khx_reg/47-1CO.usfm

\id 1CO
\ide UTF-8
\h Bakolinto 1
\toc1 Bakolinto 1
\toc2 Bakolinto 1
\toc3 1co
\mt Bakolinto 1
\c 1
\cl Kikando 1
\p
\v 1 Polo, wamanilwe, kutingila bwangato bwa Ghongo, kuba ntumwa sa Yesu Kilishitu, nu munabo Sositene,
\v 2 nu ku Kanisa ka Ghongo keli ku Kolinto, nu kubabo bengeshibwe mu Yesu Kilishitu, ba manilwe babe basanana, nu bansai bakumana kunsai ishina lya Mukota witu Yesu- Kilishitu, Mukota wabo nu witu;
\p
\v 3 mweleshibwe mpang'inene nu boolo bikutuka kweli Ghongo Tata witu nu kweli Mukota witu Yesu Kilishitu!
\p
\v 4 Nakasanila Ghongo wani bindi binsai ku bitondo nu mpang'inene si mweleshibwe na Ghongo kutingila Yesu Kilishitu.
\v 5 Buno muwe mwisalilana na butumba bunsai bwa kitondo nu bulenganya,
\v 6 buteneneki bwa Kilishitu bimwikwa gha mweli.
\v 7 Kubuno tamwinde lukaso lwampa, mukulindila kuloshibwa kwa Mukota witu Yesu Kilishitu.
\v 8 Akab'imika kwikila busi bushinda, buno tamusungulwe busi bwa Mukota witu Yesu Kilishitu.
\v 9 Ghongo eli wa bulili, we u abamanile mwikale ghamoi na mwana waghe, Yesu Kilishitu Mukota witu.
\p
\v 10 Bisakwitu, nabema kutingila ishina lya Mukota witu Yesu Kilishitu, mube na kitondo kimoi, nu mulekanukaghe, tondo mube na mu mutima umoi nu mulenganya umoi.
\v 11 Tondo, bisakwitu, nongwile, ku kanywa ka bantu ba Kolowe buno kuli nsaki gha musambana.
\v 12 Nkushima nibabule buno n'omoi moi atende buno: ine, nili wa Polo! Nu ine wa Apolo! Nu ine wa Kefa! Nu ine wa Kilishitu.
\v 13 Kilishitu abeghanishibwe? Polo abakwilagha ku musalaba, ali mw'ishina lya Polo u mu mwapatishwagha.
\v 14 Nakasanila Ghongo kubuno nshapatishishe umoi ku benywe, ndi ta Kilipusi nu Gaushi.
\v 15 Kubuno muntu animbula buno apatishibwagha kw'ishina lyani.
\v 16 Na patisha lingo mibuto sa Setefana, nu kushila, nshikumana ndi napatishe ungo muntu.
\v 17 Kilishitu nta nsingile kupatisha, tondo mu kusansa musaghu musogha, nu ta kuba na mulenganya w'itenda, buno musalaba wa Kilishitu unaghaluka tughutughu.
\p
\v 18 Meghisha ma musalaba uli bughasanga ku bakushimila; tondo kubeshwe bonile bweli bya Ghongo.
\v 19 Lingo bwatililwe: Nkashililisha bulenganya wa balenganya, nu nkashimya bwenge bwa benge.
\p
\v 20 Kuni kweli mulenganya? Kuni kweli ba sanshi? Kuni kweli muntu wa nsaki wa bino bindi? Ghongo ntakitile bwenge bwa kino kisi buwe bughasanga?
\v 21 Kubuno kisi ghamoi na mulenganya waghe ta wamanile Ghongo mu bulenganya bwaghe, bwaswaghilagha Ghongo onie bakatisha kutingila bughasanga bwa kusansa musaghu musogha.
\v 22 Bayuda bakulonda bitangalo, nu Bagiliki bakushima bwenge;
\v 23 beshwe, tukweghesha Kilishitu wakwagha ku musalaba; mabala ku Bayuda, nu bughasanga ku batekatisha,
\v 24 Tondo bweli bwangato nu bwenge bwa Ghongo kubabo bamanilwe, babe Bayuda ali Bagiliki.
\v 25 Kubuno bughasanga bwa Ghongo bwaghimba bantu, nu bushoshu bwa Ghongo bwaghimba bantu.
\p
\v 26 Bisakwitu, mumanilile, ku bamoi ku benywe bamanilwe taku benge bengi mu mubili, nu taku bite maghala mengi, ali batumba bengi.
\v 27 Tondo Ghongo a sombolile bintu bya bughasanga bya kisi buno abulughanye benge; Ghongo a sombolile bintu byatughutughu bya kisi buno abulughanye bite maghala;
\v 28 Ghongo asombolile bintu bya bulya bulya bya kisi nu bikubengwa, nu kubiteli ko, bishimye bibyo byeli gho,
\v 29 kubuno takweli muntu unitata kweli Ghongo.
\v 30 Tondo kutingila we u mu mweli, mu Yesu Kilishitu, u wakitilwe na Ghongo bwenge bwitu, bulili nu kwisanana, nu bukandulwa,
\v 31 kubuno anga bwatililwe: Olya ukw'itata, intatile mu Mukota.
\c 2
\cl Kikando 2
\p
\v 1 Bisakwitu kwine, gha nendagha kwinu, kubasambalila buteneneki bwa Ghongo, nshendagha n'itenda lingi ali lya bwenge.
\v 2 Buno nshabagha na makengelo ma kumana kingo kikai, ndi ta Yesu Kilishitu, nu Yesu Kilishitu wakwagha ku musalaba.
\v 3 In'inene nabagha bwighi na benywe mu busoshu, mu kukwa boba, nu mu kuyungwayungwa bubibu;
\v 4 nu kitondo chani, nu meghesha mani ta mabagha mighanikisho bya bwenge, tondo kulosha Muusa nu bwangato,
\v 5 buno lukatisho lwinu lukokomele, ta mu bwenge bwa bantu, tondo bwangato bwa Ghongo.
\p
\v 6 Nu bwenge bu tukusansa ku bakatisha, bwenge buteli bwa bino bindi, ali bami ba kino nkiko, babo bakashililishwa,
\v 7 kusansa bwenge bwa Ghongo, kindo nu bya bisilwe, bi twabikindwe na Ghongo kalai ku lukumbu lwitu,
\v 8 bwenge bu takumanililwa na bami ba seno nkiko, buno, ndi banaumanile, ta banitile Mukota wa lukumbu ku musalaba.
\v 9 Tondo, anga bwatililwe, u bikai bi tamonekagha ko na liso, bite'ongubwako na kutui, nu bit'ingilagha mu mutima wa muntu, bikai bya bikilwagha ba bashima Ghongo.
\p
\v 10 Ghongo atuloshagha byo kutingila Muusa. Kubuno Muusa u kumanilila binsai, nu byeli mwa munda na Ghongo.
\v 11 Ku bantu, nai ukumana mulenganya wa muntu, ndi ta mutima wa muntu weli mu we? Nu ubo nubo, muntu takumana milenganya sa Ghongo, ndi ta Muusa wa Ghongo.
\v 12 Nu beshwe, ta tweleshibwe muusa wa kisi, tondo Muusa ukutuka kwa Ghongo, kubuno tumane bya tweleshishe Ghongo kutingila mpang'inene saghe.
\v 13 Nu tu kubitenda ta ghamoi na matenda mengi makweghesha bwenge bwa bantu, tondo ghamoi na bikweghesha Muusa, mu mutendeshi wa Muusa ku bintu bya Ghongo.
\v 14 Tondo muntu uli anga nama ntaneleshibwa bikai bya Muusa wa Ghongo, kubuno byeli bughasanga kuwe, nu nta nabimana, kubuno Muusa u ukubimana.
\v 15 Muntu wite Muusa wa Ghongo, akughaya binsai, nu ntakughayibwa na muntu.
\v 16 Buno, nai wamanile mulenganya wa Mukota, kubuno amwegheshe? Nu beshwe, twite mulenganya wa Kilishitu.
\c 3
\cl Kikando 3
\p
\v 1 Bisakwitu, ine, nshatendagha na benywe anga bantu betite muusa, tondo anga bite mubili, anga bana beli mu Kilishitu.
\v 2 Nabamomyagha, t' indya lyanaka, buno tamunalikosha lelo, kubuno mucheli bantu ba mubili.
\v 3 Ubo, gha sambana bamoi ku benywe kuli lughi nu nsaki, tamuli ba mubili, nu ta mukutabanga anga muntu?
\v 4 Ongwa umoi atenda: Ine, nili wa Polo! Tamu bantu?
\p
\v 5 Nai lino u Apolo, nu nai u Polo? Bakiti, kubatingila u mu mwakatishishe, kuyangana na bu beleshibwagha na Mukota.
\v 6 Ine nashikagha, Apolo asansilaha masi, tondo Ghongo u wakushagha,
\v 7 Ku buno t'olya ukushika u waghimbana, ali lya ukusansila masi, tondo Kalagha u kukusha.
\v 8 Olya ukishika nu olya ukunsansila masi bigheshe, nu nawe ukakana kuyangana na mulimo waghe.
\v 9 Kubuno tuli bakiti ghamoi na Kalagha. Benywe mul'iswa lya Ghongo, numba sa Ghongo.
\p
\v 10 Kuyangana mpang' inene si neleshibwagha na Ghongo, natimagha kibansa anga mobaki, ungo obakagha mwicho. Tondo n'omoi alole bwa bobakagha.
\v 11 Kubuno ntaku muntu unatima kingo kibansa kutinga cha chatimwagha, u Yesu Kilishitu.
\v 12 Nu, ndi muntu obaka mu kibansa na nolo, na bikulo, na makoi m'imbei linene, na miti, bisughu, mulimo wa nawe ukaloleka ko;
\v 13 buno mu musi ukamanililwa, buno ukatinga mu kaya, nu kaya kakalosha bulili mulimo w'umoi moi.
\v 14 Ndi mobako wa muntu wimala busogha mu kibansa, akeleshibwa kibhu.
\v 15 Ndi mobako wa muntu waya, akashimisha kibhu chaghe; kuwe, akona, tondo, anga watingagha mu kaya.
\p
\v 16 Tamukumana buno muli numba sa ku kumbamila sa Ghongo, nu Muusa wa Ghongo weli munda na benywe?
\v 17 Ndi muntu asambula numba sa kukumbamila Ghongo, Ghongo akamusambula; kubuno numba sa kukumbamila Ghongo wa sanana, u nu benywe abo.
\p
\v 18 Muntu ntiyengelele w'inene: Ndi umoi ku benywe alenganya buno eli mwenge mu bino bindi, asuse mughasanga inga aba mwenge.
\v 19 Kubuno, bwenge bwa kino kisi, u bughasanga kweli Ghongo. Nu lingo bwatililwe: Aku kulumana benge mu bukongobanya bwabo.
\v 20 Nu lingo, Mukota akumana milenganya sa benge, akumana buno seli tughutughu.
\p
\v 21 Muntu itatilaghe bantu; buno binsai byeli binu,
\v 22 ndi Polo, ndi Apolo, ndi Kefa, ndi kisi, ndi kalamo, ndi lukwo, ndi bitondo bya buno busi, ndi bitondo bikashwa.
\v 23 Binsai bili binu, nu muli ba Kilishitu, nu Kilishitu eli wa Ghongo.
\c 4
\cl Kikando 4
\p
\v 1 Beshwe tukulolwa ko anga bakiti ba Kilishitu, nu bimalila bindo bya Ghongo.
\v 2 Byaseghwa ku Wakwimalila: Abe wa bulili.
\v 3 Kw'ine, nshikukwa boba ku ghayibwa na benywe, ali tulubinali twa muntu. Nu nshikwighaya in'inene kubuno nindola nshite kitondo;
\v 4 Tondo ta kobo ukunabinde wa bulili. Olya ukunaghya u Mukota.
\v 5 Uchasula mwaghye muntu ighilighili, kwikila kushwa kwa Mukota, ukabika gha mbugha binsai bya byabiswagha mu bulimaswa, nu akalosha milenganya sa mitima. Agho, nawe ukeleshibwa na Ghongo lwanso lwatunganana kuwe.
\p
\v 6 Bisakwitu, ku benywe u chasulagha nakita ibyo bitondo kw'ishina lyani nu lya Apolo, buno mutumane, nu musulukaghe bya byatililwe, nu umoi ku benywe abaghe na butumbitumbi.
\v 7 Ki chasula ntube anga bango? Nu ki kiuteleshibwe? Nu ndi weleshibwe cho, ki chasula wintata anga tweleshibwe cho?
\p
\v 8 Agho mwikuta kalai, agho mwise mweli batumba, kuko kutu tweli, mwise mwimalila bantu. Nu munashima kwimalila bantu ghamoi na beshwe!
\v 9 Tondo Ghongo, nalola buno, atukita tube, ntumwa, bashinda ku bantu, bemana kukwa, buno twabinde kalolesho mu kisi na baghenshi nu na bantu.
\v 10 Mu Kilishitu twaghalukile baghasanga; tondo benywe mweli bwenge mu Kilishitu; tweli basoshu, tondo benywe mwanaka. Mweleshibwa lukumbu nu beshwe twabengwa!
\v 11 Kwikila eno nkungu, twakwa nsala, twite mpusha, tukwenda munkanka; twanuba, twaba batingitingi;
\v 12 Twakutwa na kukita milimo na maboko mitu; kutukwa, twakasanila; kunubwa, twimila;
\v 13 kutulanywa, twatenda busogha; twaghalulwa anga ishala lya kisi, nu kikwalhu cha bantu kwikila lelo.
\p
\v 14 Ta kubitya nsoni u kunatilila bino bitondo; tondo kubakengesha anga bana bani banashima.
\v 15 Kubuno, gha munaba elefu ikumi mu Kilishitu, tamwite batata bengi, ine nababutagha mu Kilishitu kutingila musaghu musogha.
\v 16 Nabema mukite, bitukukita.
\v 17 Kubo nabasingilagha Timote, mwana wani unashimwa, nu wabulili mu Mukota; akabakengesha nsila sani mu Kilishitu, buni bu nkweghisha bantu kunsai mu Tunisa tunsai.
\p
\v 18 Bamoi bisalilana na butumbitumbi, anga nshinendile kwinu.
\v 19 Tondo mu bindi bikeke nike kwinu ndi Mukota ashima, nu nkamana, ta bitondo byabo umpanga, tondo nkalola ku bya bulumelume bwabo.
\v 20 Kubuno bukota bwa Ghongo tabukutuka mu bitondo, tondo mu bwangato
\v 21 Ki kimwashima? Nishwe kwinu na bususu, ali na lutundo nu mutima musogha?
\c 5
\cl Kikando 5
\p
\v 1 Bukongwibwa ko buno kwinu kuli matensha nu matensha meteli mu bilongo; buno umoi ku benywe ite mukashi w'ise.
\v 2 Nu mwisala na butumbitumbi! Nu benywe tamonganilwe buno wakitagha icho kitondo atibitwe!
\v 3 Kw'ine, gha ghansheli mu mubili, tondo mutima weli gho, n'aghayile kalai whoso wakitagha iche kitondo anga nabagha agho.
\v 4 Mw'ishina lya Mukota Yesu, benywe nu mutima mu kukulumana ghamoi na bwangato bwa Mukota witu Yesu,
\v 5 Muntu anga 'uso ashighililwe mu maboko ma Kahinga mubili waghe usendekete, buno mutima waghe wone busi bwa Mukota Yesu.
\p
\v 6 Tamunintata. Tamukumana buno lughagho lukeke lukughaya buntu bunsai?
\v 7 Mushimishe lughagho lwa kalai, buno mube buntu bwa kano kaluma. Kubuno ta mwite lughagho, buno Kilishitu pasaka situ, abinde kisansa.
\v 8 Tusekele kisaghulo, ta ghamoi na lughagho lwa kalai, ta ghamoi na lughagho lwa kwengelela nu lwa miyabuyabu, tondo ghamoi na tumpampa tutite lughagho lwa kwenga ali lwa bulili.
\p
\v 9 Na batilinde maluba mani buno mubaghe na bwinda na batensha,
\v 10 Nshatenda buno mwikalaghe ghamoi nabo batensha ba kino kisi, ali ghamoi na batughu, na bantu ba kunagha bya bene, ali ghamoi na bakwela basumbu; ku bungo bunaswaghile mutuke mu kisi.
\v 11 Lelo, binabatililagha, ta buno mubaghe na bwinda na muntu umoi ukwimana mwisakwinu, mutensha ali mutughu, ali ukwela basumbu, ali ukutuka bantu, ali mulefi, ali munai wa bya bene, ta kulya na muntu anga uso.
\v 12 Ki kinite buno nighaye beli kumbugha? Ta babo beli mu numba u bamunaghaya?
\v 13 Ba beli kumbugha Ghongo akubaghaya. Mutuche muntu mubi munkatighi na benywe.
\c 6
\cl Kikando 6
\p
\v 1 Umoi ku benywe, ntakongwana n'ongo, anenda kwich'itenda ku bete ba bulili ali ku basanana?
\v 2 Tamukumana buno basanana u bakaghaya kisi? Nu ndi ku benywe u mukaghayiba kisi, munalibana ku kala lubansa?
\v 3 Tamukumana buno tukaaghya baghenshi? Ki kikatulibana kukala mbansa sa bino binsai?
\v 4 Ndi mwite matenda ku bya kisi kino, buni bumwakata bantu beteli mu Kanisa babe bashushi binu!
\v 5 Nabitenda ku nsoni sinu. Nubo, taku muntu'moi mwenge ku benywe unakala itenda gha sambana bisakwabo.
\v 6 Tondo muntu atongana na mwisa kwabo, kuli batekatisha.
\p
\v 7 Agho ise bubi gha kuba kuli lubansa gha musambana. Ki chasula tamunube na bitondo bite bya bulili? Ki chasula tamwimilwe kunaghwa?
\v 8 Tondo benywe u bakukita mabi nu mukunagha; nu ku bisa kwinu u kumukukitila ibyo!
\p
\v 9 Tamukumana buno bantu babi tabak'ingila mu bukota bwa Ghongo? Mwengelelwaghe: Ali balimbya, bakwela basumbu, batensha,
\v 10 ali ba bak'winghalula bakashi, ali babo bakukita mabala, ali biimbi, ali batughu, ali balefi, ali bakutuka banabo, ali bakunagha bya bene, tabak'ingila mu bukota bwa Ghongo.
\v 11 Nubo u bwabagha bamoi ku benywe. Tondo mwoghishwe, tondo mwasanishwe, tondo mwaghansilwe ba bulili mw'ishina lya Mukota Yesu Kilishitu, nu kutingila Muusa wa Ghongo witu.
\p
\v 12 Nakaswa binsai, tondo binsai ta bya swagha, nakaswa binsai tondo nshikwishighilila niangatwe na champa.
\v 13 Malya meli ma nda, nu nda seli sa malya; nu Ghongo akashililisha ibyo binsai. Tondo mubili ta wa matensha. Weli kubushi bwa Mukota, nu Mukota eli kubushi bwa mubili.
\v 14 Nu Ghongo, watuchagha Mukota ku bakui, ku bwangato bwaghe akatutucha ku bakui.
\p
\v 15 Tamukumana buno mibili sinu u bighansa bya Kilishitu? Ndi inakata bighansa bya Kilishitu, nibighalule bighansa bya luwawa?
\v 16 Tobo! Tamukumana buno olya wayama na luwawa nti aba mubili umoi nawe? Buno, anga bwatendwa, abo babili bakaba mubili umoi.
\v 17 Tondo olya wimbika mu Kalagha nti aba na mutima umoi nawe.
\p
\v 18 Mutine matensha. Na bwaghi bunsai bwakita muntu, tabweli mu we; tondo olya wimbika mu matensha akitila bwaghi mubili waghe unsai.
\v 19 Tamukumana buno mubili winu weli numba sa kukumbamila sa Muusa Musogha weli munda ninu, umweleshibwagha na Ghongo, nu benywe mwise bantu ba ungo?
\v 20 Kubuno mwaghulilwe na bikulo bingi. Mughanule lino Ghongo mu mubili nu mu mutima winu, byeli bya Ghongo.
\c 7
\cl Kikando 7
\p
\v 1 Kwibyo bitondo bimwantililagha ko, nalenganya buno bu busogha ntu tubye ku mukashi.
\v 2 Mu kwindanga na matensha, na mulume abe na mughole waghe, nu mukashi abe na munachaghe.
\v 3 Mulume akitile mukashi waghe bwa bwashima nu mukashi akitile munache ubo nubo.
\v 4 Mukashi ntite iyakulo ku mubili waghe w'inene, tondo munache; nubo mulume ntite iyakulo ku mubili waghe w'inene, tondo mughole waghe.
\v 5 Ta munanilane, ndi ta ku lwango lumoi mu bindi bikeke, buno mube na nkungu sa masegho; lingo mukulumane, munashwa kusula Kaghinga abalingika.
\p
\v 6 Natenda ubo ta lukakisho, tondo kusungula.
\v 7 Inashimile balume bansai babe anga ine; tondo na muntu eleshibwe lukaso lwaghe na Ghongo, umoi bubuno nu ungo bubulya.
\p
\v 8 Ku babo batasongile nu ku basumbakashi, nababula buno bu busogha bikale buneli.
\v 9 Tondo ndi ta banakosha kwikala ubo, basonge; buno bu busogha kusonga kutinga kwi'ita na nkasa.
\p
\v 10 Ku babo basongile, nakakisha, nt'ine, tondo Mukota, buno mukashi alekanukaghe na munachaghe,
\v 11 (Ndi alekanukagha, ikale ubo asongwaghe ali balongane na munache), nu mulume atibitaghe mughole waghe.
\p
\v 12 Ku bango, ta Ghongo, ine nkutenda: Ndi mwisakwinu ite mukashi utekatisha, nu alonda kwikale nawe, amutibitaghe lingo,'
\v 13 Nu ndi mukashi ite mulume utakatisha nu ashima kw'ikala nawe, whoso mukashi ntatibite lingo munachaghe.
\v 14 Kubuno mulume u takatisha ana sanana kutingila mukashi waghe, nu mukashi utakatisha anasanana kutingila munache wakatishishe; ndi tobo bana binu ta banaba basanana, nu lelo basanana.
\p
\v 15 Ndi utakatisha ashima kulekanuka alekanuke; agho, mulume ali mukashi tabeli ba kulandana. Ghongo atumanile twikale mu boolo.
\v 16 Uwe mukashi ukumana buno ukonya munachobe? Ali mulume ukumana buno ukonia mughole wobe?
\p
\v 17 Cheli agho, nawe nawe atabange mu nsila samuloshishe Ghongo, kuyangana na bwa manilwe na Ghongo. Ubo u buunkukakisha Tunisa tunsai.
\v 18 Umoi amanilwe nu amonile ikale ubo; umoi amanilwe nu ntamonyilwe, ntimonyaghe.
\v 19 Kumonywa ali kutemonywa ta kitondo, tondo kukatilila nkakisho sa Ghongo u bunsai.
\v 20 Na muntu ashighale bwa bwabagha gha manwagha.
\v 21 Wamanwagha uli mukobe, ntughaneghane; ndi unashighililwa, sekela.
\v 22 Buno mukobe wamanwagha mu bukota, akandulwa na Mukota; nubo, nu muntu wakandulwa ise mukobe wa Kilishitu.
\v 23 Mwaghulwagha na bikulo bingi; mughalukaghe lingo bakobe ba bantu.
\v 24 Bisakwitu, na muntu ikale mu Ghongo bwa bwabagha gha managhwa.
\p
\v 25 Ku bikumi, nshite lukakisho lwa Mukota, tondo nite mulenganya, anga uneleshibwagha na Mukota lukogho nibe wa bulili.
\v 26 Lola lino bunalola busogha ku bino bindi bibibu byeli bwighibwighi; bweli busogha muntu ikale ubo.
\v 27 Wasongile mukashi umoi, ulekanukaghe nawe; ntwasongile ulondaghe mukashi.
\v 28 Ndi wasongile ntwakitile bwaghi nu ndi utemana mulume asongwa ntakita bwaghi; ndi kikumi chasongwa tachakita bwaghi; tondo abo bantu yungwayungwa mu mubili, nu nkulonda nibatuche mu ubo.
\p
\v 29 Lola bunkutenda, bisakwitu, buno bindi bi bikeke; kulingila lelo ba bite bakashi babe anga tabite bo,
\v 30 ba bakulila babe anga tabekulila, ba beli mu boghimboghi babe anga tabeli muso, ba bakughula babe anga tabite kena,
\v 31 ba bakukita bya kisi babe anga tabakubikita, kubuno, bitondo bya kisi bikutinga.
\p
\v 32 Tondo nkushima buno mughaneghanaghe. Olya utasongile, kulonda bitondo bya Mukota, buno aboghyeboghye Mukota;
\v 33 Olya wasongile akulonda bikai bya kisi, buno aboghyeboghye mughole waghe.
\v 34 Wasongilwe nu kikumi batingana; utasongwa ekulonda bitondo bya Mukota buno asanane mu mubili nu mu mutima; nu olya wasongilwe, akulonda bikai bya kisi buno aboghyeboghye munache.
\v 35 Natenda ubo ku byeli busogha kwinu; ta kubategha kategho, tondo ku matenda masogha buno mukitile Kalagha nkashi nu mukandwaghe na bingo bitondo.
\p
\v 36 Ndi muntu alola buno kutingya myaka sa kusongwa kwa kikumi chaghe bweli nsoni, ndi busogha amusongye, akite bwashima ntakita bwaghi, kusongya.
\v 37 Tondo olya washima nu kutenda mu mutima waghe, ta mu lukakisho buno kikumi chaghe kikale ubo, nti akita busogha.
\v 38 Nubo olya wasongya kikumi chaghe akita busogha, nu olya utakisongya akita busogha bubibu.
\p
\v 39 Mukashi akandwa na mulembe ndi munache echeli gho; tondo ndi munache a kwa, anasongwa lingo n'olya uwashima; cheligho bube mu Mukota.
\v 40 Mu mulenganya wani bunaba busogha ikale ubo. Nw'ine nkumana buno nite Muusa wa Ghongo.
\c 8
\cl Kikando 8
\p
\v 1 Kwibyo bya nama sakwelela basumbu, tukumana buno beshwe bansai twite mulenganya. _mulengenya ukulisha butumbitumbi, tondo lutundo u kwimasha muntu.
\v 2 Ndi muntu alenganya buno akumana kitondo, nti ntemana busogha bucheli.
\v 3 Ndi muntu ashima Ghongo, whoso u wamanwa nawe.
\p
\v 4 Bibyo bya kulya nama sa kwelela basumbu, tukumana buno takuli musumbu wampa mu kino kisi, nu kweli Ghongo umoi u mpanga.
\v 5 Kubuno ndi kuli byabumbilwe bikumanwa ba ghongo, kunaba mw'ighulu kunaba ghano ghansi anga bweli bulili ba ghongo bengi nu bakota bingi,
\v 6 tondo ku beshwe kuli Ghongo umoi, Tata, kwaghe u kutweli, nu Mukota umoi, Yesu Kilishitu, kutingila we binsai byeli, nu kutingila we nu beshwe tweli.
\p
\v 7 Tondo ghoso mulenganya taghuli ku bansanyai. Bamoi u bakumana buno musumbu eli gho, bakulya eso nama. sa kwela basumbu, makengelo mabo masoshu nti mabigha.
\v 8 T'indya u likutushighelesha bwighi na Ghongo; ndi tunalya lyo, ta twite kena, nu ndi tatwalya lyo, tatwinda kena.
\v 9 Mwindolagha busogha, tondo kushighililwa kwinu kunaghaluka ikoi lya kukitasha basoshu.
\v 10 Ndi muntu umoi akulola ko uwe wite mulenganya, wikalile nu kulya mu kasumilo, mukengelo ma ghoso mushoshu, tamakamwicha alye nama sakwelela basumbu?
\v 11 Whoso mushoshu ntakakwa kutingila mulenganya wobe, ghoso mwisakwinu wakwilindwe na Kilishitu.
\v 12 Mu kukita bwaghi ubo kuli bisakwinu, mukwita mutima wabo musoshu, nti mwakita bwaghi kweli Kilishitu.
\v 13 Uchasula ndi indya lina kitasha munitu, nilyaghe lyo.
\c 9
\cl Kikando 9
\p
\v 1 Nsheli mukandulwa? Nsheli ntumwa? Nshalolile ku Yesu Kilishitu Mukota? Tamweli mukolo wani mu Mukota?
\v 2 Ndi ku bango nsheli ntumwa, ku benywe nili we; kubuno muli kamanililo mu nkashi sani sa ntumwa mu Mukota.
\p
\v 3 Agho u ghankwitendela ku babo bankutalikila.
\v 4 Tatunakosha kulya ali kunywa?
\v 5 Twananilwa kwelekeshwa na mukashi weli anga mughole witu, anga bukukitagha engo ntumwa, nu mibuto sa Mukota, nu Kefa?
\v 6 Ali ine nu Balanaba tatunashigha milimo?
\v 7 Olya ukukita nkashi sa Sula ite maligho maghe? Nai olya unashika misabibu nu ntalya ku kighuma chagho? Ali nai mungele ukulanga ighimba ntanywa ku mabele maghe?
\p
\v 8 Ibyo binkutenda, byashighalila tughu mu bantu? Mulembe tawatenda ubo nubo?
\v 9 Kubuno bwatilwe mu mulembe wa Musa: Ntu shibe kanywa ka nkambu sikunanta mbuto. Ghongo ntakulola bitondo bya nkambu,
\v 10 Akubitenda ku beshwe umpanga? Naki, nti ku beshwe u kubyatililwagha buno olya ukulima na nkungo, alelamile, n'olya ukususula ngano alelamile kibhu.
\v 11 Ndi twashikagha kwinu bitondo bya mutima, bu bubibu kweleshibwa na benywe bikai bya kisi bya kutinga?
\v 12 Ndi bango beleshibwa byo na benywe, ta beshwe tun'eleshibwe byo? Tondo, tatweleshibwe byo; Tanga twinda binsai kubuno tunasula Musaghu musoghawa Kilishitu tausanswe.
\v 13 Tamukumana buno bakukita nkashi sa Ghongo, bakulishibwa naso, nu bakweghesha mu Kanisa bakutulwa?
\v 14 Mukota nuwe akakisha babo bakusansa Musaghu musogha, balile mugho.
\p
\v 15 Kwine, nsheleshibwe kena kwibyo, ta buno nkubisegha u kunabatilinde ubo; kubuno bweli busogha nikwe kutinga kwighelesha lukumbu.
\v 16 Kubuno ndi nkusansa Musaghu musogha, ku neli, ta kwiyelesha lukumbu, tondo nema kubukita, musambo ku neli ndi ninda kusansa Musaghu musogha!
\v 17 Ndi nabikukita na mutima musogha, nite indigho, ndi ta kushima kwani, nti mushigho u ubanecha.
\v 18 Indigho lyani u ki? Kusansa bulya Musaghu musogha, nu takweleshibwa kena anga Wakusansa Musaghu musogha.
\p
\v 19 Kubuno, bunashighililwa ku bansai, nimbikile mukiti wa bansai, buno nibe na bantu bengi.
\v 20 Ghamoi na Bayuda, nabagha anga Muyuda, buno nilhute; ghamoi na beli mu melembe, anga olya weli mu mulembe (nu nsheli mu mulembe), buno nilhute beli mu mulembe;
\v 21 ghamoi na betite mulembe anga olya utite gho (anga nshite mulembe wa Ghongo, mu kuba mu mulembe wa Kilishitu), buno nilhute betite mulembe.
\v 22 Nabagha musoshu ghamoi na basoshu, buno nilhute basoshu. Nimbikile muntu wa bansai buno n'onie bamoi kubo.
\v 23 Nkukitila Musaghu musogha bino binsai buno neleshibwe kibhu.
\p
\v 24 Tamukumana buno ba bakwenda lubilo mu mulungu, bansai bakwenda lubilo, tondo umoi u ukukinda? Mwende lubilo buno mukinde.
\v 25 Babo bekwenda bakulwana, bakwinanya bingi, nu bakukita uibyo buno eleshibwe nkumbu sitakwindisha; tondo beshwe tukukita ubo ku nkumbu sa milyalya.
\v 26 Ine lino, nkwenda lubilo, ta makina; nku lwana, ta buno na lumpumpu;
\v 27 Tondo, nanubya mubili wani, nu naukututya, kubuno mu kushila ku sansila bango Musaghu musogha, ninanwe.
\c 10
\cl Kikando 10
\p
\v 1 Bisakwitu, mwindaghe kumana buno batata bansai babagha mu lumbhu, nu bendagha nu kusoka kitatenge,
\v 2 bapatishwagha mu Musa mu lumbhu nu mu kitatenge,
\v 3 balyagha indya limoi lya kutuka kwa Ghongo,
\v 4 Banywagha bansai masi ma kutuka kwa Ghongo, banywilagha mw'ikoi lya sanana lya bayangagha, nu il'ikoi, u lyabagha Kilishitu.
\v 5 Tondo bengi kubo ta baswaghilagha Ghongo, kubuno bakwilagha mu kalula.
\p
\v 6 Nu ibyo bitondo byatingagha kubuno bitwegheshe, buno tubaghe na milenganya mbi, anga bbubabagha naso.
\v 7 Mwelaghe lingo, anga bamoi kubo, anga bwatililwe: bantu bikalagha ghansi buno balye nu kunywa; lingo bimalukagha nu kumina.
\v 8 Ntwinshighililaghe mu matensha, anga bwishighililagha bamoi mumo, nubo bakwagha elefu makumi mabili nu basatu ku kindi kimoi.
\v 9 Tughelekaghe Mukota, anga bu bamwelekagha bamoi kubo, batubwagha na malighi.
\v 10 Monganile lingo, anga bonganagha bamoi kubo, bashishilishwagha na musambya.
\p
\v 11 Ibyo bitondo byabikilagha buno bilole, nu byatilwagha buno bitwegheshe beshwe bika mu bindi bishinda.
\v 12 Agho lingo, olya windola buno imala, alole busogha anashwa kuwa!
\v 13 N'igheleko linsai lyeli ku bantu bansai, nu Ghongo weli wabulili, ntakimila mughelekwe kutinga maghala minu; tondo ghamoi n'igheleko akalosha nsila sa kutuka mulyo, kubuno mulimile.
\p
\v 14 Nshimwa sani, uchasula, mutine kwela basumbu.
\v 15 Nkutenda ku bantu bite mulenganya; mughaye benywe binene binatenda.
\v 16 Kaata ka tukukasanila, ta kusangila mikila sa Kilishitu? Kampampa ka tukuketulaketula, takusangila mubili wa Kilishitu?
\v 17 Ubo bweli kampampa kamoi, ku beshwe beli bengi, twakitwa mubili umoi; buno twasangila kampampa kamoi.
\p
\v 18 Mulole Baisilaeli mu mubili; Babo bakulya nkaso ta bakomya na kasasa?
\v 19 Nitende buni lingo? Nama sa kwelela basumbu seli kiki, nu musumbu u kiki? Taku kena.
\v 20 Natenda buno byakwela basumbubi bya basumbu, nu ta bya Ghongo; tondo, nshikushima mukomye na basumbu.
\v 21 Tamuna kosha kunywa mu kaata ka Mukota, nu ku kaata ka basumbu; ta munalya ku bya Mukota, nu ku bya basumbu.
\v 22 Tukulonda kukunja mishibu sa Mukota? Twamughimba maghala?
\p
\v 23 Binsai bimilwa, ta binsai u bisogha; binsai bimilwa, tondo ta binsai u bikwimasha muntu.
\v 24 Muntu ntalonde bisogha ku w'inene, tondo alonde byaswaghila ungo.
\v 25 Mulye binsai bikughushibwa mw'isoko, nu mwimbushaghe mu mitima sinu;
\v 26 Kubuno kisi cheli cha Mukota nu binsai byeli mw'icho.
\v 27 Ndi utakatisha akumana nu ndi washima kwenda, lya binsai biwaloshibwe, nu w'imbushaghe ku kena mu mutima wobe.
\v 28 Tondo ndi muntu akubula: Bibino byeli bya kwela basumbu! Ulyaghe, kubushi bwa olya wakukengeshagha nu ku makengelo ma mutima wobe.
\v 29 Nkutenda ghano, ta ku makengelo ma mutima wani, tondo wongo. Ki chasula, kushighililwa kwani kwaghibwa n'ongo muntu?
\v 30 Ndi nalya na mboghowmbogho, ki chasula natukwa kw'indya linaboghelaboghela?
\p
\v 31 Aba malya, ali mwanywa, ali mwakita kingo kitondo, mukite cho mu lukumbu lwa Ghongo.
\v 32 Mubaghe ikitalo ali ku Bagiliki, ali ku Yuda, ali ku Kanisa ka Ghongo,
\v 33 Anga nw'ine nkukita bunsai ni boghyeboghye bantu bansai, ta ku byeli bisogha ku neli, tondo ku bengi buno bone.
\c 11
\cl Kikando 11
\p
\v 1 Mukite binkukita anga n'inengo bunkukita bya Kilishitu.
\p
\v 2 Nabatata buno munkukengela ku binsai, nu mwakatilkila meghisha mani anga bunabeleshagha mo.
\v 3 Nkushima tondo buno mumane buno Kilishitu u mwami wa muntu unsai, mulume u mwami wa mukashi, nu Kalagha u mwami wa Kilishitu.
\v 4 Na muntu u kusegha ali akulisha bulenganya, nu itwe lyabukilwa, nti abenga mwami waghe.
\v 5 Na mukashi unsai, ukusegha ali ukulisha bulenganya, ndi itwe talyakukindwe, nti abenga mwami waghe; nti ise anga wabeghwa.
\v 6 Kubuno ndi mukashi ntabukinde itwe, abeghwe. Nu ndi seli msoni ku mukashi kubeghwa, abukile itwe;
\v 7 Mulume ntema kubukila itwe, kubuno asusa Ghongo nweli lukumbu lwaghe, tondo mukashi eli lukumbu lwa mulume.
\v 8 Bulili, mulume ntatukagha mu mukashi, tondo mukashi u watukagha mu mulume.
\v 9 Nu mulume ntabumbwagha ku kubushi bwa mukashi, tondo mukashi u wabumbilwe ku bushi bwa mulume.
\v 10 Uchasula kutingila nteko sa baghenshi, mukashi ema kuba na kama ka bwangato bwi nene we.
\p
\v 11 Tondo, mu Mukota, mukashi ntanaba ghete mulume, ali mulumu ntanaba ghete mukashi.
\v 12 Kubuno, anga bwatukagha mukashi mu mulume ubo nubo mulume eli gho kutingila mukashi, nu binsai byatuka kuli Ghongo.
\v 13 Mughaye benywe binene; bwaswagha mukashi aseghe Ghongo nw'itwe ntalyabukilwye?
\v 14 Ntungo nuso satweghesha buno mulume ntema kuba na nshuli ningi,
\v 15 tondo bweli lukumbu ku mukashi waghe kuba naso, kubuno eqleshibwe nshuli sibe sa kubukila itwe?
\v 16 Ndi muntu ighanya nu kunana ubo, beshwe nu Tunisa twa Ghongo tatwite iso myanya.
\p
\v 17 Mukubelesha seno toli, nshikubatata, kubuno mu misanganano sinu, tamukulonda mube basogha, tondi mwaghaluka babi mwa bubibu.
\v 18 Nu tanga, nkongwa buno mu musanganano sinu mweli malekanuko, _nimila bimoi,
\v 19 tondo, kwema kube bintucha ku benywe, inga babo bakatisha bamanililwe munkatighi na benywe.
\v 20 Gha mukukulumana, tabuno kulya indya lya Mukota;
\v 21 kubuno, mwa mu kulya, na muntu ukutola indya lyaghe, nu umoi akwa nsala, nu ungo alewile.
\v 22 Ta mwite mashumba ma kulila nu kunywila mo? Ali mu kwenegha Kanisa ka Ghongo, nu mw'itya nsoni ku babo betite kena? Nkababula buni? Ni batate? Kwibyo, nshi kubatata.
\p
\v 23 Kubuno, neleshibwagha na Mukota, bya binabegheshagha: Buno Mukota Yesu, mukindi chesanaghwa mo, atolagha kampapa,
\v 24 nu, kushila ku kasanila, akaketulaghaketulagha, nu kutenda: whono u mubili wani waketulwa ketulwa ku benywe, mukite buno ku makengelo mani.
\v 25 Nubo, mu kushilagha kulyaindyak l'igholigholo, atolagha kaata, nu kutenda: kaata kano u kununsana mu mikila sani; mukite buno mu makengelo mani mu kungu insai bumukanywagha ko.
\v 26 Kubuno kungu insai gha mukalya kampapa nu kunywa kano kaata, mukasansa lukwo lwa Mukota kwikila gha kakuluka.
\p
\v 27 Uchasula olya walya kano kampapa nu kunywa kaata ka Mukota nu ntatunganana, nti akita bwaghi ku mubili nu mikila sa Mukota.
\v 28 Na muntu indole w'inene, gha kulya kampapa nu kunywa kaata;
\v 29 buno olya walya nu kunywa nu ntakumanilila busogha mubili wa Mukota, nti alya nu kunywa lwagyo lwaghe w'inene.
\v 30 Uchasula munkatighi na benywe mwasangwa tusokoluma nu basambi, nu bengi bakwile.
\v 31 Ndi tatwighayagha beshwe b'inene, tatunaghayibwe lingo.
\v 32 Tondo ghatukughayibwa, nti twapundwa na Mukota, kubuno tunashwa kughayibwa ghamoi na kisi.
\p
\v 33 Agho bisakwitu, ghamukukulumanila kw'indya, mulindilane.
\v 34 Ndi umoi akwa nsala, alile kwaghe kubuno mwa mu kukulumana munashwa kwimbulutila lughayo. Bingo bitondo nkabishililisha mu kwika kwani.
\c 12
\cl Kikando 12
\p
\v 1 Kubibyo bya nkaso sa Ghongo, nshikushima, bisakwitu, mwinde kumana.
\v 2 Mukuma buno gha mwabagha betekatisha, mwishighililagha kubulutwa na byeko bitekutenda, anga bumwabagha mukwenda.
\v 3 Uchasula nkubabula taku muntu ndi akutenda kutingila Muusa wa Ghongo, unatenda: Yesu ashulindwe! Nu takwieli unakosha kutenda: Yesu u Mukota! Ndi takutingila Muusa musogha.
\p
\v 4 Kuli nkaso ningi, tondo Muusa u umoi;
\v 5 milimo sa Ghongo seli ningi, tondo whoso Mukota umoi;
\v 6 misinga seli ningi mikolo, tondo Ghongo umoi ukwanganya so mu bansai.
\p
\v 7 Nawe weleshibwe Muusa ukukita nkashi ku busogha bwa bansai.
\v 8 Ubo, umoi eleshibwe na Muusa kitondo cha bulenganya; ungo kitondo cha kumanilila, kutuka k'oso Muusa;
\v 9 ungo, lukatisho, kutingila k'whoso Muusa, k'ongo lukaso lwa kulamya, kutingila whoso Muusa,
\v 10 ungo, lukaso lwa kukita bitangalo, ungo kukita bulenganya; ungo kumanilila bya mitima; ungo mitendeshi ningi, kwatula mitendeshi.
\v 11 Whoso Muusa umoi u ukukita ibyo bitondo, mu kubibeghanisha na muntu bwa bwashima.
\p
\v 12 Kubuno, anga mubili umoi nu bighansa bingi, nu bighansa binsai bya mubili, binaba bingi, byakita mubili umoi, nubo mu Kilishitu.
\v 13 Buno, beshwe bansai twapatishibwe mu Muusai umoi, buno tube mubili umoi, banaba ba Yuda, banaba Bagiliki, banaba bakobe, banaba ba bakandulilwe, nu beshwe bansai twanywile whoso Muusa umoi.
\p
\v 14 Nu mubili ta kighansa kimoi, tondo bighansa bingi.
\v 15 Ndi kughulu kunatenda: Buno nshili kuboko, sheli wa mubili, ta wa mubili k'obo?
\v 16 Nu ndi kutuyi kwatenda: Buno nshili liso, nsheli wa mubili, talyeli lya mubili k'obo?
\v 17 Ndi mubili unsai unabinde liso, tunongwile buni? Ndi unabinde unsai kutui, tunongwile bumba buni?
\v 18 Ghano Ghongo abikile kighansa kimoi kimoi mu mubili bwa bwashima.
\v 19 Ndi binsai binabinde kighansa kimoi, buni bunabinde mubili?
\v 20 Lola lino, kweli bighansa bingi nu mubili umoi.
\v 21 Liso talinabula kubokoo: Nshite nkasa sobe; ali itwe kubula manshinshi: Nshite nkasa sinu.
\v 22 Nu tondo, bighansa bikumonekagha angambya tughutughu u bite nkashi nene;
\v 23 nu bitwabenga ku mubili, twabikumbilila busogha. U bubo bighansa bitu bitakughanswa, u byashimwa bwa bubibu,
\v 24 nu bighansa bitu bisogha, tabite nkasa. Ghongo abumbile mubili mu kwelesha lwanso lunene ku bibyo bindagha lo,
\v 25 buno kubaghe malekanuko mu mubili, tondo bighansa binsai bikumbililane.
\v 26 Nu ndi kighansa kimoi cha nuba, bighansa binsai binube ghamoi nacho; Ndi kighansa kimoi chanswa, bighansa binsai bi bogheboghe ghamoi nacho.
\p
\v 27 Mweli mubili wa Kilishitu, nu muli bighansa byaghe, numoi kibe chaghe.
\v 28 Nu Ghongo imikile mu Kanisa batangi, ntumwa, kuyanga abo balenganya, wa basatu beghisha nu kumbusa kwabo babo bite lukaso lwa kukita bitangalo, nu babo bite lukaso sa kulamya, lwa kukasha, lwa kwimalila bantu, lwa kutenda mitendeshi ningi.
\v 29 Bansai beli ntumwa? Bansai beli u balenganyi? Bansai u beli beghisha?
\v 30 Bansai bite lukaso lwa kukita bitangalo? Bansai bite lukaso lwa kulamya? Bansai bekutenda mitendeshi ningi? Bansai bekus'atula?
\v 31 Mulilile nkaso nsogha, nu nabaloshe nsila nsogha.
\c 13
\cl Kikando 13
\p
\v 1 Gha nkatenda mitendeshi sa bantu nu sa baghenshi, nu nshite lutundo, nili chuma cha kukengebela, ali ngoma sa kushuma.
\v 2 Nu gha nkaba na lukaso lwa kukita lwa kumana bikika, bumanililo bwa bindo binsai nu bwenge bunsai, nu ghankaba na lukatisho lwa kukukuma mindiko, ndi nshite lutundo, nti nili wa tughutughu.
\v 3 Nu gha nkabeghanya bikai byani binsai, mu kwelesha bakene indya, gha kashighilila mubili wani kuya, ndi nshite lutundo, ta bite kena kwani.
\p
\v 4 Lutundo ta lw'ighilighili, lwisalilana na busogha; lutundo talukulhutwa na bya bene, lutundo ta lukw'itata, ta lwite butumbitumbi,
\v 5 talukwengelela, ta lukw'indondela bisogha bwa binene, ta lwakushibuka, ta kughanilila mabi,
\v 6 talukuboghelaboghela mabi, tondo lukuboghelaboghela bya bulili;
\v 7 luku shighilila binsai, lukukatisha binsai, lukulelamila binsai, lukwimila binsai.
\p
\v 8 Lutundo talunakwa. Kumana bikika bukashila, mitendeshi sikakoba, mulenganya ukashimila.
\v 9 Kubuno tukumana bikeke, nu tukweghesha bikeke ku bikika,
\v 10 tondo gha kika bya sanana, bya bikeke bikashimila.
\v 11 Ghanabagha mwana, natendagha anga mwana, nalenganyagha anga mwana, namanagha anga mwana; gha nabinde mukulu, nashimishishe binsai bya bwana.
\v 12 Lelo tukulolela mu kiyobo, anga mu bulimaswa, tondo tukalola bwighibwighi; lelo nkumana bikeke, tondo nkamana anga bunamanwagha.
\v 13 Lelo lino, bino bitondo bisatubyeli: Lukatisho, malelamilo, lutundo; tondo chaghimba binsai kw'ibyo bisatu u lutundo.
\c 14
\cl Kikando 14
\p
\v 1 Mulonde lutundo. Mulondeleshe nkaso sa Ghongo, tondo tanga sa kumanilila bikika.
\v 2 Buno, olya ukutenda mu mutengeshi nta kutenda ku bantu, tondo ku Ghongo, kubuno ta kuli u ku mwongwa, nu nti mutima u mwekutendela bya kindo.
\v 3 Olya ukutenda bikika akutenda na bantu; akubimasha, akubema, akubabonga.
\v 4 Olya ukutenda mu mitendeshi, akw'imwsha winene; olya ukutenda bikashwa akwimasha Kanisa.
\p
\v 5 Nkushima benywe bansai mutende mu mutendeshi, tondo lingo mutende bikika. Olya ukutenda bikika aghimba olya ukutenda mu mitendeshi, ndi whoso mushinda ntatula buno Kanisa k'imashwe.
\p
\v 6 Nu lelo, bisakwitu, nkaba musogha ku kiki, ndi nika kwinu nu mukutenda mu mitendeshi, ndi takwatula bya limbulwa, ali kutingila bulenganya, ali kusambala bikika, ali kutingila meghisha?
\v 7 Nu ndi bikai bitakutenda bikutucha'ishi ki, anga buno nshembe, ali kansambi, tabikutucha mashuki matingana, buni bukamanililwa bikutendwa mu nshembe ali mu kansambi?
\v 8 Nu ndi lukumbi lwatucha ishuki lutakumanilila, nayi uk'indanganda ku bita?
\v 9 Nu benywe, ndi kutingila mutendeshi, tamwatenda kitondo chalekanuka, buni bukamanwa bimukutenda? Mukaba anga bakutingya muusa.
\v 10 Mitendeshi sinaba ningi mu kisi, ta ku 'moi utekongwibwa.
\v 11 Nu lingo ndi nshikumana bwatenda mutendeshi, nkaba mutumboki ku olya u kutenda, nuwe nti aba mutomboki kwinu.
\v 12 Nu benye, bumukulondelesha nkaso sa Ghongo, mu kw'imasha Kanisa umukulonda mube naso ningi.
\p
\v 13 Uchasula olya ukutenda mu mutendeshi, akusegha buno eleshibwe lukaso lwa kulwatulwa.
\v 14 Kubuno ndi nkusegha mu mutendeshi, mutima wani weli mu masegho, tondo mulenganya wani weli bulya.
\v 15 Nikite lingo ki? Nkuseghela mu mutima, tondo nkasegha ghamoi na mulenganya; Nkembela mu mutima tondo nkemba ghamoi na mulenganya.
\v 16 Bungo, ndi wakasanila mu mutima, buni bwakakula Amina ghoso ukughanshwa mu bantu! Buni bwakakula Amina mu lukasanishi lobe, nu ntekumana biukute nda?
\v 17 Bulili, ukukasanila nkasanisho nsogha, tondo muninu nt'imala.
\v 18 Nakasanila Ghongo bu nkutenda mu mutendishi kubaghimba;
\v 19 tondo mu Kanisa, nkushima nitende bitondo bitano na mulenganya wani, buno negheshe bango, kutinga elefu ikumi sa bitondo mu matendeshi.
\p
\v 20 Bisakwitu, mubaghe banabaghibwa; tondo mu menge, mube bana, nu, ku bibyo bya kwaghya, mube bantu basanana.
\v 21 Bwatililwe mu mulembe: nti kutingila bantu ba ungo mutendishi, nu kutingi tunywa twa basumba u nkatendela na kino kilongo, nu ta bakanongwilila, ubwatenda Mukota.
\p
\v 22 Kubo, mitendeshi seli kamanililo ta ku bakatisha, tondo kubatakatisha; kubungo kutenda bikika, keli kamanililo ta ku batakatisha, tondo ku bakatisha.
\v 23 Ndi lingo, mu musanganano wa Kanisa kansai, bansai batenda mu mutendeshi, nu kw'ika bantu ba kilongo ali batikatisha, ta bakababula buno muli bashile?
\v 24 Tondo ndi bansai batenda bikika, nu kwika muntu utakatisha ali wa kilongo, nti asingwa na bansai nu nti aghibwa na bansai,
\v 25 byeli mu mutima waghe nti bya limbulwa, nti inda itwe gansi mu ku kukumbamila Ghongo, nu akasambalabwasibwasi buno Kalagha eli mu nkatighi na benywe.
\p
\v 26 Basakwitu, gha munakulumana bamoi ali bango, bite lwembo, mweghisha, begheshwa, bulimbulilo, mutendeshi emoi, kumana mutendeshi, binsai bikitwe mu kw'imasha bantu.
\v 27 Kweli babo ba kutenda mu mutendeshi, babili ali basatu, umoimoi, n'ongo aatule bitondo;
\v 28 ndi takuli wa kwatula, tubibe, nu na muntu itendye winene nu na Ghongo.
\p
\v 29 Ku babo bakutenda bikika, balili ali basatu batende, nu bango balonde bulili mu bikutendwa;
\v 30 nu ndi ungo wikalile alimbulilwa, mutangi akobe.
\v 31 Tondo umoimoi atenda bikika, inga bansai begheshwe nu bimikwe busogha.
\v 32 Mitima sa bakutenda bikika si kwongwilila babo bekutenda;
\v 33 Kubuno Ghongo ta Ghongo wa kabulhu, tondo wa boolo. Anga Tunisa tunsai twa ba basanana,
\v 34 buno bakashi babibe mu misanganano, kubuno tabimilwa kutenda mo; tondo bongwilile, anga bwatendwa mulembe.
\v 35 Ndi bashima kwanwa ku kitondo kilebe, babushe banachabo ku numba; kubuno ta bwaswagha mukashi atendela mu Kanisa.
\v 36 Ndi kwinu u kwatukilagha kitondo cha Kalagha? Ali kwinu binene u ku kikagha?
\v 37 Ndi umoi imbula buno ekumana bikika ali isalilana na Muusa, amane buno bininabatilila bili lukakisho lwa Mukota.
\v 38 Nu ndi muntu nte kulumana, ikale.
\p
\v 39 Kashi bisakwitu, mulondeleshe lukaso lwa kutenda bikika, nu munanilaghe muntu kutenda mu mitendeshi.
\v 40 Tondo binsai bikitwe mu busogha nu mu bulingingi.
\c 15
\cl Kikando 15
\p
\v 1 Nabakengesha, bisakwitu, musaghu musogha u nabasansilagha nu umwasekelagha umwakokomishe mugho,
\v 2 nu kutingila gho monile, nu ndi mwaukatilila anga bubo buna basansilagha; bungobungo munakatishishe tughu.
\p
\v 3 Nabagheshagha tanga anga nwine bunasekelagha bo, buno Kilishitu akwile ku bwaghi bwitu, anga bwatenda Bitondo bya Ghongo;
\v 4 akundwagha, nu mu bindi bisatu atukagha ku bakui anga bwatenda Bitondo bya Ghongo;
\v 5 nu'indoshagha ku Kefa, nu lingo kwabo ikumi na babili.
\v 6 Kushila agho indoshagha mu limoi ku bisakwitu maghana matano, bamoi kubo becheli nu bango bakwile.
\v 7 Ku shila agho indoshagha ku Yakobo nu ntumwa insai.
\v 8 Kumbusa kwabo bansai, indoshagha kw'ine nine, anga kimomyo chakwile;
\v 9 buno nili mukeke ku ntumwa, nu nshina manwa ntumwa, kubuno nanubyagha Kanisa ka Ghongo.
\v 10 Ku mpang'inene sa Ghongo nili bubo bu nili, nu mponga saghe ku neli ta sa tughu; nukilo, nakitagha nkashi kughimba bansai, t'ine, tondo mpang'inene s'inite kweli Ghongo.
\v 11 Kashi, inaba ine, banaba bo, lola bitukweghesha, nu u bibyo bimwakatishishe.
\p
\v 12 Tondo ndi bukwegheshwa buno Kilishitu atukile ku bakui, buni bunatenda bamoi ku benywe buno takuli kutuka ku bakui?
\v 13 Ndi takweli kutuka kubakui, Kilishitu nuwe ntatukagha ku bakui.
\v 14 Nu ndi Kilishitu ntatukagha kubakui, meghesha mitu meli ma bulya, nu lukatisho lwinu luli lwa bulya.
\v 15 Bwaloleka ko buno tweli bateneneki ba bwisa kweli Ghongo, buno twatenenekagha buno Ghongo atuchagha Kilishitu ku bakui, nu ntamutukishe ku bakui, ndi bakwile tabakutuka ku bakui.
\v 16 Nu ndi bakwile tabakatuka ku bakui, Kilishitu nuwe nta tukagha ku bakui.
\v 17 Nu ndi Kilishitu ntatukagha ku bakui, lukatisho lwinu luli lwa bulya, mucheli mu bwaghi bwinu,
\v 18 Nu kashi ba bakwile mu Kilishitu bashiminde.
\v 19 Nu ndi mwako kalamo umpanga u mutukulelamila mu Kilishitu, beshwe u twakwile musambo kughimba bansai.
\p
\v 20 Tondo lelo, Kilishitu atukagha ku bakui, u muntangi ku bansai bakwile.
\v 21 Kubuno, lukwo lwikile mu kisi kutingila muntu umoi, ubu nubo kutingila muntu umoi kutuka ku bakui nuko kwikile.
\v 22 nwang'obo bukukwa bansai mu Adamu, ubo nubo bansai bakaba gho mu Kilishitu.
\v 23 Tondo nawe mu kishiki chaghe. Kilishitu anga musoki, kumbusa kwaghe ba beli mu Kilishitu, gha kashwa.
\v 24 Nu kumbusa kwagho, kushila kwa binsai ku kika, gha kakulukisha bukota ku whoso Ghongo nu Tata, gha kashila kushililisha, kwikalilwa kwa bantu, bwangato bunsai nu maghala mansai.
\v 25 Kubuno ema kwangata kwikila nkungu sa kananta baghini baghe bansai.
\v 26 Mughini mushinda ukashililishwa, u lukhwo,
\v 27 Ghongo, bulili, abikile binsai munda na manshinshi maghe. Tondo, mu kutenda buno binsai byabikwa kunsi kwaghe, kutucha whoso wamweleshagha byo.
\v 28 Nu gha kabikwa binsai kunsi kwaghe, agho Mwana nuwe w'inene akaba kunsi kwa olya wamweleshagha binsai inga Ghongo aba binsai wimalila binsai.
\p
\v 29 Mu bungo, ki kinakita babo bakwipatisha ku bya bakwile? Ndi bakwile tabakutuka ku bakui, ki chasula bekwipatisha kubo?
\v 30 Nu beshwe, ki chasula mweno nkungu tweli mu kushika?
\v 31 Busi bunsai nabikilwa bwighi na lukwo, nkumana ubo, bisakwitu, kubuno benywe u lukumbu lwani mwa mu Yesu Kilishitu Mukota witu.
\v 32 Ndi mu miso ma bantu u munalwanagha na nama ku Efeso, ki chani kisogha chankulukila? Ndi bakwile tabakutukagha ku bakui, Tulye nu tunywe, kubuno munindu twakwe.
\v 33 Ta mwiyengelele, bwinda bubi, bukubighyagha myanya nsogha.
\v 34 Mwinsubye mo, anga bweli busogha, tamukite bwaghi lingo, kubuno bamoi ku benywe tabakumana Ghongo, nabitenda ku nsoni sinu.
\p
\v 35 Tondo umoi anabusha: Buni bukutukagha bakwile ku bakui, nu baku kulukagha na mubili ki?
\v 36 Mughasanga! Biukushika tabi kwaasa, ndi tabya kwa.
\v 37 Nu biukushika, ta mubili ukabutwa; tondo kighuma cha tughutughu, kinaba ngano, ali engo mbuto;
\v 38 Nu Ghongo akuselesha mubili anga bwa bwashima, nu ku mbuto insai akuselesha mubili waso.
\v 39 Mibili insai ta sasusana; tondo, ungo u mubili wa bantu, nu ungo uli wa nama sa maghulu manai, nu ungo u wa tusoni nu ungo u wa bisonga.
\v 40 Kweli nuso mibili sa kw'ighulu nu mibili sa ghansi, tondo kwenga kubibu kwa mibili sa kw'ighulu, bungo bweli mibili sa gansi.
\v 41 Bungo bweli chengeshi cha musi ungo bweli chengeshi cha mweshi nu ungo bweli chengeshi cha tumbalumbalu; bubo chengeshi cha kamabalumbalu ta chasusana na chengeshi cha kango kambalumbalu.
\p
\v 42 Ubweli nubo kutuka kubakui. Mubili u kukundwa weli wa kubola, nu mu kutuka ku bakui ta weli lingo wa kubola;
\v 43 wabengwa mu kukunda, watuka ku bakui na lukumbu; Wakundwa mu busoshu, watuka ku bakui wisalilana na maghala;
\v 44 wakundwa anga mubili wa nama, ukutuka ku bakui na mubili wa kw'ighulu. Ndi kweli mubili wa nama, kweli nugho mubili wa kw'ighulu.
\p
\v 45 Uchasulagha bwatilwa: muntu musoki Adamu, aghalukagha mutima weli gho. Adamu mushinda aghalukile Muusa u kwesana kalamo.
\v 46 Tondo cha cheli cha muusa ta kisoki, cha cheli nama tanga; Cha cheli cha muusa chashwa kumbusa.
\v 47 Muntu musoki, atukagha mw'itete, eli wa ghansi, muntu wa babili eli wa kw'ighulu.
\v 48 Bwasusa whoso wa ghansi, ubwasusa nobo ba ghansi; nu bweli wa kw'ighulu, u bweli nubo ba kw'ighulu.
\v 49 Ubo butwasusa ba ghansi, tukasusa nubo ba kw'ighulu.
\p
\v 50 Ubunatenda ubo bisakwitu, mubili nu mikilha tabikeleshibwa bukota bwa Ghongo, nu mubili wa kubola ta ukinda kubola.
\v 51 Lola, nababula kindo: ta tukakwa beshwe bansai, tondo beshwe bansai tukaghalulwa,
\v 52 Mu ku kebya nu kulambula, mwishuki lishinda lya tolompeta. Mulenge wa tolompeta ukongibwa ko, nu bakwile bak'imaluka nengo mibili, nu beshwe tukaghalulwa.
\v 53 Kubuno mubili wakubola ukashwala mubili utekubola, nu whoso mubili wa lukwo ukashwala ute wakukwa.
\v 54 Gha kashwala mubili wa kubola, ute mubili ute wa kubola, n'oso mubili wa lukwo ukashwala mubili ute wa lukwo, agho, kitondo chatililwe kikabelelela: Lukwo lwemwa, nu kukindwa.
\q1
\v 55 Ee lukwo, kuni kweli maghala mobe? Ee lukwo, kuni kweli lubabasho lobe?
\p
\v 56 Lubabasho lwa lukwo, u bwaghi; nu maghala ma bwaghi, u mulembe.
\v 57 Tondo Ghongo akasanilwe, ukutwelesha maghala kutingila Mukota witu Yesu Kilshitu!
\p
\v 58 Nubo, bisakwitu banashima, mukokomeshe, tamuyungweyungwe, mu kukitila Mukota nkashi nsogha, mu kumana buno nkashi sinu tasikakwa tughu mu Mukota.
\c 16
\cl Kikando 16
\p
\v 1 Ku bibyo bya mukongolo wa ku basanana, mukite, nu benywe, anga buna kakishagha mu Tunisa twa Galatia.
\v 2 N'umoi ku benywe busi by'iyinga abike kushinda cha chashima, chayangana na bite, buno alindilaghe kwika kwani mu kukulumanya oso mukongolo.
\v 3 Nu gha nkika, nkasinga bantu basombolilwe na maluba buno biche nkaso sinu ku Yelusalema.
\v 4 Ndi bunaba busogha nike kwinu in'inene, nti bakenda ghamoi n'ine.
\p
\v 5 Nkenda kwinu gha nkashila kutinga ku Makedonia, kubuno nkatinga ko.
\v 6 Nampu nkatingya bindi ghamoi ninu, ali nkikala ko bindi bya nsogho, buno mukanelekeshe ku nkenda.
\v 7 Lelo nsikushima nibalole ko mu kutinga, tondo nkushima nikale ko bindi bikeke, ndi Mukota ashima.
\v 8 Nkikala ku Efeso kwikila ku Pentekosite;
\v 9 kubuno neleshibwa nkungu nsogha sa kwika ko, nu baghini beli bengi.
\p
\v 10 Ndi Timote ika, mukite binsai buno akwaghe boba ku mweli kubuno akukita nkashi sa Mukota ang'ine.
\v 11 Muntu amubengaghe. Mwamwelekeshagha na boolo, buno ike ku neli, bushi nkumulindila ghamoi na bisakwitu.
\p
\v 12 Ku bya mwisakwitu Apolo, namuseghagha bubibu buno ende kwinu ghamoi na bisakwitu, tondo tabwabagha kushima kwaghe akite bo lelo; akenda ghakaba na nkungu nsogha.
\p
\v 13 Mwengeleshe, mukokomeshe mu lukatisho, mwabagha balume, mwinakye.
\v 14 Binsai bimukukita bikitwe ghamoi na lutundo!
\p
\v 15 Lingo lukakisho lunabelesha, bisakwitu. Mumane buno numba sa Setefanushi u nsoki ku bansai ba ku Akaya, nu imbikile bubibu mu kukitila basanana milimo.
\v 16 Mube nu benywe na lutundo ku bantu ang'abo, nu ku bansai bakukita nkashi anga eso.
\v 17 Naboghabogha kulola ku Setefanushi, Folotunatushi nu Akayukusu; u baneli nabo gha mu teli,
\v 18 kubuno baboghyaboghya mutima wani nu winu. Mumane kughansa bantu ang'abo.
\p
\v 19 Tunisa twa Asia twabakasha samba, Akila nu Pilisila, ghamoi na Kanisa ka mu numba sabo, kabakasha samba bubibu mu Mukota.
\v 20 Bisakwitu bansai babakasha samba. Mukashane samba benywe binene kutingila mpeshi nsogha.
\p
\v 21 Nabakasha samba, ine Polo, na kuboko kwani.
\v 22 Ndi muntu ntashima Mukota, ashulilwa! Malanata.
\v 23 Mponga inene sa Mukota Yesu sibe ghamoi na benywe!
\v 24 Lutundo lwani lweli ghamoi na benywe bansai mu Yesu Kilishitu.