ach-ss-acholi_reg/61-1PE.usfm

\id 1PE
\ide UTF-8
\h 1 Petero
\toc1 1 Petero
\toc2 1 Petero
\toc3 1pe
\mt 1 Petero
\c 1
\cl Chura 1
\p
\v 1 Waraga man oa ki bot Petero, lakwena pa Yecu Kricito. Bot jo pa Lubaŋa ma guket woko ata, ma gubedo welo i Ponto, Galatia, Kapadokia, Acia ki Bitunia,
\v 2 ma Lubaŋa Won aye muyerogi pi yubbe ma en oŋeyo con, ma Cwiny mere Maleŋ doŋ olonyogi gudoko maleŋ wek guwiny lok pa Yecu Kricito, dok bene wek gikir remone i komgi: Kica ki kuc myero omedde botwu.
\p
\v 3 Gipwo Lubaŋa Won Rwotwa Yecu Kricito! Pien pi kicane madit omiyo ginywalowa odoco wek wabed ki gen makwo pi cer pa Yecu Kricito ki i kin jo muto,
\v 4 ki dok wek wanywak ginaleya ma pe top, ma cilo pe ogudo, ma pe balle, ma gikano piwu i polo.
\v 5 Lubaŋa tye ka gwokowu ki tekke pi niyewu, wek wunoŋ larre ma giyubo, ma binen i kare me agikki piny.
\v 6 Wubed ki yomcwiny pi man, kadi bed kombeddi gwok nyo cwinywu twero cwer pi kare manoknok mo pi kit ma gitye ka omo ki cwinywu i yo mapatpat,
\v 7 wek ginen niyewu, ka ce tye niye me ada. Pien kadi jabu ma gitemo ki mac pe ri nakanaka, ento niyewa pire dit kato jabu, dok bene bikelo botwu pak ki deyo ki woro i kare ma Yecu Kricito binen iye.
\v 8 Kadi pud pe wunene, doŋ wumare. Dok bene kombeddi kadi pe wunene, wuye en kun wubedo ki yomcwiny madit ma pe wacce, dok bene me deyo.
\v 9 Adwoggi me niyewu omiyo wunoŋo larre me tipowu.
\p
\v 10 Lunebi ma yam gutito pi kica ma gibimiyowu yam guyenyo matek, kun gipenyo lok i kom larre man.
\v 11 Gin yam gumito ni giŋe aŋa, nyo kit kare mene, ma Cwiny pa Kricito ma tye i igi tye ka nyuto, i kare ma otito iye pi can ma Kricito biciro, ki pi deyo ma dok bilubo.
\v 12 Yam onoŋo ginyuto botgi ni, kwena ma gimiyogi pe otiko gin kikomgi, ento otiko wun. En aye lok ma kombeddi doŋ jo ma gitito lok me kwena maber gutyeko tito botwu pi Cwiny Maleŋ ma gicwalo ma oa ki i polo; lok ma lumalaika bene guparo me nenone matek twatwal.
\p
\v 13 Pi meno, doŋ wubed ma wuyubbe i tamwu, kun wugokke bene. Wuket genwu ducu i kom kica ma bibino botwu i kare ma Yecu Kricito binen iye.
\v 14 Macalo litino ma luwiny, pe wumi kwowu orwatte ki mitiwu ma yam koŋ wubedo kwede i kare ma onoŋo pud wukwiya piny ca.
\v 15 Kit macalo ŋat ma olwoŋowu leŋ, wun bene wubed jo maleŋ i kitwu ducu;
\v 16 pien coc ma yam gicoyo loko ni, “Wubedo jo maleŋ, pien an aleŋ.”
\p
\v 17 ŋat ma wulwoŋo ni Wonwu-ni ŋolo kop i kom dano acel acel ma pe leŋŋe, kun lubo kit tic ma ŋat acel acel otiyo; mumiyo myero wubed ki lworo i nyime kare ducu ma pud wutye kany macalo welo.
\v 18 Wun wuŋeyo ni gityeko kokowu ki i kit pa kwarowu ma pe konyo. Pe gikokowu ki gin ma balle woko, macalo ryal nyo jabu,
\v 19 ento gikokowu ki remo pa Kricito me wel madwoŋ ma rom ki latin romo ma bal mo nyo roc mo pe i kome.
\v 20 Lubaŋa onoŋo doŋ otyeko yere wa con, ma pud pe oketo guti me lobo, ka dok onyute woko piwu i kare man, ma en aye kare me agikki.
\v 21 Pire omiyo doŋ wadoko jo ma geno Lubaŋa ma ocero Yecu ki i kin jo muto, ci omiye deyo; en meno gin mumiyo niyewu ki genwu tye i kom Lubaŋa-ni.
\p
\v 22 Doŋ wulonyo cwinywu woko odoko maleŋ pi lubo lok ada, wek wubed ki mar ma goba pe iye macalo utmego; pi meno myero wumarre kekenwu mada ki cwinywu ducucu.
\v 23 Doŋ ginywalowu odoco, pe ki kodi ma balle, ento ki kodi ma pe balle, pi twero me lok pa Lubaŋa, en lok ma tye ki kwo ma ri nakanaka.
\v 24 pien yam gicoyo ni, “Gin ducu ma tye ki kom obedo calo lum, deyone ducu rom ki deyo pa tur lum. Lum ner, ature bene o woko,
\v 25 ento lok pa Rwot ma en oloko bedo matwal.” Lok meno en aye lok me kwena maber ma yam gitito botwu.
\c 2
\cl Chura 2
\p
\v 1 Pi meno, doŋ wubwot raccwiny ducu, ki kit me goba ducu, ki kit me adwala, nyeko ki kit yet ducu.
\v 2 Wumit cak magili me cwiny, calo litino lukere ma pud ginywalogi nyen, wek omi wudoŋ nio i larre;
\v 3 pien doŋ wutyeko bilo ber pa Rwot.
\p
\v 4 Wubin bote, en got makwo ma yam dano gukwero, ento ki bot Lubaŋa obedo got me wel ma en oyero.
\v 5 Wubin calo godi makwo, wek giged kwedwu ci wudok ot pa Lubaŋa me cwiny, wek wubed ajwagi maleŋ, ka wutyer gitum me cwiny ma Lubaŋa pwoyo, pi Yecu Kricito.
\v 6 pien yam gicoyo ni, “Nen, doŋ aketo got me wel i Cion, ma ayero me got me twok ot, ŋat muye en, lewic pe bimako.”
\p
\v 7 Pi meno, ki tuŋ botwu wun jo muye en, Kricito obedo me wel; ento ki bot jo ma pe guye en, tye macalo yam gicoyo ni, “Got ma lugedo gukwero, en aye odoko got madit me twok ot.”
\p
\v 8 Odoko bene, “Got ma miyo dano yokke ka giwoto, ariya ma miyo dano poto.” Giyokke pien gukwero winyo lok pa Lubaŋa, macalo onoŋo yam giyubo pigi wa con.
\p
\v 9 Ento wun wubedo rok ma giyero, ajwagi pa kabaka, rok maleŋ, jo pa Lubaŋa kikome, wek wutit pi tic me deyo pa ŋat ma olwoŋowu nia ki i piny macol wek wudony i leŋone me aura.
\v 10 Yam onoŋo pe wubedo dano pa Lubaŋa, ento kombeddi doŋ wudoko jone; yam pe gitimo botwu kica, ento kombeddi doŋ gitimo kica botwu. Kwowu obed calo kwo pa opii pa Lubaŋa.
\p
\v 11 Wun ma amaro, abako doga botwu macalo wun wel, pe wun jo me lobo man, wukwer miti me kom woko ma lwenyo ki tipowu.
\v 12 Wubed ki kit maber i kin jo ma pe giŋeyo Lubaŋa, wek ka ce giyetowu ni wun lutim gin marac, gunen tic maber ma wutiyo, wek bene gumi deyo bot Lubaŋa i nino ma en bibino ka ŋolo kop iye.
\p
\v 13 Pi Rwotwa, myero wumine me bedo i te loc me twero ducu ma tye i kin dano, bot laloc madit, pien en aye ma loyo jo ducu,
\v 14 ki bot luloc ma en ocwalogi pi keto can i kom jo ma timo gin maraco, ki pi pwoyo jo ma timo gin ma atir.
\v 15 Pien Lubaŋa mito ni wuti gin ma atir, wek wumi jo mamiŋ ma gikwiya piny guliŋ woko.
\v 16 Wubed calo jo ma lone kengi, ento pe wuti ki locken meno pi timo gin marac; wubed giwu macalo opii pa Lubaŋa.
\v 17 Wuwor dano ducu. Wumar omegiwu. Wulwor Lubaŋa. Wuwor laloc madit. Lanen me can pa Kricito
\v 18 Wun opii, wumine kenwu i te loc pa Luditowu ki kit woro ducu, pe bot jo ma lukica ki jo mamwol keken, ento bot jo mager bene.
\v 19 Man aye gin ma gipwoyo, ka ce dano ciro arem ma noŋo cwinye tye i kom Lubaŋa, ka giune ma noŋo pe obalo.
\v 20 Gipwoyowu ki ŋo, ka wudiyo cwinwyu ma noŋo gipwodowu pi bal? Ento ka ce wudiyo cwinywu ma noŋo wutye ka neno can pi timo gin maber, meno aye Lubaŋa pwoyo.
\v 21 Pien gilwoŋowu pi gin meno; pien Kricito bene yam oneno can piwu, oweko botwu lanen maber me aluba, wek wulub kore.
\v 22 Bal mo pe ma en otimo, doge bene pe oloko lok goba.
\q1
\v 23 I kare ma dano guyete, en pe oyetogi. I kare ma en oneno can, pe oburo dano; ento omine kene bot ŋat ma ŋolo kop atir.
\q1
\v 24 Ento en otiŋo balwa i kome kene i kom yatariya, wek wan wato i bal, ka doŋ wabed kwo i kit ma atir. Pi pwod ma gipwode kwede omiyo wucaŋ.
\v 25 Pien yam onoŋo wuŋak wurwenyo woko calo romi, ento kombeddi doŋ wudwogo bot Lakwat ki Lagwok tipowu.
\c 3
\cl Chura 3
\p
\v 1 Kit meno bene, wun mon wumine me bedo i te loc pa cogwu, wek ka ce co mogo i kingi pe gilubo lok pa Lubaŋa, ci gitwero lokke pi kit pa mongi, kadi bed gin kikomgi pe giloko lok mo ki doggi,
\v 2 ento ka guneno kitwu maleŋ ma nen me woro.
\v 3 Rukwu pe obed ruk ma nen ki woko, macalo kedo yer wic, tweyo tiko jabu, ruko boŋŋi mabeco,
\v 4 ento rukwu myero obed kit me cwiny ma pe nen. Ruk ma pe balle en cwiny mamwol, ma liŋ mot; meno aye welle dit i nyim Lubaŋa.
\v 5 Pien i kare macon, mon maleŋ ma gumoko gengi i kom Lubaŋa yam girukke kit meno, kun bene gimine kengi me bedo i te loc pa coggi,
\v 6 macalo Cara yam winyo lok pa Abraim, kun pake bene ni, “Rwoda.” Wun bene kombeddi doŋ wun litinone, ka wutiyo gin maber, kun pe gin mo miyowu lworo.
\p
\v 7 Kit meno bene, wun co wubed ki monwu ki niaŋ maber, kun wumiyo deyo bot dako macalo lawoti ma kome pe tek, pien gin bene ginywako kica pa Lubaŋa kwedwa ma en aye kelo kwo. Kumeno gin mo pe ma bigeŋo legawu. Neno can pi lubo kit ma atir.
\p
\v 8 Me agikkine, wun ducu wubed ki tam acel dok ki cwiny acel. Wumarre calo omego, ma wutye ki kica dok ki cwiny mamwol.
\v 9 Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubaŋa obed i komgi, pien gilwoŋowu pi man, wek wunoŋ gum.
\v 10 Pien yam gicoyo ni, “ŋat ma maro kwo, ki ma mito ni eri pi kare malac kun bedo maber. Ogwok lebe pe olok gin marac, ki doge bene pe olok lok me bwola.
\q
\v 11 Oa woko ki i gin marac, oti gin maber, oyeny kuc dok oti matek wek onoŋ.
\q
\v 12 Pien Rwot neno jo ma kitgi atir, dok ciko ite, winyo legagi; ento dag neno jo ma lutim maraco.”
\p
\v 13 Aŋa mono ma bitimowu marac ka wuketo cwinywu me tiyo gin maber?
\v 14 Ento kadi bed wuneno can pi lubo kit ma atir, ci wutye ki gum. Pe wulworgi, dok cwinywu bene pe opoti.
\v 15 ento wuwor Kricito i cwinywu macalo Rwotwu. Wubed ma wuyubbe kare ducu pi dok i lok ma dano bipenyowu kwede i kom gen ma wutye kwede; ento wudok iye ki mwolo dok ki woro.
\v 16 Wubed ma cwinwyu leŋ, wek lewic omak jo ma yeto kitwu maber i Kricito, ka ginywarowu.
\v 17 Bedo ber ka wuneno can pi timo gin maber, ka ce Lubaŋa mito kit meno, loyo ma wuneno can pi timo gin marac.
\v 18 Pien Kricito bene yam oneno can pi bal, kicel ma otyeko lok ducu; en ŋat ma kite atir oto pi jo ma kitgi pe atir, wek omi ekelwa bot Lubaŋa. Yam gineko kome, ento gicere woko i cwiny.
\v 19 En yam owoto i cwiny ocito otito lok bot tipo pa jo ma tye i mabuc,
\v 20 ma yam con pe guwinyo Lubaŋa, kadi bed Lubaŋa odiyo cwinye i komgi i kare pa Nua ma onoŋo en tye ka payo yeya, ma dano manok ma romo aboro keken aye gularre ki i pii.
\v 21 Gin ma rom ki man ma koni larowu en aye batija; pe me lwoko cilo me kom, ento obedo macalo lega bot Lubaŋa wek wudok jo ma cwinywu leŋ, pi cer pa Yecu Kricito,
\v 22 ma doŋ odok woko i polo, tye i kabedo me deyo i ŋet Lubaŋa tuŋ acuc, kun lumalaika ki twer ki teko ducu gitye i te locce.
\c 4
\cl Chura 4
\p
\v 1 Kit macalo Kricito yam ociro arem me kom, wun bene myero wurukke ki tam acel kit meno, wek gimiwu tek. Pien ŋat mo ma doŋ ociro arem kom, pe doŋ medde ki bal,
\v 2 wek etyek kare me kwone i lobo man ma pud odoŋ kun pe dok lubo miti maraco ma dano paro, ento cobo gin ma Lubaŋa mito.
\v 3 Myero doŋ wuwek kare ma yam wubedo iye ka tiyo gin ma jo ma pe ŋeyo Lubaŋa gimaro timo oromwu. Yam wulubo kit me tarwaŋ, ki miti me kom, mero, karama me woro cam ki tuko marac, mat, ki woro jogi ma ic dagi.
\v 4 Giuro mada pien kombeddi doŋ pe wuribbe kwedgi i lok man me miti me kom ma pe jukke; meno aye mumiyo ginywarowu.
\v 5 Ento gibidok i lok man bot Lubaŋa ma oyubbe pi ŋolo kop pa jo makwo ki jo muto.
\v 6 Man en gin mumiyo yam gitito lok me kwena maber kadi wa bot jo muto, wek kadi giŋolo kop i komgi macalo giŋolo ki jo ducu, gin gubed kwo i cwiny macalo Lubaŋa.
\v 7 Agikki me jami ducu doŋ cok; pi meno wugwok kitwu, kun wuloyo mitiwu kenwu, wek wumine i lego Lubaŋa.
\v 8 Makato ducu wumok matek i marre kekenwu; pien mar umo lwak bal mapol.
\v 9 Wubed jo ma jolo welo ŋat man ki lawote, kun pe wuŋur bene.
\v 10 Kit macalo ŋat acel acel tye ki motte ma gimiye, wuti kwede pi konnye kekenwu, macalo lugwok-jami mabeco, ma tiyo ki mot me kica ma Lubaŋa omiyo ma kite patpat.
\v 11 Ka ŋat mo tito lok, myero otit macalo lok mua ki bot Lubaŋa; ŋat ma miyo kony oti macalo ŋat ma tiyo ki tek ma Lubaŋa omiyo; wek dano guket deyo i kom Lubaŋa i yo ducu pi Yecu Kricito. Deyo ki twero bedo mere nakanaka. Amen.
\v 12 Luwota ma amaro, pe wuur can ma rom ki mac ma bino i komwu pi temowu, ma kun wutamo ni gwok ca nyo gin mo mapat twatwal mupoto i komwu.
\v 13 Ento wubed ki yomcwiny i lok man ni, wuribbe i can pa Kricito, wek dok wubed ki yomcwiny madit i kare ma deyone binen.
\v 14 Wutye ki gum ka giyetowu pi nyiŋ Kricito, pien noŋo cwiny me deyo, ma en Cwiny pa Lubaŋa, bedo i komwu.
\v 15 Pe myero giket can i kom dano mo i kinwu pi nek, nyo pi kwo, nyo pi timo gin mo marac, nyo pi laro lok i gin pa ŋat mo mukene.
\v 16 Ento ka giketo can i kom dano mo pi bedo ŋat muye Kricito, lewic pe myero omake, ento omi deyo bot Lubaŋa pi lwoŋe ki nyiŋ meno.
\v 17 Pien kare me cako ŋolo kop doŋ oromo, kun cakke ki i jo pa Lubaŋa. Man ka ocakke ki botwa, ci agikki pa jo ma gukwero winyo lok me kwena maber ma oa ki bot Lubaŋa bibedo niŋniŋ?
\v 18 Coc ma yam gicoyo wacci, “Ka ce bedo tek bot dano ma kite atir me larre, doŋ labalo ma pe lworo Lubaŋa binene ka kwene?”
\p
\v 19 Pi meno, jo ma gineno can i yo ma Lubaŋa mito, ber gumine kengi i ciŋ Lacwec ma genne, kun gitiyo gin ma atir.
\c 5
\cl Chura 5
\p
\v 1 Abako doga bot ludoŋo ma gitye i kinwu, an ma ladit wadiwu ma abedo caden i can pa Kricito, dok bene abiribbe kwedwu i deyone ma binen.
\v 2 Wukwa romi pa Lubaŋa ma tye botwu, kun wunenogi maber, pe pi dic, ento pi mitiwu kenwu, i kit ma Lubaŋa mito, pe pi lim, ento pi mit me cwinywu.
\v 3 Pe wulo dano ma giketo i ciŋwu ki tek, ento wubed lanen maber bot romi;
\v 4 miyo ka Lakwat madit binen, wun wubinoŋo mot, lalukana me deyo ma pe balle.
\p
\v 5 Kit meno, wun awobe bene, wuwiny loc pa ludoŋo. Wun ducu wurukke ki mwolo, ŋat acel acel i nyim lawote, pien “Lubaŋa pyem ki jo ma wakke, ento miyo kica bot jo mamwol.”
\p
\v 6 Wumwolle kenwu i te twero pa Lubaŋa, wek ka kare oromo en otiŋwu malo.
\v 7 Wuket parwu ducu i kome, pien en tamo piwu.
\p
\v 8 Wugwokke, wuki piny, pien lakworwu Catan tye ka wirre macalo labwor ma kok, kun yenyo dano me amwoda.
\v 9 Wucuŋ matek i nyime pi niye kun waŋeyo ni, utmegiwu ma gitye i lobo ducu gitye ka ciro kit can macalo meno.
\v 10 Ka doŋ wuneno can pi kare manok, Lubaŋa lami kica ducu, ma olwoŋowu i Kricito Yecu me nywako deyone ma ri nakanaka, en kikome aye ma bidwokowu kakare, bimiyowu tek, dok bimiyo wucuŋ matek likiŋ.
\v 11 Loc obed bote nakanaka. Amen.
\p
\v 12 Acoyo botwu waraga man manok kun amiyo i ciŋ Silvano, ma aŋeyo ni ominwa ma genne, pi cuko cwinywu kunu aloko macalo caden ni, man en kica pa Lubaŋa ada; wucuŋ iye matek.
\p
\v 13 Jo ducu muye Kricito ma gitye i Babilon ma Lubaŋa oyerogi kacel kwedwu gumotowu, ki woda Marako bene omotowu.
\v 14 Wumotte kekenwu ki mot me mar. Kuc obed botwu wun ducu ma wutye i Kricito.