khx_reg/59-HEB.usfm

\id HEB
\ide UTF-8
\h Baebulania
\toc1 Baebulania
\toc2 Baebulania
\toc3 heb
\mt Baebulania
\c 1
\cl Kikando 1
\p
\v 1 Gha shilagha kutenda kalai, ngendo ningi nu mu myanga ningi na batata, kutingila balenganya,
\v 2 Ghongo, mu bino bindi bishinda, atendile na beshwe kutingila Mwana waghe, wabikile nene mwandula wa binsai, nu kutingila we, abumbagha kisi,
\v 3 nu we mu kuba chengeshi cha lukumbu lwaghe, nu kamanililo kaghe, nu mu kukatilila binsai kutingila kitondo kite bwangato, atukishe bwaghi, nu kw'ikala kw'indume kwa Mwami munene mu bishiki b'ighulu,
\p
\v 4 waghimba baghenshi eleshibwe ishina lisogha kubatinga.
\v 5 Buno nai ku baghenshi wabulilwe na Ghongo: Uwe mwana wani, nakubuta lelo? Nu lingo nkaba So nuwe ukaba mwana wani?
\p
\v 6 Nu mu kubika lingo mu kisi nkulha saghe, atendagha: Baghenshi bansai ba Ghongo bamukumbamile!
\p
\v 7 Nu lingo, atenda ku mighenshi: Whoso ukughalula ba baghenshi baghe lumpumpu, nu bakiti baghe lwembe lwa kaya.
\p
\v 8 Tondo abula Mwana: Kishumbi chobe cha bukota, e Ghongo cheli cha milyalya; mushumbo wobe wa bukota weli mushumbo wa bulili;
\q
\v 9 washimagha bulili nu wasombile bwaghi; uchasula, e Ghongo, Ghongo wobe akubongishe mwambo wa mboghombogho kughimba baninu.
\p
\v 10 Nu lingo: Uwe, Mukota, mu ndingililo wabumbagha kisi, nw'ighulu nulo byeli mukolo wa maboko mobe;
\q
\v 11 Bikatinga, tondo uwe weli gho; bikakungugha binsai anga nshulu,
\q
\v 12 U'kabighonda anga kankaba nu bikaghaluka; tondo uwe, uli bu weli, nu myaka sobe tasikashila.
\p
\v 13 Nu nai ku baghenshi wabulilwe: Ikala mu kw'indume lyani, kwikila gha nkakita baghini bobe babe kinantilo chobe?
\p
\v 14 Abo bansai ta myusa sa kukolela Ghongo milimo, basingwagha buno bakite mulimo wa Ghono kubushi bwa babo bemana kweleshibwa lonio.
\c 2
\cl Kikando 2
\p
\v 1 Uchasula twemana kwikatilisha ku bitondo bitongwagha ko, buno tunashwa kwekwa bulai nabyo.
\v 2 Buno, ndi kitondo cha sanswagha na baghenshi chakitile nkashi, nu ndi mweneghana wa kitondo nu kwinda kongwa, byakasilwe indigho lyatunganana nabyo,
\v 3 buni butunasoghonoka kwaghibwa ndi twenegha lonio lunene anga luno, lo, lwasambalwagha tanga na Mukota, lwakokomeshibwe kwitu na babo balongwagha ko tanga,
\v 4 Ghongo mu kukokomesha buteneneki bwabo, kutingila tumanililo, bighanaghana nu bitangalo bingi, nu kutingila nkaso sa Muusa Musogha, sabeghanishibwe kuyangana na bwashima.
\p
\v 5 Bulili, ta baghenshi u beleshibwe na Ghongo kisi kikashwa kitukutenda.
\v 6 Kubuno nu muntu umoi atenenekile kungo buno: Muntu u nai buno umukengele, nu mwana wa muntu buno umukumbilile?
\q
\v 7 Wamubikagha bindi bikeke kunsi kwa baghenshi, wamushwalikishe nkumbu sa lukumbu nu lwanso,
\q
\v 8 Wabikile binsai kunsi na mashinshi maghe. Bulili, mu ku mwelesha binsai, Ghongo ntashighile kikai champa chatamweleshishe, tondo tatulola nenshi lelo ndi eleshibwe binsai.
\v 9 Tondo wabikwagha mu bindi bikeke kunsi kwa baghenshi, Yesu twamumona ko ite nkumbu sa lukumbu nu sa lwanso kubushi bwa lukwo lwamunubyagha, kubuno, kutingila mpanga inene sa Ghongo, anubila bansai kwikila lukwo.
\p
\v 10 Bulili, bwaswagha ku olya wite binsai nu binsai byeli byaghe, nu washimagha kwicha mu lukumbu bengi ku bana baghe, imasha mu busanana kutingila minubo Mwami wa lonio lwabo.
\v 11 Kubuno olya ukusanania, nu babo bakusananwa, batuka kweli muntu umoi. Uchasula ntite nsoni sa kubamana bisakwabo,
\v 12 gha kuba akutenda: Nkasansa ishina lyobe kweli bisakwitu, nkakumoghelamoghela mu musanganano.
\p
\v 13 Nu lingo: Nkishighilila muwe. Nu lingo ine ghono, ine nu bana baneleshagha Ghongo.
\p
\v 14 Kashi lino, kubuno bana basanginde mikilha nu nama, w'inene nuwe asanginde, kubuno, kutingila lukwo, anante whoso wite bwangato bwa lukwo, ukutenda buno musumbu,
\v 15 nu ukukandula babo bansai, bakukwa lukwo boba, kalamo kabo kashibikwagha mu bukobe.
\v 16 Buno bulili, nta baghenshi u bakukasha, tondo kibuti cha Bulaimu.
\v 17 Uchasulagha emanagha asusane na bisakwabo mu binsai, buno abe Mwami Nsakogha munene wa lukogho nu wa bulili ku nkashi sa Ghongo, buno ashimye bwaghi bwa bantu;
\v 18 Buno, mu kuba winene alingikwagha mu kunuba, anakosha kukasha babo bakulingikwa.
\c 3
\cl Kikando 3
\p
\v 1 Uchasula, bisakwitu basanana, bite kibhu mu mubila wa kw'ighulu, mumane busogha ntumwa nu mwami munene Nsakogha wa lukatisho utukughanula,
\v 2 Yesu, wabinde wa bulili ku olya wamwimikagha, anga bwabagha Musa mu numba saghe insai.
\v 3 Kubuno u wemanilwe kughanswa wa bulili mu lukumbu lwaghimba lulo lwa Musa ali wobaka numba nsogha ite lukumbu lunene kughimba numba so'ngo.
\v 4 Nu numba insai sobakwa na muntu, tondo olya ukobaka binsai u Ghongo.
\v 5 Kweli Musa, abagha wa bulili mu numba insai sa Ghongo, anga mukiti, buno atenenekele kicho chemanagha kusambalwa;
\v 6 tondo Kilishitu eli nu we ubo anga Mwana wa numba saghe; nu numba saghe u beshwe, ndi twikokomesha kwikila kubika mulenganya wa bulili muwe, nu malelamilo bitukwitatila.
\p
\v 7 Uchasula, kuyangana na bikutenda Muusa Musogha: Buno busi, ndi mwongwa ishuki lyani.
\v 8 mukitaghe mitima sinu kuba mbibu, anga busi bw'ishibo, anga busi bwa kulingikwa mu kalula,
\v 9 u kwandingikagha ba So buno bangeleke, nu bamonagha ku mikolo sani myaka makumi manai.
\p
\v 10 Nwine nashibukilagha ulo lughiso, nu natendagha: bindi binsai bite mutima washimila. Tabamanile nsila sani.
\p
\v 11 Nalumbilagha lino mu mishibu wani: tabakika mu kishiki cha kwomulilwa ko.
\p
\v 12 Mwindole busogha bisakwitu, takubaghe umoi ku benywe wite mutima mubi nu wa kwinda kukatisha, kwikile kwindekanucha na Ghongo weli gho.
\v 13 Tondo mwanane gha musambana bindi bunsai, kwikila bunatendwa: Buno busi! Kubaghe umoi ku benywe akitaghe mutima waghe kuba mubibu mu kuyanga nsila sa bwaghi.
\v 14 Buno nu beshwe twasangila na Kilishitu, ndi twakokomesha bubibu kwikila kindi kishinda mu mulenganya wa bulili utwabagha nagho mu ndighililo,
\v 15 Anga bukutendwa: buno busi, ndi mwongwa ishuki lyaghe mukitaghe mitima sinu kuba mbibu, anga busi bwishibo.
\p
\v 16 Bulili, babo bakitagha ishibo, mu kushila kongwa kugho, ndi ta babo bansai batukagha ku Misili mu kusondolelwa na Musa?
\v 17 Nu nai u washibukilwagha na Ghongo mweso myaka makumi manai, ndi ta babo bakitagha bwaghi, nu bakwilagha mu kalula?
\v 18 Nu ku banai u kwalumbilagha buno tabakika mu kishiki chaghe cha komulilwa ko, ndi ta ku babo bananagha kongwa ishuki lyaghe?
\v 19 Twalola nu beshwe buno tabakoshagha kwika ko, kubushi kwa kwinda kukatisha kwabo.
\c 4
\cl Kikando 4
\p
\v 1 Ntukwe boba lino, kubuno indaghi lya kwika mu kishiki cha komwulila ko licheli lingo, t'omoi ku benywe aloleke buno akika kumbusa.
\v 2 Kubuno twasambalindwe uno musaghu musogha anga bo; tondo kitondo kisogha kibasambalindwe tachabakitinde kena, kubuno tachasangile lukatisho kweli babo bachongwagha ko.
\v 3 Ku beshwe bakatishagha, twingila mu kishiki cha komwulilwa ko, anga bwatenda: Nkalumbila mu mushibu wani: Tabakika mu kishiki chani cha komwolilwa ko! Atenda lingo, bunaba nkashi saghe sashilile kulingila kubumbwa kwa kisi.
\v 4 Buno atenda ghango ku kicho kindi cha mutubakamo: Nu Ghongo omulwagha kindi cha mutubakamo.
\p
\v 5 Nu ghano lingo: tabakika mu kishiki chani cha komwulilwa ko!
\p
\v 6 Kubuno, chabikindwe bamoi kwika ko, nu ku babo beleshibwagha tanga indaghi, tabikile ko kubushi bwa kwinda kongwa ishuki lyaghe,
\v 7 Ghongo abika lingo kingo kindi_buno busi_ mu kukengesha bwatendagha Daudi mu bindi byatingagha, anga bwatilwa tanga: Buno busi, ndi mwongwa ishuki lyaghe, mukitaghe mitima sinu kuba mbibu.
\p
\v 8 Kubuno, ndi Yoshuwa abomushwagha, ntanatendile obo ku kingo kindi.
\v 9 Kweli lino kwomulwa mu sabato kwabikindwe bantu ba Ghongo.
\v 10 Kubuno olya womushwa na Ghongo nti omulwa ku milimo saghe, anga Ghongo bwomulwagha ku saghe.
\p
\v 11 Twikokomeshe lino komushwa nawe, kubuno muntu anashwa kulosha myanya sa kwinda kongwa ishuki lya Ghongo.
\v 12 Kubuno kitondo cha Ghongo kile gho nu cha naka, chatinga mwele u kutwa kuno nu kuno, kikwingila bubibu mu muntu, nu kubeghanya mutima nu muusa, ngihino nu bungongo, ki kukamana milenganya nu byashima muntu.
\v 13 Takweli chabumbilwe chabiswa mu miso maghe, tondo kinsai cheli bwasi, nu kinsai kikumoneka ko mu miso ma whoso utwemana kwikisha binsai.
\p
\v 14 Nubo, ubo bu twite Nsakogha Munene watingile mw'ighulu, Yesu, Mwana wa Ghongo, tukokomeshe bubibu mu lukatisho lu tukughanula.
\v 15 Buno tatwite Nsakogha munene uninda kutukasha mu busoshu bwitu; tondo, aghelekwagha anga beshwe mu binsai nu we ntakitagha bwaghi.
\v 16 Twishigheleshe lino ghamoi na mutima wa kokomela bwighi na kishiki cha bukota cha mpanga inene, buno tweleshibwe lukogho nu mpanga inene, buno tukashwe mu nkasa situ.
\c 5
\cl Kikando 5
\p
\v 1 Bulili na Sankogha munene wasombolwa mukantighi na bantu, imikwa ku bushi bwa bantu ku nkashi sa Ghongo, buno atule nkaso nu bisansa kubushi bwa bwaghi.
\v 2 Anakwila lukogho ku babo batakumana ku bashiminde, kubuno nuwe asangila busoshu nabo.
\v 3 Nu kutingila ubo busoshu, ukikusula atucha kinsansa kubushi bwa bwaghi bwaghe anga bwa babo bantu.
\v 4 Nu takuli wampa u niyelesha uso mulimo, ndi ntamanilwe na Ghongo, anga bwabagha Haluni.
\v 5 Nu Kilishitu ntiyeleshishe lukumbu lwa kuba Sankogha Munene, tondo alutuchagha ku whoso wamubulagha: Weli Mwana wani, nakubuta buno busi!
\p
\v 6 Anga bwatendwa kungo: Weli Sankogha munene bindi binsaghi, anga lughiso lwa Melikisedeki.
\p
\v 7 We, ghabagha echeli gho mu mubili, mu kutula ghamoi na nkugho nu ghamoi na bisoshi, masegho nu kwema bubibu kweli whoso unemile kumutucha mu lukwo, nu mu kongwililwa kubushi bwa busanana bwaghe,
\v 8 eyegheshagha, mukuba Mwana, ongwililagha nu kwikumbya kutingila bitondo byanubilagha.
\v 9 Nu we, mukuba abikwa mu busanana, aghaluka nene lonio lwa milyalya ku babo bansai bakongwa ishuki lyaghe,
\v 10 Ghongo, mu kumwimika bwasibwasi Sankogha munene, kuyangana na lughiso lwa Melekisedeki.
\p
\v 11 Twite bingi bya kutenda agho, nu bingo bitondo bibibu mu kwatula, kubuno tamukongwa ighilighili.
\v 12 Bulili, benywe, kalai munabinde bakota, mwite lingo nkasa buno babegheshe, twabitondo tutangi twa Ghongo, mwite nabyo nkasa anga mabele ta buno anga indya lya naka.
\v 13 Buno, olya ucheli wa moma, ntite mulenganya wa kitondo cha bulili cha Ghongo, buno echeli mwana.
\v 14 Tondo indya lyanaka lyeli lya bantu bakula, babo bakumana kwensananya bitondo kumana bibi nu bisogha.
\c 6
\cl Kikando 6
\p
\v 1 Uchasula, mu kushigha kitondo kitangi cha Kilishitu, tuyangilile cha bulili, ta kukulukila lingo meghisha ma mikolo satingile kalai,
\v 2 sa lukatisho mu Ghongo, mu meghesha ma lupatisho, mu kubikila maboko, nu kutuka ku bakui, nu kulughaghyo lwa milyalya.
\v 3 U bitukakita ibyo ndi Ghongo ashima.
\v 4 Kubuno ta bunakoshibwa ku babo babagha mu chengeshi tangu, batomagha ku lukaso lw'ighulu, beleshibwagha kibhu na Muusa Musogha,
\v 5 basondagha kitondo kisogha cha Ghongo nu bwangato bya bindi bikashwa,
\v 6 nu bashigha nsila, baghalulwe lingo nu beleshibwe nyomolo, buno bise anga bakulucha Mwana wa Ghongo ku musalaba nu kumwitya nsoni.
\v 7 Gha kuba itete lyabola na masi ma mbula ma kuloka, nu kisughu ki kwasa mulyo, kisogha ku babo balimilwa cho, lyaghaluka lukasanilo lwaGhongo;
\v 8 tondo, ndi lyabuta mikele nu bisughu bibi, nti lya nanwa nu kushulilwa, nu kushila agho nti lya ghishwa.
\p
\v 9 Tunatenda ubo, nshimwa, tukulindila ku mweli mikolo nsogha satunganana na lonio.
\v 10 Buno Ghongo eli wa bulili, nta n'ebelela mulimo winu nu lutundo si mwaloshishe kw'ishina lyaghe, mu kukitila lingo basanana nkashi.
\v 11 tukushima n'omoimoi ku benywe aloshe bwa ghulubanila ibyo kwikila malelamilo ma bulili,
\v 12 kubuno mushighililanaghe, muyange inso nsila sa babo, kutingila lukatisho, nu kwimala busogha, beleshibwa mwandu w'indaghi.
\p
\v 13 Gheleshibwagha Bulaimu indaghi na Ghongo, nta lumbinde kungo mukulu anga we, ndi ta kuw'inene nu kutenda:
\v 14 Bulili nkakukasanila nu kibuti chobe nkakikita kibe kingi.
\v 15 Nu Bulaimu mu kulindila bwingi, eleshibwagha chalaghwagha.
\v 16 Buno bantu bakulumbila ku olya mukulu kubo, nu kulumbila u kitondo cha shililisha matenda gha basambana.
\v 17 Uchasula Ghongo, mu kulonda kulosha ku bisa mwandu, mulenganya waghe utanaghaluka, alumbilagha,
\v 18 kubuno, kutingila bikai bibili bitanaghaluka mubyo, Ghongo ntanakosha kweka bwisa. Tweleshibwe maghala ma kwenda kubusho, beshwe twakatilinde malelamilo, matwalaghaghwa.
\v 19 Mano malelamilo, twite mo anga mosa mu mutima, wa bulili nu wanaka; wakomwa nu kwingila mw'itete,
\v 20 agho u ghikominde Yesu kubushi bwitu, anga alhuta, wabikilwe bindi binsai Sankogha munene mu lughiso lwa Melekisedeki.
\c 7
\cl Kikando 7
\p
\v 1 Bulili, whoso Melekisedeki mwami wa ku Salemu, Sankogha wa Ghongo uli w'ighulu, wendile ghabusho na Bulaimu mu kutuka kukinda bami, nu amukasanilagha,
\v 2 nu eleshibwagha na Bulaimu kamoi kikumi ka binsai byakulukagha nabyo, _we u weli mwami wa bulili, kuyangana na bwatenda ilyo ishina lyaghe, kubusa kobo Mwami wa ku Salemu, ukutenda buno Mwami wa boolo, _
\v 3 nte n'ise, nte na nina, nte na kibuti, utite ndingililo ali kindi kishinda_, tondo abinde wasusana na Mwama wa Ghongo, whoso_ Melisedeki eli Sankogha munene bindi binsai.
\p
\v 4 Mulole buni bweli mukulu olya weleshibwagha na tatangulu Bulaimu kamoi k'ikumi, ku byatukagha nabyo ku bita.
\v 5 Babo bana ba Lawi bakukitagha milimo sa kwela Ghongo, bite, kuyangana na mulembe, lukakisho lwa kutola kamoi kw'ikumi ku bya shwa na bantu, ukutenda buno, kweli bisakwabo, beli ba kibuti cha Bulaimu;
\v 6 nu we, uteli w'echo kibuti, atolagha kamoi k'ikumiku kweli Bulaimu, nu akasanilagha whoso weleshibwagha indaghi.
\v 7 Buno ta myango, mwana muto u kukasanilwa na mukulu.
\v 8 Nu ghano, babo bakutola kamoi kikumi beli bakui; tondo agho, olya watenenekwagha u utakakwa.
\v 9 Lingo, Lawi, u kutolagha kamoi kikumi, akalighile, u kutenda buno, kutingila Bulaimu;
\v 10 kubuno abagha icheli mu kibunda k'ise, ghamonekagha ko Melisedeki mu miso ma Bulaimu.
\p
\v 11 Ndi lino, kushililila kwakoshibwa na mulimo wa kwela Ghongo kukukitwa na balawi, _ kubuno mweso mulimo wakwela u mwikalila mulembe weleshibwe ku bantu, _kinasulile ungo Sankogha amoneka ko? Kuyangana na lukakisho lwa Melekisedeki ta lulo lwa Aloni?
\v 12 Buno mulimo wa kwela mu kuba waghalulwa, bwaswagha mulembe nugho ughalulwe.
\v 13 Bulili, olya ukubulwa ibyo bitondo eli wa kingo kilongo, nu taku muntu wacho wakitile mulimo wa kwela;
\v 14 Buno bu byamoneka ko buno Mukota witu atukile mu kilongo cha Yuda, kilongo kitatekulwagha na Musa mu mulimo wa kwela Ghongo.
\v 15 Ubo bwaba bulili lingo, buno ungo Sankogha amoneke ko wasusana na Melekisedeki,
\v 16 wimikilwe, ta mu kuyangana na mulembe wa bya mubili, tondo, kuyangana na bwangato bwa kalamo katakashila.
\v 17 Buno atenekilwe: weli Sankogha bindi binsai kuyangana na lughiso lwa Melikisediki.
\p
\v 18 Kashi, mubiko wa kalai watebwa, kubushi winda maghala nu waghaluka wa tughutughu,
\v 19 kubuno mulembe tawikishe kampa mu bya kusanana, wabinde ndingililo nsogha sa malelamilo ma kutushighelesha bwighi na Ghongo.
\p
\v 20 Nu u bwabinde kutingila kulumbila, _
\v 21 kubuno, balawi baghalukile Bisankogha banene, ta mu kulumbila, Yesu abinde we ghamoi na kulumbila kwa whoso wamubulagha: Mukota alumbinde, nu ntakisungula: weli Sankogha munene bindi binsai, mu lughiso lwa Malekisedeki.
\p
\v 22 Kubo Yesu u wimalila lununsano lwa bulili.
\p
\v 23 Nu lingo, kwabagha Bisankogha bengi, lukwo talwabashighililagha bikale bindi binsai.
\v 24 Tondo we, buno eli gho bindi binsai, ite nkashi sa kwela Ghongo sitakumoneka ko.
\v 25 Nu kubo, we, anonia bulili babo beli bwighi na Ghongo, mu kuba eli gho akubaseghela bindi binsai.
\p
\v 26 Bulili, bwemanagha tube na Sankogha munene anga we, wa sanana, utakitile kitondo kibi, utite kama, windekanukishe na bwaghi, nu aghimba ighulu,
\v 27 ntite nkasa, anga Bisankogha banene, kutula bisansa bindi binsai, tanga kubushi bwa bwaghi bwaghe, nu lingo bwa bantu nubo, kubuno iyesanile winene limoi umpanga.
\v 28 Bulili, mulembe u kwimika bantu bite bwaghi babe binsakogha banene; tondo kitondo cha kulumbila chashwile kumbusa kwa mulembe, kimikile Mwana, u weli wasanana nu wa milyalya.
\c 8
\cl Kikando 8
\p
\v 1 Kitondo kinene ku bibyo byatendwa, buno twite Sankogha munene, u wikala kw'indume lya kishumbi cha bukota bwa Ghongo mw'ighulu,
\v 2 mukiti wa nkashi mu kishiki cha sanana cha Ghongo, nu hema sa bulili, sobakilwe na Mukota nu ta na bantu.
\p
\v 3 Sankogha munene unsai akubikwa buno atule nkaso nu binsasa; u bwaswagha nuwe abe na kikai cha kutula.
\v 4 Ndi anabinde ghano ghansi, ntanabinde Sankogha, kubuno agho gheli babo bakutula nkaso kuyangana na mulembe.
\v 5 (Babo bakukumbamila, kilimelime cha byeli mw'ighulu, anga bwakengeshwagha Musa na Ghongo ghabagha akwenda koboka hema sa Ghongo: Abulwagha, kumbilila busogha, wakitagha anga buwabulwagha ghantata gha mwinduko).
\v 6 Tondo lelo eleshibwa nkashi nene sakuba mukulumanya mu lununsano lwa bulili lwa bikilwe mwindaghi lisogha.
\p
\v 7 Bulili ndi lununsano lutangi talwabagha bubi, lungo talunabikilwe kumbusa kwalo.
\v 8 Tondo nti ghamoi na kitondo cha kusughila, u bwabulwagha Isilaeli na Mukota: Lola bindi byashwa, bwa tenda Mukota: Nkanusana lingo na numba sa Isilaeli nu numba sa Yuda,
\q
\v 9 ta anga ubo bunanunsanagha na b'ise, busi bunabakatililagha mu kuboko buno nibatuche mu kisi cha Misili, buno tabinkatilishagha bubibu mu lununsano lwani, nw'ine nshabalenganyagha ko, bwatenda Mukota.
\q
\v 10 Tondo lola lununsano lunikakita na numba sa Isilaeli, kushila ibyo bindi, bwatenda Mukota: Nkabika milembe sani mu mitima sabo, nkasitilya mu mutima wabo, nu nkaba Ghongo wabo, nubo bakaba bantu bani.
\q
\v 11 Taku muntu ukeghesha munabo, ali mwisakwabo wampa mu kutenda: Mana Mukota! Buno bansai bakanimana, kulingila mwana muto kwikila ku mukulu kubo;
\q
\v 12 Kubuno nkashighilila mabi mabo, nu nshikakengela lingo bwaghi bwabo.
\p
\v 13 Mukutenda: Lununsano lutangi lwatingile, lola lwa lelo; cha kalai, cha chakungugha, kashi nti cheli bwighi na kushimila.
\c 9
\cl Kikando 9
\p
\v 1 Lununsano lutangi lyabagha nulo na nkakisho sa kukumbamila Ghongo mu numba sa kukumbamila Ghongo sa ghano gha kisi.
\v 2 Bulili, hema sabagha, sobakwagha, munda naso, mukumanwa kishiki cha sanana, mwabikwagha chanikilo cha bwagha, mesa, nu tumpampa twa kalolesho twa Ghongo.
\v 3 Kumbusa kwa nshulu s'imbili, kwabagha kibe cha hema kikumanwa kishiki cha sanana ku babo basanana,
\v 4 chabisa kasasa ka nolo ghabikwa ngenge, nu sanduku sa lununsano sabukilwa insai na nolo. Mweso sanduku, mwabagha mwanshi wa nolo mweli mana, mushumbo wa Haluni, wengenga, nu mesa mengi ma lununsano.
\v 5 Ghantata na hema kwabagha baghenshi ba lukumbu, bilimelime byabo bya bukila kishumbi cha lukogho. Ta nkungu sa kutenda binsai.
\p
\v 6 Buno ibyo bikai kubikwa ubo, bisankoka bakukita nkashi bakwingwila mo mu nkungu insai mu kishiki kitangi cha hema;
\v 7 nu mu kishiki ch'imbili nsakogha munene akwingila mo limoi ku mwaka, nta ninda mikila sa kutula kubushi bwa bwaghi bwaghe nu bwaghi bwa bantu bansai.
\v 8 Muusa Musogha alosha agho buno nsila sa kishiki cha sanana ch'ighulwa lingo, ndi hema ntangi sicheli gho.
\v 9 U kalolesho ka bino bindi, gha bakutula nkaso nu bisansa bitenakosha kusananya muntu, kutingila mulenganya wa whoso u ku kumbamila,
\v 10 nu we, ghamoi na malya, maku nu binsai bya mubili, bya bagha nkakisho sa mubili sabikwagha kwikila bindi bya kughalulwa.
\p
\v 11 Tondo Kilishitu ashwile anga Sankogha munene wa bisogha bikashwa; enduchagha hema nene nu nsogha, sitobakilwe na kuboko kwa muntu, u kutenda buno ta sa bino byeli gho;
\v 12 nu inginde limoi mu kishiki chasanana, ta ghamoi na mikilha sa bilimba, nu sa byana bya nkambu, tondo ghamoi na mikilha saghe, mu kweleshibwa kushighililwa milyalya.
\v 13 Buno ndi mikilha sa balume ba nkambu nu bilimba, nu ito lya nkambu lyasansilwa ku babo bimbighya, soya nu kusanania mubili,
\v 14 buni bweli mikilha sa Kilishitu, we na mutima wa Ghongo, intulile w'inene uyite kama kweli Ghongo, sikasugha milenganya sinu, na myanya sakwile, buno mukitile Ghongo weli gho nkashi!
\p
\v 15 Nu kubo uchasula eli mukulumanya wa luno lununsano, kubuno, lukwo lwashwile buno lutuche mabi makitwagha mu lunsano lutangi, babo bamanaghwa beleshibwa mwandu wa milyalya u balaghwagha.
\v 16 buno gheli nkusako, bwaswagha lukwo lwa wakitagha nkusako lube tanga.
\v 17 Bulili nkusako site nkashi, ndi lukwo lwaba, talwite maghala ndi walukitagha echeli gho.
\v 18 Lola uchasula ghamoi na mikilha lununsano lutangi lwasekelwagha.
\v 19 Musa, mu kushilya kwelesha bantu nkakisho insai sa mulembe, atolagha mikilha sa nkambu nu sa bilimba, ghamoi na masi, nu nshulu sa myosa sengenga, nu kansansa sa kunsansila; ansansilagha w'inene kitabo masi nu bantu mu kutenda:
\v 20 Seno u mikilha sa lununsano si mwakakishibwa na Ghongo.
\v 21 Asansilagha lingo masi ghamoi na mikilha ku hema nu ku bikai binsai bya mu numba sa kukumbamila.
\v 22 Nu binsai kuyangana na mulembe byengagha kutingila mikilha, nu ndi mikilha tasakubulwa, ta kweli kushighililwa bwaghi.
\p
\v 23 Bwaswagha kashi, tulolesho twa bikai byeli mw'ighulu, binasughwa anga ubo, bikai bya mw'ighulu byo binene binasughwa kutingila binsasa bisogha kubi ghimba.
\v 24 Buno Kilishitu ntinginde mu numba sa Ghongo sobakilwe na kuboko kwa muntu, mu kuyanga bya bulili, tondo inginde mw'ighulu, buno atutendele mu miso ma Ghongo.
\v 25 Nu tabuno iyesane ngendo ningi ichasulagha ingila, anga nsakogha munene u kwingila mu kishishi cha sanana mu mwaka umoi umoi ghamoi na mikilha site saghe;
\v 26 ndi ubo, ananubile ngendo ningi kulingila kubumbwa kwa kisi, tondo bino bindi bishinda amonekile ko limoi buno abe kisansa cha kutucha bwaghi.
\v 27 Nu anga bwabikindwe bantu kukwa limoi, nu kushila agho kwaghibwa,
\v 28 Ubo nubo Kilishitu wiyesanile limoi buno eke bwaghi bwa bengi, akamoneka ko lya ngendi imbili ntite bwaghi bwa babo bakumwongwilila kubushi bwa lonio lwabo.
\c 10
\cl Kikando 10
\p
\v 1 Bulili, mulembe wite kilimelime cha bisogha bikashwa, nu ta buno u kulosha busoghabusogha bikai, tauna kosha, kutingila bisansa bi bakutula myaka nu myaka kwicha bantu ku busanana.
\v 2 Nu lingo ta binashighwa kutulwa, kubuno babo bakwela, ndi bishila kwenga, banalenganya lingo ku bwaghi bwabo?
\v 3 Tondo makengelo ma bwaghi meli gho mwaka nu mwaka kutingila ibyo bisansa;
\v 4 Kubuno tabunakoshibwa buno mikalha sa nkambu na sa bilimba situche bwaghi.
\p
\v 5 Uchasula Kilishitu mu kwingila mu kisi, atendile: Ntwashimagha kisansa ali lukaso, tondo wampinde mubili;
\q
\v 6 Ntwimilagha nkaso sa kutula nu bisansa kubushi bwa bwaghi.
\q
\v 7 Agho natendagha: lola, nashwa (mu kitabu cha ghondwa ine natendwa mo) buno nikite e Ghongo biwashima.
\p
\v 8 Kushila tanga kutenda ubo: Ntwimilagha nkaso nu bisansa bituche bwaghi (bikutulwagha kuyangana na mulembe),
\v 9 Atendagha lingo: Lola nashwa nikite biwashima, ashimya kitangi buno imike kishinda.
\v 10 Nti kutingila ubo bwashima u mutwasanana, kutingila lukaso lwa mubili wa Yesu Kilishitu limoi umpanga.
\p
\v 11 Nu nsakogha unsai akukita mulimo bindi binsai nu akutula ibyo binsansa bimoi, bitinakosha kutucha bwaghi,
\v 12 we, kushila kutucha kisansa elyo limoi ikalile bindi binsai kw'indume lya Ghongo,
\v 13 mukulindila agho baghini baghe baghaluke kinantilo chaghe.
\v 14 Kubuno, kutingila ulo lukaso lumoi, ikishe mu busanana bindi binsai babo basanana.
\v 15 Ubibyo bikutubula Muusa Musogha nuwe; kubuno, mu kushila kutenda:
\q
\v 16 Lola lununsano lunkukita ghamoi nabo, kumbusa kwebyo bindi, bwatenda Mukota: Nkabika milembe sani mu mitima sabo, nu nkasitila mu mutima wabo, ubwatalikila;
\p
\v 17 Nu nshikakengela lingo bwaghi bwabo ali mabi mabo.
\p
\v 18 Nu gheli kushighililwa bwaghi, taghanaba lingo lukaso lwa kutucha bwaghi.
\p
\v 19 Agho lino bisakwitu, buno butwite kutingila mikilha sa Yesu, kwingila bwasibwasi mu kishiki cha sanana,
\v 20 kuyanga mwaaka walambya uwatuliminde munda na nshulu ukutenda buno mubili waghe,
\v 21 nu buno twite Sankogha munene wimikilwe mu numba sa Ghongo,
\v 22 tushighelele na mutima wa bulili, mu lukatisho lwisala, na mitima senga, nu mubili wogha masi mulenganzya mubi nu mubili wogha masi masongokelwa.
\v 23 Tuyangilile bubibu meghesha ma malelamilo mitu, buno olya watulaghile eli wa bulili.
\v 24 Tukatililane mu lutundo nu mikolo nsogha.
\v 25 Nu tatushighe musanganano witu anga bweli bango; twanane mu kulola buno bindi byeli bwighi.
\p
\v 26 Ndi twakita bwaghi bwa butwashima nu tukumana bulili, takuli lingo kisansa cha kutucha bwaghi,
\v 27 tondo kulindila kwayibwa bubibu mu kaya ka kubanga bubibu ka kashicha batakwongwa Ghongo.
\v 28 Olya utayangile mulembe wa Musa nti akwa nteleshibwa lukogho, ku bateneneki babili ali basatu;
\v 29 minubo ki inene sitakashila sikeleshibwa whoso ukata bulai Mwana wa Ghongo, ukenegha mikilha sa lununsano sa mwenjagha, nu ukutuka Muusa wa Mpanga inene?
\v 30 Kubuno tukumana whoso ukutenda: Ine nkuana nkukulukisha muntu mab'i maghe, ku neli u kweli indigho! Nu lingo: Mukota akaghya bantu baghe.
\v 31 Bweli bwana ku kolokela mu maboko ma Ghongo.
\p
\v 32 Mukengele bindi bitangi mukushila kweleshibwa chengeshi, mwakitile ishibo linene mu minubo,
\v 33 kibe kimoi kwitwa nsoni mu mulungu nu kunuba, kingo kibe, kukomya lingo na bakitagha bubo.
\v 34 Bulili, mwakwilagha bakandwa lukogho, nu mwimilagha na mboghombogho kunaghwa binu, mukumana buno mwite binu bisogha bitakashila.
\v 35 Tamushighe kashi, malelamilo minu mabibu u mweli maligho minu manene.
\v 36 Kubuno mwemana kwikatilisha busogha, buno mu kushila kukita byashima Ghongo, mweleshibwe bi mwalaghwagha.
\v 37 Lingo bindi bikeke; olya wemana kushwa, ntakwindisha lingo.
\q
\v 38 Nu olya wa bulili ku neli, ikala mu lukatisho, nu ndi itucha, mutima wani ta una muboghelaboghela.
\p
\v 39 Beshwe, ta tuli mu babo bakwitucha buno bashimile, tondo mu babo bite lukatisho buno bonie mutima wabo.
\c 11
\cl Kikando 11
\p
\v 1 Buno lukatisho luli malelamilo ma bulili bikai bitukulindila, kulimbulilwa bibyo bitakumoneka ko.
\v 2 Mukuba nalo, bakungu batenenekelwagha busogha.
\v 3 Nti kutingila lukatisho u mutukumana buno kisi cha bumbwagha kutingila kitondo cha Ghongo, kubuno kikumonaka ko tachakitwagha na bikumoneka ko.
\p
\v 4 Nti kutingila lukatisho, Abeli atulagha Ghongo kinsansa kisogha chaghimba kicho cha Kaini; nti kutingila lo amanwagha wa bulili, Ghongo alingikagha eso nkaso; Nu nti kutingila lo, akutenda lingo anaba akwa.
\p
\v 5 Nti kutingila lukatisho Enoke atolilwe mw'ighulu, buno amonaghe ku lukwo, nu nta monekile ko lingo, kubuno Ghongo umutolagha mw'ighulu; buno, ghabagha nte tolwa, abulwagha buno aboghyaboghyagha Ghongo.
\v 6 Buno utite lukatisho, ntanaboghyaboghya Ghongo; bushi bwemana olya weli bwighi na Ghongo akatishe buno Ghongo eli gho, nu ukuligha babo bakumulonda.
\p
\v 7 Nti kutingila lukatisho Noa wakengeshwagha na Ghongo ku bitondo bitemonekagha ko lingo, nu mu kukwa boba bwa kwongwilila busogha, abasagha bwato bunene buno onie bantu ba numba saghe; nti kutingila lo aghyagha kisi, abagha nene mwandu wa bulili ukweleshibwa kutingila lukatisho.
\p
\v 8 Nti kutingila lukatisho Bulaimu mu kumanwa kwaghe, imilagha nu kwenda mu kishiki chaneleshibwe kibe mwandu, nu endagha kwetekumana.
\v 9 Nti kutingila lukatisho, endagha kwombulha mu kisi ch'indaghi anga musumba, kuyama mu hema ghamoi na Isaka nu Yakobo, basangila elyo indaghi.
\v 10 Kubuno abagha akulindila mwelo munene wobakwa busogha, whoso wabagha mulenganya wa Ghongo nu w'inene Ghongo u mobaki.
\v 11 Nti kutingila lukatisho u Sala w'inene, kilo anaba mukungu, eleshibwagha kibuti, kubuno akatishagha mu bulili bwa olya wamweleshagha indaghi.
\v 12 Uchasula ku mulume umoi, mukungu, kwatukagha kibuti kinene anga tumbalumbalu tweli mw'ighulu, anga miseghe seli mu muse wa kitatenge sitanaghanswa.
\p
\v 13 Nti mu lukatisho u mwakwilinde babo bansai, nu tabeleshibwa bikai bi balaghwagha; tondo babimonelagha ko kulai nu kubiboghelaboghela, mu kumana buno beli bagheni nu bashwile kutabanga mu kisi.
\v 14 Babo bakutenda ubo bakulosha buno bakulonda kisi kimoi.
\v 15 Ndi banaghalukile nu kulola ku bi bashighagha, banakulukile ko.
\v 16 Tondo lelo, bakushima kisi kisogha, u kutenda buno cha Ghongo. Uchasula Ghongo, ntite nsoni kumanwa Ghongo wabo, buno ababikinde kisi kinene nu kisogha.
\p
\v 17 Nti kutingila lukatisho Bulaimu atulagha Isaka, gha lingikwagha, nu atulagha mwana waghe wa ngomo, u weleshibwagha indaghi,
\v 18 uwabulilwe: Mu Isaka mukakutukila kibuti.
\v 19 Amanagha buno Ghongo ite maghala, ma kutucha bantu ku bakui, amumonagha ko lingo anga watuka ku bakui.
\p
\v 20 Nti kutingila lukatisho Isaka akasanilagha Yakobo nu Esau, mu kulola ku bitondo bikashwa.
\p
\v 21 Nti kutingila lukatisho Yakobo, mu kulembekela kukwa, akasanilagha umoimoi bana ba Yosefu. Nu akumbamilagha, mu kwikatilisha mu mushumbo waghe.
\v 22 Nti kutingila lukatisho Yosefu mu kulembekela kukwa, akengeshagha kutuka kwa bana ba Isilaeli mu Misili, abakakishagha kubushi bwa makwa maghe.
\p
\v 23 Nti kutingila lukatisho Musa, mu kubutwa kwaghe, abiswagha myeshi esatu na babuti baghe, kubuno balolagha buno mwana eli mbangilwa, nu tabakwagha boba lukatisho lwa mwami.
\v 24 Nti kutingila lukatisho Musa, mu kuba akula, ananagha kumanwa mwana wa mukinga wa Falao,
\v 25 ashimagha kunuba ghamoi na bantu ba Ghongo kuhimba kuboghelaboghela bwaghi mu nkungu bindi bikeke,
\v 26 mu kulola nsoni sa Kilishitu anga butumba bunene kughimba matumba ma Misili, kubuno alolagha indigho lili kubusho.
\v 27 Nti kutingila lukatisho atukagha mu Misili mutakukwa boba mishibu sa mwami, kubuno imbikagha buno wimala busogha, anga ukumona whoso utekumonekagha ko.
\v 28 Nti kutingila lukatisho, akitagha pasaka nu kusansila mikilha kubuno mwiti ntitubye ku nkulya sa ba Isilaeli.
\p
\v 29 Nti kutingila lukatisho, basokagha kitatenge cha mikilha anga lusi lwa kama, tondo bantu ba Misili babo baghelekagha, kusoka bamelwagha na masi.
\p
\v 30 Nti kutingila lukatisho mikolo inene sa Yeliko sendukagha, mu kushila kusitimba bindi mutubakamo.
\p
\v 31 Nti kutingila lukatisho Lahaba we luwawa ntakwile ghamoi na ndwani kubuno asekelagha basoni busogha.
\p
\v 32 Nu nitende buni lingo? Kubuno inindile nkungu sa kutenda ku bya Kideoni, ku bya Balaka, ku bya Samusoni, ku bya Yefuta, ku bya Daudi, ku bya Samwele, ku bya balenganya,
\v 33 bo, kutingila lukatisho bakindile nkota, bendile mu bulili, beleshibwe indaghi, bashibile kanywa ka mbunga,
\v 34 bashimishe maghala ma kaya, bintikishe ku mwele ukutwa, balamile nsambo sabo, babinde ndwani mu bita, batibitile ndwani sa bingo bilongo.
\v 35 Bakashi bakulukishwagha bakui babo, bango balekindwe mu mutula wa kaya, nu tabiminde kutuka mo, buno batuke busogha ku bakui;
\v 36 Bango biminde kusekwa nu kupundwa, miyololo nu kulekelwa mu kahombo;
\v 37 kusundwa makoi, ku ketulwaketulwa anga mbao si kwatwa, ku kamwa, ba kwagha na mwele, bendile kuno nu kuko nu bashwalile nkwe sa mbuli nu nkwe sa mpene, ku kungulwa binsai, kunuba, kukitilwa mabi,
\v 38 bo basombwagha na kisi, kutalatala mu tulula nu mu mindiko, mu nkunda nu mishinga s'itete.
\p
\v 39 Abo bansai, mu lukatisho mu ba tenenekelwagha, tabeleshibwe bi balwaghagha,
\v 40 Ghongo, mu kutubikila bisogha, tabana sanana ndi beshwe tatwanubagha.
\c 12
\cl Kikando 12
\p
\v 1 Nu beshwe lino, kubuno twatimbwa na lubhu lunene lwa batenenekiki, tute mushigho insai nu bwaghi bwatukunukila ta bubibu, nu twende lubilo ghamoi na kwinkatilisha bubibu mu mulimo utweleshibwe,
\v 2 mu kwengelesha kuli Yesu, Mwami u nene lukatisho, we, mu kulola ku mboghombogho sa bikindwe, anubagha ku musalaba, kwitwa nsoni, nu kwikala kw'indume kwa kishumbi cha bukota bwa Ghongo.
\p
\v 3 Mukengele bulili, whoso wiminde kutingila mubili waghe kweka bughini bwa bisa bwaghi, buno munashwa ku kutwa, nu mutima kwinda maghala.
\v 4 Tamukita bita nenshi kwika kukubula mikilha, mu kulwana na bwaghi.
\v 5 Nu mwebelinde bitondo bimwanwagha anga bana: Mwana wani ubengaghe munubo wa Mukota, nu twinde maghala ndi akusungula;
\q
\v 6 Kubuno Mukota akunubya olya washima, nu akupunda babo bansai bakumana bana baghe.
\p
\v 7 Mwimile munubo; Ghongo akubakata anga bana baghe; kubuno nai uso mwana utakukalaulwa n'ise?
\v 8 Tondo ndi tamukukalaulwa anga bansai, kashi nti tamweli bana ba bulili, mweli ba kumbugha.
\v 9 Anga butwasughilwagha na batata ba mubili, nu twabongwagha, tanalibana kwongwilila whoso Tata wa mitima buno tube na kalamo?
\v 10 Batata batukalaghulagha mu bindi bikeke, anga bubalolagha busogha; tondo Ghongo akutukalaghula buno tube na myanya nsogha, kubuno tusangile ku busanana bwaghe.
\v 11 Buli bulili kukalaghulwa kunsai kukumoneka tanga anga lubabasho, nu ta mboghombogho, tondo mu bindi bweli kubusho bikubuta bitondo bya bulili.
\p
\v 12 Munache maboko ninu matambile nu mashwe ninu moghokile,
\v 13 nu mwende mu nsila sa lingimana, kubuno cha kite bulema kinabuka, tondo kimale busogha.
\v 14 Mwikale na boolo ghamoi na bansai, nu busanana, nu muntu utite busanana ntakamona ku Mukota.
\v 15 Mwalolagha busogha kubaghe muntu ukunana mpang'inene sa Ghongo, kubuno muti wa lubabasho unashwa kwasa nu kunubya bantu bengi;
\v 16 buno kubaghe malimbya ali ghoso utakumana Ghongo anga Esau, kutingila indya aghushagha bukulu bwaghe.
\v 17 Mukumana buno, mu bindi bingi, mu kulonda akasanilwe  ananwagha, gha bulondagha na bitengetenge; kubuno mukuba inkuluka mo, ntakitindwe kena.
\p
\v 18 Tamwashighelinde bwighi na mwinduko unakatilwe ko, nu wabagha ukuya, ali lubhu ali bulimaswa, ali malingi ma masi,
\v 19 ali kughombwa kwa ngunga, ali lwayo, buno babo bongwagha kulo, batendagha babulwaghe kingo kitondo,
\v 20 kubuno tabakoshishe linw'itenda: Sinaba nama sintubya ku uso mwinduko nti sasundwa makoi.
\v 21 Nw'icho kitondo chitishe boba, chasulagha Musa atenda: Nakwa boba nu kughilimila!
\v 22 Tondo mwashighelinde bwighi na mwindiko wa Siona, mwelo munene wa Ghongo weli gho, Yelusalema wa mw'ighulu, nu ma elefu ma baghenshi,
\v 23 musanganano ba batangi batilwa mw'ighulu, Shushi Ghongo wa bansai, mitima sa basanana babo bushililile,
\v 24 sa Yesu weli mukulumanya wa lungo lununsano, nu sa mikilha sa kusansilwa sikutenda busogha kughimba seso sa Abeli.
\p
\v 25 Mwindange buno muninda kwongwa whoso u kutenda; buno ndi babo bananagha kwongwa whoso wasansagha bitangalo bya kisi ta bonile, buni butun'ona beshwe ndi twenda bulai na whoso ukutenda mw'ighulu,
\v 26 we, ishuki lyaghe lyatenjagha kisi, nu we lelo esana indaghi: nu lingo limoi nkatenja ta kisi cho k'inene, tondo nw'ighulu.
\v 27 Ibyo bitondo: nu lingo limoi, byalosha kughaluka kwa bikai bya kutenjatenja, anga bukutinga mu bindi bimoi, inga bitakutenga bibe gho.
\v 28 Uchasula, mukweleshibwa bukota butakutenga, tuloshe lukasanilo lwitu kweli Ghongo mu kumukumbamila bwatunganana,
\v 29 ghamoi na busanana nu ghamoi na kukwa boba, kubuno Ghongo witu eli kaya ka kushililisha binsai.
\c 13
\cl Kikando 13
\p
\v 1 Mwikale mu lutundo lwa mubuto.
\v 2 Mwebelelaghe kusekela bagheni; kubuno mu kukita ubo, bamoi basekelagha baghenshi nu tabekumana.
\v 3 Mukengele babo bakandwa, anga nu benywe mweli bakandwa; Babo bakunuba, anga nu benywe mwite mu mubili umoi nabo.
\p
\v 4 Isonga lyanswe na bansai, nu mughu wa basonganile ubaghe na minkoshi, kubuno Ghongo akaghya balimbya nu batensha.
\v 5 Tamwelame bikulo; mubogheleboghele bimwite; kubuno Kalagha w'inene atendile: Nshikakushighilila, nu nshi kitucha kuwe.
\p
\v 6 Nti ghamoi na malemalilo mabibu u mutunakosha kutenda: Mukota u kunkasha mu binsai, nshikakwa kintu boba, ki kinankita muntu?
\p
\v 7 Mukengele babo babasambalilagha kitindo cha Ghongo, mwa ghenshagha busogha bindi byabo bishinda, nu muyangilile lukatisho lwabo.
\v 8 Yesu Kilishitu eli bwe nweli anga mwa mwigholo, anga buno busi nu bindi binsai.
\v 9 Mubulutwaghe na meghisha mango nu ma kutuka kungo; kubuno bwaswagha mutima ukokomeshe kutingila na mpanga inene, ta kutingila malya matakukita kena ku babo belama mo.
\p
\v 10 Twite kasasa kamoi nu babo bekukitila mulimo mu hema, tabanakosha kulila gho.
\v 11 Mikilha sa nama sikwekwa na Sankogha munene mu kishiki cha sanana kubushi bwa bwaghi, eso nama sikwendagha kughishibwa bulai na mwelo.
\v 12 Uchasula Yesu Kilishitu nuwe buno asananye bantu kutingila mikila saghe, akwilagha bulai na mwelo.
\p
\v 13 Tukukuke twende kweli, ku shinda mwelo, mu kweka nsoni saghe.
\v 14 Kubuno tatwite lingo ghano ghansi mwelo musogha nu munene, tondo tukulindila u kashwa.
\p
\v 15 Kutingila we, tutule Ghongo bindi binsai bisansa bya kumutata, u kutenda buno bitondo bikutuka mu kanywa kitu nu bikughanula ishina lyaghe.
\p
\v 16 Nu tamwebelelaghe bili bisogha nu bya kwesana, buno bisansa anga ibyo u bikuboghelaboghela Ghongo.
\p
\v 17 Mwongwililagha busogha beghisha binu nu kwimbotya kubo, kubuno milenganya sabo sili ku mitima sinu anga ba bakabushibwa kwiso; bube ubo, buno bakite ubo na mboghombogho ta mu kulila, nu tabunabakitila kena.
\p
\v 18 Mutuseghele; kubuno tukumana buno twite mulenganya musogha, mu bintu binsai tube na myanya nsogha.
\v 19 Nti mu lukakisho u munababula ubo, nimane kushwa lubilo ku mweli.
\p
\v 20 Nu Ghongo wa boolo, watuchagha Mungele munene ku bakui, kutingila mikilha sa lununsano lwaghe lwa milyalya, Mukota witu Yesu,
\v 21 abeleshe maghala ma kukita mulimo washima, nu akite munda ninu byashima, kutingila Yesu Kilishitu, kwaghe kube lukumbu kinko nu nkiko! Amena!
\p
\v 22 Nabasegha e bisakwitu, mukatilile mano mano, buno nshabatilinde bingi.
\p
\v 23 Mumane buno mwisakwitu Timote akandulilwe, ndi ashwa ighilighili ku neli, nashwe ghamoi nawe ku mweli.
\p
\v 24 Mwankashishagha samba beghisha binu bansai nu basanana bansai. Babo ba ku Italia babakasha samba.
\p
\v 25 Nu mpang'inene sibe ghamoi na benywe bansai! Amina!