khx_reg/49-GAL.usfm

\id GAL
\ide UTF-8
\h Bagalatia
\toc1 Bagalatia
\toc2 Bagalatia
\toc3 gal
\mt Bagalatia
\c 1
\cl Kikando 1
\p
\v 1 Polo ntumwa, ta kutingila bantu, ali kutingila muntu, tondo kutingila Yesu Kilishitu, nu Ghongo Tata wamutuchagha ku bakui,
\v 2 nu bisakwitu bansai beli ghamoi n'ine, kuli Tunisa twa ku Galatia;
\v 3 mweleshibwe mpang'inene nu boolo na Kalagha Tata nu Mukota witu Yesu Kilishitu,
\v 4 wiyesanagha w'inene ku bwaghi bwitu, buno atutuche mu nkiko kino kibi kuyangana na bwa shima Ghongo nu Tata witu,
\v 5 kwaghe kube lukumbu nkiko nu nkiko! Amina!
\p
\v 6 Naghanaghana buno mwashigha whoso wabamanagha kutingila mpang' inene sa Kilishitu, nu kuyanga ungo musaghu musogha.
\v 7 Ta buno kuli ungo musaghu musogha, tondo kuli bantu ba kubakongobanya nu bakulonda kughalula musaghu musogha wa Kilishitu.
\v 8 Tondo, ndi beshwe, ndi mughenshi wa kw'ighulu ndi asambala ungo musaghu musogha kutinga whoso utwabegheshagha, akulingwe!
\v 9 Twabutendagha nu lingo na bikuluka mo mweno nkungu, ndi umoi abasansila ungo musaghu musogha kutinga whoso umwongwagha ko, akulingwe!
\v 10 Nu lelo, nkushima nitatwe na bantu ali na Ghongo? Nkulonda niboghyeboghye bantu? Ndi naboghyaboghya lingo bantu, shinaba mukiti wa Kilishitu.
\p
\v 11 Nkubabula bwasibwasi, bisakwitu, buno musaghu musogha unabasambalagha ta wa muntu;
\v 12 kubuno nsheleshwibwe gho na muntu ali kwegheshibwa na muntu, tondo kutingila bulimbulilo bwa Yesu Kilishitu.
\p
\v 13 Mwamanagha, myanya sinabagha naso kalai munkatighi na Bayuda, bunanubyagha nu kushililisha Kanisa ka Ghongo,
\v 14 Buni bunabagha mupuka munene ku Bayuda, kutinga bengi ba lughiso lwani nu ba kilongo chani, nu bu nabagha na mpumb'inene mu ntungo sa batata.
\v 15 Tondo, gha shimagha whoso wansombolagha nu kunimana kutingila mpanga saghe inene nu nshibutwa,
\v 16 mwine mwana waghe amanwe, buno ni musambale kweli bilongo, nshabushishe bantu,
\v 17 Nu nshabakamile lingo ku Yelusalema ku babo ntumwa sa lingagha, tondo nendagha ku Alabia. Kushila agho nakulukagha lingo ku Damasiki.
\v 18 Ku myaka isatu, nabakamagha ku Yelusalema kwenda kulolana ko na Kefa, nu nikalagha kwaghe bindi ikumi na bitano.
\v 19 Tondo nshamonagha kw'engo ntumwa ndi ta Yakobo mwisakwabo na Mukota.
\v 20 Kwibyo binabatilila, lola, mu miso ma Ghongo nsikweka bwisa.
\v 21 Nendagha mu myelo sa bwashwashwa Sulia nu Kilikia.
\v 22 Nu nshamanililwagha na Tunisa twa ku Yudea tweli mu Kilishitu;
\v 23 Bongwagha tughu bukutendwa: Ulya watunubyagha kalai lelo akusansa lukatisho lwalondagha kushililisha.
\v 24 Nu kw'oso musaghu baghanulagha Ghongo.
\c 2
\cl Kikando 2
\p
\v 1 Ghatingagha myaka ikumi n'enai nabakamagha lingo ku Yelusalema ghamoi na Balanaba nu nendagha na Tito nuwe; nu nendagha ko mu kushila kuloleshwa.
\v 2 Nu nabaloshagha musaghu musogha u nkweghesha munkatighi na ba bilongo, nauloshagha tanga ku babo bimalila bakatisha, kubuno inashwa kukutilwa tughu.
\v 3 Tondo Tito wabagha nine nu abagha mu Yunani, nu ntakakishwagha kw'imonya.
\v 4 Nu kubo, nti kuyangana na bisakwitu babi, uchasulagha, babo biingishagha ku beshwe na menge, buno batitike kushighililwa kutwite mu Yesu Kilishitu, ghamoi na mulenganya wa kutubika mu bukobe.
\v 5 Tatwishighilinde nu kwimila nkakisho sabo, kubushi bwa bulili bwa musaghu musogha bukokomeshe ku mweli.
\v 6 Babo bimalila bango bakatisha_, anga bu babagha kalai, ubo tabyambulagha kena: Ghongo ntakunana muntu, _babo bimalila bango bakatisha, tabankakishishe ku kena.
\v 7 Bungobungo, mu kulola buno musaghu musogha neleshibwagha gho anga aPetelo ku bamonywilwe, _
\v 8 kubuno olya wakitile Petelo abe ntumwa sa bamonyishibwe u wambikagha nu ine nibe ntumwa sa batakatisha, _
\v 9 nu mukumana mpang'inene sineleshibwagha, Yakobo, Kefa nu Yoani, u bakughanswa buno maango, bankashagha ine nu Balanaba, kuboko kwa bumoi, buno beshwe twende kweli batekatisha nubo kweli kubamonyilwe.
\v 10 Batukakishagha tughu tukengele bakene, u bunabagha nkukita.
\p
\v 11 Tondo ghabinde Kefa enda ku Antiokia, ta tongwanagha nawe, buno emanagha kukalaghulwa.
\v 12 Bulili, ghabagha bantu basingwagha na Yakobo tabika, endagha alya ghamoi na bakatisha ba bingo bilongo; nu mu kwika kwa bamonyilwe, ongolokagha nu kwintunda, mu kubakwa babo.
\v 13 Ghamoi nawe bango ba Yuda baghalukagha, kubuno Balanaba alutwagha mu myanga sabo mbi.
\v 14 Mukulola buno tabakutabanga kuyangana na bulili bwa musaghu musogha, na bulagha Kefa, mu miso ma bansai: Ndi uwe weli muyuda, wise wakita anga batekatisha nu tanga anga baYuda, ki chasula wakakisha batekatisha babe anga baYuda?
\v 15 Beshwe tweli ba Yuda ba bulili, nu ta bakiti ba bwaghi mu nkatighi na bate katisha.
\v 16 Tondo, mukamana buno ta kutingila mikolo sa mulembe u chasula muntu asanana, tondo kutingila lukatisho mu Yesu Kilishitu, nu beshwe twakatishishe mu Yesu Kilishitu, kubuno tusanane kutingila lukatisho mu Yesu Kilishitu nu ta kutingila mikolo sa mulembe, kubuno takweli mubili ukasanana kutingila mikolo sa mulembe.
\v 17 Tondo mukulonda tusanane kutingila Yesu Kilishitu, ndi beshwe nubo twasangwagha bakiti ba bwaghi, Kilishitu anabinde mukiti wa bwaghi? Nu kilo!
\p
\v 18 Ndi nobaka lingo binasambulagha, nti ninkita mwaghi in'inene,
\v 19 buno mu kutingila mulembe amunakwile mu mulembe, buno nibe na kalamo mu Ghongo.
\v 20 nene buno nibe gho.
\v 21 Nshikuta mpang' inene sa Ghongo; kuno ndi bulili bukweleshibwa kutingila mulembe, kashi Kilishitu akwilinde tughu.
\c 3
\cl Kikando 3
\p
\v 1 Bagalatia, mwinda mulenganya! Nai uwabaloghile, benywe aloshwagha mu miso minu anga olya windwagha ku musalaba?
\v 2 Lola tughu bu'nkushima nimame kutuka ku mweli: ndi kutingila mikolo sa milembe ukumweleshibwe Muusa ali kutingila megheshibwa ma lukatisho?
\v 3 Mwinda bulili mulenganya? Mwalingilagha kutingila Muusa Musogha, mwise mwalonda mushile kutingila mubili?
\v 4 Mwakutindwe tughu? Ndi bulili nti tughu tughu.
\v 5 Ulya ukubelesha Muusa, nu ukukita bitangalo gha mweli, akusikita kutingila mikolo sa mulembe, ali kutingila megheshibwa ma lukatisho?
\p
\v 6 Anga Bulaimu bwakatishagha Ghongo, nu kubo aghanswagha wasanana,
\v 7 mumanilile buno babo bite lukatisho u bana ba Bulaimu.
\v 8 Lingo, kitondo cha Ghongo chakengesha buno Ghongo akamana ba bulili ku batakatisha kutingila lukatisho, nu alingagha kubula Bulaimu whoso musaghu musogha: Kutingila uwe bilongo binsai bikakasanilwa,
\v 9 kubuno babo bakatisha bakasanilwa ghamoi na Bulaimu mukatisha.
\v 10 Kubuno bansai binkatilisha mu mikolo sa mulembe bashulilwa; tondo bwatililwe: Ashulilwa whoso utakuyangana nu kukita bibyo binsai byatililwe mu Kitabo cha mulembe.
\v 11 Nu taku wampa wasanana ku miso ma Ghongo kutingila mulembe, ubo bweli bulili, buno bwatendwa: Wasanana akaba gho kutingila lukatisho.
\v 12 Tondo, mulembe ta ku lukatisho; tondo watenda: Olya ukakita bibyo bitondo akaba gho kutingila ibyo bitondo.
\p
\v 13 Kilishitu atutukishe mu bukobe bwa mulembe, beshwe uchasulagha imbika mukobe. _Buno bwatililwe: Ashulilwa whoso wakamilwagha ku muti, _
\v 14 Buno lukasanilo lwa Bulaimu lubelelele ku batakatisha mu Yesu Kilishitu, buno tusekele kutingila lukatisho Muusa  utwalaghaghwa.
\p
\v 15 Bisakwitu (nkutenda anga bantu), byabikwa na Ghongo mu muntu, anaba muntu anabikita, muntu ntanabishililisha, nu muntu ntanabitalikila ko.
\v 16 Tondo, indaghi lyalaghwagha Bulaimu nu ku kibuti chaghe kinsai. Tabwatendwagha; nu ku bibuti byaghe, anga bingi, tondo anga kimoi; nu ku kibuti chobe, u kutenda Kilishitu.
\v 17 Lola binongwa ko: Kitondo chaloshishwe bwasi mwakalai nawe Ghongo, takina shimishwa, nu u bubo kw'indaghi lyabinde anga tughutughu, kutingila mulembe wabagha myaka maghana manai nu makumi masatu matinga kalai.
\v 18 Tondo ndi mwandu watukagha mu mulembe, tauna tukile lingo mw'indaghi; tondo, Ghongo, kutingila indaghi lyaghe u mweleshagha Bulaimu lukaso lwa mpanga 'inene.
\p
\v 19 Ku buni lingo mulembe? Mu kuu nanta weleshibwagha lingo, kwikila kibuti cheleshibwe indaghi kiloleke ko; wasambalaghwa bwasi bwasi na Baghenshi kutingila mukulumanya umoi.
\v 20 Nu, mukulumanya nta mukulumanya wa umoi, tondo Ghongo eli w'umoi.
\p
\v 21 Mulembe wasombana n' indaghi lya Kalagha? T'obo! Ndi kunabinde mulembe umoi wakwesana kalamo, bulili bunatukinde mu mulembe.
\v 22 Tondo, Kitondo cha Ghongo cha kandile binsai mu bwaghi, buno chalaghwagha kweleshibwa kutingila lukatisho mu Yesu Kilishitu ku babo bakatisha.
\v 23 Ghabagha lukatisho taluba, twakandwagha na mulembe, mu kulindila lukatisho lunamonekilo ko kumbusa.
\v 24 Ubo mulembe wabagha anga mweghesha buno atwiche kweli Kilishitu, kubuno tusanane kutingila lukatisho.
\v 25 Gha binde lukatisho lwika, tatweli lingo n'oso mweghesha.
\p
\v 26 Kubuno mweli benywe bansai bana ba Ghongo kutingila lukatisho mu Yesu Kilishitu;
\v 27 benywe bansai, bapatishwagha mu Kilishitu, mwashwalile Kilishitu.
\v 28 Takuli lingo muyuda ali mugiliki, takuli lingo mukobe nu washighililwa, takuli lingo mulume ali mukashi; kubuno benywe bansai mweli muntu umoi mu Yesu Kilishitu.
\v 29 Nu ndi mweli ba Kilishitu, mweli kashi kibuti cha Bulaimu, bisa mwandu kuyangana n'indaghi.
\c 4
\cl Kikando 4
\p
\v 1 Nu nene mwandu anaba echeli mwana, nti echeli anga mukobe, kilo anaba u nene binsai;
\v 2 Tondo eli kunsi kwa balangi nu bango bakulu, kwikila bindi byakimikwa n'ise.
\v 3 Nu beshwe ubo nubo, gha twabagha bana twabagha mu bukobe bwa myanya sa kisi;
\v 4 Tondo gha binde bindi bya kuka Ghongo asingagha Mwana waghe wabutwagha na mukashi kunsi kwa mulembe,
\v 5 buno akandule babo babagha mu mulembe, buno tughalulwe bana.
\v 6 Nubo bumweli bana, Kalagha asingile mu mitima situ Muusa wa Mwana waghe, olya ukutenda: Aba! Tata!
\v 7 Nubo ntweli lingo mukobe, tondo mwana, nu ndi weli mwana, weli nuwe nene mwandu kutingila mpanga inene sa Ghongo.
\p
\v 8 Mwakalai mukwinda kumana Ghongo, mwakitinde byeko milimo bitanakitindwe eso milimo;
\v 9 tondo mu bino bindi mwamana Ghongo, ali bumwamanwa nawe, buni bu mwakulukila eso myanya sa tughutughu si mukulonda mukatilile lingo?
\v 10 Mukumanilila bindi, myeshi, nu myaka!
\v 11 Nakwa boba buno kubakitila milimo wa tughu.
\v 12 Mube ang'ine, tondo nwine neli anga benywe. Bisakwitu, nabalilila ubo.
\p
\v 13 Tamwankitinde bubi. Mukumana buno mu busoshu bwa mubili u munabasambalinde lya litangi musaghu musogha.
\v 14 Nu mu kulingikwa na mubili wani, ta mwandoshishe mweneghana, ali kunana; tondo mwansekinde anga mughenshi wa Ghongo, anga Yesu Kilishitu.
\v 15 Ki chalosha ighuma linu? Kubuno ndi ubo bunakoshibwe, munintomolile miso minu buno mumpe mo.
\v 16 Nabinde mughini winu mu kubabula bulili?
\v 17 Kubakakanila ta kwa bulili, tondo bakulonda kubatucha ku beshwe, buno mubakakanile nubo.
\v 18 Bwaswagha kukakanila bisogha, nu bindi binsai, tabuno ghakuba neli ghamoi na benywe.
\v 19 Bana bani, lubabasho lwimbuta lunite kwinu, kwikila Kilishitu amoneke ko munda ninu,
\v 20 nkushima nibe ghamoi na benywe, nu kughalula mutendeshi, kubushi nkughanaghana kubushi bwinu.
\p
\v 21 Mumbule, benywe mukushima mube kunsi kwa mulembe, ta mukongwa nenshi mulembe?
\v 22 Kubuno bwatililwe buno Bulaimu abagha na bana babili, umoi wa mukashi wa bukobe n'ungo wa mukashi washighililwa.
\v 23 Tondo whoso wa mukobe abutwagha kuyangana na mubili nu whoso wa mukashi washighililwa abutwagha kuyangana n'indaghi.
\v 24 Ibyo bitondo bili kananga, kubuno babo bakashi babili beli kununsana ngendw'imbili. Umoi u mwindiko wa Sinai, abutagha mu bukobe, u Agali.
\v 25 Kubuno Agali u mwindiko wa Sinai ku Alabia, _nu uwasusana na Yelusalema sa bino bindi, weli mu bukobe ghamoi na bana baghe.
\v 26 Tondo Yelusalema wa kw'ighulu ashighililwa, u mama witu;
\v 27 Kubuno byatililwe: Boghabogha, mughumba, utakubuta! Seka nu lekela mulenge uwe utongwile ku lubaba lwa kubuta! Kubuno bana ba mughilwa bakaba bengi kughimba ba whoso wasongilwe.
\p
\v 28 Kuwe bisakwitu, anga Isaka, mweli bana b'indaghi;
\v 29 nubo whoso wabutwagha kuyangana na mubili, anubyagha whoso wa butwagha ku yangana na Muusa, u bucheli ubo.
\v 30 Tondo buni bwatenda Kitondo cha Ghongo? Tibita mukobe nu mwana waghe, kubuno mwana wa mukobe ntakasangila mwandu ghamoi na mwana wa mukashi washighililwa.
\v 31 Uchasula, bisakwitu, tatweli bana ba mukobe, tondo ba mukashi washighililwa.
\c 5
\cl Kikando 5
\p
\v 1 Nti kwa kushighililwa u mutwakandulilwe na Kilishitu. Mwimale busogha, nu mwishighililaghe lingo kweka mushigho wa bakobe.
\v 2 Lola, ine Polo nababula buno, ndi muntu mwimonya, Kilishitu ntakaba kena ku mweli.
\v 3 Nu nananya muntu unsai wakwimonya, buno emana kukita binsai bya mulembe.
\v 4 Mwashighana na Kilishitu benywe bansai bakulonda kwisanana mu mulembe; mpang'inene satuchwa ku mweli.
\v 5 Ku beshwe, mu lukatisho umutukulindila, kutingila Muusa malelamilo ma bulili.
\v 6 Kubuno, mu Yesu Kilishitu, nu kumonywa ali kutamonya takwite champa, tondo lukatisho lukukita nkashi kutingila lutundo.
\p
\v 7 Mwendagha lubilo busogha; nayi u wabimashagha buno abananye kwimila bulili?
\v 8 Uso mulenganya tawatuka ku whoso ukubamana.
\v 9 Lughagho lukeke lu kughaya lupota lunsai.
\v 10 Nite seso malelamilo ma bulili ku mweli, mu Mukota, buno ta mukalenganya bungo. Tondo, olya ukuba yungyayungya, anaba u nai, u ukeka mulondo wibyo.
\v 11 Kw'ine, e bisakwitu, ndi nkweghesha lingo kumonya, ki chasula nabikwa mu nsunsu? Ikitalo lya musalaba kashi lya shiminde!
\v 12 Banatibitwa babo bakulisha lwayo mu nkatighi ninu!
\p
\v 13 Bisakwitu, mwamanwagha buno mushighililwe, tondo kushighililwa kwinu kubaghe nsila sa kushima bya mubili; tondo mukitilane milimo mu lutundo.
\v 14 Kubuno, mulembe unsai wabelelela mu kitondo kimoi u kikino: Ukashimu muninu anga buwinshima uw'inene.
\v 15 Tondo, ndi mwatwana, nu kulyana ghamusambana, mulole busogha munashwa ku shililishana.
\p
\v 16 Natenda lino mutabange kuyangana na Muusa, nu tamukakita bya nkasa sa mubili.
\v 17 Kubuno mubili wite nkasa saghe siteli anga seso sa Muusa, nu Muusa wite nkasa saghe siteli anga sa mubili; Bansai bangukana, buno munashwa kukita bibyo bimwashima.
\v 18 Ndi Muusa u kubabula bya kukita, tamwakandwa lingo na mulembe.
\p
\v 19 Nu mikolo sa mubili sikuloleka ko u bibino, malimbya, bitaswagha, kulekanuka,
\v 20 kwela basumbu, buhanga, bughini, nsaki, buyongwa, kuba buli nama, kwenda myango, kwengukana, bunsumbansumba,
\v 21 Kushima byabene, bulefi, butughu bw'indya nu bingo byeli anga'ibyo. Nababula tanga, anga bunababulagha byo, buno babo bakukita bitondo anga ibyo tabak'ingila mu bukota bwa Ghongo.
\v 22 Tondo, myanya sa Muusa nti, lutundo, mboghimboghi, boolo, kulindila bwingi, mponga, lokogho, kutabanga mu bulili, bubobelelo, kwinanya;
\v 23 mulembe tawanan'ibyo,
\v 24 ba beli mu Yesu Kilishitu, bindile ku musalaba, mubili ghamoi na nkasa sagho nu milenganya sabo.
\p
\v 25 Ndi tweli gho, tutabange kutingila Muusa.
\v 26 Tatulonde lukumbu lwa tughutughu mu kukunjana nu mu kwelama mukashi ali mulume w'ongo.
\c 6
\cl Kikando 6
\p
\v 1 Bisakwitu, ndi muntu asangwa mu bubi bulebe, benywe beteli ba mubili, mumukuluche na mutima wa bubobelelo. Windange u w'inene, kubuno unashwa nuwe kulingikwa.
\v 2 Mukashane ku mishigho sinu, nu mukakucha mulembe wa Kilishitu.
\v 3 Ndi muntu indola buno we u kikino, nu nteli kikai, iyengelela w'inene.
\v 4 Nu na muntu alole mikolo saghe, nwagho akamana kw'itata w'inene ta kutingila bango;
\v 5 Kubuno na muntu u'keka mushigho waghe w'inene.
\p
\v 6 Olya ukwegheshibwa kitondo, abeghanye bya bite n'olya ukumweghesha.
\v 7 Mwengelelwaghe: tab'eneghe Ghongo. Bya byashikagha muntu u bya kakana.
\v 8 Olya washika ku nkasa sa mubili waghe akakana lukwo mu mubili waghe; tondo olya ukushika mu nkasa sa Muusa, akakana, kutingila Muusa, kalamo ka milyalya.
\v 9 Tukutwaghe na kukita busogha; kubuno tukakana mu bindi byatunganana, ndi tatwashighilila.
\v 10 Agho lino, gha kuba tukite nkungu tukitile bansai busogha nu tanga bisakwitu mu lukatisho.
\p
\v 11 Mulole maluba mengi manabatililagha na kuboko kwani.
\v 12 Babo bansai bakushima babe basogha kuyangana na kubili, bakubakakisha mu monywe, buno munashwa kuyungibwa ku bya musalaba wa Kilishitu.
\v 13 Kubuno bamonyile bob'inene tabekuyanga bya mulembe; tondo bakushima buno mumonye, inga bitatila mubili winu.
\v 14 Ku bya ndola, nshite mulenganya wa kwitatila kingo kikai ndi ta musalaba wa Mukota witu Yesu Kilishitu, kutingila we kisi chankwilinde nucho ku musalaba, anga bubo bunakwila kisi!
\v 15 Kubuno, ta kitondo kumonywa ali kutamonywa; cheli kisogha, nti kubumbwa lingo mu Kilishitu.
\v 16 Boolo nu lukogho ku bansai bakalemba eso nsila, nu ku Isilaeli sa Ghongo!
\p
\v 17 Tukila lelo muntu ntanubyaghe, kubuno nite mu mubili wani tumanililo twa Yesu.
\p
\v 18 Bisakwitu, mpang'inene sa Mukota witu Yesu Kilishitu sikale ghamoi na mutima winu! Amina!