ior_reg/52-COL.usfm

\id COL
\ide UTF-8
\h Colossians
\toc1 Colossians
\toc2 Colossians
\toc3 col
\mt Colossians

\c 1
\p
\v 1 በጎይታ ፍቃድ ኧክርስቶስ ኢየሱሲኪሸረኘ ተኸረ ተጳውሎስቪ ተኧስሰመንራ ተጢሞቲዮስ፤
\v 2 በቆላስያስ ከተማ ኢረውርታ በኢየሱስ ክርስቶስ አአመርሁዋ ሙርቴ ኧሰማቶ ታአባንራ ተጎይታይ ሙርቴነድቪ ሽኛትቭ ንሆውዋ።
\v 3 አሁዋአር ትንጠልይነዳእንእ ግዝየ ኧጌታ ኧኢይሱስ ክርስቶሲ እባ ኧጎይታ ናትሸኩኔ።

\v 4 በኢየሱስ ክርስቶስ ትትእሟሞሩዋመኸዪ ክርስቲያን ኧሰማትቭ ትረጁዋመኸ ሰምአነ።
\v 5 ውረ ኧኸረ ወንጌል አወተራቸ አአሁዋይ ኧሰንአ ግዝየ፣በሁዳ አነዳ ተስፋ ሰምአሁም፤እመኸ ኧኸሬ በሁድ ኧታአወርትማሁዋዪ ንመጀማሁዋ ኧትሸከቨ ሁዳ በሳቫይ ቴፐ ቢኢየሁዋታ ተስፋን።
\v 6 እመዳቭ አሁዋይ ሰንአ፤ እምወንጌል ተሰምአሁኰቪ ኧጎይታቭ ሚነድተሀርሁኰ ቀረ ቆነሺታ ባሁዋ ኤፐመኸ ፣ዋ ወንጌል ባአለም እንእ ኢኢጂዴ።እም ወንጌል ባአለም እንእ ቲደቭርቪ ቲትራእ አነ።

\v 7 እመዳቭ ቢና ኤኤዲ ኧክርስቶስ አገልጋይ ኧኸረ ቲናቭ እማቲ ኧወጌል ሜና ኢአካ ናማጂንራ ኤጳፍራ ኤኤደናሁ።
\v 8 መንፈስ ቅዱስቭ አቨናሁዋ ንማጃአር ሁዳ ኤኤደንረ።

\v 9 ብእም ኧቫአ ዋዳተሰምአኔኰ ቀረ ቆነሺታ አሁዋ ኧጎይታ መንፈስ ኢንካ ሀሪነድቪ ኧወስርትቭ ኧጎይታ ፍቃድቭ ትሂርኰዳ ቀርብ ትረሁዋኸ ኧጠልይትቪ ጎይታ ኧሳአርትቭ ስርም አንቸኧኔዳ።
\v 10 ንጸልይነዳቭ ሁዳ ኧጎይታ ኢሽርኰዳአር ትቲንኦዋ ኧሁዳ ፍቃደኸ ትረውርዋመኸዪ፣ወሄ ሜና ቦንኧታሁዋ ትደውርዋ ታሩዋኸ ፣ ጎይታቭ በኋርት ትትራኡዋነኸ።

\v 11 ፋራሂነቪ ተቁዋዋይነድቭ ትረሁዋኸ ፣ ተጎይታቭ ደረግ ትረሁዋነኸ ።
\v 12 ህመኸ ጠነቫ ቤነወ እዋየ በኸረ መንግስትኋይ አገፓናሁዋ ተቅዱሳን ደረድ ትትሻኰጅዋኸ ኤፐናሁዋ አቭ ጎይታ ቲሽርሁዋ ሽኩራኸ ትዋሪሴ።

\v 13 ተሴጣን ግዛት አዋአ አተነፈንረታ ኢረድኩዳ ኧኧችኋይ መንግስቲ ንጋአነኸ ኤፐንረ ።
\v 14 ሁዳ ባጢርንራ አፉ ባረንረታ ቴተገንረ።

\v 15 ክርስቶስ ቤኤኤር አያዢ ጎይታ መርኸትን፤ሁዳ ኧፍጥረት እንእ በህ።
\v 16-17 በሳቫይቪ ባአፈርቭ አነውታ ፣አኤኤር ያዢዮታቪ አያዢዮም ፣በሳቫይቭ ደረግ አነኖታ ሁኖዋ እንእ፣አላቃቪ ዳኘቭ ኧሆሩዋ ሁኖዋ እንእ ኧፈጠረኖዋ ክርስቶስን።ሁዳ ትንእአአር ኢፍቲ ባነደ።እንእአአር ተጣበጠ ኧትሸከቨ በሁተን

\v 18 ክርስቶስ ምስየኋ ኧኸረ ቤተክርስቲያን ዋኘድን፤ ብንእአአር ኢኢፍቲ ኢኸሪ ተውንድ ተረሳ፤እመዳ ኧኸረ ሁዳ፥እእንእአእር ኢኢፍትሜዪ ፣ተዎጁም ሰቭ እንእ በህር ኢኸኔ።
\v 19 እመዳ ኧኸረ ሁዳ ኧጎይታ ክብር በክርስቶስ መኝኧተ ኢረቭሪሁዳ ሳረ።
\v 20 ጎይታ በክርስቶስ በሳቫይቪ ባአፈር አነውታ ዘንጋ እንእ ተገግኋ አቂያመጠ፤ በቫቀር ፎር በትሆኧ ደቭኋ ሽኛት አቨንረ። በውጥጥ አመራሁዋ ኧቫአ፣ተጎይታ ኧትቫይተርሁዋአአርቪ በጭሞጨማሁዋ ቭ ኧጎይታ ጠራት ባነሁዋተ።

\v 21-22 ዋአካ ጭን በሁዳ ኢፍቲ ጭንቅነጨቪ ነውርቭ ኤነዎሁዋ ሙጭር ኧኝኧተ ያቲንሁዋይ በክርስቶሲ ሙድ ተገግኋ አእዊያመጠናሁም።
\v 23 እመዳቭ ኢኸርካ ሁዳ አሁዋ በወንጌል በረከዂ ተስፋ ዋይ ሀይ ታቱሩዋ ተቋጤተሁ በረፐርኋን፤አሁም ቨምአዂቪ፣ተሳቫይቭ አነዳ ፍጥረት እንእ ኤኤጂ ወንጌል ዋዳን፤ ኢያቭ ጳውሎስ ኧዋ ወንጌል አገልጋይ ኸርሁ።

\v 24 ባሁዋ ኧቫአ በሰንአቪ መከራ ዋአካቭ ኢሽሬ፤ምስየኋ ኧኸረ ቤተክርስቲያን ቲይር በክርስቶስ ተሰንአወ መከራ ኧተነፈ ሁዳ፣ቢያ ኢሰርአኸ ኧኝኧተሁታ ፥ኧኝኧተሁታ ተሁዳ ኧቀፐረ ሁዳ ኢያ ኧቴእኤፐርኩዴ።
\v 25 ኧጎይታይ ያተርፍካ ቃር ገኪቶሁ አሁዋ ኢኢድሁዋይ ጎይታ ባቬ አደራ ኧቬተ ክርስቲያን አገልጋይ ኸርሁ።
\v 26 እም ቃር ኧዋ ኢፍቲ ተሰቭ እንእ ተደኧረታ በዱኡራቸ ነፐረ ባነደ፤ ዋአካ ጭን ኧክርስቲያን ሰቻ አዋአን።
\v 27 ኧጎይታቭ ተመኛት ተደኧረ ኧረፐረ ዘንጋ፣ኧክብርኋ ኑኡነድ ባሁዋ ባአረማዊ ሰቭ ግት፣ኧተኸ ኑእአአር ኧኸረኸ ኣክርስቲያን ያትሄሪ ሳረን።እም በተስፋ ንእየኔዳ ዱኡራቸ ቃር፥ክብር ኢረሁኰዳባሁዋይ ሂን አነዳ ክርስቶስን።         ኧቆላስያስ ሰቪ ጳውሎስ ኧጣፈን ኪሸር

\v 28 ሰቭ እንእ በሀሪነድ ምሂተነቪ አስተሚየነቭ እንእዎኋ በክርስቶስ ያአቭረኸ ኧክስቶሳአር ንኢድነ።
\v 29 ጎይታ በሩእ ደረግኋ ቢያ ዬቪ ኧኸሬ ፣ብእም ባቬ ደረግ ኖኦራአር ኧፈርህ፣ኧቂጥቭ።

\c 2
\p
\v 1 አሁምቪ በሎዶቂያቭ አነውታ ክርስቲያን ቲያ ኢፍት ቲኢፍት ተራሄተውዋ አይሂሩዋ ሰቫአር ምርአካአር አትቫቅረኸ ትሂኒ ኧሲእ።
\v 2 ኢያቭ ሂንሁኗ ባአት ኢትሸከቭመኸዪ ንመጀ ኢረቭርኮመኸ ገኪቶምቭ በሲቶውዋታ ፣ቦጎይታ ሂን አነዳ ክርስቶስ ኢሂሩዋነኸ።
\v 3 ሀሪነድቪ ኧውዎስርትቭ እንእ አነውታ በክርስቶስ ሂንን።

\v 4 ዋዳ ኢኢድሁዋታ ሁዳ ማንእየ ሰቭ ቃርኋ አጣዊተታ ባይቄቅሁዋኔ።
\v 5 ኢያ ታሁዋ ኖኢ ብንኸርቭ በመንፈስ ታሁዋ እማቲ አነዂ ኧኸሬ ጨር ጠበጥሁም ኧቦርትማሁዋዪ፣በክርስቶስ አመርሁምታ ተቁሟᎀርሁም አሸዂ ኖኦራአር ሳረዪ።

\v 6 ባቴ ጌታ ኢየሱስ ክርስቶስ ኧቴኤፐርዂመኸ ተሁዳ ንዎሩዋ።
\v 7 በሁዳ ኧስር ውስጁምታ ቱኦምታ፥ኧትማርዂመኸ ብእምነታሁዋ ተቁዋወርም ንዎሩዋ፤እንእ ግዝየ ጎይታ ሽኩር ቧሩዋ።

\v 8 ክርስቶስ ባትመረን ትምርይ ታይኸር ሰቭ ባወናን ቂጫቪ ብእም አለም ሰቪ ሴራ በቴፐ ማንእየ አታላይነድ በደበሰወ ኧትሙራሞርት አትዎኋ ቄቅተ አይቭንሁዋኸ ተጠፑዋ።
\v 9 ጎይታ በክርስቶስ ሂን ሙርአ ኸረ ኢረቭር።

\v 10 አሁም ሙርአአር ኸርሁም ኧኸርሁዋ ሁዳ ኧርኡነድቪ ኧዳኝነድቭ እንእ ቦፈረ በኸረ በክርስቶስን።
\v 11 ተክርስቶስ እማቲ በሁርታሁዋ ዘገር አጎፖኩም፤እመኽቭ ኧዋርት ባጢራሁዋ ኢፈካኸ በክርስቶስ ኧትውፐ ሜናን ባሀሬ ፣በሰቭ ኧጅ ኢቴፕካ ዘገር አጉኦት አኸረንዳ ።
\v 12 በጥምቀት ተክርስቶስ ተዌኵሁም፤ኧሁድቭ ተውንድ በረሳን ጎይታ ጦና አመርሁምታ ተውንድ ተረሳሁም።

\v 13-14 በቫቲረኝነድማሁዋ ባጢርቭ ኧደበሰወ ተመኛታሁዋ አንቸኧሁዋይ ኧኸሬ ፣ በዎድሁዋ ኤኤዲ ጎይታ ተክርስቶስ እማቲ አያ ኤፐናሁም።ኢና ኢኸስሰንረቪ ኢትራከሰንረቭ ኧረፐርረ በቂጫ ኧጣᎉ ኧክስስ ጥፈት እንእ በቨስቀር ጥረቀቨታ ትተቨያንራ አፈካን።
\v 15 አላቃቪ ዳኘቭ እንእ ክርስቶስ በትሶኦርትኋ ኧቫ ጥብጨሁኗ አድጌፈረኖምታ ማነኽ በሰቭ ኢፍቲ አትሽከቨኖም።

\v 16 ባቴ ትትወርኧታዪ ትትሰጭታ ሙርአቪ በኘቭ ኢጋአወዳ ቀረ ዌ ሰንበት ባኩብርት ኧቫአ አትዎኋ አይፍርድዎሁዋ።
\v 17 ዋሁኗ እንእ ኧርግገኋ ኢዎኦታ ዘንጋ ጥራርኗ፤ጪግ ኧኸራአር ጭን ኢትርረከካ በክርስቶስን።

\v 18-19 ገግሁኗ ባይቨስር አመኛትቪ ፣ኧመላአይካ በስጉጅት ኢትእማመርካ ማንእየ ሰቭ ቢረቭር በጎይታ ኢፍቲ እንቁርፊት አይኽርዎሁዋኸ ተጦፑዋ፤ኧዋኸ ሰቭ ባሸን እራኢ ባአድባራ ቢወኧርካ ዘንጋሁኗ ኢድጋኬዡዋ።ኧዋኸ ሰቭ በሰርቪ ወተር ቂጠጠረታ ፣ሸረድ ቲቨርአካ ተክርስቶስ መራህቭ አታአር ኤነኖታ፤

\v 20 ኧዋ አለም ሰቭ ዬኩዳ ሜና ባቴውዋይ ሞትሁምታ ኧክርስቶሳአር በኸርሁዋጋሁ ባቴ ኧቭር ኧዋ አለም ሰቪ ቂጫ ትድጎዦዋ?
\v 21 እም ትእዛዝ ፣«አትግድ ፣አተፍር፣»ዩታኗአር፤
\v 22 እሞሁኗ እንእ በሰቭ ትምርትቪ ትዛዝ ኢቴፑዋታአር ኧሆሩዋይ ኢዎኦርታኗአር።
\v 23 ዋ ትዛዝ በገግ ፍቃድ ስጋዳ፣ ባአጉልቭ አመኛትቪ ምስየቭ ባቂጭት ሀሪነድ አአነኖታአር ኢወስሩዋ ኢህርሴ፤ቢኸር ኧገግሁኗ ትተምመኛት ኢቹኡኰዳ ደረግ ኤነኖታ።

\c 3
\p
\v 1 ሙጭር ሂንቶ ኦምቦርት 1. ተክርስቶስ እማቲ ተውንድ በትረሳሁዋጋ ክርስቶስ በቸናወ በጎይታ በቀነኋ በቸናወ ቦፎሬ በሳቫይ አነውታ ዘንጋ ።
\v 2 አሳብማሁዋ ቦፎሬ ባነዳ ሁዳ ኧህር ባሀሬ በዋ አፈራአር አይህር።
\v 3 ሞትሁምታ ሉሀሁዋ በጎይታይ ተክርስቶስ እማቲ ቸና።
\v 4 ሉሀሁዋ ኧኸረ ክርስቶስ ቲቫአካ ሀ ግዝየ አሁም ተህም በክብር ትዎኦቴ።

\v 5 እመኸ ኧኸሬ ኧዋ አፈር ሙጥጥ ተመኛት ቶኡዮዋ፤ሁኖም ኧረከዊኸ ሁጅር ኧድሙጅት፣ኧስረሁት፣በውጥጥ ተመኛት ሽርሽር ኧዋርት፣ ኧቅርኘ ኧገቡርትቪ ናፋጊነድምኗ።
\v 6 ብእሞሁኗ ኧቫአ ኧጎይታ ማአት ባይቴኤዠዡዋ ሰቭ ፎር ኢወትኴ።
\v 7 አሁም ኧዋ ኢፍቲ በረፐርዂ ንቭረድ እእመኸአአር ቲንኦዋ ባነደ።
\v 8 በዋቴ ጭን ኧዋአችት ፣ኧትራደጅት ፣ቂናቨ፣ኦአንድቪ ኦአንድቪ ያትፈኝካ ቭ ዘንጋ እንእ ቶኢ።

\v 9 ኧድርረ ፍጥረታሁዋ ተቬናሞኋ አዋአሁም ኧቃሸዂ ኧኸሬ አሁም ታሁም ትድዝራኩታ ኤነአአር አታአውጅዋ።
\v 10 ጎይታ ትሂሪ ያቨቃሁዋታ ወያ ምስየ ተኸተርሁም፤እም ወያ ምስየ ኧፈጠረን ጎይታ ኢቨስረኸ ፥እንእ ግዝየ ወያ ዬኩ።
\v 11 ብእም ኧቫአ አረማዊ ሰቭ ዌ ኧይሁዳ ሰቭ ፣ዘገር አጎፔ ዌ ዘገር እናጎፔ፣ኧትማረ ዌአትማረ፣ባሬያ ዌ ወለባ ዩሪዳአር ኤነዳ፤እንእ ብንእ ኧኸረ ጭን ክርስቶስን።

\v 12 ባቴ አሁዋ ጎይታ ኧሸፐተናሁዋ ኢረጅኩዋታ ጥርር ሰቭ ኧኸርሁዋይ ሚነድ ፣ዋቢነድ፣ አመኛት፣ ሙጭነድቪ ፋራሂነድቭ ኧምበርሁዋ።
\v 13 አሁም ታሁም ተፏረሁዋ፤አታሁዋ ባአታሁዋ ኤኤናሁዋአር በረፐረ አሁም ታሁም አፏፍ ተዌሩዋ፤አሁዋ ጎይታ አፍ ኧቫረናሁዋመኸ አሁም ታሁም ፏፍ ተወዌርዋ።
\v 14 ትንእ ቦፎእንእዎኋ እማት ኤፐ ያቲኢራንካ ንመጀ ኧበርሁዋ።

\v 15 እእማት ስአቭ ምስየኸ ኸርሁም በጎይታ ኧትሸፐትሁኰ ዋ ሽኛት በሂናሁዋ ኧምበር፤ኧጎይታቭ ሽኩር ቱርታ ሰቭ ሁሩዋ።
\v 16-17 ኧክርስቶ ቃር ኧገክር በሂናሁዋ ኧምበር፤ አታሁዋ አአታሁዋ በጨር አትሞሩዋ፤አሁም ታሁም ተዋሆሩዋ ፤በመዝሙርቪ ጎይታቭ ባጋጊዥት ፣በመንፈስቅዱስቪ በዘሙርት በሂናሁዋ ጎይታ አትሸኩሩዋ።በክርስቶስ ኧቨይተሁዋታ ኧጎይታ ሽኩርት ትቱሩዋ በቃርማሁዋዪ በቬናማሁዋ ቴዊዳ ሁዳ እንእ በጌታ በኢየሱስ ሹው ኦንኤ።

\v 18 እሽቾ ኧቶኦዠዥት ኧጎይታ ኢሽርኲ ኧኸሬ ገማሀ ዩካታአር እንእ አክያ ባራ።
\v 19 ገሞ አሁም እሽቻሁዋ ንወጂያ ባሀሬ ብእሽቻሁዋ ኢኢነኘ አትሁሩዋ።
\v 20 ዴንጎ አአቭ ኧታአዶዳሁዋ ዩኩዋታአር አክያ ኧዋርት ጎይታ ያትሽርካአር ኧኸሬ አቭ ታአዶዳሁዋ ዩኩዋታአር እንእ አክያ ቧሩዋ።
\v 21 ኧዴንጋ አባ ኧኸርሁዋ ገማ እንእ ቀጨ እዩኮኸ ኧዴጋሁዋ አታሩኡዮዋ።

\v 22 አሁዋ ባሬያ ኧኸርሁዋ ሰቭ ፥ሰቭ ታትሽሩዋሜዪ ያዥነኩዋሜ ባይተሁዋታ ታይኸር ቦሄ ሂንቪ ጎይታቭ ቦፍረውት ዳቫሁዋ ዩኩዋታአር እንእ አክያ ቧርዋ።
\v 23 ቴዊዳአር እንእ ኧሰቭ ታይኸር ኧጎይታ ባሁም ቲንኤኸ ኋርምታ ሜናሁዋ ተውረሚያሁዋ ኦንኦዋ።
\v 24 ጌታ ኢየሱስ ኧሳቫይ ደረድ ዋጋ ኧኝኧተ ኢሁዋኸ ትሂሩዋ ፤ቴውነዳቭ ኑእ ኧኸረ ኢየሱስን።
\v 25 ሙጥጣአር ዬካ ሰቭ ኧውጥጥ ሜናኋ ቅጣት ኢቴኤፐር፤በጎይታይ ውርኤተኝነድ ኤነዳ።

\c 4
\p
\v 1 አሁም ኧቫሪያ ዳቭ ኧኸርሁዋ ሰቭ ፥በሳቫይ ዳቭ አነነሁዋኸ ተሂሩዋይ ኧኸሬ ፣ባሬያሁዋ ጎይታ በፍረውት በቂጢየ አቡሪዮዋ።

\v 2 ቃንዠ ቧርምታ ጎይታ ትታትሾኩሩዋ ተቋጦም ጠልዩዋ።
\v 3 ኢያ ኧታአከትሁነ ተደኧረ ኧረፐረ ኧክርስቶስ ወንጌል ኧሰቭ ኒኢድኔ ፣ጎይታ ቃርኋ ኢቭንረኸ ኢኢና ጠልይንረ።
\v 4 አት ኧዘጉት አነኒዳአህር ቃርኋ ኧውየሞኋ ኧዝሬኵኸ ጠልይኒ።

\v 5 ታናአሞሩዋ ሰቭ እማቲ ትትረውርታ ተጦፑምታ ኋርም ንወርዋ፤ በሮዂ መያ እንእ ኧክርስቶስ ወንጌል አውጁዋ።
\v 6 ኧሰቭ እንእ መልስ ባቲተሁዋ ትሂዋኸ እንእ ግዝየ ትዝረኲዳ ዘንጋ ዛᎀ አነነዳአርቪ ንማጀቭ አኖዳአር ኧህር።

\v 7 ኢያ ኧተኸ ኧረቭረኸ ቲቂቆስ ጃቪተ ያአውድሁዋሴ ፤ሁድቭ ኢረጂዳ ሙርቴ ኧሰምነንራ፤ ሁዳ እንእ ግዝየ ቲያ እማቲ ኧጎይታ ሜና ኢንአ።
\v 8 በቭር አነነኸ ትሁሩዋመኸዪ አሁም ያቁሟሙርሁዋይ ባነሁ አሁዋይ ኬሸሁን።
\v 9 ሁዳ ታአናሲሞስ እማቲ አሁዋይ ኢቫአኴ፤አናሲሞስ ሙርቴ ኧሰምነንራ፤ሁድአሁዋይ ገኘ ሰቭን፤ ሁኖም በዋይ አነዳ ዘንጋ እንእ ጃቪቶ ያአውጅኩዋሴ።

\v 10 ቲያ እማቲ ኧታአከደ አርስጥሮኮስቪ ኧበርናባስ አአዶድኋ ኧተም ኧች ማርቆስቭ ወጌም ዩኩዋ፤ኧቫርቆሳአር ቦተርም ኤኤጅኩዋይ ኧኸሬ አሁዋይ ቲቫአካ ቶኦዎሪ።
\v 11 ኢስጦስ ዩሪ ኧረፐረኢያሱቭ ወገሬታሁዋ ዩሁዋ፤ ኧጎይታ መንግስት ሜና ቲያ ቲዬውታ ሰቭ ግት ኧይሁዳ ገኘ ሰቭ እማት ዋሁኖትኗ፤ሁኖም ኢያ አቁሟᎀርኝ።

\v 12 አሁዋይ ዶበ ኧኢየሱስ ክርስቶስ አገልጋይ ኤጳፍራ ወሄምንሁዋዌ ዩሁዋ፤ ሁድ ኧጎይታ ፍቃድገኪተሁዋ ሀይተዋታ ተቁዋወይተሁዋ ትረዋሩዋኸ ጎይታቭ በዝሬኵናሁዋ ቃር ትረውሩዋኸ እንእ ግዝየ በጠሎት ጃድ ይር።
\v 13 ህመኸቭ ሁዳ በሎዶቂያቪ በኢያራቭ ከተማ ሰቫአር አትታቀረ ዬቨኸ ኢያቭ ኢያቭ ኢኢድነ።
\v 14 ኢረንጂዳ አኪም ሉቃስቪ ዴማስቭ ወሄምንሁዋዌ ዩኩዋ።

\v 15 በጆዶቂያ አንነዋታ ኧሰማትንራ ለንምፉን በቪድመሻይ ኧጠሎት ኧደሞጁዋቭ ክርስቲያን ወጌም ቧኒ።
\v 16 ዋ ጣፍሁ ኧኬሸነኩዋ ኪሸር ፣አሁዋ ባነበብዂ ቀጥወ ፣ኧለዶቂያ ቤተክርስቲያን ሰቭ ያነቡብኖኸ ኦንኧዋ።ተለዶቂያቭ ቤተክርስቲያን አሁዋይ ኢኬሺዳ ኪሸር አሁም አምቡቢ።
\v 17 አግሪጳቭ «ተጎይታ ኧቴኤፐርኸን አገልግሎት ተጤፕ ኤኤኋይ አስርአኩ ቧሪ።

\v 18 ዋ ወጌምት በገግኛ ኧጅ ኧጣፍሁን ኢያ ጳውሎስንሁ ፤ኧታአከትሁመኸ አይተሳሁዋ፤ኧጎይታ ንማጀ ታሁዋ ኧህር።