cnw_reg/52-COL.usfm

\id COL
\ide UTF-8
\rem The text in this file was extracted from C:/DCS/Chin, Ngawn/WORD/51. COLOSSIANS. docx.
\mt Kolosa
\h Kolosa
\mt Kolosa
\toc1 Kolosa
\toc2 Kolosa
\toc3 col
\s Awnkam tuah otpih nak
\c 1
\p
\v 1 Pathian deihnak tuah Khrih nungzui tu kei mah Paul le ka nau Timote cu;
\v 2 Kolosa khua sungah a um mi thiangtho tih mi Khrih sungah muantaak U le nau tei lakah lai ngan ing. Ohtei Pa Pathian nelpen a hehpih nak le daihnak cu nohtei lakah um ta hen. Lungdam thu hilhnak
\v 3 Kohten nohtei ca a cat ngawl thu ngen in, ohtei Topa Zisuh Khrih Pa tih mi Pathian cu lungdam thu hilh ung.
\v 4 A thu cu Zisuh hum ah a um tu nohtei upnak le mi thiangtho tei hum ah nohtei koih mi itnak thu cu kohtei zak hang hi.
\v 5 Mahmi upnak le itnak cu nohtei ca vanhum ah a koih sa mi muansan nak in a heng mi a hih hang, mahmi muansan nak thu cu nohtei lakah heng in, a sunglawi thuthangpha a dik mi thu cu nohten za zo uh ci.
\v 6 Mahmi thuthangpha cu leihum hempoh ah a ngah a ngah mi bang khang in, mahmi cu nohten za in Pathian hehpih nak man zet in na theih mi ni pen pan, nohtei sungah hei a ngah cu ngah in khang hi.
\v 7 Nohten mahmi thuthangpha cu kohtei ihmi na dehpih Epaphras nelpen za ung. A mah cu nohtei ca Khrih sungah muantaak na dek tu a hih hang;
\v 8 Nohtei sungah a um mi hawvang thiangtho itnak cu Epaphras in kohtei lakah hilh zo hi.
\s Hawvang khang to tukin thu ngetnak
\p
\v 9 Mah hang, kohtei zak ni pen pan nohtei ca a cat ngawl thu ngen in, nohten hawvang tuah a seng mi cihthiam nak hempoh tuah a dim hang;
\v 10 Phatnak hempoh tih mi a ngah cu ngah in Pathian theih mi cihnak sungah khan toh nak hang, na hempoh ah Topa Pathian cu lungdam tik in, Topai co taak mi kal suan tukin thu ngen ung hi.
\v 11 Mah bek sial ngawl nohten Topai minthan nak a dim mi huham bang in huham hempoh tuah a dim cu co in supnak le thinsau nak a dim na neih uh hang;
\v 12 Vaknak sungah a um mi thiangtho tei lo co nak sungah tel tuk a cotaak in a cang tik tu Pai nelah lungdam thuson tuk thu ngen ung hi.
\v 13 Pa in ohte khuathim thu neihnak pen pan in a ihmi a capa uknak ngam sungah huai hi.
\v 14 Ohten a capa thisan a tatnak hang, sual ngaihdam a hehpih nak co hung hi.
\s A mu ngil cu khrih hi
\v 15 Capa cu muh ngawl mi Pathian mel hi. A semsuah mi hempoh sung pen ca Upa bel hi.
\v 16 Itahum titale vanhum ah hei hihen, leihum ah hei hihen, muh theih mi le muh theih ngawl mi hei hihen, kumpi tohkham khunnak hihen, uktu hei hihen, huham hei hihen, thu neihnak hei hihen, capa hang semsuah mi hi. Na hempoh capa hang in hihen, capa hang in semsuah mi hi.
\v 17 Capa cu na hempoh a um laih ngawl in na hempoh capa sungah huham tuah um zo.
\v 18 Kohhran tih mi cu pumpi hi lu a hih hang, na hempoh sungah a sunglawi cuang tuk in a patnak a hih hang, a thi mitei sung pen a hing masa bel mipa hi.
\v 19 Itahum titale, Pathian in na hempoh cangkim nak cu capa sungah um tuk in hihen;
\v 20 Thinglamteh hum pen a luang mi capa i thisan hang daihnak cang tik in, vanhum ah a um mi hei hihen, leihum ah a um mi hei hihen, na hempoh capa hang in a mah tuah pawlkom tuk in hihen a deihnak um hi.
\v 21 Nohten a pha ngawl mi sual na bawl uh hang, Pathian tuah khen in a thinlung sung pen ngal hi uh ci.
\v 22 A tuin thi le sa tuah a seng mi pumpi taksa sungah capa thihnak hang, Pathian in nohte cu a mah tuah lem leh tik zo. Mahmi cu a thiangtho sual um ngawl, mawhsiat tuk a um ngawl mi nohte cu a mai ah peh tuah thei tuk in hi.
\v 23 Mah naven nohten nang muhtei zaak mi a sunglawi thuthangpha muansan nak pen, nung kik ngawl khozet upnak sungah um un. Mah a sunglawi mi thuthangpha cu van hang nuai ah a um a semsuah mi hempoh in a phuannak hang, keimah Paul cu mahmi na dek tu ing hi.
\s Paul na dehnak
\p
\v 24 Keimah Paul in nohtei ca thuak mi haksat nak sung pen a tun lungdam in Khrih haksat cimnak ah a kul mi cu Topa pumpi taksa tih mi kohhran ca in ka pumpi taksa sungah kim tik hi.
\v 25 Pathian thuthangpha a veng hawng phuang tuk nohtei ca ka piak mi Pathian phalnak bang, kei cu mahmi kohhran na dek in um ing.
\v 26 Mahmi Pathian awnkam thu cu ni dang laih pen pan huncan hempoh ah sel in um naven a tuin a mi thiangtho tei lakah hilh in a sel mi thu thup hi.
\v 27 Mah a sel mi a thu thup cu miphun dang tei lakah a minthan nak izahtak a tam mi cu mi thiangtho tei lakah thei tik tuk in, Pathian deihnak um hi. Hi thu thup a sel mi minthan nak tuah a seng mi muansan nak cu nohtei sungah a um mi Khrih hi.
\v 28 Ohten mi hempoh Khrih sungah a cangkim ngilcang mi peh tuah tuk in, mi hempoh ngallin nak thu hilh in cih le thiamnak hempoh tuah mi hempoh hilh in Topai thu cu phuang haw hi.
\v 29 Keimah vang huham tuah ka sung pen na dehnak a nei tu Topai na dehnak bang, mahmi na cu zuam ing hi.
\c 2
\p
\v 1 Kei cu nang muhte tuah Loadicea khua sungah a um mi a muhte pen pan, keimah a mu awng ngawl tu a muhtei ca izahtak teima zuam hum tih cu nohtei lakah thei tik nuam ing.
\v 2 Hi thu cu nohten thinnop nak co in itnak sungah kom in, theihnak tuah a seng mi muankhom nak a dim hang, Pathian sel mi thu thup tih mi Khrih cu theih tuk mi thu hi.
\v 3 Mahmi Khrih sungah theihnak le cihthiam nak hempoh sel in um hi.
\v 4 A kua mah in nang muhte zol tuk ngawlin hitihbang hilh ing.
\v 5 Itahum titale kei cu pumpi taksa in nohte tuah khen ta vang, thinlung hawvang hei nangmuh tuah langkhat um ngel in, nohtei a lemcang mi thukhen nak in hihen, Khrih sungah nohtei upnak a kho mi ka muhten lungdam ing.
\s Khrih sungah kal suan nunnak
\p
\v 6 Mah hang nohten Topa Zisuh na co zo uh bang in, Topai sungah kal suan in nung un.
\v 7 Topai sungah a zung bun khang to in, nohtei cun sa zo mi bang upnak sungah kho in lungdam thu hilhnak tuah dim ta un.
\p
\v 8 Khrih thu sungah um ngawlin, leihum dan thu le mihing tei dan bawl mi sungah ngaihsut cihnak le a thupi um ngawl mizol nak hang, a kua mah in nohte siat suah tuk ngawlin ngalling ta un.
\v 9 Itahum titale, Pathian a hihnak tuah a dim mi Khrih sungah a pumpi ciangzet lang in um hi.
\v 10 Nohtei uknak le thuneih nak hempoh tei lu a himi Topai hang cangkim nak ah heng zo uh ci.
\v 11 Khrih vun lek a talhnak hang thi le sa hihnak tuah a seng mi pumpi cu vawk in, mihing khut tuah bawl ngawl mi vun lek talhnak cu Topai sung pen co uh ci.
\v 12 Nohten baptisma hang Topa tuah phumnak co in, Khrih cu a thi mitei sung pen a tho leh tik tu Pathian huham upnak hang, Topa tuah thawh leh nak co zo uh ci.
\v 13 Sual bawlnak sungah hei hihen, pumpi taksa vun lek talh ngawl hang in hihen, a thi mi nohte cu Pathian in Khrih tuah a nun tik zo hang, ohtei sualnak hempoh ngaidam zo hi.
\v 14 Ohte do in sual a zei thei dan thukham sungah a tel mi thukam siatsuah in, thinglamteh hum ah khencih in vawk sak khawng zo.
\v 15 Uknak dan le thu neihnak te vang laksak in thinglamteh hang, mahmi hempoh nehnak co in mipi mai ah langzet mualpho tik zo hi.
\p
\v 16 Mah hang eih le in tuah peh pai in hihen, puai ni, ha thak puai, colhni tuah peh pai in hihen a kua mah in thukhen ma hen.
\v 17 Mah mite cu a heng tuk laih mi a lim bek hi. A pumpi cu Khrih pumpi hi.
\v 18 A mah le mah niamkhiat nak, vancung mite biaknak sungah lungdam nak a nei tu pakhat no hei in nohtei laksawng long ngawl in, a mun muh theih mite sawk kawkawi zo in a muhtei thi le sa tuah peh pai mi thinlung hang a thupi ngawl pual thau ngalnak cu;
\v 19 A lu tuah pehzom nak um haw ma hi. A lu pen pumpi taksa hempoh cu thangui nguhmang te tuah, bawm un in a khopkhawm hang, Pathian khan toh tik mi bang in khang haw hi.
\p
\v 20 Nohten Khrih tuah thi in, leihum dan thu pen na khen ngai uh a hitale ita leihum mitei nun bang in;
\v 21 Tawngkha pah sin, tep pah sin, len pah sin tih mi dan thu zui thei uh cim?
\v 22 Hi na hempoh cu mihing tei dan thukham hilh mite a hih bang in mang li thah in sia tuk hi.
\v 23 Mah tih bang mi dan thukham te cu mai pumpi taksa cawmnak tuah peh pai ma hi. A theih cawm nak tuah biaknak, niamkhiat nak, mah le mah bawlsiat nak tuah peh pai in micip a tiam hem mite haw hi.
\s Mithak nun
\c 3
\p
\v 1 Mah a hih hang nohten Khrih tuah tho leh ngai tale Pathian taklam khut ah a khung tu Khrih umnak, hum lam ah a um mite zei tuk uh ci.
\v 2 Leihum ah a um mite ngaisung ngawl in, hum lam ah a um mite ngaisung un.
\v 3 Itahum titale, nohte cu a thi mi a hih hang nohtei nunnak cu Khrih tuah Pathian sungah sel in um hi.
\v 4 Nohtei nunnak cu Khrih a lang ten nohte vang minthan nak sungah lang tuk uh ci.
\p
\v 5 Mah hang dan tuah a dik ngawl mi nu le pa sualnak, a nawngkai mi nunnak, a pha ngawl mi duhham nak, milim bia in sualnak tih mi leihum ah a um nohtei pumpi taksa sungah a um mite thi tik ta un.
\v 6 Mahmi sualnak te hang, Pathian thinuuk nak cu a thu ngai ngawl tutei hum ah heng hi.
\v 7 Nohten mah tihbang sualnak sungah na nun laih uh in, mahmi thu sungah nungin khuasa mite hi uh ci.
\v 8 A tu cun, nohten hi thinuuk nak hempoh sung pen in hihen, thinuuk nak, thinsia, iksik nak, mi nautat awnkam, a thiangtho ngawl mi awnkam man nak te hei hihen, nohtei kam pen vawk ta un.
\v 9 Pakhat le pakhat zol thu awnkam mang pah sun. Itahum titale nohten mihing lun nunnak le mihing lun pumpi cu vawk in;
\v 10 Semsuah tupa bang a man mi theihnak tuah a thak in bawl mi mihing thak cu silh zo uh ci.
\v 11 Mah tihcun semsuah mi bawlnak sungah Grik le Judah miphun, vun lek talh le talh ngawl, micip le misil, sila le mi luat tih um ma hi. Khrih sungah na hempoh a um hang, na hempoh sungah um hi.
\s Khristian nun
\p
\v 12 Mah hang nohten Pathian a ten mite, mi thiangtho te le a ih mite a hih hang ningnat nak tuah a dim mi lainat nak, hehpih nak, niamkhiat nak, lungduai nak, thinsau nak le supnak te cu silh un.
\v 13 Pakhat le pakhat mawhsiat nak a um tale pakhat le pakhat sup in a sual cu ngaidam un. Khrih in nohtei sual a ngaihdam bang bok in pakhat le pakhat ngaidam un.
\v 14 Hi thu hempoh hum ah cangkim nak khau tuah khih mi itnak cu silh un.
\v 15 Nohtei thinlung sungah Khrih daihnak in uk tik un. Itahum titale hi daihnak hang pumpi taksa hempoh sungah a samnak co mi hi uh ci. A hehpih nak thinlung nei un.
\v 16 Khrih thu cu nohtei sungah tampi um tik in, pakhat le pakhat cihnak phunkim tuah hilh in ngallin nak a piak mi cu lungdam nak le Saam la te, a thiangtho mi la le hawvang tuah a seng mi la te nohtei thinlung tuah Pathian nelah sa un.
\v 17 Nohtei bawl mi hempoh awnkam hei hihen, na dehnak sungah hei hihen, na hempoh Topa Zisuh min sungah bawl in Topai hang, Pa Pathian cu lungdam thu hiilh un.
\s Khrih sungah a um mi innkua
\p
\v 18 Zi te aw, Topa Pathian deihnak bang pasal uknak thu ngai un.
\v 19 Pasal te aw, na zi te it un. Hang zet in otpih pah sun.
\v 20 Canu, capa te aw, na hempoh ah nu le pai thu ngai un. Itahum titale hi thu cu Pathian deih mi thu hi.
\v 21 Pa te aw, nohtei canu, capa te thinkiam tik tuk ngawl in le thin na tuk ngawlin bawl un.
\v 22 Na dek tu sila te aw, nohtei leihum To te cu na hempoh ah a thu ngai un. Mitmai pha co nuam nak, na dehnak a nei tu in a mai bek pen deh le bawl nak bang hi ngawl in, Pathian lau in a thiangtho mi thinlung tuah a thu ngai un.
\v 23 Nohtei bawl mi na hempoh mihing tei ca bawl mi bang bawl ngawl in, Pathian ca bawl mi bang zuamnak thinlung tuah dek un.
\v 24 Nohten Topa Khrih na dehnak a hih hang, Topa Pathian nelpen lo sunglawi laksawng co tuk mi thu cu nohten ngaisung ta un.
\v 25 Phat ngawlnak a bawl tute cu phat ngawlnak a bawl thaman co tuk hi. A kua mah mitmai zo tuk ma hi.
\c 4
\p
\v 1 To te aw, nohtei Topa cu vanhum ah um hi tih cu thei in dikcang nak thu, sila na dek tutei hum ah man zet bawl un.
\s Thu dang a cah mi
\p
\v 2 A cat ngawl in thungen le leng un. Lungdam nak thu hilh in ngak un.
\v 3 Kei cu Khrih hi a sel mi thu thup hang, kol bulhnak thuak ing.
\v 4 A sel mi thu thup phuang tukin, Pathian in thuphuan nak kongka cu kohtei lakah honsak tuk in hihen, mah a sel mi thuthup a phuan bang ka hilh tuk mi thu hei in hihen, kohtei ca thu nget sak un.
\v 5 A pawlam mihing tei mitmai zo in, cihnak tuah nung in hun le can teng un.
\v 6 Mihing pakhat tek humah itihbang in don leh tuk hum tih mi cu nohten thei tukin, nohtei awnkam cu ci bang alnak tuah a dim in a cat ngawl mawi ta hen.
\s Dawl ta bel otpih nak awnkam
\p
\v 7 Topa Pathian sungah muantaak na dek nak a nei tu Tychicus in, kei ma thu hempoh nohtei lakah hilh tuk hi.
\v 8 Tychicus nohtei lakah ka hah nak cu kohtei thu nohten thei tuk in, a man nohtei thinlung nop tik thei tuk in hi.
\v 9 Nohtei sung pen mihing pakhat muantaak ih huai mi Onesimus vang a mah tuah um hi. A mun hi khuapi pen a cang mi thu hempoh nohtei lakah hilh haw tuk hi.
\p
\v 10 Keimah tuah thongta mipa Aritarchus le Barnabus nau Marcus te nohten otpih un. Marcus cu nohtei lakah a heng tale a mah cu sang un hitin tih mi a mah tuah pehpai mi thu cahnak te nohten nei zo uh ci.
\v 11 Jetus tin sam mi Zisuh in nohte cu otpih tuk hi. Vun lek talh ngawl mitei sung pen a muhte bek Pathian uknak ngam ca kei mah tuah na dek tute hi. Ka thinlung nop tik tute hi.
\v 12 Khrih Zisuh na dek tu a hih hang, nohtei sung pen pakhat a himi Epaphras in nohte cu otpih hi. Nohten ngilcang a cangkim nun nei in, Pathian deihnak hempoh na dehnak nei thei tuk in a man nohtei ca a cat ngawl zuamnak tuah thu ngen hi.
\v 13 A thu ngai in a mah cu nang muhte pen pan Loadicea khua le Heirapolis khua ah a um tei ca nasezet zuamnak thu kei man thei ing.
\v 14 Ka ihzet mi si thiam Luka le Demas in nohte cu otpih hi.
\v 15 Loadicea khua sungah a um mi U le nau hempoh te hei hihen, Nymphas pen pan a inn ah a um mi kohhran hei hihen, otpih in.
\v 16 Hi lai na sial cengten Loadicea khua ah a um mi kohhran te sial tik un. Mah bang bok Loadicea kohhran pen a ngah mi lai cu nohten sial un.
\v 17 Achippus cu, “Pathian sung pen a co mi na deknak cu thupi zet a celhtian dek hen hi,” tin hilhsak un.
\p
\v 18 Hi otpih nak awnkam cu kei mah Paul loli in ka khut tuah ngan ing. Ka thuak mi kolbulh nak cu phawk ta un. A hehpih nak cu nang muhte tuah um ta hen.