khx_reg/51-PHP.usfm

\id PHP
\ide UTF-8
\h Bafilipi
\toc1 Bafilipi
\toc2 Bafilipi
\toc3 php
\mt Bafilipi
\c 1
\cl Kikando 1
\p
\v 1 Polo nu Timote, bakiti ba Yesu Kilishitu ku basanana bansai mu Yesu Kilishitu beli ku Filipi ghamoi na bapashitele nu ba Diakono;
\v 2 Mweleshibwe mpanga'inene nu boolo bikutuka kwa Ghongo Tata nu kweli Mukota Yesu-Kilishitu!
\p
\v 3 Nakasanila Ghongo wani ku makengelo mansai manite kwinu,
\v 4 Nshikubashigha ku masegho mani benywe bansai,
\v 5 nu kulosha mboghombogho sani ku mulimo umukukita mu kusambala musaghu musogha, kulingila kindi kitangi kwikila lelo.
\v 6 Nkumana buno whoso walingagha uso mulimo musogha mu benywe, akaukita busogha kwikila busi bwa Yesu-Kilishitu.
\v 7 Bwaswagha buno nkulenganya ubo ku benywe bansai, kubuno nabeka mu mutima wani, aba mu muyololo, aba mu kwitendela, nu ku kokomesha musaghu musogha, benywe bansai mweleshibwe mpag'inene anga n'ine.
\v 8 Kubuno Ghongo u wantenenekela buno nabashima benywe bansai mu mwelamo wa Yesu Kilishitu.
\p
\v 9 Nu binkusegha mu masegho mani, buno lutundo lwinu lube lunene busi na busi mu kumana nu mu mulenganya mwingi,
\v 10 buno mumanilile bitondo bisogha, inga mwaba benga mitima nu batanasunghulwa busi bwa Kilishitu,
\v 11 mwisalilane na myanya sa bulili kutingila Yesu Kilishitu, mu lukumbu nu mu kutata Ghongo.
\p
\v 12 Nkushima, mumane, bisakwitu, buno kicho chanikilagha chasulile musaghu musogha wika bulai.
\v 13 Bulili, ku nusu insaghi nu kunsai mu kisi, takweli utakumana buno Kilishitu uchasula nakandwa,
\v 14 nu bamoi ku bisakwitu mu Mukota, beleshibwa maghala kutingila kukandwa kani, nu mutakukwa boba, bakusambala Kitondo cha Ghongo.
\p
\v 15 Bweli bulili, bamoi bakusansa Kilishitu mu nkasa sa kumona bikai nu mutima wa myango; tondo bango bakunsasa na mutima musogha.
\v 16 Banabo bakukita na kushima, mu kumana buno nabikilwe kwimalila musaghu musogha,
\v 17 tondo babo bango, mu kuba na mutima wa myango, bakusambala Kilishitu na bitondo bitaswagha nu ghamoi na mulenganya wa kulisha ku neli nsusu mu kahombo.
\v 18 Kinsai kinaba, ku bunsai, ndi mu kwindosha ali mu bulili, Kilishitu akusambalwa; naboghabogha nu nkaboghabogha lingo.
\p
\v 19 Kubuno nkumana buno bikaba ku lonio lwani, kutingila masegho minu nu mu kukashwa na Muusa wa Yesu Kilishitu,
\v 20 Anga mukulindila kwani busogha, nu kulelamila kwani, nshikakwila kikai nsoni, tondo, buno busi anga bindi binsai, Kilishitu akeleshibwa lukumbu mu mubili wani ghamoi na kumanilila busogha, ndi inaba gho ali nakwa;
\p
\v 21 kubuno Kilishitu u kalamo kani nu lukwo lwanswaghila.
\v 22 Tondo ndi bunaba busogha ku mulimo wani, nibe gho mu mubili, nshikakosha kutenda binashima.
\v 23 Nabulutwa kuno nu kuno; nite mulenganya wa kwiyendela nu kwikala ghamoi na Kilishitu, u bwaswagha;
\v 24 tondo kubushi bwinu, bu busogha nibe gho.
\v 25 Nu nimila, nkumana buno nkikala nu nkashighala ghamoi na benywe bansai, buno mukite bingi nu kuba na mboghombogho mu lukatisho,
\v 26 kubuno gha nkika kwinu, mube na kwintatila mu Yesu Kilishitu,
\p
\v 27 bwaswagha mube na myanya nsogha salingimana na musaghu musogha wa Kilishitu, kubuno inashwa kwinu ali nsashwa, nongwe buno mwikala mu mutima umoi, nu kulwanila lukatisho lwa musaghu musogha,
\v 28 Nu takwishighilila mu boba bwa baghini, u nsila sa kushimila kwabo, tondo kwinu u lonyo;
\v 29 nibyo byatuka kwa Ghongo, kubuno mweleshibwe mpang'inene kutingila Kilishitu, ta mu kumukatisha umpanga, tondo nu kunuba kubushi bwaghe,
\v 30 mu kukatilila bita bi mwamonagha nkulwana, nu bimwamana lelo nabikatilila.
\c 2
\cl Kikando 2
\p
\v 1 Ndi lino, kunaba bubobelesho mu Kilishitu, ndi kunabo komulwa mu lutundo, ndi kunaba mutima umoi, ndi kunaba chombo nu lukogho,
\v 2 mumboghyemboghye busogha, mu kuba na nsila emoi, lutundo lumoi, mutima umoi mulenganya umoi.
\v 3 Tamukite kitondo champa mu kwindondela, ali kwindosha, tondo kwimbotya kwinu kuloshe buno bango babaghimba,
\v 4 N'omoi ku benywe ntalonde ighuma lyaghe winene, tondo lya bango nubo.
\p
\v 5 Mube na myanya sabagha mu Yesu Kilishitu,
\q
\v 6 we wasusagha Ghongo, ntashimagha indingimanye na Ghongo,
\q
\v 7 tondo inkungulagha w'inene, kususana na muntu wa nkashi, nu kuba anga bantu; nu kuloleka ko anga muntu wa tughutughu,
\q
\v 8 imbotyagha w'inene nu kwimila lukwo, kwikila lukwo lwa musalaba.
\q1
\v 9 Uchasula Ghongo nuwe amwimika Mwami munene, nu kumwelesha i'shina lyaghimba mashina mansai,
\q
\v 10 kubuno kutingila ishina lya Yesu n'ishwe linsai likomwe mwighulu, mu kisi, nu kunsi kw'itete,
\q
\v 11 nu na lulame lunsai lughanule buno Yesu Kilishitu u Mukota mu mu lukumbu lwa Ghongo Tata.
\p
\v 12 Ububo, nshimwa sani, anga bu bumwongwilila bindi binsai, mukitile lonio lwinu mulimo ghamoi na kukwa boba nu kughilimila, ta anga buno neli gho, tondo busogha lingo nsheli gho.
\v 13 Kubuno Ghongo u wabika mu mutima winu kukita nu kushima anga bwa bwashima.
\p
\v 14 Mukite, bitondo binsai ta mu manungunungu ali kukita anga tamwashimile,
\v 15 inga mwaba bata sungulwa nu benga mitima, bana ba Ghongo batenatekulwa bubi munkatighi na kibuti cha bigha nu cha kukongobana, mu'cho u mu mwasana anga tusuku mu kisi,
\v 16 nu mweka kitondo cha kalamo; nkakosha kwitata busi bwa Kilishitu, buno nshendelagha lubilo tughu ali kukitila mulimo tughu.
\p
\v 17 Nu ndi ninabikwa kisansa ku mulimo wa lukatisho lwinu, naboghabogha, nu naboghabogha ghamoi na beywe bansai.
\v 18 Nu benywe, mubogheboghe benywe binene nu mubogheboghe ghamoi n'ine.
\p
\v 19 Nalelamila mu Mukota Yesu kubasingila Timote mu bino, kubuno nighulubale kongwa ku misaghu sinu.
\v 20 Kubuno nshite muntu agho, wite milenganya sani, buno ansambalile busoghabusogha bu mweli;
\v 21 bansai bakwindondela byabo, nu ta bibyo bya Yesu Kilishitu.
\v 22 Mukumana buno alingikwagha, mu kwiyesana mu nkashi sa musaghu musogha ghamoi n'ine anga mwana ghamoi n'ise.
\v 23 Nkulelamila lino nabasingile we gha nalole bu kw'iyongwa;
\v 24 nu namanilila bulili mu Mukota buno nkenda ko mu bindi bikushwa.
\p
\v 25 Nalolagha busogha nibasingile mwisakwitu Epafilodito, mukiti wa mulimo nu wa bita ghamoi nine, kutingila we u mumwanikishe binabagha nabyo nkasa.
\v 26 Kubuno, alondagha kubalola ko benywe bansai, nu abagha na bongwa bwingi gha mwongwagha buno akusamba.
\v 27 Asambagha bulili, nu kulonda kukwa; tondo Ghongo u'wamukwilagha lukogho, nu ta w'inene umpanga tondo nw'ine buno nshibaghe na bongwa bwingi.
\v 28 Nu, namusingagha kwinu ighilighili buno mubogheboghe mu kumulola ko, buno niyongwaghe bubibu.
\v 29 Mumusekele lino mu Mukota na mboghimboghi inene, nu mwan'se bantu anga abo.
\v 30 Kubuno, ku bushi bwa mulimo wa Kilishitu u bwalondagha kukwa, esanagha kalamo kaghe kubuno ashililishe gha muteli, mulimo u'mwankitilagha.
\c 3
\cl Kikando 3
\p
\v 1 Bwashighala, bisakwitu, mubogheboghe mu Mukota. Nshikukutwa na kubatilila bitondo ibyo bimoi, nu kubenywe ibyo u bya lonio.
\p
\v 2 Mwindange na mbwa, mwindange na bakiti babi, mwindange na bamonyilwe babi.
\v 3 Kubuno, bamonyilwe u beshwe, bakukumbamila Ghongo kutingila Muusa wa Ghongo, u ukutwelesha lukumbu mu Yesu Kilishitu, nu tubikaghe malelamilo mitu ma mubili kweli,
\v 4 Nw'ine, inalelaminde mubili wani. Nu ndi ungo alelamila mubili waghe ine ina mutinga.
\p
\v 5 Ine, namonywagha ku bindi munani, mu lughiso lwa Isilaeli, mu kilongo cha Benyamina, Muebulania wabutwagha na Muebulania; kuyangana na mu mulembe, mu Mufalisayo;
\v 6 kutingila maghala, munubi wa Kanisa; tawakutekulwa mu bitondo bya mulembe.
\p
\v 7 Tondo bitondo ibyo byabagha binashimagha, Kilishitu u wasulagha nabilolagha ko buno kwabuka.
\v 8 Nu nkulola ibyo binsai buno ta kena, kubushi bwa kumanilila Yesu Kilishitu Mukota wani, we, nu uwasulagha nashigha binsai, nu kubilolako anga bisogho buno nikatilile Kilishitu.
\v 9 Nu kusangwa muwe, ta ghamoi na bulili, bubo bukutuka mu mulembe, tondo ghamoi na bubo bukweleshibwa kutingila lukatisho mu Kilishitu, bulili bukutuka kweli Kalagha kutingila lukatisho.
\v 10 Buno Kilishitu amanwe, nu bwangato bwa kutuka ku bakui, nu mu kusangila minubo saghe, mu kumususa mu lukwo lwaghe.
\v 11 Mu kwika, ndi nakosha, mu kutuka ku bakwighi, ghasambana bakwile.
\p
\v 12 Ta buno nasingana kalai, ali nashililila nenshi, tondo nenda lubilo, nilole ndi inalukata, buno nine nakatwagha na Yesu Kilishitu.
\v 13 Bisakwitu, nshikulenganya buno nalukatile; tondo nkukita kimoi; kwebelela byeli kumbusa kwani, nu kuyangilila byeli kubusho kwani.
\v 14 Nkwenda lubilo nikile mbinkulonda, buno neke indigho lya bunamanilwe na Ghongo mu Yesu Kilishitu.
\v 15 Beshwe bansai lino, beli basililila, tube na whoso mulenganya umoi; nu ndi mwite ungo mulenganya, Ghongo akengya uso mulenganya.
\v 16 Ghano gha twikila, twende ghamoi.
\p
\v 17 Mukite binkukita e bisakwitu. Nu mwengeleshe ku babo bite myanya nsogha, anga si mwalola ko ku tweli.
\v 18 Kubuno, kuli bengi beli baghini ba musalaba wa Kilishitu, bunababulagha byo kalai, nu nabutenda lingo lelo mu kulila.
\v 19 Kushinda kwabo kukaba kushimila; nda sabo u ghongo wabo, bakwitatila bya bikubita nsoni. Bashima bya kisi.
\v 20 Tondo, mwelo witu beshwe weli mw'ighulu, u kutukulindila nu beshwe Monya Mukota Yesu Kilishitu,
\v 21 u ukaghalula mubili witu wa nsoni nu ku ubika ususane na mubili wa lukumbu kutingila bwangato bwite bwa kwimbikila bikai.
\c 4
\cl Kikando 4
\p
\v 1 Uchasula, nshimwa sani nu bisakwitu, benywe u mboghimboghi sani nu nkumbu sani, mukokomeshe mu Mukota, nshimwa sani!
\p
\v 2 Nkwema Evodia nu nkwema Shintuke babe na mulenganya umoi mu Mukota.
\v 3 Nuwe, mwinda wani wa bulili, naki, nakusegha u bakashe, bo u balwanilagha musaghu musogha n'ine, nu ghamoi na Kelema nu bango belekeshi bani mu mulimo, nu mashina mabo meli mu kitabo cha kalamo.
\p
\v 4 Mu bogheboghe bindi binsai mu Kalagha, natenda lingo mubogheboghe.
\v 5 Busoshu bwinu bumanwe na bantu bansai Mukota eli bwighi.
\v 6 Mubaghe na mpupumwa sa kikai champa; tondo mu binsai muloshe nkasa sinu kweli Ghongo kutingila masegho nu kwema, ghamoi na kukasanila.
\v 7 Nu boolo bukutuka kweli Ghongo, bwa bwaghimba bulenganya bunsai, bukalanga mitima sinu nu milenganya sinu mu Yesu Kilishitu.
\p
\v 8 Bwashighala, bisakwitu, nu binsai bya bulili, bisai binaghanulwa, binsai byalingimana, binsai byenga, binsai byashimwa, binsai binatatwa, bya mponga, binembelwa Ghongo, bibe bya milenganya sinu.
\v 9 Bimwegheshibwagha, nu bimwongwagha ko ku neli, nu bimwamonagha ko ku neli, mubikite. Nu Ghongo wa boolo akaba ghamoi na benywe.
\p
\v 10 Naboghaboghagha bubibu mu Mukota, ku bibyo bimwakoshagha buno mughalule milenganya sinu ku neli; tondo mwindagha nkungu.
\v 11 Ta ku nkasa sani u nkukutendela ibyo, buno naboghelaboghela buno bu neli.
\v 12 Nkumana kwikala mu bukene nu nkumana kushighala mw'ighuma. Mu binsai na kunsai negheshibwe kw'ikuta nu kwongwa nsala, mu kuba mw'ighuma nu mukuba na bikeke.
\v 13 Nakosha binsai kutingila whoso ukumpa maghala.
\v 14 Kubuno mwakitagha busogha mu kusangila n'ine munubo wani.
\p
\v 15 Mukumana benywe binenene Bafilipi, mu ndingilo sa kweghesha musaghu musogha, mu kutuka kwani ku Makedonia, takuli Kanisa kampa kabagha nine mu bitondo bya kwesana nu bya kwelesha;
\v 16 Mwabagha benywe binene kubikita kubuno mwansingilagha byo kalai lyangendw'imbili, bibyo binabagha nabyo nkasa ku Tesalonika.
\v 17 Tabuno nkulonda nkaso; tondo nkulonda myanya nsogha sikutuka ku mweli.
\p
\v 18 Neleshibwe binsai, nu nili mw'ighuma; nisalilanagha na bisogha, mu kusekela byatukagha kwinu kutingila Epafolodito, anga ngenge, kisansa kimilwa na Ghongo, nu akokoma nacho.
\v 19 Nu Ghongo wani akabelesha bisogha binsai bimwite nabyo nkasa kuyangana na butumba bwaghe, ghamoi na lukumbu, mu Yesu Kilishitu.
\v 20 Kweli Ghongo witu nu Tata, aghanulwe nkiko nu nkiko! Amina!
\p
\v 21 Mukashe samba basanana bansai mu Yesu Kilishitu. Bisakwitu beli ghamoi nine babakasha samba.
\v 22 Basanana bansai babakasha samba, nu tanga babo beli mu numba sa Bwami.
\p
\v 23 Mpang' inene sa Mukota Yesu Kilishitu sikale mu mutima winu.