ior_reg/42-MRK.usfm

\id MRK
\ide UTF-8
\h ኧማርቆስ ወንጌል
\toc1 ኧማርቆስ ወንጌል
\toc2 ኧማርቆስ ወንጌል
\toc3 mrk
\mt ኧማርቆስ ወንጌል

\c 1
\p
\v 1 ኧጎይታ ትከ ኢየሱስ ክርስቶስ ወኼ ዋራይ ይቆርሽኮዳ
\v 2 በነቢ ኢሳያስ መጣ « መያ ይጤርካ ኪሸረፕኛ ታኸ ኢፊቲ ኤኬሽኪ
\v 3 ሁድቭ « ኧጎይታ ሜያ እጣውርዋ ዋአድኮኋ ጎኩርዋ ባረ በቨረሀ ያኸራካ ሰቨ ቃርን »ቧርሙ ኧጣፊይ አአር ባንደ ።

\v 4 በኽም ኧቫአ ያጠምካ ዮሐንስ « ባጢራሁዋ አፍ ይኩዋይ በጎይታ ኢፍቲ ንሰሃ ጉኦም ተጠመቁዋ »ባረ በቨረሃ አዋጅ ቲቭር ማአ ።
\v 5 ኧአይሁድ ገኝ ሰቨ እንእ ኢኢየሩሳሌም ሰቨ እንእ ጀፖርምታ ዎርሙ ባጢርሁኖዋ በጎይታ ኢፊቲ ቲትራዘዝዋ በዮርዳኖስ እሃ በዮሕንሲ ኧጅ ይጠመቁዋ ባንደ ።
\v 6 ዮሐንስ ተጋሜራ ድገር ኤፐዊ ውጅር ተኸተረ ናቫኋ በጠፍር ታአከደ ኧበረሃ ውየ እጉረቬናቭ ይቨራ ባንደ ።

\v 7 ሁድቭ ይኢድኩ ኧረፐረአዋጅ «ኧጫማኋ ያአጉጅኮዳ ክር ስን ሙግ ባይተሁ ዓፈዳኔ አይትቨቃያአር ቲያ ይረካ አአር ቲያ ኢኢ ይቫአኬ ፥
\v 8 ኢያ ብእሃ አጠምቅሁዋ ሁዳ ጭን በመንፈስ ቅድስ ያጠምቅሁዋቴ » ይርእካ አአር ባንደ ።

\v 9 በሀ ግዚየ ተገሊላ ገኝ ተናዝሪት ከተማ ማአታበዮርዳኖስ እሃ በዮሐንስ ኧጅ ተጠመቀ ።
\v 10 ኢየሱስ ትእሃ ተዋአመኸ ሰማይ ተከፈተደታ መንፈስ ቅዱስ ቡናር መሰረ በፎርኋ ቲወትካ አሸ ።
\v 11 « ኧረድኸዳ ትከኛ አኸተ ባኸቭ ይሽሬ »ይቭርካ ቃር ተሰቫይ ተጎይታይ ተሰማ።

\v 12 ህመጋ መንፈስ ቅዱስ ኧቨረሃኒየ ኤፐ ወሰደን
\v 13 በህሜ በቨረሃ በሴጣን ቲትፈተን አርቫአ ቀረ ኤኮሰ ።ተቨራ አዊ እማትሜ ቲይረቨር መላአይካቭ ያጌኪሪ ባንደ ።

\v 14 ዮሐንስ ጠቦጪታ ባአኮጂ ቀጥወ ተጎይታይ እአቫአ ወሄ ዋራይ ቲይኢድ ገሊላ ዩሪዳ ገኝ ወረታ
\v 15 ግዚየኋ ሰንአ ኧጎይታ መንግስት ማአ ሰንአ ባጢራሁዋ በጎይታ ኢፍቲ ኦኦም ንሳሃ ጉኦዋ ብእም ወንጌል ኦዎርዋ »ቲይር ይኢድ ባንደ ።

\v 16 ተህም ቀጥወ ኢየሱስ በገሊላ ባር ሞሬ ቲያርካ ስሞኦንቪ ኧስምመኋ እንድሪያስ ዓሳኢጠጭዋ ኧረፐሬ ኧኸሬ ዓሳ ኢጠጭኮዳ ሽካ ኧቫሪ ኤፖም ቲቋሽታ አሽኖም
\v 17 ኢየሱስ የሁዋ ተሆተርኝ ሰቨ ተቫጢርሁኖዋ ትዥፕርዋኸ ኧናሁዋሴ ባረኒም ።
\v 18 ሁኖም ህመጋ ዓሳ እጠጭኮዳ ሽካሁኖዋ ቃሸውምታ ቴኼተሪ ።

\v 19 ቀሪም ኤኤዲ ተወረ ቀጥወ ኧዘብዴዎስ ኧች ያዕቆብቪ ኧሳምመኋ ዮሐንስቭ ብእንሲየ መርከብ ቸኧኖምታ ዓሳ ያጠጭኮዳ ሽካሁኖዋ ያጣውርዋ ባንደ ።
\v 20 ኢየሱስቭ አሽኖምታ ህመጋ ኸናኖም ። ሁኖም አባሁኖዋ ዘብዴዎስ ተቬነኘመኋ በመርከብ ሁዳ ፎር ቼኤዊታ ኢኢየሱስ ቴሃተርሙ ዎርም ።

\v 21 ተህም ቀጥወ ቅፍርናሆም ዩሪዳ ኤኤዲ ወርሙ ኢየሱስብ ህመጋ በሰንበት አአይሁድ ኧጠሎት ቢድ ገፓታ አትሞርት ቀነሰ ፤
\v 22 ቲያትመርካ አአይሁድ ቂጭ አስተማሪየኸ ተይኸርቭ ዳኝነድ አነንዳ ሰቨኸ ኧረፐሬ ኧከሬ ኧሶሜ ሁኖዋ እንእ ወግ ይኸርወዋ ባንደ ።

\v 23 በኽም ግዚየ ቢደሞችኮዳ ቢድ ኧረፐረ አት ሴጣን ኧጠበጠን ምስ ዋኸ ቲይር አኸና፥
\v 24 «ኧናዝሪት ኢየሱሰ አኸ ቲያ ምር አነነኸ ታአፋንሬ ማአኸይ? ኢያ አኸ ማን ኧኸርኸኸ ኤሂር አኸ ኧጎይታ ኧይቀደስኸ »ባረ ።
\v 25 ኢየሱስብ ቁስ ባር ግፍርኩታ ሆር ባረ አጥራቆረን ።
\v 26 ሴጣንቭ ሁዳ ኧቭስ ሁዳ አተገ ኖኦራአበጥቨጠቨን ቀጥወ በሩኡየ ቃር ኮ ባረታ ገፈረን ወረ ።

\v 27 ሰቨ እንእ ዋ ዘንጋ ምራፈድን? ምይነትን ወያ ትምርትን ። ኧሴጣን ስን ይኢዝዝ ሁኖም ኢታአዘዥነ ቧርሙ ወግ ኧረዎምታ ገግ ትገግመሁኖዋ ኢጮጅዋ ባንደ ።
\v 28 ህም ግዚየ ኢኢየሱስ ዋራይ በገሊላ ገኝ ተሰማአ ።

\v 29 ህመጋ አይሁድ ቲደመጅኮዳ ቢድ ተዋአመኸ ተያዕቆብቪ ተዮሐንስቭ ኧሰምኦንይ ኢኢድሪያስሜ ቢድ ጎፖም ።
\v 30 በቪድ ከስ ኧስሞኦኒ አቫቸድ ሚሲየሻ ሜኬረችታ ተገተረች ባንደ ።ሂድቭ ኤኤመናኸ ህመጋ ኤኤጂ ።
\v 31 ተኽም ኧትረሳ ኧትገተረቸ ኤኤዲ ወረታ ኧጅሻ ጠበጠታ ነሳና ።ትቬክር ኧረፐረ ቼኤናታ ተረሳች አቫዘረችኖም ።

\v 32 አየድ ወይአታ በቨሸጋ ኧቃያኋ ሰቭ ኤኤመኖሚ ባአሽ ኧጠበጠነዋ ሰቨ እንእ ኧሁዳይ በቾም አዎአዮም።
\v 33 ኧከተማኋ ሰቨ እንእ በወረጀ ቁጥ ቧርሙ ባንደ ።
\v 34 ኢየሱስቭ በሮኦራ ባአሽ ኧትጠቦጭዋ ሰቭ እንእ አፊያ ኤፐ ኖኦራቭ ሴጣን አዋአ ዘንጋኋ ጭን ሴጣን ሁኖዋ ማን ኧኸረኸ ኢሂሪ ኧረፐሬ ኣኸሬ ኢዝረኩዋይ አናቨኖታ

\v 35 ሱቢ እረርኧ ገና አየድ ታይዋአ ኢየሱስ ተረሳ ተቪድ ዋአታ አት ሰቨ ኤነወ ኤኤዲወረ ጠሎት ይንአ ባንደ ።
\v 36 ስሞኦን ትቬሻሞኋ እማትሜ ኢኢየሱሲሰ ኢሱኢ ዎርሙ ።
\v 37 በረከዊመጋ ሰቭ እንእ አኸ ኢስኸ ቢ ።

\v 38 ኢያ ኧቫአሁ ኧጎይታ ቃር ኢኢዲ ኧኸሬ «ኧሰቨ ኧጎይታ ቃር ኒኢድኔ ኧቪየምንራይ አነውታ ቃያ እማትሜ ንሆርነ ባረኖም ።
\v 39 አይሁድ ቢደምችኮዳ በጠሎት ብድሞሁኖዋ ቲጋአ ኣጎይታ ቃር ትእድቪሴጣንቭ ቲያዋአ ገሊላ ቢዩሪዳ ገኝ እንእ ውርውር ይቭር ባንደ

\v 40 አት ኧጎጋ ባሸ ኧጠበጠን ምስ ኢኢየሱስ በኧግርኋ ወተኧ ቢሽርኸ ታተርፈይ ኢኸነኸባረታ ሳአረን ።
\v 41 ኢየሱስቭ አትቫጠጠንታ ኧጅኋ ዝራካ ሙሻሸንታ ትተርፊ «ኢሽሬ ትረፍ ባረን »
\v 42 ምስቭ ሁዳ ኧገግኋ ባአሽኋ ገፈረን ህመጋ ገፈረን ።

\v 43 ኢየሱስቭ ኧምስሁዳ ቲያስራብትኩዳ « ኢያ አተነፍከኸ አአትሞኋ ሰቨ እኔኤድኸ ዘንጋኋ ጭን እማት ኧካሃናት አተዥ
\v 44 ኧተንፍኸመኸ ኧሰቨ እንእ ምስክር ኢኸረኸ ሙሴ ኤኤዘዘን ህትቭ ኧጎይታ አተኧንቭ »ባረታ አጬፐን ።

\v 45 ቢኸር ጭን ምስሁዳ ተሀአ ይ ዋአታ ዋ ዋራይ እንወኋ ቲያር ቲያር አአውጅት ቀነሰ ፥ተህም ኧትረሳ ኢየሱስ ሰቨ ቲያዥኩ ማንኝእ ከተማ ኢጋአይ አንቴፐነዳ ቢኸር ጭን ሰቻ ዋአታ ሰቨ ቤነወ ኤኤዲ ይረቭር ባንደ ፥ሰቭቭ ቴኤድ ኤኤዲኧሁዳይ ይዎኦዋ ባንደ ።

\c 2
\p
\v 1 ተቀሪ ቀር ቀጥወ ኢየሱስ ቅፍርናሆን ከተማ ተዥፐረመኸ ቢድ ከስ ኧጉኦትኋ ሰቨ ሁኖዋ ሰሞም ።
\v 2 ቢድ አንቨቃ ባረታ በወረጀ ስን ይሽኮኮዳ ኤኤዲ ቲወኽሪ ስን ኖኦራ ሰቨ ተደሞጅሙ ። ኧሁኖም ኧቃር ይኢድኮዋ ባንደ ።

\v 3 በኽም ግዚየ አርቫት ሰቨ አት ሽባ ምስ ፌነጉም ኧሁዳይ አዎኦይ ።
\v 4 ኖኦራ ሰቨ ኧረፐሬ ኧኧኸሬ ኢየሱስ አኖዳ ኢኤዲ ኢቴኤነውዋኸ ቢወሁርዋ ኢየሱስ ባኖዳ አጋድ ኧሱኡር ቢድ ኮፎኩምታ በጂፐኋ በትገተረመኸአወንጂ ።

\v 5 ኢየሱስ ያትርፍኩሴ ቧርሙ ኧትማሞርዋኸ ኧሃሬ ኧ«ተፈነኸ » ባረን ።
\v 6 በኽመኸ ኧቸኖዋ አታት ኧሙሴ ኧቂጫ ባሪቅ ኧዋ ዘንጋአር በሂንሁኖዋ ዋኸ ባርሙ ።
\v 7 «<ዋ ምስ ኧጎይታ ኧዋኸ ቂናወ ኧቭር ኢቀርቭ? ተጎያ ኤኛአር ባጢር ኢፈኢ ኢኸነዳ ማንተን »ቧርሙ ።

\v 8 ኢየሱስቭ ኽመጋ በመንፈስኋ ሃረት ኧዋኸ አአር አጫመጭዋኸ ሀርታ «ኧቭር በሂናሁዋ ኧዋኸ አአር አጫመጥሁም?
\v 9 ኧሽባ ሁዳ ባጢራኸ ተፈኧነኸ ተዋርቲቪ ተሳ ጅፓኸ ፈንግ ሆር ተዋርት ኧተሁኖዋ ኢረእ ኢረኧዝ?

\v 10 ዘጋጭን ኧሰቨ ተከ በአፈር በፎር ባጢር ኢፈኢ ደረግ አነነኸ ትሂርዋኸ ባረታ ን ።
\v 11 « ኧሽባ ሁዳ ተሳ ተሳ ጅፓኸ ፈንግ ቢዳኼ ሆር እኸ » ባረን።
\v 12 ሽባ ኧረፐረ ሁዳ ኽመጋ ተረሳታ በሰቨ እንእ ኢፍቲ ጅፓኋ ፌነገ ዋአ ። በኽመኸ ኧረፖርዋ ሁኖዋ እንእ ዘንጋኋ ወግ ኸረዎምታ እእሸኸ አአር ስርም ኧሽተነ አንሂነዳ ቧርሙኧጎይታ ሽኩርት አቴኤነውም ።

\v 13 ኢየሱስ ሀአቨ አት ኧባር ሞሬ ወረ ኖኦራቭ ሰቨ ኧሁዳይ ማአ ሁዳቭ አትመረኖም ።
\v 14 ሁድቭ ሀአመያ ቲያርካ ቀረጥ ቢያጭኮዳ ኤኤዲእእልፍዩሲ ኧች ለዊይ በቸና ኤኤዲ አሸንታ« የኸ ተኸተሬ »ባረን ።

\v 15 ተኽም ቀጥወ ኢየሱስ በለዊይ ቢድ ሽረድ ኢቨራይ ቸና ኖኦራ ሰቨ አሄተሪ ኧረፐሬ ኧኸሬኖኦራ ቀረጥ ያጭታ ሰቪይ ኤኛ ባጢረተኝ ሰቭ ተኢየሱስቪ ተተማሪሞኋ እማትሜ ቸኖም ሽረድ ኢወርዋ ባንደ ።
\v 16 ኧፈሪሳ ሰቨ ኧሆርዋ ኧሙሴ ኧቂጫ ባሪቅ አሸውምታነዳ ሁዳ ተቭር ቀረጥ ቲያጭታ ሰቪይ ተቫጢረተኝቭ ሰቨእማትሜ ቸና ሸረድ ኢቨራአ? ቧርሙ ኧተማሪኋ ተሳአሪዮም ።

\v 17 ኢየሱስቭ ዋዳ ሰምአታነዳ «ኧቫአሺየ ባከሬ በፋይነዳ አነዳ ሰቨ አኪም አያሲእኩዳ »ኢያቭ ኧቫአሁ ባጢረተኝ ንሳሃ አገአይ ማአሁ ባሃሬ ጻዲቅ ሰቨ ንሳሃ አገአይ አኸሬይ አማአኋ »ባረኖም ።

\v 18 ኧዮሐንሲሜይ ኧፈሪሳሜ ሰቨ ተማሪ አንጦሙዋይ ኧረፐሬ ኧኸሬ አታት ሰቨ ኢኢየሱሲ ሞኦምታ «ኧዮሐንስ ኧፈሪሳ ሰቨሜ ተማሪ ቲጦምታ አኼ ተማሪ አይጦሙዋ ሁዳ ኧቭራፈድን? » ቧርሙ ተሳአሪ ።
\v 19 ኢየሱስ ዥፐረታ ዋኸ ብረኖም «ምሽረኝ ታነ ሙዜ ሁኖዋ ኧተኸይጦሙ? ምሽረኝ ተሁኖዋ ታነ ሁኖዋ ኧጡምት ኤነዎታ ።

\v 20 ቢኸርቭ ጭን ምሽረኝ ተሁኖዋ ኢፍቲ ኢወስጅኮዳ ግዚየ እቫአኬ ሀአ ግዚየ ኢጡሙዋሴ ።
\v 21 በጉስ ሁጅር ወያ ጣፉድ ኢጠፍካ አትቭ ሰቨ ኤንዳ ዋኸ ቢኸር ጭን ወያ ጠፉድ ሁዳ ኧጠው ሁጅር አቸ ተአወተረ ሁዳ ይቭኧስ ይትዠኣር ።

\v 22 እመኸቭ በገነዘ ኧጠጅ ገንባ ወያ ኣወይን ያወራካ ኤንዳ ቢያወራ ጭን ኧወይን ጠጅ ሁዳ ኧገባ ሁዳ እሰቭርኩ ጥጅቭ ሁዳ እትሁእ ገባቭ ሁዳ ኢትሰፐር በኽም ኧቫአኧወያ ኧወይን ወያ ገንባ ያትሲእኩ ።

\v 23 በሰንበት ቀረ ኢየሱስ በስኔኧ ዝኝኧ ግት ቲያርካ ተሁዳ ያርዋ ኧረፖርዋ ተማሪኋ ኧሲድ ኦዎጥሽት ቆነሹም ።
\v 24 ኧፈሪሳ ሰቨ ኢኢየሱስ ተማሪያኸ በሰንበት ቀረ ተቭር አይኔአር ይንኦዋ ቧርሙ? ተሳአሪ ።

\v 25 ኢየሱስቭ ዋኸ ቲይርዠፐረታ «ዳዊት ጋደንታ ሸረድ ባሴኤን ግዝየ ተሁድ እማትሜ ተረፖርዋ ሰቨ ኤፐአር አናረበብሁዋታ?
\v 26 በአያተር ኧካሀን አለቃ በረፐረወ ዘቨር ዳዊት ገፓታ ካኽናት ባሀሬ ኤኛ ሰቨ ኢቨራኩይ አትፈቀዳአር በጎይታ ኢፍቲ ኧቸና ሽረድ በናታ ተሁድ ኧረፖርዋ ሰቨ አቨኖም።»

\v 27 ዠፐረታ ዋኸ ባረኖም «ሰንበት ኧስቨ ተፈጠረ ባሃሬ ሰቨ ኧሰንበት አትፈጠረዳ ፥
\v 28 ባቴ ኢያ ኧሰቨ ኧች ኧሰንበት ጌታንሁ » ባረኖም ።

\c 3
\p
\v 1 ኢየሱስቭ ሃአቨ በኤኛ ግዘየ ይደሞችኮዳ ቢድ ገፓ በኽሜ አት ኧጅኋ ኧቁረፈረ ምስ ባንደ ።
\v 2 ኢኢየሱስ ይኮሺሺ ሰበብ ይሲኮ ኧረፖርዋ ሰቨ በስንበት ቀረ እንዴ አፍያ ይናኩ አይናኩ ያዥዋይ ያጭምሞዋ ባንደ ።

\v 3 ኢየሱስቭ ሃአ ኧጅኋ ኧቁረፈረወ ምስ ዋይኒነ የኸታ በሰቨሰቨ ሰቨ ግት ተሳ ተሰገቭ ባርን ።
\v 4 ኢየሱስ ኧትስወሰዋ ሰቨ « በሰንበት ቀረ ውኼአር ኦኖትንዌ ሙጥጣአር? ነፍስ አትርፉትኒ ወይ ኡኡትርትን? ባረ ተሳአረኖም ሁኖዋ ጭን ቁስ ቧርሙ።

\v 5 ኢየሱስቭ በኺንሁኖዋ ቱእነድ ቀጨባረንታ አነውታ ሰቨ እንእ በቫአት አዦረ አሸታ ኧቭስ ሁዳ « ኧጃኸ ዛጋ » ባረን ።ምሁዳ ኧጅኋ ብዝራካ አታአር ኤነኸ ቼኤን ።
\v 6 ኽመጋ ኧፈሪሳ ሰቨ ኧተኸ ኤኝተዋ ይጠቺኸ ተሄሮድሲ ሰቨ አትዋጆት ቆኖሹም ።

\v 7 ኢየሱስ ተተማሪሞኋ ኧገሊላ ባሪይ ኤፐ ወረ፥ ተገሊላ ባር ኖኦራ ሰቨ ቴሄተረን ።
\v 8 ይናኩዳ ኔና እንእ ኧሰሞዋ ሰቨተይሁዳ ተይሩሳአሌም ተኤዶሚያስ ተዮርዳኖስ እሀቭ ሃአጋድ አነውታ ገኝ እመኸ ተጢሮስቪተሲዶናቭ ቃያ ኧሁዳይ ሞኦም ።

\v 9 ሰቭሞኋ ጊፈተ አያትጨንቅኩመኸ ኧተማሪኃ ብእሲየመርከብ ይወኦዋኸ ኤዘዘኖም ።
\v 10 ኧኖኦራ ሰቨ ተቫአሸ አተነፌ ኧኸሬ ኖኦራ ባአሸ አነዎታ ሰቨይረጉጂ ኢትጋፎዋ ባንደ ።

\v 11 ሙጥጥ መንፈስ እንእ ቲያዢዳ ቢኢፍትኋይ ቲወኣድኡዋ « አኸ ኧጎይታ ትከንኸ ቲይሪዋ ኮ ይርዋ ባንደ ።
\v 12 ኢየሱስ ጭን ማን ኧኸረኸ አይዝሬኩዋኸ ያጥራቁርኮዋ ባንደ ።

\v 13 ኢየሱስ በቆቶ ዋአታ ይሲኢኮታ ሁኖዋ ኧሁዳይ ይዎኦዋኸ ኸናኖምታ ኧሁዳይ ሞኦም ።
\v 14 ተሁድቭ እማትሜ ይሆርዋኸ ያትሞርዋሜ አስራ ውሬትሁኖዋ ሸፐተ « ኪሽረኘ » ባረ ሽሁው አዋአኖም ።
\v 15 ተሰበ ሴጣን ያዎኦዋይ ደረግ አቨኖም ።
\v 16 ኧሸፐተነዋ አስራ ውሬቸሞሁኖዋ ዋሁኖተ፥ጴጥሮስ ኧዋሪ ስሞኦን ፥

\v 17 ቦኦኔርጌስ ዌ አብራቂ ዴጋ ኧኸናኖዋ ኧዘብዲዮሲ ዴንጋ ያዕቆብቪ ዮሐንቭ
\v 18 እንድሪያስ ፥ፊሊጶስ ፥በርተሎሚዮስ ፥ማቲዮስ ፥ቶማስ ፥እእልፍዩሲ ኧች ፥ያዕቆብ ታዲዮስ ፥ስሞኦንቪ
\v 19 ኢኢየሱስ አዋ አአይፐረን አአስቆርቱ ገኝ ይሁዳ ።

\v 20 ተኽምቀጥወ ኢየሱስ አት ቢድ ገፓ ሁድቪይ ተማሪሞኋ ሸረድ ኢዎሮኦዋኸ ተዎሁርዋ ስን አት ሀአቨ ሰቨ ተስበሰቨ ።
\v 21 ዘንጋኋ ኧስሞዋ ቢደሰቭኋ « ኺንኋ ባረን » ቧርሙ ጥጭተዋ ይወስጂይ ሁዳ አኖዳ ኤኤዲ ሞኦም ።
\v 22 ተኢየሩሳሌም ኧዎኦዋ ኧውሴ ቂጫ ባሪቅ « ቡኤል ዩሪዳ ኧሴጣን አላቃ አነወ ሴጣን ያውዋአካ በሴጣን አላቃን »ቧርሙ ።

\v 23 ሁድቭ ኸናኖምታ ዋኸ ቲይር ሟሟካ ኤኤደኖም ሴጣን ኧሴጣን ኧተኸ ያዋአ?
\v 24 አት መንግስት ሁድ ተሁድ ተራከሰታ ኢትቫተር በኸረ መንግስትኋ ይትሽከቪ አይኸነዳ ።
\v 25 አአት ቢድ አበሩሰቨ በኸረ ገግተገግኋ ተራከሰታ ቢትቫተር ይረቭሪ አይኸነዳ ።

\v 26 እመኸቭ ሴጣን ገግተገግሞኋ ተራከሰታ አይትቫይተር በኸረ የኧፋይ ባሃሬ ኧምቦርት አይኸነዳ ።
\v 27 ብእም ኧቫአ አትሰቨ ብደይተ ጦናመ ታያአግድ ኧጦናመ ሰቨይ ቢድ ጊቨኤተ ብቭረድ ኢዘንፍካ ኤንዳ ቤተረ ጦናሞ ሁዳ ባአከደ ጭን ኢዥንፊ ኢኸነ ።

\v 28 ኧውረመኛ እቭርሁዋ ኧሰቨ ትከ አነእዕዳ ባጢርቭ ተአነቨድሞኋ ይዋአኩዳ ቂናቨ ኢትፋእነ ።
\v 29 ዘጋኋ ጭን በመንፈስ ቅዱስ ኤቂናቨ ቃር ኣዝሬከ ጭን ስርም አፍ አዩሪዳ ኧዘላለም እዳ ኧኽርወ ባረ ።
\v 30 ኢየሱስ እመኸ ባረ ኧዝሬከሁዳ « ሴጣን አነወ » ኧዋሪ ባንደ ።

\v 31 ተኽም አዶድሞኋ ኧሰማትሞኋ ሞኦም በወረጀ ተሸኮወምታ ኢየሱስ ሁሮንረ ባርሙ ሰቨ ኬሾም ።
\v 32 ብሚዮኃይ ኧቸኖዋ ኖኦራ ሰቨ አዶድማኸይ ኧሰማትማኸ በወረጀ እሱከ ቧሪ ።

\v 33 ሁድቭ አዶድኛ ማንተኒያኧሰማትኮኛ ማንማንተነዋ ባረኖም ።
\v 34 በዙሪያኋ ኧቸኖዋ ሰቨ አዦረ ቲያዥ አዶድመኛይ ኧሰማትመኛ ዋሁኖተ ።
\v 35 ኧጎይታ ፍቃድ ይናካ ኢያይ ኧተም ኧሰምቭ አዶድምነኛ ባረ።

\c 4
\p
\v 1 በኤኛ ቀረኋ ሃአቨታ በቫር ሚዬ አስተሙርት ቀነሰ ። ሁዳ ቢረቭርውዴኤዲ ኖኦራ ሰቭ ኧስቨሰቬ ፣ በቫር ፎር አንዳ እሲየ መርከቢ ገፓ ችና ሰቨ እንእ በቭር ሞሬ ባንዴኤዲ ተስወሶም ባንደ ።
\v 2 ሁዳ ኖኦራ ዘንጋ በሟሟካ አስተማረኖም ፣ ዋኸ ባረኖም ፥

\v 3 ስውኝ አት ቻዋጅ ዘር ይዘራይ ዋአ፥
\v 4 ዘር ቢዘራወዳ ግዚየ አታት በቬያ ፎር ወተኧ አፍ ሞኦምታ ናጮም ቦኖይ ።
\v 5 አኛአር አፈር ቤነወ በጣጤ ኤዲ ወተኧ ገዳኒነኋ አፈር ኤኖይ ኽመጋ ነማ ፥

\v 6 . ቢኸር እዋየ ቢዋአ ጭን ሸተረ ኧስር አነፐሮይ ኧኸሬ ደነኸ ።
\v 7 እመኸ ኤኛ ዘር በሶኽ ግት ወተኧታ ነማ ሶሁዳ ነማታ ኧዘር ሁዳይ ኒማ አነቀኒ ምርት አናወደዳ።

\v 8 . ኤኛ ዘር ሃአቨ በወኼ ቡሽር አፈር ኧወተ ኧዘረ ገተደ ነማ። ኖኦራ ምርት አቨ አታትኋ ሳሳ እታትኋ ስልሳ አታትኋ በኧር ምርት አወንዳ»ባረ ።
\v 9 ሃአቨታ ኢየሱስ ፥ « ይሰቫካ እዝር አነንዳ ኧስቫ » ባረ።

\v 10 ኢየሱስ ኦጣኋ በኸረ ግዚየ አስረ ውሬቸይ እማትሜ ተረፖርዋ ኤኛሞሁኖዋ ኧሟሟካ ሁዳአር ተሳአሪ ።
\v 11 ሁዳ ዋኸ በረኖም «ኧጎይታ መንግስታአር ቲኪርዋኸ አንኩም፥ኤኛሁኖዋ ጭን እንአር በሟሟካ ይኢጂዮዋ ።
\v 12 እመኸ ኦሽትኋ ቲያዥዋ አይቬሲሪኸ ኣጎይታሜ ተዣቨይተዋ ባጢርሁኖዋ አፍ አዩሪዮኸን»ባረኖም።

\v 13 . ተኽም ኢየሱስ ዋኸ ባረኖም ፥እም ሟሟካ አሃርሁዋታ? ባቴ ዋሟሟካ ባሃርሁዋ ኤኛ ሟሟካ ኧተኸ ቲኺርቴ?
\v 14 ቻዋጅ ኧጎይታ ቃር ይዘራካ ሰቨን ።
\v 15 አታት ሰቨ በቬያ ፎር ኧወተኧ ዘርን ኧጎይታ ቃር ቢሰኦዋታ ግዚየ ሴጣን ኽመጋ ይቫአታ በከስሁኖዋ ኧዞኔ ቃር ይዎስድዎዋ።

\v 16 . እመኸ ኤኛአር በጣጤኤዲ ኧዘኔ ያቲሽካ አንዳ ኧጎይታ ቃር ተሰሞዋመኸ ኽመጋ ሳረኖምታ ይቴኤፖርታ ሰቨንዋ ፥
\v 17 ቢኸር ኧግዚየኋ ይቴኤፖሪ ባሃሬ ኧስር ኤኖይ ተቀሪ ቀጥወ በጎይታ ቃር ኧቫአ አት ምካት ቢቫአዎዋ ወይ ቢያሳድጂየዋ ኽመጋ ተክታተፉምታ ይወድኡዋ በሳኽ ግትኧዞኔ ያቲሽካ አንዳ ኧጎይታ ቃር ይሶኦታ ሰቨነዋ

\v 18-19 ቢከር ኧዋ አለም ኧዋጋ ንማጅነድ ኤኛ ተሜኛትበኺንሁኖዋ ይገአታ ኧሶሜቃር አነቀ ይጠጥኩ ብእም ኧቫአ በሁኖዋ ኧጎይታ ቃር ምርት አያወትካ ፥
\v 20 ኤኛሁኖዋ በወሄ አፈር ኧዞኔ ዘር ይቨስር፥ዋኽኖዋ ኧጎይታ ቃር ሰሞምታ ጌኮርሙ ይቴኤፖርታ ሰቨኖዋ ሁኖም ሳሳ ስልሳ በኧር ጉኩረ ምርት ይውታኖዋአር ።

\v 21 ኢየሱስ ዋኸ ባረኖም «ሰቨ ኩራዝ ተከሰታ ተሴፈድ በገዳ ወይበገባ ከስ ያወራ? ያወሬዳ ሁዳ ቢቲረከቭኬኤዲ አኸረዳዌ?
\v 22 እምኸ ኧደእሽራአር እንእ ታይትረከቭ ኧዶኦሪያአር እንእ ስቻይ ታይዋአአይዎኦርካ ፥
\v 23 « እዝር አነንዳ ኧስቫ »ባረ ።

\v 24 ተኸም ኢየሱስ «ብሶኦኤዳ ዘጋ ተጠፖዋ ብስፍርኮራ ቁና አሁም ይሰፍነኩዋቴ ተኽም ይረካአር ይደውነኩዋቴ ።
\v 25 አነንዳ ይደውነ ኤነን በኸረ ኽም አነንዳ ሁዳ ይወስችኮዴ » ባረ ።

\v 26 ተኽም ቀጥወ ኢየሱስ ዋኸ ባረኖም ኧጎይታ መንግስት በአፈር ፎር ዘር ኧዘና ሰቨ ይቨስር ።
\v 27 ምስሁዳ ይትገተር ጋእ ቲይካ ይትረሳ ኧዘናንመዝረ ኧተኸ ታይኽር ገተደ ይዋአ ።
\v 28 በአፈር ኧዘኜኔ ዝኝ አፈር ገግሞኋ ያርብቫኩ ።
\v 29 ኧዞኔ መዝረ ቲሰርካ ጎር ኧሰናይ ኧኸሬ ምስ ሁዳ ኽመጋ መኧተትኋ ነሳታ ኦጭት ይቀርስኩ ።

\v 30 ኢየሱስ ዋኸ ባረኖም «ኧጎይታመንግስት ተቭር ናትዋራኔ? ወይ በቭር ሟሟካ ይኢጅነነ?
\v 31 ኧጎይታ መንግስት አብር ይቨስርካ ኧሰናፍጭ ዘር ይቨስር ቲዘሬዳ በአፈር ፎር ታነውታ ዘር እንእ ያአንስ ።
\v 32 ቢኽር ዘኖይታ በነማ ቀጥወ ጭን በጎር ተዘኖዮዋ ዘር እንእ ይረእ ኧሳቫይ አፍ ሁኖዋ አጤኋ ጥራር ከስ ያፎይዋ ።

\v 33 ኢየሱስ ኣሰቨሁኖዋ ቢቬስርኮዳ መያ እመኸ በኸረ በኖኦራ ሟሟኻ ኤኤደኖም ።
\v 34 ሟሟካ አይቫር ባይኢድኮታ ፥ሁዲቪ ተማሪሞኋእማትሜ ቢሆርታ ግዚየ እንእ ዘንጋ ብታተረታ ቢኢድኮተ ።

\v 35 በኽም ቀረ ገፓድ ቲኸርካ ሃአጋድኋ ናአነ ባረኖም ።
\v 36 ሁኖም በኽምኸ ሰቨሁኖዋ ቼኤዊዮምታ ብእሲየ መርከብ ታነመኸ ኽመመያ ጠቦጪታ ወርሙ ፥ ኤኛአር እንሲየ መርከብ እማትሜ ባነውተ ።
\v 37 በኽም ግዚየ ደረጋሞ እቡርቢድ በቫር ፎር ተረሳታ መርከብ ሁዳ እሃ ቲቬናኩ ስን እቡርቢድ ሁዳ ቡሼኧኸ ኧመርከብ ሁዳ ይገፋኩ ባንዳ ።

\v 38 ኢየሱስ ጭን ተራስ ተራአሰታ ብእሲየ መርከብ ቢኢ አጋድኋ ተገተረ ባንደ ።
\v 39 ኢየሱስ ተርብሳታ ኧርፋስ ሁዳ አጥራቆረን ባር ሁዳ ቁስ ባረ ገብ ባር »ባረን ፥ንፋስ ሁዳ ቁስ ባረ አቸ ገብ ባረ ።

\v 40 . ኢየሱስ ኧተማሪኋ « ኧቭራፈድን ዋኸ ትፎይታ? ኧተኸ እምነት ኤነነሁዋ? »ባረኖም ።
\v 41 ሁኖም ቡሼኤኸ ፈኞምታ ሁኖምተሁኖም « ንፋሲ ባር ስን ኧሁዳ ይቴኤዘዥነዳዋዳ ማንተን? »ቴቬቬርሙ ።

\c 5
\p
\v 1 . ተገሊላ ባር ብእሲየ መርከብ ጌርሴኔኖን ዩሪዳ ገኝ ሞኦም ።
\v 2 ኢየሱስቭ ትእሲየ መርከብ ተወደመኸ ሙጥጥመንፈስ ኧጠበጥን ምስ ተሞገማ ኤኤዲ ዋአአታ ኢኢየሱስ ይትራከቭኩይ ኧሁዳሜ ኤፐታ ማአ።

\v 3 እም ምስ እንእ ግዚየ በሞገማ ከስር ይረቭርካአሪ ማኒሞኋ ቢኸር ኧግርኋ ያአግድኩዳ ሰቨ አነፐረዳ ።
\v 4 ኖኦራ ግዚየ በኧግር ብረዲ በሰንሰለት ያአጉጂዳአር ባንደ፤ዘጋ ጭን ኧጅኋ አአኮጅኮ ሰንሰለት ይቭጣጥስካአሪ ኧግርሞኋ አአኮጅኮ ብረድ ይስፓፕርካአር ባንደ።

\v 5 እም ምስ በሞገማይ በቆቶ ግት በዋአናይ በጀውረረ ቲዥፓፐር ሚሲየኋ እንእ ብእቭር ያጥካአር ባንደ።
\v 6 እም ምስ ኢየሱስ በኖኢ ባሽንጋ ኢኢየሱሲ ቲትራወእ ወረታ በኧግርኋ ወተኧታ በጉርወድኋ በአፈር ወካታ ሰገደነ።

\v 7 . ቃርኋ ነሳታ ቲያኸራ «ትን በፎረ ኑእ ኧኸረ ኧጎይታይ ኧችኢየሱሶ ቲያ ምር አነነኸ? አታጨንቄኸ በጎይታ ኧጠጥኸ! » ባረን ።
\v 8 እመኸ ኸቫረን ኢየሱስ « እእምኧውጥጥ መንፈስ ተዋ ምስ ዋአ »ኧቫረዴ።. ቃርኋ ነሳታ ቲያኸራ «ትን በፎረ ኑእ ኧኸረ ኧጎይታይ ኧችኢየሱሶ ቲያ ምር አነነኸ? አታጨንቄኸ በጎይታ ኧጠጥኸ! » ባረን ።8. እመኸ ኸቫረን ኢየሱስ « እእምኧውጥጥ መንፈስ ተዋ ምስ ዋአ »ኧቫረዴ።

\v 9 ኽመጋ ኢይሱስ« ሹዋኸ ማንተን »ቲይር ተሳአረን።«ኖኦራንራአር ሹመኛ ሌጌዎንን»ባረን።
\v 10 ተኽም ገኝ ባያዋአኩይ ቡሼኤኸ ሳአረን ።

\v 11 . በኽሜኤዲ ቢረቭርካ ቆቶ ሚዬ ኧኖኦራአር አቬጌር አጋ ባነውተ።
\v 12 ሙጥጥ መንፈስ ኢኢየሱስ «አአቬጌር ሁኖዋ ስድድንረ ንገቫኔኮይ ፍቅድንረ» ቧርምታ ሳአሪ ።
\v 13 ሁድቭ ፈቀደኖም ፤ሙጥጥ መንፈስ ሁኖም ዎኦምታ በአቬጌር ሁኖም ጎፖም ፤ውሬት ሁም ያአሁርታ አቬጌር ቲትራወኡዋ በሲዌር ጎፖምታ በቫር ሰሞጩም።

\v 14 . ኧእአቬጌር ዜማቸ ሴኮምታ ዋራይሞኋ በገኜይ በከተማሞኋ አሰኖይ፤ሰቭ እንዳም ኤፔፐሁዳ ያዥዋይ ታኖኮዴኤዲ ዎኦም።
\v 15 ኢኢየሱስሜ በዎኦዋጋ ዲባሸ ጅን ጠበጠንታ ይረቭር ኧረፐረ ምስ ውጅርኋ ተኸተረታ ቀልብሞኋ ተዥፐረነታ በኽመኸ በቸኔኤዲ ቢያዢ ፈኝዊይ ።

\v 16 . እመዳ አሸዋ ሰቭ ጅን ኧጠበጠን ምስ ኧቴፐናአሪ በአቬጌር ኧኸረ ዘንጋ ኧሰቨሁኖዋ ኤኤጂዮም።
\v 17 ሰቨ ሁኖም ዋዳ ብሶሞዋጋ ገኝሁኖዋ ጊፊተነዋታ ያረኸ ኢኢየሱስ ኣሳአርት ቆኖሹም።

\v 18 ኢየሱስ እእሲየ መርከቢይ ቢገቫዳ ግዚየ፣ጅን ኧጠበጠ ምስ ተሁዳ እማትሜ ያሪ ሳአረን።
\v 19 ኢየሱስ ጭን አንፈቀደነዳ ዘንጋ ጭን«ቢዳኼ ሆርታ ኧዶባኸ እንእ ጌታ ኧኧተኸአር ኤፐናኻአሪ አቴሸናሃአር አፉት አውድኮዋ » ባረን ።
\v 20 ምስሁዳ ወረ፤ኢየሱስ ኤፐናአር እንዳም በአስር ገኝ ከተማ እንዳም ኧአውት ቀነሰ ኧሰሞም ሁኖም ወግ ኸረዎም ።

\v 21 . ኢየሱስ በኽም ቀጥወ ሃአቨታ ብእሲየ መርከብ ተቫር ሃአጋድ በዋአጋ ኖኦራ ሰቨ በቪየኋይ ተስዎሰሙታ በቫር ሞሬ ታኖም ፤
\v 22 አይሁድ ቢደሞችኮዳ ቢድ አላቃ ተሆርዋ አት ሁዳ ኢያኢሮስ ይሪዳ ምስ ኽመቲኒነ ያር ኧረፐሬ ኢየሱስ ቢያሽኩ በኧግርኋ ወተኧታ፤
\v 23 እሲየ ገረድኛ በውንዲ በትሮፍት ግት አነቺ ኧኸሬ ትረፍተችታ በአያ ትረቭረኸ ኧጃኸ ኧድግቫታ ጠሎት ኧናና ቲይር ቡሼኧኸ ሳአረን።
\v 24 ኢየሱስ ቭ ተሁድመጋ እማትሜ ወረ።ኖኦራ ሰቨ ኼፖፕምታ ቲትጋፎዋ ቴኼተሪ።

\v 25 አስራ ውሬት ኽርቭ ደቭ ቲወትካ ኧረፐረች ሚሽት ባነቸ ።
\v 26 ኧረኦራ ኡኡዛ ሰቨ በሆርት ቡሼኧኸ ተጨነቀች፥ዋጋመሻ እንዳም በኡዛ ጀፐረች ባደ፥ቢኸር ባአሸሻ ባአሰቫ ባሃሬ ስርም አናፈዘናዳ ፤
\v 27 ኺዳቭ ኢኢየሱስ ያተርፈኸ በሰማች ግዚየ ቲኢኋይ አጋድ ማአችታ በሰቨ ሁኖዋ ግት ውጅርኋ ነከደቸን።

\v 28 እመኸ ኤፐች «ኢኢየሱስ ውጅር ስን ብነግድ ይፍዘዜሴ ይካ እምነት ባነናደ።
\v 29 ይቱካ ኧረፐረ ደቭሻኽመጋ ተሸከቨና በምካትመሻ ኧተነፈችኸ ገግመሻ አኼረና ።

\v 30-31 ኽመጋ ኢየሱስ ተገግኋ ደረግ ኧዋአነኸ አኼረንታ በሰቭ ግት ተዥፓፐረታ «ውጅኛ ኧረከዴ ማንተን? » ቲይር ተሳአረኖም። ተማሪሞኋ «ሰቨ እንእ ቴኼተረናኸታ ቲትጋፎታሽ ታዥ (ማንተን ኧረከዴኧተኸ ትር?) ሪይርዋት ሳአር»
\v 32 ኢየሱስ ጭን ዋኸ ኤያዢሜኬኧይቭርባ።

\v 33 ሚሽትሂዳ ጭን ምር ኣቴፐናኸ በሃረች ቀጥወ ፈኝችታ ቲያአረኧድካ ማአችታ በኧግርኋ ቴፌጠቨችታ አነዳአር እንዳም ኤኤደቸን።
\v 34 ኢየሱስቭ «ገረድኞ እምነታሽ አተነፈናሽበወገሬት ሆይዋ።ተምካታሽ አፉይዋ» ባረ።

\v 35 ኢየሱስ ቲዚረክ ታነ ሰቨ ሁኖም ተአይሁድ አላቃ ተኢያኢሮስቢዲ ሞኦምታ ገረዳኸ በኸረ ሞደች ተዋቴ ኧቭራፈድን ኧመምኽር ሁዳ ታቂጥኩዳ? ቧሪ።

\v 36 . ኢየሱስ ጭን ሰቨሁኖዋ ኧዝሬከዊ ሁድ ቁስ ባረኖምታ ኧአይሁድ ይደሞችኮዳ ቢድ አላፊ«ኧቨር ባሃሬ እንፈኝኸ» ባረን ።
\v 37 ኢየሱስ ተጴጥሮሲ ተያቆብ እመኸ ተያቆብ ኧስም ተዩሐንስ ባሃሬ ኤኛ ሰቨ ይትኼተርኩይ አንሴኧዳ ።
\v 38 አይሁድ ይደሞችኮዳ ቢድ አላፊ ኢያኢሮሲ ቲሰሮታ ኢየሱስ ሰበሁኖዋ ቲያሆሮታይ ቡሼኤኸ 11ቲቬሁታ አሸታ ።

\v 39 ቢድ ከስ ገፓ «እም ኺያዲ ኦክት ኧቭራፈድናአር? ገረድ ኺዳ በኸረች አሞደቻ »ባረኖም።
\v 40 ሰቨሁኖዋ ጭን ዳኮ ።ሰቨ እንእ ተቪድ ታዋአኖዋ ቀጥወ፤ኧገረድ ኺዳይ አቦሚአዶድ እመኸቭ ተሁዳ እማትሜ ተሁዳ ኧዎኦዋ ሰሚይ ተማሪሞኋ አትኼተረታ ገረድ ሂዳ ኧትገተረቸወ ኤኤዲ ገፓ።

\v 41 . ኢየሱስ ኧገረድ ኺዳይ ኧጅ ጠበጠታ «ጣሊታ ተሴገዋ! » ባረና ። «ገረዶ ተሸዋ» ኧዋርትን ።
\v 42 ገረድ ሂዳ ኽመጋ ተረሳችታ ውርውር ኧዋርት ቀነሰች እድሜመሻአስራ ውሬት ኽርቭ ባንደ።
\v 43 ኢየሱስቭ ዋዘንጋ እማት ሰቨ እሃረ ባረታ ቡሼኤኸ አጬፐኖም «ትቨራካአር አዊያ»ባረኖም።

\c 6
\p
\v 1 ተኽም ቀጥወ ኢይሱስ ተረሳታ ኧትራኸወ ገቭ ከተማ ማአ ፥ኧሁድሜ ተማሪ ቴኼተሪ ።
\v 2 በሰንበት ቀረ አይሁድ ቢደሞችኮዳ ቢድ ኢያሱስ አስተሙርት ቀነሰ፥ኖኦራ ሰቨ ይሶኦይ ባንደ ፥«ዋምስ ዋዳ እንዳም ኧኋርት ተኧቲ አቫአን? ቲይርዋ ወግ ይኸርዎዋ ባንደ።
\v 3 ዋዳ አናጢ ኧማሪያም ኧች አኸረዳዌ? ኧያቆብሜይ ኧዮሴፍሜ ኧይሁዳ ኧስምኦን ኧሰም አኸረዳዌ? ኧተማትሞኋ ቲና እማትሜ አናሽ አኸረዳዌ? ቲይርዋ በቂናጨ አንቴኤፖሪዳ ።

\v 4 ኢየሱስቭ «ነቢይ አያሆብጂ በገግሞኋ ገኝይ በገግኋ ደቦይሞኋይ አበርስኋ ግትን ባረኖም።
\v 5 በቀሪ በኤመነዋ ሰቨ ፎር ኧጅኋ አተገዎምታ አተነፈኖም ባንኸሬ ኤኛ ወጋአር ዬቪ አንሴኤዳ ።
\v 6 ተኽም ኢየሱስ በቃያ እንእ ውርውር ቲይር ያትመር ባንደ።

\v 7 . አስራ ውሬቸ ተማሪኋ ኧገግሞኋይ ኧናኖምታ ኧውሬት ኧውሬትሁኖዋ ኬሸኖም ፥ሴጣን ያወኦዋኸ ደረግ አቨኖም ።
\v 8 ኢየሱስ ኧተማሪኋ ዋ ትዛዝ ኤዘዘኖም ኧቨያሁዋ ታአር ኤኛአር ሸረድ ቢኸር ወይ ቀረጢቲ ወይ ፈራክ ቢኸር በአዝጋታሁዋ እጥጭዋ ።
\v 9 በኧግራሁዋ ጫማ ሁሮዋ ባንኸሬ ውሬት ሸሚዝ አትሁሮዋ ።

\v 10 . ኧቫኒሞኋይ ቢድ ትትጎኦታ ትትዎኦዋ ስን በኽሜ ኦኩሹዋ ፤
\v 11 በአት ቃያ አይቴኤፖርኩሚ አይሶኦኩዋ በኸረ ኧኧግራሁዋ ጉተ ጠጥውምታ ሆርዋ።

\v 12 ሁኖም ተኽሜ በዎኦዋጋ ኧሰቨ እንእ ባጢርሁኖዋ በጎይታ ኢፊቲ ያወኦዋኸ ኧሰቨ ኤኤጁም ።
\v 13 ሁኖም ኖኦራ ጅን ኦኦም እመኸ ኤኤመነዋ ሰበ ዘይት ሙሻሾምታ ተቫአሸሁኖዋ አተነፍዮም።

\v 14 . ኢኢየሱስ ሽህው ቲትኼር ኧቫአይ ንጉስ ኼሮድስቭ ኧሁድሜ ዋራይ ሰማ።አታትሁኖዋ «ኧዋኸ ወጋአር ይቴፕካ በመጥመቁ ዮሐንስ ተውንድ ቢትረሳን» ቧርሙ ።
\v 15 ኤኛሞሁኖዋ «ኤሊያስን» ቧርሙ ፤አታትሁኖም «ተድረ ነቢይ አትሁኖተ ይኽሴ ይትቬርዋ ባንደ፥

\v 16-17 ኼሮድስ እም ዘንጋ በሰማጋ «ኢያ አንገድኋ አቴጥሁን ዮሐንስ ተውንድ ተረሳይ» ባረ ።ኼሮድስ ኧኧሰምኋይ ኧፊሊጶስ ሚሽት ኼሮዲያዳን አገፓና ባንደ፥እመኸ ኧኸሬ ዮሐንስ «ኧኧሰማኸ ሚሽት አጉኦት ኤነቨኸዳ »ይኩ ባንደ፣

\v 18 . በዋ ኧቫአ ኼሮድስ ኧዮሐንስ አጤበጠንታ በወኽኔ አቴኤገደን ።
\v 19 በዋ ኧቫኣ ኼሮድያዳቭ ዋዘንጋ በከስሻ ደኧረችታ ኧዮሐንስ ታቲኢትርኵይስ ሴኤች ፥ዘንጋ ጭን አኸረናዳ ።
\v 20 ቢኸርቭ ዮሐንስ ጻዲቂ ጥርር ሰቨ በሁርትኋ ኼሮድስ ፈኝታ ይኢየኩ ባንድ። ኼሮድስ ኧዮሐንስ ዘንጋ ቢሰቫወዳ ግዚየ እንእ ይደርኩ ባንደ ፤ቢኸር ይዝሬኩዳአር ይሰቫኩይ ይሽርኩ ባንደ።

\v 21 ኧቀጥወኋ ወኼ ቀረ ማ። ኼሮድስ ኧቴኤኝወ ቀረ ቲያከብርካ ኧንኡ ሞካንንቲ ኧጋዘኝ ሁኖዋይ በገሊላ ገኝ ይቴሄርታ ኧኑእ ሰቨ እንእ ድግስ አቨና።
\v 22 ኧኼርድስ ገረድ ኧድግስ ቢድ ገፓችታ ደስ አዋች ትጮድካ ንጉስ ኼሮድስቪ ኧድግስ ኧኸናኖዋ ሰቨ በሂዳይ ደስ ሳረኖም ንጉስ ኼሮድስ ኧገረድ«ኧሴኤሽዋአር እንእ ሳአርኝ አንሼ» ባረንና ።

\v 23 ሃአቨታ ኧመግስትመኛ ግት ቢኸር ማኒማአር ብሰኧኝ አቭሼ ባረታ ተኝታ ተሳላ ።
\v 24 ገረድ ሂዳ ዋአችታ አአዶድሻ ኧኼሮዲያዲ ወረችታ ኧንጉስ ሁዳ ምር ንሳአርኩ? ትትር ተሳአረቸና ። አዶድ ሂዳ ያጥምካ« ኧዮሐንስይ አንገድ አቬ ባይ» ባረቸና ።
\v 25 ገረድ ኺዳ ሃአቨች ካች ባረችታ ተዘፐረች ኧንጉስ ሁዳይ ተዠፐረችታ፥ «ያጠምካ ዮሐንሲ አገድ ኧጥታ ዋአካ በሴራ ኧናታ አቬ »ባረቸን።

\v 26 . ንጉስ ሁዳ ብእም ዘንጋ ቡሼኧኸ ቀጨ ባረን ቢኸር በሰቨ ኢፊቲ ቴኜ ኧዝሬኬ ኧኸሬ አቬ ኧቫረቸን ቃር ይኸዳይ አንሴኧዳ ።
\v 27 ባቴ ብእም ኧቫአ ንጉስ ኽመጋ ተውታደር ሁኖዋ አት ሁዳ ኸናታ በውኽኔ ቢድ ኧዮሐንስ አንገድ አቴይጠ ያቫአኸ ኤዘዘን፥ ወታደር ሁዳ ወረታ በወኽኔ ቢድ ኧዮሐንስ አንገት አጠ ።
\v 28 አጪም አንገድ በሴራ አቫአታ ኧገረድ ሂዳ አቨና ገረድ ሂዳ ሃአቨች ኧአዶድሻ አቨቸና ።
\v 29 ኧዮሐንስ ተማሪ እመዳ ተሰሞዋመኸ ሞኦምታ ኒሳ ሁዳ ወስጁም ሜከዊ ።

\v 30 ኢኢየሱሲ ኪሽረኝ ተኬሸነዋኤዲ መኦምታ በኢየሱስ ሚዬ ኼበቡምቸኖምታ ኤፐዊ ሜናይ አስተሟሪማአር እንእ ኤኤጂ ።
\v 31 ኖኦራ ሰቨ ቲዎኦሚይ ቲያርዋ ኧረፐሬ ሸረድ ይዎሮዋይ ግዚየ አነፐረኖይ ሁዳቭ «እማትሜ ሰቨ ኤኖኤዲ ንሆነታ ቀሪመገ ናፉይ»ባረኖም ።
\v 32 ብእም ኧቫአ እማትሜ ሰቨ ኤኖወኤዲ ብእሲየ መርከብ ተሳፎርምታ ወሩሙ ።

\v 33 ሁኖም ቲያርታ ኖኦራ ሰቨ አሽውዮምታ ቴኼተሪዮም ተከተማ እንእ በኧግርሁኖዋ ቴኼተርምታ ቤተርሙ ሶኖም ።
\v 34 ኢየሱስ ትእሲየ መርከብ ተወንደመኸ ኖኦራ ሰበ በስዎሰዌኤዲ ቢያዥኮዋ ዜማቸ ኤነነዋ ጣየኸ ኧረፖርዋይ አወጦጪታ ኖኦራአር ያስተምርኮዋ ባንደ።

\v 35 . በኸም ቀረ በቨሽ ቀጥወ ውሬት ተማሪኋ ኢኢየሱሲ ቴኤኖምታ ዋኸ ቧሪ «ዋኤዲ አታኣ ር ኤውኖ በረሃን ዋአናሞኋ መሸ።
\v 36 በኽም ጀፎረ ሰቨ ባኖዳ ቃያ ሆይተዋ ይወሬዳአር ይሲእዋኸ አስራበትኖም ።»

\v 37 . ሁዳ ጭን ሃአቨታ«ይወሮታአር ኦኦምታ አውዮዋ »ባረኖም ። ሁኖም «ንሆነታ በውሬት በኧር ዲናር ዳቦኧ ንሰየነታ ይወሬታአር ናቭኔየዋ? » ቧሪ
\v 38 ሁዳቭ ምራአካ ዳቦኧ አነነሁዋ ባርኖም? እንዴ ሆርሙታ ኧዡዋ ባረኖም። አሾምታ «አምስት ዳቦኦይ ውሬ ዓሳ አነ»ባሪ።

\v 39 ተኽም ቀጥወ ፣ሰቨ ሁኖዋ በቅርጫ በቅርጭ በሳአር ኤኤዲ ይቸሮዋኸ ኤዘዥዮም ።
\v 40 እመኸ ኧኸረ በቨኧር አምሳ አምሳ ኤፖምታ አወነይም ።
\v 41 ኢየሱስቭ አምስት ዳቦኧይ ዓሳ ኧሳቫይ ኤፐ አሸታ ኧጎይታ ሽኩርት ቧቨ ቀጥው ዳቦኧ ሁዳ ፍኝተዋ ያሰረዋኸ ኧተማሪኋ እቨኖም ፣ ሁኖም አምስቸ ዳቦኦይ ውሬቸ ዓሳ እንሞሁኖዋ አሰኖም።

\v 42 . እንሞሁኖዋ በኖምታ ተነፈኖም ።
\v 43 ተማሪሞኋ ኧተነፈኖዋይ ዳቦኧይ ዓሳ አስራ ውሬት ቀጫት እንዳም ኧተነፈኖዋ አር ነሾም ።
\v 44 ዳቦኧ ኧወኖዋ አምስት ሁም ገማ ባነውተ ።

\v 45 . በኽም ግዚየ ኢየሱስ ሰቨ ሁኖም ቲያሰራብት ታነ ፣ኧተማሪኋ ብደይተዋ ብእሲየ መርከብ ተቤተሳይዳ ሃአጋድ ይዎኦዋኸ ኤዘዘኖም ።
\v 46 በሃቴ ቼኤኖምታ ጠሎት ዬቪይ ኧቆቶይ ዋዐ ።
\v 47 በቨሸ ቀጥወ እንሲየ መርከብ ሁዳ በባር ግት ባንደ፣ ኢየሱስቭ ኦታሞኋ በአፈር ባንደ ።

\v 48 ተማሪዋ ቢኢፍ ኢፍትሁኖዋ ቲረፍስካ ንፋስ ቲትጋሞታ አሸኖምታ በኧዳር በአርቫት ሳአት ኢየሱስ በቫር ፎር ኧሁኖይ ኤፐታ ማአታ ተቪየሁኖይ ያሪ ባንደ ።
\v 49 ዘንጋ ጭን ኢየሱስ በቫር ፎኦር ቲያርካ ቢያዝራኤል መሰረኖምታ ኮ ቧርሙ ።
\v 50 እንሞሁኖዋ ኢኢየሱስ ቢያዢ ደነኧኖ ባንደ። ኢየሱስቭ ኽመጋቭ ኧተማሪኋ አዝራኬኖም ፣«እ ኢየሱስቭ ብእንሲየ መርከብተተማሪሞኋ ቢቸራ ኽመጋቭ ንፋአስ ሁዳ ተሸከቨ ሁኖም ቡሼኤኸ ወግ ኸረዎም ። «ኢንፈኝሁዋ ኢያተንሁ »ባረኖም።

\v 51
\v 52 በሸረድ ሁዳ ኧቴፐ ወግ ዘንጋ አቤሰርዋ ብእመዳ ኺንሁኖዋ ድረተረ ባንደ።

\v 53 ሁኖም ተቫር ሃአጋድ ጌንሴሬጥ በሰነዋጋ እሲየመርከብ በኽሜ አሸኮምታ ወንጁም ።
\v 54 ኽም ተኽም ተወንጅዋኸመኸ ኢኢየሱስ ሰቨ ሁኖዋ ኋሪ።
\v 55 በገኝመሁኖዋ አነውታ ኢማደኝ እንዳም በጨቨር ፌነጉምታ ኢየሱስ አኖዴኤዲ ያዎኦዋ ባንደ ።

\v 56 . ኢየሱስ በወረወ ገኝይ እንእ በቃያይ በተሟኋ አነውታ ኢማደኝ እንዳም አዎምታ በጀፎረ አወነዮም አወነዮም ሁኖዋ ኧውጅርኋ ዊድ ይረጉጅዋይ ይሲኢዋ ባንደ ።ኧውጅርኋ ዊድ ኧረኮጂ ኢማደኝ እንእ ተነፉም።

\c 7
\p
\v 1 ኧፈሪሳ ሰቪ ተኢየሩስአሌም ከተማ ተዎኦዋ ተአታት ተሙሴ ቂጫ ባሪቅ ኢኢየሱሲ ሞኦምታ ኧቪየኋ ሞኦምታ ተስዎሰምታ ኤፖፒይ።

\v 2 ተኢይሱሲ ተማሪ አታትሁኖዋ ኧቂጫኸ ኧጅሁኖዋ ታይታኦዋ ሸረድ ቲወሮታ እሸውዮምታ ።
\v 3 ኧፈሪሳይ ኧአይሁድ ሰቨ እንእ ኧቫሪቅ ቂጫንራኸ ኧጅሁኖዋ አይታኦዋኸ ባአይ ቧንረ ።
\v 4 ኽመኸ ተገያ ቲዠፖርታ ኧጅሁኖዋ ታይታኦዋ ባይወሮታ እመኸ ጥዋይ ትንኪየ ሳኽንሚ አልጋቪ ኤኛአር ኖኦራ ቂጫ ይኢይ ባንዳ ።

\v 5 ኧፈሪሳ ሰቪይ ኧሙሴ ቂጫ ባሪቅ ኢኢየሱስ ኧቭር ተማርያኸ ኧአቦንራ ወገኸ ኧቦርት ቸኦምታ ኧቭራፈድን ባታኧቨ ኧጅሁኖዋ ይወሮታ? ቧርሙ ተሳአሪ ።

\v 6 ኢየሱስቭ ዋኸ ቲይር ዠፐረኖም፥ነቢ ኢሳያስ አሁዋአሪ ኧኸጣ ሁኖዋአር ዋኸ ባረ ኧዝሬከመኸ <ዋ ሰቨ በአፍኋይ ያኸብዴ ፥ ኺንኋ ጭን ቲያ ኑኡያአር አራኧዳናአር ።
\v 7 ኢያ እመኸ ያሆብጅኝ ትምኽርትሁኖዋ በኸረ በሰቨ ኧቴፐ ቂጫነዋ።

\v 8 አሁዋ ኧጎይታ ኢዝዝና ታይኸር ኧሰቨ ቂጫ ቲኢዮዋ ባረኖም ።
\v 9 ሃአቨታ ዋኸ ባረኖም «ቂጫ ቲኢዮዋይ ትትርዋ ኧጎይታ እዝዝ ትቺኢዋ ።
\v 10 ሙሴ አቭ ተአዶድ አኽብድ አትቭ [ባአቦኋ ወይ በአዶድኋ ሙጥጥአር ይዝሬካ ሰቨ በውድ ይትቀጣ ይቭር ።

\v 11 . አሁዋ ጭን ዋኸ ትሩዋ አት ሰቨ አቦኋ ወይ አዶድኋ በኦዮት ሟሪ አቦሞኋይ ኧአዶድሞኋይ ኦነት አኖዳአር እንእ ኧጎይታ አቭሁ ቢይር ።
\v 12 አሁም ኧዋኸ ሰቨ ኧአቦኋ ወይ ኧአዶድኋ ኦኖት አኖዳአር ዬቪይ አቲዊዳ።
\v 13 በሃቴ ኧዘር ብታአፑሪዳ ቂጫ ኧጎይታ ቃር ትሾርዋ ።እመኸ ኧሆርዋአር ኖኦራአር ዘንጋ ቴዋ።

\v 14 . ሃአቭታ ኢየሱስ ሰቨ ሁኖዋ ኧሁዳይ ይዎኦዋኸ ኸናኖምታ ዋኸ ባረኖም ፥ሰማሁሚይ እንማሁዋ በስርዋ ።
\v 15 ሰቨ ያሰንኩዳ አንዳ ተኺን ይዋአካ ሙጥጥ ዘጋን ባሃሬ ተሰቻአጋድ ኧከሲ ይገቫካ ሁዳ አያሰንካ ።
\v 16 « ይሰቫአካ እዝር አነንዳ ኧስቫአ »

\v 17 . ኢየሱስ ተሰቭ ሁኖዋ ቴቫተረታ ቢድ ከስ በገፓ ቀጥወ ተማሪኋ ሟሟካ ሁዳ ተሳአሪ ።
\v 18 ሁዳቭ አሁዋ ዋ ዘንጋ አንገፓናሁዋታ? በሰቭ ከስ በግፓጋ ያሰንካአር አታአር ኤንዳ ።
\v 19 ሸረድ ሁዳ ይገቫአካ ኧኺኒ ታይኸር ታይኸር ኧከስኔ ይገቫ፣ተኽም ተቭሲየ ይዋአ ብሃሬ ። ኢይሱስ እመኸ በዋርትኋ ሽረድ እንእ ንጡኽ ኧኸረኸ ኤኤደ።

\v 20 . ሃአቭ እየሱስ ዋኸ ባረኖም ፥ ተሰቨ ይዎኦታ ሁኖተን ሰቨ ያሰነሁታ ።
\v 21 ተሰቭ ኺን ከስ ይዎኦታ ሙጥጥ ጩሟጨ፥ ቴኤኛ ሰቨ ውጅር ኧድሙት ፥ ኧስርኡት ፥ሰቭ ኡኡ፣
\v 22 ጠርጠር ኧዋ፣ቡሼአር ኧሁ፣ኧቆቅ ፣ ቲኢስቻ ኧቧሉጉት ፥ ቀቨጥ ኧቶእትም መጣቆናኧሁርት ፥ሹው አአፎት ፥ንዎስርነድ እንዳም ዋሁኖተነዋ ።
\v 23 ኧዋኸ ሙጥጥ ዘንጋ እንዳም ተሰቭ ይዎኦምታ ሰቨ ያስንሁዋታኖዋአር።

\v 24 ኢየሱስ ተኽሜ ተረሳታ ጢሮስ «ገኝ ወረ፥በአት ቢድ ገፓ ኽም ቢድ ኧጉኦትኋ እማት ሰቨ ይኺርዌ አንሴኤ. ዳ።
\v 25 ኽም ትኽም እንሲየ ገረድ ጅን ኧጠበጠቫ አት ሚሽትኢኢየሱስ ዋራይ ተሰማችመኸ ኧሁድሜ ማአችታ በኧግርኋ ተፌጠቨች ።
\v 26 ሚሽት ሂዳ በሲሮፊኒቃ ገኝ ኧቴኤንች ኧግርክ ሰቨ ባነቸ ። ሂዳቭ ጅን ሁዳ ተገረድሽ ይዋአኸ ኢኢየሱስ ሳአረቸን ።

\v 27 . ሁዳ ጭን ኧዴጋኋይ ሸረድ ውሽተታ ኧግየ ኧቋሽት ወኼአር አኸረዳ ፥አወተረ ዴንጋኋ ኡኡፎይት ባረና ።
\v 28 ሃአበችታ ሂዳ «ኧውረምን ቢኸር ጊየ ስን ተዴጋ ሁኖዋ ተወተኧ ኝጫጨዋድ ይዎሮዋ ባረችታ ዠፐረቸነ ፥

\v 29 . ኢየሱስቭ«ዋኸ በዋርታሽ ጅን ሁዳ ተገረድሻ ዋአና » ባረና።
\v 30 ሂዳቭ ቢድሻይ በዠፐረች ቀጥወ ገረድሻ በአልጋ ፎር በትገተረቺ ጅን ሁዳ በገፈረናይ ነከቨቸና ።

\v 31 . ተኽም ኢየሱስ ተጢሮስ ገኝ ተረሳታ ፥በሲዶና አጋድ አስር ከተማ ቢዩሪዳ ገኝ ኤፐታ ኧገሊላ ባሪ ማአ ።
\v 32 በኽሜ ሰቨ ሁኖዋ እዝርኋ ኧጥራቆርብናአሪ አነድሞኋ ኧጠበጣአር አት ምስ ኢኢየሱሲ አዎኦም ኧጅኋ ኧዲክተወታ ይጠልይነኸ ሳአሪ ።

\v 33 ኢየሱስቭ ምስ ሁዳ ተሰቨሁኖዋ ባቴረታባዋአን ቀጥወ አጤኋ በቭስ ሁዳ እንዝር ፥ተኽም ኢትፍ ባረ ኧቭስ ሁዳይ አነድ ሙሻሸን ፥
\v 34 ኢየሱስ ኧሳቫይ ኤፐ ጠለየ «ይፍታኽ» ባረን ። እመኸ ኧዋርትቭ «ተከፈድ»ኧዋርትን ።
\v 35 ኽም ተኽም እዝርኋ ተከፈደነ አነድሞኋ ተፈታንታ ጌከረ ኧዞግት ቀነሰ።

\v 36 ኢየሱስ እም ኧተ ዘንጋ ኧአትሞኋ አይኢጅዋኸ ኤዘዘኖም ፥ቢኸር ኧሰቨ ሁኖዋ አይዝሬኩዋኸ ቢይኢዝዝኮም ሁኖዋ ጭን ዘንጋኋ ኧኖኦራ ሰቨ ኤኤጁም ።
\v 37 ኧሰሞዋ ሰበ እንእ ቡሼኤኸ ወግ ኸረዎምታ «ኤፐናአር እንእ ወኼአር ኧከሬ ጣንቆራ ሁኖዋ ይሰኦዋኸ አነድሁኖዋ ኧጠበጠዎዋ ሰቨ ይዝረኩዋኸ ኤፐ ቧርሙ።

\c 8
\p
\v 1 . በኽም ግዚየ ሃአውም ኖራ ሰቨ ተስዎሶም ።ይወሮታ ሸረድ አታአር አፐረኖይ ተማሪኋ ኧሁዳይ ኸናኖምታ ዋኸባረኖም ።
\v 2 ቲያ እማትሜ ሶኦስት ቀረ ኦኦኮሽዋይ  ይዎሮታአር ኤነኖይ ዋሰቨ ያወጡጭኝ
\v 3 ዋሰበ ተጋደኖመኸ እመኸ ቢድሁኖይ ቢንጌኪድኮዋ አታትሁኖዋ ኧዎኦዋ ተኖኢ ኧኸሬ በቬያቂተዋይወድኡዋቴ ባረኖም።
\v 4 ተማርሞኋ ዠፖርሙታ በዋ በቨረሃኤዲ ኧዋሰቨ ያወሬዮታ ሸረድ ተኧቲ ይረሁዊዴ? ባሪ።

\v 5 ሁዳቭ ምራካ ዳቦኧ አነነሁዋ ባረታ ተሳአረኖም ።
\v 6 ሁዳቭ ሰበ ሁኖም በአፈር ይቸኖዋኸ ኤዘዘኖም ሰቫቸ ዳቦኣ በኧጅኋ ጠበጠታ ኧጎይታ ሽኩርት አቨታፍነነቨታ ኧሰቨ ሁኖዋ ያሰሮዋኸ ኧተማሪኋ አቭኖምታ ፥ሁኖም ኧሰቨ ሁኖዋ አሰነኖም።

\v 7 . ቀሪያአር እንሲየ ዓሳ ባነኖተ ኢየሱስቭ እም ዓሳ ኧጎይታ ሽኩርት አቨታ አስሮዋ ባረታ ኤዘዘኖም ።
\v 8 ሰቭ ሁኖዋ ቦኖምታ ኦፎም ተማሪሞኋ ኧተነፈ ሁዳ ሰቫት ቀርጫት ሙራ ተነፈኖም ።
\v 9 ኧዎስኖዋ ሰቨ ሙዝር አርቫት ሁም ያአኽርዋ ባንደ ፥ኢየሱስቭ ኧሰቨ ሁኖዋ ባስራፐተነዋ ቀጥወ ።
\v 10 ኽመጋ ተተማሪሞኋ ብእሲየ መርከብ ገፓታ ዳንማኑታ ገኝ ወረ ።

\v 11 ኧፈርሳ ሰቨ ኢኢየሱሲ ሞኦምታ ውርጀ ቆኖሹም እንዴ ዋኢፍቲመኸ «ወግ ይኸርካ መርኸት እንዴ ተሳቫይ አተሸንረ» ቧሪ ።
\v 12 ኢየሱስ ማአቸታ «ኧዋዘቨር ሰቨ ወግ ኧኸረ ዘንጋ ያዥዋይ ኧቭር ይሲኢዋ? ኢያ ኧውረመኛ እርሁዋ ኧዋ ዘቨር ሰቨ አታአርመርኸት አይዊዳ »ባረ።
\v 13 ተኽም ቼኤኖምታብእሲየ መርከብ ሃአጋድ ዋዓ ።

\v 14 ተማሪኋ ሽረድ ኧጡት ኧትረሳኖይ ተአት ዳቦኧ ኤኛአር ብእሲየም መርከብ ሁዳ አታአር አነፐረኖታ ።
\v 15 ኢየሱስቭ «ተፈሪሳ ሰቨ ተሄሮድስ እርሾ ተጠፖዋ »ባረኖም ።

\v 16 . «ሁዳቭ ዋኸ ኧቫረንረ ሸረድ አንጠበጥነዴ »ቧርምታ ሁኖም ተሁኖምተዝራኮም ።
\v 17 ኢየሱስ ዋ አሳብሁኖዋ ሃረታ ዋኸ ባረኖም «ሸረድ አጠበጥነዳ ባሁምታ ትዝሬኩዋ? ዋአካቭ አትዌስርታ? ዋአካቭ እዝር ታነነሁም ኧቭር አሶኦታ? በኺናሁዋ አቶኦታ? ኺናሁዋ ኧቭር ድረተረ? ፥

\v 18 ኤር ታነነሁዋ ኧቭር አታሽታ? እዝር ታነነሁዋ ኧቭር እሰኦታ አዘጉታዌ?
\v 19 አምስቸ ዳቦኧ ኧአምስት ሁም ሰቨ በፍረነቭሁ ግዚየሰቨ ሁኖዋ ቦኖም ኧተነፈነዋ አር ምራካ ቀጫት ሙራ ኧረሳሁዋኸ አቲኺርታዌ?. ባረኖም ። ሁኖም «አስራ ውሬ ቀጫት ሙራ ነሳነ »ቧሪ ።

\v 20 እመኸ ሰቫቸ ዳቦኧ አአርቫት ሁም ሰቨ በፍረነሁ ግዚየምራካ ቀጫት ሙራ ኧተነፈአር ነሳሁም? ባኖም ። ሁኖም ሰቫት ቀጫት ሙራ ቧርሙ ።
\v 21 ኢየሱስቭ «ዋጣኽርሜ አቤሰርሁዋታ ኧዋርትኒ »ባረኖም ።

\v 22 ኢየሱስ ተተማሪሞኋ ቤተሳይዳ ቃያይ በሰኖዋ ቀጥወ በኽሜ አት ፉርጥ ምስ ኢኢየሱሲ አዎኦይታ ኡሻሽተ ይጠልይነኸ ሳአሪ ።
\v 23 ሁዳቭ ኧፉጥ ምሲ ኧጅ ጠበጠንታ ተወረከ ሰቻጋድ አዋአን ፥በኤርሞኋ እትግ ባረወታ ኧጅኋ አተገወታ «ምር ይትረከቭኸዳአር አነ?»ቲይ ተሳአረን ።

\v 24 ፉርጥ አረፐረ ምስሁዳ ፎረ ኤፐ አሸታ ሰቨ ሁኖዋ አአታክርተኸ ይቁረቁርታአር ይቨስሬ »ባረን ።
\v 25 ኢየስስሱስ ሃአቨታ ኧጅኋ በቭስ ሁዳ በኤርኋ ፎር ቢያወራወ ኽመጋ ተከፈደነታ እንአር ሜኬኧ ባረኦዥት ቀነሰ ።
\v 26 ባቴ «ቃያ እነገፓኸ ብእማት ጀፎረ ስን ኧአትሞኋ እዝሬከኸ »ባረን ።

\v 27 . ኢየሱስ ተተማሪሞኋ ፊሊጵስቄሳሬያ ከተማ አነውታ ቃያ ያርዋይ ተሮሾምታ በቤያ ታኖም ኢየሱስ «ሰቨ ኢያ ማንተን ይቭሬ? » ቲይር ኧተማሪኋ ተሳአረኖም ።
\v 28 ሁኖም <፥አተት ሰቨ ያጠምካ ዮሐንስን አተትሁኖዋ ነቢ ኤሊያስን ኤኛሞሁኖ ነቢተሆርዋ አትሁኖተ ዩሩዋ »ቧሪ ።

\v 29 . አሁኩ ኢያ ምንተን ቱሩዋ? » ባረታ ተሳአረኖም ። ጴጥሮስ «ትቫአኬ ኧዋሪ ክርስትስ አኸተንኸ »ባረታ ዘፐረነ ።
\v 30 ኢየሱስቭ «ኢያአር ኧቫኒሞኋ ቢኸር እኔኤቱዋ »ቲይር አጬፐኖም ።

\v 31 . ኢየሱስ ኧተምሪኋ ዋኸ ቲይር አትሞርት ቀነሰን « ኧሰቨ ኧች ኖኦራ ምካት ኧተኧዎርት አኖኸ በገኝ አስተማሪ በካሃን አላቃቭቭ በሙሴ ቂጫ አስተማሪም ይትቀጥመኸ ዮኦትሪመኸ ተሶኦስት ቀረ ቀጥወ ተውድ ይትረሳመኸ አስተሙርት ቀነሰ ባንደ ።
\v 32 ኢየሱስ እምዘንጋ ኧቪየሞኋ ኤኤደኖም ፥ጴጥሮስ ኢኢየሱስ ሞቀ አዋአንታ «ተእ ዋኸ አትቫር »ባረታ ማአቸወ ።

\v 33 ኢየሱስጭን ተዥፓፐረታ ኧተማሪኋይ ኤፐ ቲያዥ ኧጴጥሮስ አጥራቆረንታ ኧሰኸኒ አኸ ሴጥን » ባረን ።
\v 34 በኽም ቀጥወ ኢየሱስ ሰቨ ሁኖሚ ተማሪሞኋ ኧሁድሜ ኸናኖምታ ዋኸ ባረኖም «ኢያ ይቲኼተሪ ይሲካ እንእ ገግኋ ኧኽዳ መስቀልኋ ኧፈንግታ ኢያ ኧትኸተሬ ።

\v 35 ነፍስኋ ይኢዬይ ይሲካ እንእ ያአይኩ ኢያይ ኧወንጌል ቲይር ነፍስኋ ያአይኩዳ እንእ ይኢየኩ ።
\v 36 ሰቨ በዓለም አነዳ ዱኒያ እንዳም ኧሁዳአር ቢኸር ነፍስኋ ጭን ቢያአይኩ ምር ያወድኩ?
\v 37 ወይ ሰቨ ኧነቭስኋ ምር ሱጉየ አነነ

\v 38 . በጎይታ ባይታሞርዋ በዋ ባጢረተኝ ሰቨ ዘቨር ቢያይ በቃርመኛ ይቅቨጭካ እንእ ኧሰቨ ኧች በአቦሏ ክብር ተቅዱስ መላአይመጋ ቲቫአካ በሁዳይቅቨጭወዴ »ባረኖም ።

\c 9
\p
\v 1 ሀአቨታ ኢየሱስ «ኧውረመኛ እሁዋ በዌኤዲ ተትሸኮውዋ ሰቭ አታትሁኗ ኧጎይታ መንግስት በሩእ ደረግ ሜኤተታ ቲያዡዋ ስን አይዎጁዋ ሰቭ አነውዋ» ባረኖም።
\v 2 ኢየሱስ ያቆብቪ ዮኋንስ አሄተረታ ባአት ዴካ ቆቶ ፎር ኧንአ፤በህም ኤኤዲ አት ሰቭ አነፐረዳ፤በህሜ ኢፍትኋ ተሽጋገረ።
\v 3 ሁጅርሞኋ ማንእየ ሁጅር ኦኡውት ኢሂርወዳ አኧቨ ታድጌፈረን ሁጅር ኢረእካአር ጥርጥር ይር ባነደ።

\v 4 ህም ግዝየ ያቆብቪ ዮሐንስ ኤልያስቪ ሙሴቭ ተኢየሱስ ቲዝረኩታ አሸውዮም።
\v 5 ጴጥሮስ ኧኢየሱስ ኢና ዋይ ብነቭነ ኢፈዘንረ ፤አት ዳስ አኸ አት ዳስ ኧውሴ ፣አት ዳስ አኸ ኧውሴ፣አት ዳስ ኤኤልያስ ነረሽነታ ብእመኸ ንበነ» ባረን።
\v 6 እም ባሸዊ ዘንጋ ፈኘውም ባነደ፤ህም ግዝየ ጴጥሮስ ኢዝሬካአር ባይሂርካ።

\v 7 . ተህም ቀጥወ ዳቨራ ማአ ኤፈኖም ፤ተዳቨራቭ ሁዳ ከስ «ዋዳ ኧረድኩዳ ትከነኛ፤ሁዳ ዩሁዋታአር ስውኤ፤»ይካ ቃር ተጎይታይ ማአ።
\v 8 ህመጋ አዦርም ቢያዡዋ ኢየሱስ ባሀሬ በሄኤዲ አት ሰቭ አነፐረዳ።

\v 9 ተቆቶ ሁዳ ፎር በወጁዋጋ፥ኢየሱስ ኧያቆብቪ ኧዮሐንስ ኧሰቭ ትከ ተውንድ ቲትረንሳ ስን ዋ አሸዊ ዘንጋ አአት ሰቭ አዪኤጁዋኸ አትጬፐንፕም።
\v 10 ሁኖም ኤኤደኖዋ ሁዳ በሂንሁኗ አዎኖዪ፤ዘንጋ ተውንድ ኧተሸት ኧዋርት፣ ምር ኧዋርትን ቧርም ሁኖም ተሁኖም ኢድዝራኩዋ ባነደ።

\v 11 . ተህም ቀጥወ ፀሐፍት ዩሪዮታ ሰቭ«ብደርተ ኢቫአካ ኤልያስን ኧቭር ዩሩዋ?»ቧርም ተሳአሪ።
\v 12 ኢየሱስ ጭን «ኤልያስሽ ብደይተ ሜኤተታ እንእአአር ኤኤፍት ኧረፐረመኸ ኢአኴ፤ባቴ ኧሰቭ ትከሁ ኢቴኤፐርመኸዪ ኢትቀንጥመኸ ኧጣᎉ ሁድሁ ምር ኢቨስርሁዋ?
\v 13 ዘንጋ ጭን ናኤድሁዋ ፣ኤልያስሽ ማአ ባነደ፤ሁኗ ጭን ኧሁዳአር ቦተርም ኧጥᎉመኸ ኧሳረኖኸ ኤፖዊ»ባረኖም።

\v 14 ሼጣን ኧጠበጠን ኧች አፍያ ኸረ ኢየሱስቪ ውርኤቸ ተማሪ ተዦፖርም ቢዎኦዋ ቤኤድ ኧተነፉዋ ኧኢየሱሲ ተማሪ ኖኦራ ሰቭ ኸፐቨኖምታጸሐፍት ቲዩሪዮታ ሰቭ ሽር ቲቴኤጅታ ነኮውዮም።
\v 15 በሄኤድ ኧረፖሩዋ ሰቭ እንእ ኢየሱስ ቢያዢ ወግ ኸረዎምታ ወጌም ዩሪ ኧሁዳይ ኤፖም ተራዎኡም ዎርም።
\v 16 ኢየሱስተማሪኋ ተፈሪሳ ሰቭ ት ቴኤጂዳ ሽር ኧቭርአፈድናአር? » ባረ ተሳአረኖም።

\v 17 ተህም ቀጥወ አት ምስ ተሰቭ ግት «አስተማሪዮ ሼጣን ጠበጠንታ ዲዳ ኧኸረ ትከኛ አሄ አቭአሁን አሄ አቫአሁን» ባረን።
\v 18 ቲትረሳወዳ እንእ ግዝየ ኢቃሽኩ፣ኢምባ ቧፍ ኢንአ፣ሽንኋ ቃጭቃጭ ኢንአ ፣ምስየሞኋ እንእ ኢደርእ፤እም ሴጣን ያዎኦኔ ኧተማሪያኸ ሳአርሁኖም ባነደ፤ሁኗ ጭን ያዎኦኔ አኸረኖታ።
\v 19 ኢየሱስ« ዋ ታታአውሩዋ ተዋ ዘቨር ሰቭ መቸ ስን ታሁዋ ኧረቭርኴ? መቸቭ ስን ኧፈርህነሁዋቴ? እንዴ ኧች ሁዳ ዋይ ኦኤ »ባረኖም።

\v 20 ሁኖም ኧሁዳይ አቴኤነዊ፤ሴጣንቭ ሁዳ ኧኢየሱስ አሸንታ ፣ሸረር ኤፐን ፤ኧችቭ ሁዳ ባአፈር ወተኧታ እሜዪ ህሜ ቲክቨንር ታንቃኋ ኢምባ ቧፍ ኦንኧት ቀነሰ።
\v 21 ኢየሱስ ኧኧች ሁዳይ አባ « ተጠበጠ ምርአህር ቀረ ኸረ?» ባረ ተሳአረን።
\v 22 አቭ ሁዳ «ኖኦራ ግዝየ የኧትርኲ ኢሲእታ ብኧሳድቪ ብእሀቭ ፎር ›ኢቃሽኩ፤እንዴ በኸረነኸ ተቨጠጠንረ፤ኧግዘንረቭ»ባረን።

\v 23 ኢየሱስቭ «በኸረነኸ ባኸዪ? ያአቭርካ ሰቭ እንእአአር ኢኸነ»ባረን።
\v 24 ኧትከቭ ሁዳይ አባ «ኧኧቨርሴ ፥ዋአካ ስን አናአመርዂ ፍረህኒ! »ባረ ኮ ባረ።
\v 25 ኢየሱስ ሰቭ እንእ ተፍረከረ ቲትራውእ ኧሁዳይ ቲቫአካ አሸታ ፥አኸ ዲዳቪ ኧድሮእኸቭ መንፈስ«ተዳ ዋአ! ተዣቨይተኸቭ እማአኸ»ባረ ኧሴጣን ሁዳ አኸናወ።

\v 26 . ሼጣንቭ ሁዳ ውው ቲይር ባአፈር አተገ ባክቨነረን ቀጥወ ተኧች ሁዳ ዋአ፤ በሄኤ ኧረፖሩዋ ሰቭ ኧዎዳአር ቲቭስርኮዋ ስን ኧሪሳኸ ኸረ።
\v 27 ኢየሱስ ጭን ኧኧች ሁዳኧጅኋ ጠበጠንታስስስስ

\v 28 . ኢየሱስ ቢድ በገፓጋ ፥ዋ ሴጣን ኢና ኦኦት ኤኤመንረ ሁዳ ኧቭርአፈድ?»ቧርም ተሳአሪ።
\v 29 ኧዋኸ አይነት ሴጣን ኢዋአካ ሁዳ እማት በጦም በጠሎትን፤ባረኖም።

\v 30 ተህም ቀጥወ ተሄኤዲ ተረሾምታ፣ገሊላ ኤፖም ዎርም፤ኢየሱስቭአነውታ ኤኤዲ አትዎኋ ኢሂሪ አንሴኤዳ።
\v 31 ኢየሱስ ኧተማሪኋ «ኧሰቭ ትከ ኧሰቭ ኤኤቶ ያአይፑሪዴ፤ህም ኧተኤፖሩዋ ሰቭ ዮኦትሪዴ፤ዘንጋ ጭን ተሶኦስት ቀረ ቀጥወ ተውንድ ኢትረሳኴ» ባረ ያትመርኮዋ ባነደ።
\v 32 ተማሪኋ ጭን ኢየሱስ አትመረኖዋ ትምርት አምᎆሰሩዋ ባነደ፤አይትሳአሪመኸፈኘዊ። ትንእዎኋ ኢረእካ ማንተ?

\v 33 . ተህም ቀጥወ ቅፍርናሆም ሞኦም፤ ቢድቭ ቦጎፖዋ ቀጥወ ኢየሱስ ኧተማሪኋ «በቨያ ትናነ ታነነ ሽር ትቴኤጁዋ ኧረፐረ ኧቭርአፈዳአር ባነደ?»ባረ ተሳአረኖም።
\v 34 ሁኗ ጭን በቨያ ኢቴኤጂ ኧረፐረ ሽርትንእዎኋ ማን ኢረእ ይካአር ኧረፐሬ ፈኘዊታ ቁስ ቧርም።
\v 35 ኢየሱስቭ ተቸ ቀጥወ አስረ ውርኤቸ ተማሪኋ ኸናኖምታ «ኢኢፍቲ ኢኸሪ ኢሲኢካ ሰቭ እንእዎኋ ኢኢመዪ እንሞኋይ ሜነኘ ኧህር» ባረኖም።

\v 36 . ቀሪ ኧች ኢኢፍትሁኗይ አቫአ አትሸከቨ፤ኧችቭ ሁዳ ነሳ ኤኤፈንታ ፥
\v 37 ተዋኸ ትከ አት ሁዳ ኢያ ባረ ኢቴኤፐርካ ሰቭ እንእ ኢያ ቴኤፐረ ኧዋርትን፤ኢያቭ ኢቴኤፐርካ ሰቭ ኢቴኤፐርካ እማት ኢያ ታይኸር ኧኬሼይቭ አባኛ ጎይታ ተህም ኢቴኤፐር» ባረኖም። አይድጋፋንረ ሰቭ እብእ ቲናትን

\v 38 ዮሐንስ ኧኢየሱስ «አስተማሪዮ አት ምስ በሹዋኸ ሼጣን ቲይዋአካ አሸነዪታ ቲና እማቲ አያራአር ኧኸሬ ኸንአነዪ» ባረን።
\v 39 ኢየሱስ ጭን አትሁርኤ፥ አት ሰቭ በሹውኛ ወግ ሜና ኧኝኧተታ ቢያ ፎር ሙጥጣአር ኢዝሬኲ አይኸነዳ፤

\v 40 . አይዳጋፋንረ ሰቭ እንእ ቲናትን።
\v 41 ኧውረመኛ እሁዋ ኧክርስቶሳአር በሁርታሁ፣ኢያ ባረ አት ብርጭቆ እሀገታ አቨናሁዋ ሰቭ እንእ በጎይታ ኢፍቲ ኦሄ ሜና ዋጋ አይቨህርካ» ባረኖም።

\v 42 . ቢያ ቲይአውርታ ሰቭ እንስያአር ኤፐ ቲያዥኮታ ሁኗ ባአት ሁዳ እንቁርፊት ኢኸርካ ሰቭ ኑኡየ ኧወፍጨ እቭር በቨመርኋ ኧግጅቶኰታ በቫር ቢሩኲ ኢፈዙክ።
\v 43 ሁመኸ ኧኸሬ ኧጃኸ ባድቫፐረናኸ ኧጥ ቃሽኩ፤ውርኤት ኧጅ ንቨይተነኸታ ባአዛብ እሳድ ብትረንድድካ ሁዳ ኧጀ ቁንጭር ሂንተኸታ አያ ሂንተኸ ብትረቭር ኢፈዝኸ።
\v 44 አአዛብ እሳድ ፍርፍርኋ አይዎድካናአር።

\v 45 ኧግራኽ ባድቫፐረናኸ ኧጥ ቃሽኩ፤ውርኤት ኧጌ ንቨይተነኸታ ባአዛብ እሳድ ብትረድድካ ሁዳ ጅረ ሂንተኸታ አያ ሂንተኸ ብትረቭር ኢፈዝኸ።
\v 46 አአዘ እሳድ ፍርፍርኋ አይዎድካነአር፤እሳድሞኋ አየኧፋካናአር።

\v 47 ኤራኸ ባድቫፐረናኸ ፍጨርቅ አአ ቃሽኩ፤ውርኤት ኤር ንቨይተነኽታ ባአዛብ እሳድ ብትረድድካ ሁዳ፥እማት ኤር ንቨይተነኸታ አያ ሂተኸ ብትረቭር ኢፈዝኸ።
\v 48 አአዛብ እሳድ ፍርፍርኋ አይዎድካ፤እሳድሞኋ አየኧፋካ ።

\v 49 ሰቭ እንእ ብእሳድ ኢቨጥርኴ።
\v 50 በኧድ ወሄናአር ፤ዘንጋ ጭን በኧድ ባኔኤቨ በቭር ያቲኢዊ? እመኸ ኧኸሬ ባሁዋ ኧቨኧድ ቸቭና ኧበርዎሁዋ፤አሁም ታሁም አድጋኦዋ

\c 10
\p
\v 1 ኢየሱስ ተሀይ ተረሳታ ኧይሁዳ ገኘቪ ኧዮርዳኖስቭ እሀ ሀጋድ አነውታ ቃያ ወረ።
\v 2 ሰቭ ሀአቨ ቢኢፍትኅይ ቁጥቁጥ ባረ ፤ሁድ ኧኧኛ ግዝየመኸ አትሞርት ቀነሰ።2. አታት ኧፈሪሳ ሰቭ ኢፎትሪ ኧሁዳይ ሞኦምታ ፣«ምስ ምሽትኋ ኧግፍሪ? ዌ አይግፍር?»ቧርም ተሳአሪ።
\v 3 ሁድ ዠፐረታ «ሙሴ ምር ባረ ኤዘዘናሁም?» ባረኖም።
\v 4 ሁኖም፣«ሙሴሽ ፊርማሻ ኤንተናታ ኢገፍርካይ ፈቀደ»ቧሪ።

\v 5 . ኢየሱስቭ ዋ ቂጫ ኧጣፈነሁዋ ሁዳ ቱኡነድ አሸ ታነዳን ባረኖም።
\v 6 ዘንጋ ጭን ፍጥረት ቢቆርሽኰዳ፥ ጎይታ ምስ ተቭሽት ኤፐ ፈጠረኖም።

\v 7 . እመኸ ኧኸሬ ሰቭ አባሞሀዪ አዶድሞኋ ኢችእታ ተቭሽትኋ እማቲ ኢረቭር፤
\v 8 ውርኤቸሞሁኗ እማት ኢሆሩዋ፤ተህም ቀጥወ እማትኖዋ ባሀሬ ውርኤት አሆርታ።
\v 9 እመኸ ኧኸሬ ጎይታ እማት ኤፐን ሰቭ አትዎኋ አይቫይትርኩ።»

\v 10 ተማሪኋ ቢድ በጎፖዋጋ ዋ ዘንጋ ኧኢየሱስ ሀአውም ተሳአሪ።
\v 11 ኢየሱስቭ «ምሽትኋ ገፈረታ ኧኛ ምሽት ያግአካ ሰቭ እንእ ኧረከቨኸ ሁጅር ደመደ ባጢር ኢንአ።
\v 12 ተቭስመሻ ተጊያፈረችታ በኧኛ ምስ ኧገፓች ምሽት በቭስሻ ፎር ኧረከቨቸኸ ሁጅር ደመደችታ ባጢር ቲንአ» ባረኖም።ኢየሱስ ኧቭስካድየ ዴንጋ ዳረኖም

\v 13 . ኢየሱስ ኢውሻኮኸ ሰቭ ብስካድየ ዴንጋ ኧሁዳይ አዎኦም፤ተማሪኋ ጭን ነፎጊዮም።
\v 14 ኢየሱስ ዋዳ ቢያዥ ማአቸታ ዋኸ ባረኖም« ብስካድየ ዴንጋ ኢያይ ኦኦዋ አትሁርኤዮዋ ፤መንግስተ ሳቫይ ኧዋሁኗኸ ሰቭናአር፤

\v 15 . ኧውረመኛ እሁዋ ኧጎይታ መንግስት ኧትከኸ ሂንተ አይቴኤፐርኩ ሰቭ እንእ አይጋአወዳ ።»
\v 16 ዴንጋቭ ሁኖዋ ነሳ ኤኤፈኖም፤ኧጅሞኋ በፎርሁኗ አተገታ ዳረኖም። ደንገኘ አዛድ ኧች

\v 17 ተህም ኤኤዲ ተረሳታ ኧሆርት ቲቀርስካ አት ምስ ኧሁዳይ ቲትራውእ ማአ ቢኢፍትኋይ በጉርቨድኋ ወካታ፥«ሚራ አስተማሪዮ ኧዘላለም አያ ሂንተሁ ኧረቭኸ ምር ኦንኧት አነቪ? »ባረን።
\v 18 ኢየሱስ «ኧቭር ሚራ ትሬ? እማት ጎይታ ባሀሬ ሚራ ኤነዳ» ባረ ዠፐረነ፤
\v 19 ኧጎይታ እዝዝ ትሂር፤ሁድ ሰቭ አትእትር፣ኧረከኸኸ ሁጅር አድምድ፣አትስርእ፣ አአቫይ ዛር አታአውድ፣ አትቄቅ፣ አቭ ታአዶዳኸ አህብድ።»

\v 20 . ምስ ሁዳ «አስተማሪዮ ዋሁኗ እንእ ተዴግነድኛ ቀነስሁታ እተሁ» ባረን።
\v 21 ኢየሱስቭ ኧቭስ ሁዳ አሸንታ ነመደን፤በዋቴ አታአር ኢቀቭርቨኸ፤ሆርታ አነነኸዳ ንቭረድ እንእ አሰየታ ኧዚጋ አቭ፤በሳቫይ ኑእ ዱንያ ትከቭሴ፤ተህም ቀጥወ ተኸተሬ» ባረን።
\v 22 ምስ ሁዳ ዋዳ ቢሰቭአ ቡሼኤኸ ተቨጠጠ፤ ኖኦራ ዱኒያ ኧረፐረኒ ኧኸሬ ሳው ባረ ቢድኋይ ወረ።

\v 23 ኢየሱስ አኖዳ ኤኤዲ አዦረ ቲያዥ ኧተማሪኋ፣«ኧደንገኘ ሰቭ ኧጎይታ መንግስቲ ኧጉኧት ኧተኸ ያጀግርካናአር?» ባረኖም።
\v 24 ተማሪሞኋ ኢየሱስ በዝሬከን ዘጋ ወግ ኸረዎም፤ሁዳ ጭን ሀአቨታ «ዴንጎ መንግስተ ሳሳይ ኧጉኧት ኖኦራአር ያጀግርካናአር» ባረኖም ።
\v 25 ደንገነ መንግስተ ሳቫይ ቢጋአካ ሁዳ ጋሜራ ኧቨርፍ ጉድድ ቢዩሪዳ ኤኤዲ ቢዋአ ኢፈዝ።»

\v 26 ተማሪሞኋ ቲኢፍት ኢረእ ወግ ኸረዎምታ፣ «እኰኸ በኸረጋ ባቴ ማን ኢተርፍኴ? ተዌዌርም።
\v 27 ኢየሱስቭ ኧሁኖዋይ ኤፐ አሸታ፣ «ኧሰቭ አይኸነዳናአር ፣በጎይታይ ጭን ዋኸ አኸረንዳ፤ኧጎይታ እንእአአር ኢኸነ» ባረኖም።
\v 28 ጴጥሮስ «ኡክ ኢና እንእአአር ቸኧነ ተሄተኔከ» ባረን።

\v 29 ኢየሱስብ ዠፐረታ፣ «ኧውረመንንንና እሁዋ ፤ኢያቪ ኧወጌልቭ ባረታ ፥ቢድኋ፣ዌ ኧሰማትኋ፣ ዌ ኧተማትኋ፣ ዌ አዶድኋ ዌ አባኋ፣ ዌ ዴንጋኋ፣ ዌ አኡጃኋ ኧቸኧ ሰቭ እንእ፣
\v 30 ዋአካ በዋ ዘቨር ቲኢሰድጂቭ ቢድ፣ኧሰማት፣ኧተማት፣አዶድ ዴንጋቪ ቹጃቭ በቨኧር ኧጅ ኢቴኤፐርኴ፤ቢቫአካቭ ዓለም ዘላለም አያ ሂንተ ኢረቭ»ባረ።
\v 31 ዘንጋ ጭን ኖኦራ ኢኢፍቲ ኧረፖሩዋ ሁኖዋ ኢኢ ኢሆርቴ፤ኖኦራቭ ኢኢ ኧረፖሩዋ ሁኖዋ ኢኢፍቲ ኢሆርቴ።ኢየሱስ ተዣቨይተ ኢቫአኸ በተረ ኤኤደ

\v 32 ኢየሩሳሌም ቲያሩዋታ በቨያ ታኖም፣ ኢየሱስ ኢኢፍትሁኖዋይ ያር ባነደ፤ተማሪሞኋ ዋ ዘንጋ ወግ ኸረዎም ባነደ፤ቲኢሞሁኖዋይ ኢትሄተሪዮዋ ኧፖሩዋ ሰቭ ፈኞም ባነደ፤ሀአቨ ኢየሱስ አስረ ውርኤቸ ተማሪኋ ተኧኛ ሰቭ ባይተረኖምታ ኢሰርአወዳ ዘንጋ ኤኤደኖም።
\v 33-34 «ኢይየሩሳሌም ናነዴ ኧሰቭ ትከ ኧካህን አላቃቪ ኧውሴ ቂጫ አስተማሪቭ ኤኤቶ ያኤቱሪዴ፤ሁኖም ኧውንድ ፍርድ ኢፎርጅኰዴ፤አአረማዊ ሰቭ ኤኤቶ ያኤቱሪዴ ።. ኧሁድ ባጭ ባጭ ኢንኤዴ፣ ኢምባቄሁኖዋ ኢትፍ ዩኰዴ፣ ኢገርᎉዴቭ ተህም ቀጥወ ዮኦትሪዴ፤ሁዳ ጭን ተሶኦስት ቀረ ቀጥወ ተውንድ ኢትረንሳኴ » ባረኖም።

\v 35 ተህም ቀጥወ ኧዘብዴዮሲ ዴንጋ ያቆብቪ ዮሐንስ ኧሁዳይ ቴኤኖምታ «አስተማሪዮ ንሰኧኔከዳአር አክያ ትረንሬ ንሲኢነ »ቧሪ።
\v 36 ሁድ «ምር ኢንአነሁዋይ ትሱኡዋ?» ባረኖም።
\v 37 ሁኖም «በቭግስታኸ ክብር አትንራ በቀናኸ አትንራ በጉራኸ ፍቅድንረ» ቧሪ።

\v 38 ኢየሱስቭ «ትሶኦርታአር አትሂርታ፤ኢያ ኧሰጭኩዳ ኧቨከራ ጥዋ ትሰጩዋይ ኢኸነሁዋቴዪ? ኢያቭ ኧጠመኩዳ ኧመከራ ጥምቀት ትጠመቁዋይ ኢኸነሁዋቴዪ? » ባረኖም።
\v 39 ሁኖም «እከ ኢህንረሴ» ቧሪ።ኢየሱስቭ «አክያ ኢያ ኢያ ኧሰጭኩዳ ኧቨከራ ጥዋ ትስጠዉዋሴ፤ኢያቭ ኧጠመኩዳ ጥምቀት ትጠሞቁዋሴ፤
\v 40 ቢኸርቭ በጉራመኛዪ በቀነመኛ ኧቸሮት ኧቴቨኖዋ ሰቭናአር ባሀሬ ኢያ ኢካአር አኸረዳ» ባረኖም።ኧኢየሱሲ ተማሪ አስርሁኖዋ ዋዳ ቢሶኦዋ በያቆብቪ በዮሐንስ ኧዋአችት ቆነሺ ።

\v 41
\v 42 ኢየሱስቭ እማቲ ደመደኖምታ፥ ባአረማዊዊ ዳኘ ቧርም ዩሪዮታ ሁኖዋ ኢጎዤዮኸ ዳኘሞሁኖዋ ፣ዳኝነድሞሁኖዋ በሁኖዋ ፎር ያቲሹዋኸ ትሂሩዋ።

\v 43 ባሁዋይ ጭን ዋኸ አኽረንዳ፤ታሁዋ ግት ኑእ ኢኸሪ ኢሲኢካ ሰቭ እንእ አገልጋይ ኧህር ፤
\v 44 ኢኢፍቲ ኢኸሪ ኢሲእካ ሰቭእንእ እንእዎኋይ ባሬያ ኧህር፤
\v 45 እሸቭ ትከ ያጌኪርሜዪ ባጢረተኘ ሰቭ ያተርፊ ቲይር ሉሁሞኋ ያኤፕሪ ማአ ባሀሬ ፣ኧኛ ሰቭ ኧሁዳ ያጌኪርኲ አማአዳ » ባረኖም። ኢየሱስ ፉርጥ ኧረፐረ በርጠሌሜዮስ ዩሪዳ ምስ አፍያ ኤፐ

\v 46 ተህም ቀጥወ ኢየሱስ ተተማሪሞሀቪ ተሮኦራቭ ሰቭ ተኢያሪኮ ከተማ ቲዎኦታ ኤርኋ ኧፈንጠ ኧጢሞቲዮሲ ኧች በርጤሌሚዮስ በቨያ ሞሬ ቸና ኢሰኧር ባነደ።
\v 47 ሁድ ሀሜያ ያርካ ሁዳ ኧናዝሬት ኢየሱስ ኧኸረኸ ሰምአታ ኧዳዊት ትከ ኢየሱሶ ማሬ » ባይቶ ኮ ኧዋርት ቀ።
\v 48 በህም ኤኤዲ ኧስ ቧርም አአጥራቆሪ ፤ ሁዳ ጭን«ቲኢፍት ኢረእ ኧዳዊት ትኮ ማሬ ባረ አኸና።

\v 49 . ኢየሱስ ተሸከቨታ «ሁሬ » ባረኖም።ሁኖም ኧፉርጥ ሁዳ «ተፋደር ተሳኢየሱስ ኢኸራኸ »ቧሪ።
\v 50 ሁድ ሁጅርኋ ቃሸታ ክክክ ባረ ተረሳታ ኧኢየሱሲ ማአ።

\v 51 . ኢየሱስቭ« ምር ኢንአነኼ ትሲእ?»ባረን።ፉርጥቭ ምስ ሁዳ«አስተማሪዮ አዢ ኧሲእ»ባረን።
\v 52 ኢየሱስ« ሆር እምነታኸ አተነፈናኸ » ባረን።መህጋቭ ኤኋር ተከፈደ፤ ሁድ ኢየሱስ ተሄተረታ ተሁኖም ወረ።

\c 11
\p
\v 1 ኢየሱስ ተተማሪሞኋ ኧኢተሩሳሌም ከተማይ በደብረዘይት ቆቶ ሚዬ አነውታ ቤተ ፋጌሜዪ ቢታኔያ በቴኤነውዋጋ፣ኢየሱስ ተተማሪኋ ውርኤትሁኖዋ ዋኸ ባረ ኬሸኖም፥
\v 2 ፣«ኢኢፍታሁዋይ አነዳ ቃያ ሆርምታ ሰቭ አንቸናወ እእቫር ገንገር ባአኮጂ ኤኤዲ ትረሁውቴ፤ሁድ ፉጆም ዋይ ኦኤ፤
\v 3 ፤ማንኦሞኋ ምር ቲንኦዋ? በቫረናሁዋ <ጌታ ኢየሱስ ሴኤን ፤ኡኳአካ ኢዣቭነሁዋሴ >ቧርም አውጂ»ባረ ኬሸኖም ።

\v 4 . ሁኖም ዎርምታ ባአት ቢድ ወረጀ በቨያ ሞሬ አአኮጂ እእቫር ገንገር ኖኮምታ ፎቾዪ።
\v 5 በህም ኤኤዲ ኧሮፖሩዋ አታት ሰቭ ዋ እእቫር ገንገር ኧቭር ትፎጄ ቧሪዮም ።
\v 6 ኢኢየሱስሜ ተማሪ ኢየሱስ ኧቫረኖዋ ሁዳ ኧሰቭ ሁኖዋ ቤኤጂዮጋ ቾኦውዮም ።

\v 7 ኧኢየሱሲ ተማሪ ብእቫር ገንገር ሁዳ በጊሸኋ ሁጅርሁኖዋ አተኰታ ኢየሱስ ኧንአ ቸናወ።
\v 8 ኖኦራ ሰቭ ሁጅርሁኖዋ በቨያኋ ዝራኮም አተጉነ፤ኧኛሞሁኖዋ እዝር አኖዳ ኤኧ አጤ ሶፖርም ቢያርወዳ መያ ኢቋሽዋ ባነደ።
\v 9 ኢኢፍትሞኋይ ያርትቪ ኢኢሞኋይ ኢትሄተሪቭ ሰቭ ቃርሁኖዋ ነሾምታ « ሆሳእና በጎይታ ሹው ኢቫአካ ሁዳ ኧዳረዳናአር»ዩሩዋ ባነደ።
\v 10 ኢቫአካ አአባንራይ ኧዳዊት መንግስት ኧዳረዳናአር! በሳብይ ኣጎይታ ሽኩር ኧህር!»።

\v 11 ኢየሱስቭ ኢየሩሳሌም ሰንአ፤ተህም ቀጥወ ቤተመቅደስ ገፓ፤ብንእ አጋድ አነዳአር እንእ አሸ ፤አፈርቭ ኧቨሼ ኧኸሬ ተአስረውርኤቸ ተማሪሞኋ እማቲ ቢታኒያ አጋድ ዋአ።
\v 12 በበረጋኋ ተቪታኒያ ቲዎኦታ ኢየሱስ ጋደን፤13

\v 13 ሁድእንዝር አኖዳ ኧቨለስ ኤኧ በሮኢ አሸታ ፣ምላልባት ቡስር በረፐረወ ባረታ ኧሁዳይ ቴኤነቨ፤ዘንጋ ጭን በለስ ያፎይወዳ ጎርኋ አነፐሬ ኧኸሬ ቡስር አታአር አነከዎዋዳ።
\v 14 ተህም ቀጥወ ኢየሱስስ ኤኣ ሁዳ፣«ቶኦኳ ቆነሺታ አትዎኋ ባኸ ቡስር ንሄተ አይቭርአ»ባረን ባረ ቲዝሬካ ተማሪኋ ሶምኦም።

\v 15 . ኢየሱስቪ ተማሪሞኋ ኢየሩሳሌም በሰንኦዋጋ ኢየሱስ ቤተመቅደስ ገፓ፤በህሜ በቬተመቅደስ ከስ ያስሮታቪ ኢስሮታቭ ሰቭ አትሳድልተ ኦኦት ቀነሰ፤ብር ኢዌዝርታ ሰቪ ጠረጴዛቪ ቡናርቭ ያስሮታ ሰቭ ኢቸኖኰዳ ወበርቭ ሀይ ኤፐ ኤረከ ።
\v 16 አትዎኋ ግቭር ፈኒግተታ ኧቬተ መቅደስ ኦኡር ከሲ አያረኸ ኤፐ።

\v 17 . እመኸ ባረ አትመረኖም፥« ቢድኛ ኧሰቭ እንእ ኧጠሎት ቢድ ዩሪ» ቧርም አንጣᎉዳ? አሁዋ ጭን ኧፈንገያ ወረ ኤፐዂ!» ባረኖም።
\v 18 ኧካህን አላቃቪ ኧውሴ ቂጫ አስተማሪቭ ዋዳ ቢሶኦዋ ኧተኸ ኧንኧቶ ዮኦትሪኸ ቤ ኧሶኡት ቆነሹም፤ ሰቭ እንእ ባትመረን ትምርት ወግ ኧኸረወኸ አሾምታ ፈኘዊ።
\v 19 በቨሸመጋ ኢየሱስቪ ተማሪሞኋ ተከተማ ዎኦምታ ኧኛይ ዎርም ። ኢየሱስ ኧሰተቨን ኧቨለስ ኤኧ ደነኧ

\v 20 በቨረጋኋ እረርኧ ኢየሱስቪ ተማሪሞኋ መያ ቲያርታ ፣በለስ ሁዳ ተኧስርሞኋ በደነኤ አሸዊ ።
\v 21 ጴጥሮስ ዘጋኋ ተዘከደንታ ኧኢየሱስ «አስተማሪዮ ሁክ ኧሰተኸን ኧቨለስ ኤኧ ደነኧ »ባረን።

\v 22-23 ሀአቨታ ኢየሱስ «በጎይታ ኧዎሩዋ፤ኧውረመኛ ሁዋ ማንኢሞኋ ዋ ቆቶ ፣ተረኧርታ በቫር ከስ ግቭአ ባይተንታ እመዳቭ ታይጥራጠር በሂኋ ቢያአቭር ኧቫረንመኸ ኢኸነ።

\v 24 እመኸ ኧኸሬ ትሶኦሪዳ ሁዳ እንእ ኧቴኤፐርሁዋአረኸ ኧኝኧተሁዋ ባአመርሁዋ አአመርሁዋመኸ ኢህነሁዋሴ።
\v 25 ህመኸ በሳቫይ አነዳ አባሁዋ ባጢራሁዋ አፉ ዩሁዋኸ አሁም ኧጠሎት ኧጎይታ ኢፍቲ ትቴኤነውታ በሰቭ አወናዂ ቆንጦ እንእ አፉ ቧርዋ።
\v 26 አፉ ብምብሁዋ ጭን አሁም ኧሳቫይ አባሁዋ አፉ አይሁዋታ ።» በኢየሱሲ ዳኣኝነድ ኧትረሳ መትሳአየ

\v 27-28 ኢየሱስቪ ተማሪሞኋ ሀአውም ኢየሩሳሌም ሞኦም፤ኢየሱስ በቬተመቅደስ ኦኡር ከሲ ውርውር ቲይካ፣ ኧካህን አላቃ፣ ኧውሴ ቂጫ አስተማሪቪ ኧገኘቭ ባሪቅ ኧሁዳይ ሞኦምታ፤ዋሁኖዋ እንእ ቲንአካ ሁዳ በቭር ዳኝነድን? እኮሁኖዋ ቲንአኸ ዳኝነድ አቨናኸ ማንተን?» ቧሪ።ኢየሱስ ዠፐረታ እንዴ ኢያ አታአር ንትሳአርሁዋ አሁም መልስኋ ዣውኒ፤ኢያቭ ዋዳ እንእ በቭር ዳኝነድ ኤቨኸ አአውድሁዋሴ» ባረኖም ።

\v 29
\v 30 . ዮሐንስ አጠመቀ በጎይታ ፍቃድኒ ዌ በሰቭ ፍቃድ ባነደ? እንዴ መልስኋ አውጅኝ » ባረኖም።

\v 31-32 ሁኖም ዋኸ ቧርም አትዋቾም፥በጎይታ ፍቃድን ኧቫነ በኸረ ባቴ ኧቭር አናአመርሁኰዳ ይረንረዴ፤ባቴ ተሰቭን ንቫኔዪ? ተሰቭን በቫኔ፣ ሰቭ እንእ « ዮሐንስ ነቢ ባነደ ባይቶ ዩሩዋይ ኧኸሬ ፎኞም።
\v 33 በህም ኧቫአ ኧኢየሱስ «ኢና አንሂነዳ» ቧሪ፤ ኢየሱስቭ «አካ ኢያቭ ዋ ዘንጋ ንእእ በቭር ዳኝነድ ኤቨኸ አኒኢድሁዋታ » ባረኖም።

\c 12
\p
\v 1 ተህም ቀጥወ ኢየሱስ ዋኸ ባረ ሟማካ አአውጅት ቀነሰ፤ « አት ምስ ወይን ኧፐረ አዦረ ኧፐረን ፤ዩኡሩወዳአር ጎጀኧኝ ፤በፎርኋ ቸየቶኮዩኡዮኮዳአርሰቀላ አሸ ፤ተህም ቀጥወ አፈርኋ እቹታ ሰቨ አክራኝንታ ኧሰቭ ገኝ ወረ ።
\v 2 ቡስር ቢራጭኮዳ ግዝየ ተቪድ አገልጋይ አት ሁዳ ኧወይን ቡስር ያቫአኔ አፈርኋ አክራኝነዋ ሰቪ ኬሸን ፤
\v 3 ሁነዋ ጭን ሀ ኤኬሸዊ ጠቦጭም ደኖጊታ ጠረረኧጅኋ ኬሸዊ ።

\v 4 ሀአቨ ኧኛ ሜነፕኋ ኬሸ ።ሁድ ዠኦሩም አትዋረጁም ኬሸዊ »
\v 5 ሀአቨ ኤኛአር ኬሸ ፤ሁድቭ ኦቶሪ ተህም ቀጥወ ኖኦራ ሰቨ ቢኬሽቭ ፣አታትሁኖዋ ደኖጉዮም ኤኛሞሁኖዋ ኦቶሪዮም ።

\v 6 ዋአካ አት ኢኬሽኩይ ኧተነፈናአር እማት ኢረቭድኩዳ ኣችኋ ባንደ ፤ «ኧችሸኛ እመኛት ዮነኧነሴ » ባረታ ትንሞኋ ቃጥወ ኬሸን ።
\v 7 አፈርኋ አክራኝነዋ ሰቨ ጭን ሁኖም ተሁኖም ፣እሽዳሽ ደረድ አነነዳ ሁዳን ፤ ዮሁዋ ንእትኔ ደረድኋ ኢና ይህርሴ ተዌ ዌርም፤

\v 8 ተህም ቀጥወ ጠቦጪታ ኦተሪ ፤ተህም ወይን ቶኦፖርኮ ኤኤዲ ነሸይታ ኤኝኤዲ ወሶጁም ቃሸዊይ ።
\v 9 እም ሀ ወይን ኧኸረን ምስ ማኸ ኢንኧኮታአ፥ር ኢቨስርሁዋ? ኢቫአኬ አርኋ አክራየነዋ ሰቨ የኧትርኮቴ ፤ባአፈርሞሀ አነዳ ኧወይን ኤኸ ኧኧኛ ኢኩዴ ።

\v 10 ዋኸ ይካ ኧመጣፍ ቃር አናነበብሁዋታ ፤ግብ ያረሽታ ሰቨ ኧቆንጪ እቭር ኧቪድ ዋና ዛምይ ኸረ ፥
\v 11 ጎይታ ዋዳ ኤፐ እመዳቭ ቲሶኤዳቪ ቲያዢዳቭ ወግ ኢኸርካናአር ፥
\v 12 አአይሁድ ገኝ ዳኝ ሁኖዋ ኢየሱስ ዋ ቲዚረካ ኧሁኖዋ ኧኸረኸ ኋርምታ ኢጠጪ ዣውም ባንደ ፤ዘጋ ጭን ብሃሄዲ ኧረፐረ ሰቨ ፈኞምታ ቼኤውም ዎርም ።

\v 13 ተህም ቀጥወ በኢየሱስ ዘንጋ ኢሱኡኬ ፥ ተፈሪሳ ሰቪ ቴሄሮድስሜአጋድ ኧሆርዋ ሰቨ ኧሁዳይ ኬሾም ፤
\v 14 ሁኖም ኧሁዳይ ሞኦምታ ዋኸ ቧሪ ፥ አስተማሪዮ አኸ ጥርር ሰቨ ኧኸርኸኸ ንኺነ ፤ ሰቨ ፍረይተኸታይ ሰቭ ምር ይሬዴ ባይተኸ አአተሞኋ አታትቃቂካ ፤ኧጎይታ መያ በቂጢየ ታትመር ፤ባቴ ኧቄሳር ኦጎብርዌ አይጎብሪ?
\v 15 ኢናሁ ንካስኔ አንካስነ? ኢየሱስ ጭን ኸቱነድሁኖዋ ሃረታ ፥ « ኧቭር በዘንጋ ታጎኦኝ ቱሱኡዋ? እንዴ አት ብር ኦኦኒታ ነዥኩ » ባረኖም ።

\v 16 ሁንኖምአዎኦነ ፣ዋዳ ኧቫን መርክን? ጥፍትኮኋ ኧቫተናአር ባርሩም ፤ሁኖም «ኧቄሳርናአር ባሪ ።
\v 17 ኧቄሳር ሁዳ እኣቄሳር አዊ ፣ኧጎታይ ሁዳ ኣጎይታ አዊ » ባረኖም ።ሁኖም በሁዳ ወግ ኸረዎም ።

\v 18 ተህም ቀጥወ ተውንድ ኧቶሾት ኤነዳናአር ዩርታ ኧሰዱቃ ሰቨ ኢኢየሱስ ሞኦምታ ዋኸ ቧርም ተሳአሪ ፥
\v 19 አስተማሪዮ « ሙሴ አት ቂቻ ጣፈ አቨንረ ፤ሁድቭ <አት ምስ ምሽት አግቨተታ ትከ ታይኢኝ ቢዎድ ኧዋዳይ ምሲ ኧሰም ምሽት ሂዳ አግቫአካታ ኧዎደ ኧሰምኋ ዘር ኧናአነ ይካናአር ።

\v 20 ባቴ ሰቫአት ኧሰማት አነውዋ ፤አአወተረ ሁዳ አገፓናታ ሁድ ታይኢኝቫ ፤
\v 21 ውሬተኛ ሁዳ ሚሽት ሂዳ አገፓናታ ሁድ ዘር ታይና ሞዳ ሶኦስተኘ ሁዳ ህመኸ ፤
\v 22 ሰቭአቸ አጋ ባአጋ አጎፔያታ ፥እንሞሁኖዋ ዘር ታይንኦዋ ሞጁም ፤ትንእሞሁኖዋ ቀጥወ ምሽት ሂዳ ሞደች ።
\v 23 ዋ ምሽት ሳቫቸ ኧሰማት አጎፔያ ፣ ባቴ ኧዎጅዋ ሰቨ ቲትረሾታ ሂዳ ኧኧተሁኖዋ ምሽት ትኸር? » ቧሪ ።

\v 24 ኢየሱስ ትድዋፖርታ ሁዳ መጣፍ ቅዱስቪ ኧጎይታቭ ደረግ አቲሂሩዋይ ኧኸረዴ ባረ ዠፐረኖም ።
\v 25 ኧዎጁዋ ሰቨ ቲትረሾታ ኧሳቫይ መላይካኸ ኢሆርቴ ባሀሬ አያጎኦም አያዎጆም ባረኖም ።

\v 26 ኧዎደ ሰቨ ኧተሸታአር ጭን ጎይታ ኧሙሴ በቅቅቅቅቆዛ እሳድ ከስ ምር ኧዝሬከነኸ ተሙሴ መጣፍ አናነበብሁዋታ? < ኢያኧአብራሃሚ ኧይሳቅሜይ ጎይታንሁ > ኧቫረ ሁዳን ።
\v 27 ጎይታ ኧያኧኸረ ሰቨ ጎይታን ባሃሬ ባአዛብ እሳድ ኢረድጅታ ሰቪ ጎይታ አኸረዳ ፤እመኸ ኧኸሬ ኖኦሬአር ተድቭፐርሁም ።

\v 28 ጻፍት ቲዩሪዮታ ሰቨ አት ሁዳ ማአታ ሽር ቲቴኤጅታ ሰማኖም ፤ኢኢየሱስ ኧትሳአሪ ሁዳ እንእ ጊከር ቲዠፕኖታ ፥ሰማታ ፣ኧሁርትሞሀኋ ተትዛዝ እንእ ኢረካ ሁዳ ኧተዳን? ባረ ተሳአረን ።
\v 29 ኢየሱስ « ትንእ ኢረእካ ትዛዝ እስራኤል ስቭአ ፥ጎይታንራ እምት ጎይታን ይካ ትዛዝ » ባረኖም
\v 30 አኸ ጎይታኸ በውረሚየ ሂናኸ በውረምየሀኸ ፣በውረምየ አሳብማኸይ በውራአቭ ደረጋኸ ንቨድ ።።
\v 31 ውረተኘ ሁዳ ሰቨ እንእ ኧገጋኸኸ ንቨድ ። ትንእሞሁኖዋ ኢረእካ ትዛዝ ኤነዳ ።»

\v 32 ኧቂስ አሰተማሪቭ ሁዳ ፤አስተማሪዮ ወሄአር ባኸ ፣ሁዳ እማት ኧኸረኸ ፣ተሁድቭ ኤኛአር ኤነኸ ኧዘጉታኸ ወሄናአር ፤
\v 33 ሁዳ-ተውየምየ ሂን ፣አሳብኸ ተውረምየ ሉሀኸ ተውረምየ ደረጋኸ ኧርወጅት ፣ህመኸቭ ሰቨ እንእ ተውረምየኸ ኧርወጅት ቲይዊዳ ህትቭ እንእ ኢረእ ።
\v 34 ኢየሱስ ኧቂጫ አስተማሪ ሁዳ ቤሰረ ኧዥፐረነኸ አሸታ «አኸ ተጎይታ መንግስት አራሃአር አኸርኸዳ » ባረን ። ተሃ ቀጥወ ኢትሳአርኩ ኧደፈረ ሰቨ ኤንዳ

\v 35 ኢየሱስ በቤተ መቅደስ ወረጀ ቲያስተምርካ ዋኸ ባረ ተሳአተ፣« ጻፍት ጿፍትኧተኸ ክርስቶስ ኧዳዊት ኧትከን ዩርዋ? »
\v 36 ዳዊት መንፈስ ቅዱስ አቴሸንታ ቲዝሬካ ፣ « ጌታ ጌታኞ ጥራታኸ ኧኧግራኸ በገዳ ትኔቭነኸ ስን በቀነ ኛ ቸራ ባረን ።» ይር ፤
\v 37 ባቴ ዳዊት «ጌታ በቫረንጋ ፣፥ኧኸ ሀአቨ ትከኋ ኢኸር? እመዳቭ ቲይካ ኖኦራ ሰቨ በሳርት ኢሰቫኩዳ ባንደ ።

\v 38 ቲያስተምርካቭ ዋኸ ባረ ፤ጻፍት ኢዩሪዮታ ሰቨ ተጠፖዋ ፤ ተአፈር ይትሻቭካ ሁጅርተኸደይቶ ኧዘውርት ኢሽርኮዋ ፤በጀፎረ ጀፎረ ዘግ ዘግ ባይቶ ወጌምት ዩሪዮይ ኢሱኡዋ።
\v 39 በጠሎት ቢድ ኧክብር ኤኤዲ ፣ በድግስቭ ቢድ እሽክብር ኤኤዲ ኢዊዮዋይ ኢሽርኮዋ ።
\v 40 ሰቨ ያዥኖኸ ቲይርዋ ጠሎትሁኖዋ ያዴኩምታ ምስ ኧዎደቫ እሽቻይ ቢድ ያዜጉዋይ ኧኸሬ ኢረካ ድርድ ይኢየኮዋ » ባረኖም ።

\v 41 ኢየሱስ መባ ቢቋሽኮዳ ሳጥን ኢፍት ቲኢፍት ቸናታ ሰቨ በሳጥን ሁዳ ከስ ፈራክ ቲቋሽታ ያዥ ባንዳ ።ደንገኝቭ ሰቨ ኖኦራ ብር ይዋ ባንደ ።
\v 42 አት ጉርማሳ ምስ ኤነና ምሽት ጭን እማት ኧረረና ሜዞሻ አፌተረች ቃሸች

\v 43 ኢየሱስ ኧተማሪኋ ዋኸ ባረኖም ፤ «ኧውረመኛ እሁዋ ዋ ጉርማሳ አቨቃጥ ኤነና ምሽት በሳጥን ሁዳ ፈራክ ተሆኖዋ ሰቨ እንእ ኢረእካአር ቃሸች ።
\v 44 ዋሁኖዋ እንእ አነኖዋይ አውም ፤ሂዳ ጭን በዚጋ ደረግሻ አነናዳ ትረቭርወዳ ሁዳ እንእ አፌተረችታ አቭች » ባረኖም።

\c 13
\p
\v 1 ኢየሱስ ተቤተ መቅደስ ቲዋአ ታነ ተተማሪኋ አት ሁዳ « አስተማሪዮ! ኧዥ ዋቢድቪ እቭርሞኋ ያዥወኝዋኸ ኧዥ! »ባረን ።
\v 2 ኢየሱስ ሃአቨታ ፣« ዋ ኑእ እእቭር ቢድ ታሽኮዋ? ዋዳ እንእ ኢዳስኮይ ፤ እቭር በእቭር ፎር በቸናመኸ አይነቭርካ »ባረን

\v 3 ኢየሱስ በቤተ መቅደስ ኢፊቲ ቲኢፍት ፣በደብረዘይት ቆቶ ፎር በቸና ፣ኤኤዲይ ጴጥሮስ ያእቆብ ፣ዮሐንስቪ እንድሪያስቭ ዋኸ ቧርሙ ተሳአሪ ።
\v 4 «ዋዳ ምረጋ ይኸረኸ አውድንረ ፤እመዳ እንእ ያርወዳ መርኸትኋ ምራአፈድን ?

\v 5 ኢየሱስ አትዎኋ እናድፓፐረናሁዋ ፤
\v 6 ኖኦራሁኖዋ ፣ኢያ ኢየሱስንሁ ባይተዋ በሽውኛ ይዎኦቴ ፤ኖኦራቭ ሰቨ ይድዋፑርቴ ።

\v 7 ኧጋዝቪ ኧጋዝነድ ዋራይትትሶኦታ እንደነኧናሁዋ ፤ዋዳ አይወኣርካናአር ዋዳ ኢቴፑወዳቀረ ጭን ገናን ።
\v 8 ሰቨ በሰቭ ፎር መንግስት በመንግስት ፎር በኖኦራኤኤዲ አፈር ኢቅረቅርኬ ፣ ጋጀኢደብስኬ ፤ ኧቨእ ድርሁት እቆርሽኮዳንኗ ።

\v 9 « አሁዋ ጭን ኧገጋሁዋ ተጠፖዋ ፣ ኢፈርድካ ዳኝ ኤኤቶ ያአፕሪኩዋቴ ፤አይሁድ ቢደሞጅኮዳ ቢድ እጎርፍኩዋቴ ቢያ ኧቫአ ሄቶ ይኸርዋይ በፍርድ ሾገዲ ብሩእ ሰቨኢፊቲ ኧፍርድ ያትሾኩኩዋቴ ።
\v 10 ብደይተዋ ጭን ወንጌል አአረማዊ ሰቨ እንእ ኧቴኤጅት ት አነወ ።

\v 11 ጥጭቶዋ ኧፍርድ ቲያአቴኤኑኩዋታ ፣ ሀ ግዚየ መንፈስ ቅዱስ ኢሁዋታአር ዘንጉዋ ባሃሬ ምር ንዝሬክነዴ ባይተሁዋ አጠረቁዋ ፤ ባሁዋ ኢዝሬካ ሁዳ መንፈስ ቅዱስ ባሃሬ አሁዋ አኸርሁዋታ ።
\v 12 ኧሰም ኧሰምኋ አቭ ኧትከኋ ኧውንድ ኤኤተ ያኤፕርኬ ፤ዴንጋብ በአቭ ተአዶድሁኖዋ ፎር ሙጥጣአር ኢኖኮቴ ዮኦትሪዮቴይቭ ።
\v 13 ቢያ ኧቯአ ሰቨ እንእ ኢጠራሁዋቴ ፤ዘንጋ ያርወዳ ቀረ ስን ተፓ ኧሸከቨ ሰቨ ጭን ኢተርፍኬ ።

\v 14 ባኸረ ኤኤዲ አይሽር ኤኤር ኢጠግርካ ዘንጋ ትታሽታ ያረብብካ ሰቨ ኧቨስር ህም ግዚየ በይሁዳ ገኝ ባነውታ ቆቶዋ ኦኦም ኧደኦርዋ ።
\v 15 በቢድ ፎር አንዳ ሰቨ አይረድ ፤ ንቭረድኋ ያዋአይ ቢድ ከስ አይግቫአ ።
\v 16 ኧቹዳጃ ኧወረ ምስ ውጅርኋ ይቨዳይ ተዣቨይተ አያአ ።

\v 17 በሃቀረ ኧውርኤትአርዋይ ያጥዋታብ ኢስቻ ኦሁነህና!
\v 18 እመዳቭ በዘር አይኸረኸ ጠልዩዋ፤
\v 19 አዎተረ ጎይታ ፍጥረት እንእ ተፈጠረወ ግዚየ ቆነሺታ ዋአካ ስን ፤አቸ ትእምቴ ኤሽተዊ አይሂሪአር ፥መከራ ይቫአኬ ።
\v 20 ጎይታ ቀረኋ ባያቲኢርኮዋ አትዎኋ ባተነፈዳ ፥ኧሸፐተነዋ ሁኖዋ እሽሽፗቸኋ ቲይር ቀረ ሁኖዋ አቴኤረኖም ።

\v 21 በሁ ግዚየ አትዎኋ ኡክ ክርስቶስ ዌእውዲ አነ »ቢይሁዋ ዌ ውኤዲ አነ ቢይሁዋ እናአመርሁዋ ።
\v 22 ክርስቶስንረ ዩርታቪ ነቢምንረ ዩርታ ክዝበኝፕ ሰቭ ሜቶውዋታ ወግ ሜናቪ መርኸትቭ አቴሽተውዋታጎይታ ኧሸፐተነዋ ሰቨ ታይተርፍ ያድዋፑርቴ ።
\v 23 እመኸ ኧኸሬ ተጠፖዋ ባሁ ቀረኋ ታይሰአ ኤኤድኩም ።

\v 24 « ህም ግዚየ ተመከራ ሁዳ ቀጥወ እዋየ አይዋአካ ዋአናኋ ጠነቯ ይኸርኬ ፣ኧዳርቭ ዳናአ አይዋአካ ፤
\v 25 ሆሆ ተሰቫይ ውረጅተዋ ይወዱኢዋቴ፤በሳቫይ አነውታ ፍጥረት ሻህ ሻህ ዩቴ »
\v 26 ህም ግዚየኧሰቨ ትኸ በሩእ ደረግ ግርማቭ በዳቭራ ቲቫአካ ያዢዴ ።
\v 27 መላአይካሞሀ በርቫአቸ አጋድ ሆይተዋታ ተአት አጋድ አአፈር ዳር ተሸተውዋታ ኧሳቫይ ዳር ስን ኧሸፐተነዋ ሁኖዋ ቁጥቁጥ ኢናአኼ ።

\v 28 «መርኸትሞኋ ተቨለስ ተሟርዋ አጤኋ እዝር ቲዝራካካቭ ቲያፍረፍርካቭ አቫር ኧቫአኸ በሁዳ ቲሂርዋ ።
\v 29 እመኸቭ አሁዋ ዋዳ እንእ ቲኸርካ ኢየሱስ ተዣቨይተ ይቫአወዳ ግዚየ ኧሰናመኸይ ወረጀ ኧገፓመኸ ኋርዋ ።

\v 30 ኧውረመኛ እርሁዋ ዋሁኖዋ ቲሆርዋ ስን ኧዋ ዘቨር ሰቨ አይወድካ ።
\v 31 ሰቫይ አፈር ያልፍቴ ቃርኛ ጭን አያአልፍካ ።
\v 32 ዘንጋ ጭን ኧሀ ቀራአር ዌ ኧሀ ሰአታአር አቭ ጎይታ ባሃሬ ፥ኧሳቫይ መላአይካ ቢሆርዋ ፣ጌታ ኢየሱስ ቢኸር አትዎኋቭ አይሂርካ ።

\v 33 ቀረኋ መቸ ኧኸረኸ አቲሂርዋይ ኧኸሬ ተጠፖዋ ተቋጠውም ኦሮዋ ፣ጠልዩዋ ።
\v 34 እመዳቭ ቢድኋ ገፈረታ ኧሰቭ ገኝ ኧወረ ሰቨኢቨስር ፥ሁድ ኧቪድ አገልጋይኋ እንእ ሜና ሜናሁኖዋ ሻከደ አቨኖምታ ፣ኧዘበኝ ሁዳ ተቋጤቭተ ይኢየኸ ኤዘዘ ኧወረ ሰቨ ኢቨስር ።

\v 35 እመኸ ኧኸረ ኧቪድ አቭ ሁዳ በኧዳር በግት ምሳአረ ዌ ኩታራ ቲሮእካ ኧህር ኢቫአወዳ ግዘየ አይሂሪ ኧኸሬ ተቆጦም ኦሮዋ ።
\v 36 ኧጠነቃር ቲቫአካ በሬኤሁዋይ እምአዎሁዋ ።
\v 37 አሁዋ ኢኢድሁዋታ ሁዳ እንእዎኋ ኢኢድኬ ፤ አሁም ተቆጦም ኦሮዋ ።

\c 14
\p
\v 1 ኧይሁዳ ኧፋሲጋቪ ኧጠርወሸቭ ሙርአ ኢሰርአይ ውርኤት ቀረ ቲተርፍወዳ ኧካናት አላቃቪ ቂጫ አስተማሪቭ በተንኮል ጥጭቶ ዮኦትርኰዳ መያ ኢሱኡዋ ባነደ።
\v 2 ዘንጋ ጭን «ሰቭ መራክስ አይረንሳኸ በውርአ ቀረ አይህር » ቧርም ያትዋቾዋ ባነደ።

\v 3 . ኢየሱስ በቪታኒያ ደቨር በወተኧወ በስምኦኒ ቢድ ሸረድ ቲቨርአካ፥አት ምሽት ባአልባጥሮስ ብርቃጥ በሩድ ዋጋ ኢስሬዳ ኧናርዶስ ሽቶ ጠበጠች ማአች፤ብርዋጥቭ ሁዳ ሰፕብርብቸንታ ሽቶኋ በኢየሱሲ ጉንኧር ኬኬፈ ባረቸን።
\v 4 በህም ኤኤዲ ተረፖሩዋ ሰቭ አታትሁኗ ምሽት ሂዳ ቤፐቸን ሜና ፥ሟአቾምታ ሁኖም ተሁኖም «ዋ ሽቶ ኧቭር እመኸ ቢስመ ኢንኤ;»ቧርም እዝሮኩዋ ባነደ።
\v 5 ቢያስሬ ተሶኦስት በኧር ብር ኢረእካአርያዋአካናአር፤አሰየተዊታ ዋጋኋ አዚጋ ንሻኮጂዳ ቧርም ኧሽት ሂዳ ቆንጪያ።

\v 6 . ኢየሱስ ጭን ቶኡያ ኧቭር ታጨንቁያ? ኢያ ወሄያአር ኤፐቸኒ።»
\v 7 ኢየሱስ ዚጋ ሁኗ እንእ ግዝየ ታሁትኗ፤በሳረናሁዋ ግዝየ ተኧጉዥዮሴ፤ ኢያ ጭን እንእ ግዝየ ታሁዋ አነቭርካ።
\v 8 ሂዳ ኢኸናዳ ሁዳ ኤፐች፤ታንዎድ በተረች ኧሪሳኛ ኢዋሺዳ ሽቶ ሟሸቸዪ።
\v 9 «ኧውረመኛ ኢኢድሁዋ ዋ ወንጌል ኧሰቭ ቢኢጅኰዳ ኤኤዲ እንእ ዋ ሂዳ ኤፐችቸን ሜና ቲቴኤድና ኢረቭርኴ» ባረኖም።

\v 10 . ተህም ቀጥወ ታአስረ ውርኤቸአት ሁዳ አአስቆሮንቱ ይሁዳ ኢየሱስ ኤኤተ ያአይፕሪ ኧካናት አላቃይ ወረ።
\v 11 ሁኖም ዋዳ ቢሶኦዋ ሳረኖም፤ ፈራክቭ ኢዊ አድጌአሪ፤ሁድ ኢየሱስ ኤኤተ ያኤፕርወዳ መያ ኢሲእ ባነደ ። ኧጌታ ኧርቫድ

\v 12 . ኧፋሲጋ ጣይ ቢያጭኰዳ በተርወሸ ሙርአ አወተራቸ ቀረ ፥ኧኢየሱሲ ተማሪ ኧሁዳይ ሞኦምታ «ኧፋሲጋ ኧርቫድ በኧቲ ንገክኔነከ?»ቧርም ተሳአሪ።
\v 13 ሁድ ተተማሪኋ ኧውሬትሁኗ ከተማ ሆርሙታ ትንክየ ኧፌነገ ምስ ትኮውዋሴ ፤
\v 14 ሁድ ተሆተሪ ቢድኋይ ጉኦምታ፥ ኧቪድ አቨቃጥ ሁዳ« አስተማሪ ተተማሪመኛ ኧፋሲጋ ኧርቫድ ኧቨርአወዳ ኤኤዲ ኧቴኤድኔ?»ባረናኸ ቧሪ ባረኖም።

\v 15-16 ሁድ በፎቅ ፎር ኧጌኬሪ በተድ ኤኤዲ ያተሽሁዋሴ፤በሀይ ጎኩኒ»ባረኖም።ተማሪሞኋ ሁድ ኧቫረኖመኸ ከተማ አኖዳ ኤኤዲ ዎርምታ እንእአአር ኢየሱስ ኧቫረኖመ በኸሬ አሾም፤ኧፋሲጋቭ ኣርቫድ ጌኬርም።

\v 17 አፈር በቨሸጋ ኢየሱስ ተአስረ ውርኤቸ ተማሪሞኋ ማአ።
\v 18 ኧርቫድ ቲዎርኦም ታነውም ኢየሱስ «ኧውረመኛ ኢኢድሁዋ ታሁዋ ግት ቲያ እማቲ ኢበርአካ ሁዳ ኤኤተ ያኤፕሬዴ» ባረኖም።
\v 19 ሁንኖም ተወተቹምታ እንዎሁኗ ኢያ ኧህርሴዪ? ኧዋርት ቆነሺ።

\v 20 ኢየሱስ ጭን ተአስረ ውርኤቸማሁዋ አት ሁዳ ዋአካ ሸረድ ኢረሳይ ኧጅኋ ቲያ እማቲ ያወድካ ሁዳን» ባረኖም።
\v 21 « ኧሰቭጥ ትከሽ ኧሁዳአር ኧጣᎉመኸ ኢዎድኴ፤ ኧሰቭ ትከ አዋአ ያኤፕርካ ሁዳ ጭን ግርድኋ ባይትፈጠር ኢፍዘኩ ባነደ» ባረ።

\v 22 ቲዎርኧታቭ ጎይታ አሸኮረታ ዳቦኧ ፍረነቨታ ኧተማሪኋ «እኩ ዋዳ በሰርነኛ» ባረ አቨኖም።
\v 23 ኢሰጪዳብ ሁዳ ነሳ በኧጅኋ ጠበጠ ጎይታ አትሸኮረታ ኧተማሪኋ አቨኖም፤ሁኖም እንእዎሁኖዋ ቴኤፖሪታ ሰጨዊ።
\v 24 ሀአቨ ዋዳ ኖኦራ ሰቭ ኢተርፍዌ ኢትሁካ ኧወያ ጉርዳ ደብነኛ ፤
\v 25 ኧውረመኛ ኢኢድሁዋ በጎይታ መንግስት ወያ ኧወይን ቡስር ኦኦሪ ትንሰጭ ስን ፥በዋቴ ተዋዳ አት አንሰጭካ » ባረኖም።

\v 26-27 ተህም ቀጥወ መዝሙር ዘሞርም ታነዳ በደብረ ቆቶ ፈር ዎኦም። ኢየሱስ ጴጥሮስ ኢኸዳኰኸ በተረ ኤኤደ ኢየሱስ «ዜማቸ ኡዳ ኧደርኩዴ ጣይቭ ሁኗ ኢትውራጭቴ ቧርም ኧጣᎉመኸ እንእቫሁዋ ትሆጀኝዴ» ባረኖም።

\v 28 . ተውንድ በትረሳሁ ቀጥወ ጭን ፣ብደይተኩዋ ገሊላ አርኴ ፤»ባረኖም።
\v 29 ጴጥሮስ «ኧኛሁኗ ቢሆጀከ ኢያ ስርም አንኸዳኸዳ» ባ ረን።

\v 30 . ኢየሱስቭ ኧጴጥሮስ «ኧውረምነኛ ኢኢድኸ ፣ኧውርኤተኘ ኩታራ ታይሮእ ሶኦስተጋ ትኸዳይዴ » ባረን።
\v 31 ጴጥሮስ ኧኢየሱስ ታኸ እማቲ ኧዎድምር ባሀሬ ስርም አንኸዳኸዳ» ባረ ቲኢፍት ኢረእ አተፓ ዝሬኵ፤ ኧኢየሱሲ ተማሪ እንዎሁኗ ህመኸ ቧርም። ኢየሱስ በጌተሰማኒ የለየ

\v 32 . ተህም ቀጥወ በጌተሰማኒ ፎር ኦንኦም፤በህሜ ኢየሱስ ኧተማሪኋ ፥« ኢያ በሄኤዲ ኧጠልይኴ አሁዋ ብእመኸ ኦክሹዋ» ባረኖም።
\v 33 ጴጥሮስ ፣ያቆብቪ ዮሐንስቭ ጠበጠ ወረታ ቡሼኤኸ ኧትወጠጭትቪ ኧጠነቁትቭ ቀነሰ።
\v 34 «ሉህኛቲዋአ ስን ተጨነቅሁ ብእመኸ ተቋጦም ኦሮዋ» ባረኖም።

\v 35-36 ተሁኖም ቀሪያአር አረኧ ወረታ ፣ኢፍት ቲኢፍት ሀ ወቀሳኋ ኢፈካኸ « አቦኞ እንእአአር ኢኸነኸ ዋ ወቀሳ ተፎርኝ አፍካኒ፤» ዘንጋ ጭን አሄ ሙርአድ ኧህር ባሀሬ ኢያይ ሙርአድ አይህር» ባረ ጠሎት ኤፐ።

\v 37 ተዠፐረ ቢቫአ ተማሪኋ በረኤዋ ኤኤዲ ነከቨኖም፤ ሁድ ስሞኦኖ ተገተርኸዪ? » እእማት ሳኣት ስን ተቁዋወይቶ ኦኦክሽት ኤመናኸዪ?» ባረ ተሳአረን።
\v 38 «ፊትና አይሰርአዎሁዋኸ ተቁዋወርም ጠልይዋ፤መንፈስ ቅዱስ እንእ ግዝየ በቃንዢትን፤በሰር እንእ ግዝየ ቂጨኘን »ባረኖም።
\v 39 ሀአቨ ወረታ ኢኢፍት ኧጠለየን ጠሎት ጠለየ።

\v 40 . ኧውርኤተኘ ግዝየ ዊኢንድ ዊኢንድ ባረኖምታ፥በሬኤውዋ ኤኤዲ ነከቨኖም፤ሁኖም በዊኢንድ ቀርብሁኖዋ ሆርምታ ኢዝሮክታአር ባይሂርታ።
\v 41 ኢየሱስ ኧሶኦስተኘ ማአታ«፥ዋአካ ስን ተገተርሁምታ ትታፎም አነሁዋ? በሽቴ ኢቃሴ ኧሰቭ ትከ ኧቫጢረተኘ ሰቭ ኤኤቶ ያኤፑርኰዳ ግዝየ ሰንአ።
\v 42 ተሾዋ ንሆነ ፣ኤኤተ ያኤፕሬዳ ሁዳ ማአ፤»ባረኖም። ኢየሱስ ጠቦጪ

\v 43 . ህመጋቲዝሬክ ታነ ታአስረ ውርኤቸ ተማሪ ተማሪኋ አት ሁዳ አስቆሮንቱ ይሁዳ ማአ፤ተካህን አላቃይ፣ ተውሴ ቂጫ አስተማሪሜዪ ተገኘ ባሪቅሜ ኧኬሸውዮዋ ኖኦራ ሰቭ ተህም ባነውተ።
\v 44 አዋአ ያኤፕርኩዳ አስቆሮቱ ይሁዳቭ«አሁዋ ትጠጪ ትሱኢዳ ሁዳ ኢያ ኧሰኧኩዳ ሁዳን ተጥዋወቁም ጥጪ » ባረ በተረ መርኸት አቨኖም ባነደ።
\v 45 ኧኢየሱሲ ተሰንአመኸ ህምተህም ኧኢየሱሲ ቴኤነቨታ« ባረ ሳአቨን።
\v 46 ሰቭ ሁኖዋ ጠቦጩም አኮጂ።

\v 47 በህም ኤኤዲ ተትሾኮውዋ ተኢየሱሲ የማሪ አት ሁዳ ሸታኋ አዋአታ ኧካህን አላቃይ ሜነኘ እንዝርኋ ጠነቨ አፈካነ።
\v 48-50 ኢየሱስቭ «ሽፍጣ ትጠጭታአረኸ ሸታዪ ጉምአቭ ጠበጥሁም ማአሁሚእንእ ቀረ በቬተመቅደስ ታሁዋ ትነቭርካ አንጠበጥሁኝ ባነደ፤ኧዋሀአር ቲንኧታ ሁዳ መጣፍ ዩኩዳ ሁዳ ይኸኔ»ባረኖም።ሀ ግዝየ እንእዎሁኖዋ ቾኦዊ ዎሩም።

\v 51-52 አት ዘርማ ምስ እንጭኋ ባያሪ ነተላ አማደታ ኢየሱስ ኢትሄተር ባነደ፤ኧህም ዘርማ ምስ ፣ሰቭ ሁኖዋ ኢጠጪ ቢዎኦዋ ፥ሁጅርኋ ቃሸታ ዋአ ወረ። ኢየሱስ በፍርድ ሸጎ ኢፍቲ

\v 53 ኢየሱስ ኧሊቀ ካህኒ ወሰጂ፤በህሜ ኧካህን አላቃ፣ ኧገኘ ባሪቅቪ ኧቂጫ አስተማሪቭ እንእዎሁኖዋ በሀይ ተደሞጁም ባነደ።
\v 54 ፔጥሮስ ኧኢየሱስ ኧሊቀ ካህኒ ወረጀ ስንተሄተረን ወረ፤በህሜኤዲ ተረፖሩዋ ሰቭ ትራኧረ ቸናታ እሳድ ኦወእኩ ባነዳ።

\v 55 . ኧካህን አላቃቪ ኧፍርድቭ ሾንጎ ሁኖዋ እንእዎሁኖዋ ኧኢየሱስ ዮኦትሪ ዛር ኢኸርኮታ ሰቭ ኢሱኡዋ ባነደ።
\v 56 ኖኦራ ሰቭ በኢየሱስ አአቫይ ዛር ቢኢጅኰ ቃርሁኗ ጭን አናቻፐረዳ።

\v 57 አታትሁኗ ተረሾም አአቫይ ዛር ኤኤጅኰ፤
\v 58 ዋ ሰቭ በሰቭ ኧጅ አረሸዊ ቤተመቅደስ ባሪተሁን፣፥በሶኦስት ቀረ ከስ በሰቭ ኧጅ አናረሽዊ ቤተ መቅደስአረሽኴ ባረ ቲዩርታ ሰምአነ፤»
\v 59 ቢኸር ቃርሁኗ እማት አኸረንዳ።

\v 60 . ኧካናት አላቃ ሁዳ ተረሳ ኧኢየሱስ ኢፍትኋይ ተሸከቨታ ፣«ዋ ሰብኢኢጅኰኰዳ ሁዳ ምርአፈድን? ኧቭር አድዠፐርካ?» ኧኢየሱስ ተሳአረን።
\v 61 ኢየሱስ ጭን አታአር አንዠፐረነዳ፣ቁስ ባረን፤አኸ ኧጎይታ ትከ ክርስቶስንሄ? ባረ ተሳአረን።
\v 62 ኢየሱስቭ «እከ ፤ኧሰብ ትከ በሩእ ጎይታ በቀነኋ በቸናይ ታዢዴ»ባረን።

\v 63 . ኧካህን ዳኘ ሁዳ ሁጅርኋ ዠኧረ ቃሸታ ፣በዋቴ ምር ኧኛ ዛር ያትኬሸንረ?
\v 64 እኩ ቂናቨኋ ሰምአሁም፤ባቴ ምር ኢቨስርሁዋ? ባረ ተሳአረኖም፤ ሁኖም ኡኡትሪ! ቧርም ብእማት አፍ ፎጅኰ።
\v 65 ህም ግዝየ አታት ሰቭ ኢትፍ ዩኰ ባነደ፤ኤርሞኋ ጠቦጪታ በኧግርሁኗ ቲረጉኢ «ማንተን ኧረከኧናኸ እንዴ ሀር፤ዩሪ ባነደ፤አሽክርቭ ሁኗ ወኸድኋ ዮኦፌ ባነደ። ጴጥሮስ ኧኢየሱስ አንሂርኩዳ ባረ ኸታ

\v 66-67 ጴጥሮስ በካህን ሁዳይ ቢድ ገዳጋድ ቦኡር ከሲ ተካህናት ዳኜ ኧቪድ ገረድ አት ሂዳ፣ ኧጴጥሮስ እሳድ ቲዎኡኩዳ ፣ኢኢፍትኋይ ማአች መኬኧ ባረች አሸቸንታ «አኸ ተናዝሬት ኢየሱስ እማቲ ባነኸደ » ባርረቸን፤
\v 68 «ቲንዳ ሁዳ ኧኸረአአር አንሂርካ፤ »ባረ ኸታ፤ተህም ቀጥወ ከሲ ቸኧ ሰቻ አጋድ ዋአ።

\v 69 ህም ኧቪድ ሜነኘ ገረድ ሀአቨች አሸቸንታ፥በሄኤዲ ኧትሸከውዋ «ዋ ምስ ተሁኗ ባነደ»ባረች ዝሬኬች።
\v 70 ጴጥሮስ ጭን ሀአቨ ተኢየሱስ አነፐርኋ ባረ ኸታ፤ ቀሪመጋ ኤኬሺታ በሄኤዲ ኧትሸኮውዋ ሰቭ ኧፔጥሮስ አኸ ኧገሊላ ሰቭ በሁርታኸ ኧውረቭ ተሁተንኸ፤»ቧሪ።

\v 71 ጴጥሮስ ጭን «ዋ አሁዋ ቱሪዳ ምስ ኢያ አቸ አንሂርኩዳ፤» ባረ ኧትርትቪ ኧትሰደውት ቀነሰ።
\v 72 ህምትህም ኧውርኤተኘ ኩታራ ኖኧ፤ጴጥሮስ ፣እየሱስ ኧውርኤተኘ ኩታራ ተሮእትኋ ኢፍቲ ሶኦስተጋ ት ትኸዳትዴ ኧቫረን ቃር ተዘከደንታ ተቨተጠ ቤኵ።

\c 15
\p
\v 1 ጋአት እረርኧ ኧካህን አላቃ፣ኧይሁዳ ባሪቅ፣ኧቂጫ አስተማሪቪ ኧፍርድ ሾጐቭ እማቲባትዋቾዋ ቀጥወ ኢየሱስ አኮጂታ ወሰጁም ኧጲላጦስ አዊ።
\v 2 ጲላጦቭ «አኸ ኧይሁዳ ንጉስንሄ? » ባረ ተሳአረን ኢየሱስ «አኸ ኧቫኸምነኸ »ባረ ዠፐረነ።
\v 3 ኧካህን አላቃቭ በሮኦራ ዘንጋ ኮሸሺ፤

\v 4 . ጲላጦስቭ እሼ በሮኦራ ዘንግ ኮሸሽከ ኧቭር አትሄፕርካ?» ባረታ ሀአቨ ተሳአረን።
\v 5 ኢየሱስ ጭን አታአር አንዠፐረነዳ፤ጲላጦስ ኢየሱስ ቁስ በዋርትኋ ወግ ኸረወ።

\v 6 . በውርአ ቀረ ኧገኘኋ ሰቭ ጉፍኒ ኧቫረ አት ሰቭ ኢጎፍርኰዳ ቂጫ ባነኖተ።
\v 7 በሽፍጥነድ ተፉቃቄርም ተረሾምታ ሰቭ ቶኦተሩዋ ሰቭ አአኮጂ አት በርባን ዩሪንዳ በርባን ዩሪንዳምስ ባነደ።
\v 8 ኧገኘኋሰቭ ኧፒላጦሲ ሞኦምታ ኧዋ ኢፍቲ አርወሸኖመኸ አት ሰቭ እገፍኖዋይ ሳአሪ።

\v 9-10 ጲላጦስቭ ኧካህን አላቃ ኢየሱስ በቅናት አዎኦም አኤፖሪኸ ኢሂር ኧረፐሬ ኧይሁዳ ንኩስ ንፍዳነሁዋ?»ባረ ተሳአረኖም።
\v 11 ኧካህን አላቃ ጭን ኢየሱስ ኧታአገድታ በርባን ኧትፈዳ ባይቶ ኢሶኦሩዋኸ ሰቭ ንሻሾም።

\v 12 ፒላጦስ ሀአቨታ «ኧይሁዳ ክኩስ ቱሪዳ ኢየሱስሁ ማኸ ነንአኩ?»ባረ ተሳአረኖም።
\v 13 ሁኖም ሀአውምታ «ኧሆኖም ስእርኩ» ቧርም።

\v 14 . ጲላጦስቭ ኧቭር ምር ባጢር ኤፐ? »ባረኖም፤ሁኗ ጭን«ስእርኩ» ቧርም ቲኢፍት ኢረእካአር አትኋኖም።
\v 15 ጲላጦስቭ ሰቭ ሁኖዋ ያትሽሪ ቲይር በርባን ፈታንታ ገረፈ ዮኦትሪ አዋአ አቨኖም።

\v 16 ወታደርቭ ፕራይቶሪዮን ዩሪንዳ ኧዳኘ ሁዳይ ወረጀ ወሰጂ፤ወታደርቭ እንእ ባአት ዶᎀጂዮም።
\v 17 ተህም ቀጥወ ብሻ ሁጅር አሆተሪ፣ኧሶሁ ኮፊታ አጣወም ዶፈነ።
\v 18 ተህም ቀጥወ «ኧይሁዳ ንኩሶ ወገሬት አኸ ኧህር» ቧርም አንጓጠጪ ፤

\v 19 ጉነርሞኋ ባአር ደነጒ፣ኢምቧቍሞሁኗ ኦትፍ ቧኰታ ኢፍት ቲኢፍት ዎቶኡም ኧቅነጨ ስጋዳ ሰጎጅነ።
\v 20-21 ባንጓጠጪቭ ቀጥወ ኢኢፍት አአሆትግሪ ብ|ሻ ሁጅር ሞንጪታ ሀአውም ኧገግኋይ ሁጅር አሆተሪ፤ተህም ቀጥወ ኢሶኡሪ ወሰጂ።. የሱስ ሶኦሪ. አአሌካአንድሮስሜዪ የሩፎስሜ አባ ስምኦን ዩሪንዳ ምስ ተገኜ ማአ ከተማ ቲጋአካ ተኮዊታ ኢየሱስ ኢሰኧርዌ ኧጠቦጪ መስቀር ፈንግ ቧርም በግርድ ጠቦጪታ አፌነጒ።

\v 22 ኢየሱስቭ ጎልጎታ ዩሪዳ ኤኤዲ ወሰጂ ፤ጎልጎታቭ ኧዋርት ኧጉንኧር አእቭ ኧዋርትን።
\v 23 ህሜ በሰንኦዋጋ ከርቤ ዩሪንዳ ኤኧ ውዘ ኡራኦሪ ወይን ኢሰጪ አዊ፤ ሁዳ ጭን አንሰጨዳ ባአይ ባረኖም።
\v 24 ተህም ቀጥወ ሶኦሪ፤ሁጅርሞኋ ኧርጥ አተጉምታ ኢሰርአኮታ ኢሰርአኮታአር ተሻኮ።

\v 25 ኧሶኦሪቭ እረርኧ በሶኦስት ሳአት ባነደ።
\v 26-27 ኢየሱስ ኧይሁዳ ንጉስ ቧርም ጣᎉ ባነደ. ተሁድ እማቲ ውርኤት ሽፍጣ በቀነሞኋ በጉራሞኋ ሶኦሪዮም ባነደ።
\v 28 ብእም ኧቫ አ በቨጣፍ ተሽጣ እማቲ ሶኦሪ ቧርም ኧጣᎉመኸ ኸረ።

\v 29 መያቭ ያርታ ሰቭ ወግ ኸረዎምታ ጉንኧርሁኗ ቲያቁረቁሩዋ ኧቂናቭ ውርጅብኝ ቲያወችኰ ፥ኤቾሁ ቤተ መቅደስ ባሪተኸታ በሶኦስት ቀረ አኸትንሄ?
\v 30 እንዴ ተበስቀር ፎር ውረድታ ሉሀኸ አትርፍ፤

\v 31 ህመኸቭ ኧካህን አላቃቪ ኧጫ አስተማሪቭ በቅነጨ ሁኖም ተሁኖም «ቡችር ሰቪ አተነፈ ገግኋ አትርፉቲ ኤመን ፤
\v 32 ዋ ክርስቶስ እእስራኤል ንኩስ ኧሽተነ ናአቭኔኰኸ እንዴ ተቨስቀር ኧረድ ዩሩዋ ባነደ፤ተሁድ እማቲ ኧሶኦሪዮዋ ሰቭ ህመኸ ኢቀሩዊ ባነደ። ኢየሱስ ሞደ

\v 33 . ዋአና ተሶኦስት ሳአት ቆነሺታ ዢኧ ሳአት ስን ባአፈር ጠነቫ ወንደ።
\v 34 ዢኧ ሳአት በኸረጋ ኢየሱስ «ኤሎሄ፣ ኤሎሄ ላማ ሰበቅታኒ?»ባረቃርኋ ነሳ ኮ ባረ፤ትርጉሞ፥አቦኞ ኧቭር ቸኧኸዪ ኧኧዋርትን።
\v 35 በህም ኤኤዲ ተትሸኮውዋ ሰቭ አታትሁኗ ፣«ኤልያስንኢኸራካ ሁዳ »ቧርም።

\v 36 ተህም ቀጥወ አት ምስ በወይን ኧጬፎዊ ስፖንጅ አንቌ በቫረ ወይን ጬፈንታ ባአር ሰከከ አቃኋይ አቴኤነውነ፤ተህም ምስ ሁዳ ቀጥወ ቶኢ እንዴ ኤልያስ ሜኤተ ያተርፍኰኸ ነዥነሴ» ባረ።
\v 37 ኢየሱስ ቃርኋ ነሳ ኮ ባረታ ሉኋ ዋአ።
\v 38 ተህም ቀጥወ በቬተ መቅደስ ኧዠነሪ መዘኔድ ቶᎈረ ቀነሰንታ ኧገዳኒየ ውርኤቲ ተትረተረ።

\v 39 ኧኢየሱስ ኢፍቲ ኧትሸከቨ ኧረፐረ ኧቨኧር ወታደር አላቃ፥ኮባረታ ሉኋ ቲዋአካ አሸታ « ዋ ምስ ውረ ኧጎይታ ትከ ባነደ» ባረ።
\v 40 እመዳ እንእ ቲቴፕካ እሽቻ በሮኢ ተሸከቫም ያዣ ባነደ፤ተህናም ግት ኧመግደላ ማርያም እንስ ያቆብቪ ኧኧዮሳሜ አዶድ ማርያም ሰሎሜቭ ተህም ባናተ።
\v 41 ህናም በገሊላ ተሁዳ ወራም ያጌኪራይ ኧረፐራ እሽቻና፤ህመኸቭ ተሁድ እማቲ ኢየሩሳሌም ኧቫአ ኖኦራ እሽቻቭ ባናተ።

\v 42 . አፈር መሸታ ሰምበት ኢጋአወዳ፣ኧሰንበት ኢኸርካአር ኢጌኪርኰዳ ግዝየ ሰንአ።
\v 43 ህም ግዝየ ሰቭ እንእ ያኸብድኩ ኧረፐረቪ፣፥ኧጎይታቭ መንግስት ኢትጭማማ ኧረፐረ ዮስውፍ ዩሪዳ አአርማትያስ ገኘ ሰቭ ኧጲላጦሲ ማአታ፥ኧጲላጥስ ኧኢየሱሲ ኒሳ ሳአረን።
\v 44 ጲላጦስቭ ዋኸ በፈኧር ኧዎደኸ ቢሰቭአ ወግ ኸረወ።ኧቨቶ ወታደር ኸናታ ፥«ተዎደ ምርአህር ግዝየ ኸረ?» ባረ ተሳአረን።

\v 45 . ኧዎደመኸ ተቨኧር ወታደሪ አላቃ ባጬገጋ ኧኢየሱሲ ኒሳ ኧዮሴፍ አቨን።
\v 46 ዮሴፍ ጋቢ ስየታ ኧኢየሱሲ ኒሳ ከፈነንታትእቭር ባጣወሪ ቀብር ከስ አወናን፤ተህም ቀጥወ ኧቀብር ሁዳይ አንቃኋእቭር አቫአ ኤፈን።
\v 47 ህም ግዝየ ኧመግደላ ማርያምቪ ኧዪሴፍሜ አዶድ ማርያም ኧኢየሱሲ ኒሳ ኧቴኤዲ ያወሬኸ ያዣ ባነደ።

\c 16
\p
\v 1 . ኧሰምበት ምረጋ መግደላዊት ማርያም፣ኧያቆብሜ አዶድ ማርያምቪ ሰሎሜቭ ኧኢየሱሲ ኒሳ ያረዝቫኴ ሽቶ ስራቫም።
\v 2 ውርሰንበት እረርኧ አየድ ተዋአመኸ ኢየሱስ ኤኬኰ ᎀገማይ ቲያራም ታና ፤

\v 3 እቭር ሁዳ ማን አከቭሪተ ያፈካንረዴ? ባራም ህናም ተህናም ኢዝረካ ባነደ።
\v 4 ህመኸ ተቫራ ቀጥወ መመርህና ነሻም ቢያዣ፣ኧኢየሱሲ ቀብር ኤኤᎈኰ ኑኡየ እቭር ክቨነረ በፈካ ኤኤዲ ነከባዪ።

\v 5 ኧቀብር ሁዳ ከሲ ገፓመኸ፥ ጓድ ሁጅር ኧትኸተረ ዘርማ ምስ አሻምታ ደነኧናም።
\v 6 ሁዳ ጭን አይድረእሀ አሀ ትስአይዳ ኧናዝሬት ኢየሱስ ኧኸረኸ ሀርሁ፤ሁዳ ተውንድ ተረሳ ዌኤዲ ኤነዳ፤እኩ ኒሳሞኋ ኧዌኮኰ ቀብር ዋዳን ኧዣይ»ባረና።
\v 7 ዘንጋ ጭን ኧዋ ኢፍቲ ኤኤደናሁዋመኸ ብደይተናሁዋ ገሊላ ያርኴ ባሀይ ቶዢሴ ባራም አውጃዮዋ » ባረኖም።

\v 8 ህናም ቲይረኧድካሚ ወግ ቲኸርቫም ሴካም ተቀብር ከስ ዋአም፤ፈኛምቭታ አሻይ ዘንጋ አአትዎኋ አኔኤጃታ።

\v 9 ተውንድ ተትረሳ ቀጥወ ሰንበት ምረጋ ሳቭአት ሼጣን አዋአና ኧመግደላ ማርያም አሸቸን።
\v 10 ሂድ ኢኢፍት ተሂዳ ኧረፖሩዋ ሰቪ ወረችታ ተወጠጩም ቲዎሁታ አሸቸኖም ፤ኧሁኖም ኢየሱስ ተውንድ ተረሳታ አሸቸነኸ ኤኤደቸኖም።
\v 11 ሁኖዋ ጭን አናአሞሪያዳ።

\v 12 ተህም ቀጥወ ተከተማ ዎኦም ኧኛይ ያሩዋ ኧረፖሩዋ ኧውሬት ተማሪኋ ተረከቨኖም።
\v 13 ሁኖም ተዠፖርም ዎርምታ ኢየሱስ አሸዊኸ ኧኧኛ ተማሪኋ ኤኤጂዮም፤ኧሁኖም አናአሞሪዮታ።

\v 14 ተህም ቀጥወ ኢየሱስ አአስረ ውርኤቸ ተማሪኋ ሸረድ ቲወርኧታ ማአ ተራከቨኖም።አናአሞሩዋሜዪ ሂሞሁኖዋ አቶፖዋይ ማአቸዎም።
\v 15 « አሁዋ ባአለም እንእ ዞውሩዋ እም ወንጌል ኣሰቭ እንእ አዉጁዋ።»
\v 16 አአመረቪ ኧጠመቀቭ ሰቭ ኢተርፍ፤ አናአመረ ሰቭ ጭን ኢትፈንድወ፤

\v 17 አአሞሩዋ ሁኖዋ ዋ መርኸት ያሽቴ፥በሱውኛ ሼጣን ያዎኦቴ፣ባይሂሪቭ ቃር ኢዝረኩቴ፤
\v 18 ኧሳአር ጭረ በኧጅሁኗ ኢጠጭቴ ፣የኧትርካቭ መርዝ ቢሰጩዋቭ አየኧትርኮታ፣ኧጅሞሁኖዋ በጮረኗ ሰቭ ፎር ያድጉቴ ፣ሁኖም አፍያ ኢሆርቴ።»

\v 19 ጌታ ኢየሱስ ዋዳ ቤኤደኖዋ ቀጥወ ኧሳቫዪ ዋአታ በጎይታ በቀነ አጋድኋ ቸና።
\v 20 ተህም ቀጥወ ዦርምታ ኧሰቭ እንእ ወንጌል ኤኤጁም፤ጎይታቭ ተሁኖዋ እማቲ ዬቭ ባነደ፤ወግ ሜነ ዬኰዳ ደረግ ኢኮምታ ቃርኋ ውረአአር ኧኸረኸ ያጪግ ባነደ።