ach-ss-acholi_reg/59-HEB.usfm

\id HEB
\ide UTF-8
\h Jo Ibru
\toc1 Jo Ibru
\toc2 Jo Ibru
\toc3 heb
\mt Jo Ibru
\c 1
\cl Chura 1
\p
\v 1 Yam con Lubaŋa oloko ki kwarowa i dul lok mapol dok i yo mapatpat, kun loko ki i dog lunebi;
\v 2 ento i kare man ma lacen-ni en doŋ oloko kwedwa i Wode. Jami ducu ma tye, Lubaŋa ceŋ otiyogi pi twer pa Wode, ma en oyubo ni myero obed won jami ducu.
\v 3 En dero me deyo pa Lubaŋa, cal pa Lubaŋa kikome tye i kome, dok en bene ma tiŋo jami ducu ma tye, ki teko me lokke. Ma doŋ en otyeko tic me lwoko bal, en obedo piny i kabedo me deyo tuŋ acuc i ŋet Won Deyo Madwoŋ ma tye malo i polo.
\p
\v 4 kun doŋ en odoko ladit mada makato lumalaika ducu, ma rom aroma ki kit ma nyiŋ ma gimiye ber matek makato megi woko.
\v 5 Lubaŋa yam koŋ owaco ki lamalaika mo ni, “In i Woda, tin doŋ anywali”? Nyo dok ni, “An abibedo Wonne, en bibedo Woda”?
\p
\v 6 Dok bene i kare ma kelo latin kayo i lobo en owaco ni, “Lumalaika pa Lubaŋa ducu myero guwore.”
\p
\v 7 I kom lumalaika, Lubaŋa oloko ni, “En loko lumalaikane doko yamo, luticce en loko doko leb mac.”
\p
\v 8 Ento i kom Wode en oloko ni, “Komkerri, in Lubaŋa, biri nakanaka, odoo kerri en odoo me ŋolo kop atir.
\q
\v 9 In imaro kit ma atir, cwinyi dag tim marac; pi meno Lubaŋa, ma en Lubaŋani, owiri ki moo, moo me yomcwiny madwoŋ, makato luwoti ducu.”
\p
\v 10 En dok oloko ni, “In Rwot wiati iketo guti me lobo, polo bene en tic me ciŋi.
\q
\v 11 Gin birwenyo woko oyot, ento in iri nakanaka; gin ducu gibiti macalo boŋo,
\v 12 ibidologi woko macalo ibano koti, gibilokogi macalo ginaruka. Ento in ibedo ma kiti tye acel, mwakani pe bigik.”
\p
\v 13 Lubaŋa yam owaco ki lamalaika mo ni, “Bed i ŋeta tuŋ acuc i kabedo me deyo, nio ka abimiyo lukworri gidoko kom laten tyeni?”
\p
\v 14 Lumalaika kono dok gubedo aŋagi? Gin ducu gubedo cwiny mogo ma tiyo tic pa Lubaŋa; en orogi ka konyo jo ma binoŋo larre.
\c 2
\cl Chura 2
\p
\v 1 Pi meno wan myero waketu cwinywa twatwal i gin ma yam wawinyo, wek pe waŋak woko ki iye.
\v 2 Lok me kwena ma yam lumalaika gukelo onoŋo omoko matek. Ka ŋat mo okalo wi cik mo, nyo okwero winyo, gimiye can iye ma oporo bal ma en obalo.
\v 3 Wan kono dok wabibwot niŋniŋ ka pe waketo cwinywa i larre man ma pire dit twatwal-li? Larre man Rwot aye mukwoŋo tuco pire, ka doŋ jo ma yam guwinyo ki bote, gumoko botwa lokke.
\v 4 Lubaŋa bene omedo cadenne kun tiyo lanyut mogo ki taŋo ki tic madito mapatpat, dok kun poko mot mogo me Cwiny Maleŋ pi mitte kene.
\p
\v 5 Pien Lubaŋa pe oketo lobo ma mito bino ma wan waloko pire-ni i te loc pa lumalaika.
\v 6 Tye ka mo ma gituco ka maleŋ ni, “Dano gin aŋo, mumiyo ipo pire? Nyo latin pa dano, mumiyo iparo pire?
\q
\v 7 Ikete ki piny i te lumalaika pi kare manoknok, iketo en obedo laloc ma loyo gin ducu ma iketogi;
\v 8 iketo en obedo lalo jami ducu.” Doŋ ka oketo jami ducu i te loc pa dano, pe oweko gin mo ma en pe loyo. Kit macalo tye-ni pud pe waneno ka giketo jami ducu i te twerone.
\v 9 Ento wan waneno Yecu ma yam gikete ki piny i te lumalaika pi kare manoknok, ento kombeddi doŋ gimiye deyo ki woro macalo kabaka pi arem me to ma en ociro, wek pi kica pa Lubaŋa ebil to pi jo ducu.
\p
\v 10 Jami ducu tye pi Lubaŋa, dok en aye muketogi. doŋ ka yam en omito kelo litino mapol i deyone, gin ma en otimo obedo ma myero twatwal, en mumiyo latel wigi i larre doko dano muteggi pi ciro can.
\v 11 ŋat ma olonyogi bedo maleŋ, ki jo ma gilonyogi-ni, gin ducu gua i kom ŋat acel; man en aye gin mumiyo lewic pe mako Yecu me lwoŋogi ni omegine,
\v 12 kun owaco ni, “Abitito nyiŋi bot utmegina, abipaki ki wer i dye lwak mucokke.”
\p
\v 13 Dok ni, “Abiketo genna i kome,” ki dok ni, “An a ene, ki litino ma Lubaŋa doŋ omiya.”
\p
\v 14 Kit macalo litino i kare ducu giribbe i kom ki remo, en bene kit meno onywako kwedgi komgi ki remogi, wek pi tone eŋiny ŋat ma tye ki twer i kom to woko, meno en aye Catan,
\v 15 ka doŋ egony jo ma yam gubedo i twec me opii pi kare me kwogi ducu pi lworo to.
\v 16 Doŋ onen maber ni, gin ma en otimo pe okemo lumalaika, ento okemo likwayo pa Abraim.
\v 17 Meno gin mumiyo en myero odok ma rom aroma ki utmegine i yo ducu, wek omi ebed ajwaka madit ma lakica dok lagen i tic pa Lubaŋa, wek omi ekwany bal pa jone woko.
\v 18 Pien en kikome yam oneno can dok Catan obite, en mumiyo en twero konyo jo ma gibitogi.
\c 3
\cl Chura 3
\p
\v 1 Pi meno, wun utmegina maleŋ ma Lubaŋa olwoŋowu kacel kweda, koŋ wutam lok i kom Yecu ma en lakwana dok ajwaka madit me niye ma wan watuco.
\v 2 En obedo lagen bot Lubaŋa muyero okete i tic, ma rom aroma ki Moses ma yam obedo lagen i ot pa Lubaŋa.
\v 3 Lager ot gimiye deyo madit makato ot; kit meno Yecu bene nene gikwano ni deyone dit kato pa Moses woko.
\v 4 Pien ot mo keken dano aye ma gero, ento ŋat ma gero jami ducu en aye Lubaŋa.
\v 5 Moses yam obedo lagen i ot pa Lubaŋa ducu macalo latic, pi miyo caden i lok ma gibiloko i kare ma lacen.
\v 6 Ento Kricito obedo lagen i kom ot pa Lubaŋa macalo Wode. Wan aye wa ode ka ce wamoko matek i tekcwinywa, ki i wakkewa pi gen ma watye kwede.
\p
\v 7 Doŋ macalo Cwiny Maleŋ oloko ni, “Ka wuwinyo dwan Lubaŋa tin,
\v 8 pe wumi cwinywu obed nwaŋ calo jo ma yam gujemo, i kare ma guomo kwede cwinya i tim.
\v 9 ka ma kwarowu guomo iye cwinya, gutema bene iye, kun gibedo ka neno ticca pi mwaka pyeraŋwen kulu.
\p
\v 10 Pi meno cwinya owaŋ i kom jo me kare meno, omiyo awaco ni, ‘Gin kare ducu giŋak woko i tamgi; gin pe giŋeyo yona wacel.’
\p
\v 11 macalo yam akwoŋo ki kiniga, ‘Gin pe bidonyo i yweyo bota.’”
\p
\v 12 Wugwokke, utmegina, wek ŋat mo i kinwu pe obed ki cwiny marac, cwiny ma pe ye Lubaŋa, ma twero miyo en a woko ki bot Lubaŋa makwo.
\v 13 Ento myero wujiŋ cwinywu kekenwu kare ducu ka pud wutwero lwoŋo ni, “Tin”, wek ŋat mo i kinwu pe cwinye odok nwaŋ pi bwola me bal.
\v 14 Pien wan wabedo jo ma ribbe ki Kricito, ka ce wamoko matek i genwa mukwoŋo nio wa i agikki,
\v 15 macalo yam giwaco ni, “Ka wuwinyo dwane tin, pe wumi cwinywu obed nwaŋ calo jo ma yam gujemo.”
\p
\v 16 Aŋagi ma yam guwinyo dwan Lubaŋa ci gujemo woko-ni? Pe gin lwak dano ducu ma yam gua ki i lobo Ejipt ma kun Moses aye obedo ka telogi?
\v 17 Dok aŋagi ce ma yam cwinye owaŋ i komgi pi mwaka pyeraŋwen kulu-ni? Pe gin aye jo ma yam gutimo bal, ma komgi odoŋ i tim kunnu?
\v 18 Dok en yam okwoŋo kwoŋ bot jo mene ce ni, gin pe gibidonyo i yweyo bote? Pe okwoŋo kwoŋ meno bot jo ma yam pe gubedo luwiny?
\v 19 Pi meno wan waneno ni, jo meno yam pe gutwero donyo pien onoŋo gukwero ye Lubaŋa.
\c 4
\cl Chura 4
\p
\v 1 Pi meno cikke me donyo i yweyo pa Lubaŋa pud tye, ento myero wabedu ma lwor, wek ŋat mo i kinwu pe ginoŋ ni opoto woko me o iye.
\v 2 Wan doŋ wawinyo lok me kwena maber bene calo gin, ento lok me kwena ma gin guwinyo pe okonyogi, pien pe orwatte ki niyegi.
\v 3 Wan jo ma waye aye wabidonyo i yweyo meno ma yam en oloko pire ni, “Macalo yam akwoŋo ki kiniga, ‘Gin pe bidonyo i yweyo bota,’” kadi bed ticce onoŋo yam otum woko cakke i acakki piny.
\v 4 Pien tye ka mo ka ma yam en oloko i kom nino me abiro ni meno, “Lubaŋa oywe i nino me abiro ki i kom ticce ducu.”
\p
\v 5 Ka dok kany en bene oloko ni, “Gin pe bidonyo i yweyo bota.”
\p
\v 6 Kit meno yo pud tye twolo wek jo mogo gudony iye. Jo ma yam gikwoŋo tito botgi lok me kwena maber pe gudonyo, pien gin gukwero bedo ki winy.
\v 7 En dok oketo nino mukene ma gilwoŋo ni, “Tin,” kun olok lacen ki i dog Daudi ma doŋ onoŋo okato kare malac ata, i lok ma nene waloko pire, ni, “Ka wuwinyo dwane tin, pe wumi cwinywu obed nwaŋ.”
\p
\v 8 Pien ka kono yam Yocwa omiyogi yweyo, kono Lubaŋa pe oloko lacen pi nino mukene.
\v 9 Pi meno, yweyo me cabit pud tye pi jo pa Lubaŋa;
\v 10 pien ŋat ma doŋ odonyo i yweyo bot Lubaŋa noŋo doŋ oywe woko ki i ticce, calo Lubaŋa ma yam oywe woko ki i ticce-ni.
\p
\v 11 Doŋ pi man, myero wayelle me donyo i yweyo meno, wek omi ŋat mo pe dok opot woko pi kwero bedo ki winy calo gin.
\v 12 Pien lok pa Lubaŋa obedo gin makwo, dok tiyo matek, bit bene kato pala lucwan ma lebe bit ryoryo woko. Lok meno tuco iwa pil, tuc tuŋcel ka ma tipo ki cwiny gurwatte iye, nyo ka ma waŋ mwot orwatte iye ki moo ma i i cogo, kun poko par ki tam mabecone ki maracone ma tye i i dano.
\v 13 Pe tye gin mo mukanne ki bot Lubaŋa ma en pe neno, jami ducu ma en oketo odurre woko ka maleŋ i waŋe, en aye ŋat ma biŋiyo kwowa.
\p
\v 14 Kit macalo doŋ watye ki ajwaka madit twatwal ma doŋ otyeko donyo i polo, en Yecu, Wod pa Lubaŋa, pi meno myero wamok matek i niye ma watuco.
\v 15 Pien ajwaka madit ma watye kwede pe obedo ŋat ma pe winyo arem kacel kwedwa pi gorowa, pien en bene Catan yam obite i yo ducu calo wan, ento en pe omedo ki timo bal mo.
\v 16 Iyo, wan myero doŋ wanyiku cok i nyim komker pa Lubaŋa ki tekcwiny, ka ma kica tye iye, wek otimwa kica, wanoŋ bene kica ma konyowa i kare ma mitte.
\c 5
\cl Chura 5
\p
\v 1 Pien ajwaka madit acel acel giyero ki i kin lwak, ka gikete me tiyo tic i nyim Lubaŋa ma kakagi, kun tyero mot ki gitum pi bal.
\v 2 En twero tic ki dano ki mwolo, jo ma kwiya piny ki jo muŋak, pien en kikome bene noŋo goro oketo kome woko.
\v 3 Pi man, en myero otyer gitum pi balle en kikome, kacel ki pi bal pa lwak.
\v 4 Dok bene pe tye ŋat mo ma yerre kene pi dit man, Lubaŋa aye ma lwoŋe iye, macalo olwoŋo Aron.
\v 5 Kit meno bene, Kricito yam pe oketo deyo i kome kekene me bedo ajwaka madit, ento Lubaŋa aye muyere, kun wacce ni, “In i Woda, tin doŋ anywali.”
\p
\v 6 Macalo owaco bene ka mukene ni, “In ibedo ajwaka nakanaka, i kit pa Melkijedek.”
\p
\v 7 Yecu yam ocwalo legane bot Lubaŋa, i kare me kwone i lobo man, en aye bot ŋat ma yam twero lare ki i to, kun bako doge ma pe twerre ki koko ki pig waŋe, ci Lubaŋa bene owinye pi mwolone bote.
\v 8 Kadi en obedo Wod pa Lubaŋa, yam en opwonnye me bedo ki winy pi can ma en doŋ oneno.
\v 9 Ka doŋ oteggi, ci odoko ŋat ma kelo larre ma pe tum bot dano ducu ma winyo en,
\v 10 Lubaŋa cut oyere me bedo ajwaka madit i kit pa Melkijedek.
\p
\v 11 Watye ki lok mapol ma myero walok i lok man, ento tek twatwal me niaŋowu, kit macalo wun doŋ wudoko nyap ka winyo lokwa-ni.
\v 12 Kombeddi onoŋo doŋ wuromo bedo lupwony, ento myero ŋat mo koŋ dok opwonywu odoco i lok mukwoŋo ma dok i kom lok pa Lubaŋa. Mito gipitwu koŋ ki cak, ento pe cam matek.
\v 13 Pien ŋat ma doto cak pe tye ki ŋec mo ma dok i kom bedo ki kit ma atir, pien noŋo pud en latin.
\v 14 Doŋ cam matek tye pi jo muteggi, ma ryekogi ma gupwonnye kwede me poko gin maber ki gin marac doŋ ojiŋ pi ketone i tic.
\c 6
\cl Chura 6
\p
\v 1 Pi meno, koŋ waweku lok mukwoŋo i kom Kricito, ento wamedde anyim ki pwony pa jo muteggi, kun pe dok wanwoyo keto te gutine, ma en aye ŋut i kom tic ducu ma yam kwo pe iye, ki moko niyewa i kom Lubaŋa,
\v 2 ki dok me pwonnye i kom lok magi: kit batija mapatpat, keto ciŋ i wi dano, cer pa jo muto, ki kop ma giŋolo matwal.
\v 3 Wabitiyo man giwa ka Lubaŋa oye.
\v 4 Jo ma doŋ koŋ ceŋ omenyogi kicel, ma gubilo mot ma oa ki i polo, kun gibedo i kin jo mulimo Cwiny Maleŋ,
\v 5 ma bene doŋ gutyeko bilo lok pa Lubaŋa kit ma mit kwede dok gubilo gin ma bitimme i kare ma bibino i anyim, kit jo meno ka guŋak woko, pe dok gitwero rocogi wek gudok manyen ka doŋ guŋuti.
\v 6 Ka doŋ guŋak woko, meno gitye ka guro Wod pa Lubaŋa i kom yatariya pigi kengi, kun giketo lewic i kome i nyim lwak.
\v 7 Pien Lubaŋa miyo gum i kom lobo ma mato kot ma cwer i kome kare ki kare, ka dok ceko ginapita ma konyo jo ma gipuro pigi.
\v 8 Ento ka ce onyayo okuto ki ocok, konnye noŋo doŋ pe, kuro mere ka cen pa Lubaŋa keken, agikkine en aye mac ma gibiwaŋo kwede woko.
\p
\v 9 Ento wun, luwota, kadi bed waloko kit man, wageno ni wutye maber ma wukato jo meno i lok ma dok i larre.
\v 10 Pien Lubaŋa gire pe ye gin ma pe tye kakare, wiye pe biwil i kom tic ma yam wutiyo, kadi ki mar ma wunyuto pire ki konyo jo pa Lubaŋa, ma pud wutye ka konyogi bene wa i kare-ni.
\v 11 Doŋ wamito ŋat acel acel i kinwu oket cwinye nio wa agikki, wek omi gin ma wuketo iye genwu-ni ocobbe kakare.
\v 12 Pe wudok luwackom, ento wulub kit pa jo ma pi niyegi, ki pi diyo cwinygi, gitye ka noŋo gin ma yam Lubaŋa ociko pire.
\p
\v 13 I kare ma Lubaŋa cikke bot Abraim, kit macalo pe tye ŋat mo ma kate-ni ki dit ma myero en okwoŋ ki nyiŋe, en okwoŋo ki nyiŋe kekene,
\v 14 kun waco ni, “Adada abimii gum, dok abimiyo likwayu ginya gidoko mapol.”
\v 15 Doŋ Abraim pi diyo cwinye omiyo en onoŋo gin ma yam Lubaŋa ociko pire.
\v 16 Ka dano mo kwoŋo kwoŋ ci kwoŋo ki nyiŋ ŋat madit loye, dok ka pyem mo tye i kin dano, lok ma gimoko ki kwoŋ aye ma tyeko pyem meno.
\v 17 En gin mumiyo Lubaŋa omoko cikkene ki kwoŋ, pien onoŋo mito nyuto maber twatwal bot jo ma myero gunoŋ gin ma giciko pire ni, gin ma en doŋ etyeko yubo, pe dok ebiloko woko.
\v 18 Tye doŋ jami aryo ma pe dok lokke, ma Lubaŋa pe twero bwolo iye dano. Pi man, wan jo ma wariŋo walaro bote watye ki gin ma cuko cwinywa matek wek wamak gen ma giketo i nyimwa.
\v 19 Watye ki gen man macalo lajuk me mel, ma cwinywa cuŋ iye matek, ma pe wawirre atata. Gen meno donyo wa i kabedo maleŋ i ot pa Lubaŋa, i ŋe boŋo kicika,
\v 20 ka ma Yecu otelo yo odonyo iye piwa, kun doŋ odoko ajwaka madit ma bedo nakanaka i kit pa Melkijedek.
\c 7
\cl Chura 7
\p
\v 1 Melkijedek man yam obedo kabaka me Calem, dok bene ajwaka pa Lubaŋa Mamalo Twal. En orwatte ki Abraim i kare ma Abraim onoŋo doŋ dwogo ki ka neko luker ca, ci cut olamo gum i kom Abraim;
\v 2 ka doŋ Abraim opokke dul acel me apar me jami ducu ma en onoŋo. Mukwoŋo en kabaka me kit ma atir, man aye te lok me nyiŋe, dok bene en kabaka me Calem, ma te lokke ni, ‘Kabaka me kuc.’
\v 3 Wonne mo pe, minne-gu pe, kwarine bene pe, acakki me karene, kadi wa agikki me kwone bene pe. En obedo cal ki Wod pa Lubaŋa, obedo ajwaka nakanaka.
\p
\v 4 Koŋ wunen kit ma en dit kwede! Abraim, ma en aye kwarowa, yam omiyo bote dul acel me apar me jami ma en oyako.
\v 5 Doŋ jo ma i kin likwayo pa Levi ma gubedo ajwagi, cik pa Moses yam ocikogi me jogo dul acel me apar ki bot jo Icrael. Meno onoŋo gijogo ki bot utmegigi, kadi bed gin bene gubedo likwayo pa Abraim.
\v 6 Ento danu-nu ma kwarone pat ki megi-ni ogamo dul acel me apar ki bot Abraim, ka dok olamo gum i kom ŋat ma Lubaŋa ocikke bote.
\v 7 Pe dok tye kalo akala mo me waco ni, lalam gum dit kato ŋat ma en olamo gum i kome.
\v 8 Dok ki tuŋcel waneno ni, jo ma jogo dul acel me apar gin jo ma to woko, ento ki tuŋcel ŋat ma jogo en ŋat ma yam gicoyo lok i kome ni pud kwo.
\v 9 ŋat mo twero waco ni, ka Abraim, omiyo dul acel me apar, Levi bene kikome, ma jogo dul acel me apar, yam omiyo mere kun wok ki bot Abraim,
\v 10 pien i kare ca onoŋo en pud tye i kom Abraim ma kwarone i kare ma Melkijedek rwatte kwede ca.
\p
\v 11 Doŋ ka kono yam gin ducu twero cobbe kakare pi ajwagi ma gin Lulevi, ma jo Icrael yam gunoŋo cik pa Lubaŋa kacel kwedgi-ni, piŋo gimito ni ajwaka mukene dok obin i kit pa Melkijedek, kun pe giwaco ni, i kit pa Aron?
\v 12 Pi meno ka giloko ajwaka, ci cik bene myero gilok woko.
\v 13 Pien Rwotwa ma giloko lok magi i kome-ni obedo dano me kaka mukene, ma ŋat mo i kingi peya otiyo tic mo i kom keno tyer.
\v 14 ŋene gire maber ni, Rwotwa yam oa ki i kin likwayo pa Juda, dok Moses yam pe oloko lok mo i kom kaka meno ma mako ajwagi.
\v 15 Lok man doŋ otyeko nen woko ka maleŋ makato ka ajwaka mukene otuc macalo Melkijedek,
\v 16 ma odoko ajwaka, pe pi cik mo ma lubo kaka, ento pi tek me kwone ma gin mo pe romo tyeko.
\v 17 Pien coc ma yam gicoyo oloko ni, “En bibedo ajwaka nakanaka, i kit pa Melkijedek.”
\p
\v 18 Cik macon doŋ gibolo woko, pien onoŋo goro, dok konnye pe,
\v 19 pien cik pa Moses yam pe ocobo gin mo kakare, ento kombeddi doŋ gikelo gen mo maber makato, ma twero miyo wanyiko cok bot Lubaŋa.
\p
\v 20 Medo i kom meno bene, Lubaŋa yam okwoŋo kwoŋ i kome. Jo mukene ca gudoko ajwagi laboŋo kwoŋ mo,
\v 21 ento Yecu odoko ajwaka pi kwoŋ pa Lubaŋa ma yam owacce ni, “Rwot doŋ okwoŋo kwoŋ, pe dok biloko tamme, ‘In ibedo ajwaka nakanaka.’”
\p
\v 22 Meno omiyo gicikke ma Yecu ocuŋ pire obedo ber makato mukene ca.
\p
\v 23 Ajwagi mukene ca onoŋo yam welgi dwoŋ, pien to onoŋo ogeŋo nyimgi woko wek pe gumedde ki tic,
\v 24 ento Yecu bedo i dog ticce me ajwaka matwal, pien en bedo nakanaka.
\v 25 Mumiyo i kare ducu en tye ki twer me laro jo ma nyiko cok bot Lubaŋa, kun giwok ki bote, pien en bedo kwo kare ducu ka bako doge pigi.
\p
\v 26 Ajwaka madit macalo meno aye ma romo cobo mitiwa. En leŋ, gin mo marac pe i iye, cilo me bal pe ogude. Yam gipoko en woko ki i kom lubalo, gitiŋe malo i wi polo.
\v 27 En pe calo ajwagi mukene madito ca, ma gityero gitum bot lubaŋa jwijwi, mukwoŋo pi balgi kengi, ka lacen doŋ pi bal pa lwak. Yecu otyero gitum kicel keken ma otyeko lok ducu i kare ma omine kene macalo gitum.
\v 28 Adada, cik pa Moses yero jo magoro ketogi bedo ajwagi madito, ento lok me kwoŋ ma gikwoŋo lacen i ŋe cik, oyero Wod pa Lubaŋa oketo obedo muporre matwal.
\c 8
\cl Chura 8
\p
\v 1 Kombeddi gin ma pire dit ma watye ka lokone kany en ene: Wan watye ki ajwaka madit macalo man, ma doŋ obedo i kabedo me deyo yo tuŋ acuc i ŋet komker pa Won Deyo Madit i polo.
\v 2 En tiyo ticce i kabedo maleŋ, i kema me ada ma Rwot aye oguro, ento pe dano.
\p
\v 3 Ajwaka madit acel acel giyere me miyo mot ki tyero gitum bot Lubaŋa; pi meno mitte bene ni Yecu myero obed ki gin mo me atyera.
\v 4 Kono nene en tye i lobo kany, kono pe obedo ajwaka wacel, pien ajwagi doŋ tye ma gimiyo mot kun gilubo cik pa Moses.
\v 5 Ento gin ma gitiyo giporo ki tipo ki cal keken me kabedo maleŋ ma tye i polo; pien i kare ma Moses doŋ yam cok guro kema, Lubaŋa ocike ni, “Nen ni itiyo jami ducu kun ilubo kit cal ma ginyutti ki i wi got.”
\v 6 Ento kit macalo tye, Kricito doŋ onoŋo tic maber atika makato megi-ni woko, rom ki kit gicikke ma en oyubo ma obedo ber matek makato mukene macon ca, pien Lubaŋa omoko kun onoŋo ociko pi miyo jami mabeco makato.
\p
\v 7 Kono ka bal mo obedo pe i gicikke mukwoŋo, kono onoŋo gicikke mo me aryo doŋ pe mitte.
\v 8 Ento Lubaŋa onoŋo bal tye i komgi, pien owaco ni, “Kare biromo, man lok pa Rwot, ma abimoko iye gicikkena manyen ki jo me doggola pa Icrael, ki jo me doggola pa Juda.
\q
\v 9 Pe dok bibedo calo gicikke ma yam aketo ki kwarogi ca, i kare ma yam amako kwede ciŋgi, ci akwanyogi woko ki i lobo Ejipt; pien gin yam pe gulubo gicikkena, omiyo an bene atenyogi woko ata, man lok pa Rwot.
\q
\v 10 Man aye gicikke ma abiketo ki jo me doggola pa Icrael ka kare meno oromo, Rwot ma awaco: Abiketo cikka ducu i tamgi, abicoyo bene bedo i cwinygi. An abibedo Lubaŋagi, gin gibedo jona.
\q
\v 11 ŋat mo doŋ pe bipwonyo lutugi, dok ŋat mo bene pe biwaco ki ominne ni, ‘ŋe Rwot,’ pien gin ducu gibiŋeya, cakke ki i kom jo matino ma i kingi, o kwede wa i kom jo madito.
\q
\v 12 Pien abitimo botgi kica i timgi maraco ducu, pe dok abipo i kom balgi mo kadi ki acel.”
\p
\v 13 Ka oloko pi gicikke manyen, en tamo pi gicikke mukwoŋo ca macalo gin ma karene okato woko. Gin ma karene doŋ okato, ma oti woko bene, noŋo doŋ cok rwenyo.
\c 9
\cl Chura 9
\p
\v 1 Kadi gicikke mukwoŋo ca bene yam obedo ki cik mogo me woro Lubaŋa, dok bene obedo ki kabedo mo maleŋ me lobo man.
\v 2 Pien yam tye kema ma giyubo, ma obedo ki dul acel yo tuŋ woko ma gilwoŋo ni Kabedo Maleŋ, ma tye iye okar-mac, ki meja, ki mugati ma giketo i nyim Lubaŋa.
\v 3 I ŋe boŋo kicika me aryo yam tye iye kema ma gilwoŋo ni Kabedo Maleŋ Makato Ducu.
\v 4 Keno tyer ma gitiyo ki jabu tye iye kunnu me waŋo odok eceta, ki canduk me gicikke ma gimwono kome woko ki jabu. I canduk me gicikke yam tye iye abino jabu ki manna ki odoo pa Aron ma yam olot-ti, ki got ma apada aryo ma ceŋ gicoyo iye lok me gicikkene.
\v 5 Ka wi canduk yam tye iye lukerubi me deyo, ma guumo kom me kica woko ducu ki bwomgi. Jami magi pe gitwero loko gin mo iye kikore kombeddi.
\p
\v 6 Meno aye kit ma yam giyubo kwede. Ajwagi yam gidonyo i kema jwijwi teretere ka cobo ticgi me woro Lubaŋa.
\v 7 Ento kema me aryo ajwaka madit keken aye donyo iye kene, dok bene donyo iye kicel keken i mwaka acel acel, kun pe cito kunnu laboŋo remo, ma en tero me atyera pi balle ki pi bal pa lwak.
\v 8 Man aye ma miyo Cwiny Maleŋ nyuto ka maleŋ ni, yo me donyo i kabedo maleŋ peya giyabo ka kema mukwoŋo ma woko ca pud ocuŋ.
\v 9 Man aye lanyut me cal me kare man. Man te lokke ni, mot ki gitum ma gityero bot Lubaŋa pe twero miyo ŋat mo ma woro Lubaŋa doko dano ma cwinye leŋ,
\v 10 pien gitiko ka cam ki mat ki kit lwok mapatpat. Magi ducu gubedo cik ma nen ki woko me kom ma tye ka tic nio wa i kare ma Lubaŋa biloko jami ducu bedo manyen.
\p
\v 11 Ento ka Kricito doŋ obino, ma en aye ajwaka madit me jami mabeco ma bibino, kema ma en tiyo iye kato maca, odoko dit maber makato maca, pien pe gitiyo ki ciŋ, man te lokke ni, pe gin me lobo man.
\v 12 En odonyo i Kabedo Maleŋ Makato Ducu kicel keken ma doŋ otyeko lok woko ducu, kun pe otero remo dyegi ki remo litino twoni, ento otero remone kikome, ci okokowa kwede doŋ matwal.
\v 13 Remo dyegi ki twoni, ki buru roya ma giwaŋo, ka gikiro i kom jo mubalo kwer, romo lonyogi, kun lwoko komgi bedo maleŋ.
\v 14 Remo pa Kricito pe kato maca mada? Pi Cwiny Maleŋ ma bedo matwal, omiyo en omine kene bot Lubaŋa kun roc mo pe i kome, pi lonyo cwinywu ma onoŋo ocido woko macol licuc pi tiyo tic ma kwo pe iye, wek wubed ma iwu leŋ, ka doŋ wawor Lubaŋa makwo.
\p
\v 15 Pi meno Kricito aye ŋat muyubo gicikke manyen, wek emi jo ma gilwoŋo gunoŋ lim ma ri nakanaka ma Lubaŋa ociko me miyone; pi to ma yam onen, omiyo jo ma yam gikalo wi cik i te gicikke mukwoŋo kombeddi doŋ gikokogi woko.
\v 16 Pien ka ma gicikke me leyo lim tye iye, myero koŋ gimok ni, ŋat muciko doŋ oto.
\v 17 Kodi gicikke meno twero tic lacen i ŋe to keken; pe tye ki twer mo ka ŋat muciko pud kwo.
\v 18 Pi meno kadi wa gicikke mukwoŋo ca gimoko ki remo.
\v 19 Pien i kare ma yam Moses otyeko tito bot lwak gin ma giciko ducu ma tye i i cik, en okwanyo remo roci dyaŋ ki dyegi, kacel ki pii, ki yer romo makwar, ki yat anyero, okiro i kom buk kikome, ki i kom lwak ducu bene,
\v 20 kun waco ni, “Man aye remo me gicikke ma Lubaŋa ocikowu pire.”
\v 21 Dok i yo acel-lu, Moses okiro remo i kom kema ki jami ducu ma gitiyo kwedgi me woro Lubaŋa.
\v 22 I te cik, nen calo jami ducu gilonyo woko ki remo; ka ma pe gioyo iye remo, weko bal bene bedo pe iye.
\p
\v 23 Onoŋo oporre kakare pi jami ma obedo lapor keken me gin ma tye i polo myero gilonygi gubed leŋ kit meno, ento jami me polo kikomgi myero olony ki gitum mabeco makato magi-gu ducu.
\v 24 Pien Kricito pe odonyo i kabedo maleŋ ma dano otiyo ki ciŋ, ma obedo lapor ki kabedo maleŋ me adane, ento odonyo i polo kikome, ma i kare man en tye ka nen kunnu i nyim Lubaŋa piwa.
\v 25 Dok bene en pe odonyo me mine kene kare ki kare calo ajwaka madit ma donyo i kabedo maleŋ mwaka ki mwaka, kun tero remo ma pe remone kikome.
\v 26 Ka nene obedo kit meno, kono en onwoyo to kare ki kare cakke i acakki piny. Ento kit ma tye kwede-ni, en onen kicel keken i agikki me kare wek ekwany bal woko pi mine kene macalo gitum.
\v 27 Dok kit macalo giyubo ni, dano to kicel, ka doŋ ki i ŋeye ŋolo kop cakke,
\v 28 kit meno Kricito bene otyerre kene kicel me tiŋo bal pa jo mapol, dok binen tyen me aryo, pe doŋ pi tic i kom bal, ento pi laro jo ma tye ka kure.
\c 10
\cl Chura 10
\p
\v 1 Cik pa Moses gire tye iye tipo keken me jami mabeco me kare me anyim, pe calgi kikome. Pi cik dano gibedo ka kelo gitum ma kitgi acel nakanaka, mwaka ki mwaka; en doŋ pe tye ki twero mo matwal me loko jo ma bino bot Lubaŋa gudok jo mabeco muteggi.
\v 2 Ka nene tye kit meno, kono gitum pe doŋ ogik woko? Kono jo ma woro Lubaŋa doŋ gilwoko balgi woko matwal, kono pe dok gimedde me bedo ki kit ŋec mo i cwinygi ni gin lubalo.
\v 3 Ento gitum magi bedo ka poyo wi dano i balgi mwaka ki mwaka.
\v 4 Pien remo twoni ki remo dyegi pe twero kwanyo bal woko wacel.
\p
\v 5 Pi lok man, i kare ma Kricito obino i lobo, en oloko ni, “In giri pe imito gitum kadi gityer, ento iketo koma tye.
\q
\v 6 Ii pe obedo yom pi gitum awaŋa ki gitum ma gityero pi bal.
\q
\v 7 Ka doŋ awaco ni, ‘An a ene, doŋ abino ka cobo mitini, in Lubaŋa,’ macalo yam gicoyo i koma i buk adola.”
\p
\v 8 Mukwoŋo en oloko ni, “In pe imito gitum, kadi mot ma gityero, nyo gitum awaŋa ki gitum pi bal, cwinyi bene pe yom iye,” ma gin jami ma gityero pi cik.
\v 9 Ka dok oloko ni, “An a ene, doŋ abino ka cobo mitini.” Ojwayo mukwoŋone-ni woko wek omi ekel me aryone.
\v 10 Doŋ pi mitine meno, omiyo gilonyowa wadoko leŋ pi Yecu Kricito mumiyo kome ma ka gitum kicel keken ma otyeko lok woko ducu.
\p
\v 11 Ajwaka acel acel cuŋ i dog ticce nino ducu kun tyero kit gitum acel-lu kare ki kare ma pe tye ki twero mo matwal me kwanyo bal.
\v 12 Ento Kricito yam otyero gitum acel keken pi bal, pi kare ducu, ka doŋ obedo piny i ŋet Lubaŋa tuŋ acuc i kabedo me deyo.
\v 13 Nia wa i kare ca en tye ka kuro nio ka gimiyo lukworre doko kom laten tyene,
\v 14 pien gitumme acel-lu omiyo jo ma en olonyogi bedo leŋ gudoko jo mabeco muteggi matwal.
\v 15 Cwiny Maleŋ bene omiyo cadenne botwa, pien ka doŋ oloko ni,
\v 16 “Man aye gicikke ma abiketo ki jo me doggola pa Icrael, ka kare meno okato, man lok pa Rwot: Abiketo cikka ducu i cwinygi, kun acoyo bedo i tamgi.”
\p
\v 17 ka dok omedde kun loko ni, “Pe dok abipo i kom balgi ki timgi maraco.”
\p
\v 18 Ka ma weko bal tye iye, gitum mo pi bal doŋ pe mitte.
\p
\v 19 Pi meno, utmegina, wan doŋ watye ki yo me donyo i kabedo maleŋ ki tekcwiny pi remo pa Yecu.
\v 20 En oyabo botwa yo manyen, yo makwo, me donyo i ŋe boŋo kicika; yo meno aye en kome.
\v 21 Kit macalo doŋ watye ki ajwaka madit ma loyo ot pa Lubaŋa.
\v 22 myero doŋ wanyiku cok bot Lubaŋa ki cwiny me ada, kun niye bene doŋ odonyo matut i cwinywa, ma doŋ cwinywa leŋ, pien ŋec me gin maraco ma yam watimo doŋ gikwanyo woko, dok bene komwa doŋ gilwoko woko ki pii maleŋ.
\v 23 Wamoku matek likiŋ i gen ma watuco, laboŋo tagge atata, pien ŋat ma ocikowa-ni lagen.
\v 24 Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco,
\v 25 kun pe waweko cokke kacel, kit macalo jo mogo doŋ guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca doŋ tye ka nyiko cok-ki.
\p
\v 26 Pien ka watimo bal akaka ma doŋ noŋo watyeko limo ŋec i kom lok me ada, gitum mo pe dok odoŋ ma gityero pi balwa.
\v 27 Odoŋ kuro ŋolo kop keken kun watye ki lworo madwoŋ, ki mac mager ma bityeko dano ma gipyem ki Lubaŋa.
\v 28 Dano ma pe lubo cik pa Moses gineko aneka laboŋo kica mo, ka ce lok oloye i nyim caden aryo nyo adek.
\v 29 Doŋ wutamo ni can ma rom mene ma gibiketo i kom ŋat ma ocayo Wod pa Lubaŋa, dok ma opyedo remo me gicikke pa Lubaŋa ma gilonye kwede me bedo maleŋ, dok ma oŋalo Cwiny Maleŋ me kica pa Lubaŋa?
\v 30 Pien wan waŋeyo ŋat ma oloko ni, “An aye abiculo kwor, abiculo waŋe lacen,” dok ni, “Rwot biŋolo kop i kom jone.”
\v 31 Bedo gin me lworo twatwal me poto i ciŋ Lubaŋa makwo.
\p
\v 32 Ento koŋ doŋ wupo i kare mukato, kit ma yam wuciro kwede, kun wulwenyo ki lwak cam madwoŋ, i kare ma doŋ ceŋ pa Lubaŋa otyeko ryeny omenyowu.
\v 33 Kare mukene yam giyetowu dok giunowu i nyim lwak, kare mukene bene wuribbe ki jo ma gitimogi kit meno.
\v 34 Pien kica yam omakowu i kom mabuc, dok bene cwinywu obedo yom kadi giyako jamiwu, pien wun kikomwu onoŋo doŋ wuŋeyo ni wutye ki jami mukene mabeco makato magi, dok ma ri nakanaka.
\v 35 Pi meno pe wubwot tekcwiny woko, pien tye ki bakacic madit ma wubilimo.
\v 36 Mito wubed kun wuciro, wek omi wuti gin ma Lubaŋa mito, ci doŋ wunoŋo gin ma yam en ociko pire.
\v 37 Macalo yam en oloko ni, “Odoŋ kare manok mo, ci ŋat ma bino ca bibino woko oyotoyot ma pe bigalle.
\q
\v 38 Doŋ danona ma kite atir bibedo kwo pi niye; ento ka odok woko cen, cwinya pe bibedo yom i kome.”
\p
\v 39 Ento wan pe watye i kin jo ma dok cen, ka girwenyo woko matwal-li; wan watye i kin jo ma gitye ki niye, ma en aye doŋ gwoko kwogi.
\c 11
\cl Chura 11
\p
\v 1 Niye aye ma moko gin ma dano geno, en gin ma niaŋowa maber ni, jami ma pe gineno komgi gitye.
\v 2 Pire omiyo Lubaŋa opwoyo jo macon.
\v 3 Pi niye waniaŋ ni, Lubaŋa yam oketo lobo kulu ki lokke, mumiyo gin ma nen gitiyo nia ki i kom gin ma pe nen.
\p
\v 4 Pi niye Abel otyero gitum maber ma kato pa Kain woko bot Lubaŋa; meno omiyo gipwoye ni kite atir, kun Lubaŋa aye obedo cadenne pi gamo motte. En oto, ento pi niyene omiyo pud loko.
\p
\v 5 Pi niye Enoka yam gitiŋo gitero woko malo wek pe obil to. Pe gimedo ki noŋone, pien Lubaŋa onoŋo doŋ otere woko. I kare ma pud peya gitere, gimiyo lok me caden i kome, ni oyomo cwiny Lubaŋa.
\v 6 Laboŋo niye pe twerre me yomo cwinye, pien ŋat ma mito nyiko cok bot Lubaŋa myero oye ni en tye ada, dok bene ni en miyo bakacic bot jo ma yenye.
\p
\v 7 Pi niye Nua bene, ka Lubaŋa ociko en pi gin ma peya onen, owinyo doge, ka doŋ opayo yeya pi laro jo me ode. Niyene-nu omiyo kop oloyo lobo, omiyo en onoŋo kit ma atir ma bino pi niye.
\p
\v 8 Pi niye Abraim owinyo dog Lubaŋa i kare ma olwoŋe me cito i lobo mo mukene ma onoŋo yam en mito miye ni obed mere. En oa ki i lobo tugi kun pe ŋeyo ka ma ecito iye.
\v 9 Pi niye omiyo en obedo macalo welo i lobo ma yam Lubaŋa ociko pire, macalo ebedo i lobo pa lurok, kun bedo i kema gin ki Icaka ka Yakobo, ma gin bene gimiyogi kit cikke acel-lu.
\v 10 Pien en onoŋo tye ka kuro gaŋ ca ma tye ki gutine ducu matek, ma Lubaŋa aye obedo ŋat mugoyo calle, ki lagedone kikome.
\v 11 Pi niye omiyo Cara onoŋo teko me yac, kadi bed mwaka me nywalle onoŋo doŋ okato woko. Man otimme pien en otamo ni, ŋat ma ociko-ni genne.
\v 12 Man omiyo i kom laco acel, ma yam rom ki ŋat muto, oa iye lwak likwayo mapol ata calo lakalatwe me polo, ki dok calo kweyo me dog nam ma kwanone loyo dano woko-ni.
\p
\v 13 Jo magi ducu guto i kom niye, ma pud peya gimiyogi gin ma ceŋ Lubaŋa ociko pire, ento guneno anena ki ka mabor, gumoto ki kunnu, dok bene gutuco ni gin gibedo macalo lurok dok welo i wi lobo.
\v 14 Pien jo ma loko lok kit meno ginyuto ka maleŋ ni gitye ka yenyo lobo tugi kikome.
\v 15 Ka kono nene gubedo ka tamo pi lobo ma yam gin gua ki iye ca, kono gunoŋo yo me dok cen iye.
\v 16 Ento gin gitye ka paro pi lobo maber makato maca ca woko, en aye pacogi ma i polo. En meno gin mumiyo lewic pe mako Lubaŋa ka ce gilwoŋe ni Lubaŋagi, pien en doŋ otyeko yubo botgi gaŋ.
\p
\v 17 Pi niye Abraim, ka yam giteme, otyero Icaka macalo gitum bot Lubaŋa; ŋat ma Lubaŋa ocikke bote oyubbe me tyero wode acel keken macalo gitum bot Lubaŋa,
\v 18 ma yam giloko pire ni, “Litino pa Icaka aye gibilwoŋogi ni likwayu.”
\v 19 En onoŋo otamo ni, Lubaŋa tye ki twero me cero dano ki i kin jo muto; dok bene gitwero waco ni Icaka odwogo i ciŋ Abraim calo oa ki i kin jo muto.
\p
\v 20 Pi niye Icaka olamo gum i kom Yakobo ki Ecau pi kare me anyim.
\p
\v 21 Pi niye Yakobo bene, ka doŋ to, olamo gum i kom litino pa Yucepu, kun lamo i kom latin acel acel, ma okulo wiye i wi odoo me komone, me woro Lubaŋa.
\v 22 Pi niye Yucepu, i agikki me kwone, oloko pi a pa jo Icrael ki i Ejipt, ka doŋ ociko pi kit macalo myero gibiyike kwede.
\p
\v 23 Pi niye, ka yam ginywalo Moses, lunyodone gukane pi dwe adek kun pe gulworo cik pa kabaka, pien onoŋo guneno ni latin ca ber mada.
\v 24 Pi niye Moses, ka doŋ odoŋo, pe oye ni myero gilwoŋe ni en e wod pa nya pa Parao,
\v 25 kun oyero me neno can kacel ki jo pa Lubaŋa ma ka bedo ki yomcwiny me bal ma ri pi kare manok mo keken-ni.
\v 26 En otamo ni yet ma giciro pi Kricito obedo lonyo madit makato lonyo ducu ma tye i Ejipt, pien onoŋo ociko waŋe kun neno mot me kare me anyim.
\v 27 Pi niye Moses oa woko ki i Ejipt kun pe lworo kiniga pa kabaka; ociro matek, macalo en neno Lubaŋa ma pe nen.
\v 28 Pi niye bene omiyo en okwero nino madit me Kato, dok okiro remo, wek omi lanek litino kayo pe ogudgi.
\p
\v 29 Pi niye jo Icrael guŋolo Nam Makwar macalo giwoto ki i wi ŋom mutwo; ento jo Ejipt gumwony woko liweŋ i nam i kare ma gin bene gutemo me kato kit meno.
\p
\v 30 Pi niye omiyo cel me Jeriko orette opoto woko piny ma doŋ jo Icrael gurumo pi nino abiro.
\p
\v 31 Pi niye Rakab ma obedo malaya pe oto kacel ki jo ma pe gubedo luwiny, pien onoŋo en yam ojolo lurot-piny ki kuc.
\p
\v 32 Gin aŋo makato meno ma dok amedde me lokone? Pien kare aye bibedo nok bota me tittiwu pi Gideon, Barak, Samson, Jeputa, Daudi, Camuel ki lunebi-gu,
\v 33 ma gin bene pi niye omiyo gulwenyo ki luker me lobo mapatpat, guloyogi, gutiyo gin ma tye atir, gunoŋo gin ma yam Lubaŋa ociko pire. Gutweyo dog labwor-gu woko,
\v 34 guneko mac mager woko, gubwot ki i lak pala lucwan. Gorogi olokke odoko tekkom, gudoko jo matek i lweny, guryemo mony pa lurok woko.
\v 35 Mon gunoŋo danogi ma yam guto ma doŋ gucer woko. Jo mukene gigoyogi marac, guto kun gukwero ni pe gigonygi, wek gibicer i kwo maber makato.
\v 36 Jo mukene giŋalogi, gipwodogi, gitweyogi ki nyor ci giketogi i mabuc.
\v 37 Gicelogi ki got, giŋuno igi woko i dul aryo ki mucumeno, ginekogi ki pala lucwan. Gin guloŋo piny kun guruko laa romi ki laa dyegi, ma noŋo can oketo komgi woko, dano ounogi dok gitimogi ki tim maraco.
\v 38 Kit jo macalo meno lobo pe romo bedo kwedgi. Gubedo ka wot awota atata i tim, ki i wi godi, kun gibedo i boro ki bur mugwarre matut piny i ŋom.
\p
\v 39 Jo magi giŋene maber pi niyegi, ento pe gumedo ki noŋo gin ma yam Lubaŋa ociko pire,
\v 40 pien onoŋo Lubaŋa oyubo gin mo maber makato kun otamo piwa, ni meno, gin pe myero gudok jo mabeco muteggi laboŋo wan.
\c 12
\cl Chura 12
\p
\v 1 Doŋ kit macalo watye ki lwak caden mapol ma rom meno ma orumowa woko dyere, myero koŋ doŋ wabolu gin mogo mapek-gu woko ducu, ki bal ma maro tweyowa woko likiŋ, wek wariŋu doŋ ŋwec pyem ma tye i nyimwa, kun waciro bene peko ma tye iye.
\v 2 Wanenu Yecu ma en aye latel wiwa i lok kom niye, en ŋat ma ocobo niyewa kakare. Pi yomcwiny ma giketo i nyime en yam ociro yatariya, kun ocayo lewic ma giketo i kome; ento kombeddi doŋ obedo piny i kabedo me deyo yo tuŋ acuc me komker pa Lubaŋa.
\p
\v 3 Wubed ki tam i kome, ki kit ma en ociro kwede adagadaga marac twatwal ki bot lubalo, wek pe wuol, ki cwinywu pe opoti.
\v 4 I lwenywu ma wulwenyo ki bal pud peya wulwenyo wuo wa i oyo remowu.
\v 5 Nyo wiwu owil woko ce i coc ma yam gicoyo me cuko cwiny dano, ma en loko kwedwa iye macalo litinone? Ni meno, “Latinna, pe ica pwony pa Rwot; ka en ogoyi, pe cwinyi opoti.
\q
\v 6 Pien Rwot pwonyo jo ma en maro, pwodo latin acel acel ma en gamo.”
\p
\v 7 Myero wucir matek, wek opwonywu. Lubaŋa tye ka tic kwedwu macalo litinone. Latin mene ma pe wonne pwonyo?
\v 8 Ka ce owekowu laboŋo pwonyowu macalo litinone mukene ducu, nyuto ni wun doŋ litino luk, pe litinone kikome.
\v 9 Kit meno wan watye ki wegiwa me lobo man ma yam gupwonyowa, wan bene waworogi. Pe doŋ myero wamine makato i te loc pa Wonwa me cwiny wek wabed kwo?
\v 10 Pien gin yam gupwonyowa pi kare manok mo keken i kit ma gin guneno ni ber, ento Lubaŋa pwonyowa pi konyowa, wek omi wadok jo maleŋ macalo en.
\v 11 Kit pwonnye ducu, ka pud watye iye, pe watamo obedo me yomcwiny, ento me kumo, ento i ŋeye lacen kelo kuc keken bot jo ma guyelle iye, pien noŋo doŋ gudoko jo ma kitgi atir.
\p
\v 12 Pi meno, wutiŋ badwu mukwe-ni malo, wurye coŋwu magoro,
\v 13 wuyub yo ma tyenwu lubo ocuŋ atir, wek ŋat ma tyene oŋol pe dok tyene oputte woko liweŋ ki i waŋ mwot, ento myero ocaŋ woko acaŋa.
\v 14 Wuket tek me bedo ki kuc ki jo ducu, ki me bedo jo maleŋ; pien ŋat ma pe leŋ pe bineno Rwot.
\v 15 Wugwokke kun wuneno maber ni ŋat mo pe opoto ka gamo kica pa Lubaŋa. Wunen ni ŋat mo pe obedo macalo lwit yat makec ma ka otwi ci kelo ayela, dok balo jo mapol.
\v 16 Wunen ni ŋat mo pe obed latim abor, nyo dano ma pe lworo Lubaŋa calo Ecau, ma yam ocato ditte me anywalli me bedo latin kayo pi cam me tyen acel keken.
\v 17 Pien wuŋeyo ni, lacen ka en omito ni wonne olam gum i kome, ento wonne okwere woko, kadi bed onoŋo mito ma kok ki pig waŋe, pien en yam pe onoŋo yo me ŋut i gin ma otimo.
\p
\v 18 Pien wun pe wubino i gin ma gitwero gudo kome, ki mac ma yam olyel i wi got Cinai, ki colpiny me mutu ma ocido woko licuc, ki yamo lapiru matek,
\v 19 ki koko tum, ki dwan ŋat ma tye ka lok. Jo ma guwinyo lokke gubako doggi mada ni pe dok gimed loko botgi lok mo,
\v 20 pien gin pe gitwero ciro cik ma giketo, ni meno, “Kadi ki lee mo ka ogudo got, myero gicel ki gweŋ ginek woko.”
\v 21 Gin munen kunnu obedo marac twatwal ma miyo dano lworo, man omiyo Moses owaco ni, “Lworo omaka adada ma koma myel amyela.”
\v 22 Ento wun wubino i got me Cion, ki gaŋ pa Lubaŋa makwo, Jerucalem me polo, ki bot lwak lumalaika ma welgi pe kwanne ma gucokke kacel ka woro Lubaŋa.
\v 23 ki i cokke pa litino kayo ma gicoyo nyiŋgi i polo, ki bot Lubaŋa ma en laŋolkop pa dano ducu, ki bot tipo pa jo ma kitgi atir, ma doŋ gimiyo gudoko jo mabeco muteggi,
\v 24 ki bot Yecu, layub gicikke manyen, ki bot remo ma gikiro, ma tito ki kica pi gin maber ma kato gin ma remo pa Abel otito pire.
\p
\v 25 Wugwokke pe wukwer winyo lok pa ŋat ma tye ka lok. Jo ma yam gukwero winyo lok pa ŋat mucikogi i wi lobo pe gubwot. Wan kono wabibwot niŋniŋ, ka wakwero winyo lok pa ŋat ma tye ka cikowa ki i wi polo kulu-ni?
\v 26 I kare maca, dwane oyeŋo Iobo; ento kombeddi en ociko ni, “Odoŋ kicel, pe doŋ abiyeŋo lobo keken, ento abiyeŋo wa polo bene.”
\v 27 Lok man ni, “Odoŋ kicel,” nyuto ni, gibikwanyo gin ma yeŋŋe woko, meno ginaketa, ka gin ma pe yeŋŋe cako doŋ.
\v 28 Pi meno myero wapwoyu Lubaŋa, pien doŋ wanoŋo ker ma pe twero yeŋŋe, dok bene myero waworu Lubaŋa i yo ma twero yomo cwinye, kun bene wamiye deyo ki lworo,
\v 29 pien Lubaŋa-wa en aye mac ma waŋo piny.
\c 13
\cl Chura 13
\p
\v 1 Wumedde ki mar i kinwu kekenwu macalo omego.
\v 2 Wiwu pe owil ka jolo welo, pien jo mogo ma yam gugwoko welo onoŋo gugwoko lumalaika i pacogi kun pe giŋeyo.
\v 3 Wupo pi jo ma tye i mabuc calo wutye kacel kwedgi i mabuc kunnu. Wupo bene pi jo ma gitimogi ki tim marac, kit macalo wun bene wutye i kom.
\p
\v 4 Jo ducu myero guket deyo i kom nyom, dok kitanda pa jo ma gunyomme myero giwor obed maleŋ; pien Lubaŋa biŋolo kop i kom lutim tim me abor ki jo ma balo nyomgi.
\v 5 Pe wubed jo ma maro lim; jami ma wutye kwede myero oromwu, pien Lubaŋa yam oloko ni, “Pe abiboli, pe abibwoti ata.”
\p
\v 6 En meno gin mumiyo cwinywa tek, kun wawaco ni, “Rwot en lakony mera, pe abibedo ki lworo; ŋo kono ma dano twero timo i koma?”
\p
\v 7 Wupo i kom lutel wiwu macon, ma yam gitittiwu lok pa Lubaŋa. Wutam pi kwogi ki gin maber ma oa iye, ka doŋ wulub niyegi.
\v 8 Yecu Kricito gire kite tye acel keken laworo ki tin ki nino ma pe tum.
\v 9 pe wuwek pwony mogo mapatpat dok ma welo gurwenywu woko; ber kica pa Lubaŋa aye mumi teko i cwinywa, pe pi cik me cam mogo ma dano ma gulubo pe gunoŋo iye kony mo.
\p
\v 10 Watye ki keno tyer ma lutic i kema macon ca pe gitye ki twero mo me cam iye.
\v 11 Pien lee ma yam ajwaka madit tero remogi i kabedo maleŋ me bedo gitum pi bal, komgi yam giwaŋo woko cen i ŋe gony.
\v 12 Kit meno bene Yecu yam oto cen woko i ŋe dogcel, wek omi elony dano ki remone kikome gubed maleŋ.
\p
\v 13 Pi meno myero wacitu bene woko i ŋe gony, kun waciro anywar pire;
\v 14 pien kany pe watye ki gaŋ mo ma ri nakanaka, ento watye ka yenyo gaŋ ma tye anyim ma cok bino.
\p
\v 15 Doŋ wamiyu pakwa bot Lubaŋa i kare ducu macalo gitum ma gityero bot Lubaŋa, kun wawok ki bot Yecu; meno aye pwoc ma wamiyo ki dogwa ka watuco nyiŋe.
\p
\v 16 Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubaŋa.
\p
\v 17 Wuwiny lok pa jo ma telowu, dok wumine i te locgi, pien gin gitye ka gwoko tipowu laboŋo yweyo macalo jo ma Lubaŋa bipenyogi pi ticgi. Wumi guti ticgi ki yomcwiny, ma pe wumiyogi peko mo, pien meno pe konyowu kadi ki acel.
\p
\v 18 Wuleg Lubaŋa piwa, pien wan waŋeyo ada ni cwinywa gire leŋ, dok wamito ni wati gin maber i kare ducu.
\v 19 Amedo cuko cwinywu ni wuleg Lubaŋa, wek odwoka botwu oyotoyot.
\p
\v 20 Lubaŋa won kuc ma ocero Rwotwa Yecu Kricito ki i kin jo muto, ma en aye lakwat romi madit, pi remo me gicikke ma ri nakanaka,
\v 21 en myero omiwu gin ducu mabeco ma mitte, wek wuti wucob gin ma en mito; dok bene pi Yecu Kricito myero en oti kwedwa gin ma yomo cwinye. Deyo obed bot Yecu Kricito nakanaka. Amen.
\p
\v 22 Utmegina, alegowu ni wudi cwinywu i lokka ma acoyo manoknok mo-ni ma acuko kwede cwinywu.
\p
\v 23 Myero wuŋe ni ominwa Temceo doŋ gigonyo woko; wabibino kwede ka nenowu, ka ce orune obino oyot.
\p
\v 24 Wumot lutelwu ducu, ki jo pa Lubaŋa bene ducu. Jo mua ki i Itali gumotowu.
\p
\v 25 Kica pa Lubaŋa doŋ obed kwedwu ducu.