ior_reg/47-1CO.usfm

\id 1CO
\ide UTF-8
\h 1 Corinthians
\toc1 1 Corinthians
\toc2 1 Corinthians
\toc3 1co
\mt 1 Corinthians

\c 1
\p
\v 1 በጎይታ ፍቃድ ኧክርስቶስ ኢየሱሲ ኪሸረኘ ኢኸሪ ጎይታ ተኸናን ተጳውሎስቪ ተኧሰመንራ ተሶስቴንስ ፤በቆሮንቶስ አነዳ ኧጎይታ ቤተክርስቲያንቪ በአካይያ ኢረውርታቭ ቤተክርስቲያን እንእ፤
\v 2 በቆሮንቶስ አነዳ ኧጎይታ ቤተክርስቲያን ፤በክርስቶስ ኢየሱስ ᎀጠርሙታ ኧሁኖመዪ ኢናሜ ጌታ ኧኸረ ኧጌታንራ ኧኢየሱስ ክርስቶስ ሹው ብንእ ኤኤዲ ቲሆሮታ ሰቭ እንእ ፤
\v 3 ተጎይታ ታአቦንራ ተጌታመንራ ተኢየሱስ ክርስቶስ ጠጋቪ ወገሬትቭ ታሁዋ ኧህር።

\v 4-6

\v 7 እመኸ ኧኸሬ ኧክርስቶስ ኢየሱሲ ኦኦት ትቱኡሮም ታነሁዋ ማንእየ አይነት ኧመንፈስ ቅዱስ ስጦታ አይዎኦሩወሁዋታ ።
\v 8 ጌታንራ ኢየሱስ ክርስቶስ ቢቫአወዳ ቀረ ስን ቅነጨ አይቫር ሂንተሁዋ ትረውርዋኸ ፣ ሁዳ ቀረ ያርእወዳ ቀረ ስብ አጥቋጢቭተ የኧየሁዋሴ።
\v 9 ተትከኋ ተኢየሱስ ክርስቶስ እማቲ ተረዋርዋይ ኧኸናናሁዋ ጎይታ ሙርቴን።

\v 10 ኧሰማቶ በግታሁዋ መራክስ አይረቭረኸ፣እማት ሂን እማት አሳብ ኢረቭርሁዋኸ ኢረቭርሁዋመኽዪ ተድጋፖዋመኸ በጌታንራ በኢየሱስ ክርስቶስ ሹው ኧሰኧርሁዋ።
\v 11 ኧሰማቶ በግታሁዋ መራክስ አነኸተቀሎኤ አበሩስ ሰምአሁ።

\v 12 ዘጋሞኋ ዋኸትን አሁም እንእእንሁዋ «ኢያ ኧጳውሎስንሁዋአር ፣ኢያ አአጵሎስንኋአር ፣ኢያ ኧጴጥሮስንኋአር ኢያ ኧክርስቶስንኋአር» ባሁም ትትራኮሹዋ ቧርኝ።
\v 13 ባቴ ክርስቶስ ተሻከደዪ? ጳውሎስሁ አሁዋ ባረ ተሰኧረዪ? ዌ በጳውሎስ ሹው ተጠመቁሁሚ?

\v 14 ቀርጶስቪ ጋዮስቭ ባሀሬ ታሁዋ ግት አትዎኋ አናጠመቅዂ ኧኸሬ ጎይታ አትሸኩርኩ።
\v 15 እመኸ ኧኸሬ በጳውሎስ ሹው ተጠመቅሁ ባይተ ኢኢድካአር አት ሰቭ ኤነዳ።
\v 16 ውረቭ እእስጢፋኖሲ አበሩስ አጠመቅሁ፤፤ተሁኗ ኧኛአር ጭን ኢድዘከዴዳአር ኤነዳ።

\v 17 ክርስቶስ ኧኬሼ ሁዳ ኧሰቭ ወንጌል ኢኢድኔ ባሀሬ አጠምቂ አኸረንዳ፤ ኧክርስቶሲ መስቀር አይትቀንጠኸ በሰቪ አአዮነድ ቃር ኧክርስቶስ ወንጌል አኒእድካ።

\v 18 ኢየሱስ ክርስቶስ በቨስቀር ፎር ተሰኧረ ሞደ ይካ ቃር ክርስቶስ አያአውርዋ ሰቭ ጋውነድን ኢቨስርኮዋ፤በክርስቶስ አመነ ኧተነፍነ ኢኢና ጭን ኧጎይታ ደረግን።
\v 19 እመኸ ቧርም ጣᎉ፥ኧሁኖዋይ ሀሪነድ ኤነኸ ኢንአኩዴ፤

\v 20 አካ አዮ ኧቲ አነ; ቂጫሁ ኢሂርካ ሰቭ ኧቲ አነ? ኢትምራመርካሁ ሰቭ ኧቲ አነ? ጎይታ ኧዋ አለም ኧኋርት ጋውነድ አኔፐንዳ?
\v 21 ተጎይታይ ኧኋርት ኧትረንሳ ፣ኧዋ አለም ሰቭ በገግኋይ ሀሪነድ ጎይታ ኧኋርት አኸረኔ ኧኸሬ፥ጋውነድ ቢቨስርካ ኢና ብኒኢድኔዳ በክርስቶስ ወንጌል ያአቭርካ ሰቭ ታተርፊ ኧጎይታይ ወሄ ፍቃድ ኸረ። አአይሁድ ሰቭእንእ ግዝየ ወግ ኢኸርካ መርኸት ኢሱኡዋ፤ኧግሪክቭ ሰቭ ሀሪነድ ኢሱኡዋ።

\v 22 አአይሁድ ሰቭእንእ ግዝየ ወግ ኢኸርካ መርኸት ኢሱኡዋ፤ኧግሪክቭ ሰቭ ሀሪነድ ኢሱኡዋ።
\v 23 ኢና ጭን ክርስቶስ ኢኢና ባረ ኧትሰኧረኸ ንኢድነ፤ዋ ቃር ኧይሁዳ ሰቭ ጭን ቆፋትን፤ኧጊክቭ ሰቭ ጋውነድን።

\v 24 ጎይታ ኧኸናኗ ሁኗ ጭን ኧይሁዳቭ ሰቭ ቢሆሩዋ ዌ ኧግሪክ ሰቭ፥ክርስቶስ ኧግይታ ደረግቪ ኧጎይታቭ ሀሪነድምን።
\v 25 ተሰቪ ኧኋርት ኧጎይታይ ጋውነድ ኢረእ ሀሪነድን ተሰቭሜ አርወተኝነድ ኧጎይታይ ቂጨኝነድ ኢረእ ኢትቭአ።

\v 26 ኧሰማቶ እንዴ ጎይታ ኧኸናናሁዋ ግዝየ ምር አይነት ሰቭ ኧረፐርሁዋኸ አጫሙጭዋ፤ በሰቪ ሲፋን ታሁዋ ኢሮኡታ ኖኦራ ሀሪ ሰቭ አኖፖርታ? ኖኦራማሁዋ ተሩእ ሰቭቢድ አቧአሁዋታ፤ኖኦራማሁዋ ታቨጥቭ ቢድ አንቴኤኘሁዋታ።
\v 27 ዘንጋ ጭንጋበዋ አለም ሀሪ ኧሆሩዋ ሰቭ ያቅቨጪ ቲይር ፥ኧዋ አለም ጋዋ ዘንጋ ሸፐተ ጎይታ ጦናᎀንረ ዩርታ ሁኗ ያቅቨጪ ቲይር ፥ኧዋ አለም ቂጨኘ ዘንጋ ዓአፐተ።

\v 28 ጎይታ በዋ አለም ሰቪኧከበራአር ኢቨስርካ ሁዳ እንእ ኤነኸ ኢንአይ ፥ቦዋ አለም ሰቪ አአነሰቪ ኧቆጪቪ ባጭባጭቭ ኤፐዊ ዘንጋ ዘንጋ ሸፐተ።
\v 29 ኧኸረ ሁዳ በጎይታ ኢፍቲ አይድጋኬዝነኽ።

\v 30 አሁዋ ጭን ጎይታ ተክርስቶስ እማቲ ትረውርዋኸ ኤፐ፤ብእም ኧቫአ ጌታ ኢየሱስ ክርስቶስ ሀሪነድንራ፣ጽድቅመንራቪ ሙጭርነድመንራ ሱጉያመንራ ኤፐን።
\v 31 ባቴ መጣፍ ይርመኸ«ሂንኋ ያወራካ በጉይታ አውራ።»

\c 2
\p
\v 1 ኧሰማቶ አሁዋይ ኧቫአሁ ግዝየ ፣በጎይታ ሂን ኧረፐረ ምስጢር አትምብርኩም ባአሬ በገግኛይ ኧኋርትቪ ባአዮነድቭ ኢኢድሁዋይ አማአኋ።
\v 2 በግታሁዋ ታነሁ እማት ኢና ባረ ኧትሰኧረ ክርስቶስ ባሀሬ ኧኛአር አታአር ባንሂርይ አንጥሁወ።

\v 3 አሁዋይ ኧቫአሁ ሁዳ በሮኦራ ቂጭናቪ በፈራድቭ ከስ ኸርሁታ ቲያረኧዴ ማአሁ ባነደ።
\v 4 ቃርመኛቪ ትምርትመኛ በመንፈስ ቅዱስ ደረግን ባሀሬ ፣በሰቭ ሀሪነድቪ በሰቭሜ አዮነድ ኧቫአአር አኸረንዳ ።
\v 5 ኧመዳቭ እምነታሁዋ በጎይታ ደረግ ባሀሬ በሰቭ ኧኋርት አይኸነኸ።

\v 6 ኧጎይታ ቃር ቢዌስርታ ሰቭ ግት በሀሪነድ ንዝሬክነ፤ንዝሬኪኔዳቭ ቃር ኧዋ አለም ሰቪ፣ዌ ዮኦፈታ ኧዋ ኧዋ አለም ዳኘ ኧሆሩዋ ሰቪ ሀሪነድ አኸረንዳ ።
\v 7 ኢና ጭን ጎይታ ተዘቨር ኢፍቲ በተረ ኧክብርንራ ወሰነ አወናን ታንሂነዪ ኧረፐረ ሀሪነድኋ አጬግነ ንኢድነ።

\v 8 እመዳቭ ተዋ አለም ዳኘ አትዎሁኗ አኋሪዳ፤ተኋሪሽ ዋ ኧከበረ ጎይታ ባሶኦሪዳ።
\v 9 ቢኸር ኤር አናሸናአር፣እንዝር አንሰምአናአር፣ኧሰቭ ሂን አናጫመጠናአር ጎይታ ኢረንጂዳ ሁኗ አወናኖም።

\v 10 ጎይታ ጭን በመንፈስኋ ኸረታ ዋዳ ኢኢና አትሄረንረ፤መንፈስ ቅዱስ አትዎኋ አይሰርአወ ኧጎይታ ዘንጋ አታአር ታይተርፍ ጀፐረ ይሂር።
\v 11 በጎይታ ሂን ታነዳ ተጎይታይ መንፈስ ባሀሬ ፥በሰቭ ሂን አነዳ ጩመጨ ኢሂርካአር አትዎኋ ኤነዳ፤እመኸ ኧኸሬ ኧጎይታ መንፈስ ባሀሬ ኧጎይታ አሳብ ኢሂርካአር አትዎኋ ኤነዳ።

\v 12 ኢና ኧቴኤፐኔ ኧጎይታ መንፈስን ባሀሬ ኧሰቪ ሁዳ አከረንዳ፤እመዳቭ አቨንረ ሁዳ ፥ ኧቴኤፐኔ ተሁዳ ኧኸረኸ ንሂነኔ።
\v 13 ኢናቭ አአሁዋ ንኢድኔኩዋታ ሁዳ ዋዳን ፤ተሰቭ ውቀት ተትማኔ ቃር ታይኸር፣ተጎይታ መንፈስ ኧትማርኔ ቃር ንዝሬኪነ፤መንፈሳዊ ትምርት ናትመነዳቭ ሁዳ ተጎይታ መንፈስ በረከቭኔ ኧኋርትን።

\v 14 ኧጎይታ መንፈስ ኤነነ አናአመረ ሰቭ ፣ኧጎይታ መንፈስ ኢንካ ወሄ ዘንጋ ኢቴኤፐሪ አይኸነዳ።እመዳቭ አሀ ሰቭ ጋውነድ ኢቨስርኩ፤ዋዳ በጎይታ መንፈስ ኢረሁዊዳአር ኧኸሬ ኧወስርት አይኸነዳ።
\v 15 መንፈሳዊ ሰቭ ጭን ኢምረምር ባሀሬ ሁዳ ባአትዎኋ አይትምረመርካ።
\v 16 ፥«ኧጎይታይ ሂን ማን ይሂር? ሁድሁ ኢቨህሪ ማን ኢኸነ?»ቧርም ኧጣᎉምነኸ።

\c 3
\p
\v 1 ኧሰማቶ በክርስቶስ አንተፓሁዋ ትከ ኧርሁዋይ ኧኸሬ አባይተረ ሰቨነኸ ባሀሬ በጎይታ ቃር ኧትራኧ ሰቨኸ ኧዝሬክሁዋይ አኸረኒዳ።
\v 2 ገና አንተፓሁዋይ ኧኸሬ አይቭ አሰጨኩም ባሀሬ ቱኧ ሸረድ አናቨንአኩዋታ፤ ዋአካቭ ቢኸር ገናንሁዋ።

\v 3 ዋአካቭ ኧገጋሁዋይ አሳብ ቴእተሁዋታ ኧጎይታአር አኸርሁዋታ፤ ዋአካቭ ስን በግታሁዋ ኧሰቫአር ኧዝወርትቪ ሽርቭ ኧቴኤጅት አነ፤ ባቴ ዋዳ ኧጎይታ ሰቭ ኧሁርት ቸኧሁምኧዋ አለም ሰቭ ኧሁርትሻሁዋ አሀራ።
\v 4 ታሁዋ ግት አት ሰቭ « ኢያ ኧጳውሎስንኋአር ኧኛማሁዋ» » « ኢያ አአጵሎስንኋር ቱሩዋ እመዳ ኧዋርታሁዋ በክርስቶስ አናአመረ ሰቨኸ ትርውሩዋ ኧዋርትን።
\v 5 ዘንጋ ጭን ጳውሎስ ማንተን? ሁኗ በክርስቶስ ታአዉርዋኸ ኤፐኩዋ አገላይኗ፤ አሁም አአመርሁዋ ሁዳ ሁኗ ኤኤጅኩም ታንዳን

\v 6 ኢያ ኧፐርሁ አጵሎስቭ እሀ አሰጨ ፤ አረኧ ጭን ጉይታን።
\v 7 ያረእካ ጎይታን ባሃሬ ፥ ኧኧፐረቪ እሃቭ አሰጨ ሁዳ አታአር አሆርታ።

\v 8 የኧቭርካ ሁድቪ እሀ ያሰጭካቭ ሁዳ እማትኗ፤ እእንእዎኋ ኧጣ ኧጣኋ ኧቬናኋ ኧገግ ገግኋ ሽልማት ኢቴኤፐርኬ።
\v 9 ተጎይታ እማቲ ኒንአነዳንራአር ፤ አሁም ኧጎይታ ቹጃንሁዋ ፤ኧጎይታቭ ቢድንሁዋ።

\v 10 ተጎይታ በቴቬ ኧቴውት እእህር አአት አአዮ ንፓቭኸ ጉዋር ሸቀርሁ ፤ ኧኛቭ ሰቭ ኢያ በሸቀርሁን ጉዋር ቀነሰታ ያረሽ ፤ ዘንጋ ጭን እንእዎኋ ኧዎጣ ኧዎጣኋ ኧተኸ ያረሸኸ ኧጦፕት አነወ።
\v 11 እመኸ ኧኸሬ ኧሸቆሪ ጉዋር ቴእተታ ሀአቨ ኧኛ ጉዋር ኢሸቅርካ ሰቭ ኤነዳ እም ቢድ ያረሽኴ ኧሸቆሪ ጉዋር ኢየሱስ ክርስቶስን ።

\v 12 ማንኢሙኋ በዋ በሸቆሪ ጉዋር ጉዋር ፎር በወርቅ ቭ ቢኸር በቭር ዌ በከበረ እቭር ቤኧ ዌ በሳአር ዌ በጋቫ ያረሽካ ሰቭ ቢረቭር ፤
\v 13 ኧዎጣ ኧዎጣኋ በቭር አረሸኸ እንእዎኋይ ሜና ኢትሄርወዳ ኢታሽወዳ ኧፍርድ ቀረ አቫአኴ፤ ህም ቀረ እንእዎኋይ ሜና በቭር ኧቴፐኸ ብእሳድ ፍቲቶ ያዢዴ።

\v 14 ማንኢሞኋ ኤፐን ሜና ባነኧፋወ ሽልማትኋ ኢቴኤፐ።
\v 15 ሜናኋ ብእሳድ ኧተደወ ሰቭ ሽልማት ኢወኧርወ ሁዳ ኝን ኢተርፍ ፤ ቢኸርኢተርፍካ ሁዳ ብእሳድ ከስ በጭንቅ ገኢዋአካናአረኸ

\v 16 አሁዋ ገጋሁዋ ጎይታይ ሙጭር ቢድ ኧኸርሁዋይ፣ ኧኸሬ ኧጎይታ መንፈስ በሂናሁዋ ኢቭር።
\v 17 ባቴ ማንእየ ሰቭ ኧጎይታይ ሙጭር ቢድ ቢቫንር ፥ ጎይታ ሁድቭ ኢቫንርኩ፤ እም ኧጎይታይ ሙጭር ቢድ አሁትንሁዋ።

\v 18 አት ገግኋ አቄቅ ማንኢ ሰቭ በዋ አለም ሀሪ ኧኸራአር ቢቨስርኩ፥ ሀሪ ኢኸረኸ ኢያ ጋዋንሁ ኧቫር።
\v 19 ኧዋ አለም ሀሪነድ ዋኸ ቧርም ኧጣፊመኸ ሁዳ ሃሪ ሁኗ በገግሁኗይ ተንኮል ኢጠጥኮዋ ።
\v 20 ሀአቨ በኧኛ ኤኤዲ ፥ጎይታ ሀነ ዩርታ ሁኗይ ጩመጨ ማንእየአአር ኧኸረኸ ኢሂር።

\v 21 እንእአአር አሁዋ ኧኸሬ፥ በዋቴ አትዎኋ በሰቭ ሂንኋ እብያውራ
\v 22 ጳውሎስቭ ኸረ አጵሎስ ዌ ኬፋ እም አለምቭ ኸረ ኧዘላለም አያ ኧሁርት ዌ ሙድ ፣ ዋአካቭ አነዳ አነዳ ሁዳ ኧረገኋ ኢቫአካ ሁዳ፤ እንእ አሁትናአር።
\v 23 አሁዋ ኧክርስቶስንሁዋአር፤ ክርስቶስ ኧን፤ ጎይታናአር ኢፍበጎይታጋውነድቲ

\c 4
\p
\v 1 ባቴ ሰቭ እንእ ኢና ኧክርስቶስ አገልጋይመኸዪ ኧጎይታቭ ኧሂንኋ አሳብ አዎኖኰ ሰቭ ኧኘተ ያዠንሬ ያትሲእ።
\v 2 አደራአኖዳቭ አሰቭ ሙርቴ ኧሁርት አነወ ፤

\v 3 ቢኸርቭአሁዋ ዌ ኧኛ ሰቭ ቢያ አጥጨነካ፤ ኢያቭ ስን በገግኛ ኧፈርዲ እንችልካ፤
\v 4 ኢያ ሂንኛ ንጥሁን ፤ቢኸር ተቫጢር ኧቭጠርሁዳንኋአር አንካ ፤ቢያ ኢፈድካ እማት ኢየሱስን።

\v 5 እመኸ ኧኸሬ ጌታ ኢየሱስ ኧፍርድ ቶኦትኋ ኢፍቲ ባአት ሰቭ እፈንዱሁዋ ፤ሁዳ ቲቫአካ በጠነቫ ኧደኧር ዘንጋ እንእ ሰቻይ ያአኩሴ፤ህም ግዝየ ሰቭ እንእ ተጎይታ ዋግግግጋኋ ኢተኧቨርሴ።

\v 6 ባቴ አሰማቶ አአሁዋ ያጌክርሁዋይ ባሁታ ባሁዋ ዘንጋ ኢያ ገግመኛቪ አጵሎስቭ መርኸት ኤፐሁ አቴኤቭነኩም ፤እመዳቭ ኤፐሁ ሁዳ ፣« ተጣᎉ ቃር አድቭርወ»ይቭካ ምህር ቲና ትትሟርዋኔ እመኸ ኧኸሬ ባት ሰቭ ሂናሁዋ አውየተሁዋታ ኧኛ ሰቭ አትቁርጩዋ
\v 7 ትሁርትሞኋ አኸ ተኧኛ ሰቭ በቭር ትትረእ እንቴኤፐርኸናአር ኧገጋኸ ኧኸራአ ምር አነ በቴፐርኸጋረሁ አንቴኤፐረ ሰቨኸ አትጋኬዝ ።

\v 8 ዋአካሽ ያትሲኢሁዋታአር እንእ ነከሁም ፤ደንገኘቭ ኸርሁም ፤ቲና ተቫይተርሁም ነገስሁም ፤ ኧውረ ተረገስሁዋሽ ኢናቭ ታሁም ንገስንነባነደ።
\v 9 ጎይታ ኢና ኪሸረኘኋ ሙድ ተፈደዎምታ ኢዎጅኰዳ ኤኤዲ ቲዎስጂዮታ ሰቭ ኢኢአጋድ አወናንራኣር ዋኢቨስሬ፤ ብእም ኧቫአ ኧፍጥረት እንእ መሳቄያ ኸነ።

\v 10 ኢና ኧክርስቶስ ባነታ ጋዋ ኸነ፤ አሁዋ ጭን በክርስቶስ አዮ ኸርሁም ፤ኢናቭ ቂጨኘአአር ኸነ፤ አሁዋ ጭን አርወተኛአር አርወተኘንሁዋአር ፤ አሁዋ ኧትከበሁዋታንሁዋአር፤ ኢና ጭን ኧትዋረድነዳንራአር ።
\v 11 ኢና ኢገደንረ ፣ ኢጠቫንረ ፣ ኢዠሸንረ ፣ ኢደርጉንረ ቢድቭ አይቫር ንዛፕትነ።

\v 12 በገግን ራይ ኧጅ አፐነ ንቂጥነ ፤ ቲሰድውንረዳቭ ንደንነ ፤ቲሰድጅንረዳቭ ንፈርህነ ።
\v 13 ሹውንራ ቲያአፎንረዳ ወሄአር ንዠፕነ ፤ ዋአካቭ አአፈር ያሽሺዳ እሻሸ ኢቃሺዳቭ ቆሻሻ ኽነ።

\v 14 ዋዳ ኧጠፍነሁዋታ ሁዳ ኧረድሁዋታ ዴንጋኛኸ ኧኝኧተሁ ኧቨህርሁዋኔ ባሀሬ አቅቨጭሁዋይ ባይተሁታ አኸረዳ ።
\v 15 ማእየ በሁ ኢትዌዘርታ አዌድ ቢረውርኩም ፣ኖኦራ አቭ ጭን ኤነውነኩዋታ፤ኢያ ጭን በወንጌል በክርስቶስ ኢየሱስ ኤኘኩም።
\v 16 እመኸ ኧኸሬ ኢያ ትወስሩዋኸ ኧሰኧርሁዋ።

\v 17 ብእም ኧቫአ ኢረጂዳቪ ያአውሪዳቭ በጌታ ኢየሱስ ትከኛ ኧኸረ ጢሞቲዪስ ኬሸነኩም፤ ሁድቭ ቤኤድ ኤኤዲ ባነውታ ቤተ ክርስቲያን እንእ ትናስተምርኩዳ ትምርትኢትስማምአካ በክክርስቶስ ኧረከሁን አዲስ ኧሂዎት መያ ሁዳ ያአውድሁዋሴ ።
\v 18 ታሁዋ ግት አታት ሰቭ አሁዋይ እአቫአአር አንቫአአር መስብአረኖምታ ተጋኬዡም።

\v 19 ቢኸርቭ ኧጎይታ ፍቃድ በኸረ ካች ባይተሁ አሁዋይ ኧቫአኴ፤ ተህም ቀጥወ ሀ ኢትጋኬሽታ ሰቭ ፣ እማት ኢዝሮኲዳ ቃር ታይኸርቭ ደረግሞሁኗ አሽኮይ ኧሲእ።
\v 20 . እመዳቭ ኧጎይታ መንግስት ኢትሄርካ ሁዳ በጎይታ ደረግን ባሀሬ እማት በቃር አኸረንዳ።
\v 21 ባቴ ትሱኢዳ ሁዳ ኧተዳን አአር ንጥጥ ናአዌ በርመጀቪ በገርነድ መንፈስ

\c 5
\p
\v 1 በግታሁዋ ኧወከዊኸ ሁጅር ኧድሙጅት አነኸ ኢትሰምአ፤ ኧዋ አይነት ባጢር በአረማዊ ሰቪ ስን ሲቭኧቶ አይሂሪዳናአር፤ ባሁዋ ግት አአባ ኋ ምሽት አአገፓ ሰቭ አነ።
\v 2 ባቴ ኧዋኸ ያቅቨጭካ ዘንጋ በግታሁዋ ታነ ምር ያድጋኪስሁዋ? ኢረእ በዋ ዘንጋ ቀጨ ባ ይተናሁዋታ ኧዋኸ ሜና ኤፐ ሰቭ ኦኦት ባነዎሁዋተ።

\v 3 ማንእየ ኢያ ታሁዋ እማቲ ባነቭር በመንፈስ ጭን ታሁትንሁ፤ አታአር ታሁዋ እማቲ አነኋ አአር ሂንተሁታ ኧውውዋሀአር ኤፐ ሰቭ ዋአ ፈንድሁወ።
\v 4 ትደሞጅታ ኢያቭ ታሁዋ ኣረቭሪ ኧኸሬ ፣ በጌታንራ በኢየሱስ ሹውቪ በግታሁዋ ባነዳ በጌታንራ በኢየሱስ ክርስቶስ ጦና፥
\v 5 በቫጢር ኧትቬንአ ኧሃ ሰቪ በሰር ሙጅተታ ነፍስኋ በክርስቶስ ፍርድ ቀረ ኢተርፈኸ ኧዋኸ ሰቭ ኧሴጣን ኦኦም አአይውሪ።

\v 6 ኧድጋጌዥታሁዋ ወሄያአር አኸረንዳ፤ እንስየ እርሾ ኑኡየ ሊጥ ያፈእረኸ አትሂርታ?
\v 7 ዋአካ እርሾ አይቫር ኧኸርሁዋመኸ፣ ብእምቴ እርሾ ኤነወ ሊጥ ትሆሩዋኸ ጉስ ሊጥ አፍኮዋ፤ ኧፋሲጋ ጣይንራ ታንጠንረ።
\v 8 ብእም ኧቫአ ጋናጢነድቪ ፣ሙጥጥነድቭ በቬንአወ በጉስ እርሾ ታይኸር ፥ እርሾ ቤነወ አመኛትቪ ውነትቭ በቬንአዋአር ኧጠርወሸ ሙርአሁዋ ዋአሩዋ።

\v 9 ኧዋ ኢፍቲ ጣፍሁ በኬሸነኩዋ ኪሽር ተረከውዋኸ ሁጅር ኢደምጅታ ሰቭ ኢሆሩዋኸ አትሁሩዋ ባኩም ባነደ።
\v 10 እመዳ ኧዋርትኛ በዋ አፈር ፎር ቲረውርታ ኧረከውዋኸ ሁጅር ቲደሙጅታ ፣ ተጠርጥዐርተኘ ፣ ተፈንጌያ፣ኧጣጣ ቲጌቡርታ ሰቭ እማቲ አትቦሩዋ ኧዋርትኛ አኸረንዳ፤እኰኸ ተኸረ ተዋ አለም ኦኢት ያትሲኢሁዋ ኧዋርትን ።

\v 11 ኢያ ኝን ኧጠፍነሁዋታ ሁዳ ክርስቲያን ቲዩሩዋ ኧረከውዋኸ ሁጅር ቲደሙጅታ፣ ጠጠር ቲዩርታ ፣ ኧታጣ ቲጌቡርታ፣ኧሰቭ ሽው ቲያአፎታ፣ቲሰርኡታቭ ሰቭ አትኪራሞሹዋኸ ባሁ ታነዳን፤ተዋኸ ሰቭ ሸረድቭ እማቲ አትውርኦዋ።
\v 12 ክርስቲያን ባሆሩዋ ሰቭ ኧፈርዲ ኢያ ምር አገፓዪ? ክርስቲያን በሆሩዋ ሰቭሁ አሁህ አትፎርጅታ?
\v 13 ክርስቲያን ባሆሩዋ ሰቭ ኢፈርድካ ጭን ጎይታን ባቴ ሙጥጥ ሰቭ ተግታሁዋ ኦኦም ቋሺ።

\c 6
\p
\v 1 ግት አት ሰቭ ተውችር ሰቭ ሽር ቢረቭርወ ፣ዘንጋኋ ኧክርስቲያን ኢፍቲ አተኧንውትቸኧታ ኧተኽ ደፈረታ ኢትፋንዲ አናአሞሩዋ ሰቭ ኢፍቲ ኤኤነቭ?
\v 2 ክርስቲያን ሰቭ አት ቀረ ባአለም ሰቭ ኢፎርጁዋኸ አትሂርታ? ባአለም ትፎርጁዋዄ በኽረጋሁ አካ ብእንስ ዘጋ ትርጁዋዄ ኧተኸ አይኸነሁዋታ?
\v 3 እማትበዋ አለም ዘንጋ ታይኸር፣ በላአካ ስ ፎርዋኸ አትሂርታ?

\v 4 ንዴአሁዋ ዘንጋ ቲጠጥሁታ በቬተ ክርስቲያ ከስ ኢቆርጪዮታ ሰቭ ኢፎጁዋይ ሹሚዋ።
\v 5 መዳ እሁዋታ ሁዳ ናቀቭጭሁዋ ባሁ ታነዳ፤ እንዴ በግታሁዋ አትራከሰ ሰቭ ያቄያም ኢቨቃካ አቭቃጥ ሰቭ በግታሁዋ ኤነዳ?
\v 6 ዘንጋ ጭን ኧሰም ኧስምኋ ኢከስሲ ፍርድ ቢድ ያር ፤ሁድ ባያአውርዋ ሰቭ ኢፍቲ ።

\v 7 ባቴ አሁም ታሁም ኧትራሆሽታሁዋ ውርደታሁዋ ሰቻ ያዋአወሁዋ።ፍርድ ቢድ ብታርታ ሁዳ ብትጎፎሚ ብትቆቁም አይፈዝካ?
\v 8 አሁዋ ጭን ክርስታን ኧሰማታሁዋ ብቆቅት ገጋሁዋ ትቦድሉዋ።

\v 9 ዌ አይቴኤዠዡዋ ሰቭ ኧጎይታ መንግስት አይጎኦዋኸ አትሂታ? በዋ ዘንጋ አትቄቆሁዋ ፤ ትእሽቻ ዘግዘግ ዩርታ ሰቭ ፣ኧቅርኘ ኢጌቡርታ ሰቭ፣ ኧረከውዋኸ ሁጅር ኢደሙጅታ ሰቭ ፣ ምሽት ተቭሽት፣ ዌ ምስ ተቭስ ሁጅር ኢደሙጅታ ሰቭ ፣
\v 10 ዌ ፈጌያ ፣ተረኮውዋአር ዘግ ዘግ ዩርታ ሰቭ፣ ያሰህርካ መጠጥ ሰጮም ኢሶሁታ ሰቭ ፣ያትቃንውታ ሰቭ፣ ኧሰቭ ንቭረድ ኢረጥቁታ ሰቭ ፣ኧጎይታ መንግስት አይጎኦታ።
\v 11 ታሁ ም ታታሁዋ እመኸ ባነቨሁዋተ፤ ዋአቨካ ጭን በጌታ በኢየሱስ ክርስቶስ ሹውቪ ፣በጎይታንራቭ መንፈስ ታኧሁም መጠርሁምታ ተነፍሁም።

\v 12 « እንእአር ተፈቀደ» ቢኸርቭ እንእዎሁኗ አያጌኪርታ፤ «እንእአአር ተፈቀደ » ቢኸርቭ አአትዎሁኗ ባሬያ አንኸርካ።
\v 13 « ህመኸቭ ሸረድ ኧከስን ከስቭ ኧሸረድን » ጎይታ ጭን እንእዎሁኗ ያአፋኮዋ ፤ ምስየንራ ኧጎይታናአር ባሀሬ ኧረከዊኸ ሁጅር ኢደሙጅኰዳአር አኸረዳ፤ ጌታ ኢየሱስቭ ኧቭስየናአር።

\v 14 ጎይታ ኧጌታ የሱስ ተውንድ ኧረሳንመኸ ፣ ኢናቭ በሩእ ጦናኋ ተውንድ ኢረንሳንረዴ።
\v 15 ምስያሁዋ ኧክርስቶስ አካላት ኧኸረኸ አትሂርታ? ባቴ ኧክርርስቶስ አካላት ውሽተሁታ ተረከቨች ሰቭ ሁጅር ትደምድካ ምሽት ምስየ ንኪራሲ? እሸኸሽ ስርም አይኸርካ።

\v 16 ዌ ተረከቨቸን ሰቭ ሁጅር ትደምድካ ምሽት እማቲ ኢወኧርካ ሰቭ ተሂዳ እማት ምስየ ኧኸረኸ አትሂርታ? «ውርኤቸመሁኗ እማት ምስየ ኢሆርቴ » ቧርም ጣᎉ።
\v 17 ዘንጋ ጭን ተጌታ የሱስ ያድጋፓካ ሰቭ ተሁዳ በመንፈስ እማቲ ኢኸር።

\v 18 አካ ኧረኮዊኸ ሁጅር ባደሙጁዋይ ሱሁዋ፤ ሰቭ ዬኩዳ ባጢር እንእ ተአካልኋ ውጪን፤ትዳርኋ ቸኧታ ኧረከቨኸ ሁጅር ኢደምድካ ሰቭ ጭን በገዛ ምስየኋ ባጢር ኢንአ።

\v 19 አካ ምስያሁዋ በሂናሁዋ ኢረቭርካ መንፈስ ቅዱስ ቤተመቅደስ ኧኸረኸ እትሂርታ? እም መንፈስ ተጎይታ ኧቴኤፐርዂዳናአር። አሁም ኧገጋሁዋአር አኸርሁዋታ።
\v 20 በዱንያቭ ስራውኩም ፤ እመኸ ኧኸሬ በቭስያሁዋ ጎይታ አኩቡሩዋ።

\c 7
\p
\v 1 ኧጣፍሁኒ ዘንጋአር ሰቭ ኧቪድኋ ባይኸር ወሄናአር ፤
\v 2 ዘንጋ ጭን ሰቭ ኧረከቨኸ ሁጅር ባይደምዲ እንእዎኋ ኧገግ ገግኋ ምሽት ትምበርኩ ፤ እሽቻቭ ኧገግ ገግህና ምስ ኧምበርካ።

\v 3 ምስ ኧቭሽትኋ ያትሲእካዳአር እንእ ኧንአና ፤ ህመኸ ምሽትቭ ኧቭስሻ ኦንኧት አነቫዳአር እንእ ተንነ።
\v 4 ምሽት አካልሻ እማት ኧሂዳአር አኽረንዳ ፤ ኧቭስምነሻአር ህመኸቭ ምስ አካልኋ እማት ኧሁዳአር አኸረንዳ፤ ኧቭሽትምነኋአር።

\v 5 በጠሎት ትትቋጠውዋይ ኧቀሪ ቀረ ባህእሬ ፥ ገግተገጋሁዋ ባአይ አትዌርዋ ፤ አቅል ኧጉዠት ኤምተናሁዋታ ፥ ሴጣን አያሳስትሁዋኸ ሀአውምታ እማቲ ሁርዋ።
\v 6 ዋዳ እሁዋታ ሁዳ ጭን ኧቭህነኸባሀሬ ትዛዝ አኸረዳ።
\v 7 ሰቭ እንእ ኢያመኸ ምሽት ታያጋአ ቢረቭር ኢሳሬ ባነደ ፤ ዘንጋ ጭን ሰቭ እንእ ተጎይታይ ኧቴኤፐረን ኧገግኋ ኧኸረ ስጦታ አነነ፤ አት ሰቭ አት አይነት ስጦታ ቲረቭርኩዳ ቡችርቭ ሰቭ ኧኛ አይነት ስጦታ አነነ፤

\v 8 እናገፓምቪ ማመህና ኧዎጁኳ እሽቻ ዋኸትን ኧቨህርካታ ሁዳ ዋኸትን ኢያመኸ ታያጋአ ቢረቭራ ወሄናአር።
\v 9 ዘንጋ ጭን አቅል ኧጉዠት ቤኤመና አግቭአ ፤በተኛት ተዛዠትቭ አጉኧት ኢፈዝ።

\v 10 አናጎፖዋ ሰቭ ጭን ኢኢዝዝኮታ ትዛዝ ዋኸትን እን ትዛ ኧጌታ ትዛዝን ባሀሬ ኢያይ ትዛዝ አኸረዳ፤ ምሽት ተቭስሻ አትቫይተር፤
\v 11 በትቫተረች ጭን ታታጋአ ትምበር፤ ሀ በበኸረ ተቭስሻ ትጥቄያቨጥ፤ብ ምስቭ ምሽትኋ አይግፍር።

\v 12 ኧውችርሁኗ እኮታ ሁዳ ጭን ዋኸትን ፥ እመዳቭ እካ ሁዳ ኢያትንሁ ባሀሬ ጌታ አኸረዳ አት ክርስቲያን ምሽት አኸረች ምሽት አነቸነዳ ምስ ምሽትኋ ተሁዳ እማቲ ትረቭሪ በስውኤች አግፍርካ።
\v 13 አናአቨረቭ ምስ አነናዳ ክርስቲያን ምሽት ምስሻ ተሂዳ እማቲ ኢረቭሪ በሴኧ ቴእተቸን አትሆር።
\v 14 ምስ ክርስቲያን አኽረ ምስ በቭሽትኋ ኧቫአ ኧጎይታይ ቢቴኤነቭ ማን ኢሂር? አናአመረችቭ ምሽት አነቸነኸዳ ምስ ባኸ ኧቫአ ኧጎይታይ ብቴኤነቭ አኸ ምር ትሂ? ሀበኸረ ዴጋሁዋ ጎይታአር አሆርታ፤እማቲ በረፐርሁዋ ን ዴንጋሁዋ ጎታአር ኢሆሩዋ ።

\v 15 ዘንጋ ጭን አናአመረ ሁዳ ንትቫይተር በቫረ ኧትቫይተር፤አት ክርስቲያን ዌ ኧተም በዋሀአር ኧታአኮጁዋአር አሆርታ፤ጎይታ ኧኸናንረ ሁዳ ቦገሬት ንረቭነኔ።
\v 16 ምሽቶ ባሻ ኧቫአ ምሳሽ ኧጎይታይ በቴኤነቨ ምር ሀርሽም? ምሶ አኸሁ ምሽታኸ ባኸ ኧቫአ ኧጎይታይ ብቴኤነቭ ምር ትሂር? እንእዎኋጎይታ ባቨን ስጦታቪ ፣ ጎይታ ቲኸራኩዳ ኧረፐረመኸ ኧምበር፤አአብያተ ክርስቲያን አአሁን ቂጫቭ እመዳምን።

\v 17
\v 18 አት ሰቭ ዘገር ባጎፔጋ ክርስቲያን በኸረ ዘገር አናጎፔያአረኸ አይህር ። ዘገር ታያጎኦዪ ክርስቲያን ኧኸረ በኸረ ዘገር አያጉኤ።
\v 19 ዘገር አጉኧትቭ አናጉአትቭ አያጌኪርካ ዋና ዘንጋ ኧጎይታ ሙርአድ ኧዎንኧትን።

\v 20 እንእዎኋ ጎይታ ቲኸራኩዳ ኧረፐረመኸ ኧምበር።
\v 21 ጎይታ ኧኸናናኸ ግዝየ ባሬያ ባነኸዴ? በዋዳ አጠረቅ፤ተቭሪያነድ ትድጌያፈሪ በኸረነኸ ተጌያፈር።
\v 22 ባሬ ያ ኸርኸታ ጎይታ ኧኸናን ሰቭ በክርስቶስ ነጣ ዋአ ፤ህመኸ ጎይታ ቲኸራኩዳ ባሬያ አነፐረ ሰቭ ዋአካ ኧክርስቶስ ባሬያን።
\v 23 በዋጋ ኧራውኩዋይ ኧኸሬ ኧሰቭ ባሬያ አትሁቱዋ።
\v 24 ኧሰማቶ እንእዎኋ ጎይታ ቲኸራኩዳ ኧፐረመኸ ኧህር ኧምበር ።

\v 25 አናጎፖዋ ዴንጋ ተግሬዳአር ኧቫሬያአር ኤነዳ ፤ቢኸር ተጌታ ምረት ኧትረሳ አአት ኧውርቴ ሰቭኸ ምህር ኧቭህርኴ።
\v 26 ዋ ታነዳ ችግር ኧትረሳ ታታጎኦም እመኸ ብትረውሩዋ ወሄያአር ኢቭስሬ።

\v 27 ባገፓኸ ንግፍር አትቫር፤ ባናፓኸ ናግቭአ አትቫር።
\v 28 ባታጋአ ጭን ባጢር አኔፐኸዳ ፤ አናገፓች ዘየ ገረድ ቢያዎጆያ ባጢር ኧኸረንዳ ፤ዘንጋ ጭን በዋ አለም ያጎኦታ ሰቭ ኖኦራ ጅጓረ ኢስርአዎዋ። ኢያቭ ዋ ችግር አይሰርአወሁዋኸ ኧሲእ።

\v 29 ኧሰማትኞ አሳብኛ ዋኸትን ፥ዘቨርኋ አኧረ በዋቴ ምሽት አነኖታ ገማ ኤነኖዋአረኸ ኧሁርም ኧቦሩዋ ።
\v 30 ኢዎሁታ ሁኖዋ አይዎሁዋአረ፣ኢሽርኮታ ሰቭ አይሽርኮዋአረኸ ኧሁሩዋ፤ ግቭር ኢስሮታ ሰቭ ኧስራዊ ግቭር ኧሁኖዋአር አኸራአረኸ ኧወዝሪ፤
\v 31 አለም ዘንጋ እንእ ያልፍካአር ኧኸሬ ፣በዋ አለም ዱንያ ኢጠቀምካ ሰቭ ፣ አይጠቀማአረኸኧህር ኧምበር።

\v 32 ኢያሽ ታትጨነቁም ትረውርዋይ ኧሲእ። ኧቪድኋ አኸረ ሰቭ ጎይታ ያትሽሪ እማት ኧጎይታአር ያጫምጥ ።
\v 33 ኧቪድኋ ኣኸረ ሰቭ ጭን ምሽትኋ ያትሽሪ እማት ኧዋ አለማአር ያጫምጥ።
\v 34 ብእም ኧቫአ ሂንኋ ውርኤቲ ኸረ ኧዋርትን፤አናወቼያ ዘየ ገረድ እማት ኧጎይታአር ታጫምጥ፤ ጩመጨመሻ በቨሰርቪ በመንፈስ እማት ኧጎይታአር ኧሁርትን።

\v 35 እመዳቭ እካ ሁዳ አሁዋ ኢፈዝሂዋኸ ባሁ ታነዳን ባሀሬ አቅቨጭሁዋይ ባይተሁ ታነዳ አኸረንዳ፤ ጭሞጨመኛ ሂናሁዋ ውርኤቲ ታይኽርዎሁም ብእማት ሂን ኣጎይታአር ትሆሩዋነኸ።

\v 36 ቢኸርቭ አት ምስ ኧፈቸና ገረድ ተመኛድኋ አደጊተንታ ኧፍረሁት ቤኤመን አግቭአካ ባገፓና ባጢር አኸረንዳ።
\v 37 ዘንጋ ጭን ያጋአይ ተመኛት ቤነነ፣ታናጋአ ኧረቭርኴ በይተ ሂንኋ በትሸከቨነ ባያጋአካ ወሄናአር።
\v 38 እመኸ ኧኸሬ ገረድ ፈቸ አገፓ ሰቭ ወሄያአር ኤፐ፤ አናገፓቭ ስቭ ወሄያአር ኤፐ።

\v 39 አት ምሽት ምስሻ ባአያ ታነ በትዳር ቂጫ ተሁዳ ኧታአከደችዳንያአር፤ ምስሻ በዎደና ጭን ኧሳረና ገማ ታጋአይ ኢኽርአካዳአር ኤነዳ፤ ታጋአኩዳ ምስ ጭን ክርስቲያን ኧሁርት አነወ።
\v 40 ኢያኸ በኸረ ጭን ታታጋአ እመኸ ብትረቭር ኢረእ ኧሳርት ትረህቭ፤ ኢያቭ እመዳ ትንካ ኧጎይታ መንፈስ ቲያ አነዳአር ኢቨስሬ።

\c 8
\p
\v 1 ኧጣጣ ኢጌቡርኴ አንጪ ዋጋ በሰርአአር እሁዋታ ሁዳ ዋኸትን፥ እንእቨንራ ኧኋርት አነንረኸ ንሂነ፤ እኋርት ያድ ጌያኲዝ ንመጀ ጭን ይትሽር ።
\v 2 ኢያ ኧሂር ይቭካ ሰቭ አቸ ኧኋርት አኖዳአህር አሀረዳ።
\v 3 ጎይታ ኢረድካ ሰቭ ጭን በጎይታይ ኧትሄረዳናአር።

\v 4 ባቴ ኧጣጣ ኢጌቡርኴ አንጪ ዋጋ በሰራአር እሁዋታ ዋኽትን ፥ በዋ አለም ጣጣ ዩኩዋ ሁዳ ማንእየአአር ኧኸረመኸዪ ጎይታ ባሀሬ ኧኛ አምላክ ኤነኸ ንሂነ።
\v 5 ማንእየ ጎይታ ታይሆርን ጎይታ ዩሪዮታ ኖኦራ ጣጣቪ ሰቭ ኦጎዥኦማአር በሳቫይቪ ባአፈር አነውዋ ቢዩሪ፣
\v 6 ኢናይ ጎይታ ጭን እንእአአር ኧፈጠረቪ ኢናቭ ኧሁዳአር ኧኸነ እማት አቭ ጎይታን ፤ ህመኸቭ እንእአአር ኧፈጠረቪ ኢናቭ ኧሁዳአር ኧኸነ አት ጌታ ኢየሱስ ክርስቶስ አነንረ።

\v 7 ዘንጋ ጭን ዋዳ ኢሂርካ እንእዎኋ ኣሀራ ፤ አታት ሰቭ ኧዋ ኢፍቲ ኧጣጣ ጌቦርም ኧወሸውዋይ ኧኸሬ፥ ዋአካቭ ስን ኧዋኸ በሰር ቲዋርኧታ ኧውረቭ ኧጣጣ አንጪያአር ኢቭስርኮምታ ፥በእምነት አቶፖዋይ ኧኸሬ ኢሰርሁዋ።

\v 8 . ዘንጋ ጭን ሸረድ ኧጎይታይ አያቲእንቨንረዳ፤ ባንቨርአነ ኢቀቭርቨንረዳአር ኤነዳ ፤ ብንቨርአነቭ ኢተፐንረዳአር ኤነዳ ።
\v 9 ዘንጋ ጭን ኧረከዂ መብት ብእምነትሁኗአትፖዋ ሰቭ እቁርፊት ባይኸሪ ተጠፑዋ።
\v 10 ቢኸርቭ አኸ ኧኋርት አነኒ ባይተኸታ ኧጣጣ ኢጌቡርኴ አንጪ ዋጋ በሰር ኧጣጣ ቢጌቡርኰዳ ኤኤዲ ቸየንተኸ ትትቨርአካ ብእምነትኋ አንተፓ ክርስቲያን ብያዥኸ ሁድቭ አጋኋ ኧጣጣ ኧጌቦርኰ በሰር ንቭርአ አይካ?

\v 11 እመኸ ኧኸሬ ዋ ክርስቶስ ኧዎደነ በእምነትኋ አንተፓ ክርስቲያን ኧም ባኸ ኧቭአ ኧኘ ኧዋርትን።
\v 12 ብእመዳቭ ክርስቲያን ኧሰማታሁዋ ትቦድሉዋ፤አምባይተረቭ ሂንኋ መዘኝዐ ኤፐሁምታ ኧክርስቶስቭ ትቦድሊ።
\v 13 እመኸ ኧኸሬ ኢያ ኧቨርአኩዳ ሸረድ በክርስቲያን ኧሰምኛ እቁርፊት ኢኸርወ በኸረ በኧሰምኛ እንርፊት ባይኸሪ በሰር አቸ አንቨርአካ።

\c 9
\p
\v 1 ኢያ መብት አነኒዳ ሰቭ አኸርኋ? ኧክርስቶስ ኪሸረኘሁ አኸርኋ? ጌታ ኢየሱስሁ አናሸሁዳ? አሁህ ቄጥሁ በክርስቶስ ኧረከኩ ዋ ዱኒያሸኛ አኸርሁዋታ?
\v 2 ኧኧኛ ሰቭ ኪሸረኘ ባንኸር፥ አሁዋ ጭን ውረቭ ኪሸረኘሁ፤ ኧክርስቭ ኪሸረኘ ኧኸርዀኸ ኢትጬጉወዳ ማተም አሁትንሁዋ ።

\v 3 ኢምሮሙርኝዳ ሰቭ ኢኮታ መልስ ዋዳን፥
\v 4 ባቴ ኢያ ኧቨርአመዪ ኧሰጭሜ መብት ኤነኒዳ?
\v 5 ኧኧኛ ኪሸረኘኸ ኧጌታ ኧኢየሱሲ ኪረኘመኸዪ ኬፋመኸ ኢናሁ አማኝ ምሽት ጥጭተነ ንዠኔ መብት ኤነረዳ?
\v 6 ተላተነ ኧምቦርት አነቨንረዳ እማትኢያቪ በርናባስንሬ?

\v 7 አካ በገግኋ ዱንያ ወታደር ኸረ ኢትዋካካ ሰቭ ማንተን? ቃዋ ኧፐረታ ቡስር አይራጭ ሰቭ ማንተን? አሬእ አከረታ አይቭ አያርቭ ሰቭ ማንተን?
\v 8 ዋዳ ኧዝሬካ ሁዳ አሰቭ አሳብነኸዪ? ኧ ሙሴ ቂጫሽ እመኸቭ ይርሽ አሀራ?

\v 9 በውሴ ቂጫ «ባአውድ ጤፍ ኢደርኰዳ ባውራ አቃኋ አተኧግድ » ቧርም ጣᎉ ፤ ባቴ ጎይታ አአትጨነቀን ውረ ኧዋውራ ዘጋኒ?
\v 10 ጎይታ ዋዳ ኧረ ሁዳ ኢናአር አትጨነቀን ታንዳሽ አሀራ? አጣᎉ ሁዳ ውረቭ ኢናትናአር፤ ቻዋጅ ኢቹድካ ሁዳ ፣ጤፍ ኢደርኰዳ ባውራ ቴፍ ኢደርካ ሁዳ ሟር አነኒ ባረ ታ።
\v 11 ኢና አአሁዋ መንፈሳዊ ዝይኧተኔነኩዋታ አሁዋ ኢና ያትኬሸንረዳአር ብቲውንረ ኖኦራ በጋኒ ?

\v 12 ቡችርሁኗ ታሁ ዋ መብት በረከውዋጋሁ ኢና ተሀ ኢረእካአር ኧክውት ኤነቨንዳ? ኢና ጭን በዋ መብት አንጠቀምኔኮዳ፤ ኢረእ ኧክርስቶስ ወንጌ እቁርፊት ባንኸኔ እንእአአር ንፈርህነ።
\v 13 በቤተመቅደስ ያጌክርታ ሰቭ ሸረድሁኋ ተቬተመቅደስ ረሁዋመኸዪ፣ ፈቸድ ቢንኦኮዳ ኤኤዲ ያጌኪርታ ሰቭ ተፈቸድ ሂዳ ሟር አነነዋኸ አትሂርታ?
\v 14 እመኸቭ ወንጌጅ ኢኢጅታ ሰቭ ኢረውርኴ ያትኬሽኮታአር ኢቴኤፖሩዋኸ ኢየሱስ ኤዘዘ።

\v 15
\v 16 ወንግውል አአውጅትኛ አያድጌያኪሴዳ ወንጌል ኢኢድካ ሁዳ ግርድ ኧኸረቪዴ።

\v 17 በፍቃድኛ ወንጌል ብንኢድ ሽልማት አነኒ፤ ባኔኤድሁ ጭን ግርድኛ ።
\v 18 ባቴ ሽልማትሆኛ ምርእፈድን? ሽልማትሆኛ መብትኛ ቴእተሁታ ታይኮሽኒ ወንጌል አአውጅትን።

\v 19 ኢያ ነፃሰቭንሁ፣አአትዎሀቭ ባሬያ አኸርኋ፤ዘንጋ ጭን ኖራ ሰቭ ኧክርቶሲ ኧዠፕሪ ትንር ገግኛ ሰቭ እንእ ባያ ኤፐሁ።
\v 20 ኧይሁዳ ሰቭ ኧፕሪ፥ ትንር ተይሁዳ ሰቭ ኧይሁዳ ሰቨኸ ኸርሁ፤በቂጫ ኢረርታ ሰቭ ኧዠፕሪ ትንር ኧቂጫሁኗኸ ነፐሁ ፤ ቢኸር ጭን ቂጫሁኗ አንገዛይዳ።

\v 21 ጎይታ አቬ ቂጫ ቢረቭሬትቪ ፣በክርስቶ ትዛዝ ብነቭርቭ ቂጫ ኤነኗ ሰቭ ኧዠፕሪ ትንር ቂጫ ኤነነ ሰቭኸ ኸርሁ።
\v 22 በእምነትሁኗ ኧቄጩዋ ሁኗ ኧዠፕሪ ትንር ተቂጨኘ ሁኗ ቂጨኘ ኸርሁ ። ቢኸኒዳአር እንእ አታትሁኗ አተርፊ ትንር ትንእዎኋ እንእአአር ኸርሁ።
\v 23 ዋዳ እንእ ኤካ ሁዳ ተወንጌል በረካ ኧትሻከዲ ፣ኧወጌል ባሁ ታነዳን ።

\v 24 24. ቢትራውኡኰዳ ኸቭር ኢትራውኡታ ሰቭ ኖኦራአር ቢሆርም፣ ሽልማት ኢቴኤፐርካ ሁዳ እማት ሰቭ ኧኸረኸ አትሂታ? እመኸ ኧኸሬ ሽልማት ኢቴኤፐርካ ሰቨኸ ተራውኡዋ።
\v 25 ኢትውዳደሪ ኢትዘጋጅካ ሰቭ ብእንአአር አደብ ኧጥጭት አነወ፤ ሁኗ አላፊ ጠፊ አክሊል ኢረሁዋይ ኢቂጩዋ ፤ኢና ጭን አየኧፋ አክሊ ንረህቭኔ ንቂ።
\v 26 እመኸ ኧኸሬ ኢያ ኢሰርወዳ ኤኤዲ አሂር ሰቨኸ እመኸ አንትራውካ፤ ንፋስ ኢጀክካ ሰቨኸ እመኸ አንድጌያመድካ።
\v 27 ዘንጋ ጭን ኧኧኛ ሰቭ ወንጌል አውጅተሁታ ኢያ ውዳቂ አንኸረኸእ ገግኛ ጁሽተሁ ኧግይታ ኢድገዛኸ ኢንኩዴ።

\c 10
\p
\v 1 ኧሰማትኞ አቦንራ ዳቨራ ተጉንኧሁኗይ ኸረ መያ ይትሽኮዋ ኧረፐረኸዪ ወይኦም ኧዎኦዋመኸ ትሂሩዋይ ኧሲእ።
\v 2 ሁኖም እንእ ተውሴ እማት ኢሆሩዋይ ቲዩሩዋ በዳቭራቪ በቫርቭ ተጠሞቁም ።
\v 3 እንእዎሁኗ ታአት መንፈሳዊ ሸረድ ቦንኦም
\v 4 እንእዎሁኗ ታአት መንፈሳዊ እሀ ሰጮም ፤ ኢትሄተርኮዋ ተረፐረ መንፈሳዊ እቭር ሰጮም ፤ህም እቭር ክርስቶስ ባነደ።

\v 5 ቢኸርቭ ጎይታ ብሮኦራሁኗ አሳረኒ ኧኸሬ በቭረሃ ዎተኡም ሞጁም።
\v 6 እመዳ ሁኗ ሙጥጣአር ኧትሜኘውዋመኸ ኢናቭ ሙጥጣአር ባንትሜኝኔ ዋ ዘንጋ ንትጬፕነኸ መርኸት ኸረንረ።

\v 7 ሰቭ ሁኗ ኢወርኦዋሜዪ ኢሰጩዋሜ ቸኖም ፤ ኢጓሹዋሜ ተረሾም ቧርም ኧጣᎉመኸ ተሁኖም አታትሁኗ ኤፖዊመኸ አሁም ኧሁኖመኸ ኧጣጣ አትጎቡሩዋ።
\v 8 ተሁኖም ኣታትሁኗ ኧረከውዋኸ ሁጅር ደሞጁምታ ብእማት ቀረ ሁይአ ሶኦስት ሺ ሰቭ አነኧመኸ፣ ኢናቭ ተረከቭኔ ሰቭ አድምድነ ።

\v 9 ተሁኖም አታትሁኗ ኧጎይታ ኧፎትተሪመኽዪ ጭረ ነደፈኖምታ ኧዎጁዋመኸ ኢናቭ ጎይታ አንፍትርኔ።
\v 10 ተሁኖም አታትሁኗ ቁጨጮምታ ጎይታ ቢያአይካ መላአይካ አአኘኖመኸ አሁም ኧሁመኸ አትቁጨጩዋ ።

\v 11 ዋዳ እንእ መርኸት ኢኸሪ በሁኗ ፎር ቴፐ ፤ እመዳ ኧጣᎉ ሁዳ በዘቨር አነኧወ አነነዳ ኢኢና ትምርት ኢኸረንረኔ ።
\v 12 እመኸ ኧኸሬ ሰቭ ተሸከሁ ቲይር አይወድኧኸ ኧጤፕ ።
\v 13 በሰቭ ተሰንአወ ፈተና ኢረእካአር አንሰንአዎሁዋታ ፤ ጎይታ ሙርቴ ኧኸሬ አይኸነሁዋአህር አይፈትርሁዋታ ፤ዘንጋ ጭን ፈተና ቲሰርአዎሁዋታ ትፎርሁኰዳ ደረግቪ ትዎኦኰዳቭ መያ ሁዳ ኢገክነሁዋሴ።

\v 14 ባቴ ኧሰማትኞ ኧጣጣ አትጎቡሩዋ ።
\v 15 ዋዳ ኧዝሬክሁዋዳ ሁዳ ትዌስሩዋታአር ኧኸርሁዋቴ ፤ ዋ ኧዝሬኩዳ ዘንጋአር አሁም ፉርጁዋ ።
\v 16 ዋ ጎይታ አሸኮነ ንሰጭኔዳ ኧቭረካ ጥዋ ተክርስቶስ ደቭ እማትነድ አነነዳአር አሀራ? እማቲ ፍረነቭነ ንትሻከድኔዳ ዳቦኧ ኢኢና ባረ ተትወካ ተክርስቶስ በሰር እማትነድ አነነዳሻአር አሀራ?
\v 17 ዋ ንትሻከድኔዳ ዳቦኧ ኢናቭ ተዋ ተአት ዳቦኧ ንትሻከድኔ ኧኸሬ ማንእየ ኖኦራአር ብንኸነ እማት አካልንረ።

\v 18 እንዴ እእስራኤል ሰቭ ኤፖውዋአር ኦዡዋ ፣ህትቭ ኤፐዊ ዋጋ በሰር ኧዎንኦዋ ሰቭ ህትቭ ቲንኧኰዳ ኤኤዲ እማትነድ አነፐረኖታ?
\v 19 ባቴ ዋኸ ኧዋርትኛ ኧቅርኘ ኢጌቡርኴ አንጪ በሰር ያጌኪርካናአር ኧዋርትነኛ? ብዌ ቅርኘ ያጌኪርካናአር ኧዋርትነኛ?

\v 20 አኸረንዳ አረማዊ ሰቭ ህትቭ ያቲኢንውታ ሁዳ ኧሴጣንን ባሀሬ ኧጎይታ አኸረንዳ፤ተቅርኘቭ እማት ትሆሩዋይ አንሲእካ።
\v 21 ኧጌታ ኧኢሱስ ክርስቶስ ጥዋዪ ኧሴጣን ጥዋቭ እማቲ ኧስጠውት ኤነዎሁዋታ፤ ተጌታ ኢየሱስ ክርስቶስ ሸረድ በቨንአሁዋጋ፣ ኧሴጣን ሸረድ ኧውርኧት ኤነዎሁዋታ ።
\v 22 አካ ጌታ ኢየሱስ ናትቨኧችኔዪ? ኢናሁ ተሁዳ ኢረእካ ደረግ አነንሬ?

\v 23 « እንእአአር ተፈቀደረ ዘጋ ጭን እንእዎሁኗ አያጌኪርንረዳ ፤ » « እንእአአር ተፈቀደ» ዘንጋ ጭን እንእዎሁኗ ተፈቀደንረ ፤ ዘንጋ ጭንእንእአአር ኢ አያቁሟምረንረዳ።
\v 24 ሰቭ እንእ እንእዎኋ ያጌኪርካአር ባሀሬ እማትት ኧገግኋ ጥቅም አይሴእ።

\v 25 በሂናሁዋ ታትሸኩኩም በገያ ያስሬዳ በሰር እንእ ሰሮም ቡርኦዋ ።
\v 26 አፈርቪ በከስሞኋ አነዳአር እንእ ኧጎይታናአር።
\v 27 ክርስቲያን አኸረ ሰቭ ቢድኋይ ህየተናሁዋታ ታርዋይ ብትሱኡዋ፥ በሂናሁዋ ታጥራጠሩም አቴኤነውነኩዋአር እንእ ቡርኦዋ።

\v 28 ዘንጋ ጭን አት ሰቭ ዋዳ ኧቅርኝ ኢጌቡርኴ አንጪ ዋጋ በሰንር በቫረናሁዋ፥ ኤኤደናሁም ሰቪ ኧሂንማሁዋ ትቱርዋ አትውርኧዋ።
\v 29 እመዳ ኧዋርትኛ ምስ ሁዳ በሂንኋይ ኢጥራጠሪ ኧኸረንዴ ባአሬ አኸ በሂናሄ ተጥራጠርኸ ኧዋትኛ አኸረንዳ።ኧኛ ሰብ ቢጥራጠርካአር ኢያ ነጣ ዋአሁ፤ ባቴ ቢያ ኢትፈንድቪዳ ሁዳ ኧቭርአፈድን?
\v 30 ኢያ ጎይታ አቬ ሸረድ ጎይታ አትሸኲ ኧቨርአ፣ባቴ ጎይታ ባትሸኮርሁዋአር ኧቭር ኧትወቀስ ?

\v 31 ባቴ ትትወርኧታቪ ትትሰጭታቭ እንእዎሂኋኗ ኧጎይታ ክብር ኦንኧየዋ።
\v 32 ኧይሁዳ ሰቭቪ ኧግሪክቭ ሰቭ ዌ ኧጎይታቭ ቤተክርስቲያን እቁርፊት አትሁርዋ።
\v 33 ኢያ ሰቭ እንእ በቫንእየ አጋድኋ አአትሽሪ አትቫቅርመኸ አሁም ህመኸ ኦንኦዋ፤ ኖኦራሁኗ ኢተርፉዋኸ ትንር ኧገግኛ ያጌኪሬዳአር ታይኸር ኧሁኗ ኢፈዝኮታአር ኧሲእ።

\c 11
\p
\v 1 ኢያ ኧርስቶስ መያ ኧትሄተርሁመኸ አሁም ኢያይ መያ ተሆተሩዋ ።
\v 2 ብንእአአር ታስቡኒመኸዪ ኢያቭ አትመርኩዋ ትምርት ጌኬርሁም ኧጠብጥሁዋይ ሳረዪ፤
\v 3 ጭን ዋዳ ትሂርዋይ ኧሲእ ፤ በቭስ ፎር እንእ ዳኝነድ አነነዳ ዘንጋ ጭንብቭስ እንእ ፎር ዳኝመድ አነነዳ ክርስቶስ ኧኸረኸ፣በቭሽት እንእ ፎር ዳኝነድአነነዳ ምስ ኧኸረኸ በክርስቶስቭ ፎር ዳኝነድ አነነዳ ጎይታ ኧኸረኸ ቲሂሩዋይ ኧሲእ።
\v 4 ጉንኧኋ ቱህረፐቨ ኢጠልይካ ዌ ትቢት ኢዝሬካ ምስ እንእ ገግኋ ያትዋርድ።

\v 5 ጉንኧርሻ ታትህረፐቭ ትጠልይካ ዌ ትንቢት ትዝሬካ ምሽት እንእ በቭሽት ፎር ዳኝነድ አነነዳ ምስ ታትዋርድ፤ ጉንኧርመሻ ኧትሬኧች አአህርን።
\v 6 ምሽት ጉንኧርሻ አትህረፐቭ በኸረ ፣ጉንኧርሻ ትትሬእ፤ጉንኧርሻ ኧትሮእት ጭን፥ጉንኧርሻ ትትኸበቭ።

\v 7 ምስ ኧጎይታ መርክቪ ኧጎይታቭ ክብር ኢረከውወዳር ኧኸሬ ጉንኧርኋ ኧትኸቡውት ኤኖዳ ምሽት ጭን ኧቭስ ማረግኒያ።
\v 8 እመኸ ኧኸረ ሁዳ ምሽት ተቭስ ነከውያ ባሀሬ ፣ምስ ተቭሽት አነከዊዳ ።

\v 9 ህመኸ ምሽት ኧቭስ ፎጠሪያ ባሀሬ ምስ ኧቭሽት አፎጠሪዳ።
\v 10 ብእም ኧቫአዪ በመላአይካ ኧቫአ ምሽት በቭስ ዳኝነድ ኧሮእትሻ መርኸት ኢኸሪ ጉንኧርሻ ትትሬእ።

\v 11 ቢኸርቭ በጌታ ኢየሱስ ኸነ ትነቭነዳ ምሽት ምስ አይቫር ምስቭ ምሽትአይቫር ኢረውርዋይ አይኽኖታ ።
\v 12 ምሽት ተቭስ ነከውያ ምስቭ ተቭሽት ኢቴኤኝ ዘንጋ ጭን እንእዎሁኗ ኢፈጥርካ ጎይታን።

\v 13 አሁም ፉርጁዋ፤ ምሽት ጉንኧርሻ ታትህረፐቭ በጎይታ ኢፍቲ ኧጠልይት አነቫ?
\v 14 ምስ ጉንኧርኋ ባዴከ ቀቨጥ ኧኸረኸ ፍጥረት ገግሞኋ አያትመርሁዋታ?
\v 15 ምሽት ጭን ጉንኧርሻ ብታዴክ ኢሽርቫዳ ማረግነሻ፤ዴካቭ ጉንኧር አውያ ሁዳ ትትህረፐኩኔ።
\v 16 ዘንጋ ጭን ማንእየ ሰቭ በዋ ዘንግጋ ሽር ኢቴኤዲ ቢሲእ፣ኢና ዌ ኧጎይታቭ ቤተክርስቲያን ኧኛ ቂጫ ኤኤነንረዳ ።

\v 17 ዘንጋ ጭን ትደሞጅታ ኢጎዳሁዋታ ሜና ባህብሬ ያጌኪርሁዋታአር አቲንኦዋይ ኧኸሬ ዋዳ ትኒኢዝዝሁዋታ አጊያኪስሁዋይ አኸረንዳ።
\v 18 ትንእአአር ኢፍቲ በቬተክርስቲያን ትደሞጅታ በግታሁዋ በመራክስ አነኸ ሰምሁ፤ ኧሰምአሁንቭ ሁዳ አታት ኤኤድኋይ ውረ ኧኸረኸ አመርሁ።
\v 19 ታሁዋ ግተ ሙረቴ ኧሆሩዋ ሁኖዋ ባይቲቶ ኢሂሪዮዋይ መራክስ አየኧይካናአር ።

\v 20 አሁዋ እማቲ ትደሞጅታ ትወሬዳ ሁዳ ጌታ ኢየሱስ ኢዘጉጅኰዳ ሸረድ አከረንዳ ።
\v 21 ትትወርኧታ አት ሁዳ አአት ሁዳ ታይእየ እንእዎኋ ኧገግኋይ ሸረድ ኢቨርአ ፤ አታትኋ ኢገድኩ ፣አታትኋ ጭን ሰጨ ኢሰህር።
\v 22 አካ ተወርኧታ ትሰጭታአር በቪዳሁዋይ ኤነነሁዋታ? ዌ ኧጎይታ ቤተክርስቲያን ቀንጥሁምታ ፥አታአር ኤነኑዋ ሰቭ ታቅወጭዮዋ? ባቴ ምር ንቫሁዋ? በዋ ዘንጋ ናጋኪስሁዋ? ስርም አናጋኪስሁዋታ።

\v 23 ኢያ ተጌታ የሱስ ኧቴኤፐርሁን ሁዳ አአሁዋ አስተማርኩም ፤ እመዳቭ ጌታ ኢየሱስ አዎኦም ባይፖርኰ ቀረ ግት ምሳአረ ዳቦኧ ነሳታ ፥
\v 24 ጎይታ ባትሸኰረ ቀጥወ ፥ « እኩ ዋዳ አአሁዋ ቲይር ኢዎድካ በሰርነኛ ፤ ኢያ ትዘጉጅኴ ኦንኤ » ባረኖም።

\v 25-26 ህመኸ ተኧርቫድ ቀጥወ ጥዋ ነሳታ ፣ «ዋ ጥዋ ኖኦራ ሰቭ ኢተርፍወዳ ኧወያ ጉርዳ ደቭነኛ ፤ ህመኸ ኧኸሬ ተዋ ጥዋ ትትሰጭታ ኢያ ትዞጉጅኴ ኦኔ። 26. ዋ ዳቦኧ ትትወርኧታቪ እም ጥዋ ትትሰጭታቭ እንእ፥ ጌታ ኢየሱስ ተዣቨይተ ቲቫአ ስን ሙድኋ ታአውጅዋሴ።

\v 27 ባቴ ማንእየ ሰቭ ታይጋአኩ እም ዳቦኧ በቨንአዪ እም ጥዋ በሰጨ ፣ ኧጌታ ኢየሱስ ደቭ ከስ አነወ ።
\v 28 ማንእየ ሰቭ ተዋ ዳቦኧ ተውርኧትሞኋዪ ፣ትእም ጥዋ ተስጠውትኋ ኢፍቲ ፣ ኧተር ገግኋ ኧመርምር።
\v 29 ኧጌታ ኢየሱስ ኧርቫድ ታይጋአኩ ኢቭርአካቪ፣ ኢሰጭካቭ ማንእየ ሰቭ በገግኋ ፎር ፍርድ ያቫአ ።
\v 30 ታሁዋ ግት ኖኦራሁኋ ኧቄጩምቪ ኤኤመኖምቭ ሁዳ ፣ አታትሞሁኗ ኧዎጁም ሁዳ በዋ ኧቫን።

\v 31-32 ገግንራ ኧምረመርናአር ተኸረ ባንትፈንደቨንረዳ፤ 32. ዘንጋ ጭን ኧቀጥዎኋ ተዋ አለም ሰቭ እማቲ ባይትፈንድቨንሬ ዋአካ ጌታ ኢየሱስ ኢቀጣንረ።

\v 33-34 ኧደወጅታሁዋ ኧፍርድ አይኸርዎሁዋኸ ኧጋደን ሰቭ በረፐረ ሸረድ በቪድኋይ ኧቭርአ፤ ተዋ ኧተነፈ ሁዳ አሁዋይ ትንቫአካ አአውድሁዋሴ።

\c 12
\p
\v 1 ኧሰማትኞ ኧመንፈስ ቅዱስ ስጦታአር ኧውረአአር ትሂሩዋይ ኧሲእ ።
\v 2 አረማዊ ኧፐርሁዋ ግዝየ አትሂሪያአር ተሄተርሁታ እሜዩ ህሜ ትቱርዋ ዲዳ ኧሆሩዋ ጣትይ ኢወስሽኩዋ ኧረፐረኸ ትሂሩዋ።
\v 3 ኧመኸ ኧኸሬ አት ሰቭ ኧጎይታ መንፈስ ተኸተይተታ«ኢየሱስ ኧትሰተቨዳናአር ይካ ሰቭ ኤነዳ፤ እምኸቭ በመንፈስ ቅዱስ ባኸሬ፣ አትዎኋ «ዪየሱስ ጌያን ይካ ሰቭ ኤነኸ ናአውድሁዋ።

\v 4 ስጦታ ቡችር ቡችር ቢኸር መንፈስ ቅዶስ ጭን እማትን
\v 5 አገልግሎት ቡችር ቡችር ቢኸር ጌታ ጭን እማትን፤
\v 6 ሜናቭ ቡችር ቡችር ቢኸር ዘንጋ ጭን አንእአአር ዬካ እማት ጎይታ።

\v 7 ዘንጋ ጭንመንፈስ ቅዱስ እንእ ስቭ ኧዎጣ ኧዎጣኋ ኧጉልጭት ኢኩዳ ሁዳ ኧንኣዎኋ ያጌክኔ።
\v 8 አታት ስቭ በመንፈስ ቅዱስ እንኋRኢ ዘንጋ ሀይተ ኧዘንጉት ኢቴንኩ ኧኧኛ ሰቭ ብእም መንፈስ በሲየ ኢዝሬከዀ ኧኋርት ቃር ኢቴኩ።

\v 9 አአት ሁዳበህም መንፈስ እምነት ኢዊ፤ ኧኧኛኋ ብእም ባአት መንፈስ ሰቭ አፍያ ኦንኧት መንፈስ ኢቴንኩ።
\v 10 አአት ሁዳ ወጋአር ኦንኧት ፣ኧኧኛኋ ነገ ኢቫአካ ዘንጋ ኧዘንኩት ኢቴንኩ አአት ሁዳ መንፈስ ኧዋይትርት ፣ አአት ሁዳ ባይሂሪ ቃር ኧዘጉት ኧኧኛኋ ባይሂሪ ቃር ኧዝሬኬዊ ሁዳ ስና ብሮ አአውጅት ኢቴኩ። ።
\v 11 ጉት ፣ ኧኧኛኋ መንፈስ ኧዋይትርት ኧኧኛሞኋ ባይሂሪ ቃር ኧዘጉት ኧኧኛቭ ሰቭ ባይሂሪ ቃር ኧዝሬኬዊ ሁዳ ስማ በሮ አአውጅት ዋሁኗ እንእ ኧሀ አአት ኧጎይታ መንፈስ ስጦታ ቲሆርም እእንእ ሁዳ ኧሳረኸ ኧዎጣ ኧዎጣኋ ኢንኩ።

\v 12 አት አካል ኖኦራ አካላት ቢረውሪእማትአካልን፤ ዘንጋ ጭን አካላት ቢሆርም እማይ አካልን ። ክርስቶስ ህመኸምን።
\v 13 ኧይሁዳ ሰቭ ብንኸነቭ ዌ ኧግሪክ ሰቭ ብንኸነ ፣ባሬያ ብንኸነ ዌ ነጣ ሰቭ ብንኸነ እማት አካል ንኸኔ በአት መንፈስ ተጠመቅነ ፤እእንእቨንራ ሀ እት መንፈስ ንሰጭኔ ቴቨንረ።

\v 14 አካል ኤፖዊ ሁዳ ተሮኦራ ወረድን ባሀሬ ትእማት ወረድ አኸረንዳ።
\v 15 ኧግር « ኢያ ኧጅ አኸርዂ ኧኸሬ ታአካል ሁኖዋ አኸርኋ ቢይር ዋዳ ኧቫሬ አካል ኧሁርትኋ ኢወኧርኴዪ?
\v 16 እንዝር «እያ ኤር ኤር አኸርዂ ኧኸሬ አት አካል አኸርኋ » ቢይር ዋኸ ኧቭሬ ኧቭስየ አት አካል ኧሁርትኋ ኢወእኧርኴዪ?
\v 17 አካል እንእ ኤር ተኸረ ማኸ ኧኘተነ ንሰቭአኔ ባነደ? አካል እንእ እንዝር ተኸረ በቭርንራ ናሸታኔ ባነደ ?

\v 18 ዘንጋ ጭን ጎይታ ኧሳረነኸ እንእዎሁኗ ቤኤድ ኤኤድሁኗይ አወናኖም።
\v 19 እንእዎሁኗ አት ወረድ ኧሆሩዋአር ተኸረ ምስየ ኧቲ ባነደ?
\v 20 ባቴ አካላት ኖኦራኗአር ፣አካል ጭን እማትን።

\v 21 ኤር ኧኧጅ « አታትሲኤዳ» ዩኲ አይችልካ፤ ጉንኧርቭ ኧኧግር «አታትሲኤዳ» ዩኲ እይችልካ ።
\v 22 አቸ ቂጨኘ ኢወስርታ ምስየንራ ኢረእካአር ያትሱኡታኗአር።
\v 23 ኧቆንጪዮዋአር ኢወስርታ ምስየንራ ኢረእካአር ናከብነየዋ፤ ህመኸ ንቅቨጭኔኮታ ምስየንራ ኢረእካአር ንትጬፕኔነዋ።
\v 24 አንቅቨጭኔኮዋ ምስየንራ ጭን ዋ ኧጠፑት አያትኬሽኮታ ፤ጎይታ ጭን ምስየንራ እንእ እማቲ ቁጥቁጥ ኤፐኖምታ ክብር ኤነኖዋ ሁኗ ኢረእካ ክብር አቨኖም።

\v 25 እመዳ ኤፐ ሁዳ በቭስየንራ እስተሩእ ታይረቭር ገግ ተገግሁኖዋ በቂጥየ ኢታሹዋነኸ።
\v 26 አት ምስየንራ ቲዬእኩዳ እንእ ምስየንራ እማቲ ዬእኮዋ፤ አት ምስየንራ ቲሽርኮታ እንእ ምስየራ እማቲ ኢሽኮዋ።
\v 27 ባቴ አሁም እንእቫሁዋ እማት ኧክርስቶስ ምስየንሁዋ ፤ እንእቫሁዋ እእማት ኧክርስቶስ ምስየንሁዋ።

\v 28 ጎይታ በቬተክርስቲያን ከስ ሐዋርያት ፣ነብያት ፣አስተማሪ፣ወግ ሜና ኢንኧታ ሰቭ ፣ኧጮረን ሰቭ አፍያ ኦንኧትስጦታ አነኖታ ሰቭ፣ኧኧኛ ሰቭ ኧኧጉሽት ስጦታ አነኖታ ሰቭ ፣አስታድርት ስጦታ አነኖታ ሰቭ ባይሂርኩ ቃር ኧዘንጉት ስጦታ ኧነኖታ ሰቭ አወና።
\v 29 እንዎሁኗ ሐዋርያትኗ? እንእዎሁኗ ነቢኗ? እንእኮሁኗ እስተማሪኗ? እንእኮሁኗ ወግ ሜና ኢኢንኦዋ?

\v 30 እንእዎሁኗ ሰቭ አፍያ ኦንኧት ስጦታ አነኖዋ? እንእኮሁኗ ባይሂሪ ቃር ኢዝሮኩዋ? እንእኮሁኗ ባይሂሪ ቃር ኢዝረኩዋ? እንእኮሁኗ ስማ በሮ ኢዝሮኩዋ?
\v 31 ዘንጋ ጭን ትንእ ኢረእካ ሁዳ ጎኩርም ሰኡዋ፤ ባቴ ትንእ ኢረእካ መያ አቲሽሁዋቴ።

\c 13
\p
\v 1 በቨላአይካ ቃር ምንዝሬክ ንመጀ ቤነኒ ጭን እመኸ ያኸራካ ዶነመኸዪ ፣ኳሽኳሽ ይቭካ ፀናፅነኸ ኸርሁ ኧዋርትን ።
\v 2 ኧረገኋ ኢኸርካ ዘንጋ ኧዘጉት ስጦታ ቢረቭሬ ፣ ኧደኧረ ዘንጋቪ ውቀትቭ እንእ ኧኋርት ቢረቭሬ፣ቆቶቭኢደስካ እምነት ቢረቭሬ ንማጀ ጭን ቢረቭሬ ማንእየምንኋ።
\v 3 አነኒዳአር እንእ ኧዚጋ ብኒቭ ፣ምስየመናኛ ብእሳድ ኢረንድደኸ ብኔቭ ፣ ንማጀ ጭን ብርነኒ አታአር አያጌኪሬዳ ።

\v 4 ንመጀ ፋራሂን፤ህመኸቭ ሚራን፣ አይድጌያኬስካ፣ ኢኢናᎀ ኣይኽርካ፣ ኑኡነድ አያቲሽካ፤
\v 5 አኸራአር አይዝሬካ ፤ ኢኢያ ኧፍዘዜ አይቭካ፣ኢኢና አይጠጥኩዳ።
\v 6 ነጀ ውረ በኸራአር ኢሽርኩ ባሀሬ ፣በውጥጣአር አይሽርኩዳ።
\v 7 ንመጀ እንእ ግዝየ ኢፈርህ ፤ እንእዎኋ ያአቭር፣ እንእ ግዝየ ተስፋ ዬቭ ፣ እንእ ግዝየ ተፓ ኢትሸከቭ ።

\v 8 ንመጀ ስርም አወድካ ፣ዘንጋ ጭን ኧረገኋ ኢቫአካ ዘንጋ አአውጅት ኢወኧርካናአር፤ ባይሂሪቭ ቃር ኧዘጉት ኢወኧርካናአር ውቀት ቢኸር ኢወኧርካናአር ።
\v 9 ኢና ንሂኔዳ ሁዳ ቀሪናአር ፤ኧረገሞኋ ኢኸርካአር ንዝሬኪኔዳ ሁዳ ቀሪናአር።
\v 10 ቢኸርቭ ሙርአ ኧኸረ ሁዳ ቲቫአካ ቁቁራ ሁዳ ኢወኧርኴ።

\v 11 ትከ ታነሁ ኧትከኸ ኧዝሬክ ባነደ፤ ኧትከመኸ አስብ ባነደ ትከቭ ይቭካአር እእር ባንደ፤በትራእሁ ቀጥወ ኧትከኸ ኧሁርት ቸኣሁን።
\v 12 ዋአካ ናዥኔዳ ሁዳ በቭስታወድ ያዢዳአረኸ ዥጋግ ኧወተኧወዳናአር በሀ ግዝየ ጭን ኢፍት ቲኢፍት ናዥነዴ ። ዋአካ ኧሂርኩዳ ሁዳ ቀሪናአር፤በሀ ግዝየ ኢያ ገግመኛ ጎይታ ኧሀሬአአህር ጃቪተሁ ኧሂርኴ።
\v 13 ባዬ እምነት ተስፋቪ ንማጀ ዋ ሶኦስትሁኗ እንእ ግዝየ ኢረውርቴ፤ ዘንጋ ጭን ትእሞሁኗ ግት ኢረእካ ሁዳ ንማጀን።

\c 14
\p
\v 1 ንመጀ ሶኡዋ ፤ ኧመንፈስ ቅዱስ ስጦታቭ ኢረእካሞኋ ኧረገኋ ኢኸርካ ዘንጋ ኧዘጉት ጎኩርም ሶኡዋ።
\v 2 ባይሂሪ ቃር ኢዝሬካ ሰቭ ኧጎይታ ባህእሬ ኧሰቭ አይዝሬካ ፤ ኧደኧረ ዘንጋ በመንፈስ ኢዝሬኪ ኧኸሬ ፥ ኢዝሬኩዳ ሁዳ አአትዎኋ አይጋአኩዳ።
\v 3 ኧረገኋ ኢኸርካ ዘንጋ ኧዘንጉት ጭን ያትሽሪ ፣ ይቁሟሙሪ ፣ያትቫፓይ መዪ ያቁሟሙርሜ ኧሽዐቭ ኢዝሬክ።
\v 4 ባይሂሪ ቃር ኢዝሬካ ሰቭ ሰቭ ገግኋ ያትሽ፤ ኧረገኋ ኢኸርካ ዘንጋ ኢዝሬካ ሰቭ፣ ቤተክርስቲያን ያትሽር።

\v 5 እንእአሁዋ ብይሂሪ ቃር ብድዝረኩዋ ኢሽሬ፤ ተዋ ኢረእካአር ጭን ኧረገኋ ኢኸርካአር ብድዝረኩዋ ኢሽሬ፤ ቤተክርስቲያን ኢሽርካኸ ባይሂሪ ቃር ኢዝሬካ ሰቭ ኧዝሬከን ሁዳ ስማ በሮ ባኔኤደ ፥ባይሂሪ ቃር ቢዝሬካ ሁዳ ኧረገኋ ኢኸርካ ዘንጋ ኢዝሬካ ሰቭ ኢረእ።
\v 6 ባቴ ኧሰማትኞ አሁዋይ ትንቭአካ በጉልጭት ፣ ብውቀት ዌ ኧረገኃ ኢኽርካ ዘንጋ ባአውጅት ዋዳ በትምርት ባናትመርኩዋይ ባይሂሪ ቃር ብንዝሬክ ምር ያጌኪርሁዋቴ?

\v 7 ኧቱንትናመኸዪ ፣ኧቨገናመኸ ሉህ ኤነኗ ስን ኧቃሁኗ ቸምና ባቲቶ ኢሂርኰዳአር ቤነኗ ያዎኤዳ ኧመዝሙር ቃር ኧኸረኸ ኧተኸ ኢሂሪ?
\v 8 ህመኸ ጥሩምባ አኸረ ቃር ቢያትሴምአ፣ ማን ጋዝ ያሪ ኢትረሳ?
\v 9 አሁም ህመኸምንሁዋ ፤ ባአነቨዳሁዋ ባንዝሬኬሁዋይ ትዝረኲዳ ሁዳ ማን ኢሂርኩዴ? ተርፋስ ትዝረኩታናአረኸ ተሆርታ ሁዳ።

\v 10 ባአፈር ፎር አይነት ቃር አነውዋ፤ ብእም ቃር እንእ ትርጉም ኤነነ ቃር ኤነዳ ።
\v 11 ባቴ አት ሰቭ ትርጉኋ ባህእርሁ ፣ኢዝሬካ ሰቭ ኢያ ባዘራ ኧኸርወ ሁድቭ ኢኢያ ባዘራ ኢኸርቪ።

\v 12 አሁም ህመኸምንሁዋ ፤ኧመንፈስ ቅዱስ ስጦታ ትረሁዋይ ትሱኡዋይ ኧኸሬ ትንእ ኢረእ ቤተክርስቲያን ትትቁዋᎀርወዳ ስጦታ ጎኩርም ሶኡዋ ።
\v 13 እመኸ ኧኸሬ ባይሂሪ ቃር ኢዝሬካ ሰቭ ኧተርጉምት ኢኸነኸ ኧጠልይ።
\v 14 ኢያ ባይሂሪ ቃር ትንጠልይካ መንፈስኛ ኢጠልይ ፤ ኢያ ጭን ኧዝሬካአር አንሂርካ።

\v 15 ባቴ ምር ነንአ? በመንፈስኛ ኧጣልይ፤ በቀርብመኛቭ ቤሰርሁ ኧጠልይ ፤ በመንፈስኛ ኧዘምር ፣ በሂንመኛቭ ትንቬስር ኧዘምር ።
\v 16 እኰኸ በኸረ አኸ በመንፈስ ጎይታ ትታከብርካ ትኩዳ ሁዳ አይሂር ባዘራ ሰቭኧሽኩርት ጠሎታኸ በቭር ሀይተ« አሚን» ኢቭርሴ?

\v 17 አኸሽ ወሄያአር ጎይታኸ ሸኩር ትር ይርሴ ፥ ኧኛ ሰቭ ጭን አይትቁሟᎀርወዳ።
\v 18 ኢያ ትንቫሁዋ ኢረእካአር ባይሂሪ ቃር ኧዝሬኪ ኧኸሬ ጎይታ አትሸኩርኩ።
\v 19 ዘንጋ ጭን በቬተ ክርስቲያን ከስ ኧኛ ሰቭ አአስተምሪ ትንር፣ አስር ሁው፥ ሰቭ አይሂርኩ ቃር ብንዝሬካ ሁዳ አምስት ሰቭ ኢሂርኩዳ ቃር ብንዝሬክ ኢፈዝ።

\v 20 ኧሰማትኞ ኧውጥጣአር ትከ ሁሩዋ ባሀሬ በወስርታሁዋ ትከ አትሁሩዋ።
\v 21 እመዳቭ « <ባይሂሪ ቃር በሰቭ ገኘቭ ቃር ኧዋ ሰቭ ኧዝሬኴ፤ እመኽ ቢኸርቭ ‹ አይሶኦኝዳ › ይር ጎይታ ቧርም በቂቻንራ ጣᎉ።

\v 22 እመኸቭ ኧኸሬ ባይሂሪ ቃር ኧዝንጉት አናአሞሩዋ ሰቭ ኢኸርካ መርኸትን ባሀሬ፣ ያአውርታ ሰቭ አኸረዳ ፤ኧረገኋ ኢቴፕካ ኧጎይታ ቃር አአውጅት ጭን ያአውርታ ሁኖትን ባሀሬ አያአውሩዋ ሁኗ አኸረንዳ።
\v 23 ባቴ ኧቬተክርስቲያን አባል ኧሆሩዋ ሰቭ እማቲ በደሞጁዋይ ፣እንእዎሁኗ ባይሂሪ ቃር ቲዝሮኩም ታነውዋ ባዘራ ዌ አያአውሩዋ ሰቭ ሁኖዋ ኧደሞጁኰ ቢድ ቢጎኦዋ ሽረኘ ሆርም አዩርታ?

\v 24 እንእዎሁኗ ኧረገኋ ኢኸርካ ኧጎይታ ቃር ቲዝረኩም ታነውም ባዘራ ዌ አያአቭር ሰቭ ሁኗ ኧደሞጅኰ ቢድ ቢጋአ ጭን፥ እንእዎኋ በሰምአን ቃር በቫጢርኋ ኢትወቀስ ፤ ህመኸቭ በሰምአን ቃር ኢትፈንድወ።
\v 25 በሂንሞኋ ኧደኧረ ዘንጋ ሰቻ ኢዋአ ፤ ብእመዳ ውረቭ ጎይታ በግትሁኗ አነ፥ በዋርት በጎይታ ኢፍቲ ኢፍቲኢፍት ወተኧታ ኢሰግድ።

\v 26 ኧሰማቶ ባቴ ምር ንቫነ? ኧጠሎት ትደሞጅታ አት ሁዳ መዝሙር አነነ፣አት ሁዳ ያትመርኩዳ ትምርት አነነ፣አት ሁዳ ኧደኧረዘንጋ አአውችት፣ አአትኋ ባይሂሪ ቃር ኧዘጉ፣ አትቭ ሁዳ ባይሂሪ ቃር ኧዝሬኬዊ ሁዳ ስማ በሮ አአውጅት ስጦታ አነነ፤ባቴ ዋ ስጦታ እንእ በቬተክርስቲያን ኧደሞጁዋ ሰቭ ያቁሟሙርካአር ኧሁርት አነወ።
\v 27 ባይሂሪ ቃር ኢዝሬካ ሰቭ በረፐረ ፥ ውርኤት ዌ ሶኦስት ኧሁርምታ ባአጋጋ ኧዞጉዋ ፤ ኧኛኋ ጭን ፍችኋ አአውድ።
\v 28 ኧዝሬኬዊ ባዘራ ቃር ፍችኋ ኢኢድካ ሰቭ ቤነ ጭን ፥ቁስ ኧዋርምታ ኧገግሞሁኖዋዪ ኧጎይታቭ ኧዘንጉዋ።

\v 29 ውሬት በህም በደበሰ ሶኦስት ነቢ ኧዘጉዋ፤ ቡችርሁኗ ጭን ሁኗ ኧዝሬኬዊ ቃር ኧጎኩርም ኧፉትሪ።
\v 30 ተቸኖም ሰቭ ግት አት ሰቭ አት ዘንጋ ቢትረከኩ ኢኢፍት ኢዝሬክ ኧረፐረ ሁዳ ቁስ ኧቫር ።

\v 31 እንዎኋ ኢትመርወመዪ ኢትቁሟᎀርሜ እንእቫሁዋ ባአጋጋሁ ኧጎይታ ቃር ትዝሮኩዋይ ትችሉዋ።
\v 32 አአት ነቢ መንፈስ ኧኧኛ ነቢ መንፈስ ኢቴኤዘዝ።
\v 33 ጎይታ ኧሰላም ጎይታን ባሀሬ ኧህያድ ጎይታ አኸረንዳ ፤ ኧጎይታ ቤተክርስቲያን ሰቭ ቢደሞጅኰዳ ቤተክርስቲያን እንእ እመኸምን ።

\v 34 በሙሴ ቂጫ እሽቻ ኢቴኤዠዣይ ባሀሬ ኢዝረካይ አይቨቃናይ ኧኸሬ ፥ኧጠሎት በደሞጅኰዳ ቢድ ቁስ ኧቫራ።
\v 35 እሽቻ ኢሂራዪ ኧሴአይ አታት ዘንጋ ቢረቭር በቪድህናይ ኧቭስህና ኧትሳአራይ። ምሽት ኧጠሎት በደሞጅኰ ቢድ በዝሬከች ቀቨጥን።
\v 36 ኧጎይታ ቃር ኧቫአ ሁዳ ታሁትኒ? ዌ ኧቫአ እማት አሁትኔዪ ?

\v 37 ማንኢሞኋ ነቢንሁ ዌ ኧመንፈስ ቅዱስ ስጦታ አነኒ ይካ ሰቭ ቢረቭር፣ዋ ኧጧፍነኩዋ ሁዳ ኧጎይታ ትዛዝ ኧኸረኸ ኧሀር።
\v 38 ዋዳ አይሂራአር በኸረ ሁድቭ አይኋሪ።

\v 39 እመኸ ኧኸሬ ኧረገኋ ኢኽርካ ኧጎይታ ቃር ኧዘንጉት ኢረእ ጎኩርም ሶኡዋ፤ ባይሂሪ ቃር ኧዘጉትቭ አትሁርኦዋ ።
\v 40 ዘንጋ ጭን እንእዎሁኗ ባጉዋውኧዪ በጨርቭ ኧህር።

\c 15
\p
\v 1 ዋአካ ኤኤድኩዋ ወንጌል አዘግትሁዋይ ኧሲእ፤
\v 2 ዋ ኤድኩዋ ኧወጌል ቃር ገኪተሁዋ በጠበጥዂ፣ በዋ ወንጌል ትረርፉዋቴ፤ሀበኸረ አአመርሁዋ ሁዳ እመኸምን።

\v 3 ኢያ ኧቴኤፐርሁን ትንእአአር ኢረእካ ሁዳ፥ አአሁዋ ኤኤድኩም ፤ ቅዱስ መጣፍ ኢኢጁዋመኸ ክርስቶስ ኧቫጢርንራ ሞደ፤
\v 4 ተዌከ፤ በመጣፍ ቅዱስ ኧጣᎉመኸ በሶኦስተኘ ቀረ ተውንድ ተረንሳ፤

\v 5 ተውድ ተትረሳ ቅጥወ ኬፋ አሸን፤ ተህም ቀጥወ አስረውርኤቸ ተማሪኋ አሸዊ፤
\v 6 ተህም ቀጥወ ብእማተጋ አምእስት በኧር ኢሆርታ ሰቭ አሸዊ፤ ተሁኖም ኖኦራሁኗ ባአያሞሁኗ አነውዋ፤ አታትሁኗ ጭን ሞጁም።
\v 7 ተህም ቀጥወ ያቆብ አሸን፤ ተህም ቀጥወ ኪሸረኘኋ እንእ አሸዊ።

\v 8 ተእዎኋ ቀጥወ ቀረኋ ታይሰርአ ኧቴኤኘ ትከ ኧቨስርካ ኢያቭ አሸሁን።
\v 9 ኢያ ተክርስቶሲ ኪሸረኘ እንእ አአንስካ፣ኧክርስቶሲ ኪሸረኘ ባይቶ ኢሆሮኚ ስን አምበቃሁዳንኋአር፤ እመኸ ኧቫሁ ሁዳ ኢያ በጎይታ ቤተክርስቲያን አአነውታ ሰቭ አአትሳተትሁ

\v 10 ቢኸርቭ በጎይታ ፋራሂነድ ዋአካ ኧክርስቶስ ኪሸረኘ ኸርሁ፤ ኢያ ጎይታ አቬ ጠጋ ማእየአአር ሂንተ አንኧኘዳ።አቸ ትንእዎኋ ኢረእካአር ተቋጠሁ ሜናኛ ኤፐሁ ፤ዘንጋ ጭን ኢኢያ ታንኸርእ ቢያ አነዳ ኧጎይታ ደረግን።
\v 11 ባቴ ኢያቪ ሁኖምቭ ኒኢድነዳ እመዳምን፤ አሁም አአመርዂ ሁዳ እመዳምን፤

\v 12-13 ክርስቶስ ተውንድ ኧትረሳኸ ናትመነ በኸረ ባቴ በግታሁዋ አታት ሰቭ ኧተኸ ኧዎደ ሰቭ አይትረሳካ ዩሩዋ? ኧዎደ ሰቭሁ አይትረሳ በኸረ፣ ክርስቶስቭ አንትረሳዳ ኧዋርትና? 
\v 14 ክርስቶስ ተውንድ ባንትረሳሁ ኒኢድኔዳቭ ወንጌል አያጌኪርካ፤ አሁሜ እምነት ማንእየምናአር።

\v 15 ኢና ጎይታ ኧክርስቶስ ተውንድ ነሳን ባነ ኤኤድነ ፤ ኧዎጁዋ ሰቭ አይትረሾዋታ ቱሩዋ በኸረሁ አካ ክርስቶስቭ ጎይታ ትተውንድ አነሳዳ፣ኢናቭ ጎይታ አምባራአር ፈጠነ ኤኤድነ ኧዋርትናሁዋ?
\v 16 ኧዎጁዋ ሰቭ ተውንድ አይትረሾዋ በኸረ ክርስትስቭ ተውንድ አንትረሳዳ ኧዋርትን።
\v 17 ክርስቶስቭ ተውንድ ባንትራሳ እምነትማሁዋ አያጌኪርካናአር፤ አሁም ዋአካቭ ስን ተቫጢርማሁዋ አነሁዋ፥ ኧዋርትን።

\v 18 እመኸቭ በኸረ በክርስቶስ አሞርም ኧዎጁዋ ሰቭ ኧኞም ኧዋርትን።
\v 19 በክርስቶስ ሂንንራ አአወናነ ሁዳ እማት ኧዋ አለማአር በኸረ ተሰቭ እንእ ኢረእ ናቨጥጥነዳንራአር።

\v 20-21 ዘንጋ ጭን ክርስቶስ ኧዎጁዋ ሰቭ እንእ በህር ኸረ ተውንድ ተረሳ። ሙድ ባአዳም ኸረ ኧቫአመኸ ፣ ተውንድ ኧተሸትቭ ተክርስቶሲ አጋድ ማአ።

\v 22 ባአዳም ኧቫአ ሰቭ እንእ ኧዎደመኸ ፣በክርስቶስ ኧቫአ ሰቭ እንእ አያ ኢኸር።
\v 23 እመዳቭ ኢኸርካ ሁዳ እንእዎኋ ባአጋ አጋኖኋ ፤ በተረ በህር ኧኸረ ክርስቶስ ተውንድ ተረሳ፤ ተህም ቀጥወ በክርስቶስ አአሞሩዋ ሰቭ ተውንድ ኢትረሸቴ።

\v 24 ተህም ቀጥወ ግዛት፣ ዳኝነድቪ ደረግቭ እንእ አወኧይተታ መንግስት አአቭ ጎይታ ኤኤተ ቲካ ዘቨር አነኧወ ኢኸርኴ።
\v 25 ጎይታ ኧክርስቶስ ጠራትኋ ኧኧግርኋ ከሲ ቲዬቭነ ስን ኧትረጎሽት አነወ። 
\v 26 ተቀትዎኋ ቴኤምተ ኢወድእካ ጠራት ሁዳ ሙድን።

\v 27 ጎይታ ኧክርስቶስ ብንእአአር ፎር ዳኝነድ አቨን ቧርም ጣᎉ፤ ዘጋ ጭን ብንእአአር ፎር ዳኝነድ አቨን ቲይካ ፥ብንእአአር ፎር ዳኝነድ አአቨን ጎይታ ተህም አንኸረኸ ኧትሄረዳናአር።
\v 28 ክርስቶስ እንእአአር በድገዛነ ቀጥወ፥ ጎይታ ብንእአአር ፎር ዳኝነድ ኢረቭርኰኸ ክርስቶስቭ ገግሞኋ ብንእአአር ፎር ዳኘ ኤፐን አአቭ ጎይታ ኢትገዛኴ።

\v 29 ኧዎጁዋ ሰቭ አይትረሾዋ በኸረሁ፥ ኧዎጁዋ ሰቭ ቧርም ኢጠሞቁታ ሰቭ ምር ኦንኧትኖሁኗ? ኧዎጁዋ ስቭ አቸ አይትረሾዋ በኸረሁ ኧሰቭ ሁኗ ቧርም ኧቭር ኢጠሞቁዋ? 
\v 30 ሁከኸ በኸረ ኢናቭ እንእ ቀረ ኧቭር በጁጓረ ንረቭነ?

\v 31 ኧሰማትኞ ኢያ እንእ ቀረ ሙድ ኢሰርአቪ፤እመዳቭ ኢኢድሁዋታ ሁዳ በጌታንራ በኢየሱስ ባሁዋ ኧቫ አነኒዳ ኧሳርት ውረአአር ኧኸረዴ።
\v 32 ኢያቭ በኤፌሶን ከተማ አአዊኸ ቲሆርታ ሰቭ ኧትዋንድካ ሁዳ ኧቭርአፈድን? ኧዎጁዋ ሰቭ አይትረሾዋ በኸረሁ ፣ኢናቭ « አመጋ ኢዎጂዴ ኦኳ ንቭርአነ ንስጤነ» ዩርታ ሰቨኸ ኸነ ኧዋርትን።

\v 33 አድዋወርዋ « ሙጥጥ አቦገዳ ወሄ አመር ያብላሽ ። »
\v 34 ተዣወሩዋ በሂንማሁዋ ጉኦዋ፤ ባጢርቭ ኦቶንኦዋ ፤በግታሁዋ አታት ጎይታ አይሂሩዋ ሰቭ አነዉዋ ፤ እመኸቭ እሁዋታ ሁዳ አቅቨጭሁዋኔ።

\v 35 ባቴ « ኧዎጁዋ ሰቭ ኢትረሸታ ሁዳ ኧተኸትን? ተውንድ ኧትረሳ ሰቪ ምስየሁ ኧኧተኸትናአር? ይካ ሰቭ ኢምበርሴ ።
\v 36 ዋ አኸ ጋዎ ኧዘንአኸን ዝኝኧ ባሞዴ አይረቭአካ ።

\v 37 አኸ ዘር ትድዘርአካ ኧዘንአኸን ሁዳ ኧስኔኧ ዌ ኧኧኛ ዝኝኧ ዘርን ባሀሬ ኧረምአ ፊንሸ አኸረንዳ ።
\v 38 ጎይታ ጭን ኧዘር ሁዳ ኧሳረነኸ ኤፐ አካል ኢኩ፤ እንእ አይነት ዘር ኧገግ ገግኋ አካል ኢኩ ።
\v 39 በሰር እንእ እማት አኸረንዳ ፤ ኧሰቭ በሰር አትን፣ አሬእ በሰር አኛናአር ፣ አአሳቭ በሰር ቡችር አይነትን።

\v 40 ህመኸ ኧሳቫይ አካላት አነውዋ፤ ህመኸ አአፈርቭ አካላት አነውዋ፤ ዘንጋ ጭን ኧሳቫይ ክብር አትን፣ አአፈርቭ ክብር ኧኛናአር።
\v 41 እእዋየ ክብር ኧኛናአር ፣ኧዳናአ ክብር ኧኛናአር፣ ኧሆሆቭ ክብር ኧኛናአር፤ አአት ሆሆቭ ክብር ታአት ሆሆቭ ክብር ቡችር ቡችርን።

\v 42 ኧዎደ ሰቭ ኧተሸታአር እመኸምን፤ ኢምጠምጥካ ምስየ ኢዘርኤ ፣ አይምጠምጥ ምስየ ኸረ ኢትረሳ፤
\v 43 በውርደት ኧዝንኤ ሁዳ፥ ኧከበራአር ኸረ ኢትረሳ፤ በቂጭና ኧዘንኤ ሁዳ በሩእ አርዋ ኢትረንሳ፤
\v 44 ኧፍጥረት አካል ኢዘርኤ ኧመንፈስ አካል ኢትረሳ፤ኧፍጥረት አካል ባነጋ ፣ኧመንፈስቭ አካል አነ።

\v 45 ህመኸቭ « አአወተራቸ ሰቭ አዳም አይዎንድ ነፍስ ኸረ ቧርም ጣᎉ፤ ኧቀጥወ አዳም ክርስቶስ አያ ዬካ መንፈስ ኸረ ።
\v 46 ዘንጋ ጭን ኧዋ አፈር ኧፍጥረት አካል በተረ ማአ ባሀሬ ፣ መንፈሳዊ አካል ብደይተ አማአዳ ፤ ተህም ቀጥወ ኧመንፈስ አካል ማአ።

\v 47 አአወተራቸ ሰቭ ታአፈር ኧረከዊ ኧኸሬ አአፈርናአር፤ ኧቀጥወ ሁዳ ጭን ኧሳቫይናአር።
\v 48 ተአፈር ኧትፎጠሩዋ ሁኗ ተአፈር ኧትፈጠረ አአዳምምኗኸ ፤ ተሳቫይ ኧሆሩዋ ሁኗ ኧሳቫይ ሁድምኗኸ።
\v 49 አአፈራአር ኧኸረ ሁዳይ ደቨር ኧትኸተነመኸ፤ ተሳቫይ ኧቫአ ሁድሜ ደቨር ንትኸተነዴ።

\v 50 ኧሰማቶ ዋዳ ናአውድሁዋ ፥ በሰርቪ ደቭ ኧጎይታ መንግስት አይረሁዋታ፤ የኧፋካ ሁዳ አየኧፋ ሁዳ አይረህካ።
\v 51 አት ኧደኧረ ዘንጋ ኢኢድሁዋቴ ፥ እንእቨንራ አንዎድነዳ፤ ዘንጋ ጭን እንእቨንራ ንትሽጋገነዴ።

\v 52 እመዳቭ ኢኸርካ ሁዳ ኧጠነቃር ኧቀጥወ ጥሩᎄ ቲረᎊዳ ህም ተምህም ኤር ብርቅ ደፍ ቲንኤ ስነጋን።ጥሩᎄ ኢረᎊዴ ፣ ኧዎጁም ሰቭ አይሙጦሙጭዋአር ሂንቶ ኢትረሽቴ ፤ ኢናቭ ንትሽጋገነዴ።
\v 53 የኧፋካ ሁዳ አየኧፋአር ፣ኢምጠምጥካ ሁዳ አይምጠምጣአር፣ኢዎድካ ሁዳ አይዎዳአር ኧትሆደርት አነወ።

\v 54 የኧፋካ ሁዳ አየኧፋአር ፣ኢዎድካ ሁዳ አይዎዳአር ቲትኸተርካ « ሙድ ቴኤመ» ቧርም ኧጣᎉ ቃር ኢኸርኴ ።
\v 55 ህመኸ ሙዶ ኦኦምታኸ ኧቲ አነ? ሙዶ ሰቭ ትወጋወዳ ደረጋኸ ኧቲ አነ?»።

\v 56 ሙድቭ ሰቭ ኢረንድፍወዳ ሁዳ ባጢርን፤ ኧቫጢርቭ ደረግ ቂጫን።
\v 57 ዘንጋ ጭን በጌታንራ በኢየሱስ ክርስቶስ ኸረንታ ንኢምነኸ ዬቨንረዳ ጎይታ ሽኩር ኧህርኩ።

\v 58 ባቴ ናማጂ ኧሰማቶ ቱዎም ተሰጎውዋ፤ ባአታአር ሻህ ሻህ አትዋርዋ፤ በጌታ ሜና እንእ ቀረ ጎኩርም አትዋቁሩዋ፤ ኧጌታ የሱስ ኧቂጭታሁዋ እመኸ አከረኸ ትሂሩዋ።

\c 16
\p
\v 1 በክርስቶስ አአሞሩዋ ዚጋ ሰቭ ዋጋ አትዋኦት ኢያ ኧገላቲያ ቤተክርስቲያን ሰቭ ኤኤድሁኗመኸ አሁም ኧሁኖመኸ አትዋኦዋ።
\v 2 ኢያ ትንቫአካ ፈራክ እያትዋኡዌኸ በሳምት ሳምት ውርሰንበት እንእ ሰቭ ቲረሁኩዳ ሁዳ ኢካአር ኧቫይትር አውራ ።

\v 3 ኢያ ትንቫአካ አሁዋ ኧሸፐትሁዮዋ ሰቭ ደብዳቤ ጣይፍተሁ ኤንተሁኗታ ፣ አትዋአዂ ዋጋ ኢየሩሳሌም ያሰርኦዋ ኸ ኧከሽኮሴ።
\v 4 ኢያይ ኧሆርት ያትሲእ በኸረ ኢያ ተሁኖም እማቲ ኧሆርሴ።

\v 5 በመቄዶኒያ ኧኝኧተሁ ኧሆርትኛ አይወኧራአር ኧኸ፣ መቄዶንያ በሰንአሁ ቀጥወ አሁዋይ አአሴ።
\v 6 ማንእየ ኤኤድ ትናርካ ኧቨያኛ ኢኸርካአርታአጉዥኘኸ ትንር ዌ ባሁዋይ ዝክ ኧቫርሴ፤ ዌ ዘር ታሁም ኧሰርፕትሴ ይህርሴ፣ ዌ ዘርቭ ታሁም ኧሰርፕትሴ ይህርሴ።

\v 7 ዋአካ ትናርካ እግረ መያኛ አዥሁዋይ አንሲኢካ ፤ ጎይታ በቫረ ዴካ ግዝየ ታሁዋ ኧስረፕቲ አሳብ አነኒ።
\v 8 ቢኸርቭ በኤፌሶን ከተማ ኧይሁዳ ኧጎር ሙርአ ቀረ ስን ኧስረፕትኴ።
\v 9 በሀይ ኢትራኰሽኝዳ ሰቭ ቢደቡሹም ኖኦራ ኧቬና ኡፈቻ ተከፈደኒ።

\v 10 . ጢሞትዮስ አሁዋይ በቫአ ፈራድ አይቫር እማቲ ታሁዋ ኢቸናኸ ኦንኤ፤ ሁድቭ ኢያመኸ ኧጎይታ ሜና ኢንአካናአር ።
\v 11 እመኸ ኧኸሬ እማት ሰቭ አይቅርጥኩ ፤ ቦሄነድ ኢያይ ኢድዠፐረኸ ኦንኤ ፤ ኦኦትሞኋ ተክርስቲያን ኧሰማት እማቲ ንእየነ።
\v 12 ኧሰምንራ አጵሎስ አሁዋይ ኢቨአይ ቡሼኤኸ ሳአርሁን ባነደ፤ ዘንጋ ጭን ሁዳ ዋአካ አሁዋይ ኢቫአይ አመሰረንዳ፤ ቤ ቲንኩዳ ጭን ያአንሴ።

\v 13 ቃንዠ ቧርዋ ብእምነትማሁዋ ቱኦዋ፣ ቱኦም አትዋቁሩዋ ፤
\v 14 ቴዊዳአር እንእ በርመጀ ኦንኦዋ።

\v 15 ኧእስጢ አበሩስ ባአኪያ አወተራቸ አአሞሩዋ ክርስቲያን ኧሆሩዋመኸዪ ፣ ክርስቲያንቭ ያጌኪሩዋይ እንእአአርሁኖዋ አውዋኸ ትሂሩዋ ፤
\v 16 እእመኸ ሰቭቪ ተሁኖም በቬና ኢቂጭታቭ ሁኒዋ እንእ ቶኦዘዥኗ።

\v 17 በእስጢፋኖስ ፣ በፈርዶናጦስ ፣በአካይቆስ ኦኦት ሳረዪ፤ አሁዋ ዋይ ባንቦርታሁዋ ኧፐረቪያአር ሁኗ ᎂንኧኒ።
\v 18 ሁኗ ኢያሜዪ አሁሜ ሂን አትሳሩም፤ እመኸ ኧኽሬ ኧዋኸ ሰቭ ባቲቶ ኧኋርት ያትሲእ።

\v 19 በእሲያ አነውታ አብያተ ክርስቲያን ወገሬት አሁዋ ዩኩዋ ። አቂላቪ ጵርስቅላ በቪድሞሁኖዋይ ኧጠሎት ኢደሞጅታቭ ክርስቲያን እንእ ፥ እማቲ በጌታ በኢየሱስ ሹው አቸ ወሄምንሁዋዌ? ዩኩዋ።
\v 20 ክርስቲያን ኧሰማት እንእ ወገሬት ዩኩዋ። አሁም ታሁም በጌታ ኢየሱስ ንማጀ ተሳአውም ወገሬት ተዌዌርዋ።

\v 21 ዋ ወጌምት በገዛ ኧጀኛ ኧጠፍነሁዋታ ኢያ ጳውሎስንሁ።
\v 22 ጌታ ኢየሱስ አይረንድ ሰቭ በረፐረ ኧትሰተቫአር ኧህር ፤ ጌታ ኢየሱሶ የኸ።
\v 23 ኧጌታ የሱስ ጠጋ ታሁዋ ኧህር።
\v 24 ንመጀኛ በጌታ በኢየሱስ ክርስቶስ ታሁዋ ኧህር፤ አሚን ።