemy.
\v 2 Baala hãwa-ò idireny rare, Juda bede-ò, arka òrysymy, tai wedu tuhyhykỹni roimyhỹre, tarynaki runymyhỹre, ỹju mahãdu wana.
\v 3 Tahe arka ritidirenyre kahu broreni idi retyymyhỹre roò, itỹmyra, tahe ritarenyre Abinadabe heto ribi, hãwalò-ki rỹimyhỹre wahe. Uza ta Aio, Abinadabe riòreboho, heka kahu-di roirenyre.
\v 4 Arka-di retyymy. Aio ikomy rariamy ramyhỹre.
\v 5 Davi israelita mahãdu wana resemyhỹreny tule rawiunymyhỹreny tarurumy Deuxu wodeysadỹỹmy, wedu nihikỹ wahe. Sõemy tiiboho ròtòkamyhỹreny, aõtxile aõ, tỹbu, bratu dori sõemy aõnaõna.
\v 6 Ka aõma-ò ritehemynyreu tai òmyta aõtxile alòbròna tai rityynymyhỹre Nakõ bede-ki, tai broreniboho rariòwyrenyre. Iu Uza tebò riterenyre ta arka rimyre.
\v 7 Wedu nihikỹ Deuxu Uza-ki ibinamy rahare, rityhynyõre-ki, ihyy rirubunyre. Taityhyle Uza rurure, arka birekile.
\v 8 Davi sõemy reburere wedu nihikỹ aõmareki, teburedi, Uza aõhõkỹ tyhymy (risnyreki); wiji (yrbu) ini Perez-Uzamy naninimyhỹde.
\v 9 Tahe Davi Deuxu lau ruberure, wedu nihikỹ lau, kiamy rarybere: —Timybohe tahe arka ixihemy ariwykre?
\v 10 Kawesemy he Davi rexiixãwinyre arka tahãwa-ò riwykremy ratximyhỹ ribi Jerusalẽ bede-ò; ihãremy tasỹ, tawo rirahorere ta riwyre Obede-Edõ-ò, Gate hãwã heka rare.
\v 11 Inataõ ahãdumy arka tai bede riere, wedu nihikỹ Obede-Edõ riwiòhenanyre isỹre wana.
\v 12 Davi wedu kiamy rieryre, wedu nihikỹ Obede-Edõ isỹreny wana riwiòhenanyre arka òraruki ibutumy iaõnaõna ijõdire tahe Obede-Edõ heto ribi arka riwyre, sõemy teysamy, Davi hãwa-ò idi roirenyre.
\v 13 Ka hãbu mahãdu arka-di retyymyhỹ rahudi debo-ò sohoji reuromy tatireny riwyrenyre. Davi Deuxu dee xiwe riwahinyre broreni ta iriòre wijiumuyhỹkỹmy rirubunyre.
\v 14 Tahe Davi, tyywihikỹdi rexityynyre wedu dee aõmysỹdỹỹdu tyydi, resemyhỹ Davi Deuxu riwowydỹỹnymyhỹ, wedu nihikỹ.
\v 15 Kawesemy tii ta israelitamy mahãdu wana arka-di riwymy roirenyre Jerusalẽ bede-ò, sõemy teysamy idi roire bedewodỹỹ sõemy.
\v 16 Kaa arka hãwa-ò ralomy rareu, Sau riòre, Mikalmy nidu, hetowo ribi retehere, Davimy robire rawaytòmyhỹ-ò, resemyhỹ wedu nihikỹ riwowydynymyhỹ. Tahe tii sõemy ixidi rõhõtinyre moõ iweribi ratxiõrerimy ixisohojimy nodumy.
\v 17 Arka dixe roirenyre tena-ò, Davi tenamy riwinyre-ò. Tahe xiwe tamy riwahinyre Deuxu dee, wedu nihikỹ-ò, xiwe uriaõkõ riwòsiwòsinyre bedeywidỹỹnamy.
\v 18 Ka xiwe riwahinymy rahudi bedeywidỹỹna wana, Davi ixỹ (ribensoanyre) wedu nihikỹ ruruterehekỹ nidi.
\v 19 Irahudita paõ hãbu mahãdu-ò hãwyy mahãdu-ò riwahinyre, ta broreni-ò biu (deyxe) ta uva werubu ijõre. Irahudi tahe tasỹ-ò rearearenyre.
\v 20 Davi roosere tasỹ tahãwyy wana ele tiimy ratxikedi hikỹle ixidee ririmyhỹ òraru-ki, ka Mikal, Sau riòre, rare iwiutàdedỹỹmy. Kiamy rarybere: —Awiikuhe Israel wedu riwinyra! Ixỹrutere mahãdu tahe rare, tekòdu mahãdu dekòdukò takumy ritekòsinyra!
\v 21 Kiamy Da vi rirawyònyre: —Wedu nihikỹ rewoeydynymy resemy watxireri, tii riwatare buu ritakewihikỹle wahe iriòreriòre mahãdu wana Israel mahãdu wedumy, asỹreny mahãdu wahe. Tiiemy wedu nihikỹ ariteysanymy arawiunymy ararekre.
\v 22 Tamy ire arexilàhà làhànymy ixidi arakre. Wadi ixinamy mohõtinykre jiarỹ aõ aõkõ raremy, ka ijadoma mahãdumy tarybeta ta sõemy riwawiòhenanyke!
\v 23 Tahe Mikal, Sau riòre tiu rariòrenyõhyyre.
\c 7
\p
\v 1 Davi taõmysỹdỹỹna sõemy riywinyre, tule Deuxu wedu nihikỹ sõemy rihedỹỹnyre iòludu mahãdu ribi.
\v 2 Tiutxuu Davi Deuxu deòdu-ò rarybere Natã dee: —Bedeteini! Jiarỹ ka rare, heto òwòrumy wetihiky-ki rasỹnywahãre, iwanata kua arka breò hetoki-le kua rỹireri!
\v 3 Natã kiamy rirawyònyre: —Ixinamy timybo ixideewimy biwinybekre aõnaõna kiemy dori Deuxu wedu nihikỹ awana ratxireri.
\v 4 Irulemyta wedu nihikỹ Natã dee rarybere:
\v 5 —Makre ta wadeòdu Davi dee marybekre jiarỹ arateònyramy tamy myỹ marybekre: Kai aõkõ heka heto wadee biwinykre tai arasỹnykremy.
\v 6 Iu Israel mahãdu Egitu ribi retarenyre uhukỹle ihyy wiji (yrbu), waheto ihoõre wasỹrana. Myle watximyhỹre wasỹõlemy breu hetoki-le.
\v 7 Butumy ka Israel mahãdu-di nanamyhỹde, tiu tamyreny rỹỹraxiõhyymyhỹre waõmysỹdỹỹdumy retare mahãdu-ò aõherekibo heto wadee riwinyrenyõremy heto wihikỹõ.
\v 8 Wylemyta, marybekre wadeòdu Davi dee jiarỹ, wedu nihikỹ ruruterehekỹ, kiamy ararybekre: Jiarỹ heka aratare budoeni-di aõmysỹdỹỹdu ribi, Israel mahãdu wasỹreny biwedunykremy.
\v 9 Tiò tamyhỹte wana hãwã witxira bede-ò ahekihyky watxiwahãre tule, ka aõbinamy teawana, ibutumy aòludu mahãdu ribi arahedỹỹnymyhỹre. Jiarỹ heka iny wihikỹmy arawinyre, butumy hãbu bedebedemy rỹira-ribi kai awite.
\v 10-12 Israeò mahãdu-ò hãwã retara tule tai arahãwanykre, tai awimy roirekremy. Ka suò rirò      nyrenykre utyhyle, tai hãwadu mahãdu tamyreny raõbinanykre, urile tahe tuhyyhyy roireke ihoõre. Diarỹ heka tuu rarybereri ibutumy aòludu mahãdu ribi arahedỹỹnykre tule sõemy ariòreriòre adee ariwahinykre. Ka, burukreu tasỹ ehetxiu mahãdu luu bire-ò buukre wana, ariòre mahãduõ wedumy arisnykre tule iruruteremy arirahorekre wedumy runykrebedeu.
\v 13 Tii heka waheto wadee riwinykre, tule ariòreriòre mahãdu tiiemy wedumy ralomy rỹirakre.
\v 14 Jiarỹ heka tybymykre, tii tasỹ wariòremykre. Ka reòsamyhỹkre wana, jiarỹ aõhe (arisnymyhỹkre) iwese uladu tyby aõhe (risnymyhỹre) wesemy.
\v 15 Tiu waderina iribi aritaõtyhy, iwese Sau ribi retare wesemy, wedumy mabekremy.
\v 16 Tiiemy ariòreriòre ruaruamy rarekre, jiarỹ tuu ariwinykre wedu tiiemy aki rarekremy. Ariòreriòre tyy tiu rexihuõtyhy.
\v 17 Natã ibutumy Davi-ko relyyre timybo Deuxu tamy rarybereny. Davi reàlàre bededỹỹnana.
\v 18 Davi wedu breò heto-ò ralore, ta runyre kiamy rexitòenyre: —Wadeuxu, wedu nihikỹ wadee tuu biwinyke aõkõhe rare tuu wadee tewinyte juhuu bedeu, wasỹreny tule.
\v 19 Tule, juhubedeu wiòhedỹỹna ibutereki (òsny), wiji wariòreriòre mahãdu bededỹỹnana mysỹ tarybeteri aõ iribi kanakremy. Ibutumy hãbu mahãdu tuu (bitobxidỹỹnykre) wedu nihikỹ, Deuxu!
\v 20 Aõmybo tahe adee ixyby ararybekre? Kai heka tiwaerymyhỹte, jiarỹ heka eòdu rare.
\v 21 Aureraruna heka rare, araykydi biwinykre: tule ibutumy aõnaõna ninihikỹmy tiwaerynanyte.
\v 22 Wedu nihikỹ heka tate, wadeuxureny! Moõ aweseke ihoõre, kai sohoji Deuxumy, waijiohonarenyre; ixybyta ijõ ihoõre.
\v 23 Tihãwa-ki iny ihoõre Israel mahãdu wesemy, iaõhõkỹmydỹỹnanareny ribi tetatenyte aijoimy. Kai heka anidehedehe tate tule aõ wiwihikỹle tamyreny tewinyte. Kai heka aijoi Egitu hãwã ribi tetatenyte tule ijõ iny mahãdu teteònyte ihãwã ribi ideuxureny tule aõmaheki kỹnyhe timybo aijoi reamyhỹre heki.
\v 24 Wedu nihikỹ, ka heka Israel mahãdu tiiemy asỹmy rỹirakremy tetate kai tasỹ ideuxurenymykre.
\v 25 —Wiji tahe wedu nihikỹ, wadeuxureny, inatyhymyhe tuu manarybekre wabededỹỹnanamy tuu tarybete heware tule wasỹreny bededỹỹnana tulesỹ arybemynamy tuu biwinykre aõbo rỹikre bededỹỹnanamy.
\v 26 Inihikỹmy heka anidehedemy mabekre, tiiemy iny mahãdu umy rarybemy rỹirakre; wedu nihikỹ ruruterehekỹ Israel mahãdu Deuxu. Tule wedu bededỹỹnana tiiemy rarekre wariòreriòre mahãdu-ki abedeywidỹỹnamy.
\v 27 Wedu nihikỹ ruruterehekỹ, Israel mahãdu Deuxu! Jiarỹ heka warybe ijõdireri adee ixitòedỹỹna ariwinykre aõherekibo wadee tuu tarybeta, eòdu dee, wariòre mahãdu-ki wedu rarekremy.
\v 28 Tasỹ ijõra. Kai, wedu nihikỹ, aõ wiwihikỹlemy wadee tarybeteri, tule arybe mynahakỹle tuu rutỹỹnykre kiemy dori kai Deuxu atxiteri.
\v 29 Adee wiji arexitòenykre wariòreriòre mahãdu-di borenymy mabekremy tiiemy iitxesedurenymy mabekremy. Kai, wedu nihikỹ, wadeuxu, kiamy tarybete. Tiiemy wariòreriòre mahãdu biwiòhenanymy mabekremy!
\c 8
\s1 Davi sõemy ròtamyhỹre.
\p
\v 1 Ijõtxuu bedeusỹ, Davi filisteu mahãdu dee raõbinanyre, iribireny ròtare hãwã tyhyhykỹ rixãwidỹỹnyre.
\v 2 Moabita mahãdu ribisỹ tule ròtare. Suò ritidirenyre, tamyòta rerutidi riurihinanyrenyre tahe inatxi deòterehemy rahurenyre. Kawesemy moabita mahãdu Davi deòdumy rexirahòrerenyre tule tamy tahãwareny riòwynyre.
\v 3 Zoba wedu òsỹ Davi raõbinanyre, Hadadeezer-ò, Heobe riòre-ò, suu ixyby riwyrenykremy roireru Eufrate bero bire ludu.
\v 4 Mil 700 awaru dinodu mahãdu Davi idi rahỹỹnanyre Hadadezer ijoi mahãdu-di tulesỹ uritere mil sodadumy rimyre iny tỹmyra mahãdu lehekỹ: tulesỹ awaru mahãdu kahòxatxi-di rurudu mahãdu ritiorore ibutumy, 100 lemyta risiradỹỹnyre kahòxatxi-di rurudu-my.
\v 5 Sirio Damasco mahãdu Hadadezer wiòhedỹỹmy rekoare, ta Davi 20 mil-mysỹ ijoireny rahure.
\v 6 Aõwesele sodadu isurenymy riteòtenymy idi reare. Tureny Davi rahỹỹnanyre, tahãwareny tamy riòwynyre. Wedu nihikỹ Deuxu ritarasadỹỹnymyhỹre aõtxile tihãwa-ò ramyhỹre ròtahyymyhỹre.
\v 7 Davi Hadadezer sodadu mahãdu debòna iribireny ibutumy riwyre ta idi rare Jerusalẽ hãwã bede-ò.
\v 8 Tulesỹ sõemy bronze riwyre Beta hãwaribi ta Beròtxi ribi ijõ riwyre, tai Hadadezer rowedudỹỹmyhỹre ribi.
\v 9 Wedu Toù-my nidu, Hamale hãwã ludu, Davi-my ijyy rieryre Hadadezer sodadu ribi ròtaremy.
\v 10 Ta tariòre riteònyre Joraõ Davi rirybenykremy tule tuu rawowydykremy Hadadezer ribi ròtareki. Toù sõemy Hadadezer wana raõbinanymy raremyhỹ. Joraõ dee aõnaõnadi rare prata-di ije ta ouro-di ije tule bronze-di ije.
\v 11 Ta wedu Davi rihitxinyre wedu nihikỹ heto-ki riuhekremy, aõma wana ributunymy ijõ mahãdu ribi prata ta ouro-my diwyde wana.
\v 12 Kia mahãdu heka rare edonita mahãdu, moabita mahãdu, filisteu mahãdu ta amalekita mahãdumy. Iwese tyhyleta ijõ Hadadezer ribi diwyde rihitxinyre.
\v 13 Davi ire rexinidehenyre edonita mahãdu rahureu 18 mil-my rihure bedeu Sal bede-ki.
\v 14 Tule tii hãwã hãwa-my butumy tasodadu rihãwadỹỹnyre Edõ bede-ki, tule tai hãwadu mahãdumy rahãynanyre. Wedu nihikỹ Deuxu heka tuu Davi-di ramyhỹre bede bedemy ritarasadỹỹnymy aõtxi tiò ramyhỹre ròtahyymyhỹre.
\v 15 Davi ibutumy Israel mahãdu hãwã riwedunyre tule wiwesehyyle idireny raõmysỹdỹỹnymy raremyhỹ tule ibededỹỹnanareny wiwesehyylere.
\v 16 Joabe, Zenia isere, isodadu riwedunymyhỹre. Josafà tasỹ Ailude riòre rare, wedu dohodỹỹdumy ratximyhỹre.
\v 17 Zadoke tasỹ, Aitube riòre rare, ka Aimeleke tasỹ, Abiata riòre rare, Deuxu bededỹỹnana-di aõmysỹdỹdu heka juhuu roire. Zeraia tasỹ weduõ rare.
\v 18 Benaia tasỹ, Joiada riòre rare, keretxita mahãdu wedu tulesỹ peletxita mahãdu wedu. Ka Davi riòreboho tahe Deuxu-ò aõmysỹdỹỹdu roire. Davi Mefibosete wana.
\c 9
\p
\v 1 Ijõtxuu Davi rỹỹraxire: —Sau sỹ mahãduõ aõkõbo ijõ irumy ihỹmyhỹre? Ka txibo ijõ ihỹre wana, tamy aõwiwihikỹle ariwinykre, Jonata òraru-ki.
\v 2 Aõmysỹdỹỹduõ ihỹmyhỹ Ziba inire, Sau sỹ mahãduõ. Inyõ tamy rarybere Davi-ò rybemy rakemy. —Kaibe Ziba tate? — wedu tamy rỹỹraxire. —Kohe, tii watxireri, manarybeta ixinamy! —Kawesemy rirawyònyre.
\v 3 Wedu tamy rỹỹraxire: —Sau sỹ mahãduõ aõbo heka ijõ aõbo ihỹõmyhỹre aõmakemy aõwiwihikỹle tamy ariwinymy aratxikemy, tuu Deuxu dee raryberemy? Ziba rirawyònyre: —Kohe. Jonata riòre ihỹmyhỹde. Tii iti ibinamyhỹre wiole.
\v 4 —Tikibota ratxireri? — Wedu rỹỹraxire. —Maki heto-ki, Amiel riòreki, Lo-Denar hãwa-ki! — Ziba rirawyònyre:
\v 5 Tahe Davi rarybere inyõ riòrykremy.
\v 6 Mefibosete rehemynyreu, Jonata riòre, Sau riokore, tatiowomy resere tule suò taò ritidire Davi ruò tyhy bededỹỹnanamy. Kiamy Davi rarybere: —Mefibosete! —Wedu, manarybe ixinamy! —Kawesemy rirawyònyre.
\v 7 Brebuõmykre! Davi tamy rarybere. — Jiarỹ adee awimy ararekre Jonata òraru-ki, buu wahe. Jiarỹ ixyby suu adee ariwahinykre alabiè Sau su, tule ixinamy kai wadee manamyhỹkre.
\v 8 Mefibosete ixybyle rexisỹrabunyre ta rirawyònyre: —Jiarỹhe ijòròsa rubu ratyre wawike ihoõre! Aõherekibo heka wadi awimy atxiteri?
\v 9 Wedu Ziba dee rarariòwyre, Sau aõmysỹdỹỹdu-ò, kiamy rarybere: —Jiarỹ Mefibosete dee ixybyle ariwahinykre, awedu riokore-ò, ibutumy aõbo Sau hõrõ rare isỹreny wana ihõrõreny.
\v 10 Kai, ta ariòreboho ta aõmysỹdỹỹdu mahãdumy wana suu bisuuxinybenykre awedu Sau sỹ mahãdu-ò tule irahudi bihebenykre (irsỹnadimy) roirekremy. Ka Mefibosete tahe tiiemy waheto-ki tii wana ariraximy ararekre. Ziva waiyreny iriòre sõere tule waituemy iaõmysỹdỹỹmy mahãdu sõe.
\v 11 Tii rirawyònyre: —Ibutumy adee ariwinykre arybe mynamy. Irahudi xe Mefibosete wedu heto-ki riroximyhỹre, iriòre wesemy.
\v 12 Mefibosete iriòre wexyy ijõdire Mika inire. Ziba sỹmahãdu ibutumy Mefibosete deòdumy rironyrenyre.
\v 13 Kiamy Mefibosete, iti wiòmy ibinamy raremyhỹ, Jerusalẽ-ki rahãwanymy raremyhỹ tule byrena bedeu wedu wana hyy riroxirerimy ihỹre.
\c 10
\p
\v 1 Davi amonita mahãdu ribi ròture sirio mahãdu ribi tule. Tiutxuubota wedu Naà rurure, Amo bede ludu, taira iriòre Hanu teròwymy wedumy runyre.
\v 2 Ta Davi kiamy rarybere: —Hanu dee awimy ararekre, Naà di raremyhỹ wese, tyby dori, wadee awi rare. Tahe teòdu riteònyre tamy awimy ratxirerimy rybemy. Ka rirònyreu, teòdu mahãdu Habà hãwa-ò.
\v 3 Amonita mahãdu kialemy tawedu-ò raryberenyre: —Aõmamy heka idi tahõtinyteri Davi dee buu awimy raremyhỹ òraru-ki tule tii adi awimy rarekemy aõbo idi tahõtinyteri? Tureri aõkõ heka! Aõmamy heka riteònyrenyreri hãwã erysymy, hãwã rahurenykremy.
\v 4 Tai òrarukita Hanu Davi deòdu mahãdu rimyrenyre, isuusireny iyeribi riorore iribireny, tule ityyreny riorore irahudita riteònyrenyre.
\v 5 Irahudi Davi rieryreu, ixyby teòdu mahãduõ riteònyre tiiboho wana witxi rekoakremy kiemy raixỹrurenyreri òraru-ki. Kiamy Davi tarybe tamyreny riwahinyre Jerikò hãwa-ki le ratxirenykremy aõma uhukỹle riòkeserenykremy tahãwareny-ò isuusirireny ixyby ruhudihikỹle.
\v 6 Amonita mahãdu xe irahudi rexieryrenyre Davi taòludumy ixidee rirahòrerenyremy. Iòrarukita, 20 mil-my sirio sodadu mahãdu dee rarariòwyrenyre, mil hãbu sõemy, 12 mil-my tasỹ Tabe hãwaribire.
\v 7 Davi tuijyy rieryreu Joabe riteònyre tiiboho wana raõbinanyrenykremy Israelita mahãdu sodadu awiawi-di riòryrenyre.
\v 8 Amonita mahãdu rohonyrenyre Ta Habà ròtena ritòbòtòbònymy roire iwana sỹ ijõ mahãdu dirio Zoba mahãdu tasỹ Heobe ta Tobe ta Maakà my mahãdu iròtenareny iraymy rierenyre.
\v 9 Joabe kiamy idi retehere iòludureny ikoki ribi tamyreny kedeakremy ijõ tasỹ iheworeny ribi tamyreny kedeakremy. Iòrarukita Israel sodadu mahãdu awiawi ritare sirio mahãdu utedeò.
\v 10 Iuhe mahãdu tahe taseriòre Abisai dee ririre, tii riywiywinykremy amonita mahãdu wana wiutede rutamanyrenykremy.
\v 11 Tahe Joabe kiamy Abisai dee rarybere: —Ka sirio mahãdu waribi ròtamy idi betehekre wana, wawiòhedỹỹmy; kai sỹ tule, amonita mahãdu aribi ròtareri wana, tule awiòhedỹỹmy adee arakre.
\v 12 Bexiwodeburemy benykre! Rekexityhynymy rakaaõbinanyrenykre inysỹrenyki tule iny Deuxureny hãwa-ki. Tule Deuxu deewimy tuu rikiwyrenykre wedu nihikỹ wahe!
\v 13 Tahe Joabe tasodadu mahãdu wana aõbinamy rekoarenyre, urile sirio mahãdu raòrunyrenyre ilaureny.
\v 14 Amonita mahãdu tureny robire raòrunyrenyremy. Tulesỹ iwesele Abisai ribi raòrunyrenyre ixybyle tahãwa-ò rirònyrenyre. Tahe Joabe ixãwire amonita mahãdu dee aõbina ribi ixybyle Jerusalẽ-ò roosere.
\v 15 Ka sirio mahãdu israelita mahãdu tureny rahaỹnanyremy iximyreny robirenyreu, ixybyle rexibutunyrenyre taawarureny wana butumy.
\v 16 Iwedureny Hadadezer sirio iwitxira hãwaludu-ò rarariòwyre Eufrate bero bede-ki roimyhỹre mahãdu-ò. Tahe roirenyre ihyy Helã hãwã òhòkỹle ritehemynyre. Ikorenymy Sobake ramyhỹre, Hadadezer sodadu wedu.
\v 17 Davi tuijyy rieryreu, israelita mahãdu awaru ributunyre, Jordaõ berokotxi riòhòrerenyre ta Helã bede-ò resemy roire. Taita sirio mahãdu Israelita mahãdu wiutede rexiywiywinymy rierenyre. Tahe aõbina ròrarunyre.
\v 18 Tahe Israelita mahãdu sirio mahãdu riorudỹỹnyrenyre. Davi tasodadu mahãdu wana 600 mil-my sodadu sõe rahurenyre kahudi aõbinadu mahãdu tulesỹ quarenta awaru-di aõbinadu mahãdu rahurenyre sirio mahãdu ijoi.  Jobake tule rirubunyrenyre, taòludureny sodadu mahãdu wedu, taõbinanaki-le rurure.
\v 19 Ka ijõ wedu mahãdu Hadadezer riwedunyrenyre mahãdu israelita mahãdu iribireny ròtamy idi reteherenyreu, tamyreny rawooxire, tamyrenyle rexiwelorore irurureny-ò. Sirio mahãdu taiòraru-ki ilaureny ruberure iwiòhenadỹỹrenymy ixyby reakelau amonita mahãdu wahe.
\c 11
\s1 Davi Bate-Seba wana.
\p
\v 1 Wyra sohojidi wedu mahãdu rohonymyhỹre, wou bededỹỹnanamy, myrerimy ta Davi Joabe riteònyre, taijoireny tasodadureny ibutumy Israelita mahãdu raõbinanyrenyre taòludureny-ò. Iribireny ròtarenyre amonita mahãdu ribi tule Habà hãwã rikyrawonyrenyre. Iu bedeu Davi Jerusalẽki-le rarire.
\v 2 Tahe Davi rỹire, iyjamy rõrõriòrere rahudi, tahe rariamy ihỹmyhỹ heto webròdi. Iu tahe Davi hãwyy ruxerahakỹmy robire rõhõmy-ò.
\v 3 Tahe inyõ tamy riteònyre mobo rare rierykremy tahe rieryrexe. Bate-Seba raremy, Eia riòre tulesỹ Uria hãwyy raremy, heteu mahãdu.
\v 4 Tahe Davi aõtxile teòdu mahãduõ iòrysymy rakremy rarybere. Tahe didydenyde, Davi wana wityyò resere. Tatehe ribi Bate-Seba rexihutyhylemy tuu rutỹỹnyre? Rare taheto-ò.
\v 5 Isỹtybymyta (robòtònyremy) dexieryde tahe tarybe Davi dee riwahinyre rierykremy ibededỹỹnana.
\v 6 Iòrarukita Davi tarybe riwahinyre Joabe dee. —Uria ini biditeònykre, heteu mahãdu wahe, tii wana wide ararybekromy. Tahe Joabe irybemy reòbymy.
\v 7 Ka Uria rehemynyreu, Davi tamy rỹỹraxire Joabe aõbo awilemy ratxirerimy taawaru mahãdu wana tule wou aõbo awilemy rohonyreri.
\v 8 Irahudixe Uria dee rarybere: —Make aheto-ò bexielehynykre. Uria rohonyre, tule Davi aõnaõnaõ tamy riwahiny riwykremy taheto-ò.
\v 9 Urile tahe Uria taheto-ò raõhyyre; taheto-ki rõrõke txiororemy, wedu heto ijõkile rõrõre wedu heto-di itxeredu ruraki-le.
\v 10 Ka Davi tuijyy rieryreu Uria taheto-ò raõremy, tamy rỹỹraxire: —Irehemyhe aheto ribi bede teijeta tahe tooseteri. Aõherekibo tahe aheto-ò taõta?
\v 11 Kiamy Uria rirawyònyre: —Israel hãbu mahãdu ta Judamy mahãdu heka irehemy rỹireri tasỹ ribi, aõbinalemy kua rỹireri, tule arka taireny ratxireri. Wawedu Joabe tasodadu mahãdu wana kua bedetyatyalemy rahãwanyrenyreri. Timybo tahe jiarỹle waheto-ò arakre, ariroxikre ta aõmy ariõmy aratxirekre irahudi tasỹ wahãwyy wana aõbo rihike arõrõkre? Inatyhymyhe adee ararybekre butumy aõnaõna òbiti weribi-ò, tiu tuu ariwinykehi aõkõ iwese bededỹỹnana!
\v 12 Tahe Davi kiamy rarybere: —Kaki ixyby sohoji itxumy bede biekre. Biurasou ta arateònykre. Uria Jerusalẽ-ki ratximyhỹ ijõtxuu tulere taile ratximyhỹ.
\v 13 Tahe Davi tamy rarariòwyre tii wana riroxikremy tahe aõmamy tamy mona riwahinyre ixinamy raòdewàrikre. Ihãreleta, Uria taheto-ò raõhyyre iru bedeu. Heto-di itxeredu ruraki-le rõrõre, taheto-ò rake txiò raremy, aõmysỹdỹỹdu bireki-le rõrõmy txuu idi deade.
\v 14 Ijõ txuuxe, Davi tyyriti riwinyre Joabe dee ta Uria ole riwahinyre.
\v 15 Kiamy Davi tyyriti riwinyre: Uria ikomahãdu kytxi birutàkre, tiweribibo aõnityhymy iòhãrureri weribi-ò. Irahudita iribi bexitabenykre ixinamy rurukremy.
\v 16 Iòraruki tahe, hãwã rikyrawonymy roimyhỹ wana wana, Joabe iwedureny Uria-di rare iweribi iòludureny iòhãrumyhỹ weribi-ò.
\v 17 Iòludureny mahãdu awaru tahãwareny ribi diòlònydenyde, raõbinanyrenyre Joabe ijoi mahãdu wana tahe Davi sodadu mahãdu-ò rururenyre. Uria tule rurure.
\v 18 Tahe Joabe ijyy riwahinyre Davi dee aõbina bededỹỹnana timybo rohonyramy.
\v 19 Kiamy tii rarybere ijyy wahidi rare dee: —Ka, irahudi ibutumy wedu-ko aõbina bededỹỹnanamy belyykre rahudi.
\v 20 Aõhewana reburekre ta kỹnyyraxikre adee. Aõherekibo tahe hãwã tyy òhòkỹle tetehemynyta aõbinamy? Tuu aõbo tabitenyõta biu ribi wyhy-di adireny kodohotirakremy rỹirerimy?
\v 21 Abimeleke-txi aõbo õhõtireny reaõreri, Jerubesete riòre, rururetxi? Tebe hãwã bede-ki, tai hãwyyõ biu ribi mana-di rahunanymyhỹ tamy ihyy rirubunyre. Aõherekibo tahe ityyò tyhyhykỹle tetehemynytenyta? Kawesemy wedu rỹỹraxikre wana, kiamy birawyònykre: Uria, asodadu, tule rurura.
\v 22 Tahe rybewahidi rare ta Davi-ko relyyre Joabe tuu ritohonyre mynamy.
\v 23 Rybewahidi nodu kiamy rarybere: —Waòludureny aõnityhyre waratyrereny ityhyreny ta wadeereny aõbinamy diòlònydenyde tahãwareny ribi. Tahe jiarỹboho tamy roirenyre iutedereny-ò isỹtyyreny òhòkỹle.
\v 24 Tahe biu ribi wadireny rohotiramyhỹ wyhy-di, tule asodadu mahãdu-õ ituerenyra. Uria asodadu rurura.
\v 25 Davi kiamy rarybere rybewahidi rare dee: —Joabe urile biteyrewedỹỹnyke uritere aõmy nohõtiyre kõkremy tamy marybekre, kiemy dori wou bededỹỹnana moõ rexieryõhyymyhỹre mobo rurukre. Kialemy tamy marybekre ixyby tarurumy aõbinamy reakremy, ihyy hãwã rahukremy.
\v 26 Bate-Seba tahãbu rubu rieryreu irahi robure.
\v 27 Taibru rahumy sỹtybymyta, Davi inyõ tamy riteònyre kididykremy tamy. Ihãwyymy irahudi rexirahorere tule tii wana rariòrenyre. Urile tahe wedu nihikỹ Davi-ki awimy rahaõhyyre ibina riwinyre òraruki.
\c 12
\s1 Natã Davi dee rarybere:
\p
\v 1 Wedu nihikỹ Deuxu teòdu Natã-my nidu riteònyre Davi dee rybemy. Natã rare ta tamy rarybere: —Iny inatxi hãbu roiremyhỹ hãwaõki: Ijõ heka ityhy rare, ijõ tasỹ iaõkõ rare.
\v 2 Ityhy heka ibroreni sõe rare tule ibudoeni sõe,
\v 3 Iwanata iaõkõ sohojile rare ibudoeni idi ratximyhỹre. Idi sõemy ròrenymyhỹre, ihetoki-le raumynyre, iriòre boho kyki-le. (Tarsỹnalemy) riòrenyrerimy ihỹre, tabedeòdi-le rimonarerimy ihỹre, tule iwyòtyrekile rõrõmyhỹre. Budoeni heka iriòre wese rare tamy.
\v 4 Kiaole kỹnyhe inyõ dehemynyde ityhy heto-ò. Kiata tabudoeni rubudỹỹ deralemy reare tarura ludu dòmy rirubunyke wahe; tahõrõõ rirubunyke txiò raremyta, iaõkõ budoeni kiekiele rirubunyre, tahe riheranyrexe taruraludu dòmy.
\v 5 Iòrarukita Davi sõemy raburere hãbu bededỹỹnana òraruki kiamy rarybere: —Inatyhymyhe ararybekre wedu nihikỹ nidi Deuxu irumy nodu wahe, tibo hãbu tuu riwinyrahe urile rurukre!
\v 6 Inaubiòwa bededỹỹnamyhe tii ròòwydỹỹkre ka ritara òwymy, ibina dorihe riwinyra!
\v 7 Tai tahe Natã Davi dee kiamy rarybere: —Hãbu heka kaile atxiteri. Kiamy wedu nihikỹ, Israel mahãdu Deuxu rarybera: Jiarỹ heka Israel mahãdu wedumy aratare tule Sau ribi arahedỹỹnyre.
\v 8 Adee wedu rewahinyre tule ihãwyyboho; Israel mahãdu wedumy (arasnyre) tule Juda mahãdu wedumy. Ka adee ibutekre wana, ixyby ijõ adee ariwahinykre.
\v 9 Aõherekibo tahe wabededỹỹnana tetyhynykõta ibina kaa tewinyta? Uria kaa teburunyta, heteu mahãdu, wouki, amonita mahãdu tuu teteerydỹỹnyta tulesỹ ihãwyymy texihãwyydỹỹnyta!
\v 10 Ihãremysỹxe, aõherekibo heka warybe tetyhynykõta Uria hãwyy iribi tedyta, iòrarukita ariòreriòreõ tiiemy rurumy rarekre.
\v 11 Ihãremy tasỹ ijõmo adee ararybekre inyõ asỹ mahãdu òle adee ibina riwinykre. Kai tuu bobikre ahãwyy mahãdu aribi aritakremy ta iwitxira hãbu dee ariwahinykre; tule tureny rahãwyynykre txulemy.
\v 12 Kai heka iwasimy òraruna tewinyta, ixisohojimy, ka jiarỹ tahe txulemy inyõ tuu riwinykre adee, Israel mahãdu ibutumy tuu robikremy.
\v 13 Tahe Davi kiamy rarybere: —Jiarỹ òraruna ibina rewinyra Deuxu dee, wedu nihikỹ-ò. Natã kiamy rirawyònyre: —Wedu nihikỹ aòraru risuhòra; buruõkre.
\v 14 Urile tahe, aõherekibo, tuu tewinyta, ibina wedu nihikỹ dee teteòsinyta, tai òrarukita uladu ariòre rurukre.
\v 15 Tahe Natã rare tasỹ-ò. Davi riòre rurure Bate-Seba wana iriòre. Tahe wedu nihikỹ Davi riòre riwebinadu dỹỹnyre Uria hãwyy riwinyre.
\v 16 Davi rexitòenyre Deuxu dee uladu reytekemy tule byre deralemy reamyhỹ. Tatỹhinawo-ò ralore ta su tyrele rexiludimy rureherehe ini nade.
\v 17 Tahe iaõmysỹdỹỹdu mahãdu uritere idi rarutaamyhỹreny itamadỹỹmy, ta teralemy reamyhỹ tule tiiboho wana aõ (rirsỹke) ihoõre.
\v 18 Debò-ò inatxitxu sỹtybymy, tahe uladu rurure, iaõmysỹdỹỹdu mahãdu tule Davi lau ruberumyhỹreny riteòarimy keleu. Kiamy raryberenyre: —Uladu irulemy roimyhỹ bedeu, Davi inyboho rirawyònyõhyymyhohyymyhỹ tamy inyboho rybemy rekoamyhỹrenyu. Timybo tahe tamy tuu rakaryberenykre? Txibo aõbo ibina kidiwinykele inihe iòhãrure!
\v 19 Davi taõmysỹdỹỹdu mahãdumy robireu widee rarybewasimyhỹmy, rieryre uladu rururemy. Tahe rỹỹraxire. —Uladuwe rurura? —Rurura hawa! —Kawesemy rirawyònyrenyre.
\v 20 Tahe Davi rỹire suki roimyhỹ ribi, rõhõre, rexisihònyre tule tatyy riwiurònyre. Irahudita rare Deuxu heto-ò, wedu nihikỹ heto-ò, tahe riwodeysanyre. Ka taheto-ò doosedeu, rỹsỹnamy rexitòenyre tahe riroxire.
\v 21 Tahe teòdu mahãdu kiamy raryberenyre: —Jiarỹboh he wiji araeryrenyõhyyreri aõhebo tatỹỹnyterimy. Ka uladu irulemy ihỹmyhỹu heka, irahi sõemy tahinymyhỹ tule biroxike aõkõ ibedeu; kaa, rururau tamaama, taita tule teraxita!
\v 22 —Kohe! — Davi rirawyòyre. Uladu inimy ihỹmyhỹ wanawana, renarehere tule rahinyre wedu nihikỹ wadi raruxetòeke dohotamy tule rubu ribi rihedỹỹnykemy.
\v 23 Ka rurura rahudi tahe, aõmybo tahe arenarehekre? Dà ariixixanykre aõbo rikihe rubu ribi? Tiutxuõu tamy arake tai roireri-ò urile tahe tiu ixyby wadee iòkeseõna. Salomaõ (ijrana)
\v 24 Irahudixe Davi tahãwyy Bate-Seba riteysadỹỹnyre. Tii wana wityyò reserenyre, rariòrenyrenyre weryrymy, kiamy Davi rininire Salomaõ-my. Deuxu tuu rerinanyre.
\v 25 Ta teòdu Natã tamy riteònyre Jedidia-my rininikre kiemy dori wedu nihikỹ Deuxu tuu rerinanymyhỹre òraru-ki. Davi Habà hãwa-di rahỹỹnanyre.
\v 26 Iwanawanata, Joabe ire Habà mahãdu dee raõbinanymyhỹ, Amõ hãwa. Kaa hãwa-di rahỹỹnanykrey ratximyhỹ bedeu.
\v 27 Rybewahi dinodu riteònyre kiamy Davi dee rybe riwahinyre: —Habà mahãdu deehe raõbinanyra tule hãwã bero ludu-di rahỹỹnanykremy ratximyhỹ bedeu.
\v 28 Taita sodadu iuhe kiamy rỹireri mahãdu bibutunykre, ta ihãwareny-ò maõbinanykre, tule idi mahỹỹnanykre. Jiarỹ idi ixyby arahỹỹnanyke tahe ihoõre arexiwowydynykremy.
\v 29 Tahe Davi tasodadu mahãdu ributunyre, Habà òhòkỹle ritehemynyre, tahe raõbinanyre ihãwareny-ò tule ihãwareny-di rahỹỹnanyre.
\v 30 Mòlòki, amonita mahãdu deuxu tamy rexitòenymy myhỹrenyre, kia heka irataana aõhewana 34 bedeõmy rautxienymyhỹre. Irataana heka ouro rare, tule mana ruxerahakỹ ijõmy imahãdure, tiita Davi ritare ta taratiò rirutàre. Tule sõemy aõnaõna Habà ribi riwyre.
\v 31 Davi ijõ hãwaribi didyde mahãdu riaõmysỹdỹỹnyrenyre xehadi, ta bruredi ta womadi tulesỹ txijolo riwinyrenyre. Iwesele tasỹ Amõ hãwã ludu mahãdu-ò riwinyre. Tahe Davi tasodadu mahãdu wana Jerusalẽ-ò ribuarerenyre. Amõ Tama wana.
\c 13
\p
\v 1 Absalaõ, Davi riòre, heka terỹ iruxera rare, Tama heka inire. Ijõ Davi riòreõ tasỹ Amnõ inire, tii heka terỹmy raworemyhỹre.
\v 2 Tuu sõemy rexiwore dỹỹnymyhỹre, ihyy rawebinadunyre iòraru-ki. Amnõ sõemy rõhõtinymyhỹre isiramy tai rahamyre isiramy tai rahamyhỹre timybo terỹ wana widee rehemynykedi; Ijadòma rare òraruki timy tii wana widee rehemynyke risiranymyhỹre.
\v 3 Urile tahe Amnõ ibiòwa iureraru ijõdire, Jonadabe inire, Simeia riòre, Davi seriòre.
\v 4 Jonadabe kiamy Amnõ dee rarybere: —Kaihe wedu riòre atxiteri, ihãrele tahe, txuu iyhyõmy bederyrydi bede tadiemyhỹte. Wakota tuu bedelyyke aõherekibo tuu ahãtemy. —Tama-my kie nanaworemyhỹde, Absalaõ lerỹmy, waha weribi waseriòre wahe! — Kawesemy Amnõ rirawyònyre.
\v 5 Tahe Jonadabe kiamy rarybere: —Urile bexiòtaòtanyte awebinadurerimy mata bexilidita. Ka buu kanakre wana, kiamy tamy marybekre: Txidàhà inihe, waseriòre Tama wadee kanake wadee rỹsỹna riwahinykemy. Kakile wadee riwinykre ixityy-ki idi areteherekremy tule tiile wadee rỹsỹna riwahinyrekre.
\v 6 Tahe Amnõ rexilidire webinadumy rexiòtaòtanymy. Tahe Davi iruramy rare, tahe Amnõ kiamy rarybere: —Txiòlàhà ini Tama wadee kanake boloõ wadee riwinykremy tai ixityyki idi areteherekremy, tasỹ tiile wadee riwahinyrekre.
\v 7 Tahe Davi Tama dee rarybere, taheto-ki: —Amnõ heto-ò ini makre rỹsỹnaõ (irsỹnamy) biwinykremy.
\v 8 Rare tahe riki roimyhyõle itxi reare. Tahe aõnaõna rimyre, riwinymy ratximyhỹ irukile. Tahe ruare risere Amnõ dee. Ta teralemy rare kialemy rarybere: —Ibutumy iny mahãdu bidòdỹỹnykre. Tahe ibutumy iny mahãdu rohonyre.
\v 9
\v 10 Ta kiamy Amnõ Tama dee rarybere: —Waherina-ò rỹsỹnadi wadee manake ta kaile biwaòenykre taxe tamy riwyre (irsỹna).
\v 11 Ka Amnõ dee rỹsỹna riwahinyreru, rimyre ta tamy kiamy rarybere: —Waseriòre, bodoike wabireny!
\v 12 Kiamy tii rirawyònyre: —Kõre, waseritxore! Wadi tuu rutakakõmykre tuu kariwinykemy! Tuu iwidỹkỹkõmykre Israel bede-ki. Ibina iwidỹkỹkõmykre!
\v 13 Timybo heka iny  kykykò karehemynymyhỹkre tuu kawirinykre rahudi? Kai tule tiku moõ aratyhynyke ihãkuõre kaki Israel bede-ki. Marybeta wedukò, tukemy, adeke riwawahinykre.
\v 14 Ta aõkõ Amnõ Tama rybe-ò roholaõ hyymyhỹ. Tule, iruru iratyrereri òraruki, taruruhukỹlemy rimymy tuu rahãwyynyre.
\v 15 Tuu rahãwyynymy rahudita urile tuu radònyre juhuu sõemy tuu raworemyhỹ ribi ixãwimy. Kiamy rarybere: —Bohonyketa karibi!
\v 16 Tama kiamy rirawyònyre: —Kõre, waseritxore! Kiawesemy tiwatekònyteri awi anõkõ rare ihãremyta kai inihikỹmy ibina tewinyta! Urile tahe Amnõ irybe-ò roholaõhyymyhỹ aõmybo tamy rarybemyhỹò.
\v 17 Teòdu-ò ryryre ta kiamy tamy rarybere: —Waribi ini hãwyy bidyke! Ahana-ò biòlòdỹỹnykre ta ijò bitòbònykre!
\v 18 Tahe teòdu Tama riòlòdỹỹnyre  tule ijò ritòbònyre. Uòhi rehehekỹ riuhererimy ihỹre, terarehe mynodu. — Wedu riòre ijadòma tyhy heka iwesena tyy riuhemyhỹre ibedeu.
\v 19 Tahe bryby taratiò riòdonyre, tatyy riykare ijõmy ta rirajuamy rohonyre, tebòdi taò ritòbònymy.
\v 20 Iseriòre Absalaõ tamy rỹỹraxire: —Amnõ kõ aõbo aõhebo (arasnyra)? Inyõkõ ta tuu ijyyõmykre, waseriòre. Urikita, tii aseriòrele ratxireri. Ixibedewo dỹỹõmyta. Kaweemyta Tama ihỹmyhỹ ibedewomy Absalaõ heto-ki.
\v 21 Davi wedu ibededỹỹnana rieryreu, reburere.
\v 22 Absalaõ aõmy Amnõ dee rarybere ihoõre, urile tahe sõemy tamy iky reare iseriòre Tama dee taruruhukỹlemy reare òraruki.
\v 23 Inatxi wyramy bede riwyrahudi, Absalaõ tabudoeni sira riòromy ihỹmyhỹ Baa-Hazo-ki hãwã iòhõlemy, tahe ibutumy wedu riòre mahãdu dee rarariòwyre tamy wii rotykremy.
\v 24 Tahe tii rare wedu Davi dee rybemy kiamy tamy rarybere: —Wawedu, wabudoeni sira resỹmy watxireri. Taiki mynakemy eòdu mahãdu wana tamy.
\v 25 Davi rirawyònyre: —Kõre, wariòre. Butumy adòikeki, sõemy adee aõmysỹdỹỹkodohonyke. Absalaõ ihãrele idi ratutaamyhỹ, ta wedu noderamyhỹ tule rakemy tamy rarybere.
\v 26 Ta Absalaõ kiamy rarybere: —Awirebohe. Waseriòre Amnõ tukemy wahemy biditeònykre. —Aõherekibo tahe ahemy rakre? Kawesemy wedu rỹỹraxire.
\v 27 Ihãrele Absalaõ rawoxierysyteremyhỹ, ihyy tahe Davi Amnõ riwahinyre ijõ tariòre mahãdu tule riwahinyrenyre roikremy ihemy. Absalaõ xe aõnaõna riywinyre wedu hõrõ wesemy.
\v 28 Ta kiamy teòdu mahãdu dee rarybere: —Bodoholabedeny ini Amnõ bededỹỹnana-ò. Ka raòdewàrikre wana, jiarỹ ka tuu adeereny ararybekre, birububenykre. Uritere breburenyòmykre, jiarỹ tuu adesekere ibededỹỹnanamy. Bexiwodeburemy benyta!
\v 29 Tahe teòdu mahãdu xe Amnõ rirubunyrenyre, Absalaõ deradỹỹnamy. Ka ijõ Davi riòre mahãdu-õ ta tawaru tyre runymy ta rihenyrenyre.
\v 30 Kia tasỹ-ò diòkesemy diode wanawana ta, Davi tuijyy rieryre: Absalaõ ta ariòre mahãdu ibutumy rahurenyra; ijõ sohojiõ rahenyõhyyra!
\v 31 Tahe wedu rỹimy reare, tatyy ritxuare bederyry bededỹỹnanamy ta suò ixidi rehure. Tulesỹ teòdu mahãdu tuu rỹimyhỹ tule tatyyreny ritxuarenyre.
\v 32 Ka Jonadabe, Simeia riòre, Davi seriòre, kiamy rarybere: —Wedu, ariòre mahãdu ituerenyõlera butumy. Amnõ sohojile heka rurura. Absalaõ bededỹỹnana wahe, heka raeryke kiemy juhuu terỹdee taruruhukỹlemy reare òraru-ki heka aõhewana tuu riwinyra Tama wahe.
\v 33 Iòraruki tahe, jiarỹ arityhynyõkre ariòreboho ibutumy ituerenyramy: Amnõ sohojile tahe inatyhymy rurura.
\v 34 Absalaõ xe, rahenyre. Iu bedeu sodadu itxeredu-my ratximyhỹ iny sõemy dirahudemy, Horonãi-ò ryy ramyhỹredi. Rare tai wedu ratximyhỹ òhòkỹle ta rarybere: —Inyõ rirahureri Horonãi-ò ryy ramyhỹre-di roireri.
\v 35 Tahe Jonadabe Davi dee rarybere: —Ariòreboho ta riòkeserenyreri, tuu adee raryberamy.
\v 36 Kawesemy tamy rarybera rahudita, Davi riòreboho taròte rahurenyre rahinyrenyre katxiterehekỹmy, tule Davi tasodadu mahãdu wana rahinyrenyre.
\v 37 Absalaõ xe rahenyre Gesur hãwã wedu wana ratxikremy, Talmai my nidu rura-ò, Amiude riòre wahe. Ta irehemy Davi rahinymy raremyhỹ tariòre Amnõ rubu-ò.
\v 38 Absalaõ inataõ wyramy bede riere Gesur bede-ki.
\v 39 Tahe Davi wedu iwehityy sõemy risare, tule ikyara ixãwire Amnõ rubu òraruki rexirawinyre. Absalaõ òkesena.
\c 14
\p
\v 1 Joabe, ise heka Zeruia rare, Davi bededỹỹnana rieryre Absalaõ wehityy sõemy risarerimy.
\v 2 Ta hãwyy bedeeryhykỹ òrysymy inyõ riteònyre Tekoa hãwa-ki sỹdu ta kiamy tamy rarybere: —Bexiòtaòtanykre tadobumyhỹdemy arubu-ò. Iny robumyhỹ tyy-di bexityynykre tule uritere ixisihodỹỹõmykre. Aõmakremy irehemy ibru-ki bede tadiije myhỹtekremy.
\v 3 Mata wedu-ò rybemy timybo adee ararybekre mynamy tamy marybekre. Tahe Joabe tamy rarybere timybo rarybekremy irybe riywinyre.
\v 4 Tahe hãwyy rare tai wedu ratximyhỹ òhòkỹle, tatiowomy resere iribi tasỹ taòmy su-ò resere tyhydỹỹ bededỹỹnanamy ta myy rarybere: —Txikòlàhà iku anokerỹbo, wedu, bidiwawikòhenanyke iku làhà!
\v 5 Aõmybo tahe teateri? — tamy rỹỹraxire. Hãwyy kiamy rirawyònyre: —Wahãbu kie rurura; jikarỹ heka wytese ruxetòe rare.
\v 6 Wedu, jikarỹ heka waritxore inatxireri. Tikutxumy wiwana bederahyhyki ralanobinanyrenyre. Iny ihãkukõre wiribi ritakarenykemy, ihykyxe ijõ wii rirubunyrenyre.
\v 7 Ikòrarukita wasỹ mahãdu wamy rakòludurenyreri. Idi sõemy rarutakarenyreri tamyreny kariwahinymy rirubunyrenykemy, taseritxore rirubunyre kòraruki. Ka tuu riwinyrenykre wana, waritxore ihãkukõmy kareakakre. Wararòsòna kiekie làhàxe rahurenykre wahãbu taiki iritxore kõmy (risnyrenyrekre) moõ ini itỹmyra dỹkỹkõna.
\v 8 Davi kiamy rirawyònyre: —Bòòse asỹ-ò, jiarỹ timybo idi arõhõtinykre.
\v 9 —Wedu, — tii rarybere — jikarỹ wasỹreny mahãdu wana tamy karekòbyrenykre anotxile txibo anobo biwinykre-kò. Tule wedu ano atyre rakutxienyke ihakukõre.
\v 10 Tahe iòlò kiamy rarybere: —Txibo inyõ adee aõbinamy reakre wana, ka-ò idi mynakre, ta tiu ixyby aõhe adee tyyõna.
\v 11 —Wedu — tii rarybere: txikolàhà iku anokerỹbo, wedu nihikỹ-kò bexitòenyke, aDeuxu, kò, wasỹreny mahãdu heka waritxore rubu-kò raruki bidi rikywinyrenyreri ixyby ano nihikỹ relekõkemy, waritxore rubudỹkỹmy heka raryberenyreri. Davi kiamy rarybere: —Wedu nihikỹ nimy ararybekre, Deuxu irumy nodu nimy, moõ ariòre dee aõhe rutỹỹnyke ihoõre.
\v 12 —Wedu — hãwyy rarybere: txiko ikuni ixyby krarybe sohojile anomy. —Awire! — Kawesemy rirawyònyre.
\v 13 Anoherekibo heka Deuxu sỹ mahãdu deke bina tewinyta? — Kawesemy hãwyy rỹỹraxire. — Ikòlò, wedu kai heka aritxore hãwã witxira ribi kanakõkremy tarybete; kiamy, wijityhyle tuu tarybeta, kai kòbitihikỹle heka anohỹkỹmy (texisnyteri).
\v 14 Ibutumy xe rikituerenykre; iwese bee sutxi rejuxunymyhỹre wesemy, timy ixyby rabutuke ihãkukõmy. Iwesebre Deuxu tiku iny rurura ribi ixyby ikòkesedỹkỹkõna, ka ikòlò tahe tuu riwinyke hãbu ixyby ka-kò kanakemy hãwã witxira ribi.
\v 15 Ikòlò, adeke rybemy heka wiji rareri kiemy dokuri iny mahãdu wadekehekỹle reakemy rỹireri riwabrebunymy. Tai tahe tuu rahõtinyre: Krakrehe ikòlò-kò rybemy, adahaka timykibo warybemy kedekòbyke.
\v 16 Kawesemy he rahõtinyre wadeke bedekòbykremy tule biwahedỹkỹnykremy iny mahãdu ribi waritxore rubudỹkỹmy rarutakamy rỹireri mahãdu ribi wadi tule rarutakarenyreri tule Deuxu suu tasỹ mahãdu deke riwahinyre ribi riwatakarenykremyreri riwarubunyrenykremy.
\v 17 Jikarỹ, ekòdu, tule kiamy rahõtinyreri wahedỹkỹmy wadeke manarybekemy, kiemy dokuri ikòlò Deuxu ỹju wese rare butumy anonanona rikerymyhỹre. Wedu nihikỹ, iny Deuxureny, he awana ratxikre!
\v 18 Adee lỹỹraxi ariwinykre — Kawesemy iòlò rirawyònyre, — tule òbitimy wadee tuu manarybekre. — Wedu, ixinamy (bdỹkỹraxikre) anoaxina anomy! — Kawesemy hãwyy rarawyònyre.
\v 19 —Joabe kỹny tuu adee rarybere aõhe inatyhy? — Iòlò rỹỹraxire. Hãwyy rirawyònyre: —Tuu krarybekre, butumy kòbitimy, isirare timybo ỹkyraxi ribi iwitxiramy tuu krarybeke. Kohe, tiki tuu wadeke rarybere asodadu Joabe timybo krarybekre tule anobo kariwinykre.
\v 20 Tiki anomamy tuu riwinyra anonanona nyimyhỹde ixãwikemy. Wedu kai heka abedekeryre Deuxu ỹju wese tule butumy anonanona tekerymyhỹte.
\v 21 Irahudi xe iòlò Joabe dee rarybere: —Wawohe rerahorera aõbo adeewi ariwinykremy. Mata weryrybo Absalaõ òrysymy ixyby kodoosekremy.
\v 22 Tahe Joabe ixidi su-ò rehure Davi kotxi tyhydỹỹna bededỹỹnanamy ta kiamy rarybere: —Deuxu sõemy arawiòhenanykre, iòlò! Wijihe jiarỹ reeryra wedu waki awimy raharamy, waixitòedỹỹna dee reòbyra, rewinyreò, eòdu wahe.
\v 23 Tahe Joabe rỹire, rare Gesur hãwa-ò tahe Absalaõ didyde Jerusalẽ-ò ixyby.
\v 24 Ta wedu, kiamy rarybere Absalaõ iheto-ki rasỹnykõkremy. —Tuu arobiõkre! — Kawesemy tii rarybere. Taixe Absalaõ tahetoki-le rasỹnyre tule iòlò dee rake ihoõre. Absalaõ Davi wana widee rawooxirenyre.
\v 25 Israel bede-ki heka iny ihoõre Absalaõ wesena ini dehedehemy iruxerare òraruki. Irati ribi ta iwa-ò tuu hyy rubehera aõ tai ibina ihoõmy.
\v 26 Irade rehehekỹ, tule tarade wyra sohoji-di riòròmyhỹre, irehetyhymy reamyhỹre wana iutxie òraruki. Irade heka inatxi urihina ratyremy rautxienymyhỹre, aõma rixbi xe rahõrõnyreri iutxie òbitityhy ribi.
\v 27 Tii inataõre iriòre ijõ heka Tama inire, tii heka sõemy iruxerare.
\v 28 Absalaõ inatxi wyramy rahawanyre Jerusalẽ-ki iòlò-my rabiõhyylemy.
\v 29 Tahe Joabe òrysymy inyõ riteònyre iòlò dee rarybekemy ibededỹỹnanamy. Urile tahe Joabe noderalemy reare. Tasỹ ixybyle iòrysymy inyõ riteònyre, tule noderalemy reare.
\v 30 Tai tahe Absalaõ teòdu mahãdu dee rarybere: —Bedetehedeny ini! Joabe lòbròna heka wahõrõ òhòkỹle roromy roireri, tòbròna heka xewada ratxireri. Bòita biwonybenykremy. Tahe roirenyre Joabe oworu wodỹỹmy tahe riwonyrenyre.
\v 31 Iòrarukita Joabe rare Absalaõ heto-ò tahe tamy rỹỹraxire: —Aõherekiwe eòdu mahãdu waòworu riworonyrenyra?
\v 32 Absalaõ rirawyònyre: —Adee kie warybe rewahinyra. Marybekemy Davi dee myỹ: Kiamy wahe, aõherekibo heka Gesur ribi riwaòkesedỹỹnyreri? Tai ixinamy aratxike wihikỹle. Ixybyle Absalaõ rarybere: —Iòlò dee heka ararybekemyreri. Jiarỹ aõbo bede òrarure riki, ixinamy riwarubunykre.
\v 33 Tahe Joabe rare iòlò dee rybemy. Taita iòlò inyõ riteònyre Absalaõ òrysymy, tahe nade, tatiowomy tamy resere tule taòmy suò roire iruò. Tahe iryò iòlò ruore. Absalaõ wedumy raòludure.
\c 15
\p
\v 1 Isỹtybymyta Absalaõ ityti heòty ixidee riywiywinymy ratximyhỹ awaru wana tule xikõitamy hãbu sõe ikomy raòrunyrenykremy.
\v 2 Rudihikỹle rỹimyhỹre ta ixyby hãwã ijòtòbona; kita rỹirerimy ihỹre, tai ryy raonananymyhỹre-ki. Ka inyõ hãwã witxira ribi nalòmyhỹde Davi tamy aõ riywinykemy, ta Absalaõ tamy ryrymyhỹre ta tamy rỹỹraximyhỹre tiludubo raremy. Tahe iny rirawyònymyhỹre. Wedu, jiarỹ inihe aõma mahãdu rare Israel mahãdu.
\v 3 Kiamy Absalaõ rarybemyhỹre: Bedetehe ini! Bededỹỹnana ratxireri, urile tahe iòlò ijoi-ò kaki ratxiõreri ahõrõ-ò roholakemy.
\v 4 Tule sỹ Absalaõ kiamy rarybemyhỹ: Kaa! Jiaryỹ bede ywidỹỹdukeki kaki! Ikeki wadeele iny kanamyhỹeke taõnaõnamy rybemy da aõmy ixitòedỹỹmy aõbo wadeele rỹỹraximyhỹke, ta tamy aõ ariwinymyhỹke.
\v 5 Tahe, aõtxile iny Absalaõ dee rehemyny wana, rimymyhỹre, iryò ruòmyhỹre.
\v 6 Absalaõ butu israelita mahãdu dee tuu riwinymyhỹre Davi iòlò dee iny rawana tabededỹỹnana ywidỹỹmy, tarybe wiwi heribi iny ixiwohe riatymyhỹre Israel mahãdu.
\v 7 Inaubiòwa wyra sỹtybymy ta, Absalaõ Davi dee rarybere: —Txioini he Hebrõ hãwa-ò arake Deuxu dee heka kiamy rarybere, wedu nihikỹ-ò.
\v 8 Gesur-ki rahãwanymy raremyhỹ wanawana wahe, Siria bede-ki, kiamy rarybere, wedu nihikỹ ixyby kidiwaòkesedỹỹnykre wana Jerusalẽ-ò, Hebrõ bede-ki tuu areàlàkremy rexiywinyre.
\v 9 Make ixinamy! — Kawesemy iòlò rarybere. Taxe Absalaõ rare Hebrõ-ò.
\v 10 Urile tahe rybewahi dinodu komy riteònyre ibutumy Israel mahãdu dee, myỹ tamyreny rarybekremy. —Kaa tòka wodỹỹ-ò boholabenykre wana, myỹ marybebenykre: Absalaõ Hebrõ hãwã iòlòmy runyra wiji.
\v 11 200 hãbu sõemy heka Absalaõ hemy roirenyre Jerusalẽ hãwã ribi, riheludunyrenyre, aõ rieryrenyke ihoõre ka roire ihemy tule rityhynymy roire ihemy.
\v 12 Ka xiwe riwahinymyhỹ wanawana ta, Absalaõ Aitofel dee rarariòwyre, Gilo hãwã ludu-ò. Aitofel heka Davi ijoi mahãduõ rare. Kawesemy ta iòlòmy òluduna riwinyre iruruteremy iu relere, Absalaõ heludu mahãdu ire rasõere. Davi Jerusalẽ ãribi rahenyre.
\v 13 Tahe ijyydu nade ta Davi-ko relyyre israelita mahãdu Absalaõ ijoimy wiji rỹirerimy.
\v 14 Tai tahe Davi tasodadu mahãdu-ò rarybere tiiboho wana Jerusalẽ-ki ratximyhỹ mahãdu dee: —Ka Absalaõ ribi rikihenyrenykeki, wylemy ròkòirenyke. Ròkòita wylemy, uri (kõyrbu), kakile inyboho kidimydenykre, iny ribireny kòdòtakre tule ibutumy mobo ka hãwamy rỹireri mahãdu kidirubunykre!
\v 15 Awire. Jiarỹboho, aõmysỹdỹỹdumy watxirenyreri, rexihumy watxirenyreri aõmybo manarybekre sohojile reraòrenyreri! — Kawesemy teòdu mahãdu rirawyònyrenyre.
\v 16 Tahe iòlò rohonyre tahãwyy mahãdu wana ta taõmysỹdỹỹdu mahãdumy roirenyre. Ijõ tabiraludu mahãdu õle ririmy heto-di itxeredumy debòitue sõemy rarirenyre tai.
\v 17 Ka iòlò riòlònyrenyreu tasỹreny mahãdu wana hãwã ribi, heto ionana-ki rỹimyhỹ-ò rexitxuhunyrenyre.
\v 18 Ibutumy iaõmysỹdỹỹdu mahãdu lama lemy iramy rỹimyhỹ iòlò ramy iwanawana ta keretxita mahãdu ta peletxita mahãdu rexideòtenyrenyre irykotxi. 600 sodadumy ihemy diode Gatxi hãwã ribi ihemy roireri wahe tule iratyre riòlònyre.
\v 19 Tahe Davi Itai dee rarybere, iwedureny-ò: —Tiòwe wahemy tateri? Bòòseta wedu tỹmyra wana matxikremy. Kai heka hãwã witxira mahãdu atxiteri, ahãwã ribi irehemy ahãte awimy.
\v 20 Iòhòtyhylemy heka kaki bede teijeta tahãwanymy. Timykibo tahe adee areòbymy wahemy manakre? Jiarỹ dori tiobo arakre rexieryõhyyreri. Bòòseta butumy aijoi mahãdu ixihemy bidykre. Wedu nihikỹ derina tule iòbiti bededỹỹnana awana ratxikre!
\v 21 tahe Itai rirawyònyre: —Iòlò jiarỹ he inatyhymy ararybekre, wedu nihikỹ nimy, Deuxu irumy nodu nimy, tiiemy ahemy arakre tiobo makre òhòkỹle, aõaxina aòraruki arurukre.
\v 22 —Awirebohe! — Kawesemy Davi rirawyònyre. — Mobohe wakomy! Itai xe rare ikorenymy ibutumy taijoi mahãdu wana tule tasỹreny mahãdu wana.
\v 23 Iwanawana ta Davi ijoi mahãdu rohonymyhỹrenyre, ixỹ mahãdu tule sõemy rasỹbinamyhỹre brebumy. Iòlò bero kotxi reurore Sedrõ bero kotxi, ijoi mahãdu tule ihemy riòhòrerenyre, bedetya hakỹ-ò roirenyre.
\v 24 Zadoke, Deuxu dee aõmysỹdỹỹdu, iherenyki ihỹmy, tule levita mahãdu arka-di retyymyhỹreny. Levita mahãdu xe arka suò riderenyre ixỹ mahãdu butumy taòlò rahure rahudi hãwã ribi. Abiata tule taile ihỹmyhỹ.
\v 25 Tahe iòlò Zadoke dee rarybere: —Arka-di ixybyle makre hãwa-ò. Wedu nihikỹ awimy waki rahakre wana, tiutxumy tulobiximy arakre tule heto iwoki rỹireri-ò itxeremy.
\v 26 Ka, waki awimy rahaõkre wana, ixinamyhe timybo aõhebo (riwasnykre)!
\v 27 Ixybyle Davi Zadoke dee rarybere: —Bedetehe ini! Aimaà ariòre bidykre Jonata tule, Abiata riòre, ixinamy boosekre hãwa-ò.
\v 28 Iwanawana ta, rywetyaki araraòmy arunymy ararekre, timyboxe ijyy umyreny kedehemynykrele ariraòkre.
\v 29 Tahe Zadoke ta Abiatamy boho arka-di roirenyre Jerusalẽ-ò ta taixe roiremyhỹ.
\v 30 Tahe Davi olivera hãwalò-ò raòwònyre rahinymy, tawadero hukỹlemy ihỹmyhỹ tule ubeta taratiò ritidire tabedewo deòsinamy. Ibutumy ihemy rirahure mahãdu tule tarati rehetynyrenyre tulesỹ rahinymyhỹreny.
\v 31 Ka Davi-ko relyyrenyreu Aifotel bededỹỹnanamy Absalaõ weribi-ò rohoreremy, kiamy tii rarybere: —Wedu nihikỹ Deuxu, Aitofel dohodỹỹna ibutumy Absalaõ raykyna ribinabinanykre!
\v 32 Ka Davi hãwalò-ò rehemynyreu, tai wiu rohonymyhỹre-ò, ibiowa tyhy Husai-my nidu, arkita mahãdu, rare tai tii wana  wiji reakremy. Husai tyy iyrayrahakỹ-di rexityynymy ihỹmyhỹ tule suu taratiò riòdònymy ihỹmyhỹ tabederyry deòsinamy.
\v 33 Kiamy Davi rarybere: —Wahemy noõmykre, tiu dori kiaweseki biwawiòhenanyõtyhy.
\v 34 Myta biwawiòhenanykre, Aitofel dohodỹỹna-di aõ releõkemy. Ka hãwa-ò roosekreu, kiamy Absalaõ-ò marybekre: Iòlò, wijihe awana aratxikre iwese bu wana watximyhỹre wesemy.
\v 35 Deuxu dee aõmysỹdỹỹdu tai iu kanatxikre Abiata tule, ta ikoreny belyykre ibutumy aõmybo taholamyhỹtemy iòlò heto-ki.
\v 36 Iriòremy Aimaà ta Jônata-my boho, tule tai kanatxidenykre, ta ijyy-di wadee biteònybenykre aõtxile txibo aõõbo boholabekre-ò.
\v 37 Tahe Husai, Davi biowa rare ta rehemynyre hãwa-ò tule Absalaõ iutyhyle rehemynyre.
\c 16
\s1 Davi Ziba wana.
\p
\v 1 Davi ijõ hãwalò-ò reurore tai, Ziba wana, witxi reare, Mefibosete aõmysỹdỹỹdu wana. Inatxi jumẽtu baõ-di detyymy nade 200-my baõ sõe, cem-my uva bolo, cem-mysỹ bederaty sõe tulesỹ vinho imonamy tỹximy diwyde.
\v 2 Tahe iòlò Davi tamy rỹỹraxire: —Aõwexe kia-di biwinykre? Ziba rirawyònyre: —Jumẽtu inihe iòlò hãwyy ityreki rakre rare; ka baõ ta bederaty, my tahe hãbu mahãdu rỹsỹnamy rewyreri; ka vinho tahe reywesereny rekreu tuu riõrenyrekre ryreherehemy
\v 3 Tikibo tahe Mefibosete ratxireri, Sau awedu riokore? Kawesemy iòlò rỹỹraxire. Ziba rirawyònyre: —Jerusalẽ-ki rarireri kiemy dori riki ilabie Sau bededỹỹnana tamy riwahinyremyreri.
\v 4 Iòlò kiamy Ziba dee rarybere: —Ibutumy aõbo Mefibosete hõrõ he ahõrõ rare. Ziba rirawyònyre: —Adekehe arexisỹrabunykre wawedu tiiemy aõki arawiòhenanymyhỹkre! Davi Simei wana.
\v 5 Ka Davi Bauri hãwa-ò rehemynyreu, Gera riòre, Sau sỹ mahãduõ, tule wana witxi reakremy rare ta riòrarunyre aõnaõna binabinahãkỹmy rybe tamy.
\v 6 Tule Simei Davi dee mana-di dehu riòrarunyre tule iijoi mahãdu dee rahunanymyhỹ, iòlò xe ijoi mahãdu ixi rikyrawonymy rỹimyhỹ idi itxeredu mahãdu tule riijemyhỹ ilau.
\v 7 Tii kiamy Davi rilahire: —Mata karibi, aleeryduhukỹ! Rubudỹỹduhukỹ!
\v 8 Wedu Sau ribi tewyny ahãte. Wedu nihikỹ aõhỹkỹmy (arasnyreri) Sau sỹ mahãdu terubunyte òraru-ki. Wiji tahe wedu ariòre Absalaõ dee Deuxu riwahinyra, iwana (tawxi) kai ibinamy atxiteri, aleeryduhukỹ!
\v 9 Taita Abisai, Zeruia isere, kiamy iòlò dee rarybere: —Aõherekiwe ijòròsa hakỹ iximy telahajina dỹỹnyteri? Txiòta ini tamy arake irati ariòròkemy!
\v 10 Kaiboho xe aõkõre! — Kawesemy iòlò Abisai rirawyònyre iseriòre Joabe wana. — Ka wedu nihikỹ Deuxu tuu riteònyreri wana walahajimy, mobo tahe tamy rỹỹraxikre tuu riwinyrerimy?
\v 11 Tahe Davi Abisai dee rarybere tule taijoi mahãdu-ò: —Wariòre òbitihikỹle heka warubudỹỹmy wadi ratxireri, aõherekibo tahe Benjami mahãdule aõbo rikihe iwitxirareri tuu iwese riwinykemy? Ixinamyta hãbu ratxireke. Ixinamyta riwalahire wedu nihikỹ dori tuu riteònyreri tuu riwinykremy.
\v 12 Aõhewana wedu nihikỹ waõ binabina-ò retehereri tule txibo aõwiõ wadee kidiwahinykre ibina deròwymy.
\v 13 Tahe Davi taijoi mahãdu wana rariarenyre. Simei tule iwyònade rariamy nade, hãwalò weribi nariamy nade, tuu ralahajinanymy manadi tamy rehumyhỹ tule su-di Davi dee rehumyhỹ.
\v 14 Iòlò taijoi mahãdu wana sõemy reywesemy ritehemynyrenyre Jordaõ bero-ò taile rexielehynyrenyre. Absalaõ Jerusalẽ-ki ihỹmyhỹ.
\v 15 Absalaõ israelita mahãdu wana Jerusalẽ hãwa-ò rirònyrenyre, Aitofel ikyrenyki ihỹmy.
\v 16 Husai, Davi deòdumy ihỹmyhỹ, Absalaõ wana witxi reare, ta ryryre: —Beysabenyke iòlò-di! Beysabenyke iòlò-di!
\v 17 Absalaõ rỹỹraxire: —Tiwexe abiòwa dee òbitimy atximyhỹtere? Aõherekibo heka ihemy taõta?
\v 18 Hasai rirawyònyre: —Timykibo tuu ariwinykemy wahe?  Jiarỹ heka mobo Deuxu tuu ritara weribi-ki watxireri, wedu nihikỹ wahe, tule ixỹ mahãdu butumy Israel mahãdu ritara weribi-ki. Awana aratxikre.
\v 19 Òbitityhy tahe, mowanabo aratxikre, wawedu riòre wana? Iwese bu wana raremyhAwana aratxikre. \f +
\fqa Òbitityhy tahe, mowanabo aratxikre, wawedu riòre wana? Iwese bu wana raremyhỹ wese, heka awana rarybere: —Òhòdỹỹnamy wiji reareri. Aõbohe ijoi riwinykre?  \f*
\v 21 Aitofel rirawyònyre: —Bu biraludu mahãdu õlemy mahãwyynyke, heto-di itxeredumy ririra mahãduõ wana. Iòraruki tahe ibutumy israelita mahãdu araerykre buòludumy wiji texirahoretamy, iòrarukita ibutumy iny mahãdu awana rỹireri mahãdu reysarenykre.
\v 22 Iòrarukita welò riòre riderenyre heto ijò0ki Absalaõ dee, ibutumy iny mahãdu ruki, tahe turenyxe rerare tyby biraludu mahãdumy.
\v 23 Iubedeu Aitofel ureraru tamy riwahinyre bedeu heka aõma wesemy rohonymyhỹre Deuxu tuu rarybereri wesemy; Davi wana ratxireri tasỹ tule Absalaõ-wama ratxireri-my.
\c 17
\s1 Husai Aitofel ureraru ribinabinanymyhỹ.
\p
\v 1 Irahudi tahe Aitofel Absalaõ dee rarybere: —Txioini 12.000-my hãbu sõe aritakre, ta wiji rutemy aroikre Davi hewo ribi.
\v 2 Ta tamy areakre reywesereri wanawana iòra rurumy kia ratxireri tii kuduberukre, tule ijoi mahãdu ibutumy brebumy raòrunyrenykre.
\v 3 Tahe iòlò sohojile arirubunykre.
\v 4 Irahudixe ibutumy iijoi mahãdu adee adidykre, iwese hãwyy tahãbu-ò roosemyhỹre wesemy. Kiemy dori iny sohojile rurukremyreri, ijõ mahãdu xe ixinamy rỹikre.
\v 5 Absalaõ tai awimy rahare ureraru-ki, tule israelita mahãdu awimy tai raharenyre. \f +
\fqa Ta Absalaõ kiamy rarybere: —Husai dee taini byrybeny, irybeò ijoi roholakremy aõbo inihe irybekremy.  \f*
\v 6 Husai rehemynyreu, kiay Absalaõ rarybere: —Aitofel ureraru wadeereny riõra inihe myra; ihewomy aõbo ijoi rakre? Timyboxe, kaisỹ manarybekre aõbo ijoi riwinykremy.
\v 7 Husai kiamy rirawyònyre: —Aitofel ureraru inihe awiõra wiji.
\v 8 Kaihe buu Davi teerymyhỹte iijoi mahãdu wana aõbinaki  iwodebure roiremy tulesỹ reburemy ratxirenyreri iwese (urxa) bederahyki ratximyhỹre wesemy tariòre wasidỹỹna òraruki. Buu heka sodadu ibedeery ratxireri rumy tasodadu mahãdu kyki aõkõ ratxirerimy ihỹre.
\v 9 Aõhe wana wiji ka rexiwomy ratxireri hãluu bedeõkeki da kõmy aõbo hãwaõ-ki ratxireri. Ka Davi aõbinamy asodadu mahãdu-ò kedeakre, mobo tamy roholara mahãdu kiamy kanarybekre Absalaõ sodadu inihe ituera.
\v 10 Tule sodadu tebure mahãdu dori, halòe wese teburereri mahãdu dori, kuduberudenykre. Butumy heka Israel mahãdu buu rierymyhỹre sodadu ityhy raremy tulesỹ sodadu tii wana ratxireri mahãdu sỹ aõbina ery rỹireri teburemyle.
\v 11 Waureraru he kiamyra iny bibutunykre rare, karibi ihyy hãwã onana òhòkỹle rehemynykre ijoi rexibutunymy, ibutumy israelita mahãdu, ỹnyra rutàwese tahe rexibutunymy roikre sõe, tasỹ kaile aõbina komy makre biweludunymy.
\v 12 Txibo Davi titxibo ratxireri, itxi rekekoarenykre aõbo aõhebo rutỹỹnyreri riery kõole wahe. Timyxe aõhe tỹỹõna iu tii rahenykre ihoõre iijoi mahãdu tule ibutumy tabre rahurenykre.
\v 13 Ka iwitxira hãwa-ò rahenykre wana, iny ijoireny mahãdu reruti kidiwydenykre, idi hãwã rikitxiwirenykremy manaõ rarike ihoõre biu-ki.
\v 14 Ta Absalaõ israelita mahãdu wana kiamy raryberenyre: —Husai ureraru inihe Aitofel ureraru ribi awira. Wedu nihikỹ Deuxu he tuu riwinyre Aitofel ureraru wihikỹ-di ròiõkremy, tai Absalaõ aõhõkỹmy rutỹỹnykremy wedu nihikỹ bededỹỹnanamy. Davi deòarixidỹỹna ta rahenyre.
\v 15 Tahe Husai Zadoque ko relyyre ta Abiata ko ijõmy relyyre Absalaõ timybo ritohonyramy ta israelita mahãdu butumy roholaramy tule sỹ Aitofel timybo raryberamy ikoreny relyyre.
\v 16 Kiamy rarybere: —Ta wylemy Davi deòarixidỹỹmy inyõ biteònykre myỹ tamy marybekre uritere rywetuaki tỹhi õmykremy. Jordaõ bero kotxi wytyhylemy Davi rohorekremy taijoi mahãdu wana ituerenykõkremy wahe!
\v 17 Jonata ta Aimaàmy boho iwory hogeo-my nidu iòhò-ki ratximyhỹreny ròraòmy rexiòhãrunymyhỹrenyre hãwa-ò roteki inyõ tureny robikelau. Teòduõ aõu aõu ramyhỹre tamyreny rybe wahidi aõobo roholamyhỹre ijyymy; iu tahe iòlò Davi ko ijyymy roimyhỹre.
\v 18 Iu bedeu tahe inyõ tureny robire ta Absalaõ ko tuu relyyre. Iòraruki ta Jonata ta Aimaàmy boho wytyhykemy roirenyre, hãbu Bauri hãwa-ki rasỹnymyhỹre heto-ò. Iheto bireki hãlyybe rỹimyhỹ, iwooleta rironyrenyre.
\v 19 Hãbu hãwyy hety rimyre, ta hãluu ijò idi ritòbònyre ityre tasỹ alòbrònaty riòdònyre iny rieryõkremy.
\v 20 Absalaõ sodadu mahãdu ritehemynyre ta hãwyy-ò rỹỹraxirenyre: —Titxiwe Aimaà ta Jônatamy boho roire? —Rekuròrenyra kanaweribikò! Kawesemy hãwyy rirawyònyrenyre. Ta ihãrele rierenyre, urile tahe itxi rekoaõhyyre; tahe ixybyle Jerusalẽ-ò riòkeserenyre.
\v 21 Roire sỹtybymyxe, Aimaà Jonata wana hãluu ribi riòlònyrenyre tahe roirenyre Davi deòarixidỹỹmy. Timybo Aitofel bede riywinyramy tamy reakremy kiamy tamy raryberenyre: —Wytyhylemy bero kotxi bohorekre!
\v 22 Tahe Davi taijoi mahãdu wana Jordaõ bero kotxi taòhòrese riòrarunyrenyre ka, txuu rohonyreuxe butumy taòhòrese rahurenyre.
\v 23 Ka Aitofel ureraru dee moõ reòbyõre-ki xe, roosere taawaru rimymy ta rare ta hãwa-ò. Irahudi, taõnaõna ibutumy riywiywiny myrahudita, rexirubunyre (btòtaamy). Ta tyby wabede ole rituunyrenyre.
\v 24 Ka Absalaõ Jordaõ bero kotxi riòhòrerenyreu, Davi tiu aõkõ Maanãi hãwa-ki rehemynymy ratximyhỹ.
\v 25 Absalaõ Amasa tasodadu wedumy rirutàre, Joabe derowymy. Amasa heka Jeter-my nidu riòre rare, israelita mahãdu; ise tasỹ Abigail rare, Naà riòre heka rare, Zeruia seriòre wahe, Joabe se wahe.
\v 26 Absalaõ israelita mahãdu wana Gileade bede-ki rexibutunyrenyre.
\v 27 Ka Davi Manãi-ò rehemynyreu, Sobi wana witxi reare, Naà riòre wana, Habà hãwa-ki hãwadu-wana, Amoanita bede-ki; Maki ibiòwa-my, Amiel riòre heka rare, Lo-Debar-ki hãwadu heka rare; Basilai ijõmy imahãdu renyre, Hosel~i-ki hãwadu heka tii rare, Gileade mahãdu.
\v 28-29 Tiiboho heka (bacia) diwymy doide, suherana, ta herina tulesỹ rỹsỹna diwydenyde dewi rỹsỹnamy taijoi mahãdu wana (rirsỹkremy), (trigo) riwyrenyre, (cevada), ỹnyde, òmyta, aõtyhy node, òmytani, bidi, broreni huãsyra, broreni huãsy werawera ta budoenimy. Tiiboho rierymyhỹreny, Davi bedetyatya-ki, taijoi mahãdu wana rama tamyreny reakremy, bemomo tule reyweserenykremy.
\c 18
\s1 Absalaõ rubuna.
\p
\v 1 Iòlò Davi tasodadu mahãdu ributunyre, ta rihitxihitxinyre wiribi ijõ ijoi mil-my rihitxinyre ijõ tasỹ 100 my rihitxinyre tamyòta tasỹ iny sohoji sohoji iwedumy (risnyre) idireny aõmysỹdỹỹdumy.
\v 2 Tahe inataõmy taijoi-di hitxihitximy rohonykremy rarybere, ijõ heka Joabe riwedunyre, ijõ tasỹ Abisai iwedure, Joabe seriòre (isereny heka Zeruia rare), ijõ ijoi tasỹ Itai iwedure, Gate hãwã ludu. Tahe iòlò kiamy taijoi mahãdu-ò rarybere: —Jiarỹ tule arakre aherenymy.
\v 3 Ta kialemy rirawyònyrenyre: —Kaihe manaõkre. Ka anaòrunydenykeki wahe da kõmy aõbo ijoi òludu iny sodadurenymy kanarubudỹỹ, timy iwitxirake ihoõre tamyreny. Ka kai tahe debòitue hãbu sõe wese atxiteri wadeereny. Kakile marikehe wadeereny awireri kakỹny awimy karibi wadireny itxeredu biteònymy atxibekre.
\v 4 Awire txibo timybo awimy tai mahabenykre wesemy ariwinykre! —Kawesemy idò rirawyònyrenyre. Tahe ijòtòbona weribi rỹimyhỹ iwanawana ta isodadu mahãdu resemy roirenyre mil ijoi sõe hitximy tasỹ 100 ijoi mahãdu hitximy
\v 5 Kiamy tii Joabe ta Abisai-my boho-ò rarybere: —Ka wadee awimy atximyhỹtenyte wana, weryrybo Absalaõ ywilemy idi atxibenykre. Ibutumy sodadu mahãdu roholare Davi rybe-ò.
\v 6 Davi sodadu mahãdu xe raõbinanyrenyre israelita mahãdu dee Efraĩ bijiu-ki tamyreny aõbinamy rekoare.
\v 7 Tahe Davi sodadu mahãdu israelita mahãdu ribi rotarenyre. Sõemy rirubunyrenyre: 20000-my hãbu iu ituere.
\v 8 Aõbinadu mahãdu bedebedemy widi roberarenyre, bijiukihe aõnityhymy hãbu mahãdu tabre rahure bedetya-ki aõbinadu mahãdu ribi.
\rem dat 2017
\v 9 Lisitere-ribileta, Absalaõ Davi sodadu mahãduõ wana witxi reare. Absalaõ awaru tyre-ki runymyhỹ, tahe òwòrurawo-di rohonymy rare, taita irati òwòru rukurea wotxi ralomy rearenyre. Iawaru rexitxuhuny kõlemy reare rare, Absalaõ taxe biu-ki reàrenymy rarire.
\v 10 Davi ijoi mahãduõ Absalaõ-my rabire ta Joabe dee rarybere: —Abasalaõ-my ta rabira òwòru ruruki reàrenymy kua doide!
\v 11 Joabe kiamy rarybere: —Tuhe tabita? Aõherekibo tahe taile terubunytakõta? Adee ini heka debòitue prata-my ariwahinyra ta weretysanamy inihe.
\v 12 Ta hãbu myỹ rirawyònyre: —Wadee mil prata-my bidiwahinyke hãrele, tiu tamy wadebò aõhe tỹỹõna iòlò riòre dee. Ibutumy ijoi roholara iòlò adeereny rarybera-ò adee Absai ta Hai-my dee. Wadee awimy atximyhỹtenyte wana, weryrybo Absalaõ-di ywilemy atxibenykre.
\v 13 Ka irybemy areòby kòrawana ini Absalaõ arirubunyra, iòlò ini irahudi rieryra — tii heka ibutumy aõnaõna rierymyhỹre — tiu ini kai waweribi-ki arybeõna.
\v 14 Arybeò ixyby aroholaõkre! —Kawesemy Joabe rarybere. Tahe inataõ tõnorimy Joabe rimyre ta Absalaõ-ki idi rojyre ta irurulemy roimyhỹ, òwòru ruruki reàrenymy.
\v 15 Tamyòta Joabe sodadu mahãdu rikyrawonyrenyre Absalaõ tahe inatyhymyxe rirubunyrenyre.
\v 16 Tahe Joabe rurònyre aõbina ruhukremy. Taawarureny ibutumy ritxuhunyrenyre israelita mahãdu hemy ijaribi tahe ribuarerenyre.
\v 17 Absalaõ rubu riwyrenyre ta hãluu wotxi irubu-di rehurenyre bijiu bede-ki tamyòta mana nihikỹ-di riratòbònyrenyre. Tahe israelita mahãdu raòrunyrenyre, iny sohoji tasỹtasỹ-ò reareare.
\v 18 Absalaõ irumy raremyhỹ bedeu, ixidee rowidỹỹre hetoti wesemy kiemy iriòre ihoõreki tuu riwinyre ini tai tiiemy roimy rarekremy. Ta tanilemy rininire, wiji (yrbu) tuu raerymyhỹre Absalaõ hõrõmy. Davi Absalaõ rubu-ò rahinyre.
\v 19 Tahe Aimaà, Zadoke riòre, Joabe-ò rarybere: —Txioini arake (ijramy) iòlò dee ijyy-di wedu nihikỹ Deuxu òbiti riwinyramy, iòludu ribi rihedỹỹnyramy.
\v 20 —Kõre! — Joabe rirawyònyre. — Wiji rybe wahi wiõdi maõkre. Ijõ txuu ta tuu makre, wiji tahe aõkõre, iòlò riòre dori rurura.
\v 21 Tahe teòdu etxiòbi dee rarybere: —Kaihe makre ibutumy aõmybo tabitamy iko belyykre. Teòdu taramy tamy resere Joabe dee irahudi tahe (ijramy) rare.
\v 22 Aimaà rõhõtiõmyhỹ: —Txioini wahe biwawahinyke, ijyy-di tule arakemy, aõhereri aõkõ aõbo aõhebo rutỹỹnykre. —Aõherekibo heka tuu makemyreri, wariòre? — Joabe tamy rỹỹraxire. —Aõ bitake heka ihoõre ijyy-di noòwymy.
\v 23 Aõhereki aõkõ timykrebo, urile tahe arakemyreri! — Aimaà ixyby tuu rarybere. —Ma kỹnybohe ixinamy! — Joabe rirawyònyre. Tai taxe tii (ijramy) rare Jordaõ bede-di ryy ramyhỹre-di etxiòbi ratyre aõwesele rohonyre.
\v 24 Davi ijòtòbona bireki runymyhỹ hãwã weribiò aõkõ hetowo-ò ròtena weribi-ki. Itxeredu biu-ò raòwònyre ta ijò-ò runyre. Tahe retehere ahãna-ò ta hãbumy robire raijaranymy rarerimy ixisohoji.
\v 25 Tahe iòlò riteòarinyre. Kiamy iòlò rarybere: —Ixisohoji rareri wana, rybewahi widi rareri. Tahe rehemynymy nade heto-ò.
\v 26 Itxeredu sỹ ixybyle hãbuõ-my robire ixisohoji reamy rarerimy ta ijòki rỹimyhỹre dee ryryre: —Bedeteheke ini! Ixybylesỹ hãbuõ raijaranymy rareri! —Kiasỹ tule rybewahi widile rareri! — Davi rirawyònyre.
\v 27 Itxeredu kiamy rarybere: —(Ijra) heka, Aimaà wesereri Zadoke riòre komy kia hãbu awi rare — iòlò rarybere — aõhe wana rybewi wahidi rareri.
\v 28 Aimaà iòlò dee kiamy ryryre: —Awihyylemy bede rohonyra! Tahe tatiowomy tamy resere tule taòmy su-ò resere, ta kiamy rarybere: —Wedu nihikỹ, aDeuxu, kiahe tuu rakawowydyrenykre, tii xiery heka ijoi ritarasadỹỹna aòludumy rexirahòrera mahãdu ribi.
\v 29 Absalaõ tahe awilemy aõbo naderi? — Iòlò tamy rỹỹraxire. Aimaà rirawyònyre: —Asodadu Joabe riwateònyreriu, heka sõemy jeijei rohonyrerimy idi retehera, urile tahe riryõre aõbo aõherabo.
\v 30 Txiobo inihe kia-ò bexiwesinymy biwaraò! — Iòlò tamy rarybere. Tii xe taile riraòre.
\v 31 Tasỹ ijyyduõ rehemynyre etxiòbi my nidu ta iòlò dee rarybere: Iòlò, ijyy wihikỹdi he adee rareri! Wijihe wedu nihikỹ Deuxu aratarasa dỹỹnyra ibutumy iny  mahãdu aòludumy rexirahòrera mahãdu ribi.
\v 32 Absalaõ tahe awilemy aõbo naderi? — Iòlò rỹỹraxire. Ijyydu kiamy rirawyònyre: —Jiarỹ wakihe ixinamy txibo aõhebo rutỹỹra wana rutỹỹnyra ibutumy aòludu mahãdu ibutumy umy dòdu mahãdu wana.
\v 33 Sõemy xe iòlò iu rabederyryre. Raòwònyre hetowo biu-ki rỹimyhỹ-ò tahe tahi riòrarunyre. Rirariralemy ihỹmyhỹ tule katxi terehekỹmy ryrymyhỹ: —Wariòre! Absalaõ wariòre! Absalaõ, wariòre! Joabe Davi-ki ibinamy rahare.
\c 19
\rem dat 2017
\p
\v 1 Joabe-ko relyyrenyre Davi rahinyreri-my Absalaõ òraru-ki.
\v 2 Iòraruki tahe ibedeu, tarasana wowydyna bederyrymy rexirahorere ibutumy Davi ijoi mahãdu kiemy iòlò tariòre rubu-ò rahinyreri òraru-ki.
\v 3 Diòkesedenyde hãwa-ò ibedewomy dirònyde, iwese sodadu mahãdu wouribi brebumy raorunymyhỹre wesemy,  raixỹrumy.
\v 4 Iòlò taò rihetynymy ratximyhỹ ta katxiterehekỹmy rirajuamyhỹ: —Wariòre! Absalaõ wariòre! Absalaõ, wariòre!
\v 5 Tai òraruki ta Joabe rare iòlò heto-ò kiamy tamy rarybere: —Wijihe ibutumy asodadu mahãdu teixỹrudỹỹnyta, ahedỹỹdu mahãdu wahe, ariòreboho wana tule ahãwyyboho tasỹ abiraludu mahãdu-my wana ahedỹỹdu mahãdu.
\v 6 Kaihe umy rerinamyhỹre mahãdu-ò awiõte ka mobo wana umy rerinanykõmyhỹre òta awimy atximyhỹte. Wijihe kiamy texideòsinyteri aijoi mahãdu adee asodadu mahãdu wana aõke ihoõre adee. Kiamy wiji ka retehereri Absalaõ rurukõra wana ini heka eysamy atxiberi jiarỹboho ta inihe ibutumy arituerenyra.
\v 7 Make taini heka tamyreny tureny mawydykre-my asodadu mahãdu-my. Ka tuu biwinyõkre wana, inatyhymy ararybekre, Deuxu, wedu nihikỹ nimy, biuraso rudiu moõ aweribi kanatxiõhyykre. Iu heka adee ire ibinamy bede kòdòhònykre.
\v 8 Tai taxe iòlò rỹire ta ijòtòbona nihikỹ bire-ò runyre. Tahe isodadu mahãdu tuu bede rieryrenyre rohonymy runyrerimy iuxe isodadu mahãdu iwerura-di ributunyrenyre. Davi taòkesena riòrarunyre Jerusalẽ bede-ò. Iwanawana tasỹ israelita mahãdu rihenyrenyre, tasỹ tasỹ-my roberarenyre.
\v 9 Irahudi ta, bedebede-my, taõbinareny riòrarunyrenyre. Kiamy raryberenyre: —Davi heka inyòludureny ribi inyhedỹỹrenyre. Filisteu mahãdu ribi iny rihedỹỹnyrenyre, wiji tahe Absalaõ lau rahenymy roimyhỹre iòraruki karibi rohonymy ramyhỹre.
\v 10 Absalaõ heka inyboho ritarenyre tawedu-my, urile tahe rurura wou-ki. Aõherekibo tahe, Davile ixyby ka-ò inyboho riòkesedỹỹõreri tawedumy?
\v 11 Davi rieryre israelita mahãdu rybe. Tai taxe Zadoke riteònyre Abiata wana Juda mahãdu myỹ rỹrỹxirenykremy: Aõherekibo heka kaibohole wedu wiòhedỹỹmy tahõtinytenyta ixyby tasỹ-ò kòdoosekremy?
\v 12 Kaiboho heka wasỹ toite, wadeyre heka toite tule wahãlubu toite; Aõherekibo tahe ixyby waòkesedỹỹmy wadi atxitenytei?
\v 13 Tulesỹ tarybe Davi Amasa dee kiamy riwahinyre: —Kai heka wasỹ tate. Tahe wijehe, kai wasodadu wedumy malokre Joabe deròwymy. Deuxu he ixinamy riwarubunykre tuu ariwinyõkre wana!
\v 14 Kawesemy rarybere òrarukita ibutumy Juda mahãdu iweribi rexibutunyre, kiamy tarybe wedu dee riwahinyrenyre ixinamy taijoi mahãdu wana kòdoosedenykremy.
\v 15 Tahe Davi doosede Jordaõ bero òhòkỹle dehemynyde. Juda mahãdu ijoi sỹ tule roire tiiboho wana Gilgal bede-ki witxi rekoarenykremy, tiiboho wana butumy kidiòhòredenykremy bero-di.
\v 16 Aõwesele moma, Simei, Bẽjami ta mahãdu, Gera riòre, Bauri hãwã ludu, heka raelemyhỹ wylemy iòlò Davi wana witxi reakremy.
\v 17 Mil hãbu-my heka Bẽjami mahãdu Simei wana rỹimyhỹ. Tule Ziba mahãdu rỹilemyhỹ, Sau sỹ mahãdu dee aõmysỹdỹỹ riwinymyhỹre mahãdu, roirenyre Jordaõ bero-ò wairyremy iriòre sõe tasỹ waituemy iaõmysỹdỹỹdu mahãdu sõe. Iòlò koki hikỹle ritehemynyre.
\v 18 Ta riòhòrerenyre Jordaõ bero kotxi iòlò ijoi mahãdu wana kidiòhòrekremy tule txibo aõmybo iòlò tamyreny rarybekre imynale riwinyrenykremy roirenyre. Ka iòlò rohorekremy reywinymy ratximyhỹ-ò, ta Simei ixidi dehumyhỹde su-ò, ikotxi.
\v 19 Kiamy rarybere: —Iòlò, adee kiamy arexitòenykre iubre karibi tahònyta bedeu adee ibina rewinyre tahe bitusanykremy ixiribi warybe bina. Iribi õhõti rusakre aõbo rewinyre ribi; uritere itxi õhõti (ijraõmy).
\v 20 Jiarỹ rexieryre ibina rewinyremy iòraru-ki ta heka deledelelemy adee rehemynyreri wiji.
\v 21 Tai tahe Abisai, Zeruia isere, kiamy tamy rarybere: —Simei he rurukewi rare Deuxu wedumy ritareny ralahajinanyre òraru-ki.
\v 22 Taita Davi le Abisai dee ta iseriòre Joabe-my boho-ò kiamy rarybere: —Kaiboho wahe, Zeruia riòre boho, aõhe ihoõre tii wana aòrarureny! Aõbinabinahakỹ aõbo wadee biwinybenykemy atxitenyteri? Ka wiji dorihe Israel mahãdu wedumy ka rare, israelita mahãduõ wiji rurukehe ihoõre.
\v 23 Kaisỹ adee inatyhymy ararybekre buruke ihoõre.
\v 24 Mefibosete, Sau riokore, tulesỹ nade wedu wana witxi reakremy. Tii tawa risuhoke ihoõre, tasuusiri tule risỹke ihoõre, tulesỹ tatyy risuhoke ihoõre iu wede Jerusalẽ ribi rohonyreun risuhòkõra hyky idi ta ka roosereri tatyysudi-ò yrubu.
\v 25 Ka Mefibosete Jerusalẽ ribi dehemynydeu wedu wana witxi reakremy, tamy rỹỹraxire: —Mefibosete, aõherekiwe wahemy taõte?
\v 26 Kiamy rirawyònyre: —Wedu, kaihe tiwaerymyhỹte wabina raremy. Kiaremy heka wadeòdu dee rarybere wawaru wadee riywinykremy, ityre arunymy ahemy arakremy, irahudita urile wadeòdu riwabonyre.
\v 27 Roihikỹlemy wamy relyyre. Urile tahe kai Deuxu ỹju wesena tate òbitimy aõ teerymyhỹte; kiaremy heka, txibo timybo tai mahãkre wana ixinamy tuu biwinykre.
\v 28 Waha sỹ mahãdu tahe bihubenyke sohojile riòbynyre, ka wadee taxe ibutumy tewahinyte ariroxikre wahe. Wiji xe ixyby aõmy adee arexitòenyke ihoõre.
\v 29 Wedu kiamy rirawyònyre: —Ixyby aõmy rybeõmykre. Reeryra dori Say aõnaõna umyreny ariywinykre kai ta Ziba-my.
\v 30 Ixinamy Ziba hõrõmyke ibutumy! —Kawesemy Mefibosete rirawyònyre.—Wadee kai awityhyreri ixyby asỹ-ò tooseteri.
\v 31 Barsilai, Rogeli hãwã ludu, Gileade bede-ki roimyhỹre, tulesỹ nade ta hãwã ribi  wedu wana kòdòhòrekremy Jordaõ bero-di.
\v 32 Barsilai heka matuari rare: 80-my iwyra. Ityhy nihikỹ heka rare, ka wedu Maanãi bede-ki ratximyhỹ bedeu, sõemy riwiòhenanyre.
\v 33 — Barsilai — wedu tamy rarybere — Jerusalẽ bedeò wahemy manakre tai wawana matxikremy, jiarỹ adi aròrenykre.
\v 34 Ta tii kiamy rirawyònyre: —Tiu inihe irehemy bede waitxeseõna; aõmybo tahe arakre Jerusalẽ-ò ahemy?
\v 35 Ta tii kiamy rirawyònyre: 80-my wawyra-di watxireri tule timy aõ awi ariwinyke ihoõre. Rỹsỹna wi arieryke ihoõre tule aõbebe-my momo wiudu mahãdu wiu-ò aroholake ihoõ tule. Urile heka adee utxiè adiwahinykre.
\v 36 Awi heka rare wadee tewahinyteri tahe aõkõre. Uriki tahe ahemy arakre kia-ò le inihe Jordaõ bero kanaò riòre.
\v 37 Ixinamyta aroosekre wasỹ-ò waha nadimy boho hãluu bire-ki arurukremy. Kimã leta kaa rare, wadeòdu. Tii ixihemy bidykre ixinamy ixideewimy idi mabekre.
\v 38 Wedu rirawyònyre: —Ixihemy aridykre tule idi aròrenykre adeewimy. Tule adee butumy ariwinykre txibo aõmy wadee bexitòenykre wana.
\v 39 Tahe Davi tasỹreny mahãdu wana Jordaõ bero-kotxi riòhòrerenyre. Barsilai ryò ruore tule Deuxu-ò rityhenyre tii wana rarikremy, irahudixe Barsilai roosere tasỹ-ò. Israel Judamy boho rajeijeirenyre.
\v 40 Weduxe bero kotxi rohorere Juda mahãdu wana ta Israel mahãdu ibutemy ijõmy ihemy riohorere. Iribixe Gilgal-ò rare, Kimã ihelemy rare.
\v 41 Tulesỹ israelita mahãdu ihelemy rirahure ta kiamy Davi dee raryberenyre: —Wedu, aõherekibo heka wasỹreny, Juda mahãdu, aradyrenyra kua weribiòhòkỹle, asỹreny wana butumy kua Jordaõ bero-ò?
\v 42 Juda mahãdu rirawyònyrenyre: —Aõherekibo tuu rewinyrenyra kiemy inihe wedu wasỹreny ratxireri. Taile aõbo tarikihe beburetenyteri? Wedu aõbo warỹsỹnareny wadeereny riòwynyra da aõbo wadeereny riwahinyra?
\v 43 Israelita mahãdu kiamy rirawyònyrenyre: —Jiarỹboho aratyrereny Davi sỹ tyhyrenyreri, ta aõhereri aõkõ kaiboho isỹle atxitenyteri. Aõherekibo heka rybeõlemy tiwaritenyteri? Jiarỹboho heka, juhu tyhy tuu raryberenyre wedu òkesedỹỹmy! Urile tahe Juda mahãdu aõnityhymy Israel mahãdu ribi raryberenyre.
\c 20
\s1 Seba Davi-my roludure.
\p
\v 1 Tule inyõ ihỹmyhỹ rybetyhydỹỹ kõduõ, Seba-my nidu wahe, Bikri riòre, Benjami mahãdu heka rare. Tii rurònyre ijoi ributunykremy kiamy ryryre: —Ixinamyhỹwa Davi rareke! Aõ heka ihoõre tamy ijoi rexiwelòlòke wahe! Aõ iõkõmy aõbo rikihe ijoi ihemy rakre! Israel mahãdu, ijoi heka rake tasỹ-ò!
\v 2 Taxe israelita mahãdu Davi ribi roirenyre Seba hemy roirenyre. Ka Juda mahãdu tahe Davi wana rarirenyre Jordaõ bero ribi ihemy diode hyky ihyy Jerusalẽ hãwã òhòkỹle tiiboho wana ritehemynyre.
\v 3 Davi rare taheto-ò Jerusalẽ bede-ò tai deboituemy tabiraludu sõe ririre tai hãbu sohoji idinodurenymy ririre tamyreny òtaòtamy reake ihoõre tasỹ tiiboho sỹxe irybemynamy hetowo-ki hyy ratximyhỹrenyre riòlònyke ihoõre wytese wesemy roiremyhỹ.
\v 4 Kiamy wedu Amasa dee rarybere: —Juda mahãdu dee ini marybekre ijõ biurasou ibutumy tiiboho wana kaki manatxidenykremy.
\v 5 Tahe Amasa rare hãbu mahãdu ariximy, urile tahe wedu tuu rarybereu tyhy dooseõde.
\v 6 Taita Davi Abisai dee rarybere: —Seba inihe Absalaõ ratyre inydeereny aõmysỹdỹỹ riwwahinykre. Mata iny ihewo ribi waijoi mahãduõ ta ixihemy bidykre; (urikõyrbu) aõtxile hãwaõdi kanahãynanyheny hãwã iuhuari-di õdi tahe inyribireny kanahenykre.
\v 7 Tahe roirenyre Joabe taijoi mahãdu wana, keretxita mahãdu ta peletxita mahãdu ta sodadu aõbinadu tyhytyhy hykỹle ijõmy rirahure Abisai hemy. Jerusalẽ ribi riòlònyre Seba hewo-my roikremy.
\v 8 Ka mana nihikỹmy nidu-ò ritehemynyreu, Gibeaõ hãwa-ò, Amasa itxireny reare. Joabe iu wou mahãdu tyy-di rexityynymy ihỹmyhỹ tule mayrehe-di tarexiàti-ki ihỹmyhỹ, weretysanadi ixidee ritaamy idi ihỹmyhỹ. Ka tamy reareu, mayrehe rariowyre.
\v 9 Tahe Joabe Amasa dee rarybere: —Aõhe wabiòwa, timybohe atxiteri? Tahe isuuririki-le rimyre Amasa suusiri-ki tarurunawe ribi rimyre iryò rokremy.
\v 10 Amasa timy rõhõtinyõhyyre Joabe mayrehedi ratximyhỹmy tebò wyò weribi-ki. Tahe Joab exe tai rojyre Amasa-ki iweki tai rojyre, ta iweryri rejuxunyre sulemy iweryri roberare. Aõwesele rurumy reare: Joabe ixyby tai rojyõre rurure òraru-ki. Irahudi tasỹ Joabe taseriòre Abisai wana roirenyre Seba hewo ribi.
\v 11 Joabe sodaduõ rarire Amasa rubu ta kiamy ryryre: —Ibutumy mobo Joabe wana rỹireri mahãdu heka Dav weribi-ki rỹireri; Joabe hemyta boibenyke!
\v 12 Amasa rubuxe rytyaki resemy roimyhỹ, tahãlubu tyatya-ki roimyhỹ. Joabe wiòhedỹỹduõ tuu robire iny ibutumy tamyle rexitxuhunymyhỹmy; taita ryribi riwesinyre irubu ta ubetadi rihetynyre kiemy iny namyhỹde ehetxi tamyle ruhumyhỹre.
\v 13 Ka rubu ratare rahudi ryribi, iuxe ibutumy Joabe hemy rirahure Seba hewomy.
\v 14 Seba ibutumy Israel mahãdu sỹdi rariamy rare ihyy Abeli (Abel)-Bete-Maakà hãwã òhòkỹle rexitxuhunyre. Ta ibutumy Bikri sỹ mahãdu ijoi tii wana rexibunyre ta hãwa-ò tiiboho wana rirònyrenyre.
\v 15 Tahe Joabe sodadu mahãdu tamy ritehemynyre tule hãwã rikyrawonyrenyre. Tahe suu riratòònyrenyre hãwa.
\v 16 Tai hãwaduõ hãwyy ibedeeryhe rare. Tii uhuari-ò raòwònymy ta ryryre: —Bodohokujadenykeiku! Bodohokujadenykeiku! Joabe koiku marybebenyke ka-kò kanakremy, tamy dokuri krarybekemyreri!
\v 17 Tahe Joabe rare, tahe hãwyy tamy rỹỹraxire: —Kai anobohe Joabe-my nidu tate? — Kohe, tii! — tii rirawyònyre. —Bodohokukaiku, warybekò! — hãwyy rarybere. —Raholareri! — tii rirawyònyre.
\v 18 Tahe kiamy hãwyy rarybere: —Juhu bedeku kiamy iny rarybemyhỹre: Juhu Abeli (Abel) hãwa-kò boibenykre timykrebo bikerybenykremy; kawesemy heka relemyhỹre relekre anobo da anokõre anobo.
\v 19 Wahãwareny heka inihikỹ rare tule awi roire kòbitimy nodu Israel mahãdu kykyki. Anoherekibo tahe ihudumy idi tarutakateri? Deuxu, wedu nihikỹ hõrõ anobohe bibinabinanykemy idi atxiteri?
\v 20 Tiu tikeho aõkõ! — Joabe rirawyònyre. — Tiu arihukeho aõkõ, tule ahãwã aribina binanyke ihoõre!
\v 21 Wahõrõreny heka tii aõkõ ratxireri. Aõma ta heka tii reri hãbu Efraĩ ludu, Seba-my nidu, Bikri riòre wahe, kia heka Davi-my rexiòlududỹỹnyreri, wawedureny wahe. Tiile heka wadee bidiwahinykre, irahudixe arakre. —Irati kredi adeke karehurenykre uhukari ratyredi! — hãwyy rarybere.
\v 22 Tahe hãwyy rare taijoi mahãdu-ò rybemy. Tahe Seba rati riòròrenyre irati kredi uhuari ratyre ribi rehurenyre Joabe dee. Tahe rurònyre, taijoi ributunyre, tahe hãwã ririrenyre rooserenyre tasỹreny-ò. Joab exe rare Davi rura-ò Jerusalẽ bede-ò. Davi wana aõmysỹdỹỹdu mahãdu.
\v 23 Joabe heka Israel sodadu mahãdu wedumy raremyhỹ; ka Benaia tasỹ xe, Joiada riòre wahe, kia tasỹ keretxita mahãdu riwedunymyhỹre tulesỹ peletxita mahãdu riwedunylemyhỹre.
\v 24 Adoniraõ tasỹ hãbu  aõmysỹdỹỹ sirasira hakỹ riwinymyhỹre riwedunymyhỹre; ka Josafa, Ailuji riòre, tasỹ wedu ritohonymyhỹre iaõmysỹdỹỹnare.
\v 25-26 Seva tasỹ tyyriti-di aõmysỹdỹỹdu rare. Zadoke ta Abiatamy boho tasỹ Deuxu bededỹỹnana-di aõmysỹdỹỹduõle rare Davi ijoiõle.
\c 21
\rem dat 2017
\s1 Sau riòreriòre mahãdu rururenyre.
\p
\v 1 Davi wedu-my raremyhỹ bedeu, sõemy ràma reare, inataõ wyramy heka bede riere ràma (ijramy). Iòraruki ta, Davi Deuxu dee rỹỹraxire, wedu nihikỹ-ò, ta kiamy dirawyònyde: —Sau inihe bede òrarureri tii heka taijoi mahãdu wana ròrubudỹỹrenyre: Gibeaõ mahãdu-my raòhòterenyre.
\v 2 Gibeaõ mahãdu heka israelita mahãdu aõkõ roire. Tiiboho heka amoheu mahãdu roire urile tahany ibuterenyre kiamy israelita mahãdu tamyreny rarybere idireny riywiywinymy roirekremy; ihãreleta Sau ihudurenymy tamyreny reare Israel ta Judamy mahãdu òraru-ki. Tahe Davi Gibeaõ mahãdu-ò rarariòwyre.
\v 3 Kiamy rarybere: —Aõwexe adeereny ariwinykre? Aõma heka adeereny ariòwynykre ibina adeereny relere, iu tahe Deuxu ijoi mahãdu-ò awimy iu atxibenykre.
\v 4 Ta tiiboho kiamy rirawyònyrenyre: —Sau bededỹỹnana wahe tasỹreny wana heka aõdi raòwoke aõkõre ouro-di raòwyke aõkõ tule prata-di raòwyke. Tulesỹ israelita mahãduõ arirubunyrenyke ihoõre.—Aõbo tahe tukemy, adeereny ariwinykre? —Davi rỹỹraxire tamyreny.
\v 5 Kiamy tiiboho rirawyònyrenyre: —Sau heka wahudurenymy wadeereny reare tiki ijõ sohoji aratxirenyõkremy Israel mahãdu su bedeõki.
\v 6 Iriòreriòre mahãdule heka wadeereny bidiwahinykre debòò inatxi reuro-my hãbu sõe rỹireri mahãdu wahe, ta aribitòtaarenykre Deuxu ruò, wedu nihikỹ ruò, Gibeaõ bede-ki, tai Sau ruare bede-ki, wedu nihikỹ wedumy ritare wahe. —Adeereny ariwahinyrenykre! — Kawesemy wedu rirawyònyrenyre.
\v 7 Urile tahe, tii irybe ijõdire Jonata wana widee bede riywinyre wahe, taiki Mefibosete-di ruruõkremy rexiraykynyre, Jonata riòre wahe Sau riokore.
\v 8 Ihãrelexe wedu tamyreny rarariòwyre Armoni ta Mefibosete-my boho dee — Iny inatxi Hispa riòreboho wahe, Aia rioòre wahe, Sau dee riwahinyrenyre; tulesỹ Merabe riòre rimyrenyre iruyre-my sõereny, Sau riòre wahe, Adriel dee riwahinyre heka rare, Barzilai riòre wahe, Meòla mahãdu heka rare.
\v 9 Davi xe tamyreny riwahinyre Gilbeaõ mahãdu dee debò inatxi reuro-my sõereny, rirubunyrenyre xe bitòtaamy hãwalo riòre bede-ki, wedu nihikỹ ruò. Debò inatxi reuro-my heka iny rurure. Aõmau heka tuu rutỹỹnyre aõwi dele bedeu.
\v 10 Tai tahe Hispa, Sau biraludu, tyyxehekỹ rimyre idi ta rexihetònyre mana tyre ridemy. Aõwi dele bedeu tai ratximyhỹ ihyy tai hyy biudele idi resere tule rubu mahãdu rixobanyre. Txumy rubu mahãdu riemyhỹre rara riròrenyke lau rumy tasỹ iròdu mahãdu-ò riijemyhỹre.
\v 11 Davi Hispa bededỹỹnana rieryreu.
\v 12 Rare ta diwyde Sau ti Jabe-Gileade-ki hãwadu mahãdu ribi tule iriòre Jonata ti diwylede, Jabe-ki hãwadu mahãdu heka rubu riwyrenyre Bete-Sỹ butuna ribi, iu filisteu mahãdu tai riònyrenyre ribi iu tule Sau rirubunyrenyre bedeu Gilboa hãwalo-ki.
\v 13 Tahe Davi Sau ti ta Jonata myti rituunyre debò inatxi reuro-my hãbu rubu mahãdu wana.
\v 14 Rituunyre xe Sau ti ta Janata myti tyby hãluu-ò rituunyre Kis-my nidu hãluu wo-ò, Sau tyby heka rare, Zela hãwã bede-ki, Bẽjami mahãdu bede-ki. Ibutumy aõmybo wedu rarybere ibutumy relere. Ka rexihumy rahudi tahe Deuxu ixitòedỹỹnareny dirawyònyde isureny bededỹỹnamy wahe. Aõbina filisteu mahãdu wana rỹire bededỹỹnana.
\v 15 Wousỹ rohonyre filisteu mahãdu Israel mahãdu wana. Davi tasodadu mahãdu wana roirenyre tahe filisteu mahãdu wana raõbinanyrenyre. Aõbina bedeu Davi sõemy reywesere.
\v 16 Hãbu rarire nihikỹõ sohoji iu ratximyhỹ Isbi-Benobe heka inire itõnori heka iruyre bedeõmy iutxie rare tule tõnori itỹmyra riuhemy idi ratximyhỹ. Davi rirubunykemy rexiraykynyre.
\v 17 Urile tahe Abisai, Zeruia isere, kia Davi rihedỹỹnyre, filisteu dee reare ta rirubunyre. Iòraruki ta Davi sodadu mahãdu kiamy raryberenyre Davi wou-my iherenymy raõrekremy. Kiamy raryberenyre: —Kai heka Israel mahãdu (rasòsòna) tate, waribireny burukehe ihoõre.
\v 18 Ixybysỹ wouõ rohonyre filisteu mahãdu wana Gabe hãwã bede-ki. Iu Sibekai, Husa hãwã ludu, hãbu rarie nihikỹõ rirubunyre Safe my nidu.
\v 19 Ixybysỹ aõbina rohonyre filisteu mahãdu wana  Gabe bedekilesỹ, iusỹ Elanã, Jair riòre, Belẽ mahãdu, Golia rirubunyre, Gatxi hãwã ludu. Itõnori deò riki heka tyy idi relemyhỹre deò wese rare ibude.
\v 20 Ixybylesỹ aõbina rohonyre Gatxi bede-ki. Taisỹ hãbu nihikỹõ ihỹmyhỹ, juhu mahãdu hãbu nihikỹ riokoreõ, tebò juhu heka debòò sohoji reuromy sõere tebò sohoji sohoji iwasỹ tulere debòò sohoji reuromy iwa juhu sõe.
\v 21 Israelita mahãdu-my ralahajinanymyhỹ; tahe Jonata Simeia riòre, Davi seriòre, rirubunyre.
\v 22 Ka inaubiòwa hãbuboho heka juhu mahãdu hãbu ninihikỹ rỹira mahãdu riokore roire Gatxi hãwã ludu Davi xe rahurenyre tasodadu mahãdu wana.
\c 22
\rem dat 2017
\s1 Davi ròtare wiu.
\p
\v 1 Ka wiu heka Deuxu dee Davi rirynyre, wedu nihikỹ-ò, iu Sau ribi rihedỹỹnyre iribi sohoji aõkõ òbitityhy ibutumy iòludu mahãdu ribi:
\v 2 Wedu nihikỹ heka wamana rare, wahõrõ tikiemy nodu tulesỹ aõribi watarasadu.
\v 3 Wadeuxu heka mana rare tai rexiwomyhỹre. Tii riwaijemyhỹre debòna-di iny rỹimyhỹre wesemy; tii heka waitxesedu rare, tule tii awityhymy riwamymyhỹre. Deuxu heka wahedỹỹdu rare, tii riwaijemyhỹre tule aõwesele waòludu mahãdu ribi riwahedỹỹnymyhỹre.
\v 4 Tamy rarumyhỹre wedu nihikỹ-ò ixiwiòhedỹỹmy, tahe aõwesele waòludu mahãdu ribi riwahedỹỹnymyhỹre. Wedu nihikỹ òta ijoi rawiunymyhỹke!
\v 5 Tiubo rubu bededỹỹnana riwakyrawonymy ixi rahõtinyre, wadee nade watyre resekremy.
\v 6 Riwamyrexe rubu tareruti-di, hãluu rexiywiywinymy roimyhỹ riwamykremy.
\v 7 Iòhãrumy wadee bede relereu xe tamyhỹkỹle raryre wedu nihikỹ-ò; kiamy tamy rexitòenyre riwawiòhenanykremy.
\v 8 Tahe suu ramytatare raukỹukỹre, hãwalo rawo tule r aukỹukỹre tulesỹ ramytatare kiemyhe Deuxu reburere-ki ture.
\v 9 Tearà ribi wàdà rohonyre, tule irywo ribi helòtyra bure sòhòkỹ rohonyre heòty iny sõdu wana.
\v 10 Tii biu wetyy riraynyre ta desede biu wetyy luru heke iwati rawoò desede.
\v 11 ỹju bròtyaki ruore ta aõwesele roirenyre tetyre-ki ruòmy rare.
\v 12 Bede luru-di rexihetynyre; biu wetyy sõemy, bee sõemy, iwerura-my.
\v 13 Biu delaa wana, tule heòty ikotxi roore.
\v 14 Tahe wedu nihikỹ biu ribi naymytxide, iny nihikỹ tarybe riòlòdỹỹnyre.
\v 15 Tii heka tawyhy-di rohotirare iuta ibutumy taòludu mahãdu riuberanyre; tulesỹ tabiu delaadi ire riteònyre.
\v 16 Ka wedu nihikỹ taòludu mahãdu riaõhõkỹmydỹỹnyre bedeu tulesỹ, awimy aõkõ iu ihỹmyhỹ, tamyreny raymytxire, iu (bertxi) rawo rityrysydỹỹnyre, iu ibutumy su manydu ritỹnynyre.
\v 17 Kua biu ribi hikỹle wedu nihikỹ tebò wadee diterenyde ta riwamyre; tii heka berawo ribi riwatare.
\v 18 Wedu nihikỹ heka waòludu mahãdu iòhãru ribi riwahedỹỹnyre wamy dòdu mahãdu ribi. Tiiboho heka ibutumy wadee ityhy roire.
\v 19 Tiubo wadee bede isiramy ratximyhỹ bedeu, wadee rekoarenyre; tahe iu wedu nihikỹ Deuxu riwaijere.
\v 20 Iòhãru ribi riwatare tule riwahedỹỹnyre aõherekibo kiemy inihe sõemy wamy rerinanymyhỹre.
\v 21 Wedu nihikỹ sõemy wadi rorenymyhỹre kiemy dori òbitimy watximyhỹre; tii sõemy riwawiòhenamymyhỹre aõherekibo kiemy inihe aõ waki ibina ihoõre.
\v 22 Jiarỹ heka wedu nihikỹ deewi rewinymyhỹre tule tiu òraruna rewinyõhyy watxwahãre waDeuxu aririke wahe.
\v 23 Jiarỹ heka irybe mynamy watxiwahãre tule ibededỹỹnana ratyre arohonyke ihoõre.
\v 24 Wedu nihikỹ riwarymyhỹre tiu aõ ibina rewinyõmyhỹre tule irehemy aõnaõna binabina ribi watxiwahãre.
\v 25 Kawesemy tii wadi ròrenymyhỹre kiemyhe òbitimy tamy watxiwahãre, tule riwaerymyhỹre waòraru ihoõre.
\v 26 Kai wahe, wedu nihikỹ Deuxu, kai heka awi tate mobo awimy adee ratximyhỹre-ò tulesỹ òbiti tate mobo iòbitimy adee ratximyhỹre-ò.
\v 27 Kai heka (owriuri) ihoõre iny ijõ iuriuri ihoõmy rỹimyhỹre mahãdu-ò, ka aòludu òxe tuõre ibinare.
\v 28 Kai heka ywimy nodu bihedỹỹnykre, ka xiwede mahãdu xe aõkõre urile bibedetxinykre.
\v 29 Kai heka, wedu nihikỹ, waloosòna tate; kai heka, wabede luru, tule mahukre.
\v 30 Kai heka ruru wadee bidiwahinykre waòludu mahãdu-ò idi areakremy tule inikỹmy biwaruruterenykre idi iribi aròtakremy.
\v 31 Deuxu heka aõ òbitimy riwinymyhỹre tule aõmy rarybe wana imynale riwinymyhỹre. Tii heka debòna wese rare iny riemyhỹre mahãdu dee.
\v 32 Wedu nihikỹ kai heka Deuxu sohoji tate kie  tate ixyby ta ijõ ihõre;  kai sohojile heka waDeuxurenyreri.
\v 33 Tii heka wahedỹỹdu ruruterehekỹ rare tule titxi rawana wadi taruki ratxirerimy ihỹre.
\v 34 Tule aõtxi areake-ò riwaijemyhỹre tule biu rarie tyre (riwasnyray) riwahedỹỹnymyhỹre.
\v 35 Tii riwaerynanymyhỹre aõbinamy aõmakremy waxiahate wihikỹ ariuhekremy.
\v 36 Kai, wedu nihikỹ, debòna wadee tewahinymyhỹte waumy rihedỹỹnykremy; awiòhedỹỹna òraruki heka waruruteremy wahãre.
\v 37 Kai heka tiu tiwawahinyõhyymyhỹre waòludu mahãdu riwamyke-ò tule tiu rariòwyõhyy watxiwahãre.
\v 38 Waòludu mahãdu hemy reawahãr ta iribireny ròtawahãre; arexitxuhunyke ihoõre ka rota xiery ta rexitxuhunymyhỹre.
\v 39 Rewexywexynymyhỹrenyre, rỹirenyke ihoõre; tule watirawo-ò rejuxunymyhỹrenyre rabòdumy.
\v 40 Ruru wadee tewahinymyhỹte waõbinanamy ta aõtxile waòludu mahãdu ribi idi ròtamyhỹre.
\rem dat 2017
\v 41 Waribi teòrudỹỹnymyhỹte, tule mobo wamy radònymyhỹre mahãdu arihukrenykre.
\v 42 Tiiboho tawiòhedỹỹdumy rekoamyhỹrenyre, ta iny ihoõre rihedỹỹnyrenyke; Wedu nihikỹ-ò ryrymyhỹrenyre, ta rirawyònyrenyõhyymyhỹre.
\v 43 Rewexywexynymyhỹrenyre, ta su demy relemyhỹrenyre; ityrereny rariamyhỹre iwesebre subruru rymy rỹimyhỹre wesemy.
\v 44 Kai heka tiwahedỹỹnymyhỹte ixỹ mahãdu aõbinabinahakỹ kyribi ta hãwahãwã wedu-my tiwasynyte. Ixỹ mahãdu arieryke tule ihoõre ka wiji tahe wadeòdumy ihỹrenyre.
\v 45 Hãwã witxira mahãdu wadee rexisỹrabunymyhỹrenyre tule warybemy reòbymyhỹrenyre aõmy tamyreny rarybe wana.
\v 46 Teburereny titxibo reamyhỹre ta ramytatamy riòlònymyhỹrenyre tai awimy ratximyhỹrenyre ribi.
\v 47 Wedu nihikỹ Deuxu heka irumy ratximyhỹre. Tuta ijoi rawowydymyhỹke kua wamanamy wahe, tuta ijoi relyymyhỹke Deuxu rurutere nihikỹmy waumyhedỹỹdu wahe.
\v 48 Tii heka waweribi ratximyhỹre waòludu mahãdu oòraru-ki, waraworawo-ò ritidimyhỹrenyre.
\v 49 Tule riwahedỹỹnymyhỹre waòludu mahãdu ribi. Kai wahe, wedu nihikỹ, butumy wadee tewinymyhỹte waòludu mahãdu ribi aròtakremy tule hãbu deburehekỹ mahãdu ribi tiwahedỹỹnymyhỹte.
\v 50 Tai òraruki tahe sõemy umy rawowydymyhỹre iny bina mahãdu kyki; iòraruki ta adee arawiunykre wowydyna wiudi.
\v 51 Deuxu sõemy wedu ritarasadỹỹnymyhỹre tule terina riteòsinymyhỹre mobo tii ritare —Davi heka rare tule iriòreriòre mahãdu tiiemy idireny rarekremy.
\rem dat 2017
\c 23
\s1 Davi iònamy rarybekre.
\p
\v 1 Kahe Davi rybe iòna rare, Jessè riòre wahe. Deuxu heka Davi hãbu tyhymy rirahorere, Jakò Deuxu heka wedu-my ritare tule Israel mahãdu dee wiu wihikỹ riwinyre. Kiamy Davi rarybere:
\v 2 Wedu nihikỹ tyytyby wadee rarybemyhỹre, irybe ibutumy wadòrotolemy rỹireri.
\v 3 Israel mahãdu Deuxu rarybera, Israel mahãdu itxesedu kiamy wadee rarybera: Wedu heka òbitimy ròwedudỹỹmy rarekre, Deuxu bededỹỹnana rityhynymy ròwedudỹỹmy rarekre.
\v 4 Iwesebre txuu rudiu rohonymyhỹre biu wetyy ihoõmy iwesebre ãsi biu lòra sỹtybymy txu lòòso-ò (rarxỹrxỹnymyhỹre) wesemy.
\v 5 Tai òraruki tahe Deuxu sõemy wariòreriòre mahãdu riwiòhenanymy rarekre, tii heka tuu rarybere tiiemy wawana rarekremy, rybe òbitidi tiu rabinabinake ihoõre. Kia heka ibutumy tuu raraykynyre rare; jiarỹ aõbo tahe tuu ixidee rewinyreri aròtamy aratxikremy, Deuxu heka tuu riwinykre iwesemy.
\v 6 Ka ityhydỹỹdu kõmahãdu tahe idi adehu rỹikre bede wesele: inyõ tebòmy rimykehe ihoõre.
\v 7 Ka ramykre wana ta aõtxile aõ ramykre womati aõbo da òwòru aõbo; taita ibutumy tiiboho roorenykre.
\v 8 Katahe Davi sodadu mahãdu nidedehe mahãdu nira: Josebe-Basebetxi, Tokemoni ludu, inataõ ijoimy nidu mahãdu wedu; tii tatonori-di hãbu mahãdu oitocento sõe wana raõbinanyre ta sohoji aõbina rohonyreki-le ibutumy rahurenyre.
\v 9 Eleaza, Dodo riòre Aoi riokore, heka ijõ rare inataõ ijoimy nidu mahãduõ inidehedehehekỹ mahãduõ. Iu bedeu Davi wana filisteu mahãdumy ralahajinanymyhỹreny aõbinamy reakremy rexibutunymy roimyhỹ-ò. Iu israelita mahãdu aõbina ribi rexitarenyre.
\v 10 Ka Eliaza ta rarire filisteu mahãdu wana aõbina raki ihyy tebò urile ramyremyrenyre inihikỹmy, imayrehe timy tebò ribi reseke ihoõmy. Wedu nihikỹ Deuxu sõemy ritarasadỹỹnyrenyre. Ka aõbina ituere bedeu, israelita mahãdu riòkeserenyre ihyy Eliaza tai rubu mahãdu debòna iribi ritamyhỹ òhòkỹle ritehemynyrenyre.
\v 11 Irahudi tahe Sama nade, Agè riòre, hararita mahãdu. Filisteu mahãdu iu lei bede-ki rexibutunyrenyre, tai òmytani sõemy rỹimyhỹ bede-ki. Iu israelita mahãdu raòrunyrenyre filisteu mahãdu lau.
\v 12 Sama le tahe iu reaõhyyre alòbròna kykile rarire, raõbinanyre tii boho wana ta tureny raòhòtere filisteu mahãdumy. Iu bedeu wedu nihikỹ ritarasadỹỹnyrenyre.
\v 13 Aõwi rede ihòmy rareri bedeu, iny inataõ wedu mahãdu taijoi-di doide “30-my didu mahãdu” roirenyre Adulaã hãluu hãluuhukỹ; Davi tai ratximyhỹ-ò, filisteu mahãduõ rebutunymyhỹ wanawana gigante-my nidu bede-ki.
\v 14 Tai tahe sodadu iny inataõ tebureboho roirenyre filisteu mahãdu tai roimyhỹkydile roirenyre, bee riryrenyre ta idi roirenyre Davi dee. Urile tahe tuu riõõhyyre bemy, iòsỹ, urile rejuxunyre Deuxu-ò xiwe rawahireri wesemy, wedu nihikỹ wahe.
\v 17 Kiamy rarybere: —Wedu nihikỹ Deuxu, tiu ka bemy ariòkeho aõkõ! Ka hãbu mahãdu iitxemy roira heka iòhãrumy roira ihãlubureny rejuxunymy tuu ariòke wesemy wahe! Kawesemy he tii bemy riõõre. Kawesemy he hãbu iny inataõ aõbinadu tyhyhykỹboho riwinyrenyre.
\v 18 Abisai, Joabe seriòre (Zeruia ta iserenyre), 30-my nidu mahãdu nidehedehehekỹ heka riwedunymy raremyhỹ. Kiata ixisohojile raõbinyre, 300 hãbu sõe wana ta rihumy rirubunyrenyre, iòraruki ta tii xe ini aõnityhymy taijoi mahãdu kyribi rohonyre trinta-my nidu mahãdu kyribi.
\v 19 Abisai xe ini itỹny tyhymy rexirahorere taijoi mahãdu kyribi, urile heka inidehedehe tyhy aõkõ rare iny inataõ mahãdu ribi uri sõemy rorubudỹỹrekile tuu raninire.
\v 20 Benaia-my nidu, Joiada riòre wahe, Kabzeel hãwã ludu, kia heka sodadu nidehedehe mahãduõ rare tule iwodebure nihikỹ rare. Tii heka inatxi aõbinadu ninihikỹ rirubunyre moabita mahãdu wahe. Nonoe rejuxunymyhỹ bedeu ta, hãluu hãluuhukỹ-di rubehemy rare taita halòe rirubunyre.
\v 21 Tulesỹ egipcio mahãduõ rirubunyre, hãbu inihikỹ heka rare, tõnori tebònamy ihỹmyhỹ. Ta Benaia òwòru-di tebòki ratximyhỹdile tamy aõbinamy reare, tõnori tebò ribi riatyre ta itõnoridile tai rojymy rirubunyre.
\v 22-23 Kawesemy he Benaia riwinyre. Tii aõbina rieryre ijõ mahãdu 30-my nidu mahãdu kyribi, urile tahe inidehedehe aõkõ rare ijõ mahãdu wesemy. Davi xe itxeredu-my iheto-my rỹimyhỹre wedu-my (risnyre).
\v 24-39 30-my nidu mahãdu kyki ihỹmyhỹ: Asael, Joabe seriòre, Elanã, Dodo riòre, Belẽ ludu; Sama ta Elika ijõre, Harode hãwã ludu; Hele, Pelete ludu; Ira, Ike riòre wahe, Tekoa ludu heka rare; Abieze ijõre Anatobe ludu; Mebunai ijõre, Husa ludu; Saomo, aòita mahãdu; Maarai ta Helebe-my, Baanà riòre, Netofa hãwã ludu; ta Itai, Hibai riòre, Gibea ludu Bjami bedebedehekỹ ludu; ta Benaia ijõre, Piratõ ludu, Hidai, Gaa bero riòre ludu; Abi-Aòbõ, Arabà ludu; Azmavete, Bauri ludu; Eliaba, Saaòbõ mahãdu; Josẽ riòreboho; Jonata; hararita Sama mahãdu ta Aiaõ, Sara riòre; Elifelete ijõre, Akasbai riòre, Maakà mahãdu; Elia sỹ ijõre, Aitofel riòre, Gilo mahãdu, Hesro sỹ ijõre, Karmelo mahãdu; Paarai sỹ ijõre, Arabe mahãdu; Igaò sỹ ijõre, Natã riòre, Zaba mahãdu; Bani sỹ ijõre Gade bedehekỹ ludu, Zeleke sỹ ijõre, Amõ mahãdu; Naarai sỹ ijõre, Beeròtxi mahãdu. Joabe debonadi retyymyhỹre, Zeruia ta isere; Ira ta Garebe, Jatxi mahãdu; tahe Uria le ijõre heteu mahãdu. 37-my heka sõerenyre aõbinadu tyhytyhyhykỹ mahãdu.
\rem dat 2017
\c 24
\s1 Davi ixỹ sõe tiwesebo rỹimyhỹ raerykremy idi rariare.
\p
\v 1 Ijõ bededỹỹnanasỹ, wedu nihikỹ sõemy Israel mahãdu-ki ibinamy rahare iu Davi awimy aõkõ iu ratximyhỹ. Kiamy Deuxu Davi dee rarybere: —Makre ta ibutumy Israel mahãdu-di mariakre tiwesebo sõe rỹireri bierykremy Judà mahãdu sõe tule bierykre.
\v 2 Taita Davi Joabe dee tuu rarybere, sodadu mahãdu wedu-ò, kiamy tamy rarybere: —Makre sodadu mahãdu wana ibutumy Israel mahãdu sỹdi mariakre, ibràra-di makremy ta beà-ò idi manariamy manakre, ixỹ sõe erysymy, aõma dori arierykemyreri tiwesebo iny sõereny inyboho ihỹrenyre.
\v 3 Ta kiamy Joabe wedu rirawyònyre: —Wedu nihikỹ, iny Deuxureny, inihe inyboho risõenyrenykre 100 bede òhòkỹlemy wiji rỹire ratyremy, ka arue tuu kodobikre! Aõmybo tahe tuu tahõtinyteri ka ixỹ sõe erysymy?
\v 4 Urile tahe wedu inatyhyhykỹmy Joabe dee rarybere sodadu mahãdu dee tule irybe rityhynyrenykremy; tahe iribi roireny Davi ribi roirenyre Israel mahãdu sõedi rariarenykremy.
\v 5 Jordaõ bero kotxi riòhòrerenyre tahe Aroe beà weribiò rexibutunyrenyre, vale hãwã bede-ki Gate bedebedehekỹki. Iribi tasỹ ibràra-ò roirenyre Jazer hãwa-ò.
\v 6 Iribi tasỹ ixyby roirenyre Gileade bede-ò ihyyta gade bede òhòkỹle ritehemynyre, heteu mahãdu su-ò. Tasỹ  Dã hãwa-ò roirenyre Dã hãwã ribi tasỹ iraru weribiò rekoarenyre, Sidõ bede-ò.
\v 7 Iribi tasỹ beà weribiò riberenyrenyre, Txiru hãwa-ò, iuhuari dimy roimyhỹre wahe, iribi tahe ibutumy bedebedemy rekoarenyre heveu mahãdu hãwamy kananeu mahãdu ihyy Berseba hãwã òhòkỹle rexionananyrenyre, Juda su beà weribiò.
\v 8 Kawesemy he rariarenyre, nove ahãdu ribi waitue txu sõemy bede rierenyre rahudi, tahe Jerusalẽ-ò ribuarere, bedebedemy ibutuy rariareny rahudi.
\v 9 Tahe tiiboho wedu dee riteòsinyrenyre hãbu sõe sodadu-my raõmysỹdỹỹrenyke riòbyny kiamy sõereny: 800.000-my Israel mahãdu-ki tasỹ Juda bedekira 500.000-my.
\v 10 Ka irahudi, Davi idireny rariare rahudi, ixidee sõemy rexirahere idi ramytxitxire, kiamy tii rarybere: —Wedu nihikỹ Deuxu, òraruna heka ixidee rewinyra ibina hãbu mahãdu sõe-di rariara òraru-ki. Txiòtalàhà ini, waribi bisuhosuhokre aõkerỹbo! Ka rewinyra heka itxỹteitxỹte herbile tuu rewinyra.
\v 11-12 Tai òraruki ta wedu nihikỹ teòdu Gade dee rarybere, Deuxu rybemy Davi dee rarybemyhỹre dee: —Makre ta kiamy Davi dee marybekre inataõ bededỹỹnanamy tamy ariwahinykre ikyribi ta ijõ ixidee ritakre; tibo ixidee ritakre mynadi xe tamy ariwinykre. Biurasò rudiu tahe tamy rare, Davi rexixamy ratximyhỹ-ò.
\v 13 Gade xe rare tamy rybemy, iko relyyre aõmybon Deuxu tamy raryberemy ta ritỹỹraxinyre: —Aõbo he adee awikre? Inataõ wyramy au-ki rama reakre aõbo, da inataõ wyramy aõbo aòludu mahãdu lau brebumy beamy mabekre aõbo da kõmy aõbo inataõ wyramy au-ki banana-di aõhõkỹmy butỹỹnymy mabekre? Wylemyta tuu manarybe wadee Deuxu dee tuu ararybekremy.
\v 14 Davi rirawyònyre: —Waòrahe rurumy watxireri, kiaremy heka hãbu mahãdu aõhỹkỹhỹkỹmy (riwasnykehe) aõkõre. Kiaremy heka wedu nihikỹ Deuxu le heka ixinamy aõhỹkỹmy (riwasnyrenykre), tiin dori wadeereny iruxetòe ijõdikre!
\v 15 Tahe wedu nihikỹ banana-di tamyreny rehure Israel mahãdu tyre, rudile ihyy tiobo itxu ritidire-ò rehemynykre uhukỹle reyterenykremy. Ibràra weribiò sỹdu mahãdu tasỹ beà weribiò sỹdu mahãdu-my mahãdu heka tabre rahure 70.000-my heka israelita mahãdu ituerenyre.
\v 16 Ka wedu nihikỹ ỹju Jerusalẽ hãwã hudumy rakremy ratximyhỹ-ò, ta wedu nihikỹ tawo rirahorere ixyby ixỹ aõhõkỹmy (risnykõkremy) ta rarybere ỹju ròrubudỹỹmy ratximyhỹ dee: —Ixãwike hewaxe! Awitahe! Wedu nihikỹ ỹju aõma bire-ki ihỹmyhỹ tai aõnaõna ty riterymyhỹre-ki Arauna hõrõ jebuseu mahãdu wahe.
\v 17 Davi tuu robire ỹju ixỹmy raòhòtemyhỹmy taita kiamy Deuxu dee rarybere wedu nihikỹ dee: —Jiarõy sohojile hewa bede òrarureri. Jiarỹ heka reòsara. Aõbo heka ixỹ mahãdu riwinyra? Jiarỹ hãwyy ta wariòreboho wana heka aõhỹkỹhỹkỹmy (biwasnybenyke).
\v 18 Iu bedeule tahe Gade rare, kiamy Davi dee rarybere: —Makre tai aõnaõna ty raterymyhỹre-ò Arauna hõrõ wahe taita xiwena biwinykre Deuxu dee.
\v 19 Tahe Davi Deuxu rybemy reòbyre, wedu nihikỹ wahe, taxe rare, tuu Gade tamy rarybere mynamy.
\v 20 Arauna ixirawotxi retehere ta wedu taijoi mahãdu wana tamy rybemy rarerimy robire. Taira tatiowomy resere suò taòmy roire, Davi kotxi.
\v 21 — Wedu, aõoherekibo heka kaò tateri? Davi rirawyònyre: —Suõbradỹỹmy rareri tai xiwena ariwinykremy Deuxu dee, wedu nihikỹ-ò, banana ròte ixãwikremy.
\v 22 Taita Arauna kiamy rarybere: —Wedu, ixinamy ixideewimy aõaxina ibutumy bimykre ta Deuxu dee biwahinykre. Kaki ka broreni rỹire biwòsinykremy xiwemy biwahinykremy, ka iaõnaõnareny kalemy rỹire; ka aõnaõna ty idi raterymyhỹre òwòru tasỹ hemy biuhekre.
\v 23 Arauna ibutumy wedu-ò riwahinyre irahudita kiamy rarybere: —Wedu nihikỹ, aDeuxu, kỹny axiweò reobykre!
\v 24 Urile tahe wedu kialemy rirawyònyre: —Txiòtòetuke, tamy areòbyõkre. Ibutumy ariòwynykre. Jiarỹ wedu nihikõy, waDeuxu dee, iòwykõmy xiwe ariwahinyke ihoõre. Tahe Davi xe suu riõbranyre tai aõnaõna ty raterymyhỹre broreni tule riõbranyre ciquenta prata sõe-di.
\v 25 Taile xiwena riwinyre Deuxu dee, wedu nihikỹ wahe, tahe xiwe tamy riwahinyre riwòsiny wiwiny riwahinyre tule xiwe bede ywina wana. Tahe wedu nihikỹ ixitòedỹỹna dirawyònyde, ta aõwesele banana Israel-ki ralòmyhỹre ixãwire.