ach-ss-acholi_reg/67-REV.usfm

\id REV
\ide UTF-8
\h Niyabo
\toc1 Niyabo
\toc2 Niyabo
\toc3 rev
\mt Niyabo
\c 1
\cl Chura 1
\p
\v 1 Man aye gin ma Lubaŋa onyuto bot Yecu Kricito, wek omi en bene oniaŋ luticce i kom gin ma myero otimme oyotoyot i kare me anyim. En yam ocwalo lamalaika bot laticce Jon wek otitte oŋe.
\v 2 ka doŋ lacen i ŋeye Jon olokke odoko caden me lok ma Lubaŋa owaco, dok caden i kom lok me caden ma yam Yecu Kricito omiyo, kun bene otito pi gin ducu ma en oneno.
\v 3 Ŋat ma kwano lok ma gitito i buk man i nyim lwak tye ki gum, jo ma winyo bene tye ki gum, ki jo ma lubo gin ma gicoyo iye bene tye ki gum, pien kare doŋ cok.
\p
\v 4 Lok man Jon mucwalo bot lwak muye Kricito ma gitye i kabedo abiro mapatpat i Acia: Kica ki kuc obed botwu, ma oa ki bot Lubaŋa ma tye, ma yam obedo tye wa con, dok ma bibino, kun a ki bot cwiny abiro ma gitye i nyim komkerre,
\v 5 ki ma a bene ki bot Yecu Kricito, lacaden ma genne, latin kayo i kin jo muto, kabaka madit ma loyo luker ducu ma i wi lobo-ni. Deyo obed bot ŋat ma marowa, ma nene ogonyowa woko ki i twec me balwa ki remone,
\v 6 ka doŋ olokowa wadoko lwak ma en loyo, kun wadoko ajwagi pa Lubaŋane ma Wonne bene. Deyo ki twero me loc obed bote nakanaka. Amen.
\p
\v 7 Nen, en tye ka bino ki pol, dano ducu gibinene ki waŋgi, kadi jo ma yam gucobe; kaka ducu me wi lobo bikumo pire. Kit meno ada. Amen.
\v 8 “An Alupa ki Omega”, man Rwot Lubaŋa ma owaco, en Lubaŋa ma tye, dok ma yam onoŋo tye con, doki ma bibino, en Won Twer Ducu.
\p
\v 9 An Jon, ominwu ma oribbe kwedwu i can ki i ker ki i diyo cwiny me ciro can ma wabedo kwede i Yecu. Onoŋo atye i cula ma gilwoŋo ni Patimo, pien onoŋo atito lok ma Lubaŋa oloko, ki lok me caden ma Yecu omiyo.
\v 10 Cwiny Maleŋ yam oyuto tamma woko i nino pa Rwot, ka doŋ cut awinyo dwan maloŋo yo tuŋ i ŋeya ma winnye calo koko tum ma gikuto.
\v 11 kun wacca ni, “Co gin ma itye ka nenone i buk-ki, ka doŋ icwal bot lwak jo muye Kricito ma gitye i kabedo abiro mapatpat, i Epeco, i Cumurna, i Pergamo, Tuatira, Cardic, i Piladelpia ki i Laodikia.”
\v 12 Ci alokke me neno dwan ma onoŋo tye ka lok kweda-ni. I kare ma doŋ alokke, ci aneno okar-mac me jabu abiro;
\v 13 i dye okar-mac abiro-nu aneno iye ŋat mo ma cal ki wod pa dano. Dano-nu orukke woko ki jor mabor, ki del me jabu ma otweyo i kore.
\v 14 Yer wiye onoŋo tar calo yer romo matar, tar calo pee; ki waŋe bene onoŋo obedo calo leb mac ma lyel,
\v 15 tyene aryo ducu onoŋo calo mola ma giliyo i keno, ka lacen doŋ girudo woko odoko maleŋ, kun dwane mor winnye calo mor pa pii ma corre.
\v 16 Onoŋo omako lakalatwe abiro i ciŋe tuŋ lacuc, ki pala lucwan mabit ryoryo okatti ki i doge, kun onoŋo nyime tye ka ryeny calo ceŋ ma ryeny matek.
\v 17 Ka doŋ anene, ci apoto woko piny ka tyene calo ŋat muto. Ento en oketo ciŋe lacuc i koma kun wacca ni, “Pe ilwor, an aye ŋat mukwoŋo ki me agikkine,
\v 18 an ŋat ma kwo-ni. Yam onoŋo ato woko, ento koŋ inen, kombeddi atye kwo, abibedo kwo matwal. Dok bene layab me To ki me Lyel tye bota.
\v 19 Kombeddi doŋ ico gin ma itye ka nenone-ni, gin ma tye ki gin ma bitimme lacen i anyim.
\v 20 Koŋ agonnyi tyen lok me muŋ me lakalatwe abiro ma ineno i ciŋa tuŋ lacuc, ki okar-mac abiro me jabu. Lakalatwe abiro gin aye lumalaika pa lwak muye Kricito ma gitye i kabedo abiro mapatpat, doŋ okar-mac abiro-ni gin aye lwak muye Kricito ma gitye i kabedo abiro mapatpat.
\c 2
\cl Chura 2
\p
\v 1 “Bot lamalaika pa lwak muye an ma gitye i Epeco co kit man ni, ‘Man lok pa ŋat ma omako lakalatwe abiro i ciŋe tuŋ lacuc, ma tye ka wirre i dye okar-mac abiro.
\v 2 “Aŋeyo ticci ducu, kit ma icanne kwede ki kit ma idiyo kwede cwinyi. Aŋeyo bene kit macalo pe itwero ciro kwede tim pa jo maraco, ento itemo jo ma gilwoŋŋe kengi ni gin lukwena, kun gin gigi pe lukwena, mumiyo bene doŋ inoŋo ni gin lukwena ma lugoba.
\v 3 Aŋeyo itye ka diyo cwinyi, kun iciro can pi nyiŋa, dok bene pud pe iol giri.
\v 4 Ento atye ki lok man i komi, pien doŋ iweko mar ma onoŋo yam itye kwede mukwoŋo ca-ni woko.
\v 5 Koŋ ipo kit macalo onoŋo ipoto kwede i kabedo mamalo ma yam io iye-ni, ka doŋ iŋut, ci icak tiyo gin ma onoŋo ibedo ka tiyone i kare mukwoŋo ca. Ka pe iŋut, abibino boti ci akwanyo okar-macci woko ki i kabedone.
\v 6 Gin maber ma onen boti en aye ni, idag tic pa jo Nikolaiti ma an bene adagi-ni.
\v 7 ŋat ma ite tye myero owiny lok ma Cwiny Maleŋ oloko bot lwak ducu ma guye an. Abimiyo ŋat ma oloyo camo yat me kwo ma tye i poto pa Lubaŋa.’
\p
\v 8 “Bot lamalaika pa lwak muye an ma gitye i Cumurna co kit man ni, “‘Man lok pa ŋat mubedo mukwoŋo ki me agikkine, ŋat ma yam oto ka dok ocer woko odoko kwo-ni.
\v 9 “Aŋeyo kit ayelayela ducu ma itye ka cirone, ki can lim bene ma itye kwede (ento in ilony). Aŋeyo bene yet pa jo ma giwaco ni gin Lujudaya, kun i adane gin pe Lujudaya, ento gin gubedo lwak me dul pa Catan.
\v 10 Pe ilwor can ma bipoto i komi. Nen, Catan bikwanyo jo mogo ki i kinwu bologi woko i mabuc wek etemwu. Gibibedo ka yelowu pi nino apar. Bed dano ma lagen nio wa i to, ci doŋ abimiyi tok me deyo me kwo.
\v 11 ŋat ma ite tye myero owiny lok ma Cwiny Maleŋ oloko bot lwak ducu ma guye an. Ŋat ma oloyo, to me aryo doŋ pe biketo arem i kome.’
\p
\v 12 “Bot lamalaika pa lwak muye an ma gitye i Pergamo co kit man ni, ‘Man lok pa ŋat ma tye ki pala lucwan mabit ryoryo.
\v 13 Aŋeyo ka ma ibedo iye, ka ma kom pa Catan tye iye. In giri imako nyiŋa woko matek likiŋ, pe ikwero niyeni i koma, kadi ki i kare pa Antipac ma obedo cadenna me ada, dano ma lagen ma yam gineko i kinwu, ka ma Catan bedo iye.
\v 14 Ento atye ki lok mogo manoknok i komi, pien itye ki jo mogo kunnu ma gumako pwony pa Balaam, ma yam opwonyo Balak me keto ariya i nyim jo Icrael wek gupot i bal, kun obitogi ni gucam riŋo ma gityero bot jogi, ki me timo tim tarwaŋ.
\v 15 Kit meno, in bene itye ki jo mogo ma gumako pwony pa jo Nikolaiti.
\v 16 Ka ce pe iŋut, ci abibino boti oyotoyot, ka doŋ alwenyo kwedgi ki pala lucwan me doga.
\v 17 ŋat ma ite tye myero owiny lok ma Cwiny Maleŋ oloko bot lwak ducu ma guye an. ŋat ma oloyo abimiye manna moyo ma onoŋo gikano woko, abimiyo got matar bene bote, ki nyiŋ manyen ma gicoyo i kom got meno ma ŋat mo pe ŋeyo, kono en ŋat ma gamo ni keken aye ŋeyo.”
\p
\v 18 “Bot lamalaika pa lwak muye an ma gitye i Tuatira co kit man ni, “Man lok pa Wod pa Lubaŋa ma waŋe calo leb mac ma lyel, ki tyene ducu calo mola ma girudo maleŋ adada.
\v 19 “Aŋeyo ticci ducu, mar ma itye kwede, niyeni ki ticci me konyo dano, ki kit ma idiyo kwede cwinyi. Aŋeyo ni ticci ma kombeddi itye ka tiyone kato me kare mukwoŋo ca.
\v 20 Ento atye ki lok man i komi, pud iweko dako ca, Jejebel, ma lwoŋŋe kene ni en lanebi-ni, kun tye ka pwonyo luticca miyo giŋak woko i yo me tim tarwaŋ, ki camo riŋo mogo ma noŋo doŋ gityero woko bot jogi.
\v 21 Onoŋo amiyo bote kare me ŋut, ento en okwero ŋut i tim tarwaŋe-ni.
\v 22 Nen, abibolo dako-nu i wi kitanda ma noŋo two marac, pacogge bene abibologi woko i can madit atika, ka pe guŋut, gukwero lubo tim tarwaŋ pa dako-nu.
\v 23 Abineko litinone woko bene, wek lwak ma guye an i kabedo ducu guŋe ni an aŋiyo cwiny dano wa ki tamgi, dok abimiyo bot dano acel acel i kinwu gin ma lubo kit tic ma en otiyo.
\v 24 “Ento bot wun jo mukene ma wutye i Tuatira, ma pe wulubo kit pwony man, dok bene pe wupwonyo gin mo ma gilwoŋo ni ‘muŋ matut pa Catan’, doŋ atito botwu ni, pe doki abimiedo yec mo mukene botwu.
\v 25 Ento wumak gin ma wutye kwede-ni aye matek likiŋ, waŋ ma an adwogo.
\v 26 ŋat ma loyo, dok ma obedo ka tiyo ticca nio i agikki, abimiye twero me loyo lurok.
\v 27 En biloyogi ki odoo nyonyo, calo ŋat ma goyo agulu ŋidogi woko matitino, kit macalo an bene alimo twero ki bot Wora;
\v 28 an abimiye latwok bene.
\v 29 ŋat ma ite tye myero owiny lok ma Cwiny Malaŋ oloko bot lwak ducu ma guye an.’
\c 3
\cl Chura 3
\p
\v 1 “Bot lamalaika pa lwak muye an ma gitye i Cardic co kit man ni, “‘Man lok pa ŋat ma tye ki cwiny pa Lubaŋa abiro, ki lakalatwe abiro. “‘Aŋeyo ticci ducu; itye ki nyiŋ me bedo kwo, ento doŋ ito woko.
\v 2 Co woko ci ijiŋ gin ma pud odoŋ boti-ni obed tek, ma doŋ cok to-ni; pien anoŋo pe icobo ticci mo kakare i nyim Lubaŋana.
\v 3 Doŋ ipo i kom gin ma ilimo ki ma iwinyo; gwok gin meno ento iŋuti. Ka ce pe ico, ci abibino boti macalo lakwo, ma in pe iŋeyo cawa ma abibino kwede i komi.
\v 4 Kadi bed kumeno, pud itye ki jo mogo manoknok i Cardic ma peya gunywano boŋŋigi ki cilo. Gibiwoto kacel kweda ma noŋo guruko boŋŋi matar, pien gin aye gimyero.
\v 5 ŋat ma oloyo gibiruko kit meno ki boŋŋi mater, dok bene pe abijwayo nyiŋe woko ki i buk me kwo. Abituco nyiŋe i nyim Wora, ki i nyim lumalaikane.
\v 6 ŋat ma ite tye myero owiny lok ma Cwiny Maleŋ oloko bot lwak ducu ma guye an.’”
\p
\v 7 “Bot lamalaika pa lwak muye an ma gitye i Piladelpia co kit man ni,
\v 8 “‘Man lok pa ŋat maleŋ ki me ada, ma en aye tye ki layab pa Daudi, en ŋat ma ka oyabo ci ŋat mo pe dok loro, ka oloro, ci ŋat mo bene pe dok yabo. ‘Aŋeyo ticci ducu. Nen, doŋ atyeko cibo doggola ma oyabbe woko i nyimi, ma ŋat mo pe twero lorone. Aŋeyo ni tekoni nok, ento kadi bed kumeno, doŋ imako lokka, dok bene pe ikwero nyiŋa.
\v 9 Nen, abimiyo lwak me dul pa Catan, jo ma yam gubedo ka cayi ma giwaco ni gin Lujudaya, kun i adane gin pe Lujudaya, ento giloko lok goba, nen, abimiyo gibino giryebbe piny i te tyeni, wek guniaŋ ada ni an amari.
\p
\v 10 Pien imako lokka me diyo cwiny i ciro can, an bene abigwoki maber i kare me omo cwiny, ma tye ka bino i kom wi lobo ducu, me temo jo ma bedo i wi lobo-ni.
\v 11 Abebino oyotoyot. Mak gin ma itye kwede-ni matek likiŋ, wek ŋat mo pe oma lalukanani woko.
\v 12 ŋat ma oloyo, abimiyo doko wir i ot pa Lubaŋana, pe bia kato woko ki iye. Abicoyo nyiŋ Lubaŋana, ki nyiŋ gaŋ pa Lubaŋana i kome, Jerucalem manyen ma bia ki i polo bot Lubaŋana bibino piny, dok bene ki nyiŋa kikome manyenne.
\v 13 ŋat ma ite tye myero owiny lok ma Cwiny Maleŋ oloko bot lwak ducu ma guye an.’
\p
\v 14 “Bot lamalaika pa lwak muye an ma gitye i Laodikia co kit man ni, “‘Man lok ma oa ki bot Amen, ma en aye caden ma genne ki me ada, gin ducu ma Lubaŋa oketo yam ocakke ki i kome.
\v 15 “‘Aŋeyo ticci ducu. Pe iŋic, dok bene pe ilyet. Onoŋo twero bedo ber ka nene ibedo ŋic nyo lyet!
\v 16 Doŋ kit macalo onoŋo ibedo mormor, pe ibedo ŋic dok bene pe ibedo lyet, abiŋuli woko ki i doga.
\v 17 Pien in doŋ iwacci, “An alony, doŋ atye ki gin ducu ma miyo abedo ki kwo maber, gin mo pe ma doki amito.” Ento kun pe iŋeyo ni in aye ŋat ma piny doŋ oloyo atika, ma imiyo kica mako dano i komi twatwal, in lacan, waŋi oto woko, dok bene ibedo munero.
\v 18 Pi meno amiyo ryeko boti me wilo jabu maleŋ ma giliyo woko maber ki mac ki bota, wek omi idok lalonyo. Wil bene boŋŋi matar ki bota me arukani wek ium ki lewic me bedoni munero wek pe doŋ onen, ki yat mo bene me wiro waŋi, wek inen piny.
\v 19 Agoyo jo ma an amarogi, apwonyogi dok atirogi; pi meno ket tek iŋut woko.
\v 20 Nen, acuŋ i doggola kun adwoŋo. Ka ce ŋat mo owinyo dwana ci oyabo doggola, abidonyo bote ka acamo cam kacel kwede ki en bene camo kacel kweda.
\v 21 ŋat ma oloyo, abimiye twero me bedo kacel kweda i wi komkerra, kit macalo an bene doŋ aloyo ci abedo kacel ki Wora i wi komkerre-ni.
\v 22 ŋat ma ite tye myero owiny lok ma Cwiny Maleŋ oloko bot lwak ducu ma guye an.’”
\c 4
\cl Chura 4
\p
\v 1 Lacen ka man otum, dok aneno doggola mo i polo ma onoŋo tye twolo. Doŋ dwan mukwoŋo ma onoŋo awinyo obedo ka lok kweda calo koko tum-mi, owacci, “It ibin malo kany, ci abinyutti gin ma bitimme lacen i ŋe man.”
\v 2 Cutcut Cwiny Maleŋ oyuto tamma woko, ci aneno komker ma gicibo i polo, ma dano mo onoŋo obedo i wiye.
\v 3 ŋat ma onoŋo obedo i wi komker ca onoŋo ryeny calo got me wel matarre ki makwarre, ki danyu ma nen calo emeradi orumo komker woko dyere.
\v 4 Ka dok komker mukene pyeraryo wiye aŋwen orumo komkerre woko dyere, ki ludoŋo pyeraryo wiye aŋwen bene gubedo i wi komker magi, ma guruko boŋŋi matar, kun gurwako bene lalukana me jabu me deyo i wigi.
\v 5 Onoŋo tye gin mo ma wil awila calo lutkot ki i kom komker-ri, ki dwan mapol winnye iye, ki gin ma mwoc amwoca calo mwoc pa kot. I nyim komker onoŋo tye iye dog mac raa abiro ma tye ka lyel, ma gin aye cwiny pa Lubaŋa abiro.
\v 6 Ka dok aneno i nyim komker meno onoŋo tye iye gin ma nen calo nam me kiyo maleŋ calo gweŋ ma mil amila. Dok lee makwo aŋwen gurumo komker woko dyere i ŋete tuŋŋi ki tuŋŋi, waŋgi pol ma mogo tye tuŋ i nyimgi ki mogo tye yo tuŋ i ŋegi.
\v 7 Lee makwo mukwoŋo onoŋo nen calo labwor, ki me aryone onoŋo nen calo twon, lee makwo me adekke waŋe nen calo waŋ dano, ki lee makwo me aŋwenne onoŋo nen calo ocur ma tye ka tuk.
\v 8 Doŋ lee makwo aŋwen-ni onoŋo lee acel acel bwome tye abicel, ma waŋgi noŋo pol ata, muromo komgi woko ducu ki yo tuŋ woko wa ki yo tuŋ i iye bene. Dyeceŋ ki dyewor pe giweko wer ni, “Rwot Lubaŋa Matwero-ducu leŋ, leg dok leŋ, en ŋat ma yam tye con, koni tye, dok bibino!”
\p
\v 9 I kare ducu ka lee makwo-gu gimiyo deyo ki woro ki pwoc bot ŋat ma obedo i wi komker ca, ma bedo kwo nakanaka,
\v 10 ci ludoŋo pyeraryo wiye aŋwen-ni giryebbe piny i nyim en ŋat ma obedo i wi komker ca, ci guworo en ŋat ma bedo kwo nakanaka-ni; dok gubolo lalukanagi i nyim komker kun giwero ni,
\v 11 “Rwotwa ki Lubaŋawa, in imyero me noŋo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.”
\c 5
\cl Chura 5
\p
\v 1 Onoŋo bene aneno buk adola tye i ciŋ ŋat ma obedo i wi komker-ri tuŋ lacuc, ma gicoyo woko ducu ryoryo, tuŋ iye wa ki tuŋ ŋeye bene, dok gimwono ki ginanena abiro.
\v 2 Dok aneno lamalaika mo matek twatwal ma onoŋo tye ka tito lok ki dwan maloŋo ni, “Aŋa ma myero me yabo buk adola-ni, ki me yabo ka ma gimwono kwede woko?”
\v 3 Pe tye ŋat mo i wi polo, kadi i wi lobo, kadi piny i te lobo ma twero yabo buk adola-ni kadi wa neno iye bene.
\v 4 Ci akok matek pien pe ginoŋo ŋat mo ma myero me yabo buk adola nyo kadi me neno iye.
\v 5 Cutcut ŋat acel i kin ludoŋo owacca ni, “Pe ikoki. Nen, Labwor ma i kaka me Juda, Lwit yat pa Daudi, en aye doŋ oloyo, pi meno en twero yabo buk adola ki yabo ginanenane abiro ma gimwono kwede-ni woko.”
\v 6 Lacen dok aneno Latin romo ma ocuŋ i kin komker ki lee makwo aŋwen ki i kin ludoŋo, nen calo doŋ gineko woko. Onoŋo tuŋe tye abiro, ki waŋe bene tye abiro, ma gin cwiny pa Lubaŋa abiro, ma en ocwalo i wi lobo ducu.
\v 7 Ci en ocito okwanyo buk adola woko ki i ciŋ ŋat ma onoŋo obedo i wi komker ma onoŋo omako tuŋ lacuc-ci.
\v 8 I kare ma doŋ en okwanyo buk adola-ni woko, ci lee makwo aŋwen-ni ki ludoŋo pyeraryo wiye aŋwen-ni guryebbe piny i nyim Latin romo, kun ŋat acel acel i kingi omako naŋa, ki atabo jabu ma gupoŋ ki odok eceta, ma en aye lega pa jo pa Lubaŋa.
\v 9 Ci gubedo ka wero wer manyen ma waco ni, “In imyero me kwanyo buk adolani, ki me yabo ginanena ma gimwono kwede, pien yam gineki woko, dok pi remoni ikoko dano pi Lubaŋa, ma gua i kaka mapol mapatpat, ki i leb ki rok mapatpat ducu,
\v 10 ilokogi gudoko lwak pa Lubaŋa ma en loyo, ma gin aye doŋ ajwagi ma gitiyo bote, gin bene gibiloyo lobo.”
\p
\v 11 Ka dok aneno, ci awinyo dwan lumalaika ma welgi pe kwanne, alip ki alip, ma gurumo komker woko, ki lee makwo ki ludoŋo,
\v 12 kun giloko ki dwan maloŋo ni, “Latin romo ma gineko-ni en aye ma myero me noŋo twero, lonyo, ryeko ki teko, woro ki deyo kacel ki pwoc!”
\p
\v 13 Ka dok awinyo ginaketa ducu ma tye i polo, ki i wi lobo, ki piny i te lobo, ki ma gitye i nam-gu ki gin ducu ma tye iye, ma giloko ni, “Pwoc ki woro ki deyo ki twero obed nakanaka bot ŋat ma obedo i wi komker, ki bot Latin romo!”
\p
\v 14 Ci lee makwo aŋwen-ni gugamo ni, “Amen!” cutcut ludoŋo guryebbe piny guworo Lubaŋa ki Latin romo.
\c 6
\cl Chura 6
\p
\v 1 Lacen aneno Latin romo oyabo kabedo acel ka ma onoŋo gimwono ki i kin kabedo abiro-ni, ci awinyo lee acel ki i kin lee makwo aŋwen ca oloko ki dwan macalo mor kot ni, “Bin!”
\v 2 Ka dok aneno aguragura matar, ki ŋat ma ŋweco kwede onoŋo omako atum. Gimiye lalukana, ci en ocito woko kun loyo lweny, dok bene ni wek ebed ka loyo lweny.
\v 3 Ka doŋ oyabo ka ma gimwono me aryone, ci awinyo lee makwo me aryone ka loko ni, “Bin!”
\v 4 Cutcut aguragura mukene makwar adada oa ki woko obino odonyo; ŋat ma ŋweco kwede gimiye twer me kwanyo kuc womo ki i wi lobo, wek dano gubed ka nekke kekengi, dok bene gimiye pala lucwan madit me lweny.
\v 5 Ka oyabo ka ma gimwono me adekke, ci awinyo lee makwo me adek ka loko ni, “Bin!” Cutcut atugi neno aguragura macol; onoŋo ŋat ma riŋo kwede omako mijan i ciŋe.
\v 6 Lacen dok awinyo dwan ma oa ki i kin lee makwo aŋwen-ni kun loko ni, “Ŋano agwata acel welle ciliŋ abic, cayiri agwata adek welle ciliŋ abic ento moo ki koŋo vino pe ibalgi!”
\v 7 I kare ma dok oyabo ka ma gimwono me aŋwenne, ci awinyo lee makwo me aŋwenne ka loko ni, “Bin!”
\v 8 Ka dok aneno aguragura ma obedo kibworo, ŋat ma ŋweco kwede onoŋo nyiŋe To, kun Lyel onoŋo lubo kore. Omiyogi twero i kom dul lobo acel me aŋwen me neko dano ki pala lucwan, ki kec, ki two gemo, ki lee tim mager.
\p
\v 9 I kare ma oyabo ka ma gimwono me abicce, aneno tipo pa jo ma ginekogi pi lok pa Lubaŋa ki pi bedo caden me lok meno; aneno tipogi tye i te keno tyer.
\v 10 Gukok ki dwan maloŋo ni, “Ai Rwot Madit, Rwot maleŋ ki me ada, abitero kare ma rom mene ma noŋo peya iŋolo kop, dok ma noŋo peya iculo kwor me remowa i kom jo ma bedo i lobo?”
\v 11 Ci gimiyo jor matar bot ŋat acel acel, ka gicikogi ni pud koŋ doŋ guywe pi kare mo manoknok, nio waŋ ma wel lutic wadigi ki utmego ma gibinekogi calo gin ocobbe kakare.
\p
\v 12 I kare ma en oyabo ka ma gimwono me abicelle, aneno, ci nen, oyeŋyeŋ oyeŋo lobo matek twatwal, omiyo ceŋ ocido woko macol lucuc calo boŋo cola, ki dwe odoko kwar calo remo.
\v 13 Lakalatwe me polo guo woko piny lirutrut calo nyig yat oduro me cwir ma poto ki i jaŋe ka yamo ma okodo matek oyeŋo.
\v 14 Ci polo bene orwenyo woko liweŋ calo karatac ma gidolo, kadi ki got ki cula nam gikobogi woko ducu ki ka-kargi.
\v 15 Ka doŋ luker me lobo, ki jo ma pigi dito, ki ludito me mony ducu, lulonyo ki wegi twero ki jo ducu ma i wi lobo, opii ki jo ma gilone kengi, gukanne woko i boro ki i kin got mubar ma i godi ducu,
\v 16 kun giwaco bot godi madoŋo ki godi matino ni, “Wupot i komwa ci wuumwa woko ki i waŋ ŋat ma obedo i wi komker, ki i akemo pa Latin romo;
\v 17 pien nino madit me akemogi doŋ oo, ci aŋa ma bitwero cuŋ iye?”
\c 7
\cl Chura 7
\p
\v 1 Lacen aneno lumalaika aŋwen gucuŋ i but lobo aŋwen ducu, ma gigeŋo yamo me lobo woko, wek yamo mo pe okod i lobo, nyo i nam, kadi ki i kom yat mo.
\v 2 Dok aneno lamalaika mukene ma ito cito malo ki ka ma ceŋ tuc ki iye, onoŋo tye ki lanyut pa Lubaŋa makwo. Ci okok ki dwan maloŋo bot lumalaika aŋwen ma onoŋo gimiyogi twero me balo lobo ki nam,
\v 3 kun wacci, “Pe wubal lobo nyo nam kadi ki yadi, nio waŋ ma doŋ waketo lanyut i tur nyim lutic pa Lubaŋawa.”
\v 4 Ka dok awinyo bene wel dano ma giketo lanyut i komgi, gubedo dano alip miya acel ki pyeraŋwen wiye aŋwen, ma gua ki i kaka pa jo Icrael ducu.
\v 5 I kaka pa Juda giketo lanyut i kom dano alip apar wiye aryo. I kaka pa Reuben giketo lanyut i kom dano alip apar wiye aryo. I kaka pa Gad giketo lanyut i kom dano alip apar wiye aryo.
\v 6 I kaka pa Acer giketo lanyut i kom dano alip apar wiye aryo. I kaka pa Naputali giketo lanyut i kom dano alip apar wiye aryo. I kaka pa Manace giketo lanyut i kom dano alip apar wiye aryo.
\v 7 I kaka pa Cimeon giketo lanyut i kom dano alip apar wiye aryo. I kaka pa Levi giketo lanyut i kom dano alip apar wiye aryo. I kaka pa Icakar giketo lanyut i kom dano alip apar wiye aryo.
\v 8 I kaka pa Jabulon giketo lanyut i kom dano alip apar wiye aryo. I kaka pa Yucepu giketo lanyut i kom dano alip apar wiye aryo. I kaka pa Benjamin giketo lanyut i kom dano alip apar wiye aryo.
\p
\v 9 Lacen aneno lwak dano mapol ata, ma ŋat mo pe romo kwano welgi, ma gua ki i rok ducu, ki i kaka ducu, ki dano ducu me wi lobo, ki leb ducu, ci gucuŋ i nyim komker ki i nyim Latin romo, ma gurukke ki jor matar, kun gumako jaŋ otit i ciŋgi.
\v 10 Ci gidaŋŋe ki dwan maloŋo ni, “Laro dano tye bot Lubaŋawa ma obedo i wi komker, ki bot Latin romo!”
\v 11 Lumalaika ducu onoŋo gucuŋo gurumo komker woko dyere, gurumo bene ludoŋo ki lee makwo aŋwen-ni, ka guryebbe piny i nyim komker ci guworo Lubaŋa,
\v 12 kun giwacci, “Amen! Pak ki deyo ki ryeko ki pwoc, ki woro ki twero ki teko obed bot Lubaŋawa nakanaka. Amen.”
\p
\v 13 Ci ŋat acel ki i kin ludoŋo oloko kweda, kun penya ni, “Jo magi ma guruko jor matar-ri aŋagi, gua kono ki kwene?”
\v 14 Adokke iye ni, “Ladit, in iŋeyo.” En dok owaco bota ni, “Magi aye gin jo ma gua ki i can madit atika, gin bene doŋ gutyeko lwoko jorgi i remo pa Latin romo odoko matar adada.
\v 15 Pi meno, doŋ gitye i nyim komker pa Lubaŋa, ma gitiyo bote i ode dyeceŋ ki dyewor; ŋat ma obedo i wi komker bibedo i kingi kun gwokogi.
\v 16 Kec pe dok binekogi, kadi orwo pii bene pe dok binekogi, ceŋ pe dok biwaŋogi, kadi kit lyeto mo bene.
\v 17 Pien Latin romo ma tye i dye komker bibedo lakwatgi; en bitelogi terogi i waŋ it me pii me kwo, Lubaŋa bene bidunyo pig waŋgi woko ducu ki i waŋgi.”
\c 8
\cl Chura 8
\p
\v 1 I kare ma Latin romo oyabo ka ma gimwono me abiro, polo oliŋ woko litik pi kare ma romo nucu cawa kulu.
\v 2 Ci lacen aneno lumalaika abiro ma gicuŋ i nyim Lubaŋa kare ki kare, gimiyo botgi tum abiro.
\v 3 Lamalaika mukene obino ci ocuŋ i nyim keno tyer, onoŋo omako atabo jabu me waŋo odok eceta. Gimiye odok eceta mabup wek omed ki lega pa jo pa Lubaŋa ducu i kom keno tyer jabu ma tye i nyim komker.
\v 4 Ci yito odok eceta ma giwaŋo oa ki i ciŋ lamalaika ma onoŋo tye i nyim Lubaŋa, oduny kacel ki lega pa jo pa Lubaŋa ocito malo.
\v 5 Lacen doki lamalaika okwanyo atabo me waŋo odok eceta, otoko lodi mac ki i keno tyer poŋ atabo meno, ci obolo woko piny i lobo; cutcut kot ocako mor kun mwoc matek adada, ma noŋo lutkot wil awila, ki oyeŋyeŋ bene oyeŋo piny.
\p
\v 6 Cutcut lumalaika abiro ma onoŋo gitye ki tum abiro-ni guyubbe doŋ me kutone.
\v 7 Ci lamalaika mukwoŋo okuto tumme, omiyo pee ki mac ma orubbe ki remo ocorre i lobo. Meno omiyo acel me adek me lobo owaŋ woko, ki acel me adek me yadi bene, ki lum madyak ducu bene owaŋ wok licwic.
\v 8 Lamalaika me aryone okuto tumme, ci gin mo ma onoŋo nen calo got madit twatwal, ma onoŋo mac tye ka waŋone opoto woko i dye nam.
\v 9 Cutcut dul acel me adek me nam odoko remo, acel me adek me gin makwo ducu ma gibedo i nam guto, ki acel me adek me mel ducu bene guŋinnye woko.
\v 10 Lamalaika me adekke okuto tumme, ci lakalatwe madit oa ki i polo opoto piny, ma lyel calo mac dog raa, opoto i kom dul acel me adek me kulu ducu, ki i waŋ it ducu ma piine gunnye agunya.
\v 11 Nyiiŋ lakalatwe meno Yat roka. Dul acel me adek me pii odoko kec calo yat roka, pii meno oneko lwak dano mapol, pien onoŋo doŋ odoko kec.
\v 12 Lamalaika me aŋwenne okuto tumme, ci gin mo ogoyo dul acel me adek me ceŋ woko, ki dul acel me adek me dwe, ki dul acel me adek me lakalatwe, mumiyo dulgi me acel me adekke odoko col; dero mo ma ryeny obedo pe pi dul acel me adek me dyeceŋ ki dul acel me adek me dyewor bene.
\p
\v 13 Ka dok aneno, ci awinyo ocur mo tye ka koko ki dwan maloŋo, i kare ma onoŋo en tye ka tuk i dye yamo kun kok ni, “Can, can, can i wi jo ma bedo i lobo, pi dwan tum mukene ma pud gudoŋ ma lumalaika adek doŋ gicok kutone!”
\c 9
\cl Chura 9
\p
\v 1 Lamalaika me abicce okuto tumme, ci aneno lakalatwe oa ki i polo opoto woko i ŋom, kun onoŋo gimiye layab me dog bur matut ma tere pe gik.
\v 2 En oyabo dog bur, ci yito oduny ki i doge calo yito ma oa ki i ruk mac madit adada ma tye i keno, ceŋ ki yamo gucido woko ki yito ma oa ki i bur.
\v 3 Lwak bonyo oa ki i yito meno omukke obino i lobo oumo woko lipuk; onoŋo yam gimiyo botgi kit twero ma rom ki twero ma oton me lobo-ni tye kwede.
\v 4 Gicikogi ni pe gubal lum me lobo, kadi gin ma twi atwiya, nyo yat mo, ento guket can i kom jo ma pe ki lanyut pa Lubaŋa i tur nyimgi.
\v 5 Pe giye ni gunek jo meno aneka, ento giyegi ni guungi auna pi dwe abic. Arem ma giwinyo pi un ma giunogi kwede onoŋo rom ki arem ma dano ma oton okayo bedo kwede.
\v 6 I kare meno dano biyenyo to, ento pe gibinoŋo; gibimito ni gito woko, ento to bilwi woko ki botgi.
\v 7 Lwak bonyo mumukke obino i lobo-ni onoŋo ginen calo lwak aguragura ma giyubogi woko pi lweny; onoŋo bene tye gin mogo i wigi ma nen calo lalukana jabu; waŋgi obedo calo waŋ dano,
\v 8 yer wigi obedo calo yer wi mon, lakgi obedo calo lak labwor.
\v 9 Korgi obedo calo nyonyo ma askari gigeŋo ki korgi, ma noŋo bwomgi ŋur winnye calo mor pa lwak gadigadi lweny ma lwak aguragura aye giywayo, kun gicito gilaro lweny.
\v 10 Yibgi onoŋo tye obedo calo lwak oton, kwirgi bene tye me kayo dano, ki twerogi me uno dano pi dwe abic onoŋo bene yam tye i yibgi.
\v 11 Laditgi ma onŋo loyogi macalo kabaka obedo lamalaika me bur matut ma tere pe gik. Nyiŋe i leb Ibru onoŋo gilwoŋo ni Abaddon; i leb Grik gilwoŋo ni Apollyon.
\p
\v 12 Can muikwoŋo doŋ okato. Nen, can aryo mukene pud odoŋ ma myero obin.
\p
\v 13 Lamalaika me abicelle okuto tumme, ci awinyo dwan mo ma a ki i twok keno tyer aŋwen me jabu ma tye i nyim Lubaŋa.
\v 14 Owaco bot lamalaika me abicel ma tye ki tum-mi ni, “Gony lumalaika aŋwen ma gitweyogi i dog kulu madit me Euprate-ni woko.”
\v 15 Cutcut gigonyo lumalaika aŋwen ca, kun onoŋo doŋ giyubogi pi kare meno kikome, pi cawa meno, i nino meno, i dwe-nu me mwaka meno, wek gunek dul acel me adek pa dano ducu.
\v 16 Wel askari me mony ma onoŋo giŋweco ki aguragura onoŋo romo milion miya aryo; onoŋo awinyo ka giwaco welgi.
\v 17 Man aye kit ma lwak aguragura ki jo ma giŋweco kwedgi gunen kwede bota i ginanyuta: jo ma giŋweco kwedgi onoŋo yam guruko nyonyo me geŋo korgi ma raŋigi kwar calo lodi mac, dok obedo bulu calo kidi capir, ki dok raŋine obedo calo raŋi lwit opok, macalo gweŋ calfa. Aguragura onoŋo wigi calo wi labwor, kun mac ki yito ki alur me kidi calfa ma waŋ katti ki i doggi.
\v 18 Gemo magi adek-ki, mac, ki yito ki alur me kidi calfa ma okatti ki i doggi oneko jo ma romo dul acel me adek pa dano ducu.
\v 19 Pien twero pa lwak aguragura meno tye i doggi ki i yibgi. Yibgi obedo calo twol mapol ma tye ki wigi, en yibgi-nu aye giketo kwede arem i kom dano.
\v 20 Jo mukene ma two gemo magi pe onekogi yam pe guŋut pi gin ma onoŋo gin kikomgi gutiyo ki ciŋgi, pe guweko woro jogi, ki cal jogi ma gutiyo ki jabu, ki ryal ki mola, ki kidi me wel-gu, ki yadi, ma gin cal jogi ma pe gitwero neno gin mo, dok pe gitwero winyo lok mo, kadi ki wot bene pe gitwero wot.
\v 21 Jo meno yam bene pe guŋut pi nek ma guneko ki dano, nyo pi timgi me jokjok, kadi pi timo tim tarwaŋ, nyo pi kwalo kwo.
\c 10
\cl Chura 10
\p
\v 1 Dok aneno lamalaika mukene matek twatwal oa ki i polo kun lor bino piny. Orukke woko ki pol, ma onoŋo danyu tye i wiye, waŋe onoŋo obedo calo ceŋ, ki tyene onoŋo obedo calo wir mac.
\v 2 Onoŋo buk adola matidi tye i ciŋe ma iye oyabbe woko. Oketo tyene tuŋ lacuc i nam ki tyene lacam oketo i wi lobo.
\v 3 Odaŋŋe ki dwan maloŋo calo labwor ma moro dwane; ka odaŋŋe, ci mor pa kot omwoc amwoca ma romo tyen abiro kulu.
\v 4 Ka kot doŋ omor omwoc tyen abiro, ci ayubbe ka coc, cutcut acako winyo dwan ma a ki i polo kun wacci, “Mwon lok ma mor kot abiro-ni guwaco woko, pe ico acoya.”
\v 5 Ci lamalaika ma onoŋo aneno ocuŋ i nam ki i lobo-ni otiŋo ciŋe lacuc malo i polo,
\v 6 ka okwoŋo kwoŋ ki nyiŋ ŋat ma bedo nakanaka, ma oketo polo ki jami ducu ma tye iye, ki lobo ki jami ducu ma tye iye, kacel ki nam ki jami ducu ma tye iye kun wacci, “Agalagala mo doŋ pe,
\v 7 ento ka kare oromo ma lamalaika me abiro bikuto tumme, Lubaŋa bicobo tamme ma tye i muŋ kit macalo yam otito bot luticce lunebi.”
\p
\v 8 Doki awinyo ka dwan ma onoŋo oa ki i polo-ni tye ka lok kweda tyen me aryo kun wacci, “Cit ikwany buk adola ma oyabbe ma tye i ciŋ lamalaika ma ocuŋ i wi nam ki i lobo-ni.”
\v 9 Ci acito bot lamalaika meno, atitte ni omiya buk adola matidi-nu; ci en ogamo owacca ni, “Gam icam woko. Bibedo kec i ii, ento bibedo lim i dogi calo moo kic.”
\v 10 Cutcut agamo buk adola matidi ca woko ki i ciŋ lamalaika ci acamo woko. Obedo lim i doga calo moo kic, ento i kare ma doŋ atyeko camone, obedo makec i iya.
\v 11 Ka doŋ giwacca ni, “In myero doki itit lok pa Lubaŋa, i kom lwak dano mapatpat ki rok ki leb ki luker ducu.”
\c 11
\cl Chura 11
\p
\v 1 Lacen gimiya lagada me pimo piny, ma obedo calo odoo, ci giwacca ni, “A icit ipim ot pa Lubaŋa, keno tyer, ki jo ma giworo Lubaŋa i ode.
\v 2 Ento pe ipim dyekal me ot pa Lubaŋa ma tye woko, wek meno obedi pien doŋ gityeko miyone woko bot jo ma pe giŋeyo Lubaŋa, gibibedo ka nyono gaŋ maleŋ woko pi dwe pyeraŋwen wiye aryo.
\v 3 Abimiyo twero bot lucadenna aryo-ni me tito lok pi nino alip acel ki miya aryo ki pyerabicel, ma noŋo guruko boŋo cola.”
\v 4 Lucaden aryo-ni gin aye yadi jeituni ki okar mac tara ma cuŋ i nyim Rwot me lobo.
\v 5 Ka ce onoŋo ŋat mo mito timogi rac, ci mac bicorre i doggi waŋo lukworgi woko liweŋ; doŋ ka ŋat mo mito timogi rac, meno aye kit ma gibineke kwede.
\v 6 Gitye ki twero me loro polo woko wek kot pe ocwer i kare ma noŋo gitye ka tito lok pa Lubaŋa. Gitye-bene ki twero me loko pii wek odok remo, dok me keto can i kom lobo i yo ducu, tyen mapol kit macalo cwinygi mito.
\v 7 Ka doŋ gutyeko miyo cadengi, ci lee maca ma okatti ki i bur ma tere pe gik-ki biero lweny i komgi, dok bene nekogi woko.
\v 8 Ci komgi muto biradde i dye yo me gaŋ madit, ma i carolok gilwoŋo nyiŋe ni Codom, ki dok ni Ejipt, en bene ka ma yam giguro iye Rwotgi i kom yatariya.
\v 9 Dano ma gua ki i kin lwak me wi lobo ki i kaka mapatpat ki leb-gu ki i rok mapatpat gibineno komgi muto pi nino adek ki nucu, kun pe giye ni giyikgi i lyel.
\v 10 Jo ma bedo i lobo biŋatte i komgi, gibibedo ki yomcwiny kun gicwalo mot i kingi kekengi, pien lutit lok aryo-nu onoŋo yam guuno dano ma bedo i lobo matek.
\v 11 Ento i ŋe nino adek ki nucu, yweyo me kwo oa ki bot Lubaŋa ci odonyo i komgi, ka doŋ gucako a malo, gucuŋo ki tyengi, mumiyo lworo madit twatwal omako jo ducu ma onenogi.
\v 12 Cutcut guwinyo dwan maloŋo ma oa i polo kun waco ni, “Wuit wubin malo kany!” Ci guito i polo i pol, ma lukworgi bene gineno.
\v 13 I cawa meno cutcut oyeŋyeŋ madit twatwal oyeŋo piny. ci dul acel me apar me gaŋ meno omukke opoto woko piny. Oyeŋyeŋ meno oneko jo alip abiro, jo mudoŋ lworo omakogi matek, ci gumiyo deyo bot Lubaŋa me polo.
\p
\v 14 Can me aryo doŋ okato; nen, can me adek doŋ cok bino.
\p
\v 15 Lacen lamalaika me abirone okuto tumme, ci dwan mogo maloŋo owinnye i polo ma wacci, “Ker me lobo doŋ odoko ker pa Rwotwa ki Kricitone, en doŋ bibedo ka loc matwal.”
\v 16 Cutcut ludoŋo pyeraryo wiye aŋwen ma gibedo i wi komkergi i nyim Lubaŋa guryebbe piny guworo Lubaŋa,
\v 17 kun giwacci, “Wamiyo pwocwa boti, in Rwot Lubaŋa Matwero-ducu, in ma itye dok ma yam ibedo tye wa con, pien doŋ imako tekoni madit ci icako loc.
\q1
\v 18 Lurok yam gubedo ki akemo, ci akemoni obino, ki kare me ŋolo kop pa jo muto, kare me miyo mot me pwoc bot luticci ma lutit lokki, ki joni maleŋ, bot jo ducu ma gilworo nyiŋi, jo matino ki jo madoŋo, ki kare me neno jo ma tye ka balo lobo woko.”
\p
\v 19 Ka doŋ giyabo ot pa Lubaŋa ma tye i polo, ci canduk me gicikke onen woko i ot pa Lubaŋa. Kot ocako cwer kun mor, mwoc amwoca ma lutkot wil awila, ki dwan owinnye maloŋo me mor pa piny, oyeŋyeŋ ocako yeŋo piny, ki pee bene ocorre madwoŋ twatwal.
\c 12
\cl Chura 12
\p
\v 1 Ginanena mo madit adada onen i polo, dako mo ma onoŋo oruko ceŋ, kun dwe tye i te tyene, ki lalukana ma onoŋo en oruko i wiye obedo lakalatwe apar wiye aryo.
\v 2 Dako-nu onoŋo tye ki ic, onoŋo doŋ cok nywal; cutcut arem me nywal omiyo en omukke ki koko, kun pwodde apwoda ki remcwiny ma doŋ mito nywalo latin woko.
\v 3 Ci tinanena mo mukene dok onen i polo, min kulu mo makwar madit otuc, ma onoŋo wiye tye abiro, ki tuŋe tye apar, kun onoŋo lalukana abiro me loc tye i wiye ducu.
\v 4 Yibe opwodo dul acel me adek pa lakalatwe me polo, ci ocorogi woko piny i ŋom. Ka doŋ min kulu madit ca ocako cuŋ i nyim dako ma onoŋo mito nywal ca, wek ka dako-nu onywal, ci emwony latinne woko.
\v 5 Ci dako-nu cut onywalo latin awobi, en ŋat ma biloyo rok ducu ki odoo nyonyo. Ento latin meno gigamo woko, gitero bot Lubaŋa ki i komkerre.
\v 6 Ci dako-nu oa oriŋo woko i dye tim, ka ma Lubaŋa oyubo iye kabedo pire, ka ma gibibedo ka pite iye pi nino alip acel ki miya aryo ki pyerabicel.
\p
\v 7 I kare meno cutcut lweny ocakke i wi polo, Mikael kacel ki lumalaikane gulwenyo i kom min kulu madit-ti. Min kulu madit-ti kacel ki lumalaikane bene gulwenyo,
\v 8 ento giloyogi woko, mumiyo kabedo doŋ odoko pe pigi i wi polo.
\v 9 Ci gibolo min kulu madit ca woko piny i ŋom, ma yam obedo min kulu macon-ni, ma gilwoŋo ni Ladot, ki Catan, labwol dano ma i wi lobo ducu; gibole woko piny i ŋom kacel ki lumalaikane.
\v 10 Cutcut awinyo dwan mo maloŋo i polo ma wacci, “Kombeddi doŋ laro dano, ki teko, ki ker pa Lubaŋawa ki twero pa Kricito doŋ oo, pien ŋat ma yam doto utmegiwa-ni doŋ gibolo woko piny i ŋom, en ŋat ma yam dotogi i nyim Lubaŋawa dyeceŋ ki dyewor-ri.
\q1
\v 11 Gin doŋ guloye woko pi remo pa Latin romo, ki pi lok me caden ma gubedo ka tucone, dok bene pe guparo pi kwogi, ento gumine kengi kadi wa i to.
\q1
\v 12 Bed ki yomcwiny, in polo, ki wun bene ma wubedo iye! Ento wun lobo ki nam, wubineno can malit atika, pien Ladot doŋ olor obino woko piny botwu ma tye ki akemo madwoŋ, pien ŋeyo ni karene tye manok!”
\p
\v 13 I kare ma min kulu doŋ oneno, gibole woko piny i ŋom, ci ocako ryemo dako ca ma onoŋo onywalo latin awobini.
\v 14 Ento gimiyo bwom ocur madito aryo bot dako-nu, wek oa woko ki i nyim min kulu, otuk ocit woko i dye tim, i kabedone ca ka ma gibipite iye pi mwaka adek ki nucu.
\v 15 Ci min kulu oŋoko pii ki i doge i kor dako-nu, piine obedo calo pii me kulu, wek pii opoŋ omol dako-nu woko.
\v 16 Ento lobo okonyo dako-nu, lobo oŋamo doge ci omwonyo kulu meno ma onoŋo min kulu oŋoko woko ki i doge-ni.
\v 17 Kiniga omako min kulu i kom dako-nu, ci ocito oero lweny i kom likwayo pa dako ca mukene-gu ducu, i kom jo ma gilubo cik pa Lubaŋa, ma gimako bene lok me caden ma Yecu omiyo.
\v 18 Ka doŋ ocuŋ i kweyo me dog nam.
\c 13
\cl Chura 13
\p
\v 1 Dok aneno lee mo ma oa ki i nam tye ka katti woko, ma tuŋe tye apar ki wiye bene onoŋo tye abiro, kun onoŋo lalukana apar me loc tye i tuŋe ducu; dok i wiye ducu onoŋo tye iye nyiŋ mo ma nyuto cac i kom Lubaŋa.
\v 2 Lee ma aneno-ni onoŋo obedo calo kwac, tyene obedo calo tyen ŋuu mager, ki doge onoŋo obedo calo dog labwor. Min kulu madit ca omiyo tekone, komkerre, ki twero madit ma en tye kwede bot lee meno.
\v 3 Aneno wiye onoŋo nen calo gigoyo giketo ret iye ma gimito nekone woko, ento ret meno ma onoŋo giketo i wiye-ni doŋ ocaŋ woko. Lobo ducu olubo lee-nu ki ur madit ma pe wacce.
\v 4 Dano gubedo ka woro min kulu ca pien onoŋo omiyo twerone woko bot lee-nu, dok bene guworo lee-nu kun giwacci, “Aŋa ma obedo calo lee man, dok aŋa ma twero lweny kwede?”
\v 5 Gimiyo twero bene bot lee-nu me loko lok mogo me wakke ki me yeto Lubaŋa, dok bene gimiye twero me tiyo gin ma iye mito pi dwe pyeraŋwen wiye aryo.
\v 6 Ci oŋamo doge me yeto Lubaŋa, kun yeto nyiŋe ki ka ma en bedo iye, kun yeto bene wa jo ducu ma gibedo i polo.
\v 7 Dok bene gimiye twero ma ero lweny i kom jo maleŋ ki tayogi woko. Gimiye bene twero me loyo kaka ducu, dano ducu ki leb-gu, wa rok mapatpat ducu.
\v 8 Jo ducu ma gibedo i lobo gibiworo lee-nu, dano acel acel ma onoŋo nyiŋe pe gicoyo i buk me kwo pa Latin romo ma yam gineko ca, cakke wa i acakki piny.
\v 9 Ka ŋat mo ite tye myero owiny lok man.
\v 10 Ka ce onoŋo yam giyubo ni gimak dano mo me bedo opii, ci gibitere woko i opii; ka ce ŋat mo neko dano ki pala lucwan, en bene myero gineke woko ki pala lucwan. Meno aye ka ma jo pa Lubaŋa myero gunyut iye kit ma giciro kwede can ki niyegi.
\p
\v 11 Lacen dok aneno lee mukene ka katti i ki ŋom; onoŋo tuŋe tye aryo calo min kulu.
\v 12 En otiyo ki twero pa lee mukwoŋo ca ducu ma lee-nu bene neno, kun miyo lobo kacel ki jo ducu ma gibedo iye woro lee mukwoŋo, ma ret ma i wiye onoŋo doŋ ocaŋ woko-ni.
\v 13 En otiyo tic mogo madito ma bedo me aura twatwal, dok bene miyo mac a ki i polo bino piny i lobo ma dano bene gineno.
\v 14 Pi tic mogo ma onoŋo giyene me tiyone i nyim lee mukwoŋo ca, omiyo en obwolo dano ma gibedo i lobo, owaco botgi ni guyub cal mo obed ma ka-ka lee ma onoŋo yam giketo ret i kome ki pala lucwan, ma pud onoŋo obedo kwo-ni.
\v 15 Giyene bene me miyo yweyo i cal lee ma giyubo ca wek omi cal lee-nu olok lok, dok bene wek omi jo ma pe gibiworo cal lee-nu ginekgi woko.
\v 16 Dok bene en omiyo giketo poyo i kom dano ducu, jo matino ki jo madito, lulonyo ki lucan, jo ma gilone kengi wa ki opii bene, i ciŋgi tuŋ lacuc nyo i tur nyimgi.
\v 17 Gitimo man wek dano mo pe owil jami, nyo kadi ki catone, ka pe tye ki poyo meno i kome, ma meno obedo nyiŋ lee ca, nyo namba me nyiŋe.
\v 18 Gin man mito ryeko. ŋat ma niaŋ, ma wiye tiyo twero kwano namba pa lee-nu, pien nambane obedo namba pa dano, nambane tye miya abicel ki pyerabicel wiye abicel.
\c 14
\cl Chura 14
\p
\v 1 Lacen dok aneno Latin romo ma ocuŋ i wi got Cion; onoŋo jo alip miya acel ki pyeraŋwen wiye aŋwen tye kacel kwede, ma doŋ onoŋo gicoyo nyiŋe ki nyiŋ Wonne woko i tur nyimgi.
\v 2 Ci awinyo dwan mo oa ki i polo ma mor calo pii ma tye ka curre, ki dok calo kot ma tye ka mor matek. Dwan ma awinyo ca onoŋo obedo calo dwan lugo-naŋa ma tye ka goyo naŋagi.
\v 3 Onoŋo gitye ka wero wer manyen i nyim komker, ki i nyim lee makwo aŋwen-ni, ki i nyim ludoŋo-gu bene. Pe tye ŋat mo ma onoŋo twero pwonyo wer meno, kono jo alip miya acel ki pyeraŋwen wiye aŋwen ca keken ma doŋ gikokogi woko ki i lobo.
\v 4 Magi gin aye jo ma pe gubalo komgi ki timo tim tarwaŋ ki mon, pien gugwokke gubedo jo maleŋ; dok bene gin jo ma lubo Latin romo ka ma en woto iye ducu. Jo magi aye gin jo ma gikokogi ki i kin dano ducu, wek gubed calo cam mukwoŋo cek ma giyubo pi Lubaŋa ki Latin romo.
\v 5 Pe giwinyo lok goba mo i doggi; gubedo laboŋo roc mo i komgi.
\p
\v 6 Dok aneno lamalaika mukene tye ka tuk wirre i dye polo; onoŋo tye ki lok me kwena maber me atita bot jo ma gibedo i wi lobo, bot rok ducu ki kaka ki leb-gu ki jo mapatpat ducu.
\v 7 Ci oloko ki dwan maloŋo ni, “Wulwor Lubaŋa, wumi deyo bote, pien karene me ŋolo kop doŋ oromo. Wuwor en ŋat ma oketo polo ki lobo ki nam ki waŋ it-gu.”
\v 8 Lamalaika mukene me aryone dok olubo kor lawote, kun wacci, “Babilon madit doŋ opoto, opoto gire woko, en gaŋ ma yam omiyo rok ducu mato koŋo vino me timme me tarwaŋ-ŋi.”
\v 9 Lamalaika mukene me adekke dok olubo korgi, kun loko ki dwan maloŋo ni, “Ka ce ŋat mo oworo lee-nu ki calle, ma noŋo giketo poyo i tur nyime nyo i ciŋe,
\v 10 ci en bimato koŋo vino me akemo pa Lubaŋa, ma oonyo i kikopo me kinigane ma pe girubo ki pii, gibibedo ka une ki mac ki gweŋ calfa ma mac oliyo woko, i nyim lumalaika maleŋ ki i nyim Latin romo bene.
\v 11 Yito mac ma giunogi kwede bedo ka duny nakanaka cito malo, kun pe giywe i dyeceŋ wa i dyewor bene, gin jo ma giworo lee-nu ki calle, kadi wa ŋat ma doŋ giketo poyo me nyiŋ lee meno i kome.”
\v 12 Meno aye ka ma jo pa Lubaŋa myero gunyut iye kit ma giciro kwede can, gin jo ma gwoko cik pa Lubaŋa ki niyegi i kom Yecu Kricito.
\v 13 Dok awinyo dwan mo oa ki i polo ma wacci, “Co lok man ni, Cakke kombeddi jo ma to ma noŋo gitye i Rwot tye ki gum.” Cwiny Maleŋ bene omoko lok man kun wacci, “Adada kit meno, doŋ gibiywe ki i tic matek ma yam gubedo ka tiyone, pien ticgi ma yam gutiyo-ni lubo korgi.”
\p
\v 14 Lacen doki aneno pol matar, ki ŋat mo obedo i wi pol ma cal ki wod pa dano. Lalukana jabu onoŋo tye i wiye, ki pala kac mabit bene onoŋo tye i ciŋe.
\v 15 Ka dok lamalaika mukene okatti ki i ot pa Lubaŋa, kun daŋŋe matek bot ŋat ma onoŋo obedo i wi pol-li ni, “Cwal ciŋi ika kac ki pala kacci, pien kare me kac doŋ oromo, ki gin ma gikayo i lobo bene doŋ ocek woko.”
\v 16 Kit meno ŋat ma onoŋo obedo i wi pol-li oryeyo ciŋe i lobo ki pala kac, ci okayo gin mucek i lobo.
\v 17 Lamalaika mukene doki okatti ki i ot pa Lubaŋa ma tye i polo, en bene onoŋo omako pala kac mabit.
\v 18 Lamalaika mukene dok oa ki i ŋet keno tyer obino; lamalaika meno onoŋo tye ki twero i kom mac. Ci odaŋŋe matek bot ŋat ma onoŋo tye ki pala kac mabit ca ni, “Cwal ciŋi ki pala kacci ci icok nyig olok me lobo, pien nyige doŋ ocek woko.”
\v 19 Kit meno lamalaika oryeyo ciŋe i lobo ki pala kac, ci ocoko olok ducu me lobo, oonyo woko i bur madit me biyo pig olok me akemo pa Lubaŋa.
\v 20 Ci ginyono bur me biyo olok meno woko i ŋe gaŋ, remo omol ki i bur me biyo olok, ma borre romo mairo miya aryo, ki tute piny onoŋo mito romo cokcok futi abic.
\c 15
\cl Chura 15
\p
\v 1 Dok aneno ginanyuta mo mukene madit i polo, ma obedo bene me aura mada, gin lumalaika abiro ma gitye ki gemo abiro. Magi gin aye doŋ gemo me agikkine, pien gin aye gimiyo akemo pa Lubaŋa cobbe kakare.
\p
\v 2 Ka dok aneno gin mo ma nen calo nam me kiyo maleŋ ma orubbe ki mac; doŋ jo ma onoŋo gutayo lee ca ki calle, ki namba me nyiŋe, onoŋo gucuŋ i dog nam me kiyo, kun gumako naŋa pa Lubaŋa i ciŋgi.
\v 3 Onoŋo gitye ka wero wer pa Moses, ma obedo latic pa Lubaŋa, ki wer pa Latin romo kun giwacci, “Ticci ducu ma itiyo bedo me aura, dok gidito, ai Rwot Lubaŋa Won Twer Ducu! Kitti ducu tye atir dok me ada, in Kabaka ma iloyo rok ducu!
\q1
\v 4 Aŋa mono ma pe bilworo, ai Rwot? Aŋa kono ma pe bipako nyiŋi? Pien in keni aye ileŋ. Rok ducu gibino gibio wa i nyimi, gin ducu gibiwori, pien doŋ onen woko ka maleŋ ni ticci ducu tye atir.”
\p
\v 5 Lacen aneno ot pa Lubaŋa, ma en kema lok me caden ma tye i polo; onoŋo oyabbe woko,
\v 6 ci lumalaika abiro gua ki i ot pa Lubaŋa gukatti woko ki gemo abiro. Onoŋo guruko boŋo camanini maleŋ adada, ma gutweyo korgi woko ki del jabu.
\v 7 Ci lee acel ki i kin lee makwo aŋwen-ni omiyo atabo jabu bot lumalaika abiro; onoŋo atabo magi gupoŋ woko ki kiniga pa Lubaŋa ma bedo kwo nakanaka.
\v 8 Yito ma oa ki i deyo pa Lubaŋa ki tekone omwono ot pa Lubaŋa woko limuk, ma ŋat mo onoŋo pe twero donyo iye, nio waŋ ma gemo abiro ma lumalaika abiro gukelo ca doŋ otum woko liweŋ.
\c 16
\cl Chura 16
\p
\v 1 Dok awinyo dwan mo maloŋo oa ki i ot pa Lubaŋa ma waco bot lumalaika abiro ni, “Wucit wuony akemo pa Lubaŋa ma tye i atabo abiro ca-ni woko i lobo.”
\v 2 Lamalaika mukwoŋo ocito oonyo gin ma i i atabone woko i lobo. Ci two bur maraco ma toko kom dano atoka omako jo ma poyo pa lee ca tye i komgi ma giworo calle bene-ni.
\v 3 Lamalaika me aryone oonyo gin ma ii atabone woko i nam, ci olokke odoko calo remo pa dano muto, ki gin makwo ducu ma onoŋo gitye i nam guto woko.
\v 4 Lamalaika me adekke oonyo gin ma i i atabone i kulu ki i waŋ it-gu ducu ci gin ducu gulokke gudoko remo.
\v 5 Cutcut awinyo lamalaika ma loyo pii ka wacci, “Kop ma iŋolo-ni iŋolo giri atir, in ŋat ma tye, yam bene ibedo tye con, in Ŋat Maleŋ.
\v 6 Pien jo ma guoyo remo pa joni maleŋ, ki remo pa lutit lokki, in bene imiyo botgi remo me amatagi. Kakare, can meno oporo gin ma gutimo.”
\v 7 Dok awinyo keno tyer ka daŋŋe ni, “Ada, Rwot Lubaŋa Won Twer Ducu, kop ducu ma iŋolo bedo ada dok atir!”
\v 8 Lamalaika me aŋwenne oonyo gin ma i i atabone woko i kom ceŋ, dok bene giye ni owaŋ dano woko ki mac.
\v 9 Lyeto mager twatwal owaŋo dano atika, mumiyo dano guyeto nyiŋ Lubaŋa ma tye ki twero i kom gemo magi, pe guŋut dok bene pe gumiyo deyo bote.
\p
\v 10 Lamalaika me abic oonyo gin ma i i atabone woko i kom komker pa lee ca, ci kerre doŋ ocako bedo i colpiny; arem madwoŋ omiyo dano gukayo lebgi ma pe wacce,
\v 11 guyeto Lubaŋa me polo pi arem ki bur ma otoko komgi woko, dok bene pe guŋut i kom gin ma gutimo.
\v 12 Lamalaika me abicelle oonyo gin ma i i atabone woko i kulu madit Euprate, ci piine otwo woko pi yubo yo pi wot pa luker ma gia ki yo tuŋ wokceŋ.
\v 13 Lacen aneno cen maraco adek ma gubedo calo ogwal ma okatti ki i doŋ min kulu, ki i dog lee, ki i dog lanebi ma lagoba,
\v 14 pien gubedo cen pa jok ma tiyo tic mogo me aura twatwal. Gin bene giwoto bot luker me wi lobo ducu ka cokogi woko kacel pi mony i nino madit pa Lubaŋa Won Twer Ducu.
\v 15 (Nen, abebino macalo lakwo! Dano ma bedo ma waŋe twolo kun kiyo piny tye ki gum, ma kun noŋo gwoko boŋŋine, wek pe ewot munero, ma dano gineno kome ma pe eruko iye boŋo!)
\v 16 Gucoko luker kacel i kabedo ma gilwoŋo i leb Ibru ni Armagedon.
\p
\v 17 Lamalaika me abirone doŋ oonyo gin ma tye i atabone i dye yamo, ci dwan mo madit oa ki i ot pa Lubaŋa, ki i wi komker kun wacci, “Doŋ otimme!”
\v 18 Ci lutkot ocako wil awila, mor winnye matek, ki mwoc pa kot, ki oyeŋyeŋ madit oyeŋo piny, kit oyeŋyeŋ mo ma peya yam onen cakke ma dano gubedo i lobo; oyeŋyeŋ meno obedo dit adada.
\v 19 I gaŋ madit-ti obarre opokke dul adek, gaŋi pa lurok ducu gumuk gupoto woko piny. Ci Lubaŋa opo pi Babilon ma en gaŋ madit, pi miye ni omat koŋo vino i kikopo me akemone mager.
\v 20 Mumiyo cula nam ducu guriŋo woko, ki godi ducu bene doŋ gurwenyo woko ma pe doŋ giromo noŋogi.
\v 21 Pee mapek twatwal ocorre ki i polo opoto i kom dano, kun pek pa nyig pee acel acel onoŋo cok romo ratili miya acel; nio waŋ ma dano guyeto Lubaŋa pi gemo man me pee-ni, pien gemo meno onoŋo obedo rac ma okato kare.
\c 17
\cl Chura 17
\p
\v 1 Lacen lamalaika acel i kom lumalaika abiro ma onoŋo gitye ki atabo abiro-ni obino bota owacca ni, “Bin wek anyutti kop ma doŋ giŋolo i kom dako ma lakwele marac, ma bedo i wi pii mapol-li.
\v 2 Luker me wi lobo ducu gutimo kwede abor, kadi wa jo ma bedo i lobo ma gumer ki koŋo vino me tim me aborre-ni.”
\p
\v 3 Cutcut lamalaika otiŋa otera i tim, kun onoŋo Cwiny Maleŋ oyuto tamma woko, ci aneno dako mo ma obedo i wi lee mo makwar, ma gicoyo nyiŋ mogo i kom lee-nu ma nyuto cac i kom Lubaŋa; coc meno oromo kome ducu, lee-nu onoŋo wiye tye abiro ki tuŋe tye apar.
\v 4 Dako-nu oruko boŋo ma obedo lamar lamar ki makwar, ma odeyo kome ki jabu, ki kidi me wel, ki tiko matar me wel-gu, kun omako kikopo jabu i ciŋe ma opoŋ woko ki gin ma dano kwero, ki cilo me timme me abor-ri.
\v 5 I tur nyime gicoyo iye nyiŋ mo ma te lokke obedo me muŋ, ni, “Babilon madit, megi mon ducu ma gin malaya, ki jo ducu ma gitimo tim me kwer.”
\v 6 Aneno dako-nu omer woko ki remo pa jo pa Lubaŋa, dok bene ki remo pa lucaden pa Yecu ma ginekogi. Ka doŋ anene ci abedo ki ur madit twatwal.
\p
\v 7 Ento lamalaika owacca ni, “Piŋo iuro? Abititti lok me muŋ pa dako-nu, ki pa lee ma dako obedo i wiye, ma wiye tye abiro ki tuŋe tye apar-ri.
\v 8 Lee ma ineno-ni onoŋo yam tye, ento kombeddi doŋ pe, bilor piny i bur ma tere pe gik, doŋ cito rwenyo woko matwal. Doŋ jo ma bedo i lobo ma yam pe gicoyo nyiŋgi i buk me kwo cakke i acakki piny gibiuro mada me neno lee-nu, pien yam con tye, kombeddi doŋ pe, ento bidwogo.
\v 9 Lok man mito tam ki ryeko. Wiye abiro-gu obedo godi matino abiro ma dako ca obedo iye.
\v 10 Gin bene gubedo luker abiro ma jo abic i komgi doŋ gupoto woko, acel tye, ento acel mukene peya obino. Ka obino, myero koŋ ori pi kare mo manok keken.
\v 11 Ento lee ma yam tye ca, ma kombeddi doŋ pe-ni, en kabaka me aboro, ento en ŋat acel i kin jo abiro ca, dok bicito woko ci rwenyo matwal.
\v 12 Doŋ tuŋ lee apar ma ineno ca gin aye luker apar ma peya gulimo twero me loc, ento myero gulim twero me loc macalo luker pi cawa acel, kacel ki lee ca bene.
\v 13 Jo magi onoŋo yam tamgi tye acel, ci gumiyo twerogi ki ditogi woko bot lee ca.
\v 14 Jo-nu biero mony i kom Latin romo, ento Latin romo bitayogi woko, pien Rwot pa rwodi, ki Kabaka ma loyo luker ducu, dok jo ma tye bote aye jo ma gilwoŋogi, ma giyerogi ma gin jo ma genne.”
\v 15 Dok owacca ni, “Pi madwoŋ ma i kulu ma ineno ca, ka ma dako ma lakwele obedo iye-ni, magi aye gin dano ma i wi lobo, ki lwak rok ducu ki leb-gu ducu.
\v 16 Doŋ tuŋ lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke doŋ munero, gibicamo riŋo kome ci giwaŋo woko ki mac.
\v 17 Pien Lubaŋa aye ma oketo mit man i cwinygi, wek gucob tamme kun gibedo ki cwiny acel, ka wek doŋ gumi twerogi bot lee ca, nio waŋ ma lok ma Lubaŋa owaco ocobbe kakare.
\v 18 Dako ma ineno ca en aye gaŋ madit ma tye ka loyo luker ducu me wi lobo.”
\c 18
\cl Chura 18
\p
\v 1 Lacen dok aneno lamalaika mukene ka lor piny kun a ki i polo, ma onoŋo tye ki twero madit; deyone oryeny ocaro wi lobo ducu.
\v 2 Ci odaŋŋe ma dwane winnye matek twatwal ni, “Babilon madit doŋ opoto, opoto gire woko! Doŋ odoko kabedo pa jogi, odoko bene ka kanne pa cen maraco ducu, ki pa winyo maraco ma i dano kwero.
\v 3 Rok ducu gumato koŋo vino me timme macol me tarwaŋ ca, luker ducu me wi lobo gutimo kwede abor, ki lucat-wil ma i wi lobo ducu doŋ gumedde gudoko lulonyo pi bedone me caro ki tim twarwaŋe-ni ma okato kare.”
\p
\v 4 Dok awinyo dwan mukene ma oa ki ipolo kun wacci, “Wun jona, wua woko ki bote, wek pe wuribbe kwede i balle, wek bene pe wunywak kwede gemo mogo ma poto i kome!
\v 5 Pien balle doŋ odurre malo lipim, oo wa i polo, Lubaŋa doŋ opo i kom tim maraco ducu ma yam en otimo.
\p
\v 6 Wutim dako-nu ki kit tim ma yam en otimowu kwede, ma en otimo, wurub gin ma en mato obed mapek twatwal i kikopone kikome ma ya en orubo iye ginamata botwu-ni.
\v 7 Dok wumi bote arem ki kumo ma rom ki kit ma en obedo ka wakke kwede, ki timme me caro caro. Pien en waco ki i cwinye ni, ‘An daker, abedo i wi kom, pe arom ki da-to, pe abibedo ki kumo wacel’,
\v 8 pi meno gemone ducu bipoto i kome i nino acel, two odeke, kumo ki kec. Gibiwaŋe woko bene ki mac, pien Rwot Lubaŋa ma ŋolo kop i kome tekke dit.”
\p
\v 9 Doŋ luker me wi lobo ma yam gutimo abor kwede, ma gulubo timme me tarwaŋ, gibikok pire kun gidoŋo oduru ma noŋo ginene doŋ tye ka waŋ i mac kun yitone duny.
\v 10 Gibicuŋ wa cen pi lworo kit can ma giune kwede, kun giwacci, “Ai do, ai do! Ineno can ba, in Babilon, gaŋ madit dok matek! Kop ma giŋolo i komi doŋ opoto i komi lawaŋacel.”
\v 11 Lucat-wil me lobo bene gitye ka koko kun gikumo pire, pien ŋat mo pe ma dok biwilo jami ma opoŋ i melgi,
\v 12 jabu, ryal, litino kidi me wel, tiko matar me wel, boŋo camanini maberre, boŋŋi ma obedo lamar lamar, boŋŋi aridi ki makwar, ki kit bao mapatpat ducu ma ŋwecgi kur, jami ducu ma gitiyo ki lak lyec-gu, jami ducu ma gitiyogi ki bao ma welgi malo twatwal, mola, nyonyo, ki got me gedo ma giliyo aliya maber twatwal,
\v 13 cinamon ki gin mogo mukene ma ŋwecgi kur, odok eceta me awaŋa, murra, odok luban, koŋo vino, moo jeituni, moko mapwot ki ŋano, dyaŋi ki romi, aguragura, ki gadigadi lweny, opii, kadi wa kwo pa dano kikome.
\v 14 “Nyig yat ma yam cwinyi paro twatwal-li doŋ gikwanyo woko ki boti, cam mogo mamit ma pe nen atata ki jami ma gipwoyo ki waŋ, doŋ gurwenyo woko ki boti, pe dok ibinoŋogi matwal!”
\v 15 Lucat-wil ma yam gicato jami magi ducu, ma doŋ gudoko lulonyo pi gaŋ meno, gibicuŋ wa cen ka mabor pi lworo ki can ma giune kwede, kun gikok matek ma kumo kwede ni,
\v 16 “Ai do, ai do, gaŋ madit-ti oneno can ba, en gaŋ ma yam onoŋo giruko woko ki boŋo camanini maberre, ki boŋŋi ma lamar lamar ki makwar, kun gidero woko ki jabu, kidi me wel, ki tiko matar me wel bene.
\v 17 Lonyo madit kit man-ni giketo woko teŋteŋ lawaŋacel.” Ludito me mel, ki jo ma woto i nam, ludwo mel ki jo ducu ma gitiyo tic me cato wil i nam, gucuŋ wa cen ka mabor.”
\v 18 Ci gudaŋŋe matek ka gunene tye ka waŋ kun yito duny, kun giwacci, “Gaŋ mene ma onoŋo yam rom ki gaŋ man madit-ti?”
\v 19 Ciguonyo putu i wigi, i kare ma gitye ka koko kun gikumo ma gidaŋŋe ki koko matek pire ni, “Ai do, ai do, ineno can ba, in gaŋ madit-ti, ka ma jo ducu ma yam gitye ki melgi i nam gudoko lulonyo pi lonyone madwoŋŋi! Giketo woko teŋteŋ i cawa acel keken.
\p
\v 20 Wudaŋŋe ki wer me yomcwiny, wun lwak me polo, wun jo maleŋ, wun lukwena ki lutit lok pa Lubaŋa, pien Lubaŋa doŋ odwoko kop ma yam oŋolo i komwu-ni i kome!”
\p
\v 21 Lalaikmaa mo matek otugi kwanyo gweŋ mo madit ma rom ki kidi rego, ci obolo woko i nam, kun wacci, “Babilon ma en gaŋ madit-ti gibitimo ki tim bwami gicanyo woko matek i ŋom, pe doŋ gibinoŋo matwal!
\v 22 Dwan lugo-naŋa ki jo ma goyo wer ducu, dwan lukut nyamulere ki lukut tum pe dok biwinnye boti matwal. Dano mo ma tiyo tic me diro pe dok binoŋŋe boti matwal. Mor pa kidi rego pe dok biwinnye boti matwal.
\v 23 Tara mo pe dok bilyel menyi, kadi ki dwan lanyom ki dwan nyako ger pe dok biwinnye boti matwal; pien lucat-willi onoŋo yam gin jo ma pigi dito atika i lobo yam bene ibwolo rok ducu ki tim jokjok ma ibedo ka timone.
\v 24 Remo pa lutit lok pa Lubaŋa ki pa jo maleŋa, remo pa jo ducu ma yam ginekogi i lobo, ginoŋo tye i Babilon.”
\c 19
\cl Chura 19
\p
\v 1 Lacen i ŋe man awinyo woo madwoŋ macalo dwan lwak dano mapol ata ma gktye i polo ma giwacci, “Aleluya! Laro dano ki deyo ki teko tye bot Lubaŋawa,
\v 2 pien kop ma en ŋolo ducu tye ada dok atir. En doŋ oŋolo kop woko i kom dako ma malaya-ni, ma yam obalo lobo woko ki timme me abor-ri, dok bene oculo kwor me remo pa luticce i kome.”
\v 3 Gin dok gudaŋŋe tyen me aryone kun giwacci, “Aleluya! Yito me waŋo gaŋ-ŋi duny mucido cito malo lituu nakanaka.”
\q1
\v 4 Ci ludoŋo pyeraŋwen-ni kacel ki lee makwo aŋwen-ni guryebbe woko piny guworo Lubaŋa ma obedo i wi komkerri, kun giwacci, “Amen. Aleluya!”
\v 5 Dwan mo dok oa ki i wi komker ma wacci, “Wupak Lubaŋa, wun luticce ducu, wun jo ma wulwore, jo matino wa ki jo madito.”
\v 6 Ka dok awinyo dwan mo ma winnye calo lwak madit ma giwo, calo mor pa pii ma corre, dok calo mor kot ma mwoc matek. Guwacci, “Aleluya! Pien Rwot Lubaŋawa Won Twer Ducu, tye ka loc.
\q1
\v 7 Wabedu ki yomcwiny, kun wadwore, dok bene wami deyo bote, pien kare me nyom pa Latin romo doŋ oo, nyako gerre bene doŋ oyubbe woko;
\v 8 gimiyo boŋo camanini maberre ma ryeny dok maleŋ en aye ni en oruki.” Pien boŋo camanini maberre-nu obedo gin ducu ma tye atir ma jo maleŋ gitimo.
\p
\v 9 Ci lamalaika owacca ni, “Co lok man ni, Jo ma gilwoŋogi i karama pa Latin romo tye ki gum.” Dok owacca ni, “Lok magi lok pa Lubaŋa.”
\v 10 Cutcut aryebbe woko piny ka tyene ka wore, ento en owacca ni, “Pe myero itim kit meno! An latic wadiwu, dok arom ki utmegini ma gumako lok me caden ma Yecu omiyo botgi-ni. Wor Lubaŋa.” Pien lok me caden ma Yecu omiyo aye cwiny ma miyo lutit lok gitito lok pa Lubaŋa.”
\p
\v 11 Lacen aneno polo oyobbe, cut atugi neno aguragura matar! Ŋat ma obedo i wiye gilwoŋo ni ŋat ma Genne dok me Ada, gin ma en timo ducu tye atir i ŋolo kop kadi wa i lweny bene.
\v 12 Waŋe ryeny calo mac, dok onoŋo oruko lalukana mapol me loc i wiye; onoŋo bene tye ki nyiŋ mo ma gigoro ma ŋat mo pe ŋeyo, kono en keken gire aye ŋeyo.
\v 13 Oruko boŋo ma onoŋo giluto i remo, dok nyiŋ ma onoŋo gilwoŋe kwede en aye Lok pa Lubaŋa.
\v 14 Lwak mony mapol me polo ma guruko boŋo camanini maberre, matar dok maleŋ, gulubo kore ma giriŋo ki aguragura matar.
\v 15 Pala lucan mabit okatti ki i dogge, ma en bineko ki lurok woko ducu, ka doŋ bibedo ka loyogi ki odoo nyonyo; en binyono bur me biyo koŋo vino me akemo pa Lubaŋa mager ma en Won Twer Ducu-ni.
\v 16 Onoŋo gicoyo nyiŋ i kom jorre ki i eme ma kwanne ni, Kabaka ma loyo luker ducu ki Rwot pa rwodi.
\p
\v 17 Ka dok aneno lamalaika mo ocuŋ i ceŋ. En olwoŋo kwa winyo ducu mapatpat ma gituk i dye yamo ki dwan maloŋo ni, “Wubin, wugurre kacel ka camo cam me otyeno ma Lubaŋa oyubo,
\v 18 ka camo riŋo kom luker, ki riŋo kom ludito wi mony, ki riŋo kom jo ma yam gin oteka, riŋo aguragura ki riŋo kom jo ma ŋweco kwedgi, ki riŋo dano ducu, jo ma gilone kengi kacel ki opii, jo matino ki madito ducu.”
\v 19 Lacen aneno lee ca ki luker me lobo guywayo monygi me lweny i kom ŋat ma obedo i wi aguragura kacel ki monnye.
\v 20 Ento gimako lee ca woko, kacel ki lanebi ma lagoba, ma yam obedo ka tiyo tic mogo me aura i nyime, ma obwolo dano ma onoŋo doŋ giketo poyo pa lee ca i komgi, ki ma yam onoŋo giworo calle-ni. Gin aryo-nu ducu, lee ki lanebi ma lagoba, gibologi woko makwo i nam me mac, ma tye ka lyel ki gweŋ calfa ma mac oliyo.
\v 21 Jo mudoŋŋe ducu ginekogi woko ki pala lucwan pa ŋat ma obedo i wi aguragura matar-ri, ki pala lucan ma okatti ki i doge; winyo ducu guyeŋ woko ki riŋo kom dano ma gucamo.
\c 20
\cl Chura 20
\p
\v 1 Ka dok aneno lamalaika mo oa ki i polo kun lor bino piny; onoŋo omako layab me bur ma tere pe gik, ki nyor mapek adada.
\v 2 Ci omako min kulu madit ca, ma obedo twol macon-ni, ma en aye Ladot dok Catan bene, ka otweye woko pi mwaka alip acel,
\v 3 ci obole woko i bur ma tere pe gik, oloro dog bur woko, omwono woko bene kun oketo lanen i wiye wek pe dok omedde ki bwolo rok ducu, nio waŋ ma mwaka alip acel doŋ okato. I ŋe meno myero gigonye woko pi kare mo manoknok.
\p
\v 4 Lacen dok aneno kamker mapol, jo ma gubedo i wigi obedo jo ma onoŋo gimiyo botgi twero me ŋolo kop. Aneno bene tipo pa jo ma yam giŋolo ŋutgi woko pi miyo cadengi i kom Yecu ki pi lok pa Lubaŋa, gin jo ma yam pe guworo lee ca, nyo calle, dok bene ma yam pe guketo poyone i tur nyimgi nyo i ciŋgi. Gin doki gubedo kwo, gubedo ka loc kacel ki Kricito pi mwaka alip acel.
\v 5 Jo muto mukene-gu ducu pe dok gubedo kwo, nio waŋ ma mwaka alip acel doŋ okato. Man aye cer mukwoŋo.
\v 6 Tye ki gum ŋat ma bibedo i cer man mukwoŋo-ni, dok bene en dano maleŋ pa Lubaŋa kikome. Jo macalo meno, to me aryo pe tye ki twero mo i komgi, ento gin doŋ gibibedo ajwagi pa Lubaŋa ki pa Yecu, dok bene gibibedo ka loc kacel kwede pi mwaka alip acel.
\p
\v 7 Ka inen mwak alip acel doŋ otum, ci gibigonyo Catan woko ki i mabucce.
\v 8 Ci en bikatti woko cito ka bwolo rok ducu ma tye i but piny, ma en aye Gog ki Magog, bicokogi bene pi lweny, jo ma welgi pe kwanne ma girom ki kweyo me dog nam.
\v 9 Gumol gucito guket woko i wi lobo ka malac ci gurumo gony pa jo pa Lubaŋa ki gaŋ ma en maro-ni, ento mac oa ki i polo ci owaŋogi woko liweŋ.
\v 10 Catan ma yam obwologi-ni bene gibolo woko i nam me mac ki gweŋ calfa ma mac oliyo, ka ma lee ki lanebi ma lagoba bene gitye iye ca; gibibedo ki arem nakanaka dyeceŋ ki dyewor.
\p
\v 11 Dok aneno komker mo madit matar, ki ŋat ma obedo i wiye. Lobo ki polo gua ki i nyime guriŋo woko, ento pe dok ginoŋo kabedo mo pigi.
\v 12 Ci aneno jo muto, jo madito ki jo matino, kun gucuŋ i nyim komker, onoŋo bene tye kenyo buk mogo ma giyabo igi woko. Giyabo bene buk mo mukene ma en aye buk me kwo. Giŋolo kop i kom jo muto kun gilubo gin ma yam gin gutiyo, kit macalo onoŋo gicoyo i buk magi.
\v 13 Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi; ci giŋolo kop pa dano acel acel kun gilubo gin ma yam gin gutiyo.
\v 14 Gibolo To ki Lyel woko i nam mac. Nam me mac aye meno to me aryo.
\v 15 Gam mo ma yam pe ginoŋo nyiŋe gicoyo i buk me kwo, gibolo woko i nam me mac.
\c 21
\cl Chura 21
\p
\v 1 Lacen dok aneno polo manyen ki lobo manyen, pien polo mukwoŋo ki lobo mukwoŋo onoŋo doŋ gurwenyo woko, kadi wa nam bene onoŋo doŋ pe.
\v 2 Ci aneno gaŋ maleŋ, Jerucalem manyen, kun oa ki i polo bot Lubaŋa bino piny, ma giyubo woko macalo nyako ger ma gideyo pi cware.
\v 3 Ci awinyo dwan mo maloŋo ma oa ki i komker kun wacci, “Nen, kabedo pa Lubaŋa doŋ tye bot dano. En bibedo kacel kwedgi, ci gin gibibedo jone. Lubaŋa kikome aye bibedo kwedgi, kun bene bedo Lubaŋagi.
\v 4 En bijwayo pig waŋgi woko ducu. To bene doŋ bibedo pe, kadi kumo nyo koko, nyo arem, pien gin macon doŋ ducu gurwenyo woko matwal.”
\p
\v 5 Ci ŋat ma obedo i wi komker owacci, “Nen, aketo jami ducu doko nyen.” Ka dok bene owacci, “Co lok man, pien lok magi lok ma genne dok me ada.”
\v 6 Ci owacca ni, “Doŋ otimme! An Alupa ki Omega, an acakki ki agikki. ŋat ma orwo neko, abimiyo mato pii me waŋ it me kwo laboŋo wel mo.
\v 7 Meno aye mot ma ŋat ma oloyo binoŋo, ki an abibedo Lubaŋane, en bene bibedo latinna.
\v 8 Ento jo ma lwor, ma pe gin lugen, lutim tim mogo me kwer, lunek dano, lutim abor, lutim tim jokjok, luwor cal jogi, ki jo ducu ma gin lugoba, gibinoŋo mot ma gipoko botgi i nam ma tye ka lyel mac ki gweŋ calfa; meno aye to me aryo.”
\p
\v 9 Ci malaika acel ki i kin lumalaika abiro ma onoŋo gitye ki atabo abiro ma gemo abiro me agikki tye i igi ca, obino oloko bota kun wacci, “Bin, anyutti Nyako ger, dako pa Latin romo.”
\p
\v 10 Cutcut otiŋa, otera woko wa i wi got mo madit mabor twatwal, kun onoŋo Cwiny Maleŋ doŋ oyuto tamma woko, ka onyutta Jerucalem, gaŋ maleŋ, ma oa ki i polo bot Lubaŋa bino piny.
\v 11 Jerucalem ma onoŋo tye ki deyo pa Lubaŋa. Onoŋo ryeny calo kidi me wel madit makato ducu, ma pe nen atata, calo jacipa, dok leŋ calo gweŋ ma mil amila.
\v 12 Celle onoŋo dit ocudo malo likuŋ, doge onoŋo tye apar wiye aryo. Lumalaika apar wiye aryo onoŋo gitye i dogcel ducu, dok bene i dogcel onoŋo gicoyo iye nyiŋ kaka apar wiye aryo pa jo Icrael.
\v 13 Dogcel adek onoŋo tye yo tuŋ wokceŋ, yo tuŋ acam dogcel adek, yo tuŋ acuc dogcel adek, ki yo tuŋ potoceŋ bene dogcel adek.
\v 14 Cel me gaŋ bene onoŋo tye ki te gutine apar wiye aryo, ci i komgi onoŋo tye iye nyiŋ lukwena apar wiye aryo pa Latin romo.
\p
\v 15 ŋat ma oloko kweda-ni onoŋo tye ki odoo lagada jabu me pimo gaŋ ki dogcel ki cel kikome.
\v 16 Gaŋ meno onoŋo yam twoke tye aŋwen ma giromrom, borre rom ki lacce, ci opimo cel ki odoone, oromo mairo alip acel ki miya abic; borre ki lacce ki borre ma odok malo ducu gubedo rom.
\v 17 En bene dok opimo cel, ci oromo futi miya aryo ki apar wiye abicel ka gipimo ki bad dano, kit macalo lamalaika opimo kwede.
\p
\v 18 Cel onoŋo gigero ki jacipa, ki gaŋ mere gigero ki jabu keken, ma noŋo nen maleŋ calo kiyo.
\v 19 Te guti ducu me gaŋ onoŋo gideyo woko ki litino kidi me wel mapatpat. Mukwoŋo obedo kidi ma gilwoŋo ni jacipa, me aryo capir, me adek agat, me aŋwen emeradi,
\v 20 me abic onik, me abicel karnelian, me abiro kuricolit, me aboro berul, me aboŋwen topaj, me apar kuricoparac, me apar wiye acel jacint, me apar wiye aryo ameticito.
\v 21 Gin me loro dogcel apar wiye aryo-ni onoŋo obedo tiko matar me wel apar wiye aryo, gin me loro dogcel acel acel gitiyo ki kit tiko-nu acel keken; yo ducu ma i gaŋ gipeto ki jabu keken, ma nen leŋ calo kiyo.
\p
\v 22 Pe aneno ot mo me woro Lubaŋa i gaŋ meno, pien ot me woro Lubaŋa ki kunnu en aye Rwot Lubaŋa Won Twer Ducu kikome, ki Latin romo.
\v 23 Ceŋ nyo dwe pe bimitte i gaŋ meno me ryeny iye, pien deyo pa Lubaŋa aye leŋo ma tye kunnu, ki tarane en aye Latin romo.
\v 24 Leŋo ma tye iye bimiyo rok ducu giwoto maber; ki luker ducu ma i wi lobo gibikelo deyogi iye.
\v 25 Pe gibiloro dogcelle i dyeceŋ, ki dyewor bene bibedo pe kunnu.
\v 26 Gibitero iye deyo ki lonyo pa rok ducu.
\v 27 Ento gin mo ma kome keni pe bidonyo iye, kadi ki ŋat mo ma timo gin me kwer, nyo gin me goba, ento kono jo ma nyiŋgi doŋ gicoyo woko i buk me kwo-ni keken.
\c 22
\cl Chura 22
\p
\v 1 Lamalaika dok onyutta kulu me pii me kwo, ma mil amila lamakmak calo gweŋ ma mil, ma onoŋo mol kun a ki i komker pa Lubaŋa ki pa Latin romo,
\v 2 onoŋo mol lubo dye yo me gaŋ meno. Dok bene i dog kulu ryoryo onoŋo yat me kwo tye iye, ma tye ki nyige mapatpat ma romo apar wiye aryo, onoŋo bene nyak dwe ki dwe. Pot yat meno onoŋo obedo yat me caŋo two pa jo me rok ducu.
\v 3 Gin ma giceno pe dok binen kunnu, ento komker pa Lubaŋa ki pa Latin romo aye bibedo iye, ki luticce gibiwore.
\v 4 Gibineno waŋe, ki nyiŋe bene bibedo i tur nyimgi.
\v 5 Dyewor doŋ pe bibedo tye matwal; pe dok gibimito mac ma caro piny, nyo ceŋ, pien Rwot Lubaŋa bibedo ceŋgi, ci gin gibibedo ka loc nakanaka.
\p
\v 6 Ka dok owacca ni, “Lok magi lok ma genne, dok me ada. Rwot ma en Lubaŋa ma loyo cwiny lutit lokke doŋ ocwalo lamalaikane me nyuto bot luticce gin ma bitimme i kare macokcok-ki.
\v 7 Nen, doŋ acok bino.” Tye ki gum dano ma lubo lok ma gitito i buk man.
\p
\v 8 An aye Jon, ŋat ma yam owinyo lok man dok oneno gin magi ducu. I kare ma awinyo lok man dok ma anenogi, cutcut aryebbe woko piny ka tyen lamalaika ma onyutta gin magi ka amiye woro;
\v 9 ento en owacca ni, “Pe myero itim kit meno! An latic wadiwu, arom ki utmegini ma gin lutit lok pa Lubaŋa, ki jo ma gilubo lok ma gicoyo i buk man. Wor Lubaŋa.”
\v 10 Ka dok owacca ni, “Pe imwon lok magi ma gitito i buk-ki woko, pien kare doŋ cok.
\v 11 Wek lutim maraco koŋ gumedde ki timo gin marac jo ma cilo me bal obwoyogi gumedde ki bedo ki bal, ki jo ma kitgi atir myero gumedde ki timo gin ma tye atir, ki jo maleŋ bene myero pud gumedde ki bedo leŋ.”
\p
\v 12 “Nen, doŋ acok bino, kun akelo motta me pwoc, me culo dano acel acel muporo tic ma en otiyo.
\v 13 An Alupa ki Omega, mukwoŋo ki me agikki, acakki ki agikki.”
\v 14 Jo ma lwoko ginarukagi wek gibed ki twero me camo nyig yat me kwo, ki me donyo i gaŋ ma noŋo giwok ki i dogcel, jo-nu aye tye ki gum.
\v 15 I ŋe gaŋ woko tye iye jo ma timo tim calo gin gwogi, lutim tim jokjok, lutim abor, lunek dano, ki luwor cal jogi, ki jo ducu ma maro loko goba, kun gitiyo bene gin me gobagoba.
\p
\v 16 “An Yecu doŋ acwalo lamalaikana me tito lok me caden botwu pi lwak jo muye an ducu ma gitye i kabedo ducu. An a lwit yat dok bene lakwar Daudi, an latwok ma ryeny twatwal-li.”
\p
\v 17 Cwiny Maleŋ kacel ki nyako ger gitye ka wacci, “Bin!” ŋat ma owinyo lok man bene myero ogam ni, “Bin!” ŋat ma orwo neko myero obin, wek ŋat ma mito bene omat pii me kwo laboŋo wel.
\p
\v 18 Doŋ aciko jo ducu ma guwinyo lok ma gitito i buk man, ni, ka ce dano mo dok omedo lok mo iye, Lubaŋa bene bimedo gemo ma gitito pire i buk kany-nyi i kome.
\v 19 Dok bene ka ce ŋat mo okwanyo lok mo woko ki i kom lok ma gitito i buk kany, Lubaŋa bene bikwanyo twerone me camo yat me kwo ki donyo i gaŋ maleŋ woko, ma gicoyo pigi i buk kany-nyi.
\p
\v 20 ŋat ma miyo caden i kom lok magi bene owacci, “Adada, binona doŋ cok.” Amen. Rwot Yecu, bin!
\p
\v 21 Kica pa Rwot Yecu obed ki jo pa Lubaŋa ducu. Amen.