eyo_reg/59-HEB.usfm

\id HEB
\ide UTF-8
\h Hebranik
\toc1 Hebranik
\toc2 Hebranik
\toc3 heb
\mt Hebranik
\c 1
\cl Kurget 1
\p
\v 1 King'alalji Jehovah kwanisiekcho eng keny kobun maotik konyil che chang' ak eng' ortinwek che chang'.
\v 2 Ako inendet ne kagong'alalwech eng betusiechu bo let eng' Werit, ne kigondeno koek ne namu tuguk tugul. Amu kiyai ng'weny eng' inendet.
\v 3 Inendet [Jeiso] ko kakweng'etab talilindab torornatetab Jehovah, ako kergeindo ne bo itondanyi. Ak kotonondos tuguk tugul eng' ngolyotab kamuktaennyi. Ako ye kingo kagoyai kaundoetab tengekwogik, kwo kotebee eutab tai ne bo torornatet eng barak.
\p
\v 4 Ako kigoek ne kararan ne kindet missing eng' malaikaisiek, ko u ye konyitot kainennyi kosiir kaineng'wai.
\v 5 Amu anjo eng' malaikaisiek che kimwoji Jehovah eng' betut age kolenji, "ii werinnyu kaasichin rani"? Ak kogeny, "aegu kwanda eng' inendet ak koek werit eng ane"?
\p
\v 6 Ak kogeny, ye kingomut kiboretiennyi kocho ng'weny, komwa Jehovah kole, "ingokutungji inendet malaikaisiek tugul che bo Jehovah.
\p
\v 7 Ago kimwa agobo malaikaisiek kole, "inendet ne yae malaikaisiekyi koek tamirmirik, ak kiboitinikchi koek mat ne liblibeni."
\p
\v 8 Ago eng Werit komwa kole, "Ee Jehovah tebche koigeny ak koigeny ng'echereng'ung' ne bo laitornatet. Shioritab imanda ko shioritab baunateng'ung.
\q
\v 9 Kiicham imanda ak kiisas tengekto. Eng noto anyun kigoiilin Jehovah eng' mwaitab boiboiyet kosiir sirityeng'ung."
\p
\v 10 "Eng' taunet ko kiilumde inye Kiptaiyandani, ole tonone ng'weny ak kipsengwetisiek ko boisionikab euneguk.
\q
\v 11 Ing'etu inye agoi, ak sirtoi icheket. Ak osegitu tugul ko u ngoriet.
\q
\v 12 Ak itagurii ko u ngoriet ne tabanu barak, ak kowalak ko u ngoriet. Ago ii u inye noto agoi, ama tinyei kenyisieguk ole igesunegei.
\p
\v 13 Tos mi malaikaisiek anjojo che kimnwaji betut age koleji, "Tebe eunyu ne bo tai agoi ayai buniguk koek ng'echeretab kelyeguk"?
\p
\v 14 Tos choto tugul ko ma malaikaisiek che tamirmirik che boisie, ak che kiyoktoi korib icheket che tun nyoru yetunet?
\c 2
\cl Kurget 2
\p
\v 1 Eng' noto anyun kanyoljech kenam mising kosiir tuguchuto kigegas, si ma kichuchuge.
\v 2 Amu ngot ko ki tononot ng'olyot ne kigimwaei kobun malaikaisiek, ago age tugul ne kiginyorji bistoet ak ngelelnatet konyoru melektonnyi ne emegei eng imanda,
\v 3 kichilildoi ano anyun ngeleste yetunet ne o ne te ni? Ni ko sigunet ne kitoi kobarasta Kiptaiyat ak kiigimitwech icheket che kigas.
\v 4 Ak eng' kasarata ko kibaorian agine Jehovah koboto icheget eng kaborunoik, ak kwong'utik che ter ter, koboto kamugosiek che terotin, ak eng' kagoitosiekab Tamirmiriet ne Tilil ko u magenyi.
\p
\v 5 Amu maigochi Jehovah malaikaisiek koboi ng'wenyut ne chonii, ne noto anyun kimwae ago bo.
\v 6 Ako baoriani chito age eng' komasta age kole, "Nee chi, ne tos ibwat? Anan ko weritab chi ne tos image kiy?
\q
\v 7 Kiyai inendet komining'it ng'atigin eng' malaikaisiek; ilaakchi inendet kutwetab torornatet ak tegisto.
\q
\v 8 Kiindene tuguk tugul kogas it inendet eng' keldebesaikab kelyekchi." Amu ki eng inendet anyun ne kiindeno Jehovah tuguk tugul kogas it inendet. Maituch kiy ne ma kase it inendet. Ago ra kotomo kegeer kogase it tuguk tugul inendet.
\v 9 Ago kigeere inendet (Jeiso) ne kigiyai eng kasarta kitigin komining'it kosir malaikaisiek ko kigilaakyi kutwet ne bo torornatet ak teegisto amu nyalilda ne bo meet, si kobiit kochamcham meet eng mieindab Jehovah agobo chi age tugul.
\p
\v 10 Amu kinyolji inendet ne mi tuguk tugul amu inendet ak kora kobunu tuguk tugul inendet, koek ne imutyini werik che chang' torornatet. Si koyai koek taunindetab yetuneng'wai ne igesunotge eng' nyalilwogik.
\v 11 Amu inendet ne itililisie ak icheget che kitilili kobunu orit agenge. Eng' noto anyun ko ma ililani inendet koguure icheket che kitupche.
\v 12 Ak kole, "Amwachini kaineng'ung' tupchosiekchu, atieni kalosuneng'ung' eng' kwenutab tuiyet."
\p
\v 13 Ak kogeny, "amang'u inendet". Ak kogeny, "keer ami yu ak leguk che kigogona Jehovah".
\p
\v 14 Ak ko u yo emdoi anyun leguk korotik ak borto, koginam agine inendet borto nebo chito ko u noto, si kobiit kong'em eng' oretab meet inendet ne tinye kimnatetab meet, noto ko chesawil.
\v 15 Si kobiit kotiach icheget tugul che ki ratotin eng' betusiekwai tugul amu kaiyweisietab meet.
\v 16 Amu eng' iman ko kimakotoreti malaikaisiek, ago ki kitoreti kesuwekab Abraham.
\v 17 Eng' noto anyun ko kinyolji keyai inendet eng' tuguk tugul kogergeit ak tupchosiekyi, si kobiit koek tisiindet ne o ne bo rirenetabge ak ko bo iman eng' tuguk che tokyinge Jehovah, ak koyai tisisiet agobo tengekwogikab biko.
\v 18 Amu ko u yo kinyalil inendet ye kigitieme, komuchi agine kotoret icheket che bune tiemutik.
\c 3
\cl Kurget 3
\p
\v 1 Noto anyun, che kitupche che tililen, yamdoik che bo kursetab kipsengwet, obwat mising' ne kiyoktoi ak tisiindet ne o ne bo ng'ang'enyo, inendet Jeiso.
\v 2 Ne kiek ne kiyani eng'Jehovah ne kileweni inendet, ko u ye kiyai Musa agine eng' gotab Jehovah kotugul.
\v 3 Amu kigiit Jeiso kele nyoljini inendet torornatet ne o kosir Musa, ko u yo kiiti kele tinye teegisto inendet ne kiteeche got kosiir got.
\v 4 Amu go age tugul ko teechei chito, ago Jehovah ne kiitechei tuguk tugul.
\v 5 Ak eng' iman ko kiek Musa ne kiyani eng' gotab Jehovah tugul, ako baoriani agobo tuguk che tun kimwae eng betusiek che bwanii.
\v 6 Ago Kristo ko ne kiyani ko Werit ne bou kotab Jehovah. Acheget ke ii gonyi ngot kenam mising' nyiganatennyo ak kamang'unet ne kiwolegei.
\p
\v 7 Noto anyun, ko u yo mwaei Tamirmiriet ne Tilil kole: "ngot ogas kutinyi rani
\v 8 Koma to uuit mugulelwekwok ko u ngelelnatet, ak ko u eng' betutab tiemisiet eng' ong'atet.
\v 9 Nito ko ye kingongelelso kwanisiekwok ak kotiema, nga nda kiagogeer boisionikchu
\p
\v 10 kenyisiek artam. Eng' noto anyun ko kianerekchi ebenoto. Ak kiamwa ale, 'ichilili kotugul eng mukulelwekwai. Tomo konai ortinwekchu.'
\p
\v 11 Ko u ye kiamurte eng' neregekyu ale: 'Maite icheket kamuung'enyu.'
\p
\v 12 Oripge anyun che kitupche si mabiit chi age tugul eng' akwe netinye muguleldo ne ya ne bo bistoet (ne matinye kayanet), muguleldo ne istoegei Jehovah ne sobe.
\v 13 Ago oteechinigei betut age tugul, ko te ko ta kemwaei kele "rani," si ma kinach [kiuit] chi age tugul eng' akwe amu kenisietab tengekto.
\v 14 Amu kigeegu yamdoikab Kristo ngot kenam mising' nyiganatennyo eng inendet kong'etee taunet agoi kagesunet.
\v 15 Agobo nito ko kikemwa kele, "ngot ogas kutinyi rani, ko mat ouiit mugulelwekwok ko u eng' tagisiet".
\p
\v 16 Amu ng'o che kingogas ko ki                    tagis? Tos ma icheket tugul che kimong'une Misiri kondochini Musa?
\v 17 Ak ng'o che kinerekchi inendet kenyisiek artam? Tos ma icheket che kicholwogenso, che kibekyi muswekwai ong'atet?
\v 18 Ak ng'o che kimurto inendet kole maite kamuung'enyi, tos, ma icheket che kiingelelji inendet?
\v 19 Eng' noto anyun kegeere kele kima imuch icheket koit amu ma iyan.
\c 4
\cl Kurget 4
\p
\v 1 Yo ta komi kayomiset ne bo keit kamuungenyi, ongiywei anyun, si mabiit chi age tugul eng akwe ne mwae kole matanyoru.
\v 2 Amu kigiamwech iman logoiywek che tililen ko u icheget. Ago eng' kaset ko ma toret ng'olyot icheget che kima ing'ol ak kayanet, kou icheget che kigas iit eng tai.
\v 3 Amu ache che kigeyan keite kamuung'enoto kou yo kigomwa inendet kole, "Ko u ye kiamurte eng' neregekchu ale, maite icheket kamuung'enyu, nganda kiga kogesgei boisionichoto kong'ete ngab kelumda ng'weny.
\v 4 Amu kigomwa eng orit age agobo betutab tisab kole: "Ak kiimuny Jehovah eng' betutab tisab eng' boisionikchi tugul".
\p
\v 5 Ak eng' yu komwa kokeny kole, "Maite icheket kamuung'enyu."
\p
\v 6 Eng' noto anyun, kegeere kele mito boroindo ne bo alak koit kamung'enoto, ago icheget che kinyor boroindo ak keamji logoiywek che tililen ko kimata koit amu ng'elelnatet.
\v 7 Ak kogeny komwa Jehovah agobo betut age, ne kiguure "Rani" kingong'alal kobun Daudi ko kagobata betusiek alak kole: "Rani ko u ye kisib kemwa kele, ngot ogas tugenyi rani ko mat ouuit mugulelwekwok."
\p
\v 8 Amu nda kigaa kogochi Josua icheket kamuung'et, nda kima ta komwae eng' let Jehovah agobo betut age.
\v 9 Ara ng'etunot anyun kamung'etab sabato agobo bikab Jehovah.
\v 10 Amu inendet ne kagoit kamuung'etab Jehovah, kogagomuuny eng' boisionokyi, ko u ye kimuuny Jehovah agine eng chechi.
\p
\v 11 Ongegilge anyun si keit kamuung'enoto, si maibutyi chi age tugul kergeindab ngelelnateng'wai ne kiyai.
\v 12 Amu sobe ng'olyotab Jehovah ak ko serser, ak ko ng'atip kosir rotwetab chok ne ng'atiben komoswek tuwai. Ak toorei agoi kobesio sobondo ak tamirmiriet, ak ole tuiyechini kowoik ak amset, ak komuchi koguiyo kabwatutik ak magutikab muguleldo.
\v 13 Ama mi kiy age tugul ne kigiyai ne ung'at eng' taitab konyekab Jehovah, ako sulotin tuguk tugul eng taitab konyek che bo inendet ne tun kitetyini atebosiekcho.
\p
\v 14 Amu kitinye tisiindet ne o ne kigochut ak komanda kipsengwetisiek, noto Jeiso Weritab Jehovah, ko ongenam anyun mising' ng'ang'enyo.
\v 15 Amu magitinye tisiindet ne o ne maimuchi korirenech eng ny'alulnatosiekcho, ago kitinye ne kigityem inendet ko u ache eng' tuguk tugul, kobate matinyei tengek.
\v 16 Ongetenden anyun kerikchi ng'echeretab riranet eng nyiganatet, asi ketaach mieindo ak kenyoru rirenet netoretech eng' kasarta ne mi nyalilda.
\c 5
\cl Kurget 5
\p
\v 1 Amu tisiindet age tugul ne o, ne kigilewen eng' biko, ketorori kotebe yoto agobo biko amu tononjinetab tuguk che tokchinige Jehovah, si kobiit kogoito kagochinoik ak tiseiywek agobo tengekwogik.
\v 2 Inendet ko imuchi korire che mengen kiy, ak che ki keberber, amu inendet agine komi eng' nyalulnatet.
\v 3 Amu nito anyun, ko u ye nyoljini kogoito che kitisisie agobo tengekwogikab biko, konyoljini kogoito agine agobo tengekwogikchi.
\v 4 Ama mi chi ne igochinigei teegisi inegei. Kobate ye kaguur Jehovah inendet ko u Aron.
\v 5 Ko u noto anyun, kima itororgei Kristo agine koyaige koek tisiindet ne o. Kobate mi inendet ne king'alalji koleji; "ii Werinyu; rani kaaeku Kwandang'ung'."
\p
\v 6 Ko u ye mwae agine eng komosta age kole, "ii tisiindet koigeny ko u ole ki u Melkisedek."
\p
\v 7 Ki eng' betusiek che kimi eng' borto, ko kiigoito Kristo sautik ak samutik eng' rirek che kasunotin, ak beekab kong' korirjini Jehovah, ne imuchi kosor inendet eng' meet, ako kigigasyi amu kaiyweenyi ne kiywei Jehovah eng' sobenyi.
\v 8 Agot nganda ki Werit inendet, ko kiinetgei kasetab iit eng' tuguk tugul che kinyorune nyalilda.
\v 9 Kigiyai inendet koek ne igesunotgei, ak kiek inendet taunetabge nebo yetunetab koigeny eng' tugul che kase iit inendet.
\v 10 Ak kiguure Jehovah inendet tisiindet ne o ko u ye ki u Melkisedek.
\p
\v 11 Kitinye anyun che kimwae agobo Jeiso che chang,' kobate korom ole kemwoitei, amu kigo uiit eng' akwe ogaste.
\v 12 Nga nda eng kasari konyolu koegu konetik, kogagonyoljok kogeny kocho chito age si konetak konetisiosiek che bo tai che bo ng'alekab Jehovah. Amu kioegu che mache chego, ama amitwogik che uuen.
\v 13 Amu age tugul ne kiguue chego ko tomo konai, anan koityi koboisie komie ng'olyotab imanda, amu ta ko lekwet ne mining'[manyurut] inendet.
\v 14 Ago amitwogik che uuen ko bo biko che eechen. Chuto ko amu kikosoiyo icheget, koboisie kaguiyeng'wai ak komuchi kobesio che kororon ak che yaachen.
\c 6
\cl Kurget 6
\p
\v 1 Noto anyun, ongebagakte, amata keng'alale ng'alek che bo tai che bo Kristo, ago ongetestai agoi keechegitu. Matogany ketou kogeny lumeiywot ne bo sigunet ne bunu boisionik che meiyotin ak ne bo kayanet eng' Jehovah,
\v 2 anan ko lumeiywot ne bo konetisietab kabatisanosiek, ak ne bo kagonoretab eunek, ak ne bo ng'etyeetab che kigomeiyo ak kiruogetab koigeny.
\v 3 Ak kibendi keyae nito ngo cham Jehovah.
\v 4 Amu maimukakse eng' icheket che kigaa kegochi lapkeiyet, ak kochamcham konunet ne bo kipsengwet, ak koek yamdoikab Tamirmiriet ne Tilil.
\v 5 Ak kora kochamcham ng'olyot ne kararan ne bo Jehovah, ak kimnatosiekab kenyisiek che bwanii,
\v 6 ak ngot ko chuchuchgei icheket ko ma imugakse keweekyi icheket sigunet. Amu igartatyingei weritab Jehovah kogeny, kogochini inendet kateweret ne toogu.
\v 7 Amu mbaret ne kigoee ropta ne robonjini konyil che chang, ak kobiityo tugukab komonut che kigibatyini- konyoru kaberuret eng' Jehovah.
\v 8 Ago ngo iiyo katok ak talibik, ko matoreti kiy ak ko legite chubet, ne kagesunennyi ko kebeel.
\p
\v 9 Ago chamanichu, kiyani eng' akwe tuguk che kororon kosiir choto, ago mising kemwae che namegei ak yetunet, agot nganda king'alali ko u nito.
\v 10 Amu Jehovah ko ma Jehovah ne ma bo iman. Mautie boisieng'wong' ak chamnyet ne kiobarte agobo kainennyi, amu kioboisiechini bikchii che tililen, ak otese tai oboisiechini agoi.
\v 11 Ak kimache mising chi age tugul eng' akwe kele kobarta kagiletabge ne u noto agoi let, asi kobiit koek kamang'uneng'wong ne iyanat.
\v 12 Nito ko si moegu chemeatin, ago okergeitu ak icheket che eng kayanet ak muitaet konyoru kayamisutik.
\p
\v 13 Amu ye kingogachini Jehovah Abram kayamisutiennyi, ko kimurtaege, amu kima komi age ne o kosiir inendet.
\v 14 Ak kimwa kole "Awendi aberurin ne bo iman, ak akonin ioteng'ung ko chang'it."
\v 15 Ak kingo kagomuita Abram ko u nito, konyor kito ne kikakiyamisyi.
\v 16 Amu murtoi biko eng ne o kosiir icheget. Ak murtaet ko kagimitet ne tare tiiyet age tugul.
\v 17 Ye kingomach Jehovah mising koborji icheket che nyoru kayamisutiet ole u magennyi ne mawalakse, kondeno murtaet kwenut.
\v 18 Ki yai ko u nito si eng' tuguk aeng' che mawalakistos -ama imugakse eng' Jehovah komwa lembech- ko ache che ki kemwechi ole mi toretet, kemuchi anyun eng' noto kenyoru kagaigaet ne kim si kenam kamang'unet ne kigendeno tainyo.
\v 19 Kitinye nito ko nangetab sobondo, kamang'unet ne wendi kot orit kosiirtoe anget ne kigikitisie,
\v 20 ole kichut Jeiso agobo ache. Ak kikoek tisiindet ne o ko u kit ne ki u Melkizedek.
\c 7
\cl Kurget 7
\p
\v 1 Amu Mechizedekinito, laitoriatab Salem, tisiindetab Jehovah ne Toror Mising, ne kituiyo ak Abram kingowechekei kobunu boriet eng' ole kibare laitorinik ak kiberur [Melchizedek] inendet.
\v 2 Nito ko inendet ne kipchechi Abram kebebertab taman ne bo tugul. Kainennyi ne bo tai ko "laitoriatab imanda" ak yeityo kogeny ko "laitoriatab Salem", noto ko "laitoriatab kalyet".
\v 3 Ne matinye kwan, ama tinye kamet, ama tinye oreng'wai, ama tinye taunetab betusiek, anan kagesunetab sobet. Ago kegergei ak Weritab Jehovah, tebchei ko tisiindet koigeny.
\p
\v 4 Ogeer anyun ole ki tee oindab chichi ne kigoochi Abram boiyot ne o kebebertannyi bo taman ne bo barunoikchii.
\v 5 Ak tinyei iman werikab Lawi che namei boisietab tisisiet ko kiking'at konam kebeberwekab taman kobun biko kou eng' ng'atutiet, noto ko tupchosiekchi agot nga nda kibunu bortab Abram.
\v 6 Ago kinam Melkidedek kebeberwekab taman kobun Abram, nga nda inendet ko kima kiitito inendet eng' oreng'wai ak koberur inendet, ne kitinye kayomisutik.
\v 7 Ak ko mami tiiyet age tugul kele nyoru ne mining' kaberuret eng' ne o.
\v 8 Ak eng' nito, kotaachei biko che begu kebeberwekab taman, kobate eng' nito kigibaorian kele sobe agoi.
\v 9 Ak kimuchi anyun kemwa kele, eng Lawi ne kitaache kebeberwekab taman, ko kigoito agine eng Abram,
\v 10 amu kita komi bortab kwandanyi Lawi kingotuitos Melkizedek ak Abram.
\p
\v 11 Ak nda kiimugakse keityi kagesunetabge eng tiseinatetab Lawi (amu kinyorune yoto biko ng'atutiet), ko kita kimage nee kobiit tisiindet age ne u ole ki u Melkizedek, ama kiyai ko u ole ki u Aron?
\v 12 Amu ngot kowalak tiseinatet, ko matiny agoi kewal agine ng'atutiet.
\v 13 Amu inendet ne kimwaitae tuguchu ko bo bororiet age, ne mami chi eng' bororionoto ne kigobois eng' kaptisisio.
\v 14 Amu toogu komie kele Kiptaiyandennyo ko kibunu oretab Juda, bororiet ne kimang'alale Musa ng'olyo age tugul agobo ng'alekab tisiik.
\v 15 Che kimwae ko toogu komie kosiir kele biitu tisiindet age eng' kergeindab Melkizedek.
\v 16 Nito kigiyai ago ma eng' oretab ng'atutikab borto, ago eng' kimnatetab sobondab koigeny.
\v 17 Amu baoriani sirutik agobo inendet kole: "ii tisiindet koigeny ko u kit ne ki u Melkizedek".
\p
\v 18 Ama kele kikiisto kityo ng'atutiet ne kiga kendoune amu nyalulenyi ako amu ma til kiy-
\v 19 ako amu ma yai ng'atutienoto kiy koek ne igesunotge-- ak kora ibunetab kamang'unet ne keigei ne kirikchine Jehovah kosiir.
\p
\v 20 Ako ki makiyai koek tisiindet ko mami murtoet! Alak ko kiek tisiik ko makimurto,
\v 21 kobate kigiyai inendet [Jeiso] koek tisiindet eng inendet ne kimwochi kole, "Kikomurto Kiptaiyat ama walei kapkotutikchi kole: ii tisiindet koigeny".
\p
\v 22 Eng nito anyun ko kiek Jeiso tononjinindet ne bo arorutiet ne kararan kosiir.
\p
\v 23 Tisiik che ki bo betusiek che kikosirto ko ki chang, amu kitaee icheket meiyat si matebi.
\v 24 Ako anyun amu sobei Jeiso koigeny, kotinyei tiseinatet ne magiwalei.
\v 25 Eng noto anyun komuchi kogeny kosor agoi kasuldaet icheget che bwanjini Jehovah kobun inendet, amu sobe inendet si kosae agobo icheket.
\p
\v 26 Amu kinyolu ketinye tisiindet ne o, ne tilil, ne matinye kenisiet, ama tinye muruonindo, ne itabanat eng' kiptengekinik ak kigitoror kosiir kipsengwetisiek.
\v 27 Ne manyoljini kogoito tiseiywek betut age tugul, ko u tisiik chuun ki eechen che kiigoitoi korok agobo tengekwogikwai, ngotar kogoito agobo che bo biko. Kiyai noto [Jeiso] konyil agenge ak koem ye kingogoitoge.
\v 28 Amu kiindenoi ng'atutiet bich che nyalulyotin koek tisiik che eechen. Ago eng' ngolyotab murtoet, ne kibiitu let eng' ng'atutiet, ko kilewen Werit, ne kigeyai koek ne igesunotge koigeny.
\c 8
\cl Kurget 8
\p
\v 1 Nguno anyun eng' tuguk che kimwae ko kit ne o ko ni: kitinye tisiindet ne o ne kikotebee eutab tai ne bo ng'echeretab Torornatet eng' kipsengwetisiek.
\v 2 Inendet ko kiboitiot eng ole tilil, emait ne bo iman ne kilume Kiptaiyat, ama chito.
\p
\v 3 Amu kitorori tisiindet age tugul ne o si kogoito kagochinoik ak tiseiywek. Noto anyun ko nyolu kotinye agine tisiindeni kito ne igoitoi.
\v 4 Nda mito Kristo ng'weny, nda maegu tisiindet inendet, amu mi icheket che igoitoi kagochinoik ko u biteetab ng'atutiet.
\v 5 Boisie icheget eng' kaborunet ak uruetab tuguk che bo kipsengwet. Ko u ye kigitechi Musa Jehovah ye kimache kotonon emait: Kimwa Jehovah kole, "Rib si iyai tuguk tugul kou kergeindo ne kigiborun eng' tulwet".
\v 6 Ago nguno Kristo ko kigotaach boisiet ne kararan kosiir, ko u eng' noto ko agine ko katuiyoindet ne bo arorutiet ne kararan kosiir, ne kigiyai eng' inendet kayomisutik che kororon kosiir.
\p
\v 7 Amu nda kima ko rartaat arorutiet ne bo tai, ko ki ta makechengjini boroindo ne bo aeng'.
\v 8 Amu ye kingo nyorji lelutik biko, komwa kole; "Ogeero, mwae Kiptaiyat kole bwanii betusiek, che tun kiyomisyinige kayomiset ne leel koboto gotab Israel ak gotab Juda.
\q
\v 9 Ma ko u kayomiset ne kigiyomisge, ak kwanisiekwai eng betut ne kianam eunekwai si amut komong eng' emetab Misiri. Amu kima kas iit kayomisenyu, ak kima tamage kiy icheket- mwaei Kiptaiyat.
\q
\v 10 Ako ni kayomiset ne tun kiyomisyinige ak gotab Israel ye ibata betusiechoto- mwae Kiptaiyat. Andenoi ng'atutikchu kabkatutikwai, ak asire kogeny eng mugulelwekwai. Aegu Jehovah neng'wai ak koek icheket bikchu.
\q
\v 11 Ama koneti chi age tugul chitab kokwenyi anan konet chi ne tupcho, ak koleji 'Nai Kiptaiyat,' Amu tun konaa chi tugul, kong'ete ne mining' eng' icheket kot koit ne o.
\q
\v 12 Amu tun ariree icheket amu tengekwogikwai, ama tun anani tengekwogikwai agoi.
\p
\v 13 Amu kingogure arorutieni "ne leel," ko kibarasta kole kigometo arorutiet ne bo tai, ago noto kakemeto ak koosit ko legit kobetito.
\c 9
\cl Kurget 9
\p
\v 1 Noto anyun agot arorutionoto ki bo tai ko kitinye ng'atutikab saet ak komastanyi ole tilil ne bo ng'wenyuni.
\v 2 Amu kiga kichob emainoto komie. kiteut ne bo tai ko ole kimi keldab tait, ak meset, ako makatinik che bo kabartaet ko kigigure ole tilil.
\v 3 Ak kingesiirtoe anget nebo aeng ne kigikite got, ko kimi got age eng' emait ne kigiguure ole tilil missing kosiir tugul.
\v 4 Ne kitinye kapkorosutab tahabu ak moingetab arorutiet ne kigiliige tahabu komoswek tugul. Orit ko kimi teret ne bo tahabu ne kitinye mana, ak kiroktab Aron ne kiing'ati, ak koikab arorutiet.
\v 5 Ak eng baragutab moingetab arorutiet, ko kimi kerubisiekab lilindo che kiiuri kereiwotab rirenet, tuguk che magimuchi keng'alale raa agenge agenge.
\p
\v 6 Ak kingo kagechob anyun tuguchuto, ko u noto, kobendi tisiik kotugul emainoto bo tai koyaei boisionikwai.
\v 7 Ago kiwendi tisiindet ne o inegei emait ne bo aeng, konyil agenge eng' kenyit, ak kima wendi ama tinye korotik che igoitoijinige ak agobo lelutikab biko.
\v 8 Kiboru anyun Tamirmiriet Ne Tilil eng' ng'olyondoni kole, kitomo keng'any oret ne mongjini ole tilil mising kosiir ye kita kotononi emait ne bo tai.
\v 9 Nito ko ki kalewenetab betusiechu. Nebo eng kagochinoik ak eng' tiseiywek che kimaimuchi koyai chito ne saei koek ne igesunotge eng' kabwatenyi.
\v 10 Amu kiribe mising agobo amitwogik ak che kiee ak kaunosiek che terotin, choto ko ng'atutik che bo borto kityo che kiging'at agoi betusiekab tetutik che leelachen.
\p
\v 11 Kinyo anyun Kristo ne inendet tisiindet ne o ne bo tuguk che kororon che kikobwa. Kibun anyun emait ne o ago ne igesunotge kosiir, ne magiyae eunek, ago che ma bo ng'wenyuni.
\v 12 Ama eng' korotigab kwesik ak moek, ago eng' korotikchi ichegei ak kiwo anyun ole tilil mising konyil agenge ak koem ak konyorwech katiaget ne bo koigeny.
\v 13 Amu ngot ko kitilili kaunetab borto korotikab kwesik ak kirugik, aronikab roriat che kikiise icheget che tinye muruonindo,
\v 14 kotililii anyun ne tia korotikab Kristo, ne eng' Tamirmiriet ne bo koigeny ago matinye tisia ko kiigochige Jehovah, kotilili kabwatennyo eng' boisionik che meiyotin si keboisiechi Jehovah ne sobe?
\p
\v 15 Ak amu nito, inendet ko katuiyoindetab koyomiset ne leel. Si kobiit konyor che kigeguur kayomisetab borotet ne bo koigeny', ye kingo kagobiit meet agobo katiagetab chalwogik, che kimito eng' arorutiet ne bo tai.
\v 16 Amu ole mito arorutiet, ko ne matiny agoi komito meetab inendet ne yae.
\v 17 Amu tinye arorutiet kimnatet ye kabiit meet, ago matinye kimnatet kota kasobe inendet ne kiyae.
\v 18 Eng' noto anyun agot arorutiet ne bo tai ko kima kilumda ko mami korotik.
\v 19 Amu ye kingo kagomwachi Musa biko tugul ko u eng' ng'atutiet, konam korotikab moek ak che bo kwesik, koboto beeko ak kororik che biriren ak husop ak koise bukuit ak biko tugul.
\v 20 Ak komwae kolen, "chu ko korotik che bo arorutiet ne king'at Jehovah agobo akwe."
\v 21 Ak ko u noto, koisee korotik emait koboto tuguk tugul che kiboisie.
\v 22 Eng' ng'atutiet, ko u kele kitilile tuguk tugul korotik. Ak ngo mami tumdaetab korotik ko mami nyoetab kaat.
\p
\v 23 Kinyolu anyun kitilile itonwekab tuguk che bo kipsengwet eng korotik chuto bo tiong'ik. Ago anyun kitilile tuguk che bo kipsengwet tiseiywek che kororon kosiir chuto.
\v 24 Amu ki machut Kristo ole tilil missing ne kigiyae eunek, ne kaborunetab kito ne mito ago bo iman. Ago kimongji inendet kipsengwet, si kotook eng' taitab Jehovah agobo ache.
\v 25 Ma si kogoitoge konyil che chang', ko u yo wendi tisiindet ne o ole tilil eng' kenyit age tugul, koibe korotik che ma chechii.
\v 26 Amu nda ki u noto, ko kinyoljini anyun kinyalil konyil che chang kong'ete ngelumda ng'weny. Ago kong'ang'ak raa konyil agenge eng' kagesunetab kenyisiek si kobiit koisto tengekto eng tiseiywot ne inendet.
\v 27 Ak ko u yo kiging'at agobo chito kome konyil agenge, ak ye ibata korub kiruoget,
\v 28 ko u noto, Kristo agine kingo kagigoito konyil agenge si koib tengekwogikab che chang, ko tun toogu ne bo aeng' ma agobo tengek, ago eng' icheket che iganyi inendet agoi yetunet.
\c 10
\cl Kurget 10
\p
\v 1 Amu tinye ng'atutiet uruetab tuguk che kororon che bwanii, ago ma itondong'wai. Tuguchuto ko maimuchi koyai icheket che rikyini Jehovah koek che igesunotinge eng' tiseiywechoto igoitoi tisiik kotugul eng' kenyit age tugul.
\v 2 Nda kima u noto, ko tos kima kiagebagakta kigoitoi? Amu kita kinga kotilil che sae konyil agenge ko kimata kotinye kabkateetab tengekwogik kogeny.
\v 3 Ago eng' tiseiywechoto komito kabkatetab tengekwogik kenyit age tugul.
\v 4 Amu maimugakse eng' korotikab kirugik ak ngororek koisto tengekwogik.
\p
\v 5 Eng noto anyun ye kingocho Kristo ng'weny, konyo komwa kole, "Kima imach tiseiywek ak kagochinoik, ago kiichobko borto;
\q
\v 6 kima ibaibaitu eng' kagochinoik che kibeele komugul ak kogochinoik che bo tengekwogik.
\q
\v 7 Amwa anyun ale, 'keero, angni anee- ko u ye kigisir agobo ane eng' bukuit- ayai mageng'ung, ee Jehovah."'
\p
\v 8 Ne tai komwa kole, "Ki ma imach anan ibaibaitu eng' tiseiywek, ak kagochinoik, anan ko kagochinoik che kibeele komugul, nda ko che bo tengekwogik. Ama ibaibaitu eng choto.
\v 9 Yeityo komwa anyun inendet [Jeiso] kole, "Keero, kaanyo ayai mageng'ung." Noto anyun, istoi atebto ne bo tai, asi kigimit atebto ne bo aeng.
\v 10 Eng' maget noto, kigitililech anyun kobun kagoitoetab bortab Jeiso Kristo konyil agenge ak koem.
\p
\v 11 Iman, tisiindet age tugul kotononi eng' betut age tugul koboisie ak kogoitoi konyil che chang- tiseiywechoto che magoi imuchi koisto tengekwogik.
\v 12 Ago tisiindeni [Kristo] ko ye kingo kagogoito tiseiywot konyil agenge agobo tengekwogik, kotebe anyun eutab tai ne bo Jehovah.
\v 13 Koganyi kong'ete yoto agoi keyai bunikchi koek ng'echeretab kelyekchi.
\v 14 Amu eng kagoitoet agenge ko kigoyai icheket che kitilili koek che igesunotinge koigeny.
\v 15 Ak baorianwech agine Tamirmiriet Ne Tilil. Ne tai komwae kole,
\q
\v 16 "Ni ko arorutiet ne tun kiyomisyinige ak icheket ye ibata betusiechoto, mwae Kiptaiyat. Andeni ng'atutikchu mugulelwekwai, ak asirjini eng kabkatutikwai".
\p
\v 17 Ak kotesyi kole, "Ama abwati chalwogikwai ak tengekwogikwai kogeny."
\p
\v 18 Nguno anyun ole mito nyoetab kaat ne bo chuto, komakomi kogeny kagoitoet agobo tengekto.
\p
\v 19 Amu noto anyun che kitupche, kitinye nyiganatet kechut ole tilil mising amu eng' korotikab Jeiso.
\v 20 Noto ko oret ne leel ak kosobe, ne kiyatwech kechute kebundoe anget ne kigebesio, ne noto ko kobun bortanyi.
\v 21 Amu kitinye tisiindet ne o ne bou gotab Jehovah,
\v 22 ongerikte anyun eng' muguleldo ne bo imanda, ak eng' kayanet ne nyitat ko kagetis mugulelwekcho ak kemete kabwatet ne ya, ak kiun borwekcho eng' beko che tililen.
\v 23 Ongenam mising', ng'ang'etab kamang'unennyo, amu bo iman inendet ne kiiaroru.
\v 24 Ak ongebkaat mising ole kicheerteige achege eng' achege, kigimitige eng chamnyet ak boisionik che kororon.
\v 25 Ama kibagakte ketuitosi achege eng achege, ko u ye kigoyai alak. Ago, ongecheerge achege eng achege, ko u yo ogeere ole rigu betut.
\p
\v 26 Amu ngot keyae tengek kekwetyini ko kagetaach naetab imanit, ko ma komi tiseiywot age kogeny ne bo tengekwogik.
\v 27 Ago kito ne kang'et ko kagenet eng' kaiyweisiet ne bo kiruoget, ak koromnatetab mat ne igesu bunikab Jehovah.
\v 28 Chito age tugul ne kasas ng'atutietab Musa komee amamii rirenet eng' baorinik aeng' anan ko somok.
\v 29 Obwatitoi ano akwe, ago ng'wanitu ne tia biret ne tun nyoljini kiruokyine inendet ne kigotiech Weritab Jehovah, ak koiit korotikab arorutiet che kitilile inendet koek tuguk che ma tililen, ak kosas Tamirmirietab mieindo?
\v 30 Amu kinget inendet ne kigomwa kole, nenyu yaaktaetab mugetut, ane ne ayaaktoi". Ak kogeny, "Ko iruokyini Kiptaiyat bikchi."
\v 31 kit ne ngw'an mising' ngibutyi eunekab Jehovah ne sobe!
\p
\v 32 Ago obwat ye kingo kagegonok lapkeiyet eng betusiek che ki bo keny, ole kiomuitoji boriet ne o eng' nyalilwogik.
\v 33 Ye kioegu eng' kasarta age che kitangangjini eng' katewerisiosiek ak kanyalilosiek, ak eng' kasarwek alak ko kiotoretige koboto icheket che kicham keyachini ko u noto.
\v 34 Amu kiorire icheket che ki ratotin, ak ocham eng' boiboiyet kesarenak tugukwok. Amu kiongen ole otinye magornatet ne kararan kosiir choto ago ne tebche koigeny.
\v 35 Amowirte anyun nyiganateng'wong,' ne tinye melekto ne o.
\v 36 Amu nyolu otinye muitaet, si ye kaoyai magetab Jehovah, omuch otaach tuguk che kiyamis.
\v 37 Amu ta komi kasarta kitigin mising', si kocho inendet ne nyonii ama ienege.
\q
\v 38 Ago sobe nenyu ne bo imanda eng' kayanet. Ak ngot kochuchuchge, ko mabaibaitu sobondanyu eng' inendet."
\p
\v 39 Ago ache ko mabotech icheget che ichuchuchige kobendi luset, ago kimite ak icheket che iyani ak kosor sobonwekwai.
\c 11
\cl Kurget 11
\p
\v 1 Ara anyun kayanet ko naetab tuguk che kimang'u ak kaborunetab tuguk che tomo kegeer.
\v 2 Amu eng nito ne kigibaorianjine boisiekcho che bo tai agobo kayaneng'wai.
\v 3 Eng kayanet kenae kele kigiyai kipsengwetisiek eng ng'olyotab Jehovah, noto anyun tuguk che kigeere ko kima kiyae tuguk che toogu.
\p
\v 4 Eng' kayanet ko kiigochi Abel Jehovah tiseiywot ne kararan kosiir ne bo Kain, ne kigibaorianjine inendet kele ki bo imanda, ak kibaorian Jehovah agobo kagochinoikchi, ak eng' kayanet ko agot ng'anda kigome ko ta kong'alali Abel.
\p
\v 5 Ki eng' kayanet ko kigimut Enok si mageer meet. Ak kimata kogeer chi inendet, amu kiimut Jehovah. Amu kiga kibaorian agobo inendet ye kitomo kimut kele kiibaibai Jehovah.
\v 6 Ak ngo mami kayanet ko ma imugaksei kibaibai inendet. Amu inendet ne chonjini Jehovah konyoljini koyan kole mi inendet ak ko igochini inendet melekto icheket che cheng'e inendet.
\p
\v 7 Ki eng' kayanet si koyai Noa melit, kot kosor gonyi ye kingo kageteechi agobo tuguk che kitomo kegeere, amu kiiywei Jehovah. Kigiruokchine ng'weny nito anyun, akoek inendet ne kinam imanda ne biitu eng' kayanet.
\p
\v 8 Eng' kayanet ko kigas iit Abraham ye kingeguur, ak kimanda ak kwo koret ne ki maingen, kwo komosta ne ki tun kotaach koek borotet.
\v 9 Eng' kayanet ko kiek kiprutoiyot eng' emetab kayamisutiet, ko u emet ne ma nenyi. Kimeng'oti emaisiek koboto Isak ak Jakobo, che ki che name kayamisutienoto koboto inendet.
\v 10 Amu kiiganyi nganaset ne tinye lumeiywek, ne teegindennyi ak yaindennyi ko Jehovah.
\v 11 Ki eng' kayanet, ko kisiich agine Sara kimnatet nga nda ki sonet, ak komanach ko kagosiirto kenyisiekyi. Amu kiit kole bo iman inendet ne kikochini kayomiset.
\v 12 Noto anyun, kobun chichi agenge----ne kiga koige ne kigome---- ko kigisiich biko che chang ko u kokelikab kipsengwet ak kipsiaiyet che mi tabandab araraita che ma iitokistos.
\p
\v 13 Eng' kayanet ko kimeiyo chuto tugul ama taach kayomisutichu. Ago kiga kogeer kityo, ak koboiboitu kota komi ole loo, ko kagong'any kole ki toek ak ko kiprutoinik icheket eng' ng'weny.
\v 14 Amu icheket che mwae tuguk che u choto, koboru kole cheng'e emet ne neng'wai.
\v 15 Ak nda kiga kibwati iman agobo emoni kimong'une, ta kinyoru boroindo koweektage.
\v 16 Ago ko u ole u, ko mache missing emet, ne kararan kosiir, noto ko ne bo kipseng'wet inegei. Ak ma ililandoige Jehovah agobo icheket keguure Jehovah neng'wai, amu kigochopchi icheket nganaset.
\p
\v 17 Eng' kayanet ko kiigoito Abraham Isak, kingetiem inendet. Ee kiigoito werinnyi ne kigisich inegei, inendet ne kigataach kayamisutik.
\v 18 Inendet Abram ne kiga kimwoji keleji, "Tun kemwoitoe Isak iyoteng'ung".
\v 19 Kiit anyun Abram kole imuchi Jehovah kong'eet Isak agot eng' che kigobek, ak kitaach inendet ak kowechge si koek kaborunet.
\p
\v 20 Eng' kayanet ko kiiberur Isak Jakobo ak Esau eng' tuguk che bwanii.
\p
\v 21 Eng' kayanet ko kiiberur Jakobo werik tuwai che bo Josep ye ki legit kome, ak kosa kotiegei walitab kiroktannyi.
\v 22 Eng' kayanet ko kimwa Josep agobo mandaetab legukab Israel ye ki legit kome, ak kogon ng'atutiet agobo kowoikchi.
\p
\v 23 Eng kayanet ko kiuny sigikchi Musa eng' arawek somok kingo kagesich, amu kiga geer kole ki lakwet ne kararan. Ak kima iywei ng'atutietab laitoriat.
\v 24 Eng' kayanet ko kitai Musa, kingo kagoeet keguure weritab cheptab Parao.
\v 25 Kilewen keyachi che yaachen koboto bikab Jehovah kosiir kobaibaige eng' boiboiyosiekab tengekto che bo betusiek che matia.
\v 26 Kiit tewernatet ne kiteweri agobo Kristo kole magornatet ne o kosiir konoraik che bo Misiri, amu kiiganyi melektonnyi.
\v 27 Eng' kayanet kobagakta Musa Misiri. Ama iywei neregekab laitoriat, amu kimuita ko u yo kikeerei inendet ne ma toogu.
\v 28 Eng' kayanet ko kiyai Pasaka, ak isisietab korotik, si ma twa israelik ne kibare werik che bo tai.
\p
\v 29 Eng' kayanet ko kibun orit ne bo araraita ne Birir ko u yo bunei emet ne yaamat. Ak kingolen kotiem Misirik koyai ko u nito, kelugui icheget.
\p
\v 30 Eng' kayanet ko kilulyo irimoikab (tiikab) Jeriko, kingo kagemut betusiek tisab.
\p
\v 31 Eng' kayanet ko ma me chepkukoniot ne kigiguure Rahab koboto icheket che ki ng'elelik, amu kigataach segeik eng' kalyet.
\p
\v 32 Ara anyun, nee age ne ta kemwae? Amu mamii boroindo ngot amwa agobo Gideon, Barak, Samson, Jepta ak agobo Daudi ak Samuel ak Maotik.
\v 33 Ki eng' kayanet koterter bounatosiek, ak koyai imanda, ak kotaach Kayamisutik. Kiger kutuswekab ng'etunyik,
\v 34 kiimis kimnatet ne bo mat, kichilile rotwetab chok, kigigimit eng' nyalulateng'wai, kigimegitu eng' luget, ak kiterter askarikab luget chebo bunik.
\v 35 Kitaach kwonyik bikwai che kiga komeiyo, che kiging'eet. Alak kenyalil, ago ki taiyo ketiach, si kobiit kosiich ng'eetyet ne kararan kosiir.
\v 36 Ak kigitiem alak eng' chombilet ak eng' birosiekab kipcharitisiek, ee ak kogeny eng' ratisiosiek ak toorjinetab korgoret.
\v 37 Kigiwir alak eng' koik. Kigibet kobun aeng eng' musumenosiek. Kigibar eng' rotwetab chok. Kiilogoti ngoraikab kechirek ak che bo ng'ororek. Kibononsot, kiginyalil ak keyachini che yaachen.
\v 38 Che kima konyoljini ng'weny icheket. Kiombenoti eng' ong'atosiek ak tulondok, ak eng kebenonik ak keringonikab ng'weny.
\p
\v 39 Nga nda bichu tugul ko kinyor chamet ak kobaorianji Jehovah amu kayaneng'wai, koma taach iche kayamisutiet.
\v 40 Amu kigasib kochobgech Jehovah kito ne kararan kosiir, si ma kiyai ichegei koek che igesunotinge ama kimi.
\c 12
\cl Kurget 12
\p
\v 1 Noto anyun, amu kimutech boldet ne kindet ne bo baorinik eng' komoswek tugul, ongelelektee kobaa taban nyigisin age tugul ak tengekto ne sib kong'wilech. Ak ongeruei eng muitaet ak eng' kabeletab ge ne kigindenoiwech tainyo.
\v 2 Ongegeer Jeiso, ne taunindet ak ko kawong'unindet ne bo kayanet. Ne kimuita eng' kimurtoiyot amu boiboiyet ne kigindeno tainyi, ak kosas kalilanet ak kigotebe eutab tai ne bo ng'echeretab laitornatet ne bo Jehovah.
\p
\v 3 Obkat mising' inendet ne kimuita eng' kirindaet ne bo kiptengeginik ak kanyalilet agobo inendet, si mojosye ak otanuise eng' sobonwekwok.
\v 4 Tomo ogirinde tengek kot kotumdage korotik, obarege ak tengekto;
\v 5 ak kioutie kakaigaet ne ng'alalwok oii werik kolejinok: "Werinyu, amesas kotigonetab kiptaiyat, anan itanui ye kerin kong' inendet.
\q
\v 6 Amu inendet ne chame kiptaiyat kotigoni, ak kobire werit age tugul ne taache."
\p
\v 7 Omuitee anyun eng nyalilwogik amu kotigonet. Yaiywok Jehovah ko u noto, ko u ye yaachini werik. Ara werit anonoo anyun ne maitigoni kwanit?
\v 8 Ago ngot ko motinye kotigonet, ne kiginyorune ache tugul yamdaet, oboe sorbuch anyun, mo ii werik.
\v 9 Ngot ko kigitinye kwanisiek che bo borwekcho che kiitigonech ago kigigonyitii icheket, ko tos kaigai ne tia kimining'ityige Kwanda ne bo tamirmiriet ak kesopche!
\v 10 Amu kiitigonech kwanisiekcho eng' betusiek che ng'ering' ko u ye kigeere kole kararan. Ago Jehovah kotigonech agobo toretennyo, si keegu che kiemtei tililindanyi.
\v 11 Ma toogu kotigonet age tugul kele bo boiboiyet eng' betunoto, ago konu kaimutik. Ago ye ibata koiichi icheget che kiginet logoekab kalyet choto ko logoekab imanda.
\p
\v 12 Eng noto anyun onamji barak eunek che nyalulyotin, ak kutung'oik che meiyotin.
\v 13 Ak oyachi kelyekwok ortinwek che lititen, si ma kimaas icheket che ing'waltos, ago si kinya ak kesoob.
\v 14 Ogiilge ak otebi eng' kalyet koboto biko tugul, ak tililindo, amu ngo matinye chi ko memuchi kogeer Kiptaiyat.
\v 15 Oribge si ma rarchi chi age tugul mieindab Jehovah, si mabiit tigitiotab ng'wanindo ak koet si ko koon kaimutik, ak komuruon che chang,
\v 16 si mabiit ne sokse, anan chito ne meiywei Jehovah, ko u Esau ne kialda etunennyi ne bo siget agobo amdit agenge.
\v 17 Kingomach eng' let konam kaberuret ketae, amu onget ole kimasich boroindo ne bo sigunet, nganda kicheng mising' eng' beekab kong.
\p
\v 18 Amu ma obwanji tulwet ne kimuchi ketiiny, tulwet ne lale ko u maat, anan tuindo, ak mesundeito ak kipchurchuriet.
\v 19 Ma obwbaa ole mi cheetab iriaget, anan ko twegunet ne bo tuget ne ngalali ngalek ne kisom icheket che kigas kole si matata ketes kemwoji icheket ng'olyo age.
\v 20 Amu kima komuji komuita eng' ng'olyondonoto kiging'at kele: "Agot ngo tiiny tiony tulwet kewiree koik ne matiny."
\v 21 Ak eng' kioto kitook, ko kito ne ang'oss ak kiimui biich mising', kot kole agine Musa, "Aiywei ak abotani."
\v 22 Ago ne siire anyun, ko kaobwaa akwe tulwetab Sion, ak ng'anaset ne bo Jehovah ne sobe, Jerusalem ne bo kipsengwet, ak tuiyosiek elfusiek tamanusiek che bo malaikaisiek che mi eng boiboiyet.
\v 23 Kaoitu tuiyet ne o ne bo kiboret, biko tugul, ak kaniset ne bo che kigesir eng' kipseng'wet. Kaobwanji Jehovah, kiruogindetab tugul, ak ne bo tamirmirik che bo bikab imanda che kigeyai koek che igesunotinge.
\v 24 Ak Jeiso katuiyoindetab arorutiet ne leel, ak korotikab iset che ng'alali ne kaigai kosiir che bo Abel.
\p
\v 25 Ogeer si motaiye inendet ne ng'alali. Amu ngot ko kimachililyo icheket ye kingotaiyo inendet ne kiitechini icheket eng ng'weny, kechililtei ano anyun ache ngot keistoege inendet ne iteu eng kipsengwet.
\v 26 Eng kasarta agenge, ko kitumtum ng'weny kutinyi. Ago kagoaror anyun ra kole, "ta ketyini atumtumi kogeny ng'weny, ago ma ng'weny inegei, ago koboto kipsengwet agine."
\v 27 Ago eng' ng'olyondonito, kamwa kole, "ta ketyini", koboru istoetab tuguk che kimuchi kitumtum, ko u eng' tuguk che kigeyai, si kobiit kong'et tuguk choto che ma kitumtumi.
\v 28 Noto anyun, amu kigetaach ache bounatet ne magimuchi kitumtum, ko ongeegu che tinye kongoi ak ko u nito keyai boisiet ne iboiboi Jehovah mising', eng' teegisto ak kaiyweet.
\v 29 Amu Jehovah nenyo ko mat ne igesu.
\c 13
\cl Kurget 13
\p
\v 1 Ingotestai chamnyet nebo tupchosiek.
\v 2 Amatouitye otaach toek. Amu kigotaach alak malaikaisiek eng' noto ko maingen.
\v 3 Obwati icheget che ratotin ko u yo oratatin tugul. Obwati icheget che kinyalili ko u yo omi ak akwe eng' boroto.
\p
\v 4 Ingogonyit chi tugul katunisiet, amat koek kitogut ne tinye simdo, amu tun iruokyini Jehovah biko che sokse ak che ibege.
\v 5 Ingoek atebeng'wong' ne matinye chametab silingisiek. Ingoemak tuguk che otinye, amu kigomwa Jehovah inendet kole, "Magoi abagakten, ama goi ameten."
\p
\v 6 Ingoemech anyun tuguk che ketinye si kenyoru nyiganatet kemwa kele, "Toretindennyu Kiptaiyat, maiyweisiei. Tos itaa nee chi?
\p
\v 7 Obwati icheket che indoiywok, icheket che kimwawok ng'olyotab Jehovah, ak ye obwati ogeere ole kiteptoi atebosiekwai. Oyai ko u ye kiyae iche eng' kayanengwai.
\v 8 Kerge Jeiso Kristo eng' amut, rani, ak agoi koigeny.
\v 9 Ama ta ogany kobeetok kanetisiosiek che besiotin ak che ter. Amu kararan kolumdaak muguleldo eng' mieindo, ago ma eng' amitwogik che matoreti kiy icheket che bendote choto.
\p
\v 10 Kitinye anyun kaptisisiet ne ma kichamjini icheket che boisie eng' emait koamis.
\v 11 Amu korotikab tiong'ik che kigibare agobo tengekwogik ko kiibu tisindet ne o kobwa ole tilil, ak kigibeelei borwekab tiong'ichoto eng' nganaset sang'.
\v 12 Noto anyun kinyalil agine Jeiso eng' ormarich sang ne bo nganaset, si kobiit kotilil biko eng' korotikyi.
\p
\v 13 Ongebe anyun ole mi inendet eng' sang'utab ormarich, keibe tewernatet ne kimuitoji inendet.
\v 14 Amu makitinye eng' yu nganaset ne tebche koigeny. Ago kicheng'e noto chonii.
\p
\v 15 Eng inendet, ko ongigochi Jehovah kotugul korosekab kalosunet, noto ko lokoekab kutuswek che ilosu kainenyi.
\p
\v 16 Amata kiutie keyai che kororon ak kagoitoetab tuguk che kitinye, amu baibai mising' Jehovah eng' korosek che u choto.
\p
\v 17 Ogas iit che indoiywok ak omining'ityige icheket, amu ripse agobo sobonwekwok, ko u che tun tetu agobo boisieng'wai. Ogas iit si kobiit koyai boisionoto eng' boiboiyet, ama eng arogenet, si maek buch eng akwe.
\p
\v 18 Osaiwech, amu kiyani kele kitinye tugul kabwatet ne kararan, ak kemache ketebi eng' atebet ne chulat eng tuguk tugul.
\v 19 Ak asomok mising' kot koit ale oyai ko u noto (Osaiwech), si kosib keweekwo anyo ole omite.
\p
\v 20 Ingoyaak Jehovah ne bo kalyet, ne kiimut mestowot ne o ne bo kechirek komong eng' che kikomeiyo, eng' korotik che bo kayomiset ne bo koigeny, inendet noto kiptaiyandennyo Jeiso.
\v 21 Oegu anyun che ochobotin eng' boisiet age tugul ne kararan, si oyai magenyi, yae eng' ache che chamakse mising' eng' tainyi, eng' Jeiso Kristo, ne nenyi torornatet koigeny ak koigeny. Amen.
\p
\v 22 Ago acheerok mising' anyun tupchosiechu ale, omuite eng' ng'olyotab kagimitet, amu kaasiruak eng' ng'alek tutigin.
\p
\v 23 Onai ole kogitiach tupchenyo Timoteo, ago ngot konyo ko legit ko tun anyoni ageerok koboto inendet.
\p
\v 24 Ogat tugul che indoinywok ak bikab Jehovah tugul che tililen. Igatok che bunu Italia.
\p
\v 25 Ingotebi mieindo kobotok akwe tugul.