kcn_reg/55-1TI.usfm

\id 1TI
\ide UTF-8
\h 1 Timose
\toc1 1 Timose
\toc2 1 Timose
\toc3 1ti
\mt 1 Timose
\c 1
\cl Sura 1
\p
\v 1 Paulo mursal te Yesu je namna te amri te Rabbana sidu wedi neina hidaaya fi mete Keisto Yesu ahadi tena;
\v 2 Wedede kede ruwa ne Timtheo nyereku tayi taasil fi imaan: baraka, huruma, amaani kede te Rabbana kede kun neita ab gi tala ne Yesu Kristo sidi tena.
\p
\v 3 Je namna ab ana kan ja kelem neita kede ita gen fi Efeso, wakti ab ana kan gi ruwa fi Makedon kede ita amrisha anas taanin kede umon ma gi alim je umon aju.
\v 4 Sala kan wedi taalim me kalama, te wilaadi ab ma gi koma ab gi jib juru laabil fi namna te mamlaka te Rabbana ab fi iman.
\v 5 Lakin mwisho te amri ya amri ab gi tala min juwa gelba ab nedif me Roho ab kuweesi me amin ab ma fogo kabas:
\v 6 Wede anas taanin ja wassa fogo umon geeru fi soo kalama taanin;
\v 7 Ligo umon aju kun je anas ab gi lim shariya mon ma gi faham kalama ab umon gi wonus fogo me kalam ab umon gi haki kisha.
\p
\v 8 Lakin ina arufu je shariya kuwesi ajol kan bi agara je namna ab shariya fi.
\v 9 Ligo ita arufu je shariya ma kutu uwo me ajol ab adil illa anas ab ma adil aw anas ab ma aasy, anas ab ma gi kafu Rabbana me anas ab endisi batal, anas ab ma nedif me anas ab gi sulu Rabbana je sokol ab ma endis faida, anas ab gi katul nas baba toumon m nas mama toumon wu umon ya nas katili.
\v 10 Anas ab gi akul Bisiyaga me anas te zina nas nyakama, anas ab kabas, anas ab gi alif te saki me taanin kulu ab gi alim hayyi taajol; je namna ab injil te heshima te Rabbana.
\v 11 Je namna ab injil fi heshima te Rabbana ab gi shukur bakan ab ja hafizi naana.
\p
\v 12 Ana gi shukur ne Rabbana ab wedi naana gudra ya kristo sidi tena, kalam oja feker naana ja ana fi ajol te haaki, wakti okutu ana fi kidima te injil.
\v 13 Fi awlan wakti ana kan ajol te shata ma aw ajol ab aduyi te Kristo, ajol te maridisi; lakin ana ja hurumi yana kalam ana kan giso fi arufu ma me aba amin;
\v 14 Baraka te sidi tena dukur idu zaidi bakan wayi fi amin, me aju ab fi fu Yesu.
\p
\v 15 Kalam de gi amin, wu kaman gi faa kede rudu kulu je Kristo ja fi duniya kede uwo ja wedi hidaaya ne anas kulu min umon ana ya tawlan.
\v 16 Lakin ya tayinu Yesu Kristo ja ayinu huruma tayi okede weeri alama fu ana fi subra to kulu kede ana kun mithaal ne anas ab gura amin mowo fi hayyi ab ma gura kalas.
\p
\v 17 Je namna ab te sultan te milele me milele ab ma gi kalas ab ma gi beenu, Rabbana wayi kede gi wedi nowo hishma me arfa asma to wakti kulu ladi mwisho te duniya Ameen.
\v 18 Amri wede ana fi hafiz neita nyereku tayi Timotheo je kalama te nas nebiya fimo ab ja wonus fugita min zaman kede ita ja dusman min fogo dusman ab kuwesi.
\v 19 Ligo ita gi robutu iman taki me Roho ab kuwesi ab anas taanin gi jada naa dukur umon gi karabu amin toumon:
\v 20 Min umon ya Kumenaayo me Alekizander ab ana wedi umon n sitan mon kede faham jeshatama batal.
\c 2
\cl Sura 2
\p
\v 1 Fi awlan ana gi kelem ne itakum kede itakum gi waga waga ne Rabbana, me asadu nowo me lim badu, me shukur Rabbana, kede gi so le ajal te anas kulu.
\v 2 Fi sabab te nas sultana, me kubarina kulu kede ina ja kun me hayyi ab adul meta amaani fi kafu Rabbana me so sokol ligo ina gi so fi taratib to.
\v 3 Wede ya kuwesi ab gi rudu uwo gidam te ajol ab jib nena hidaaya me gidam Rabbana.
\v 4 Ab aju ana kulu kede ligo hidaaya ladi fi rasul te faham hakki.
\v 5 Kalam fi Rabbana wayi me ajol ab gi lim anas fi Rabbana wayi ya ajol Yesu Kristo,
\v 6 Ab uwo wedi nafsi to kede uwo kun sadaka fi sabab te nas kulu kelem ne anas bija kun kan wakti tim:
\v 7 Ab ana ja kutu ana kede kun mursal me ajol te kelem injil (ana gi wonus hakki ana gi kabas me) ajol te alim ab gi alim beelana fi amin me hakki.
\p
\v 8 Ya ana aju rujala kede gi womba fi kila bakan, ligo umon gi arfa idda ab nedif ligo umon ma endis gelba hari, me juru laabil.
\v 9 Ya kaman nuswana kede gi nedif umon fi lebis ab kuwesi me ligo haya me amsuku kalam me bisesi; ma fi weeri sulu rasu, lulu, aw gold aw gumasi te bayi.
\v 10 Lakin (je namna ab gi faa ne nuswana ab gi naadi umon je anas ab gi kafu Rabbana) me kidima ab kuwesi;
\v 11 Mariya kede alim me bisesi me taya kulu lakin mariya ana aba kede uwo alim maa, saa kan hukum mariya.
\v 12 Ana abba mariya kede alim sala kan hukum ragi lakin kun tey te ragi.
\v 13 Kalam Adam ya abidu kalagu, baada naade dukur Hawa;
\v 14 Wu Adam ma ya shaitan kabasi lakin mariya naade ya kabas dukur okarabu:
\v 15 Lakin ajol ab bi ligo hidaaya fi weledu kan umon bizidu iman toumon me aju badum, m nedif bakan wayi me so kalam ligo umon gi so me bisesi.
\c 3
\cl Sura 3
\p
\v 1 Gi amin kalam de gali ajol kan bi aju kun kebir te kanisa ogikun otamaani kidima ab kuwesi.
\v 2 Yala ajol ab kebir te kanisagifaa nowo kede ma gi alisi uwo, kede okun ragi te mariya 1 ab ma gi sakaran, ajol ab bisesi, ab gi amsuku kalam bisesi, abgi karibisha difana abgi alim.
\v 3 Ab magi korokoro bakan te asurubu merisa ab magi dugu; ajol ab baari ab magi dusman, ab magi tamani sokolina;
\v 4 Ab gi hukum kuwesi juwa to abgi alim yala to fi heshima kulu;
\v 5 Ajol kan magder arufu hukum juwa to wagder kefin ayinu wara juwa te Rabbana.
\v 6 Ma wede ab lisa geeru mbari, kede uwo ma sulu uwote fo kalam uwo biwaga fi ida te sheitan.
\v 7 Gifaa nowo kede uwo gi kun ligo anas te bara gi wonusu fugu uwo kuwesi, okede maaja waga fi shatama me mtego te sheitan.
\p
\v 8 Ya jede me ana ab giso kidima fi kanisa kaman umon kede kun ligo umon endisi hishima mon kede kun anas te haki ab magi asurub merisa anas ab ma gi taman sokolin te anas.
\v 9 Ligo umon gi hafiz siri te amin me roho ab kuwesi.
\v 10 Gifa kede umon ligo imtihaan dukur kede umon abidu so kidima te Rabbana ligo umon ma endisi sokol yoyote a bi kelem gali mon arufu ma.
\v 11 Ya fi jede me nuswana kede kun je anas ab endis heshima ab ma gi gata wara anas ab ma gi sakaran anas ab te haki fi kulu.
\v 12 Anas te kidima ab rujala kede umon kun ligo umon endis mariya wayi ligo umon gi hukum yala toumon kuwesi me juwa toumon kaman.
\v 13 Kalam anas ab kala so kuwesi mon gi ligo bambara kebir ab kuwesi me kungow fi amin Yesu Kristo.
\p
\v 14 Ana katif neeta wede ligo ana arufu ana gura ja neeta gwam;
\v 15 Lakin kan ana chelewa kede ita arufu namna ab giso kidima fi bey te Rabbana, ya kanisa te Rabbana ab hayi, nsonda me msingi ab te haki.
\v 16 Ab kaman mafi fogo kabasi siri te kafu Rabbana. Ya kalam ab kuwesi uwo ya ja ayinu fi gildu dukur wedi nowo hidaya fi roho ayinu uwo nas malaika ayinu uwo fi beelana dukur rudu uwo fi duniya dukur sulu uwo fi heshima.
\c 4
\cl Sura 4
\p
\v 1 Lakin roho giwonus fadi gali fi yom te mwisho bija kun anas ab bija wassa min amin ligo umon gi ayinu roho ab gisulu anas fi awja me taalim te sheitan,
\v 2 Kalam unaafiki te anas ab kabas ligo gi haragu roho toumon me chuma ab haari.
\v 3 Ligo umon gi aba, joju gi aba anas kede ma akul akil taanin ab Rabbana ja kalagu sabab te shukur uwo anas ab amin umon faham haki.
\v 4 Kalam kila mahluk te Rabbana kuwesi mafi te jada kan bi amurugu ligo shukur.
\v 5 Kalam gi nedif uwo me kalam teRabbana me womba.
\v 6 Ita kan bi fahamisha akwana me kalama dolde ita bija kun ajol te kidima ab kuwesi ab te Kristo Yesu ligo ita gi kun kebir te kalama te amin me ta taalim ab kuwesi ab ita fatiliya.
\v 7 Lakin taalim ab ma diin ab te awirin ya aju kede ita seebu, alim ita me kafu Rabbana.
\v 8 Kalam taalim te gildu gi awur fi muda siya lakin kafu Rabbana gi awun fi kalama kulu kalam fi fogo ahadi te hayi te assede me te baden.
\v 9 Kalam wede taasil wugifaa kede amin mo kulu.
\v 10 Kalam ya ina gi so me gudra kalam ina ja ahadi me Rabbana ab hayi ajol te hidaaya te anas kulu lakin zaidi ne anas ab amin.
\v 11 Amrisha anas wu kede ita alim umon.
\p
\v 12 Ajol yoyote kede ma sulu ita te tey kalam ita yowele lakin kun (example) ne anas ab amin fi wanasa fi masi, fi aju, fi amin, me kun ajol ab adil.
\v 13 Ladi ana bija zidu gudra fi agara me ingili me taalim.
\v 14 Mata seebu zawadi ab fi fu ita abnedi neeta je naabi me kutu fogo ida te aju siya.
\v 15 Wede feker fogo kede ita kun fogo; zidu taki kede beenu noumon kulu.
\p
\v 16 Chunga ita me taalim taki zidu fi dolde kalam kan ita so jede ita bi ligo hidaaya ita baraw me anas ab gi fatiliya ita.
\c 5
\cl Sura 5
\p
\v 1 Mata koro koro me ajusi kede ita kelem nowo je baba taki yal wele je akwaana:
\v 2 Nuswana ab aju siya je wazze taki, yala ab duga je akwaana taki banaa fi adil kulu.
\p
\v 3 Kede ita wedi noumon heshima nuswana ab rujala toumon ja mutu.
\v 4 Lakin mariya ab ragi to ja mtu kan uwo kun ligo uwo endis yala aw wazuku, kede umon gidam alim sobisesi ne anas te juwa toumon me lipa wazze toumon: Kalam wede ya gi rudu gidam Rabbana.
\v 5 Lakin ab bi kun namwandu taasil dukur seebu uwo barraw ab gi sten Rabbana odusman fi womba min na hari me fileli.
\v 6 Lakin ab hafla gi hihu nowo ogi kun me nutu sala kan lisa hayyi.
\v 7 Me dolde ked ita amrisha umon kede umon ma kun me makosa yoyote.
\v 8 Lakin ajol yoyote kan ma bi ayin wara anas to, zaidi anas te juwa to ligo uwo abba amin uwo ya batal futu ajol ab abba amin.
\p
\v 9 Namwandu kulu ma bi katifu uwo kan uwo magi tim sana (60), ab ja joju uwo me ragi wayi.
\v 10 Ajol ab bi rudu kalam so kuweso; aw uwo arfa yala aw uwo karibisha difana, awuwo beredu anas ab nedif kura, aw uwo kun ligo uwo kan gi ligo taa, aw kan uwo kan gi fatiliya kidima kulu ab kuwesi.
\v 11 Lakin nas namwandu ab lisa dugu kede ita gi abba umon kalam kan umon bija abidu so kidima te zina gidam Kristo ligo umon aju joju.
\v 12 Ligo umon gi so makoda kalam umon jada iman toumon tawlan.
\v 13 Umon kaman gi alim kun anas ab kisilan umon gi masi masi fi kambi kulu lakin kede umon ma kede kun kasalan, umon kaman endis lugambo me kajanja ligo umon gi wonus kalam ab ma endis faida.
\v 14 Ya ana aju ab lisa dugu kede joju umon kede umon weledu yala kede umon ayinu wara juwa toumon, kede umon ma gi wedi ne aduyi nafas sika ab uwo bi futu kede uwo sitim uwo.
\v 15 Kalam fi asede fi mon umon ab geeru fi fatiliya shaitan.
\p
\v 16 Mariya yoyote ab gi amin, kan uwo ayinu nas namwandu okede awun umon, kede kanisa ma kede kun me tegil kede umon awun nas namwandu mara wayi.
\p
\v 17 Anas ab wazze ab gi hukum kuwesi kede wedi noumon heshima mara tinen zaidi ab gi kutu gudra fi taalim.
\v 18 Kalam kitaba t zaman gi kelem gali, mata sidu kasma te bagara ab gi kuruju akulu. Ajol ab gi so kazi ogi faa malipo to.
\p
\v 19 Mata gi rudu telim fi ajusi kan ma fi ushahidu tinen aw talata.
\v 20 Anas ab gi karabu kede ita haya umon gidam te anas kulu me anas taanin kede kafu.
\p
\v 21 Ana gi wassiya ita gidam Rabbana me Kristo Yesu me nas malaika ab me nigitu chunga ita ligo ma fi weeri ita gi waga wen, mata so kalam kalam kede ita.
\p
\v 22 Mata so haraka fi kutu ida fi ajol yoyote, mata so bakan wayi me batal te anas taanin.
\v 23 Mata gi asurub moyo barraw kede ita asurud fi merisa siya kalam batna taki siya lajal ayan.
\v 24 Fi anas ab batal toumon fi fadi ligo gi sulu umon kede umon ruwa so batal metaanin gi tala noumon min wara.
\v 25 Ya jede kidima ab kuwesi gi kun fi fadi sala kan ma jede nija weeri uwo.
\c 6
\cl Sura 6
\p
\v 1 Anas ab gi hukum nas laabi kede gi arfu nas kubarin toumon ligo umon faa heshima de kulu, asma ta Rabban me taalim tena kede ma gi sitim.
\p
\v 2 Anas ab endis nas sidi toumon ligo umon anas te iman, mata kum futu ena fugu mon kalam umon akwaana; lakin kede umon zidu kadama umon kalam anas a gi so kidima ligo umon wayi mon gi amon kaman aju umon. Alim dolde kede ita kutu fi injil.
\p
\v 3 Ajol yoyote kan bi alim mun gulub ligo uwo ma gi amin me kalama te hayyi ya te sidi tena Yesu Kristo me alim namna te kafu mo Rabbana.
\v 4 Ligo ogi weeri weeri uwo oma endis sokol yoyote ab uwo gi faham illa takabur me so mpako me dusman ab te kalam ya gi tala fogo tyel, korokoro, satama, me zambi ab gi shinda je lim Rabbana me sokol taano,
\v 5 Juru laabil te nas ab agal noumon ma, anas ab ma endis hakki ligo umon gi fekeri gali kafu Rabbana ya ligo faida.
\p
\v 6 Lakin kafu Rabbana bakan wayi me ma weri weri ya faida ab milan.
\v 7 Kalam ina ma lisa jibu sokol yyote fi duniya kalam atta ina ma aeja amurugu fogo sokol.
\v 8 Lakin kan ina endis akili me gumasa wede bija tim ina.
\v 9 Anas ab aju kun me utajiri mon gi waga fi imtihan me mtego, me taman te awiri ab gi kutu kede ajol wodur kalam ab gi kutu ajol kede wodur.
\v 10 Kalam aju sokolina ya sika te ligo musiba kulu fi anas ab gi koore mon aju wede mon dukur gi attan umon me sunga milan.
\p
\v 11 Lakin ita, ajol te Rabbana jere boyi min dolde kede ita fatiliya hidaaya, kafu Rabbana, amin, aju, subra, me kun bari.
\v 12 Duaman seme lakin dusman te amin robutu gowu hayyi ab ma gi kalasu ab ja naadi ita dukur ita natik nataka ab kuwesi gidam ta shuhadaa ab milan.
\p
\v 13 Ana gi wassiya ita gidam Rabbana ab gi wedi hayyi, me Kristo Yesu ab kelem ne ena natik ab kuwesi ne Pontiyo Piraato;
\v 14 Chunga nafsi taki fi amri ab ma fogo alama ab ma fogo lawama, ladi wakti ab sidi tena Yesu Kristo bija.
\v 15 Ab obija weri fi mwisho to sidu gudrs ab gi heshima te anas ab gi hukum.
\v 16 Uwo ya ma gi mutu ogi gen fi taa aw nuuru ab ita ma agder juru uta jambu to ajol kulu ab lisa ita ayinu ma mafi ajol ab agder ayin uwo. Kede wedi nowo heshima me hukum ab ma gi kalas Ameena.
\p
\v 17 Kede ita kelem ne tajirim ab fi fi wakti te asede, kede umon ma kede kum me takabbur, sala kan amin utajiri ab umon fi mo ab ma gura kun te kila wakti lakin Rabbana gi wedi ne ena kulu sabab te utajiri kalam kede ina furai me wede;
\v 18 Kede umon gi so seme kede umon kun tajirin fi kidima ab kuwesi kede umon kun anas ab gi gesim, kede umon kun wayo;
\v 19 Ligo umon gi hafiz ne nafsi toumon sokol te beden fi wakti ab gi ja ja dukur kede umon ja robutu hayyi toumon mara wayi.
\p
\v 20 Akwe Timotheo chunga sokol ab hafiz ne eta ligo ita gi juru ita boyi fi kalam ab ma fi ab ma te Rabbana me dusman me kalama ab te faham ab gi nadi jede fi kabas;
\v 21 Fi anas ab gi kelem gali umon fi mo mon meelu fi amin. Baraka kede kun me etakum.