ior_reg/60-JAS.usfm

\id JAS
\ide UTF-8
\h James
\toc1 James
\toc2 James
\toc3 jas
\mt James

\c 1
\p
\v 1 ኧጎይታቪ ኧጌታ ኢየሱስ አገልጋይ ኧኸረ ያዕቆብ በአለም እንእ ኧትቭራጨዉዋ አስረ ዉርኤቸ እእስራኤል ጥቭ ፤ወገሬት አሁዋ አህር ። ጅጓረቪ ፈተናቭ
\v 2 ኧስማትኞ ኖኦራ ጅጓረ ቲስርአቨሁዋታ ኧገክር ኧሳርሁዋ ፤
\v 3 ብእምነታሁዋ ፈተና ቲሰርአቨሁዋታ ፤ፋራሂነዳሁዋ ቲደቭር ያረኸ ትሂሩዋ ።

\v 4 በፋራይሂነዳህዋ ትግስት ቲቭኧተዉ ኧትሶጎዉታሁዋ አታአር ታይቀቭርቨሁም ጥርርቪ ሙርአ አአር ትሆሩዋኸ ያቨቃሁዋታ አአር ኧህር ።
\v 5 ታሁዋ ግት ማንኝእሞኋ ኧኋርት ባአነሰንአትሞኋ ታይቀርጥ በዋቢነድኋ እንእ ሜንአ ዪቭካ ጎይታ ኧሳአር ኧሁድቭ ያኩሴ ።

\v 6 ዘንጋኋ ጭን ታይጥራጠር ብእምነት ኧሳአር ኢጥራጠርካ ሰቭ ንፋስ ኢገፋኩዳቪ ኢገኧዝካቭ ኧቫር እሃ ኢቨስር ።
\v 7 ሃአ ሰቭ ተጎይታይ አታአር ኧረህቭኴ አይቫር ።
\v 8 እመዳ ኢኸርካ ሁዳ ዉርኤት አሳብ አነነመዪ በቨያሞኋ በዉርኤት አሾወ ኧኸረዴ።

\v 9 በዱኒያ ዚጋ ኧኸረ ኧሰም ጎይታ ያረእኲ ኧኸሬ ኧሳርኩ ።
\v 10 ኑኡ ዱኒያ አነነዳ ምስ ዱኒያኋ ቢቀቭር ኧሳርኩ እመኸቭ ኧሁርት አኖዳ ሁዳ ፤ ኣዋ አለም ዱኒያ ኧሳአር ማማኸ ኢትራገፍካ አአር ኧኸረዴ ።
\v 11 ኡዋየቭ ዋአ ቲቬኪርኩዳ ሸቭረሬ ዬቭኩ ማማሞኋ ኢትራገፍ ፤ደቨርሞኋ የኧፋ እመኸቭ ደንገኘ ሰቭ በቬና ትርኩመ ቲቭር የኧይ።

\v 12 ጎይታ ጉርዳ ኧገፓመኸ ኢረጂዳ ሁኖዋ ዪቭ ኮታ ኧሂዎት አክሊል ኢቴኤፖሩዋይ ኧኸሬ በፈተና ግዚየ ተፓ ኢትሸከቭካ ሰቭ ኧትዳረዳን አአር ፤
\v 13 ጎይታ አአትዎኋ በዉጥጥ አአር አይፈትሪ ኧኸሬ ማንኝእ ሰቭ ፈተና ቲሰርአወዳ «ጎይታ ፈተረዪ» አይቫር ፤ ሁድቭ አትሞኋ አይፈትርካ ።

\v 14 ዘንጋ ጭን ሰቭ ኢትፈተርካ ሁዳ በገግኋይ ሙጥጥ ተመኛት ቴኤመ ኢትዎተቲ ኧኸረዴ።
\v 15 ተህም ቀጥወ ተመኛት በሰቭ ሂን በትጥቨሰሰ ቀጥወ ባጢር ኢኢኝ ባጢርቭ በትራኧ ቀጥወ ሙድ ኢኢኝ ።
\v 16 ኧረንድሁዋታ ኧሰማትኞ ባአታአር አትቆቁዋ ።

\v 17 ወሄ ማርቪ ሙርአ በረካቭ እንእ ኢዎኦታ ሁዳ ተፎሬ ተጎይታኔ ፤እመዳ እንእ ኢቫአካኧጥራረኸ ኧዘዉርት ዌ ኧትሽጓጎርት ቴነወ ኧቭርሃን እንእ አባ ተኸረ ተጎይታኔ ።
\v 18 ጎይታ ኧፍጥረትዃ እንእ በህር ንኸርኔ በገግኋ ፍቃድ በዉረ ቃርኋ ኤኘንረ ። ስቭኤቶ በቬና አዎኦርት

\v 19 ኧረድሁዋታ ኧሰማትኞ ዋዳ አይተሳሁዋ ሰብ እንእ ኢሰቭአይ ጋዳይ ኧህር ኢዝሬኲሜ ኢቨኧችሜ ዝዛ ኧህር ።
\v 20 ኧሰቭ ማአት ኧጎይታ ፅድቅ በሰቭ ሂን ኢረቭረኸ አዬካ ።
\v 21 እመኸ ኧኸሬ ሙጥጥነድቪ ቡሼእነድቭ አኖዳ ዘንጋ እንእ ተሂናሁዋ ኦኦሙ ቋሹሙታ ፤ጎይታ በሂናሁዋ አወናን ነብሳሁዋ ያተርፊ ኢኸነዳ ቃር በጋዉነድ ተኦዎሩዋ ፥

\v 22 ቃርኋ ኢዝሬኩዳ ሁዳ ኦንኦዋ ባኸሬ እማት ትሶዉኦታ አአር ሂንተሁዋ ገጋሁዋ አትቆቁዋ ።
\v 23 ቃርኋ ሰምአታ በቬና አያዎኧር ሰቭ ኢፍትኋ በቭስታወድ ያዥካ ሰቭ ኢቨስር ።
\v 24 ኣዋኸ ሰቭ ኢፍትኽኋ በቭስታወድ አሸታ ያር ፤ ቢኸርቭ ህመጋ ኢፍትዃ ምር ኡቨስረኸ ኢትረሳኩ።
\v 25 ዘንጋኋ ጭን ነታ ያዋአኩዳ ኧቂጢየ ቂጫ አሸታ በሁዳ ኢትሸከቭካ ሰቭቪ ኧሰምአን ቃር ታይትረሳኩ በቬና ያዎኦርኩዳ ሰቭ በቬናኋ ኧትዳረ አአር ኢኸር ።

\v 26 ባአነቨድኋ ታይጬፕ ኧጎይታ ኧሰግድ ይቭካ ሰቭ ኧገግኋ ኢቄቅ ሃይማኖትሞኋ ማንኝእምን አአር ፤ [አያጌኲርካን አአር ]
\v 27 በጎይታ ኢፍቲ አዎር ኤኖወ ሐይማኖት ኧዋርት አቭ ታአዶድሁኖዋ ኧዎጅኮዋ ዴንጋቪ ገማመህና ኧዎጅኳ እሽቻ ባጀገረና አአር ኧኦጉዥትቪ ብእም አለም ታንዳ ሙጥጥ ሜና ኧትጦፑትን።

\c 2
\p
\v 1 ኧሰማትⶉ ክብር ባነንዳ በጌታንራ ብእየሱስ ክርስቶስ ታአቩሩዋይ ኧኸሬ ፤አአትሞኋ አታትቋቁዋ ።
\v 2 ኧወርቅ ሻሸራ ኧኸንአዪ ያዙዎኝካቭ ሁጅር ኧትኸተረ ሰቭ አሁዋይ ቢቫአ ህመኸ አነኣቪ ጉስ ሁጅር ኧትኸተረ ዚጋ ምስ አሁዋ አነሁኮዳ ኤኤዲ ቢቫአ ።
\v 3-4 ያዙዎኝካ ሁጅር ኧትኸተረ ሁዳ አጋጊዥተሁዋ እኩ አሄ ኤኤዲ ዋዳን በዋ ወሄ ቧርጩማ ቸራ ብቱሪ ዚጋ ሁዳ ጭን አኸ ሄኤዲ ተሰገቭ ዌ «ሄኤዲ ገዳይ ዉዪአ ቸራ» ብቱሪ ብእም ኧቫአ በሰቭ ግት ኧትቋቁትሻሁዋ አሃራ? አትቭ ባትቋቁት ቱፎርጁዋኸ አትሂርታ?

\v 5 ኧረድሁዋታ ኧሰማትኞ ሱዉኦዋ ፤ጎይታ ብእምነት ደንገኘ ኢሆሩዋመዪ ፤ኢረጂዳቭ ሁኖዋ ተስፋ አቨኖዋ መንግስት ኢቴኤፖሩዋይ በዋ አለም አኖዉታ ዚጋ ሰቭ አንሸፐተዳ?።
\v 6 አሁዋ ጭን ዚጋ ቱቆርጩዋ ፤አአሁዋ ያትጨንቁኩዋታ ሁኖዋ ደንገኘ ሁኖሽ አሆሩዋታ? ኧርፍርድ ቢድ ኢትሸኮዉዋታ ሁኖሽ አሆሩዋታ?
\v 7 አሁዋ ኧትኸናህኮ ኧከበረ ሹቭ ኢቆሩዉታ ሁኖሽ አሆርታ?

\v 8 በመጣፍ «ናማጂያኸ ኧገጋኸኸ ኧንአ ንቨድ »ቧርምሙ ኧጣፊ ኧጎይታ መንግስት ቂጫ ፤ብእየሁዋ ወሄ አአር ቲንኦዋ ።
\v 9 በሰቭ ግት ብታትቋቁዋ ጭን ባጢር ቲንኦዋ ቂጫቭ ኧጣስሁዋሜ ትትቅንጩዋ ።

\v 10 ሰቭ ቂጫ እንእ እየታ አትሁዳ ቢያአፋ ቂጫ እንእ አአፋ አአረኸ ኢትቬዘር ።
\v 11 «ተረከቭኸን እስቻ ሁጅር አትድምድ» ኧቫረ ጌታ ህመኸ ፤«አትእትርቭ»ባረ ብእም ኧቫአ ተረከቭኸና እሽቻ ሁጅር ባትደምድቭ በኧተርኸ ቂጫ ጣስኸ ።

\v 12 ቃርማሁዋዪ ሜናማሁዋ በነጣነት ቂጫ ኢትፈንድወሁዋኸ በኋርት ኧህር ።
\v 13 እመኸ ኧኸሬ አፉ ኧቫረ ሰብ እንእ አፉት አይቫር ኢትፈንዱወ ቢኸርቭ አፉት ኧፍርድ ኢኢምኩ።

\v 14 ኧሰማትⶉ አት ሰቭ እምነት አነኒ ቢይቭር ወሄ ሜና ጭን ባይረቭርኩ ምር ኢንአነዴ? ኧዋኸ አይነት እምነት ያተርፍኲ አይኸነዳ ።
\v 15 ኢዎርኧታቭ አአርቪ ኢሰጭታቭ አአር ኤነኖዋ ክርስቲያን ኧሰማትቪ ኧተማትቭ ቢረቩሩዋ ፤
\v 16 ታሁዋ ግት አት ሰቭ ኧቭሲየሁኖዋ ያትሲእኮታ አአር ታዪቭኮዋ ቦጎሬት ሆሩዋ አይዠዥሁዋ ኡፎዉዋ ቢይቭኮዋ ምር ዪንአኖቴ?
\v 17 ህመኸ ወሄ ሜና ኤኖወ እምነት ኧዎንደዳን አአር ።

\v 18 ዘንጋ ጭን አት ሰቭ «አኸ እምነት አነነኸ ፤ኢያ ሜና አነኒ »ቢይር እንዴ እምነታኸ ተቬና ባይትርቭ አተሼ ፤ኢያቭ « እምነትኛ በቬናኛ አተሽኸሴ ፤ኧቫኩሴ።»
\v 19 እማት ጎይታ አነኸ ትሂር ወሄን አአር ፤እሸዳ ሴጣንቭ ያአቩሩዋ በፈራድቭ ያረኧድኮዋ ።
\v 20 አኸ ጋዋ ሰቭ ሜና ኤነወ እምነት አያጔኲር አአር ኧኸረኸ አትሂርካ ?

\v 21 አባንራ አብራሃም ትኮኋኢሳቅ ህትቭ ቢንኧኮዳ ኤኤዲ ኧጎይታ ህትቭ ኢኸሪ ባቴኤነቨንጋ በቬና አንፀደቀዳ?
\v 22 ብእመዳ አአብራሃሚ እምነት ተቬና እማቲ ኧረፐረመኸዪ ኧኦዎርትሞኋ በቬና ያቲሽ ኧረፐረኸ ኧዥ ።
\v 23 በመጣፍ «አብራሃም በጎይታ አመረ ፤ኧኦዎርትሞኋ ፅድቅ ኸረ ተቬዘረነ » ኧዋሪ ኧመጣፍ ቃር ኸረ ።ሁድቭ ኧጎይታ ናማጂ ቧሪ ።
\v 24 ብእመዳ ሰቭ እማት ቦኦዎርት ታይኸር በቬናቭ ኢፀድቀኸ ታዡዋ ።

\v 25 እመኸቭ ተረከቨች ገማ ሁጅር ትደምድ ኧረፐረች እረአብ ዩዉሪያዳ ምሽት እእስራኤል ኪሸረኘ በቪድሻ ቴኤፐረችታ ቤኤኛ መያ ያሩዋኸ ኤፐቺ ሂድቭ በወሄ ሜናሻ ተነፈች [ፀደቀች]።
\v 26 ተነፍስ ኧትቫይተረ በሰር ኧዎንደ አአር ኧኸረመኸ ህመኸ ሜና ኤነነ እምነት ኧዎንደዳን አአር ።

\c 3
\p
\v 1 ኧሰማትኞ አስተማሪ ኧኸነ ኢና ኢረእካ ፍርድ ንቴኤፐርነኸ ቲሂሩዋይ ኧኸሬ ታሁዋ ግት ኖኦራ ሰቭ አስተማሪ አይህር ።
\v 2 እንእቨንራ በሮኦራ ዘንጋ ንድቫፐርነ በቃርኋ አይድቫፐረ ሰቭ በረፐረ እንእ ኤኤድኋይ ኦኦሮት ኢኸነዳ ጥርር ሰቭን ።

\v 3 ፈረዝ ኢቴኤዘዡዋኸ ሉጓም ባቃሁኖዋ ናቸፍርኔዮምታ እንእ ኤኤድሁኖዋይ ኧሳረንረኸ ኒኢዝዝኔዮዋመኸ ።
\v 4 እንዴ መርከብ ኦዢዮዋ ማንኝእ ኑኡየ አአርቪ ቱኧቭ ንፋስ ኢገፋኮታ አአር ቢሆሩዋ መርክብ ኢረዳካ ምስ ብእሲየ መሪ ኧሳረን ኤኤዲ ኤፐ ኢዎስትኩ።

\v 5 ህመኸ አነቨድ እንሲየ ኧገግንራይ ምሲየ ቲኸር በሮኦራ አአር ኢትጒይኴዝ ኑኡየ ድቭር ብእሲየ እሳድ ኧተኸ ነተደ ያርኧኸ ቦስሩዋ ።
\v 6 አነቨድቭ እእሳድነኸ ፤አነቨድ በብሲየንራ ግት አነዳ ሙጥጥ አአር ኧቬንአወ ፍጥረትን ፤አነቨድ ሙርአ ምሲየንራ ያሰንህ አአዛብ እሳድመኸ ምሲየንራ እንእ ኢቬኪር ።

\v 7 በድቭር አነዳ አዊቪ አፉቭ ህመኸ ባአፎር ፎር ኢትሻዉታዪ በቫርቭ እሃ ከስ ኢረቩርታ ፍጥረት እንእ በሰቭ ተጎዦሙ ።
\v 8 ዘንጋ ጭን አረቨድኋ ኢገዛይ ኢኸነዳ ሰቭ አቸቭ ኤነዳ ። አነበድ የኧትርካ መርዝ እኧቬንአዎዪ ፎያድቭ ኤነነ ሙጥጥን አአር ።

\v 9 በሁድቭ አቦንራ ጎይታ ናትሼኩርነ በሁድቭ በጎይታ መርክ ኧትፎጠሩዋ ሰቭ ንሰድቭነ ።
\v 10 ትእማት አነቨድ ደረትቪ ስድቭ ኢዎኦዋ ኧሰማትኞ ዋኸ ኧሁርት ኤኖዳ ።

\v 11 ታአት ጭርጭሪየ ኢኢቭካዪ ኢቨርርካ እሃ ኢገድዲ?
\v 12 ኧሰማትኞ ኧቭርቱኳን ኤኧ ኧዎይን ቡስር ፤ኧወይን ኤኧቭ ኧቭርቱኳን ቡስር ያፎዪ ኢኸኔ? ህመኸቭ ቲቨርርካ እሃ ኢኢቭካ እሃ ኢረሁዉዪ?

\v 13 ታሁዋ ግት ሃሪቪ ኢቬስርካቭ ሰቭ ማንተን? በረፐረ ኧኋርት ባኖዳ ቦወሄ ኑሮኋ አተሽ ።
\v 14 ዘንጋ ችን ኢቨርርካ ቅናትቪ ገግቭ ኧርዎጅት በሂናሁዋ ቢረቭር ኑኡነድ አይተሳቫሁዋ ኧዉረ በኸረ አአር አትፉጥሩዋ።

\v 15 እምም አይነት ሃሪነድ ኢረሁዊዳ ሁዳ ታአለም ተቨሰርቪ ተሰይጣንምን ባኸሬ ተጎይታይ አኸረዳ ።
\v 16 ቅናትቪ ገግቭ ኧሮጅትቭ ባኖኮዳ ኤኤዲ መራክስቪ ሙጥጥ ሜናቭ እንእ ኢረዉሩዋ ።
\v 17 ዘንጋኋ ጭን ተጎይታይ ኢረሁዊዳ ኧኋርት አወተራቸኋ ጥርርን አአር ተህም ቀጥወ ሽኛት ኢረድካን አአር ፋራይሂን ፤አኪያ ይቭካን አአር እአፉ ይቭካን አአር ወሄይቭ ቡስር ኧቬንአወዳን አአር ፤ኧትቋቁትቪ ኸጥነድቭ ኤኖዳን አአር ።
\v 18 ወገሬት ኢረጅታ ሰቭ ወሄነድ ዘንኦምታ ኧፅድቅ ቡስር ኢራጩዋ[ቁጥቁጥ]ዪንኦዋ።

\c 4
\p
\v 1 ባሁዋ ግት አነዳ አርቪ መራክስቭ ተኧቲ ኧዎኦታኖዋ አአር? በቭሲያሁዋ ቸናታ ቲትዋካካ ተገጋሁዋይ ሙጥጥ ተመኛትሽ አሃራ?
\v 2 ኧትሜኘዂ ሁዳ ትትዎሁርታ ሰቭ ቶኦትሩዋ ፤ኖኦራ አአር ትትሜኙዋ ኧትሜኘሁይ ሁዳ ባነከሁዋ አሁም ታሁም ትትራኮሹዋ ትትዋጁዋ ፤ አትጠሊዩዋይ ኧኸሬ ኧሴኧሁይቭ ሁዳ አትረሁዉታ ።
\v 3 ብትሶኦርሙ ኧሳአርኊ ሁዳ አትረሁዉዋ ሁዳ ኧገጋሁዋ ኢሽርሁዋይ በቩጥጥ ጩሞጨ ትሶኦሩዋይ ኧኸረዴ።

\v 4 አሁዋ ህዳተኘ ሰቭ ዋ አለም ኢረድካ ሰቭ እንእ ኧጎይታ ጠራት ኸረ ኧዋርትን ።
\v 5 ህመኸ መጣፍ« ጎይታ በሂናሁዋ አወናን መንፈስ ፤እማት ኧሁዳ አአር ቱሆሩዋይ ኢሲእ » ኧቫረን ሁዳ እመኸ ኢቨስርሁዋ?

\v 6 ዘንጋ ጭን መጣፍ«ኧትቢተኘ ሰቭ ጎይታ ኢትራከስኮዋ ፤አአመኛታሞ ሁኖዋ ጭን ፀጋ ኢቭኮዋ»ኧቫረ ሁዳ ኧዋዳን።
\v 7 ባቴ አሁዋ ኧጎይታ ተጎዦዋ ፤ሴጣን ጭን አትሳድጂ ፤ታሁዋ ያረእሴ ፤

\v 8 ኧጎይታይ ተኧነዉዋ ሁድብ አሁዋይ ኢተኧነቭሴ ። አሁዋ ባቲረተኘ ሰቭ ኧጃሁዋ አዉጥሩዋ ፤አሁዋ ትጥራጠርታ ሰቭ ሂናሁዋ አጥርርዋ ።
\v 9 ተተጠረቁዋ ተዎጠጩዋ [ኦዝኑዋ] ፥ቡሁዋቭ ፥።ዳይአሁዋ በቪኸ ኧሳርትማሁዋ ባንሳርት ኧትሰገር።
\v 10 በጎይታቭ ኢፍቲ ገጋሁዋ አቶኦንሹዋ ፤ሁድቭ ያረእሁዋሴ ።

\v 11 ኧሰማትኞ ገግተገግማሁዋ ሹዉ አታአፎዋ ፤ ኧኧሰምኋ ሹዉ ያአፋካዪ በኧሰምሞኋ ኢፈርድካ ሰቭ በቂጫ ፎር ሙጥጥ አአር ኢዝሬክ ፤በቂጫቭ ፎር ኢፈርድ ፤በቂጫ ብትፈርድ ዳኘ ኸርኸ ፈንድኸ ባኸሬ ቂጫ አኒኢየኸዳ።
\v 12 ቂጫ ኢካቪ ኢፈርድካቭ እማት ጎይታን ሁድቭ ያተርፍሜዪ የኧትርሜ ኢኸነዳን አአር ፤ዘንጋ ጭን በራማጂያኸ ፎር ትፈርድካ አኸ ማንደንኸ ?

\v 13 አሁዋ «ኦኳ ዌ ነገ ኤኛ ገኘ ሆይተነታ በሃይ አት ህርቭ ንቸናነዴ ፤አቂጭተነ ናተርፍነዴ »ቱዉርታ አሁዋ ሱቭኦዋ ።
\v 14 ነገ ኢኸርካ አአር አትሂርታ አሁዋ ምርአፈድንሁዋ? ቀሪመጋ አሸዊታ ህመጋ ኢዎሁሪዳ ተንንሁዋ ፤

\v 15 ብ ኢረእ አሁዋ ኦዋርት አነቨሁዋታ ሁዳ«ጎይታ ፍቅጅተ ብነቭርነ ዋዳ ዌ ሃዳ ነንአነሴ »ቧሩዋ ።
\v 16 አሁዋ ጭን ዋዳ ኧዋርት ቸኧሁምታ ፤በትቢታሁዋ ትትጒያኴዡዋ እእመኸ ኧትጊያጔዥት ሙጥጥን አአር ።
\v 17 በዋቴ ወሄ አአር ኦንኧት አኖኸ ቲሂር ወሄ አአር አዬቭ ሰቭ ባጢር ዬቭ ።

\c 5
\p
\v 1 ዋአካቭ ደንገኘ አሁዋ የሁዋ ሱዉኦዋ ኢሰርአቨሁዋታ ጅጓረ አአር ቡሁዋ ፤ዋይ ዋይቭ ባሩዋ ።
\v 2 ዱኒያሁዋ ቦሸ ባረ ሁጅርማሁዋ ንእስ በንአን ።
\v 3 ወርቅማሁዋዪ ብርማሁዋ ቦሸ ባረ ቦሸ ኧቫረሜ ኧኸሬ ዘር ኢኸርቨሁዋቴ ።ምሲየማሁዋ እእሳደኸ ኢቬኪርኩዴ ኣዋ ኢኢ ዘቨር ኢኸርሁዋታ አአር ኖኦራ ዱኒያ ቁጥ ኤፐሁም ።

\v 4 ኋሩዋ አፈራሁዋ ቲቹጁዋ ኧዋአሩዋ ሰቭ ኧካስህኊ ዶሞዝ ባሁዋ ፎር ኮ ይቭር ዝኝኧ ያጭታ ሰቪ ኮት እንእ አአር ቢኸነዳ ጎይታ እንዝር ገፓ ።
\v 5 ባአፈር ፎር በትጋኦትቪ በሳርትቭ ነፐርሁም ምሲየማሁዋ ያጪዳ ቧዉራኸ አቄኘሁም።
\v 6 ታሁዋ አንትራኮሱዋ ጥርር ሰቭ ፈንድህኮም እኧተርሁዮምቭ ።

\v 7 አካ ኧሰማትኞ ክርስቶስ ቲቫአ ስን ተቋቶዉም ኦሮዋ ፤ ቻዋጅ ኢኢፍትመዪ ኢእሜ ዲየ ቲረህቭ ስን ፈነኸታ ወሄ አአፈር ሙርት ይኢየኸ ኦዡዋ።
\v 8 አሁም ህመኸ ፍሮሁዋ ጌታ የሱስ ኢቫአዎዳ ግዚየ እኧሰንአይ ኧኸሬ ተቋጦዉም ኦሮዋ ።።

\v 9 ኧሰማትኞ አሁም ታሁም አትቁጨጩዋ ሃአ ባኸረ ኢትፈንድወሁዋቴ እኩ ኢፈርድካ ሁዳ ማአ ሰንአ።
\v 10 ኧሰማትኞ ኧጎይታ ሹቭ ነሾሙ ኧዝሬይከዉዋ ነቢ ኧሰንአዎዋ ጅጓረ ቴኤፖርሙታ ኢና ወሄ መርኸት ኧሆርንረኸ ኋሩዋ ።
\v 11 ህመኸቭ በፋራይሂነድ ትቶፖሙ ኧትሸኮዉዋ ሁኖዋ «ኧትዳርታኖዋ አአር »ንቭርነየዋ ፤ኢዮብቭ ኧተኸ ኧፈነኸኸ ሰምአህም ጌታቭ ተቀጥወ ኤፐነ አአር አሸሁም።ጎይታቭ ኧቀጥወ ኤፐነ ወሄ ዘንጋ አሸሁም ፤ብእመዳ ጎይታ አፉ ይቭካአአርቪ ሚራቭ ኧኸረኸ አሸሁም ።

\v 12 ኧሰማቶ ትእንቭ አአር ኢፍቲ በሳቫይቪ ባአፈርቭ ዌ በቫንኝእም ዘንጋ ቢኸር አትሩዋ ፤ትዝረኵዳ ዘንጋ ኧዉረ በኸረ እንከ ቧሩዋ ፤ኧዉረ ባኸረ አኸረዳ ቧሩዋ ሃአ ባኸረ ኢትፈንድቨሁዋቴ።

\v 13 ባሁዋ ግት አጀገረን ሰቭ በረፐረ ኧጠልይ ፤ኧሳረን ሰቭ በረፐረ ኧሽኩርት መዝሙር ኧዘምር።
\v 14 ባሁዋ ግት ኤኤመን ሰቭ በረፐረ ኧቤተ ክርስቲያ ባሪቅ ኧህራታ ሁኖዋ በጎይታ ሹቭ ዘይት ኧኋኡሙ ኧጠሊነ ።
\v 15 ቦኦዎርት ኧጠለዪ ጠሎት ኤኤመን ሰቭ አፊያ ኢንአ ጌታቭ ተቫአሾኋ አፊያ ኢንአኩ፤ኤፐንቭ ባጢር በረፐረ አፉ ይቭኩ።

\v 16 እመኸ ኧኸሬ አሁም ታሁም ባጢራሁዋ ተራዘዡዋ አፊያቭ ኢሆሩዋኸ አታሁዋ ጠሊይዋ ፤ኧፃዲቅ ሰቭ ጠሎት ኖኦራ ወሄ ዘንጋ ዪንአ ።
\v 17 ኤልያስ ኢናመኸ ሰቭ ባንደ ዘንጋ ጭን ድየ አያድገኸ አተፓ ጠለየ ።ባአፈር ፎር ሶኦስት ዘቨር ተግት ድየ አናተገዳ።
\v 18 ሃአቨ ጠለየ ተሳቫይ ዲየ አተገ አፈር ብርኧ አረምአ ።

\v 19 ኧሰማትኞ ታሁዋ ግት አት ሰቭ ቶሄ መያ ቢዋአ ፤ኤኛ ሰቭ ኦሄ መያይ ቢዠፕርኩ፤
\v 20 እመዳ ቦስሩዋ ባጢረተኘ ተድቫፐረወ መያ ኢዠፕርካ ሰብ ነብስኋ ተዉድ ያተርፍኩ ኖኦራቭ ባጢር ኢኢፍ።