hav_reg/48-2CO.usfm

\id 2CO
\ide UTF-8
\h 2 Abakorinto
\toc1 2 Abakorinto
\toc2 2 Abakorinto
\toc3 2co
\mt 2 Abakorinto
\c 1
\cl Chigabi 1
\p
\v 1 Paulo, Ntumwa ya Yesu Kristu oku bulonza bwa Nyamuzinda na mwenewabo Timoteyo, oku shengero lya Nyamuzinda liri e'Korinto, n'okubachesebwa boshi bali e'Akayi:
\p
\v 2 Muhabwe obonjo n'omurhula gurheng'emwa Nyamuzinda Darha werhu n'emwa Nahano werhu Yesu Kristu.
\p
\v 3 Agishwe Nyakasani, Eshe wa Nahano Yesu Kristu, Darha w'obubabale n'okurhuliriza koshi,
\v 4 orhurhuliriza omu malumwa gerhu goshi, bulala, kugerera aga malumwa rhuli chintu omu bigabi bya Nyamuzinda, rhugale kurhuliriza abali omu malumwa!
\v 5 Bulala nk'okw'amalumwa ga Kristu galugire omu kagarhi kerhu, nantyo oburhulirizi bwerhu bwaluga kugerera Kristu.
\v 6 N'akaba rhwababezwe yimubona oburhulirizi n'obuchungeke; n'akaba rhwarhulirizwe, yi nenyu mubon'oburhulirizi, bujirika oku malembero gokuheka ago malumwa g'amango rhulembera.
\v 7 N'echinihirizo cherhu emunda muli chiyimangire, bulala rhuyinji oku, akaba mugwerh'echigabi omu malumwa, mugwerh'echigabi omuburhulirizi nenyu.
\v 8 Rhurhalonzeze, okubaleka murhana menyere, beneberhu, okw'amalibuko marhuhikire omu Azia, marhulibwize ngasi mango oku gandi, kurhaluk'emisi yerhu, kuger'oku mango g'okuchik'entege z'okubik'akalamo.
\v 9 Rhwanalema rhwabona okunali okuyimanga kw'akalamo yirhurhanahira echinihirizo omukagarhi kerhu s'aliko rhuchihirire omu kagarhi ka Nyamuzinda, oful'abafu.
\v 10 Yewe arhushwekwire kandi yinji warhushwekula omulufu, rhunagwerhe echinihirizo oku nj'arhushwekula kandi.
\v 11 Nenyu muli mwarhurhabala omu mahuno genyu, chiro n'enshokano rhwahabirwe oku bunene bw'amahuno g'abantu, bantu banene baderhe koko enyanya lyenyu.
\p
\v 12 Bulala okuchikuza kwerhu kuli ntya: obuhamirizi b'omurhima gwerhu, nk'okurhwalambagir'omugulu, na bwenene okulunda lwenyu, n'okubuchesibwa n'obushinganyanya embere za Nyamuzinda, birhali kugerer'obwenge bw'omubiri s'aliko kugerer'obonjo bwa Nyakasani.
\v 13 Rhurhabayandikire echindi chintu nk'ebi muli mwasoma n'ebimumenyere. Nandi nachinihiriza oku nji mwabimenyerera okugera oku buzinda.
\v 14 Nk'oku munamenyere omu chichira oku rhuli bukuze bwenyu, nk'oku nenyu nji mwaba bukuze bwerhu okulusiku lwa Nahano Yesu.
\p
\v 15 Omubulangalire, nalonza kuyinj'emunda muli, yi mugwarha obonjo kabiri;
\v 16 Nalonzaga kugerer'emwenyu yi ngenda e'Makedonia, kandi kurheng'e Makedoniya kuja emwenyu nanji munamperekeze e'Yudeya.
\v 17 K'omukulonz'ebyola, nakoleseze n'obolokazi? Changwa ebishubizo byani byakaba bishubizo bikulikiz'omubiri, kuger'ahabyakab'omukagarhi kani nechi kandi nanga?
\v 18 Nk'oku Nyamuzinda ali mushinganyanya, omwazi rhwababwiraga gurhali nechi kandi nanga.
\v 19 Bulala mwene Nyamuzinda Yesu Kristu, rhwabayigirize omukagarhi kenyu, kungererako, na Silvano na Timoteyo arhabaga nechi na nanga, s'aliko nechi yiwaliri omukagarhi kage.
\v 20 Bulala, okubiyerekeze echiragane cha Nyamuzinda, omu kagarhi kage m'omuli nechi; che chirhumire kandi Bibentyo aderherwe omu kagarhi kage oku bukuze bwa Nyamuzinda.
\v 21 Kandi yenarhuyimanza haguma n'enyu omu kangarhi ka Kristu n'okurhushiga, ali Nyamuzinda.
\v 22 Yiwanarhuhiraga kw'akashe arhuha echimanyiso cha Muka omu mirhima yerhu.
\p
\v 23 Aliko nyono mpamagere Lulema abe muhamirizi w'omurhima gwani, omu kuba babalira, ntazi hik'e Korinto.
\v 24 Kurhali kuderh'okurhurhambwire obwemere bwenyu; s'aliko rhwabo barhabazi b'obusime bwenyu: Bulala muyimangire omu bwemere.
\c 2
\cl Chigabi 2
\p
\v 1 Naliganizize omu kagarhi kani oku ntachigaluk'emwenyu n'omugayo.
\v 2 Bulala nkola nabagayisa, ndewakashuba kunsimisa, changwa arhali olala nagayisaga?
\v 3 Nayandikire nk'okunabijirire yintagala kushimana omukuhika kwani, omugayo okulunda lwabalala bali bagayisizwe kump'obusime, bagwerhe omukagarhi kenyu mweshi obushinganyanya ok'obusime bwani buli bwenyu mweshi.
\v 4 Biri omu mugayo gwani gunene, omurhima guvunikire, haguma n'emiziga minene yinabayandikire, arhali mpumugayiswe s'aliko mumeny'obwira bunene mbaherheko.
\p
\v 5 Ey'omuntu akaba mpanvu y'omugayo, arhali nyagayisize, aliko mweshi, oku bugeke amabagayisa mweshi.
\v 6 Bihemere oyumuntu ahabw'obuhane, ahabirwe nabanene,
\v 7 yimugala kumubabalira n'okumuyinginga y'arhagayiswa n'akahinda kanene.
\v 8 Nji nabahema oku mujir'ebijiro by'okumusima.
\v 9 Bulala nabayandikire omu kubahira, omurhangulo akaba mwakakenga mubuli chintu.
\v 10 N'obo, eyi mwakababalira oyo muntu nji namubabalira nani, nechi nababalire, nakaba nababalir'echintu, eri 'nyanya zenyu, embere za Kristu;
\v 11 yirhurhalekera Lyangombe obushobozi okurhwabano bulala rhurhahabir'emigabi yage.
\p
\v 12 Okubiyorhere, amango nahikag'e Trowa enyanya z'omwazi g'obuholo gwa Kristu, nachiro Nahano anchigulir'olunvi, omuka gwani gurhahumukaga bulala ntalibwene Tito mwenewerhu;
\v 13 che chirhumire, nchimala kubaleka, nagend'e Makedoniya.
\p
\v 14 Koko emwa Nyamuzinda, orhuha kuhimana ngasi mango omukagarhi ka Kristu n'okurhuha kw'empumulo y'obumenyi bwage ngasi hoshi!
\v 15 Oku ntyo, rhuli mpumulo nyinja ya Kristu e mwa Nyamuzinda, omu bachungukire n'oku bantu baherere.
\v 16 Oku baguma, empumulo y'olufu, oku bandi empumulo y'akalamo. Nande w'akayeneza kw'ebyo byoshi?
\v 17 Bulala rhurhahindamwir'omwazi gwa Nyamuzinda, nk'okw'abanene bakola, s'aliko haguma n'okunali, okulunda lwa Nyamuzinda yirhwaderha omu kagarhi ka Kristu embere za Nyamuzinda.
\c 3
\cl Chigabi 3
\p
\v 1 Rhurhonderage buhyahya kuchijirira ama maruba g'obuhamiriza rhwenyine? changwa rhukenere kuguma n'abaguma, amaruba g'okuchihamir'embere zenyu changw'okulunda lwenyu?
\v 2 Mwabo muli maruba gerhu, mayandikirwe omu mirhima yerhu, mayinjikene n'okusomwa n'abantu boshi.
\v 3 Mubonekene muli maruba ga Kristu, mayandikirwe kweyinjira y'akasi, arhali okubwino, changwa kugerera oku Muka gwa Nyamuzinda olamire, nanga arhali oku meza g'amabale, s'aliko oku meza g'omubiri omu mirhima.
\v 4 Nechi chinihirizo, rhuchigwerhe kugerera Kristu embere za Nyamuzinda.
\v 5 Kurhali kuderh'okurhwakagala rhwenyine ku ganiz'echintu chirhenger'emwerhu rhwenyine. S'aliko obushobozi bwerhu burhenger'e mwa Nyamuzinda.
\v 6 Arhujirire nerhu kuba baganda bage omu bunvikane buhyahya, kurhali kugerer'amaruba s'aliko oku Muka, bulal'amaruba gayirha s'aliko Muka analamya.
\v 7 Akab'akasi k'olufu, kashomekerhwe haguma n'emyandiko oku mabale, kabere k'obukuze kugerer'abana b'e Israeli barhachigalaga kulola omu malanga ga Musa, enyanya z'obulangashange bw'amesho gage, nachiro akaba obulangashane bwali bw'akachanji kageke.
\v 8 Nkagurhe akasi ka Muka karhankaba kabukuze bwenene?
\v 9 Akab'akasi kukuhanwa kakuzizwe, akasi k'okunali kab'enyanya bwenene omu bukuze.
\v 10 Nachirw'akaba, aka kasi kakuzizwe karhabaga n'obukuze bunene, enyanya z'obukuze burhalukire bwenene.
\v 11 Nantyo, akab'echaliri chabichanji bigeke chakuzizwe, echebichanji by'esiku zoshi nji chakuzwa bwenene.
\p
\v 12 Bulala rhuherh'echinihirizo, rhukoles'obushobozi bunene.
\v 13 Rhurhanajiraga nka Musa, wahir'echirezi omu malanga y'abana b'e Israeli barhabonag'obuzinda by'ebyo bichanji bigeke.
\v 14 Aliko bakomez'emirhima yabo. Bulala echochirezi chinachiliho, eyibasoma endagano ya Mira, echochirezi chibaho, bulala barhafunuliragwa oku chirhega kugerera Kristu.
\v 15 Kugera buno, eyibasoma Musa echirezi chakabwirwe omu mirhima yabo.
\v 16 S'aliko ey'omuntu ayemera Kristu, echirezi chanarhenga.
\v 17 N'obo, Nahano ali Muka; nah'Omuka gwa Nahano guli, hali obushwekule.
\v 18 Aliko rhwabo rhweshi abamalanga gashwekwirwe, rhuli rhwalola nk'omuchiyo obukuze bwa Nahano, rhwahindamwirwe mw'echochishushanyo kurhenger'obukuze kuhiko omu bukuze, nka Nahano, oli Muka.
\c 4
\cl Chigabi 4
\p
\v 1 Na ntyo, rhugwerhe obukozi rhwahabirwe oku bonjo, rhurhachikaga entege.
\v 2 S'aliko Rhulahir'eby'eshonyi bijirik'omu bwibisho, chiro rhurhagendaga Omu bulyalya. changw'okuhira omwazi gwa Nyamuzinda m'obubeshi. Alik' omu kuyamagiz'okunali rhulirhwachijira maruba g'enjira omu buli murhima g'omuntu embere za Nyamuzinda.
\v 3 Akab'ogu Mwazi gwerhu g'obuholo nguchishukir'echitambara, gushukirwe oku balala baherere.
\v 4 N'oku barhayemerere na Lyangombe wabo wagano mango amalire kuhumy'obwenge, yinji barhabona obumoleke bw'ogu Mwazi gwinja gwakolera gw'obukuze bwa Kristu oli shusho lya Nyamuzinda.
\v 5 Rhurhali rhwa chiyigiriza rhwenine, rhulirhwayigiriza Yesu Kristu Nahano na rhunali rhwabayirika bakozi enyanya za Yesu.
\v 6 Bulala Nyamuzinda, aderhere: obumoleke nji bwamolek'omu muzimya! Yekolezez'omu mirhima yerhu arhuh'obumenyi bw'obukuze bwa Nyamuzinda emalanga ga Yesu Kristu.
\p
\v 7 Rhuheker'obu buchire omu mibiri y'obudaka, y'emisi mikulu ehabwa na Nyamuzinda, s'arhali rhwabo.
\v 8 Rhulifundezwe enyunda zoshi s'aliko rhurhashwekerwe, rhugwerhe entanya s'aliko rhurhahimirwe.
\v 9 Rhulibuzwe, s'aliko rhurhakabulirwe, rhushurhirwe s'aliko rhurhaherere;
\v 10 Rhuhekere ngasi mango olufu lwa Yesu omu mubiri gwerhu, y'akalamo ka Yesu kachiyerekana omu mubiri gwerhu.
\v 11 Bulala rhwerhulamire, rhuhanirwe buzira kuleka enyanya z'olufu lwa Yesu, ya kalamo ka Yesu kachiyerekana omu mubiri gwerhu g'olufu.
\v 12 Nantyo, olufu yilwakola omu kagarhi kerhu n'a kalam'omu kagarhi kenyu.
\v 13 Na nk'oku rhuherh'omuka muguma g'obwemere guderherwe guno mwazi gw'olwandiko: Nayemerere; chechirhumire naderhere! Rhuyemerere, chechirhumire rhwaderha,
\v 14 Rhuchimeny'okowafulaga Nahano Yesu nj'arhufula haguma na Yesu na nj'arhuyerekana haguma nenyu embere zage.
\v 15 Bulala ebyo byoshi byahika enyanya zenyu, y'obubabale omu kuchikuba, bulug'oku bukuze bwa Nyamuzinda, ebijiro by'obukuze byo lubaga lunene,
\p
\v 16 Chechirhumire rhurhachikag'entege. Na mang'omuntu werhu w'embug'eyakafa, eyakashandala, alik'omuntu orhulimo aba muhyahya buli lusiku.
\v 17 Bulal'obubabale bwerhu bugeke bwa gano mango yibwaburha, kurhaluka buli luganjo, obulemere n'obukuze bw'esiku na mango,
\v 18 Bulala yirhwalola, arhali kw'ebintu bibonekene, s'alik'oku birhabonekene, bulal'ebintu bibonekene birhalegama, n'ebirhabonekene biba by'esiku na mango.
\c 5
\cl Chigabi 5
\p
\v 1 Rhuyinj'okw'akaba lino hema rhulamirem'okw'igulu lishashanyukire, rhugwerh'enju omu mpingu eyeri kasi ka Nyamuzinda, enju y'esiku n'amango erhakolwaga n'efune z'omuntu.
\v 2 Kandi rhunalibuka mulino hema, rhulirhwalonza kuyambis'enju yerhu y'empingu,
\v 3 Rhukola rhwabonekana rhuyambere na rhurhali butambara.
\v 4 Bulala rhuchiri mw'eri hema, yirhwakuma, rhulibukire, arhali okuba rhulonzeze, aliko rhurhachikulaga k'oluhu, s'aliko kuyambala, y'ogo g'okufa kumirwa n'ogw'akalamo.
\v 5 N'owarhukulaga kw'ebyola, ali Nyamuzinda warhuher'echikinja cha Muka.
\v 6 Rhuyunjwire munihiro ngasi mango na rhunayinji kw'okuber'omu mubiri rhuyorhere hale na Nahano.
\v 7 Bulala rhulambagir'omu njira y'obwemere s'arhali omukubona.
\v 8 Rhuyunjwilire omunihiro na rhunalonza kurhenga m'ogu mubiri rhujibera haguma na Nahano.
\v 9 By'ebirhuma rhumusimisa changwa rhurhenge mw'ogu mubiri changwa rhubere mw'ogu mubiri.
\v 10 Bulala birhuhemere okubonekan'embere z'olubanja lwa Kristru, yibuli mugum'ahembwa kukulikira n'ebinja changw'ebibi akoler'achiri omu mubiri gwage.
\p
\v 11 Rhuchimeny'obuba bwa Nahano, rhunalonz'okuyunvis'abantu; Nyamuzinda arhuyinji, na nihir'oku omu nkengero zenyu murhuyinji.
\v 12 Rhurhachihamirize kandi rhwenyin'embere zenyu, s'aliko rhubahere akachanji k'okuchisimisa enyanya zerhu, yimugala kushubiza ku balala bachikuza enyanya z'ebibonekan'embuga birahli omu murhima.
\v 13 Ery'akaba nahezez'obwenge; biri bya Nyamuzinda; n'akaba ntahezez'obwenge, liri ragi lyenyu.
\v 14 Bulala obwira bwa Kristu yibwa rhulibisya, bulala rhubwene oku, akaba mugum'afirire boshi, k'okuderh'oku boshi b'afire;
\v 15 n'okw'afirire boshi, y'abali balama barhachilamaga oku bonine, s'alik'oku w'afire enyanya zabo.
\v 16 Nantyo, kurhenga buno, rhurhayinji omuntu kukulikiz'omubiri, n'akaba rhwamenyere Kristu kukulikiz'omubiri, bunola rhurhachimuyinji ntyo.
\v 17 Ery'omuntu akaba omu kagarhi ka Kristu, ali chiremwa chihyahya. Ebintu bya mira by'agerere; lola, byoshi byamaba bihyahya.
\v 18 N'ebyo birhenger'emwa Nyamuzinda w'arhunywanisize haguma naye kugerera Kristu, anarhuh'akasi k'okuyunvisikanya.
\v 19 Bulala Nyamuzinda aliri omu kagarhi ka Kristu, ayunvisikanyisa egulu na yenyine, buzira kuganjir'abantu amabi gabo, anarhuhira mw'omwazi g'obunvikane.
\p
\v 20 Rhukola ntumwa za Kristu, nk'oku Nyamuzinda anahanula kugerera rhwabano, rhubahemer'okuzino lya Kristu: Muyunvikane na Nyamuzinda!
\v 21 Orhashubaga kujir'echaha, omuheseze emizigo y'ebyaha byerhu yirhub'omu kagarhi kage okunali kwa Nyamuzinda.
\c 6
\cl Chigabi 6
\p
\v 1 Bulala rhunakola haguma na Nyamuzinda, rhubahanwire mumenye obonjo bwa Nyamuzinda murhaburholaga oku busha.
\v 2 Bulal' aderhere: omu kachanji k'okuyemerwa nakuyunva, omu lusiku l'obuchunguke nakurhabala, tala akasanzi k'okuyemerwa kokano tala olusiku l'obuchunguke loluno.
\v 3 Rhurhanihire chintu choshi ch'okusirhaza, y'akasi karhaba chintu ch'oku shungw'omudoke.
\v 4 S'aliko, rhulirhwachijira bahamiriza, nk'abakozi ba Nyamuzinda, omu kulindira bwenene, omu malumwa, n'omulufiro, n'omu bibazo;
\v 5 Omu kushurhwa, omu kuhirw'omu mpaniko, omu mijinya, omu mpanya, omu kurhaj'ero, omu kurhalya;
\v 6 Omu kuchichesa, omu kumenya, omu kulembera, omu bwinja, omu Muka Muchesibwa, omu buzigire burhaherhe bulyalya,
\v 7 Omu mwazi gw'okunali, omu misi ya Nyamuzinda; haguma n'entwaro z'okunali z'okuboko k'okulyo n'amalembe;
\v 8 Omu kagarhi k'obukuze n'eshoni, omu kagarhi k'oku derhwa kubi n'okuderhwa bwinja, kulolwa nka mubeshi aliko muntu mushinganyanya;
\v 9 Nk'abarhayinjikene, aliko bayinjikene bwenene, nk'abafire, aliko balamire,
\v 10 Nk'abagayisizwe, aliko bantu b'obusime esiku zoshi, nk'abakene, aliko rhuchiza banene, nk'abarhagwerh'echintu, aliko baherhe byoshi.
\p
\v 11 Obunu bwerhu bwamashwekulwa emwenyu, ego Bakorinto, emirhima yerhu yamayushulwa.
\v 12 Murhafundezezwe omu kagarhi kerhu, s'aliko mufundezezwe omu mirhima yenyu.
\v 13 Intyo, mujuhe nk'oku mwa habirwe (ndi naderha nenyu nka bana bani), mukuz'emirhima.
\v 14 Murhachishwekeraga omu buja burhali bwenyu. Enshimanano eri ngahe ahakagarhi k'okuli n'obubi? changwa ngah'enshimanano eri ahakagarhi k'akamole n'omwizimya? Enshimanano eri ngahe aha kagarhi ka Kristu na Beliali?
\v 15 Changwa chigabi chichi aha kagarhi k'omushinganyanya n'orhali mushinganyanya?
\v 16 Enshimanano ehe yakaba aha kagarhi k'olurhamba lwa Nyamuzinda n'ebishushanyo? Bulala rhuli lurhamba lwa Nyamubaho, nk'oku Nyamuzinda abi derhere: Nji nayumbaka na ndambagire omu kagarhi kabo; nji naba Nyamuzinda wabo, nabo nji baba lubaga lwani.
\p
\v 17 Chochirhumire, murheng'omu kagarhi kabo, munachikule haguma nabo, Nahano ashambere; murhahumaga oku chiyandwire nji na nabayankira.
\q
\v 18 Nji nab'emwenyu Darha, nenyu nji mwaba bagala na bali bani, Nahano w'esiku zoshi ashambere.
\c 7
\cl Chigabi 7
\p
\v 1 Muchigwarha ebi binihirizo, bazigirwa bani, rhuchichese na buli choshi chizingis'omubiri n'omuka, rhuchimal'obuchesibwa bwerhu omu buba bwa Nyamuzinda.
\p
\v 2 Murhuhe aha rhwahanda omu mirhima yenyu. Ntaye rhwagomere, ntaye rhwa heker'ehyage, ntaye rhwalir'enyungu.
\v 3 Kurhali kubahana kurhumire naderha ntya; bulala na malire derh'oku muli omu mirhima yerhu omu lufu n'omu kalamo.
\v 4 Ngwerhe echinihirizo chinene omu kagarhi kenyu, ngwerhe choshi nankachivuga enyanya zenyu, nyunjwire oburhulirizi, omu kagarhi k'amalumwa gerhu goshi nyunjulirene omurhima kurhaluk'oluganjo.
\p
\v 5 Bulala, kurheng'okuhika kwerhu e Makedoniya, omubiri gurhahumukaga; rhwalibuzwa omu njira zoshi: ebirha embuga, n'obuba omu murhima.
\v 6 Aliko Nyamuzinda orhuliriza abaluhire arhurhuliriza omu kuhika kwa Tito,
\v 7 arhanali n'omukuhika kwage konyine, s'aliko kandi n'oku burhulirizi Tito alemaga ayunva oku lunda lwenyu: Arhushambalire obulonza bunene mugwerhe, emiziga, obushiru muherh'enyanya zani kugerera obusime bwani bwabere bunene.
\v 8 N'okubahisa kwani omu maruba gani, ntakahungama, n'akaba nahungamire bulala nabwene okw'aga maruba gabagayisize, nachiro akaba omu mango maguma maguma.
\v 9 Namachisima arhali okuba mwagayisizwe, s'aliko omugayo gwenyu gwarhumire mwahungama; bulala mwagayisizwe kugerera Nyamuzinda, yimurhabona echihano enyanya lyerhu oku mwazi goshi goshi.
\v 10 Bulala, omugayo gurhenga ku Nyamuzinda guburh'oku chihana k'obuchunguke, alik'omugayo gw'egulu guburh'olufu.
\v 11 Lolaga, gunola mugayo gurhenger'e mwa Nyamuzinda gwalerhere obushiru omu kagarhi kenyu: yamabajira b'obushiru bunene, b'okuchiderhera bonyine, b'oku yerekana oku nta bubi, abakenga bwenene basimire kumbona bwenene, bachihana enyanya zani, n'abalonza kuhana obubi. Mwayerekene omu njira zoshi oku murhaligwerh'obubi mwebi byoshi.
\v 12 Akaba nabayandikire, erhal'enyanya z'owadukangene, changwa owadukirwe; byabaga by'obushiru bwenyu emwerhu buchiyerekene omukagarhi kenyu embere za Nyamuzinda.
\v 13 Checharhumire rhurhulirizwa. Aliko haguma n'okurhulirizwa kwerhu, rhwasimisizwe bwenene kandi oku busime bwa Tito, n'okuntu arhuzizwe kugerera mweshi.
\v 14 N'akaba nachikuzize bugeke enyanya zenyu embere zage, ntabonag'eshonyi, s'aliko okuba rhwashamber'okunali n'ebirhwachikuziz'embere za Tito byabere by'okuli.
\v 15 Aliko basima kabiri omu kuyibuka obukenge bwenyu embere za boshi n'omukumuyankirira haguma n'obuba n'oku dirhimana.
\v 16 Nchisimisize oku nakachihira mu buli choshi omu kagarhi kenyu.
\c 8
\cl Chigabi 8
\p
\v 1 Bene berhu, rhuli rhwabamenyesa obubabale bwa Nyamuzinda bwachiyerekene omu mashengero g'e Makedoniya.
\v 2 Omu malibuko manene babwene, obusime bunene n'obukene bunene by'ababurhire obugale bunene, okuhana bwenene.
\v 3 Bulala bahanire obuhamirizi oku kulikirana n'obuhashe bwabo na kulusha obuhashe bwabo barhula nk'oku bagalire.
\v 4 Barhuhema banashigirira mpu babone kushangira olukogo l'okukolera abachesibwa.
\v 5 Arhali n'oku babahanire nk'okurhwalisimire, aliko bachihanire emwa Nahano, kandi emwerhu, oku bulonza bwa Nyamuzinda.
\v 6 Rhwarholere Tito yamala ogu mulimo gwinja emwenyu, nk'oku agurhonderaga.
\v 7 Nantyo, mukole bwinja mu buli chintu, omu bwemere, enganiro, omu bwenge, n'obushiru n'obusime bwenyu emwerhu; nantyo mubone obubabale bunene.
\v 8 Nta derhere ntyo nka rhegeko, aliko okubushiru bw'abandi bantu, okuli k'obusime bwenyu.
\v 9 Bulala muyinji obubabale bwa Nahano werhu Yesu Kristu, enyanya zenyu achijirire mukene, nabo aliri muchire, y'obukene bwage mugale kuchira.
\v 10 Nganiza yani n'amahana, bulala bibakwanene, kumwabo mwarhondere kukola, s'aliko mw'abo mwagwarhire obulonza kurheng'omwaka gugerere.
\v 11 Bunola mumale kukola, y'okukolwa kwakarhi kugerere obushobozi bwenyu bushuzwa okubushiru mwakoleseze.
\v 12 Ey'omuntu akagwarha omurhima g'okuhana, Nyamuzinda ayemerer'echintu akahana kukulikira echintu aherhe, s'aliko birhakulikir'echarhaherhe.
\v 13 Bulala ntaderhere ogu mwazi oku yabandi barhulera, nenyu mubabale,
\v 14 s’aliko kukulikira erhegeko ly’oku nganangana: Omu malumwa gabunola gagale kurhabala onyifinjo zenyu. Yina malumwa genyu gagale kurhabala okunyifinjo zabo yi mweshi muba banganangana.
\v 15 Nk’oku byayandikirwe: Owalirholagwire binene arhagwerhe kulush’abandi, n’owarholagwire bigeke arhalibulire.
\p
\v 16 Aliko Nyamuzinda akuzwe, yiwahirire obushiru omu murhima gwa Tito enyanya zenyu;
\v 17 Bulala ayankirire amahuno gerhu, kandi agwarha obushiru n'obulonza bwage yenyine aja emwenyu.
\v 18 Rhwamarhuma ola mwenewerhu, owasimirwe bwenene omu kagarhi k'omwazi gwinja omu mashengero goshi.
\v 19 Arhanali ntya konyine, s'aliko alondwerwe na mashengero agenda omu lugenzi haguma nerhu mweyi myazi y'obubabale rhulirhwakolera okubukuze bwa Nahano, n'oku yerekana oku rhuchirheganyize.
\v 20 Yirhwakola ntyo, y'omuntu arharhuderhaga buligo enyanya zaguno mushalulo gunene rhulirhwakola;
\v 21 Bulala rhuli rhwalonza echiri chinja, arhali embere za Nahano yenyine, s'aliko n'embere z'abantu.
\v 22 Rhwamarhuma haguma nabo mwene werhu, rhwamalire kumugeregeza enchundo zinene rhwabona eyagwerh'obushiru omu mango ganene, aliko anagwerh'obushiru bunene bwenen'enyanya, z'omunihiro gunene agwerh'emwenyu.
\v 23 Ey'omuntu akalonza emyazi ya Tito, rhuba chigusho chiguma naye, rhukola haguma naye enyanya zenyu, n'enyenya za beneberhu, ziri ntumwa za mashengero n'obukuze bwa Kristu.
\v 24 Intyo mubahe, embere za mashengero echimenyiso ch'obuzigire bwenyu na munabayereke n'okurhugwerh'omwishingo enyanya zenyu.
\c 9
\cl Chigabi 9
\p
\v 1 Enyanya z'emyazi y'okurhabala abachesibwa ba Nyamuzinda bali e' Yudeya, ntalonzeze kubayandikira.
\v 2 Bulala nyinji omurhima gwenyu gwinja g'okurhabala nani ndi nachisimisa enyanya zenyu embere z'abantu b'e Makedonia, n'okuderha: oku aka Nyamuzinda k'e Akayo kachirhegwire kurhabala kurheng'omwaka guhwere n'obushiru bwenyu bw'asisimwire abantu banene.
\v 3 Ntumire beneberhu, y'obukuze rhwabajirire burhafa busha kw'echo chigabi, muna chirheganye nk'oku naderhere.
\v 4 Ntalonzeze okw'abe Makedoniya bakamperekeza n'okurhabashimana muchirheganyize, n'obu burhwali burhuhindamukir'eshoni, zimenye zakabakola.
\v 5 Omurhima gwambwirire oku ntume beneberhu burhanzi emwenyu, barhegany'eshego mwalaganyaga, eyoshego y'okuli, chirhabaga chintu ch'akusezwa.
\p
\v 6 Mumenye: Obyala bigeke na bigeke ashalula; n'obyala binene, ashalula binene.
\v 7 Buli muguma ahane nkok'omurhima gwage gumubwirire, arhahanaga n'oburhe, changwa nk'okazizwe, bulala Nyamuzinda asima ohana n'obusime.
\v 8 Na Nyamuzinda anagala kubaha enshokano zoshi, yimubona ebimukwanene muli byoshi ngasi mango, mugere echihe chokusigaza chokujiramo ngasi mulimo gwinja.
\v 9 Nk'oku biyandikirwe: anagab'amenja gage, anagabira abakene; okunali kwage kuli kw'esiku n'amango.
\p
\v 10 Y'enahana emburh'oku muhinzi, n'omugati oku biryo byage, abah'emburho zinene nj'analuz'amalehe g'obushinganyanya bwenyu.
\v 11 Nji mwaba bachire omu bintu byoshi, mugale kuba bantu b'okurhabala abantu boshi yi Nyamuzinda avugwa omonkwa oku bulagirire bwerhu.
\v 12 Bulala oburhabale b'ogu mulimo guchesibwa gurhali kurhabala abachesibwa omu mulimo gonyine, s'aliko gube bw'okuvuga Nyamuzinda omonkwa.
\v 13 Oburhabale bwenyu burhabashwekaga amesho, bakenge, bakuze Nyamuzinda oku bukenge bwenyu m'ogu mulimo gw'emyazi y'Omurhula gwa Kristu, n'omukurhabala abantu boshi.
\v 14 Nantyo, bali babahunira, babon'enyorha enyanya z'olukogo lwa Nyamuzinda lunagenderere omu kagarhi kenyu.
\v 15 Nyamuzinda akuzwe enyanya z'enshokano yage rhurhankagala kukuza nk'oku bihemere.
\c 10
\cl Chigabi 10
\p
\v 1 Nyono Paulo mbahemere omu bwirhonzi n'omu bwinja bwa Kristu, nyono mwirhonzi omu kubonekana nkandi hagarhi kenyu na nyunjwir'obushiru emunda muli n'eyinakaba hale nenyu.
\v 2 Mbahemere hano nji mbaho, nji murhansezaga kulibirhira n'omunihiro gw'obushiru, inchinihiriz'omu kukolesa enyanya zabaguma omu bo, barhulola nka rhulambagir'omu nyigirizo z'omubiri.
\v 3 Bulala eyi rhwakalambagir'omu mubiri aliko rhurhajir'ebirha nka bya mubiri.
\v 4 Bulal' emiherho rhugwerhe y'okulwisa erhali ya mubiri; s'alikw'eherh'emisi omu Nyakasani, omu kukumbagaza enyumbake z'omwanzi.
\v 5 Rhwanakumbagaza enganiza na ngasi chintu ch'elugulu chizamwirwe enyanya z'obumanyi bwa Nyamuzinda, rhukaheba ngasi nganiza omu buja bwa Kristu.
\v 6 Rhukachirheganya okuchiholer'amabi goshi, amango obukenge bwenyu bwamahikirira.
\v 7 Mulole, ebiri emalanga genyu! nka mugum'achiyemez'okwali wa Kristu, aganize ogu mwazi omu murhima gwage: okwali wa Kristu; nerhu ntyo rhuli ba Kristu.
\v 8 Nka nankachibona hityu bwenene omu bukulu Nahano arhuher'omu kubayumbaka, s'arhali omu kubashanda, ntakabon'eshoni.
\v 9 Ntabonekanaga nk'owalonz'oku bayubohesa mwab'omu maruba gani.
\v 10 bulala baderhe: okw'amaruba gage gaba gakalihire gana komere; s'aliko yenin'ali hano omu mubiri, arhaherh'emisi, n'echinwa chage chirhakengerwe.
\v 11 N'ogwerh'aderha nk'oku, abirhole nk'oku rhuli omu binwa omu maruba gerhu; amango rhurhaliho; intyo kurhunali omu bijiro byerhu amango rhuliho.
\v 12 chiro rhurhakageza changw'oku chishushanya nabaguma mubalala bachihiraga bonyine. s'aliko bager'olugero lwabo bonine n'oku chishushanya bonine, babul'obwenge.
\v 13 Oku rhwabo, rhurhalonziz'oku chih'obukuze kulush'olugero; nji rhwarhola, arhalintyo, oku lugero l'olubibi l'obugabane Nyamuzinda arhuhere, oku bulyo rhwankabahikira.
\v 14 Rhurhankarhaluka embibi zerhu, nka kulala rhunkabageko bulala kurhenga ku mwabo lirhulerher'emyazi y'obuholo ya Kristu.
\v 15 Rhurhankachih'obukuze omu bijiro by'owindi; s'alik' omu bulangalire, nk'obwemere bwawe buyushukire bunakulire bwenene omu kagarhi kenyu kukulikirana n'olubibi rhwachiheberag'aho
\v 16 n'okuyamagaz'omwazi kurhaluka emwenyu buzira kuchikuza n'ebyajirirwe omu mbibi rhwahebah'okubandi.
\q
\v 17 Wakachishinga, achishingire omu Nahano.
\v 18 Bulala arhali olala ochilerha yenyine ye yemererwe s'aliko olala Nahano ahamagere.
\c 11
\cl Chigabi 11
\p
\v 1 Nka mwankambera olukogo omu buhwinja bugeke ngwerhe n'echi mumbere olukogo.
\v 2 Bulala mperh'agahinda ku mwabo naka kahinda kali omu Nyamunzinda; bulala na bashambazaga enyanya za muhya mulume muguma, yi nkuyerekana embere za Kristu nka mubikira loshi
\v 3 Kona kuguma nka kulal'enjoka ya shumikaga Eva, kugerera oku bwenge bubi bwayo nyubahire okw'enkengero zenyu zakazichikula omu bwimana bwa Kristu.
\v 4 Bulala eyi hakayinja wabayigiriza owindi Kristu harheng'oyu rhwabayigirize changwa nka murhol'owindi Muka kulek' eyimugwerhe changw'ogundi mwazi kulek' ogu mugwerhe, murhankabula kuyemera!
\v 5 Nabo nchikwebere okw'ezo ntumwa nkulu ntacho zindushire.
\v 6 N'akaba nta bwenge boku derha njira, obumanyi bowe ntabubulire oku byoshi, n'embere za byoshi.
\v 7 Obo ntyo, najirir'echaha bulala nachiyandagaza nyenyine mpu muj'enyanya, nabayamagiziza oku busha omwazi gwa Nahano?
\v 8 Nanyegere agandi mashengero, obugale bwabo, n'abahag'oluhembo libankolera. N'amango naliri emwenyu naba n'obulagirire, ntaye nazidohere.
\v 9 Bulala beneberhu barhengaga e Masedoniya babamenyaga ebimbulire. Omu byoshi ntabazidoheraga nachilanga.
\v 10 Kuger'omu kuli kwa Kristu kuli mu nyono, ndahire oku bilolere erenge, ntaye wakabinkulamo muchino chihugo cha Akaya.
\v 11 Bulagurhe? ... kabulala ntabasima? ... Nyakasani yebimenyere! ...
\v 12 S'aliko, namabijira nji nashubi bijira ntyo omu kuntu nkule bilala bayerekana omu kuchibisha mubyo, mpu yibarhabonekanaga kuguma nerhu omu bintu bachiha mw'obukuze.
\v 13 Abo bantu, bali ntumwa z'obubeshi, bakozi babeshi, bachihindamwire ntumwa za Kristu.
\v 14 N'ebyola birhakasomezwa bulala na Lyangombe naye yenyine anachihindamula nka malayika w'akamole.
\v 15 Kusiga birhali bihyahya okw'eshengero zabo zakachihindamula nka shengero z'okuli; obuzinda bwabo bwebe nk'orhwasi rhwabo.
\p
\v 16 Namashuba derha, ntaye ondolage nka musire, aliko muntole nka musire linani mba nkanachikunga hityu.
\v 17 Ebinderhere omu bulangalire ntabiderhere okuba n'ebinakachikubagira, ntabiderhere oku bwa Nahano, aliko nk'oku busire.
\v 18 Bulala haliboneken'abachikubagira kugerera oku by'omubiri nani nchikubagire byo.
\v 19 Bulala mubalembera n'obulonza, balala barhajira bwenge mwebanya bwenge.
\v 20 Nk'omuntu akakujira mugaragu, nk'omuntu akakushenyagula, nk'omuntu aka kurhol'ebyawe, nk'omuntu akakushurha, mumulembere.
\v 21 Nyunvirhe ensonyi z'okubiderha bulala ntayerekene oku bulirwa n'emisi. S'aliko, eyihakajira w'owanshubira, nderhere nka musire, nakagera kubijira.
\v 22 Kab'ali ba Heburaniya? Nani ntyo, kab'ali Ba Israeli? Nani ntyo, kab'ali omulala gw'Abrahamu? nani ntyo.
\v 23 Kab'ali bw'omushengero lya kristu? Embiderhere buzira lugero, nde yewe nakulusha kandi kugerera oku rhwasi, kugerera omu kushurhwa nashurhirwe, kugerera kandi n'omukushekwa nashwekerwe, n'ahanene nalire omu mahanya g'olufu.
\v 24 Karhano, nashurhurhirwe n'Abayahudi rhurhi makumi mane rhwabulagamo kaguma;
\v 25 kasharhu nashurhirw'orhurhi, liguma nashurhirwe amabale, kasharhu nazikire omu menji, nayorhere lusiku luguma obudufu n'ezuba enyanya z'amenji.
\v 26 Kanene omu mbalamo nabalamaga naliri omu buhanya bwenyinji zizibuzibu, omu buhanya bw'ebishambo, omu buhanya bw'abe chihugo chani, omu buhanya bwa balala bantu baherere omu mahanya g'omu mpinga. Omu mahanya g'enyanja, omu mahanya ga beneberhu b'obubeshi.
\v 27 Naliri omu rhwasi n'omu malibuko, nalichihebere omu borhere b'oku chishalisa, omu kuchishibis'omu nzara, n'omu nyorha y'oku chishalisa, omu kuyiriza bwenene omu mboho, n'omu kuyorha busha buzira kuyambala,
\v 28 na buzira kuderh'ebindi bintu, nali limbukire n'enkengero za ngasi lusiku, nakazigi hembwa n'amashengero goshi.
\v 29 Nde molokazi? Nani ndi molokazi? Nde wakagayiswa nani ntayunva nalibuzwa?
\v 30 Akaba nakachikunga omu borhere bwani b'obuzamba.
\v 31 Nyamuzinda Eshe wa Nahano Yesu, Yewagishirw'emyaka yoshi, Amenyer'oku ntabeshere.
\p
\v 32 Omu Damasiki, omurhegesi wa mwami Aretas alangiziz'echihugo ch'Abadamasi y'agala kugwarha.
\v 33 Kurhenger'omu dirisha munayandagazwaga elimpeberwe omu karhanda, nayandagazwa oku chibambazi, nafuma kurhenga omu maboko gage.
\c 12
\cl Chigabi 12
\p
\v 1 Kukwanene nchikuze... okola kurhali kwinja, nayinja kugerera omu kubonekerwa n'omu bibonekezi bya Nahano.
\v 2 Menyere muntu muguma muli Kristu waliriho, hamagera myaka ekumi nene, alihekerw'omu mpingu ya kasharhu, akaba kwali kugerer'omu mubiri gwage ntamenyere nkaba kurhali kugerera enyuma y'omubiri ntamenyere, Nyakasani yemenyere.
\v 3 Namenyere ok'oyo muntu, nkaba kwali kugerer'omu mubiri gwage, changwa, arhali omu mubiri ntamenyere, Nyakasani yemenyere.
\v 4 Ahekwa omu Paradizo ayunv'ebinwa bisomezwe bilala nta muntu wali kwanene abiderhe.
\v 5 Nji nachikuza, nka muntu oli nk'oyo, s'aliko nyenyine ntakachikuza enyanya z'obulema bwani.
\v 6 Bulala, eyinakalonza ku chih'enkunga ntakaba muhwinja bulala nakaderha okuli, s'aliko, echimbuzize yiharhajira omuntu wakaderh'enyanya zani binwa binene kulusha bilal'abwene mu nyono, changwa kulush'eby'ayunvirhe kunyono.
\v 7 Yintagwarhwa n'omwibono y'obulenga bunene omu mafunuliro ngwerhe, yintachibona nahabirw'omushaki omu mubiri gwani, Malayika mubi wa Lyangombe angerereze yi ntachibona.
\v 8 Kasharhu nahunire Nahano mpu, ampimire obo buhanya;
\v 9 ambwira mpu: obonjo bwani buyener'emund'oli, bulala obuhashe bwani bwajirikan'omubuzamba. Nyechishingire bwenene n'obulonza b'obuzamba bwani. Y'obuhashe bwa kristo buba enyanya zani.
\v 10 Bulala echo chechirhuma nchishing'omubuzamba bwani, omu kudukwa, omu kubulirwa, omu malibuko, omu mpanya enyanya za Kristo, bulala muli Kristo mundi muzamba, kandi munamperh'emisi.
\p
\v 11 Namaba muhwinja, mwe mwarhumire, bulala ntacho nalibulirw'omu ntumwa zikulu chirw'akaba ntali wakamaro.
\v 12 Ebyemezo by'oburhumwa bwani byachiyerekene ahagarhi kenyu, omu kulembera ngasi chemezo chiyerekene empanulo n'ebisomezo.
\v 13 Omubichi mwantaberemo changwa mwajirir'eshishi y'ezindi nshegero, bulala ntalibalemerere oku kantu koshi; mumbabalire k'obo bubi.
\p
\v 14 Talag'okubwagasharhu buno, nchirheganyize kuj'emwenyu, ntakanabalemerera oku kantu koshi, bulala birhali bintu byenyu ndonzeze, s'aliko mundonzeze. Bulala arhali abana bobabikir'ababusi enguli s'alik'ababusi babika enguli enyanya z'abana babo.
\v 15 Nyono nanjir'eshololo enyanya zani nyenine n'enyanya z'emirhima yenyu, omu kubasima nani nsimwe nenyu?
\v 16 Nakaba ntali balemerere! s'aliko nka muntu mwenge nabagwarhir'omu bwenge.
\v 17 Nka nabwen'obunguk'emunda muli, kugerer'oku bantu narhumag' emunda muli?
\v 18 Na rhumire Tito emwenyu, haguma n'owindi mwenewerhu, ka Tito hali akantu abahemer'oku misi? ka rhwalambagiraga mw'ezola ntambo zenezo?
\p
\v 19 Ka kandi muganizize oku rhwabalahire? Rhuderher'embere za Nyamuzinda omu Kristu. S'aliko emyazi yoshi bazigirwa eri enyanya z'okubayumbaka.
\v 20 Bulala nyubahire, chirw'amango nayinja, nji ntababuganaga nk'oku ndonzize mbabugane na chiro nabonekana emwenyu arhali nk'oku mulonziz'oku bona; nta buganag'obushombanyi, obongwa, oburhe, obuhaka, obukomezi, Obuchibone, n'olwamo;
\v 21 Nani amango nashubi yinja Nyamuzinda wani nj'antohya embere zenyu, Ndakire banene bagomere mira, nachiro barhahungamaga enyanya ly'ezinga, N'obuhushi n'enyifinjo zibi bajirire.
\c 13
\cl Chigabi 13
\p
\v 1 Naj'emwenyu obwa kasharhu ngasi buhaka bwaderhwa embere z'abahamirizi babiri changwa basharhu.
\v 2 Amango naliriho obwa kabiri, namalire kuderha kandi zene ntaliho namashubi derha bulala bajirir'ebyaha hano nyuma nyuma n'oku bandi boshi oku eyi nkagaluk'emwenyu ntacho nyechikolese changwa nyechijire.
\v 3 Bulala mulonzez'echimenyiso nkaba Kristu onderheramo yewe yerhali muzamb'embere zenyu, aliko nde oherh'emisi muli mwabo?
\v 4 Bulala abambwaga enyanya z'obuzamba aliko alamir'enyanya z'emisi ya Nyamuzinda, nerhu rhuli bazamba muli yewe s'aliko rhwelame muli yewe kugerera oku buhasha bwa Nyamuzinda bwakol'emunda rhuli.
\v 5 Muchilol'emurhima mwenyine ku mwenyeni akaba muli omu bwemere Muchiyemeze mwenyine. Kamurhamenyere oku Yesu Kristu ali mu mwabo? Akab'arhalintyo, kuderha oku murhayemererwe.
\v 6 Aliko ndagalire oku mumenyere oku rhurhalahirwaga.
\v 7 Nantyo rhuhunire Nyamuzinda rhurhajirag'amabi, arhali mpu rhubonekane rhwenyine oku rhurhalahirwaga, s'aliko rhujir'ebikwanene, rhubonekane bayemerwa.
\v 8 Bulala rhurhaherh'obuhashe bw'okulahir'okuli s'obuhashe bw'okuyemer'okuli.
\v 9 Rhuchisimis'amango rhuli omu buzamba, s'aliko muherh'emisi, birhunahuna omu mahuno gerhu, kuli kugenderera kwenyu.
\v 10 Chirhumire nayandik'ebibintu, eli ntahali nk'ohali, ntakolesez'oburhe kukulikirana obukulu Nahano ampere omu kubah'emisi s'arhali omubusha.
\p
\v 11 Okubiyorhere, beneberhu mube omu busime, muchikwize, musimane, mube n'enyifinjo ziguma, mulame omu murhula, na Nyamuzinda w'obusime n'omurhula aba haguma nenyu.
\v 12 Mulamusane, mwenine oku mwenyine omu kuhoberana kuchere.
\p
\v 13 Abachesibwa boshi babalamusize.
\v 14 Olukogo lwa Nahano Yesu Kristu, n'obusime bwa Nyamuzinda, n'okubuguma bwa Muka Ochere bube haguma nenyu mweshi.