khx_reg/46-ROM.usfm

\id ROM
\ide UTF-8
\h Baloma
\toc1 Baloma
\toc2 Baloma
\toc3 rom
\mt Baloma
\c 1
\cl Kikando 1
\p
\v 1 Polo, mukiti wa Yesu Kilishitu wamanwagha abe ntumwa, wasombolwagha asanse musaghu musogha wa Ghongo,
\v 2 walaghwagha kalai na Ghongo kutingila balenganya baghe mu kitondo cha Ghongo,
\v 3 chatenda ku Mwana waghe (wabutilwe mwa kibuti cha Daudi, mu mubili,
\v 4 nu kumanwa Mwana wa Ghongo ku bwangato kuyangana na Muusa wa sanana, kutingila kutuka ku bakui kwaghe), Yesu Kilishitu Mukota witu,
\v 5 ku 'we tweleshishwe mpang'inene nu butumangwa, buno twikile mwa mw'ishina lyaghe, mu kwimila busogha lukatisho lwa bilongo bansai,
\v 6 nu kubyo benywe nubo mwamanilwe na Yesu Kilishitu--
\v 7 nu ku bansai ku Loma, beli nshimwa sa Ghongo, bamanilwe babe basanana; Mpang'inene nu boolo mweleshibwe byo na Ghongo Tata nu Mukota Yesu Kilishitu!
\p
\v 8 Nakasanila tanga Ghongo wani kutingila Yesu Kilishitu ku benywe bansai, kubuno lukatisho lwinu lwamanwa mu kisi kinsai.
\v 9 Ghongo, u nkukolela mu mutima wani mu musaghu musogha wa Mwana waghe, bya ntenenekela buno nshikwinda ku bakengela,
\v 10 nkusegha mu masegho mani ma bindi binsai, buno mu kushima kwaghe, nibe na mboghimboghi sa kwenda kwinu.
\v 11 kubuno, nkushima nibalole ko, buno nibasambalile lukaso lwa sanana lwa Ghongo, buno mukokomeshe mu lukatisho,
\v 12 Ali tweleshibwe maghala, kutingila lukatisho lutwasangila, benywe nw'ine.
\v 13 Nshikushima mwinde kumana, bisakwitu, buno nkubagha na mulenganya wa kwika kwinu. Buno nimone bisogha ku mweli, anga ku bingo bilongo; tondo nangilwa kwikila lelo.
\v 14 Nite nkashi ku Bagiliki nu ku Bantu ba miyabuyabu, ku bantu ba milenganya ningi, nu ku batakulenganya.
\v 15 Ubo nite nkasa inene sa kubasansila musaghu musogha, ku benywe beli ku Loma.
\p
\v 16 Kubuno nshikukwila musaghu musogha nsoni; bweli bwangato bwa Ghongo ku kalamo k'olya wakatisha, ku Bayuda tanga, nu ku Bagiliki nubo.
\v 17 Kubuno muwe u mwalimbulindwe kw'isanana kwa Ghongo kutingila lukatisho nu nkatisho, anga bu bwatililwe: Wasanana akimala mu lukatisho.
\p
\v 18 Mishibu sa Ghongo sa limbulwa kw'ighulu ku bwaghi nu kubitasanana bya bantu, bakubisa bulili,
\p
\v 19 kubuno bi tunamana ku Ghongo, byalimbulwa bwasi kubo, Ghongo mu kubalosha byo.
\v 20 Ubo bintu bisogha bya Ghongo bitekumoneka ko, nu bwangato bya milyalya nu bu Ghongo bwaghe, bikumoneka ko kulingila kubumbwa kwa kisi, mu kulola ku binsai byakitile. Ta binendela myango,
\v 21 mu kumana Ghongo, tabamutatile anga Ghongo, nu tabamukasaninde; tondo bashiminde mu milenganya sabo, nu mutima wabo utekulenganya winginde mu bulimaswa.
\v 22 Kwitata buno beli balenganya, baghalukile bashile;
\v 23 Nu baghalukishe lukumbu lwa Ghongo utakakwa, mu bilimelime bya muntu u kakwa, tusoni, mu nama sa maghulu manai, nu mu nama sakwendela ku nda.
\p
\v 24 Uchasulile Ghongo abashighilinde mu bwaghi, kulembana na nkasa sa mitima sabo; nu ba benga bo binene mibili sabo.
\v 25 Bo, baghalulile bulili bwa Ghongo kuba bwisa, nu bakumbaminde nu kukitila milimo kintu kughimba Ghongo, wa kasanilwa mu milyalya. Amina!
\p
\v 26 Uchasulagha Ghongo abashighilinde mu nkasa sa bibi; kubuno bakashi babo bashighile bu bakuyamagha na balume nu kughalula butanakitwa mukashi.
\v 27 Nu balume babo nubo bashighile nsila sa bakashi, bingilinde kulimbyana balume binene kubo binene. Babo bakitile ubo, beleshibwe indigho lya bulasalasa bwabo.
\p
\v 28 Tabite mulenganya wa kumana Ghongo, Ghongo abashighilinde mu nsila sabo sa bushimishi, buno bakite bitondo bitaswagha.
\v 29 Bisalana na mabi mansai, kukalama, butughu, bwenge bubi, kushima bya bene, bwiti, nsaki, bwengelelo,
\v 30 kusomba, batulanya, bakutenda bubi, bakunana Ghongo, bisa nsaki, bakwindola, bisa kw'itata, bashingi ba bitondo, bisa kanywa, bisa kwitumbya, mighansanga, bakiti ba mabi, baghini ku babuti babo,
\v 31 batite milenganya, ba kughalukaghaluka, banani ba bilongo, tabite lukogho.
\v 32 Nu banaba bakumana lughayo lwa Ghongo, bakukita ibyo bemana kukwa, ta buno bakubikita umpanga, tondo beli na lwango lumoi na babo bakubikita.
\c 2
\cl Kikando 2
\p
\v 1 Ee muntu, unaba uwe nai, uwe ukughaya, ntuna kwilwa lukogho; kubuno mu kughaya bango, nti ukw'ighaya uw'inene. Kubuno ukughaya, ukukita ibyo nuwe.
\v 2 Tukumana buno, lughayo lwa Ghongo ku babo bekukita ibyo lwatuka mu bulili.
\v 3 Nu ukulenganya buno, e muntu, olya ukwaya ba bakukita ibyo nu akubikita, ukabembuka lughayo lwa Ghongo?
\v 4 Ali, wabenga butumba bwa busogha bwaghe, nkiki saghe nu kwindisha kwaghe, ntukumana buno busogha bwa Ghongo bwakicha mu kwisungula mutima.
\v 5 Tondo, mu bubibu bobe nu bwa mutima wobe utashima kughaluka, w'ikunsumanisha mushibu wa Ghongo busi bwa lusungyo lwa bulili lwaghe.
\p
\v 6 u kakulukisha muntu insai kutingila mikolo saghe.
\v 7 Kubikila kalamo ka milyalya ku babo, mu kukita bu sogha, bakulonda lwanso, lukumbu nu kutakukwa;
\v 8 Tondo konganwa kubibu nu kushibukila babo, ku mutima wa nsaki, beli baghini ku bulili nu bimila bi tatunganana.
\v 9 Munubo nu nsusu ku mutima wa muntu ukukita bubi, Bayuda tanga, nu ku Bagilikii.
\v 10 Lukumbu, lwanso, nu boolo k'olya ukukita busogha, ku Bayuda tanga nu ku Bagiliki!
\v 11 Kubuno kwa Ghongo, takuli bu ntoghole.
\p
\v 12 Bansai bakitagha bwaghi ghete mulembe bakakwa gheteli mulembe, nu bansai bakitagha bwaghi gheli mulembe bakaghibwa na mulembe.
\v 13 Tababo bekwongwilila mulembe u bisanana mu miso ma Ghongo, tondo ba bakukita byeli mu mulembe, ubakamanwa ba bulili.
\v 14 Bilongo betite mulembe, ndi bikukita bya byatilwa mu mulembe, beli, mulembe bo binene;
\v 15 Balosha buno nkashi sa mulembe satilwa mu mitima sabo, nu mulenganya wabo musogha, mu kuteneneka, nu milenganya sabo si kutalikilana ali kwitendela umoi kungo.
\v 16 Ubukaloleka ko, anga musaghu wani musogha, Ghongo akaghaya kutingila Yesu Kilishitu bitondo bya biswa bya bantu.
\p
\v 17 Uwe ukwimana Muyuda, wikalila mulembe, ukwitatila Ghongo,
\v 18 Uwe ukumana byashima, ukumana kulekanucha bikai, wegheshwa na milembe;
\v 19 uwe windola buno ukutabanja byuku, chengeshi ku babo beli mu bulimaswa,
\v 20 mweghesha wa baghasanga, mwegheshi wa bikongolo kubuno wite mu mulembe myanya sa bumanililo nu bulili;
\v 21 Uwe, u kweghesha bango, ntukwiyeghesha w'inene! Uwe ukweghesha bango bimbaghe, nu u kwimba!
\v 22 Uwe ukutenda munteshaghe, nu ukuntensha! Uwe wasomba byeko, nu ukwela byeko!
\v 23 Uwe w'inkita lukumbu lwa mulembe, wabenga Ghongo mu kubela mulembe!
\v 24 Kubuno ishina lya Ghongo lyeneghwa na benywe mu bilongo anga bwatililwe.
\p
\v 25 Kumonywa ku kusogha, ndi wayanga mulembe; tondo ta kusogha ndi wata mulembe
\v 26 Ndi utamonywile ayanga byatilwa mu mulembe, kwinda kumonywa kwaghe takukakatwa anga kumwonywa?
\v 27 Utamonywile bulili nu ukukita bya mulembe, nta ka kwaghya uwe wata mulembe, nu ukumana byeli mu mulembe nu kumonya?
\v 28 Muyuda ta whoso ukulolwa ko; nu kumonywa ta bwa kumoneka ko ku mubili.
\v 29 Tondo Muyuda, u whoso weli we mwa mu mutima; nu kumwonywa, u bubo bwa mu mutima, mu Muusa nu ta mu mutilo. Kughanula kwa whoso Muyuda ta kwatuka ku bantu, tondo kwa Ghongo.
\c 3
\cl Kikando 3
\p
\v 1 Ki chaswaghila Bayuda, ali ki u busogha bwa kumonyeshibwa?
\v 2 Buli bunene ku nsila insai, kubuno bitondo bya Ghongo beleshibwe byo tanga.
\v 3 Nu ndi bamoi kubo ta ba katisha, bwaghi bwabo bunashimya bulili bwa Ghongo?
\v 4 Tobo! tondo Ghongo ekumanililwa wa bulili, nu muntu unsai u wa bwisa, anga bwatililwe: Buno usangwe wa bulili ku bitondo byobe, nu wakindagha gha bakukughaya.
\p
\v 5 Tondo ndi kwinda kusanana kwitu ndi kwimika kusanana kwa Ghongo, tutende ki? Ghongo nta sanana mu mushibu waghe? (nkutenda anga bantu).
\v 6 Tobo! buni bwakaghaya kisi we Ghongo?
\v 7 Nu ndi, ku bwisa bwani, bulili bwa Ghongo bukumoneka ko ku lukumbu lwaghe, buni bunaghibwa lingo anga mwisa bwaghi?
\v 8 Ki kinasula nakita bubi nu busogha kimoneke ko, anga bamoi kubo bakutushingila bwisa, buno tukubitenda? Kwaghibwa kwabo kuli kwa bulili.
\p
\v 9 Ki lino! Tuli basogha?
\v 10 Tobo. Kubuno twaloshishe kalai buno bansai, Bayuda nu Bagiliki beli mu bukota bwa bwaghi, anga bwatililwe: Taku wa bulili, ta wampa.
\v 10 Kubuno, mu lukatisho lwa mu mutima u'mukumoneka kusanana, nu mu kwatula bili ku mutima u' ku kulutagha lonio,
\v 11 Taku mulenganya, ta wampa ukulonda Ghongo; bansai baabukile, bansai babulughanile;
\p
\v 12 taku wampa ukukita busogha, ta n'umoi;
\q
\v 13 Mwegho wabo uli nsinda sighulwa; ndame sabo sili sa kwengelela bango. Ku milomo sabo kuli busungu bwa nsoka;
\q
\v 14 kanywa kabo kisala bishulilo nu lubaba;
\q
\v 15 Bite maghulu masasha mu kwitila mikila;
\q
\v 16 busambya nu musambo byeli mu nsila sabo;
\q
\v 17 Tabakumana nsila sa boolo;
\q
\v 18 Mu miso mabo tabakukwa Ghongo boba.
\p
\v 19 Nu tukumana binsai byatendwa mu mulembe, akubula babo beli mugho, kubuno kanywa kansai kashiba, nu bansai bamanwe na Ghongo buno bantu ba bwaghi.
\v 20 Kubuno ta kweli ukasanana kutingila milimo sa mulembe, tondo nti kutingila mulembe u kweli kumana bwaghi.
\p
\v 21 Tondo, ghe teli mulembe u kweli bulili bwa Ghongo, bukutenenekwa na Mulembe nu balenganya,
\v 22 Bulili bya Ghongo kutingila lukatisho kweli Yesu Kilishitu ku bansai bakatisha, takweli kusombola.
\v 23 Kubuno bansai bakitile bwaghi, nu kwimwa lukumbu lwa Ghongo;
\v 24 Nu bansai bamanwa ba bulili ku mpang'inene, kutingila kalamo ka bulili keli mu Yesu Kilishitu.
\v 25 We u wabikwagha na Ghongo, ku tingila mikila saghe, buno abe kisansa ku babo bakakatisha, buno aloshe bulili bwaghe, kubuno ashighililagha bwaghi bwakitwagha kalai,
\v 26 buno aloshe bu bulili bwaghe lelo k'olya wamukatisha.
\p
\v 27 Ki uchakwitatila? Bwashilile ubo. Ku mulembe ki? Ku mikolo sa milembe? Aye, tondo ku mulembe wa lukatisho.
\v 28 Kubuno tukulenganya buno muntu asanana kutingila lukatisho, ta ku mikolo sa mulembe.
\v 29 Nu Ghongo eli tughu Ghongo wa Bayuda? Nteli nuwe wa Babilongo? Naki, eli nuwe wa bilongo,
\v 30 kubuno kweli Ghongo umoi, ukaghansa babo ba bulili, bamonywile nu batamonywile.
\v 31 Twashimya mulembe kutingila lukatisho? Tobo! tondo twimika mulembe.
\c 4
\cl Kikando 4
\p
\v 1 Tutende lingo buni ku Bulaimu tata witu, bya monagha kutingila mubili?
\v 2 Nu ndi Bulaimu amanwagha wa sanana kutingila mikolo, anitata tondo ta kweli Ghongo.
\v 3 Kubuno buni bwatenda kitondo cha Ghongo? Bulaimu akatishagha Ghongo, nw'ibyo byasulile aghanswa wa bulili.
\v 4 Tondo, ku ulya wakita mulimo, ndi alighwa, ta ku mpang'inene, tondo anga indigho lyaghe;
\v 5 Nu ulya utakita nkashi, tondo akatisha ghoso ukughansa babi, lukatisho lwa whoso lwa ghanswa lwa bulili.
\v 6 Tondo Daudi nu we alosha ighuma lya muntu waghanswa wa bulili na Ghongo nu ntakitile milimo.
\q
\v 7 Mboghimboghi ku babo bashighililwa mabi mabo, nu bwaghi bwabo bwakunikwa!
\v 8 Mboghimboghi sa muntu utaghansilwa bwaghi na Mukota.
\p
\v 9 Kashi ighuma lyeli umpanga ku bamonywa nu kubatamonywa? Kubuno tukutenda buno lukatisho lwaghanswagha kweli Bulaimu.
\v 10 Buni bwa ghansilwagha lo? Lwabusho ali kumbusa kwa kumonyeshibwa kwaghe? Abagha nte monywa nenshi.
\v 11 Nu eleshibwe kamanililo ka kumonya kabe anga kama ka kumughansa wa bulili keleshibwagha kutingila lukatisho, nu nte monywa, kubuno abe tata wa bansai betemonywa bakatisha, inga baghanswa ba bulili,
\v 12 nu tata wabamonywa, ta wabamonywa umpanga, tondo babo bakutabanga mu nsila sa lukatisho lwa tata Bulaimu nu nte monywa.
\p
\v 13 Kubuno, ta ku mulembe chasula Bulaimu ali ku kibuti chaghe eleshibwa mwandu wa kisi, nti kutingila lughanso lwa bulili lwa lukatisho.
\v 14 Kubuno ndi bisa mwandu bite gho kutingila mulembe nti lukatisho lweli lwa tughutughu. Nu indaghi nti lyashima,
\v 15 kubuno mulembe ukubuta mishibu, nu gheteli mulembe tagheli kukita bwaghi.
\v 16 Uchasula bisa mwandu bite gho kutingila lukatisho, kubuno kutingila mpang'inene, inga indaghi lyaba ku kibuti, ta ku kibuti kikuyanga mulembe, tondo kicho kite lukatisho lwa Bulaimu tata wa bansai anga bwatililwe:
\v 17 Nakwimikile ube tata wa bilongo bingi. Eli tata w'olya wakatisha, Ghongo, ukwelesha kalamo ku bakui, nu akumana byeli anga bitabagha.
\v 18 Mu malelamilo, akatishagha nu kuba tata wa bilongo bingi anga bwabulaghwa: Buno ubukaba kibuti chobe.
\v 19 nu kwinda kukutwa mu lukatisho ntikatile buno mukungu nu abagha na myaka ighana, Nu mughole waghe Sala abagha ta wa kubuta lingo.
\v 20 Ntendagha myango kw' indaghi lya mulaghagha Ghongo: tondo abagha na lukatisho maghala mu lukatisho, mu kughanula Ghongo,
\v 21 Nu abagha na ndemalilo buno bya bulwa bikaba.
\v 22 Uchasula aghanswa muntu wa bulili.
\p
\v 23 Tondo ta ku winene uchasula bibo byatilwagha aghansilwa byo;
\v 24 Tondo ku beshwe, tukaghansilwa byo, ku beshwe twakatisha k'ulya watuchagha Yesu Mukota witu, ku bakui,
\v 25 Ulya wesanwagha ku bwaghi bwitu nu atukagha ku bakui buno tushighililwe bwaghi bwitu.
\c 5
\cl Kikando 5
\p
\v 1 Kushighililwa kwitu kutingila lukatisho, twite boolo ghamoi na Ghongo mu Mukota witu Yesu Kilishitu,
\v 2 kwaghe ukutwamona mpanga kutingila lukatisho, u mutwikala, nutunkwitata mu malelamilo ma lukumbu lwa Ghongo.
\v 3 Ta kwibyo umpanga, twitatila nu minubo, kumana buno munubo ukubuta kwinya mutima,
\v 4 kwinya mutima ukukinda malingiko, nu kukinda malingiko, ukulisha malelamilo.
\v 5 Tondo malelamilo tamakwengelelagha, kubuno lutundo lwa Ghongo lwisala mu mitima situ kutingila Muusa Musogha uteleshibwe.
\p
\v 6 Kubuno ghatwabagha tatwite maghala, Kilishitu, ku bindi bikumanwa, akwile ku myanya sa bantu babi.
\v 7 Ta kusoshu muntu kukwila muntu mubi; tondo bu busoshu kukwila muntu musogha.
\v 8 Tondo Ghongo akulosha lutundo lwaghe ku tweli, kubuno, gha twabagha tucheli baghi, Klishitu atukwilinde.
\v 9 Nu bwingi kubo, lola twasanana kutingila mikila saghe, nu akatonia mu mishibu waghe.
\v 10 Kubuno ndi, ghatwabagha baghini, twalonganilwe na Ghongo kutingila lukwo lwa mwana waghe, nu busogha k'obo, mu kulongomana nawe, tu kona kutingila kalamilo kaghe.
\v 11 Ta nuubo umpanga, tondo tukw'itatila mu Ghongo kutingila Mukota witu Yesu Kilishitu, muwe umut weleshibwe malongano.
\p
\v 12 Uchasula, kutingila muntu umoi bwaghi bwinginde mu kisi, nu kubo bwaghi lukwo, nu lukwo lweninde ku bantu bansai, kubuno bantu bansai bakitagha bwaghi...
\v 13 Kubuno kutukila mulembe bwaghi bwabinde mu kisi, nu bwaghi ta bwaghanswa gheteli mulembe.
\v 14 Kutukila agho lukwo lwangatile kisi tukila Adamu kwikila ku Musa, nu ku babo batakitagha bwaghi, anga Adamu, wasusana anga olya ukika.
\v 15 Tondo ta bwa lukaso lwa tughu anga kukita bwaghi; kubuno bwaghi bwa muntu umoi, bengi bakwile, nu lukaso lwa mpang'inene kutukila mu ntu umoi Yesu Kilishitu, kalamo kalamishe bantu bengi.
\v 16 Nu ta ku lukaso lwatukagha ku muntu umoi wakitagha bwaghi; tondo ku bwaghi bumoi ukwatukinde kughayibwa, tondo k kutingila lukaso lwa tughu, bantu bengi bashighilindwe bwaghimbwabo.
\v 17 Ndi ku bwaghi bwa muntu umoi, lukwo lwikile mu kisi, bwingi kobo bantu beleshibwe mpang'inene nu lukaso lwa bulili bakaba na kaLamo kutingila Yesu w'inene.
\p
\v 18 Agho lino, kutingila ku bwaghi bumoi kwaghibwa kwikile ku bantu bansai. Nu ku kitondo kimoi cha bulili, kushighililwa bwaghi kwikile ku bantu bansai.
\v 19 Kubuno kwinda kongwa kwa muntu moi, bengi bakitile bwaghi, nu kwongwilila kwa muntu umoi, bantu bengi bakaghulukile basanana.
\v 20 Tondo, mulembe wabikilwe buno bwaghi bube bwingi, tondo gha gheli bwaghi, mpang'inene sabinde ningi,
\v 21 Kubuno, bwaghi bwashwile na lukwo, mpang'inene sa bulili, sikile na kalamo ka milyalya kutingila Yesu Kilishitu Mukota witu.
\c 6
\cl Kikando 6
\p
\v 1 Tukatenda ki lingo? tukikala mu bwaghi, inga mpangi nene sika?
\v 2 Tobo! beshwe twakwile bya bwaghi, buni butun'ikala lingo mu bwaghi?
\v 3 Tamukumana buno buno beshwe bansai twapatishwagha mu Yesu Kilishitu, ta mu lukwo lwaghe u'mutwapatishwagha?
\v 4 Twakundwagha ghamoi nawe mu lukwo lwaghe, kubuno anga Kilishitu atukagha ku bakui mu lukumbu lw'ise, ububo nu beshwe tutabange lelo mu kalamo kaghe.
\v 5 Ububo, ndi twabinde muntu umoi ghamoi nawe kutingila lukwo lwaghe, tukaba lingo muntu umoi kutingila kutuka kwaghe ku bakui,
\v 6 Mukumana buno muntu witu wa kalai akwagha ku musalaba nawe, buno mubili wa bwaghi ubole, nu tube lingo ntumwa sa bwaghi;
\v 7 kubuno ulya wakwa ta mu kandwa lingo wa bwaghi.
\v 8 Ndi twakwagha ghamoi na Kilishitu, twakatisha buno tuk'ikala ghamoi nawe,
\v 9 mukumana buno Kilishitu watukagha ku bakui nta nakwa lingo; lukwo talwite lingo bwangato kuwe.
\v 10 Kubuno akwilagha bwaghi limoi umpanga, atukile ku bakui, nu eli gho kutingila Ghongo.
\v 11 Nu benywe mwindole ko, anga mwakwilinde bwaghi, nu mweli kwa Ghongo mu Yesu Kilishitu.
\v 12 Bwaghi tabwikalaghe lingo mu mibili sinu si kakwa, nu mwimilaghe lingo nkasa saghe.
\v 13 Ta mwesane bighansa bya mubili winu ku bwaghi anga kikai cha bwaghi, tondo mwishighilile benywe binene kweli Ghongo, anga ba batukile ku bakui, nu mweleshe Ghongo bighansa binu anga bikai bya bulili.
\v 14 Kubuno bwaghi tabukaba na bwangato kwinu, kubuno mweli, ta mu mulembe, tondo mu mpang'inene.
\p
\v 15 Ki lino? Tukite bwaghi kubuno tuli ta mu mulembe, tondo mu mpang'inene? Nu kilo. Bulai nobo!
\v 16 Ta mukumana buno mu nkwishighilila ku muntu anga bakobe, mukumwongwilila, muli bakobe ba whoso umukwongwilila, anga bwaghi bukwicha ku lukwo, ali kwongwilila ku kwicha ku bulili?
\v 17 Tondo Ghongo atatwe, kubuno gha mwabagha bakobe ba bwaghi, mwongwililagha mu mutima winu, bitondo bimwegheshibwagha.
\v 18 Gha mwatukagha mu bwaghi, mwaghalukile bakobe ba bulili. _
\v 19 Nkutenda bu kutendagha bantu ku bushoshu bwa mubili winu. Nubo lingo mwesanile bighansa binu anga bakobe ba mabi buno mwike ku bwaghi, nu lelo mwesane bighansa binu anga bakobe ba bulili, buno mwike ku busanana.
\v 20 Kubuno gha mwabagha bakobe ba bwaghi, ta mwakandwagha na bulili.
\v 21 Bighuma ki u bimwakonamyagha lino? Bighuma bimukongwila nsoni lelo. Kubuno gha shinda ibyo binsai nti lukwo.
\v 22 Tondo lelo, gha mwashighililwa ku bwaghi nu kughaluka bakobe ba Ghongo, mweka bighuma bya kusanana, nu kushila agho kalamo ka milyalya.
\v 23 Kubuno indigho lya bwaghi u lukwo; tondo lukaso lwa tughu lwa Ghongo, u kalamo ka milyalya mu Yesu Kilishitu Mukota witu.
\c 7
\cl Kikando 7
\p
\v 1 Tamukumana buno, e bisakwitu, kubuno nkutenda na bantu bakumana mulembe_, kubuno mulembe wite bwangato ku muntu wicheli wisa?
\v 2 Ububo mukashi wa songwa akandwa na mulembe ku munachaghe ndi echeli gho; tondo ndi munache akwa, nti atuka mu ubo bwangato bwamukandagha na munache.
\v 3 Ali lingo, ndi munache echeli gho, nu aba mukashi wa ungo mulume, nti atensha; tondo ndi munache akwa, nti ntakandwa lingo na bwangato, nta tensha lingo ndi aba mukashi wa ungo muntu.
\v 4 Ubo nubo, bisakwitu, benywe nubo mwabagha bakui ba mulembe, kutingila mubili wa Kilishitu watukagha ku bakui, kubuno tukonamye bighuma kuli Ghongo.
\v 5 Buno, gha twabagha mu mubili, nkasa sa bwaghi satukagha mu mulembe sa kitagha nkashi mu bighansa bitu, buno tukonamye bighuma ku lukwo.
\v 6 Tondo lelo, twakandulilwe mu mulembe, mu kukwila uso mulembe mutwabagha twakandilwe, kubuno tukite nkashi mu mutima wa mu bino bindi, ta mu mutima wa kalai.
\p
\v 7 Tutende lingo buni? Mulembe uli bwaghi? Tobo! Tondo namanagha bwaghi kutingila mulembe. Buno nshinamanile bubi, ndi mulembe tawatendagha: Ntuka kita mabi.
\v 8 Nu bwaghi, mubo, bwindagha nkasa sabo munda nine; buno ghete mulembe taghe bwaghi.
\v 9 Kwine, gha nabagha nshikandwa na mulembe, nabagha neli gho; tondo ghikagha lukakisho, bwaghi bwabagha mwine, nu nakwagha.
\v 10 Ubo, lukakisho lwichagha ku kalamo, lwanichagha ku lukwo.
\v 11 Kubuno mubo bwaghi, kutingila lukakisho lwa lukakisho lwanicha ku lukwo.
\v 12 Kashi lingo mulembe wa sanana, nu lukakisho lwa sanana, lwa bulili nu lusogha.
\p
\v 13 Bya byeli busogha binaba ku neli ndingililo lya lukwo? Tobo! Tondo bwaghi, buno buloleke ko kuba bwaghi, bwicha lukwo munda mwani kutingila bisogha, kutingila lukakisho bwaghi bube bubi bubibu.
\p
\v 14 Tukumana buno mulembe uli wa Muusa; tondo ine, nili wa mubili, naghushibwe mu bwaghi.
\v 15 Kubuno nsikumana bi nkukita: nshikukita bi nkushima, nu nkukita binasomba.
\v 16 Tondo ndi nakita bisanshima, nti namana buno mulembe uli musogha.
\v 17 Nu lelo ntine u kubukita, tondo bwaghi buli munda n'ine.
\v 18 Bisogha nkubimana tabili munda nine, ukutenda buno mu mubili wani; nite bunashima, tondo ta bwangato bwa kukita busogha.
\v 19 Kubuno nshikukita busogha binkushima, nu nkukita bubi bu nshikushima.
\v 20 Nu ndi nakita binshikushima, nt'ine u ukubukita, tondo bwaghi bweli munda nine.
\v 21 Nasanga kashi mulembe mw'ine: Gha nkulonda kukita busogha, bubi nti bwika ghabusho.
\v 22 Kubuno naboghela boghela mulembe wa Ghongo, kutingila muntu weli munda n'i ne.
\v 23 Tondo nkulola mu bighansa byani ungo mulembe, ukulwana na mulembe wa mulenganya wani, wangalucha mukobe wa bwaghi, weli mu bighansa byani.
\v 24 Mukene ine! Nai unkatucha mu ghoso mubili wa lukwo?...
\v 25 Ghongo atatwe kutingila Yesu Kilishitu Mukota witu! Agho lingo, ininene kutingila mulenganya nili mukobe wa mulembe wa Ghongo, nu kutingila mubili nili mukobe wa mulembe wa bwaghi.
\c 8
\cl Kikando 8
\p
\v 1 Kashi taku kughayibwa ku babo beli mu Yesu Kilishitu.
\v 2 Kubuno, kubo, mulembe wa Muusa wa kalamo mu Yesu? Kilishitu, u wankandulile mu mulembe wa bwaghi nu wa lukwo.
\v 3 Kubuno ki tanakoshibwa mu mulembe, kubuno mubili wamubikile musoshu, Ghongo aghishe bwaghi mu mubili, mwa mukusinga Mwana waghe mu mubili wa susana na bwaghi ku bitondo bya bwaghi.
\v 4 Kubo, bulili bwa mulembe bubelelele ku tweli, beshwe bekutabanga ta mu mubili tondo mu Muusa.
\v 5 Babo bite kalamo mu mubili, bakulenganya bya mubili, tondo babite kalamo mu Muusa, bakulenganya bya Muusa.
\v 6 Nu lutundo lwa mubili nti lukwo, tondo lutundo lwa Muusa, nti kalamo nu boolo;
\v 7 Kubuno lutundo lwa mubili luli lusombo lwa Ghongo, kubuno talweli mu mulembe wa Ghongo, nu taluna kosha.
\v 8 Ubo, bo bite kalamo mu mubili, tabana boghyaboghya Ghongo.
\v 9 Kwinu, tamweli gho kuyangana na mubili, tondo na Muusa, ndi Muusa wa Ghongo uli munda benywe. Ndi muntu tite Muusa wa Yesu Kilishitu ta waghe.
\v 10 Nu ndi Kilishitu eli munda na benywe, bulili akwile mu mubili ku bwaghi, tondo muusa wite kalamo mu bilili.
\v 11 Nu ndi Muusa w'olya watuchagha Yesu ku bakui weli munda n'inu, olya watuchagha Kilishitu ku bakui akelesha mubili winu wa lukwo kalamo kutingila Muusa waghe weli munda na benywe.
\p
\v 12 Agho lingo, bisakwitu, tatu bakobe ba mubili buno tube gho kuyangana na mubili.
\v 13 Ndi mwaba gho mu kuyangana na mubili, nti mwakwa; tondo ndi kutingila Muusa mwita bitondo bya mubili nti mwaba gho,
\p
\v 14 Kubuno babo bansai balhutwa na Muusa wa Ghongo beli bana ba Ghongo.
\v 15 Nu tamweleshishwe Muusa wa bukobe, buno mube lingo na boba; tondo mweleshibwe Muusa wa kuba bana, kutingila we tukumana Aaba, Tata!
\v 16 Muusa w'inene ukutenenekela muusa witu buno tuli bana ba Ghongo.
\v 17 Ndi tuli bana, tuli bisa mwandu: bisa mwandu ba Ghongo nu bisa mwandu ghamoi na Kilishitu, ndi twanuba ghamoi nawe, buno tu katatwa ghamoi nawe.
\p
\v 18 Nkumana minubo sa bino bindi tasinalingikwa na lukumbu lweli kubusho kwitu lutukaloshibwa.
\v 19 Kubuno kyabumbilwe kinsai kikulindila na nkasa inene kulola ku bana wa Ghongo.
\v 20 Kubuno chabumbilwe kinsai chabikilwe ghansi ku bikatinga, _ ta kwakushima kwacho, tondo kutingila olya wakibikagha agho, _
\v 21 ghamoi na malelamilo buno nuwe akakandulwa mu bukobe bwa lukwo, nu abe na kibhu mu lukumbu lwa bana ba Ghongo.
\v 22 Tondo, tukunana kwikila buno busi, chabumbilwe kinsai kikulila nu kunuba na mbabasho anga sa kubuta.
\v 23 Nu ta so sinene; tondo nu beshwe bite myanya sa Muusa nu beshwe tukulila, mu kulindila tube bana, nu kughalulwa mibili situ.
\v 24 Kubuno mu ndemalilo u mutonile. Tondo, ndemalilo sikumoneka ko ta ndemalilo; bikumoneka ko binalemalilwa lingo?
\v 25 Tondo ndi twalelamila bitutakumona ko, tukubilindila na nkasa.
\p
\v 26 Ubu nubo Muusa atukukasha mu busoshu bwitu, kubuno tatukumana bisogha bi tunasegha, tondo Muusa w'inene akutuseghela kutingila indilo litanasambalwa;
\v 27 Nu whoso ukulonda mitima akumana mulenganya wa Muusa, kubuno akuseghela basanana anga bwashima Ghongo.
\p
\v 28 Tukumana buno bitondo binsai, byeli bisogha ku babo bashima Ghongo, babo bamanilwe ku mulenganya waghe.
\v 29 Kubuno, babo bamanagha tanga, ababikagha tanga basusane na Mwana waghe, kubuno Mwana waghe abe Nkulha mu katighi na bilongo bingi.
\v 30 Nu babo basombolagha tanga, abamanagha nubo; nu babo bamanagha, abasananiagha nubo; nwabo basananaghya, abeleshishe nubo lukumbu.
\p
\v 31 Tutende lingo buni ku bino bitondo? Ndi Ghongo atutendela, nai ukatusinga?
\v 32 We, utendelelagha Mwana waghe, tondo amwesanagha ku beshwe bansai, buni bwatakakosha kutwelesha binsai ghamoi nawe?
\v 33 Nai ukatalikila basombolilwe na Ghongo? Ghongo u kumana wa bulili!
\v 34 Nayi ukabaghaya? Kilishitu akwile; bingi kwebyo, atukile ku bakui, eli kw'indume kwa Ghongo nu akutuseghela!
\v 35 Nai akatulekanicha na lutundo lwa Kilishitu? Ndi muyungyoyungyo, ndi kabebe, ali munubo, ndi nsala, ali munkanka, ali lukwo, ali mbotela?
\v 36 Anga bwatilwagha: Kutingila uwe uchasula tukwitwa busi bunsai, twalolwa buno mbuli sikwenda ku ketulwa.
\v 37 Tondo mwibyo bitondo binsai twaghimba basingana, kutingila whoso watushimile.
\v 38 Buno nkumana bulili ali lukwo ali kalamo, ali baghenshi ali bangati, ali bitondo bya buno busi ali bi kika,
\v 39 ali bwangato, bya ku ntata, ali bya munsi, ta ku champa cha bumbilwe ki katulekanucha na lutundo lwa Ghongo lwaloshishe mu Yesu Kilishitu Mukota witu.
\c 9
\cl Kikando 9
\p
\v 1 Nkutenda bulili mu Kilishitu, nshikweka bwisa, makengelo mani ma munda mankutenenekela kutingila Muusa Musoga.
\v 2 Nite bongwa bunene nu nkubabalwa bubibu mu mutima.
\v 3 Kubuno inashimile in'inene nitundwe nu kushighana na Kilishitu ku bitondo bya bisakwitu, babuti bani kuyangana na mubili,
\v 4 u Baisilaeli u baghalukile bana, nu kuba na lukumbu, nu manunsano, nu mulembe, nu melelo,
\v 5 nw'indaghi, nu bikulukulu, nu u kwatuka kuyangana na mubili, Kilishitu weli kw'ighulu na binsai, Ghongo akasanilwe milyalya. Amina.
\p
\v 6 Ta kutenda buno kitondo cha Ghongo takikukita kena. Kubuno, bansai ba kibuti cha Isilaeli tabeli Baisilaeli,
\v 7 Nu, kuba mu kibuti cha Bulaimu bansai ta bana baghe; tondo bwatendilwe: Mu Isaka mukakutukila kibuti,
\v 8 kutenda buno ta babutwa mu mubili u bana ba Ghongo, tondo babo b'indaghi u bakughanswa buno kibuti.
\v 9 Lola, kitondo k'indaghi: Nkakuluka mu bindi anga bino, nu Sala akaba isite mwana.
\v 10 Nu kutinga ubo, bwabinde ku Lebeka wabutagha na Isaka tata witu;
\v 11 Kubuno gha bagha bana ta bebutwa nu ta bekita bibi ali bisogha, kubuno kwisombolela kwa Ghongo kube, ta kuyangana na mikolo, tondo bwashima olya ukumana,
\v 12 _Lebeka abulwagha: Nkulha akakitila muto waghe milimo; anga bwatililwe:
\v 13 Nashimagha Yakobo nu nasombagha Esau.
\p
\v 14 Tutende buni lingo? Mu Ghongo mweli biteli bulili? Tobo.
\v 15 Buno abulagha Musa: nkaba na lukogho k'olya nkakitila lukogho, nu mponga ku babo banelesha mponga.
\v 16 Agho lingo, ubo tabwayangana ali n'olya washima, ali n'olya ukwenda lubilo, tondo na Ghongo u kukwila lukogho.
\v 17 Kubuno, Falao abulwagha Kitondo cha Ghongo: Nakw'imikagha buno nikuloshe bwangato bwani, nu buno ishina lyani lisambalwe mu kisi kinsai.
\v 18 Nubo, a kukwila lukogho k'olya washima nu kwinda mutima mubibu mu muntu olya washima.
\p
\v 19 Ukambusha: Ki kinasula aghaya lingo? Kubuno unanana bwashima? 
\v 20 E muntu, uwe tanga, uwe nai buno wende myango na Ghongo? Indegha likabula olya walibumbagha: Ki chasulagha wambumba buno?
\v 21 Mubumbi to nen'itete, anabumba nalyo indegha lisogha nu indegha lya tughutughu?
\v 22 Nu butendwe, ndi Ghongo mu kulonda kulosha mushibu waghe nu kulosha bwangato bwaghe, alindilagha bindi bingi, indegha lya mushibu likashililila.
\v 23 Nu ndi alondagha kulosha butumba bwa lukumbu lwaghe ku malegha ma lukogho lwa longomanyagha kalai mu lukumbu?
\v 24 Ubo bwatumanagha tondo ta mu nkantighi na Bayuda umpanga, tondo lingo munkatighi na Bilongo.
\v 25 Anga bwatenda mu Hosea: Nkamana kilongo chani ghoso utabagha wa kilongo chani, nu shimwa whoso utabagha shimwa;
\p
\v 26 Nuko ku babulwagha: Tamu kilongo chani! Bakamanwa bana ba Ghongo.
\p
\v 27 Isaya nuwe, atandegha mu Isilaeli: Ghakaba bana ba Isilaeli bise bengi anga museghe wa kitatenge, u moi u kashighala u ukona.
\v 28 Kubuno Mukota akakita binsai ighilighili mu kisi bwa bwashima.
\p
\v 29 Nu bwatendagha Isaya kalai: Ndi Ghongo wa maghana ntatushighilagha imbuta, tunabinde anga Sodoma, tunasusanile Gomola.
\p
\v 30 Tutende buni lingo? Bilongo bitakulonda bulili, beleshibwe bulili, bulili bukutuka mu lukatisho,
\v 31 nu Isilaeli walondagha mulembe wa bulili, ntaumonile.
\v 32 Ki chasulagha? Kubuno Isalaeli aulondagha, ta kutingila lukatisho, tondo anga u kutuka mu mikolo. Bakitalile kw'ikoi.
\v 33 Anga bwatililwe: Lola, nabika mu Sioni ikoyi lya kukitala ko nu lughangala lwa kuselemucha bantu, nu olya wamukatisha ko ntakitwa nsoni.
\c 10
\cl Kikando 10
\p
\v 1 Bisakwitu, bwashima mutima wani nu masegho mani kwa Ghongo kubo, buno bansai b'one.
\v 2 Nabatenenekela buno bakokomesha mu Ghongo, tondo ta mu mulenganya;
\v 3 mu kwinda kumana bulili bwa Ghongo, nu kulonda kw'imika bulili bwabo, ta bishighililagha mu bulili bwa Ghongo;
\v 4 Kubuno Kilishitu u kushililila kwa mulembe, buno olya wakatisha aghansilwe bulili.
\p
\v 5 Agho, Musa akumana bulili bwatuka mu mulembe: Muntu ukakita bino bitondo, akalamila mubyo.
\v 6 Tondo, lola bukutenda bulili bukutuka mu lukatisho: Utendaghe mu mutima wobe: Nai ukenda kw'ighulu, nti ise anga wa kumbya Kilishitu;
\v 7 Ali nai uk'ingila munsi? Nti ise anga ukutucha Kilishitu ku bakui.
\v 8 Chatenda buni lingo? Kitondo cheli bwighi nowe, mu kanywa kobe nu mu mutima wobe. Tondo, kitondo cha lukatisho, u kitukusansa.
\v 9 Ndi kanywa kobe katenda byatuka mu mutima wobe buno Yesu u' Mukota, nu ndi wakatisha mu mutima wobe buno Ghongo amutuchagha ku bakui, u k'ona.
\v 10 Kubuno, mu ku katisha mu mutima ukwicha mu bulili, 'nu mu kutenda bya bulili na kanywa kobe, u kwicha mu lonio, anga bwatenda kitondo cha Ghongo:
\v 11 Olya muntu wamukatisha ko, nta kakwa nsoni.
\v 12 Ta batingana, Bayuda nu Bagiliki, kubuno bansai bite Mukota umoi, uli mutumba wa bansai bakumumana.
\v 13 Kubuno olya ukamana mu mutima waghe ishina lya Kilishitu, akona.
\p
\v 14 Nu buni bu banamana mu mutima olya ubatakatisha? Nu buni bu banamukatisha olya ubatongwagha ko? Nu buni bubakamwongwagha ko, ndi nta ku muntu wa ku sansa?
\v 15 Nu buni bukika misaghu nsogha, ndi takweli basingilwe? Anga bwatililwe: bwaswagha manshinshi ma babo basansa boolo, wa babo ba kunsasa musaghu musogha!
\v 16 Tondo bansai tabiminde musaghu musogha. Isaya nuwe atenda: Mukota, nai wakatishishe ku meghesha mitu?
\v 17 Ubo lukatisho lukutuka mu bi kongwibwa ko, nu bi kongwibwa ko, kitondo cha Kilishitu.
\p
\v 18 Tondo natenda: Ta bongwile? Tobo! Ishuki lyabo lyongwibwe ko mu kisi kinsai, nu bitondo byabo bikile kushinda kisi.
\p
\v 19 Tondo, natenda: Isilaeli ntamumanagha? Musa u mutangi watendagha: Nkabucha lughi lobe ku ghoso uteli lingo na kilongo, nu nkalubha mushibu wobe kutingila kilongo kitite kulenganya.
\p
\v 20 Nu Isaya mu kutucha boba, amu tendagha: Namonekile na babo ba tandondagha, nindoshishe ku babo ba tambushagha.
\p
\v 21 Tondo ku Isilaeli, atenda: Nalambishe maboko mani bindi binsai ku kilongo cha miyabuyabu bantu ba miyabuyabu nu ba myango.
\c 11
\cl Kikando 11
\p
\v 1 Natenda lingo: Ghongo asombile kilongo chaghe? Tobo, bulai noko! Kubuno nw'ine nili Muisilaeli, mu kibuti cha Bulaimu mu lusu lwa Benyamina.
\v 2 Ghongo nta sombile kilongo chaghe, cha sombologha mwa kalai. Tamukengele Kitondo cha Ghongo chatendwagha ku Elia, buni bwatalikilagha Isilaeli kweli Ghongo:
\v 3 Mukota, bitile balenganya bobe, bendulile tusasa tobe; nashighinde ine nene, nu bakulonda kunita?
\v 4 Tondo buni bwamusubishagha Ghongo? N'imbikilagha bantu elefu mutubakamo, ba takomelagha Baali mashwe.
\v 5 Ubo nubo, mu bino bindi kwashighala bakeke kubo, kuyangana na mpang'inene sa kusombolwa.
\v 6 Tondo, ndi ku mpanga, ta ku mikolo kashi; kutenda bungo, mpanga tasinaba lingo mpanga. Ndi ku mikolo, kashi ta mpanga lingo; kutenda bungo mukolo ta weli mukolo lingo.
\p
\v 7 Kiki lingo? Cha kikulonda Isilaeli, ntakimonile, tondo kusombola kwa kimonile; bango beleshibwe mitima mbibu,
\v 8 anga bwatililwe: Kalagha abeleshishe mutima wa kunsensela, miso ma ta kumona, nu matui matakwongwa, kwikila buno busi. Nu Daudi atenda:
\v 9 Mesa mabo mabaghalukinde kategho, kakilha, ikitalo, nu indigho!
\q
\v 10 Miso mabo mashibwe, nu tamekumona lingo, nu mugongo wabo ukumbame bindi binsai.
\p
\v 11 Natenda lino: Ndi mu kukitala, u mubalondagha kuwa? Bulai noko! Tondo ku ikitalo lyabo, lonio lwikinde Bilongo, kubuno babuche lughi.
\v 12 Ndi ikitalo lyabo, lyabagha butumba bwa kisi, nu bukeke bwako butumba bya bilongo, bakashighala banga gha bakisungula ku mutima?
\p
\v 13 Nababula byo benywe, bilongo; Ubo buneli mtumwa sa bilongo, natata mulimo wani kwa Ghongo,
\v 14 ndi bwakoshibwa, nibuche lughi lwabo babo ba kilongo chani, nu konia bamoi kubo.
\v 15 Kubuno, ndi kusombwa kwabo kwabinde malongano mu kisi, buni bukaba kukuluchwa kwabo, ndi ta kalamo mu nkatighi na bakui?
\v 16 Nu ndi bitangi bikeke bi bisogha, binsai bingi bya kumbusa nti bisogha nubyo; nu ndi mushi u musogha, ntabe nuso seli nsogha.
\p
\v 17 Tondo ndi ntabe emoi sakalwa, nu we, musabibu wa mbala, kubikwa gha satuka, nu wise ghamoi na mushi nu matongu ma musabibu,
\v 18 ntwitate mu kutebwa kweso ntabe. Ndi wintata, mana buno towe u nene uso mushi, tondo mushi uwa kweka.
\v 19 Ukatenda lino: Ntabe saketulwagha buno nighelekwe.
\v 20 Ubo buli bulili; sakalwagha kutingila ku takatisha kwabo, nuwe weli gho kutingila lukatisho. Ntube mutumbitumbi, tondo kwa gha boba;
\v 21 kubuno Ghongo nte ndelinde ntabe, nuwe ta ka kwendelela nuwe.
\p
\v 22 Lola lino busogha nu kusugha kwa Ghongo; kusugha ku babo bitukishe kuwe, nu busogha bwa Ghongo kuwe, ndi wikala nu ku kokomesha mu bubo busogha; ndi tobo nuwe ukakalwa.
\v 23 Bo nubo, ndi tabindisha mwa mukwitucha kuwe, nubo nti bakakuluchwa lingo, kubuno Ghongo ite maghala ma ku bingisha lingo.
\v 24 Ndi uwe wakalwagha ku musabibu wa mbala bulili, nu bakuluchwa mu musabibu wa bulili takuyangana na buweli, nubo bemana ku kuluchwa ku musabibu wabo kuyangana na bu bikala.
\p
\v 25 Buno bisakwitu, nshikushima mwinde kumana icho kindo kubuno mwindolaghe anga bite mulenganya, buno bamoi ku Baisilaeli babinde na mutima mubibu, kwikila bilongo bingo binsai bingile.
\v 26 Nubo, Isilaeli unsai akona, anga bwatililwe: Mulamya akatuka ku Siona, nu akabembucha Yakobo ku mabi;
\p
\v 27 nu nkanunsana nabo gha nkatucha bwaghi bwabo.
\p
\v 28 Mu musaghu musogha, beli baghini kutingila benywe; tondo mwa mu kusombolwa, bashimwa kutingila b'ise babo.
\v 29 Kubuno Kalagha nti kuluche mo ku byelesha, nu ku byamanila muntu.
\v 30 Nubo tabimilagha Ghongo kalai nu mwa ku munana mweleshibwagha lukogho,
\v 31 Nubo lelo tabiminde kubuno kutingila lukogho lumweleshibwagha, nubo beleshibwe lukogho.
\v 32 Kubuno Ghongo abikile bansai ghamoi mu kumunana, kubuno abakwile bansai lukogho.
\p
\v 33 Ee butumba bunene, bulenganya nu bwenge bwingi bwa Ghongo; nu kwaghya kwaghe takunaghelekwa, nu nsila saghe tasikumanililwa! Kubuno,
\v 34 nai wamanile mulenganya wa Ghongo, ali nai wabagha mukungu waghe?
\v 35 Nai wamweleshagha mutangi, buno akulukishwe?
\p
\v 36 Kwaghe, kutingila we, nu kuwe u kweli binsai. Lukumbu kwaghe mu kinko insai. Amina!
\c 12
\cl Kikando  12
\p
\v 1 Nabema lino, bisakwitu, kutingila lukogho lwa Ghongo, musighe mibili sinu sibe kinsasa kisogha, chasanana, cha shimwa na Ghongo, u'melelo minu matunganana.
\v 2 Mususanaghe na bantu ba bino bindi, tondo mughalule milenganya sinu, inga mwamana bwashima Ghongo, cheli kisogha, chashimwa nu cha shililila.
\p
\v 3 Ku mpang'inene si neleshibwe, nkubula umoimoi ku benywe, mwintumbyaghe, tondo mube na myanya nsogha kuyangana na lukatisho lweleshibwe umoi moi ku benywe na Ghongo.
\v 4 Anga bw'ite mubili witu bighansa bingi, nu bighansa binsai tabite mulimo umoi,
\v 5 nubo butweli bengi, tweli mubili umoi mu Kilishitu, nu tweli bighansa gha tusambana.
\v 6 Kubuno twite nkanso satingana, kuyangana na mpang'inene si tweleshibwe, olya wite lukaso lwa bulenganya, alenganye mu lukatisho;
\v 7 olya wamanilwe mu nkanshi sa Ghongo, akite so; olya kweghesha, ikale mu kweghesha,
\v 8 Olya wa kwimwisha, imashe. Olya ukwesana, esane na mutima musogha, olya wa kwimalila bantu, abimalile busogha, olya wakwila lukogho, alukwile na mboghimboghi.
\p
\v 9 Lutundo lubaghe lwa bwengelela. Mukwe bubi bogha; mukokomeshe mu bisogha.
\v 10 Mu lutundo lwa mubuto, mushimane ghamusambana; mukute binsai mu lwanso.
\v 11 Mube na maghala nu ta butambi. Mube na mitima sa naka. Mukitile Ghongo milimo.
\v 12 Mubogheboghe mu malelamilo, nu nkiki mu lusungyo, nu mukutwaghe na masegho.
\v 13 Mweleshe benga mitima bi bite nkasa nabyo. Musekele bantu bansai.
\v 14 Mukasanile ba bakubanubya, mukasanile, nu mubashulilaghe muntu.
\v 15 Mubogheboghe ghamoi na ba kuboghabogha; mulile na bakulila.
\v 16 Mube na mulenganya umoi gha musambana. Mulondaghe kwitumbya. Mulutwe na bya bota. Mwindolaghe anga bite mulenganya mwingi.
\v 17 Mukuluchaghe bubi ku bubi, mulonde bisogha bya bashima bantu bansai.
\v 18 Ndi bwakoshibwa, mube na boolo ku bantu bansai.
\p
\v 19 Nshimwa sani, mwindighilaghe bubi benywe binene, tondo, mushighile Ghongo mushibu; anga bwatilwa: Ine k'indighila, indigho lyeli ku neli, bwatenda Mukota.
\v 20 Tondo ndi mughini wobe ite nsala, mweleshe indya; ndi ite mpusha, mweleshe masi kubuno mu kukita ubo, nti wamukulumanishila makangalya ma kaya kw'itwe lyaghe.
\v 21 Ntukindwe na mabi, tondo kinda bubi na busogha.
\c 13
\cl Kikando 13
\p
\v 1 Nu muntu unsai angatwe na bakulu, kubuno taku bukulu butatuka kwa Ghongo, nu bakulu beli gho babikilwe na Ghongo.
\v 2 Uchasula olya wanana bukulu nti anana Ghongo wabubikagha, nu balya batab'imila, bak'imbulutila lwaghyo bo binene.
\v 3 Ta ku kintu kisogha uki kusula bashushi bekukubwa boba. Ukushima ntukwe mukulu boba? Kita busogha nu ukimilwa nawe.
\v 4 Shushi eli mukiti wa Ghongo ku bya busogha kobe, tondo ndi wakita mabi, kwagha boba; kubuno ta kutughu kwe kusumbagha na mwele nu eli mukiti wa Ghongo, buno akite indigho lya mabi, nu ku nubya wakita bubi.
\v 5 Bwaswagha lino kwangatwa, ta kukwa lusungyo boba, tondo ku mulenganya witu wa munda.
\v 6 Kubo uchasula mwaligha palata, kubuno bashushi beli bikiti ba Ghongo babikilwe mu whoso mulimo.
\v 7 Mweleshe bantu bili byabo, palata kwa olya umwema kwelesha so, mutulo kwa olya wema kwelesha gho, boba k'olya wa kukubwa boba, lwanso ku olya unanswa.
\p
\v 8 Mubaghe na kikai cha muntu ndi ta kushimana gha musambana; buno washima banabo nti akucha mulembe.
\v 9 Kubo, nkakisho: Ntukatensha, tukita, ntukimba, ntukaba na nkasa sa bya bene, nu bingo byasusana nebyo, bya kandwa mu kino kitondo kimoi: Ukashima muninu buw'inshima uw'inene.
\v 10 Lutundo ta lukukitila muninu mabi: lutundo u kubelele kwa mulembe.
\p
\v 11 Mukumana bindi bitweli mo: U nkugu sa kubuka, kubuno lonio lu bwighi na beshwe, kutinga gha twakatishagha.
\v 12 Kindi chaba kilai, busi bwacha, tute myanya sa bulimaswa, nu tushwale ngabo sa musi.
\v 13 Tutabange busogha anga mu musi, bulai na butughu, nu bulefi, nu n'saki, nu lughi.
\v 14 Tondo, mushwale Yesu Kilishitu, nu tamuswaghye mubili buno mukuche nkasa mbi sagho.
\c 14
\cl Kikando 14
\p
\v 1 Musekele whoso musoshu mu lukatisho, nu mwendaghe myango sa milengania.
\v 2 Wakatisha anashima kulya ku binsai, nu musoshu, akulya tughu bisughu.
\v 3 Olya ukulya ntabenge uta kulya, nu utakulya nt'aghye olya ukulya, buno Ghongo amusekinde.
\v 4 Uwe unai, u kwaghya mukiti wa ungo? Ndi imala ali awha, mukota waghe u ukumana. Tondo akimaluka kubuno Mukota ite bwangato bwa kumw'imika
\p
\v 5 Umoi akulekanucha bindi, kweli ungo, bindi binsai bigheshe. Na muntu ku babo babili akatilile bya lenganya mu mutima waghe.
\v 6 Olya u kulekanucha bindi, akita ubo ku Mukota. Whoso ukulya, nti kweli Mukota u kwakulila indya, buno akasanila Ghongo; olya utekulya, nti kweli Mukota u kwetekulilya indya, nu akukasanila nuwe Ghongo.
\v 7 Naki, takuli unaba gho ali unakwa ku w'inene.
\v 8 Kubuno, ndi tuki twa tengya, ali ndi twakwa, nti kutingila Mukota winene. Kashi ndi tucheli gho ali ndi twakwa, tuli mu Mukota.
\v 9 Kubuno Kilishitu akwagha nu eli gho, kubuno angate bakwile nu bekwisa bansai.
\p
\v 10 Tondo uwe, ki chasula waghya mubuto ghobe? Ali nuwe, ki chasula wabenga muninu? Kubuno beshywe bansai tuk'imala ku lubansa lwa Ghongo.
\v 11 Kubuno bwatililwe: Ine nkw'isa, u'bwatenda Mukota, n'ishwe linsai likakomwa gha neli, nu na lulame lukaghanula Ghongo.
\p
\v 12 Ububo na muntu na muntu akalosha byaghe mu miso ma Ghongo.
\p
\v 13 Kashi, ta twaghyane gha tusambana; tondo ntu kite cha kukitasha ali cha kwenducha mubuto wobe.
\v 14 Nkumana nu n'imila na bulili kutingila Mukota Yesu, buno takuli champa kitaswagha munda nacho kinene, nu kintu kinsai ta chaswagha ku olya wakikata buno tachaswagha.
\v 15 Tondo, ndi kutingila indya, muninu onganwa, ntuli lingo mu lutundo; kutingila indya, ntwimile ashimile ghoso wakwilinde na Kilishitu.
\v 16 Mpanga sobe tasisule washingilila bango bitondo.
\v 17 Kubuno, bukota bwa Ghongo ta bwa kulya ali kunywa, tondo bulili, boolo nu mboghimboghi kutingila Muusa-Musogha.
\v 18 Olya ukukitila Kilishitu anga bubo, imilwa na Ghongo nu kusekelwa na bantu.
\p
\v 19 Ubo lino, tulonde bya boolo nu bya kutwimasha mu lukatisho.
\v 20 Kutingila indya, ntw'ite mulimo wa Ghongo; Ku bulili, bintu binsai bya swagha; tondo ta bisogha ku muntu mwa mu kulya, ndi byaghaluka ikitalo.
\v 21 Bweli busogha kutalya nama, kutan'ywa maku, nu kw 'inania binsai binakitasha muninu ali, kumwitya mutima, ali bya mabala ku busoshu bwaghe.
\v 22 Lukatisho lu wite, katilila lo kobe nu Ghongo. Mboghimboghi ku olya utakwighaghya w'inene ku byakita.
\v 23 Tondo olya wisikima ku byakulya, aghibwa, kubuno ntakita na mutima musogha. Binsai byatuka mu mutima ute musogha, nti bwaghi.
\c 15
\cl Kikando 15
\p
\v 1 Beshwe bankambwe twema kweka busoshu bwa babo bete bankambwe, ta kwindola beshwe binene.
\v 2 N'omoi ku beshwe abogyebogye munabo ku bisogha kubuno amwimike.
\v 3 Buno Kilishitu nt'indolagha w'inene, tondo anga byatililwe: bituko bya babo bakutukagha, byabinde byani.
\v 4 Tondo, kinsai chatilwagha kalai, chabagha cha kutweghesha, kubuno kutingila nkiki nu bubobelelo bi tukweleshibwa na bitondo bya Ghongo, tulelamile.
\p
\v 5 Nu Ghongo wa nkiki nu bubobelelo abeleshe mulenganya umoi gha musambana, anga Yesu Kilishitu,
\v 6 Kubuno bansai mu kitondo kimoi, mutate Ghongo nu Tata wa Mukota witu Yesu-Kilishitu.
\p
\v 7 Musekelane anga bwa basekelagha Kilishitu mu lukumbu lwa Ghongo.
\v 8 Nkutenda buno, Kilishitu abagha mukiti wa bamonywa buno aloshe bulili bwa Ghongo nu kukucha indaghi lyeleshibwagha ba Tata,
\v 9 buno bilongo batate Ghongo ku lukogho lwaghe, anga bwatililwe: Uchasula nkakutata mu bilongo nu n'kemba ku lukumbu lw'ishina lyobe.
\v 10 Bwatendwa lingo: Bilongo muboghemboghe na bantu baghe!
\v 11 Nu lingo: mutate Mukota, benywe bilongo binsai, bantu bansai bamwembele na nkugho!
\v 12 Isaya nuwe atendagha: Mu kibuti cha Yese u'mukatuka olya ukabikwa buno imalile bilongo; bilongo bika mulelamila.
\p
\v 13 Nu Ghongo wa malelamilo, abisashe mboghimboghi nu boolo mu lukatisho, inga musalilana na malemalilo, kutingila bwangato bwa Muusa Musogha!
\p
\v 14 Ku benywe bisakwitu, n'kumana buno muli basogha, nu mwite mulenganya, nu munakosha kusungulana.
\v 15 Kubungo, nabatilila na nkas'inene anga kubakengesha ku mpong' inene si neleshibwe na Ghongo,
\v 16 nibe mukiti wa Yesu-Kilishitu mu kantighi na batekatisha, mu kukita mulimo wa musaghu musogha wa Ghongo, kubuno batekatisha babe lukaso lusogha nu lwa sanana, kutingila Muusa Musogha.
\p
\v 17 Nema kwitata, mu Yesu Kilishitu ku bikai bya Ghongo.
\v 18 Kubuno nshikakosha kutenda ku bingo bitondo, ndi ta bibyo byankitinde Yesu Kilishitu mu kashi sani, buno batekatisha bimile kutingila kutenda nu kukita,
\v 19 kutingila bwangato bwa bitangalo nu bighanaghana, kutingila bwangato bwa Muusa wa Ghongo, kubuno kulingila Yelusalemu nu myelo sa bwighibwighi kwika ku kisi cha Uliliya, nisasishe uko kunsai musaghu musogha wa Kilishitu.
\v 20 Nu nitatinde kusambala musaghu musogha kuko kwabagha Kilishitu ntongwibwa ko, kubuno inashwa kobaka kobakile bango, anga bwatililwe:
\v 21 Ba batamwongwagha ko bakalola, babo batasambalindwe misaghu saghe, bakamana.
\p
\v 22 Icho u chanangilagha kwenda kwinu.
\v 23 Tondo lelo, nshite cha kunangila mwecho kibe, nu myaka ningi nkubagha na nkasa sa kwenda ku mweli.
\v 24 Nkulelamila buno nabalole ko mu kutinga gha nkenda Ishipania, nu kwelekeshibwa na benywe, mu kushila nkasa sa kubamona ko.
\v 25 Lelo nenda ku Yelusalema, ku mulimo wa basanana.
\v 26 Kubuno, ku Makedonia nu ku Akaya, bantu bashimagha kukita mukongolo wa kwelesha bakene mu nkatighi sa basanana ba Yelusalemu.
\v 27 Bashimagha kubukita, nu lwabagha lukakisho kwabo; kubuno batekatisha beleshibwagha kibhu mu kitondo cha Ghongo, nubo bemana kubelesha ku bibyo bisogha bya mubili.
\v 28 Gha nkashila ibyo bitondo nu kushila kubelesha eso nkaso, nkenda ku Ishipania nu kutinga kwinu.
\v 29 Nkumana buno mu kwenda kwinu, lukasanilo lunene lwa Kilishitu u lunkenda nalo.
\p
\v 30 Bisakwitu, nabema, kutingila Mukota Yesu Kilishitu nu lutundo lwa Muusa Musogha, mulwane ghamoi n'ine, mu nkuseghela kwa Ghongo,
\v 31 kubuno nisoghonoke mu maboko ma bantu babi ba Yudea, nu mulimo unenda ku kita ku Yelusalemu wimilwe na basanana,
\v 32 buno nike kwinu na mboghimboghi, ndi u bwashima Ghongo, nu nomulwe gha mweli.
\v 33 Nu Ghongo wa boolo ikale na benywe bansai! Amina!
\c 16
\cl Kikando 16
\p
\v 1 Nabasingila Foibe mubitu witu uli diakono mu Kanisa ka Ghongo ku Kankulia,
\v 2 buno mu musekele busogha mw'ishina lya Mukota witu, anga basanana, mumukashe na bintu bite nabyo nkasa kwinu, kubuno akashagha bengi nu ininene.
\p
\v 3 Mwankashisha samba Pilisika nu Akila, bankukita nabo nkashi mu Kilishitu.
\v 4 Biyesanile buno nilame; nti n'inene u nkubakasanila, tondo Tunisa tunsai twa bilongo.
\v 5 Mwankashishagha samba Kanisa; keli mu numba sabo.
\v 6 Mwankashishagha samba Malia wanubagha mu kubakitila mulimo.
\v 7 Mwankashishagha samba Andoloniko nu Yunia babuti bani, nu banitu ba lukando, bakumanwa bantu banene mu nkatighi na ntumwa, nu balingagha kumana Kilishitu kw'ine.
\v 8 Mwankashishagha samba Ampilisi mwinda wani mu Mukota.
\v 9 Mwankashisha samba Ulibano munitu wa nkashi sa Kilishitu nu Sitansisi, mwinda wani.
\v 10 Mwankashisha samba Apele wamanwa mukilishitu. Mwakashishagha samba bantu beli mu numba sa Alishitambule.
\v 11 Mwankashisha samba Helodiana, mubuti wani. Mwankashishagha samba bantu beli mu numba sa Nalasisi ba bashima Mukota.
\v 12 Mwankashisha samba Tilifene nu Tulifosa bekukitila Mukota mulimo. Mwankashisha samba Peleshide, mwinda wani, wakitagha nkashi ningi sa Mukota.
\v 13 Mwankashishagha samba Lufusi nsombolwa sa Mukota, nu nina, u mama tondo.
\v 14 Mwankashishagha samba Asikilida, Felegone, Helemeso, Patolobabi, Helemasi nu bisakwitu beli nabo.
\v 15 Mwankashishagha samba Filologo nu Yuliani, Nelie nu mubitu waghe, nu Olempe, nu basanana bansai beli ghamoi nabo.
\v 16 Mukashane samba gha musambana kutingila mpeshi. Tunisa tunsai twa Kilishitu twa bakasa samba.
\p
\v 17 Bisakwitu, nabema, mwalolagha busogha ku babo bakulekanucha bantu nu bakukita mabala, ku megheshibwa ma mweleshishwe. Mwintuche kubo.
\v 18 Buno bantu anga abo tabakukitila Kilishitu Mukota witu nkashi, tondo nda sabo; Nu ku bitondo byabo bya kutebeka, bakushimisha mitima sa batakokomela mu lukatisho.
\v 19 Ku benywe, kwimila kwinu ku kumanwa na bansai; na ba boghelaboghela, nu nkushima mube balenganya ku bili bisogha, nu ba bulili ku bitondo bibi.
\v 20 Nu Ghongo wa boolo akananta Kahinga ku manshinshi minu. Nu m'pang'inene sa Mukota witu Yesu Kilishitu sibe na benywe!
\p
\v 21 Timoteo munitu wa nkashi abakasha samba, nu Lukiaso, Yasoni nu Sosipata babuti bani.
\v 22 Nabakasha samba mu Mukota, ine Telutulo natila mano maluba.
\v 23 Gaiso mugheni wani nu wa Kanisa kansai, babakasha samba. Elashito mulangi wa bikulo bya musumba abakasha samba, nu mubuto witu Kalitusi.
\v 24 Nu mpang 'inene sa Mukota witu Yesu Kilishitu sibe ghamoi na benywe bansai! Amina!
\p
\v 25 K'olya wakosha ku bakokomesha mu Musaghu musogha nu meghesha ma Yesu Kilishitu, kuyangana na kuloshwa ku bya biswagha kalai,
\v 26 tondo byalimbulwa lelo kutingila mitilo sa balenganya, ku lukakisho lwa Ghongo wa milyalya, nu lwekwa mu bulenganya wa bilongo binsai, buno bimile lukatisho,
\v 27 Kweli Ghongo, mulenganya w'inene, lukumbu lube nkiko nu nkiko kutingila Yesu Kilishitu! Amina!