ema-x-emai_reg/49-GAL.usfm

\id GAL
\ide UTF-8
\h Ebe si ekhe̱n Gales̱ian
\toc1 Ebe si ekhe̱n Gales̱ian
\toc2 Ebe si ekhe̱n Gales̱ian
\toc3 gal
\mt Ebe si ekhe̱n Gales̱ian

\c 1
\p
\v 1 O̱na ikhi Ipo̱lu li uvbiodogho. Li chie̱n uvbiodogho zavbi abo si ea vare sokpe̱n shian vbobo̱ si Jesu Kristi bi Oise̱le̱bua li Era, lo̱ nwuo̱in zavbi eu chiere.
\v 2 Mai bi imio̱main li mai rivbo li are̱ vin o̱li ebe na yi o̱se si Galasian.

\v 3 E̱seo̱he̱n re̱yi e̱ bi o̱fure isi Oise̱le̱bua li Eramai bi Jesu Kristi,
\v 4 lo̱ri egbo̱i re vbi o̱hio̱ si o̱kho̱o̱ mai lo̱i re̱ demain chiere vbi o̱re̱i si o̱kho̱o̱ na, vbi e̱ke̱n ahoo si Oise̱le̱bua bi era.
\v 5 Re̱yi o likhi o̱khai re̱le̱ re̱le̱.

\v 6 O̱yiame̱, unuan khi vba deli udu yi eta leyi o̱dan e̱je̱ e̱je. O̱yiame̱ unuan khi vba deli egbe sho̱ vbi isi o̱lo̱ e chie e̱ vbi e̱ke̱n e̱seo̱he̱n isi Kristi.
\v 7 Eta si o̱hume̱me̱n o̱vbe i evbo̱, sokpe̱n ea eso nia nwuin okpokpo yi vba nian ho'o nian fi osughu o̱vbi etasi o̱hume̱me̱n si Kristi.

\v 8 Mamain da'a e̱hi isi okhumeimi kha vare oya wewi eta o̱vbe'e yio̱dan yi o̱nima wewe ubievba, ukhueo lo̱lo̱ mie̱n.
\v 9 Mai tai ebi mai kpao gboi tai te̱le̱ khi, "Akha mi o̱ia lo̱ wewi eta o̱vbe yi o̱dan yi o̱livba ga obo̱ mie̱n, o̱li o̱ia chie̱n o̱la khuei."
\v 10 Eri ake ho li agbo̱n mo̱ obo̱ me̱ vbo̱ da'a Oise̱le̱bua? Eriake ho o̱li vbemi ebi agbo̱n o̱i ho o̱i? Ikha kpe̱i vbi emi lire vbi ahoo si agbo̱n'u, ivbi o̱lo̱ gi Kristi.

\v 11 Ihoo li vba e̱n, imio̱nme̱n, khi eta isi o̱hume̱me̱n lia wewe o̱i za vbi obo̱ si agbo̱n vare.
\v 12 Oiza vbi obo̱ si agbo̱n vare yime̱n, o̱ia i gbo vbie̱ me̱ o̱in. Sokpe̱n, o̱ shan vbi obo̱ si are̱vbie̱ isi Jesu Kristi yime̱n.

\v 13 Vba hoi vbi e̱mo̱in awee me̱n li gheghe vbi ugami isi ekhein Jiu, ebi yai khui ighogho si elemie̱ho̱n shan bi ebi riakha'a lire khue elemie̱ho̱n o.
\v 14 Eri mo̱i iyao vbi ugami isi ekhein Jiu lei ireme̱n mo̱i, vbi e̱ke̱in ebome̱n. Re̱se̱ vbiyo̱ li'i mo̱in iriakha'a vbi awee si ebome̱n.

\v 15 Sokpe̱n Oise̱le̱bua lo̱ ze̱ime̱n vbi e̱ke̱in isi iyo̱n me̱n, lo̱ e chie me̱n vbi e̱seo̱he̱n so̱i,
\v 16 o̱ri ovbio̱i vbie̱ vbi e̱ke̱in me̱n vbi egho̱gho̱n so̱i li re wewe o̱i vbi usee isi ekhe̱in Ije̱ntai, imo̱in ooso li mai o̱i eta.
\v 17 Ilode̱ vbi Jerusale̱m vbisi enian chie̱n kpao vbi ivbiodogho khe̱me̱n, sokpe̱n Arebia li lode̱ li chie za chie vare vbi Damaskos.

\v 18 Ikpe'ea ke rare, lire lode vbi Jerusalem lire̱ o̱ e̱n Keifas, li kere̱ dia kpe̱n o̱n ikpe̱de̱ igbeihie̱n.
\v 19 I chie mi uvbiodogho o̱vbee rai Jemisi li omio̱i O̱lo̱mo̱e̱nmai.
\v 20 Reyi emi li vin yi vba na, itai vbi e̱ke̱n ata vbi isao isi Oise̱le̱bua khi e̱he̱n kia mo̱e̱n.=

\v 21-22 Likere̱ lode̱ vbi odidai isi Siria bi Silisia. Vbi ole̱ghe̱ na e̱khe̱n O̱se̱ lo̱rivbi Judia iuse e̱n'me̱n.
\v 23 Eriain ho̱in khi atai kho̱'o̱, "O̱ia lo̱ kpao ke̱in o̱lo̱ gbi O̱se̱ lo̱ke kie̱n o̱lo̱ wewi eta si amie̱nho̱n lo̱'o̱u kh'o̱kpao khusian.
\v 24 O̱hio̱ so̱na ian re̱ ri o̱khai yi Oise̱le̱bua vbi o̱hio̱ me̱n.

\c 2
\p
\v 1 Ikpei gb'ele kerare li mai bi Banabasi re̱ lode̱ vbi Jerusale̱m. Igbo wui Tito̱s re̱khai egbe.
\v 2 Ilodē erimidi khi Oise̱le̱bua e̱me̱n li lode̱. liza wewe eta si o̱hume̱me̱ vbie̱iain lo̱u khi wewe vbie̱i ekhe̱n Ge̱ntai. (Sokpe̱n ikpayi elecie̱n ukutu vb'use sian gui iyie̱nmi vbi uhe'egbe). Emo̱ze̱i lire̱ vbiyo̱ ikhi lae'mie̱n ula men i'deo̱'vbi ahoi.

\v 3 Sokpe̱n airi utotomi o̱i o̱'o̱so lai rue̱'o̱i, re̱se̱vbi Tae̱to̱s lo̱kie̱n Griki.
\v 4 O̱li iyie̱mina dumu vbo̱hio̱ si ea eso leo̱ do'o dube̱e̱ vbi o̱fure nimai mo̱e̱n vbi Jesu Kristi. Yiain ho'o nimai cie̱n oghumi si uhi.
\v 5 Mai degbe rehe o̱vbo niain e̱ghe̱'ikhe̱ghe̱, lai re̱mie̱n khi ata si eta si o̱hume̱me̱n i'degbe delo̱ vbi o̱hio̱ se̱'e̱     .

\v 6 Sokpe̱n ea li eso o̱i khekie̱in khi are̱khae̱n, ei mi ikho̱'obo̱ le rele̱me̱n. Eme kian ere̱me̱m i'mo̱i emo̱dewun reyi'me̱n. Oise̱le̱bua iya mo̱'obo̱ o̱vbi emi lo̱u khi agbo̱n ze̱i.
\v 7 Sokpe̱n eremio̱in ebai'e̱me̱n ya wewe eta si o̱hume̱me̱n vbie̱ ea lo̱'o̱u khai rue̱'e̱. Elabai'i Pita yai wewe vbie̱ elo̱'o̱u kha rue̱'e̱i.
\v 8 Erimidi Oise̱le̱bua lo̱ ri Pita bia li elo̱'o̱u kha'rue̱'e̱i, yio̱n o̱gbo re̱me̱n bia li elei mo̱n orue̱'e̱.

\v 9 E̱ghe̱li Jemisi, Ke̱ifas, bi Jo̱ni lae̱n o̱vbi ele wui igbuloto̱i si O̱se̱, re̱ mi e̱seo̱he̱n li la reneme̱n, lekeza si mabi Banabasi ke̱'egbe. Evbiyo̱ li maimai reo̱ gi ekhe̱n Ge̱ntai ze, li iain gbore̱o̱ gi ela rue̱'e̱i ze.
\v 10 Yiain gbo ho'o li mai gbo e'ei eli e̱so̱n'o̱gbe re. Me̱me̱ o̱gbo re̱ ho'o li bi obia liyo̱.

\v 11 E̱ghe̱li Ke̱ifasi re̱ vare vbi Antio̱k, eri kpayo̱i kha'erun bi khi'ile̱'e̱o so̱i erimidi ero̱ vbi afido̱n.
\v 12 O̱kpe̱se̱ khi ea eso zavbi isi Jemisi vare, Ke̱ifas ya kpayi ekhe̱in Ge̱ntai e'emae. Ekgeli eli ea'na kere̱ vare, lo̱iya keza debaian e'emae. Ero̱ mo̱in ilofe̱n si ea lian hoi orue̱'e̱.

\v 13 Eleko̱'o̱re vbi ekhe̱in Jiusi debai Ke̱ifas vbi o̱li ue̱n si ai'zaghome̱n na. Ema zavbo̱ mie̱n ikhi Banabasi legbeso̱i reo̱'o̱vbi o̱li laikpe̱ zaghome̱n na.
\v 14 Bikere̱ zawo'o̱i khi yiai re̱khan ata si eta si o̱hume̱me̱n, likere̱'o̱i Ke̱ifasi, vbi isao siain ere̱me̱n khi, "Ukha kie̱n Jiusi, luya e̱n bi ekhe̱n Ge̱ntai, ebulo̱kei kpayi ekhe̱n Ge̱ntai obo̱ re̱ ubi ekhe̱n Jiu?"

\v 15 Mamai nimai kie̱in imoto̱i si Jiu nimai vbi "Ekhe̱in Ge̱ntai nia vbo̱kho̱'o̱"
\v 16 e̱in khi aimio̱la re̱kie̱n o̱lo̱fuain vbo̱hio̱ si obia si uhi. Sokpe̱n, arian kie̱in e̱le̱fuain s̱ian vbi amie̱nho̱n o̱vbi Jesu Kriste. Main mie̱in Jesu Kristi ho̱n limai re̱ mo̱in awu'fuan vbe̱ke̱n amie̱nho̱n o̱vbi Kristi lo̱i vbi res̱ian vbi ukpo̱hio̱ si uhi. Erimidi akha mi o̱lo̱lo̱ meti mie̱in awufuan s̱ian vbi are̱o̱vbi uhi.

\v 17 Makha ho'o awufuan vbobo̱ si Oise̱le̱bua s̱ian vbi obo̱ si Kristi ni mai kpe̱ evbi o̱kho̱'o̱, eri Kristi ke kien o̱lo̱gi o̱kho̱'o̱? Akha mi emiliyo̱!
\v 18 Ikha e̱nhi egbe o̱vbi arudu'o̱vbi uhi lo̱'o̱u khi isin ovbi oto̱i, ikie̱in o̱lo̱ gbuhi'a vbo̱le̱ghe̱.
\v 19 Ike u li uhi sian vbi e̱mo̱in uhi, laire̱ mie̱n khi irivbo̱ li Oise̱le̱bua.

\v 20 Ake kha'an me̱n yie̱n vb'o̱gbe̱n re̱khain Kristi. Me̱me̱ kike rivbo̱ legbeme, sokpe̱n Kristi o̱ke rivbi'e̱me̱n. Ue̱n liake e̱n yian yia e̱n'o̱in vbi e̱ke̱n amie̱nho̱n si Ovbi Oise̱le̱bua, lo̱ hume̱ke̱nme̱n, lo̱ ri egbe so̱i humo̱han ne̱me̱n.
\v 21 Ikhata khi e̱seo̱he̱n si Oise̱le̱bua o̱ievbo̱, vbo̱hio̱ akha'ai khi o̱fuan rivbo̱ vbo̱hio̱ si uhi, e̱ghe̱ain Kristi u'o̱vbi oto̱'o̱san.

\c 3
\p
\v 1 Ekhe̱in Galesian li oghumioruru, o̱'o̱ke ko̱vba eo̱? Eo'vba li aza khain Jesu yie̱n vb'ogbe̱n.
\v 2 O̱na uo̱kpa li ho'oi li mama vbi obo̱ vba. Eru mie Etin vbi obia si uhi, daa sian vbi amie̱ho̱n si eta la ho̱in?
\v 3 Vbake iyo̱ ruru? Livba ke re̱ ri e̱mo̱in Etin be̱ re, eri vba lo̱ ke o̱ ri e̱mo̱n egbe kuo̱ia?

\v 4 Erivba lo̱ ke ooya si emi lebun na kua, e̱ghe̱ laai khi aukua o̱'o̱?
\v 5 Eri o̱lo̱ri Etin navba, lo̱ gbo bi obia si o̱yiunua vbi usee vba vbena vbi e̱ke̱n sian vbi obia si uhi, daa amie̱ho̱n?

\v 6 Elabi Ebraham "imie̱n Oise̱le̱bua ho̱n lai ri o̱hio̱ so̱i e̱ e̱ o̱in ovbi o̱ia le̱se̱n."
\v 7 Gbo iyo̱ eni khi ele mie̱nho̱n e̱kie̱n ivbi Ebraham.
\v 8 Eta si o̱hume̱me̱n e̱n khoto̱i khi Oise̱le̱bua lo̱ zi ekhe̱in Ijentai mo̱in amie̱ho̱n, lo̱ re̱ wewe vbie Ebraham re̱ o̱ o̱i, "Vbo̱hio̱ se̱ e̱ li umaikhuma ere̱me̱n lo̱ re mo̱i ihianba."
\v 9 O̱hio̱ si o̱na, ele mie̱ho̱n ere̱me̱n lo̱ mo̱in ihianba debai Ebraham, lokie̱n o̱ia si amie̱ho̱n.

\v 10 Agbo le di udu ain obia si uhi vbi ele ri vbi e̱ge̱in eo̱, iyio̱ lai vio̱in o̱vbotoi kho̱, "Ukhueo re̱yi o̱ia lo̱i rekha emi ere̱me̱n la vin o̱ vbi uhi, lo̱i gbo ri ain u."
\v 11 Ero̱ke nwuin e̱o kuere khi uhi kha meti nwuan kie̱n o̱lo̱fuain vbi sao si Oise̱le̱bua, erimidi amie̱ho̱n nikhi ukpode̱ o̱fuan.
\v 12 Uhi bi amie̱ho̱n ivbi o̱kpa, sokpe̱n, "Oia lo̱ bi obia si uhi lo̱ gbo e̱n ue̱n si uhi."

\v 13 Kristi de main chiere, sho̱ vbi uvie̱nmi si uhi re lo̱re̱ regbe so̱i kie̱n o̱lakhue'e vbi o̱hio̱ main avio̱n khi, "Ukhueo re̱yi o̱ia li akhan yie̱n vbi o̱gbe̱n".
\v 14 Lai re̱ mie̱n khi ihianba si Ebraham lo̱ re̱ si ekhe̱n Ije̱ntai egbe vbi e̱ke̱n Jesu Kristi, laire mie khi vbe̱ke̱n amie̱ho̱n mai meti mi Etin Lofuan la hi'i.

\v 15 Imio̱nme̱n, ilo̱ ti eta ze̱n elabi o̱ia. Reyi ue̱n si mamai li agbo̱n, o̱ia iya vbi emi rai uhi re, elabai vio̱n o̱vbi oto̱i.
\v 16 Ebraham bi uanmi so̱i li ahi ni. O̱itai khi, "Re̱yi uanmi ere̱me̱n," lokie̱in elo̱bun, sokpe̱n re̱yi iso̱i ukpo̱kpa, "Reyi uanmi se'e", lo̱kie̱in Kristi.

\v 17 Emi li roita likhi. Uhi lo̱ ou kha mie ikpei egbo̱'ue-ikp'o̱gban ikpuokho, o̱ike zuan ke o̱i khi atamasi si Oise̱le̱bua li gheghe i'ke mo̱in o̱lo̱ri.
\v 18 Akhai khi ae'vbuku o̱za vbi uhi vare, e̱ghe̱ ain o̱ike kie̱in emi la hi'i. Sokpe̱n Oise̱le̱bua ri o̱li ae'vbuku na ni Ebraham shian vbi uhimi.

\v 19 Iyi emi uhi ke dewun vbi o̱le̱ghe̱? Emo̱n uhi rivbo vbi o̱hio̱ si afido̱n, o̱kpe̱se̱ khi uanmi si Ebraham lo̱'o̱u khi ahi ni. Emo̱in are̱u si uhi, obo̱ si ekhe̱n ehi la wuo̱io̱n, sokpe̱n o̱lo̱ re̱o khuo gbo rivbo̱.
\v 20 O̱lo̱ re̱ o khuo̱i na rai otuo̱kpa, sokpe̱n Oise̱le̱bua chie̱n okpa.

\v 21 Eri uhi i kei deba uhimi isi Oise̱le̱bua? Iyo̱ ko̱ gbeigbei! Erimidi akha gbi uhi lai ro̱i mi aye, eghe ain o̱hume̱me̱ lo̱ zavbi uhi vare vbi o̱le̱ghe̱.
\v 22 Sokpe̱n eta lavin o̱i khi emikhi emi lo̱ chie̱n o̱kho̱o̱ khi ighian li o̱lo̱'o. Oise̱le̱bua lo̱ uo̱i iyo̱ laimie̱n khi uhimi si amienfan mai khi avbi amie̱nho̱n o̱vbi egbe si Jesu Kristi lo̱ meti si elemie̱nho̱n egbe.

\v 23 O̱kpe̱se̱ khi amie̱ho̱n vare, mai chie̱n oghumi si uhi, mai chie̱n isighain se̱ vbi e̱ghe̱ la lo̱ re ri amie̱ho̱n vbie̱.
\v 24 Li uhi re̱ chie̱n o̱lo̱ re̱main shan se̱vbo̱ khi Kristi vare, li mai re̱ chie̱n o̱ lare̱ vbi ata vbi e̱ke̱n amie̱ho̱n.
\v 25 Eyian lo̱ o̱u khi amie̱ho̱n vare, mai ke chie evbi obo̱ si o̱o̱so lo̱re main shan.
\v 26 Ivbi Oise̱le̱bua nimain ke'u shan vbi amie̱ho̱n vbi egbe si Jesu Kristi

\v 27 O̱ia ikho̱ia vbi usee vba lo samen vbi eni si Kristi, uke ga obo̱ mie̱in Kristi.
\v 28 Aike mie̱n khi o̱na ikhi Jiu da Griki, aike mi o̱vie̱n da o̱lo̱foni, o̱mohe da o̱kposo, erimidi o̱kpa vba keu vbi Jesu Kristi.
\v 29 Ukha chie̱n isi Kristi, u chie̱n uanmi si Ebraham, u chie̱n o̱lo̱lo̱ u'uku elabi a'ihio̱ o̱vbi oto̱i.

\c 4
\p
\v 1 Emiata ikhi o̱lo̱lo̱ u'uku kha kie̱n o̱vbekha, o̱imo̱i iyo̱dan re̱yi o̱vie̱n, o̱khare̱ kie̱n khi yio̱n lo̱ mo̱in emikhemi.
\v 2 Sokpe̱n ea niain lo̱ya re̱o kpayo̱i khui elemi se̱vbo̱ e̱ghe̱ li erai re̱o̱i kho̱ke se̱ lo̱lo̱ re̱ mo̱i elemi.

\v 3 Iyo̱ limai ri, e̱ghe̱ si o̱vbekhan mai, mai kie̱n ela mamani re̱yi awe'e si olagbo̱na.
\v 4 Sokpe̱n bi e̱nghe kere̱se̱, Oise̱le̱bua yi ovbio̱i, lo̱'o̱u khi o̱kposo vbiai, la vbia o̱vbi ue̱n si uhi.
\v 5 O̱vbo̱na lo̱re̱ mie̱n ele rivbi obo̱ si uhi fan, limai lo̱re̱ meti kie̱n elare̱ kio̱mo̱n.

\v 6 Erimidi ivbia vbaiu, Oise̱nle̱bua yi eti si ovbio̱i ovbi e̱ke̱n udu samai, eti lo̱ khue eci "Baba, li Era."
\v 7 Vbo̱hio̱ so̱na u kecie kie̱n o̱vie̱n sokpe̱n o̱mo̱ lavbiai. Ukha kie̱n o̱mo̱, e̱the̱ai ukie̱n o̱lo̱mo̱n uku s̱ian vbi obo̱ si Oise̱le̱bua.

\v 8 E̱ghe̱an, livbaire̱̱ ei̱n Oise̱le̱bua, livba re̱ cie̱n ovie̱n yi elo̱'o̱u khi ere̱re̱ kie̱in ireo̱ gbeigbei.
\v 9 Eyian lo̱keu khue̱in Oise̱le̱bua, da'a, li Oise̱le̱bua kere̱ e̱nvba, e̱mo̱ze̱i livba lo̱kecie re̱ delegbe o̱vbi awe'e si o̱lagbo̱na lo̱i dewuin emio̱so? Vba ke cie ho'o li vbai cie kie̱n o̱vie̱n?

\v 10 Erivba e̱n re̱ vbi ae'ere si ikpe̱de̱, uki lo̱gbo̱n, e̱ghe̱ o̱do̱ndan, bi ikpe.
\v 11 Ofe̱n o̱wun me̱n lavba. Ofe̱n si o̱ubi khi ifilo lavba vbi oto̱'o̱san.

\v 12 Idoabo̱ lavba, imio̱nme̱n, livba re̱ubi'me̱n, erimidi eri me̱me̱n gbou bivba. Vbai ume̱n o̱be.
\v 13 Vbae̱n khi o̱hio̱ si aidan lire̱ wewe vbie̱vba vbi ikpao.
\v 14 Ore̱u khi aidan se̱me̱ kie̱in idamighe yivba, vbai ri e̱o gbeme̱run da'a livba sin me̱n. Sokpe̱n vba ga'obo̱ mie̱n'me̱n elabi e̱hi si Oise̱le̱bua, bemo̱n khi Jesu Kristi legbeso̱i li ke'u.

\v 15 Ebi egho̱gho̱n savba keri siyo̱'o̱? Erilo̱ me̱ti tai kho̱, vba'a khalo̱ me̱ti, erivbakha vbo̱'o̱i ikpeo vba wun'ne̱me̱n.
\v 16 O̱hio̱ so̱na, erike kie̱in o̱be vba erimidi khi t'ata lavbaho̱n?

\v 17 Erian so̱go̱lo̱ ho'o vba, sokpe̱n o̱ivbi re̱yi o̱le̱se̱n. Yian ho'o liain van vba vhi obo̱ me̱n livbai ya re̱khaiain.
\v 18 O̱eo̱vbo̱ livba ya riakha'a vbo̱hio̱ si emile̱se̱n, o̱ivbi e̱ghe̱ li rivbi use'evba ukpo̱kpa.

\v 19 Ivbekhan me̱n li gue̱'e̱, ya ciegbo oya si utomi si evbia vbo̱hio̱ vba re̱kpe̱se̱'vbo̱ khi Kristi di udu vba're.
\v 20 Yia ho'o li di use'e vba re li re̱ deli uro'o me̱n, erimidi e̱mo̱n vba o̱'yiame̱ unuan.

\v 21 Tane̱me̱ho̱n, vbavba li vba ho'o li vba e vbi e̱mo̱n uhi, vbai hin emin li uhi tai?
\v 22 Avin'o̱in khi Ebrahamu mo̱in ivbia eva, o̱kpa vbi o̱li oghumi vbiai li o̱no̱in re̱vbi o̱li o̱kposo laro'oi vbiai.
\v 23 O̱re̱riyo̱, o̱li oghumi vbiai likhi o̱lavbiai s̱ian vbi ukpo̱hio̱ si egbe, sokpe̱n o̱li o̱kposo laro'oi vbiai likhi o̱mo̱n la hi.

\v 24 Alo̱ meti mi aze̱o si elemina vbi itan, erimidi eli ikposo leva na eubi atamasi eva. O̱kpa zavbi O̱ko̱ si Sinai vare. O̱vbiai ivbia lekie̱n ighumi. O̱na vbi Hagai.
\v 25 Hagai likhi O̱ḵo̱ si Sinai vbi Arebia. O̱kie̱in are̱zoma si Jerusale̱m li o̱le̱ghe̱na, erimidi khi o̱rivbi oghumi bi ivbekhan so̱i.

\v 26 Sokpe̱n Jerusale̱m lo̱rivbi idale, lo̱kie̱n iyio̱mai.
\v 27 Erimidi era vin'o̱i kho̱, "Yia gho̱gho̱n, we̱we̱ li agan, we̱we̱ lu'u vbia. Fiurun si egho̱gho̱n, we̱we̱ lue̱in e̱mo̱in o̱mo̱n uvbiami. Erimidi agan ke vbi ivbia lebun, lei ivbi o̱kposo lo̱imo̱in o̱do̱ n.

\v 28 E̱yian vbavba li imio̱n me̱n, ze̱n elabi Aizik, ivbia li ahi'i livbau.
\v 29 Vbi e̱ghe̱ain, o̱mo̱n lavbia s̱ian vbi e̱mo̱in egbe lo̱khui o̱la vbiai s̱ian vbi eti s̱ian. Iyo̱ gbo'o̱ ebai tai na.

\v 30 Emi eta livin tai? "Khui o̱l'o̱kposo li oghumi an bi ovbio̱i fia. Erimidi ovbi o̱kposo li o̱vie̱n ain kha u'uku debai ovbi o̱kposo laro'o."
\v 31 O̱hio̱ si o̱na, imio̱n'me̱n, mai vbi ivbi o̱kposo lo̱kie̱in oghumi, sokpe̱n ivbi o̱kposo la ro'oi.

\c 5
\p
\v 1 O̱hio̱ si anifan li Kristi re̱ de̱mai ciere. O̱hio̱ so̱na muzan le̱se̱n, ecie siegbe o̱vbi ifi si o̱miamen si ighain.
\v 2 Me̱me̱n li Po̱lu li e̱vba khi vbakha kie̱n o̱la rue̱'e̱i umo̱in e'e li Kristi lo̱ zavbo̱ re̱na'a.

\v 3 Igbocie to̱na ni o̱ikho̱ia lo̱u kha rue̱'e̱i ho̱n, lo̱iya re̱o̱vbi uhu ereme̱n.
\v 4 Eru van egbe'se̱ s̱io̱vbi egbe si Kristi re e̱ghe̱ li vba diudu ain uhi. Uke de s̱io̱vbi e̱seo̱he̱n re vbo̱le̱ghe̱.

\v 5 S̱ian vbi obo̱ si eti-lo̱fuan, vbe̱ke̱in amie̱nho̱n, nimaza muzan khe̱'e̱ aruduo̱ si ue̱n'le̱se̱n.
\v 6 Vbi Jesu Kristi, orue̱'e̱ bi o̱lo̱ivbi orue̱'e̱ o̱'imo̱n o̱lo̱dewun. Amie̱nho̱n vbe̱ke̱in ihume̱ke̱n u'kpo̱kpa lo̱kie̱n emi.
\v 7 Eri vba ya e̱n le̱se̱n. Emo̱ke khuvba vbi ata are̱khae̱n?
\v 8 Laire̱ vbi emi'liyo̱ i'zavbi obo̱ si o̱lo̱'ecie'e̱ vare.

\v 9 Emi kha rana're o̱mo̱in iyo̱dan.
\v 10 Eri'mo̱in adiudu an o̱we'egbe vbi O̱lo̱mo̱e̱nmai khi ukha degbe mo̱in ao'o o̱dan. O̱ia lo̱ vbie̱'e̱ rurua o̱lo̱ mi ikhueo so̱i, o̱lo̱ghere̱ghe kian ereme̱n.

\v 11 Imio̱nme̱n, ikha kpe̱ wewi e̱mōin orue̱'e̱, emo̱ze̱i lakpe̱re̱ mo̱in ikho̱e̱ke̱in se̱me̱n? O̱khariyo̱ o̱gbe̱'e̱n lo̱vbi ukpo̱ran lo̱de o̱gbo̱ngban o̱ke kie̱n ema khueo.
\v 12 Iho'o lai mie̱n khi ea lian vbie̱ vba rurua, elo a'ai egbe'siain.

\v 13 Oise̱le̱bua ecievba o̱vbi amie̱nfan. Sokpe̱n vbaewei amie̱nfan savba o̱vbi ukpode si egbe. Vba ya ro̱i gi o̱zeva vba.
\v 14 Erimidi uhi ereme̱n kui uhumi ghe vbi o̱kpa lo̱kie̱n, "Hume̱ke̱in o̱lo̱zevase̱ elabi egbese̱'e̱."
\v 15 Sokpe̱n vba kha gbe'egbe li vba ya khuakhi egbe'e, vba rie'e o̱vbo̱ khi vbai khue egbevba'o.

\v 16 Ire̱'o̱vba, vba ya ri e̱mo̱n Eti s̱ian, livba kha yare̱ ri e̱mo̱in egbe u.
\v 17 Erimidi khi egbe mo̱in aho'o lo̱ totoi re̱khain Eti, iyo̱i eti gboi mo̱in aho'o lo̱ totoi re̱khain egbe. O̱hio̱ o̱be si egbe lian eveva u. Emo̱zavbo̱ dianre likhi uya vbi emi luaho̱'o̱i khulo̱p'u.
\v 18 Sokpe̱n Eti kha re̱'e̱s̱ian, uhi ike mo̱in utotomo ōwe̱'vbegbe.

\v 19 Era zawui obia li ari egbe bia. Yiain ikhi oghe̱'e̱, ue̱n lo̱ se̱ne̱n, are̱o'o̱vbi o̱kposo da'a o̱mo̱he,
\v 20 ireo̱ ugami, eti lo̱be bi ikhumi uwe'emi, ari e̱olo̱be gho'o̱ia, uro'o, o̱ine̱n uwumi, o̱kan umie̱nmi, oghaye̱,
\v 21 imo̱eo, ade̱yio̱n gbegbe, bi ue̱n evbe elabi enan. I'hiuke̱ke̱ lavba, elabi'i hiuke̱ke̱ lavba vb'ikpao, khi elo̱vbi elemina ekha u'uku si e̱ghe̱'o̱ba si Oise̱le̱bua.

\v 22 Sokpe̱n ikpo̱mo̱n li Eti o̱mo̱n likhi ihume̱ke̱n, egho̱gho̱n, o̱fure, ozie̱n, itue̱ke̱n, o̱hume̱me̱n, amie̱nho̱n,
\v 23 ifue̱n'egbere, bi ako̱in emi'u. Aimi uhi lowuin eli emi'na.
\v 24 Ea lian kie̱in isi Jesu Kristi eike mo̱in aho'o si egbe da'a is'o̱lo̱be.

\v 25 Main kha rivbi e̱ke̱n Eti, vbazuan ya we'e vbe̱ke̱n Eti.
\v 26 Vbaezuan ya mōi ikho̱e̱n'egbe, da'a abiegbe ohan, da'a amo̱n'e̱o si egbe.

\c 6
\p
\v 1 Imio̱nme̱n, akha mio̱ia lamie̱in vbi ue̱in lo̱be, elo̱ vbi ea si Eti vbi use'evba icie zuan'mie̱n khi vba fain o̱l'o̱ia vbe̱ke̱n idegbere. Vba ri eoi egbevba vbegbe, li vbaeo mi idamighe.
\v 2 Vba ya kpayegbe obo̱, livba lo̱re̱ ri uhi si Kristi sian.

\v 3 Akha mi o̱lo̱ecie egbeso̱i emi lo̱i kian, o̱te̱'e̱ egbe so̱i'e.
\v 4 O̱deo̱de i'fe̱i obia si obo̱ so̱i gho. E̱ghe̱an lo̱lo̱re̱ mi emi vbi egbe so̱i lo̱lo̱ re̱ sobo̱ vbudu, bi kho̱i regbo̱i ma'an o̱'o̱vbe'e.
\v 5 Erimidi khi o̱deo̱de lo̱lo̱ huai ihua so̱i.

\v 6 O̱ia la'a vbie̱o̱i eta lavin o̱i re̱vbi emo̱mo̱e̱n ni o̱lo̱ vbie̱o̱i emi.
\v 7 Ezuan te̱'e̱e. Oise̱le̱bua ivbi o̱lari eta so̱i gbighe̱'e̱. Emi lo̱ia ko̱i, o̱lemi lo̱lo̱ lie.
\v 8 Erimidi o̱lo̱ ki ikpe̱ko̱mi si o̱kho̱'o̱, o̱lo̱ liei ikhue'eo, re̱keyi o̱lo̱ ko̱i re̱yi Eti, lo̱lo̱ liei agbo̱n lo̱i mo̱in ire̱so vbi e̱ke̱in Eti.

\v 9 Vb̄aizo̱i e̱'e̱main vbi o̱se̱n u'umi, erimidi e̱ghe̱ire̱se̱ mai lo̱ mi e'e so̱i e̱ghe̱limai i'robo̱ vbo̱re.
\v 10 Vbo̱hio̱ so̱na, makha mi ehe, lai vbi o̱le̱se̱n yi o̱iaikho̱ia. Vba zuan so̱go̱lo̱ vbi o̱lo̱se̱n yi ea lare̱ koko vbi ighogho vbe̱ke̱in amie̱nho̱n.

\v 11 Vbami emi gbogodo li ri obo̱me̱n vin yivba.
\v 12 Eso nian ho'o niain re̱vbi̱e khi erian e̱'e̱n'u nianre o̱vba livbai rue'e. Erian vbena vbo̱hio̱ laio̱ kpe̱ kho̱e̱ke̱n'ian vbo̱hio̱ si o̱gbe̱n si Kristi.
\v 13 O̱iu khi ian liain rue̱'e̱i khian re̱khain uhi. Sokpe̱n yian ho'o lu rue̱'e̱ niain ya ri e̱mo̱in egbese̱'e̱ ruo̱.

\v 14 Akhamie̱n khi iruo̱i lo̱i vbi vbo̱hio̱ si o̱gbe̱n si O̱lo̱mo̱e̱nmai li Jesu Kristi. S̱ian vbi e̱mo̱in li are̱ gbi o̱lagbo̱na ne̱me̱n lagbore̱ gbo gbi me̱me̱ li o̱lagbo̱na.
\v 15 O̱hio̱ khi orue̱'e̱ bi o̱lo̱i vbi orue̱'e̱ o̱icie̱n emio̱so. Aye lo̱gbo̱n lo̱ dewuin emi.
\v 16 Re̱yi ea liain lo̱ ri o̱li uhi na sian, o̱fure bi ihianba i'debaiain, bi ekhe̱n Izrel si Oise̱le̱bua.

\v 17 Re̱ zavbi e̱na ra'ale̱ o̱'o̱so ecie kpokpo me̱n, erimidi ae̱'e̱n si Jesu lo̱rime̱vbegbe lia wun sian.
\v 18 Li e̱seo̱he̱n si O̱lo̱mo̱e̱nmai li Jesu Kristi i'debaei eti se̱'e̱, imio̱nme̱n. Ise̱'e̱.