eyo_reg/67-REV.usfm

\id REV
\ide UTF-8
\h Ng'ang'utiet
\toc1 Ng'ang'utiet
\toc2 Ng'ang'utiet
\toc3 rev
\mt Ng'ang'utiet
\c 1
\cl Kurget 1
\p
\v 1 Nito ko ng'ang'utiet ne bo Jeiso Kristo ne kiigochi Jehovah inendet koborji otwogikyi tuguk che biitu ne matiny ak kochogu. Ak kiiyok malaikaiyandenyi asi koborji kiboitiondenyi Johana,
\v 2 ne kibaorian agabo ngolyotab Jehovah ak baornatetab Jeiso Kristo, tuguk tugul che kigeer.
\v 3 Iberurot inendet ne somani, ak, icheket che kasei ngalekab maoinatoni ak koribe tuguk che kigisiir eng maonotonito, amu kagorik betut.
\p
\v 4 Sirjini Johana, koityi kanisosiek tisab chemi Asia: ingotebi mieindo kobotok ak kalyet, che bunu inendet ne mi, ago kimi, ago tun choni, ak che bunu tamirmirik tisab che mi taitab ngecherenyi nebo laitornatet,
\v 5 ak che bunu Jeiso Kristo, ne baoriat ne bo iman, kiboretiet nebo che kigobek, ako bounindetab laitorinikab ng'weny. Koityi inendet ne chamech ako ne kitiachech eng tengekwogikcho eng korotikchi-
\v 6 kigoyaech keegu bororiet, keegu tisiik chebo Jehovah nenyi ako kwandanyi--- ingobunji inendet torornated ak kimnatet koigeny ak koigeny. Amen.
\p
\v 7 Ogeero, nyoni koboto bolik; ak tun kogere inendet konda age tugul, koboto icheket che kiga toor inendet. Ak koteiyo bororiosiek tugul chebo ng’weny amu inendet.
\v 8 "Ane ko aii Alpha ak Omega" mwae Kiptaiyat Jehovah, "inendet ne mi, ago kimi, ago tun nyoni, noto ko Kamuktaindet.
\p
\v 9 Ane, Johana- tupcheng’wong ak ko aii ne kiemtei tugul nyalilda ak bounatet ak muitaet ne mi eng Jeiso Kristo--kiami emet ne kiikwen beko ne kiguure Patmo; agobo ngolyotab Jehovah ak baornatetab Jeiso.
\v 10 Kiami eng’ Tamirmiriet eng’ betutab Kiptaiyat. Ak kiagas kutit ne o eng batenyu, ko u ne bo iriaget.
\v 11 Komwa kole "Sirji bukuit tuguk che igeere eng bukuit ak iyokchi kanisosiek tisab--- koityi Epeso, koityi Simura, koityi Pergamo, koityi Tuatera, koityi Sarde, koityi Laodikia."
\v 12 Ak kiakuskong ale ageer kutinato kingalalwo, ak kingakuskong ageer kelyek tisab che bo taisiek che bo tahabu.
\v 13 Ak eng’ kwemutab kelyechoto bo taisiek ageer chito ne kergei ak weritab chi, kolaachi ngoriet ne koi ne itei kelyekchi ak koratege birirwetab tahabu komut tegenyi.
\v 14 Ak ki leel metinyi ak ko leelach sumeekyik ko u kororik che leelachen- ak leelach ko u teluchi-ak ki u konyekyi mat ne liblibeni.
\v 15 Ak ki u kelyekchi sugunwet ne sitat missing, ko u ne kigitilil eng mat, ak ki u tugenyi cheetab beko che chang.
\v 16 Kitinye kokelik tisab eng’ eunyi ne bo tai, ak kimong’une kutinyi rotwetab chok ne ng’atiben komoswek tuwai. Ki lile bich togenyi ko u asista ne lale eng kimnatenyi tugul.
\v 17 Ak kingageer inendet, abutyi kelyekchi ko u chito ne kagome. Ak kiigonora eunyi ne bo tai ak kole, "Ameiywei. Anendet ko aii ne bo tai ak ne bo let
\v 18 ak ko aii ne sobei. Kiga amei, ak ogeer anyun, asobe koigeny ak koigeny! Ak atinye yateiywekab meet ak che bo oldab che kigobek.
\v 19 Sir anyun tuguk che kaigeer, ak tuguk che mito raa, ak tuguk che tun biitu eng let.
\v 20 Ako anyun ung’otietab kokelik tisab che kegeer eng’ eunyu ne bo tai, ak kelyek tisab che bo taisiek che bo talabu: Kokelikchoto tisab ko malaikaisiekab kanisosiek tisab, ak kelyechoto tisab che bo taisiekab tahabu ko Kanisosiek tisab.
\c 2
\cl Kurget 2
\p
\v 1 "Koityi malaikayat ne bo kaniset nemi Epeso sir: 'Mwae tuguchu inendet ne name kokelik tisab eng eunyi nebo tai ako inendet ne wendote kwenutab kelyek tisab chebo taisiek che bo tahabu,
\v 2 "' Anget boisioniguk, ak boisiengung’ ne nyigis, ak muitaengung’, ak anget ale memuchi imuite agobo biko che yaachen- ak kiityem icheket che kurege che kiyoktoi, ago ma choto, ako kiinai ile kiplembechonik.
\v 3 Ak itinye muitaet ak kiimuite agobo kainenyu, amechaas.
\v 4 Ago ating'enen ngolyo, ale kiimete chamnyeng'ung’ ne bo tai.
\v 5 Inan anyun ole kiibute. Sigu ak iyai bocsionik che kiyae eng tai. Ngot ko mesigu anyonjinin ak aiste keldab taingung’ eng’ ole mito.
\v 6 Ago itinye ni: Isase boisonikab Nikolaitik, che asase agine.
\v 7 Inendet ne tinye itit, kogas kito ne mwachini Tamirmiriet kanisosiek. Inendet ne iterteri agochini koaam che bunu ketitab sobondo, ne mi paradiso ne bo Jehovah."'
\p
\v 8 Ak isirji malaikaiyatab kaniset ne bo Smurna: Ngalek che bo inendet ne bo tai ak ko ne bo let, inendet ne kigakome ak kosob kogeny:
\v 9 "Anget nyalilwogikuk ak banandang'ung', ago ii mogorio. Anget chubisietab icheket che mwae kole yahudik icheket, ago ma Yahudik icheket. Icheget ko sunagogitab chesawil.
\v 10 Ameiywei nyalilwogik che legit inyoru. Ogeero! Machei chesawil kotoorji korgoret alak eng’ okwe si kobiit ketiemak, ak inyoru nyalilda eng betusiek taman. Egu ne kiyani ogoi meiyat, si agonin kutwet ne bo sobondo.
\v 11 Inendet ne tinyei itit, kogas kito ne mwachini Tarmirmiriet kanisosiek. Inendet ne iterteri ko manyoru ng’wanindo eng’ meet ne bo aeng.
\p
\v 12 Ak isirji malaikaiyatab kaniset ne mi Pergamo: Ngalek che bo inendet ne tinye rotwetab chok ne ng’atiben komoswek tuwai:
\v 13 "Anget ole imenye, ole mi ng’echeretab laitornatet ne bo chesawil. Ak ikwore kainenyu missing. Anget ale metai kayaneng'ung' eng ane, agot eng betusiekab Antipa baoriandenyu, nenyu ne bo iman, ne kigibar eng kwenung'wong, ole menye chesawil.
\v 14 Ago atingenen ng’alek che ngering: Itenye alak eng oloto che kigonaam kanetisietab Balaam, ne kiinet Balak kondeno kanagutiet taitab logokab Israel asi koam amitwogik che kigochini kanamonik ak kosokso.
\v 15 Itinye kora ko u noto, alak che rube kanetisietab Nikolaitik.
\v 16 Sigu anyun! Ngot ko mesigu, anyonjinin achogu oborie icheket eng rotwetab chok ne mi kutinyu.
\v 17 Inendet ne tinye itit, kogas kito ne mwachini Tamirmiryet kanisosiek. Inendet ne iterteri, agochini mana che ung'otin, ak agochini koita ne leel ne kigesirji kainet ne leel eng koiata, kainet ne mainget chi kobate inendet ne taache."
\p
\v 18 "Koityi malaikayat ne bo kaniset nemi Tuatera sir: Ilechi, 'mwae ng'alechu Weritab Jehovah, ne tinye konyek che liblibendos kou mat ak kou kelyekchi taet ne tabulul:
\v 19 "Angen boisioniguk: chamnyeng’ung' ak kayaneng’ung’ ak muitaeng’ung. Anget ale chang’ boisioniguk che bo let kosiir che bo tai.
\v 20 Ako ating’enen ng’oly, ale ichamjini chnepyoset, jezebel, ne kuuregei maotio; ak koneti kiboitinkyuk ak kogoigoi kosokso, ak koam tuguk che kigochin kanamonik.
\v 21 Ak kiogochi kasarta ale si kosik, ago machame kosik eng soksennyi
\v 22 Ogeer anyun! Awirjini kitogut ne bo miendo ak ichek che ibegei koboto inendet koba nyalida ne o, ngotko masig eng boisionikyi.
\v 23 Ak abare legukchi komeiyo, ak konai kanisosiek tugul kole anendet ne isiachi kabwatutik ak mugulelwek. Ak agochini age tugul eng akwe ko u boisionikwok.
\v 24 Ako amwawok akwek che ong’etunotin eng’ Tuatira, tugul che matinyei konetisioni che maingen tuguk che kure alak tugukab orit chebo Chesawil- ko eng akwe amwae ale mateswok milet age.
\v 25 Ago ko u noto, okwar missing noto otinye akoi aitu.
\v 26 Ak inendet ne iterteri ak koyai boisionikyu agoi kagesunet, kotun agochini kimnatet koboi bororiosiek.
\v 27 'Ak koboi eng’ kiroktab karnet, ak kotuei ko u terenikab cheptereniot komengechitu koek rokyonick.'
\v 28 Ak ko u yo kiataach agine kobun Kwandanyu, agochini inendet kokeliet ne bo koriron.
\v 29 Inendet ne tinye itit, kogas kito ne mwachini Tamirmiriet kanisosiek."
\c 3
\cl Kurget 3
\p
\v 1 "Koityi malaikayatab kaniset ne mi Sarde sir anyun: 'Ng'alechu ko bo inendet ne tinye tamirmirik tisab che bo Jehovah ak kokelik tisab. " Anget boisioniguk. Itinye kainet kele isobe, ago kiimei.
\v 2 Kosu ak igimit tuguk che ng'etunotin che legit komeiyo, amu tomo anyoru, boisioniguk ko che kigosulda eng taitab Jehovah nenyu.
\v 3 Inan anyun, kito ne kiitaach ak o igas. Kas iit anyun, ak isigu. Ngot ko meng'et ak iripse anyun, achonii ko u chorindet, amenae sait ne anyonjinin.
\v 4 Ago itinye kainaik che ng'ering eng' Sarde che ma imuruon ngoroikwai, ak tun bendoti icheket kobotoo, koloogoti ngoroik che lechach, amu nyolunotin icheket.
\v 5 Inendet ne iterteri kotun kilaakchini ngoroik che leelachen, ak mogoi abuch kainenyi eng Bukuitab Sobondo, ago ang'anye kainenyi eng taitab Kwandanyu, ak eng taitab malaikaisiekchi.
\v 6 Inendet ne tinye itit, kogas kito ne mwachini Tamirmiriet kanisosiek"
\p
\v 7 " Koityi malaikaiyatab kaniset ne mi eng’ Piladelpia sir anyun: ' Ng'alek chebo inendet ne tilil agobo iman- inendet ne tinye yateiwotab Daudi, inendet ne ngo yaat ko makere chi, ak ne ngoker ko mayatei chi.
\v 8 "'Angen boisioniguk. Keer anyun, kaandene taing’ung’ kurget ne yatat ne maimuchi chi koger. Angen ale itinye kimnatet ne kitigin, ako kiirib ng’olyondenyu, ama itai kainenyu.
\v 9 Keer anyun! Agochini icheget che bo sunagogitab Chesawil, icheget che kuregee yahudik ago ma ichet, che kenu- Ayae icheket kobwa kogutuny eng kelyeguk, ak konai kole achamin.
\p
\v 10 Amu kiirib ng’atutiennyu eng muitaet, aribin agine eng’ kasartab tiemisiet ne chonjini ng’weny komugul, si kotiem icheket che menyei ng’weny.
\v 11 Anyoni achogu. Nam missing noto itinye si masaranin chi kutweng’ung.
\v 12 Inendet ine iterteri ayae koek toloita eng' hekalut ne bo Jehova nenyu. Ama komandoi sang’ kogeny, ak asirjini inendet kainetab Jehova nenyu, ak kainetab nganasetab Jehova nenyu. (noto ko Jerusalem ne leel, ne chorugei eng kipsengwet kobunu Jehova nenyu), ak kainenyu ne leel.
\v 13 Inendet ne tinye itit, kogas kito ne mwachini Tamirmiriet kanisosiek."'
\p
\v 14 "Koityi malaikaiyatab kaniset ne mi Laodikia sir anyun: 'Ng'alekab inendet ne Amen, baoriat ne kiyani ak ko bo iman, bounindetab yautikab Jehova.
\v 15 "Angen bosioniguk ale mekaitit amebele bich. Kata keigei nda kekaitit anan ibele bich!
\v 16 Ko amu ilalang anyun- mebele bich amekaitit- Ko legit, ang’ung’den eng’ kutinyu.
\v 17 Amu imwae ile, 'Aii Magorio, ak kianyoru tugukchu che chang', ama mi kiy ne amache.' Ako mengen anyun ile inyalilii mising, nyolu kerirenen, ibanani, ii kipkoratia ak imi aach ngor.
\v 18 Kas katikonenyu: alena tahabu ne kigitilile mat asi iegu magoriot, ak ngoroik che leelach ako liltoi, si ilaach, ak si matook kalilanetab aach ngorieng’ung, ak kerichekab konyek che iile konyeguk si igeerte.
\v 19 Agere kong’ ak atigoni tugul che achame. Noto anyun, igiilge ak isigu.
\v 20 Keer anyun, atononi eng’ kurget ak agonygonyi. Ngot ko kas chi age tugul kutinyu ak koyaat kurget, anyoni konyi ak aamisie koboto inendet, ak koamis inendet kobotoo.
\v 21 Inendet ne iterteri agochini ketebi tuwai eng’ ng’echerennyu ne bo laitornatet, ko u ye kiaterter agine ak atebi ak Kwandanyu eng’ ng’echerenyi ne bo laitornatet.
\v 22 Inendet ne tinye itit, kogas kito ne mwachini Tamirmiriet kanisosiek.""
\c 4
\cl Kurget 4
\p
\v 1 Kingobata tuguchu atobende, ak ageer anyun kurgetab kipsengwet ne yatat. Tuget ne bo tai ne kiagas ko ki u ne bo iriambut, ne king’alalwo kole, "long’u oli, asi aborun tuguk che tun biitu eng’ let ne matiny."
\v 2 Eng kasarata ko kiami anyun eng’ Tamirmiriet, Ak kiageer anyun ko kagindeno eng kipsengwet ng’echeretab laitornatet, ak kimi chito ne kitebe ng’echeranato.
\v 3 Ak inendet ne kitebee ko kikegei ako koitab jasipi ak carnelit. Kimito kibembet ne kigemut ng’echeretab laitornatet. Kigergei kibembeinato ako sumaragdo.
\v 4 Ak kigemut ng’echeranato bo laitornatet ng’echerok tiptemu ak ang’wan, ak kitebe boisiek tiptemu ak ang’wan ng’echerochoto, kolaachi ngoroik che leelachen, ak kotinye eng metowekwai kutwesiek che bo tahabu.
\v 5 Ak kimong’une ng’echeranato kalyelosiek, bolotosiek ak tulosiekab ilat. Ak kiliblibendos taisiek tisabu che bo matik eng taitab ng’echeranoto bo laitornatet, choto ko tamirmirik tisab che bo Jehova.
\v 6 Ak kimii taitab ng’echeranoto bo laitornatet, araraita ne bo glasit ne u krustalo. Ak kimi kwenutab ng’echeranato bo laitornatet ak kiimut komoswek tugul che bo ng’echeranata ko kigemuut tiong'iik ang’wanu che saptos, che nyiitotin konyek tai ak Let.
\v 7 Ak ki kergei tiondo ne bo tai ak ng’etundo ak ki kergei ne bo aeng’ ak moita, ak kitinyei ne bo somok itondo ne u ne bo chito, ako nebo angwan ko kigerge ak chepsireret ne tirireni
\v 8 Ak ki nyiitotin tiong’ichoto ang’wan soptos konyek komoswek tugul barak ak orit, kotinyei age tugul kebebaik lo. Ama imuung'tos icheket bet ak kemoi komwae kolen, "Tilil, Tilil, Tilil, Kiptaiyat Jehova Kamuktaindet, ne kimi ak komi ak kotun nyonii."
\p
\v 9 Ak ye kingogochi tiongichoto saptos torornatet, ak teegisto ak kongoi inendet ne tebee ng’echeranoto bo laitornatet, inendet ne sobei koigeny ak koigeny,
\v 10 kobutyi anyun boisiechoto tiptemu ak ang’wan taitahb inendet ne tebee ng’echeranoto bo laitornatet ak kogutungji inendet ne sobei koigeny ak koigeny. Ak kowirji ng’weny kutwesiekwai eng taitab ng’echeret kolen,
\q1
\v 11 "nyoljinin, kiptaiyandennyo ak ko Jehova nenyo, itaach torornatet ak tegisto ak kamuktaet, amu kiiyai tuguk tugul, ak komii amu mageng’ung’ nekiyai koyaagis.
\c 5
\cl Kurget 5
\p
\v 1 Ak kiageer anyun eng’ eutab tai ne bo inendet ne kitebee ng’echeranato bo laitornatet, bukuit ne kigisiir tai ak batai, ne kiging’och eng ngoksosiek tisab.
\v 2 Ak kiageer anyun malaikayat ne kim kobarastoi eng’ kutit ne o, kole, "Ng’o ne nyolu koyaatk bukuit ak kotiach ng’oksosiekyi?
\v 3 Ak kima komi chi kipsengwet, anan ng’weny, anan ko kureretab ng’weny ne kiimuchi koyaat bukuinoto, anan kosoman.
\v 4 Ak kiarir missing amu kima biit chi ne nyolu koyaat bukuinoto anan kogeer kosoman.
\v 5 Ak kilejo age eng’ boisliechoto, "Ameterir. Keer anyun! Kigoterter Ng’etundo ne bo oretab Juda, Tigitiotab Daudi, ko kigoturis. Ako imuchi inendet koyaat ng’oksosiechoto tisab."
\v 6 Ak kiageer Aruet ne kitononi eng’ kwenutab ng’echeranato bo laitornatet ak tiong’ichoto angwan saptos, ak eng kwenuta boisiechoto. kitoogu ko u ne kegaa kebar. Kitinye kuinoik tisab ak konyek tisab, choto ko tamirmirik tisab che bo Jehova che kigiyokto koba ng’weny komugul.
\v 7 Kiwo anyun ak koib bukuit eng’ eutab tai ne bo inendet ne tebee ng’echeranato bo laitornatet.
\v 8 Ak ye kingo kagoib bukuinoto, kobutyi taitab Arwet tiong'ichoto ang’wanu saptos ak boisiechoto tiptemu ak ang’wan. Ak kitinye age tugul ketubet ak tabet ne bo tahabu ne nyiitotin nyamdutik, che kebeelei, che choto ko sautikab bikab Jehovah che tililen.
\v 9 Ak kitienyo tiendo ne leel: kolen "nyoljinin inam bukuit ak iyaat ng’oksosiekyi. Amu kigienyin, ak eng korotiguk ko kiialji Jehova biko kobun bororiet age tugul, ak che bo kutit age tugul, ak che bo bik alak tugul, ak che bo ematunwek tugul.
\q1
\v 10 Ak kiiyai icheket koek bororiet ak tisiik eng’ Jehova nenyo, ak kobounisie eng’ ng’weny."
\p
\v 11 Ak kiageerte anyun ak kiagas kutitab malaikaisiek che chang’ che kiimut ng’echeranato bo laitornatet ak tiong’ik che saptos ak boisiek. Ak koitengwai ko ki elfusiek tamanusiek konyil elfusiek konyil elfusiek che bo elfusiek.
\v 12 Kimwaei eng’ tuget ne o kole, "Nyolunot Aruet, ne kigieny, kotaach bounatet, magornatosiek, ng’omnatet, kimnatet, teegisto, torornatet ak kalosunet."
\p
\v 13 Ak kiagas kito age tugul ne kigiyai ne kimi kipsengwet, ak ne mi ng’weny, ak ne mi kureretab ng’weny, ak eng’ araraita-ak tuguk tugul che mi oring'wai-kolen, "Ingobunji inendet ne tebe ng’echeretab laitornatet ako inendet Aruet, kalosunet, tegisto, torornatet, ak bounatet koigeny ak koigeny.
\p
\v 14 Ak kimwa tiong'ichoto ang’wanu saptos kole," Amen!" Ak kobutyi ng’weny boisiechoto ak kukutungchi.
\c 6
\cl Kurget 6
\p
\v 1 Ak kiageer ye kingoyaat Aruet agenge eng' ng’ok sosiechoto tisab, ak kiagas agenge eng' tiong’ichoto ang’wan saptos komwa eng’ tuget ne ki tule ko u ilat kole "Nyo!"
\v 2 Ak kiageer anyun mbartanyit ne leel. Ak kitinye kianda ketindet, ak kigigochi inendet kutwet. Ak kimong' ko katerterin, ak asi kosich koterteris.
\v 3 Ak ye kingoyaat Arwet ng’okset ne bo aeng, agas tiondo ne bo aeng’ ne sobei kole, "Nyo!"
\v 4 Ak kimong’ Mbartanyit age---ne birir ak kigigochi inendet ne kikete koisto kalyet kobet eng’ ng’weny, si kobiit kobargei ichegei eng ichegei.. Kigigochi inendet rotwetab chok ne o.
\v 5 Ak ye kingoyaat Arwet ng’okset ne bo somok, agas tiondo ne sobei ne bo somok kole, "Nyo!" Ak kiageer anyun mbartanyit ne tuui, ak kitinyei ratilit eng’ eunyi inendet ne kikete.
\v 6 Ak kiagas ne u tuget eng’ kwenutab tiong’ichoto ang’wan che saptos kolen, "kialdoe kibabetab nganok denarit agenge, ak kialdoe kibabok somok che bo sairik denarit agenge. Ameng’em mwaita ak divaik."
\v 7 Ak ye kingoyaat Arwet ng’okset ne bo ang’wan, agas tugetab tiondo ne sobei ne bo ang’wan kole, "Nyo!"
\v 8 Ak kiageer anyun, mbartanyit ne talelyo. Ak kainetab inendet ne kikete ko kigiguree meet, ak kirube inendet oldab che kigomeiyo. Ak kigigochi ichecket kimnatet koboi kebeberta agenge eng’ ang’wan ne bo ng’weny, kobare rotwetab chok, rubet ak miondo, ak tiong’ikab timdo che yaachen che bo ng’weny.
\p
\v 9 Ak kingoyaat Arwet ng’okset ne bo mut, ageer eng’ kureretab kaptisisio sobonwekab icheket che kigibar amu ng’olyotab Jehova, ak baornatet ne kitinyei.
\v 10 Ak kimwa eng kutit ne o kole, "Agoi ou, ee Bounindetab tugul, ne tilil ak ko bo iman, si iruokyi ak iyaaktoiywech mugetit ogobo korotikyo eng’ ichek che menyei ng’weny?"
\v 11 Ak kigigochi age tugul eng’ icheket ngoriet ne goi ne leel, ak keleji ko ta kogany ne matia, kot kosulda koitetab che otwogik koboto icheket, ak tupchosiekwai, che tun kibarei ko u icheget.
\p
\v 12 Ak kiageer ye kingoyaat Arwet ng’okset ne bo lo, ak kibiit kiprengreng’it ne o mising. Ak kituuit asista ko u kuniet ne kigiyae kororik che tuuen, ak kikergeit arawet komugul korotik.
\v 13 Ak kiroroiyo ng’weny kokelik che mi kipsengwetisiek, ko u ye ibutos eng’ mogoiywet logoekyi, kotomo korurio, ye itumdumi koristo ne o.
\v 14 Ak kiistogee kipsengwet ko u kartasit ne kakimaman. Ak kigiisto eng komoswekwai tulwet age tugul ak emet age tugul ne kiikwen beko.
\v 15 Kong'et anyun Laitorinikab ng’weny ak bounik, ak kiptainik che eechen, ak magorek, ak che kimen, ak chi age tugul ne rarat ak chi age tugul ne itiagat, kounygee eng’ kebenonik ak ruandosiek che bo tulonok.
\v 16 Ak kolejini tulonok ak ruandosiek, "Oluulchech! Ak ounyech eng’ togetab inendet ne tebee ng’echeretab Laitornatet, ak eng’ neregekab Aruet.
\v 17 Amu kagoit betut ne o ne bo neregekwai. Ak tos ng’o ne imuchi kotonon?"
\c 7
\cl Kurget 7
\p
\v 1 Kingobata nito ageer malaikasiek ang’wan kotonondos eng’ luukwek ang’wan che bo ng’weny, konamei koristo ang’wan che bo ng’weny, si mata kousyi usonet ng’weny, anan araraita, anan ketit age tugul.
\v 2 Ak kiageer malaikayat age komong'u kobun kong’asis, kotinye ng’oksetab Jehova ne sobei. Kiguur malaikaisiek ang’wan eng’ tuget ne o, che kigigochi kong’em ng’weny ak araraita:
\v 3 Koleji, "Among’em ng’weny, anan araraita, anan ketiik, agoi kindene ng’okset togochikab kiboitinikab Jehova nenyo."
\v 4 Ak kiagas koitetab icheget che kiging’och, ko kiek elfusiek bogol ak artam ak ang’wan, che kiging’och eng oret age tugul ne bo legukab Israel:
\v 5 kiging’och elfusiek taman ak aeng’ che bo oretab Juda, ak kiek che bo oretab Reuben elfusiek taman ak aeng, ak kiek che bo oretab Gad elfusiek taman ak aeng,
\v 6 ak kiek che bo oretab Aser elfusiek taman ak aeng, ak kiek che bo oretab Naptali elfusiek taman ak aeng, ak kiek che bo oretab Manase elfusiek taman ak aeng,
\v 7 ak kiek che bo oretab Simeon elfusiek taman ak aeng, ak kiek che bo orethab Lawi elfusiek taman ak aeng, ak che bo oretab Isaker elfusiek taman ak aeng,
\v 8 ak kiek che bo oretab Sebulun elfusiek taman ak aeng, ak kiek chebo oretab Josep elfusiek taman ak aeng, ak kiging’och che bo oretab Benjamin elfusiek taman ak aeng.
\p
\v 9 Kingobata tuguchu, ageer anyun, tuiyet ne o ne kima komuchi chii koiit--che bunu bororiet age tugul, oret age tugul, kutuswek tugul- kotonondos eng taitab ng’echeterab litornatet ak eng’ taitab Aruet. Kilaachi ngoroik che koen ako leelach, ak Kotinye temenikab sosik eng’ eunekwai,
\v 10 ak kibarostoi eng’ kutit ne o, Kole: "Bo Sarunet Jehova nenyo ne tebe ng’echeretab Laitornatet, ak ko bo Aruet."
\v 11 Ak kitonondos malaikaisiek tugul ko kaimuut ng’echeretab Loitornatet, ak boisiek, ak tiong'ik ang’wan che saptos, ak kiibutyi ng'weny eng taitab ng’echeretab Laitornatet. Ak kolos Jehova,
\v 12 kolen, "Amen! Bo Jehova nenyo kolosunet, ak torornatet, ak ng’omnatet, ak kongoi, ak tegisto, ak kamuktaet, ak kimnatet, koigeny ak koigeny! Amen!"
\p
\v 13 Ak kitebena agenge eng’ boisiek, kolejo, "Chu ilaachi ngoroik che leelachen, ko ng’o, ak kobunu ano?
\v 14 Ak kiawolji inendetn aleji, "Kiptaiyandeni, ingen inye," kolecho anyun, "Chu ko icheket che bunu nyalilda ne o. Ak kigoun ngoroikwai koleelagitu eng’ korotikab Aruet."
\v 15 Amu nito anyun, komi icheket taitab ng’echeretab laitornatet ne bo Jehova; ak koboisiechini inendet bet ak kemoi eng’ hekalunyi. Ak koiitoi inendet ne tebe ngecheretab laitornatetab emainnyi eng’ baragung’ wai.
\v 16 Ma kogasei rubet kogeny, ama koamei melelda kogeny. Makobeelei ichekt asista, ama kobelei icheket mat age tugul.
\v 17 Amu egu mestowong’wai Aruet ne mi kwenutab ng’echeretab laitornatet, ak kondochini icheket koba konyekab beko che saptos, ak kobukchi Jehova beekab kong alak tugul eng’ konyekwai."
\c 8
\cl Kurget 8
\p
\v 1 Ak ye kingoyaat ng’okset ne bo tisab, kosis kipsengwet kasarta ne legit kebebertab sait.
\v 2 Ak kiageer malaikaisiek tisab che kitonondos eng’ taitab Jehova, ak kigigochi kiriambusiek tisab.
\v 3 Ak kicho malaikayat age, konyo kotonone ole bo kapkorosut, kotinyei teret ne bo tahabu; ne kibelee nyamdutik. Ak kigigochi nyamdutik che chang’ che kibeele, si kotese sautikab che tililen tugul chebo Jehovah eng’ kapkorosutab tahabu, ne kimi taitab ng’echeretab laitornatet.
\v 4 Ak kitogosta iyetab nyamdutik che kibeelei---koboto sautikab biko che tililen, eng taitab Jehova ak eng’ eutab malaikayat.
\v 5 Ak kiib malaikaiyat teronoto ak konyiit matab kapkoros konyi. Ak kowirji ng’weny, ak kibiit tulosiek, ak kutuswek ak kalyelosiek, ak kiprengreng'iet.
\p
\v 6 Ak kipchopgei malaikasiek tisabu che kitinyei kiriambusiek tisab si koguut.
\v 7 Ak kiguut malaikayat ne bo tai, ak kibiit koikab ropta ak mat, che ing'olotin ak korotik. Ak kigiwirji ng’weny; ak kilal kebeberta agenge eng somok ne bo ng’weny, ak kilal kebererta agenge eng somok ne bo ketiik, ak kilalyo suswek tugul che nyalilen.
\v 8 Ak kiguut malalikayatab aeng’ ak kigiwirji anaraita kit ne u tulwet ne o kolalei. Ak kiek korotik kebeberta agenge eng’ somok ne bo araraita,
\v 9 ak kimeiyo kebeberta agenge eng’ somok ne bo tiong’ik che kimi araraita che ki saptos, ak kiging’em kebeberta agenge eng’ somok ne bo melisiek.
\v 10 Ak kiguut malaikaiyatab somok, ak kirorok kokeliet ne o kobun barak, kolalei ko u torchit, ak kiibutyi keberta agenge eng’ somok ne bo ainosiek.
\v 11 Kigiguure kainetab kokelienato ng’wanindo. Ak king’waniit kebeberta agenge eng’ somok ne bo beko, ak kimeiyo biko che chang’ eng’ beechoto, amu kiga kiyai kong’wonegitu.
\v 12 Ak kiguut malaikaiyatab ang’wan iriambunyi, ak kigikwer kebeberta agenge eng’ somok ne bo asista, ak kebeberta agenge eng’ somok ne bo arawet ak kebeberta agenge eng’ somok ne bo kokelik. Ak koimenit kebeberta agenge eng’ somok ne bo tuguchoto, ama lapkeit betut eng’ kebeberta agenge eng’ somok ak kebebertab somok ne bo kemout ko kima kotinye lapkeiyo age tul.
\p
\v 13 Ak kiageer, chepsireret ne kitirireni eng’ eng barak ak agas kolen eng’ kutit ne o, "Bwo bwo, bwo, agobo Icheket che menye ng’weny, amu cheosiek alak che bo iriambusiek che bo malaikaisiek somok che ta koguutei."
\c 9
\cl Kurget 9
\p
\v 1 Ak kiguut iriambunyi malaikaiyatab mut. Ak kiogeer kekeliet ne kibunu kipsengwet ko kakobutyi ng’weny. Ak kigigochi inendet yateiywot ne bo kebenet ne lo missing amatinye let.
\v 2 Ak kiyaat kebenonoto matinye let, ak kilany iyeto komong’une kebenonoto, ne u iyeto ne bo mat ne o missing. Ak koimenit asista ak soet amu iyetab kebenonoto.
\v 3 Ak kimong’une chereng’enyinik iyeto kobwa ng’weny, ak kigigochi ichek kimnatet ne u ne bo takolikab ng’ony.
\v 4 Ak kiging’at icheket komang’em suswekab ng’weny anan ko kiy age tugul ne nyalil anan ko ketit age tugul, ago bichoto ichegei che kimatinye ng’oksetab Jehova eng’ togochikwai.
\v 5 Ak kiging’at icheket keleji amat kobar bichoto, ago si kobiit konyalil icheket arawek mut. Ak ki u kanyalileng’wai kanyalitetab takoliet, yo kasus chito.
\v 6 Ak tun cheng’e biko meet eng’ betusiechoto ako mogoi nyor. Isori biko ko machei komeiyo, ak komweei meiyat eng’ icheket.
\v 7 Ak ki u itonwekab chereng’enyisiechoto mbartanyisiek che chobotin koba boriet. Ak ki u yo mi metowekwai kutwesiekab tahabu ak togochikwai ko kigerge ak togochikab biko.
\v 8 Ak kitinye sumeek che u sumeekab chepyoso, ak ki u kelekwai kelekab ng’etunyik.
\v 9 Ak kitinyei garik che kiilaakyini teget ko u che bo karnok; ak ki u cheetab kebebaikwai cheetab karisiek che bo mbartanyisiek che chang’ che ruaei kobendi boriet.
\v 10 Ak kitinye saruraik che u che bo takolaik; ak eng saruraikwai ko kitinye kimnatet kosus biko eng’ arawek mut.
\v 11 Ak kitinye icheket laitoriat ne bou, noto ko malaikaiyatab kebenet ne mang'ete let. Ne kainenyi eng’ kutitab Hebranik ko abnandon, ak eng yunanik ko Apollyon.
\p
\v 12 Kagosiirto bwo ne bo tai. Okeer anyun! Ye ibata kobwanii nyasutik alak aeng’u.
\p
\v 13 Ak kiguut malaikaiyatab lo iriambunyi, ak kiagas tuget ne mongune kuinoikab kapkorosutab tahabu ne mi taitab Jehova,
\v 14 komwachini malaikaiyandanato bo lo, ne kitinye iriambut, kolech, "Itiach malaikaisiek ang’wan che ratotin eng’ ainet ne o ne bo Euphrate."
\v 15 Ak kigitiach malaikaisiechoto ang’wan, che kiga kechob ogobo kasarata, ak betut, ak arawet, ak eng kenyinoto ketiach kobar kebebertab agenge eng’ somok ne bo biko.
\v 16 Ak kiek koitetab askarikab luget che kikalany mbartanyisiek 200,000,000. Ak kiagas koitengwai.
\v 17 Ak kiageer anyun ko u noto mbartanyisiek eng ng’ang’utiet ak icheget che kikete: Kokitinye garik che kilaakyini tegetik che u mat, ak che u haukinto ak che songi ko u koik che laldos. Ak ki u metowekab mbartanyisiek metowekab ng’etunyik, ak komong’une kutuswekwai mat, ak iyeto, ak koik che laldos.
\v 18 Ak kibar tiong’ichu somogu kebeberta agenge eng somok ne bo biko, eng’: mat, iyeto ak eng’ koik che laldos che kimong’une kutuswekwai.
\v 19 Amu kimi kimnatetab mbartanyisiechoto kutuswekwai, ak saruraikwai-- amu kikergei sarurikwai ak erenok, amu kitinye metowek che kisuse biko kot konyor mook.
\v 20 Ak biko che king’et, che kima kibar eng’ korotwechoto, ko mosig eng' boisionikab eunekwai si ma ta kosa oik ak kanamonikab tahabu, ak che bo feda, ak che bo sugunonik, ak che bo koik, ak chebo ketik---tuguk che maimuchi kogeerto, anan kogasta anan kobendat.
\v 21 Amasik eng rumisiosiekwai, anan eng’ banitwogikwai, anan eng sokseng'wai, anan eng chorsosiekwai.
\c 10
\cl Kurget 10
\p
\v 1 Ak kiageer kogeny anyun malaikaiyat age ne kim kochorugei eng kipsengwet. Kikakilaagchi boldet, ak kimi kibembeit baragutab metinyi. Ak ki u togenyi asista, ak ki u kelyekyi toloiwekab mat.
\v 2 Ak kikanam eng’ bukuit ne mining, ne kikiyat eng eunyi. Ak kiindeno keldanyi ne bo tai nyanjet ak kondeno ne bo katam emet.
\v 3 Ak kiwaach eng’ tuget ne o ko u yo morori ng’etundo. Ak ye kingo kagowaach, kong'ololyo ilotik tisab eng' tulosiekwai.
\v 4 Ak ye kingo kogong'ololyo ilotik tisabu, amach asir, ako kiagas tuget ne bunu kipsengwet kole, " Ng’och tuguk che kamwa ilotik tisabu. Amesir."
\v 5 Ak Kinamji barak eunyi ne bo tai kotokyi kipsengwet malaikaiyat ne kiageer kotonone araraita ak emet.
\v 6 Ak kimuro eng inendet ne sobei koigeny ak koigeny, inendet ne kiyai kipsengwet ak tuguk che mito orit, ng’weny ak tuguk che mi orit, ak araraita koboto tugul che mito orit, ak komwa malaikaiyat kole, "Makomii kaenetabge.
\v 7 Ago eng’ betut ye machei koguut iriambunyi malaikaiyatab tisab, kosulda anyun ung’otietab Jehova, ko u logoiywek che tililen che kimwochi kiboitinikyi maotik."
\p
\v 8 Ak tuget ne kiagas kobunu kipsengwet kong’alolwo kogeny: kole, "Ui, nam bukuit ne yataat eng eutab malaikayat ne tononi eng araraita ak eng’ ng’weny."
\v 9 Awe anyun ole kimi malaikaiyat ak aleji kogona bukuinoto mining. Ak kolejo, "Nam bukuit ak iaam. Igochini moeng’ung kong’wanit, ago anyinyitu eng’ kuting’ung’ ko u kumiat."
\v 10 Ak kianam bukuit ne mining eng’ eutab malaikaiyat ak aam. Ak ki anyin eng' kutinyu ko u kumiat, ak kingo kaam, kong’wanit eng’ moennyu.
\v 11 Ak kimwowo kole, "Kanyoljin imaoten agobo bik che chang,’ bororiosiek, kutuswek, ak laitorinik.
\c 11
\cl Kurget 11
\p
\v 1 Ak kigigona tegat ne u kirokto aboisie koek ne kikwoisie. Ak kikilejo, "Ngeet ak ikwaa hekalutab Jehova ak kapkorosut, koboto icheget che saei eng’ oloto orit.
\v 2 Ago bagakte, amat ikwaa kiyeng'ut ne mito hekalut sang, amu kigegochi Bororiosiek. Ak kotiechatiechi eng’ kelyekwai nganaset ne tilil eng arawek artam ak aeng.
\v 3 Agochini baorinikyu aeng’ komaoten betusiek 1,260 kolachi kuniook."
\v 4 Baorinichuto ko ketik aeng’ che bo emitic ak kelyek aeng’ che bo taisiek che kotonondos eng’ taitab Kiptaiyet ne bo ng’weny.
\v 5 Ak komache chi konyalil icheket, komong’une mat kutuswekwai ak kotar bunikwai. Ak ngot ko mache chi konyalil icheket, kebare ko u nito ne matiny.
\v 6 Tinye baorinichuto kimnatet koger kipsengwet si marobon eng’ betusiekab maoinatengwai. Ak kotinye kimnatet kowal beko koek korotik ak kobir ng’weny eng’ koroita age tugul ko u ole maktoi.
\v 7 Ak ye tun kagotar baornatengwai, koyai luget agobo icheket tiondo ne mong’une kebenet ne loo ama tinye let. Iterteri ak kobar icheket tionyoto.
\v 8 Ak tebsot muswekwai eng’ oretab nganaset ne o, (ne kiguure eng’ tamirmiriet Sodom ak Misiri) ole kiga kigartate Kiptaiyandengwai.
\v 9 Ak keerei muswekwai alak eng’ biko tugul che bunu ortinwek, ak kutuswek, ak bororiosiek, eng’ betusiek somok ak kebebertab betut. Ama chamdoi ketub muswekwai eng’ kererit.
\v 10 Ak boiboitu che menye ng'weny ogobo icheget ak kogasge. Ak koyokyige konunoik agenge eng age amu kinyalili maotichuto aeng’ icheket che menyei ng’weny.
\v 11 Ak ye kingobata betusiechoto somogu ak kebeberiat kochut icheket kambusetab sobondo ne bunu Jehova, ak kotononio eng’ kelyekwai. Ako name cholatet ne o ichek che keere icheket.
\v 12 Ako kase tuget ne o ne bunu kipsengwet kolejini icheket, "Olong’u oli!" Ak kolanye koba kipsengwet eng boldet, kogeeroti icheket bunikwai.
\v 13 Ak eng kasarata kobiitu kiprengreng’iet, ak kolul kebeberta agenge eng’ taman ne bo nganaset. Ak kobare kiprengreng'ianato biko elfusiek tisab, ak kicholsot che ng'etu ak kogochi torornatet Jehova ne bo kipsengwet.
\p
\v 14 Kagosiirto nyalilda ne bo aeng. Keer anyun! Nyoni Nyalilda ne bo somok kochogu.
\p
\v 15 Ak kiguut malaikaiyatab tisab iriambunyi, ak kibiit tugosiek che eechen eng’ kipsangwet ak komwa kole, "Kagobunji bounatetab ng’weny Kiptayandenyu, ak ko bo Kristo nenyi, ak kobou koigeny ak koigeny."
\v 16 Ak kiibutyi ng’weny boisiek tiptemun ak ang’wan, che tebee taitab Jehova eng’ ng’echerokwai che bo torornatet, ak kokutungji Jehova.
\v 17 Komwae kole, "Kiwegun kongoi, ee Kiptaiyat Jehova kamuktaindet, ne imi, ak kiimi, amu kainam kamuktaeng’ung ne o ak kaitou ibou.
\q1
\v 18 Kinerekcho bororiosiek, ak kakonyo nereknateng’ung. Ak kakoit betut ne kiruokyine biko che kigomeiyo ak betut ne kigochine kiboitiniguk maotik melekwekwai, ak biko che tililien, ak icheket che kiiywei kaineng’ung, che mengechen ak che eechen. Kakoit kasarta nengu'un ing’em icheket che ngemei ng’weny."
\p
\v 19 Ak kigiyaat hekalutab Jehova eng’ kipsengwet ak kitook eng’ hekalunnyi moingetab arorutioenyi. Ak kibiit kalyelosiek ak kutuswek, ak tulosiek ak kiprengreng'osiek, ak koik che eechen che bo ropta.
\c 12
\cl Kurget 12
\p
\v 1 Kitook kaborunet ne o eng kipsengwet: chepyoso ne kiilaachi asista, ak komi arawet ng'wenyutab kelyekchi ak kimi metinyi kutwetab kokelik taman ak aeng.
\v 2 Kitomono inedet, ak kiwaache kotinye ngw'anindab sigisiet, ak eng’ ng'wanindo komache kosigis.
\v 3 Ak kitook kaborunet age eng kipsengwet: Ogeer anyun! Kimi tiondo ne o ne borir ne kitinye metewek tisab ak kuinok taman, ak kimi metewekchi kutwesiek tisabu.
\v 4 Ak kibukto saruryenyi kebeberta agenge eng somok ne bo kokelikab kipsengwet ak kowirji ng'weny. Ak kitonon tionyoto eng taitab chepyosonoto kimache kosigis, kole si ye sigis, koam lekwet.
\v 5 Ak kisich lekwet ne werit, ne tun ko bou bororiosiek tugul eng kiroktab karnet. Ak kigimut kechaktae lakwenyi kwo ole mi Jehova agoi nyecherenyi ne bo laitornatet.
\v 6 Ak kimwei chepyosonoto kwo tumoo kwen, ole kitinye komosta ne kiga kochopchi Jehova, si komuch kobai inendet eng oloto betusiek 1,260.
\p
\v 7 Ak kibiit boryet eng kipsengwet. Kiwo Mikol Koboto malaikaisiekchi kobarge ak tiondo, ak kiyai boryet tionyoto ak malaikaisiekchi.
\v 8 Ago kima ko kim tionyoto komuch koterteris. Ak ki mata konyor olda ngwai kogeny eng kipsengwet.
\v 9 Ak kigiwiir tionyoto O konyo ng'weny erenet ne bo keny, ne kigiguure Chesawil anan ko Setani, keberberindetab ngweny komugul- kigiwir konyo ngweny, ak kigiwir malaikaisiekchi koboto inendet.
\v 10 Ak kiagas kutit ne o eng kipsengwet: kole, "kagocho raa sorunet ak kamuktaet ak bounatetab Jehova nenyo, ak kimmatetab Kristo nenyi. Amu kagewirta kataminetab che kitupche kwa ngweny, kiitami icheket eng taitab Jehova nenyo bet ak kemoi.
\q1
\v 11 Ak kiiterter inendet amu korotikab Aruet ak amu ng'olyotab baornateng'wai ama cham sobonwekwai agoi meet.
\q1
\v 12 Noto anyun oboiboitu, akwe kipsengwetisiek, ak akwe che omenye oloto! Ako mutyo agobo ng'weny ak araraita, amu kachorge chesawilyet kocho ole omite! Kotinye nereknatet ne ya ako ingen kole tinye kasarta ne kitigin kityo!
\p
\v 13 Ak ye kingogeer chesawilyet kole kagewir kocho ng'weny, korub chepyoset ne kasiche lakwet ne werit.
\v 14 Ak kigigochi chepyosonoto kebebaik aeng chebo chepsireret ne o si komuch kotiriren kwo oldanyi ne kigichopchi eng ong'atet. Nito ko ole kigiribee, betusiek ak kebebertab betusiek koistoege erenet.
\v 15 Ak kirong erenet beeko eng kutinyi che teno ainet korubee chepyosonoto kole si komuch koib inendet bechoto.
\v 16 Ak kitoret ng'weny chepyosonoto. Kiyaat kutinyi ng'weny ak kolugui ainet ne ki rang'uge eng kutitab chesawilyet.
\v 17 Ak kinerekchi chesawilyet chepyosonoto ak kwo kobarge akch bo orenyi, icheket che ribe ng'atutikab Jehova ak kotinye baornatetab Jeiso.
\v 18 Ak kitonon tiondo eng kipsiaiyet ne mito tabandab araraita.
\c 13
\cl Kurget 13
\p
\v 1 Ak kiageer tiondo kolong'u kong'etune araraita. Ak kitinye kuinoik taman ak metewek tisab. Ak eng' kuinoikyi ko kitinye kutwesiek taman, ak eng metit age tugul ko kimi kainetab chubisiet.
\v 2 Ak tionyi kiogeer ko ki kerge ak cheplanget. Kelyekchi ko ki u kelyekab chebogerit, ak kiu kutinyi kutitab ng’etundo. Ak kiigochi chesawilyet inendet kimnatenyi, ng'echerennyi, ak bounatet ne o asi koboi.
\v 3 Ak kiageer agenge eng' metewekchi ko u yo kagikwer ak kitinye moet ne ya, ak kigakosob moet. Ak kikwong ng'weny komugul ak korub tiondo.
\v 4 Ak kora kogutungji icheket chesawilyet, amu kigochi bouinatenyi tiondo. Ak kigutungji icheket kora tiondo ak kotestai komwa kole, "Ng’o ne kerge ak tiondo?", ak "Ngo ne imuchi koborio ak inendet?"
\v 5 Ak kigigochi tiondo kutit kong'alal tuguk che bo laskeita che eechen ak chubisiet. Ak kigigochi inendet kimnatet koboisie arawek artam ak aeng.
\v 6 Ak kiyaat kutinyi kochub Jehova, ak kochub kainenye ak gonyi, ak icheket che menye kipsengwet.
\v 7 Ak kigigochi tiondo chamjinet kobarge ak bikab Jehovah che tililen ak kotur icheket. Ak kigigochi kora kimnatet koboi oret age tugul, ak biko tugul, ak kutit age tugul ak bororiet age tugul.
\v 8 Ak kogutungji inendet tugul che menye ngweny, chi agetugul ne ma kisirchi kainenyi Bukuitab Sobondo, ne bo Aruet ne kigieny kong'etee taunetab ng’weny.
\v 9 Ngo tinye chi age tugul itit, kogas.
\v 10 Ngot kemuti chi kerat, kerate ne matiny. Ngot kebare chi eng rotwetab chok, ko eng rotwetab chok kebare nematiny. Mi yu muitaet ak kayanetab biko che tililen.
\p
\v 11 Ak kiager tiondo age kolong'u eng ng'weny. Kitinye kuinok aeng ko u aruet, ak king'alali ko u chesawil.
\v 12 Ak koboisie kimnatet tugul ne bo tiondo nebo tai eng tainyi, ak kogochi ng'weny ak che menye ng'weny kogutunji tiondo ne kibo tai----noto ne kigisoob ole kitinye moet ne ya.
\v 13 Ak kiyai inendet kaborunoik che eechen. Kiyai agot mat kororok ng'weny kong'ete kipsengwet eng taitab biko.
\v 14 Ak kiken icheket che menye ng'weny eng kaborunoik che kigigochi inendet kamuget koyai eng taitab tiondo, koleji icheket che menye ng'weny komuswogenji kanamwet tiondo--- ne tinye lomutietab rotwetab chok, ako kisob kogeny.
\v 15 Ak kigichamji inendet kombushi kanamwetab tiondo si komuch kong'alal kanamwetab tiondo, ak kotil kole kebar tugul che ma kutungjini kanamwetab tiondo.
\v 16 Ak king'at tugul, che mengechen ak che eechen, mogorek ak kibananok, che itiogotin ak che ratotin, kotaach ng'okset eng eutab tai anan ko eng toget.
\v 17 Ak kima imugakse eng chi age tugul koalis anan koaldois ngo matinye ng'okset ne bo tiondo, noto ko koitetab tiondo ne koitet ne teleldochini kainenyi.
\v 18 Ni ko mache ng'omnatet. Inendet ne tinye Kaguiyet, koiit koitetab tiondo. Amu koitetab chi. Ako koitenyi ko bogol lo ak tamamwogik Lo ak Lo (666).
\c 14
\cl Kurget 14
\p
\v 1 Ak kichilte, ak ki ageer anyun Aruet ko tononi eng Tulwetab Sion. Ak koboto inendet ko kimi biko alfusiek bogolu ak artam ak ang’wan (144,000) che kitinye kainenyi ak kainetab kwandanyi che kigisirchi togochikwai.
\v 2 Kiagas kutit kobun kipsengwet ne u bolatetab beko che chang ak ko u tuletab ilet ne bolei mising. Ak tuget ne kigagas ko ki u nebo butik che bute kibukandisiekwai.
\v 3 Ak kitien tiendo ne leel eng taitab ngechenetab laitornatet, ak eng’ taitab tiongik ang'wan che saptos ak boisiek. Ama mi chi ne kimuchi konetge tienoto kobate icheget 144,000 che kigimutu kong'e ng'weny.
\v 4 Chuto ko icheghet che ma nyerege eng chepkukonik, amu bergeinik icheget. Chuto ko icheget che rube Aruet eng’ oldo tugul ole wendi. Kigial chuto eng’ kwenutab biko koek logoekab tai eng Jehova ak eng Aruet,
\v 5 Ama kinyorji kutuswekwai lembechta; ama tinye tisia.
\p
\v 6 Ak kiageer malaikaiyat age kotirireni eng kwenutab barak, kotinye logoiywek che tililen che bo koigeny asi koamchi icheket che menye ng'weny--- ak bororiet age tugul, oret, kutit, ak biko.
\v 7 Ak kigurso eng kutit ne o, kole, "Oiywei Jehova ak ogochi torornatet. Amu kagoit kasartab kiruogenyi. Ogutungji inendet, ne kiyai kepsengwet, ak ngweny, ak araraita neo ak ole kosunee beeko."
\v 8 Ak korub malaikaiyat ne bo aeng, ne mwae kole, "Kagolul, kagolul Babulon ne o, ne kisaisai bororiosiek tugul koee divaikab koromnatetab soksennyi."
\v 9 Ak korub icheket malaikaiyat age--ne bo somok ne mwae eng tuget ne o kole, "Ngot ko kutungji chi age tugul tiondo ak kanamwenyi ak kotaach ngokset eng togenyi nda ko eng eunyi,
\v 10 koee agine divaik che bo neregek che koromen che bo Jehova, che kigichob ama king'ool eng tabetab (kikombetab) nerekekchi. Chito ne eei kenyalili eng mat ak koik che laidos eng taitab malaikaisiek che tililen ak eng taitab Aruet.
\v 11 Ak lonye iyetab ngwanindongwai koigeny ak koigeny, ama tinye kamuung'et bet ak kemoi--- icheket che ilosu tiondo ak kanamwenyi, ak age tugul ne taache ngoksetab kainenyi.
\v 12 Mi yu Muitaetab bikab Jehovah che tililen, icheget che ribe ng’atutikab Jehovah ak kayaneng'wai eng Jeiso."
\v 13 Ak kiagas tuget kong'ete kipsengwet kole, "Sir chu: Boiboen icheket che meisot eng Kiptaiyat." "Eeh," mwae Tamirmiryet, "Si komuch komuuny eng boisionikwai, amu rube icheket boisionikwai".
\p
\v 14 Ak kiatobende, ak ageer anyun boldet ne leel. Ako ne kitebe boldanato ko chito ne u weritab chi. Kitinye eng’ metinyi kutwet ne bo tahabu ak kimi eunyi ringet ne ng'atib.
\v 15 Ak komong' malaikaiyat age eng kapkorosut ak koguur eng kutit ne o inendet ne kitebe boldet: Ak koleji, "Naam ringeng'ung ak itou igesisie. Amu kogoit kasartab kesisiet, amu kagoruryo kesutikab ng’weny."
\v 16 Ak kiwirchi ng'weny ringenyi inendet ne kitebe boldet, ak kigiges ng'weny.
\v 17 Ak Kimong malaikaiyat age eng kapkorosut ne mi kipsengwet; kotinye agine ringet ne ng'atib.
\v 18 Ak kimong’ kora malaikaiyat age eng kaptisisiet ole kibelee nyamdutik, inendet ne kitinye kimnatet eng mat. Kiguur anyun inendet eng kutit ne o, inendet ne kitinye ringet ne ng'atib, koleji, "Naam ringeng'ung ne ngatib ak iruruch sabibukab ketik che bo ng'weny, amu kagoruryo sabibukchi."
\v 19 Ak kiwirchi malaikaiyat ringenyi ng'weny ak kokes sabibukab ng'weny. Ak kowirji kenut ne o, ole kitue sabibuk che bo neregekab Jehova.
\v 20 Ak kigitiech ole kitue sabibuk eng nganaset sang’, ak komong korotik eng ole kituisie kot koit karikab kutitab mbartanyisiek, ne ite olo bo mailisiek bogol aeng.
\c 15
\cl Kurget 15
\p
\v 1 Ak kiageer kaborunet age eng kipsengwet, ne o ak ko bo kwang'ut: Kimi malaikaisiek tisabu che tinye korotwek tisab, choto ko korotwek che bo let, amu kitoree choto neregekab Jehova.
\p
\v 2 Ak kiageer kito ne ki u araraita ne o ne u glasit ne ing'olat ak mat. Ak kotonondos eng tabandab araraita ko ki icheget che kiga koterter tiondo ak kanomwenyi ak koitetab kainenyi. Kitinye icheket kibukandisiek che kigochini icheket Jehova.
\v 3 Ak kitiensot icheket tiendab Musa, kiboityotab Jehova, ak tiendab Aruet: Kolen, " Eechen ak ko bo kwong'ut boisioniguk, ee Kiptaiyat Jehovah, Kamukitaindet. Bo imanda ak kobo iman ortinweguk, inye Laitoriatab bororiosiek.
\q1
\v 4 Tos ng'o ne ma iywein inye Kiptaiyat ak kotoror kaineng'ung? Amu inye inyege ne itilil. Bwanii bororiosek tugul ak kogutungjin eng taing'ung, amu kageng'any boisoniguk che bo Imanda."
\p
\v 5 Ak kingobata tuguchu ageerte, ak kigiyat hekabut ne bo emaitab baornatet eng kipsengwet.
\v 6 ak kimong'une hekalunato malaikaisiek tisabu che tinye korokwechoto tisab. Ak kilaachi ngoroik che tililen, che kilile bich, ak koratatege biriraikab tahabu komut tegetikwai.
\v 7 Ak Kiigochi age eng tiong'ik ang'wan che septos malaikasiek tisab ketubosiek tisab chebo tahabu che nyiitotin neregekab Jehovah, inendet ne sobe koigeny ak koigeny.
\v 8 Ak kinyi hekalut iyeet ne kibunu toronatetab Jehovah ak kong'ete kimnatenyi. Ak kima imuch chi kwo hekalut orit agoi kosulda korotwek tisabu che bo malaikaisiek tisab.
\c 16
\cl Kurget 16
\p
\v 1 Ak kiagas tuget ne o kogurse eng hekalut kolejini malaikasiechoto tisab, "Oba ak orongji ng'weny ketubosiek tisab che bo neregekab Jehovah."
\v 2 Ak kiwo malaikayat ne bo tai ak korongji ng'weny ketubenyi: ak kibityo mook che ang'osen ak ko ngwonen eng biko che kitinye ng'oksetab tiondo ak che kisae kanamwenyi.
\v 3 Ak kirongji malaikaiyat ne bo aeng ketubenyi araraita. Ak kiwalak koek korotik, ko u korotikab chito ne kagome, ak kime kiy age tugul ne sobe ne ki mi araraita.
\v 4 Ak kirongji malaikaiyat ne bo somok ketubenyi ainosiek ak kong'ikab beeko, ak kiek korotik.
\v 5 Ak kiagas malaikaiyat ne bo beeko komwa kole, "Ibo imanda- inye ne imi, ak ko kiimi, Inye ne Itilil-- amu kairuoch ko u noto.
\v 6 Amu kitumda korotikab biko che tililen ak che bo maotik, ak kaigochi icheket korotik koe; amu nyoljini icheket ko u noto."
\v 7 Ak kiagas kapkorosut komwa kole, "Eeh, Kiptaiyat Jehovah, Kamuktaindet, bo iman ak ko bo imanda kiruogutiguk."
\v 8 Ak kirongji malaikaiyat ne bo ang'wan ketubenyi asista, ak kigichamji kobeel biko eng' mat.
\v 9 Ak kigibeel biko eng mat ne o, ak kichub kainetab Jehovah, inendet ne tinye kimnatet eng korotwechuto. Ako ma sik anan kogochi inendet torornatet.
\p
\v 10 Ak kironji malaikaiyat ne bo mut ketubenyi ngecheretab laitornatet ne bo tiondo, ak kotuch tuindo bounatenyi. Ak kinyei ngelyebwekwai amu ngwanindo.
\v 11 Ak kichub Jehovah ne bo kipsengwet amu ng'wonindong'wai ak mookwai, ak kitoiyo kora kosik eng boisionikwai.
\v 12 Ak Kironji malaikaiyat nebo lo ketube ainet ne o, noto ko Euphrate. Ak kiyaamnyo beekyi si kobiit kochobok oretab laitorinik che bunu kong'asis.
\v 13 Ak kiageer tamirmirik somok che muruonen che kerge ak morororchik komong'une kutitab chesawil ak eng kutitab tiondo ak eng' kutitab maotiot ne bo lembech.
\v 14 Amu choto ko tamirmirikab oik che yae kwang'utikab kaborunoik. Che kibendi ole mi laitorinikab ng'weny komogul, si koruruch icheket koba lugetab betut ne o ne bo Jehova Kamuktaindet.
\v 15 ("Ogeer anyun! Anyoni ko u chorin! Iberurot inendet ne ripsei, ak koribei ngoroikyik si ma wendot aach ngor ak kegeer kalilanennyi.")
\v 16 Ak kirurukchi icheket eng' orit agenge ole kiguure Har-Magedon eng' kutitab Hebranik.
\p
\v 17 Ak kironji malaikaiyat ne bo tisab ketubenyi eng' soet. Ak kimong' tuget ne o eng' hekalut ak kobun ng'echeretab laitornatet, kole, "Kagosulda!"
\v 18 Ak kibiit kalyelosiek che bo ilet, ak kung'unyng'unyet, tulosiek, ak kiprengreng'iet ne kim--kipengreng'iet ne sirei tugul kong'etee kotoi komeny chito eng' ng'weny, ak eng iman ko ki o kiprengreng'iet noto.
\v 19 Ak kipcheak nganaset ne o koek komoswek somok, ak kilulyo nganasokab bororiosiek. Ak kiinan Jehovah Babulon ne o, ak kiigochi inendet kikombet ne nyiitat divaikab koromnatetab neregekchi.
\v 20 Ak kibet emet age tugul ni kiikwen beko, ama keroo tulondok.
\v 21 Ak kirorokyi biko koikab ropta che eechen kobun barak che te nyigisindang'wai talentait. Ak kichub biko Jehovah amu koroitab koichoto bo ropta amu ki yaa mising' koroito noto.
\c 17
\cl Kurget 17
\p
\v 1 Ak kinyo age eng' malaikaisiechoto tisab ne kitinyei ketubosiek tisab, konyo kong'alolwo, kole, "Nyo, si aborun kiruogetab chepkugoniot ne o ne tebe beko che chang,
\v 2 nee kiyai sokset akaitorinikab ng'weny ak inendet, ako kibogityo meng'ikab ng'weny, eng' divaikab soksenyi."
\p
\v 3 Ak kiimuta malaikaiyat eng' Tamirmiriet agoi surkwen, ak kiageer chebioso ne kitebe tiondo ne birir, ne nyiitat kainaikab chubisiet. Kitinye tionyoto metowek tisab ak kuinoik taman.
\v 4 Ak kiilaachi chebiosonato ngoroik che arusen ne birir ak che biriren, ak kigilelesonjine tahabu ak koik che bo kamanutiet ne o mising' ak sanaek che kororon. Kitinye eng' eunyi kikombet ne bo tahabu ne nyiitat tuguk che sasotin ak tugukab simdo che bo soksenyi.
\v 5 Ak kigisirji togenyi kainet ako ne ung'at kele: "Ung'otiet, Babulon ne o, kametab chepkugonik ak ne bo tuguk tugul che kesase che bo ng'weny."
\v 6 Ak kiageer kwonyoto ko kagobogit eng' korotikab biko che tililen che bo Jehovah, ak eng korotikab baorinikab Jeiso. Ak ye kingageer inendet, akwong' eng' kwonget ne o.
\p
\v 7 Ak kilejo malaikaiyat, "Kekwong' amu nee? Amache amwaun ung'otietab kwonyito ak ne bo tiondo ne keseni inendet, ne tinyei metowek tisab ak kuinoik taman.
\v 8 Tionyi kegeere ko kimi, ama mami ra, ak ko legit komong' eng' kebenet ne lo ama ng'ete let. Ak kowendi luset. Ak kwong'dos icheket che menye ngweny, che makisirji kainaikwai Bukuitab Sobondo kong'ete ngab kelumda ng'weny---ye keer tiondo, amu Kimi, ama Komi raa, ak kota konyonii.
\v 9 Mi yu kaguiyet ne bo ng'omnatet. Metowechoto tisab ko tulondok tisab, che tebe kwonyoto.
\v 10 Ak choto ko laitorinik tisab. Kigobutyo mut, mito agenge, tomo konyo age; ak ye nyo, konyoljini kotebi ne matia.
\v 11 Ak tionyoto kimi, ama komi, inendet ko laitoriat ne bo sisiit. Ak ko agenge eng' chun tisab ak ko wendi ng'emisiet.
\v 12 Ak kuinoichoto taman che kegeer ko laitorinik taman che tomo konam bounatet, ak konyoru kimnatet ko u laitorinik koboto tiondo, eng' boroindab sait agenge.
\v 13 Tinyei kabwatet agenge, ak kogochini icheket tiondo kamuget ak kimnateng'wai.
\v 14 Baregei chuto ak Aruet. Ak koterteri Aruet icheket amu inendet ko Kiptaiyatab kiptainik ak ko Laitoriatab laitolrinik--ak icheget che mi koboto inendet ko che kigeguur, che kigelewen ak che kiyani."
\v 15 Ak kilejo malaikaiyat, "Beechu Kegeere, che katebee chepkugoniot, ko biko, ak tuiyosiek, ak bororiosiek, ak kutuswek.
\v 16 Ak kuinoichu kegeere taman ak tiondo, ko tun sasei chepkugoniot. Ak kometo kotebi inegei komi aach ngor, ak koam banyekyi, ak kobeel inendet eng' mat kogesgei.
\v 17 Amu kiindeno Jehova mugulelwekwai koyai magenyi ak kosich tugul kabwatet agenge, ak kokoshin kogochi tiondo bounatengwai, agoi kosulda ng'alekab Jehova.
\v 18 Ako chepyosoni kegeere ko nganaset ne o, ne bou laitorinikab ng'weny."
\c 18
\cl Kurget 18
\p
\v 1 Kingobata tuguchu ageer malaikayat age kochoruge eng' kipsengwet. Kitinye kimnatet ne o, ak kokweny ng'weny eng' talilindanyi.
\v 2 Ak Kiwaach eng' kutit ne kim, kole, "Kogolul, kagolul Babulon ne o! Ak kagoek ole menye oik, ak korgoretab tamirmiriet age tugul ne muruon, ak korgoretab tarit age tugul ne muruon, ak korgoretab tiony age tugul ne muruon ak ne kisasei.
\v 3 Amu kigobutyo bororiosek tugul amu kokoee divaikab koromnatetab soksenyi. Kisokso laitorinikab ng'weny ak inendet. Ak kiek mogorek chemung'arainikab ng'weny eng' kimnatetab kaseretab tugukyi."
\p
\v 4 Ak kiagas tuget age kobunu kipsengwet, kole, "Omong'une inendet, akwe bikchu, si moemte tengekwogikyi, ak si monyoru korotwekchi.
\v 5 Amu kigochang'it kot goit tengekwogikyi kipsengwet, ak kagobwat Jehova yautikchi che yaachen.
\p
\v 6 Oweekyi inendet ko u ye kigoyai, ak oyakyi inendet konyil aeng' ko u boisionikyi; eng kikombet ne king'olsee, ong'olji inendet konyil aeng.
\v 7 Ko u ye kiilosgei ak komeng'iis eng talbisto, ogochi inendet ng'wanindo ak orogenet ko u noto. Amu mwae inendet eng' muguleldanyi, kole, 'Atebche ko a laitoriat ne kwondo, ma ii mosok, ak magoi ageer rirek.'
\v 8 Noto anyun itu korotwekyi eng betut agenge: meiyat, rirek, ak rubet. Ak kebeel inendet eng' mat, amu kim Kiptaiyat Jehova ne kiruokindenyi."
\p
\v 9 Ak rirtos ak koteitos agobo inendet laitorinikab ng'weny, che kisokso ak kotebi koboto inendet eng' talbisto, ye keer iyetab lalenyi.
\v 10 Kotonondos eng' ole loo amu kaiyweetab ng'wanindanyi, ak kolen "Buoi, buoi, wee, nganaset ne o, Babulon, nganaset ne Kim! Amu kait kiruogeng'ung eng' sait agenge kogagoit kergong'ieng'ung."
\v 11 Ak korirtos chemung'arainikab ng'weny ak koteitos agobo inendet amu ma koalei chi kogeny tugukwai che aldoi-
\v 12 tugukab tahabu, ak feda, ak koik che bichien eng' alet, ak sanaek che kororon, ak katanisiek che kororon, ak ngoroik che biriren; ak ketit age tugul ne nyamdut, ak kit age tugul ne bo kelekab belek, ak kit age tugul ne kigiyae ketit ne bo kamanutiet ne o, ak che bo sugunonik, ak karik, ak koik che leelachen,
\v 13 ak cinamon, ak nyamdutik, ak nyamdutik che kibeelei, ak mwanik che kiilegei, ak tuguk che nyamdut, ak divbaik, ak mwanik, ak busiek che tabululilen, ak nganuk, ak tuga, ak kechirek; ak mbartanyisiek ak karisiekab mbartanyisiek ak atwogik ak sobonwekab bik.
\v 14 Ak kagobetito logoyat ne kimakyinige eng sobondang'ung tugul. Tuguguk tugul che bo talbisto, che anyinyen ago kororon ko kakomuchunta, ama kenyoru kogeny.
\v 15 Tonondos eng' ole loo chemung'arainikab tuguchuto che kiek magorek eng inendet amu kaiyweetab ng'wanindanyi, ak korirtos ak koteitos eng' tuget ne o.
\v 16 Kolen, "Buoi, buoi wee, nganaset ne o, ne kiilachi katanisiek che kororon, ak ngoroik che arusen ne birir, ak che biriren, ago ne kigilelesonjine tahabu, ak koik che bo kamanutiet ne o, ak sanaek che kororon!
\v 17 Amu eng sait agenge kityo kogagobetyo magornatosiek tugul che eechen."
\v 18 Ak kiririo ye kingogeer iyetab lalenyi. Komwa kole, "Tos mi nganaset ne kergei ak nganasani o?" Ak kiwirji temburiek metowoikwai, ak kowaaksot, korirtos ak koteeitos,
\v 19 " Buoi, buoi wee nganasani o ole kiegune magorek biko tugul che kitinyei melisiekwai eng' araraita. Amu oindab kaimutienyi ne kait ngemisiennyi eng' sait agenge."
\p
\v 20 "Baibaitu eng' inendet inye, kipsengwet, ak akwe che tililen, ak che kiyoktoi, ak maotik, amu kagoruokyi Jehovah inendet amu akwe."
\p
\v 21 Ak kisut malaikaiyat ne kim koita ne u koitab bai ne o ak kowirji araraita, kolen, "Kiwirtoi Babulon nganaset ne o, kobut ko u noto eng kabutet ne o, ama kegeere kogeny.
\v 22 Ama kegasei kogeny eng' inye butikab ketubosiek ak che itiendos ak che kutei ndurerusiek ak che kutei iriambut. Ama kenyoru muswogindet ne bo muswokindet age tugul eng' inye kogeny agoi. Ama kegasei tugetab koitab bai eng inye kogeny agoi.
\v 23 Ama kokwenyi lapkeiyetab tait eng' inye kogeny. Ama kegasei kutitab sandet ak ne bo mureret eng' inye kogeny, amu chemung'arainiguk ko ki biko che eechen che bo ng'weny, ako kigigen bororiosiek tugul eng' banisieng'ung'.
\v 24 Ak kiginyorji inendet korotikab maotik ak che bo bikab Jehovah che tililen, ak che bo tugul che kigibar eng' ng'weny."
\c 19
\cl Kurget 19
\p
\v 1 Kingobata tuguchu, agas kit ne u tuget ne o ne bo biko che chang eng' kipsengwet ko kurse ak kolen, "Halleluya! Bo Jehova nenyo yetunet, torornatet, ak kamuktaet.
\q1
\v 2 Amu bo iman ak ko bo imanda kiruogutikyi, amu kagoruokyi chepkugoniot ne o ne kimuruon ng'weny eng' soksenyi. Ak kagoyaakta mugetut ak ko bo korotikab kiboitinkyi eng' eutab Chebiosonato."
\m
\v 3 Ak Kimwa kogeny ne bo aeng kole: "Haleluya! Ak lanyei iyetanyi koigeny ak koigeny."
\q1
\v 4 Ak kiibutyi ng'weny boisiek tiptemu koboto tiong'ik ang'wan che saptos ak kolos Jehova, inendet ne tebe ng'echeretab laitornatet. Ak kimwae kolen, "Amen. Haleluya!"
\m
\v 5 Ak kimong tuget eng' ng'echeretab laitornatet kolen, "Olosu Jehovah nenyo, akwe tugul kiboitinkyi che oiywei inendet, che mengechen ak che eechen."
\m
\v 6 Ak kiagas kito ne ki u tugetab tuiyetab biko ne o, ak ko u cheetab beko che chang, ak ko u cheetab tulosiek che kimen, kolen, "Haleluya! Amu laitorani Kiptaiyat Jehova, inendet ne Kamuktaindet.
\q1
\v 7 Ongeboiboitu ak kegasgei mising ak kigochi torornatet inendet! Amu kagoit katunisietab Aruet, ak kagochopge osotiondenyi.
\q1
\v 8 Ak Kigigochi inendet kolaachge eng' katanit ne kararan, ne leel ak ko tilil" (amu katanit ne kararan ko boisionikab imanda che bo bikab Jehovah che tililen).
\p
\v 9 Ak kilejo malaikaiyat, "Sir chu: Iberurotin icheket che keguurjini igortab katunisietab Aruet." Ak Kilejo, "Chu ko ng'alekab iman che bo Jehova."
\v 10 Ak kiabutyi kelyekyi alosu inendet, ago kilejo, "Ameyai kou nito! Aii kiboitiot ko u inye koboto tupchosieguk che tinyei baornatet agobo Jeiso. Kutungji Jehova, amu baornatetab Jeiso ko tamirmirietab maoinatet."
\p
\v 11 Ak kiageer koyatak kipsengwet, ak kimi anyun, mbartanyit ne leel. Ako inendet ne kikete ko kigigure ne kiyani ak ko bo iman. Ak koruochi ak koyae luget eng' imanda.
\v 12 Ak ki u konyekyi liblibenatab mat, ak eng metinyi ko kimi nariosiek che chang. Ak kotinye kainet ne kigisirchi inendet ne mami chi ne ingen kobate inendet inegei.
\v 13 Ak ilaachi ngoriet ne koi ako kigichukta korotik, ak kigigure kainenyi Ng'olyotab Jehovah.
\v 14 Ak kiruboti inendet lugosiek che bo kipsengwet che kitinye mbartanyisiek che leelachen, ako kiilachi katanisiek che kororon che leelachen iman ak ko tililen.
\v 15 Ak kimong'une kutinyi rotwetab chok ne ng'atib si kobiit kobire bororiosiek, ak koboi icheket eng' kiroktab karnet. Ak kotiech sabibuk eng' ole kituisie che bo koromnatetab neregekab Jehova ne bo kamuktaet.
\v 16 Ak kotinye eng' ngorienyi ak eng' kebestannyi kainet ne kigisir kele, "LAITORIAT NE BO LAITORINIK, AK KIPTAIYAT NE BO KIPTAINIK."
\p
\v 17 Ak kiageer malaikaiyat kotononi eng' asista. Ak kigurso eng' tuget ne o kolejini taritik tugul che tirirendos eng barak, "Obwa otuiyechi igorta ne o ne bo Jehova.
\v 18 Si Kkbiit oaam borwekab laitorinik, ak borwekab kiptainikab luget, ak borwekab biko che kimen, ak borwekab mbartanyisiek ak che bo che ketei, ak borwekab biko tugul, che itiagotin ak che otwogik, ak che mengechen ak che eechen."
\v 19 Ak kiageer tiondo ak laitorinikab emotinwek, ak lugosiekwai. Ko kairuruchge koyai luget ak inendet ne kiga tebe mbartanyit ak lugenyi.
\v 20 Ak kiginam tiondo koboto maotiondonoto ki bo lembech ne kiyae kaborunoik eng' tainnyi. Eng kaborunoichuto ko Kiiberber che kiga kindeno ng'oksetab tiondo ako icheket che kiilosu kanamwennyi. Kigiwirji choto aeng tuwai kosaptos araraitab mat ne bo koik che laidos.
\v 21 Ak kigibar icheket che king'et eng' rotwetab chok ne kimong'une kutitab inendet ne kitebe mbartanyit, ak kibiyongyo taritik tugul eng' borwekwai.
\c 20
\cl Kurget 20
\p
\v 1 Ak kiageer malaikaiyat kowolu eng' Kipsengwet. Kitinyei yateiywotab kebenet ne loo ne man'ete let, ak kotinye sirimdo ne o eng' eunyi.
\v 2 Kinam anyun ndaret, erenet ne bo keny, ne inendet ko oindet ago chesawil, ak korat inendet kenyisiek elfut agenge.
\v 3 Ak kowirji inendet kebenet ne loo ne mang'ete let. Ak koger ak kong'och baragunnyi. Si mata koberber bororiosiek kogeny agoi kogesge kenyiksiek elfut agenge. Ye ibata noto, kitiach ne matia.
\p
\v 4 Ak kiageer ng'echerokab laitornatet. Ak che kitebe Icheket ko che kigagegochi kimnatet koruoch. Ak kiageer sobonwekab ichekelt che kigitil metewek amu baornatetab Jeiso ak ng'olyotab Jehova. Ak ko icheket che magutungji tiondo anan ko kanamwenyi, ako che kimanyor ng'okset eng' togochikwai anan eng' eunekwai. Kisopcho anyun, ak kolaitoran koboto Kristo kenyisiek elfut.
\v 5 Ma sopcho che kiga komeiyo agoi kogesge kenyisiek elfut agenge. Nito ko ng'eetiet ne bo tai.
\v 6 Iberurot ako tilil ne tinyei yamdaet eng' ng'etiet ne bo tai! Mabou icheket meet meet ne bo aeng. Egu tisiikab Jehova ak ko bo Kristo ak kolaitorani akoboto inendet kenyisiek elfut agenge.
\p
\v 7 Ak ngobek kenyisiek elfut agenge, kitiach Setani komong' eng' korgorennyi.
\v 8 Ak komong' koberber bororiosiek che mito luukwek ang'an che bo ng'weny--- Gog ak Magog--- koyumji icheket luget. Ak ko chang'itu kaiteng'wai ko u ng'aniekab araraita.
\v 9 Ak kiba kotogosta komut emet ne lebel ak komuut oldab che tililen che bo Jehovah----nganaset ne chamat. Ak kichorgei mat kong'ete kipsengwet ak kotar icheket.
\v 10 Ak chesawil ne kiiberber icheket, kewirji araraitab mat ne laldos koik, ole kigiwirji agine tiondo ak maotiot ne bo lembech. Ak kinyalili beet ak kemoi koigeny agoi koigeny.
\p
\v 11 Ak kiageer ng'echeret ne o ak ko ne leel ne bo laitornatet koboto inendet ne kitebee. Ak kimwei, ng'weny ak kipsengwet komwee togenyi, ago kimakomi ole bendi.
\v 12 Ak kiageer che kigobek--- che mengechen ak che eechen, kotonondos eng' taitab ng'echeteretab laitornatet, ak kigiyaat bukuisiek. Ago kigiyaat bukuit age-- noto ko Bukuitab Sobondo. Ak kigiruokyi che kigobek eng' tuguk che kigakisirji bukuisiechoto, ko u boisionikwai.
\v 13 Ak kigon araraita che kigomeyo che kimi oritinnyi. Ak kigon meet ak oldab che kigomeiyo icheket che kigomeiyo che kimi oriting'wai, ak kigiruokyi che kigomeiyo tugul ko u boisionikwai.
\v 14 Ak kigiwirji meet ak oldab che kigomeiyo araraitab mat. Nito ko meet ne bo aeng----araraitab mat.
\v 15 Ak ngot kenyor chi age tugul ne kima kisirji kainennyi Bukuitab Sobondo kewirjini araraitab mat.
\c 21
\cl Kurget 21
\p
\v 1 Ak kiageer kipsengwet ne leel ak ng'weny ne leel, amu kigakosirto kipsengwet ne bo tai ak ng'wenyut ne bo tai, ago kima komi araraita kogeny.
\v 2 Ak kiageer emet ne tilil, Jerusalem ne leel, kowolu eng kipsengwet Kobunu Jehova, ko kagechob ko u mureret ne kagelelesanji sandenyi.
\v 3 Ak kiagas kutit ne o komong'une ng'echeretab laitornatet kolen, "Ogeer anyun! Mi ole tebee Jehova ak biko, ago meng'isie koboto icheket. Egu icheket bikchi, ak kotebi Jehova inendet ak icheket ak koek Jehova neng'wai.
\v 4 Ak kobukchi inendet beekab Kong' alak tugul eng konyekwai, ama komi meet kogeny, anan ko kateet kogeny, nda ko rirek, nda ko ng'wanindo. Kigosirto tuguk che bo tai.
\p
\v 5 Ak kimwa inendet ne tebee ng'echeretab laitornatet, kole, "Ogeero! ayae tuguk tugul koleelagitu." Ak kile, "Sir tuguchu amu ngalechu ko che kiyani ak kobo iman."
\v 6 Ak kolejo, "Kagosulda tuguch! Ai Alpha ako aii Omega, taunet ak kagesunet. Agochini buch inendet ne ame melelda che bunu kondab beekab sobondo.
\v 7 Inendet ne iterteri konamu tuguchu, ak aegu Jehova nenyi ak koek inendet werinyu.
\v 8 Ago icheketet che nyogoren, ak che matinye kayanet, ak che kisase, ak rumik, ak che sokse, ak boniik, ak che sae kanamonik, ak kiplembechonik tugul, kotinye kebebertang'wai eng araraita ne lale matab koik che laldos. Nito ko meet ne bo aeng."
\p
\v 9 Ak kinyo agenge eng malaikaisiechoto tisab che kitinye ketubonik tisab che ki nyiitotin korotwek tisabu che bo let, ak kole, "Nyo yu. Awendi aborun mureret, osotiotab Aruet."
\p
\v 10 Ak kiimuta eng' Tamirmiriet agoi tulwet ne o ago koi ak kiboruo emet ne tilil Jerusalem kowolu eng kipsengwet Kobunu Jehovah.
\v 11 Kitinye Jerusalem torornatetab Jehova, ak talilindanyi ko ki kerge ak koita ne bo kamanutiet ne o, ak ko u koita ne bo Jasipi ne tilil ko u krustalo.
\v 12 Kitinye karwet ne o, ne koi ak kotinye kurgotik taman ak aeng', che kimi malaikaisiek taman ak aeng. Eng kurkotichoto ko kigisir kainaik chebo ortinwek taman ak aeng che bo werikab Israel.
\v 13 Kimi komostab kongasis kurgotik somogu, ak kimi komostab murot ne bo katam kurgotik somogu, ak kimi komostab murot ne botai kurgotik somogu, ak kimi komostab cherongo kurgotik somogu.
\v 14 Ak kitinye karwetab emonoto lumeiywek taman ak aeng, ak kimi kainaikab che bo che kiyoktoi taman ak aeng che bo Aruet.
\p
\v 15 Ak kitinye inendet ne king'alalwo tegat ne bo tahabu si kokwae emet, ak kurgotikchi ak karwenyi.
\v 16 Ak kiaechin karwesiek tugul angwanu che bo emet; ak kiaechin koindanyi ak tebeesindo. Ago kiikwae emet tegandanoto, ak kiek mailisiek elfut agenge ak bogol mut koindanyi (koindanyi, tebe sindanyi, ak koindanyi ne wendi barak ko kiaechin).
\v 17 Ak Kiikwa kora karwenyi, ak kiek kakwoutikab eut bogol ak artam ak agwan eng kakwaetab chito (noto kora ko ne bo malalaikaiyat).
\p
\v 18 Ak kigitechee jasipi karwenyi, ak nganaset ko kigitechee tahabu che tililen, ko u glasit ne lildoi.
\v 19 Ak kigilelesonji lumeiywekab karwet ne bo emet eng koik alak tugul che bo kamanutiet ne o. Nebo tai ko ki jasipi, ne bo aeng' ko ki sapire, ne bo somok ko ki kalkedo, ne bo angwan ko sumaragdo,
\v 20 ne bo mut ko sardonukso, ne bo lo Ko sardio, ne bo tisab ko krusolito, ne bo sisit ko beryli, ne bo sokol ko topasi, ne bo taman ko kruspopraso, ne bo taman ak agenge ko huakint, ak ne bo taman ak aeng ko ametusto.
\v 21 Ak kurgotik taman ak aeng' ko ki sanaek taman ak aeng' che kororon; age tugul eng kurgotik ko ki chobe sanaiyat agenge. Ak kikichobe tahabu che tililen ko u glasit ne sengelel oretab nganaset.
\p
\v 22 Ama geer hekalut orititab nganaset, amu Kiptaiyat Jehova Kamuktaindet ak Aruet ko hekalunyi.
\v 23 Ak kima ko mache nganaset asista, nda ko arawet si kobiit kokweny amu ikwenyi torornatetab Jehova, ako tainyi ko Aruet.
\v 24 Ak kobendote bororiosiek lapkeiyetab nganasanato. Ak koibu laitorinikab ngw'eny torornateng'wai kocho orit.
\v 25 Ama kigere kurgotikchi bet ako mami kemout oloto.
\v 26 Ak ibu icheket torornatet ak teegistab bororiosiek kobwa orit,
\v 27 ago machute orit kiy age tugul ne ma tilil nda ko ne yae kiy ne kisase, anan ko kenisiet, ago kobate icheket che kigisirji kainaikwai Bukuitab Sobondo ne bo Aruet.
\c 22
\cl Kurget 22
\p
\v 1 Ak kiiboruo malaikaiyat ainetab beekab sobon, ne tilil ko u krustalo. Kirong'uge kobunu ng'echeretab laitornatet ne bo Jehova ak ne bo Aruet
\v 2 eng kwenutab oretab nganaset.. Ak kimi ketitab sobon ainonoto komosi ak komosin ak koiei logoek taman ak aeng che magerge, ak koiei logoekchi eng arawet age tugul. Ak kobo kasoobetab bororosiek sogekab ketoto.
\v 3 Ama komi chubisiet age tugul kogeny. Ak tun ko mi orit ne bo nganaset ng'echeretab laitornatet nebo Jehova ak ne bo Aruet, ak atwogikchi che boisiechini inendet.
\v 4 Ak kogere togenyi, ak ko mi kainenyi togochikwai.
\v 5 Ama komi kemout kogeny; ama mache lapkeijetab tait anan ko lapkeiyetab asista, amu lapkeiyet Kiptaiyat Jehova eng icheket. Ak koegu laitorinik icheket koigeny ak koigeny.
\p
\v 6 Ak kilejo malaikaiyat, "Ng'alechu ko che kiyoni ak ko bo iman. Inendet Kiptaiyat, ne Jehova ne bo tamirmirikab maotik, ko kiyok malaikayandenyi koborji otwogikchi tuguk che bitu ko legit ne matiny."
\v 7 Ogeero! Achoni kolegi! Iberurot ne inendet ne ribe ng'alekab maoinatetab bukuini."
\p
\v 8 Ane, Johona, ne kiagas ak ageer tuguchu. Ak yo Ago ki ngagas ak ageer, abutyi ng'weny si akutungji eng kelyekab malaikaiyat ne kiboruo tuguchuto.
\v 9 Ak kolejo, "Meyai ko u noto! Aii otwogikindet ko u inye, koboto tupchosieguk maotik, ak koboto icheket che ribe ng'alekab bakuini. Kutungji Jehova!"
\v 10 Ak kilejo, "Amat ituch ng'alek che bo maoinatetab bukuini, amu kagorik betusiek.
\v 11 Inendet ne ma bo imanda, kotestai koyai che ma bo imanda kosiir. Inendet ne bo atebto ne ya, ingoek ne bo atebto ne ya kosiir. Ak inendet ne bo imanda, koyai che bo imanda kosiir. Ak inendet ne tilil, ko ingotililit kosiir.
\p
\v 12 "Ogeero! Achoni achagu. Ating'anu melektanyu, si agochi chi age tugul ko u boisionikchi.
\v 13 Aii Alpha ak aii Omega, ne bo tai ak ko ne bo let, tauntet ak kagesunet.
\v 14 Iberurotin icheket che iuni ngoroikwai si komuch konyor chamjinet koam che bunu ketitab sobondo ak kochut nganaset kobune kurgotik.
\v 15 Mi sang' sesenik, ak bonik, ak che sokse, ak rumik, ak che sae kanamonik ak age tugul ne chame lembech ak koboisie.
\p
\v 16 Ane, Jeiso, ne kayogu malaikayandenyu si kobaorianwok agobo tuguchu bo kanisosiek. Aii tigitiot ak kesuwotab Daudi, kokelyet ne bo kariron ne ikwengtoi.
\p
\v 17 Mwae Tamirmiriet ak Mureret kole, "Nyo!" Ako inendet ne kase, komwa kole, "Nyo!" Ago age tugul ne ame melelda, kocho, ak inendet ne mache, koee beko che bo sobon buch.
\p
\v 18 Abaorianjini chi age tugul ne kase ng'alek che bo maoinatetab bukuini ale: Ngot kotesyi chi age tugul ngalechu, ngalek alak, kotesyini Jehova korotwek che kigisirji bukuini.
\v 19 Ako ngoisto chi age tugul ng'alek che mi eng bukuitab maoinatoni, konemu Jehova kebebertanyi eng ketitab sobondo, ak eng nganaset ne tilil, che kigisirji bukuini.
\p
\v 20 Inendet ne baorianjini tuguchu komwae kole, "Eeh! Anyoni achogu." Amen! Nyo, Kiptaiyat Jeiso!
\p
\v 21 Ingotebi mieindab Kiptayat Jeiso koboto tugul. Amen.