ior_reg/56-2TI.usfm

\id 2TI
\ide UTF-8
\h 2 Timothy
\toc1 2 Timothy
\toc2 2 Timothy
\toc3 2ti
\mt 2 Timothy

\c 1
\p
\v 1 ቢኢየሱስ ክርስቶስ ቃር በገፓን ኧሂዎት ተስፋኸ ብእግዜር ፍቃድ ኧክርስቶስ ኢየሱሲ ኪሸረኘ ኧኸረ ጳዉሎስ፤ኧኬሸን ኪሸር ፤
\v 2 ኢረጂዳ ትከኛ ጢሞቲዎስ ፤ጠጋ ፥ምረትቪ፥ ወገሬትቭ ትእግዜር አብ ተጎይታመንራ ተክርስቶስ ኢየሱሲ አኸ ኧህር።

\v 3 እማት ግዚየ ታናትሸክቭ ዋአናዪ ምሳአረ በጠሎትኛ አኸ አአር ትናጫምጥካ ኧድረ አቦንራ ኤፐዉዋመኸ በወሄ ቀርብኛ ኧትገዛነዳ እግዜር ሽኩር እቭኩ
\v 4 ኢምባኸ ትናጫምጥ ቡሼኧኸ ኢሽረዪታ አዥሄ ኧትሜኝ ።
\v 5 ኸጥነድ ኤነወ እምነታኸ ኢትዘከዴ፤እእም አይነት እምነት አወተረ በቬታኸ በሎይድቪ ባአዶድማኸ በኤዉንቄ ባነደ ፤ዋአካቭ ባኸ አነኸ ሃርሁ።

\v 6 ብእም ኧቫአ ኧጅኛ ባኸ ፎር ባተግሁ ግዚየ እግዜር አቨናኸ ስጦታ ኧመንፈስ ቅዱስ እሳድ ትሳሳኮኸ አዘግድኸ፤
\v 7 እግዜር ኧደረግቪ ኧርመጀ ገግቭ ተቫጢር ዩኡሮኮዳ ፤ መንፈስ ባኸሬ ኧፈራድ መንፈስ አናቨንረዳ ።

\v 8 ባቴ ኧጎይታንራ አአር ቲኢዲሜ ኧህር ፤ኧሁድቭ ትንቭር በታአከድሁ ቢያ አትቅቀቭጭ፤ቢኸርቭ እግዜር ቢዪኸዳ ደረግ ኧወንጌል ትትቭር ቲያቭ እማቲ መከራ ተኧቨር።
\v 9 እማትቭ ኢና ቴፐኔ ወሄ ዘንጋ ታይኸርቭ እግዜር በገግኋ ፍቃድ በፀጋኋ አተነፈንረ፤ንትቀደስነሜ ኧኸናንረ ሁዳን ፤እም ፀጋ ተዘቨር ዘቨር ኢፍቲ በክርስቶስ ኢየሱሲ አጋድ ቴቨንረ ።
\v 10 ዋአካ ጭን ኧዉድ ደረግ አአፋ በወንጌሊ አጋድ ሙድ ኤነወ ሂዎትቪ እንእ ግዚይየ ኧቦርት ኡኡዋዬ ባዋአን ፤ባተነፈንረ በክርስቶስ ኢየሱሲ ቦኦት ተሄረ።
\v 11 ኢያቭ ኧዋ ወንጌል ወሄ ዋራይ ኢኢዳዲ ኪሸረኘዪ አስተማሪም ኸርሁ ተሾምሁ።

\v 12 እም መከራ ኢሰርአቪዳ ሁዳ በሃ ኧቫአደ ቢኸርቭ አአመርሁን ሁዳ ማን ኧኸረኸ ኧሂሪ ኧኸሬ አንቅቨጭካ ፤አሁንቭ አደራ ሃአ ቀረ ስን ይእዬ ኢኸነኸ ሃርሁ።
\v 13 አኸ ቲያ ኧሰምአኸን በክርስቶ ኢየሱስ ባነዳ ብእምነትቪ በርመጀቭ ህርታ፤ጤነኘ ኧኸረ ትምርት መሰሮ ጥጥ።
\v 14 ቢና ከስ ባነዳ በመንፈስ ቅዱስ ህርታ አዉከ ወሄ አደራ ኧየ።

\v 15 ብእሲያ ገኘ አኖዉዋታ ሁኖዋ እንእቨሁኖዋ ኧሆቾኘኸ ቲሂር፤ፊሎጎስቪ ሄርዋጌኔስቭ በሁኖዋ ግትአነቩዋ ።
\v 16 ኧሄኔሲፎሩዊ ቢደ ሰቭ ጎይታ ምረት አቭኮዋ ሁኖዋ ኖኦራ ግዚየ ኧጅኋ ፈታኒ፤በሰንሰነድቭ በታአጎጅትኛ አቅቨጨዳ ።
\v 17 አቸሸኋ እሮም ገኘ ኧቫአ ግዚየ ሴኧዪ ሴኧዪታ ነከቨዪ።
\v 18 በሃ ቀረ ተጎይታይ ምረት ኢረህቨኸ ጎይታ ምረት አቭኩ፤በኤፌሶንቭ ምርአካ አአር አጔኬሬኸ አኸ ጔከርኸ ቲሂር።

\c 2
\p
\v 1 ባቴ ትከኞ አኸ በክርስቶስ ኢየሱሲ ባነዳ ፀጋ ጃድ ባር/አትቫቅር/ ።
\v 2 በሮኦራ ሰቭ ኢፍቲ ቲያ ኧሰምአኸን ትምርት ኤኤኛ ያትሞሩዋይ ኢኸኖታ ኧታአሞሩዋ ሰቭ አደራ አቭ ።

\v 3 ኧክርስቶስ ኢየስሱሲ ወሄ ወታደርኸ ህር ቲያቭ እማቲ መከራ ተኧቨር።
\v 4 በወታደርነድ ያጔኪርካ ሰቭ አአላቃኋ ሂን ያትሽሪ ጃድ ይቭር/ያትቫቅር /ባኸሬ ተወታደር ሜና ኤኛ አአር አዪንአካ ።
\v 5 እመኸቭ በሩጫ ያትዋትርታ ሰቭ ኧሩጫ ሁዳይ ደንብ ኧየተዉዋ ባትራወኡዋ ሽልማት አይረሁዉታ።

\v 6 ቆዋረ ቻዋጅቭ ቄጠ ተረከቨን ወማ ሟርኋ አወተራቸ ኧኩዉት አኖወ።
\v 7 ኢያ እቭኸዳ ሁዳ በሂናኸ አዉራ ጎይታ ኢሂርካ ሂን አኸ።

\v 8 ተቩድ ኧትረሳ ኧዳዊት ዘር ኧኸረ ኢየሱስ ክርስቶስ ዝግድ ኢያቭ ኢኢድኩዳ ወሄ ዋራይ ዋዳን ።
\v 9 ብእም ወሄ ዋራይ ኧቫአ ኢኢፋደኘኸ ቲያአጉጅኝ ስን መከራ ኧቴኤፐር፤እእግዜር ቃር ጭን ስርም አይታአከድካ።
\v 10 ህመኸ ኧኸሬ በክርስቶስ ኢየሱስ ኢረሁዊዳ ኧትረፉትዊ ኧዘላአለም ክብር እማትቬ ኢረሁዉዋይ እግዜር ኧሸፐተኖዋ ሰቭ ትንር ብእን ዘንጋ ፈነህሁ ኧትሸከቭ ።

\v 11 ዋኸ ይቭካ ቃር ዉረ አንዳን አአር፤ «ተሁዳ እማትሜ በዎድነ ፤ ተሁድቭ እማትሜ አያ ሂተነ ንበርነሴ፤
\v 12 ቲቭኧተነ ብትሸከቭነ፤ ተሁድቭ እማትሜ ንግስነሴ። ብንኸዳኔይቭ ሁድቭ ኢኸዳንረ ፤
\v 13 ሙርቴ ሂንተነ ባትረከቭን ፤ሁዳ እንእ ግዚየ ሙርቴ ኸረ ኢረቭር ፤ኧገግኋ ኢኸዳይ አይኸነዳ» ።

\v 14 ህመኸ ኧኸሬ ዋ ዘንጋ አዝጉጅት አቴእኩ በቃር ባይኩራኮሩዋይ ብእግዜር ኢፍቲ አጤፕኮዋ፤እመዳ አት ጥቅም ኤነን ኢሶዉኤዳብ ሁዳ ያፈርስካን አአር ።
\v 15 አይቅቨጭቪ ኧዉረ ኧኸርቭ ቃር አጬገ ያትመርካ ኧትምሰከረነ ሜነኘ ህርታ ተፈተነ ኧዋአነ ገግነዳኸ ብእግዜር ኢፍቲ ታቲኢንቨኸ አትቫቅር።

\v 16 እእግዜር ክብር ታይኸር አታር ታያጌኲር ዠረኝነድ አርእ፤ብእም ዘንጋ ኧትጠቦጩዋ ሰቭ ትእግዜር ቲያረኡዋ ያሩዋ።
\v 17 ትምርትመሁኖዋ አይደርእ መዛኽ በቭሲየ ኢትቭራጭ ሄሜኖዎስቪ ፊሊጦስቭ በሁኖዋ ግት አነዉዋ።
\v 18 እመሁኖዋ ተዉረ አአር ዎኦም ዣዠ ዩዉርታ ሁኖተ፤ሁኖም «ተዉንድ ኧተሸት ኧዋ ኢፍቲ ኸረ »ተዋ ቀጥወ ተዉንድ ኧተሸት ኤንዳ ቧርሙ አአታትሁኖዋይ እምነት ያትቹኡዋ ።

\v 19 ኧህር ባኸሬ ጎይታ ኧሁዳ አአር ኧሆሩዋ ሁኖዋ ኢሂር እመኸቭ «ኧጎይታ ሹቭ ኢኸራካ እንእ ተቩጥጥ አአር አረእ» ይቭካ ማተም አኖዳ አይቅረቅር እእግዜር ቃር ተፓ ተሸከቨ ።
\v 20 በአት በሩኡየ ቢድ ከስ እማት ኧወርቅቪ ኧቭርቭ ግቭር ታይኸር ኤኧቭ ኧሸህራቭ ግቭር ኢረቭር፤ ተሁኖም አታትህኖዋ ኧከበረ አአር እታትሁኖዋ ኧትዋረደ አአር ያጔኩሩዋ
\v 21 ባቴ ማንኝእመኋ ተዋ ተዝሬከሁኖዋ ዘንጋ ገግኋ ቢያጠርር ኧከበረ አአር ያጔኪርካ ኧትቀደሰ፤ኧጎይታሞኋ ያጔኪርካ ኧወሄ አአር እንእ ኧትዝጋጀ አአር ኢኸር።

\v 22 ተወዴይነድ ሙጥጥ ተመኛት ሲህ ፤በጥርር ሂን ጎይታ ቲሆሮታ ሰቭ እማቲ ህርታ ፅድቅ፥እምነት፥ንመጀዪ ሽኛትቭ ተኸተር።
\v 23 መራክስ ያቫአኸ ቲሂሪ ኧኸሬ፤ አታአር ታያጔኪር ማንኝእ አአር ተኸረ ዉርጀ ሲህ።

\v 24 ኣጎይታ አገልጋይ ኢትራከሲ አይትቨቃኩዳ፤ ኢረእ እንእ ሰቭ ገር፥ አትሞርት ኢኸርነዳ አአር፥ፋራይህቭ ኧሁርት አኖወ።
\v 25 ኧውረ አአር ኧኋርቲ ኢሰርኦዋኸ እግዜርቭ ንስሃ ኢጎኦዋይ እድል ዪኮኸ ተስፋ ቦንኧት ኢትቃዎምታ ሁኖዋ በገርነድ ኢዠፕርካ አአር ኧሁርት አኖወ።
\v 26 እመዳቭ በቀርብሁኖዋ ኢጎኦቴ፤ ኧሂንኃ ሙርአድ ያቲፕኮዋይ ባሪያ ኤፐ ተጠበጠኖዋ ተሴጣን ሽካ ኢትጎፎሩዋሴ በዋርትን።

\c 3
\p
\v 1 በዘቨር ያርእወዳ ያትጨንቅካ ቀረ ኢቫአኸ ሃር።
\v 2 በሃ ቀረ ሰቭ እንእ ገግኃ ኢረድካ አአር ኢኸርኬ ፤ዋጋ ኢረጅታ ፤ተⶔያጓዥ፥ቲቢተኛ ፥ያትቃንቩታ አአር፥አአቭ ታአዶድሁኖዋ አይታአዘዡዋ፥ አኸዳ ኤነድ፥ቅድስና ኤነኖዋ።
\v 3 ንማጀ ኤነኖዋ፤ ተሰቭ አይትቊያሞጩዋ ፤ኦአደኘ ገግሁኖዋ አይጎዦዋ፤ቱኧ ፥ወሄ አአር ኧኸረ ሁዳ አይረጁዋ።
\v 4 ኢሆጆታ አአር፤ኢትሃይጅታ አአር ፤አታአር ባኸረ በትቢት ኧትቬንኦዋ አአር፤ትእግዜር ኢረእ ደንገኝነድ ኢረጅታ አአር ኢሆርቴ።

\v 5 እእግዜር ያኸቡጅታ/ሃይማኖተኘ / ሰቭ ኢዎስሩዋ ደረግኋ ጭን ሆቾም ፤ተዋሁኖዋ አረእ።
\v 6 እመሁኖዋ በቪድ ቢድ ተደኦርሙ ጎፖም በሮኦራ ባጢር ኧታአከጃ በቡችር ቡችር ሙጥጥ ሙጥጥ ሜና ገፓም ኧሳረና ኧሳረናኸ ኢኸራታ ምንፈስህና ቂጨኘ እሽቻ ያጠሙጅዋታኖዋ አአር።
\v 7 ኧዋኸ እሽቻ እንእ ግዚየ ኢትመራ ዘንጋኋ ጭን፤ኧዉረ አአርኋ ኧኋርቲ ስርም አይሰርአታ።

\v 8 ኢያኔስቪ ኢያንብሬስ ኧሙሴ ኧትቃወሚኸ እም ቀርብሁኖዋ ኧኧፋወዋዪ ብእምነትቭ ኧወትኡዋ ሰቭ ኧዉረ አአር ኢትቃወሙዋ ።
\v 9 ኧህር ባኸሬ አይቴፕኖታ፤ ኧሃአ ሰቪ ጋዉነድ ኧትሄረመኸ እእም ሰቪ ሁዳ እእንቨኃ ኢትሄርሴ።

\v 10 አኸ ጭን ትምርትኛ፥ ሜናኛ ፥ተመኛትኛ ፥እምነትኛ፥ ኧፍረሁትኛ፥ንማጀመኛዪ፥ ትቭኤተዉ ኧትሰጎዉትመኛ ትሂር።
\v 11 ኧትሰደጅትመኛዪ መከራመኛ ፤በአንፆኪያ፥ቢኢቆኒዮንቪ በልስጥራቭ ኧሰንአቪ ሁዳ እንእ ፈነሁቭ ኧትሸከሁወ ኧትሰደጅት እንእ ትሂር፥ጎይታ ጭን ተዋሁኖዋ እንእ አተነፈዪ።
\v 12 ጪግቭ በክርስቶስ ኢየሱስ አመረ፤እእግዜሪ ሰቭ ሂይተ ኢረቭሪ ኢረድካ እንእ ኢትሰተድ።
\v 13 ሙጥጥቪ ቄቃቭ ሁኖዋ ጭን ቲትቀቁሚ ቲቆቁም በቩጥጥ ሜናሁኖዋ ፎር ሙጥጥ ሜና ቲደዉርኰ ያሩዋ ።

\v 14 አኸ ጭን ኧትማርኸ ተቫን ኧኸረኸ ቲሂሪ ኧኸሬ በትማርኸንቪ በገፓናኸቭ ሁዳ ትቭአ ተሰገቭ ።
\v 15 ተትክነድማኸ ቀነስኸ በክርስቶስ ኢየሱስ ቦኦዎርት፤ኧትረፉት ኢረሁኮዳ ጥበብ ኢረሁኮታ ኧትቆደሹዋ መጣፍ ሃርኸ።

\v 16 ኧትቆደሹዋ መጣፍ እንእ እእግዜር መንፈስ አኖወታኖዋ አአር፤ያትሞርኮይ ፥ኧትሳሰቹዋ ሰቭ ኢዥፑርኮይ፥መያ ኧገፈረ ሰቭ ኢጌኪርኴ፥ፅድቅ ኢረሁኮዳቭ መያ ኢዎሁርኴ ያጔኩሩዋ።
\v 17 እመዳቭ እእግዜር ሰቭ ኧወሄ ሜና እንእ ኢቨቃመኸዪ በቂጢየ መያ ያረኸ ኢጌኩሩዋ።

\c 4
\p
\v 1 ብእግዜር ኢፍቲ ፤እመኸቭ በአያ ባነዉታቭ በዎጁም ሁኖዋ ኢፈርዲ ቢቫአካ ፤በክርስቶስ ኢየሱስ ኢፍቲ፤ ኧሁዳይ ተዣቨይተዉ ኦኦትቪ፤ መንግስትሞኋ ትናጫምጥ ዋ ዘንጋ አደራ እቭኸ ።
\v 2 ቃርኋ አዉድ ቢትመችካቭ ባይትመችቭ እንእ ግዝየ ተጥቫቨቅ በሩእ ፋራይሂነድቪ ባትሞርትቭ ገክር ኢኢፋደኘ ቢፋድኋ ማአችወ ፤አቁሟሙርቭ።

\v 3 እመኸ ኢኸርካሁዳ ሰቭ ኧዉረ ኧኸረ ትምርት አይቴኤፐርወ ጊፐ ኢቫአይ ኧኸረዴ፤ ኢረእ ኧገዛ ምኞትሁኖዋ ኢትስማማአኮታ ሃአ ያቲኪካ አአር ኧሰምኦኮ እንዝርሁኖዋ ኢትስምአምአካ ኢሰቩኦዪ ኢሱኢዳ ሁዳ ዪኢድኮታ በዙሪያሁኖዋ ኖኦራ አስተማሪ ኢስቨሱዉዋቴ።
\v 4 ኧውረ አአር ተሱዉኦት እንዝርሁኖዋ ኢዠፑሩዋቴ ፤እቊትሜ ኧኝኧተዉ ኢትዥዋፖሩዋቴ ።
\v 5 አኸ ጭን ቢቫአቨኸዳ ዘንጋ እንእ ታድራከድ ገጋኸ ኧየ ፤ቢሰርአቨኸዳ መከራ እንእ ፍረህታ ትብአ ተሰገቭ ፤ወንጌል አአዉጅት ሜናኸ ኧንአ፤ እእግዜር አገጎልጉልት ሜናኸ ጃቭር።

\v 6 ኢያ ኢሰጪዳ ቁርባን ህትቨኸ ኧትሁኢ ማአ ሰንአ፤ተዋ አለም ተቫተይተሁ አርወዳ ኧዎንድወዳ ግዚየ ሰንአ።
\v 7 ወሄ አርቭ ተዋካሁ፤ ኑጫመኛ ጀፐርሁ ሃይማኖትመኛ ኢየሁ ።
\v 8 ተዋ ቀጥወ ኧፅድቅ አክሊል ተጔከረ ይእዬ፤እመዳቭ ቂጥየ ኢፈርድካ እግዜር በሃ ቀረ ኢቬዴ፤እማት ኢያቭ ታይኸርቭ ኧሁዳይ ተዣቨይቶ ኦኦት ተቭራኖኡም ዩኡሮታ ሁኖዋ እንእ ዪውዮቴ ።

\v 9 በፈኧረ ኢያይ ትቫአኸ አትቫቅር።
\v 10 ዴማስ ዋ አለም ነመደ ቼኧዪተሰሎንቄ ወረ ።ቂርቂስ ገላቲያ፤ቲቶም ድልማጢያ ዎርሙ።

\v 11 ዋአካ ቲያ አነዳ ሁዳ ሚቲየ እማት ሉቃስን ።ማርቆስ ባአገልግሎትኋ ያጔኲረዪ ኧኸሬ ትትቫአካ ታኸቭ አአኩ ።
\v 12 ቲኪቆስ ኤፌሶን ኬሸሁን።
\v 13 ትትቭአካ በጢሮአዳ ባአክርጳይ ኧቼኧሁን ካባ አአኒ ፤መጣፍመኛ ኢርእካሞኋ ኧብራና መጣፍኛጥጥኒ የኸ ።

\v 14 ናስ አረጠረ ጌጥ ያጣዉርካ እስክንድሮስ ኖኦራ ጉዳት አሰንአቪ ፤ጎይታ ጭን ኧቬናኋ ያኩሴ ።
\v 15 ንዝሬኪኔዳ ዘንጋ ቡሼኧኸ ተቃወመ አኸቭ ተሁዳ ተጤፕ ።
\v 16 በትከሰስሁወ ዘንጋ አአወተረ ቃርኛ ትናአይፕርካ እንእወኃ ቼኧ ሴከ ባኸሬ ፤እማት ሰቭ አናአከዜዳ ፤እም ባጢርሁኖዋ አይቨዝርወዋ።

\v 17 ቢኸር እእግዜሪ ወሄ ዋራይ ቢያ ኢቴኤዲ፤ አለማዊ ሰቭ ኢሶዉኦዋኸ ጎይታ በቭየኛይ ተሸከቨ አትፓፓዪ ተዠፕቭ አቃ አዋአዪ ።
\v 18 ጎይታ ተቩጥጥ አአር እንእ ያተርፌዴ ፤ኧሳቫዪ መንግስትመኃ በወገሬት ያሰርአይዴ ፤ተዘላለም ዘላለም ስን ክብር ኧሁዳ ኧህር አሚን።

\v 19 ኧጵርስቅላዪ አአቂላ ፥ኧሄኔሲፎሩም ቢደ ሰቭ ወገሬት ባርኒ ።
\v 20 ኤርስጦስ በቆሮንቶስ ከተማ ኤከሰ ፤ፕሮፊሞስቭ ኤኤመኒ ኧኸሬ በሚሊጢን ቸኧሁን።
\v 21 ዘር ታይጋአ ኢያይ ትቫአኸ ኢኸነኸዳ ሁዳ እንእ ኧንአ ።ኤዉግሎስቪ ጱዴስቭ እመኸቭ ሊኖስ ቅላዉዲያዪ ኧሰማት እንእመሁኖዋ ወገሬት ዩከ ።
\v 22 ጎይታ ታኸ ኧህር ።እእግዜር ጠጋ ታሁዋ ኧኽር።