hav_reg/59-HEB.usfm

\id HEB
\ide UTF-8
\h Abaebraniya
\toc1 Abaebraniya
\toc2 Abaebraniya
\toc3 heb
\mt Abaebraniya

\c 1
\cl Chigabi 1
\p
\v 1 Miramira Nyamuzinda akazagi derha na bashokulu berhu kugerera abalebi, ngasi mango n'omu njira zinene.
\v 2 Aliko muzino siku z'obuzinda aderha nerhu kugerera Omwana wage. Nyamuzinda amujira fula y'ebintu byoshi, na kugerera oyu, alemag'egulu lyoshi.
\v 3 Yewe chiri chimenyiso ch'akamole k'obukuze bwa Nyamuzinda, bunola yewe luli lwiganyo lushinganya lwa Nyamuzinda yenyine, n'oku buhashe b'omwazi gwage analang'ebintu byoshi. Naye abere amachesa'bantu kurheng'omu byaha byabo, ayikala n'obuhashe omu mbingu omu kuboko k'okulyo kwa Nyamuzinda Munyabuhashe boshi.

\v 4 Omwan'abere mukulu kulusha ba malaika enyanya walilala zino ahabwaga na Nyamuzinda, liherh'obukuze kulusha agandi.
\v 5 Bunola Nyamuzinda arhabwiraga haba n'eliguma chiro na muguma wa bamaika: "WOyo, oli mwana wani, Nyono zene nabere Yisho". Changwa, arhaderhaga eyimyazi enyanya wa malaika yeshi yeshi: "Yewe aba mwana wani, Nani nab'Eshe".

\v 6 Na kandi amango Nyamuzinda arhum'omwana wage w'echusha omw'igulu aderha: "Bamaika boshi ba Nyamuzinda bakwanene bamuharamye'.
\v 7 Aliko enyanya wa bamailka, Nyamuzinda aderha: "Nyamuzinda ajirire bamaika bage babe kamuhusi. Ajirire abo bakozi bage babe nka birimi bya muliro."

\v 8 Aliko enyanya z'Omwana, Nyamuzinda aderha:"Entebe yawe y'obwami woyo Nyamuzinda, yalama esiku n'amango. Warhambul'obwami bwawe n'okuli.
\v 9 Osimire okuli n'okugaya obubi. Nantyo Nyamuzinda, Nyamuzinda wawe, akuyimanzize, akushigir'amavurha, akuher'olukengo n'okukuhir'enyanya kulush'abenyu boshi.

\v 10 Konakuguma Nyamuzinda aderha:"Woyo Nahano, oku murhondero walem'egulu, e mbingu kali kasi k'efune zawe.
\v 11 Byagera, aliko woyo wayorha. Byashaja nka mushangi.
\v 12 Wabigonyagonya nka fulema, nabyo byahindamuka nka mishangi. Aliko woyo wayorha kula kona kula, n'akalamo kawe karhaba n'obuzinda.

\v 13 Nyamuzinda arhabwiraga chiro n'omuguma wabamaika bagentya:"Yikala n'obuhashe oku kulyo kwani, kuger'amango nahiba abashombanyi bawe eshishi w'amangulu gawe."
\v 14 Malaika alinde? Bali muka, balibakolera Nyamuzinda bali barhumwa naye enyanya z'enyungu ya balala bakwanene bachungulwe.

\c 2
\cl Chigabi 2
\p
\v 1 Enyanya lyantyo, rhukwanene okugwarha bwenen'emyazi yoshi rhwayunvirhe, emenye yakarufuma.

\v 2 Bulala ekaba oburhumwa bwaderhwaga na bamaika bwaba n'emisi, na ngasi, chaha na lugoma chahanirwe oku kwanene.
\v 3 Gurhe rhwakafuma nka rhurhagwarhire obuchunguke bukulu bulintya? Obu Nahano yenyine ayamagizaga burhanzi, Na bamuyunvaga bahamiriza okweyo myazi eri y'okuli.
\v 4 Na Nyamuzinda alihamiriziza kugerera ebisomezo, n'ebimenyiso, na kugerer'empano za Muka ochere ahag'abantu nk'okwalonzeze.

\v 5 Nyamuzinda arhalihere bamaika obushobozi b'okurhambula eguli liri lyayinja, erila rhuli rhwaderha.
\v 6 Kandi, eyi myazi ehamirizwe n'omu mandiko machere: "Omuntu alinde chiro omuyibuke, mwen'omuntu alinde chiro omushashire?

\v 7 Wamuher'obukulu ahashishi hityu wa bamaika. Wamubumbya obukuze n'olukengo.
\v 8 Wamuher'oburhambo bw'ebintu byoshi."Elibiderhwa mpu Nyamuzinda aher'omuntu oburhambo bw'ebintu byoshi, k'oku derh'oku arhalekaga chiro na chintu chiguma. Chiro byakabantya, kugera nabuno rhurhabwene oku ahabirwe obuhashe bw'ebintu byoshi.

\v 9 Aliko ebirhuli rhwabona byebi: Yesu alijirirwe kuba n'oburhambo ahashishi hityu lya bamaika kulonza oku lukogo lwa Nyamuzinda, Yesu afe enyanya z'abantu boshi. Nantyo kugerera olo lufu lwamugereraga, ahabirwe obukuze n'olukengo.
\v 10 Nantyo byalihemere oku Nyamuzinda walemaga n'okubichunga bwinja, amujira Yesu kuba mwimana kugerer'amalibuko, kulonza alerhe bana banene kuba baguma b'obukuze bya Nyamuzinda. Bunola Yesu yi walongolaga abantu babe n'obuchunguke.

\v 11 Yewe anaches'abantu kurheng'omu byaha, na balala bachesezwe naye, boshi bali bana ba Darha Muguma. Chechirhumire Yesu arhayunvirhe shonyi kubahamagala beneberhu.
\v 12 Bunola aderhere:"Nyamunda, nayamagize omwazi gwawe kubeneberhu, n'oku kuza omu chigusho chabantu."

\v 13 Kandi aderhere:"Namulangalira Nyamuzinda." Na kandi aderhere:"Nyono ndi hano haguma n'abana bani Nyamuzinda ampaga."
\v 14 Bunola abobana bali ban'omuntu, baherh'omubiri n'eshagama, Yesu konakuguma alirholerhe oborhere bwa mwen'omuntu. Ajiragantya kulonza kugerer'olufu lwage amulimbule Lyangombe waliherh'obuhashe b'okulerh'olufu.
\v 15 Konakuguma alishwekwire balala boshi balilamire nkabaja omu kalamo kabo koshi enyanya lyokuyubaha olufu.

\v 16 Bunola, arhaliyinjire kugwasa ba malaika, aliko ayinjaga kugwasa bene Abrahamu.
\v 17 Enyanya ly'antyo byalimuhere ashushe benebabo mu byoshi, kulonza mpuyaba mugula mukulu w'obonjo na mulangalirwa omu mikolo yag'embere za Nyamuzinda, na kw'eyole njira ebyaha by'abantu byababalirwe.
\v 18 Na bunola yewe yenyine alirhangwirwe n'okulibuzwa, aherh'obuhashe b'okugwasa abali omumarhangulo

\c 3
\cl Chigabi 3
\p
\v 1 Enyanya lyantyo, beneberhu, mwabo mwahamagerwe na Nyamuzinda muli na bantu bage kuguma nerhu, mukengere bwenene enyanya za Yesu, yeri ntumwa na mugula Mukulu w'obwemere rhuherhe rhwayamagiza
\v 2 Yewe aliri mulangalirwa embere za Nyamuzinda amuyimanza kw'akola kasi, nk'oku Musa alire mukozi mulangalirwa omu nyumpa yoshi ya Nyamuzinda.
\v 3 Omumbasi w'enyumpa anakengwa bwenene kulusha enyumpa. Nantyo kona kuguma Yesu akwanene ahabwe olukengo lunene kulusha Musa.
\v 4 Kubinali ngasi nyumpa enayumbakwa n'omuntu, aliko Nyamuzinda yiwayumbakag'ebintu byoshi.

\v 5 Musa aliri mwemezi omu nju yoshi ya Nyamuzinda nka mukozi na muhamiriza w'emyazi nji ya derhwa buzinda.
\v 6 Aliko Kristu ali nka mwana omu nju yoshi n'eyo nju ye rhwabano, nka rhufarhire bwenene obulangalire bwerhu, n'obukuze bwerhu kuhik'obuzinda.

\v 7 Nantyo, nkoku Muka Mweru aderhere:"Zene mukayunv'omulenge gwage,
\v 8 murhajirag'emirhima yenyu mizibu nka mango gokuluba, nka lulala lusiku barhangalaga Nyamuzinda omu rungu.

\v 9 Omola rungu, bayisho bali ntangwire nabo balibwene byoshi nabajiriraga mu myaka makumi mane.
\v 10 Enyanya ly'ebyo, nagaya eburha lyabo, nanaderha: Aba bantu b'aherer'esiku zoshi. Nabo barha kulikir'enjira zani.
\v 11 Nantyo, nalahira n'oburhe okubarhaja ahandu nabarheganyizaga h'okuhumukira.

\v 12 Nantyo beneberhu, mulole bwinja, ahakagarhi kenyu harhabaga chiro n'omuntu muguma oherh'omurhima gubi g'okurhayemera, kuger'akachihira akaba hale na Nyamuzinda oherh'akalamo.
\v 13 Aliko muhanulane ngasi lusiku luderherwe zene harhaga muguma wenyu wajir'omurhima guzibu oku bunganyi bw'ebyaha.

\v 14 Bunola rhweshi rehulamire omuchinyabuguma haguma na Nyamuzinda na Kristu ayakaba rhwalinga kuger'obuzinda bula bulangalire rhwahabwaga okumurhondero.
\v 15 Emyandiko echere enderhere:"Enkaba zene mw'akayunv'omulenge gwa Nyamuzinda, mumenye mwaka zibuhy'emirhima yenyu nk'okubasho bajiraga omu rungu, kula basho bajira emango bagomera Nyamuzinda."

\v 16 Bantu bahe bayunvag'omyazi ya Nyamuzinda b'ana goma? Karhali balala boshi balilongwere na Musa kurheng'eMisiri?
\v 17 Kandi bantu bahe b'agayisaga Nyamuzinda mu myaka makumi mane? K'arhali bala boshi bajiorag'echaha, bahena n'okufir'omurungu?
\v 18 Kandi bantu bahe Nyamuzinda alahiriraga mpubarhaja ahantu hokuhumukira abarheganyizaga? K'arhali balala balahiraga kumukenga?
\v 19 Nantyo rhubwene oku barhalichigalire kuja mw'omwala mahumukiro enyanya z'okurhayemera kwabo.

\c 4
\cl Chigabi 4
\p
\v 1 Okubon' okwechila chiragane chokuj'omu bushagaluke bwage chichiri haguma nerhu, murhayubahaga, muguma wenyu njakafundi hika.
\v 2 Bulala kubinali, nerhu rhwayigirizw'omwazi gwinja haguma nabo. Aliko gula mwazi bayunvaga gurhabayungulaga chintu, bulala gurhachishwekeraga haguma n'obwemere bayunvirhe.

\v 3 Rhwabo rhwayemerere okuja mobo bushagaluke oku byaderherwe: kula nalahirag' oku burhe bwani, barhaj'omu bushagaluke bwani: n'e mirimo yoshi yalihwere baheba hesimikiro ly'e gulu.
\v 4 Bulala haly'ahandi haderhere ok'omu lusiku lwa mushanvu Nyamuzinda alek'e mirimo yage yoshi ahumuk'olusiku lwa mushanvu.
\v 5 Na kandi, mwechi chigabi: Barhaj' omu bushagaluke bwani.

\v 6 Bulala bichibikirwe bagum' oku jamo, nabo balala bagwerh' echiragane barhajagamo enyanya ly'olugomo lwabo.
\v 7 Nyamuzinda aheba holwindi lusiku, zen' aderh' omu Daudi, n'eyuma lya siku zinene nk'oku byarhangagi derhw'embere: Zen'eri mwankayunv' omulenge gwage, murhajirag' e mirhima yenyu mizibu.

\v 8 Bulala nka Yoshua nkahumusaga barhankachiderher' enyuma lyah' olwindi lusiku.
\v 9 hali olusiku loku humuka lubikirw'oku lubaga lwa Nyamuzinda.
\v 10 Bulal' ohumusizwe na Nyamuzinda na humuka n'omu mirimo yage, nka kula Nyamuzinda ahumukag'omu yage.
\v 11 Rhuchihan'okuj'omu buluhuko, yiharhajira warhogera m'olo lwiganyo l'olugomo.

\v 12 Bulal' omwazi gwa Nyamuzinda gulamire guna shinganene, gurhyazizwe nka kere ka moji mabiri, ka rhula ka nagab' omuka n'omurhima, amavuha n'omokwa; gunamenyer' entanya n'enganiza z'omurhima.
\v 13 Ntachiremwa chibishirw'embere zage, aliko byoshi buribusha binabokana omu mesho gowinji warhuchir'olubanja.

\v 14 Nantya, bulala rhugwerh' Omugula mukulu warhalukir' ebichu, Yesu, Mwene Nyamuzinda, Rhuser'omu bwemere rhuhamiriza.
\v 15 bulala rhugwer' Omugula orhakagala kuyunv' obuzamba bwerhu; obo ageragezwa kuguma nerhu omu byoshi, buzira kujir'echaha.
\v 16 Kusiga rhushegerere n'obulangalire ntembe y'obonjo, yirhubon' obubabale, n'okuba n'eragi ly'oburhale oku birhukenere

\c 5
\cl Chigabi 5
\p
\v 1 Ngasi mugula walondwer' omu bantu aheberweho enyanya ly' abantu omu mikolo ya Nyamuzinda, okukazi lerh' entulo n'empero oku byaha.
\v 2 akachishigira ebihwinja n'abaherere, bulala naye agwerh'obuzamba.
\v 3 Enyanya ly'okola chechirhumir'akwanene rhange kurhulira ebyaha byage ye nine, kuguma ne byo lubaga.

\v 4 Nta muntu ochiha obu burhwali nkarhahamagalagwa na Nyamuzinda, nka kula Haruni aliri.
\v 5 Na Kristu arhachihag' obukuze bw'okuba Mugula mukulu s'afarha omwazi g'owa mubwiraga: Oli Mwana wani na kuburhire zene!

\v 6 Nka kul' aderh' ahandi oli Mugula wesikuzoshi aka Melikisedeki.

\v 7 Yew' omu siku z'omubiri gwage arhul' amahuno n'okuyama n'emiziga n'amahuno n' emiziga okuwagalaga kumuchungul' omu gufa, naye ayunvirizwa enyanya z'obukenge ayigire.
\v 8 Nachiro akaba aliri Fula achirhohya omu malibuko abwene,

\v 9 Naye amalire kuhirwa enyanya omu buchese, aba oku bamukengere nin' obuchunguke bw'esiku n'amango,
\v 10 Nyamuzinda amuhamagala Mugula mukulu aka Melekisedeki.
\v 11 Rhwuherhe binene rhwaderh' enyanya ly'ebyo, n'ebintu bizibuhir' okuderha, bulala murhayanguhir' okuyunva.

\v 12 Nenyu kurhenga mira mwa kwanen' okuba bigiriza, muchiri mwalonz'oku yigirizwa kurhonderer'oku nyigirizo zirhanzi za Nyamuzinda, muyinjire kulonz' amarha s'arhali nbiryo bikomere.
\v 13 Ngasi ochiriwalonz'amarha arhakomer' emyazi y'okuli, bulal'ali mwana.
\v 14 aliko ebiryo bikomere biri bya bantu bakulire, kwa bola bakulikiz' okuli bamanyer' ebinja n'ebibi.

\c 6
\cl Chigabi 6
\p
\v 1 Chechirhumire, rhukalek'enyigirizo zirhanzi za Kristu, rhwabanguliza mpu rhuhikir'oku buchese, na buzira kushingirira kandi oku bijiro bifire,
\v 2 obwemere oku Nyamuzinda, enyigirizo z'obubatizo, z'okuhirwa kw'amaboko, n'okufuka kw'abafire, n'olubanja ly'esiku n'amango.
\v 3 Ebyo binji rhwajira nka Nyamuzinda ayemerere.

\v 4 Bulala birhagalikene oku balala bahabirw'obuchese, bagez'empano z'empingu, bashangira na Muka Mweru,
\v 5 bagez'oku mwazi mwinja gwa Nyamuzinda n'emisi y'amango gayinja,
\v 6 bakumbala, emyuma lyaho barhankachinjirwa bahyahya na chiro bahungama bulala balibwiza Mwene Nyamuzinda obwa kabiri omu mirhima yabo n'okumuh'eshonyi embere z'abantu.

\v 7 Bulal'echihugo chinya mw'envula buli mango n'oku yera mw'eshogo z'okurhabala abahinzi, chinashombol'emigisho emwa Nyamuzinda;
\v 8 Aliko nka chakayera emishaki n'omusihe chanalahirwa, chanakomwa, buzinda banachidwik'omuliro.

\v 9 Aliko bazigirwa, nachiro rhwaderhantyo, rhuchizerere ebintu binja enyanya z'enyu n'ebyakamar'oku bwemere.
\v 10 bulala Nyamuzinda arhali mubi mp'ayibirir'emikolere yenyu, n'obuzigire mwayerekanaga oku zino lyage, mwakolere munalimwakola oku bachesibwa.

\v 11 Rhuchifinjir'oku ngasi muguma wenyu ayerekan'obo bushiru kuhik'obuzinda agwarhirir'obo bulangalire,
\v 12 Kuhantu murhankalekerera, munayige abanyabwemere n'okukomerera bayima endaganyo.

\v 13 Amango Nyamuzinda ahaga Abrahamu echiragane, ajir'endahir'oku yenine s'aliko arhajirag'endahir'oku ye mukulu kumulusha,
\v 14 aderha: kubinali nji nakugisha nji nayushula obuko bwawe.
\v 15 Nantyo Abrahamu achinganir'agera kweyo ndaganyo.

\v 16 Nabo, abantu banjir'endahiro oku babakulire, N'endahiro enamal'obuhaka boshi n'okuhikiriz'endagane.
\v 17 checharhumire Nyamuzinda alonz'okuyerekana loshi oku ba njibayima endagano y'erhahindamuka eyumangirwe n'endahiro,
\v 18 Nantyo, oku bintu bibiri birhahindamuka, omubyo birhakagalikana Nyamuzinda abeshe, rhubon'oburhuliriza bukomere, obo bubwaliri malibirhiro g'oku farhirir'omulangaliro rhwalaganywaga.

\v 19 Ogu mulangaliro, rhugugwerhe nka simikiro ly'omurhima, simikiro ly'okuli linakomere; lirhula kuger'omu busika, omu Yesu ajir'enyanya lyerhu
\v 20 orhushokolera, wajirirwe Mugula mukulu w'esiku n'amango, oku Melekisede-ki aliri.

\c 7
\cl Chigabi 7
\p
\v 1 Bulal'oyula Melekisedeki, mwami w'e Salemi, Mugula wa Nyamuzinda oli nyanya owabugananaga n'Abrahamu amango ahimaga, amugisha;
\v 2 Abrahamu amuh'echigabi ch'ekumi ch'obugale bwage boshi, (k'okuderha kw'ezino lya ali; mwami w'okuli, kandi ali mwami w'omurhula)
\v 3 arhagwerh'eshe, chiro nina, chiro babusi, arheherh'omurhodero gw'esiku zage, chiro n'obuzinda bw'akalamo kage, s'aliko ashushanyizwe na Mwene Nyamuzinda ali Mudahwa kuhik'okubuzinda.

\v 4 Nantyo, mulolage gurh'oyu muntu aliri mukulu, chiro n'Abrahamu darha werhu mukulu amuh'echiguma ch'ekumi
\v 5 n'omu bana babalawi bahabirw'emirimo y'obugula baherh'erhegeko ly'ehano ly'okurhol'echiguma ch'ekumi oku bantu babo, benebebo, chir'aba barhengere omu buko bw'Abrahamu.
\v 6 Alik'olala wali n'oluburhwa lwage haguma nabo arhola echigabi chekumi emw'Abrahamu agish'oyo w'echiragane.

\v 7 Aliko buzira buhaka omudorho agishwa n'omukulu.
\v 8 Nantyo, bala barhol'echekumi balibagufa, aliko aho abimenyikene okw'alamire.
\v 9 Rhwanaderha oku kugerera Abrahamu chiro n'omulawi warholaga echekumi naye arhulaga echekumi.
\v 10 Bulala lawi aliri omunda yage amango Melekisedeki abuganaga Abrahamu.

\v 11 Nantyo, akaba obuchese bwaligalikene kugerera obudahwa bwa balawi bulal'oku budahwa kw'amarhegeko gayikala gaherw'olubaga, bichi byarhuma wundi mugul'ayinja nka Melekisedeki, orhali nka Haruni.
\v 12 Bulala obudahwa bukahindamuka n'amarhegeko g'anahindamuka.

\v 13 Bulal'oderher'ebyo ali w'ogundi mulala na ntaye w'omu mulala gwabo wakolere oku lurhamba.
\v 14 Ntay'orhenji oku Nahamwerhu ali w'omulala gwa Yuda mulala Musa arhaderhagak'oku biyerekere obudahwa.

\v 15 Nkand'emyazi rhuliderha echiyerekene loshi, nk'owindi mudahw'akayinja oku lwiganyo lwa Melekisedeki;
\v 16 arhali mudahwa oku hano ly'erhegeko ly'omubiri, alik'oku misi ya kalamo karhahwa;
\v 17 Bulala balihamiriz' enyanya zage: Oyo ali mudahwa kugez'okubuzinda oku lwiganyo lwa Melekisedeki

\v 18 Bulala hal'oku kulwa kw'erhegeko lya rhangaga enyanya ly'obuzamba bwalyo, nalyo lirhachikwanene.
\v 19 Bulal'eryo lirhahikiriz'omwazi; alik'obulangalire bwinja bwenene bwahirwaho ahali halyo, n'enyanya zage rhushegerere Nyamuzinda.

\v 20 N'okuna lirhajirikaga buzira ndahiro,
\v 21 bulala bala bandi babaga badahwa buzira ndahiro; aliko yewe haguma n'endahiro emolala wamubwira: Nahano ahebere h'endahiro arhanahinduka, oyo ali mudahwa kuhik'obuzind'oku lwinganyo lwa Melekisedeki.

\v 22 Yesu Nantyo ali mwimangizi w'endagano eri nyinja bwenene.
\v 23 Kandi haliri badahwa banene olufu lwachikiranya lurhazigaga babahw'esiku zoshi,
\v 24 siyewe kul'okuba ali w'esiku n'amango, obudahwa bwage burhankarhenga.

\v 25 chechirhumire nagala ku chiza losho abashegerera Nyamuzinda kumugerera, alamir'esiku zoshi lyagala kubahemera.
\v 26 kubinali ntyo rhukwanen'okuba n'omudahwa mukulu, mwimana, orhali ku shembo, oshera haguma n'abanyabyaha, oli enyanya kurhaluk'amalunga.

\v 27 Yewe nta bulagirir'agwerhe nk'abandi badahwa bakulu, bokurhul'entulo ngasi lusiku, burhanzi oku byaha byage yenine, na kandi n'oku byaha by'olubaga: ebi abijire chaliguma amango achihana nterekero.
\v 28 Bulal'erhegeko linayimika abolokazi mpu babe badahwa makulu, aliko echinwa ch'okuchigasha chayinj'enyuma wamarhegeko chayimikir'omwana obaho esiku n'amango .

\c 8
\cl Chigabi 8
\p
\v 1 Nantyo, omwazi mukulu mw'eyi myazi rhugwerhe rhwaderha yeyi: rhuherhe Omudahwa mukulu alintya, ayiker'oku kuboko kw'okulyo kw'echirhi cha Nyamuzinda omu karhi k'empingu.
\v 2 Mukozi wa hantu ha chesezwe n'echilaalo ch'okuli, chi Nahano ayimanzaga, aliko barhali bantu.

\v 3 Bulala ngasi mudahwa mukulu ahebwah'okurhulw'oluhembo n'entulo; nantyo naye ntyontyo abe n'echintu chongurhula.
\v 4 achibag'alir'omw'igulu, arhankabere mudahwa; bulala hali abahwa banarhul'entulo nk'okwerhegeko lyalirhegekere;
\v 5 abo bakola lwiganyo n'echichu ch'emyazi y'empigu, nk'oku Musa alihanurwe na Nyamuzinda, amango alonza oku kwiza echochilaalo bulal'aliderhere: Olala ojir'ebintu byoshi oku lwiganyo lula wayerekanag'oku musozi.

\v 6 Aliko akal'agwerh'ebikwirire bwenene, nk'okwali munywanisa w'echirane chinja bwenene, eryo liyimangir'oku biragane binja bwenene.
\v 7 bulala nk'echirane chirhanzi chirhaliherh'obuzamba harhankashoderw'ahantu hechakabiri.

\v 8 Bulala haguma n'enderho y'okubakalihira yi Nahano abwiraga Israheli; lola, esiku zayinjire, Nahano amaderha, nani najirir'olubaga lwa Bayisraheli n'olubaga lwa Bayuda echiragane chihyahya,
\v 9 chirhaba nk'echiragane chila najiraga na b'eshe, amango nabafarharag'efune oku bakula omu chihugo ch'e Misiri; bulala barhagendekeraga omu chiragane chani, nani ntachibalagagako, ku Nahano aderhere.

\v 10 Bulal'echi chiri chilagane najira n'olubaga lw'eYisraheli, buzinda bwa zila siku Nahano aderhere; naheb'amarhegeko gani ahagarhi kabo, omu mirhima nagayandika: Nani naba Nyamuzinda wabo, nabo baba bantu bani.

\v 11 Nji barhayigirizana buli muntu n'omwalugwe wage, omuntu na mwene wabo, oku derha mpu: omanye Nahano; bulala boshi nji bamenya kurhenga oku mudorho kugera oku mukulu wabo.
\v 12 Bulala nji nababalir'ambi gabo n'ebyaha byabo ntachibiyibuka.

\v 13 Omu kuderha: echiragane chihyahya ajira chila chirhanzi okuba cha mira. Aliko echintu chankaba cha mira, n'okushaja eyi chikola chihwere.

\c 9
\cl Chigabi 9
\p
\v 1 Nantyo chiro n'echiragane cha mira chigwerh'erhegeko ly'okuharamya Nyamuzinda n'ahantu hage hachesezwe omw'igulu.
\v 2 Bulal'echilaalo cha yumbakagwa omu busika mwalihamagerwe hantu hachere, mwaliri echimole, Echishasha, n'emigati y'enterekero.

\v 3 Enyuma w'echizimbero cha kabiri chaliri chilalo chi hamagerwe hantu hachere,
\v 4 olusho lw'ehoro, n' esanduku y'endagano yali funikirwe n'ehoro enyunda zoshi, n'omuyo mwaliri engumbu y'ehoro yaliri mwa mana, n'agarhi ka Haruni kayasaga, n'amabale g'endagano.
\v 5 N'enyanya zayo bamalayika bobulangashane bahir'echichuchu oku ntebe y'obubabale; nantyo rhurhanka derha kw'eyi myazi muguma oku muguma.

\v 6 Nantyo ey'ebibintu bimali kwizwa, abadahwa baj'omuchiralo cha burhanzi esiku zoshi bahikiriza ebiloler'oku haramya.
\v 7 Alik'ochiralo cha kabiri Omudahwa mukulu yenine yiwakazagi jamo liguma oku mwaka, alik'arhali buzira shagama ahanire oku yenine, n'oku byaha by'obuhwinja bw'abantu.

\v 8 Muka Ochere ayerekan'omwazi oku njira y'okuj'ahantu hachere harhaza chiyerekana, echiralo chaburhanzi chichiyimangire.
\v 9 eyi lw'olwiganyo lwa muzino siku; amango entulo y'enterekero ekola yahanwa, birhankagalika okuhikiriza entimanya oku walerhag'enterekero,
\v 10 kuba liri rhegek'omujira y'omubiri gonine,(ebintu by'okulya n' okunywa, n'okuyoga kwa ngasi lubero) zalirhegekerwe amango g'okuchichesa kuhyahya.

\v 11 Aliko Kristu amalire yinja nka mudahwa mukulu w'emyazi minja ya chiyinja, oku chilalo chikulu chishinganene bwenene, chirhajirwaga n'efune k'okuderha, erhali y'en'egulu.
\v 12 Aliko arhali oku shagama y'ebihebe changwa y'anyena, alik'oku shagama yage yenine ajamo liguma lyonine ahantu hachesizwe yimbona obuchunguke bw'esiku n'amango.

\v 13 Bulala okw'eshagama y'echihebe n'enyena n'oluvu lw'enkavu lwakazaga shukizw'ababi lwakazaga komya n'okushuk'omubiri;
\v 14 Nantyo bwenen' eshagama ya Kristu yew'omurhima gw'esiku n'amango achihana yenin'e mwa Nyamuzinda, okuba nterekero erhagwerhe shembo yeyashuk'entimanyo zenyu, n'ebijiro by'olufu, yimubon'oku kolera NYamuzinda ozene?
\v 15 Enyanya z'oko, yewe ali munywanisa w'echiragane chihyahya bulala balabahamagerwe bakamarh'echiragane ch'omwimo gw'esiku n'amango, bulal'olufu lwajirirw'omu kuchungula amabi gajirwagw'eshishi w'echiragane cha burhanzi.

\v 16 Bulala akaba echiragane ch'okuyima cha huna ulufu l'olala wachiralaga.
\v 17 Bulala echiragane ch'okuyima chigwerhe emisi amango wachijiraga achiri m'omuka.

\v 18 Enyanya lyantyo chiro na chila chiragane chamira chirhabaga buzira shagama.
\v 19 Bulala amango Musa amalaga kubwira abantu ngasi rhegeko kulala burhegeke burhumire, arhola eshagama y'ebishakalume by'empene, haguma na menji n'oboya bw'omuduku, n'ehishukizo, ashukira oku chitabu n'oku bantu.
\v 20 Aderha: Eyi eri shagama mwarhegekerwe na Nyamuzinda.

\v 21 Chiro n'olurhamba n'ebintu byoshi by'oku kuzizamo ashukiza ntyo nabyo.
\v 22 N'omu marhegeko ebintu byoshi bicheswa n'eshagama, na buzira shagama nta kucheswa.

\v 23 Intyo oku lwiganyo lw'ebiba empingu byali hunire oku cheswa ntyo, s'aliko eby'empingu oku ntulo nyinja kulisha ezila.
\v 24 Bulala Kristu arhajaga ahantu hachere hajiragwa n'efune z'abantu l'olugero l'okuli'aliko aja omu mpingu abonekana embere za Nyamuzinda enyanya zerhu.

\v 25 Arhajagamo mpu achihane bulimango, nka kulala omu dahwa akazagi jira buli mwaka anaja aho hantu hachere n'eshagama erhali yage.
\v 26 Nka kubyali ntyo bya kahunire akazilibuzwa buli mango kurhonderera oku murhondero gw'egulu, aliko lero liguma lyonine, oku buzinda bw'egulu abonekene okukula ebyaha omu kuchihana yenine.

\v 27 Kona kuguma n'okw'abantu bafa liguma, n'enyuma ly'okufa banajiswa lubanja.
\v 28 Intyo ku Kristu naye ahanirwe liguma arhole ebyaha by'abantu banene, nj'ashubi yinj'obwa kabiri, kurhachiri enyanya ly'ebaha, aliko enyanya ly'abalala bamulingire oku buchunguke.

\c 10
\cl Chigabi 10
\p
\v 1 Intyo kulakuba erhegeko chiri chijuchu ch'ebindi byayinja, arhali eshusho yabyo byonine, birha nka galika chiro n'eliguma oku ntulo banarhula buli mwaka oku hikiriza abayegerere.
\v 2 Akaba arhali ntyo bakalekere okuzirhula: Bulala bali bamukuza bakazheswa liguma bakarhanka chimanyire echaha omu murhima?
\v 3 Aliko mw'ezo ntulo buli lwibuso lw'ebyaha buli mwaka.
\v 4 Bulala birhagalikene oku shagama y'enkavu n'eny'empene oku kula ebyaha.

\v 5 Enyanya by'oku Kristu abere aja omu gulu aderha: Orhalonzaga empero n'entulo, aliko wanjirira omubiri.
\v 6 Entulo z'oku sirezwa n'entulo z'ebyaha orhazilonzaga.
\v 7 Na ntyo na derha lero nyinjire omu mikunjo y'echitabu chiyandikirwe, na jira obulonza bwawe Nyamuzida.

\v 8 Arhanga derha: Enterekero n'entulo, n'enterekero z'okusirezwa n'entulo z'ebyaha orhazilonzaga chiro orhanasimiswaga nazo ezarhulwaga okurhegeko.
\v 9 Buzinda aderha: Tala nyinjire nkole obulonza bwawe okula elirhanzi ya yimanza elya kabiri.
\v 10 M'obu bulonza rhwabwene obuchese omu kuhana omubiri gwa Yesu Kristu liguma.

\v 11 Na buli mudahwa ayumanga buli lusiku oku kola n'okurhula ezonterekero buli mango, zirhakana gala okukula ebyaha.
\v 12 Aliko yewe amango amalaga kurhula enterekero liguma oku byaha kugera esiku n'amango, ayikala ekulyo kwa Nyamuzinda.
\v 13 Ali alindira kuhika bahire abashombanyi bage eshishi w'amagulu gage.
\v 14 Bulala oku ntulo ya liguma ahikiriza kugera esiku n'amango abachesizwe.

\v 15 Na Muka ochere arhuhamirize ntyo aderha:
\v 16 Eyi eri ndagano nji najira nabo. Enyuma ly'ezo siku, Nahano aderhe; nji nahira erhegeko lyani omu mirhima yabo n'omu bwenge bwabo na liyandika.

\v 17 N'ebyaha n'obubi bwabo na buyibagira.
\v 18 Ahali obubabale buli ntyo harhanka chiba entulo y'ebyaha.

\v 19 Lero, mwene werhu rhugwerhe obushobozi bw'okuja ahantu hachere enyanya ly'eshagama ya Yesu.
\v 20 Enjira arhonderaga enyanya lyerhu, mpyahya, ya kalamo, omu mushangi g'oguli mubiri gwa Yesu.
\v 21 Na ntyo rhuherhe omudahwa mukulu omu nju ya Nyamuzinda.
\v 22 Rhuyegere n'omurhima gw'okuli, n'okuhikiriza obwemere, emirhima yerhu akamala kushukiwa omu kuleka entanya zibi, n'emibiri yerhu oku shukwa n'amenji makomere;

\v 23 Rhugwarhe bwenene okuhamiriza obulangalire bwerhu yirhurha hindamuka, bulala owarhulaganyize oli mwemezi.
\v 24 Rhunalolane omu kushunikana omu buzigire n'omu mirimo minja.
\v 25 Rhurhalekaga oku buganana haguma nk'okw'engeso y'abandi, s'aliko rhuhanulane bulala rhubwene oku olo lusiku luli hofu.

\v 26 Bulala eyi rhwanka jira echaha oku bulonza nabo rhwamalire kumenya okuli, harhachiri entulo y'ebyaha.
\v 27 Aliko kulindira obuzibu bw'olubanja n'obuba bw'obukali bw'omuliro nji bwalya aba shombanyi.

\v 28 Omuntu wagayaguza erhegeko lya Musa afire buzira kubabalirwa, oku buhamirizi bw'abantu babiri changwa basharhu.
\v 29 Bichi muganizize? kurhakwanene obuhane bunene omuntu walabarha omwana wa Nyamuzinda, n'okuganjaeshagama y'echiragane ashukwagwa nayo mpu chintu chizingire, n'okujachira Muka w'obonjo ?

\v 30 Bulala rhumenyere owaderhaga ntya: Obuhane, n'okuchihola biri byani, nyono na bijira na kandi Nahano ahana abantu bage.
\v 31 Biri bintu by'okuyunaha oku rhogera omu maboko ga Nyamuzinda ozene.

\v 32 Aliko, oyibuke olusiku lurhanzi, enyuma ly'oku kolezezwa mwakomereza ebirha omu malumwa manene.
\v 33 Oku lunda luguma mwajirwa chilangaliro omu njira y'okushimangwa n'amalumwa, n'oku lwindi lunda mwabere mwashimanana na bola bajiragwa ntyo.
\v 34 Bulala mwababalira balala baliri omu mpamikwa mwana yemera oku bushagaluke okunyegwa biri byenyu, mumanyire omu mpingu, bikwirire kulusha n'eby'okulama.

\v 35 Na ntyo murhabulaga obulangalire bwenyu bulala buherhe oluhembo lunene.
\v 36 Bulala mukenere, oku komerera, eyi mu mala kujira obulonza bwa Nyamuzinda mubone echi mwalaganywaga.
\v 37 Bulala kashanji kageke, oy'oku yinja ayinja chiro arhanalegama.

\v 38 Alik'owokuli alama oku bwemere, naye akagaluka enyuma OMuka gwani gurha gwerhe obushagaluke naye.
\v 39 Aliko rhwewe rhurhali bantu b'okugaluk'enyuma s'aliko rhuli haguma na bala bagwerhe obwemere bw'oku chungula emirhima yenyu.

\c 11
\cl Chigabi 11

\p
\v 1 Intyo obwemere buba n'okuli kw'emyazi y'okunihirwa, okuyemerwa bwenene emyazi erhaboneka.
\v 2 Bulala intyo kwa bashaja berhu baderhaga.
\v 3 Oku bwemere rhunamenya okw'egulu lyalemagwa oku mwazi gwa Nyamuzinda nantyo ebintu bibonekana birhajirwaga oku bintu bibonekana.

\v 4 Oku bwemere Haberi arhulira Nyamuzinda entulo ekwirire kulusha Kaini chiro akaba afire achiri aderha.

\v 5 Oku bwemere Enoka ahekwa arhabonag'olufu. Chiro arhabonekaga bula Nyamuzinda amubarhula, bulala embere y'oku barhulwa kwage abaga aderherwe okusimisa Nyamuzinda.
\v 6 Aliko buzira obwemere orhakagala kusimisa Nyamuzinda, bulala omuntu oja emwa Nyamuzinda arhange ayemere oku Nyamuzinda aliho n'okwanaha abamushonda oluhembo.

\v 7 Oku bwemere Nyamuzinda amalire ku bwira Nowa emyazi y'ebinwa birhaziboneka n'omu kuyunva Nyamuzinda ayumbaka enkuge ya chungula enju yage. Intyo arhambula egulu abafula y'okuli kubonekana oku bwemere.

\v 8 Oku bwemere Abrahamu amango ahamagalagwa agenda ahantu ajibon'akashambala akenga arhanamenyere ngahe aja.
\v 9 Oku bwemere alama omu chihugo chirhali chage, alama omu hema haguma na Isaka na Yakobo bayima haguma naye omu chiragane. Bulala aliri ahamagalirwe echishagala ch'echihando.
\v 10 Chilala Nyamuzinda yenyine ye mumbasi wacho n'amulenga wacho.

\v 11 Oku bwemere chiro sara yenine ahabwa obuhashe bw'okuba bukule eyabaga arhalukire emyaka yage bulala alimuganjire omubanya chiragane bashinganyanya.
\v 12 Nantyo babwirwa na muntu muguma naye aliri nka murhimba, bantu banene nka nyenyezi z'emalunga obunene bwabo bali nka muchanga g'omu nyanja gurhakagalika kuganjwa.

\v 13 Aba boshi bafire omu bwemere, barhazi habwa ebyo biragane, aliko balibibwene mukurhengerera hale n'okuzishagalukira n'oku derha okubali bahisi na bagenzi muchihugo.
\v 14 Bulala abaderha emyazi eri nkeyi eyerekene bwinja oku bali balonza echabo chihugo bonine.

\v 15 Nakaba bakayibuka echihugo chabo barhengagamo barhankabwene ahaba kagalukira. Aliko abachifinjir'echo chihugo ch'empingu.
\v 16 Nantyo Nyamuzinda arhankabona eshonyi oku hamagalwa Nyamuzinda wabo bulala bakwiziz'echishagala.

\v 17 Oku bwemere Abrahamu arhangulwa, arhula Isaka ab'entulo na yewe wahabwaga echiragane aliri arhula omwana wage, omwana w'echinege.
\v 18 Nechi, yewe wabwiragwa ok'omu Isaka eburha lyawe nji lyahamagalwa.
\v 19 Aganja oku Nyamuzinda akagala kumufula omu kurhenga ekuzimu, ashube mubona kurhenga eyomunda oku lwiganyo.

\v 20 Oku bwemere Isaka agisha Yakobo na Esau chiro n'omu myazi y'ebintu nji byayinja nji byayinja buzinda.
\v 21 Oku bwemere Yakobo aliri omulufu agisha ngasi muguma omu bana bage, Yusufu aharamya ayegemera agarhi kage.
\v 22 Oku bwemere Yusufu aliri hofu n'obuzinda bwage aderha omwazi gwarhenga emwa bana ba Isiheli, aderha omwazi gwamavuha gage.

\v 23 Oku bwemere Musa, amango aburhwaga abishwa myezi esharhu n'ababusi bage, bulala balibwene okwali mwana mwinja; chiro barha yubahaga erhegeko lya mwami.
\v 24 Oku bwemere Musa abere akula alahira oku hamagalwa mwana wa mwali wa Farao.
\v 25 Abona oku kulikwinja oku rhindibuka haguma n'abantu ba Nyamuzinda hali h'oku chishagalusa omu byaha omu siku zigeke.
\v 26 Ayibuka ok'oku bonererwa kwa Kristu bulibugale bukulu kulusha obuhirhi bw'e Misiri bulala alinihire olo luhembo.

\v 27 Oku bwemere arhenga e'Misiri omu kuyubaha obuhane bwa mwami, bulala alinihire okubona olala orhabonekana.
\v 28 Oku bwemere ajira e'Pasaka, n'oku shukira eshagama, enyanya y'olala warhindibuza abana bw'olubere arhabahumagako.

\v 29 Oku bwemere bagera omu nyanja ndukula, nk'omu chihugo chiyumire; aba misiri balonza okujira ntyo bamirwa.
\v 30 Oku bwemere enkuta z'e'Yeriko zakumbagala, amango zabaga zazungulukirwe siku mushanvu.
\v 31 Oku bwemere Rahabu, olala muhushi arhayirhwagwa haguma na balala babi; bulala ayegerezaga zilala ndabi z'omurhula.

\v 32 Nani nderhe bichi kandi? Bulala amango orhankaderhere derhe omwazi gwa Gideoni na Baraka na samusoni na Yefuta na Daudi na Samweli n'Ezababeli;
\v 33 Abo oku bwemere bahima obwami bwabami, bajira okuli, bahabwa echiragane, bashweka obunu bw'entale,
\v 34 bazimya emisi y'omuliro, bafuma obukali bw'omupagani. Bahabwa emisi enyuma y'obolokazi, baba banyamisi omu ntambala, balibisya enfolamiherhoza bahisi.

\v 35 Abakazi barhola emirhumba yabo yafulwaga. Aliko abandi bakoromeswa bwenene n'oku yirhwa, barhayemeraga obuchunguzi; mpu yi babona obufuke bwinja;
\v 36 Abandi barhangulwa omu kubonererwa n'okushurhwa na ntyo bashwekwa, n'oku hebwa omu mpamiko;
\v 37 Bashurhwa oku mabale, bachibwa n'emisumeni, barhangulwa, bayirhwa n'emipanga; bazunguluka-bazunguluka banayambere empu z'ebibuzi; baliherhe entanya, barhindibuzwa, bajirirwaamabi;
\v 38 Abantu babalala egulu lirhalikwanene okubanabo, baliri bali bazunguluka - zunguluka omu mpinga n'omu ntondo n'omungurhu n'omubiriba by'echihugo.

\v 39 Naba bantu boshi bamalire kuderhwa enyanya y'obwemere bwabo, barhahabwaga chiragane;
\v 40 Bulala Nyamuzinda abaga arhubikire rhwabo echintu chinja, mpu bowe barhabaga bashinganyanya buzira rhwabo.

\c 12
\cl Chigabi 12
\p
\v 1 Nerhu k' okuderha, bulala rhuzungulukirwe n' abadimwe banene nka ntya, rhukabulire ngasi kantu kakarhulemerera, n' echaha chakarhushweka kubuyabuya, rhulibirhire omu mukolo gurhulingire rhubegere,
\v 2 rhulangalire Yesu, ya Nahano yenali murhabazi omu buyemere bwerhu, yi walibuzagwa oku musalaba, agayaguzwa kubikubi, mpu ly' aba n' obushagaluke balimubikire,, aji yikala ekulyo kw'entebe y'obwami ya Nyamuzinda.
\v 3 Lero mujage mwayibuka bwenene oyula walindiraga buhanya bungana ho bw'abanya byaha bumuje kwo, mpu limurharhama chango yi murhayolokola omu mirhima yenyu.

\v 4 Mwabo, murhazilwisa entambala chiro y'eshagama mukahima echaha;
\v 5 Kandi mwayibirire malala mahunulo na babwirire nka kulala wakashambalira abana bawe: Mwana wani orhagayaguzaga obuhanya bwa Nyamuzinda, chango orhagayaga eya kakukalihira.
\v 6 Bulala omusimwa wa Nyamuzinda, ana muchesa namalibuko, yewe anashurha ngasi mwana wage wa muyankirire.

\v 7 Obuhane b'obwakarhuma mwalindira; Nyamuzinda anabarhola nka bana bage, bulala nde mwana orhashurwa n'eshe?
\v 8 s'aliko eri mwakabera buzira buhane kuguma nabalala boshi baliriho k'okuderha eri nenyu munali bana b'embuga, chi murhali bana b'omunju.

\v 9 Haguma n'oko nerhu rhwaliherhe badarha barhuburhaga bakazagi rhuha obuhane, rhwakazikengabo; lero kakurhakaba kukulu rhufukame embere za Darha w'emirhima yerhu, yirhulama?
\v 10 Bulala ntyo kubinali bowe balirhuhanire omu siku zigeke nk'oku bonine bali bwene kushinganene, s'aliko Nyamuzinda yewe, oku bunguke bwerhu, anarhuhana mpu yirhuba bachesibwa kuguma naye.
\v 11 Ngasi buhane oku kasazi kabo burhabonekana nka bwa Kalerha obushagalukire, s'aliko burhe; n'oku buzinda bunalerhera oyola bwa yigirize amalehe g'obushinganyanya bw'obumurhula.

\v 12 Enyanya z'oko, mulambulage amaboko garhamire, n'amadwi gaholere,
\v 13 n'amagulu genyu mumageze omu njira zi kwirire, ly'ebirema birhaheraga, s'aliko kwakaba kwinja bifume.

\v 14 Mulonze omurhula n'abantu boshi, n'obuchesebwa, na buzira bowe, ntaye webone Nahano,
\v 15 muchilange bwenene ntaye okeherwage n'olukogo lwa Nyamuzinda; echisisi ch'amalumwa nji chakabarhogerako n'okulibuza bantu banene, enyanya za ntyo bantu banene nji ba zingiswa.
\v 16 Murhabonekaga mwe Mambaraga chango oku rhayubaha Nyamuzinda, nka Esau waguzaga akashambala kage k'olubere enyanya z'akalyo kaliguma.
\v 17 Bulala nk'oku muna menyere oku buzinda, ajire alonza gurhe akayima emigisho, arhayemerwaga bulala arhabonaga ahakahungamira chiro akaba ahalonza namalira.

\v 18 Bulala murhahikiraga entondo yaka humirweko, ya kolera k'omuliro, chiro n'echichu chi yiragwire, n'omwizimya, n'omulaba,
\v 19 n'omulenge g'omushekera n'omulenge gw'emyazi; chiro ahola balemaga bayunva, babayinginga barhachibwiragwa ogundi mwazi;
\v 20 Bulala barhagalagi komerera mwazi balirhegekerwe: Chiro n'enyama ekayinja huma kw'eyo ntondo bayiririke kw'amabale, chango bayibande echumu;
\v 21 eyo myazi ya yubahisa chiro na Musa aderha: Na mayubaha n'oku dirhimana.

\v 22 S'aliko mwabo mwahikire oku ntondoi y'e Sayuni n'omu chishagala cha Nyamuzinda ozene, Yerusalema y'empingu, naba Malayika bihumbi binene,
\v 23 n'olubaga lunene, n'eshengero lya baburhwa ba burhanzi baliyandikirwe omu mpingu, na Nyamuzinda, ochira abantu boshi olubanja, n'emirhima ya bantu bw'okuli balishinganene,
\v 24 na Yesu munvisikanyi w'abantu omu ndagano mpyahya, n'eshagama y'okushukirwa eli yaderha amenja kulusha elala ya Abeli.

\v 25 Mumenye mwakalahira oli waderha. Bulala akaba abola balahiraga owalemaga wabahanula omu gulu barhanka chungulwa, bwenene rhwabo rhunkachungulwa eri rhwankayaka oyola orhuhanula warhengaga empingu,
\v 26 n'echi omulenge gwage gwadirhimanyaga egulu ago mango; s'aliko lero alaganyize n'oku derha: Nji nashubi dirhimanya egulu, si lirhali gulu lyonine, s'aliko n'empingu nayo.

\v 27 Ogo mwazi, kandi oku liguma, gwa yerekana oku bungisa ebintu byakandirhimanywa nka bintu byalemagwa, yi bilala birhanka dirhimnywa bibeho.
\v 28 Intyo rhukabona obwami burhankadirhimanywa, rhube n'eregi yi rhurhulira Nyamuzinda obukuze b'oku musimisa haguma n'obukenge n'obuba.
\v 29 Bulala Nyamuzinda werhu guli muliro gusireza.

\c 13
\cl Chigabi 13
\p
\v 1 Oku simana kwa baguma kugenderere.
\v 2 Murhalekag'oku yerekan'obusime oku bahisi; bulala omuntyo abandi bayegereza bamalayika buzira kumenya.

\v 3 Muyibuke abali omu mpamikwa nka mushwekwe haguma nabo; nabalibalibuzwa, bulala n'enyu mulinty' omu mubiri.
\v 4 Obuhya bukegwe n'abantu boshi, n'enchingo ebe buzira zinga: bulala Nyamuzinda njahan'abahushi n'abumaguza.

\v 5 Murhabaga n'obusime bw'efuranga: mulek'omujinya musimiswe n'ebintu mugwerhe; Bulala yenaderhere mpu: ntakuleka, ntanakulikirira.
\v 6 Rhwanka derha n'oburhwali oku; Nahano ana ntabala, ntayubaha: gurh'abantu banjira?

\v 7 Muyibuke abemangizi bababwiraga omwazi gwa Nyamuzinda; muna lole obuzinda bw'emilambagirire yabo omu kalamo kabo, muyig'obwemere bwabo.
\v 8 Yesu Kristu aliyen'oyo mulegolo, zene, n'esiku n'amango.

\v 9 Murharhebekagwa n'oku rholwa na ngasi nyigirizo z'olwahanda; bula biri binja omurhima guzibuhe n'olukogo, s'arhali n'ebiryo bulal'abagendere nabyo, barhabonaga bunguke.
\v 10 Rhugwerhe olurhamba, n'abakolera omu chihando barhayemererwe okulya.
\v 11 Emibiri y'ebyo birhungano bulal'eshagama yabyo yahekerwe ahachesibwa n'Abadahwa bakulu enyanya w'echaha, emirhumba yabo yayoswa embuga y'enkambi.

\v 12 Checharhumaga Yesu naye, alibuzw'embuga w'omulyango lyachesa olu baga lwage oku shagama yage
\v 13 yenine; alibuzw'embuga y'omulyango. Rhuhuluke rhumushimbe, embuga w'enkambi rhuheker'omukomo gwage.
\v 14 Bulala rhurhaherhe hantu hokulegama han'oku budaka, aliko rhuli rhwalonz'ahantu hinja.

\v 15 Nantyo, kugerera yewe rhuhe Nyamuzinda enterekero y'obukuze esiku zoshi, gamalehe g'obunu buyamagiz'ezino ly'age.
\v 16 Aliko murhayibagiraga kujira ebinja n'okuchiheba haguma bulala entulo zantyo zisimisa Nyamuzinda.
\v 17 Mukeng'ebirongozi munachirhohye okubo bulala babalang'emirhima yenyu nka bantu nji bahan'oluganjo, nantyo yibagala kubikola omu bushagaluke s'arhali omu mugayo: bulala birhankaba n'akamaro.

\v 18 Murhuhunire n'erhu emwa Nyamuzinda bulala rhuyemer'okurhuherh'entimanyo zinja, rhukalonza kuba n'endabagiro zinja omubyoshi.
\v 19 Nani mbayingingire n'enyu bwenene mujire ntyo, okubuzinda njinagaluk'emunda muli okubisanzi.

\v 20 Intyo, Nyamuzinda w'omurhula, walerhaga kandi Nahano Yesu kurheng'omubafu ye lungere mukulu w'ebibuzi, oku shagama y'echilagane ch'esiku zoshi.
\v 21 Abajire n'enyu mube bashinganyany'omu mirimo minja y'okuhikiriza obulonza bwage abajirir'ebimuberere binja kugerera Yesu Kristu, ahabwe obukuz'emyaka n'emyaka Amina.

\v 22 Aliko mbayingingire, beneberhu, mulembere omwazi g'okuhanula; bulala nabayandikire mwab'okumyazi migeke.
\v 23 Mumany'oku mwenewerhu Timoteo amalire kushwekulwa, akayinja njinababona haguma naye.

\v 24 Mulamuse balala boshi babalongola, n'abachesibwa boshi, benebenyu b'e Butaliana babalamusize mwabo.
\v 25 Olukogo lube n'enyu mweshi! Amina!