\id TIT
\ide UTF-8
\h Tito
\toc1 Tito
\toc2 Tito
\toc3 tit
\mt Tito
\c 1
\cl ESUKI 1
\p
\v 1 Polo, motuke mo Mwengei, mpe toma e Yesu kilisito la obileyi ogemei e wango Mwengei awaoni, pe la oyewi wo meemene enge eokani la ekaleli enanganake la Mwengei,
\v 2 la elikia liesi e mokalo, mo libela enge Mwengei, ongo okokiti obuki moleho, awunate tee la gala.
\v 3 Pe la engele ende aenasali liloba lande ohola la otomo etiesakolake enge wahekeli mbai, la otomami e Mokalesi mosu, Mwengei;
\v 4 Atie Tito monga mo mbai e ogemei enge edjei iso kpaa la eho: Magba masungu la logoo e Mwengei wawa pe la Kilisito Yesu mokalesi mosu edje la owe.
\v 5 Iyodheli la mokii mo Kelete, laate, owongele sambo djinge itisombaka olamu pe obate wiloko la gbate esi la esi, obileyi malako ma mbai.
\v 6 Inga wadja pele wango wati la pamela, molome o moli moikima ongo odjei la wana walamu, wango watipundane la ekaleli e osoto pe wati mito mitetelake.
\v 7 Laate mobanei akoki odjei moto ongo otipundane, laate adjei kapita e Mwengei, ati matioke, atimemelaka saa ndjongo, atidje mokengi o mona, atiswaka la wato, atitobaka wato, atidje moto o litema ongo okolukaka ototi wasumbelia la ndenge mbe.
\v 8 Kasi adje moto ongo okoyambaka wadjidji, moto ongo okobalaka sambo ndamu, moto o mamungwene malamu, moto molamu, moto o meemene, mosatu, moto ongo okoatekisaka.
\v 9 Ongo ohelani la sambo ndamu djinge itiesakolami, laate ayewe oaseli weeti matiesakoli masatu alidji ayewe opameli wango wakomalelaka.
\p
\v 10 Laate edjei la wamatioke, wato wango wakoasaakolaka saa ndjongo, wato wango wakobitesaka mamungwene, la oeteli wango wanangani la oteni kombeni.
\v 11 Okoki owahelesi monoko, lawato waho wakolingesaka ewedje la maliye ango ekotiesakolaka iwo sambo djinge ekokiti iwo otiesakoli, laate watote asumbelia ndenge ebe.
\v 12 Mwesi ndondo ewu motiesakoli mowu amene, aasali ate: Wato wa Geleta wakodjaka masio kpaa wato wa moleho, mbau mbe e motulu, wato wa litema wango watibalaka otomu.
\v 13 Li litatoli edjei meemene. Eho enge, wapamelaka la otetelake, laate wadje la otetelake e ogemei,
\v 14 Laate watiahelanese la sambo pambapamba e Wayuda mpe la pui e wato wango wakohaka meemene mokongo.
\v 15 Wiho kpaa elangi atie wato wango walangi. Kasi atie wato wa osoto la wango wadjangi ogemei ema teeti edjangi olangi, tee mamungwene mawu la oyewi wau wowumiga gbomoko.
\v 16 Wakoasaka la ohola ate wamoyewi Mwengei, kasi wakomowunganaka Mwengei la tomo djawu, laate wadjei wato wa onalili pe wati la otosi pe watiwonge la tomo teeti elamu.
\c 2
\cl ESUKI 2
\p
\v 1 Kaikonde, owe asaka saa sambo djinge ewongi la matiesakoli enge ekohekeleke olamu.
\v 2 Asa ate mbange dja pele watilekese likamiti la ekaleli ewu, watitote sambo la lisimbo, wadje la mamungo malamu, otetelake e ogemei, la libalano, la ekaleli e egalela.
\v 3 Ase mbange dja wali pe wadje la esombeli enge eengi la watuke wa Mwengei, watibukele wato mileho, watidje watuke wa maana, watiesakoli dja sambo ndamu;
\v 4 ase waklotiesakola seka wabale pele djau la wana wau,
\v 5 wadje la mamungwene malamu, walange, wakeli tomu dja monguta, wato walamu, wango wakoyatitimisaka liwoso la pele djawu, laate liloba e Mwenge etitangeme wailiko.
\v 6 Djaka oaseli wana wa pele wadje la mamungwene malamu.
\v 7 La sambo kpaa odje owe amene ndakisa e sambo ndamu, otiesakolake djinge idjei meemene, etidje la mbeti,
\v 8 maloba ma owe malange enge ekokiti okwi, laate moto ongo odjei eeti ngambo atume la soni, ango edjangi inde ema ebe etwaseli iso.
\v 9 Asela watuke watemei makumu mawu la sambo kpoaa, pe wawayemeleseke olamu, watiwawongoselake maloba mbe,
\v 10 watiyiwe, kasi wadje meemene la ndenge enge eengi, laate watemeye la ohola matiesakoli ma Mwengei Likumu lasu.
\p
\v 11 Ango logoo e sungu e Mwengei, enge ekokalesaka wato wa ndenge kpaa eenani ohola.
\v 12 Etoyinyei totone ekaleli edhendeyake Mwengei alidji la posa dja moki pe toyabate la mamungwene malamu pe la omeemene pe la ekaleli enanganake l; a Mwengei masio kpaa,
\v 13 ango ekolambelaka iso oemeli elamu pe oeneni e Mwengei mosungu la ongali pe la mokalesi osu, Kilisito Yesu.
\v 14 Ongo ayahali la kole esu laate atokalese la sambo kpaa e obuki pui pe akpololi wato wango wango wadjei wato wande amene, wango wadjei la egalelela la tomo ndamu.
\p
\v 15 Djaaka ndji oasi djinge sambo la otomi pe la opami e okumu kpaa. Te moto tueti atiodhende.
\c 3
\cl ESUKI 3
\p
\v 1 Wamungolela ate wayadjimbese pe watemeye wadjodji la makumu, wayawongele la tomo kpaa ndamu,
\v 2 watiasele moto obe, watidje wato wabali kindo, watidje wato wasambo tetelake, wayatitimese atie wato kpaa.
\p
\v 3 Laate iso, todjakali liwoso wikete, wato waminga, wato wawungi, watuke wa posa ndenge la ndenge pe la mwemu. Tokalali la minga pe la mohela, todjakali otonani iso amene.
\v 4 Kaikonde, ango olamu e Mwengei mokalesi mosu la libalano lande atie wato eenanali,
\v 5 etidjake la tomo ndamu enge ekelaki iso, kasi motema magba ende atokalesi iso ndenge atokpoli pe atokpali la mokalo, pe atoumesi wato waholi la ligamesi e elimo satu.
\v 6 Atoswelali iso elimo eho ngbii la mboka e Yesu Kilisito mokalesi mosu,
\v 7 laate mbuse e oeneni wato walamu la logoo esungo ende, towumia watoti wa libula la ookani e olambeli mokalo mo libela.
\p
\v 8 Liloba laho lidjei meemene. Pe la sambo djaho, ibali ate oenesake eho engele kpaa la egalela ate edjei meemene, laate wato wango wamogemei Mwengei wabatake mamungo mawu la okeli tomo ndamu. Dhenda enge edjei olamu pe la kole atie wato.
\v 9 Ase tona ogulani wo boli, matoto, oswi, mihela ma sambo dja pui, laate sambo djaho etiakole pe edjei pamba.
\v 10 Inga moto apumbesa okawani moumisa lihele la owe, mbuse e omokebesi mbala e liwoso la enge ewale, mbuse motona,
\v 11 Yewa ate moto o ndenge eho aungi mboka, pe akokelaka lisumu, ayakwesi la loyi inde amene.
\p
\v 12 Engele ikootomela Aletemasi inga Tisiki owe tila, kela ndenge kpaa laate odje atie nbai la Nikopolisa, laate ongo nde ebundoi mbai oetesi engele e pioo.
\v 13 Mohekele Zenasi, ongo oyewi pui olamu, la Apolosa enge kpaa eengi la okendo wou, laate watidjange ema teeti.
\v 14 Wato wasu pe wayekole okeli tomo ndamu la oengemesi posa djau enge edjei la kole, laate watidjange owoti pukapuka.
\p
\v 15 Wato kpaa wango wadjei mongindji la mbai wa ohi mobale. Ha mbaa la wato wango wakotobalaka iso ngbii ndondo e ogemei. Logoo osungu edje la ino kpaa.